Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - среда, 23 августа 2017 г. Сейчасъ на порталѣ посѣтителей - 5.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Ное́мврія во 2-й де́нь.
Святы́хъ му́ченикъ Акинди́на, Пига́сія, Афѳо́нія, Елпидифо́ра и Анемподи́ста.

[ВЕЧЕРЪ,]
На Го́споди воззва́хъ: стихи́ры, гла́съ 4. Подо́бенъ: Яко до́бля.

Пяточи́сленное сочета́ніе му́чениковъ воспои́мъ,* му́драго Акинди́на,* Пига́сія, Елпидифо́ра,* Афѳо́нія и Анемподи́ста,* до́блія страда́льцы* и те́плыя защи́тники,* точа́щія невозбра́нную благода́ть* и наде́жду незави́стну* безбѣ́дно благочести́вымъ подаю́щія.

Ни гла́дъ, ниже́ бѣда́,* ни жи́знь, ниже́ сме́рть,* ни коно́бовъ врѣ́нія,* ни земны́я про́пасти, ниже́ звѣре́й уста́* разлучи́ти возмого́ша отъ любве́ Христо́вы* ва́ша терпѣливому́дрыя до́блести,* къ Нему́ бо непреста́нно взира́юще* и Того́ еди́наго жела́юще,* вражду́ющія побѣди́сте.

Сла́дости насыща́ющеся,* и свѣ́та исполня́еми,* и жи́знь вѣ́чную наслѣ́довавше,* къ ва́мъ прибѣга́ющія отъ бѣ́дъ изба́вите,* и у́зъ, и темни́цы* на мѣ́стѣ озлобле́нія, богому́дріи,* къ Бо́гу дерзнове́ніе иму́ще* и милосе́рдіе явля́юще,* я́ко и́стинно христоподража́теле.

Сла́ва, гла́съ 6:

Дне́сь пятоза́рный му́чениковъ ли́къ, я́ко свѣтоно́сныхъ звѣ́здъ схожде́ніе вѣ́рныя просвѣща́ющь, къ та́инственному весе́лію призва́. Дне́сь и́же разу́мнаго Со́лнца служи́теліе и пе́рсскихъ потреби́теліе преда́ній, чу́вственное со́лнце че́ствовавшія и покланя́ющіяся огню́, руково́дствоваша ко благоче́стію. Поче́рпше же оби́льнѣ страстоте́рпческую и́хъ ча́шу, и Христа́ ра́ди излія́вшимися кровьми́ вѣнча́шася, на́съ призыва́юще, благоче́стія рачи́тели, пріиди́те, глаго́люще, по́двиги на́шими учреди́теся и вѣнцы́, и че́сти зри́те: претерпѣ́вый бо до конца́, то́й спасе́тся, Христо́съ Истина изрече́; да о́бщницы бу́дете вѣнце́въ на́шихъ и моли́твенники ны́ ко Го́споду и́мате.

И ны́нѣ, богоро́диченъ или́ крестобогоро́диченъ. Подо́бенъ: Тридне́венъ.

Лю́ди беззако́ннѣйшія, безъ пра́вды пригвожда́ющія Тя́ на дре́вѣ, Дѣ́ва и Чи́стая Ма́ти Твоя́, зря́щи, я́коже Симео́нъ прорече́, утро́бою, Спа́се, уязвля́шеся.

На стихо́внѣ окто́иха и святы́хъ стихи́ра, гла́съ 1:

Сти́хъ: Ди́венъ Бо́гъ во святы́хъ Свои́хъ, Бо́гъ Изра́илевъ.

Лучи́ возсія́ша му́чениковъ пятоза́рныя, дѣ́вамъ равночи́сленны, воображе́нія бо и́хъ зря́ще, озаря́емся, па́мятей и́хъ пріобща́ющеся. Тѣ́мъ моли́твами и́хъ, Христе́ Бо́же, безбѣ́днѣ спаса́й отъ вра́гъ ду́ши на́ша и мольба́ми и́хъ неоску́дну жи́знь на́шу соблюди́, я́ко источа́еши ми́лости Твоя́ бога́тыя непреста́нно безпреткнове́нно Тя́ сла́вящимъ, упова́ніе же иму́щимъ въ Тя́; моли́твами и́хъ да́руй душа́мъ на́шимъ ве́лію ми́лость.

