Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - суббота, 24 iюня 2017 г. Сейчасъ на порталѣ посѣтителей - 22.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Ное́мврія въ 4-й де́нь.
Преподо́бнаго отца́ на́шего Іоанни́кія Вели́каго. И свята́го му́ченика Ника́ндра, епи́скопа Мѵ́рскаго, и Ерме́я пресви́тера.

[ВЕЧЕРЪ,]
На Го́споди воззва́хъ: стихи́ры на 6. Преподо́бнаго 3, гла́съ 4. Подо́бенъ: Зва́нный свы́ше.

Иже свѣ́томъ* облиста́нъ Боже́ственнымъ,* егда́ чистото́ю ума́ воззрѣ́лъ еси́,* и подо́бно разсуди́въ не стоя́щихъ,* вѣ́чно бу́дущая,* тогда́ о́гнь въ се́рдцы, о́тче, пріе́мъ,* еле́ни подо́бно разже́глся еси́* Боже́ственною любо́вію* и, забы́въ пло́ть и кро́вь,* угото́вился еси́ къ подвиго́мъ по́стническимъ,* и́хже ра́ди тѣле́сныя стра́сти* души́ твое́й покори́лъ еси́.

На восхожде́ніе* боже́ственныхъ го́ръ высоты́ всели́лся еси́,* не смиря́емь смире́ннаго сего́ тѣлесе́* ну́ждами, о́тче, бѣ́дными, Іоанни́кіе.* Бдѣ́нными стоя́ніи* и вседне́вными моли́твами Благо́му сочета́вся,* просвѣти́лся еси́* и проро́чества прія́лъ еси́ да́ръ* зрѣ́ти да́льняя, я́ко бли́жняя,* и предглаго́лати вѣ́рнымъ бу́дущая.* Тѣ́мъ, я́ко боже́ственнаго* учи́теля, тя́ сла́вимъ.

Де́монская стремле́нія и стрѣ́лы* крѣ́пко притупи́лъ еси́* воображе́ніи моли́твъ* и на тѣ́хъ взя́лъ еси́ побѣ́ды* Бо́жіею си́лою, достосла́вне.* Отсю́ду по́чести тебѣ́, о́тче,* чуде́съ Благíй дарова́,* смире́ніемъ упоко́ився се́рдца твоего́.* Тѣ́мже и мѵ́ро благово́нное* твоя́ честны́я источа́ютъ мо́щи:* благово́ніе бо яви́лся еси́* Христо́во, Іоанни́кіе.

Ины стихи́ры му́ченика, гла́съ 2. Подо́бенъ: Егда́ отъ дре́ва.

Зва́ніе тезоиме́нное пріе́мъ отъ Боже́ственнаго про́мысла, сіе́ вещми́, о́тче, зна́менавъ, утверди́лъ еси́: ра́тныхъ бо мно́жества и собо́ръ мучи́телей въ терпѣ́ніи твое́мъ побѣди́лъ еси́. Тѣ́мъ вѣне́цъ побѣ́ды пріе́мъ, вѣ́рою взыва́лъ еси́: сла́ва непобѣди́мѣй держа́вѣ Твое́й, Человѣколю́бче.

Мѵ́ра благово́ннѣйшая на́мъ врачева́ній источа́еши дне́сь, Ника́ндре, въ боже́ственнѣй па́мяти твое́й, и отго́ниши, му́дре, мглу́ скорбе́й и стра́сти тѣле́сныя, и бога́тыя благода́ти исполня́еши собо́ръ всѣ́хъ, вопію́щихъ Христу́: Ты́ еси́ неистоще́нное мѵ́ро, благоуха́ющее пою́щія Тя́.

Имѣ́я дерзнове́ніе ко Христу́, прославля́емому еди́ному во святы́хъ Его́, Того́ моли́, преподо́бне Ника́ндре, о всѣ́хъ, любо́вію соверша́ющихъ твою́ па́мять и восхваля́ющихъ твоя́ исправле́нія, я́ко да неизрече́нныхъ о́ныхъ бла́гъ и нетлѣ́нныя сла́вы о́бщницы бу́демъ благода́тію.

Сла́ва, гла́съ 6:

Преподо́бне о́тче, во всю́ зе́млю изы́де вѣща́ніе исправле́ній твои́хъ, тѣ́мъ на небесѣ́хъ обрѣ́лъ еси́ мзду́ трудо́въ твои́хъ. Де́монскія погуби́лъ еси́ полки́ и а́нгельскія дости́глъ еси́ чи́ны, и́хже житію́ безъ поро́ка поревнова́лъ еси́, дерзнове́ніе имѣ́я ко Христу́ Бо́гу, ми́ръ испроси́ душа́мъ на́шимъ.

И ны́нѣ, богоро́диченъ или́ крестобогоро́диченъ. Подо́бенъ: Тридне́венъ.

Ви́дящи Тя́ распина́ема, Христе́,* Тебе́ Ро́ждшая вопія́ше:* что́ стра́нное, е́же ви́жу, та́инство, Сы́не Мо́й?* Ка́ко на дре́вѣ умира́еши, пло́тію повѣ́шенъ,* жи́зни Пода́телю?

