Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - вторникъ, 17 октября 2017 г. Сейчасъ на порталѣ посѣтителей - 18.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Ма́ія въ 27-й де́нь.
Свята́го священному́ченика Ѳерапо́нта.

[ВЕЧЕРЪ,]
Стихи́ры священному́ченика Ѳерапо́нта, гла́съ 8. Подо́бенъ: Му́ченицы Твои́, Го́споди.

Ѳерапо́нтъ пребога́тый,* живы́я воды́ исто́чникъ сы́й,* струи́ исцѣле́ній источа́етъ* и отмыва́етъ до конца́ скве́рну неду́говъ тя́жкихъ* всѣ́хъ, притека́ющихъ съ вѣ́рою.* Того́ мольба́ми, Го́споди,* всѣ́мъ пода́ждь ве́лію ми́лость.

Ѳерапо́нтъ чу́дный,* обагре́ніи кро́вными окропле́нъ,* оде́жду содѣ́ла свѣтлѣ́йшу свяще́нія вои́стинну,* въ ню́же боголѣ́пно одѣ́явся,* вну́трь святы́хъ вни́де.* Того́ моли́твами, Го́споди,* всѣ́мъ пода́ждь ве́лію ми́лость.

Стихи́ры Богоро́дицы, гла́съ и подо́бенъ то́йже:

Исхити́ мя, Влады́чице,* изъ руки́ змíя человѣкоубíйцы,* борю́щаго мя́ ле́стію пожре́ти до конца́,* сокруши́ че́люсти сего́, молю́ся,* и кова́рствія разори́,* я́ко да изба́влься сего́ ногте́й,* велича́ю си́лу Твою́.

Азъ е́смь дре́во непло́дное, Всенепоро́чная,* неплодя́щее плода́ спасе́ннаго,* тѣ́мже и трепе́щу посѣче́нія,* да не ка́ко вве́рженъ бу́ду* въ о́гнь негаси́мый, окая́нный.* Тѣ́мже Ти́ припа́даю:* сего́ изба́ви мя́* и плодоно́сна покажи́, Чи́стая, Сы́ну Твоему́* хода́тайствомъ Твои́мъ.

Уязви́ се́рдце мое́ стрѣла́ жела́нія смертоно́сная,* и уязви́хся отъ неразу́мія, и неисцѣ́льно болю́.* Ма́ти Бо́жія, не пре́зри мене́, отча́яннаго,* но исцѣле́ніе да́ждь ми́,* я́ко ро́ждши Го́спода и Спа́са, еди́наго Милосе́рда.

Сла́ва, и ны́нѣ, богоро́диченъ:

Помышле́нія нечи́ста, и усты́ льсти́вы,* дѣла́ же моя́ вся́ оскверне́на,* и что́ сотворю́? ка́ко усря́щу Судію́?* Влады́чице Дѣ́во, моли́ Сы́на Твоего́,* и Зижди́теля, и Го́спода,* я́ко да въ покая́ніи пріи́метъ ду́хъ мо́й,* я́ко еди́нъ Благоутро́бенъ.

Крестобогоро́диченъ:

Не терплю́, Ча́до,* ви́дящи Тя́ на дре́вѣ усну́вша,* бо́дрость всѣ́мъ подаю́щаго,* я́ко да и́же дре́вле преступле́нія плодо́мъ* сно́мъ поги́бельнымъ усну́вшимъ,* боже́ственную и спаси́тельную бо́дрость пода́си, —* Дѣ́ва глаго́лаше, пла́чущися,* Юже велича́емъ.


[НА УТРЕНИ,]
Кано́нъ, творе́ніе Іо́сифово, гла́съ 6.

Пѣ́снь 1.

Ирмо́съ: Яко по су́ху пѣшеше́ствовавъ Изра́иль по бе́зднѣ стопа́ми, гони́теля фарао́на ви́дя потопля́ема, Бо́гу побѣ́дную пѣ́снь пои́мъ, вопія́ше.

Со свяще́нными ли́ки на небесѣ́хъ лику́я всегда́, чту́щія на земли́ святу́ю па́мять твою́, страсте́й и бѣ́дъ лю́тыхъ, Ѳерапо́нте, изба́ви.

Простира́емо въ мíрѣ свяще́нное и честно́е твое́ страда́ніе, возставля́етъ вѣ́рныя въ то́, сла́вити тя́, свѣ́тло до́блествовавша, му́дре Ѳерапо́нте, благода́тію.