Сла́ва, гла́съ 2. Самогла́сенъ:

Пріиди́те, возра́дуемся Го́споду въ па́мяти дне́сь страстоте́рпцевъ, о празднолю́бцы! Пріиди́те, восхва́лимъ и́хъ, та́йно похваля́юще: ра́дуйся, Акинди́не; ра́дуйся, Пига́сіе; ра́дуйся, Анемподи́сте; ра́дуйся, Елпидифо́ре; ра́дуйся, Афѳо́ніе, и́же ле́сть и́дольскую въ про́пасть погрузи́вше и Христа́ Го́спода посредѣ́ три́знища я́сно проповѣ́давше. Тѣ́мъ, всеблаже́нніи и многострада́льніи, непреста́нно моли́теся о душа́хъ на́шихъ.

И ны́нѣ, богоро́диченъ, или́ крестобогоро́диченъ. Подо́бенъ: Егда́ отъ дре́ва.

Дре́ву кре́стному Тя́, Іису́се, пригвожде́на зря́щи, Неискусобра́чная, пла́чущи, глаго́лаше: Ча́до сладча́йшее, почто́ оста́вилъ еси́ Мене́, ро́ждшую Тя́, еди́ну, Свѣ́те непристу́пный, Пребезнача́льнаго Отца́? Потщи́ся и просла́вися, я́ко да сла́ву получа́тъ Боже́ственную, Боже́ственныя стра́сти Твоя́ сла́вящіи.

Тропа́рь, гла́съ 2:

Страстоте́рпцы Госпо́дни, блаже́нна земля́, напи́вшаяся кровьми́ ва́шими, и свя́та селе́нія, пріи́мшая тѣлеса́ ва́ша: въ три́знищи бо врага́ побѣди́сте и Христа́ со дерзнове́ніемъ проповѣ́дасте: Того́ я́ко бла́га моли́те спасти́ся, мо́лимся, душа́мъ на́шимъ.


НА УТРЕНИ,
Оба кано́на окто́иха и святы́хъ на 4, его́же краегране́сіе: Твои́хъ мольба́ми мя́ му́чениковъ мно́жества покрыва́й. Ѳеофа́нъ. Гла́съ 4.

Пѣ́снь 1.

Ирмо́съ: Отве́рзу уста́ моя́, и напо́лнятся Ду́ха, и сло́во отры́гну Цари́цѣ Ма́тери, и явлю́ся, свѣ́тло торжеству́я, и воспою́, ра́дуяся, Тоя́ чудеса́.

Со́лнца иму́ще пра́вды незаходи́ма, Христа́, Бо́га на́шего, просвѣща́юща ва́съ, святíи, невеще́ственнымъ свѣ́томъ, о́блаки разори́те невѣ́дѣнія моего́.

Безбѣ́дную, святíи, безпрепо́нно источа́юще, благода́ть подава́ете приходя́щимъ вѣ́рою, вся́ку бѣду́, и вся́кое уны́ніе, и бу́рю, и мяте́жъ уставля́юще.

Крѣ́постію непобѣди́мою препоя́савшеся, святíи, плотскíя не́мощи не помы́слисте, но, безбоя́зненно мудрова́ніе явля́юще, на о́гнь и муче́ніе дерзну́сте.

Богоро́диченъ: Ты́ еди́на, Богоневѣ́сто, въ высоча́йшихъ Сѣдя́щаго на объя́тіихъ носи́ла еси́, пло́ть бы́вша; Ты́ бо яви́лася еси́ отъ всѣ́хъ вѣ́къ прія́телище досто́йное Вседержи́теля.

Пѣ́снь 3.

Ирмо́съ: Не му́дростію, и си́лою, и бога́тствомъ хва́лимся, но Тобо́ю, Отчею ѵпоста́сною Му́дростію, Христе́: нѣ́сть бо свя́тъ, па́че Тебе́, Человѣколю́біе.

Утверди́вшеся Христо́вою си́лою, всеизя́щнѣйшіи, по́мысломъ крѣ́пкимъ, сквозѣ́ о́гнь же и во́ду, стра́ждуще, преидо́сте къ небе́снымъ.

Нерасте́рзною бу́дущихъ наде́ждею ствержда́еми, настоя́щихъ болѣ́зней му́жественнѣйшимъ смы́сломъ, всесла́вніи му́ченицы, небрего́сте.

