Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - четвергъ, 29 iюня 2017 г. Сейчасъ на порталѣ посѣтителей - 17.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Ное́мврія въ 1-й де́нь.
Святы́хъ и чудотво́рцевъ безсре́брениковъ Космы́ и Даміа́на, и́же отъ Асíи.

ВЕЧЕРЪ,
На Го́споди воззва́хъ: стихи́ры святы́хъ на 6, гла́съ 6. Подо́бенъ: Все́ отло́жше.

Всю́ отложи́вше* на небесѣ́хъ наде́жду,* сокро́вище некра́домо* себѣ́ святíи сокро́вищствоваша:* ту́не прія́ша,* ту́не даю́тъ* неду́гующимъ врачева́нія.* Зла́та или́ сребра́ ева́нгельски не стяжа́ша,* человѣ́комъ же и ското́мъ* благодѣя́нія препода́ша,* да всѣ́ми послушли́ви бы́вше Христу́,* со дерзнове́ніемъ мо́лятся* о душа́хъ на́шихъ. [Два́жды.]

Ве́щи возгнуша́шася* на земли́ тлѣ́емыя,* небесножи́теліе же во пло́ти* я́коже а́нгели яви́шася,* единому́дренніи сожи́теле,* сопру́гъ единонра́вный святы́хъ* и единоду́шный.* Тѣ́мже стра́ждущимъ всѣ́мъ* врачева́нія подаю́тъ,* безсре́бренно да́рующе* благодѣя́нія тре́бующимъ,* я́же лѣ́тнымъ си́мъ* досто́йно почти́мъ пра́здникомъ,* Христу́ со дерзнове́ніемъ моля́щіяся* о душа́хъ на́шихъ. [Два́жды.]

Всю́ все́льшая въ себе́ Тро́ицу,* дво́ица приснопа́мятная,* Косма́ и Даміа́нъ богому́дріи,* я́ко пото́цы источа́ютъ* отъ исто́чника живоно́снаго* во́ды врачева́ній;* и́хже и мо́щи стра́сти осяза́ніемъ врачу́ютъ,* и са́мая то́кмо имена́* неду́ги отъ человѣ́ковъ отго́нятъ,* всѣ́хъ притека́ющихъ* спаси́тельная приста́нища о Христѣ́,* и со дерзнове́ніемъ мо́лятся* о душа́хъ на́шихъ.

Все́ отри́нувше* стра́стное мучи́тельство* и вся́ко размышле́ніе* лука́ваго змíя попра́вше о Христѣ́,* святíи безме́здницы,* Космо́ и Даміа́не,* свѣтообра́зни яви́стеся,* я́ко свѣти́ла, озаря́юще всю́ подсо́лнечную* богозна́меньми всегда́,* тму́ отгоня́юще и неду́ги благода́тію* и всѣ́мъ спаси́теліе явля́ющеся,* вѣ́рою неукло́нною* творя́щимъ сла́вную па́мять ва́шу, прему́дріи.

Сла́ва, гла́съ 6. Анато́лія:

Безконе́чна е́сть святы́хъ благода́ть, ю́же отъ Христа́ прія́ша, тѣ́мже и мо́щи и́хъ отъ Боже́ственныя си́лы непреста́нно дѣ́йствуютъ чудеса́, и́хже и имена́, вѣ́рою призыва́ема, неисцѣ́льныя болѣ́зни исцѣля́ютъ. Имиже, Го́споди, и на́съ душе́вныхъ и тѣле́сныхъ страсте́й свободи́, я́ко Человѣколю́бецъ.

И ны́нѣ, [богоро́диченъ]:

Богоро́дице, Ты́ еси́ лоза́ и́стинная, [возрасти́вшая на́мъ Пло́дъ живота́, Тебѣ́ мо́лимся: моли́ся, Влады́чице, со святы́ми апо́столы поми́ловати ду́ши на́ша].

Или́ крестобогоро́диченъ. Подо́бенъ: Все́ отло́жше.

Агнца своего́* Агница нескве́рная дре́вле* и непоро́чная Влады́чица* на дре́вѣ кре́стнѣмъ я́ко узрѣ́,* ма́терски восклица́ше* и, дивя́щися, вопія́ше:* Ча́до сладча́йшее,* что́ зрѣ́ніе сіе́* но́вое и пресла́вное?* Ка́ко со́нмъ безблагода́тный* суди́щу Пила́тову предаде́ Тя* и осужда́етъ на сме́рть Живота́ вся́ческихъ?* Но воспѣва́ю Твое́ неизрече́нное, Сло́ве, снизхожде́ніе.

На стихо́внѣ окто́иха.

[А идѣ́же хра́мъ святы́хъ или́ восхо́щетъ кто́ святы́мъ пѣ́ти поліеле́й, тогда́ на стихо́внѣ стихи́ры, и на у́трени по каѳи́смахъ сѣда́льны, и кано́нъ Богоро́дицѣ, и святы́хъ кано́на два́, и хвали́тны, и славосло́віе].

На стихо́внѣ стихи́ры, гла́съ 2:

Исто́чникъ исцѣле́ній еди́наго то́кмо въ лѣ́тѣ исцѣлева́ше, хра́мъ же безсре́брениковъ все́ мно́жество исцѣля́етъ неду́гующихъ, неоску́дно бо е́сть и неиждива́емое бога́тство святы́хъ. Тѣ́хъ моли́твами, Христе́, поми́луй на́съ.

Сти́хъ: Ди́венъ Бо́гъ во святы́хъ Свои́хъ, Бо́гъ Изра́илевъ.

Ѳеофа́ново: Любо́вію Боже́ственною и жела́ніемъ бу́дущихъ дѣ́тельнѣ пожи́вше, спаси́тельныя пути́ испра́висте. Тѣ́мже, чистоту́ душе́вную нескве́рно соблю́дше, ве́щнымъ до конца́ противоста́сте; Ду́хомъ же Боже́ственнымъ позлати́вшеся, беззла́тно исцѣле́ніе неду́гующимъ подаете́, дво́ица свяще́нная, свѣтоза́рный соу́зе, просвѣще́нный боже́ственный сопру́же, безсре́бреницы, въ ско́рбехъ и неду́зѣхъ посѣща́юще на́съ и ду́шъ на́шихъ неду́ги безме́здно врачу́юще.

Сти́хъ: Святы́мъ, и́же су́ть на земли́ Его́, удиви́ Госпо́дь вся́ хотѣ́нія Своя́ въ ни́хъ.

