Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - пятница, 28 апрѣля 2017 г. Сейчасъ на порталѣ посѣтителей - 20.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Ма́ія въ 30-й де́нь.
Преподо́бнаго отца́ на́шего Исаа́кія, оби́тели Далма́тскія.

[ВЕЧЕРЪ,]
Стихи́ры, гла́съ 1. Подо́бенъ: Небе́сныхъ чино́въ.

Воздержа́ніемъ тѣ́ло огра́ждь,* страстна́я движе́нія* умертви́лъ еси́, о́тче,* моли́твами и бдѣ́ніи.* Тѣ́мже я́же въ тебѣ́* духо́вная си́ла осѣни́вши,* показа́ тя мы́сленна свѣти́льника и всемíрна.

Мона́шеское житіе́ ты́ уясни́лъ еси́,* отъ пусты́ни, о́тче, возсія́въ гра́ду,* я́коже со́лнце.* Тѣ́мже вѣ́рныя уче́ніи твои́ми просвѣти́лъ еси́,* благослови́ти Отца́, и Сы́на,* и Ду́ха Единосу́щнаго.

Стихи́ры Богоро́дицы, гла́съ и подо́бенъ то́йже:

Одержи́ми паде́ніи ненаде́жными, Чи́стая,* Тя́ Предста́тельницу еди́ну иму́ще, Дѣ́во,* вопіе́мъ благода́рственно:* очи́сти ны́, Пресвята́я Богоневѣ́сто,* Ты́ бо еси́ мíру прибѣ́жище* и заступле́ніе ро́ду на́шему.

Жезло́мъ Твоего́ предста́тельства,* Богороди́тельнице Чи́стая,* звѣри́ныя стра́сти* окая́нныя души́ моея́ отжени́ вско́рѣ,* ми́рно живо́тъ мо́й управля́ющи,* и свято́му мя́ ста́ду избра́нныхъ Твои́хъ ове́цъ причти́.

Согрѣше́ній пучи́ною потопля́емь,* къ ти́хому приста́нищу Пречи́стыя Твоея́ моли́твы,* Богороди́тельнице, прибѣ́гъ,* взыва́ю Ти́: спаси́ мя,* держа́вную Твою́ пода́вши десни́цу* рабу́ Твоему́, Пренепоро́чная.

Сла́ва, и ны́нѣ, [богоро́диченъ]:

Нра́вомъ гнилы́мъ попо́лзся, ни́цъ лежу́* и къ Твое́й, Дѣ́во, притека́ю тишинѣ́:* отъ бу́ри сопроти́вныя* и искуше́ній многообра́зныхъ мя́ изба́ви,* да пою́ Твою́ благода́ть непреста́нно,* Богоро́дице, Ма́ти Приснодѣ́во.

Крестобогоро́диченъ:

У Креста́ предстоя́щи Сы́на и Бо́га Твоего́* и долготерпѣ́ніе Того́ смотря́ющи,* глаго́лаше, пла́чущи, Ма́ти Чи́стая:* увы́ Мнѣ́, Ча́до сладча́йшее,* что́ сія́ стра́ждеши непра́ведно, Сло́ве Бо́жій,* да спасе́ши человѣ́чество?


[НА УТРЕНИ,]
Кано́нъ, гла́съ 8.

Пѣ́снь 1.

Ирмо́съ: Изра́иля отъ рабо́ты изба́вилъ еси́, Го́споди, десни́цею Твое́ю держа́вною, я́ко о́наго спа́слъ еси́, ны́нѣ на́съ спаси́.

Отъ пусты́нныхъ предѣ́лъ прини́кнувъ, преподо́бне, собра́ніе е́реси расплѣни́въ, свя́те, утверди́лъ еси́ вѣ́ру Христо́ву.

Дави́дски предъ цари́, сла́вне, глаго́ля, никогда́же постыдѣ́лся еси́, Христо́ву хотя́ Це́рковь утверди́ти.

Въ ти́нѣ пре́лести, приве́ргся, прехва́льне, я́ко би́серъ, просія́лъ еси́, заре́ю Ду́ха уясня́емь, сла́вне.

Богоро́диченъ: Во утро́бѣ заче́нши безлѣ́тнаго, Пречи́стая, отъ Отца́ рожде́нна Сы́на, младе́нца Сего́, непоро́чная Дѣ́во, породила́ еси́.

Пѣ́снь 3.

Ирмо́съ: Утверди́ на́шъ у́мъ и сердца́, небеса́ сло́вомъ утвержде́й, во е́же пѣ́ти и сла́вити Тя́, во спасе́ніе ду́шъ на́шихъ.

Труба́ слове́сна Ду́ха яви́лся еси́, о́тче, вся́ созыва́ющи, я́коже на бра́нь, вра́жіимъ ополче́ніемъ проти́ву ста́ти по́мощію Спа́са Христа́.

