Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - вторникъ, 27 iюня 2017 г. Сейчасъ на порталѣ посѣтителей - 23.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Ма́ія въ 31-й де́нь.
Свята́го му́ченика Ерме́я.

[ВЕЧЕРЪ,]
Стихи́ры, гла́съ 1. Подо́бенъ: Небе́сныхъ чино́въ.

Яко необори́мь сто́лпъ,* прило́ги вра́гъ не поколеба́лся еси́ отню́дъ,* тѣ́хже сердца́ сте́рлъ еси́, Ерме́е,* и болѣ́знію до́блихъ по́двигъ твои́хъ,* я́ко преклоне́ну стѣ́ну,* вся́ и́хъ шата́нія низло́жь.

Во глубину́ невѣ́рія попо́лзшіяся* возводя́, Ерме́е, Бо́жіимъ сло́вомъ,* му́къ треволне́нія подъя́лъ еси́ мно́га,* страстоте́рпче прехва́льне,* до́ндеже вше́лъ еси́ съ ни́ми ра́достно* въ приста́нище небе́сное.

Стихи́ры Богоро́дицы, гла́съ и подо́бенъ то́йже:

Одержи́ми паде́ніи ненаде́жными, Чи́стая,* Тя́ Предста́тельницу еди́ну иму́ще, Дѣ́во,* вопіе́мъ благода́рственно:* очи́сти ны́, Пресвята́я Богоневѣ́сто,* Ты́ бо еси́ мíру прибѣ́жище* и заступле́ніе ро́да на́шего.

Жезло́мъ Твоего́ предста́тельства,* Богороди́тельнице Чи́стая,* звѣри́ныя стра́сти окая́нныя души́ моея́ отжени́ вско́рѣ,* ми́рно живо́тъ мо́й управля́ющи,* и свято́му мя́ ста́ду* избра́нныхъ Твои́хъ ове́цъ причти́.

Согрѣше́ній пучи́ною потопля́емь,* къ ти́хому приста́нищу* пречи́стыя Твоея́ моли́твы, Богороди́тельнице, прибѣ́гъ,* взыва́ю Ти́: спаси́ мя,* держа́вную Твою́ пода́вши десни́цу* рабу́ Твоему́, Пренепоро́чная.

Сла́ва, и ны́нѣ, [богоро́диченъ]:

Нра́вомъ гнилы́мъ попо́лзся, ни́цъ лежу́* и къ Твое́й, Дѣ́во, притека́ю тишинѣ́:* отъ бу́ри сопроти́вныя* и искуше́ній многообра́зныхъ мя́ изба́ви,* да пою́ Твою́ благода́ть непреста́нно,* Богоро́дице, Ма́ти Приснодѣ́во.

Крестобогоро́диченъ:

Воздви́жена я́ко ви́дѣ на Крестѣ́ Агнца* Непоро́чная Дѣ́ва, пла́чущи, вопія́ше:* сла́дкое Мое́ Ча́до,* что́ но́вое и пресла́вное видѣ́ніе?* Ка́ко, содержа́й вся́ческая го́рстію,* на дре́вѣ пригвожда́ешися пло́тію?

Тропа́рь, гла́съ 4:

Му́ченикъ Тво́й, Го́споди, Ерме́й во страда́ніи свое́мъ вѣне́цъ прія́тъ нетлѣ́нный отъ Тебе́, Бо́га на́шего: имѣ́яй бо крѣ́пость Твою́, мучи́телей низложи́, сокруши́ и де́моновъ немощны́я де́рзости. Того́ моли́твами спаси́ ду́ши на́ша.


[НА УТРЕНИ,]
Кано́нъ, творе́ніе Іо́сифово, гла́съ 8.

Пѣ́снь 1.

Ирмо́съ: Во́ду проше́дъ, я́ко су́шу, и еги́петскаго зла́ избѣжа́въ, изра́ильтянинъ вопія́ше: Изба́вителю и Бо́гу на́шему пои́мъ.

Звѣзда́, сія́ющая боже́ственнымъ свѣ́томъ, муче́нія сія́ніемъ позна́нъ бы́лъ еси́, свѣ́тло вся́ озаря́я, вѣ́рою чи́стою тя́, Ерме́е, чту́щія.

Вы́ну воззрѣ́ніемъ, е́же къ Бо́гу, вся́ презрѣ́въ, я́же въ житіи́, му́чениче му́дре, въ му́ченическія вше́лъ еси́ по́двиги и врага́ держа́вно побѣди́лъ еси́.

Красе́нъ видѣ́ніемъ и душе́ю сы́й, Ерме́е, вво́инился еси́ Царю́ Небе́сному и Сего́, му́чениче, до конца́ враги́ смири́лъ еси́.

