Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - вторникъ, 23 мая 2017 г. Сейчасъ на порталѣ посѣтителей - 14.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Аѳонская служба святому по рукописи начала XX вѣка.

Мѣ́сяца Ма́ія въ 27-й де́нь.
Слу́жба свято́му пра́ведному Іоа́нну Ру́сскому, Исповѣ́днику
[1].

НА ВЕЧЕРНИ,
[Блаже́нъ му́жъ.., 1-й антифо́нъ.] На Го́споди воззва́хъ: стихи́ры, гла́съ 4:

Возсія́ па́мять твоя́ ны́нѣ,* пра́ведне Іоа́нне,* сердца́ и умы́ вѣ́рныхъ озаря́ющи,* ублажа́емъ у́бо тя́ я́ко терпѣливоду́шна,* непоколеби́ма въ благовѣ́ріи,* добродѣ́тельми укра́шена,* нетлѣ́ніемъ и чудесы́ просла́вленна,* и мо́лимтися прилѣ́жно:* моли́ся, свя́те, о спасе́ніи ду́шъ на́шихъ.

Якоже а́нгелъ, на земли́ пожи́лъ еси́,* воздержа́ніемъ увяди́въ твое́ тѣ́ло,* бдѣ́ніемъ и всено́щными стоя́ніи,* при́снымъ памятова́ніемъ сме́рти,* прича́стникъ же быва́я Боже́ственныхъ Та́инъ,* и тѣ́ми въ ку́юждо суббо́ту освяща́яся,* благоуго́денъ Бо́гови яви́лся еси́,* но моли́ся и на́мъ благоуго́днымъ Тому́ бы́ти* и спасти́ся душа́мъ на́шимъ.

Яко зла́то, въ горни́лѣ скорбе́й* искуси́лся еси́, доблему́дре,* преогорчева́емь плѣни́вшими тя́:* тѣ́мже по кончи́нѣ свята́я душа́ твоя́,* сожи́тельница а́нгеловъ,* досто́йно съ тѣ́ми весели́тся,* и притека́ющихъ къ моще́мъ твои́мъ* ра́дуеши дарова́ніемъ исцѣле́ній,* съ пра́ведными у́бо созерца́я добро́ту Влады́чню,* моли́ся о спасе́ніи ду́шъ на́шихъ.

Сокро́вище вели́ко Проко́пія,* ма́ло кесарíйско мѣ́сто,* и сія́ оби́тель и́мутъ,* святы́я мо́щи твоя́, Іоа́нне,* и́мже на поклоне́ніе собра́вшеся,* пѣ́сньми почита́емъ преставле́ніе твое́, зову́ще ти́:* ра́дуйся, звѣздо́, отъ Россíи возсія́вшая* и Асíю по́двиги свои́ми и чудесы́ озари́вшая;* ра́дуйся, вѣ́рныхъ похвало́ и украше́ніе;* ра́дуйся, моли́твенниче о спасе́ніи ду́шъ на́шихъ.

[Аще на 5, мо́жеши пропѣ́ти свѣти́ленъ: Ди́вное...]
Сла́ва, гла́съ 1:

Ка́ко не похва́лимъ, пра́ведне, благоду́шіе твое́ въ чу́вственномъ плѣне́ніи, и́мже посрами́лъ еси́ первовино́вника духо́внаго плѣне́нія, кро́тость же, незло́біе и смире́ніе, и́миже врага́ низложи́лъ еси́, безмо́лвіе и поще́ніе, моле́ніе всено́щное, въ не́мже помо́стъ притво́ра церко́внаго струя́ми сле́зными ороша́лъ еси́ и тѣ́ми о́гнь страсте́й угаси́лъ еси́, о́гнь любве́ боже́ственныя пріи́мъ въ се́рдцѣ свое́мъ и восхожде́ніи благода́тными свѣ́телъ бы́въ, Іоа́нне, во свѣ́тлостехъ святы́хъ ны́нѣ лику́еши, идѣ́же помина́й помина́ющія тя́.

[И ны́нѣ, пра́здника или́ богоро́диченъ:

Всемíрную сла́ву, отъ человѣ́къ прозя́бшую и Влады́ку ро́ждшую, небе́сную две́рь воспои́мъ, Марíю Дѣ́ву, безпло́тныхъ пѣ́снь и вѣ́рныхъ удобре́ніе: Сія́ бо яви́ся не́бо и хра́мъ Божества́, Сія́, прегражде́ніе вражды́ разруши́вши, ми́ръ введе́ и Ца́рствіе отве́рзе; Сію́ у́бо иму́ще вѣ́ры утвержде́ніе, Побо́рника и́мамы, изъ Нея́ ро́ждшагося Го́спода. Дерза́йте у́бо, дерза́йте, лю́діе Бо́жіи, и́бо То́й побѣди́тъ враги́, я́ко Всеси́ленъ.

Вхо́дъ. Проки́менъ дне́. И чте́нія три́:

Прему́дрости Соломо́новы чте́ніе.

