Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - воскресенiе, 22 октября 2017 г. Сейчасъ на порталѣ посѣтителей - 16.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Ма́ія въ 28-й де́нь.
Слу́жба и́же во святы́хъ отца́ на́шего Игна́тія епи́скопа, Росто́вскаго чудотво́рца.

[НА ВЕЧЕРНИ,]
[Блаже́нъ му́жъ.., 1-й антифо́нъ.] На Го́споди воззва́хъ: стихи́ры, гла́съ 8. Подо́бенъ: О, пресла́внаго чудесе́!

Преподо́бне о́тче Игна́тіе,* испроси́ къ Бо́гу моли́твами твои́ми Це́ркве утвержде́ніе:* святи́тели покры́й ми́лостію твое́ю,* христолюби́вому Импера́тору побѣ́ды да́руй на враги́ и одолѣ́ніе,* и недви́жиму и необори́му сохрани́тися гра́ду на́шему,* и вѣ́рнымъ лю́демъ грѣхо́въ оставле́ніе,* всѣ́мъ притека́ющимъ къ ра́цѣ моще́й твои́хъ,* свѣ́тло творя́щихъ пра́зднество успе́нія твоего́:* за ны́, свя́те, помоли́ся.

Преподо́бне о́тче, богому́дре святи́телю Игна́тіе,* ты́ бо вои́стинну яви́лся еси́,* просвѣща́я всѣ́хъ омраче́нная сердца́,* наставля́я на пу́ть и́стинный.* Ты́ бы́лъ еси́ убо́гихъ, и си́рыхъ и вдови́цъ засту́пникъ,* вельмо́жъ тве́рдое наказа́ніе и утвержде́ніе,* и всѣ́мъ, вѣ́рою притека́ющимъ* подъ кро́въ Пречи́стыя Бо́жія Ма́тере,* испроси́, свя́те, грѣхо́въ оставле́ніе,* моли́ся за ны́ ко Влады́цѣ.

Сла́ва, гла́съ то́йже:

Апо́столомъ ревни́теля, Игна́тія, преблаже́ннаго отца́ и учи́теля, соше́дшеся, восхва́лимъ, и́мже Христа́ Бо́га позна́хомъ и, отъ тмы́ къ свѣ́ту приближа́ющеся, о́чи и сердца́ просвѣща́емъ, въ па́мять его́ ликовству́юще, ку́пно весели́мся, обрѣ́тше вожда́ правовѣ́рна во Ца́рствіе Христо́во.

И ны́нѣ, [пра́здника или́] богоро́диченъ:

[Ца́рь Небе́сный за человѣколю́біе на земли́ яви́ся и съ человѣ́ки поживе́, от Дѣ́вы бо Чи́стыя пло́ть пріе́мый и изъ Нея́ проше́дый съ воспрія́тіемъ, еди́нъ е́сть Сы́нъ, сугу́бъ естество́мъ, но не ѵпоста́сію. Тѣ́мже, соверше́нна Того́ Бо́га и соверше́нна Человѣ́ка вои́стинну проповѣ́дающе, исповѣ́дуемъ Христа́ Бо́га на́шего: Его́же моли́, Ма́ти Безневѣ́стная, поми́ловатися душа́мъ на́шимъ.]

Вхо́дъ. Проки́менъ дне́. И чте́нія три́ святи́тельскія:

При́тчей чте́ніе.

Па́мять пра́веднаго съ похвала́ми, и благослове́ніе Госпо́дне на главѣ́ его́. Блаже́нъ человѣ́къ, и́же обрѣ́те прему́дрость, и сме́ртенъ, и́же увѣ́дѣ ра́зумъ. Лу́чше бо сію́ купова́ти, не́жели зла́та и сребра́ сокро́вища. Честнѣ́йшая же е́сть ка́меній многоцѣ́нныхъ, все́ же честно́е недосто́йно ея́ е́сть. Долгота́ бо дне́й и лѣ́та живота́ въ десни́цѣ ея́, въ шу́йцѣ же ея́ бога́тство и сла́ва. Отъ у́стъ ея́ исхо́дитъ пра́вда, зако́нъ же и ми́лость на язы́цѣ но́ситъ. Послу́шайте у́бо мене́, о ча́да, честна́я бо реку́, и блаже́нъ человѣ́къ, и́же пути́ моя́ сохрани́тъ: исхо́ди бо мои́ — исхо́ди живота́, и уготовля́ется хотѣ́ніе отъ Го́спода. Сего́ ра́ди молю́ ва́съ и предлага́ю мо́й гла́съ сыново́мъ человѣ́ческимъ. Я́ко а́зъ, прему́дрость, устро́ихъ совѣ́тъ, и ра́зумъ и смы́слъ азъ призва́хъ. Мо́й совѣ́тъ и утвержде́ніе, мо́й ра́зумъ, моя́ же крѣ́пость. Азъ мене́ лю́бящія люблю́, и́щущіи же мене́ обря́щутъ благода́ть. Разумѣ́йте у́бо, незло́бивіи, кова́рство, ненака́заніи же, прилага́йте сердца́. Послу́шайте мене́ и па́ки, честна́я бо реку́, и отве́рзу отъ усте́нъ пра́вая, я́ко и́стинѣ поучи́тся горта́нь мой, ме́рзки же пре́до мно́ю устны́ лжи́выя. Съ пра́вдою вси́ глаго́лы у́стъ мои́хъ, ничто́же въ ни́хъ стро́потно, ниже́ развраще́нно. Вся́ пра́ва су́ть разумѣва́ющимъ и про́ста обрѣта́ющимъ ра́зумъ. Науча́ю бо ва́съ и́стинѣ, да бу́детъ о Го́сподѣ наде́жда ва́ша, и испо́лнитеся Ду́ха.