Не поже́ръ и́доломъ, блаже́нне, твоя́ исторго́ша зу́бы, че́люсти мы́сленныхъ сокруши́лъ еси́ льво́въ и побѣ́ды одѣ́ялся вѣнце́мъ неувяда́ющимъ.

Богоро́диченъ: Свята́я Дѣ́во, Ма́ти Христо́ва, му́чениковъ сла́ва и а́нгеловъ ра́досте, съ ни́ми моли́ Сы́на Твоего́ уще́дрити и спасти́ рабы́ Твоя́.

Пѣ́снь 3.

Ирмо́съ: Ты́ еси́ утвержде́ніе притека́ющихъ къ Тебѣ́, Го́споди, Ты́ еси́ Свѣ́тъ омраче́нныхъ, и пое́тъ Тя́ ду́хъ мо́й.

Украше́ніе бы́лъ еси́ страда́льцевъ, му́дре, благода́тію богосія́нною. Тѣ́мже, и́же въ мíрѣ, благоче́стно тя́ почита́емъ.

Хвалу́ Бо́гу на́шему, че́люстемъ твои́мъ сокруша́емымъ, му́чениче му́дре, тя́ укрѣ́пльшему, благода́рно воспѣва́лъ еси́.

Си́лою Боже́ственнаго Ду́ха ты́ укрѣпля́емь, прему́дре, си́льнаго, ра́дуяся, въ зло́бѣ смири́лъ еси́ змíя.

Богоро́диченъ: Усты́ и язы́комъ исповѣ́даю Тя́, Бо́га пресвяты́й хра́мъ, Пречи́стая, сего́ ра́ди вся́каго изба́ви мя́ озлобле́нія.

Сѣда́ленъ, гла́съ 4. Подо́бенъ: Вознесы́йся.

Низло́жь враго́въ возноше́нія, я́ко во́инъ си́ленъ Влады́чень, побѣ́дный вѣне́цъ прія́лъ еси́. Тѣ́мже восхваля́емъ тя́, я́ко до́бля страда́льца, вѣ́рою творя́ще твою́ всепра́зднственную па́мять, въ не́йже моли́ спасти́ся на́мъ вся́кія ну́жды, Ерме́е многострада́льне.

Сла́ва, и ны́нѣ, богоро́диченъ:

По Бо́зѣ во Тво́й, Богоро́дице, прибѣга́ю смире́нный покро́въ боже́ственный, припа́дая, молю́ся: поми́луй, Пречи́стая, я́ко превзыдо́ша главу́ мою́ грѣси́, и бою́ся, Влады́чице, му́ки, и трепе́щу. Моле́ніе сотвори́, Чи́стая, къ Сы́ну Твоему́ отъ си́хъ изба́вити мя́.

Крестобогоро́диченъ:

Отъ Безнача́льнаго Отца́ рожде́ннаго, напослѣ́докъ Тя́ пло́тію ро́ждшая, на Крестѣ́ ви́сяща зря́щи, Христе́, — увы́ Мнѣ́, любе́знѣйшій Іису́се, — вопія́ше, — ка́ко, сла́вимый я́ко Бо́гъ отъ а́нгелъ, отъ беззако́нныхъ ны́нѣ человѣ́къ, Сы́не, хотя́ распина́ешися? Пою́ Тя, Долготерпѣли́ве.

Пѣ́снь 4.

Ирмо́съ: Услы́шахъ, Го́споди, смотре́нія Твоего́ та́инство, разумѣ́хъ дѣла́ Твоя́ и просла́вихъ Твое́ Божество́.

То́ки крове́й твои́хъ многобо́жія о́гнь погаси́ша, вѣ́рнымъ же роса́ яви́шася, страстоте́рпче му́чениче досточу́дне.

Тро́ическою благода́тію, му́чениче, ороша́емь, пребыва́еши неопали́мь, посреди́ пла́мене стоя́ три́ дни́, всесла́вне.

Ли́къ небе́сныхъ си́лъ свы́ше смотря́ше до́блесть, и по́двигъ твои́хъ крѣ́пости, страда́льче Ерме́е, дивя́ся.

Богоро́диченъ: Препѣ́тая Влады́чице, во святы́хъ почива́ющаго па́че сло́ва родила́ еси́, сего́ ра́ди Тя́ пѣ́сньми почита́емъ.

Пѣ́снь 5.

Ирмо́съ: Вску́ю мя́ отри́нулъ еси́ отъ лица́ Твоего́, Свѣ́те незаходи́мый, и покры́ла мя́ е́сть чужда́я тма́ окая́ннаго? Но обрати́ мя, и къ свѣ́ту за́повѣдей Твои́хъ пути́ моя́ напра́ви, молю́ся.

