Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - воскресенiе, 17 декабря 2017 г. Сейчасъ на порталѣ посѣтителей - 9.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Ма́ія въ 28-й де́нь.
Преподо́бнаго отца́ на́шего Ники́ты, епи́скопа Халкидо́нскаго.

[ВЕЧЕРЪ,
На Го́споди воззва́хъ:] стихи́ры преподо́бнаго Ники́ты, гла́съ 4. Подо́бенъ: Яко до́бля.

Мно́гое беззло́біе твое́* зло́бу прогна́ де́монскую* благода́тію Боже́ственнаго Ду́ха,* спострада́ніемъ твои́мъ возвесели́въ Бо́га,* Его́же возжела́лъ еси́,* моли́твъ прилѣжа́ніемъ просвѣти́ся ду́хъ тво́й.* Тѣ́мже прія́лъ еси́ чуде́съ благода́ть* цѣли́ти неду́ги, Ники́то,* благоче́стно притека́ющимъ къ тебѣ́.

Сро́дствомъ связа́еми,* зако́ны удержа́сте* Свята́го Ду́ха, свяще́нницы,* и, стопа́мъ послѣ́дующе* бы́вше па́стыря богому́драго,* облиста́вшаго лучи́ пресла́вныхъ исцѣле́ній,* украси́стеся подо́бными ви́ды исцѣле́ній,* пресла́вный Ники́то* со Игна́тіемъ богому́дрымъ.

Стихи́ры Богоро́дицы, гла́съ и подо́бенъ то́йже:

Осужде́нія изба́ви,* Пресвята́я Богоневѣ́сто,* и лю́тыхъ прегрѣше́ній* смире́нную мою́ ду́шу,* и сме́рти измѣни́ моли́твами Твои́ми,* и да́руй оправда́ніе получи́ти* въ де́нь испыта́нія,* е́же получи́ша святы́хъ собо́ри,* покая́ніемъ очище́на мя́ пре́жде конца́ покажи́* и сле́зными излія́ніи.

Ту́чами Ду́ха Пресвята́го, Пречи́стая,* мою́ мы́сль ороси́,* Яже ка́плю ро́ждшая, Христа́, неисче́тно* безмѣ́рная беззако́нія человѣ́ковъ* щедро́тами измы́вшую;* изсуши́ исто́чникъ страсте́й мои́хъ* и пото́ка мя́ сподо́би* пи́щи живы́я при́сно* моли́твами Твои́ми.

Покая́нія изря́дное* и спаси́тельное врачевство́,* Яже Бо́га ро́ждшая, Спа́са моего́,* и сле́зъ то́ки,* и часа́ по́мыслъ, гро́знаго и стра́шнаго,* и Суда́ неумы́тнаго* Ты́ ми́ да́руй избѣжа́ти моли́твами Твои́ми, о Дѣ́во!* муче́нія тре́петнаго* и Боже́ственную улучи́ти благода́ть.

Сла́ва, и ны́нѣ, богоро́диченъ:

Тма́ми, Пречи́стая, обѣща́хся* покая́ніе сотвори́ти* о мои́хъ согрѣше́ніихъ,* но не оставля́етъ мя́ люби́мый зо́лъ мои́хъ обы́чай.* Сего́ ра́ди Тебѣ́ вопію́* и припа́даю, моля́ся:* Ты́ мя, Влады́чице, изми́ такова́го мучи́тельства,* наставля́ющи мя́ къ лу́чшимъ* и спасе́нія бли́зъ су́щимъ.

Крестобогоро́диченъ:

На Крестѣ́ Тя́ я́ко узрѣ́* пригвожде́на, Го́споди,* Агница и Ма́ти Твоя́ дивля́шеся* и — что́ видѣ́ніе сіе́, — взыва́ше, —* Сы́не вожделѣ́нне,* сія́ Тебѣ́ невѣ́рный собо́ръ воздаде́ беззако́нный,* и́же мно́гихъ Твои́хъ чуде́съ наслади́выйся?* Но сла́ва неизглаго́ланному* соше́ствію Твоему́, Влады́ко.

Тропа́рь, гла́съ 4:

Пра́вило вѣ́ры и о́бразъ кро́тости, воздержа́нія учи́теля яви́ тя ста́ду твоему́, Яже веще́й Истина: сего́ ра́ди стяжа́лъ еси́ смире́ніемъ высо́кая, нището́ю бога́тая, о́тче Ники́то, моли́ Христа́ Бо́га спасти́ся душа́мъ на́шимъ.


[НА УТРЕНИ,]
Кано́нъ, гла́съ 4.

Пѣ́снь 1.

Ирмо́съ: Мо́ря чермну́ю пучи́ну невла́жными стопа́ми дре́вній пѣшеше́ствовавъ Изра́иль, крестообра́зными Моисе́овыма рука́ма Амали́кову си́лу въ пусты́ни побѣди́лъ е́сть.