При́тчей чте́ніе.

Уста́ пра́веднаго ка́плютъ прему́дрость, язы́къ же непра́веднаго поги́бнетъ. Устнѣ́ муже́й пра́ведныхъ ка́плютъ благода́ти, уста́ же нечести́выхъ развраща́ются. Мѣ́рила льсти́вая ме́рзость предъ Го́сподемъ, вѣ́съ же пра́ведный прія́тенъ Ему́. Идѣ́же а́ще вни́детъ досажде́ніе, та́мо и безче́стіе, уста́ же смире́нныхъ поуча́ются прему́дрости. Соверше́ніе пра́выхъ наста́витъ и́хъ, и поползнове́ніе отрица́ющихся упасе́тъ и́хъ. Не по́льзуютъ имѣ́нія въ де́нь я́рости, пра́вда же изба́витъ отъ сме́рти. Умеръ пра́ведный, оста́ви раска́яніе, нару́чна же быва́етъ и посмѣя́тельна нечести́выхъ па́губа. Пра́вда непоро́чнаго исправля́етъ пути́, въ нече́стіе же па́даетъ непра́вда. Пра́вда муже́й пра́выхъ изба́витъ и́хъ, безсовѣ́стіемъ же плѣня́ются беззако́нніи. Сконча́вшуся му́жу пра́ведну, не поги́бнетъ наде́жда, похвала́ же нечести́выхъ поги́бнетъ. Пра́ведникъ отъ ло́ва убѣ́гнетъ, въ него́же мѣ́сто предае́тся нечести́вый. Во устѣ́хъ нечести́выхъ сѣ́ть гра́жданомъ, чу́вство же пра́ведныхъ благопоспѣ́шное. Во благи́хъ пра́ведныхъ испра́вится гра́дъ, и въ поги́бели нечести́выхъ ра́дованіе. Во благослове́ніи пра́выхъ возвы́сится гра́дъ, усты́ же нечести́выхъ раскопа́ется. Руга́ется гра́жданомъ лише́нный ра́зума, му́жъ же му́дрый безмо́лвіе во́дитъ.

Прему́дрости Соломо́новы чте́ніе.

Пра́ведникъ, а́ще пости́гнетъ сконча́тися, въ поко́и бу́детъ. Ста́рость бо честна́ не многолѣ́тна, ниже́ въ числѣ́ лѣ́тъ исчита́ется. Сѣди́на же е́сть му́дрость человѣ́комъ, и во́зрастъ ста́рости — житіе́ нескве́рное. Благоуго́денъ Бо́гови бы́въ, возлю́бленъ бы́сть, и живы́й посредѣ́ грѣ́шникъ, преста́вленъ бы́сть. Восхище́нъ бы́сть, да не зло́ба измѣни́тъ ра́зума его́ или́ ле́сть прельсти́тъ ду́шу его́. Раче́ніе бо зло́бы помрача́етъ до́брая и паре́ніе по́хоти, премѣня́етъ у́мъ незло́бивъ. Сконча́вся вма́лѣ, испо́лни лѣ́та до́лга, уго́дна бо бѣ́ Го́сподеви душа́ его́, сего́ ра́ди потща́ся отъ среды́ лука́вствія. Лю́діе же ви́дѣвше и не разумѣ́вше, ниже́ поло́жше въ помышле́ніи таково́е, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.

На стихо́внѣ стихи́ры, гла́съ 1. Подо́бенъ: Всехва́льніи.

Богому́дре Игна́тіе,* твоя́ мо́щи, ра́дующеся, пресвѣ́тло цѣлу́емъ* и почерпа́емъ благода́ть цѣльба́мъ,* любе́зно тя́ хва́ляще* и вѣ́рою непреста́нно моля́щеся:* Христу́ моли́ся* дарова́ти душа́мъ на́шимъ* ми́ръ и ве́лію ми́лость.