Равному́дрствующе тре́мъ ю́ношамъ, всехва́льніи, безу́мія пе́рсскаго о́гнь угаша́юще, яви́стеся, росо́ю Ду́ха окропля́еми.

Богоро́диченъ: Тя́, Предста́тельницу извѣ́стну, Богома́ти, стяжа́вшіи, наде́жды на Тя́ возлага́юще, спаса́емся и, къ Тебѣ́ прибѣга́юще, сохраня́емся.

Сѣда́ленъ, гла́съ 8. Подо́бенъ: Прему́дрости.

Безбѣ́дно тече́ніе благочести́вное, въ по́двизѣ стра́ждуще, благосла́вніи наде́ждею проидо́ша, вѣнцы́ укрѣпля́еми; сопроти́вныя бо до конца́ погуби́вше, безпрепо́нно побѣ́ду свою́ соверши́ша, тѣ́мъ и оби́льно прося́щимъ вѣ́рою источа́ютъ всегда́ мно́жество исцѣле́ній. Имже согла́сно возопіи́мъ: моли́те Христа́ Бо́га грѣхо́въ оставле́ніе дарова́ти честву́ющимъ любо́вію святу́ю па́мять ва́шу.

Сла́ва, и ны́нѣ, богоро́диченъ:

Яко дѣ́ву и еди́ну въ жена́хъ, Тя́, безъ сѣ́мене ро́ждшую Бо́га пло́тію, вси́ ублажа́емъ, ро́ди человѣ́честіи: о́гнь бо всели́ся въ Тя́ Божества́, и я́ко Младе́нца дои́ши Зижди́теля и Го́спода. Тѣ́мъ, а́нгельскій и человѣ́ческій ро́дъ, досто́йно сла́вимъ пресвято́е Рождество́ Твое́ и согла́сно вопіе́мъ Ти́: моли́ Христа́ Бо́га согрѣше́ній оставле́ніе дарова́ти покланя́ющимся вѣ́рою пресвято́му Рождеству́ Твоему́.

Крестобогоро́диченъ:

Агнца и Па́стыря и Изба́вителя, Агница зря́щи на Крестѣ́, восклица́ше, пла́чущи, и, го́рько рыда́ющи, вопія́ше: мíръ у́бо ра́дуется, пріе́мляй Тобо́ю избавле́ніе, утро́ба же Моя́ гори́тъ, зря́щи Твое́ распя́тіе, е́же терпи́ши за милосе́рдіе ми́лости. Долготерпѣли́ве Го́споди, ми́лости бе́здно и исто́чниче неисчерпа́емый, умилосе́рдися и да́руй согрѣше́ній оставле́ніе, вѣ́рою пою́щимъ Боже́ственныя Стра́сти Твоя́.

Пѣ́снь 4.

Ирмо́съ: Сѣдя́й въ сла́вѣ на Престо́лѣ Божества́ во о́блацѣ ле́гцѣ, прíиде Іису́съ Пребоже́ственный, Нетлѣ́нною Дла́нію и спасе́ зову́щія: сла́ва, Христе́, си́лѣ Твое́й.

Просвѣща́еми добро́тою изя́щнѣйшаго страда́нія, свѣ́тліи свѣти́льницы, му́ченицы Христо́вы яви́стеся, свѣтлѣ́йшими луча́ми озаря́юще зову́щія: сла́ва, Христе́, си́лѣ Твое́й.

Очище́ніе кро́вь му́чениковъ бы́сть, и благово́ннѣйшее и́стинно приноше́ніе Бо́гу безпрепо́нно даю́щи, и безбѣ́дный источа́ющи всѣ́мъ исто́чникъ врачева́нія.

Разли́чныхъ напа́стей и бѣ́дъ нахожде́ніе ва́шими моли́твами, су́щими ко Христу́, отрази́сте соверша́ющихъ усе́рдно всесвяще́нную и всепра́зднственную па́мять ва́шу, досточу́дніи.

Испрове́ргше пре́лести и́дольское безбо́жіе, Бо́га всѣ́хъ животворя́щее дѣ́йство дѣ́лы явля́юще, зва́сте, преблаже́нніи: сла́ва, Христе́, си́лѣ Твое́й.

Богоро́диченъ: Крѣпча́йшее Тя́ ору́жіе на враги́ предлага́емъ, ско́рби вся́кія и лю́тыхъ обстоя́ній отрѣва́емъ вре́дъ и возмуще́ній ерети́ческихъ, Ма́ти Бо́жія, избѣга́емъ.

