Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - понедѣльникъ, 26 iюня 2017 г. Сейчасъ на порталѣ посѣтителей - 24.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Ное́мврія въ 3-й де́нь.
Святы́хъ му́ченикъ Акепси́мы епи́скопа, Іо́сифа пресви́тера и Аиѳа́ла діа́кона и обновле́ніе хра́ма свята́го великому́ченика Гео́ргія, и́же въ Ли́дѣ, идѣ́же положено́ е́сть честно́е тѣ́ло его́.

[ВЕЧЕРЪ,]
На Го́споди воззва́хъ: стихи́ры му́чениковъ, гла́съ 8. Подо́бенъ: О, пресла́внаго чудесе́!

О, пресла́внаго чудесе́!* Акепси́ма кра́сный,* му́ченикомъ служи́тель,* пѣ́сней увязе́ніемъ вѣнча́ется дне́сь,* богоя́звенная страда́нія предлага́етъ* и острупля́етъ врага́ безпло́тнаго.* О, каковы́я получи́ многода́рныя благода́ти!* Его́же моли́твами* спаси́ ду́ши на́ша, Христе́,* я́ко Милосе́рдъ.

О, пресла́внаго чудесе́!* Отъ Перси́ды звѣзда́,* Іо́сифъ возсія́,* волше́бную ме́рзость разруша́я Ду́хомъ,* кро́вными струя́ми погаси́ огня́ служе́ніе безбо́жія.* О, крѣ́пости, е́юже низложи́ де́моны!* Того́ моли́твами* спаси́ ду́ши на́ша, Христе́,* я́ко Милосе́рдъ.

О, пресла́внаго чудесе́!* Аиѳа́лъ тве́рдый* страда́нія побо́рникъ тезоимени́тъ явля́ется,* са́дъ присноцвѣту́щій,* и, рѣ́жемь, цвѣте́тъ ра́нами,* и, уже́ умерщвля́емь, жи́ти начина́етъ.* О, крѣ́пости естества́, ю́же претерпѣ́!* Того́ моли́твами* спаси́ ду́ши на́ша, Христе́,* я́ко Милосе́рдъ.

Ины стихи́ры свята́го Гео́ргія, гла́съ 4. Подо́бенъ: Яко до́бля.

Страстоте́рпче Гео́ргіе,* а́нгеловъ собесѣ́дниче* и му́чениковъ ссе́льниче,* прибѣ́жище скорбя́щихъ всегда́,* приста́нище утише́нія* пла́вающему и мнѣ́ въ житіи́ бу́ди* и упра́ви, молю́ тя, жи́знь мою́:* я́ко да вѣ́рою несомнѣ́нною ублажа́ю* па́че естества́ по́двиги твоя́.

Въ мо́ри мя́ пла́вающа,* на пути́ ше́ствующа,* въ нощи́ спя́ща, соблюди́,* бдя́щу просвѣти́* у́мъ мо́й, Гео́ргіе,* и наста́ви твори́ти во́лю Госпо́дню,* я́ко да обря́щу въ де́нь Су́дный* въ житіи́ содѣ́янныхъ ми́ разрѣше́ніе,* прибѣга́я въ кро́въ тво́й, сла́вне.

Вѣ́ры броня́ми,* и щито́мъ благода́ти,* и Креста́ копіе́мъ огради́вся,* сопроти́внымъ непобѣди́мь бы́лъ еси́, Гео́ргіе,* и, я́ко боже́ственный храбо́рникъ,* де́монскія полки́ побѣди́въ,* со а́нгелы лику́еши,* вѣ́рныя же, сохраня́я, освяща́еши* и спаса́еши, призыва́емь.

Сла́ва, гла́съ 6:

Досто́йно и́мене жи́тельствовалъ еси́, во́ине Гео́ргіе: кре́стъ бо Христо́въ на ра́мена взе́мъ, отъ діа́вольскія ле́сти оляденѣ́вшую зе́млю до́брѣ воздѣ́лалъ еси́ и, терно́вное служе́ніе искорени́въ и́дольское, Правосла́вныя вѣ́ры ло́зу насади́лъ еси́. Тѣ́мже то́чиши врачева́нія во все́й вселе́ннѣй вѣ́рнымъ и Тро́ицы дѣ́латель пра́веденъ показа́лся еси́. Моли́, мо́лимся, о ми́рѣ мíра и спасе́ніи ду́шъ на́шихъ.

И ны́нѣ, богоро́диченъ или́ крестобогоро́диченъ. Подо́бенъ: Тридне́венъ.

На дре́вѣ Живо́тъ на́шъ зря́щи, Всенепоро́чная Богоро́дица, ви́сящъ, ма́терски рыда́ющи, вопія́ше: Сы́не Мо́й и Бо́же Мо́й, спаси́ любо́вію пою́щія Тя́.

На стихо́внѣ окто́иха. Сла́ва святы́хъ, гла́съ 6. Ефре́ма Карíя.