Сокруша́емь тѣ́ломъ, му́чениче пресла́вне, мно́гими му́ками сокруше́ніе содѣ́лалъ еси́ въ поги́бель истука́ннымъ благода́тію, сего́ ра́ди всѣ́хъ благочести́выхъ благода́тію Боже́ственною исцѣля́еши душе́вная сокруше́нія.

Го́рькими отра́вы, му́чениче, напое́нъ пребыва́еши невреди́мь, во извѣ́стну вѣ́ру призыва́я си́хъ Пода́теля, претворя́ема твои́мъ свѣ́тлымъ чудодѣ́йствомъ къ муче́нія красотѣ́ пресвѣ́тло.

Ника́коже уклони́лся еси́ стоя́нія лу́чшаго, блаже́нне, укрѣпля́ющаго тя́, и утвержда́юща, и исправля́юща по́двиги вся́, е́же къ нему́ бы́вшее, прозря́ нра́ва простото́ю.

Богоро́диченъ: Мы́сленный Тя́ свѣ́щникъ дре́вле проро́къ ви́дѣ Ду́хомъ, иму́щь, Отрокови́це, свѣщу́, Христа́ Го́спода, свѣ́томъ неизрече́ннымъ вся́ ны́ просвѣща́юща, вѣ́рно Тя́ чту́щія, Пренепоро́чная.

Пѣ́снь 6.

Ирмо́съ: Очи́сти мя́, Спа́се, мно́га бо беззако́нія моя́, и изъ глубины́ зо́лъ возведи́, молю́ся, къ Тебѣ́ бо возопи́хъ, и услы́ши мя́, Бо́же спасе́нія моего́.

Всецѣ́ло къ Бо́гу, всеблаже́нне, имѣ́я жела́ніе, болѣ́зни и терза́нія боже́ственнаго твоего́ тѣлесе́, я́коже ино́му стра́ждущу, терпѣ́лъ еси́, ра́дуяся, вѣнца́ прозира́я.

Претерпѣ́лъ еси́ крѣ́пко жи́лъ твои́хъ отъя́тіе, Ерме́е, му́чениче Христо́въ, врага́ многоко́зненнаго жи́лы истерза́я благода́тію и му́жеству вся́кому о́бразъ явля́яся.

Изощре́нъ огне́мъ Христо́вы любве́, я́ко обою́ду о́стръ вои́стинну бы́лъ еси́ ме́чь во́инства безбо́жная, я́ко тве́рдъ ору́жникъ, посѣка́я явле́нно.

Богоро́диченъ: Пита́еши боголѣ́пно ма́ніемъ вся́ Пита́ющаго, рука́ми держи́ши, Всенепоро́чная Влады́чице, вся́ Содержа́щаго, сего́ ра́ди Тя́, вѣ́рніи, по до́лгу сла́вимъ.

Конда́къ, гла́съ 6. Подо́бенъ: Еже о на́съ.

Иже по Христѣ́ усе́рдно подвиза́вся, въ сѣди́нахъ до́блихъ му́жество стяжа́, му́чениче Ерме́е, беззако́нныхъ злоумышле́нія попра́въ Христо́вою си́лою, отъ чаро́вныхъ напое́ній невреди́мь пребы́сть, зовы́й: Бо́гъ е́сть со мно́ю, и никто́же на мя́.

Пѣ́снь 7.

Ирмо́съ: Отъ Іуде́и доше́дше, о́троцы въ Вавило́нѣ иногда́ вѣ́рою Тро́ическою пла́мень пе́щный попра́ша пою́ще: отцевъ Бо́же, благослове́нъ еси́.

Къ Бо́гу зря́, могу́щему спасти́, ума́ пра́востію, претерпѣ́лъ еси́ болѣ́зни, Ерме́е, до́бляго твоего́ тѣ́ла, воспѣва́я: оте́цъ на́шихъ Бо́же, благослове́нъ еси́.

Кропле́ніемъ твои́хъ крове́й о́гнь угаси́лъ еси́ безбо́жія, въ пла́мень же вше́дъ, не опали́лся еси́ отню́дъ, воспѣва́я, пребога́те: оте́цъ на́шихъ Бо́же, благослове́нъ еси́.

Блажи́тъ тя́ вся́ка це́рковь, зря́щи до́блести твоя́, благода́ть же чуде́съ и побѣ́дныя по́чести, я́же подаде́ тебѣ́ Госпо́дь, му́чениче Ерме́е му́дре, свѣ́тло подвиза́вшуся.