Богосія́нну тя́ звѣзду́, мы́сленное со́лнце показа́въ, по́двигъ твои́хъ свѣ́томъ и чуде́съ сія́ніемъ вѣ́рныя озаря́етъ, свяще́нно восхваля́ющія тя́.

Богоро́диченъ: Свяще́нный ли́къ проро́ческій предсказа́ше издале́ча, хотя́щу Тя́ бы́ти Бо́жію Роди́тельницу, Чи́стая, вы́шшу херуви́мъ и вся́кія тва́ри.

Пѣ́снь 3.

Ирмо́съ: Нѣ́сть свя́тъ, я́коже Ты́, Го́споди Бо́же мо́й, вознесы́й ро́гъ вѣ́рныхъ Твои́хъ, Бла́же, и утверди́вый на́съ на ка́мени исповѣ́данія Твоего́.

Уго́дникъ бы́лъ еси́ Христо́въ, и́стинно нося́ и подо́бно, му́чениче, твое́ зва́ніе вои́стинну, и цѣли́ши ду́шъ и тѣле́съ всегда́ неду́ги.

Кро́вь, съ ма́стію смѣ́шшися, твое́ свяще́нство свѣтлѣ́йше твори́тъ, святи́телю и па́стырю, му́чениче и врачу́ боля́щихъ, тѣ́мже восхваля́емъ тя́.

Цѣли́ши стра́сти лю́тыя вѣ́рно приступа́ющихъ, и неду́ги уставля́еши, и духо́въ лука́выхъ очища́еши вре́дъ Христо́вымъ призыва́ніемъ боже́ственнымъ, всеблаже́нне.

Богоро́диченъ: Разумѣ́ти рождества́ Твоего́, Чи́стая, неизглаго́ланную глубину́ недоумѣ́етъ у́мъ человѣ́чь: Бо́гъ бо, излія́въ Себе́ за милосе́рдіе, во утро́бѣ Твое́й, всего́ мя обнови́.

Сѣда́ленъ, гла́съ 1. Подо́бенъ: Гро́бъ Тво́й.

Уго́дниче Христо́въ, пострада́въ зако́нно, яви́лся еси́ и́стиненъ святи́тель и му́ченикъ. Тѣ́мже мо́лимъ тя́: ду́шъ на́шихъ, свя́те, ны́нѣ уврачу́й неудобьисцѣ́льныя стра́сти, Человѣколю́бца и Воли́теля ми́лости Христа́ умоли́.

Сла́ва, и ны́нѣ, богоро́диченъ:

Наста́ви на́съ на пу́ть покая́нія, укло́ньшіяся при́сно къ безпу́тіемъ зо́лъ и Преблага́го прогнѣ́вавшія Го́спода, Неискусобра́чная благослове́нная Марíе, прибѣ́жище отча́янныхъ человѣ́ковъ, Бо́жіе жили́ще.

Крестобогоро́диченъ:

Зря́щи Тя́, Христе́, Всенепоро́чная Ма́ти, ме́ртва на Крестѣ́ просте́рта, вопія́ше: Сы́не Мо́й, собезнача́льне Отцу́ и Ду́ху, что́ неизрече́нное Твое́ сіе́ смотре́ніе, и́мже спа́слъ еси́ пречи́стыхъ ру́къ Твои́хъ, Ще́дре, созда́ніе?

Пѣ́снь 4.

Ирмо́съ: Христо́съ моя́ си́ла, Бо́гъ и Госпо́дь, честна́я Це́рковь боголѣ́пно пое́тъ, взыва́ющи, отъ смы́сла чи́ста, о Го́сподѣ пра́зднующи.

Очи́стивъ пе́рвѣе отъ страстны́я молвы́ ду́шу, прія́лъ еси́, священнодѣ́йственне, пома́заніе боже́ственно свя́то и при кончи́нѣ страда́льческимъ украси́лся еси́ вѣнце́мъ.

Зна́меніи всегда́ и боже́ственными чудесы́ сія́я, ви́дишися и облиста́еши всю́ подсо́лнечную, благода́ть отъ Бо́га пріе́мъ, святи́телю досточу́дне.

Упа́слъ пе́рвѣе лю́ди благода́тію, безкро́вными же́ртвами, я́ко святи́тель, свяще́нно освя́щь и, я́ко а́гнецъ, закла́нъ бы́въ, Го́сподеви приведе́ся.