Пра́ведныхъ ду́ши въ руцѣ́ Бо́жіей, и не прико́снется и́хъ му́ка. Непщева́ни бы́ша во очесѣ́хъ безу́мныхъ умре́ти, и вмѣни́ся озлобле́ніе исхо́дъ и́хъ, и е́же отъ на́съ ше́ствіе — сокруше́ніе, они́ же су́ть въ ми́рѣ. Ибо предъ лице́мъ человѣ́ческимъ, а́ще и му́ку пріи́мутъ, упова́ніе и́хъ безсме́ртія испо́лнено. И вма́лѣ нака́зани бы́вше, вели́кими благодѣ́тельствовани бу́дутъ, я́ко Бо́гъ искуси́ я́ и обрѣ́те и́хъ досто́йны Себѣ́. Я́ко зла́то въ горни́лѣ, искуси́ и́хъ и, я́ко всепло́діе же́ртвенное, прія́тъ я́. И во вре́мя посѣще́нія и́хъ, возсія́ютъ, и я́ко и́скры по сте́блію, потеку́тъ. Су́дятъ язы́комъ и облада́ютъ людьми́, и воцари́тся Госпо́дь въ ни́хъ во вѣ́ки. Надѣ́ющіися На́нь разумѣ́ютъ и́стину и вѣ́рніи въ любви́ пребу́дутъ Ему́, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.

Прему́дрости Соломо́новы чте́ніе.

Пра́ведницы во вѣ́ки живу́тъ, и въ Го́сподѣ мзда́ и́хъ, и попече́ніе и́хъ у Вы́шняго. Сего́ ра́ди пріи́мутъ ца́рствіе благолѣ́пія и вѣне́цъ добро́ты отъ руки́ Госпо́дни, зане́ десни́цею покры́етъ я́ и мы́шцею защити́тъ и́хъ. Пріи́метъ всеору́жіе — рве́ніе свое́ и вооружи́тъ тва́рь въ ме́сть враго́мъ. Облече́тся въ броня́ пра́вды и возложи́тъ шле́мъ — су́дъ нелицемѣ́ренъ. Пріи́метъ щи́тъ непобѣди́мый — преподо́біе, поостри́тъ же напра́сный гнѣ́въ — во ору́жіе, спобо́ретъ же съ ни́мъ мíръ на безу́мныя. По́йдутъ праволу́чныя стрѣ́лы мо́лніины и, я́ко отъ благокру́гла лу́ка облако́въ, на намѣ́реніе полетя́тъ, и отъ каменоме́тныя я́рости испо́лнь паду́тъ гра́ды. Вознегоду́етъ на ни́хъ вода́ морска́я, рѣ́ки же потопя́тъ я́ на́гло. Сопроти́въ ста́нетъ и́мъ ду́хъ си́лы и, я́ко ви́хоръ, развѣ́етъ и́хъ, и опустоши́тъ всю́ зе́млю беззако́ніе, и злодѣ́йство преврати́тъ престо́лы си́льныхъ. Слы́шите у́бо, ца́ріе, и разумѣ́йте, навы́кните, судіи́ конце́въ земли́. Внуши́те держа́щіи мно́жества и гордя́щіися о наро́дѣхъ язы́ковъ, я́ко дана́ е́сть отъ Го́спода держа́ва ва́мъ и си́ла отъ Вы́шняго.

Прему́дрости Соломо́новы чте́ніе.

Пра́ведникъ, а́ще пости́гнетъ сконча́тися, въ поко́и бу́детъ. Ста́рость бо честна́ не многолѣ́тна, ниже́ въ числѣ́ лѣ́тъ исчита́ется. Сѣди́на же е́сть му́дрость человѣ́комъ, и во́зрастъ ста́рости — житіе́ нескве́рное. Благоуго́денъ Бо́гови бы́въ, возлю́бленъ бы́сть, и живы́й посредѣ́ грѣ́шникъ, преста́вленъ бы́сть. Восхище́нъ бы́сть, да не зло́ба измѣни́тъ ра́зума его́ или́ ле́сть прельсти́тъ ду́шу его́. Раче́ніе бо зло́бы помрача́етъ до́брая и паре́ніе по́хоти, премѣня́етъ у́мъ незло́бивъ. Сконча́вся вма́лѣ, испо́лни лѣ́та до́лга, уго́дна бо бѣ́ Го́сподеви душа́ его́, сего́ ра́ди потща́ся отъ среды́ лука́вствія. Лю́діе же ви́дѣвше и не разумѣ́вше, ниже́ поло́жше въ помышле́ніи таково́е, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.]

На стихо́внѣ стихи́ры, гла́съ 2:

Богому́дре Іоа́нне,* благода́тію Бо́жіею просвѣща́емь* и раче́ніемъ боже́ственнымъ окриля́емь,* страда́льческую но́щь житія́ ра́бскаго* непреткнове́нно средѣ́ зловѣ́рныхъ преше́лъ еси́* и ко дню́ невече́рнему ра́йскія свобо́ды дости́глъ еси́,* озаря́я отту́ду вѣ́рныхъ исполне́ніе.