Предпу́тіе обра́зно трисія́ннаго ва́шего единоу́мія и во Христѣ́ муче́нія, неизрече́нныя Тро́ицы и пресу́щественныя Еди́ницы, страда́льцы, и́же въ Перси́дѣ неопа́льни соблю́дшеся, тріе́ о́троцы бы́ша: я́ко бо они́, на пла́мень дерзну́вше, Бо́гу не досади́ша, та́ко и вы́ умре́ти не отреко́стеся, не пощадѣ́вшеся Христо́вою любо́вію; но я́ко во о́нѣхъ яви́выйся Четве́ртый въ пла́мени ороша́ше, та́ко и ва́съ Христо́съ, Иже еди́нъ отъ Тро́ицы, прія́тъ въ мѣ́сто прохла́дное, Акепси́ма со Іо́сифомъ и Аиѳа́ла, богопрія́тніи, моли́теся о душа́хъ на́шихъ.

И ны́нѣ, богоро́диченъ или́ крестобогоро́диченъ. Подо́бенъ: Тридне́венъ.

Ви́дящи Тя́ распина́ема, Христе́, Тебе́ Ро́ждшая вопія́ше: что́ стра́нное е́же ви́жу та́инство, Сы́не Мо́й? Ка́ко на дре́вѣ умира́еши, пло́тію повѣ́шенъ, жи́зни Пода́телю?

Тропа́рь, гла́съ 4:

Му́ченицы Твои́, Го́споди, во страда́ніихъ свои́хъ вѣнцы́ прія́ша нетлѣ́нныя отъ Тебе́, Бо́га на́шего: иму́ще бо крѣ́пость Твою́, мучи́телей низложи́ша, сокруши́ша и де́моновъ немощны́я де́рзости. Тѣ́хъ моли́твами спаси́ ду́ши на́ша.

Сла́ва, Гео́ргія, гла́съ то́йже:

Яко плѣ́нныхъ свободи́тель и ни́щихъ защи́титель, немощству́ющихъ вра́чь, царе́й побо́рниче, побѣдоно́сче, великому́чениче Гео́ргіе, моли́ Христа́ Бо́га спасти́ся душа́мъ на́шимъ.

И ны́нѣ, богоро́диченъ или́ крестобогоро́диченъ.



НА УТРЕНИ,
Еди́нъ кано́нъ окто́иха со ирмосо́мъ на 6, и му́чениковъ на 4, и Гео́ргія на 4.

Кано́нъ му́чениковъ. Гла́съ 4.
Пѣ́снь 1.

Ирмо́съ: Отве́рзу уста́ моя́, и напо́лнятся Ду́ха, и сло́во отры́гну Цари́цѣ Ма́тери, и явлю́ся, свѣ́тло торжеству́я, и воспою́, ра́дуяся, Тоя́ чудеса́.

Тро́ицы равночи́сленніи Пресвяты́я, всебога́тіи, Тоя́ яви́стеся честнíи покло́нницы и предстоите́ престо́лу Тро́ичному, те́пліи засту́пницы притека́ющимъ къ ва́мъ.

Тро́ицы покло́нницы трисо́лнечныя су́ще, многобо́жія ле́сть, святíи, разруши́сте, претерпѣ́вше му́ки многообра́зныя и сме́рть непра́ведную, богоблаже́нніи.

Муче́нія пучи́ну безъ волне́нія преидо́сте вѣ́рою, блаже́нніи, и приста́сте къ безпеча́льному животу́, къ приста́нищу вы́шнія свѣ́тлости, въ сла́ву неизрече́нную.

Богоро́диченъ: Ра́дости на́мъ Хода́таица, я́ко пріе́мши исполне́ніе всего́ Божества́, яви́лася еси́, Пренепоро́чная. Тѣ́мъ вси́ Тебѣ́ ра́дость а́нгелову согла́сно зове́мъ, Богора́дованная.

Инъ кано́нъ свята́го Гео́ргія, его́же краегране́сіе: Дѣ́ланіе Бо́гу тя́ сла́влю, блаже́нне. Гла́съ 4.
Пѣ́снь 1.

Ирмо́съ: Триста́ты крѣ́пкія, Рожде́йся отъ Дѣ́вы, безстра́стія во глубинѣ́, души́ трича́стное потопи́, молю́ся, да Тебѣ́, я́ко въ тимпа́нѣ, во умерщвле́ніи тѣлесе́ побѣ́дное воспою́ пѣ́ніе.

Дѣ́ланіе Бо́жіе гобзу́ющее яви́лся еси́, пита́я вѣ́рныя подража́ніемъ благочести́вымъ, страстоте́рпче Гео́ргіе, па́мять твою́ свѣтоно́сную свяще́нно пра́зднующія и въ се́й те́пло тя́ сла́вящія.

