Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - среда, 28 iюня 2017 г. Сейчасъ на порталѣ посѣтителей - 11.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Ма́ія въ 29-й де́нь.
Слу́жба свята́го и блаже́ннаго Іоа́нна, Христа́ ра́ди юро́диваго, Устюжскаго чудотво́рца.

[НА ВЕЧЕРНИ,]
На Го́споди воззва́хъ: стихи́ры, гла́съ 4. Подо́бенъ: Зва́нный свы́ше.

Егда́ раче́ніе и боже́ственное жела́ніе возсія́* въ души́ твое́й, свя́те,* тогда́ преле́стная вся́, я́же въ мíрѣ, мудрова́нія оста́вль,* и, къ вы́шнимъ жела́я, вы́шняя взыска́лъ еси́.* Отону́дуже и да́ръ прозрѣ́нія,* не отъ человѣ́къ, ни человѣ́комъ,* но отъ вы́шняго про́мысла пріи́мъ,* мно́гимъ ра́ди добродѣ́тельнаго житія́ позна́нъ бы́лъ еси́,* еще́ жи́въ сы́й,* и по преставле́ніи чудеса́ творя́ пресла́вная* си́лою Христа́, Бо́га на́шего:* Его́же моли́ спасти́ и просвѣти́ти ду́ши на́ша.

Егда́ боже́ственное зва́ніе* пріи́де на тя́, богому́дре,* тогда́, Святы́мъ Ду́хомъ подвиза́емь,* возни́клъ еси́ отъ мірска́го сладостра́стія къ свѣ́ту богоразу́мія* и оте́ческія сла́вы и любве́ избѣжа́ти потща́лся еси́.* Бога́тство у́бо и сла́ву я́ко не су́щая презрѣ́лъ еси́* и, еди́наго возлюби́въ, и́стиннаго живота́ Христа́ Бо́га на́шего,* кре́стъ тво́й взе́мъ,* Того́ живоно́снымъ стопа́мъ послѣ́довалъ еси́.* Его́же моли́, Іоа́нне досточу́дне,* спасти́ и просвѣти́ти ду́ши на́ша.

Ины стихи́ры, гла́съ 2. Подо́бенъ: Кíими.

Кíими похва́льными вѣнцы́ увязе́мъ преподо́бнаго?* Блаже́нству вѣнца́, благоче́стія исправле́ніе,* Це́ркве свѣ́тлое украше́ніе,* исто́чника боже́ственныхъ исцѣле́ній неизчерпа́емаго,* излива́ній духо́вныхъ рѣку́,* зе́млю Устюжскую мно́гихъ чуде́съ веселя́щую тече́ніемъ,* Іоа́нна до́бляго,* предста́теля на́шего и храни́теля,* моля́щася Христу́ Бо́гу* дарова́ти душа́мъ на́шимъ ми́ръ и ве́лію ми́лость.

Кíими смире́нными устна́ми воспое́мъ блаже́ннаго?* Ди́внаго въ житіи́, безпло́тнымъ сожи́теля,* просла́вленнаго въ чудесѣ́хъ Бо́гомъ,* столпа́ Це́ркве недви́жимаго,* предста́теля су́щихъ въ бѣда́хъ и ско́рбехъ,* въ пу́ть ше́ствующихъ прави́теля,* си́рыхъ и оби́димыхъ засту́пника,* больны́хъ врача́ безме́здна,* моля́щася Го́сподеви* дарова́ти на́мъ ве́лію ми́лость.

Пріиди́те, вѣ́рныхъ собо́ри,* псало́мски восплещи́те рука́ми,* печа́льныхъ утѣше́ніе, неду́жныхъ исцѣле́ніе,* блаже́ннаго Іоа́нна воспѣва́юще,* похвалу́ земли́ Устю́жскія,* церко́вное украше́ніе,* рѣку́ ми́лости вои́стинну,* боже́ственнаго Христо́ва смире́нія ревни́теля,* подаю́щаго мíрови ве́лію ми́лость.

Сла́ва, гла́съ 8:

Яко тече́ніе до́брѣ сконча́вшему, и вѣ́ру соблю́дшему непоро́чную, и враги́ безпло́тныя терпѣ́ніемъ твои́мъ попра́вшему, возложи́ся на честны́й тво́й ве́рхъ побѣ́ды вѣне́цъ пресвѣ́телъ отъ руки́ Вседержи́теля Бо́га, Его́же ра́ди мíръ и су́щая въ не́мъ су́етства преоби́дѣлъ еси́. Тѣ́мъ и свята́я твоя́ чи́стая душа́ на небеса́ востече́, ра́дующися, пра́ведныхъ же ли́цы срѣто́ша тя́, веселя́щеся, и небе́сная селе́нія свѣ́тло воспрія́ша, блаже́нное же и честно́е тѣ́ло твое́ на земли́ пребыва́етъ нетлѣ́нно, вѣ́рнымъ подава́я исцѣле́ніе. Тѣ́мже вѣ́рою пра́вою и те́плымъ жела́ніемъ свято́му твоему́ гро́бу припа́дающе, богому́дре Іоа́нне, про́симъ испроси́ти у Христа́ Бо́га на́шего гра́ду твоему́ непоколеби́му и безмяте́жну пребы́ти отъ навѣ́тъ вра́жіихъ и пога́нскаго наше́ствія, правовѣ́рному Импера́тору на́шему побѣ́ды на враги́, умире́нія же мíру и спасе́нія душа́мъ на́шимъ.