Ге́рманово: Вели́кихъ сподо́бльшеся даро́въ, всехва́льніи, въ смире́нномъ житіи́ на земли́ пожи́сте, и, проходя́ще всю́ду, ту́не неду́гующихъ стра́сти врачу́юще, яви́стеся а́нгеловъ собесѣ́дницы, Космо́ съ Даміа́номъ му́дрымъ, бра́тія прекра́сная, и на́ша стра́сти моли́твами ва́шими уврачи́те.

Сла́ва, гла́съ 6:

Всегда́ иму́ще Христа́, дѣ́йствующа въ ва́съ, святíи безсре́бреницы, чудодѣ́йствуете въ мíрѣ, немощству́ющія врачу́ете, и́бо врачевство́ ва́ше исто́чникъ е́сть неисчерпа́емый: че́рплемь же, па́че преистека́етъ и, излива́емь, изоби́луетъ; на кíйждо де́нь истощава́емь, и умножа́ется, всѣ́мъ подая́ и неоскудѣва́емь пребыва́я; и че́рплющіи насыща́ются врачева́ній, то́йже пребыва́етъ неиждиву́щъ. Что́ у́бо ва́съ нарече́мъ? Цѣли́тельныхъ ли враче́въ ду́шъ же и тѣле́съ? Цѣли́телей страсте́й неисцѣ́льныхъ, ту́не исцѣля́ющихъ всѣ́хъ, пріе́мшихъ дарова́ніе отъ Спа́са Христа́, подаю́щаго на́мъ ве́лію ми́лость.

И ны́нѣ, богоро́диченъ:

Никто́же, притека́яй къ Тебѣ́, посра́мленъ отъ Тебе́ исхо́дитъ, Пречи́стая Богоро́дице Дѣ́во, но про́ситъ благода́ти и пріе́млетъ дарова́ніе къ поле́зному проше́нію.

Или́ крестобогоро́диченъ. Подо́бенъ: Тридне́венъ.

Ви́дящи Тя́ распина́ема, Христе́, Тебе́ Ро́ждшая вопія́ше: что́ стра́нное е́же ви́жду та́инство, Сы́не Мо́й? ка́ко на дре́вѣ умира́еши, пло́тію повѣ́шенъ, жи́зни Пода́телю?

Тропа́рь, гла́съ 8:

Святíи безсре́бреницы и чудотво́рцы, Космо́ и Даміа́не, посѣти́те не́мощи на́ша: ту́не прія́сте, ту́не дади́те на́мъ.


НА УТРЕНИ,
По 1-й каѳи́смѣ сѣда́ленъ окто́иха или́ святы́хъ, гла́съ 4. Подо́бенъ: Ско́ро предвари́.

Въ мíрѣ богоуго́дно житіе́ стяжа́вше, богатносвѣ́тліи, исцѣле́нія на́мъ, ра́дость пріе́млющимъ, извѣще́ніе святы́мъ, че́стнѣ научи́вшеся, подаете́: яви́стеся бо, пресла́вніи, вра́чеве боля́щихъ, Христу́, споспѣшеству́ющу ва́мъ, Космо́ и Даміа́не, святíи безме́здницы. [Два́жды.]

Сла́ва, и ны́нѣ, богоро́диченъ:

Пое́мъ Тя́, Богоневѣ́сто и Ма́ти Христа́ Бо́га, сла́вяще Рождество́ Твое́ непостижи́мое, и́мже изба́вихомся отъ ле́сти діа́воли и вся́ческихъ бѣ́дъ, Влады́чице Богоро́дице, и вѣ́рно взыва́емъ: поми́луй ста́до Твое́, еди́на Всепѣ́тая.

По 2-й каѳи́смѣ сѣда́ленъ, гла́съ 8. Подо́бенъ: Повелѣ́нное та́йно.

Отъ безме́здныхъ сокро́вищъ чудеса́ содѣва́юще, пречи́стыхъ даро́въ благода́тныхъ яви́стеся раче́ніемъ боголѣ́пнѣ, бога́тство воспріе́мше небе́сное и сла́ву оста́вльше земну́ю. Тѣ́мъ пѣ́снь прино́симъ всѣ́хъ Содѣ́телю, благода́ть дарова́вшему ва́мъ исцѣле́ній. [Два́жды.]

Сла́ва, и ны́нѣ, богоро́диченъ:

Непремѣ́ннаго Бо́га я́ко ро́ждшая, изменѣ́ннаго мя́ при́сно грѣхо́мъ, утверди́ се́рдце мое́, Блага́я, моли́твами ма́терними Твои́ми, я́ко да и а́зъ зову́ Ти, Богоро́дице Марíе: поми́луй ста́до Твое́, е́же стяжа́ла еси́, Всенепоро́чная.

По поліеле́и сѣда́ленъ, гла́съ 8. Подо́бенъ: Прему́дрости.

Исцѣле́ній да́теліе и чудотво́рцы и чуде́съ свѣти́льники свѣтопріе́мніи всѣ́мъ яви́стеся духо́вною благода́тію: страсте́й бо пла́мень вѣ́рою прохлажда́ете и вѣ́рныхъ въ не́й смы́слъ согрѣва́ете. Тѣ́мъ врачевство́ душе́вное стяжа́вше, боже́ственную це́рковь ва́шу, къ не́й же прибѣга́юще, вопіе́мъ: богоно́сцы безсре́бреницы, моли́те Христа́ Бо́га согрѣше́ній оставле́ніе дарова́ти пра́зднующимъ любо́вію святу́ю па́мять ва́шу. [Два́жды.]

Сла́ва, и ны́нѣ, богоро́диченъ:

Яко дѣ́ву и еди́ну въ жена́хъ, Тя́, безъ сѣ́мене ро́ждшую Бо́га пло́тію, вси́ ублажа́емъ, ро́ди человѣ́честіи: о́гнь бо всели́ся въ Тя́ Божества́, и я́ко Младе́нца млеко́мъ пита́еши Зижди́теля и Го́спода. Тѣ́мъ, а́нгельскій и человѣ́ческій ро́дъ, досто́йно сла́вимъ пресвято́е Рождество́ Твое́ и согла́сно вопіе́мъ Ти́: моли́ Христа́ Бо́га согрѣше́ній оставле́ніе дарова́ти покланя́ющимся вѣ́рою пресвято́му Рождеству́ Твоему́.