Разжже́ твое́, страстоте́рпче, се́рдце боже́ственное раче́ніе вои́стинну, самозва́нъ тѣ́мъ къ мучи́телемъ прише́лъ еси́, попаля́я многобо́жія пре́лесть и ра́зумъ свѣ́тлости облиста́я спасе́нія.

Яко ле́въ, упова́я, суди́щу предста́лъ еси́, возвѣща́я я́вственно воплоще́ніе Христо́во, Имже мíръ изба́вися паде́нія дре́вняго, пе́рвое прія́тъ благопло́діе, треблаже́нне Гео́ргіе.

Богоро́диченъ: Избавля́я на́съ осужде́нія дре́вняго, Сы́нъ Бо́жій бы́сть Сы́нъ Дѣ́вы я́ко Человѣ́къ, тѣ́мъ Сего́ во двою́ существу́ и хотѣ́нію правовѣ́рнымъ се́рдцемъ сла́вимъ.

Пѣ́снь 3.

Ирмо́съ: Не му́дростію, и си́лою, и бога́тствомъ хва́лимся, но Тобо́ю, Отчею ѵпоста́сною Му́дростію, Христе́: нѣ́сть бо свя́тъ, па́че Тебе́, Человѣколю́бче.

Не въ му́дрости е́ллинскаго су́етія, му́дріи, но ра́зумомъ боже́ственнымъ безбо́жіе обличи́сте пе́рсское, укори́вше си́хъ безу́міе.

Священнонача́лія просвѣще́нъ боже́ственнымъ помаза́ніемъ, свяще́нный Акепси́мо, муче́нія же кро́вію себе́ украси́лъ еси́, богоблаже́нне.

Сокруше́ніе твои́хъ удо́въ, Іо́сифе приснопа́мятне, преле́стныя ко́зни до конца́, му́чениче, сокруши́, тебѣ́ же исхода́таи сла́ву нетлѣ́нную.

Богоро́диченъ: Тя́ Му́дрость Бо́жія чистѣ́йшее селе́ніе обрѣ́тши, отъ Твои́хъ чи́стыхъ крове́й воплоти́ся и по Рождествѣ́ нетлѣ́нну яви́.

Инъ.

Ирмо́съ: Лу́къ си́льныхъ изнемо́же, и немощству́ющіи препоя́сашася си́лою, сего́ ра́ди утверди́ся въ Го́сподѣ се́рдце мое́.

Ро́да и оте́чества сла́вы ра́достію отве́ргся, Христу́ послѣ́довалъ еси́ и Го́рняго Сіо́на жи́тель, му́чениче, яви́лся еси́ краснѣ́йшій. [Два́жды.]

Да наслѣ́дникъ изя́щенъ и покори́въ, Жива́го Бо́га сы́нъ яви́шися, претерпѣ́лъ еси́ ра́ны треволне́нія мучи́телей, му́чениче до́блій.

Богоро́диченъ: Во всего́ Ада́ма одѣ́яся, Иже милосе́рдія ра́ди Но́вый Ада́мъ бы́сть изъ Тебе́, Пренепоро́чная, еди́нъ сы́й человѣ́ковъ Созда́тель.

Конда́къ святы́хъ, гла́съ 2. Подо́бенъ: Вы́шнихъ ища́.

Боже́ственная, му́дре, непоро́чно тайноводи́лъ еси́, же́ртва прія́тна бы́лъ еси́, богоблаже́нне: Христо́ву бо пи́лъ еси́ ча́шу сла́вно, свя́те Акепси́мо, со страда́льцы твои́ми, моля́ся непреста́нно о всѣ́хъ на́съ.

Икосъ:

Кто́ отъ вѣ́рныхъ возмо́жетъ отню́дъ досто́йно воспѣ́ти прему́драго свяще́нника Акепси́ма, свѣти́льника Христо́ва? То́й бо разруши́ пре́лесть и́дольскую и посрами́ де́монская ухищре́нія крѣ́пкою си́лою Спа́са Христа́ Бо́га, Тро́ицѣ Пресвятѣ́й благоче́стно покланя́тися наказу́я, Отца́ и Сы́на и Свята́го Ду́ха во еди́номъ Божествѣ́ почита́ти, моля́ся непреста́нно о всѣ́хъ на́съ. Сѣда́ленъ му́чениковъ, гла́съ 8. Подо́бенъ: Прему́дрости.

Іо́сифъ, до́блій подви́жникъ, Акепси́ма, пре́лести губи́тель и Аиѳа́лъ сла́вный, страда́лецъ непобѣди́мый, свѣ́тлыя звѣ́зды, вѣ́рными въ пѣ́снехъ досто́йно вои́стинну да восхва́лятся дне́сь: сíи бо пре́лесть пе́рсовъ очерни́ша, со́лнцу не поже́рше, ни огня́ поче́тше; къ ни́мже любо́вію возопіе́мъ: моли́те Христа́ Бо́га грѣхо́въ оставле́ніе дарова́ти пра́зднующимъ любо́вію святу́ю па́мять ва́шу.

