Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - среда, 16 августа 2017 г. Сейчасъ на порталѣ посѣтителей - 15.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Ное́мврія въ 4-й де́нь.
Слу́жба и́же во святы́хъ отцу́ на́шему Па́влу, митрополи́ту Тобо́льскому, Пече́рскому чудотво́рцу.

НА МАЛѢЙ ВЕЧЕРНИ,
На Го́споди воззва́хъ: стихи́ры [на 4], гла́съ 8:

Святи́телю всече́стне, побо́рниче Це́ркве Христо́вы, Па́вле богоглаго́ливе, ми́лостивно преклоня́ешися къ и́щущимъ твоего́ заступле́нія, приходя́щимъ съ вѣ́рою къ ра́цѣ святы́хъ моще́й твои́хъ, да́ры цѣле́бныя подае́ши незави́стно; тя́ бо засту́пника и предста́теля и цѣли́теля, вѣ́рніи, обрѣто́хомъ. [Два́жды.]

Святи́телю преблаже́нне, свѣ́тлая красото́ Це́ркве Христо́вы, Па́вле богому́дре, добродѣ́тельми высо́кими, я́ко лѣ́ствицею небовосхо́дною, восте́клъ еси́ къ Бо́гу, прія́ти твоего́ исповѣ́данія по́честь побѣ́дную, на́мъ же оста́вилъ еси́ въ наслѣ́діе тѣ́ло твое́ нетлѣ́нное, источа́ти исцѣле́нія и прогони́ти ду́хи нечи́стыя отъ человѣ́къ; тѣ́мже блажи́мъ тя́, чудотво́рче преди́вный.

Святи́телю достохва́льне, сто́лпе непоколеби́мый Це́ркве Христо́вы, Па́вле богоно́сне, по́стническимъ житіе́мъ отъ ю́ности украси́вся, въ Ла́врѣ Пече́рстѣй Бо́гу обручи́лся еси́, и́ночествовати усе́рдно, та́мо же и поко́й о Христѣ́ обрѣ́лъ еси́, въ небеса́ всели́вся чи́стою душе́ю твое́ю, тѣ́ло твое́ нетлѣ́нное въ благослове́ніе на́мъ оста́вилъ еси́, источа́ти чудеса́; тѣ́мже хва́лимъ тя́, чудотво́рче преди́вный.

Сла́ва, гла́съ 6:

Возсія́ луча́ми мно́гихъ чуде́съ па́мять твоя́, святи́телю Па́вле, вѣ́рныхъ сердца́ озаря́ющи богоразу́мія свѣ́томъ, ю́же соверша́юще свѣ́тло, тебѣ́, па́стырю до́брый Христо́ва ста́да, хвале́бно взыва́емъ: ра́дуйся, исповѣ́дниче непосты́дный, о пра́вдѣ свидѣ́тельствовавый нелицепрія́тно; ра́дуйся, нестяжа́телю и́стинный, не свое́, а церко́вное достоя́ніе храни́вый; ра́дуйся, архіере́евъ украше́ніе и мона́ховъ похвало́. Христа́ Бо́га моли́, спасти́ся душа́мъ на́шимъ.

И ны́нѣ, богоро́диченъ, [гла́съ то́йже:

Богоро́дице, Ты́ еси́ лоза́ и́стинная, возрасти́вшая на́мъ Пло́дъ живота́, Тебѣ́ мо́лимся: моли́ся, Влады́чице, со святы́ми апо́столы поми́ловати ду́ши на́ша].

На стихо́внѣ стихи́ры, гла́съ 2. Подо́бенъ: До́ме Евфра́ѳовъ.

До́мъ добродѣ́телей,* вмѣсти́лище смиренному́дрія,* сосу́дъ Бо́жія благода́ти,* яви́лся еси́,* святи́телю Па́вле приснопа́мятне.

Сти́хъ: Свяще́нницы Твои́ облеку́тся въ пра́вду,* и преподо́бніи Твои́ возра́дуются.

До́ма Бо́жія стра́же,* волко́въ душегуби́тельныхъ отгони́телю,* благоче́стія учи́телю,* показа́лся еси́,* святи́телю Па́вле богоуго́дне.

Сти́хъ: Уста́ пра́веднаго поуча́тся прему́дрости,* и язы́къ его́ возглаго́летъ су́дъ.

До́ма Влады́чицы Богоро́дицы,* небеси́ подо́бныя це́ркве Пече́рскія,* благода́тное украше́ніе, гро́бъ тво́й нарица́емъ,* цѣле́бныя струи́ источа́яй отъ него́,* святи́телю Па́вле чудодѣ́йственне.

Сла́ва, гла́съ то́йже:

Въ ма́лѣ бы́въ вѣ́ренъ, святи́телю, надъ мно́гими превозне́слся еси́ Бо́жіею благода́тію, оби́льно тебѣ́ дарова́нною: исцѣля́еши ду́ши вѣ́рою притека́ющихъ къ тебѣ́, я́ко вои́стинну вели́кій таи́нникъ Святы́я Тро́ицы.

И ны́нѣ, богоро́диченъ, [гла́съ то́йже:

Все́ упова́ніе мое́ на Тя́ возлага́ю, Ма́ти Бо́жія, сохрани́ мя подъ кро́вомъ Твои́мъ.]

Тропарь, гласъ 8:

Правосла́вія наста́вниче, Це́ркве Христо́вы побо́рниче, пра́вды нелицепрія́тный провозвѣ́стниче, архіере́овъ богодухнове́нное удобре́ніе, Па́вле чудотво́рче, высото́ю исповѣ́данія твоего́ вся́ ны́ удивля́еши, чудесы́ же твои́ми благода́тно просвѣща́еши; подви́жниче духо́вный, моли́ Христа́ Бо́га спасти́ся душа́мъ на́шимъ.

[Сла́ва, и ны́нѣ богоро́диченъ, гла́съ то́йже:

Иже на́съ ра́ди рожде́йся отъ Дѣ́вы, и распя́тіе претерпѣ́въ, Благíй, испрове́ргій сме́ртію сме́рть и Воскресе́ніе явле́й я́ко Бо́гъ, не пре́зри, я́же созда́лъ еси́ руко́ю Твое́ю, яви́ человѣколю́біе Твое́, Ми́лостиве. Пріими́ ро́ждшую Тя́, Богоро́дицу, моля́щуюся за ны́, и спаси́, Спа́се на́шъ, лю́ди отча́янныя.]


НА ВЕЛИЦѢЙ ВЕЧЕРНИ,
Блаже́нъ му́жъ.., 1-й антифо́нъ. На Го́споди воззва́хъ: стихи́ры [на 8], гла́съ 4:

Яко звѣзда́ многосвѣ́тлая, святи́телю Христо́въ, не́бо Це́ркве Ру́сскія озари́лъ еси́, исповѣ́данія до́блестію, нетлѣ́ніемъ моще́й твои́хъ и мно́гими чудесы́: во тмѣ́ вѣ́ка сего́, ве́лію свѣ́тлость благоче́стія возсіява́еши, досточу́дне, и вся́ ны́ приво́диши блажи́ти тя́ по достоя́нію, и вѣ́рою соверша́ти святу́ю и пречестну́ю па́мять твою́. [Три́жды.]

