Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - пятница, 15 декабря 2017 г. Сейчасъ на порталѣ посѣтителей - 6.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Ма́ія въ 27 де́нь.
Слу́жба преподо́бному отцу́ Ѳерапо́нту Можа́йскому, Луже́цкому чудотво́рцу.

НА МАЛѢЙ ВЕЧЕРНИ,
[На Го́споди воззва́хъ:] стихи́ры, гла́съ 8:

Отче Ѳерапо́нте, моли́твами и слеза́ми очи́стилъ еси́ ду́шу твою́, тѣ́мже ны́нѣ чи́стымъ твои́мъ се́рдцемъ зри́ши сла́ву Тріѵпоста́снаго Бо́га, Его́же моли́, преподо́бне, дарова́ти на́мъ ми́ръ и вели́кія ми́лости.

Посто́мъ и бдѣ́ніемъ поработи́лъ еси́, о́тче, тѣ́ло твое́ богому́дрому ду́ху твоему́, тѣ́мже и Преблагíй Бо́гъ дарова́ Свою́ благода́ть честно́му тѣ́лу твоему́, и́миже, о́тче Ѳерапо́нте, источи́ на́мъ ми́ръ и ве́лію ми́лость.

Сла́ва, гла́съ то́йже:

Преподо́бне о́тче, ты́ при́сно взыва́лъ еси́ ко Пречи́стѣй Ма́тери Бо́га и моли́твъ Ея́ ра́ди ны́нѣ предстои́ши Ро́ждшемуся отъ Нея́, съ Не́юже у Того́ испроси́ ми́ръ и спасе́ніе душа́мъ на́шимъ.

И ны́нѣ, богоро́диченъ гла́са или́ пра́здника.

На стихо́внѣ стихи́ры, гла́съ 4:

Устраши́вся стра́шнаго суда́ Бо́жія и вѣ́чныя му́ки, всего́ себе́, преподо́бне, преда́лъ еси́ терпѣ́нію, труда́мъ, бдѣ́нію и посту́, сего́ ра́ди прія́лъ еси́ вѣ́чный поко́й и сла́ву небе́сную.

Сти́хъ: Честна́ предъ Го́сподемъ сме́рть преподо́бныхъ Его́.

Многолѣ́тнимъ житіе́мъ Бо́гу рабо́тавъ, преподо́бне, ду́шу и тѣ́ло чи́сты предста́вилъ еси́ Христу́ Бо́гу, Иже прія́тъ тя́, Ѳерапо́нте, въ жи́тницу Свою́ небе́сную, я́ко зерно́ благопло́дное.

Сти́хъ: Блаже́нъ му́жъ, боя́йся Го́спода, въ за́повѣдехъ Его́ восхо́щетъ зѣло́.

Моли́твою непреста́нною вопія́лъ еси́ Бо́гу, блаже́нне, во дни́ и въ нощи́, и ны́нѣ, преподо́бне Ѳерапо́нте, пѣсносло́виши Го́спода со святы́ми а́нгелы Его́.

Сла́ва, гла́съ 8:

Образъ бы́лъ еси́ и́ноческаго житія́, преподо́бне, смире́ніемъ и цѣлому́дріемъ сія́ющій; просвѣти́ и укрѣпи́ и на́съ твои́ми моли́твами, чту́щихъ па́мять твою́, Ѳерапо́нте, о́тче на́шъ.

И ны́нѣ, богоро́диченъ дне́ или́ пра́здника.

Тропа́рь, гла́съ 4:

Житіе́мъ чи́стымъ просвѣти́вся, въ моли́твахъ и постѣ́хъ пусты́ни яви́лся еси́ до́брое прозябе́ніе и, духо́вному твоему́ учи́телю послѣ́дствуя, у́мъ сво́й къ небе́снымъ упра́вль, ста́ду твоему́ наста́вникъ бы́лъ еси́, тѣ́мъ тя́ мо́лимъ, о́тче Ѳерапо́нте: моли́ Христа́ Бо́га спасти́ся душа́мъ на́шимъ.


НА ВЕЛИЦѢЙ ВЕЧЕРНИ,
Блаже́нъ му́жъ: 1-й антифо́нъ. На Го́споди воззва́хъ: стихи́ры, гла́съ 5:

Пріиди́те, вѣ́рніи, и ли́къ соста́вимъ въ наро́читый се́й де́нь уго́дника Бо́жія, преподо́бнаго отца́ на́шего Ѳерапо́нта, дне́сь бо чи́стая его́ душа́, до́брымъ на земли́ трудодѣ́ланіемъ усугуби́вшая тала́нты своя́, принесе́ я́ Влады́цѣ Да́телю и съ ни́ми вни́де на небеси́ въ ра́дость Го́спода своего́, Его́же непреста́нно мо́литъ спасти́ся душа́мъ на́шимъ.

Да неосужде́нно предста́неши на суди́щи Христо́вѣ, оста́вль вся́, су́щая въ мíрѣ, на тѣ́сный пу́ть покая́нія возше́лъ еси́ и до́брѣ по́двигомъ и́ночества подвиза́лся еси́, но и си́мъ не довлѣ́яся, въ безмо́лвіе пусты́ни прите́клъ еси́, да мо́лишися Бо́гу вта́йнѣ, но Бо́гъ, ви́дяй тя́ вта́йнѣ, воздаде́ тебѣ́ я́вѣ, пресели́въ непоро́чную твою́ ду́шу къ ли́комъ небе́сныхъ а́нгеловъ и всѣ́хъ святы́хъ Свои́хъ, съ ни́ми же, о́тче на́шъ Ѳерапо́нте, моли́ спасти́ся душа́мъ на́шимъ.

Лю́дная мѣ́ста оста́вль, въ де́брь пусты́нную всели́лся еси́, но, слеза́ми свои́ми ороси́вся, возра́слъ еси́ въ высоту́ вся́кихъ добродѣ́телей, тѣ́мже и умно́жи тя́ Всеблагíй Вертогра́дарь, Христо́съ, при́ ко́рени бо смире́нія твоего́ насади́ ча́да твоя́, и́ноки, и́мже наста́вникъ бы́лъ еси́ и́стинный и храни́тель неусы́пный, та́кожде и ны́нѣ, преподо́бне, огради́ моли́твами твои́ми и на́съ, чту́щихъ па́мять твою́ вѣ́рно.