Сла́ва, свята́го Гео́ргія, гла́съ 1. Подо́бенъ: Гро́бъ Тво́й.

Во́инство на земли́ возненави́дѣвъ, му́чениче, на небесѣ́хъ возжелѣ́лъ еси́ сла́вы и болѣ́зни поне́слъ еси́ и лю́тую сме́рть. Тѣ́мъ, дне́сь всесвяту́ю твою́ па́мять пра́зднующе, Христу́ прино́симъ хвалу́, треблаже́нне Гео́ргіе.

И ны́нѣ, богоро́диченъ:

Упова́ніе христіа́нъ, Пресвята́я Дѣ́во, Его́же родила́ еси́, Бо́га, па́че ума́ и сло́ва, непреста́нно моли́ о воспѣва́ющихъ Тя́ пода́ти оставле́ніе грѣхо́въ на́шихъ всѣ́хъ и исправле́ніе житія́ вѣ́рою и любо́вію при́сно сла́вящимъ Тя́.

Крестобогоро́диченъ:

Нескве́рная Агница, Агнца и Па́стыря повѣ́шена на дре́вѣ ме́ртва зря́щи, пла́чущи, вѣща́ше, ма́терски восклица́ющи: ка́ко претерплю́ Твое́, е́же па́че сло́ва, Сы́не Мо́й, сни́тіе и во́льныя стра́сти, Бо́же Преблагíй?

Пѣ́снь 4.

Ирмо́съ: Сѣдя́й въ сла́вѣ на Престо́лѣ Божества́ во о́блацѣ ле́гцѣ, прíиде Іису́съ Пребоже́ственный, Нетлѣ́нною Дла́нію и спасе́ зову́щія: сла́ва, Христе́, си́лѣ Твое́й.

Ни́жняя презрѣ́вше и ко еди́нѣмъ пребыва́ющимъ смотря́юще, тѣ́хъ получи́ша жили́ща, Акепси́ма до́блій и сла́вніи Іо́сифъ и Аиѳа́лъ да восхва́лятся.

Иже къ еди́ному Влады́цѣ просте́ртое твое́ помышле́ніе во вре́мя страда́нія, му́чениче, облегче́нія тебѣ́ творя́ше нестерпи́мыхъ му́къ, крѣ́пкій Іо́сифе, страстоте́рпче Христо́въ досточу́дне.

Честно́е твое́ свидѣ́тельство, я́ко плодови́та лоза́ объе́млема, источа́етъ вино́ вѣ́рнымъ умиле́нія, Аиѳа́ле страстоте́рпче, веселя́щи зову́щія: сла́ва, Христе́, си́лѣ Твое́й.

Богоро́диченъ: Свята́я Богоро́дица, въ Ню́же всели́тися благоволи́, я́ко во благово́нный хра́мъ, Сло́во Отчее и Равнобоже́ственное, не растлѣ́ чистоты́, ни стужи́: и́бо роди́ Емману́ила, Бо́га и Человѣ́ка.

Инъ.

Ирмо́съ: Любве́ ра́ди, Ще́дре, Твоего́ о́браза, на Крестѣ́ Твое́мъ ста́лъ еси́, и раста́яшася язы́цы: Ты́ бо еси́, Человѣколю́бче, крѣ́пость моя́ и хвале́ніе.

Умерщвле́нное твое́ тѣ́ло му́ками, блаже́нне, умерщвле́ннаго Сло́ва вообража́етъ стра́сти, дарова́вшаго ти́ живо́тъ вѣ́чный.

Щито́мъ и́стиннымъ огражде́нъ, побо́рники лжи́выя крѣ́пкимъ смы́сломъ ку́пно погуби́лъ еси́, богому́дре Гео́ргіе.

Просла́вися твои́ми у́ды святы́ми, и́же въ земны́хъ одѣ́яся неможе́ніе, Сло́во. Тѣ́мъ вѣ́чно тя́ прославля́емъ, Гео́ргіе.

Богоро́диченъ: Иже бытіе́ дарова́вый человѣ́комъ и е́же до́брѣ бы́ти тѣ́мъ, преступле́ніемъ истлѣ́вшимъ, Пречи́стая, дарова́, бы́въ Человѣ́къ.

Пѣ́снь 5.

Ирмо́съ: Ты́, Го́споди, мо́й Свѣ́тъ, въ мíръ прише́лъ еси́, Свѣ́тъ Святы́й, обраща́яй изъ мра́чна невѣ́дѣнія вѣ́рою воспѣва́ющія Тя́.

Вели́кое и честно́е призыва́я и́мя Госпо́дне, ча́шу спасе́нія страда́ній, ра́дуяся, Акепси́мо, испи́лъ еси́.