Яко исто́чникъ многоцѣле́бный и рѣка́ многово́дная чуде́съ, святи́телю Христо́въ, Ла́вру Пече́рскую ороша́еши къ плодоноше́нію духо́вному: въ не́й бо чу́днымъ нетлѣ́ніемъ моще́й твои́хъ просла́вился еси́, богопрія́тне, и отъ ни́хъ мно́гая исцѣле́нія неду́жнымъ дарова́лъ еси́, тѣ́мже любо́вію соверша́емъ святу́ю и пречестну́ю па́мять твою́. [Три́жды.]

Яко ско́рбныхъ утѣ́шитель и неду́гующихъ вра́чь безме́здный, святи́телю Христо́въ, приходя́щихъ къ честно́му твоему́ гро́бу, ми́лостивно пріе́млеши и да́ры благода́тныя оби́льно подае́ши всѣ́мъ, тре́бующимъ твоего́ заступле́нія, чудотво́рче благíй, тѣ́мже пѣ́ніи хвале́бными почита́емъ святу́ю и пречестну́ю па́мять твою́. [Два́жды.]

Сла́ва, гла́съ 6:

Апо́столовъ прее́мниче, Златоу́ста подража́телю, изгна́ніе отъ престо́ла твоего́, пра́вды ра́ди, претерпѣ́лъ еси́, о́тче Па́вле, диви́мся му́жеству души́ твоея́ и ре́вности о Це́ркви Христо́вѣй: не нае́мникъ бо бы́лъ еси́, но па́стырь и́стиненъ, ду́шу свою́ полага́яй за о́вцы своя́, тѣ́мже тя́ почита́емъ и ублажа́емъ, досточу́дне.

И ны́нѣ, богоро́диченъ, [гла́съ то́йже:

Кто́ Тебѣ́ не ублажи́тъ, Пресвята́я Дѣ́во? Кто́ ли не воспое́тъ Твоего́ Пречи́стаго Рождества́? Безлѣ́тно бо отъ Отца́ возсія́вый Сы́нъ Единоро́дный, То́йже отъ Тебе́, Чи́стыя, про́йде, неизрече́нно вопло́щся: естество́мъ Бо́гъ Сы́й и естество́мъ бы́въ Человѣ́къ на́съ ра́ди; не во двою́ лицу́ раздѣля́емый, но во двою́ естеству́ несли́тно познава́емый. Того́ моли́, Чи́стая Всеблаже́нная, поми́ловатися душа́мъ на́шимъ].

Вхо́дъ. Проки́менъ дне́ и чте́нія три́.

При́тчей чте́ніе.

Па́мять пра́веднаго съ похвала́ми, и благослове́ніе Госпо́дне на главѣ́ его́. Блаже́нъ человѣ́къ, и́же обрѣ́те прему́дрость, и сме́ртенъ, и́же увѣ́дѣ ра́зумъ. Лу́чше бо сію́ купова́ти, не́жели зла́та и сребра́ сокро́вища. Честнѣ́йшая же е́сть ка́меній многоцѣ́нныхъ, все́ же честно́е недосто́йно ея́ е́сть. Долгота́ бо дне́й и лѣ́та живота́ въ десни́цѣ ея́, въ шу́йцѣ же ея́ бога́тство и сла́ва. Отъ у́стъ ея́ исхо́дитъ пра́вда, зако́нъ же и ми́лость на язы́цѣ но́ситъ. Послу́шайте у́бо мене́, о ча́да, честна́я бо реку́, и блаже́нъ человѣ́къ, и́же пути́ моя́ сохрани́тъ: исхо́ди бо мои́ — исхо́ди живота́, и уготовля́ется хотѣ́ніе отъ Го́спода. Сего́ ра́ди молю́ ва́съ и предлага́ю мо́й гла́съ сыново́мъ человѣ́ческимъ. Я́ко а́зъ, прему́дрость, устро́ихъ совѣ́тъ, и ра́зумъ и смы́слъ азъ призва́хъ. Мо́й совѣ́тъ и утвержде́ніе, мо́й ра́зумъ, моя́ же крѣ́пость. Азъ мене́ лю́бящія люблю́, и́щущіи же мене́ обря́щутъ благода́ть. Разумѣ́йте у́бо, незло́бивіи, кова́рство, ненака́заніи же, прилага́йте сердца́. Послу́шайте мене́ и па́ки, честна́я бо реку́, и отве́рзу отъ усте́нъ пра́вая, я́ко и́стинѣ поучи́тся горта́нь мой, ме́рзки же пре́до мно́ю устны́ лжи́выя. Съ пра́вдою вси́ глаго́лы у́стъ мои́хъ, ничто́же въ ни́хъ стро́потно, ниже́ развраще́нно. Вся́ пра́ва су́ть разумѣва́ющимъ и про́ста обрѣта́ющимъ ра́зумъ. Науча́ю бо ва́съ и́стинѣ, да бу́детъ о Го́сподѣ наде́жда ва́ша, и испо́лнитеся Ду́ха.

Прему́дрости Соломо́ни чте́ніе.

Уста́ пра́веднаго ка́плютъ прему́дрость, устнѣ́ же муже́й му́дрыхъ вѣ́дятъ благода́ть. Уста́ му́дрыхъ поуча́тся прему́дрости, пра́вда же избавля́етъ и́хъ отъ сме́рти. Сконча́вшуся му́жу пра́ведну, не поги́бнетъ наде́жда. Сы́нъ бо пра́веденъ ражда́ется въ живо́тъ и во благи́хъ свои́хъ пло́дъ пра́вды объи́метъ. Свѣ́тъ пра́веднымъ всегда́, и отъ Го́спода обря́щутъ благода́ть и сла́ву. Язы́къ му́дрыхъ до́брая свѣ́сть, и въ се́рдцѣ и́хъ почíетъ му́дрость. Лю́битъ Госпо́дь преподо́бная сердца́, прія́тни же Ему́ вси́ непоро́чніи въ пути́. Му́дрость Госпо́дня просвѣща́етъ лице́ разу́мнаго: постига́етъ бо жела́ющія ю́, пре́жде да́же разумѣ́ти ю́, и удо́бь у́зрится отъ лю́бящихъ ю́. Утреневавый къ не́й не утруди́тся, и бдя́й ея́ ра́ди вско́рѣ безъ печа́ли бу́детъ. Яко досто́йныхъ ея́ сама́ обхо́дитъ, и́щущи, и во стезя́хъ ея́ явля́ется и́мъ благопріе́мнѣ. Му́дрости никогда́же одолѣ́етъ зло́ба. Си́хъ ра́ди и рачи́тель бы́хъ добро́ты ея́, и возлюби́хъ ю́, и поиска́хъ отъ ю́ности моея́. И взыска́хъ невѣ́сту привести́ себѣ́, я́ко всѣ́хъ Влады́ка возлюби́ ю́. Таи́бница бо е́сть Бо́жія хи́трости и обрѣта́тельница дѣ́лъ Его́. Труды́ ея́ су́ть добродѣ́тели: цѣлому́дрію же и ра́зуму та́ учи́тъ, пра́вдѣ и му́жеству, и́хже потре́бнѣе ничто́же е́сть въ житіи́ человѣ́комъ. Аще же и мно́гаго иску́сства жела́етъ кто́, вѣ́сть дре́вняя, и бы́ти хотя́щая разсмо́тритъ. Свѣ́сть изви́тія слове́съ и разрѣше́нія гада́ній, зна́менія и чудеса́ проразумѣ́етъ, и сбытія́ време́нъ и лѣ́тъ, и всѣ́мъ совѣ́тникъ е́сть бла́гъ. Яко безсме́ртіе е́сть въ не́й и благосла́віе во обще́ніи слове́съ ея́. Сего́ ра́ди бесѣ́довахъ ко Го́споду, и помоли́хся Ему́, и рѣ́хъ отъ всего́ се́рдца моего́: Бо́же отце́въ и Го́споди ми́лости, сотвори́вый вся́ сло́вомъ Твои́мъ и му́дростію Твое́ю устро́ивый человѣ́ка, да владѣ́етъ бы́вшими отъ Тебе́ тварьми́ и да управля́етъ мíръ въ преподо́біи и пра́вдѣ. Да́ждь ми́ Твои́хъ Престо́ловъ присѣдя́щую прему́дрость и не отлучи́ мене́ отъ о́трокъ Твои́хъ, я́ко а́зъ ра́бъ Тво́й и сы́нъ рабы́ни Твоея́. Посли́ ю́ съ Небе́съ отъ свята́го жили́ща Твоего́ и отъ Престо́ла сла́вы Твоея́, да, су́щи со мно́ю, научи́тъ мя́, что́ благоуго́дно е́сть предъ Тобо́ю, и наста́витъ мя́ въ ра́зумъ, и сохрани́тъ мя́ въ сла́вѣ свое́й. Помышле́нія бо сме́ртныхъ вся́ боязли́ва и погрѣши́тельна умышле́нія и́хъ.