На стихо́внѣ окто́иха. Сла́ва, гла́съ 8. Самогла́сенъ:

Мона́ховъ мно́жества наста́вника тя́ почита́емъ, о́тче на́шъ Іоанни́кіе, твое́ю бо стезе́ю вои́стинну пра́во ходи́ти позна́хомъ. Блаже́нъ, еси́, Христу́ рабо́тавъ, и вра́жію обличи́лъ еси́ си́лу, а́нгеловъ собесѣ́дниче, преподо́бныхъ соприча́стниче и пра́ведныхъ: съ ни́миже моли́ся Го́сподеви поми́ловатися душа́мъ на́шимъ.

И ны́нѣ, богоро́диченъ или́ крестобогоро́диченъ. Подо́бенъ: О, пресла́внаго чудесе́!

Тя́ ви́дящи, пригвожда́ема* на Крестѣ́, Іису́се,* и Стра́сти пріе́млюща во́лею,* Дѣ́ва и Ма́ти Твоя́, Влады́ко, —* увы́ Мнѣ́, — вопія́ше, — Ча́до сла́дкое,* ра́ны непра́ведно ка́ко терпи́ши,* Врачу́, исцѣли́вый человѣ́ческое неможе́ніе* и отъ тли́ всѣ́хъ изба́вивый* милосе́рдіемъ Твои́мъ?

Тропа́рь, гла́съ 8:

Сле́зъ твои́хъ тече́ньми пусты́ни безпло́дное воздѣ́лалъ еси́, и, и́же изъ глубины́ воздыха́ньми, во сто́ трудо́въ уплодоноси́лъ еси́, и бы́лъ еси́ свѣти́льникъ вселе́ннѣй, сія́я чудесы́, Іоанни́кіе, о́тче на́шъ, моли́ Христа́ Бо́га спасти́ся душа́мъ на́шимъ.

Сла́ва, гла́съ 4:

Му́ченикъ Тво́й, Го́споди, Ника́ндръ, во страда́ніи свое́мъ вѣне́цъ прія́тъ нетлѣ́нный отъ Тебе́, Бо́га на́шего, имѣ́яй бо крѣ́пость Твою́, мучи́телей низложи́, сокруши́ и де́моновъ немощны́я де́рзости. Того́ моли́твами спаси́ ду́ши на́ша.

[И ны́нѣ, богоро́диченъ или́ крестобогоро́диченъ.]



НА УТРЕНИ,
[На Бо́гъ Госпо́дь: Тропа́рь преподо́бнаго, два́жды. Сла́ва, му́ченика. И ны́нѣ, богоро́диченъ или́ крестобогоро́диченъ.]

Еди́нъ кано́нъ окто́иха [на 6], и преподо́бнаго на 4, и му́ченика на 4.

Кано́нъ преподо́бнаго, его́же краегране́сіе: Предте́чева тя́ подража́теля хвалю́. Іо́сифъ. Гла́съ 4.
Пѣ́снь 1.

Ирмо́съ: Отве́рзу уста́ моя́, и напо́лнятся Ду́ха, и сло́во отры́гну Цари́цѣ Ма́тери, и явлю́ся, свѣ́тло торжеству́я, и воспою́, ра́дуяся, Тоя́ чудеса́.

Свѣ́томъ благода́ти озаря́емь, преподо́бне, вѣ́рою па́мять твою́ торжеству́ющія просвѣти́ и тмы́ грѣхо́вныя моли́твами твои́ми изба́ви, Іоанни́кіе.

Пу́ть вводя́щій невозвра́тно ше́ствовалъ еси́ ко гра́ду небе́сному, Іоанни́кіе, Святы́й бо наста́ви тя́ Ду́хъ, почива́яй въ се́рдцы твое́мъ.

Вышша́ющее смире́ніе, Іоанни́кіе, имѣ́лъ еси́, тѣ́мъ мо́лимся тебѣ́: уще́дри, преподо́бне, смире́ніе на́ше и болѣ́зни вся́ облегчи́ серде́цъ на́шихъ.

Богоро́диченъ: Па́дшихъ воззва́ніе и стоя́щихъ укрѣпле́ніе су́щи, Всенепоро́чная, тѣ́мъ молю́ся Тебѣ́: па́дшій мо́й у́мъ грѣхо́мъ, испра́ви, Влады́чице, я́ко да сла́влю Тя́.

Кано́нъ му́чениковъ, гла́съ 4.
Пѣ́снь 1.

Ирмо́съ: Ли́цы изра́ильтестіи, невла́жными стопа́ми по́нтъ Чермны́й и вла́жную глубину́ прогна́вше, вса́дники триста́ты враги́ ви́дяще въ не́й погруже́ны, съ весе́ліемъ поя́ху: пои́мъ Бо́гу на́шему, я́ко просла́вися.

Честны́й пра́здникъ честны́хъ страда́лецъ священному́чениковъ, свяще́нную па́мять дне́сь свяще́нными пѣснопѣ́ньми ны́нѣ свяще́ннѣйшая Христо́ва Це́рковь, священнолѣ́пно соверша́ющи, пѣ́сньми украша́ется, сія́ почита́ющи.