Пѣ́снь 5.

Ирмо́съ: Нечести́віи не у́зрятъ сла́вы Твоея́, Христе́, но мы́ Тя́, Единоро́дне, Оте́ческія сла́вы сія́ніе Божества́, отъ но́щи у́тренююще, воспѣва́емъ Тя́, Человѣколю́бче.

Тя сама́го, Афѳо́ніе, приве́лъ еси́ Христу́, крѣ́пцѣ мучи́тельскую, сла́вне, обличи́въ зло́бу безбо́жную, и къ свѣ́ту прите́клъ еси́ вѣ́ры, веселя́ся.

Подо́бяся, Афѳо́ніе, стра́сти Христо́вѣ, Того́ ра́ди твоя́ глава́ отсѣче́ся изя́щнѣ: къ неизмѣ́нному бо весе́лію потща́лся еси́ и безсме́ртному поко́ищу.

На недви́жимѣй наде́жди утверди́вся, и кра́сная, я́же на земли́, оплева́въ, всему́дре Елпидифо́ре, неукло́нно бо ты́ прете́клъ еси́ по́прище страда́нія.

Богоро́диченъ: Возсія́въ изъ Тебе́, Со́лнце мы́сленное свѣ́тлыя лучи́ Своего́ Божества́ всѣ́мъ простре́, Богоро́дице Влады́чице: тѣ́мъ вси́ Тя́ сла́вимъ.

Пѣ́снь 6.

Ирмо́съ: Пожру́ Ти со гла́сомъ хвале́нія, Го́споди, Це́рковь вопіе́тъ Ти́, отъ бѣсо́вскія кро́ве очи́щшися, ра́ди ми́лости отъ ре́бръ Твои́хъ исте́кшею кро́вію.

Теку́щихъ тлѣ́нная презрѣ́вше, нетлѣ́нная сподо́бистеся зрѣ́ти. Искуше́ній у́бо изба́вите и бѣ́дъ вѣ́рою ва́съ призыва́ющія, всехва́льніи.

Тро́ицу Безнача́льную, пресла́вніи му́ченицы, лю́то свя́занныя и въ темни́цахъ неосла́бно держи́мыя разрѣши́ти, ва́шими мольба́ми умилосе́рдите.

За Тя́ себе́ преда́вше на сме́рть, безсме́ртіе, Спа́се мо́й, до́бліи получи́ша, и спаси́теліе су́щихъ въ бу́ри и напа́стехъ и ско́рбехъ бы́ша.

Богоро́диченъ: Расто́ргни мои́хъ прегрѣше́ній, Отрокови́це, рукописа́ніе, и содержа́щія мя́ печа́ли и страсте́й разрѣше́ніе да́рующи, и соблюда́ющи вы́ну неврежде́нна, Влады́чице.

Конда́къ, гла́съ 2. Подо́бенъ: Тве́рдыя.

Благочести́выя и богоно́сныя му́ченики, я́ко на земли́ оста́вльшія вся́, прія́лъ еси́ въ наслажде́ніе благи́хъ Твои́хъ и упокое́ніе, Акинди́на, Пига́сія, Анемподи́ста, съ ни́миже Афѳо́нія и Елпидифо́ра же, еди́не сы́й Преблагíй.

Икосъ:

Отве́рзи ми́ уста́, Христе́ мо́й, воспѣ́ти и похвали́ти че́стно по́двиги страстоте́рпецъ Твои́хъ, Го́споди: сíи бо, вся́ оста́вльше и возлюби́вше Тебе́, Созда́теля всѣ́хъ, су́щая на земли́ вся́ я́ко тлѣ́нная вмѣни́ша. И та́мо честны́й о́бразъ живоно́снаго Твоего́ Креста́ сотвори́вше, усе́рдно предста́ша Царю́, я́ко ору́жницы, му́ченицы до́бліи, вопію́ще Ти́: еди́не сы́й Преблагíй.

Пѣ́снь 7.

Ирмо́съ: Спасы́й во огни́ авраа́мскія Твоя́ о́троки и халде́и уби́въ, я́же Пра́вда пра́ведно уловля́ше, препѣ́тый Го́споди, Бо́же оте́цъ на́шихъ, благослове́нъ еси́.