И ны́нѣ, богоро́диченъ: Ца́рь Небе́сный... или́ пра́здника.
Вхо́дъ, проки́менъ дне́ и чте́нія три́.

Прему́дрости Соломо́ни чте́ніе.

Пра́ведницы во вѣ́ки живу́тъ, и въ Го́сподѣ мзда́ и́хъ, и попече́ніе и́хъ у Вы́шняго. Сего́ ра́ди пріи́мутъ ца́рствіе благолѣ́пія и вѣне́цъ добро́ты отъ руки́ Госпо́дни, зане́ десни́цею покры́етъ я́ и мы́шцею защити́тъ и́хъ. Пріи́метъ всеору́жіе — рве́ніе свое́ и вооружи́тъ тва́рь въ ме́сть враго́мъ. Облече́тся въ броня́ пра́вды и возложи́тъ шле́мъ — су́дъ нелицемѣ́ренъ. Пріи́метъ щи́тъ непобѣди́мый — преподо́біе, поостри́тъ же напра́сный гнѣ́въ — во ору́жіе, спобо́ретъ же съ ни́мъ мíръ на безу́мныя. По́йдутъ праволу́чныя стрѣ́лы мо́лніины и, я́ко отъ благокру́гла лу́ка облако́въ, на намѣ́реніе полетя́тъ, и отъ каменоме́тныя я́рости испо́лнь паду́тъ гра́ды. Вознегоду́етъ на ни́хъ вода́ морска́я, рѣ́ки же потопя́тъ я́ на́гло. Сопроти́въ ста́нетъ и́мъ ду́хъ си́лы и, я́ко ви́хоръ, развѣ́етъ и́хъ, и опустоши́тъ всю́ зе́млю беззако́ніе, и злодѣ́йство преврати́тъ престо́лы си́льныхъ. Слы́шите у́бо, ца́ріе, и разумѣ́йте, навы́кните, судіи́ конце́въ земли́. Внуши́те держа́щіи мно́жества и гордя́щіися о наро́дѣхъ язы́ковъ, я́ко дана́ е́сть отъ Го́спода держа́ва ва́мъ и си́ла отъ Вы́шняго.

Прему́дрости Соломо́ни чте́ніе.

Пра́ведныхъ ду́ши въ руцѣ́ Бо́жіей, и не прико́снется и́хъ му́ка. Непщева́ни бы́ша во очесѣ́хъ безу́мныхъ умре́ти, и вмѣни́ся озлобле́ніе исхо́дъ и́хъ, и е́же отъ на́съ ше́ствіе — сокруше́ніе, они́ же су́ть въ ми́рѣ. Ибо предъ лице́мъ человѣ́ческимъ, а́ще и му́ку пріи́мутъ, упова́ніе и́хъ безсме́ртія испо́лнено. И вма́лѣ нака́зани бы́вше, вели́кими благодѣ́тельствовани бу́дутъ, я́ко Бо́гъ искуси́ я́ и обрѣ́те и́хъ досто́йны Себѣ́. Я́ко зла́то въ горни́лѣ, искуси́ и́хъ и, я́ко всепло́діе же́ртвенное, прія́тъ я́. И во вре́мя посѣще́нія и́хъ, возсія́ютъ, и я́ко и́скры по сте́блію, потеку́тъ. Су́дятъ язы́комъ и облада́ютъ людьми́, и воцари́тся Госпо́дь въ ни́хъ во вѣ́ки. Надѣ́ющіися На́нь разумѣ́ютъ и́стину и вѣ́рніи въ любви́ пребу́дутъ Ему́, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.

Прему́дрости Соломо́ни чте́ніе.

Пра́ведникъ, а́ще пости́гнетъ сконча́тися, въ поко́и бу́детъ. Ста́рость бо честна́ не многолѣ́тна, ниже́ въ числѣ́ лѣ́тъ исчита́ется. Сѣди́на же е́сть му́дрость человѣ́комъ, и во́зрастъ ста́рости — житіе́ нескве́рное. Благоуго́денъ Бо́гови бы́въ, возлю́бленъ бы́сть, и живы́й посредѣ́ грѣ́шникъ, преста́вленъ бы́сть. Восхище́нъ бы́сть, да не зло́ба измѣни́тъ ра́зума его́ или́ ле́сть прельсти́тъ ду́шу его́. Раче́ніе бо зло́бы помрача́етъ до́брая и паре́ніе по́хоти, премѣня́етъ у́мъ незло́бивъ. Сконча́вся вма́лѣ, испо́лни лѣ́та до́лга, уго́дна бо бѣ́ Го́сподеви душа́ его́, сего́ ра́ди потща́ся отъ среды́ лука́вствія. Лю́діе же ви́дѣвше и не разумѣ́вше, ниже́ поло́жше въ помышле́ніи таково́е, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.