Прему́дрости Соломо́ни чте́ніе.

Похваля́ему пра́веднику, возвеселя́тся лю́діе: безсме́ртіе бо е́сть па́мять его́, я́ко отъ Го́спода познава́ется и отъ человѣ́къ, и уго́дна Го́сподеви душа́ его́. Возлюби́те у́бо, о му́жіе, му́дрость и поживете́: восхощи́те ея́ и нака́зани бу́дете. Нача́ло бо ея́ любы́ и соблюде́ніе зако́на. Почти́те прему́дрость, да во вѣ́ки ца́рствуете. Возвѣщу́ ва́мъ и не скры́ю отъ ва́съ та́инъ Бо́жіихъ, я́ко То́й му́дрости наста́вникъ е́сть, и му́дрыхъ испра́витель, и вся́кому смы́слу и дѣ́лу хитре́цъ. И всѣ́мъ смы́сломъ научи́тъ му́дрость, е́сть бо въ не́й Ду́хъ разу́менъ и свя́тъ, и сія́ніе свѣ́та присносу́щнаго, и о́бразъ бла́гости Бо́жія. Та́я дру́ги Бо́жія и проро́ки устроя́етъ, благолѣ́пнѣйши же е́сть со́лнца и па́че вся́каго сотворе́нія звѣ́здъ, свѣ́ту сосужда́ема, обрѣта́ется пе́рвѣйши. Та́я угожда́ющихъ е́й отъ болѣ́зни изба́ви и наста́ви на стези́ пра́выя. Даде́ и́мъ ра́зумъ имѣ́ти свя́тъ, и сохрани́ я́ отъ ловя́щихъ, и по́двигъ крѣ́покъ подаде́ и́мъ. Да разумѣ́ютъ вси́, я́ко си́льнѣйши всего́ е́сть благоче́стіе, и никогда́же премо́жетъ зло́ба му́дрости, ниже́ пре́йдетъ злы́я облича́ющи су́дъ. Реко́ша же въ себѣ́, помы́сливше непра́ведно: наси́льствуемъ пра́ведному, и не пощади́мъ преподо́бства его́, ни усрами́мся сѣди́нъ ста́рости многолѣ́тны. Бу́детъ бо на́мъ крѣ́пость — зако́нъ и улови́мъ пра́веднаго, я́ко неуго́денъ на́мъ е́сть, и проти́вится дѣло́мъ на́шимъ, и поно́ситъ на́мъ отпаде́ніе зако́на, и облича́етъ на́мъ согрѣше́нія наказа́нія на́шего. Возвѣща́етъ на́мъ ра́зумъ имѣ́ти Бо́жій, и о́трока Госпо́дня себе́ имену́етъ. Бы́сть на́мъ на обличе́ніе помышле́ній на́шихъ и тя́жекъ на́мъ е́сть и ви́димь, я́ко неподо́бно ины́мъ житіе́ его́, и измѣне́ны стези́ его́. Въ поруга́ніе вмѣни́хомся ему́, и удаля́ется отъ путе́й на́шихъ, я́ко отъ нечисто́тъ, и блажи́тъ послѣ́дняя пра́ведныхъ. Уви́димъ у́бо, а́ще словеса́ его́ и́стинна су́ть, иску́симъ, я́же сбыва́ются ему́. Руга́ніемъ и му́кою истя́жемъ его́, да разумѣ́емъ кро́тость его́ и иску́симъ беззло́бство его́, сме́ртію безобра́зною осу́димъ его́, бу́детъ бо посѣще́ніе отъ слове́съ его́. Сія́ помы́слиша и прельсти́шася, ослѣпи́ бо я́ зло́ба и́хъ, и не разумѣ́ша та́инъ Бо́жіихъ и не разсуди́ша, я́ко Ты́ еси́ Бо́гъ еди́нъ, живота́ имѣ́яй и сме́рти вла́сть, и спаса́яй во вре́мя ско́рби, и избавля́яй отъ вся́каго зла́. Ще́дръ и Ми́лостивъ, и дая́й преподо́бнымъ Свои́мъ благода́ть, и Свое́ю мы́шцею го́рдымъ противля́яйся.

На литíи стихи́ры, гла́съ 2:

Пріиди́те, вѣ́рніи, ублажи́мъ святи́теля и чудотво́рца Па́вла, въ послѣ́дняя на́ша лѣ́та до́блестію исповѣ́данія просія́вшаго, и чудесы́ мно́гими отъ Го́спода просла́вленнаго: въ ри́зу бо нетлѣ́нія свы́ше облече́ся, и цѣле́бныя да́ры источа́етъ отъ моще́й свои́хъ святы́хъ. Духо́внѣ красу́йся, Ла́вро Пече́рская, стяжа́вши въ себѣ́ такова́го свѣти́льника, и́стиннаго Христо́ва уго́дника, моли́твами свои́ми подаю́щаго мíру ве́лію ми́лость.

Имѣ́я дерзнове́ніе ко Го́споду, святи́телю о́тче на́шъ Па́вле, проси́ оте́чествію твоему́ умире́нія, па́ствѣ твое́й благоустрое́нія, Ла́врѣ Пече́рстѣй, тобо́ю возлю́бленнѣй, благода́тнаго преуспѣ́янія, и всѣ́мъ на́мъ, любо́вію чту́щимъ тя́, ми́рнаго богоуго́днаго житія́ и ве́лія ми́лости.

Во всю́ зе́млю Ру́сскую изы́де сла́ва чуде́съ твои́хъ, святи́телю Па́вле, егда́ мо́щи твоя́, благоволе́ніемъ Вседержи́теля Бо́га, нетлѣ́нни обрѣто́шася: по мно́зѣхъ бо лѣ́техъ, во гро́бѣ лежа́щу ти́, тлѣ́ніе не дерзну́ прикосну́тися твое́й пло́ти, ниже́ сами́мъ оде́ждомъ твои́мъ, преподо́бне, та́ко просла́вльшу тя́ Христу́ Бо́гу, у Него́же проси́ на́мъ ми́ра и ве́лія ми́лости.