Честно́ю пома́занъ ма́стію свяще́нничества вѣ́рно, священнонача́льниче Ника́ндре, честнѣ́йшу сію́ отъ крове́й твои́хъ обагре́ньми содѣ́лалъ еси́, въ ра́дости зовя́: воспои́мъ Бо́гу на́шему, я́ко просла́вися.

Пу́ть муче́нія теку́ще, весе́ліе и́стинное въ не́мъ я́вѣ показу́юще, обогати́стеся благода́тію чуде́съ и дарова́ній небе́сныхъ, му́ченицы, согла́сно вопію́ще: воспои́мъ Бо́гу на́шему, я́ко просла́вися.

Богоро́диченъ: Неопи́санный въ нѣ́дрѣхъ Оте́ческихъ, въ нѣ́дрѣхъ Ма́тернихъ пло́тски Христо́съ опису́ется, по рождествѣ́ Сію́ и́стинно Дѣ́ву па́че ума́ сохрани́въ, Ему́же велегла́сно вопіе́мъ: воспои́мъ Бо́гу на́шему, я́ко просла́вися.

Пѣ́снь 3.

Ирмо́съ: Твоя́ пѣсносло́вцы, Богоро́дице, живы́й и незави́стный Исто́чниче, ли́къ Себѣ́ совоку́пльшія, духо́вно утверди́, въ боже́ственнѣй Твое́й сла́вѣ, вѣнце́въ сла́вы сподо́би.

Теку́щая пребыва́ющими измѣни́лъ еси́, смы́сленно пріе́мъ тво́й кре́стъ, Іоанни́кіе, и на невосходи́мыя го́ры, я́ко Илія́ вели́кій, возше́дъ, пребы́лъ еси́.

Пу́ть тебѣ́, зѣло́ жела́емый, отце́въ показа́ дво́ица, ю́же обрѣ́лъ еси́ лѣ́ты множа́йшими сокрове́нну въ гора́хъ, проро́ческимъ да́ромъ просвѣще́нъ, блаже́нне.

Коле́блеми страстьми́ разли́чными, вѣ́рою притека́емъ къ твоему́ покро́ву, Іоанни́кіе, святы́ми твои́ми хода́тайствы вся́ ны́ посѣти́, моля́ся Человѣколю́бцу.

Богоро́диченъ: Кропле́ніемъ ми́лости Твоея́, Дѣ́во, у́гліе погаси́ мои́хъ страсте́й, Богора́дованная, и уга́сшій возжзи́ свѣти́льникъ се́рдца моего́, златы́й свѣти́льниче, Всенепоро́чная.

Инъ.

Ирмо́съ: Яко непло́ды роди́ отъ язы́къ Це́рковь, и мно́гое въ ча́дѣхъ изнемо́же со́нмище, чу́дному Бо́гу на́шему возопіи́мъ: Свя́тъ еси́, Го́споди.

Слове́сныя мре́жи простира́я, су́щія въ пре́лести, чудодѣ́йствуя, уловля́лъ еси́, обро́къ многообра́зенъ отъ Дѣ́вы, Ника́ндре, Возсія́вшему сія́ принося́.

Розга́ благопло́днѣйшая Ти́това са́да бы́лъ еси́ Кри́тскаго свѣти́льника, гро́зды нося́ слове́сныя, сла́дость на́мъ точа́щая спаси́тельную, Ника́ндре блаже́нне.

Со Ерме́емъ боже́ственнымъ оляденѣ́вшая сердца́ Креста́ ра́ломъ воздѣ́ласте, му́дріи, и плодоно́сны благода́ти яви́сте: тѣ́мъ блажи́ми есте́.

Богоро́диченъ: Ниже́ небе́сный у́мъ мо́жетъ па́че ума́ рождество́ Твое́ сказа́ти, Отрокови́це, Ума́ бо пе́рваго во чре́вѣ, Сло́во, Чи́стая зачала́ еси́, вся́ческая сло́вомъ соста́вившее.

Сѣда́ленъ, гла́съ 8. Подо́бенъ: Прему́дрости.

Страсте́й мра́къ очи́стивъ, Христо́выхъ повелѣ́ній я́ко и́стинно свѣ́тъ пріе́мъ, въ постѣ́ просія́лъ еси́ и, умертви́въ тѣ́ло, ду́хомъ ожи́лъ еси́, вра́жія сѣ́ти попра́лъ еси́, блаже́нне. Тѣ́мъ и вы́шнихъ безпло́тныхъ а́нгеловъ соприча́стникъ бы́лъ еси́ Ду́ха благода́тію, Іоанни́кіе, о́тче на́шъ, моли́ Христа́ Бо́га грѣхо́въ оставле́ніе дарова́ти пра́зднующимъ любо́вію святу́ю па́мять твою́.

Сла́ва, му́чениковъ, гла́съ 4. Подо́бенъ: Вознесы́йся.

Святи́тельства и́стины Боже́ственнымъ пома́заніемъ и муче́нія свяще́нною и́стинно кро́вію просвѣще́ни, сла́вніи, совокупи́стеся чино́мъ, ра́дующеся, безпло́тныхъ а́нгелъ. Тѣ́мъ пра́зднуемъ честну́ю ва́шу па́мять, моля́щеся всѣ́мъ очище́ніе пода́ти моли́твами ва́шими, святíи.