Сти́хъ: Мно́ги ско́рби пра́веднымъ,* и отъ всѣ́хъ и́хъ изба́витъ я́ Госпо́дь.

Плѣне́нный тата́ры* и отведе́нный ко ага́ряномъ,* вселе́нъ, всече́стне, бы́лъ еси́ въ ко́нскомъ стоя́лищи,* я́коже Іовъ на гно́ищи,* утѣсня́емь и оскорбля́емь,* тѣ́мже пра́веднымъ судо́мъ Бо́жіимъ* по кончи́нѣ утѣша́ешися на ло́нѣ Авраа́мли,* идѣ́же всѣ́хъ веселя́щихся жили́ще.

Сти́хъ: Пра́ведникъ я́ко фи́никсъ процвѣте́тъ,* я́ко ке́дръ, и́же въ Лива́нѣ, умно́жится.

Внѣ́ до́льняго оте́чества* богоуго́дно пожи́въ, блаже́нне,* въ го́рнее оте́чество всели́лся еси́,* дарова́ньми украси́вся Ду́ха.* Бу́ди у́бо те́плый хода́тай ко Го́споду* о Россíи и ея́ лю́дехъ,* о Горѣ́ и оби́тели се́й,* страсте́й же и неду́говъ* свобожда́й на́съ моли́твами твои́ми,* благода́ти тезоимени́те.

Сла́ва, гла́съ 6:

Имѣ́яй благíй по́мыслъ, и се́рдце бо́дрое, и любо́вь нелицемѣ́рную, бдя́й же при́сно и Бо́гу пріединя́яйся, блаже́нную кончи́ну пріе́млетъ дне́сь Іоа́ннъ пра́ведный и чи́стою душе́ю свое́ю воспаря́етъ горѣ́, свесели́тися избра́ннымъ Отца́ Небе́снаго, остави́ же во утѣше́ніе и освяще́ніе своя́ святы́я мо́щи, къ ни́мже притека́юще, воззове́мъ къ нему́: тя́, богопрія́тне, воспѣва́ющимъ согрѣше́ній испроси́ проще́ніе, ми́ръ и ве́лію ми́лость.

[И ны́нѣ, пра́здника или́ богоро́диченъ:

Творе́цъ и Изба́витель мо́й, Пречи́стая, Христо́съ Госпо́дь, изъ Твои́хъ ложе́снъ проше́дъ, въ мя́ оболкíйся, пе́рвыя кля́твы Ада́ма свободи́. Тѣ́мже Ти́, Всечи́стая, я́ко Бо́жіи Ма́тери же и Дѣ́вѣ, вои́стинну вопіе́мъ немо́лчно: ра́дуйся а́нгельски, ра́дуйся, Влады́чице, предста́тельство, и покро́ве, и спасе́ніе ду́шъ на́шихъ.]

Тропа́рь, гла́съ 4:

Отъ земли́ плѣне́нія твоего́ воззва́вый тя́ къ небе́снымъ селе́ніемъ Госпо́дь соблюда́етъ невреди́мо и цѣльбоно́сно тѣ́ло твое́, пра́ведне Іоа́нне, ты́ бо, въ Россíи я́тый и во Асíю прода́нный, посредѣ́ ага́рянскаго злоче́стія благоче́стно пожи́лъ еси́ во мно́зѣ терпѣ́ніи и, сѣ́явъ здѣ́ слеза́ми, жне́ши та́мо неизглаго́ланною ра́достію. Тѣ́мже моли́ Христа́ Бо́га спасти́ся душа́мъ на́шимъ.

[Сла́ва, и ны́нѣ, пра́здника или́ богоро́диченъ:

Еже отъ вѣ́ка утае́нное, и а́нгеломъ несвѣ́домое та́инство: Тобо́ю, Богоро́дице, су́щимъ на земли́ яви́ся, Бо́гъ въ несли́тномъ соедине́ніи воплоща́емь, и кре́стъ во́лею на́съ ра́ди воспріи́мъ, и́мже воскреси́въ первозда́ннаго, спасе́ отъ сме́рти ду́ши на́ша.]


НА УТРЕНИ,
[На Бо́гъ Госпо́дь... Аще е́сть Пятьдеся́тница: тропа́рь пра́здника, два́жды. Сла́ва, свята́го. И ны́нѣ, пра́здника.
Аще ли е́сть по́стъ: тропа́рь свята́го, два́жды. Сла́ва, и ны́нѣ, богоро́диченъ.]

По 1-мъ стихосло́віи сѣда́ленъ, [гла́съ 3]:

Свѣ́тлымъ житіе́мъ твои́мъ, Іоа́нне, и неусы́пными моли́твами неулови́мь пребы́лъ еси́ ловле́ніи тмы́ предста́теля и, во гро́бѣ лежа́, нетлѣ́ненъ пребыва́еши, подая́ цѣльбы́ призыва́ющимъ тя́ и па́мять твою́ любо́вію пра́зднующимъ. [Два́жды.]