Отче Ѳерапо́нте, ты́ стяжа́лъ еси́ себѣ́ дру́га, спо́стника и сомоли́твенника, блаже́ннаго Кири́лла, съ ни́мже ра́достно Бо́гу рабо́талъ еси́, внима́я же сло́ву и примѣ́ру его́, восте́клъ еси́ по не́мъ въ пусты́ню и та́мо яви́лся еси́ съ ни́мъ насади́тель и́ноческаго благоче́стнаго житія́, и ны́нѣ съ ни́мъ веселя́ся въ небе́сныхъ оби́теляхъ, моли́ся, блаже́нне, дарова́ти душа́мъ на́шимъ ми́ръ и ве́лію ми́лость.

Егда́ благовѣ́рный кня́зь Андре́й умоли́ тя́, преподо́бне, созда́ти бли́зъ гра́да Можа́йска оби́тель и́ноческую, тогда́ собра́лъ еси́ но́вое ста́до твое́, ему́же наста́вникъ бы́лъ еси́ да́же до преставле́нія твоего́, но и по преставле́ніи вда́лъ еси́ сему́ ста́ду твоему́ облагода́тствованное тѣ́ло твое́, я́ко ору́жіе благохрани́тельное и всѣ́хъ земны́хъ сокро́вищъ многоцѣ́ннѣйшее, точа́щее исцѣле́нія неисче́тныя; тѣ́мже, о́тче Ѳерапо́нте, всѣ́хъ на́съ, припа́дающихъ къ тебѣ́ въ хра́мѣ твое́мъ святѣ́мъ, покры́й моли́твами твои́ми и соблюди́ отъ неду́говъ и напа́стей и отъ вся́каго нестрое́нія.

Сла́ва, гла́съ 6:

Пріиди́те, окре́стніи лю́діе, воспои́мъ храни́теля страны́ ва́шея, богоно́снаго отца́ на́шего Ѳерапо́нта, его́ бо святы́ми моли́твами Христо́съ Госпо́дь мно́гажды разсы́па тмочи́сленная вра́жеская по́лчища, попра́ти Правосла́вную вѣ́ру на́шу тщи́вшіяся, а́ще бо иногда́ христоненави́стніи и невѣ́рніи прихожда́ху вну́трь страны́ сея́, но гнѣ́въ Бо́жій вско́рѣ постига́ше и́хъ, и, разсла́бившеся ра́зумомъ, посра́млени, вспя́ть бѣжа́ху. Мы́ же, иму́ще такова́го засту́пника и учи́теля, укрѣпи́мъ сердца́ на́ша въ любви́ Христо́вой и въ вѣ́рѣ и́стиннѣй.

И ны́нѣ, богоро́диченъ: Кто́ Тебе́ не ублажи́тъ...
Аще же Пятидеся́тница: И ны́нѣ, пра́здника.

Вхо́дъ. Проки́менъ дне́. Чте́нія три́.

При́тчей чте́ніе.

Па́мять пра́веднаго съ похвала́ми, и благослове́ніе Госпо́дне на главѣ́ его́. Блаже́нъ человѣ́къ, и́же обрѣ́те прему́дрость, и сме́ртенъ, и́же увѣ́дѣ ра́зумъ. Лу́чше бо сію́ купова́ти, не́жели зла́та и сребра́ сокро́вища. Честнѣ́йшая же е́сть ка́меній многоцѣ́нныхъ, все́ же честно́е недосто́йно ея́ е́сть. Долгота́ бо дне́й и лѣ́та живота́ въ десни́цѣ ея́, въ шу́йцѣ же ея́ бога́тство и сла́ва. Отъ у́стъ ея́ исхо́дитъ пра́вда, зако́нъ же и ми́лость на язы́цѣ но́ситъ. Послу́шайте у́бо мене́, о ча́да, честна́я бо реку́, и блаже́нъ человѣ́къ, и́же пути́ моя́ сохрани́тъ: исхо́ди бо мои́ — исхо́ди живота́, и уготовля́ется хотѣ́ніе отъ Го́спода. Сего́ ра́ди молю́ ва́съ и предлага́ю мо́й гла́съ сыново́мъ человѣ́ческимъ. Я́ко а́зъ, прему́дрость, устро́ихъ совѣ́тъ, и ра́зумъ и смы́слъ азъ призва́хъ. Мо́й совѣ́тъ и утвержде́ніе, мо́й ра́зумъ, моя́ же крѣ́пость. Азъ мене́ лю́бящія люблю́, и́щущіи же мене́ обря́щутъ благода́ть. Разумѣ́йте у́бо, незло́бивіи, кова́рство, ненака́заніи же, прилага́йте сердца́. Послу́шайте мене́ и па́ки, честна́я бо реку́, и отве́рзу отъ усте́нъ пра́вая, я́ко и́стинѣ поучи́тся горта́нь мой, ме́рзки же пре́до мно́ю устны́ лжи́выя. Съ пра́вдою вси́ глаго́лы у́стъ мои́хъ, ничто́же въ ни́хъ стро́потно, ниже́ развраще́нно. Вся́ пра́ва су́ть разумѣва́ющимъ и про́ста обрѣта́ющимъ ра́зумъ. Науча́ю бо ва́съ и́стинѣ, да бу́детъ о Го́сподѣ наде́жда ва́ша, и испо́лнитеся Ду́ха.

При́тчей чте́ніе.

