Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - понедѣльникъ, 26 iюня 2017 г. Сейчасъ на порталѣ посѣтителей - 24.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Ма́ія въ 29-й де́нь.
Святы́я преподобному́ченицы Ѳеодо́сіи дѣ́вы.

[ВЕЧЕРЪ,
На Го́споди воззва́хъ:] стихи́ры святы́я, гла́съ 8. Подо́бенъ: О, пресла́внаго чудесе́!

Му́ченице дѣ́во,* всехва́льная Ѳеодо́сіе,* Христа́ вседу́шно возжела́вши,* муче́нія претерпѣ́ла еси́ ра́ны,* до́блественнѣ ураня́ема за твоего́ Рачи́теля* и стру́жема ногты́ по ре́бромъ.* О, подвиго́въ твои́хъ тве́рдаго противле́нія!* Имиже на зе́млю вои́стинну* низве́ргла еси́ го́рдаго.

Добро́тою души́ же и тѣлесе́* укра́шена свѣ́тло,* Христу́ пренесла́ся еси́,* сла́вы вѣнце́мъ жела́ющи отъ Него́ увязти́ся,* Ѳеодо́сіе, му́ченице всесла́вная,* и Ца́рствія я́вѣ діади́му,* вои́стинну многоцѣ́нну,* досто́йно прія́ти твоему́ верху́,* невѣ́ста нетлѣ́нная я́вльшися, всему́драя.

Стихи́ры Богоро́дицы, гла́съ и подо́бенъ то́йже:

Ра́дуйся, ду́шъ просвѣще́ніе,* согрѣша́ющихъ проще́ніе,* неради́выхъ исправле́ніе;* ра́дуйся, утѣше́ніе и ра́дость,* скорбя́щихъ Помо́щнице;* ра́дуйся, Блага́я,* немощны́хъ ду́шъ исцѣле́ніе;* ра́дуйся, примире́ніе къ Бо́гу и Хода́таице,* Серафи́мъ всѣ́хъ я́ко су́щи святѣ́йши, Чи́стая.

Пло́ть отъ крове́й Твои́хъ пріе́мъ,* Превѣ́чный Бо́гъ* Тя́ Предста́тельницу показа́* человѣ́комъ, Чи́стая.* Тѣ́мже изба́ви рабы́ Твоя́* отъ вся́кія бѣды́ и обстоя́нія* и сѣ́тей лука́ваго врага́* и сія́нія причасти́тися сподо́би избра́нныхъ,* вся́ сла́вящія и покланя́ющіяся Тебѣ́.

Спаси́ мя́, Влады́чице Пречи́стая,* Яже Спа́са Христа́ неизрече́нно ро́ждшая:* Тя́ бо еди́ну стяжа́хъ предста́тельницу,* и необори́мую стѣ́ну,* и покро́въ, и ра́дованіе,* и души́ моея́ боже́ственное утѣше́ніе.* Ты́ у́бо мя́ изба́ви неусыпа́ющаго че́рвія* и огня́ вѣ́чнующаго,* Ма́ти Христа́ Бо́га.

Сла́ва, и ны́нѣ, [богоро́диченъ]:

Да гла́сы велича́ю Тя́* ра́достными, Чи́стая,* и сла́влю пучи́ну человѣколю́бія Твоего́,* отъ бѣ́дъ спаси́* и изми́ мя́ душетлѣ́нныхъ стрѣ́лъ* неви́димаго и вселука́ваго врага́:* Тя́ бо предлага́ю на него́, Богоневѣ́сто,* ору́жіе тве́рдо и непобѣди́мо,* Ма́ти Христа́ Бо́га.

Крестобогоро́диченъ:

Что́ зри́мое видѣ́ніе,* е́же Мои́ма очи́ма ви́дится, о Влады́ко?* Содержа́й всю́ тва́рь,* на дре́во воздви́женъ бы́въ* и умира́еши, всѣ́мъ дая́й жи́знь! —* Богоро́дица, пла́чущися, глаго́лаше,* егда́ узрѣ́ на Крестѣ́ возноси́ма* изъ Нея́ неизрече́нно возсія́вшаго* Бо́га и Человѣ́ка.

Тропа́рь, гла́съ 4:

Добродѣ́тель благопрія́тно, му́ченице, пости́гла еси́, Христо́во прія́телище бы́сть чи́стое и Свята́го Ду́ха до́мъ возлю́бленъ; отню́дуже посрами́ла еси́ врага́, борю́щаго ро́дъ человѣ́ческій, до́брѣ страда́вшая, и посѣ́кла еси́ Копрони́ма, Ѳеодо́сіе, мече́мъ вѣ́ры, и къ черто́гу небе́сному преста́вилася еси́, ра́дующися. Тебѣ́ вѣ́рою чту́щимъ при́сно проси́ ве́лія ми́лости.