И ны́нѣ, богоро́диченъ:

Обнови́ла еси́, Чи́стая, Боже́ственнымъ рождество́мъ Твои́мъ истлѣ́вшее во страсте́хъ земноро́дныхъ ме́ртвенное существо́ и воздви́гла еси́ вся́ отъ сме́рти къ животу́ нетлѣ́нія. Тѣ́мже Тя́ по до́лгу блажи́мъ вси́, Дѣ́во Препросла́вленная, я́коже прорекла́ еси́.

Крестобогоро́диченъ:

Дѣ́во Пренепоро́чная, Ма́ти Христа́ Бо́га, ору́жіе про́йде Твою́ пресвяту́ю ду́шу, егда́ распина́ема ви́дѣла еси́ во́лею Сы́на и Бо́га Твоего́. Его́же, Благослове́нная, моля́щи не преста́й проще́ніе прегрѣше́ній на́мъ дарова́ти.

Пѣ́снь 4.

Ирмо́съ: Неизслѣ́дный Бо́жій совѣ́тъ, е́же отъ Дѣ́вы воплоще́нія Тебе́, Вы́шняго, проро́къ Авваку́мъ усмотря́я, зовя́ше: сла́ва си́лѣ Твое́й, Го́споди.

Го́ры высоча́йшія пости́гъ, верхи́ де́моновъ возвыша́емыя, смире́ніемъ смири́лъ еси́, му́дре, и на ни́хъ му́жествовалъ еси́, сла́ва мона́шествующихъ и утвержде́ніе.

Яко мече́мъ обоюдоо́стрымъ, Христо́вымъ стра́хомъ вооружи́вся, змíя отсту́пника низложи́лъ еси́ разу́мно и чу́вственно, блаже́нне, свяще́нными побѣ́дами прославля́емь.

Весь Боже́ственнымъ Ду́хомъ распали́вся, о́тче, мра́зъ претерпѣ́лъ еси́, мно́жайшими лѣ́ты въ пусты́няхъ вселя́яся, ища́й Го́спода, благода́тію тя́ Боже́ственною согрѣва́юща.

Богоро́диченъ: Тя́, очище́ніе всѣ́хъ земны́хъ, вѣ́рою молю́ и припа́даю, Благослове́нная: ми́лостива ми́ Судію́ и Сы́на Твоего́ сотвори́, я́ко да по до́лгу сла́влю Тя́.

Инъ.

Ирмо́съ: Сѣдя́й въ сла́вѣ на Престо́лѣ Божества́ во о́блацѣ ле́гцѣ, прíиде Іису́съ Пребоже́ственный, Нетлѣ́нною Дла́нію и спасе́ зову́щія: сла́ва, Христе́, си́лѣ Твое́й.

Колесни́ца яви́стеся Сло́ва, у́мно Сего́ нося́ще, тѣ́мъ привя́зани къ ко́немъ, лю́тѣ же влачи́ми, не отверго́стеся Сего́, ни побѣди́стеся, къ небе́снѣй стезѣ́ я́вѣ подвиза́еми.

Темни́цамъ приближа́ющеся и у́зами облага́еми, отъ у́зъ льсти́ гра́дъ и лю́ди спасо́сте и ю́зою любве́ связа́стеся Свя́заннаго пло́тію на́съ ра́ди, всеблаже́нніи.

Со а́нгелы Влады́ку заключе́ни сла́вляху, небе́снымъ хлѣ́бомъ, всесла́вніи, пита́еми. Тѣ́мъ пло́ти болѣ́зней небрего́сте, си́льнѣйшіи ра́нъ бы́вше.

Богоро́диченъ: На престо́лѣ высо́цѣмъ стра́шно сѣдя́й, на Ма́тернихъ объя́тіяхъ, Младе́нецъ бы́въ, сѣди́тъ, па́дшій о́бразъ исправля́я и обоже́ніе су́щимъ изъ Ада́ма да́руя.

Пѣ́снь 5.

Ирмо́съ: Ужасо́шася вся́ческая о Боже́ственнѣй сла́вѣ Твое́й: Ты́ бо, неискусобра́чная Дѣ́во, имѣ́ла еси́ во утро́бѣ надъ всѣ́ми Бо́га, и родила́ еси́ Безлѣ́тнаго Сы́на, всѣ́мъ, воспѣва́ющимъ Тя́, ми́ръ подава́ющая.

Ше́ствовалъ еси́, преподо́бне, тѣ́сный и приско́рбный пу́ть боже́ственными восхожде́ньми се́рдца, и видѣ́ніи разширя́емь, и положе́ніемъ обожа́емь я́вѣ. Тѣ́мъ бы́сть мона́шествующимъ утвержде́ніе и украше́ніе.

Око очи́стившу помышле́нія, преподо́бне, благода́ть тебѣ́ даде́ся проро́чества, я́ко настоя́щая глаго́лати бу́дущая, зрѣ́ти же да́льняя, я́ко бли́жняя. О, Іоанни́кіе, Бо́жіе оби́телище!