Сла́ва: гла́съ 8:

Па́стырю предо́брый, сто́лпе и красото́ Ру́сскія Це́ркве, Па́вле достохва́льне, ты́ свяще́нники освяща́лъ еси́, заблу́ждшія исправля́лъ еси́, оби́димыхъ бы́лъ еси́ предста́тель, вдо́въ и сиро́тъ прибѣ́жище, и все́й па́ствѣ твое́й благоче́стія учи́тель; тѣ́мже хва́лимъ тя́, и мо́лимтися прилѣ́жно: моли́ Христа́ Бо́га спасти́ ду́ши на́ша.

И ны́нѣ, богоро́диченъ, [гла́съ то́йже:

Безневѣ́стная Дѣ́во, Яже Бо́га неизрече́нно заче́нши пло́тію, Ма́ти Бо́га Вы́шняго, Твои́хъ рабо́въ мольбы́ пріими́, Всенепоро́чная, всѣ́мъ подаю́щи очище́ніе прегрѣше́ній, ны́нѣ на́ша моле́нія пріе́млющи, моли́ спасти́ся всѣ́мъ на́мъ].

На стихо́внѣ сти́хиры, гла́съ 2. Подо́бенъ: Кíими похва́льными.

Кíими досто́йными похвала́ми* ублажи́мъ святи́теля Па́вла?* Но́ваго исповѣ́дника Це́ркве Ру́сскія* и преди́внаго чудотво́рца,* нетлѣ́нія прозябе́ніе прекра́сное* и моли́твенника богопрія́тнаго,* его́же небе́сными моли́твами,* Христо́съ Бо́гъ, благоувѣ́тливъ на́мъ быва́етъ,* и да́руетъ ве́лію ми́лость.

Сти́хъ: Честна́ предъ Го́сподемъ* сме́рть преподо́бныхъ Его́.

Кíими пѣ́сненными добро́тами* просла́вимъ святи́теля Па́вла?* Его́же сла́ва не отъ человѣ́къ, но отъ Бо́га* назна́менася нетлѣ́ніемъ и чудесы́,* исто́чника исцѣле́ній благода́тныхъ,* ми́лости пода́теля* и ско́рбныхъ утѣ́шителя любвеоби́льнаго,* моля́щася непреста́нно у престо́ла Христа́ Бо́га,* дарова́ти на́мъ отъ враго́въ избавле́ніе,* и ве́лію ми́лость.

Сти́хъ: Пра́ведникъ я́ко фи́никсъ процвѣте́тъ,* и я́ко ке́дръ, и́же въ Лива́нѣ, умно́жится.

Кíими побѣ́дными вѣнцы́* увязе́мъ святи́теля Па́вла?* До́браго во́ина Христо́ва,* не убоя́вшася гнѣ́вавшихся непра́ведно о пра́вдѣ Бо́жіей,* и противуста́вша наруши́телемъ пра́вилъ Святы́я Це́ркве,* ея́же достоя́ніе охраня́я,* изгна́ніе отъ престо́ла святи́тельскаго ра́достно прія́тъ;* того́ моли́твами, Христе́ Бо́же,* да́руй Це́ркви Твое́й ми́ръ и ве́лію ми́лость.

Сла́ва, гла́съ 3:

Святи́телю всече́стне, пра́вило вѣ́ры и́стинныя, о́бразе му́жества высо́каго, о́тче на́шъ Па́вле, по́стническимъ житіе́мъ благоукраси́вся, къ ли́ку преподо́бныхъ Пече́рскихъ соприче́лся еси́, съ ни́миже престо́лу Влады́чню предстоя́, моли́ Христа́ Бо́га, дарова́ти на́мъ прегрѣше́ній проще́ніе, и душа́мъ на́шимъ ми́ръ и ве́лію ми́лость.

И ны́нѣ, богоро́диченъ, [гла́съ то́йже]:

Безъ сѣ́мене отъ Боже́ственнаго Ду́ха [во́лею же Отчею зачала́ еси́ Сы́на Бо́жія, отъ Отца́ безъ ма́тере пре́жде вѣ́къ су́ща, на́съ же ра́ди, изъ Тебе́ безъ отца́ бы́вша, пло́тію родила́ еси́ и Младе́нца млеко́мъ пита́ла еси́. Тѣ́мже не преста́й моли́ти изба́витися отъ бѣ́дъ душа́мъ на́шимъ].

[На благослове́ніи хлѣ́бовъ: Тропа́рь святи́теля, два́жды [пи́санъ на ма́лѣй вече́рни] и Богоро́дице Дѣ́во.., еди́ножды.]



НА УТРЕНИ,
[На Бо́гъ Госпо́дь: Тропа́рь святи́теля, два́жды. Сла́ва, и ны́нѣ, богоро́диченъ.]

По 1-мъ стихосло́віи сѣда́ленъ, гла́съ 1:

Яко украше́ніе драго́е, и́мать тя́ Ла́вра Пече́рская, святи́телю Па́вле: въ не́й бо сокро́вище нетлѣ́нныхъ моще́й твои́хъ храни́мо е́сть, отъ ни́хже исцѣле́нія пресла́вно источа́еши, я́ко таи́нникъ Бо́жія благода́ти. [Два́жды.]

Сла́ва, и ны́нѣ, богоро́диченъ:

Всѣ́хъ Творца́ и Влады́ку, Бо́га же и Содѣ́теля, Всенепоро́чная Чи́стая, Ду́хомъ Боже́ственнымъ въ ложесна́хъ заче́нши, нетлѣ́нно родила́ еси́, Его́же сла́вяще, Тя́ велича́емъ, Дѣ́во, я́ко пала́ту всѣ́хъ Царя́, и мíра защище́ніе.

По 2-мъ стихосло́віи сѣда́ленъ, гла́съ 1:

Сто́лпъ непоколеби́мъ пра́вилъ церко́вныхъ бы́лъ еси́, святи́телю Па́вле приснопа́мятне, его́же вѣ́три суему́дрія человѣ́ческаго поколеба́ти не возмого́ша, тѣ́мже ны́нѣ бога́тство некра́домо исцѣле́ній яви́ся гро́бъ тво́й, блаже́нне, моли́твенниче о душа́хъ на́шихъ. [Два́жды.]

Сла́ва, и ны́нѣ, богоро́диченъ:

Ра́дуйся, златокова́нная ча́ше, Пречи́стая Дѣ́во, въ не́йже вино́ спаси́тельное отъ Ду́ха Свята́го на́мъ раствори́ся, его́же пію́щіи ктому́ не умира́ютъ: безсме́ртія бо вино́вное Сло́во родила́ еси́, на ра́дость на́мъ вѣ́чную.

По поліеле́и сѣда́ленъ, гла́съ 8:

Воздержа́ніемъ отъ ю́ности твоея́ пло́ть ду́ху покори́лъ еси́, о́тче, мона́хъ и́стиненъ бы́лъ еси́ нелицемѣ́рно, и просвѣти́вся богому́дрія уче́ніемъ, святи́тельства оде́ждею досто́йно украси́лся еси́, Па́вле богоно́сне, ны́нѣ со святи́тели престо́лу предстоя́ Христо́ву, моли́ся о душа́хъ на́шихъ. [Два́жды.]