Сти́хъ: Свяще́нницы Твои́ облеку́тся въ пра́вду,* и преподо́бніи Твои́ возра́дуются.

Исцѣле́ній во́ды* твоя́ ра́ка притека́ющимъ источа́етъ всегда́,* святи́телю досточу́дне,* и омыва́етъ стра́сти,* и потопля́етъ полки́ бѣсо́вскія* дѣ́йствомъ Свята́го Ду́ха.* Тѣ́мже моли́ся* дарова́ти душа́мъ на́шимъ* ми́ръ и ве́лію ми́лость.

Сти́хъ: Честна́ предъ Го́сподемъ* сме́рть преподо́бныхъ Его́.

Апо́столомъ сопресто́льна,* іера́рхомъ единому́дренна,* по́стникомъ единоревни́теля восхва́лимъ,* учи́телей печа́ть* и боже́ственное изображе́ніе Христо́выхъ та́инъ,* святи́телю блаже́нне.* Ему́же моли́ся* дарова́ти душа́мъ на́шимъ* ми́ръ и ве́лію ми́лость.

Сла́ва, гла́съ 6:

Правосла́вныя вѣ́ры духо́вныя ра́ди му́дрости учи́тель яви́лся еси́, Игна́тіе блаже́нне, Христа́ обрѣ́тъ наста́вника, совѣ́ты злосла́вныя ерети́чества разсы́палъ еси́. Тѣ́мъ мо́лимъ тя́, свя́те: моли́ся Христу́ Бо́гу о на́съ, до конца́ е́же отъ тебе́ извѣ́ствованную пра́вую вѣ́ру недви́жиму сохрани́ти на́мъ и получи́ти ве́лію ми́лость.

И ны́нѣ, [пра́здника или́] богоро́диченъ:

[Творе́цъ и Изба́витель мо́й, Пречи́стая, Христо́съ Госпо́дь, изъ Твои́хъ ложе́снъ проше́дъ, въ мя́ оболкíйся, пе́рвыя кля́твы Ада́ма свободи́. Тѣ́мже Ти́, Всечи́стая, я́ко Бо́жіи Ма́тери же и Дѣ́вѣ, вои́стинну вопіе́мъ немо́лчно: ра́дуйся а́нгельски, ра́дуйся, Влады́чице, предста́тельство, и покро́ве, и спасе́ніе ду́шъ на́шихъ.]

Тропа́рь, гла́съ 4:

Благовѣ́рія просвѣ́щся уче́ніи, святи́тельства пріе́мъ па́ству и апо́столовъ наслѣ́дникъ бы́въ, тѣ́мъ прія́лъ еси́ отъ Бо́га да́ръ чуде́съ, святи́телю о́тче Игна́тіе, моли́ Христа́ Бо́га, да спасе́тъ ду́ши на́ша.

[Сла́ва, и ны́нѣ, пра́здника или́ богоро́диченъ:

Еже отъ вѣ́ка утае́нное, и а́нгеломъ несвѣ́домое та́инство: Тобо́ю, Богоро́дице, су́щимъ на земли́ яви́ся, Бо́гъ въ несли́тномъ соедине́ніи воплоща́емь, и кре́стъ во́лею на́съ ра́ди воспріи́мъ, и́мже воскреси́въ первозда́ннаго, спасе́ отъ сме́рти ду́ши на́ша.]


[НА УТРЕНИ, [1]
По 1-й стихоло́гіи сѣда́ленъ, гла́съ 1. Подо́бенъ: Гро́бъ Тво́й.

Служи́тель бы́въ Христу́, вся́ческихъ Влады́цѣ, научи́лъ еси́ лю́ди и просвѣти́лъ еси́ боже́ственнымъ креще́ніемъ, къ разумѣ́нію сего́ наста́вль, святи́телю. Тѣ́мже проповѣ́дника тя́ и́стины вси́ имену́емъ, святи́теля и уго́дника Христо́ва. [Два́жды.]

Сла́ва, и ны́нѣ, богоро́диченъ:

Безневѣ́стная Чи́стая Богоро́дице Дѣ́во, еди́на вѣ́рныхъ предста́тельнице и покро́ве, бѣ́дъ, и скорбе́й, и лю́тыхъ обстоя́ній всѣ́хъ изба́ви, на Тя́ упова́ніе, Отрокови́це, иму́щихъ, и ду́ши на́ша спаси́ боже́ственными моли́твами Твои́ми.

По 2-й стихоло́гіи сѣда́ленъ, гла́съ 4. Подо́бенъ: Ско́ро предвари́.

Отъ ю́ности взе́мъ кре́стъ тво́й, благочести́вно Христу́ послѣ́довалъ еси́, увяди́въ плотско́е мудрова́ніе воздержа́ніемъ; тѣ́мже, на святи́тельстѣмъ сѣда́лищи сѣ́дъ, святи́телю, возвели́чилъ еси́ Влады́ку и Того́ Пречи́стую Ма́терь, разли́чными дарова́ніи твою́ украси́вша ра́ку, Игна́тіе богоблаже́нне. [Два́жды.]