На стихо́внѣ стихи́ры, гла́съ 4. Подо́бенъ: Яко до́бля.

Те́пло возсія́ла е́сть, я́ко со́лнце,* свѣтоза́рная па́мять твоя́,* луча́ми мно́го облиста́ющи* твои́хъ добродѣ́тельныхъ дѣя́ній,* всеблаже́нне Іоа́нне,* и озаря́ющи вѣ́рныхъ ра́зумы свѣ́томъ чуде́съ твои́хъ.* Сію́ у́бо пра́зднующе,* ра́достно тя́ сла́вимъ и вѣ́рою ублажа́емъ,* уго́дниче Христа́, Бо́га на́шего:* Его́же моли́ отъ тли́ и бѣ́дъ изба́вити* вѣ́рою пра́зднующія всечестно́е твое́ успе́ніе.

Сти́хъ: Возвесели́тся пра́ведникъ о Го́сподѣ* и упова́етъ на Него́.

Земны́й а́нгелъ и небе́сный человѣ́къ* яви́лся еси́, блаже́нне,* исто́чникъ умиле́нія, ми́лости тече́ніе,* струя́ исцѣле́ній, Іоа́нне досточу́дне,* ма́слина Бо́жія, вои́стинну плодови́та,* еле́емъ трудо́въ твои́хъ просвѣща́я вѣ́рно хва́лящія тя́.* Моли́ Человѣколю́бца* отъ бѣ́дъ изба́вити любо́вію чту́щія па́мять твою́.

Сти́хъ: Пра́ведникъ, я́ко фи́никсъ, процвѣте́тъ,* [я́ко ке́дръ, и́же въ Лива́нѣ, умно́жится].

Ра́зумъ тво́й, преблаже́нне,* боже́ственнымъ свѣ́томъ сія́я,* тѣле́сныхъ страсте́й превзы́де,* непримѣ́сенъ до́льнимъ нося́ о́бразъ,* и, вообража́я себе́ добродѣ́тельми боже́ственными,* показа́ся ве́сь свѣтообра́зенъ споспѣше́ніемъ Ду́ха Пресвята́го,* Іоа́нне прему́дре, пра́ведныхъ похвало́,* съ ни́миже моли́ Христа́, Бо́га на́шего,* отъ бѣ́дъ изба́вити пою́щія тя́.

Сла́ва, гла́съ 2:

Отъ нече́стія во благоче́стіе прише́дый, свѣ́томъ разу́мнымъ отъ Бо́га просвѣще́нъ бы́въ, возненави́дѣлъ еси́ оте́ческую любо́вь и возлюби́лъ еси́ и́стинную вѣ́ру Христо́ву. Гра́да на́шего я́ко дости́гнувъ, въ не́мъ чи́стымъ и непоро́чнымъ житіе́мъ Го́сподеви угоди́лъ еси́ и мно́гія лю́ди удиви́лъ еси чудесы́, богоблаже́нне Іоа́нне. Но ны́нѣ имѣ́я дерзнове́ніе ко Влады́цѣ всѣ́хъ Бо́гу, моли́ о и́же вѣ́рою творя́щихъ всечестну́ю твою́ па́мять и притека́ющихъ со усе́рдіемъ къ чуде́сному гро́бу твоему́, изба́вится страсте́й душе́вныхъ же, вку́пѣ и тѣле́сныхъ, и вся́ческихъ бѣ́дъ, и искуше́ній и спасти́ся душа́мъ на́шимъ.

И ны́нѣ, богоро́диченъ или́ пра́здника.

Тропа́рь, гла́съ 5:

Нагото́ю тѣле́сною и терпѣ́ніемъ обнажи́лъ еси́ вра́жія кова́рствія, облича́я неподо́бное его́ дѣя́ніе, зѣ́льнѣ стражда́ со́лнечный ва́ръ и ну́ждныя вели́кія сту́дени мра́за, и огня́ не чу́лъ еси́, Бо́жіею по́мощію покрыва́емь, Іоа́нне прему́дре, моли́ о вѣ́рою творя́щихъ па́мять твою́ че́стно и усе́рдно притека́ющихъ къ ра́цѣ моще́й твои́хъ, изба́витися отъ бѣ́дъ и паде́нія избѣжа́ти.

Сла́ва, и ны́нѣ, богоро́диченъ или́ пра́здника.



НА УТРЕНИ,
Тропа́рь пра́здника, два́жды. Сла́ва, свята́го. И ны́нѣ, пра́здника.

По 1-й стихоло́гіи сѣда́ленъ, гла́съ 8. Подо́бенъ: Прему́дрости.