Болѣ́зни мя́ изба́ви грѣхо́въ и скорбе́й, утоли́ се́рдца моего́ болѣ́знь и грѣхопаде́ній разрѣше́ніе да́руй, Благодѣ́теля Бо́га имѣ́я, послу́шающа честны́хъ твои́хъ моли́твъ.

Богоро́диченъ: Ума́ моего́ уврачу́й изступле́нія, Всенепоро́чная, и уврачи́ стра́сти души́ моея́, и уны́нія тму́ отжени́, я́ко да восхваля́ю Тя́ пѣ́сненно, Присноблаже́нная Богоро́дице Всепѣ́тая.

Инъ.

Ирмо́съ: Просвѣще́ніе Твое́, Го́споди, низпосли́ на́мъ и отъ мглы́ прегрѣше́ній разрѣши́ ны, Бла́же, Тво́й ми́ръ да́руяй.

Въ просвѣще́ніе вѣ́ры путево́ждствовалъ еси́ лю́ди, и, оста́вльше тму́ идолонеи́стовства, ча́да Свѣ́та бы́ша хода́тайствомъ твои́мъ, Ника́ндре.

Просвѣти́тельными Ду́ха блиста́юще заря́ми, муче́ній но́щь преидо́сте безвре́дно, рѣша́ще мглу́ безбо́жія, свѣти́льницы сла́вніи.

Па́вловыхъ во́дъ испо́лненъ Ти́тъ бы́въ, тя́ напая́ше, показу́я рѣку́, струи́ му́тныя безбо́жія потопля́ющу, Ника́ндре.

Богоро́диченъ: Агнца и Го́спода ро́ждшая пло́тію, Дѣ́во, еди́на нескве́рная ски́ніе, Боже́ственный ковче́же, честны́й свѣти́льниче, ду́шу мою́ озари́.

Пѣ́снь 6.

Ирмо́съ: Боже́ственное сіе́ и всечестно́е соверша́юще пра́зднество, богому́дріи, Богома́тере, пріиди́те, рука́ми воспле́щимъ, отъ Нея́ ро́ждшагося Бо́га сла́вимъ.

Увяди́въ стра́сти тѣле́сныя, я́ко дре́во узрѣ́лся еси́ высокове́рхое, плоды́ чуде́сныя и честна́я исправле́нія свяще́ннѣйше нося́, богоблаже́нне.

Уврачи́ тя Госпо́дь явле́ніемъ Евста́ѳія му́ченика, я́дъ всепа́губный испи́вша, всеблаже́нне, чрезъ ру́ку непра́ведную и бѣ́дствующа.

Тма́мъ болѣ́зней пріобщи́лся еси́, тѣ́ломъ не́мощенъ пребы́въ, Іоанни́кіе. Тѣ́мъ вѣ́рою зову́ ти: болѣ́зни утоли́ се́рдца моего́.

Богоро́диченъ: Еди́на всѣ́хъ по́моще, помози́ на́мъ, бѣ́дствующимъ, и ру́ку пода́ждь, и къ приста́нищемъ введи́ спасе́нія, Отрокови́це Богоблагода́тная.

Инъ.

Ирмо́съ: Возопи́, прообразу́я погребе́ніе тридне́вное, проро́къ Іо́на, въ ки́тѣ моля́ся: отъ тли́ изба́ви мя́, Іису́се, Царю́ си́лъ.

Пригвожда́ема гвоздьми́ тѣлеса́ му́чениковъ, Страсте́й подража́теле Спа́са явля́хуся, пригвозди́вшагося на Крестѣ́ и отъ тли́ мíръ спа́сшаго.

Пучи́ну му́къ преидо́сте, му́ченицы, окормле́ніемъ Свята́го Всеси́льнаго Ду́ха и къ Боже́ственному приста́нищу приста́сте, сла́вы исполня́еми.

Побѣди́лъ еси́, тезоимени́тне, муже́й вся́кое противле́ніе убíйцъ, святи́телю приснопа́мятне Ника́ндре, и вѣнцы́ сла́вы прія́лъ еси́, Бо́гу предстоя́.

Богоро́диченъ: Погуби́ла еси́ прама́тере, Отрокови́це, укори́зну, благослове́ньми на́съ Вѣнча́вшаго пло́тію ро́ждши, и ско́рбь тоя́ въ ра́дость и́стинную преложи́ла еси́.

Конда́къ, гла́съ 8. Подо́бенъ: Взбра́нной.

Звѣзда́ яви́лся еси́ всесвѣ́тлая, въ мíрѣ просвѣща́яй и су́щія во мра́цѣ страсте́й облистава́яй, вра́чь же крѣпча́йшій яви́лся еси́, но я́ко прія́лъ еси́ благода́ть исцѣле́ній, прося́щимъ тя́ пода́ждь исцѣле́ніе, да зове́мъ: ра́дуйся, о́тче Іоанни́кіе.