[Сла́ва, и ны́нѣ, пра́здника или́] богоро́диченъ:

Извѣ́стная христіа́номъ и еди́на по Бо́зѣ крѣ́пкая Помо́щнице, си́льная въ бѣда́хъ Предста́тельнице, покры́й и соблюди́ ны, Влады́чице человѣколюби́вая, вся́ совѣ́ты злоко́знствующихъ враго́въ низлага́ющи.

По 2-мъ стихосло́віи сѣда́ленъ, [гла́съ 4]:

Страсте́й о́гнь погаси́лъ еси́, блаже́нне, тече́ніемъ сле́зъ и добродѣ́тельми обогати́лся еси́, я́влься человѣ́къ небесному́дръ, но да улучу́ и а́зъ избавле́ніе отъ мглы́ страсте́й хода́тайствомъ твои́мъ, Іоа́нне, и да явлю́ся спасе́нъ, съ вѣ́рою прибѣга́яй къ тебѣ́. [Два́жды.]

[Сла́ва, и ны́нѣ, пра́здника или́] богоро́диченъ:

Къ Тебѣ́, Всецари́це, приношу́ ю́же отъ болѣ́зни моли́тву мою́: поми́луй мя́, Всеблага́я, и неколе́блема прило́ги льсти́ваго содѣ́лай, да не посра́мленъ бу́ду, въ де́нь искуше́нія Тя́ призыва́яй, недосто́йный ра́бъ Тво́й.

По поліеле́и сѣда́ленъ, [гла́съ 1]:

Среди́ мірска́го мяте́жа пра́ведно пожи́вша, я́ко въ безмо́лвіи пусты́нномъ, на ра́мена Кре́стъ Госпо́день взе́мша и Тому́ послѣ́довавша страда́льческими по́двиги, восхва́лимъ вси́ пѣ́сньми Іоа́нна, его́же израсти́ Россíя, Асíя же позна́, я́ко преподо́бна. [Два́жды.]

[Сла́ва, и ны́нѣ, пра́здника или́] богоро́диченъ:

Кто́ отъ человѣ́къ возмо́жетъ изрещи́ Твоя́, Дѣ́во, я́же па́че ума́ несказа́нная та́инства? Ты́ бо яви́лася если́ всѣ́хъ пребо́льши святы́хъ, и превы́шши а́нгеловъ, и небе́съ ши́рши, я́ко изъ Тебе́ возсія́ Христо́съ Бо́гъ, спаса́яй ду́ши на́ша.

Степе́нна, 1-й антифо́нъ 4-го гла́са. Проки́менъ, [гла́съ 4]: Честна́ предъ Го́сподемъ* [сме́рть преподо́бныхъ Его́.] Сти́хъ: Что́ возда́мъ Го́сподеви [о всѣ́хъ, я́же воздаде́ ми?] Вся́кое дыха́ніе... Ева́нгеліе Луки́, зача́ло 64.

По 50-мъ псалмѣ́ стихи́ра, гла́съ 6:

Пра́ведне Іоа́нне, вѣ́рный ра́бе Христа́ Бо́га, Ца́рствія Его́ наслѣ́дниче, Проко́піи красото́ и Россíи похвале́ніе, тве́рдый въ благовѣ́ріи, зловѣ́рными неодоли́мь сы́й, странѣ́ на́шей проси́ на враги́ одолѣ́ніе, сыново́мъ же россíйскимъ непобѣди́мымъ бы́ти и неосла́бнымъ въ благоче́стіи и въ ми́рѣ спасти́ся всѣ́мъ на́мъ.

Кано́нъ [пра́здника или́ Богоро́дицы со ирмосо́мъ на 6 и свята́го на 8], гла́съ 2.

Пѣ́снь 1.

Ирмо́съ: Гряди́те, лю́діе, пои́мъ пѣ́снь Христу́ Бо́гу, раздѣ́льшему мо́ре и наста́вльшему лю́ди, я́же изведе́ изъ рабо́ты Еги́петскія, я́ко просла́вися.

Пресвѣ́тлымъ озаря́емь свѣ́томъ Со́лнца пра́вды, просвѣще́ніе испроси́ мнѣ́, омраче́нному, воспѣ́ти твое́, богосвѣ́тле, свѣтоза́рное торжество́.

Уды вся умертви́въ, му́дре, въ чи́стомъ се́рдцѣ твое́мъ имѣ́лъ еси́ Христа́, умертви́вша и сте́рша главу́ змíя и отъ я́да того́ изба́вльша человѣ́ческое естество́.

Въ зако́нѣ Госпо́дни поуча́яся, бы́лъ еси́, я́ко дре́во, е́же благíй пло́дъ сво́й даде́ во вре́мя свое́, прія́лъ бо еси́ по кончи́нѣ, достосла́вне, благода́ть врачева́ти призыва́ющія тя́.