[НА УТРЕНИ,]
Кано́нъ, его́же краегране́сіе: Ѳеодо́сіи му́ченицы пою́ сла́ву. Гла́съ 4.

Пѣ́снь 1.

Ирмо́съ: Мо́ря чермну́ю пучи́ну невла́жными стопа́ми дре́вній пѣшеше́ствовавъ Изра́иль, крестообра́зными Моисе́овыма рука́ма Амали́кову си́лу въ пусты́ни побѣди́лъ е́сть.

Бо́гъ тебѣ́, Ѳеодо́сіе, бы́сть пу́ть страда́нія, на Кре́стъ во́лею возше́дый, низложи́въ мучи́теля, я́коже пти́цѣ, наруга́тися, отъ му́ченикъ содѣ́ла.

Благомо́щно, Ѳеодо́сіе всечестна́я, на земли́ разрази́ла еси́ нача́льника пре́лести, крѣ́пко пострада́вши, прехва́льная, и сла́вы вѣне́цъ я́ко побѣдоно́сица, му́ченице, прія́ла еси́.

Дре́вле велехва́льство имѣ́вый, ны́нѣ низложи́ся, твоему́ терпѣ́нію, му́ченице, прирази́вся: Креста́ бо си́лу воспріе́мши, посрами́ла еси́ безмѣ́рно того́ шата́ющася.

Богоро́диченъ: Лука́вно прельсти́ мя́ змíй, взя́тъ плѣне́на, обожи́тися жела́ніе ми́ вло́жь; Тобо́ю же, Пречи́стая, призва́нъ бы́въ, обожи́хся непремѣ́нно вои́стинну.

Пѣ́снь 3.

Ирмо́съ: Весели́тся о Тебѣ́ Це́рковь Твоя́, Христе́, зову́щи: Ты́ моя́ крѣ́пость, Го́споди, и прибѣ́жище, и утвержде́ніе.

Жела́ніе Боже́ственное, Ѳеодо́сіе, тя́ че́стну показа́ невѣ́сту, Христо́ву му́ченицу, Того́ Кре́стъ возлюби́вшую.

Пло́ти тлетво́рное оста́вльши, о честна́я, промышле́ніе, Животворя́щимъ Ду́хомъ живе́ши, Ѳеодо́сіе пресла́вная.

Уврачу́й мо́й у́мъ, богодарова́нною твое́ю, честна́я, благода́тію, и ду́шу, страстьми́ разсла́бленную, исцѣли́.

Богоро́диченъ: Возста́вила еси́, о Чи́стая, па́дшій мо́й зра́къ, ро́ждши Нача́льника, Влады́чице, всѣ́хъ на́съ воскресе́нія.

Сѣда́ленъ, гла́съ 8. Подо́бенъ: Прему́дрости.

Крове́й твои́хъ струя́ми всю́ крѣ́пость лука́ваго діа́вола я́ко вои́стинну погрузи́вши, сла́вная, прешла́ еси́ невре́дно му́къ всевели́кую пучи́ну и въ земли́ святѣ́й я́вѣ всели́лася еси́, по́честь трудо́въ досто́йно пріе́мши, черто́га вхо́да небе́снаго сподо́билася еси́, Ѳеодо́сіе прехва́льная. Моли́ Христа́ Бо́га грѣхо́въ оставле́ніе пода́ти чту́щимъ любо́вію святу́ю па́мять твою́.

[Сла́ва, и ны́нѣ,] богоро́диченъ:

Небе́сную две́рь и киво́тъ, всесвяту́ю го́ру, свѣ́тлый о́блакъ воспои́мъ, неопали́мую купину́, слове́сный ра́й, Евы воззва́ніе, вселе́нныя всея́ вели́кое сокро́вище, я́ко спасе́ніе въ Не́й содѣ́лася мíрови и оставле́ніе дре́внихъ согрѣше́ній. Сего́ ра́ди вопіе́мъ Ей: моли́ся Сы́ну Твоему́ прегрѣше́ній оставле́ніе дарова́ти, благоче́стно покланя́ющимся всесвято́му Рождеству́ Твоему́.

Крестобогоро́диченъ:

Агнца, и Па́стыря, и Изба́вителя Агница зря́щи на Крестѣ́, восклица́ше, пла́чущи, и, го́рько рыда́ющи, вопія́ше: мíръ у́бо ра́дуется, пріе́мля Тобо́ю избавле́ніе, утро́ба же Моя́ гори́тъ, зря́щи Твое́ распя́тіе, е́же терпи́ши за милосе́рдіе ми́лости. Долготерпѣли́ве Го́споди, ми́лости бе́здно и исто́чниче неисчерпа́емый, умилосе́рдися и да́руй согрѣше́ній оставле́ніе вѣ́рою пою́щимъ Боже́ственныя Стра́сти Твоя́.