Сла́ва, и ны́нѣ, богоро́диченъ:

Дѣ́во Всенепоро́чная, Яже Пресу́щнаго Бо́га ро́ждшая, со святи́телемъ Того́ непреста́нно моли́ оставле́ніе прегрѣше́ній и исправле́ніе житія́ да́ти на́мъ пре́жде конца́, вѣ́рою и любо́вію пою́щимъ Тя́ по до́лгу, еди́на Всепѣ́тая.

По поліеле́и сѣда́ленъ, гла́съ 8. Подо́бенъ: Прему́дрости.

Надъ страстьми́ ца́рствовавъ плотски́ми, святи́тель яви́лся еси́ богоподо́бенъ, па́ству твою́ пресла́вно упа́слъ еси́, преподо́бне, креще́ніемъ же просвѣти́лъ еси́ и наказа́лъ еси́ сла́вити Еди́наго Бо́га въ Тріе́хъ Ѵпоста́сехъ, тѣ́мже источа́еши исцѣле́нія и по кончи́нѣ вѣ́рою приходя́щимъ ко святѣ́й Бо́жіей це́ркви и къ ра́цѣ моще́й твои́хъ, святи́телю Игна́тіе; моли́ Христа́ Бо́га согрѣше́ній оставле́ніе пода́ти чту́щимъ любо́вію святу́ю па́мять твою́. [Два́жды.]

Сла́ва, и ны́нѣ, богоро́диченъ:

Небе́сную две́рь и киво́тъ, пресвяту́ю го́ру, свѣ́тлый о́блакъ воспои́мъ, неопали́мую купину́, слове́сный ра́й, Евы воззва́ніе, вселе́нныя всея́ вели́кое сокро́вище, я́ко спасе́ніе въ Не́й содѣ́лася мíрови и оставле́ніе дре́внихъ согрѣше́ній. Сего́ ра́ди вопіе́мъ Ей: моли́ся Сы́ну Твоему́ прегрѣше́ній оставле́ніе дарова́ти благоче́стно покланя́ющимся всесвято́му Рождеству́ Твоему́.

Степе́нна, 1-й антифо́нъ 4-го гла́са. Проки́менъ, гла́съ 4: Уста́ моя́ возглаго́лютъ прему́дрость* и поуче́ніе се́рдца моего́ ра́зумъ. Сти́хъ: Услы́шите сія́, вси́ язы́цы, внуши́те, вси́, живу́щіи по вселе́ннѣй. Вся́кое дыха́ніе... Ева́нгеліе Іоа́нна, зача́ло 35, отъ полу́.

По 50-мъ псалмѣ́ стихи́ра, гла́съ 6:

Правосла́вныя вѣ́ры духо́вныя ра́ди му́дрости учи́тель яви́лся еси́, Игна́тіе блаже́нне, Христа́ обрѣ́тъ наста́вника, совѣ́ты злосла́вныя ерети́чества разсы́палъ еси́. Тѣ́мъ мо́лимъ тя́, свя́те: моли́ся Христу́ Бо́гу о на́съ, до конца́ е́же отъ тебе́ извѣ́ствованную пра́вую вѣ́ру недви́жиму сохрани́ти на́мъ и получи́ти ве́лію ми́лость.]

Кано́нъ [пра́здника или́ богоро́дицы, на 6, и святи́теля, на 8], гла́съ 8.

Пѣ́снь 1.

Ирмо́съ: Во́ду проше́дъ, я́ко су́шу, и еги́петскаго зла́ избѣжа́въ, изра́ильтянинъ вопія́ше: Изба́вителю и Бо́гу на́шему пои́мъ.

Отче богому́дре, святи́телю Игна́тіе, отве́рзи ми́, недосто́йному, устнѣ́ воспѣ́ти тя́ и пріими́, я́ко кади́ло, отъ убо́жества моего́, е́же ти́ принесо́хъ, недосто́йный.

Воспое́мъ вси́ свяще́ннаго святи́теля Игна́тія, почти́мъ засту́пника, и утвержде́ніе гра́ду на́шему Росто́ву, и храни́теля неусы́пна.

Спаси́тельнымъ Христо́вымъ за́повѣдемъ послѣ́довалъ еси́, прему́дре святи́телю Игна́тіе: вдови́цамъ и си́рымъ бы́лъ еси́ засту́пникъ и гра́ду на́шему вели́кое защище́ніе.

Богоро́диченъ: Пречи́стая Богоро́дице, Содѣ́теля и Спа́са поро́ждши всѣ́мъ, пою́щимъ Тя́, спаси́ отъ бѣ́дъ гра́дъ Тво́й Росто́въ, непреста́нно моля́щи Сы́на Твоего́ за ны́ и Бо́га на́шего.