Богоро́диченъ: Тя́, Всепѣ́тая Приснодѣ́во, исповѣ́дающіи Богоро́дицу, утвержде́ніе и предста́тельство и́мамы и, прибѣга́юще къ Тебѣ́, бу́ри жите́йскія и искуше́ній избавля́емся.

Пѣ́снь 3.

Ирмо́съ: Утверди́ на́съ въ Тебѣ́, Го́споди, дре́вомъ умерщвле́й грѣ́хъ, и стра́хъ Тво́й всади́ въ сердца́ на́съ, пою́щихъ Тя́.

Просія́ свято́е житіе́ твое́, блаже́нне, во Асíи и озаря́етъ свѣ́томъ чуде́съ, но проси́ и на́мъ благода́ти, е́же хотѣ́ти и е́же дѣ́яти, блага́я чту́щимъ па́мять твою́.

Не да́лъ еси́ сна́ очи́ма твои́ма, до́ндеже успи́лъ еси́, достохва́льне, безчи́нная двиза́нія востаю́щія на ду́хъ пло́ти твои́ми ко Го́споду всено́щными моле́ніи.

Непобѣди́мою си́лою Креста́ Христо́ва де́монская побѣди́въ устремле́нія, яви́лся еси́ вино́вникъ спасе́нія мно́гихъ, помо́щникъ сы́й притека́ющихъ къ моще́мъ твои́мъ.

Богоро́диченъ: Яко Черто́гъ одушевле́нъ Бо́жій и Кади́льницу мы́сленнаго и свѣтоно́снаго Угля, велича́емъ Тя́, Богоро́дице, зову́ще: ра́дуйся, Хода́таице спасе́нія на́шего.

По 3-й пѣ́сни, сѣда́ленъ, [гла́съ 4]:

Бы́лъ еси́ плѣ́нникъ на земли́, богому́дре, вся́ко озлобле́ніе претерпѣва́я, добродѣ́тели, я́коже ѳиміа́мъ благово́ненъ и же́ртву благопрія́тну, прине́слъ еси́ Бо́гу, Его́же моли́ дарова́ти согрѣше́ній очище́ніе чту́щимъ святу́ю па́мять твою́. [Два́жды.]

[Сла́ва, и ны́нѣ, пра́здника или́] богоро́диченъ:

Ты прибѣ́жище на́ше еси́, и си́ла, и утѣше́ніе, Богоро́дице Пречи́стая: се́ бо Иже всѣ́хъ Госпо́дь, ро́ждься отъ Тебе́, Дѣ́ву боже́ственную Тя́ соблюде́ по рождествѣ́ и небесе́ и земли́ Цари́цу сотвори́, тѣ́мъ Тя́ вси́ недосто́йными усты́ сла́вимъ.

Пѣ́снь 4.

Ирмо́съ: Услы́шахъ, Го́споди, слу́хъ Тво́й и убоя́хся, разумѣ́хъ дѣла́ Твоя́, и диви́хся, и возопи́хъ: сла́ва си́лѣ Твое́й, Го́споди.

Ду́шу свою́ украси́лъ еси́, плотско́е умертви́въ мудрова́ніе, тѣ́мже небе́сныхъ красо́тъ еси́ зри́тель.

Пра́веденъ бы́лъ еси́ и незло́бивъ, и́стиненъ же и непоро́ченъ, вѣ́ренъ и богочести́въ, прехва́льне.

Боже́ственнымъ смире́ніемъ возвыша́емь, врага́ смири́лъ еси́, блаже́нне, на небеси́ и на земли́ сла́венъ я́влься.

Богоро́диченъ: Спаса́й ста́до Твое́, Ма́ти Бо́жія, безвре́дно отъ вся́каго зла́: Тя́ бо во обстоя́ніихъ и́мамы избавле́ніе.

Пѣ́снь 5.

Ирмо́съ: Просвѣще́ніе во тмѣ́ лежа́щихъ, спасе́ніе отча́янныхъ, Христе́ Спа́се мо́й, къ Тебѣ́ у́тренюю, Царю́ ми́ра, просвѣти́ мя сія́ніемъ Твои́мъ, ино́го бо ра́звѣ Тебе́ Бо́га не зна́ю.

Неблагоро́денъ ра́бъ по тѣ́лу сотво́рься, благоро́денъ нра́въ въ души́ имѣ́лъ еси́, прече́стне, все́ твое́ жела́ніе на Бо́га Всеви́дца возложи́лъ еси́.

Богоуго́дно тече́ніе свое́ на земли́ соверши́вшу ти, со благоугоди́вшими Бо́гу ны́нѣ лику́еши, моля́ся о почита́ющихъ преставле́ніе твое́, богоизбра́нне.

Чу́до зри́тся на тебѣ́, сла́вне, ка́ко по преставле́ніи соблюда́ется неруши́мо, благово́нно и цѣле́бно тѣ́ло твое́ судьба́ми Просла́вльшаго тя́.