Отъ ю́ности, я́ко свѣти́льникъ, возсія́лъ еси́, блаже́нне, зѣ́льнымъ воздержа́ніемъ умертви́въ плотска́я взыгра́нія, тѣ́мъ и на высоту́ восте́клъ еси́ богоразу́мія, пресла́вне, пожи́въ въ мíрѣ богоуго́дно, посрами́лъ еси́ бѣсо́вская ополче́нія, Іоа́нне всеблаже́нне. Сего́ ра́ди вопіе́мъ ти́: моли́ Христа́ Бо́га согрѣше́ній оставле́ніе дарова́ти чту́щимъ любо́вію святу́ю па́мять твою́. [Два́жды.]

Сла́ва, и ны́нѣ, богоро́диченъ:

Въ ти́ну впа́дъ грѣхо́въ, и нѣ́сть мнѣ́ постоя́нія, лю́тѣ потопи́ мя бу́ря прегрѣше́ній, но, я́ко ро́ждши Сло́ва, еди́наго Человѣколю́бца, на мя́, раба́ Твоего́, при́зри и изба́ви мя́ вся́каго грѣха́, и страсте́й душетлѣ́нныхъ, и вся́каго озлобле́нія лука́ваго убíйцы. Богоро́дице Неискусому́жная, моли́ Христа́ Бо́га грѣхо́въ оставле́ніе да́ти ми́, Тебе́ бо наде́жду и́мамъ, ра́бъ Тво́й.

По 2-й стихоло́гіи сѣда́ленъ, гла́съ 4:

Яко въ дому́ вои́стинну, на мѣ́стѣ пу́стѣ, посредѣ́ безу́мныхъ человѣ́къ всели́вся, богому́дре Іоа́нне, вся́ко озлобле́ніе претерпѣва́я, до́брыя дѣ́тели, я́коже ѳиміа́мъ благово́ненъ и же́ртву благопрія́тну, Бо́гу прине́слъ еси́. Тѣ́мже, дерзнове́ніе стяжа́въ къ Нему́, моли́ дарова́ти очище́ніе согрѣше́ній вѣ́рою хва́лящимъ святу́ю па́мять твою́. [Два́жды.]

Сла́ва, и ны́нѣ, богоро́диченъ:

Неискусобра́чная Невѣ́сто, Приснодѣ́во, съ пра́ведными восхваля́емъ Тя́, я́ко Тобо́ю вели́чіе сотвори́ на́мъ дне́сь Сы́нъ Тво́й и Бо́гъ Превѣ́чный отъ Отца́, Иже въ ложесна́хъ Твои́хъ вмѣсти́тися изво́ли, да отъ ле́сти свободи́тъ ро́дъ на́шъ.

По поліеле́и сѣда́ленъ, гла́съ 8. Подо́бенъ: Прему́дрости.

Яко врача́ прему́дра и уго́дника Госпо́дня богопрія́тна восхва́лимъ, чуде́сному твоему́ гро́бу прикаса́ющеся, богому́дре: соше́дшеся же любо́вію и вѣ́рою, во псалмѣ́хъ и пѣ́ніихъ возра́дуемся, сла́вяще Христа́, такову́ю благода́ть тебѣ́ дарова́вшаго исцѣле́ній, Іоа́нне всеблаже́нне. Его́же моли́ согрѣше́ній оставле́ніе дарова́ти вѣ́рою и любо́вію пра́зднующимъ всечестну́ю па́мять твою́.

Сла́ва, и ны́нѣ, богоро́диченъ:

Яко дѣ́ву и еди́ну въ жена́хъ, Тя́, безъ сѣ́мене ро́ждшую Бо́га пло́тію, вси́ ублажа́емъ, ро́ди человѣ́честіи: о́гнь бо всели́ся въ Тя́ Божества́, и я́ко Младе́нца млеко́мъ пита́еши Зижди́теля и Го́спода. Тѣ́мъ, а́нгельскій и человѣ́ческій ро́дъ, досто́йно сла́вимъ пресвято́е Рождество́ Твое́ и согла́сно вопіе́мъ Ти́: моли́ Христа́ Бо́га согрѣше́ній оставле́ніе дарова́ти покланя́ющимся вѣ́рою пресвято́му Рождеству́ Твоему́.

Степе́нна, 1-й антифо́нъ 4-го гла́са. Проки́менъ, [гла́съ 4]: Возвесели́тся пра́ведникъ о Го́сподѣ* [и упова́етъ на Него́]. Сти́хъ: Услы́ши, Бо́же, гла́съ мо́й, [внегда́ моли́тимися къ Тебѣ́]. Вся́кое дыха́ніе... Ева́нгеліе Матѳе́я, зача́ло 43.