Пѣ́снь 3.

Ирмо́съ: Небе́снаго кру́га Верхотво́рче, Го́споди, и Це́ркве Зижди́телю, Ты́ мене́ утверди́ въ любви́ Твое́й, жела́ній кра́ю, вѣ́рныхъ утвержде́ніе, еди́не Человѣколю́бче.

Сокруши́ супоста́ты безбо́жныя, преподо́бне, моле́ніемъ твои́мъ къ Творцу́ и Бо́гу и си́лу и́хъ, вооруже́нную на ны́, пога́нская наше́ствія покори́ подъ но́ги вѣ́рному Импера́тору на́шему.

Ты́ прояви́лъ еси́, Влады́ко, послѣ́днему ро́ду на́шему чудотво́рца святи́теля Игна́тія, гра́ду Росто́ву утвержде́ніе, Це́ркви Твое́й и́стовое пра́вило, іере́йскому же чи́ну наста́вника.

Прикосну́вшуся, свя́те, пречестна́го тѣ́ла твоего́ Стефа́ну архимандри́ту, пе́рсту ручно́му, къ дла́ни прико́рчившуся отъ рожде́нія, Бо́жіею благода́тію да́лъ еси́ простира́тися.

Богоро́диченъ: Бу́ди ми́, Дѣ́во, прибѣ́жище, и приста́нище, и стѣна́ необори́ма, и Засту́пница, Яже Бо́га поро́ждши пло́тію, Пречи́стая, Изба́вителя всеще́драго и Спа́са пою́щимъ Тя́, Богоневѣ́стная.

Сѣда́ленъ, гла́съ 8. Подо́бенъ: Прему́дрости.

Украша́яся прему́дростію ра́зума, горды́ню низложи́лъ еси́ плотскíя тяготы́ и бы́лъ еси́ оби́телище Ду́ха Пресвята́го, непремѣ́ннымъ простира́яся ра́зумомъ къ Лю́бящему тя́. Тѣ́мъ, ре́вностію боже́ственною разгара́яся, сла́вне, си́рыхъ, и убо́гихъ, и вдови́цъ бы́лъ еси́ засту́пникъ, гра́да же Росто́ва утвержде́ніе, яви́вся а́нгеломъ собесѣ́дникъ, святи́телю Игна́тіе, моли́ Христа́ Бо́га грѣхо́въ оставле́ніе дарова́ти, чту́щимъ любо́вію святу́ю па́мять твою́. [Два́жды.]

Сла́ва, и ны́нѣ, богоро́диченъ:

Небе́сную две́рь и киво́тъ, пресвяту́ю го́ру, свѣ́тлый о́блакъ воспои́мъ, неопали́мую купину́, слове́сный ра́й, Евы воззва́ніе, вселе́нныя всея́ вели́кое сокро́вище, я́ко спасе́ніе въ Не́й содѣ́лася мíрови и оставле́ніе дре́внихъ согрѣше́ній. Сего́ ра́ди вопіе́мъ Ей: моли́ся Сы́ну Твоему́ прегрѣше́ній оставле́ніе дарова́ти благоче́стно покланя́ющимся Всесвято́му Рождеству́ Твоему́.

Пѣ́снь 4.

Ирмо́съ: Услы́шахъ, Го́споди, смотре́нія Твоего́ та́инство, разумѣ́хъ дѣла́ Твоя́ и просла́вихъ Твое́ Божество́.

Благода́тію богоно́сецъ нарица́емь вои́стинну, Игна́тіе, во Христа́ обле́клся еси́ житія́ ра́ди чистоты́ и научи́лъ еси́ сла́вити въ Тро́ицѣ Еди́наго Бо́га.

Изба́ви ста́до твое́ отъ грѣхо́вныя бу́ри, Игна́тіе святи́телю, бѣ́дъ же и скорбе́й, приводя́ въ приста́нище боже́ственныя во́ли Его́.

Яви́лся еси́ вои́стинну Христо́въ уго́дникъ, о́тче Игна́тіе: моля́ся не преста́й отъ напа́стей, и бѣ́дъ, и скорбе́й изба́вити ста́до твое́, отъ ну́жды и печа́ли.

Богоро́диченъ: Свяще́нно сла́вятъ Тя́ святи́тельстіи собо́ри и всѣ́хъ преподо́бныхъ ли́цы: Зижди́теля бо и́хъ я́ко Младе́нца на руку́ Твое́ю понесла́ еси́, Богоро́дице.

Пѣ́снь 5.

Ирмо́съ: Вску́ю мя́ отри́нулъ еси́ отъ лица́ Твоего́, Свѣ́те незаходи́мый, и покры́ла мя́ е́сть чужда́я тма́ окая́ннаго? Но обрати́ мя, и къ свѣ́ту за́повѣдей Твои́хъ пути́ моя́ напра́ви, молю́ся.