Яко изба́вилъ еси́ изъ пла́мене три́ благочести́выя о́троки, си́це и ны́нѣ страда́льцы въ пещи́ о́гненнѣй сохрани́лъ еси́, вопію́щія Ти́ богому́дренно: оте́цъ на́шихъ Бо́же, благослове́нъ еси́.

Дае́ши оби́льныя да́ры и чудодѣя́ніе источа́еши страстоте́рпцы Твои́ми, Христе́, содѣва́я и содѣ́йствуя я́ко Милосе́рдъ и явля́я пою́щимъ Тя́: оте́цъ на́шихъ Бо́же, благослове́нъ еси́.

Мно́жество му́ченикъ, нело́жно со́бранніи вѣ́рою, приведо́стеся Христу́, пресла́вныхъ чуде́съ явле́ніе дѣ́йствующе и пою́ще: оте́цъ на́шихъ Бо́же, благослове́нъ еси́.

Богоро́диченъ: Изба́вленніи Тобо́ю пра́дѣднія кля́твы и къ присносу́щнѣй пи́щи преше́дше, ра́дуйся, зове́мъ Тебѣ́, Препросла́вленная Влады́чице, Яже Бо́га на́мъ воплоще́ннаго ро́ждшая.

Пѣ́снь 8.

Ирмо́съ: Отроки благочести́выя въ пещи́ Рождество́ Богоро́дичо спасло́ е́сть, тогда́ у́бо образу́емое, ны́нѣ же дѣ́йствуемое, вселе́нную всю́ воздвиза́етъ пѣ́ти Тебѣ́: Го́спода по́йте, дѣла́, и превозноси́те Его́ во вся́ вѣ́ки.

Благочести́вѣйшее му́чениковъ торжество́ ра́достно пріи́де, мíръ озаря́ющее, вся́ возвесели́, и свѣ́тло украша́ющее вѣ́рою пою́щія: Го́спода воспѣва́йте дѣла́ и превозноси́те Его́ во вѣ́ки.

На звѣ́ри, и ро́вы, и му́ки лю́тыя дерзну́сте, преизя́щніи, иму́ще Помо́щника непобѣди́ма, сла́вы Го́спода, Ему́же ны́нѣ зове́мъ: Го́спода воспѣва́йте дѣла́ и превозноси́те Его́ во вѣ́ки.

Ва́съ, до́блія страда́льцы, Акинди́на, Пига́сія, и Анемподи́ста, па́ки же Афѳо́нія и приснопа́мятнаго Елпидифо́ра, иму́ще стѣ́ну крѣ́пкую, Го́спода пое́мъ и превозно́симъ во вѣ́ки.

Вѣнце́мъ побѣ́ды украси́вшеся и добро́ты діади́мою свѣтя́щеся, зарю́ невече́рнюю коне́чно, блаже́нніи, на небесѣ́хъ прія́ли есте́, му́ченицы, зову́ще: Го́спода по́йте дѣла́ и превозноси́те Его́ во вѣ́ки.

Богоро́диченъ: Усты́ и ра́зумомъ Богоро́дицу му́дрствующе, пѣсносло́вимъ Тя́, Пренепоро́чная: породила́ бо еси́, Пречи́стая, пло́тію обложе́ннаго Творца́, и Бо́га, и Царя́ Христа́. Тѣ́мъ Тя́, Дѣ́во, пое́мъ и превозно́симъ во вѣ́ки.

Пѣ́снь 9.

Ирмо́съ: Ева у́бо неду́гомъ преслуша́нія кля́тву всели́ла е́сть, Ты́ же, Дѣ́во Богоро́дице, прозябе́ніемъ чревоноше́нія мíрови благослове́ніе процвѣла́ еси́. Тѣ́мъ Тя́ вси́ велича́емъ.

Труды́ ва́ша на земли́ небе́сное весе́ліе прія́ше, идѣ́же му́чениковъ ли́цы, и боже́ственныхъ во́инства, и все́ перворо́дныхъ сра́дуется торжество́, всеблаже́нніи.

Отъ у́зъ лю́тыхъ, всеблаже́нніи, и бѣ́дъ изба́вите вся́, вѣ́рою свято́е торжество́ ва́ше пра́зднующія, ми́ръ же, и тишину́ прося́ще, и спасе́ніе, блаже́нніи.