Вы́шняя тя́ пи́ща, зва́ннаго ра́нами, прія́тъ и ли́цы, Іо́сифе, му́ченичестіи съ ни́ми веселя́щася.

Са́дъ присноцвѣту́щій, плоды́ по́двигъ твои́хъ концы́ пита́я, и́стинно яви́лся еси́, Аиѳа́ле блаже́нне.

Богоро́диченъ: Свѣ́тъ безлѣ́тный на́мъ, Отчее сія́ніе, родила́ еси́ подъ лѣ́ты, благосты́нею бога́тства бы́вша, Пренепоро́чная.

Инъ. Ирмо́съ то́йже.

Вше́дъ му́жески въ му́ченическій по́двигъ, и порази́лъ еси́ и́дольское, страстоте́рпче, свирѣ́пство, тѣ́ломъ сокруша́емь.

Тебе́ ка́мень свѣ́тлый Влады́ка въ вѣнцѣ́хъ вонзе́, страстоте́рпче, Свое́й Це́ркви подо́бно сія́юща.

Пожре́ся, я́ко а́гнецъ, до́браго Пастыренача́льника сме́рть вообрази́въ, и прине́слся еси́ вы́шнѣй трапе́зѣ же́ртва непоро́чна.

Богоро́диченъ: Спаси́ ны отъ бѣ́дъ и скорбе́й, Пречи́стая Богоро́дице, и му́къ изба́ви бу́дущихъ моли́твами Твои́ми.

Пѣ́снь 6.

Ирмо́съ: Пожру́ Ти со гла́сомъ хвале́нія, Го́споди, Це́рковь вопіе́тъ Ти́, отъ бѣсо́вскія кро́ве очи́щшися, ра́ди ми́лости отъ ре́бръ Твои́хъ исте́кшею кро́вію.

Главѣ́, Акепси́мо, твое́й, отсѣ́ченнѣй отъ тѣлесе́, Христу́ совокупи́ вѣ́рою ду́шу твою́, му́чениче, неотсту́пно, та́мо су́щими заря́ми при́сно просвѣща́емь.

Ка́меніемъ, я́ко первострада́лецъ, му́чениче, убива́емь, не отве́рглся еси́ Ка́мене жи́зненнаго — Христа́, преходя́ къ та́мо су́щимъ свѣ́тлымъ оби́телемъ.

Же́зліемъ неми́лостивно ураня́емь, ра́довашеся, же́злъ имѣ́я си́лы — Кре́стъ Госпо́день, и похвалу́, страстоте́рпче Аиѳа́ле, богому́дре всебога́те.

Богоро́диченъ: Купина́ прообразова́ше вели́кую та́йну па́че ума́ Твоего́ Рождества́, огне́мъ отню́дъ повива́ема и ника́коже опаля́ема, Дѣ́во Всепѣ́тая.

Инъ.

Ирмо́съ: Пріидо́хъ во глубины́ морскíя, и потопи́ла мя́ е́сть бу́ря мно́гихъ грѣхо́въ, но я́ко Бо́гъ изъ глубины́ возведи́ живо́тъ мо́й, Многоми́лостиве.

Сосу́дъ раздробля́емь тѣ́ла страда́ніи, му́чениче, вра́жія вся́ ко́зни лука́выя му́жески разруши́лъ еси́, всеблаже́нне Гео́ргіе. [Два́жды.]

Остроты́, разсѣка́ющія тѣ́ло, и колесе́, му́чениче, и распаля́емы ве́щи пе́щныя, и́же къ Бо́гу любо́вію распаля́емь, отню́дъ не устраши́лся еси́.

Богоро́диченъ: Святы́й хра́мъ во святы́хъ Почива́ющему была́ еси́, Богома́ти: тѣ́мже на́съ, вѣ́рно пою́щихъ Тебе́, освяща́еши, Приснодѣ́во.

Конда́къ свята́го Гео́ргія, гла́съ 8. Подо́бенъ: Взбра́нной.

Къ возбра́нному и ско́рому заступле́нію Твоему́ прибѣ́гше, вѣ́рніи, мо́лимъ изба́витися, страстоте́рпче Христо́въ, отъ собла́знъ вра́жіихъ воспѣва́ющимъ тя́, и вся́кихъ бѣ́дъ, и озлобле́ній, да зове́мъ: ра́дуйся, му́чениче Гео́ргіе.