Пѣ́снь 4.

Ирмо́съ: Вознесе́на Тя́ ви́дѣвши Це́рковь на Крестѣ́, Со́лнце Пра́ведное, ста́ въ чи́нѣ свое́мъ, досто́йно взыва́ющи: сла́ва си́лѣ Твое́й, Го́споди.

Шата́яся, мучи́тель ра́нами устраши́ти крѣ́пость твоего́ терпѣ́нія хотя́ше окая́нный: ты́ же, прехва́льная, — сла́ва Бо́гу моему́! — взыва́ла еси́.

Богода́ннымъ и боже́ственнымъ именова́ніемъ проувѣ́дѣнно обогати́лася еси́, му́ченице страстоно́сице: да́ніе бо была́ еси́ Бо́жіе, на́съ веселя́щее, вѣ́рою тя́ и любо́вію почита́ющія.

Укра́шенною, богому́драя Ѳеодо́сіе, му́ченическою кро́вію твое́ю, омоче́ною одѣ́яна оде́ждею, — теку́ во слѣ́дъ Тебе́, — любо́вію Жениху́ твоему́ взыва́ла еси́.

Богоро́диченъ: Воплоще́нно Сло́во, Чи́стая Дѣ́во, боголѣ́пно родила́ еси́ и пребыва́еши Дѣ́ва. Тѣ́мже немо́лчными гла́сы, — ра́дуйся! — Тебѣ́, Влады́чице, вѣ́рою несумнѣ́нною взыва́емъ.

Пѣ́снь 5.

Ирмо́съ: Ты́, Го́споди, мо́й Свѣ́тъ, въ мíръ прише́лъ еси́, Свѣ́тъ Святы́й, обраща́яй изъ мра́чна невѣ́дѣнія вѣ́рою воспѣва́ющія Тя́.

Мѵ́ро излія́вшееся, Христа́ возлю́бльши, отрокови́це, богому́дренно послѣ́довала еси́ Сему́, пѣ́сньми сла́вящи.

Вѣ́чную жи́знь вре́менною измѣни́ла е́сть, кро́вію ма́лою небе́сное Ца́рство му́ченица наслѣ́дова.

Источа́ютъ, я́ко исто́чницы, му́ченическія мо́щи цѣльбы́ неду́гующимъ и душе́вныя неду́ги вѣ́рою исцѣля́ютъ.

Богоро́диченъ: Кто́ мо́жетъ Твое́ сказа́ти та́инство, Всенепоро́чная? Зижди́теля бо, невмѣсти́маго всѣ́ми, во чре́вѣ Твое́мъ вмѣсти́ла еси́.

Пѣ́снь 6.

Ирмо́съ: Пожру́ Ти со гла́сомъ хвале́нія, Го́споди, Це́рковь вопіе́тъ Ти́, отъ бѣсо́вскія кро́ве очи́щшися, ра́ди ми́лости отъ ре́бръ Твои́хъ исте́кшею кро́вію.

По Тебѣ́ со тща́ніемъ сме́рть пріима́ше Ѳеодо́сія му́ченица, преще́нія мучи́телей не убоя́вшися, Твое́й стра́сти уподо́бися, Христе́, во́льнѣй. [Два́жды.]

Удо́бно Кресто́мъ Твои́мъ жены́ укрѣпи́вшеся, главы́ зміе́въ, я́коже предре́клъ еси́, Спа́се, попира́ютъ, Твое́ю любо́вію уязвля́емы и Боже́ственнымъ Твои́мъ жела́ніемъ.

Богоро́диченъ: Всю́ Тя́, Голуби́цу соверше́ну и предо́бру, издале́ча обрѣ́тъ, кри́нъ и удо́льный цвѣ́тъ, о Богома́ти, Жени́хъ мы́сленный въ Тя́ всели́ся.

Конда́къ, гла́съ 2. Подо́бенъ: Вы́шнихъ ища́.

Труда́ми живо́тъ нетру́дный дости́гла еси́, кро́вію же Копрони́ма удави́ла еси́, му́ченице, скве́рнаго врага́ Христо́вы Це́ркве, всеблаже́нная Ѳеодо́сіе, и съ вы́шними ра́дуешися во́инствы, чту́щія па́мять твою́ покрыва́ющи.

Пѣ́снь 7.

Ирмо́съ: Въ пещи́ авраа́мстіи о́троцы перси́дстѣй, любо́вію благоче́стія па́че, не́жели пла́менемъ, опаля́еми, взыва́ху: благослове́нъ еси́ въ хра́мѣ сла́вы Твоея́, Го́споди.