Степе́нна, 1-й антифо́нъ, 4-го гла́са. Проки́менъ, гла́съ 4: Святы́мъ, и́же су́ть на земли́ Его́,* удиви́ Госпо́дь вся́ хотѣ́нія Своя́ въ ни́хъ. Сти́хъ: Предзрѣ́хъ Го́спода предо мно́ю вы́ну, [я́ко одесну́ю мене́ е́сть, да не подви́жуся]. Вся́кое дыха́ніе... Ева́нгеліе Ма́рка, зача́ло 23.

По 50-мъ псалмѣ́ стихи́ра, гла́съ 2:

Се́ ко́ль добро́ и ко́ль красно́, е́же жи́ти бра́тіи вку́пѣ въ Ду́сѣ Святѣ́мъ, я́коже рече́ богооте́цъ Дави́дъ, любо́вію нелицемѣ́рною и вѣ́рою несомнѣ́нною, сло́вомъ и́стиннымъ, я́ко ря́сны зла́ты, дру́гъ дру́зѣ себе́ придержа́ща. Пріиди́те, ны́нѣ благослови́мъ Го́спода, да́вшаго на́мъ святы́я Своя́ безме́здники, Косму́ и Даміа́на, врачи́ боля́щихъ, свѣти́ла те́мныхъ, прогони́тели де́моновъ, и́миже боля́щіи исцѣля́ются, и́миже ме́ртвіи воскреса́ютъ, и́миже прокаже́нніи очища́ются, по гла́су Госпо́дню: ту́не у́бо прія́ша, ту́не же и подаю́тъ боля́щимъ исцѣле́нія. Ихже моли́твами, Христе́ Бо́же, просвѣти́ ду́ши на́ша.

Оба кано́на окто́иха безъ му́ченичновъ и святы́хъ кано́нъ на 6.
А идѣ́же хра́мъ: кано́нъ Богоро́дицы со ирмосо́мъ на 6 и святы́хъ о́ба кано́на на 8.

Кано́нъ [пе́рвый], его́же краегране́сіе: Сла́вныя врачи́ земны́мъ пѣ́ти подоба́етъ. Гла́съ 6.
Пѣ́снь 1.

Ирмо́съ: Яко по су́ху пѣшеше́ствовавъ Изра́иль по бе́зднѣ стопа́ми, гони́теля фарао́на ви́дя потопля́ема, Бо́гу побѣ́дную пѣ́снь пои́мъ, вопія́ше.

Озаря́еми сла́вою Боже́ственною, богосвѣ́тліи безсре́бреницы, озари́те на́ша ду́ши, разоря́юще стра́стную мглу́, я́ко да ва́съ вѣ́рою почита́емъ.

Тлетво́рныхъ очи́щшеся пе́рвѣе страсте́й болѣ́зней преложе́ніемъ, очища́ете на́ша лю́тыя неду́ги, му́дріи, и болѣ́зни душе́вныя облегча́ете.

Отъ всѣ́хъ Влады́ки да́ръ прія́сте, святíи, чуде́съ дарова́нія, на́ша исцѣли́те мно́гія и неудобьисцѣ́льныя пло́ти стра́сти, мо́лимся.

Моле́ніе, безсре́бреницы и вра́чеве, Бо́гу принеси́те, я́ко да изба́витъ ны́ искуше́ній и скорбе́й мно́гихъ и тре́петнаго и стра́шнаго тогда́ муче́нія.

Богоро́диченъ: Зако́новъ есте́ственныхъ кромѣ́ ро́ждши, Чи́стая, Законода́теля Іису́са Изба́вителя, Его́же моли́ изба́вити ны́, Богоро́дице, мно́гихъ беззако́ній на́шихъ.

Другíй кано́нъ, его́же краегране́сіе: Пѣ́сньми почита́ю му́дрыя безсре́бреники. Творе́ніе Іоа́нна Дамаскина́. Гла́съ 1.
Пѣ́снь 1.

Ирмо́съ: Пои́мъ, вси́ лю́діе, отъ го́рькія рабо́ты фарао́ни Изра́иля Измѣ́ншему и во глубинѣ́ морстѣ́й нога́ми немо́крыми Наста́вльшему, пѣ́снь побѣ́дную, я́ко просла́вися.

Отъ благода́ти Нача́льныя Тро́ицы, дво́ица чу́дная и честна́я свѣща́ема, всѣ́мъ исцѣле́нія приходя́щимъ вѣ́рно подае́тъ, при́сно источа́ющи.

Тайноучи́ми живоно́снымъ словесе́мъ, я́ко свѣти́ла въ мíрѣ возсія́вше, стра́стную мглу́ удо́бь разгоня́ете теплото́ю вѣ́ры, всеблаже́нніи.

Зако́ну покаря́ющеся Спа́сову, всесла́вніи, сладостра́стіе у́бо плотско́е отри́нуша: добродѣ́тельными же душа́ми свѣтлѣ́йше просвѣща́ющеся, въ мíрѣ преизя́ществоваша, досточу́дніи.

Богоро́диченъ: Во всего́ человѣ́ка въ Твою́ утро́бу всели́выйся, Богома́ти, неизрече́ннѣ облече́ся, изъ Отца́ возсія́вый Сы́нъ, безлѣ́тнѣ Пребоже́ственный, Тому́ воспои́мъ, я́ко просла́вися.

Пѣ́снь 3.

Ирмо́съ: Нѣ́сть свя́тъ, я́коже Ты́, Го́споди Бо́же мо́й, вознесы́й ро́гъ вѣ́рныхъ Твои́хъ, Бла́же, и утверди́вый на́съ на ка́мени исповѣ́данія Твоего́.

Мíръ пое́тъ ва́ша, святíи, всегда́ мно́гая благодѣя́нія и чуде́съ мно́жества, чудотво́рцы и вра́чеве, а́нгелъ всѣ́хъ равностоя́тели.

Ва́съ обои́хъ, свѣтода́телей, мо́лимъ, звѣ́здъ на высотѣ́ лежа́щихъ Це́ркве та́йно, Космо́ и Даміа́не, сердца́ вѣ́рныхъ озари́те.

Ка́пли источа́юще при́сно, святíи, исцѣле́нія, омы́йте всѣ́хъ душе́вную скве́рну и стра́стныя пло́ти то́ки вся́ уста́вите.