Сла́ва, и ны́нѣ, богоро́диченъ:

Отъ любве́ душе́вныя вопію́ Ти, Влады́чице: моле́ніемъ богоуго́днаго святи́теля Па́вла, въ оби́тели Твое́й Пече́рстѣй чудесы́ просія́вшаго, преклони́ся на ми́лость ко мнѣ́ недосто́йному, моли́тву пріими́, Всеблага́я, со смире́ніемъ Тебѣ́ приноси́мую отъ болѣ́зненныя души́, и бу́ди ми́ здра́віе и спасе́ніе.

Степе́нна, 1-й антифо́нъ 4-го гла́са. Проки́менъ, [гла́съ 4]: Честна́ предъ Го́сподемъ* сме́рть преподо́бныхъ Его́. Сти́хъ: Что́ возда́мъ Го́сподеви о всѣ́хъ, я́же воздаде́ ми? Ева́нгеліе отъ Іоа́нна, зача́ло 35 отъ полу́.

По 50-мъ псалмѣ́ стихи́ра, гла́съ 6:

Боже́ственная благода́ть осѣня́етъ гро́бъ тво́й, святи́телю о́тче на́шъ Па́вле, и дѣ́йствуетъ во спасе́ніе приходя́щихъ къ тебѣ́ съ вѣ́рою: я́ко боля́щія исцѣля́еши, разсла́бленныя укрѣпля́еши, слѣпы́я просвѣща́еши и бѣ́сы отъ человѣ́къ прогоня́еши, чудеса́ излива́еши прикаса́ющимся моще́мъ твои́мъ святы́мъ; тѣ́мже тя́, цѣле́бниче безме́здный, почита́емъ и ублажа́емъ.

Кано́нъ [Богоро́дицы со ирмосо́мъ на 6, и святи́теля на 8], гла́съ 6, его́же краегране́сіе: Пою́ Це́ркви побо́рника святи́теля Па́вла.

Пѣ́снь 1.

Ирмо́съ: Яко по су́ху пѣшеше́ствовавъ Изра́иль по бе́зднѣ стопа́ми, гони́теля фарао́на ви́дя потопля́ема, Бо́гу побѣ́дную пѣ́снь пои́мъ, вопія́ше.

Пріими́, свя́тче Бо́жій, пѣ́ніе хвале́бное, отъ и́стиннаго усе́рдія тебѣ́ приноси́мое, и простри́ моли́твенныя дла́ни твоя́ ко Го́споду, прося́ на́мъ осія́нія благода́тнаго свы́ше, да твое́ богоуго́дное житіе́ вѣ́рно просла́вимъ, Бо́гу, въ тебѣ́ просла́вльшемуся, побѣ́дную пѣ́снь воспѣва́я.

Отъ юности твоея́, о́тче Па́вле, по́стническое житіе́ возлюби́лъ еси́, уче́ніи богодухнове́нными просвѣти́въ тво́й смы́слъ, содѣ́лался еси́ сосу́дъ избра́нъ Бо́жія благода́ти, я́же тя́ возвы́си на степе́нь святи́тельскую, я́ко досто́йнаго Бо́гу побѣ́дную пѣ́снь воспѣва́ти.

Юношескія стра́сти обузда́въ воздержа́ніемъ, въ Ла́врѣ Пече́рстѣй благíй яре́мъ Христо́въ на ра́мо твое́ возложи́лъ еси́, Па́вле преподо́бне, и́нокъ бы́въ нелицемѣ́ренъ, во смире́ніи ду́ха Бо́гу побѣ́дную пѣ́снь воспѣва́вый.

Богоро́диченъ: Царя́ Небе́снаго, на херуви́мѣхъ сѣдя́щаго, и серафи́мы повелѣва́ющаго, престо́лъ яви́лася еси́, Богоро́дице, къ Нему́же дерзнове́ніе Ма́тернее имѣ́ющи, проси́ на́мъ у Его́ бла́гости грѣхо́въ проще́нія и житія́ исправле́нія, да тебѣ́ благода́рное пѣ́ніе воспѣва́емъ.

Пѣ́снь 3.

Ирмо́съ: Нѣ́сть свя́тъ, я́коже Ты́, Го́споди Бо́же мо́й, вознесы́й ро́гъ вѣ́рныхъ Твои́хъ, Бла́же, и утверди́вый на́съ на ка́мени исповѣ́данія Твоего́.

Естества́ человѣ́ческаго не́мощь познава́я, моли́твами непреста́нными къ Бо́гу, си́лу свы́ше прія́лъ еси́, по́двиги духо́вныя непреткнове́нно проходи́ти, на ка́мени вѣ́ры утверди́въ, о́тче Па́вле, твое́ боголюби́вое се́рдце.

Ра́зумъ тво́й богосло́віемъ Правосла́вныя вѣ́ры украси́лъ еси́, Па́вле богоно́се, соиме́нному ти́ апо́столу Христо́ву внима́я съ любо́вію, и того́ уче́нія полага́я я́ко пра́вило жи́зни, дости́глъ еси́ исполне́нія духо́внаго, въ Бо́зѣ утверди́въ твоя́ помышле́нія.

Къ исто́чнику сла́достному ева́нгельскаго уче́нія, я́ко еле́нь на исто́чники водны́я, поте́клъ еси́, Па́вле богому́дре, и я́ко дре́во, при вода́хъ возра́сшее, пло́дъ мно́гъ о Христѣ́ прине́слъ еси́ Святѣ́й Це́ркви, я́же е́сть сто́лпъ и утвержде́ніе и́стины.

Богоро́диченъ: Во мно́гія и лю́тыя беззако́нія впа́дшія ны́, Влады́чице Преблага́я, изба́ви отъ плѣ́на страсте́й, и въ страну́ безстра́стія приведи́, руко́ю Твое́ю держа́вною, утверди́въ на́ша сердца́ на ка́мени за́повѣдей Сы́на Твоего́ и Бо́га.

Сѣда́ленъ, гла́съ 6:

Помышля́я тя́, святи́телю, въ черто́зѣ небе́снѣмъ Царя́, Христа́ и Бо́га, сла́вою и че́стію увѣнча́ннаго, уязвля́юся се́рдцемъ, тоя́ же добро́ты жела́ющи, но увы́ мнѣ́ окая́нному, чу́ждому дѣ́лъ твоего́ житія́ блага́го, недосто́йному спасе́нія вѣ́чнаго, ты́ са́мъ, преблагíй о́тче, воззри́ на мя́ погиба́ющаго, и ру́ку по́мощи твоея́ мнѣ́ простри́, бога́тствы твои́ми воспо́лни мою́ душе́вную ску́дость, и покажи́ мя́ наслѣ́дника Ца́рства Христо́ва. [Два́жды.]

Сла́ва, и ны́нѣ, богоро́диченъ:

Свя́занъ мно́гими ны́нѣ плени́цами грѣхо́въ, и содержи́мь лю́тыми страстьми́ и бѣда́ми, къ Тебѣ́ прибѣга́ю, моему́ спасе́нію, и вопію́: помози́ ми, Дѣ́во, Ма́ти Бо́жія.

Пѣ́снь 4.