Уста́ пра́веднаго ка́плютъ прему́дрость, язы́къ же непра́веднаго поги́бнетъ. Устнѣ́ муже́й пра́ведныхъ ка́плютъ благода́ти, уста́ же нечести́выхъ развраща́ются. Мѣ́рила льсти́вая ме́рзость предъ Го́сподемъ, вѣ́съ же пра́ведный прія́тенъ Ему́. Идѣ́же а́ще вни́детъ досажде́ніе, та́мо и безче́стіе, уста́ же смире́нныхъ поуча́ются прему́дрости. Соверше́ніе пра́выхъ наста́витъ и́хъ, и поползнове́ніе отрица́ющихся упасе́тъ и́хъ. Не по́льзуютъ имѣ́нія въ де́нь я́рости, пра́вда же изба́витъ отъ сме́рти. Умеръ пра́ведный, оста́ви раска́яніе, нару́чна же быва́етъ и посмѣя́тельна нечести́выхъ па́губа. Пра́вда непоро́чнаго исправля́етъ пути́, въ нече́стіе же па́даетъ непра́вда. Пра́вда муже́й пра́выхъ изба́витъ и́хъ, безсовѣ́стіемъ же плѣня́ются беззако́нніи. Сконча́вшуся му́жу пра́ведну, не поги́бнетъ наде́жда, похвала́ же нечести́выхъ поги́бнетъ. Пра́ведникъ отъ ло́ва убѣ́гнетъ, въ него́же мѣ́сто предае́тся нечести́вый. Во устѣ́хъ нечести́выхъ сѣ́ть гра́жданомъ, чу́вство же пра́ведныхъ благопоспѣ́шное. Во благи́хъ пра́ведныхъ испра́вится гра́дъ, и въ поги́бели нечести́выхъ ра́дованіе. Во благослове́ніи пра́выхъ возвы́сится гра́дъ, усты́ же нечести́выхъ раскопа́ется. Руга́ется гра́жданомъ лише́нный ра́зума, му́жъ же му́дрый безмо́лвіе во́дитъ.

Прему́дрости Соломо́новы чте́ніе.

Пра́ведныхъ ду́ши въ руцѣ́ Бо́жіей, и не прико́снется и́хъ му́ка. Непщева́ни бы́ша во очесѣ́хъ безу́мныхъ умре́ти, и вмѣни́ся озлобле́ніе исхо́дъ и́хъ, и е́же отъ на́съ ше́ствіе — сокруше́ніе, они́ же су́ть въ ми́рѣ. Ибо предъ лице́мъ человѣ́ческимъ, а́ще и му́ку пріи́мутъ, упова́ніе и́хъ безсме́ртія испо́лнено. И вма́лѣ нака́зани бы́вше, вели́кими благодѣ́тельствовани бу́дутъ, я́ко Бо́гъ искуси́ я́ и обрѣ́те и́хъ досто́йны Себѣ́. Я́ко зла́то въ горни́лѣ, искуси́ и́хъ и, я́ко всепло́діе же́ртвенное, прія́тъ я́. И во вре́мя посѣще́нія и́хъ, возсія́ютъ, и я́ко и́скры по сте́блію, потеку́тъ. Су́дятъ язы́комъ и облада́ютъ людьми́, и воцари́тся Госпо́дь въ ни́хъ во вѣ́ки. Надѣ́ющіися На́нь разумѣ́ютъ и́стину и вѣ́рніи въ любви́ пребу́дутъ Ему́, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.

На литíи стихи́ры, гла́съ 6:

Ра́дуйся, о́тче, въ ско́рбехъ утѣ́шителю, въ напа́стехъ помо́щниче, прибѣ́жище стра́ннымъ, пріими́ моле́ніе на́ше и не оста́ви на́съ, си́рыхъ, но испроси́ на́мъ отъ Христа́ Бо́га спасе́ніе вѣ́чное, преподо́бне Ѳерапо́нте.

Преподо́бне о́тче, пріи́мъ кре́стъ Христо́въ, оста́вилъ еси́ вся́ блага́я мíра и въ пусты́ню всели́лся еси́, рабо́тати Бо́гу вта́йнѣ, но Бо́гъ, ви́дяй та́йныя по́двиги твоя́, мздовоздаде́ тебѣ́, Ѳерапо́нте, я́вѣ во Ца́рствіи небе́снѣмъ.

Сла́ва, гла́съ 8:

По и́мени твоему́, Ѳерапо́нте, та́ко и житіе́ твое́ соверши́лъ еси́: бы́лъ бо еси́ вѣ́рный ра́бъ Го́спода Христа́ и му́дрый приста́вникъ въ дому́ Его́, нача́льствующій, я́ко служа́й, и всѣ́мъ въ болѣ́знехъ и въ ну́ждахъ помога́яй; преподо́бне о́тче, а́нгеловъ собесѣ́дниче, сожи́телю пра́ведныхъ, и́стинный подви́жниче, не преста́й моли́тися о на́съ, чту́щихъ съ любо́вію па́мять твою́.

И ны́нѣ, богоро́диченъ гла́са или́ пра́здника.

На стихо́внѣ стихи́ры, гла́съ 1:

Кíими похва́льными пѣ́сньми возмо́жемъ досто́йно воспѣ́ти душе́вную добро́ту твою́, преподо́бне, нестяжа́ніе и ще́дрость, страннолю́біе и ми́лостыни, кро́тость и незло́біе, послуша́ніе и братолю́біе, согрѣша́ющимъ исправле́ніе те́плое, ка́ющимся утѣше́ніе сла́дкое, боля́щимъ врачева́ніе ско́рое, немощны́мъ по́мощь и укрѣпле́ніе, оскудѣва́ющимъ снабде́ніе, въ напа́стехъ избавле́ніе, и всѣ́мъ, призыва́ющимъ тя́, вѣ́рное услы́шаніе, блаже́нне о́тче на́шъ Ѳерапо́нте, не пре́зри на́съ за грѣхи́ на́ша безчи́сленныя, но моли́твами твои́ми испроси́ на́мъ у Христа́ Бо́га очище́ніе грѣхо́въ и ве́лію ми́лость.

Сти́хъ: Честна́ предъ Го́сподемъ сме́рть преподо́бныхъ Его́.