Икосъ:

Вели́къ въ предста́тельствахъ на земли́ показа́лся еси́, Госпо́день уго́дниче и дру́же, вѣ́рныя бо лю́ди покрыва́я, спаса́еши при́сно, сла́вне. Тѣ́мъ вѣ́рою и любо́вію вопіе́мъ тебѣ́, многострада́льче: ра́дуйся, и́мже просвѣща́ется мíръ; ра́дуйся, и́мже во́инство озаря́ется; ра́дуйся, вѣ́рныхъ отъ плѣ́на избавле́ніе; ра́дуйся, ю́зниковъ ско́рое заступле́ніе; ра́дуйся, высото́ съ вѣ́рою притека́ющихъ къ тебѣ́ те́плѣ; ра́дуйся, обогати́телю лю́бящихъ тя́ и въ ско́рби весе́ліе; ра́дуйся, я́ко сы́й царе́й огражде́ніе; ра́дуйся, я́ко подае́ши во бране́хъ побѣжде́ніе; ра́дуйся, звѣздо́, просвѣща́ющая пла́вающія; ра́дуйся, рѣши́телю вся́каго озлобле́нія; ра́дуйся, къ нему́же вся́къ вѣ́рный прибѣга́етъ; ра́дуйся, и́мже восхваля́ется Созда́тель; ра́дуйся, му́чениче Гео́ргіе.

Пѣ́снь 7.

Ирмо́съ: Спасы́й во огни́ авраа́мскія Твоя́ о́троки и халде́и уби́въ, я́же Пра́вда пра́ведно уловля́ше, препѣ́тый Го́споди, Бо́же оте́цъ на́шихъ, благослове́нъ еси́.

Во огни́ муче́нія ро́су отъ Бо́га пріе́мше, сопроти́вныхъ пла́мы ва́шимъ терпѣ́ніемъ погаси́сте, страстоте́рпцы, зову́ще: Бо́же оте́цъ на́шихъ, благослове́нъ еси́.

Иже огню́ покло́нницы сему́ наслѣ́дницы яви́шася, огню́ служи́ти служа́щія Со́лнцу сла́вы понужда́ху, но сíи взыва́ху: Бо́же оте́цъ на́шихъ, благослове́нъ еси́.

Акепси́ма, и Іо́сифъ, и Аиѳа́лъ, Тро́ицы Всечестны́я три́ свѣти́ла, и́же вся́ концы́ благоче́стія заря́ми облиста́юще, да почту́тся во вѣ́ки.

Богоро́диченъ: Благослове́нъ Пло́дъ благослове́ннаго Твоего́ чре́ва, Его́же благословя́тъ небе́сныя си́лы и земны́хъ составле́нія, Иже на́съ изба́вивый кля́твы пе́рвыя, Благослове́нная.

Инъ.

Ирмо́съ: Юноши три́ въ Вавило́нѣ, велѣ́ніе мучи́телево на бу́йство прело́жше, посредѣ́ пла́мене вопія́ху: благослове́нъ еси́, Го́споди, Бо́же оте́цъ на́шихъ.

Жива́ бы́лъ еси́ же́ртва, му́чениче, за ны́ Пожре́ному, я́ко овча́ти, де́мономъ же́ртвы, всу́е приноси́мыя, упраздни́лъ еси́, о Христѣ́ укрѣпля́емь.

Яви́ся благопло́денъ, я́ко лоза́, принося́ гро́здіе на́мъ терпѣ́нія, сла́вне, вино́ ка́плюще боже́ственное, сердца́ всѣ́хъ благочести́выхъ веселя́щее.

Уды да́лъ еси́ усе́рдно разсѣка́ти за Христа́, пребы́лъ же еси́ неотлуче́нъ Того́ любве́, преблаже́нне, и наслѣ́дникъ всѣ́хъ бла́гъ, веселя́ся.

Богоро́диченъ: Хвалу́ Бо́гу прино́ситъ вся́ тва́рь, отъ Твоего́ ро́ждшуся, Пренепоро́чная Отрокови́це, пречи́стаго чре́ва и дре́внія всѣ́хъ на́съ кля́твы Изба́вльшему.

Пѣ́снь 8.

Ирмо́съ: Отроки благочести́выя въ пещи́ Рождество́ Богоро́дичо спасло́ е́сть, тогда́ у́бо образу́емое, ны́нѣ же дѣ́йствуемое, вселе́нную всю́ воздвиза́етъ пѣ́ти Тебѣ́: Го́спода по́йте, дѣла́, и превозноси́те Его́ во вся́ вѣ́ки.

Сло́ва бы́вше прія́телища и Того́ я́звы нося́ще, мучи́телей суровство́мъ бре́мя, а́ки безду́шно, на безслове́сная возложи́стеся, приноси́ми ко искуше́нію мно́жайшимъ му́камъ, му́ченицы до́бліи, Христа́ превознося́ще во вѣ́ки.

Хода́таи сла́вы присносу́щныя, приснопа́мятніи му́ченицы, украша́еми, ра́достно ше́ствовасте, Его́же возлюби́сте свидѣ́тельства, сла́вніи, пу́ть, зову́ще: Го́спода по́йте и превозноси́те Его́ во вѣ́ки.

Ни о́гнь, ни ра́ны, ни звѣ́ри, ни ме́чь, ни ро́въ, ни сме́рть возмо́же му́ченики Твоея́ любве́ отлучи́ти, Го́споди, благи́хъ Исто́чниче, любве́ неистощи́мая Струя́. Ихже хва́ляще, Христе́, Тебе́ благослови́мъ во вѣ́ки.