Се́ совокупи́вшеся лю́діе, святíи, отвсю́ду ва́ша воспѣ́ти вели́кія да́ры вну́трь це́ркве ва́шея, но всѣ́хъ моле́нія испо́лните.

Богоро́диченъ: Свята́я Влады́чице Чи́стая, Пресвято́е Сло́во воплоти́вшая сло́вомъ, безслове́сныхъ мя́ страсте́й, пою́ща Тя́ благоче́стно боже́ственными словесы́, изба́ви, Пренепоро́чная.

Инъ.

Ирмо́съ: Утверди́ мене́, Христе́, на недви́жимомъ ка́мени за́повѣдей Твои́хъ и просвѣти́ мя свѣ́томъ лица́ Твоего́: нѣ́сть бо свя́тъ па́че Тебе́, Человѣколю́бче.

Врачева́ній исто́чники, даро́въ же Боже́ственныхъ струи́, невеще́ственнаго Свѣ́та свѣтлѣ́йшая прія́телища, вси́ досто́йнѣ воспои́мъ.

Яко тѣле́сныя и душе́вныя врачу́юще стра́сти и болѣ́зни приходя́щихъ къ ва́мъ, всечестнíи усе́рдно ны́нѣ я́ко благодѣ́теліе исцѣля́ете.

Пло́дными добродѣ́тельми украша́еми, вся́ку тлѣ́емую сла́дость жите́йскую я́вѣ отрази́сте, къ Бо́жіей добро́тѣ непреста́нно взира́юще.

Богоро́диченъ: Въ ви́дѣ на́шемъ пре́жде Неви́димый яви́ся, о Богороди́тельнице, сте́кшуся съ пло́тію Божеству́ во утро́бѣ Твое́й пресвятѣ́й, Богоневѣ́сто.

Сѣда́ленъ, гла́съ 8. Подо́бенъ: Прему́дрости.

Отъ исто́чника бе́здны, Іису́са, чуде́съ струи́ благолѣ́пно поче́рпше, святíи, та́йными ту́чами страсте́й мра́чныя о́блаки отгоня́ете и неду́гующимъ человѣ́комъ исцѣле́нія подае́те. Тѣ́мъ, получи́вше здра́вое весе́ліе, ва́ми, пресла́вніи, удивля́еми, зове́мъ: богоно́сніи безсре́бреницы, моли́те Христа́ Бо́га согрѣше́ній оставле́ніе дарова́ти пра́зднующимъ любо́вію святу́ю па́мять ва́шу. [Два́жды.]

Сла́ва, и ны́нѣ, богоро́диченъ:

Яко Всенепоро́чная Невѣ́сто Творца́, я́ко Неискусому́жная Ма́ти Изба́вителя, прія́телище я́ко су́щи Утѣ́шителя, Препѣ́тая, беззако́нію мя́ су́ща скве́рное оби́телище и бѣсо́мъ игра́лище въ ра́зумѣ бы́вша, потщи́ся отъ тѣ́хъ злодѣ́йства мя́ изба́вити и свѣ́тлое жили́ще добродѣ́телей соверши́, Свѣтоно́сная Нетлѣ́нная, отжени́ о́блакъ страсте́й и вы́шняго прича́стія сподо́би и Свѣ́та невече́рняго моли́твами Твои́ми.

Крестобогоро́диченъ:

Агнца, и Па́стыря, и Изба́вителя Агница зря́щи на Крестѣ́, восклица́ше, пла́чущи, и, го́рько рыда́ющи, вопія́ше: мíръ у́бо ра́дуется, пріе́мля Тобо́ю избавле́ніе, утро́ба же Моя́ гори́тъ, зря́щи Твое́ распя́тіе, е́же терпи́ши за милосе́рдіе ми́лости. Долготерпѣли́ве Го́споди, ми́лости бе́здно и исто́чниче неисчерпа́емый, умилосе́рдися и да́руй согрѣше́ній оставле́ніе вѣ́рою пою́щимъ Боже́ственныя стра́сти Твоя́.

Пѣ́снь 4.

Ирмо́съ: Христо́съ моя́ си́ла, Бо́гъ и Госпо́дь, честна́я Це́рковь боголѣ́пно пое́тъ, взыва́ющи, отъ смы́сла чи́ста, о Го́сподѣ пра́зднующи.

Боже́ственное ро́ждіе вои́стинну благопло́дно, ло́зы боже́ственныя, та́йное вино́ иска́паюшія, въ весе́ліи му́дрыя безсре́бреники ублажи́мъ.

Ору́жіе яви́стеся, устрѣля́ющее враги́ неви́димыя, и́хже и на́съ стрѣ́лъ изба́вите, заступа́юще на́шу жи́знь, му́дріи безсре́бреницы.

Не е́сть человѣ́къ, и́же ќто не стяжа́ благíя ва́съ моли́твенники ко Христу́, святíи безсре́бреницы, Его́же моли́те огня́ вѣ́чнаго на́съ изба́вити.

Ва́съ, блаже́нніи, и́же призыва́етъ, и на земли́, и въ мо́ри бѣ́дъ вся́кихъ свобожда́ется, тѣ́мъ изба́вите на́съ сопроти́внаго обстоя́нія.

Богоро́диченъ: Всели́вся Госпо́дь, Чи́стая, посредѣ́ Тебе́, вмѣсти́лище свято́е, исто́чникъ мно́гихъ явля́етъ исцѣле́ній и очище́ніе страсте́й, Богоро́дице Приснодѣ́во.

Инъ.

Ирмо́съ: Разумѣ́хъ, Всеси́льне, Твое́ смотре́ніе и со стра́хомъ просла́вихъ Тя́, Спа́се.

Рече́нію Боже́ственному я́вѣ возслѣ́дующе, не зла́та блиста́нія, ниже́ сребра́, боже́ственніи, стяжа́сте.

Сія́юще Боже́ственными чудесы́, безсре́бреницы вся́ благодѣ́тельствуютъ, благода́ть подаю́ще.

Вра́чеве му́дріи показа́стеся страсте́й болѣ́знемъ, исцѣли́тельныя ру́ки простира́юще.

Богоро́диченъ: Да залани́тствятся ны́нѣ ли́ца, Богоро́дицу Тя́ не исповѣ́дающихъ, Пречи́стая Влады́чице.

Пѣ́снь 5.