По 50-мъ псалмѣ́ стихи́ра, гла́съ 4:

Человѣ́че Бо́жій и вѣ́рный ра́бе, уго́дниче Христо́въ, соверши́телю Того́ боже́ственныхъ повелѣ́ній, му́же, ди́вный въ чудесѣ́хъ, сто́лпе и утвержде́ніе гра́да на́шего Устюга, Ца́рствія наслѣ́дниче, богоблаже́нне Іоа́нне, дерзнове́ніе имѣ́я ко Христу́ Бо́гу, непреста́нно моли́ о душа́хъ на́шихъ.

Кано́нъ Богоро́дицы или́ пра́здника, со ирмосо́мъ на 6 и свята́го на 8. Творе́ніе Ѳеофа́ново. Гла́съ 4.

Пѣ́снь 1.

Ирмо́съ: Мо́ря чермну́ю пучи́ну невла́жными стопа́ми дре́вній пѣшеше́ствовавъ Изра́иль, крестообра́зными Моисе́овыма рука́ма Амали́кову си́лу въ пусты́ни побѣди́лъ е́сть.

Прича́стіемъ, е́же къ Бо́гу, преподо́бне, бы́лъ еси́ свѣ́тъ и къ Нему́ отлучи́лся еси́, Іоа́нне блаже́нне, жела́ній кра́йнихъ, благи́хъ наде́ждъ твои́хъ, о́тче, исполне́ніе прія́лъ еси́.

Жела́ніемъ су́щимъ къ Бо́гу распала́емь, мíръ оста́вилъ еси́ и Спу́тника обрѣ́лъ еси́, Христа́, о́тче Іоа́нне сла́вне, съ Ни́мже стезю́ проше́лъ еси́ спаси́тельную, ра́дуяся.

Обогати́тися и́миже, ника́коже искуша́емыми, возжела́въ, бога́тство, и сла́ву вре́менную, му́дре, и пи́щу мимотеку́щую, мірско́е достоя́ніе доблему́дреннѣ отри́нулъ еси́.

Богоро́диченъ: Кра́сную, избра́нную, всечестну́ю и непоро́чную разумѣ́въ Тя́, Бо́жіе Сло́во всели́ся въ Тя́ и, ро́ждся изъ Тебе́, сы́ны сотвори́ благода́тію, Богоро́дицу чту́щія Тя́.

Пѣ́снь 3.

Ирмо́съ: Весели́тся о Тебѣ́ Це́рковь Твоя́, Христе́, зову́щи: Ты́ моя́ крѣ́пость, Го́споди, и прибѣ́жище, и утвержде́ніе.

Усе́рдно мы́слей совлече́ся дѣя́ніемъ, побѣжда́я вра́жія полки́ боже́ственнымъ посо́біемъ Ду́ха.

Ра́нами боже́ственными, и воздержа́ніемъ, и біе́ніемъ страсте́й мірски́хъ, о́тче Іоа́нне, избѣ́глъ еси́.

Умори́ша врага́ по́стницы Твои́, Іису́се, умерщвле́нія ра́достно, Влады́ко, Твоего́ живоно́снаго возжелѣ́вше.

Богоро́диченъ: Избавля́ющи человѣ́ки преслуша́нія и лю́таго паде́нія, всему́ вино́внаго, Чи́стая и Всенепоро́чная, родила́ еси́.

Сѣда́ленъ, гла́съ 5:

Согла́сіемъ боже́ственнымъ озаря́емь, въ пути́ веду́щія боже́ственнымъ сія́ніемъ ходи́въ вѣ́рно, о́тче пра́ведне Іоа́нне, враго́въ отбѣ́гъ прило́говъ, сы́нъ же свѣ́та и дне́ яви́лся еси́, Іоа́нне богоблаже́нне. [Два́жды.]

Сла́ва, и ны́нѣ, богоро́диченъ:

Ма́ти Бо́жія Пречи́стая, гра́дъ христіа́нскій изба́ви и лю́ди Твоя́, обы́чно зову́щія, проти́витися враго́мъ и го́рдымъ мы́слемъ посо́бствуй, да вопіе́мъ Ти́: ра́дуйся, Благослове́нная.

Пѣ́снь 4.

Ирмо́съ: Вознесе́на Тя́ ви́дѣвши Це́рковь на Крестѣ́, Со́лнце Пра́ведное, ста́ въ чи́нѣ свое́мъ, досто́йно взыва́ющи: сла́ва си́лѣ Твое́й, Го́споди.

Соедини́вся къ стези́ пра́ведне и богоно́сне, въ боже́ственный гра́дъ вше́лъ еси́, преподо́бне Іоа́нне, спаси́тельнымъ сія́ніемъ обогати́вся.

Единообра́зенъ, преподо́бне Іоа́нне, смы́сломъ богоно́снымъ, блаже́нне, бы́въ, боже́ственными повѣстьми́ и боже́ственною оде́ждею одѣ́ялся еси́.

Се́рдце твое́, скрижа́ль очище́ну, Свята́го Ду́ха благода́ть обрѣ́тши, о́тче, написа́ соверше́нно безстра́стіе, вѣ́ру и любо́вь нелицемѣ́рну.