Богоро́диченъ: Еди́ну неискусому́жную Ма́терь и еди́ну тва́рей преиму́щую, го́ру пресвяту́ю, трапе́зу всезлату́ю, Богоро́дицу, пѣ́сньми воспѣва́юще, зове́мъ: Го́спода воспѣва́йте дѣла́ и превозноси́те Его́ во вѣ́ки.

Инъ.

Ирмо́съ: Изба́вителю всѣ́хъ Всеси́льне, посредѣ́ пла́мене благоче́ствовавшія, снизше́дъ, ороси́лъ еси́ и научи́лъ еси́ пѣ́ти: вся́ дѣла́, благослови́те, по́йте Го́спода.

Упра́витель пла́вающимъ изя́щный, помо́щникъ въ ско́рбехъ вели́къ яви́лся еси́, Гео́ргіе, спаса́еши вѣ́рою къ тебѣ́ и несомнѣ́ннымъ се́рдцемъ притека́ющія.

Истины яви́лся еси́ побо́рникъ и лжи́ бы́лъ еси́ оглаго́льникъ, на́мъ же па́ки утвержде́ніе, страстоте́рпче, вѣ́рою вопію́щимъ: благослови́те вся́ дѣла́ Госпо́дня Го́спода.

Кропле́ніемъ крове́й твои́хъ погаси́лъ еси́ пре́лести, Гео́ргіе, у́гліе и вѣ́рныхъ напои́лъ еси́ сердца́, вѣ́рно тя́ воспѣва́ющихъ и соверша́ющихъ сла́вную па́мять твою́.

Богоро́диченъ: Отъ Іессе́ева ко́рене прозябла́ еси́ и зло́бный ко́рень исто́ргнула еси́, Содѣ́теля тва́ри прозя́бши, Отрокови́це, Ему́же пое́мъ: благослови́те вся́ дѣла́ Госпо́дня Го́спода.

Пѣ́снь 9.

Ирмо́съ: Ка́мень нерукосѣ́чный отъ несѣко́мыя горы́, Тебе́, Дѣ́во, краеуго́льный отсѣче́ся — Христо́съ, совокупи́вый разстоя́щаяся естества́. Тѣ́мъ, веселя́щеся, Тя́, Богоро́дице, велича́емъ.

Благочести́выя свѣти́льники и пре́лести потреби́тели, разу́мнаго рая́ благово́нныя цвѣ́ты, сосу́ды честны́я, Бо́жія красоты́ зри́тели восхва́лимъ.

Угль, его́же дре́вле ви́дѣ Иса́ія, въ се́рдцы вну́трь пріе́мше, и, того́ блиста́ніемъ озаря́еми, мра́чное, му́ченицы, огня́ служе́ніе отрази́сте.

Живонача́льнѣй ны́нѣ Тро́ицѣ укра́шени предстоите́ и, вѣне́чными добро́тами просвѣща́еми, па́мять творите́ о и́же на земли́, блаже́нніи, помина́ющихъ ва́съ всегда́.

Богоро́диченъ: Отча́яннаго мя́ спаси́, Спа́са заче́ншая и пло́тію ро́ждшая, Дѣ́во, грѣхо́внымъ бо бре́менемъ отягча́емь, болѣ́зненно зову́ Ти: потща́вшися, помози́ рабу́ Твоему́.

Инъ.

Ирмо́съ: Ева у́бо неду́гомъ преслуша́нія кля́тву всели́ла е́сть, Ты́ же, Дѣ́во Богоро́дице, прозябе́ніемъ чревоноше́нія мíрови благослове́ніе процвѣла́ еси́. Тѣ́мъ Тя́ вси́ велича́емъ.

Яко у́тро, я́ко со́лнце, свѣ́тло возсія́въ, и тва́рь просвѣти́лъ еси́ страсте́й незаходи́мыми заря́ми, чуде́съ же мно́гихъ явле́ніи, Гео́ргіе, му́чениковъ ра́дованіе. Тѣ́мъ тя́ любо́вію ублажа́емъ.

Ка́пля боже́ственныя сла́дости, Гео́ргіе, яви́лся еси́, стра́стную на́шу го́ресть взе́мля и ослажда́я всегда́ ду́ши же и сердца́ вѣ́рою тя́ блажа́щихъ, достосла́вне.

Освяти́лъ еси́ кро́вію зе́млю и ду́хомъ весе́лія небе́сная испо́лнилъ еси́, му́чениче. Тѣ́мъ вся́ка душа́ тя́ благочести́выхъ, я́ко уго́дника Госпо́дня, лю́битъ при́снаго и помо́щника тя́ напису́етъ.