Егда́ наста́ вре́мя кончи́ны твоея́ многолѣ́тныя и многопло́дныя богоуго́дныя жи́зни, преподо́бне о́тче, ско́рбію вели́кою испо́лнилъ еси́ сердца́ лю́бящихъ тя́: благовѣ́рнаго кня́зя Андре́я и всѣ́хъ и́ночествующихъ ча́дъ твои́хъ; но Всеблагíй Госпо́дь ско́рбь и́хъ вско́рѣ премѣни́лъ е́сть на ра́дость несказа́нную, дарова́въ тѣ́лу твоему́ чудодѣ́йственную си́лу: бѣ́сы прогоня́ти, неду́ги исцѣля́ти и отъ бѣ́дъ огражда́ти всѣ́хъ, съ вѣ́рою и любо́вію притека́ющихъ во всечестны́й хра́мъ тво́й и припа́дающихъ къ ра́цѣ святы́хъ моще́й твои́хъ. Отче на́шъ Ѳерапо́нте, моли́твами твои́ми при́сно невреди́мы сохрани́ на́съ, и страну́ твою́, и вся́ христоимени́тыя лю́ди.

Сти́хъ: Блаже́нъ му́жъ, боя́йся Го́спода, въ за́повѣдехъ Его́ восхо́щетъ зѣло́.

Преподо́бне о́тче, ты́ тѣле́сная мудрова́нія поще́ніемъ крѣ́пкимъ ду́ху покори́лъ еси́ и непреста́нными моли́твами прибли́зился еси́ къ Бо́гу, благопослуша́ніемъ же соверше́ннымъ и нището́ю ду́ха преди́вною, незло́біемъ и кро́тостію, слеза́ми твои́ми и посто́мъ, бдѣ́ніемъ же и труда́ми неусы́пными о́бразъ бы́лъ еси́ ста́ду твоему́ и предте́ча къ небе́сному житію́, идѣ́же весели́шися со всѣ́ми, угоди́вшими Бо́гу, Его́же съ ни́ми моли́, о́тче Ѳерапо́нте, дарова́ти на́мъ здѣ́ благоче́стное житіе́ и та́мо съ тобо́ю Ца́рство небе́сное.

Сла́ва, гла́съ 6:

Преподо́бне о́тче, ты́ всего́ себе́ и всю́ жи́знь твою́ ввѣ́рилъ еси́ предста́тельству и заступле́нію Пречи́стыя Богоро́дицы, тѣ́мже и созда́нныя тобо́ю святы́я хра́мы и оби́тели и́ноковъ Ея́ сла́вѣ и покро́ву преда́лъ еси́, и нынѣ́, озаря́емь свѣ́томъ сла́вы Влады́чицы Пречи́стыя, съ Не́ю, блаже́нне Ѳерапо́нте, моли́ся Христу́ Бо́гу, спасти́ся на́мъ отъ вражды́ и мяте́жа и отъ всѣ́хъ вра́гъ, ви́димыхъ и неви́димыхъ, отъ бѣ́дъ и болѣ́зней и отъ вѣ́чныя му́ки.

И ны́нѣ, богоро́диченъ гла́са. Аще Пятьдеся́тница: И ны́нѣ, пра́здника.

[На благослове́ніи хлѣ́бовъ: Тропа́рь свята́го, два́жды [пи́санъ на ма́лѣй вече́рни] и Богоро́дице Дѣ́во.., еди́ножды.]



НА УТРЕНИ,
На Бо́гъ Госпо́дь: Тропа́рь преподо́бнаго, два́жды. Сла́ва, и ны́нѣ, богоро́диченъ.

По 1-мъ каѳи́смѣ сѣда́ленъ, гла́съ 5:

Аще и зѣло́ почте́нъ бы́сть отъ благовѣ́рнаго кня́зя Андре́я преподо́бный Ѳерапо́нтъ, но не предаде́ся горды́ни, и, смире́ніемъ обле́кся, недосто́йна себе́ вмѣня́ше мірскíя че́сти, о́бразъ да́вый, да послѣ́дуемъ смире́нію его́.

Сла́ва, и ны́нѣ, богоро́диченъ [или́ пра́здника].

По 2-й каѳи́смѣ сѣда́ленъ, гла́съ 6:

Ни зно́й, ни мра́зъ, ни стра́хъ звѣре́й, ни преще́ніе люде́й развраще́нныхъ, ни благохвале́нія отъ и́ноковъ, ни по́чести князе́й мірски́хъ, ничто́ отъ таковы́хъ возмо́же уклони́ти преподо́бнаго Ѳерапо́нта отъ любве́, я́же къ Бо́гу, тѣ́мже вои́стинну вѣ́рный ра́бъ Го́спода нарече́ся.

Сла́ва, и ны́нѣ, богоро́диченъ [или́ пра́здника].

[Сѣда́ленъ по поліеле́и зри́ по 3-й пѣ́сни кано́на:]

Та́же степе́нна, 1-й антифо́нъ 4-го гла́са. Проки́менъ, [гласъ 4]: Честна́ предъ Го́сподемъ сме́рть преподо́бныхъ Его́. Сти́хъ: Что́ возда́мъ Го́сподеви о всѣ́хъ, я́же воздаде́ ми́? Ева́нгеліе отъ Матѳе́я, зача́ло 43.

По 50-мъ псалмѣ́ стихи́ра, гла́съ 6:

Дне́сь свѣтоно́сное торжество́: возсія́ бо на́мъ па́мять пречестна́го отца́ на́шего Ѳерапо́нта, на́шего засту́пника и храни́теля, и́же припа́даетъ ко престо́лу Вседержи́теля и къ стопа́мъ Пречи́стыя Богоро́дицы, усе́рдно о на́съ моля́ся.

[Кано́нъ пра́здника или́ Богоро́дицы, и свята́го] кано́на два́:

Пе́рвый кано́нъ, его́же краегране́сіе: Воспои́мъ преподо́бному отцу́ Ѳерапо́нту. Гла́съ 5.
Пѣ́снь 1.

Ирмо́съ: Пои́мъ, Го́сподеви, сотво́ршему ди́вная чудеса́ въ Чермнѣ́мъ мо́ри, пѣ́снь побѣ́дную, я́ко просла́вися.

Воспѣва́еши ны́нѣ, преподо́бне, изба́вившему тя́ отъ истлѣ́нія и просла́вившему тя́ Бо́гу.

Отче Ѳерапо́нте, да́ждь на́мъ сло́во воспѣ́ти Го́спода, Иже въ тебѣ́ сла́вно просла́вися.