Икосъ:

Другíй, о́тче, яви́лся еси́ вра́чь и предста́тель, неду́ги одержи́мымъ и скорбьми́, Іоанни́кіе чу́дне, исцѣля́я всѣ́хъ, вѣ́рно притека́ющихъ подъ боже́ственный кро́въ тво́й. Тѣ́мъ и отъ на́съ слы́шиши: ра́дуйся, отца́ блага́го ко́рене о́трасль; ра́дуйся, ма́тере блага́я вѣ́твь; ра́дуйся, и́же тѣ́хъ любо́вь отри́нувый; ра́дуйся, и́же еди́наго Бо́га пріе́мый; ра́дуйся, я́ко оста́вилъ еси́ земно́е во́инство; ра́дуйся, я́ко низложи́лъ еси́ ва́рварскую горды́ню; ра́дуйся, стѣна́ и храни́тель царе́мъ бы́вый; ра́дуйся, ору́жіе и сто́лпъ мíрови я́влься; ра́дуйся, язы́ческія разруша́я бра́ни; ра́дуйся, свѣти́льниче, сія́я чудесы́; ра́дуйся, наги́хъ покрови́телю; ра́дуйся, плѣне́нныхъ изба́вителю; ра́дуйся, о́тче Іоанни́кіе.

Пѣ́снь 7.

Ирмо́съ: Не послужи́ша тва́ри богому́дріи, па́че Созда́вшаго, но, о́гненное преще́ніе му́жески попра́вше, ра́довахуся, пою́ще: препѣ́тый отце́въ Госпо́дь и Бо́гъ, благослове́нъ еси́.

Се́рдце твое́ Тро́ицы жили́ще содѣ́лалъ еси́, три́ созда́въ хра́мы, въ ни́хже Боже́ственною благода́тію, Іоанни́кіе, мѵ́ро источа́еши въ просвѣще́ніе и очище́ніе вѣ́рно тебѣ́ приходя́щихъ.

Душа́ твоя́, свѣтозаре́ніемъ Боже́ственнаго Ду́ха освѣща́ема при́сно, ду́шъ зря́ше вѣ́рно приходя́щихъ тебѣ́ совѣ́ты, блаже́нне, проро́ческими прозна́ньми свяще́нно удивля́ема.

Неду́говъ, обурева́ющихъ мя́, блаже́нне, души́ же и тѣлесе́ твои́ми святы́ми моли́твами ско́ро изба́ви и пѣ́ти сотвори́: препѣ́тый оте́цъ на́шихъ Бо́же, благослове́нъ еси́.

Богоро́диченъ: Непремѣ́ннаго ро́ждшая еди́на Го́спода, Богора́дованная, десни́цею Его́, Чи́стая, премѣни́ти мо́й у́мъ моли́ся къ лу́чшимъ, лю́тѣ превраща́емый жите́йскими печа́льми.

Инъ.

Ирмо́съ: Авраа́мстіи иногда́ въ Вавило́нѣ о́троцы пе́щный пла́мень попра́ша, пѣ́сньми взыва́юще: оте́цъ на́шихъ Бо́же, благослове́нъ еси́.

Свяще́нную твою́ оде́жду обагри́въ, блаже́нне, обагре́ньми крове́й, соверши́лъ еси́ свѣ́тльшую, Ника́ндре, — отце́въ, — вопія́, — Бо́же, благослове́нъ еси́.

Приближа́ющеся огню́, несомнѣ́нною любо́вію къ Творцу́ не опали́стеся, вопію́ще, блаже́нніи: оте́цъ на́шихъ Бо́же, благослове́нъ еси́.

Пе́щи пла́мень, ва́мъ угото́ванный на муче́ніе, преврати́сте на ро́су Ду́хомъ Вседѣ́тельнымъ, вопію́ще: оте́цъ на́шихъ Бо́же, благослове́нъ еси́.

Богоро́диченъ: Воплоще́нное Сло́во ражда́еши несказа́нно, Чи́стая Дѣ́во, зову́щія отъ сме́рти избавля́юща: оте́цъ на́шихъ Бо́же, благослове́нъ еси́.

Пѣ́снь 8.

Ирмо́съ: Отроки благочести́выя въ пещи́ Рождество́ Богоро́дичо спасло́ е́сть, тогда́ у́бо образу́емое, ны́нѣ же дѣ́йствуемое, вселе́нную всю́ воздвиза́етъ пѣ́ти Тебѣ́: Го́спода по́йте, дѣла́, и превозноси́те Его́ во вся́ вѣ́ки.

Стоя́ высо́ко на горѣ́, я́ко на свѣ́щницѣ свѣти́льникъ, преподо́бне, всѣ́хъ помышле́нія вѣ́рою просвѣща́лъ еси́, показу́я изря́днѣйше словесы́ и дѣ́лы стезю́ жи́зни и возводя́ ты́я Боже́ственнымъ сло́вомъ къ высотѣ́ безстра́стія.

Умъ безстра́стіемъ очи́щшему, бесѣ́довалъ еси́ Го́споду Вседержи́телю, отъ Него́же неизглаго́ланнымъ, преподо́бне, науча́емь, проро́чески предглаго́лалъ еси́, просвѣща́я ду́ши, я́ко велича́йшъ, всеблаже́нне, проро́къ. Тѣ́мъ тя́ согла́сно, вѣ́рніи, восхваля́емъ.

Постиго́ша мя́ ра́ны тя́жкія, и неду́зи разли́чніи смуща́ютъ. Си́хъ мя́ изба́ви, о́тче, молю́ся тебѣ́, я́ко отъ Бо́га пріе́мъ, Іоанни́кіе, благода́ть врачева́ти стра́сти и болѣ́зни вѣ́рныхъ облегчева́ти.