Богоро́диченъ: Гла́съ Ти́ прино́симъ боже́ственнаго Гавріи́ла весе́лія, зову́ще: ра́дуйся, ра́дость вселе́ннѣй, ско́рби Потреби́теля поро́ждши и Евино отъе́мши поноше́ніе; ра́дуйся, Дѣ́во Неискусобра́чная.

Свѣти́ленъ. Подо́бенъ: Ду́хомъ во святи́лищи.

Подъя́лъ еси́ я́ко безпло́тенъ нестерпи́мыя му́ки, Акепси́мо всехва́льне, свяще́нниковъ сла́во, со Іо́сифомъ чу́днымъ и ди́вный Аиѳа́лъ діа́конъ, Христо́въ таи́нникъ, и́хже болѣ́знемъ страда́нія удивля́ются при́сно безпло́тныхъ чи́ни.

Сла́ва, Гео́ргію. Подо́бенъ то́йже:

Струя́ми крове́й твои́хъ преле́стныя пла́мы погаси́лъ еси́, блаже́нне, и мучи́телей свирѣ́пство до конца́ погуби́лъ еси́, и Христа́ просла́вилъ еси́, Гео́ргіе страстоте́рпче. Тѣ́мъ вѣне́цъ прія́лъ еси́ нетлѣ́нія и жи́зни отъ десни́цы Вы́шняго.

[И ны́нѣ,] богоро́диченъ:

Нѣ́сть во мнѣ́ отню́дъ наде́жды спасе́нія, Дѣ́во, я́ко злѣ́ впадо́хъ во глубину́ прегрѣше́ній и жду́ преще́нія стра́шныя му́ки и ко́злищъ ча́сти; но уще́дри мя́ пре́жде Суда́, я́ко су́щи тепла́ Засту́пница, Богоро́дице.

На стихо́внѣ окто́иха и му́чениковъ:

Сти́хъ: Воззва́ша пра́ведніи, и Госпо́дь услы́ша и́хъ.

Стихи́ра, гла́съ 2: О благоче́стіи, святíи, тве́рдѣ подвиза́вшеся за Христа́, свирѣ́пство мучи́телей посрами́сте и и́доловъ высоту́ въ про́пасть погрузи́сте, Акепси́мо, и Аиѳа́ле, и Іо́сифе. И ны́нѣ на небесѣ́хъ, вѣнцено́сцы, лику́юще, моли́теся о душа́хъ на́шихъ.

Сла́ва, гла́съ 4. Самогла́сенъ. Студи́тово:

Разу́мнаго адама́нта терпѣ́ніе, бра́тіе, духо́вно восхва́лимъ, Гео́ргія, сла́внаго му́ченика, его́же за Христа́ жго́ма, кова́ша бѣды́, и остри́ша му́ки, и разли́чная муче́нія изнури́ша тѣ́ло, естество́мъ тлѣ́нное, побѣжда́ше бо жела́ніе естество́, сме́ртію понужда́я рачи́теля прейти́ къ жела́емому Христу́ Бо́гу и Спа́су ду́шъ на́шихъ.

И ны́нѣ, богоро́диченъ или́ крестобогоро́диченъ. Подо́бенъ: Яко до́бля.

На Крестѣ́ Тя я́ко узрѣ́* пригвожде́на, Го́споди,* Агница и Ма́ти Твоя́ дивля́шеся,* и — что́ видѣ́ніе сіе́, — взыва́ше, —* Сы́не вожделѣ́нне?* Сія́ Ти́ непокори́вый собо́ръ воздаде́ беззако́нный,* и́же мно́гихъ Твои́хъ чуде́съ наслади́выйся.* Но сла́ва неизглаго́ланному* соше́ствію Твоему́, Влады́ко.


НА ЛИТУРГІИ,

Проки́менъ, гла́съ 4: Святы́мъ, и́же су́ть [на земли́ Его́, удиви́ Госпо́дь вся́ хотѣ́нія Своя́ въ ни́хъ]. Сти́хъ: Предзрѣ́хъ Го́спода [предо мно́ю вы́ну, я́ко одесну́ю мене́ е́сть, да не подви́жуся]. Апо́столъ ко Ефесе́емъ, зача́ло 233. Аллилу́ія, гла́съ 4: Воззва́ша пра́ведніи, и Госпо́дь услы́ша и́хъ, [и отъ всѣ́хъ скорбе́й и́хъ изба́ви и́хъ]. Сти́хъ: Мно́ги ско́рби пра́веднымъ, [и отъ всѣ́хъ и́хъ изба́витъ я́ Госпо́дь]. Ева́нгеліе Луки́, зача́ло 106. Прича́стенъ: Ра́дуйтеся, пра́ведніи, о Го́сподѣ, [пра́вымъ подоба́етъ похвала́].

Источникъ: Минíа, мѣ́сяцъ Ное́мврій. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 16 – 23.

/ Къ оглавленію раздѣла /


Наверхъ / Къ титульной страницѣ

0