Ирмо́съ: Бо́жіимъ свѣ́томъ Твои́мъ, Бла́же, у́тренюющихъ Ти́ ду́ши любо́вію озари́, молю́ся, Тя́ вѣ́дѣти, Сло́вѣ Бо́жій, и́стиннаго Бо́га, отъ мра́ка грѣхо́внаго взыва́юща.

Боже́ственное привлеко́ша просвѣще́ніе, сія́нія исто́чникъ всеусе́рднѣ возлюби́вше, и просвѣща́ютъ на́съ всегда́ чуде́съ заря́ми великоимени́тіи.

Кра́сный сопру́гъ су́ще, му́дріи, бразды́ воздѣ́лавше ду́шъ богозна́меньми, при́сно пожина́юще стра́сти, я́коже пле́велы, и здра́вія кла́съ стори́чествующе.

Вжиля́еми крѣ́постію Христо́вою, въ зло́бѣ си́льнаго всю́ крѣ́пость погуби́сте, его́же мучи́тельства на́съ изба́вите, неусы́пніи предста́тели на́ши, безсре́бреницы.

Ше́ствовати стези́ на́мъ пра́выя и твори́ти во́лю Бо́жію укрѣпи́те, святíи, уставля́юще стра́сти серде́цъ на́шихъ и тѣле́съ неду́ги облегчева́юще.

Богоро́диченъ: Изба́ви мя́, Влады́чице Блага́я, искуше́ній врага́, и гее́нны муче́нія, и обдержа́щаго мя́ плѣне́нія и не посрами́ мене́, пѣсносло́вящаго Тя́.

Инъ.

Ирмо́съ: Отъ но́щи у́тренююще, пое́мъ Тя́, Христе́, Отцу́ Собезнача́льна и Спа́са ду́шъ на́шихъ: ми́ръ мíрови пода́ждь, Человѣколю́бче.

Яко пото́ки богото́чныя, источа́ете вѣ́рнымъ благодѣя́нія во́ды, душе́вныя же ку́пно и тѣле́сныя исцѣля́юще неду́ги, сла́вніи безсре́бреницы.

Исто́чникъ благода́ти, честнíи безсре́бреницы, разверза́юще, всѣ́мъ здра́віе раздае́те, вѣ́рою и любо́вію къ ва́мъ ны́нѣ притека́ющимъ.

Свѣ́тліи и всему́дріи звѣ́зды, и́же зе́млю я́вѣ онебеси́вше подо́біемъ свѣ́тлости а́нгельскія, непреста́нно озаря́ютъ на́съ.

Богоро́диченъ: Превы́шша яви́лася еси́, всѣ́хъ Творца́, Отцу́ собезнача́льнаго, заче́нши, Ма́ти Дѣ́во, и ро́ждшая мíру Спа́са и Го́спода.

Пѣ́снь 6.

Ирмо́съ: Жите́йское мо́ре, воздвиза́емое зря́ напа́стей бу́рею, къ ти́хому приста́нищу Твоему́ прите́къ, вопію́ Ти: возведи́ отъ тли́ живо́тъ мо́й, Многоми́лостиве.

Живу́ще, му́ченицы, ра́достно на небесѣ́хъ, въ честны́й хра́мъ ва́шъ пріити́ потщи́теся и на́ша неду́ги тѣле́сныя и серде́чныя стра́сти исцѣли́те.

Въ боже́ственное благолѣ́пія одѣ́явшеся красно́, я́ко въ сугу́бицу, святíи, на́ги ны́ су́ща добродѣ́телей боже́ственно одѣ́йте и страсте́й безче́стія ны́нѣ обнажи́те.

Яко украше́ніемъ чуде́съ одѣ́яни всегда́, спаси́теліе мíру яви́стеся, мірска́го у́бо вре́да вся́ ны́ изба́вите, святíи, и страсте́й нече́стія и муче́нія.

Умертви́вше, святíи, стра́сти вся́ пло́ти смертоно́сныя благода́тію, животво́рными чуде́съ приложе́ньми оживля́ете стра́ждущія и вра́тъ сме́рти избавля́ете.

Богоро́диченъ: Не опали́въ утро́бы Твоея́, Огнь сы́й, Іису́съ, изъ Тебе́ пло́тію происхо́дитъ; Сего́, Чи́стая, моли́ огня́ и вся́кихъ му́къ изба́вити вѣ́рою воспѣва́ющія Тя́.

Инъ.

Ирмо́съ: Проро́ка спа́слъ еси́ отъ ки́та, Человѣколю́бче, и мене́ изъ глубины́ прегрѣше́ній возведи́, молю́ся.

Спаси́тельныя цѣли́тели, благодѣ́тели богому́дрыя, Косму́ же и Даміа́на боже́ственныя, усе́рдно да почти́мъ.

Цѣлому́дріе соблю́дше и ра́зумомъ укра́шени, Косма́ и Даміа́нъ боже́ственніи со Христо́мъ ра́дуются.

Единому́дренно пожи́вше, единоду́шно по́стничествовавше, ку́пно врачева́нія подая́ти на́мъ ввѣ́рени бы́сте.

Богоро́диченъ: Свѣ́тъ Непристу́пный родила́ еси́ пло́тію, Пречи́стая, ве́сь мíръ просвѣща́юща заря́ми Божества́.

Конда́къ, гла́съ 2. Подо́бенъ: Тве́рдыя.

Благода́ть пріи́мше исцѣле́ній, простира́ете здра́віе су́щимъ въ ну́ждахъ, вра́чеве, чудотво́рцы пресла́вніи, но ва́шимъ посѣще́ніемъ ра́тниковъ де́рзости низложи́те, мíръ исцѣля́юще чудесы́.

Икосъ:

Вся́каго ра́зума и му́дрости прехо́дитъ сло́во му́дрыхъ враче́въ, и всѣ́мъ зна́ніе подаю́тъ: Высоча́йшаго бо благода́ть пріе́мше, неви́димо здра́віе да́руютъ всѣ́мъ. Отню́дуже и мнѣ́ по́вѣсти благода́ть дарова́ся пѣ́ти, я́ко богоно́сныя уго́дники Христо́вы и служи́тели, исцѣле́ній мно́жество подаю́щія, болѣ́зней бо вся́ избавля́ютъ, мíръ исцѣля́юще чудесы́.

Пѣ́снь 7.