Богоро́диченъ: Испо́лни уста́ на́ша хвале́нія Твоего́, Госпоже́, и покажи́ ны другíй десятостру́нный псалти́рь очище́ніемъ сугу́быя чу́вствъ пятери́цы.

Пѣ́снь 6.

Ирмо́съ: Гла́съ глаго́лъ моле́бныхъ отъ болѣ́зненныя, Влады́ко, души́ услы́шавъ, отъ лю́тыхъ мя́ изба́ви: Еди́нъ бо еси́ на́шего спасе́нія вино́венъ.

Яко кри́нъ благово́ненъ, израсти́ тя Россíя, и, я́ко ши́покъ красе́нъ, бы́лъ еси́ посредѣ́ те́рнія ага́рянскаго, облагово́нившей тя́ благода́ти Бо́жіей.

Яко фи́никсъ процвѣ́тъ, благода́ти тезоиме́нне, сла́достію плодо́въ, услажда́еши чу́вства вѣ́рныхъ, я́ко ке́дръ несокруши́мь, я́влься бу́рею напа́стей и искуше́ній.

Яко многоцѣ́нное сокро́вище, въ земли́ кры́ющееся, мо́щи своя́ яви́лъ еси́ благочести́вымъ въ видѣ́ніи, и тѣ́ми неду́ги врачу́еши, подая́ отъ Бо́га освяще́ніе лобыза́ющимъ я́.

Богоро́диченъ: Яко Ма́ти всѣ́хъ даро́въ Пода́теля яви́лася еси́, са́дъ многоцвѣ́тенъ и ра́й сладкоды́шущь, плода́ми Ду́ха ущедря́ющь и благода́тьми облагоуха́ющь пою́щія Тя́.

Конда́къ, гла́съ 8:

Въ честнѣ́й па́мяти твое́й, свя́те, весели́тся о тебѣ́ Россíя, во благоче́стіи тя́ воспита́вшая, и цѣле́бнымъ моще́мъ твои́мъ ра́дуется Асíя, идѣ́же у́зкій пу́ть проше́дъ страда́льческаго плѣ́на и по́стническихъ подвиго́въ, сосу́дъ че́стенъ яви́лся еси́ Бо́жія благода́ти, ея́же проси́ и на́мъ, чти́телемъ твои́мъ, да зове́мъ ти́: ра́дуйся, Іоа́нне, благода́ти тезоимени́те.

Икосъ:

Ка́ко по достоя́нію восхва́лимъ тя́, доблему́дре, по́двиги твои́ми стра́сти умертви́вша, пло́ть порабо́тивша ду́ху и врага́ побѣди́вша? Кто́, слы́шавъ вели́кое твое́ терпѣ́ніе и смире́ніе, не удиви́тся? Еже ко всѣ́мъ кро́тость и беззло́біе, къ скорбя́щимъ сострада́ніе, къ су́щимъ въ бѣда́хъ и неду́зѣхъ поможе́ніе. Въ невече́рнемъ у́бо дни́ Ца́рствія Бо́жія, съ пра́ведными пра́ведно наслажда́яся, моли́ся о чту́щихъ па́мять твою́, да зове́мъ ти́: ра́дуйся, Іоа́нне, благода́ти тезоимени́те.

Пѣ́снь 7.

Ирмо́съ: Образу злато́му, на по́лѣ Деи́рѣ служи́му, тріе́ Твои́ о́троцы небрего́ша безбо́жнаго велѣ́нія, посредѣ́ же огня́ вве́ржени, ороша́еми, поя́ху: благослове́нъ еси́, Бо́же оте́цъ на́шихъ.

Де́нь пра́зднственный соверша́емъ дне́сь блаже́ннаго успе́нія твоего́, свѣтоза́рне, въ не́мже свѣти́льникъ нося́, по́лнъ еле́я благи́хъ дѣ́лъ, вше́лъ еси́ въ свѣ́тлый черто́гъ и Жениху́ ду́шъ вопіе́ши: благослове́нъ еси́, Бо́же оте́цъ на́шихъ.

Ду́шу удобри́въ, богому́дре, ра́ломъ моли́твы, воздержа́ніе посѣ́явъ и ороси́въ е́ слеза́ми, пожа́лъ еси́ кла́сы чистоты́ и пра́ведности и съ пра́ведными взыва́еши укрѣ́пльшему тя́ Христу́: благослове́нъ еси́, Бо́же оте́цъ на́шихъ.

Святы́хъ ду́ши, пра́ведныхъ ли́къ и безпло́тныхъ умо́въ ополче́ніе прія́ша тя́, сликовству́юща и́мъ, досточу́дне, нетлѣ́ннымъ одѣя́ніемъ сла́вы укра́шенна и съ ни́ми пою́ща: благослове́нъ еси́, Бо́же оте́цъ на́шихъ.