Тро́иченъ: Со всѣ́ми Вы́шними во́инствы — Отца́, Сы́на и Свята́го Ду́ха — Тро́ицу Нераздѣ́льную, Несозда́нное Божество́ пѣсносло́вяще: свя́тъ, свя́тъ, свя́тъ, возопіи́мъ въ ра́дости, еди́на Вла́сть, Нача́ло и Ца́рство.

Богоро́диченъ: Яви́лася еси́ а́нгеловъ превы́шшая, Бо́га неизрече́нно воплоти́вши, Того́ умоли́, Влады́чице Всенепоро́чная, плотски́хъ вы́шша страсте́й бы́ти мя́ умо́мъ, высото́ю смире́нія, пѣсносло́вяща Твою́ велича́йшую благода́ть.

Инъ.

Ирмо́съ: Изба́вителю всѣ́хъ Всеси́льне, посредѣ́ пла́мене благоче́ствовавшія, снизше́дъ, ороси́лъ еси́ и научи́лъ еси́ пѣ́ти: вся́ дѣла́, благослови́те, по́йте Го́спода.

Іера́рхъ че́стенъ бы́лъ еси́, ника́коже чужде́ю кро́вію, свое́ю же, Ника́ндре, вше́дъ въ го́рній хра́мъ и поя́: благослови́те вся́ дѣла́ Госпо́дня Го́спода.

На сѣда́лищи, восхвали́въ Го́спода, пресви́теровъ Ерме́й сла́вный, удобри́вся кро́вію муче́нія, зове́тъ: благослови́те вся́ дѣла́ Госпо́дня Го́спода.

Свяще́нно предсоверша́юще свята́я, же́ртвы честны́я яви́стеся и въ воню́ принесо́стеся благово́нія Го́споду, вопію́ще: благослови́те вся́ дѣла́ Госпо́дня Го́спода.

Богоро́диченъ: Зо́лъ мои́хъ пучи́ну изсуши́, благоутро́бія пучи́ну ро́ждшая, Изба́вителя и Го́спода, Ему́же вопіе́мъ, Дѣ́во: вся́ дѣла́ благослови́те Госпо́дня Го́спода.

Пѣ́снь 9.

Ирмо́съ: Вся́къ земноро́дный да взыгра́ется, Ду́хомъ просвѣща́емь, да торжеству́етъ же безпло́тныхъ умо́въ естество́, почита́ющее свяще́нное торжество́ Богома́тере, и да вопіе́тъ: ра́дуйся, Всеблаже́нная Богоро́дице, Чи́стая Приснодѣ́во.

Укрѣпи́ся Бо́гу, у́мъ тво́й утверди́вшу удержа́ти стра́сти, а́нгелъ въ тѣлеси́ отсю́ду, о́тче, ты́ бы́лъ еси́, и со а́нгелы на небесѣ́хъ живе́ши всегда́, сла́вы престо́лу предстоя́ и Свѣ́та невече́рняго исполня́емь.

Якоже на небеси́, въ гора́хъ и верте́пахъ всели́лся еси́, преподо́бне: тѣ́мъ укроти́шася тебѣ́ ди́віи звѣ́ріе, покори́вшу стра́сти душе́вныя, неудо́бь покори́мыя, Іоанни́кіе, и пра́ведну же бы́вшу. Сего́ ра́ди вѣ́рно тя́ почита́емъ.

Твоя́ свяще́нныя и святы́я мо́щи во гро́бѣ лежа́ще, неду́ги погружа́ютъ и попаля́ютъ полки́ де́монскія всегда́, му́дре Іоанни́кіе, Бо́жіею благода́тію источа́ютъ всѣ́мъ врачева́нія, вѣ́рно тя́ при́сно блажа́щимъ.

Уже́ Христу́ приближа́яся я́снше и чи́стше, помяни́ вѣ́рою тя́ помина́ющихъ, Іоанни́кіе, грѣхо́въ проще́ніе на́мъ прося́, и неду́говъ всѣ́хъ избавле́нія, и небе́снаго Ца́рствія селе́ніе.

Богоро́диченъ: Просвѣти́, Чи́стая, души́ моея́ о́чи, Свѣ́тъ ро́ждшая, да не пости́гнетъ мя́ грѣхо́вная тма́ тяжча́йшая, ниже́ глубина́ покры́етъ мя́ отча́янія, но Ты́ мя́ спаси́ и окорми́ ко приста́нищу Боже́ственнаго хотѣ́нія.

Инъ.

Ирмо́съ: Ева у́бо неду́гомъ преслуша́нія кля́тву всели́ла е́сть, Ты́ же, Дѣ́во Богоро́дице, прозябе́ніемъ чревоноше́нія мíрови благослове́ніе процвѣла́ еси́. Тѣ́мъ Тя́ вси́ велича́емъ.

На дре́вѣ, му́дре, терпѣли́вно растяга́емь и свѣща́ми опаля́емь, ро́су небе́сную прія́лъ еси́ руко́ю а́нгельскою, му́чениче Ника́ндре, паля́щія же ме́ртвы показа́лъ еси́ живоно́сными твои́ми моли́твами.