Ирмо́съ: Росода́тельну у́бо пе́щь содѣ́ла а́нгелъ преподо́бнымъ отроко́мъ, халде́и же опаля́ющее велѣ́ніе Бо́жіе, мучи́теля увѣща́ вопи́ти: благослове́нъ еси́, Бо́же оте́цъ на́шихъ.

Впери́сте у́мъ на небе́сная до́брыхъ приложе́ньми и бы́сте о́бщницы Боже́ственныхъ даро́въ, крила́ти су́ще орли́, всю́ прохо́дите зе́млю, чудодѣ́йствующе при́сно.

Просвѣти́стеся, я́коже добросія́нное, безсре́бреницы, зла́то, Боже́ственною благода́тію исцѣле́ній обогати́сте мно́жества. Тѣ́мъ уще́дрите ны́, обурева́емыя лю́тыхъ нахожде́ній искуше́ньми.

Преложи́вше Го́споду чи́сты ва́ша ду́хи, безсре́бреницы, да́ръ отъ Него́ прія́сте нечи́стыя ду́хи прогони́ти всегда́, и́хже зло́бы го́рькія изба́вите всѣ́хъ на́съ.

Усну́сте пра́ведно до́лжнымъ сно́мъ, му́дріи безсре́бреницы, и неусы́пніи моли́твенницы есте́ о вѣ́рныхъ; тѣ́мъ ду́шъ на́шихъ при́сно и тѣле́съ лю́тыя стра́сти успи́те.

Богоро́диченъ: Моля́щи не преста́й Человѣколю́бца, Бо́га на́шего, Всенепоро́чная, я́ко да пріи́мемъ всеконе́чнѣ отпуще́ніе злы́хъ и получи́мъ на небесѣ́хъ угото́ванная блага́я лю́бящимъ Его́.

Инъ.

Ирмо́съ: Тебе́, у́мную, Богоро́дице, пе́щь, разсмотря́емъ, вѣ́рніи, я́коже бо о́троки спасе́ три́ Превозноси́мый, мíръ обнови́, во чре́вѣ Твое́мъ всецѣ́лъ, хва́льный отце́въ Бо́гъ и препросла́вленъ.

Всецѣ́лы Бо́гу богому́дреннѣ яви́стеся, вси́ Бо́га вмѣсти́тельны, мíръ бо ве́сь Бо́га ра́ди оста́висте, стопа́мъ послѣ́дующе Спа́совымъ, всесла́вніи, боголѣ́пнѣ отце́въ Бо́га почита́юще.

Преесте́ственно, вра́чеве всеизря́днѣйшіи, немощны́хъ я́звы рукодѣ́йствы та́инственными вся́ исцѣля́ете, лѣчбы́ спаси́тельныя отъ сокро́вищъ почерпа́юще боже́ственныхъ и воспѣва́юще Бо́га пресла́внаго.

Вѣнце́мъ Твоего́ Ца́рствія, Влады́ко, и багряни́цею свѣ́тлою украси́лъ еси́ боголѣ́пнѣ превозлю́бльшія добро́ту непости́жную, Христе́, Твоея́ красоты́, и вѣ́рнымъ благодѣ́тели о́бщія сія́ показа́лъ еси́.

Богоро́диченъ: Восто́ку свы́ше, Пречи́стая, я́вльшуся на земли́, показа́лася еси́ всеблаголѣ́пная две́рь и всесвѣ́тлая, мíръ озаря́ющи луча́ми чистоты́ и вѣ́рнымъ лучи́ чуде́съ при́сно посыла́ющи.

Пѣ́снь 8.

Ирмо́съ: Изъ пла́мене преподо́бнымъ ро́су источи́лъ еси́ и пра́веднаго же́ртву водо́ю попали́лъ еси́: вся́ бо твори́ши, Христе́, то́кмо е́же хотѣ́ти. Тя́ превозно́симъ во вся́ вѣ́ки.

Неду́говъ вся́ческихъ су́ще ра́тницы, посо́біемъ Боже́ственнаго Ду́ха, святíи, утоли́те на́шихъ ду́шъ неду́гованія и тѣле́съ облегчи́те болѣ́зни.

Ви́дителіе Госпо́дни ны́нѣ красоты́ су́ще и́стинно, присѣща́йте се́й кра́сный богоно́сный хра́мъ ва́шъ и исто́чникъ чуде́съ мно́гихъ соверша́йте.

Отъ исто́чника ра́йска исходя́ще, я́ко рѣ́ки двѣ́, все́ напая́ете лице́ земли́ исцѣле́ній струя́ми, неду́говъ изсуша́юще ту́чи.

Блаже́нныя наде́жды пріи́мше, отъ всѣ́хъ досто́йно блажите́ся я́ко испо́лнителіе, блаже́нніи, Бо́га на́шего боже́ственныхъ хотѣ́ній, безсре́бреницы я́вльшеся.

Вра́чеве неисцѣ́льныхъ страсте́й, безсре́бреницы, неисцѣ́льныя стра́сти на́ша исцѣли́те, и искуше́ній бу́рю утоли́те, и уны́нія разжени́те о́блаки.

Тро́иченъ: Со а́нгелы святы́ми пѣсносло́вимъ Отца́, и Сло́ва, и Ду́ха Свята́го, еди́но въ тре́хъ ѵпоста́сѣхъ Божество́, еди́но Ца́рство и еди́ну Вла́сть.

Инъ.

Ирмо́съ: Въ пещи́ о́троцы Изра́илевы, я́коже въ горни́лѣ, добро́тою благоче́стія чистѣ́е зла́та блеща́хуся, глаго́люще: благослови́те, вся́ дѣла́ Госпо́дня, Го́спода, по́йте и превозноси́те во вся́ вѣ́ки.

Уме́рше мíра сего́ кра́снымъ и сребролю́бія неду́гъ отсѣ́кше, наименова́ни бы́сте, му́дріи, всѣ́ми безсре́бреницы, вопію́щими: вся́ дѣла́ Го́спода по́йте и превозноси́те во вся́ вѣ́ки.

Вѣ́чныя прича́стницы жи́зни бы́сте проявле́ннѣ, жи́зни бо тлѣ́емыя вся́ оста́висте кра́сная, согла́снѣ зову́ще: благослови́те вся́ дѣла́ Го́спода, по́йте и превозноси́те во вся́ вѣ́ки.

Изба́ви вся́, Влады́ко Христе́, лю́тыхъ болѣ́зней моли́твами безсре́брениковъ и сподо́би при́сно согла́снѣ зва́ти Тебѣ́: благослови́те вся́ дѣла́ Го́спода, по́йте и превозноси́те во вся́ вѣ́ки.