Ирмо́съ: Христо́съ моя́ си́ла, Бо́гъ и Госпо́дь, честна́я Це́рковь боголѣ́пно пое́тъ, взыва́ющи, отъ смы́сла чи́ста, о Го́сподѣ пра́зднующи.

Истинный ра́бъ Христа́ Спаси́теля бы́лъ еси́, святи́телю богоблаже́нне, на Того́ бо вы́ну взира́я у́мныма очесы́ се́рдца, жи́знь твою́ въ за́повѣдехъ Его́ соверши́лъ еси́, смы́сломъ чи́стымъ испыту́я та́йны, въ Зако́нѣ Бо́жіемъ сокрове́нныя, и досто́йнымъ открыва́емыя отъ Го́спода.

Преподо́біемъ и чистото́ю украси́вся измла́да, святи́телю Па́вле, на престо́лѣ архіере́йстѣмъ поста́вился еси́ отъ Пастыренача́льника Іису́са, я́ко свѣти́льникъ горя́й и свѣтя́й; моли́твами твои́ми, свя́те, освѣти́ и на́ша мра́чныя ду́ши, да по́мощію твое́ю у́зримъ свѣ́тъ спасе́нія о Го́сподѣ.

Отъ ю́га Россíи возра́слъ еси́, о́тче, я́ко вѣ́твь благопло́дная, и въ сѣ́верную Сиби́рскую страну́ по́сланъ бы́лъ еси́ пасти́ ста́до Христо́во: Тобо́льская всеосвяще́нная Це́рковь тя́ па́стыря до́браго стяжа́, побо́рника и защи́тника ея́ достоя́нія.

Богоро́диченъ: Въ Тебѣ́, Чи́стая, исповѣ́дуемъ во дву́ естеству́ бы́ти, во еди́но прекра́сно соедини́вшіяся спасе́нія ра́ди на́шего. Того́ моли́, Благода́тная, раздѣле́нныя ны́ грѣхопаде́ньми отъ Его́ благода́ти, па́ки соедини́ти съ Собо́ю та́инствами святы́я Це́ркве.

Пѣ́снь 5.

Ирмо́съ: Бо́жіимъ свѣ́томъ Твои́мъ, Бла́же, у́тренюющихъ Ти́ ду́ши любо́вію озари́, молю́ся, Тя́ вѣ́дѣти, Сло́вѣ Бо́жій, и́стиннаго Бо́га, отъ мра́ка грѣхо́внаго взыва́юща.

Отъ и́стинныя любве́ къ Бо́гу и Его́ святѣ́й Це́ркви, святи́телю Па́вле, не терпѣ́лъ еси́ взя́тія церко́внаго достоя́нія, но сему́ му́жески противуста́лъ еси́, изгна́ніе отъ престо́ла твоего́ претерпѣ́въ, я́ко вои́стинну исповѣ́дникъ пра́вды Бо́жія.

Разумѣ́вши отъ видѣ́нія свы́ше твоего́ по́двига пра́вость, Благовѣ́рная Цари́ца, по жела́нію твоему́, святи́телю Па́вле, въ Ла́вру Пече́рскую жи́тельствовати тя́ посыла́етъ, да идѣ́же постриже́нъ бы́лъ еси́ во и́ночество, та́мо сконча́еши живо́тъ тво́й въ по́двизѣхъ поста́ и моли́твы.

Нищету́ духо́вную возлюби́въ, о́тче богому́дре, зла́то, Цари́цею тебе́ по́сланное, прія́ти не восхотѣ́лъ еси́, до́ндеже не бы́сть оно́ назначе́но на благу́ю потре́бу Ла́вры Пече́рскія, въ не́йже па́че зла́та дража́йшія, честву́емъ ны́нѣ твоя́ многоцѣле́бныя мо́щи.

Богоро́диченъ: Изумѣва́етъ вся́къ у́мъ человѣ́ческій, Твоего́ приснодѣ́вства ве́лію та́йну пости́гнути, Богоро́дице, ка́ко въ рождествѣ́, и по рождествѣ́, дѣ́вство сохрани́ла еси́ нетлѣ́нно, тѣ́мже, испыта́ніе су́етное о се́мъ отве́ргше, правосла́вно и несомнѣ́нно Ма́терь Дѣ́ву Тя́ исповѣ́дуемъ, мо́лимтися прилѣ́жно: въ чистотѣ́ и цѣлому́дріи на́съ утверди́, Всеблага́я.

Пѣ́снь 6.

Ирмо́съ: Жите́йское мо́ре, воздвиза́емое зря́ напа́стей бу́рею, къ ти́хому приста́нищу Твоему́ прите́къ, вопію́ Ти: возведи́ отъ тли́ живо́тъ мо́й, Многоми́лостиве.

Къ ли́ку преподо́бныхъ оте́цъ Пече́рскихъ причте́нъ бы́ти сподо́бился еси́ отъ Го́спода, святи́телю Па́вле, Иже яви́ на́мъ твоя́ нетлѣ́ніемъ процвѣ́тшія мо́щи, и чудесы́ отъ ни́хъ истека́ющими всѣ́хъ увѣря́етъ, я́ко вои́стину уго́дникъ еси́ Бо́жій, и моли́твенникъ многомо́щный о душа́хъ на́шихъ.

Аще и въ послѣ́дняя лѣ́та пожи́лъ еси́, святи́телю преподо́бне, но съ дре́вними святы́ми соравни́лся еси́ дарми́ исцѣле́ній, я́же источа́ютъ на́мъ твоя́ святы́я мо́щи, я́ко цвѣ́тъ ра́йскій, благоуха́ніемъ святы́ни услажда́ющія ду́ши на́ша.

Свѣ́томъ небе́снымъ осія́нный яви́лся еси́, свя́тче Бо́жій, Кíевскому митрополи́ту Евге́нію, ему́ повелѣ́въ, да обрѣ́тенный гро́бъ тво́й оста́витъ въ поко́и. Тѣ́мже со слеза́ми мно́гими и усе́рднымъ моле́ніемъ, припаде́ о́нъ къ твои́мъ тлѣ́нію неприча́стнымъ моще́мъ, во всеуслы́шаніе исповѣ́дуя твое́ посѣще́ніе.

Богородиченъ: Въ пучи́нѣ мо́ря жите́йскаго лю́тѣ бѣ́дствуемъ, и боя́щеся потопле́нія грѣхо́внаго, къ Тебѣ́, Ма́ти Бо́жія, вопіе́мъ отъ души́: помози́ на́мъ, и не попусти́ погрузи́тися въ про́пасть поги́бели, но изведи́ на́съ, Блага́я, на зла́чную па́жить спасе́нія, да сла́вимъ моли́твъ Твои́хъ си́лу, и благослови́мъ и́мя Твое́ во вѣ́ки.

Конда́къ, гла́съ 8:

Вы́шнія красоты́ жела́я, святи́телю Па́вле, въ мíрѣ премíрно пожи́лъ еси́, нището́ю, воздержа́ніемъ и непреста́нными моли́твами предочища́я себе́ къ небе́снѣй сла́вѣ. Це́ркве побо́рникъ бы́въ, пра́вды ра́ди Бо́жія мно́гія ско́рби претерпѣ́лъ еси́, и исповѣ́данія до́блестію укра́шенъ, вше́лъ еси́ въ ра́дость Го́спода твоего́, Его́же моли́ непреста́нно о всѣ́хъ на́съ.