Богоро́диченъ: На Тя́, Влады́чице, наде́жду мою́ отъ души́ возложи́хъ всю́ и ча́ю отъ Тебе́ боже́ственнаго утѣше́нія, благода́тную по́мощь низпосли́ ми, стезю́ показу́я, къ небеси́ возводя́щую, во е́же пѣ́ти: благослове́нъ еси́, Бо́же оте́цъ на́шихъ.

Пѣ́снь 8.

Ирмо́съ: Въ пе́щь о́гненную ко отроко́мъ евре́йскимъ снизше́дшаго и пла́мень въ ро́су прело́жшаго Бо́га, по́йте дѣла́ я́ко Го́спода, и превозноси́те во вся́ вѣ́ки.

Святѣ́йшихъ и Животворя́щихъ Та́инъ возжелѣ́вшу тебѣ́, прехва́льне, пріобщи́тися при исхо́дѣ, принесе́ни бы́ша во я́блоцѣ, и́хже прія́въ, воспари́лъ еси́ къ небе́снымъ.

Добро́ту Созда́теля, ю́же зрѣ́лъ еси́ здѣ́, я́ко въ зерца́лѣ и гада́ніи, ны́нѣ, преше́дъ къ вы́шнимъ, яснѣ́йше зри́ши, разрѣ́шшимся тебѣ́ зерца́ломъ, богоблаже́нне.

Тече́нія сла́дкая исцѣле́ній иска́паютъ по́тове твои́ и ско́рби твоя́ — ра́дованіе съ вѣ́рою притека́ющимъ къ моще́мъ твои́мъ во сла́ву Христа́ Бо́га на́шего.

Богоро́диченъ: Святѣ́йшій хра́ме Спа́са на́шего, пресла́вный Его́ престо́ле, превысо́кое не́бо и раю́ слове́сный, отве́рзи на́мъ, Преблагослове́нная Богороди́тельнице, ра́йскія две́ри.

Пѣ́снь 9.

Ирмо́съ: Отъ Бо́га Бо́га Сло́ва, неизрече́нною му́дростію прише́дшаго обнови́ти Ада́ма, я́дію въ тлѣ́ніе па́дшаго лю́тѣ, отъ Святы́я Дѣ́вы неизрече́нно воплоти́вшагося на́съ ра́ди, вѣ́рніи, единому́дренно пѣ́сньми велича́емъ.

Бога́тство некра́домое собра́въ, е́же ни че́рвь, ни тля́ тли́тъ, и, я́коже нѣ́кій корабле́цъ, отплы́въ отъ земли́, приста́нища всепоко́йнаго и блаже́нства вѣ́чнаго дости́глъ еси́.

Го́рнее Ца́рство, Вы́шній гра́дъ, Бо́жій ра́й, пра́ведныхъ наслажде́ніе и свѣ́тъ немерца́ющь обрѣсти́ сподо́бился еси́, идѣ́же на́съ помяни́, воспѣва́ющихъ тя́, всехва́льне.

Съ со́нмомъ пра́ведныхъ и всѣ́хъ святы́хъ лику́я, приснопа́мятне, моли́ всѣ́хъ Созда́теля и Бо́га, да сподо́битъ спаса́емыхъ ча́сти па́мять твою́ пра́зднующихъ.

Богоро́диченъ: Пріими́, Влады́ко, хода́тайство о на́съ Ма́тере Твоея́ и его́же просла́вилъ еси́, Іоа́нна пра́веднаго, и́хже мольба́ми не лиши́ на́съ благи́хъ Твои́хъ, угото́ванныхъ лю́бящимъ Тя́.

Свѣти́ленъ:

Ди́вное узрѣ́вше зна́меніе, ужасо́шася омраче́нніи ага́ряне: свѣ́тъ бо блиста́ше, идѣ́же бѣ́ погребе́нъ Іоа́ннъ, и а́біе возвѣсти́ша сіе́ вѣ́рнымъ, и́же, откопа́вше гро́бъ, съ ра́достію обрѣто́ша нетлѣ́нное, и благоуха́нное, и цѣльбоно́сное пра́веднаго тѣ́ло, Христа́ Бо́га о не́мъ велича́юще. [Два́жды.]

[Сла́ва, и ны́нѣ, пра́здника или́] богоро́диченъ:

Свѣ́тъ благода́ти Рождество́мъ Твои́мъ возсія́, и просвѣти́ всю́ подсо́лнечную, и предста́теля тмы́ погуби́, Богороди́тельнице Пречи́стая, а́нгеловъ похвало́ и человѣ́ковъ всѣ́хъ спасе́ніе, непреста́нными гла́сы Тя́ велича́ющихъ.

На хвали́техъ стихи́ры, гла́съ 8:

О пресла́внаго чудесе́!* Іоа́ннъ, благовѣ́рная о́трасль Россíи* и Це́ркве Христо́вы сы́нъ и́скренній,* съ лю́тыми ага́ряны жи́тельствуя,* въ ско́рбехъ плѣне́нія и въ злострада́ніи,* обрѣ́те, Его́же иска́ше,* ду́шъ на́шихъ Свободи́теля,* Стра́сти и Кре́стъ прія́вшаго* человѣ́ческаго ра́ди свобожде́нія.