Богоро́диченъ: Яко две́рь, веду́щую къ боже́ственному вхо́ду, я́ко ра́й боже́ственный, я́ко разу́мно мѣ́сто освяще́нія, я́ко добро́ту Іа́ковлю, Дѣ́ву ублажи́мъ.

Пѣ́снь 5.

Ирмо́съ: Бо́жіимъ свѣ́томъ Твои́мъ, Бла́же, у́тренюющихъ Ти́ ду́ши любо́вію озари́, молю́ся, Тя́ вѣ́дѣти, Сло́вѣ Бо́жій, и́стиннаго Бо́га, отъ мра́ка грѣхо́внаго взыва́юща.

Боже́ственнымъ сія́ніемъ озари́вся, яви́лся еси́ пресвѣ́тлая звѣзда́, просвѣща́я подсо́лнечную боже́ственными зна́меніи Бо́жіимъ Ду́хомъ, Ѳерапо́нте, святи́телю богоблаже́нне.

Яко всесожже́ніе свяще́нно, я́ко приноше́ніе, о́тче, прія́тно и же́ртва соверше́нна, пло́тію пострада́вшему Сло́ву прине́слся еси́, Ѳерапо́нте святи́телю, му́ченикъ бы́въ.

Ча́шу налія́въ всекрасно́ исповѣ́данія вои́стинну, крѣ́пкимъ твои́мъ страда́ніемъ всѣ́хъ напоя́еши, Ѳерапо́нте преподо́бне, съ высо́кимъ проповѣ́даніемъ призыва́я.

Богоро́диченъ: По рожде́ніи стра́шнѣмъ пребыла́ еси́ дѣ́вою, я́коже пре́жде: Бо́гъ бо бѣ́ рожде́йся, устроя́яй вся́ во́лею, безневѣ́стная Марíе, Богоблагода́тная.

Пѣ́снь 6.

Ирмо́съ: Жите́йское мо́ре, воздвиза́емое зря́ напа́стей бу́рею, къ ти́хому приста́нищу Твоему́ прите́къ, вопію́ Ти: возведи́ отъ тли́ живо́тъ мо́й, Многоми́лостиве.

Житіе́ твое́ боже́ственно, жи́знь боголѣ́пна и сла́вна сме́рть, му́ченическими сія́я добро́тами, чуде́съ свѣтлостьми́ озаря́я сердца́ пою́щихъ тя́.

Плодови́ту ло́зу тя́ виногра́да и́стиннаго, разу́мнаго позна́хомъ, исповѣ́данія гро́здіе и́стинно принося́, источа́ющее терпѣ́нія, богому́дре, вино́ изря́дно.

Хра́мъ тво́й показа́ся врачевство́ свяще́нно, облегча́я благода́тію вся́кія болѣ́зни немощны́хъ и рѣша́ неду́ги, святи́телю богому́дре, досточу́дне.

Богоро́диченъ: Сло́во во утро́бѣ Твое́й одебелѣ́ безъ сѣ́мене, и Человѣ́къ яви́ся соверше́нъ, обновля́я естество́ богоподо́бно, я́коже еди́нъ вѣ́сть, Боговмѣсти́мая две́ре, Всенепоро́чная.

Пѣ́снь 7.

Ирмо́съ: Росода́тельну у́бо пе́щь содѣ́ла а́нгелъ преподо́бнымъ отроко́мъ, халде́и же опаля́ющее велѣ́ніе Бо́жіе, мучи́теля увѣща́ вопи́ти: благослове́нъ еси́, Бо́же оте́цъ на́шихъ.

Страсте́й треволне́ніе укроти́въ воздержа́ніемъ, преподо́бне, пострада́въ же, наводне́ніемъ погаси́лъ еси́ твои́хъ крове́й пре́лести запале́ніе, священному́чениче Христо́въ, Ѳерапо́нте преподо́бне.

Соверши́лся еси́ мѵ́ромъ пома́занія, священнотаи́нниче преподо́бне, и, соверши́въ свяще́нники и наро́дъ, я́ко па́стырь, соверши́лъ еси́ тече́ніе до́брое, закла́нъ бы́въ за Христа́, Ѳерапо́нте, му́чениче му́дре.