Богоро́диченъ: Сѣдя́й на престо́лѣ превознесе́ннѣ херуви́мстѣмъ, я́ко престо́лъ, Тя́ имѣ́я, на руку́ Твое́ю почи́, Марíе Богоневѣ́сто, пресла́вный Бо́гъ.

Пѣ́снь 5.

Ирмо́съ: Ты́, Го́споди, мо́й Свѣ́тъ, въ мíръ прише́лъ еси́, Свѣ́тъ Святы́й, обраща́яй изъ мра́чна невѣ́дѣнія вѣ́рою воспѣва́ющія Тя́.

Пресвѣ́тлую зарю́ пріи́мъ, Іоа́нне, я́ко со́лнце, яви́лся еси́, бѣсо́вскую тму́ отгоня́я, достоблаже́нне.

Твои́мъ жела́ніемъ, Христе́, окрили́вся, блаже́нный Іоа́ннъ жела́ніе тѣле́сное, я́коже изгре́біе мірско́е, му́дрѣ оттрясе́.

Си́лою боже́ственною ду́шу укрѣпи́въ, въ мíръ го́рній всели́лся еси́, свободи́вся страсте́й, о́тче богому́дре Іоа́нне.

Богоро́диченъ: Рече́нія проро́къ соверши́шася: Дѣ́ва роди́ Бо́га Сло́ва, вы́ше естества́ и сло́ва пребы́вши Дѣ́вою.

Пѣ́снь 6.

Ирмо́съ: Пожру́ Ти со гла́сомъ хвале́нія, Го́споди, Це́рковь вопіе́тъ Ти́, отъ бѣсо́вскія кро́ве очи́щшися, ра́ди ми́лости отъ ре́бръ Твои́хъ исте́кшею кро́вію.

Умъ тво́й ве́сь къ Бо́гу простира́я, непреста́нными поуче́ніи, плотскíя любве́ не пощадѣ́лъ еси́, благи́мъ хода́тайствомъ, Іоа́нне, присвое́нія.

Ни скве́рныя вражды́ прія́тъ, блаже́нне, посреди́ тебѣ́ мíра живу́щу, чи́стыми же па́че мольба́ми очища́еши скве́рны душе́вныя притека́ющихъ къ ра́цѣ моще́й твои́хъ.

Ты́, плотски́хъ мудрова́ній вы́шши по́мыслъ имѣ́я, не уязви́лся еси́, посреди́ же́нъ обнажа́емь: безстра́стія бо оде́ждею, Іоа́нне, обле́клся еси́.

Богоро́диченъ: Усты́, и по́мысломъ, и се́рдцемъ, Пречи́стая, Тя́, Богоро́дицу, проповѣ́даю: Тобо́ю бо Бо́гу примири́хомся, отринове́нніи преступле́ніемъ пе́рвѣе пра́отца.

Конда́къ, гла́съ 8:

Вы́шнія красоты́ жела́я, ни́жнія сла́дости тѣле́сное яде́ніе тща́тельно оста́вилъ еси́, нестяжа́ніемъ су́етнаго мíра возлюби́лъ еси́ а́нгельское житіе́, преходя́ сконча́вся, Іоа́нне блаже́нне, съ ни́миже моли́ Христа́ Бо́га непреста́нно о всѣ́хъ на́съ.

Икосъ:

Ка́ко возмогу́ грѣ́шный и скве́рный а́зъ, вку́пѣ душе́ю и тѣ́ломъ, исписа́ти су́щее во пло́ти равноа́нгельное житіе́ твое́ и пресла́вная чудеса́, а́ще у́бо мно́зи прему́дріи не дости́гнутъ исповѣ́дати мно́гаго твоего́ терпѣ́нія, и смире́нія, и те́плыя ко Христу́ любве́? Но оба́че надѣ́яся на твое́ беззло́біе, о блаже́нне, си́це вопію́ ти: ра́дуйся, пресвѣ́тлая звѣздо́, отъ ю́га возсія́вшая и къ восто́ку прише́дшая; ра́дуйся, возненави́дѣвый оте́ческую любо́вь, Христа́ же еди́наго, надъ всѣ́ми су́щаго Бо́га, всѣ́мъ се́рдцемъ возлюби́вый и Тому́ невозвра́тнымъ жела́ніемъ послѣ́довавый; ра́дуйся, бу́йственное и юро́дственное, е́же по апо́столу, жи́тельство избра́вый; ра́дуйся, премѣни́вый тлѣ́нная и настоя́щая наде́ждею бу́дущихъ бла́гъ; ра́дуйся, дре́внему Іову уподо́бивыйся терпѣ́ніемъ; ра́дуйся, страстоте́рпче Христо́въ непобѣди́мый, при́сно побѣди́вый діа́вола твои́мъ смире́ніемъ; ра́дуйся, я́ко дре́вній о́нъ Ла́зарь ни́щій, почива́я ны́нѣ въ ло́нѣхъ Авраа́млихъ; ра́дуйся, и́же по отше́ствіи мíра сего́ су́щимъ въ бѣда́хъ и искуше́ніихъ гото́въ обрѣта́яйся предста́тель и засту́пникъ гра́ду на́шему Устюгу; ра́дуйся, вездѣ́ призыва́ющія тя́ бы́стро предваря́яй; ра́дуйся, богому́дре Іоа́нне.