Икосъ:

Подража́вый соиме́нному ти́ апо́столу язы́ковъ въ небоя́зненномъ исповѣ́даніи, святи́телю Па́вле, не убоя́лся еси́ гнѣ́вавшихся на тя́ си́льныхъ мíра сего́, но о пра́вдѣ Бо́жіей му́жески свидѣ́тельствовалъ еси́ предъ ни́ми; сего́ ра́ди престо́лъ тво́й святи́тельскій оста́вити принужде́нъ бы́лъ еси́, и мно́гія ско́рби претерпѣ́въ крѣ́пости ра́ди исповѣ́данія твоего́, въ Ла́врѣ Пече́рстѣй ти́хое приста́нище спасе́нія себѣ́ обрѣ́лъ еси́, идѣ́же свя́то сконча́въ жи́знь земну́ю, ко Го́споду преше́лъ еси́ въ селе́нія святы́хъ, но, я́ко имѣ́яй дерзнове́ніе у престо́ла Христо́ва, моли́ся непреста́нно о всѣ́хъ на́съ.

Пѣ́снь 7.

Ирмо́съ: Росода́тельну у́бо пе́щь содѣ́ла а́нгелъ преподо́бнымъ отроко́мъ, халде́и же опаля́ющее велѣ́ніе Бо́жіе, мучи́теля увѣща́ вопи́ти: благослове́нъ еси́, Бо́же оте́цъ на́шихъ.

Яко звѣзда́ путево́дная свѣ́тиши всѣ́мъ, хотя́щимъ жи́ти въ преподо́біи и чистотѣ́, святи́телю о́тче на́шъ Па́вле, оста́вивъ бо престо́лъ тво́й святи́тельскій, въ Ла́врѣ Пече́рстѣй ре́вностно подвиза́лся еси́ въ бдѣ́ніихъ, поще́ніихъ и моли́твахъ непреста́нныхъ, во умерщвле́нномъ тѣлеси́ сла́дцѣ воспѣва́я: благослове́нъ еси́, Бо́же оте́цъ на́шихъ.

Ти́хо и богоуго́дно сконча́въ жи́знь твою́ земну́ю, святи́телю, я́ко пшени́ца зрѣ́лая, пожа́тъ бы́лъ еси́ и преста́вился еси́ въ небе́сную жи́тницу Христо́ву, въ ра́дость вѣ́чную святы́хъ, идѣ́же подвиго́мъ твои́мъ воздая́ніе блаже́нное прія́въ, со безпло́тными зове́ши: благослове́нъ еси́, Бо́же оте́цъ на́шихъ.

Испо́лнися на тебѣ́, о́тче, рече́ніе Христо́во: блаже́ни изгна́ни пра́вды ра́ди, я́ко тѣ́хъ е́сть Ца́рство Небе́сное. Се́ блаже́нъ еси́ вои́стину, блаже́нство Ца́рствія Христо́ва унаслѣ́дивый, и отъ страны́ изгна́нія, въ оте́чество небе́сное воспрія́тый бла́гостію человѣколю́бца Бо́га, Ему́же во гла́сѣ ра́дованія и хвале́нія вопіе́ши: благослове́нъ еси́, Бо́же оте́цъ на́шихъ.

Богоро́диченъ: Тебе́ необори́мую стѣ́ну, и спасе́нія хода́таицу стяжа́хомъ, Богоро́дице Дѣ́во; Тобо́ю хва́лимся, смире́нніи и грѣ́шніи, иму́ще Тя́ покро́въ и защи́ту отъ враго́въ на́шихъ; Тебѣ́ у́бо мо́лимся, Влады́чице, помози́ рабо́мъ Твои́мъ, и изба́ви на́съ отъ поги́бели вѣ́чныя.

Пѣ́снь 8.

Ирмо́съ: Изъ пла́мене преподо́бнымъ ро́су источи́лъ еси́ и пра́веднаго же́ртву водо́ю попали́лъ еси́: вся́ бо твори́ши, Христе́, то́кмо е́же хотѣ́ти. Тя́ превозно́симъ во вся́ вѣ́ки.

Его́же возлюби́лъ еси́, Его́же ра́ди и подвиза́лся еси́, святи́телю, Христо́съ Госпо́дь, То́й воздаде́ тебѣ́ ще́дрою руко́ю мзду́ небе́сную, и я́ко вѣ́рный ра́бъ Его́, вше́лъ еси́ въ ра́дость черто́га Его́ пресвѣ́тлаго, идѣ́же не забу́ди на́съ, о́тче, въ моли́твахъ твои́хъ благопрія́тныхъ къ Бо́гу, превозноси́мому во вѣ́ки.

Лице́ Христо́во пресвѣ́тлое и превожделѣ́нное созерца́еши, святи́телю, и со святы́ми предстои́ши престо́лу Го́спода Сла́вы, просла́вльшаго тя́ на небеси́ и на земли́: на небеси́ блаже́нства ра́йскаго наслажда́ешися, на земли́ же нетлѣ́ніемъ и чудесы́ вѣ́рныя просвѣща́еши, приводя́ и́хъ къ славосло́вію Бо́га, превозноси́маго во вѣ́ки.

Яко алава́стръ враче́бный и сокро́вище исцѣле́ній, и́мать Ла́вра Пече́рская ра́ку моще́й твои́хъ святы́хъ, о́тче Па́вле, но́вый исповѣ́дниче Це́ркве Ру́сскія, исповѣ́даніе бо твое́ процвѣте́ нетлѣ́ніемъ и чудесы́, и си́ми я́сно свидѣ́тельствуетъ, я́ко благоуго́дно бы́сть Бо́гу, превозноси́мому во вѣ́ки.

Богоро́диченъ: Пречи́стая Богоро́дице Дѣ́во, въ Пече́рстѣй оби́тели Твое́й са́дъ духо́венъ возрасти́вшая преподо́бныхъ оте́цъ, чудесы́ просія́вшихъ во вселе́ннѣй, въ ни́хже и Па́велъ святи́тель просла́вися да́ры благода́тными, умоли́ съ ни́ми покланя́емую Тро́ицу, поми́ловати на́съ, обнища́вшихъ грѣхопаде́ньми, и не лиши́ти спасе́нія вѣ́чнаго.

Пѣ́снь 9.

Ирмо́съ: Бо́га человѣ́комъ невозмо́жно ви́дѣти, на Него́же не смѣ́ютъ чи́ни а́нгельстіи взира́ти; Тобо́ю бо, Всечи́стая, яви́ся человѣ́комъ Сло́во воплоще́нно, Его́же велича́юще, съ небе́сными во́и, Тя́ ублажа́емъ.

Ада и сме́рти побѣди́тель Христо́съ, по сме́рти нетлѣ́ніемъ тя́ почте́, святи́телю приснопа́мятне, си́мъ показу́я, я́ко душа́ твоя́ жива́ во вѣ́ки о Го́сподѣ пребыва́етъ, въ блаже́нствѣ невече́рнемъ святы́хъ; его́же дости́гнути, о́тче, и на́съ сподо́би твои́ми моли́твами.

Вели́каго въ добродѣ́телехъ, вели́кими чудесы́ Бо́гъ тя́ просла́ви, святи́телю Па́вле, яви́въ на́мъ твоя́ нетлѣ́нныя мо́щи во врачевство́ неду́гомъ душе́внымъ и тѣле́снымъ, и́мже усе́рдно покланя́ющеся, тя́, засту́пника на́шего, по до́лгу ублажа́емъ.