Тя́, богода́нными укра́шену, му́ченице, добро́тами, вѣ́рою зря́ще, пѣ́сньми свѣ́тло Жениху́ твоему́ взыва́емъ: благослове́нъ еси́ въ хра́мѣ сла́вы Твоея́, Го́споди. [Два́жды.]

Съ дѣ́вами свѣщено́сицами въ небе́сный, му́ченице, ны́нѣ черто́гъ, ра́дующися, со Христо́мъ возшла́ еси́, взыва́ющи: благослове́нъ еси́ въ хра́мѣ сла́вы Твоея́, Го́споди.

Богоро́диченъ: На престо́лѣ превознесе́ннѣ сѣдя́й, престо́лъ Тя́ на земли́, Дѣ́во, богоподо́бенъ обрѣ́тъ, почи́лъ е́сть: благослове́на Ты́ въ жена́хъ еси́, Пренепоро́чная Влады́чице.

Пѣ́снь 8.

Ирмо́съ: Ру́цѣ распросте́ръ, Даніи́лъ, льво́въ зія́нія въ ро́вѣ затче́; о́гненную же си́лу угаси́ша, добродѣ́телію препоя́савшеся, благоче́стія рачи́тели, о́троцы, взыва́юще: благослови́те, вся́ дѣла́ Госпо́дня, Го́спода.

Разрѣши́вшися соу́зъ плотски́хъ, Ѳеодо́сіе честна́я, возлетѣ́ла еси́, ра́дующися, къ свѣтообра́зному черто́гу, невѣ́стнически лику́ющи, и муче́нія червле́нною кро́вію блеща́щися, и вопію́щи: благослови́те, вся́ дѣла́ Госпо́дня, Го́спода.

Въ черто́зѣ небе́снѣмъ жи́ти сподо́билася еси́ свѣ́тло, Ѳеодо́сіе честна́я, вѣ́чнующее благосла́віе обрѣ́тши, всеприснопа́мятная, и му́жества твоего́ плодо́мъ вои́стинну обогати́вшися, вопію́щи: благослови́те, вся́ дѣла́ Госпо́дня, Го́спода.

Украси́лася еси́ тезоимени́тствомъ я́вѣ, Ѳеодо́сіе честна́я: Бо́жіе бо да́ніе на́мъ изря́дно даде́ся, всему́драя, даро́въ па́че ума́ воздаю́щи рѣ́ки, вѣ́рою пою́щимъ: благослови́те, вся́ дѣла́ Госпо́дня, Го́спода.

Богоро́диченъ: Вои́стинну ро́ждши Бо́га, вои́стинну Пречи́стая Ма́ти нарекла́ся еси́ Бо́гу, и́стинно нося́щи, по ко́емждо рожде́ніи, Богоиме́нство. Тѣ́мже Тя́, вѣ́рніи, сла́вимъ, Богоро́дицу, богому́дренно, Всенепоро́чная Влады́чице.

Пѣ́снь 9.

Ирмо́съ: Ка́мень нерукосѣ́чный отъ несѣко́мыя горы́, Тебе́, Дѣ́во, краеуго́льный отсѣче́ся — Христо́съ, совокупи́вый разстоя́щаяся естества́. Тѣ́мъ, веселя́щеся, Тя́, Богоро́дице, велича́емъ.

Разрѣши́ плени́цы согрѣше́ній благоче́стно тя́ воспѣва́ющихъ твои́ми мольба́ми, богому́драя Ѳеодо́сіе, му́ченице прехва́льная, Бо́гу Вседержи́телю, предстоя́щи, всечестна́я.

Евы прама́тере жела́ніе худо́жно прія́тъ, воззрѣ́ніемъ къ Бо́гу обоже́на и бы́вши Боже́ственнымъ прича́стіемъ бо́гъ. Тѣ́мже тя́, всеблаже́нная Ѳеодо́сіе, велича́емъ.

Ве́сь сла́дость е́сть тво́й Жени́хъ, страстоте́рпице, ве́сь душе́вное утѣше́ніе, Ѳеодо́сіе му́ченице, Христо́съ, Его́же ны́нѣ наслажда́ющися, твои́ми моли́твами на́съ помина́й.

Богоро́диченъ: Пло́тію пріити́ восхотѣ́въ, украси́вый вся́ сло́вомъ въ Тя́ всели́ся, еди́ну, Святѣ́йшу всѣ́хъ, обрѣ́тъ, и Богоро́дицу показа́ и́стинную, Ма́ти Дѣ́во.

Источникъ: Минíа, мѣ́сяцъ Ма́ій. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 240 об. – 244.

/ Къ оглавленію раздѣла /


Наверхъ / Къ титульной страницѣ

0