Лѣ́ствица мы́сленная показа́лся еси́, богоно́се, къ ца́рству веду́щи вы́шнему восходя́щія вѣ́рою, уче́ніи твои́ми утвержда́емы въ Ду́сѣ.

Гора́ и́стинно я́вствовался еси́ уче́нія, богоно́се, любо́вію Влады́ки, ко Христо́вѣ Це́ркви вся́ собира́я, сопряже́нныя добродѣ́тельми къ Нему́.

Богоро́диченъ: Ма́ти и́стинно показа́лася еси́, о Дѣ́во, Емману́ила ро́ждши, Бо́га Сло́ва, Его́же моля́щи не преста́й, безму́жная Невѣ́сто, благослове́нная Богоро́дице Чи́стая.

Сѣда́ленъ, гла́съ 4. Подо́бенъ: Прему́дрости.

Тучено́сный о́блакъ духо́вный яви́лся еси́, преблаже́нне, су́щимъ на земли́, напая́я, я́ко бразду́, вѣ́рныхъ сердца́: обте́къ же концы́ боже́ственными словесы́ твои́ми, до́ждь уче́ній источи́лъ еси́, прему́дре, тѣ́мже, я́ко пото́ки, всѣ́хъ сердца́ благово́ніе Ду́ха богому́дренно израсти́лъ еси́, богоно́се Исаа́кіе, моли́ Христа́ Бо́га грѣхо́въ оставле́ніе пода́ти чту́щимъ любо́вію святу́ю па́мять твою́.

Сла́ва, и ны́нѣ, богоро́диченъ:

Яко Всенепоро́чная Невѣ́ста Творцу́, я́ко Неискусому́жная Ма́ти Изба́вителя, прія́телище я́ко су́щи Утѣ́шителя, Препѣ́тая, беззако́нію мя́ су́ща скве́рное оби́телище и бѣсо́мъ игра́лище въ ра́зумѣ бы́вша, потщи́ся отъ тѣ́хъ злодѣ́йства мя́ изба́вити и свѣ́тлое жили́ще добродѣ́телей соверши́, Свѣтоно́сная Нетлѣ́нная, отжени́ о́блакъ страсте́й и вы́шняго прича́стія сподо́би и Свѣ́та невече́рняго моли́твами Твои́ми.

Крестобогоро́диченъ:

Агнца, и Па́стыря, и Изба́вителя Агница зря́щи на Крестѣ́, восклица́ше, пла́чущи, и, го́рько рыда́ющи, вопія́ше: мíръ у́бо ра́дуется, пріе́мля Тобо́ю избавле́ніе, утро́ба же Моя́ гори́тъ, зря́щи Твое́ распя́тіе, е́же терпи́ши за милосе́рдіе ми́лости. Долготерпѣли́ве Го́споди, ми́лости бе́здно и исто́чниче неисчерпа́емый, умилосе́рдися и да́руй согрѣше́ній оставле́ніе вѣ́рою пою́щимъ Боже́ственныя стра́сти Твоя́.

Пѣ́снь 4.

Ирмо́съ: Услы́шахъ слу́хъ си́лы Твоея́, и возвесели́ся се́рдце мое́ о Го́сподѣ.

Ангелоподо́бно на земли́ показа́лъ еси́ житіе́, лику́еши съ небе́сными си́лами.

Пе́рвѣе ты́ мона́ховъ настоя́тель бы́въ, изъ пусты́ни, богому́дре, су́щимъ во гра́дѣ о́бразъ показа́лся еси́, сла́вне.

Па́мять твоя́ вои́стинну ны́нѣ, Исаа́кіе о́тче, весели́тъ сердца́ пою́щихъ тя́.

Богоро́диченъ: Богоро́дице, и ны́нѣ, я́ко при́сно, отъ вра́гъ беззако́нныхъ моли́твами Твои́ми свободи́ рабы́ Твоя́.

Пѣ́снь 5.

Ирмо́съ: Отъ но́щи невѣ́дѣнія боговѣ́дѣніемъ просвѣти́вый концы́, просвѣти́ мя у́тромъ человѣколю́бія Твоего́, Го́споди.

Отъ пусты́ни вои́стинну, я́коже звѣзда́ свѣтла́, возсія́лъ еси́ и ерети́ческую но́щь уче́ніи твои́ми отгна́лъ еси́.

Бразды́ удержа́въ коня́ Уа́лентова, прехва́льне, ско́тскій ра́зумъ обличи́лъ еси́, я́вѣ посрами́въ его́.

Главу́ твою́, о́тче, же́зліемъ положи́лъ еси́ ураня́тися, мы́сленно вѣ́ры твоея́ главу́ держа́, Христа́ Бо́га.

Богоро́диченъ: Херуви́мъ я́вльшися честнѣ́йши, Дѣ́во Всепѣ́тая, моли́ Сы́на Твоего́ спасти́ ду́ши пою́щихъ Тя́.