Богоро́диченъ: Ра́дующеся, вси́ вѣ́рніи, и благода́тію укрѣ́пльшеся, и́же Рождество́мъ Твои́мъ изба́влени бы́вше, Чи́стая Ма́ти Дѣ́во, непреста́нно вопіе́мъ: благослови́те вся́ дѣла́ Го́спода, по́йте и превозноси́те во вся́ вѣ́ки.

Пѣ́снь 9.

Ирмо́съ: Бо́га человѣ́комъ невозмо́жно ви́дѣти, на Него́же не смѣ́ютъ чи́ни а́нгельстіи взира́ти; Тобо́ю бо, Всечи́стая, яви́ся человѣ́комъ Сло́во воплоще́нно, Его́же велича́юще, съ небе́сными во́и, Тя́ ублажа́емъ.

Се́й хра́мъ ва́шъ чудесы́ всеблаголѣ́пно, я́ко звѣзда́ми свѣ́тлыми, украша́ется и, согла́сно веселя́ся, всегда́ блажи́тъ и честну́ю ва́шу па́мять пра́зднуетъ благоче́стно, честнíи безсре́бреницы.

Яко свѣ́тъ, я́ко два́ вели́ка со́лнца, разу́мную тве́рдь украша́ете, безсре́бреницы, и зна́меній заря́ми просвѣща́ете всѣ́хъ вѣ́рныхъ сердца́. Тѣ́мъ зове́мъ: разрѣши́те тму́ страсте́й на́шихъ, мо́лимся.

Въ се́ла вы́шняя вселя́еми, святíи, посредѣ́ на́съ бы́ти неви́димо милосе́рдуйте, и́же посредѣ́ Боже́ственнаго хра́ма ва́шего пѣ́сни возсыла́ющихъ Вседержи́телю и блажа́щихъ прилѣ́жно ва́съ, всехва́льніи.

Земля́ съ вы́шними весели́тся въ свѣ́тлый боже́ственный пра́здникъ ва́шъ, святíи: его́же соверша́ющихъ, на́съ изба́вите тмы́, и болѣ́зней, и вся́кія тѣсноты́, и е́же во а́дѣ лю́таго, му́дріи, муче́нія.

Богоро́диченъ: Тре́петное рожде́ніе иму́щи, Всечи́стая, въ стра́шный де́нь испыта́нія, молю́ся, стра́шнаго отвѣ́та изба́ви мя́ и спаса́емыхъ стоя́нія прича́стника сотвори́, вѣ́рно пою́ща Тя́, Богора́дованная.

Инъ.

Ирмо́съ: Тебе́, свѣ́тлую свѣщу́ и Ма́терь Бо́жію, пречу́дную сла́ву и вы́шшую всѣ́хъ тва́рей, пѣ́сньми велича́емъ.

Пѣ́сньми му́друю дво́ицу Свѣ́та у́мнаго, облиста́ющую зарю́ и просвѣще́ніе всѣ́мъ подаю́щу, непреста́нно ублажа́емъ.

Крѣ́пость душе́внаго здра́вія творя́ще вѣ́рнымъ, и тѣле́сныя врачу́ете ввѣ́реніи ва́мъ стра́сти, я́ко спаси́теліе, тѣ́мже и воспѣва́еми есте́ при́сно.

Богосвѣ́тлая свѣти́ла, у́мнѣ не́бо честны́я Це́ркве свѣтодая́нія ли́тіемъ, ны́нѣ свѣ́тъ подаю́ще, непреста́ннѣ озаря́ютъ.

Отъ Честны́я Тро́ицы богозва́нная дво́ица похваля́ема, источа́етъ прося́щимъ врачева́ній всѣ́мъ подая́нія, любо́вію тѣ́хъ блажа́щимъ.

Богоро́диченъ: Тебе́, свѣ́та о́блакъ, и святы́й киво́тъ, и всесвѣ́тлую две́рь мы́сленнаго Со́лнца, я́ко Богоро́дицу пѣ́сньми велича́емъ.

Свѣти́ленъ. Подо́бенъ: Ду́хомъ во святи́лищи.

Благода́ть врачева́ній отъ Бо́га пріе́мше, безсре́бреницы блаже́нніи, е́же врачева́ти неду́жныя и исцѣля́ти вся́ вѣ́рно притека́ющія къ боже́ственному ва́шему хра́му. Сего́ ра́ди согла́сно ублажа́емъ досто́йнѣ честну́ю ва́шу па́мять.

Богоро́диченъ:

Родила́ еси́, Пречи́стая, Бо́жіе Бо́га Сло́во, мíрови спаси́тельное соверша́ющаго всему́дрѣ строе́ніе изря́дное. Сего́ ра́ди Тя́ вси́ пѣсносло́вимъ досто́йнѣ, я́ко моля́щуюся къ Нему́, изба́витися на́мъ неду́говъ и вся́кихъ бѣ́дъ.

На хвали́техъ стихи́ры на 4, гла́съ 1. Анато́ліево:

Благода́ть исцѣле́ній отъ Бо́га пріе́мше, безсре́бренно стра́сти ду́шъ и тѣле́съ на́шихъ те́плѣ исцѣля́ете, всемíрніи безсре́бреницы, тѣ́мже ва́ми Христо́съ, вѣ́рнымъ да́нное здра́віе да́руя, свѣти́ла неле́стная ва́съ показу́етъ вселе́ннѣй. Того́ умоли́те спасти́ся душа́мъ на́шимъ.

Отъ вы́шняго про́мысла бе́здну исцѣле́ній поче́рпше, всѣ́мъ источа́ете вѣ́рнымъ исцѣле́нія, безсре́бреницы: преесте́ственнѣ бо неду́гующихъ стра́сти рукодѣ́йствіи та́инственными, отъ сокро́вищъ Ду́ха лѣчбы́ предлага́юще спаси́тельныя, стра́ждущихъ исцѣля́ете. Тѣ́мже хра́мъ че́стенъ бы́вше Живонача́льныя Тро́ицы, въ ва́съ бо я́вѣ оби́тель сотвори́: Ейже моли́теся спасти́ся душа́мъ на́шимъ.