Стена́лъ еси́ въ мíрѣ отъ рабо́ты суетѣ́, но изведе́ тя́ Госпо́дь Бо́гъ въ свобо́ду и́ноческаго чи́стаго житія́.

Богоро́диченъ: Пречи́стая Ма́ти Христа́ Бо́га, исцѣли́ неду́ги на́ша благода́тію Сы́на Твоего́.

Другíй кано́нъ, его́же краегране́сіе: Моли́тву на́шу къ тебѣ́ сію́ пріими́, о́тче на́шъ. Гла́съ 1.
Пѣ́снь 1.

Ирмо́съ: Пѣ́снь побѣ́дную пои́мъ вси́ Бо́гу, сотво́ршему ди́вная чудеса́ мы́шцею высо́кою и спа́сшему Изра́иля, я́ко просла́вися.

Моли́ся, преподо́бне, спа́сшему тя́ Го́споду изба́вити на́съ отъ ско́рбей и напа́стей, облежа́щихъ на́съ.

Отъ многотру́дныя жи́зни сея́, я́ко а́нгелъ Бо́жій Изра́иля иногда́, преподо́бне, моли́твами твои́ми приведи́ на́съ въ обѣтова́нное Ца́рство.

Лю́тѣ на́съ и смертоно́сно терза́ютъ стра́сти на́ша, умоли́ на́мъ отъ я́звъ на́шихъ исцѣли́тися Кресто́мъ Го́спода.

Богоро́диченъ: Изми́ на́съ, Ма́ти Бо́жія, отъ бре́мени бѣ́дъ и ско́рбей, да, изба́вленніи Тобо́ю, зове́мъ Бо́гу на́шему: я́ко просла́вися.

Пѣ́снь 3.

Ирмо́съ: На ка́мени за́повѣдей Твои́хъ коле́блющагося мя́ утверди́, вознеси́ ро́гъ мо́й въ ра́зумѣ повелѣ́ній Твои́хъ, да, хваля́ся, вопію́ Тебѣ́: нѣ́сть свя́тъ, па́че Тебѣ́, Го́споди си́лъ.

О Го́сподѣ Бо́зѣ укрѣпля́лъ еси́ здѣ́ вы́ну се́рдце твое́, сего́ ра́ди ны́нѣ вознесе́ся ро́гъ тво́й въ Бо́зѣ твое́мъ, мы́ же весели́мся о спасе́ніи твое́мъ.

Изнемо́же крѣ́пость пло́ти твоея́ отъ поста́ и трудо́въ твои́хъ, но ду́хъ тво́й препоя́сася си́лою Бо́жіею и сра́дуется ны́нѣ со а́нгелы.

Ми́лостынями и благотворе́ніи ижди́лъ еси́ вся́ имѣ́нія твоя́ Го́спода ра́ди, тѣ́мже и Госпо́дь обогати́ тя во Ца́рствіи Свое́мъ.

Богоро́диченъ: Пречи́стая Дѣ́во, дѣ́вственниковъ ли́ки Тобо́ю хва́лятся, и на́съ сопричти́ къ ли́ку му́дрыхъ дѣ́въ.

Инъ.

Ирмо́съ: Утвержде́й сло́вомъ небеса́ и зе́млю основа́вый, Бо́же, и мене́ утверди́, вопію́ща Тебѣ́ пѣ́снь: Свя́тъ еси́, Го́споди.

Твоя́ моли́твы вознеси́ о на́съ къ Бо́гу, преподо́бне, и разруши́ ко́вы враго́въ на́шихъ на на́съ.

Вы́ну пода́вый на́мъ благопотре́бная, преподо́бне, да не изнемо́жемъ, а́лчуще, но да пое́мъ тя́ все́ю крѣ́постію на́шею.

Умерщвле́нніи грѣхи́ на́шими, ны́нѣ мо́лимъ тя́, преподо́бне: изба́ви на́съ а́да моли́твами твои́ми и приведи́ съ тобо́ю къ престо́лу сла́вы.

Богоро́диченъ: На́шего ра́ди спасе́нія ро́ждшая Бо́га, Пречи́стая, отжени́ отъ на́съ вся́каго врага́.

Сѣда́ленъ, [гла́съ 4]:

Ангельски пожи́въ на земли́, дне́сь со а́нгелы лику́етъ богоно́сный Ѳерапо́нтъ и съ ни́ми о на́съ мо́лится ко Спа́су всѣ́хъ, тѣ́мже взыгра́емъ, бра́тіе, и превознесе́мъ чадолю́бнѣйшаго сего́ отца́ на́шего Ѳерапо́нта.

[Сла́ва, и ны́нѣ, богоро́диченъ или́ пра́здника.]

Пѣ́снь 4.

Ирмо́съ: Услы́шахъ, Го́споди, слу́хъ Тво́й и убоя́хся, разумѣ́хъ смотре́ніе Твое́ и просла́вихъ Тя́, Еди́не Человѣколю́бче.

Ра́зумомъ вня́лъ еси́ гла́су Го́спода Судіи́ и, ужа́сся, скры́лся еси́ въ пусты́ню, но ны́нѣ со святы́ми весели́шися о Бо́зѣ, Спа́сѣ твое́мъ.

Егда́ вни́де въ се́рдце твое́ тре́петъ стра́шнаго суда́ Бо́жія, тогда́ отгна́лъ еси́, преподо́бне, слеза́ми и посто́мъ вся́ стра́сти твоя́.

Преподо́бный гла́съ моли́твы усте́нъ твои́хъ слы́шашеся въ де́брехъ пусты́нныхъ, и услы́ша его́ Госпо́дь съ высоты́ и даде́ тебѣ́ побѣ́ду за пѣ́сни Ему́.

Богоро́диченъ: Отжени́ отъ на́съ ско́рбь, гла́дъ и вся́кую ну́жду, Ма́ти Бо́га Пречи́стая, всеси́льнымъ хода́тайствомъ Твои́мъ.

Инъ.

Ирмо́съ: Слу́хъ Тво́й, Го́споди, услы́шахъ и убоя́хся, дѣла́ Твоя́ разумѣ́хъ и ужасо́хся, я́ко Бо́гъ, пре́жде вѣ́къ Сы́й, отъ Дѣ́вы рожде́йся, бы́сть Человѣ́къ.