Пѣ́снь 6.

Ирмо́съ: Ри́зу мнѣ́ пода́ждь свѣ́тлу, одѣя́йся свѣ́томъ, я́ко ри́зою, Многоми́лостиве Христе́ Бо́же на́шъ.

Проре́клъ еси́ Уа́ленту, му́дре, ме́рзкую сме́рть проразумѣ́ніемъ ду́ха и яви́лся еси́ вои́стинну проро́къ сла́венъ.

Лопа́тою вѣ́ры вѣ́рныхъ, я́ко пшени́цу, собра́лъ еси́, Уа́лента, я́ко пле́вы въ пле́вницѣ, запали́лъ еси́ моли́твами твои́ми, му́дре.

Угла́дилъ еси́ скрижа́ли серде́чныя вѣ́рою послу́шающихъ тебе́, богому́дре Исаа́кіе, начерта́въ на ни́хъ правосла́вія о́бразъ.

Богоро́диченъ: Яже еди́на сло́вомъ пло́тію Сло́во ро́ждши, изба́ви, мо́лимся, сѣте́й вра́жіихъ ду́ши на́ша.

Конда́къ, гла́съ 8. Подо́бенъ: Яко нача́тки.

Яко уго́дникъ Бо́жій вѣ́рный, по Христо́вѣ Це́ркви ре́вностію разже́гся, бразды́ Уа́лентовы удержа́въ, проро́чески тому́ о затворе́ніи Це́ркве па́губную сме́рть предре́клъ еси́, преподо́бне. Тѣ́мже при́сно моли́ о на́съ, чту́щихъ тя́, Исаа́кіе преподо́бне.

Пѣ́снь 7.

Ирмо́съ: Въ нача́лѣ зе́млю основа́вый и небеса́ сло́вомъ утверди́вый, благослове́нъ еси́ во вѣ́ки, Го́споди Бо́же оте́цъ на́шихъ.

Пода́вый преподо́бному Твоему́ сло́во обличи́тельно къ мучи́телевѣ зло́бѣ, благослове́нъ еси́ во вѣ́ки, Го́споди Бо́же оте́цъ на́шихъ.

Во свѣ́тлѣй пра́ведныхъ сла́вно оби́тели водворя́яся, о́тче, вопіе́ши Зижди́телю: благослове́нъ еси́ во вѣ́ки, Го́споди Бо́же оте́цъ на́шихъ.

Отче честны́й, Спа́су моли́ся о на́съ немо́лчно, не престая́, изба́витися вся́кія бѣды́ и неотъе́млемыя жи́зни улучи́ти ста́ду твоему́.

Богоро́диченъ: Иже во утро́бу Дѣ́вы всели́выйся и въ не́й Ада́ма назда́вый, благослове́нъ еси́ во вѣ́ки, Го́споди Бо́же оте́цъ на́шихъ.

Пѣ́снь 8.

Ирмо́съ: Безнача́льнаго Царя́ сла́вы, Его́же трепе́щутъ небе́сныя си́лы, по́йте, свяще́нницы, лю́діе, превозноси́те во вся́ вѣ́ки.

Показа́вшаго правосла́вныя вѣ́ры побо́рника, Исаа́кія, вси́ по́йте, свяще́нніи, лю́діе, превозноси́те во вся́ вѣ́ки.

Яко овча́ слове́сное, отъ пусты́ни прише́лъ еси́, отгоня́ звѣ́ри отъ ста́да Христо́ва, водворя́тися въ мѣ́стѣхъ пусты́хъ прогоня́.

Не убоя́лся еси́ Уа́лентовы, о́тче, лю́тыя и злы́я я́рости кро́тостію души́, дѣ́йствоваше бо въ тебѣ́ Ду́хъ Истины.

Богоро́диченъ: Жи́зни изъ Тебе́ отсѣче́ся Ка́мень, я́коже пи́шетъ, безъ руки́ человѣ́чи, Пресвята́я Чи́стая, Бо́гъ, благоволи́вый въ Тя́ всели́тися.

Пѣ́снь 9.

Ирмо́съ: Тя́, Богоро́дицу, Ма́терь Свѣ́та, въ пѣ́снехъ велича́емъ.

Сокруши́лъ еси́ си́лы безбо́жныхъ держа́вно крѣ́постію Боже́ственнаго Ду́ха.

Разруши́лъ еси́ сою́зы, вѣ́ры сою́зомъ, ересе́й полки́.

Исаа́кіе богому́дре, помина́я къ Бо́гу не преста́й, е́же спасти́ на́съ.

Богоро́диченъ: Рождество́ Твое́, Дѣ́во, е́же въ печа́лехъ рожде́ніе Евы претвори́.

Источникъ: Минíа, мѣ́сяцъ Ма́ій. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 250 об. – 253.

/ Къ оглавленію раздѣла /


Наверхъ / Къ титульной страницѣ

0