Ви́дѣстеся видѣ́ніе стра́шно: обнажа́еми, и безслове́снымъ привязу́еми, и на мно́жайше, страстоте́рпцы, влеко́ми, и цѣ́ли явля́еми, огню́ приближа́ющеся, и неопаля́еми, Ду́хомъ Боже́ственнымъ соблюда́еми.

Дне́сь Мѵ́рская свяще́нная митропо́лія пра́зднуетъ велегла́сно, гра́дъ вся́къ на весе́ліе созыва́ющи, въ па́мяти ва́шей се́й, всехва́льніи, въ не́йже свяще́нное ва́ше страда́ніе соверши́сте.

Отве́рзеся ва́мъ не́бо, и а́нгели восхожде́нію восплеска́вше, чи́ни преподо́бныхъ и пра́ведныхъ возвесели́шася, взыгра́шася му́ченицы. Съ ни́миже все́льшеся, помяни́те помина́ющія ва́съ, святíи.

Богоро́диченъ: Свѣ́томъ мя́ озари́ Твои́мъ, Всенепоро́чная, ро́ждшая Свѣ́тъ непристу́пный, разжени́ о́блаки души́ моея́, и тмы́ мя́ исхити́, молю́ся, и Боже́ственнаго спасе́нія сподо́би, Пречи́стая, Еди́на Приснодѣ́во.

Свѣти́ленъ. Подо́бенъ: Ду́хомъ во святи́лищи.

Благода́ть преизбы́сть Бо́жія въ души́ твое́й, му́дре Іоанни́кіе, безпло́тно живу́ща. Тѣ́мъ чту́щія тя́ страсте́й изба́ви те́мныхъ облако́въ, къ ти́хому приста́нищу вводя́ и отгоня́я полки́ де́монскія.

Богоро́диченъ: Сотвори́ и́стинно съ Тобо́ю вели́чія Сы́нъ предвѣ́чный Отчимъ совѣ́томъ: Жи́знь бо нетлѣ́нную безъ стра́сти родила́ еси́ и пребыла́ еси́ я́коже пре́жде рождества́, ма́терскихъ избѣ́гши болѣ́зней, и Дѣ́ва, па́ки по рождествѣ́ пребы́вши Дѣ́ва.

На стихо́внѣ окто́иха. Сла́ва, гла́съ 6:

Еже по о́бразу соблю́дъ невреди́мо, у́мъ влады́ку надъ страстьми́ па́губными по́стнически поста́вивъ, во е́же по подо́бію я́ко мо́щно возше́лъ еси́, му́жески бо естество́ пону́дивъ, потща́лся еси́ ху́ждшее покори́ти лу́чшему и пло́ть порабо́тити ду́ху. Тѣ́мже мона́шествующихъ яви́лся еси́ ве́рхъ, жи́тель пусты́нный, благотеку́щихъ обучи́тель, пра́вило добродѣ́телей извѣ́стнѣйшее, и ны́нѣ на небесѣ́хъ зерца́ломъ разрѣ́шшимся, о́тче на́шъ Іоанни́кіе, чи́стѣ зри́ши Святу́ю Тро́ицу, моля́ся непосре́дственнѣ о и́же вѣ́рою и любо́вію чту́щихъ тя́.

И ны́нѣ, богоро́диченъ или́ крестобогоро́диченъ. Подо́бенъ: Все́ отло́жше.

Ору́жіе, я́коже рече́ Симео́нъ,* се́рдце Твое́ про́йде, Пречи́стая Влады́чице,* егда́ узрѣ́ла еси́ изъ Тебе́ Возсія́вшаго* неизрече́ннымъ сло́вомъ,* отъ беззако́нныхъ я́ко осужде́на,* возноси́ма на Кре́стѣ,* о́цтомъ и же́лчію напая́емаго,* ре́бра же пробода́ема,* и ру́цѣ и но́зѣ пригвожда́емы,* и рыда́ющи восклица́ше,* ма́терски вопію́щи:* что́ сіе́, Ча́до Сладча́йшее,* но́вое та́инство?


НА ЛИТУРГІИ,

Проки́менъ, гла́съ 7: Честна́ предъ Го́сподемъ сме́рть преподо́бныхъ его́. Сти́хъ: Что́ возда́мъ Го́сподеви о всѣ́хъ, [я́же воздаде́ ми́?] Апо́столъ къ Гала́томъ, зача́ло 213. Аллилу́ія, гла́съ 6: Блаже́нъ му́жъ, боя́йся Го́спода, [въ за́повѣдехъ Его́ восхо́щетъ зѣло́]. Сти́хъ: Си́льно на земли́ бу́детъ сѣ́мя его́. Ева́нгеліе Матѳе́я, зача́ло 10. Прича́стенъ: Въ па́мять вѣ́чную бу́детъ пра́ведникъ, [отъ слу́ха зла́ не убои́тся].

Источникъ: Минíа, мѣ́сяцъ Ное́мврій. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 23 об. – 30 об.

/ Къ оглавленію раздѣла /


Наверхъ / Къ титульной страницѣ

0