Ангелъ храни́тель на́мъ бу́ди и да́ждь отра́ду на́мъ въ де́нь ско́рби на́шея, о́тче Ѳерапо́нте.

Ше́ствуй съ на́ми сія́ніемъ свѣ́та твоего́, преподо́бне, и украси́ на́съ цвѣта́ми до́брыхъ дѣ́лъ.

Уми́льно къ тебѣ́ припа́даемъ: огради́ на́съ, о́тче, да не сожже́тъ на́съ со́лнце, ниже́ вѣ́тръ губи́тельный.

Богоро́диченъ: Къ Тебѣ́ прибѣга́емъ, Ма́ти Дѣ́во Пречи́стая, бу́ди на́мъ тве́рдое и извѣ́стное заступле́ніе.

Пѣ́снь 5.

Ирмо́съ: Отъ но́щи покланя́ющіяся Тебѣ́, Христе́, поми́луй и ми́ръ да́руй: зане́, свѣ́тъ, повелѣ́нія Твоя́ бы́ша исцѣле́нія рабо́мъ Твои́мъ, Человѣколю́бче.

До но́щи отъ у́тра и отъ но́щи да́же до у́тра воспѣва́лъ еси́ Бо́гу, и повелѣ́нія Его́ бы́ша тебѣ́ свѣ́томъ на земли́, преподо́бне.

О и́стинѣ и пра́вдѣ ревнова́лъ еси́ здѣ́ и со пра́ведными причте́нъ еси́ ны́нѣ на небеси́.

Бѣ́галъ еси́ лжи́, я́ко я́да, и на́съ отъ путе́й лжи́выхъ отво́диши ко Христу́, Истинѣ и Животу́.

Богоро́диченъ: Не и́мамы ина́го заступле́нія и по́мощи, ра́звѣ Тебе́, Влады́чице, помози́ на́мъ и спаси́ на́съ.

Инъ.

Ирмо́съ: Тво́й ми́ръ да́ждь на́мъ, Сы́не Бо́жій: ино́го бо, ра́звѣ Тебе́, Бо́га не зна́емъ, и́мя Твое́ имену́емъ, я́ко Бо́гъ живы́хъ и ме́ртвыхъ еси́.

Тя́ мо́лимъ, о́тче: да́ждь ми́ръ Це́ркви, гра́ду и всѣ́мъ лю́демъ твои́мъ.

Ели́ко роса́ зла́ку, толи́ко и ты́ на́мъ исцѣле́ніе бу́ди моли́твами твои́ми.

Бѣ́днѣ болѣ́знями сме́ртными стра́ждемъ, возвѣ́й на на́съ ду́хъ спасе́нія, о́тче.

Богоро́диченъ: Сѣдя́й на херуви́мѣхъ вочеловѣ́чися Тобо́ю, Дѣ́во, Его́же моли́ за стра́ждущія человѣ́ки.

Пѣ́снь 6.

Ирмо́съ: Отъ ки́та проро́ка изба́вилъ еси́, мене́ же изъ глубины́ грѣхо́въ возведи́, Го́споди, и спаси́ мя.

Отъ всего́ се́рдца вопія́лъ еси́ ко Го́споду, и услы́шанъ еси́ отъ Него́, и ра́дуешися во свѣ́тѣ лица́ Его́.

Мы́слію зрѣ́лъ еси́ Бо́га, въ хра́мѣ Бо́жіемъ стоя́, и се́ ны́нѣ Бо́га зри́ши лице́мъ къ лицу́ въ селе́ніи небе́снѣмъ.

Устрани́лъ е́сть нетлѣ́ніе отъ тѣ́ла твоего́ Госпо́дь Бо́гъ тво́й, Ему́ же ты́ пѣ́лъ еси́ со гла́сомъ хвале́нія и исповѣ́данія.

Богоро́диченъ: Отве́рзи щедро́ты Твоя́, Богоро́дице, и приведи́ на́съ въ селе́нія Го́спода сла́вы, я́же Онъ обѣща́ вѣ́рнымъ Свои́мъ.

Инъ.

Ирмо́съ: Со Іо́ною вопіе́мъ Ти́, Го́споди, со гла́сомъ хвале́нія моля́щеся: возведи́ отъ тли́ живо́тъ на́шъ.

Се́ бе́здна грѣхо́въ потопля́етъ на́съ, ускори́, преподо́бне, изъя́ти на́съ отъ ни́хъ.

Іо́нѣ спасе́ніе да́вшего Бо́га умоли́, преподо́бне, дарова́ти на́мъ спасе́ніе отъ бѣ́дъ, обыше́дшихъ на́съ.

Юже въ ско́рбехъ, и слеза́хъ, и въ беззако́ніихъ иждива́емую жи́знь на́шу изведи́, преподо́бне, отъ истлѣ́нія.

Богоро́диченъ: Помози́ на́мъ, Пречи́стая, грѣси́ бо и бѣды́ одолѣва́ютъ на́съ и умерщвля́ютъ.

Конда́къ, гла́съ 4:

Преблагíй Спа́съ на́шъ Христо́съ умно́жилъ е́сть ми́лость Свою́ къ на́мъ, дарова́въ на́мъ въ засту́пника и цѣли́теля преподо́бнаго отца́ на́шего Ѳерапо́нта, и́же просвѣща́етъ на́съ о́бразомъ свята́го житія́ своего́ и ны́нѣ моли́твами свои́ми огражда́етъ оби́тель свою́ отъ враго́въ и отъ разруше́нія, страну́ сію́ отъ гла́да и напра́сныя сме́рти, чту́щихъ же па́мять его́ всѣ́хъ отъ болѣ́зней и отъ лю́тыхъ страсте́й.