Боже́ственными свѣтоли́тіи, преподо́бне, облиста́нъ, свѣтови́дѣнъ бы́лъ еси́; вѣ́рно свѣтоно́сное твое́ успе́ніе творя́щія просвѣти́, страсте́й мглу́ отъе́мля.

Яви́лся еси́ свѣтови́дными дѣя́ніи, свѣ́та испо́лненъ, су́щія въ нощи́ лю́тыхъ просвѣща́я и къ свѣ́ту небе́сному наставля́я Ду́хомъ, о́тче Ники́то свяще́нне.

Чуде́съ облиста́еши дарова́нія приступа́ющимъ всегда́ свяще́ннѣй твое́й ра́цѣ, вмѣ́сто трудо́въ и болѣ́зней твои́хъ отъ Бо́га воздая́ніе сіе́, преблаже́нне, пріе́мъ.

Богоро́диченъ: Безъ сѣ́мене Отчею во́лею отъ Боже́ственнаго Ду́ха Бо́жія зачала́ еси́ Сы́на и пло́тію родила́ еси́ изъ Отца́ безъ ма́тере, на́съ же ра́ди изъ Тебе́ безъ отца́.

Пѣ́снь 3.

Ирмо́съ: Весели́тся о Тебѣ́ Це́рковь Твоя́, Христе́, зову́щи: Ты́ моя́ крѣ́пость, Го́споди, и прибѣ́жище, и утвержде́ніе.

Возне́слся еси́, смири́вся Христа́ ра́ди, и бро́вь, преподо́бне, мы́сленнаго змíя Ду́хомъ въ зе́млю смири́лъ еси́.

Вели́кихъ отъ Бо́га сподо́бився даро́въ, вели́къ свяще́нникъ бы́лъ еси́, о́тче святи́телю богопрія́тне.

Беззло́біемъ твою́ жи́знь, я́коже младе́нецъ, соверша́я, погуби́лъ еси́ враго́въ, преподо́бне, всю́ зло́бу благода́тію.

Богоро́диченъ: Еди́ну въ жена́хъ благослове́нную Богоро́дицу, я́ко Бо́жіе селе́ніе преблаголѣ́пно, вси́ ра́достію просла́вимъ.

Сѣда́ленъ, гла́съ 4. Подо́бенъ: Ско́ро предвари́.

Отъ младе́нства взе́мъ тво́й кре́стъ, благоче́стно Христу́ послѣ́довалъ еси́, увяди́въ плотско́е воздержа́ніемъ мудрова́ніе, тѣ́мже на святи́тельстѣ сѣда́лищи, Ники́то, возне́слъ еси́ Влады́ку, зна́меньми разли́чными твою́ украси́вша ра́ку, богоблаже́нне.

Сла́ва, и ны́нѣ, пра́здника или́ богоро́диченъ:

Чи́стая, Всенепоро́чная и Неискусому́жная, Яже еди́на Безлѣ́тнаго Сы́на и Сло́ва Бо́жія въ лѣ́то ро́ждши, Сего́ со святы́ми и честны́ми патріа́рхи, и му́ченики, и проро́ки, и преподо́бными моли́ дарова́ти на́мъ очище́ніе и ве́лію ми́лость.

Крестобогоро́диченъ:

На Крестѣ́ Тя́ возвы́шена я́ко узрѣ́ Пречи́стая Ма́ти Твоя́, Сло́ве Бо́жій, ма́терски рыда́ющи, вѣща́ше: что́ но́вое и стра́нное сіе́ чу́до, Сы́не Мо́й? Ка́ко, Жи́знь всѣ́хъ, вкуша́еши сме́рти, оживи́ти ме́ртвыя хотя́, я́ко Милосе́рдъ?

Пѣ́снь 4.

Ирмо́съ: Вознесе́на Тя́ ви́дѣвши Це́рковь на Крестѣ́, Со́лнце Пра́ведное, ста́ въ чи́нѣ свое́мъ, досто́йно взыва́ющи: сла́ва си́лѣ Твое́й, Го́споди.

Всено́щными бдѣ́ніи и вседне́вными, о́тче богому́дре, стоя́ніи, пло́ти движе́нія вся́ увяди́лъ еси́ и, ра́дуяся, взыва́лъ еси́: сла́ва си́лѣ Твое́й, Го́споди.

Повину́лъ еси́ непоко́рное пло́ти твоея́ душе́вными си́лами, богому́дре, прія́лъ еси́ благода́ть, всеблаже́нне, отгоня́ти ду́хи и очища́ти неду́ги.