Пѣ́снь 7.

Ирмо́съ: Въ пещи́ авраа́мстіи о́троцы перси́дстѣй, любо́вію благоче́стія па́че, не́жели пла́менемъ, опаля́еми, взыва́ху: благослове́нъ еси́ въ хра́мѣ сла́вы Твоея́, Го́споди.

Содержи́мь сы́й ко Христу́, преподо́бне о́тче Іоа́нне, боже́ственною любо́вію други́хъ спасти́, и́хже ра́достно спа́слъ и изба́вилъ еси́, вопія́: благослове́нъ Бо́гъ оте́цъ на́шихъ.

Съ небесе́ тебѣ́ пода́нную, о́тче Іоа́нне, пріи́мъ пи́щу, се́ю препита́въ всѣ́хъ, благопоко́рно пріе́млющихъ твоя́ повелѣ́нія, и́миже до́лу влеку́щій грѣ́хъ оставля́ху, блаже́нне.

Послѣ́довавъ оте́ческимъ преда́ніемъ, о́тче Іоа́нне му́дре, па́губу отри́нути заповѣ́далъ еси́, зовы́й Бо́гу: благослове́нъ Бо́гъ оте́цъ на́шихъ.

Богоро́диченъ: Вы́шняго освяще́нное Боже́ственное селе́ніе, ра́дуйся: Тобо́ю бо даде́ся ра́дость, Богоро́дице, зову́щимъ: благослове́на Ты́ въ жена́хъ еси́, Всенепоро́чная Влады́чице.

Пѣ́снь 8.

Ирмо́съ: Ру́цѣ распросте́ръ, Даніи́лъ, льво́въ зія́нія въ ро́вѣ затче́; о́гненную же си́лу угаси́ша, добродѣ́телію препоя́савшеся, благоче́стія рачи́тели, о́троцы, взыва́юще: благослови́те, вся́ дѣла́ Госпо́дня, Го́спода.

Всесвѣ́тлая звѣзда́, су́щихъ въ тимѣ́ніи страсте́й приводя́ къ животу́, твори́ти боже́ственныя за́повѣди и нечи́стыя цѣлому́дренно жи́ти, отго́ниши лю́тыя неду́ги, вопія́: благослови́те, по́йте и превозноси́те Его́ во вѣ́ки.

Ты́ цѣ́лъ умо́мъ въ кро́вѣ чу́дныхъ, му́дре, мно́гихъ улови́лъ еси́ юро́дствовати Го́спода ра́ди, вѣ́дый наруга́емь бы́ти, вопія́, честнѣ́йшій Іоа́нне блаже́нне: благослови́те, по́йте и превозноси́те Его́ во вѣ́ки.

Соверше́нъ еди́нъ свои́хъ су́щихъ сла́вяй Госпо́дь, прославля́я тя́, преподо́бне, ко гро́бу твоему́ притека́ющія исцѣля́етъ, свѣтлослове́ньми зову́щія: благослови́те, по́йте и превозноси́те Его́ во вѣ́ки.

Богоро́диченъ: Избавля́яй на́съ возсія́ изъ Тебе́ Госпо́дь, Дѣ́во Чи́стая, Его́же моли́, Влады́чице, просвѣти́ти пою́щія Тя́ и обстоя́нія на́съ изба́вити, пою́щихъ: благослови́те, по́йте и превозноси́те Его́ во вѣ́ки.

Пѣ́снь 9.

Ирмо́съ: Ка́мень нерукосѣ́чный отъ несѣко́мыя горы́, Тебе́, Дѣ́во, краеуго́льный отсѣче́ся — Христо́съ, совокупи́вый разстоя́щаяся естества́. Тѣ́мъ, веселя́щеся, Тя́, Богоро́дице, велича́емъ.

Всѣ́мъ се́рдцемъ Тро́ицѣ усе́рдно предложи́вся, и́же отъ Нея́ лучу́ богодѣ́льно пріи́мъ, свѣтови́дѣнъ бы́въ, со а́нгелы лику́еши.

Жела́ніемъ боже́ственнымъ пріедини́вся и воздержа́ніемъ просвѣ́щся, ча́емыхъ вѣ́чныхъ бла́гъ во прича́стіи бы́въ, богоблаже́нне Іоа́нне, и наслажде́ніи.

Твоя́ болѣ́зни и по́ты во вселе́ннѣй сла́вятся, ты́ же небе́сною сла́вою пита́яся, Іоа́нне, на́съ непреста́нно помина́й.