[Икосъ:

Отъ младе́нчества твоего́ и да́же до престарѣ́нія тѣ́ломъ и душе́ю рабо́талъ еси́ Го́споду Іису́су Христу́ и Пречи́стѣй Его́ Ма́тери, и се́ ны́нѣ душа́ твоя́ ликовству́етъ въ Его́ небе́сныхъ оби́теляхъ, тѣ́ло же твое́, здѣ́ почива́я, сія́етъ чудесы́. Сего́ ра́ди вопіе́мъ ти́ ра́достно: ра́дуйся, во слѣ́дъ Христа́ неукло́нно ше́дый; ра́дуйся, сло́во Его́ соблюда́вый тве́рдо; ра́дуйся, во сла́ву Христа́ Бо́га подвиза́выйся; ра́дуйся, Пречи́стую Христа́ Ма́терь неумо́лчно сла́вивый; ра́дуйся, отъ Христа́ и отъ Ма́тери Его́ просла́вленный; ра́дуйся, имы́й дерзнове́ніе ве́ліе ко Христу́; ра́дуйся, защи́тниче оби́тели Луже́цкія; ра́дуйся, храни́телю страны́ Можа́йскія; ра́дуйся, побо́рниче крѣ́пкій за держа́ву Россíйскую; ра́дуйся, добропобѣ́дный во́инъ Правосла́вныя Це́ркве; ра́дуйся, всѣ́мъ призыва́ющимъ тя́ подаю́щій ско́рую по́мощь отъ Христа́ Бо́га. Ра́дуйся, Ѳерапо́нте, уго́дниче Христо́въ и чудотво́рче].

Пѣ́снь 7.

Ирмо́съ: Огня́ гаси́лище — отроко́въ моли́тва, ороша́ющая пе́щь, проповѣ́дница чудесе́, не опаля́ющи, ниже́ сожига́ющи пѣсносло́вцы Бо́га оте́цъ на́шихъ.

Ты́ слеза́ми мно́гими угаси́лъ еси́ пла́мень страсте́й твои́хъ и ны́нѣ ро́снымъ ду́хомъ прохлажда́ешися въ раи́, вопія́: Бо́же, благослове́нъ еси́.

Царю́ царе́й, преподо́бне, съ духо́вными ча́ды твои́ми на земли́ воспѣва́лъ еси́ вы́ну: Бо́же, благослове́нъ еси́.

Усрами́шася и́щущіи тебѣ́ зла́я, ты́ же, изба́влься отъ бѣ́дъ, пое́ши Бо́гу: Бо́же, благослове́нъ еси́.

Богоро́диченъ: Ѳиміа́мъ благоуха́нный Го́сподеви моли́твы Твоя́, Богороди́тельнице, и́миже и на́съ сподо́би пѣ́ти Бо́гу: благослове́нъ еси́.

Инъ.

Ирмо́съ: По мно́жеству ми́лости Твоея́, Человѣколю́бче, сотвори́ съ на́ми, да Тебѣ́ вѣ́рно вси́ воспѣва́юще, пои́мъ, я́коже о́троцы: благослове́нъ еси́, Бо́же оте́цъ на́шихъ.

Разжже́ніе страсте́й на́шихъ угаси́, преподо́бне, дожде́мъ моли́твъ твои́хъ о на́съ къ Бо́гу, да зове́мъ: Бо́же, благослове́нъ еси́.

Іису́са Го́спода умоли́, преподо́бне, я́ко да посра́мятся вси́, дѣ́лающіи зла́я на́мъ, рабо́мъ твои́мъ, мы́ же да зове́мъ Ему́: Бо́же, благослове́нъ еси́.

Истинно благослове́нный ны́нѣ отъ Отца́ Небе́снаго, помози́ и на́мъ бы́ти благослове́нными отъ Него́ и воспѣва́ти: Бо́же, благослове́нъ еси́.

Богоро́диченъ: Милосе́рдая Влады́чице на́ша, содѣ́лай Влады́ку Го́спода ми́лостива къ на́мъ, грѣ́шнымъ, да зове́мъ вы́ну: Бо́же, благослове́нъ еси́.

Пѣ́снь 8.

Ирмо́съ: Творца́ тва́ри, Его́же ужаса́ются а́нгели, по́йте, лю́діе, и превозноси́те во вся́ вѣ́ки.

Естество́мъ тѣле́снымъ зно́й и мра́зъ, снѣ́гъ и до́ждь, о́гнь и бу́рю претерпѣ́лъ еси́ Го́спода ра́ди, ду́хомъ поя́ и превознося́ Его́ во вѣ́ки.

Рыка́ніе звѣре́й ди́віихъ и во́пли пти́цъ нощны́хъ не заглуши́ша гла́са твоего́, немо́лчно воспѣва́вша Бо́гу и превозноси́вша Его́ во вѣ́ки.

Ангелоподо́бно бы́лъ еси́ смире́нъ се́рдцемъ, преподо́бенъ и пра́веденъ, все́ю душе́ю поя́ Го́спода и превознося́ Его́ во вѣ́ки.

Богоро́диченъ: Пречи́стая Дѣ́во, сподо́би на́съ съ проро́ки и съ му́ченики сла́вити Го́спода, пою́ще и превознося́ще Его́ во вѣ́ки.

Инъ.

Ирмо́съ: Пѣ́снь Тебѣ́ прино́симъ безпло́тныхъ, я́коже о́троцы въ пещи́, и, пою́ще, глаго́лемъ: благослови́те, вся́ дѣла́ Госпо́дня, Го́спода.

Исцѣли́ на́ша неду́ги, препита́й си́рыхъ и вдови́цъ, да вси́ ра́достно Го́спода пое́мъ и превозно́симъ во вѣ́ки.

Опали́, я́ко мо́лнія, вся́ вражды́ и нестрое́нія о́крестъ на́съ, да единомы́сленно пое́мъ Го́спода и превозно́симъ во вѣ́ки.

Твои́мъ хода́тайствомъ да́руй плодоро́діе земли́ на́шей и цѣльбу́ исто́чникамъ во́дъ, да благослови́мъ Го́спода и превозно́симъ во вѣ́ки.

Богоро́диченъ: Чи́ни а́нгельстіи Тя́ сла́вятъ, Пречи́стая, не пре́зри гла́сы и на́съ, грѣ́шныхъ, пою́щихъ Тя́ и превознося́щихъ во вѣ́ки.

Пѣ́снь 9.