Окрестъ стоя́ще ра́ки твоея́ святи́телю Игна́тіе, тя́ имѣ́емъ къ Бо́гу хода́тая, и заступле́ніе гра́да твоего́ Росто́ва, и утвержде́ніе необори́мо.

Ми́лостивъ бы́въ убо́гимъ, ми́лость душе́вную испроси́, прехва́льне, ми́лостыню стяжа́въ, о́тче Игна́тіе, свѣщу́ свѣ́тлу устро́илъ еси́.

Жили́ще бы́въ Пресвята́го Ду́ха вои́стинну, блаже́нне Игна́тіе, Того́ явле́нными боже́ственными дарми́ до́брѣ обогати́лся еси́.

Богоро́диченъ: Мѵ́ро та́йное Тя́ имену́емъ, Пречи́стая, я́ко ро́ждши Бо́га пло́тію, источа́ющаго боже́ственное мѵ́ро всѣ́мъ, притека́ющимъ подъ кро́въ Тво́й.

Пѣ́снь 6.

Ирмо́съ: Очи́сти мя́, Спа́се, мно́га бо беззако́нія моя́, и изъ глубины́ зо́лъ возведи́, молю́ся, къ Тебѣ́ бо возопи́хъ, и услы́ши мя́, Бо́же спасе́нія моего́.

Житіе́ твое́ цѣлому́дренно, священноявле́нне, соверши́въ, пра́вдою украси́лся еси́, и му́жествомъ смы́сла добродѣ́тели сочта́въ себѣ́, преблаже́нне святи́телю Игна́тіе.

Сохрани́ гра́дъ тво́й Росто́въ, преблаже́нне святи́телю Игна́тіе, отъ безбо́жныхъ и чужевѣ́рныхъ нахожде́ній и усо́бныя ра́ти, моля́ся не преста́й Влады́цѣ Христу́ о ста́дѣ твое́мъ.

Ты́ у́бо по сме́рти, я́ко жи́въ, на погребе́ніи твое́мъ пріе́мь сви́тки твои́ма рука́ма, и́хже свяще́нники въ животѣ́ твое́мъ освяти́лъ еси́ Бо́гу, рече́ бо Госпо́дь: прославля́ющаго Мя́ просла́влю.

Богоро́диченъ: Превы́шши бы́сть вы́шнихъ си́лъ, Богоблагода́тная, заче́ншая Сло́во Бо́жіе неизрече́нно, вся́ческая сло́вомъ сотво́ршее, отъ Отца́ пре́жде вѣ́къ ро́ждшееся, Того́, Чи́стая, ро́ждшая неизрече́нно.

Конда́къ, гла́съ 4. Подо́бенъ: Яви́лся еси́.

Яви́ся дне́сь пресвѣ́тлая па́мять твоя́, святи́телю преблаже́нне Игна́тіе, въ мíрѣ свѣ́тло сія́ющи и явля́ющи всѣ́мъ боже́ственное сія́ніе.

Икосъ:

Изъ чре́ва ма́терня освяще́ннаго святи́теля Госпо́дня похва́лимъ ны́нѣ вси́, преподо́бнаго Игна́тія, гра́да Росто́ва утвержде́ніе, благода́тныя да́ры пріи́мша боже́ственныя сла́вы и въ чудесѣ́хъ сла́внаго, вси́, вѣ́рою те́плою притека́юще къ ра́цѣ моще́й его́. Тѣ́мъ и а́зъ, недосто́йный и грѣ́шный, надѣ́юся моли́твами его́ ко Влады́цѣ и Пречи́стѣй Его́ Ма́тери ми́лость прія́ти въ де́нь Су́дный содѣ́янныхъ мно́ю зо́лъ и проще́ніе получи́ти, явля́ющи всѣ́мъ боже́ственное сія́ніе.

Пѣ́снь 7.

Ирмо́съ: Отъ Іуде́и доше́дше, о́троцы, въ Вавило́нѣ иногда́, вѣ́рою Тро́ическою пла́мень пе́щный попра́ша, пою́ще: отце́въ Бо́же, благослове́нъ еси́.

Отве́рзи ми́ две́рь покая́нія, святи́телю Игна́тіе, да омы́ю скве́рну окая́нныя моея́ души́ и тѣ́ла моего́ вся́ чу́вства, да приношу́ пѣ́снь Го́сподеви, свѣ́тло зовя́: оте́цъ на́шихъ Бо́же, благослове́нъ еси́.

Иму́ще тя́ твои́ раби́ засту́пника те́пла и стѣ́ну необори́му, гра́да Росто́ва утвержде́ніе, не убои́мся супоста́тныхъ враго́въ, но побѣжда́емъ си́лою Христо́вою, взыва́юще: оте́цъ на́шихъ Бо́же, благослове́нъ еси́.