О пресла́внаго чудесе́!* Среди́ плотски́хъ рачи́телей пребыва́я,* ве́сь чи́стъ и духо́венъ бя́ше Іоа́ннъ,* имѣ́я ло́же въ ко́нскомъ стоя́лищи,* бога́тство — наготу́ и хла́дъ,* вмѣ́сто же че́сти — поруга́нія и біе́нія,* вся́ претерпѣ́ до́блій, твердѣ́йше Христа́ ра́ди,* не уклони́вша лица́ Своего́ отъ оплева́ній и зауше́ній* человѣ́ческаго ра́ди спасе́нія.

Пріиди́те, вѣ́рніи,* свяще́нную и честну́ю па́мять пра́веднаго Іоа́нна* благоче́стно ны́нѣ восхва́лимъ:* се́й бо, пожи́въ въ плѣну́, а́ки у́зникъ въ темни́цѣ,* по преставле́ніи свое́мъ сподо́бися на небеси́* пресвѣ́тлаго осія́нія пра́ведныхъ,* его́же получи́ти мо́лится* воспѣва́ющимъ любо́вію свѣ́тлыя того́ по́двиги.

Боже́ственная благода́ть Ду́ха,* живу́щая въ тебѣ́, всече́стне,* ди́вна показа́ тебе́ въ нетлѣ́ніи твои́хъ честны́хъ моще́й,* въ чудесѣ́хъ отъ тѣ́хъ и исцѣле́ніихъ,* и́хже любо́вію лобыза́юще,* сла́вимъ о тебѣ́ Христа́ Бо́га,* ди́внаго во святы́хъ Свои́хъ,* къ Нему́же бу́ди те́плый хода́тай* о воспѣва́ющихъ свѣ́тлыя твоя́ по́двиги.

Сла́ва, гла́съ 6:

Кто́ не восхва́литъ тя́, и́стинно достохва́льнаго, Іоа́нне пра́ведне? Кто́ не удиви́тся боголюби́вому твоему́ нра́ву? Егда́ бо лю́тый господи́нъ тво́й узрѣ́ въ дому́ свое́мъ тебе́ ра́ди изоби́ліе во все́мъ и даде́ тебѣ́ осла́бу, ты́, снѣда́емь огне́мъ любве́ ко Го́споду, пріумно́жилъ еси́ труды́ по́стническія, тѣ́мже свя́та яви́ тебе́ и просла́ви Пресвята́я Тро́ица, Юже моли́ спасти́ся душа́мъ на́шимъ.

[И ны́нѣ, пра́здника или́ богоро́диченъ:

Богоро́дице, Ты́ еси́ лоза́ и́стинная, возрасти́вшая на́мъ пло́дъ живота́, Тебѣ́ мо́лимся, моли́ся, Влады́чице, со святы́ми апо́столы, поми́ловати ду́ши на́ша.

Славосло́віе вели́кое. Ектеніи́ и отпу́стъ.]



[НА ЛИТУРГІИ,

Блаже́нна отъ кано́на свята́го, пѣ́снь 3-я и 6-я. [Зри́:] Аще ли прилучи́тся вну́трь Пятьдеся́тницы: блаже́нна пра́здника, пѣ́снь рядова́я и свята́го пѣ́снь 6-я, на 4. Проки́менъ, гласъ 7: Возвесели́тся пра́ведникъ о Го́сподѣ* и упова́етъ на Него́. Сти́хъ: Услы́ши, Бо́же, гла́съ мо́й, внегда́ моли́тимися къ Тебѣ́. Апо́столъ ко Ефесе́емъ, зача́ло 233. Аллилуія, гласъ 4: Пра́ведникъ я́ко фи́никсъ процвѣте́тъ, я́ко ке́дръ, и́же въ Лива́нѣ, умно́жится. Сти́хъ: Насажде́ни въ дому́ Госпо́дни во дво́рѣхъ до́му Бо́га на́шего процвѣту́тъ. Ева́нгеліе Луки́, зача́ло 24. Прича́стенъ: Въ па́мять вѣ́чную бу́детъ пра́ведникъ, отъ слу́ха зла́ не убои́тся.]

Примѣчаніе:
[1] Данная аѳонская служба святому Іоанну Русскому публикуется впервые, по рукописи Русскаго Пантелеимонова монастыря на Святой Горѣ начала XX вѣка.

Источникъ: Служба святому праведному Іоанну Русскому, Исповѣднику, егоже память совершаемъ Маія въ 27-й день. // «Журналъ Московской Патріархіи». — М., 1983. — № 7. — С. 35-39.

/ Къ оглавленію раздѣла /


Наверхъ / Къ титульной страницѣ

0