Любо́вію тя́ воспѣва́ющихъ, святи́телю блаже́нне, и честву́ющихъ усе́рдно твою́ святу́ю па́мять, не лиши́ предста́тельства твоего́ небе́снаго: искуше́нный по вся́ческимъ, и на́мъ, искуша́емымъ, помози́, да тя́ немо́лчно ублажа́емъ.

Богоро́диченъ: Аще и мно́го согрѣша́емъ, но не отчаява́емся покро́ва твоего́, Влады́чице, Спору́чнице грѣ́шныхъ и Взыска́ніе поги́бшихъ отъ на́съ имену́емая, по достоя́нію Твоего́ къ на́мъ милосе́рдія; тѣ́мже воззри́ на на́съ Ма́тернею любо́вію, и возста́ви отъ паде́нія грѣхо́внаго, да Тя́, Помо́щницу на́шу, немо́лчно ублажа́емъ.

Свѣти́ленъ:

Звѣзда́ пресвѣ́тлая, отъ Тобо́льска въ Кíевъ прише́дшая, явля́ешися вѣ́рнымъ, святи́телю о́тче на́шъ Па́вле: сія́ніемъ бо чуде́съ твои́хъ, всѣ́мъ зарю́ безсме́ртія я́сно показу́еши, и человѣ́ки ублажа́еши преоби́дѣти сла́дкая, да возмо́гутъ, я́коже и ты́, стяжа́ти возме́здіе небе́сное и вѣ́чную сла́ву святы́хъ. [Два́жды.]

Сла́ва, и ны́нѣ, богоро́диченъ:

Госпоже́ Богоро́дице, христіа́нъ Засту́пнице, поми́луй на́съ, грѣ́шныхъ, и въ добродѣ́тели укрѣпи́, соблюди́ на́съ Твои́мъ покро́вомъ, да на́глая сме́рть не похи́титъ на́съ негото́выхъ, и доведи́ на́съ, Дѣ́во, въ го́рнее Ца́рство и вѣ́чную сла́ву святы́хъ.

На хвали́техъ стихи́ры [на 4], гла́съ 5. Подо́бенъ: Ра́дуйся.

Ра́дуйся, святи́телю всече́стне,* Па́вле богоно́сне,* Влады́ки Христа́ таи́нниче и учениче́,* вѣ́ренъ Ему́ до конца́ пребы́вый:* тебе́ бо, о́тче, ни ско́рби, ни гоне́нія* не отторго́ша отъ любве́ Христо́вы,* ю́же исповѣ́даніемъ и защи́тою пра́вилъ Це́ркве* я́сно свидѣ́тельствовалъ еси́,* тебѣ́ ны́нѣ засту́пника и́мамы на небеси́,* уго́дниче Бо́жій,* и съ вѣ́рою тебѣ́ мо́лимся:* пода́ждь на́мъ отъ ду́ха ре́вности твоея́ по Бо́зѣ,* укрѣпи́ ны́ непоколеби́мы въ Правосла́віи,* и моли́ся Христу́, дарова́ти на́мъ ве́лію ми́лость. [Два́жды.]

Ра́дуйся, главо́ освяще́нная,* ра́зума боже́ственнаго преиспо́лненная,* Ду́ха Свята́го благода́тію пріосѣне́нная:* твоего́ по́двига до́блестію* вся́ ны́ поуча́еши, о́тче,* ничто́же предпочита́ти па́че любве́ Христо́вы,* и вѣ́рности уста́вомъ святы́я апо́стольскія Це́ркве,* и́хже ты́ вѣ́рный побо́рникъ бы́лъ еси́,* ско́рби претерпѣ́вый пра́вды ра́ди Бо́жія.* Преклони́ся ны́нѣ къ моли́твамъ на́шимъ,* святи́телю богому́дре Па́вле,* и научи́ ны́ твоему́ богому́дрію высо́кому,* да возмо́жемъ вѣ́рно соверша́ти за́повѣди Христа́ Бо́га,* Его́же моли́ дарова́ти на́мъ ве́лію ми́лость.

Ра́дуйся, архіере́омъ боже́ственное удобре́ніе,* красото́ Це́ркве Ру́сскія* и Ла́вры Пече́рскія при́сное ра́дованіе:* твои́ми свяще́нными уче́ньми* и о́бразомъ житія́ твоего́, святи́телю Па́вле,* вся́ вѣ́рныя просвѣща́еши благода́тно,* и къ славосло́вію Бо́га приво́диши,* я́ко въ на́ша послѣ́дняя лѣ́та,* такова́го свѣти́льника и чудотво́рца на́мъ дарова́,* въ нетлѣ́ніи почíющаго* и цѣле́бныя струи́ оби́льно источа́ющаго.* Тѣ́мже па́мять твою́ святу́ю вѣ́рно соверша́емъ* и мо́лимтися прилѣ́жно:* моли́ Христа́ Бо́га, дарова́ти на́мъ ве́лію ми́лость.

Сла́ва, гла́съ 6:

Святи́телю богоблаже́нне, сто́лпе Це́ркве непревра́тный, побо́рниче Правосла́вія, отъ у́тра жи́зни твоея́ на стра́же благоче́стія стоя́лъ еси́, и до ве́чера сме́ртнаго въ по́двизѣхъ духо́вныхъ неосла́бно пребыва́лъ еси́, о́тче на́шъ Па́вле, Ца́рствія Христо́ва наслѣ́дниче и Бо́гомъ просла́вленный чудотво́рче, не премолчи́ вопія́ за ны́ ко Го́споду.

И ны́нѣ, богоро́диченъ:

Никто́же, притека́яй къ Тебѣ́, [посра́мленъ отъ Тебе́ исхо́дитъ, Пречи́стая Богоро́дице Дѣ́во, но про́ситъ благода́ти и пріе́млетъ дарова́ніе къ поле́зному проше́нію].

Славосло́віе вели́кое. [Ектеніи́ и отпу́стъ.]



НА ЛИТУРГІИ,

Слу́жба вся́ о́бщая святи́тельская: [Блаже́нна, отъ кано́на святи́теля пѣ́снь 3 и 6. Проки́менъ, гла́съ 1: Уста́ моя́ возглаго́лютъ прему́дрость,* и поуче́ніе се́рдца моего́ ра́зумъ. Сти́хъ: Услы́шите сія́ вси́ язы́цы, внуши́те вси́ живу́щіи по вселе́ннѣй. Апо́столъ ко Евре́омъ, зача́ло 318. Аллилу́ія, гла́съ 2: Уста́ пра́веднаго поуча́тся прему́дрости, и язы́къ eго́ возглаго́летъ су́дъ. Сти́хъ: Зако́нъ Бо́га его́ въ се́рдцѣ его́, и не за́пнутся стопы́ eго́. Ева́нгеліе Іоа́нна, зача́ло 36. Прича́стенъ: Въ па́мять вѣ́чную бу́детъ пра́ведникъ, отъ слу́ха зла́ не убои́тся].

Источникъ: Пече́рская Минíа. [Ча́сть втора́я.] — Кíевъ: Въ тѵпогра́фіи Кíево-Пече́рскія Ла́ѵры, 2007. — С. 128-143.

/ Къ оглавленію раздѣла /


Наверхъ / Къ титульной страницѣ

0