Бога́тымъ озаря́еми свѣ́томъ и благода́тію, страстоте́рпцы, сія́юще, согрѣше́ній разрѣше́ніе и печа́лей ку́пно съ ва́ми подви́гшимися да́ти къ ва́мъ прибѣга́ющимъ Благодѣ́теля умоли́те.

Богоро́диченъ: Ева у́бо дре́ва жи́зненнаго изгна́ся, возбрани́вшися причаще́нія, Ты́ же, Дѣ́во Богоро́дице, Жи́знь превѣ́чную родила́ еси́, мíру живоно́сное дѣ́йство да́рующи вѣ́рою.

Свѣти́ленъ. Подо́бенъ: Жены́, услы́шите.

Акинди́на, и Пига́сія, и Елпидифо́ра вѣнча́емъ со Афѳо́ніемъ пѣ́сньми, ку́пно и Анемподи́ста, и́бо пе́рсскую ле́сть обличи́вше суему́дренную и біе́нія и ра́ны за Христа́ претерпѣ́вше, неизрече́нныя сла́вы получи́ша.

Богоро́диченъ: Ра́дуйся, Бо́жія пала́то; ра́дуйся, горо́ осѣня́ема; ра́дуйся, купино́ неопали́мая; ра́дуйся, престо́ле сла́вы; ра́дуйся, боже́ственная трапе́зо; ра́дуйся, ру́чко всезлата́я; ра́дуйся, свѣ́щниче огнезра́чный; ра́дуйся, ле́гкій о́блаче, Дѣ́во Ма́ти Марíе.

На стихо́внѣ окто́иха и святы́хъ стихи́ра, гла́съ 2:

Сти́хъ: Мно́ги ско́рби пра́веднымъ, и отъ всѣ́хъ и́хъ изба́витъ я́ Госпо́дь.

Кро́вными то́ки тѣ́ло обагри́въ, безбѣ́днѣ проше́лъ еси́ пу́ть муче́нія, страстоте́рпче Акинди́не, тѣ́мъ и крѣ́постію Боже́ственною препоя́сався, вра́жія изсѣ́клъ еси́ кознодѣ́йства. Христа́ Бо́га моли́ о на́съ спасти́ся душа́мъ на́шимъ.

Сла́ва, гла́съ 4:

Пятоза́рная страда́лецъ свѣща́, я́ко въ дубра́вѣ дре́въ сѣки́рою, Дави́дски изсѣче́ ле́сть вра́жію, исповѣ́давше Христа́ предъ цари́, непреста́нно мо́лятъ о душа́хъ на́шихъ.

И ны́нѣ, богоро́диченъ или́ крестобогоро́диченъ. Подо́бенъ: Яко до́бля.

На Крестѣ́ Тя я́ко узрѣ́* пригвожде́на, Го́споди,* Агница и Ма́ти Твоя́ дивля́шеся,* и — что́ видѣ́ніе сіе́, — взыва́ше, —* Сы́не вожделѣ́ннѣйше?* Сія́ Ти́ невѣ́рный собо́ръ воздаде́ беззако́нный,* и́же мно́гихъ Твои́хъ чуде́съ наслади́выйся.* Но сла́ва неизглаго́ланному* соше́ствію Твоему́, Влады́ко.


НА ЛИТУРГІИ,

Проки́менъ, гла́съ 4: Святы́мъ, и́же су́ть на земли́ Его́, [удиви́ Госпо́дь вся́ хотѣ́нія Своя́ въ ни́хъ]. Сти́хъ: Предзрѣ́хъ Го́спода предо мно́ю вы́ну, [я́ко одесну́ю мене́ е́сть, да не подви́жуся]. Апо́столъ ко Ефесе́емъ, зача́ло 233. Аллилу́ія, гла́съ 4: Воззва́ша пра́ведніи, [и Госпо́дь услы́ша и́хъ, и отъ всѣ́хъ скорбе́й и́хъ изба́ви и́хъ]. Сти́хъ: Мно́ги ско́рби пра́веднымъ, [и отъ всѣ́хъ и́хъ изба́витъ я́ Госпо́дь]. Ева́нгеліе Матѳе́я, зача́ло 36. Прича́стенъ: Ра́дуйтеся, пра́ведніи, [о Го́сподѣ, пра́вымъ подоба́етъ похвала́].

Источникъ: Минíа, мѣ́сяцъ Ное́мврій. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 11 об. – 16.

/ Къ оглавленію раздѣла /


Наверхъ / Къ титульной страницѣ

0