Богоро́диченъ: Украси́лася еси́, Дѣ́во добро́тою, кра́снаго Христа́ ро́ждши, на́мъ уподо́бльшася и вся́ сокруше́нныя къ жи́зни возве́дша. Тѣ́мже вѣ́рно Тя́ всегда́ сла́вимъ въ пѣ́снехъ.

Пѣ́снь 8.

Ирмо́съ: Побѣди́тели мучи́теля и пла́мене благода́тію Твое́ю бы́вше, за́повѣдемъ Твои́мъ зѣло́ прилежа́ще, о́троцы вопія́ху: благослови́те, вся́ дѣла́ Госпо́дня, Го́спода.

Беззако́нныхъ велѣ́ніе, зако́номъ укрѣпля́емь и́стиннымъ, страда́льче Ерме́е, ра́дуяся, преоби́дѣлъ еси́: и по́двиги вели́кими, блаже́нне, терпя́, прія́лъ еси́ я́же въ вы́шнихъ жили́ща во вѣ́ки.

Не ужаса́юся вся́каго болѣ́зней велѣ́нія пребыва́ема, ни принесу́ че́сти не су́щимъ бого́мъ, — взыва́лъ еси́, всеблаже́нне, — еди́наго то́кмо чту́ Іису́са Го́спода, при Понтíйстѣмъ Пила́тѣ распе́ншагося.

Пожре́тися ше́лъ еси́, я́ко овча́ незло́биво, му́чениче Ерме́е, за Поже́ршагося на́съ ра́ди, я́ко овча́те, и же́ртвы ме́рзкія вся́ отъ земли́ отъе́мшаго, тѣ́мже во хвале́ніи досто́йно тя́ пое́мъ.

Богоро́диченъ: Яви́лася еси́ ши́рши небе́съ, вмѣсти́вшая Бо́га во утро́бѣ, Его́же при́сно моли́ утѣсня́ющаго мя́ ны́нѣ грѣха́ изба́вити, Дѣ́во, я́ко да, просте́рся дѣ́лы благоче́стія, вѣ́рно Тя́ ублажа́ю.

Пѣ́снь 9.

Ирмо́съ: Ужасе́ся о се́мъ не́бо, и земли́ удиви́шася концы́, я́ко Бо́гъ яви́ся человѣ́комъ пло́тски, и чре́во Твое́ бы́сть простра́ннѣйшее небе́съ. Тѣ́мъ Тя́, Богоро́дицу, а́нгеловъ и человѣ́къ чинонача́лія велича́ютъ.

Ви́дѣти сподо́бился еси́, разрѣши́вся отъ пло́ти, страстоте́рпче прехва́льне, блага́я, я́же тебѣ́ угото́ва Бо́гъ и съ тобо́ю пострада́вшимъ и низло́жшимъ лука́ваго. Съ ни́миже на́мъ спасти́ся Го́спода моли́, му́чениче Ерме́е достохва́льне.

Красе́нъ тво́й ви́дъ и пре́жде твоего́ страда́нія, краснѣ́йши яви́ся, му́дре по по́двизѣхъ чу́дныхъ, а́нгельскою свѣ́тлостію укра́шенъ, сла́вне. Тѣ́мже и къ кра́снымъ восте́клъ еси́ черто́гомъ, побѣ́дными вѣнцы́ удобре́нъ.

Во́инство преоби́дѣлъ еси́ земно́е, Царю́ Небе́сному во́инствуеши, му́чениче му́дре, Его́же си́лою крѣ́пкою де́монскія полки́ вся́ потреби́лъ еси́ держа́вно и побѣ́дными вѣнцы́ зако́нно увя́злся еси́, о на́съ моли́ всегда́.

Па́мять твоя́ наста́ свѣтоза́рная, на́ша мы́сли просвѣща́ющи луча́ми по́двигъ твои́хъ тве́рдыхъ, въ не́йже мо́лимъ тя́: имѣ́яй дерзнове́ніе ко Христу́, моли́ непреста́нно улучи́ти на́мъ ми́лость въ де́нь Су́дный.

Богоро́диченъ: Обо́лкся въ мя́, про́йде изъ Тебе́ Бо́гъ, нетлѣ́нія облече́ мя оде́ждою, злы́мъ нра́вомъ обна́жшася боже́ственныя оде́жды, Богороди́тельнице Влады́чице, всѣ́хъ человѣ́ковъ прибѣ́жище, му́чениковъ вѣнцено́сныхъ утвержде́ніе и стѣна́ и а́нгеловъ ра́дованіе.

Источникъ: Минíа, мѣ́сяцъ Ма́ій. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 253 – 256 об.

/ Къ оглавленію раздѣла /


Наверхъ / Къ титульной страницѣ

0