Си́лою Боже́ственною укрѣпля́емь, святи́телю, де́монскія полки́ побѣди́лъ еси́ вся́, побѣ́ды, я́ко тезоимени́тъ, вѣне́цъ чуде́съ отъ Вѣнцеда́вца наслѣ́дилъ еси́.

Богоро́диченъ: Украси́лася еси́ духо́вными красота́ми, Отцу́ Собезнача́льнаго Сло́ва заче́нши и пло́тію ро́ждши, Дѣ́во Всенепоро́чная, Его́же о мíрѣ моли́.

Пѣ́снь 5.

Ирмо́съ: Ты́, Го́споди, мо́й Свѣ́тъ, въ мíръ прише́лъ еси́, Свѣ́тъ Святы́й, обраща́яй изъ мра́чна невѣ́дѣнія вѣ́рою воспѣва́ющія Тя́.

Кро́тостію я́вѣ души́ украша́емь, всели́лся еси́, святи́телю, въ зе́млю кро́ткихъ, блаже́нъ бы́въ.

Струя́ми, о́тче, напои́вся дарова́ній Ду́ха, цѣле́нія жела́ющимъ источа́еши, Ники́то богому́дре свяще́нне.

Житіе́ твое́, свѣ́томъ добродѣ́телей сія́я, я́коже многоцѣ́нною у́тварію, чуде́съ благода́тію, всеблаже́нне, украси́ся.

Богоро́диченъ: Тя́ ору́жіе непобѣди́мое на враги́ предлага́емъ, Тя́ утвержде́ніе и наде́жду на́шего спасе́нія, Богоневѣ́сто, стяжа́хомъ.

Пѣ́снь 6.

Ирмо́съ: Пожру́ Ти со гла́сомъ хвале́нія, Го́споди, Це́рковь вопіе́тъ Ти́, отъ бѣсо́вскія кро́ве очи́щшися, ра́ди ми́лости отъ ре́бръ Твои́хъ исте́кшею кро́вію.

Свѣща́ свѣтоза́рная тро́ичная возсія́ла е́сть, со Игна́тіемъ Ники́та, свяще́нное самобра́тство, и подаю́тъ исцѣле́нія вѣ́рнымъ, свѣ́тло блиста́ющи.

Дру́гъ дру́гу по пло́ти му́дріи сро́дствующе, и́стиннаго по ду́ху сро́дства ны́нѣ сподо́бистася, единонра́вно, и Бо́гу благоуго́дно пожи́вша.

Губи́тельныя отбѣ́гъ ересе́й ти́ны честны́мъ поклоне́ніемъ Христо́вы ико́ны, е́же по о́бразу спа́слъ еси́, святи́телю Ники́то богопрія́тне.

Богоро́диченъ: Две́рь, е́юже про́йде еди́нъ Вы́шній, покая́нія ми́ две́ри и вхо́ды отве́рзи спасе́нія, отъ вся́каго мя́ соблюда́ющи вре́да, Всенепоро́чная.

Конда́къ, гла́съ 8. Подо́бенъ: Возбра́нной.

Свѣ́тлостію дѣ́лъ твои́хъ просія́лъ еси́, преподо́бне, апо́стольскаго престо́ла наслѣ́дникъ бы́лъ еси́, Ники́то, и, я́ко со́лнце, облиста́лъ еси́ твое́й па́ствѣ, о́тче, вся́ боже́ственныхъ уче́ній испо́лнь. Тѣ́мже зове́мъ ти́: ра́дуйся, Халкидо́ну удобре́ніе.

Пѣ́снь 7.

Ирмо́съ: Въ пещи́ авраа́мстіи о́троцы перси́дстѣй, любо́вію благоче́стія па́че, не́жели пла́менемъ, опаля́еми, взыва́ху: благослове́нъ еси́ въ хра́мѣ сла́вы Твоея́, Го́споди.

Со святи́тели водворя́ешися вои́стинну, о́тче му́дре, сія́нія мы́сленнаго исполня́емь, и на́съ озари́, взыва́ющія: благослове́нъ еси́ въ хра́мѣ сла́вы Твоея́, Го́споди.

Яко пастыренача́льникъ, я́ко Бо́жій предста́тель непоро́ченъ, Сему́ чи́сты же́ртвы, свѣ́тло воспѣва́я, прине́слъ еси́: благослове́нъ еси́ въ хра́мѣ сла́вы Твоея́, Го́споди.

Па́стырь показа́лся еси́, слове́сною, Ники́то, цѣвни́цею ста́до слове́сное къ па́жити и́стинныхъ уче́ній призыва́я, — благослове́нъ еси́, — вопія́, — въ хра́мѣ сла́вы Твоея́, Го́споди.

Исповѣ́даніемъ житіе́ украси́въ, о́тче, цѣле́ній благода́ть и́стинную отъ Ду́ха прія́лъ еси́, — благослове́нъ еси́, Бо́же мо́й, — вопія́, — въ хра́мѣ сла́вы Твоея́, Го́споди.