Гла́съ 2. Ге́рманово:

Ра́дуется ли́къ святы́хъ во вѣ́ки, Ца́рство бо небе́сное наслѣ́доваша, земля́, мо́щи и́хъ пріе́мши, благово́ніе возвѣ́я: раби́ Христо́вы бы́ша, всели́вшеся въ жи́знь вѣ́чную.

Вра́чеве немощству́ющихъ, сокро́вища врачева́ній, спаси́теліе вѣ́рныхъ, безсре́бреницы всесла́вніи, въ ну́ждахъ зову́щія и боля́щія исцѣли́те, съ Ѳеодо́тіею моля́ще Бо́га блага́го изба́витися на́мъ отъ сѣ́тей вра́жіихъ.

Сла́ва, гла́съ 4. Ѳеофа́ново:

Исто́чникъ исцѣле́ній иму́ще, святíи безсре́бреницы, исцѣле́нія подае́те всѣ́мъ тре́бующимъ, я́ко велича́йшихъ даро́въ сподо́бльшеся отъ приснотеку́щаго Исто́чника, Спа́са Христа́. Рече́ бо къ ва́мъ Госпо́дь, я́ко единоревни́телемъ апо́столовъ: се́ да́хъ ва́мъ вла́сть надъ ду́хи нечи́стыми, я́коже ты́я изгони́ти, и лѣчи́ти вся́къ неду́гъ и вся́кую я́зю. Тѣ́мже въ повелѣ́ніихъ Его́ до́брѣ пожи́вше, ту́не прія́сте, ту́не подае́те, врачу́юще стра́сти ду́шъ и тѣле́съ на́шихъ.

И ны́нѣ, богоро́диченъ. Подо́бенъ: Яко до́бля.

Ра́дуйся, прибѣ́жище христіа́нъ* и утвержде́ніе;* ра́дуйся, лѣ́ствице небе́сная;* ра́дуйся, сокро́вище дѣ́вства;* ра́дуйся, Богоро́дице, киво́те слове́сный* боже́ственныя сла́вы;* ра́дуйся, похвало́ всего́ мíра и утвержде́ніе,* па́дшихъ воззва́ніе, ски́нія всесвѣ́тлая,* свята́я и всекра́сная.

Крестобогоро́диченъ. Подо́бенъ то́йже:

Распина́ема Христа́ Человѣколю́бца* ви́дящи, Пречи́стая,* и ре́бра ископова́ема копіе́мъ,* пла́чущи, вопія́ше:* что́ сіе́, Сы́не Мо́й?* Что́ Ти́ безблагода́тніи лю́діе возда́ша,* за я́же сотвори́лъ еси́ до́брая и́мъ?* и тщи́шися безча́дствовати Мя́, Вселюбе́знѣйшій?* удивля́юся, Благоутро́бне,* Твоему́ во́льному распя́тію.

Аще же славосло́вію вели́кому бы́ти, то на хвали́техъ и сíи стихи́ры двѣ́ приложи́, да бу́детъ на 6; а́ще же ни́, на стихо́внѣ окто́иха,

Та́же сти́хъ: Се́ что́ добро́, или́ что́ красно́, но е́же жи́ти бра́тіи вку́пѣ.

Гла́съ 6: Свѣ́тлая и просвѣще́нная возсія́ дне́сь па́мять безсре́брениковъ Христо́выхъ, свѣ́тло облиста́ющи луча́ми чуде́съ по все́й земли́ мíръ. Пріиди́те у́бо, празднолю́бцы, вѣ́рно торжеству́емъ; пріиди́те, къ моще́мъ святы́хъ усе́рдно вси́ стеце́мся, я́ко да ско́рое исцѣле́ніе отъ ни́хъ пріи́мемъ неоску́днѣ: безме́здно бо подаю́тъ всѣ́мъ дѣ́йствомъ Свята́го Ду́ха исцѣле́ній дарова́нія.

Сла́ва, гла́съ 8:

Кто́ не удиви́тся, кто́ не просла́витъ, кто́ не воспое́тъ вѣ́рно му́дрыхъ и пресла́вныхъ безсре́брениковъ чудеса́? Яко и по свято́мъ и́хъ преставле́ніи всѣ́мъ подаю́тъ, притека́ющимъ вѣ́рою, бога́тно врачева́нія, и честны́я и святы́я мо́щи тѣ́хъ то́чатъ благода́ть врачева́ній. О, дво́ица свята́я! О, честны́я главы́! О, му́дросте и сла́во отъ Бо́га да́нныя ва́мъ благода́ти! Тѣ́мже пѣ́сньми зове́мъ Благодѣ́телю Бо́гу, показа́вшему ты́я на врачева́ніе ду́шъ и тѣле́съ на́шихъ.

И ны́нѣ, богоро́диченъ:

Влады́чице, пріими́ [моли́твы ра́бъ Твои́хъ и изба́ви на́съ отъ вся́кія ну́жды и печа́ли].

Крестобогоро́диченъ. Подо́бенъ: Му́ченицы Твои́.

Не терплю́, Ча́до, ви́дящи Тя́, на дре́вѣ усну́вша, бо́дрость всѣ́мъ подаю́щаго: я́ко да дре́вле преступле́нія плодо́мъ сно́мъ поги́бельнымъ усну́вшимъ боже́ственную и спаси́тельную бо́дрость пода́си, Дѣ́ва глаго́лаше, пла́чущи, Юже велича́емъ.


НА ЛИТУРГІИ,

Блаже́нна окто́иха на 4 и отъ кано́на святы́хъ пѣ́снь 3-я. Проки́менъ, гла́съ 4: Святы́мъ, и́же су́ть на земли́ Его́, удиви́ Госпо́дь вся́ хотѣ́нія Своя́ въ ни́хъ. Сти́хъ: Предзрѣ́хъ Го́спода предо мно́ю вы́ну, я́ко одесну́ю мене́ е́сть, да не подви́жуся. Апо́столъ къ Кори́нѳяномъ, зача́ло 153. Аллилу́ія, гла́съ 2. Сти́хъ: Се́ что́ добро́, или́ что́ красно́, но е́же жи́ти бра́тіи вку́пѣ. Ева́нгеліе Матѳе́я, зача́ло 34, отъ полу́. Прича́стенъ: Ра́дуйтеся пра́ведніи [о Го́сподѣ, пра́вымъ подоба́етъ похвала́.]

Источникъ: Минíа, мѣ́сяцъ Ное́мврій. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 2-11.

/ Къ оглавленію раздѣла /


Наверхъ / Къ титульной страницѣ

0