Тече́ніемъ крове́й твои́хъ погрузи́лъ еси́ вра́жія полки́, чуде́съ же сія́ніемъ мра́къ страсте́й разоря́еши, Ѳерапо́нте, вои́стинну чудодѣ́йственникъ я́влься и вра́чь немощны́хъ.

Богоро́диченъ: Сѣдя́й въ нѣ́дрѣхъ Роди́теля неопи́санно, Чи́стая, въ нѣ́дрѣхъ Твои́хъ ны́нѣ сѣди́тъ, опи́санъ, Твои́мъ обложе́нъ зра́комъ, за е́же спасти́ Ада́ма, но́въ Ада́мъ бы́въ.

Пѣ́снь 8.

Ирмо́съ: Изъ пла́мене преподо́бнымъ ро́су источи́лъ еси́ и пра́веднаго же́ртву водо́ю попали́лъ еси́: вся́ бо твори́ши, Христе́, то́кмо е́же хотѣ́ти. Тя́ превозно́симъ во вся́ вѣ́ки.

Безкро́вны же́ртвы Бо́гу прине́слъ еси́ и поже́рлся еси́, я́ко а́гнецъ чи́стъ, непоро́ченъ; де́монскія же́ртвы потреби́лъ еси́, красота́ страда́льцевъ, Ѳерапо́нте святи́телю.

Рая́ жи́тель боже́ственъ бы́въ, и святы́хъ а́нгеловъ яви́лся еси́ соприча́стникъ, му́ченическою сія́я свѣ́тлостію, му́чениче страстоно́сче и служи́телю Спа́совъ.

Го́рдаго змíя ты́ смири́лъ еси́ смире́ніемъ се́рдца, сопроти́влься сему́ му́жески и му́ченическою кро́вію обагри́въ, святи́телю, свяще́нную оде́жду твою́.

Богоро́диченъ: Изба́вльшеся пе́рвыя кля́твы Рождество́мъ Твои́мъ, Всеблагослове́нная Отрокови́це Богора́дованная, Гавріи́ловъ Тебѣ́ гла́съ возсыла́емъ: ра́дуйся, вино́вна всѣ́хъ спасе́нію.

Пѣ́снь 9.

Ирмо́съ: Бо́га человѣ́комъ невозмо́жно ви́дѣти, на Него́же не смѣ́ютъ чи́ни а́нгельстіи взира́ти; Тобо́ю бо, Всечи́стая, яви́ся человѣ́комъ Сло́во воплоще́нно, Его́же велича́юще, съ небе́сными во́и, Тя́ ублажа́емъ.

Ви́дѣти сла́ву Вседержи́теля жела́я, непра́ведную претерпѣ́лъ еси́ сме́рть, и твое́ю возше́лъ еси́ кро́вію, святи́телю сла́вне, я́коже на колесни́цѣ, и, къ небесе́мъ восте́клъ, ра́дуяся, почи́лъ еси́.

Яко свѣ́тъ, я́ко у́тро, на́мъ возсія́лъ еси́ свѣ́тлыми заря́ми, озаря́я концы́, святи́телю и па́стырю богодохнове́нне, и страсте́й рѣши́ши омраче́ніе. Тѣ́мже тя́ почита́емъ и благоче́стно ублажа́емъ.

Сы́й съ ли́ки, богоблаже́нне, патріа́рхъ и му́ченикъ, апо́столъ, и пра́ведникъ, и преподо́бныхъ, съ ни́ми моли́ся разрѣше́ніе согрѣше́ній всѣ́мъ дарова́ти, творя́щимъ благоче́стно боже́ственную па́мять твою́.

Твоего́ хра́ма, му́чениче, благолѣ́піе, блиста́ніи чуде́съ всегда́ просвѣща́емо, вѣ́рою приступа́ющимъ въ ду́сѣ разрѣша́етъ страсте́й мра́къ, уставля́етъ неду́ги, му́чениче святи́телю и па́стырю досточу́дне.

Богоро́диченъ: Свѣ́томъ Твои́мъ, Богоблагода́тная, въ жена́хъ Дѣ́во, просвѣти́ мя, молю́ся, и огня́ вѣ́чнаго мя́ изба́ви; я́ко да велича́ю Тя́, я́ко да Тя́ сла́влю, я́ко да по до́лгу воспою́ вели́чія Твоя́.

Источникъ: Минíа, мѣ́сяцъ Ма́ій. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 229 – 232.

/ Къ оглавленію раздѣла /


Наверхъ / Къ титульной страницѣ

0