Богоро́диченъ: Да обожи́тъ человѣ́чество яви́ся Человѣ́къ, Отрокови́це, изъ чре́ва Твоего́ пло́ть Изба́витель заимова́въ хотѣ́ніемъ. Благослове́нна Ты́ въ жена́хъ, Пренепоро́чная Влады́чице.

Пѣ́снь 8.

Ирмо́съ: Ру́цѣ распросте́ръ, Даніи́лъ, льво́въ зія́нія въ ро́вѣ затче́; о́гненную же си́лу угаси́ша, добродѣ́телію препоя́савшеся, благоче́стія рачи́тели, о́троцы, взыва́юще: благослови́те, вся́ дѣла́ Госпо́дня, Го́спода.

Вели́кихъ трудо́въ воздая́нія я́вѣ пріи́мъ: свѣ́тъ неизглаго́ланный, жи́знь безсме́ртную, преподо́бне, и черто́гъ неразори́мый, Вѣнцеда́вцу твоему́ Христу́ вопіе́ши, ра́дуяся: благослови́те, вся́ дѣла́ Госпо́дня, Го́спода.

Ми́лостію ми́лости ища́, ни́щія удово́лилъ еси́, убо́гія напита́лъ еси́, нагíя одѣ́ялъ еси́, сла́вы себѣ́ оде́жду притворя́я, мона́шествующихъ о́бразъ, Ники́то, бы́лъ еси́, вопію́щихъ: благослови́те, вся́ дѣла́ Госпо́дня, Го́спода.

Це́рковь бы́въ прекра́сна Боже́ственнаго Ду́ха ума́ чистото́ю, отгоня́еши ду́хи лука́вствія и неду́ги очища́еши, приходя́щимъ къ тебѣ́ и вопію́щимъ: благослови́те, вся́ дѣла́ Госпо́дня, Го́спода.

Могíй вся́ о Христѣ́, и ны́нѣ яснѣ́йши и чистѣ́йши Бо́гу соединя́яся, предста́ни, его́же стяжа́лъ еси́, ста́ду, преподо́бне, творя́щему твое́ вѣ́рно боже́ственное успе́ніе и вопію́щу: благослови́те, вся́ дѣла́ Госпо́дня, Го́спода.

Богоро́диченъ: Все́лься во Твое́ чре́во, Христо́съ, вся́ческихъ Госпо́дь, я́коже изво́ли, святѣ́йшу Тя́ показа́ а́нгелъ, Ма́ти Дѣ́во, освяще́ніе и просвѣще́ніе на́мъ дарова́, вопію́щимъ: благослови́те, вся́ дѣла́ Госпо́дня, Го́спода.

Пѣ́снь 9.

Ирмо́съ: Ка́мень нерукосѣ́чный отъ несѣко́мыя горы́, Тебе́, Дѣ́во, краеуго́льный отсѣче́ся — Христо́съ, совокупи́вый разстоя́щаяся естества́. Тѣ́мъ, веселя́щеся, Тя́, Богоро́дице, велича́емъ.

Священнолѣ́пно послѣ́дуя твоему́ тезоимени́тому и боже́ственному, сего́ сподо́бился еси́ о́бразомъ, Ники́то, о́тче богоблаже́нне, и заре́ю Ду́ха благода́тною обогати́лся еси́, богодохнове́нне.

Яви́стеся, Тро́ическою благода́тію обога́щшеся, богоно́сцы, ра́вно отъ нея́ пріе́мше исцѣле́ній боже́ственное дѣ́йство и чи́сто пожи́вше и богоуго́дно, досточу́дніи.

Дне́сь па́мять твоя́, о́тче, па́че со́лнца блиста́етъ сія́ніемъ добродѣ́телей, чудесы́ вселе́нную озаря́ющи и вѣ́рныя уясня́ющи священнотаи́нниче всече́стне.

Якоже денносвѣ́тлыя звѣ́зды, о́тче Ники́то, со священнодѣ́йственнымъ Игна́тіемъ я́вльшеся, вся́ у́бо просвѣти́те, благочести́віи и блаже́нніи, восхваля́ющія ва́съ всегда́.

Богоро́диченъ: Свѣ́та жили́ще яви́лася еси́, отъ Отца́ пре́жде денни́цы Сло́ву возсія́вшаго, Отрокови́це Дѣ́во, еди́на Богора́дованная, и вѣ́рныя просвѣ́щшаго, и преподо́бныя вѣнча́вшаго.

Источникъ: Минíа, мѣ́сяцъ Ма́ій. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 232 об. – 236.

/ Къ оглавленію раздѣла /


Наверхъ / Къ титульной страницѣ

0