Уста́вы оте́ческими утверди́лъ еси́, му́дре, це́рковь Пречи́стыя Ма́тере Бо́жія, и свяще́нства лѣ́потою преукра́шенно сохрани́лъ еси́, и уче́ньми твои́ми наказа́лъ еси́ взыва́ти: оте́цъ на́шихъ Бо́же, благослове́нъ еси́.

Богоро́диченъ: Спаси́тельное приста́нище, Богоро́дице Дѣ́во, Тя́ иму́ще нынѣ́, жите́йскихъ бѣ́дъ и бу́ри избѣга́емъ, къ приста́нищу тишины́ Твоея́ приходя́ще и Сы́ну Твоему́ вопію́ще: оте́цъ на́шихъ Бо́же, благослове́нъ еси́.

Пѣ́снь 8.

Ирмо́съ: На горѣ́ святѣ́й просла́вльшася, и въ купинѣ́ огне́мъ Приснодѣ́вы, Моисе́ови та́йну я́вльшаго, Го́спода по́йте и превозноси́те во вся́ вѣ́ки.

Побѣжде́нъ бы́въ враго́мъ прегрѣше́ньми мно́гими мо́лвъ жите́йскихъ, вѣ́рою прихожду́ и, я́ко Манассíя, вопíю Ти́, Христе́, святи́теля моле́ніемь спаса́емь, зову́: Го́спода по́йте и превозноси́те Его́ во вѣ́ки.

Вооружа́ются на ны́, смире́нныя лю́ди твоя́, святи́телю пречестны́й Игна́тіе, сы́нове Ага́рины, но сокруши́ и́хъ неви́димою си́лою, моле́ніемъ твои́мъ ко Влады́цѣ за при́сныя рабы́, пою́щія: Го́спода по́йте и превозноси́те Его́ во вѣ́ки.

Моли́твы, преблаже́нне, и моле́нія творя́ща тебе́ прилѣ́жно къ Бо́гу при́сно за рабы́ твоя́, въ печа́лехъ засту́пника и побо́рника иму́ще тя́ къ Бо́гу, отъ всѣ́хъ бѣ́дъ спаса́емся, Го́спода пою́ще и превознося́ще Его́ во вѣ́ки.

Богоро́диченъ: Влады́чице, Дѣ́во Чи́стая Препросла́вленная, со святи́телемъ къ Сы́ну Твоему́, Царю́, моли́ся прилѣ́жно, отъ вся́кія ну́жды и бѣды́ изба́витися гра́ду Твоему́ Росто́ву, Тебе́, Госпоже́, вѣ́рою блажа́щу, и пою́щу, и превознося́щу во вся́ вѣ́ки.

Пѣ́снь 9.

Ирмо́съ: Ужасе́ся о се́мъ не́бо, и земли́ удиви́шася концы́, я́ко Бо́гъ яви́ся человѣ́комъ пло́тски, и чре́во Твое́ бы́сть простра́ннѣйшее небе́съ. Тѣ́мъ Тя́, Богоро́дицу, Ангеловъ и человѣ́къ чинонача́лія велича́ютъ.

Вельми́ ра́дуется о тебѣ́, честны́й о́тче, святи́телю Игна́тіе, при́сный тво́й гра́дъ Росто́въ, имѣ́я тя́ на вся́ко вре́мя помо́щника и засту́пника, и ны́нѣ не отходи́ отъ на́съ, моли́твы творя́ за ны́ къ Бо́гу, я́ко да отъ безбо́жныхъ ва́рваръ на́съ изба́виши, тя́ велича́ющихъ.

Яко блудни́ца, и мыта́рь, и разбо́йникъ вопію́ ти́ отъ се́рдца: согрѣши́хъ, прости́ мя, Влады́ко, мно́гихъ мои́хъ злы́хъ прегрѣше́ній и изба́ви отъ вся́каго зла́ святи́теля моле́ніемъ Игна́тія, я́ко да Твою́ ми́лость непреста́нно велича́емъ.

Пріиди́те, собере́мся, вси́ росто́встіи наро́ди, къ блаже́ннѣй ра́цѣ преподо́бнаго Игна́тія и со слеза́ми возопіе́мъ къ Бо́гу моля́щеся: изба́ви, Го́споди, лю́ди Твоя́ и не да́ждь достоя́нія Твоего́ ро́ду исма́ильтескому, я́ко да возвели́чимъ ми́лость Твою́ во вѣ́ки.

Богоро́диченъ: Марíе Богоневѣ́сто, Влады́чице, омраче́нное мое́ се́рдце съ душе́ю мольба́ми Твои́ми просвѣти́ и жи́зни вѣ́чныя сподо́би мя́, Госпоже́, не помина́ющи мои́хъ безчи́сленныхъ зо́лъ, Сы́на и Бо́га Твоего́ моли́ за мя́, окая́ннаго, и пѣвцы́ Твоя́ сохрани́, Пречи́стая.