Богоро́диченъ: Спаси́ мя, всѣ́хъ ро́ждши Изба́вителя и Благодѣ́теля, разори́вши души́ моея́ о́блакъ, Свѣ́та о́блаче, Свята́я Влады́чице, си́льна содѣ́лай на стра́сти, борю́щія мя́.

Свѣти́ленъ:

Совѣ́та удали́лся еси́, бѣ́гая, нечести́выхъ сожи́тельства, Христу́ же, надъ всѣ́ми Бо́гу на́шему, непоро́чнымъ житіе́мъ угоди́лъ еси́, Іоа́нне, Его́же ны́нѣ моли́ о на́съ, рабѣ́хъ твои́хъ, вѣ́рою пра́зднующихъ всечестну́ю па́мять твою́, богому́дре Іоа́нне. [Два́жды.]

Богоро́диченъ:

Му́дрость Ѵпоста́сную, и Сло́во Пресу́щное, и Врача́ всѣ́хъ поро́ждши, Дѣ́во, стру́пы и я́звы души́ моея́ исцѣли́, лю́тыя и многовре́менныя, и уста́ви се́рдца моего́ страстна́я помышле́нія.

На хвали́техъ стихи́ры на 4, гла́съ 4. Подо́бенъ: Да́лъ еси́ зна́меніе.

Да́лъ еси́ при́тчу терпѣ́нія и му́жества,* Преблагíй Го́споди,* пра́веднаго Іоа́нна и многочуде́снаго,* добродѣ́тельми, и словесы́,* и дѣ́лы сія́юща,* цѣлому́дріемъ украша́ема и кро́тостію.* Тѣ́мъ Твое́ неизрече́нное смотре́ніе сла́вимъ,* Іису́се Всеси́льне и Спа́се ду́шъ на́шихъ. [Два́жды.]

Пра́веденъ и незло́бивъ,* и́стиненъ же, и непоро́ченъ, и вѣ́ренъ,* уклоня́яся отъ вся́кія зло́бныя ве́щи,* показа́лся еси́, Іоа́нне блаже́нне,* просвѣще́нъ добродѣ́тельми и благоче́стіемъ сія́я,* тѣ́мъ тя́ ублажа́емъ* и свято́е твое́ и честно́е дне́сь пра́зднуемъ успе́ніе,* ра́дующеся, богому́дре.

Цѣлому́дріемъ и благовѣ́ріемъ,* я́ко багряни́цею многоцѣ́нною, одѣ́явся, Іоа́нне,* пра́вдою же и кро́тостію, я́ко боже́ственнымъ вѣнце́мъ, увя́злся еси́,* со стра́ждущими Христа́ ра́ди* ца́рствовати возжелѣ́лъ еси́.* И ны́нѣ Царю́ си́лъ предстои́ши,* Іису́су Всеми́лостивому* и Спа́су ду́шъ на́шихъ.

Сла́ва, гла́съ 8:

Добродѣ́телей твои́хъ, богому́дре Іоа́нне, исправле́нія уясни́ша вѣ́рныхъ сердца́: кто́ бо, слы́ша безмѣ́рное твое́ смире́ніе и терпѣ́ніе, не удиви́тся ко всѣ́мъ кро́тости и беззло́бію, къ скорбя́щимъ ми́лованію и къ су́щимъ въ бѣда́хъ ско́рому поможе́нію, къ пла́вающимъ немяте́жному приста́нищу и въ пу́ть ше́ствующимъ благо́му поспѣше́нію? Вся́ боголѣ́пно предвари́лъ еси́, досточу́дне. И ны́нѣ неувяда́емымъ вѣнце́мъ вѣнча́лся еси́ отъ руки́ Вседержи́теля Бо́га, Его́же моли́ спасти́ся душа́мъ на́шимъ.

И ны́нѣ, богоро́диченъ или́ пра́здника.
Славосло́віе вели́кое, [ектеніи́] и отпу́стъ.



НА ЛИТУРГІИ,

Слу́жба преподо́бническая: [Блаже́нна пра́здника, пѣ́снь рядова́я и преподо́бнаго пѣ́снь 6-я, на 4. Проки́менъ, гла́съ 7: Честна́ предъ Го́сподемъ* сме́рть преподо́бныхъ Его́. Сти́хъ: Что́ возда́мъ Го́сподеви о всѣ́хъ, я́же воздаде́ ми? Апо́столъ къ Гала́томъ, зача́ло 213. Аллилуія, гласъ 6: Блаже́нъ му́жъ, боя́йся Го́спода, въ за́повѣдехъ Его́ восхо́щетъ зѣло́. Сти́хъ: Си́льно на земли́ бу́детъ сѣ́мя его́. Ева́нгеліе Луки́, зача́ло 24. Прича́стенъ: Въ па́мять вѣ́чную бу́детъ пра́ведникъ, отъ слу́ха зла́ не убои́тся.]

Источникъ: Минíа, мѣ́сяцъ Ма́ій. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 244 – 250.

/ Къ оглавленію раздѣла /


Наверхъ / Къ титульной страницѣ

0