Ирмо́съ: Яко сотвори́ Тебѣ́ вели́чія Си́льный, Дѣ́ву я́вль Тя́ чи́сту по рождествѣ́, я́ко ро́ждшую безъ сѣ́мене Своего́ Творца́, тѣ́мъ Тя́, Богоро́дице, велича́емъ.

Отче Ѳерапо́нте, благослове́нъ Бо́гъ, воздви́гнувый на́мъ тя́, о́трока Своего́, во огражде́ніе на́ше твои́мъ заступле́ніемъ.

Ны́нѣ сотвори́ тебѣ́ Бо́гъ ми́лость, всели́въ тя́ въ небе́сныя оби́тели, да привлече́ши въ ни́хъ и на́съ, вѣ́рно чту́щихъ тя́.

Ты́ служи́лъ еси́ Христу́ и Пречи́стѣй Ма́тери Его́ вся́ дни́ живота́ твоего́ на земли́, преподо́бне, укрѣпи́ и на́съ служи́ти Имъ всегда́.

Богоро́диченъ: Умоли́ небе́снаго Домовлады́ку, Пречи́стая, умудри́ти и спасти́ ду́ши на́ша моли́твами уго́дника Его́ Ѳерапо́нта, отца́ на́шего.

Инъ.

Ирмо́съ: Свѣтоно́сный о́блакъ, въ о́ньже всѣ́хъ Влады́ка, я́ко до́ждь съ небесе́ на руно́, сни́де и воплоти́ся на́съ ра́ди, бы́въ Человѣ́къ, Безнача́льный, велича́емъ вси́, я́ко Ма́терь Бо́га на́шего Чи́стую.

Еди́не ще́дре Го́споди, посѣти́ на́съ ми́лостями Твои́ми ра́ди уго́дника Твоего́, преподо́бнаго Ѳерапо́нта.

Не отступа́й отъ на́съ, о́тче, во вся́ дни́ вре́меннаго сего́ житія́ на́шего, но огражда́й на́съ ми́ромъ и ве́ліею ми́лостію.

Ада и вѣ́чныя му́ки изба́витися на́мъ моли́, о́тче, и да взы́дутъ ду́ши на́ша отъ земли́ въ небе́сная селе́нія.

Богоро́диченъ: Шата́нія враго́въ на́шихъ низложи́, Всепѣ́тая, и ниспосли́ на́мъ проще́ніе грѣхо́въ и спасе́ніе вѣ́чное.

Свѣти́ленъ, гла́съ 8:

Мно́гимъ посто́мъ и моле́ніемъ неусы́пнымъ очи́стивъ сво́й у́мъ отъ вся́кія стра́сти, и сла́дость душе́вныя чистоты́ вкуси́въ, всѣ́хъ на́съ, ча́дъ свои́хъ, о́тче, зове́ши къ чистотѣ́, глаго́ля на́мъ словесы́ апо́стольскими: отложи́мъ, ча́да, дѣла́ те́мная, я́ко во дни́ благообра́зно да хо́димъ, не козлогласова́ніи и пія́нствы, не рве́ніемъ и за́вистію, но облецы́теся Го́сподемъ на́шимъ Іису́сомъ Христо́мъ и пло́ти уго́дія не твори́те въ по́хоти.

[Сла́ва, и ны́нѣ, богоро́диченъ или́ пра́здника.]

На хвали́техъ стихи́ры на 4, гла́съ 5:

Разбо́йники, тебе́ неи́стово преща́вшія, незло́біемъ побѣди́лъ еси́ и на пу́ть до́брый напра́вилъ еси́, о́тче на́шъ Ѳерапо́нте, и́ночествующихъ похвало́, и́стинный учи́телю и храни́телю неизмѣ́нный.

Рука́ма твои́ма чи́стама созда́лъ еси́ хра́мъ Пречи́стыя Богоро́дицы Влады́чицы, и въ не́мъ со твои́ми спо́стники сла́дко воспѣва́лъ еси́ Христу́ Бо́гу, о́тче на́шъ Ѳерапо́нте, о́бразъ бы́въ воздержа́нія, и смире́нія, и душе́вныя чистоты́.

Сла́ва, гла́съ то́йже:

Преподо́бне о́тче, къ тебѣ́ ны́нѣ припа́даемъ и тя́ усе́рдно мо́лимъ: помоли́ся о на́съ Спа́су всѣ́хъ, изба́витися на́мъ отъ огня́ и гла́да, отъ вражды́ и нестрое́нія, отъ лю́тыхъ на́шихъ грѣхо́въ и отъ всѣ́хъ смертоно́сныхъ на́шихъ страсте́й.

И ны́нѣ, пра́здника или́ богоро́диченъ.
[Славосло́віе вели́кое, ектеніи́ и отпу́стъ.



НА ЛИТУРГІИ,

Блаже́нна, пра́здника и свята́го, пѣ́снь 6-я на 4, или́ одного́ свята́го, пѣ́сни 3-я и 6-я. Проки́менъ пра́здника и свята́го, гла́съ 7: Честна́ предъ Го́сподемъ сме́рть преподо́бныхъ его́. Сти́хъ: Что́ возда́мъ Го́сподеви о всѣ́хъ, я́же воздаде́ ми́? Апо́столъ дне́ и свята́го, къ Гала́томъ, зача́ло 213. Аллилу́ія пра́здника и свята́го, гла́съ 6: Блаже́нъ му́жъ, боя́йся Го́спода, въ за́повѣдехъ Его́ восхо́щетъ зѣло́. Сти́хъ: Си́льно на земли́ бу́детъ сѣ́мя его́. Ева́нгеліе дне́ и свята́го, Луки́, зача́ло 24. Прича́стенъ пра́здника и свята́го: Въ па́мять вѣ́чную бу́детъ пра́ведникъ, отъ слу́ха зла́ не убои́тся.]

Источникъ: Слу́жба и Ака́ѳистъ съ моли́твою преподо́бному отцу́ Ѳерапо́нту Можа́йскому, Луже́цкому чудотво́рцу. — М.: Въ Сѵнода́льной Тѵпогра́фіи, 1890. — Л. 1-19.

/ Къ оглавленію раздѣла /


Наверхъ / Къ титульной страницѣ

0