Свѣти́ленъ. Подо́бенъ: Ученико́мъ.

Чу́днаго и сла́внаго святи́теля, Игна́тія вели́каго, пріиди́те, пѣ́сньми свяще́нными да похва́лимъ, я́ко росто́вцемъ па́стыря и а́нгельскимъ чино́мъ сослуже́бника бы́вша. [Два́жды.]

[Сла́ва, и ны́нѣ, пра́здника или́ богоро́диченъ:

Богоро́дицу пѣ́сньми немо́лчными благоче́стно пое́мъ, вопію́ще: ра́дуйся, Горо́ свята́я, ра́дуйся, Престо́ле огнено́сный всѣ́хъ Царя́, ра́дуйся, Похвало́ а́нгеловъ и святы́хъ Сла́во.]

На хвали́техъ стихи́ры на 4, гла́съ 1. Подо́бенъ: Небе́сныхъ чино́въ.

На небеси́ препочи́лъ еси́, веселя́ся,* моля́ за ны́ Пресвяту́ю Тро́ицу,* ми́лость пода́ти на́мъ* и ми́рно житіе́ и безгрѣ́шно,* я́ко въ Ту́ вѣ́рующимъ при́сно,* ско́рби гонза́ти и ра́дованіе улучи́ти. [Два́жды.]

Милосе́рдія ра́ди твоего́* исто́чникъ на́мъ да́руй благода́ти,* вско́рѣ ра́дости испо́лнь,* пода́ждь на́мъ утѣше́ніе, су́щимъ въ печа́лехъ,* моля́ Христа́, всесла́вне,* спасти́ся душа́мъ на́шимъ.

Да въ весе́ліе вше́дъ нетлѣ́емо,* весе́лія да́ти моли́* и спасти́ рабы́ твоя́:* мо́жеши бо, Игна́тіе,* призыва́ющихъ тя́ бѣды́ вся́ разгна́ти,* моля́ Христа́, исцѣли́ти боля́щія.

Сла́ва, гла́съ 1:

Отъ зако́ннаго ко́рене прозя́бшь, возра́слъ еси́, усыне́нія вода́ми напое́нъ я́сно, Игна́тіе: и́бо Христо́вы Це́ркве, я́ко фи́никсъ высокове́рхій, процвѣ́лъ еси́ на́мъ, преуцвѣ́товая вѣ́рныя. Тѣ́мъ, ны́нѣ со святи́тели предстоя́, Христу́ моли́ся о душа́хъ на́шихъ.

И ны́нѣ, богоро́диченъ.
[Славосло́віе вели́кое. Ектеніи́ и отпу́стъ.]



НА ЛИТУРГІИ,

Слу́жба сего́ мѣ́сяца въ 23-й де́нь святи́телю Лео́нтію Росто́вскому: [Блаже́нна, пѣ́снь 3-я и 6-я. Проки́менъ, гла́съ 1: Уста́ моя́ возглаго́лютъ прему́дрость* и поуче́ніе се́рдца моего́ ра́зумъ. Сти́хъ: Услы́шите сія́, вси́ язы́цы, внуши́те, вси́, живу́щіи по вселе́ннѣй. Апо́столъ ко Евре́емъ, зача́ло 318, отъ полу́. Аллилу́ія, гла́съ 2: Уста́ пра́веднаго поуча́тся прему́дрости, и язы́къ его́ возглаго́летъ су́дъ. Сти́хъ: Зако́нъ Бо́га его́ въ се́рдцѣ его́, и не за́пнутся стопы́ eго́. Ева́нгеліе Матѳе́я, зача́ло 11. Прича́стенъ: Въ па́мять вѣ́чную бу́детъ пра́ведникъ, отъ слу́ха зла́ не убои́тся.]

Примѣчаніе:
[1] Подоба́етъ вѣ́дати: «На у́трени, по каѳи́змахъ сѣда́льны, и по поліеле́осѣ сѣда́лѣнъ, проки́менъ и ева́нгеліе, пи́сано сего́ мѣ́сяца въ 23-й де́нь, что́ святи́телю Лео́нтію. По 50-мъ псалмѣ́ стихѣ́ра, гла́съ 6: Правосла́вныя вѣ́ры.., пи́сана на вече́рни. Кано́нъ Богоро́дицѣ: Во́ду проше́дъ... на 6 и святи́телю кано́нъ, гла́съ 8 на 8...» (Кни́га Треѳоло́й: мѣ́сяцъ Ма́ртъ-Ма́й. М., 1638, л. 374 об.)

Источникъ: Минíа, мѣ́сяцъ Ма́ій. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 236 – 240 об.

/ Къ оглавленію раздѣла /


Наверхъ / Къ титульной страницѣ

0