Мѣ́сяца Ма́ія въ 27-й де́нь.
Слу́жба преподо́бному отцу́ на́шему Ни́лу, и́же на е́зерѣ Селиге́рѣ, на о́стровѣ, зово́момъ Столобно́е, но́вому чудотво́рцу.

НА МАЛѢЙ ВЕЧЕРНИ,
На Го́споди воззва́хъ: стихи́ры, гла́съ 1. Подо́бенъ: Небе́сныхъ чино́въ.

Наста́, богоно́се,* со́лнца свѣтлѣ́йшій тво́й пра́здникъ,* озаря́етъ приходя́щія къ тебѣ́ вѣ́рою,* и безсме́ртіемъ облагоуха́етъ,* и душа́мъ источа́етъ исцѣле́ніе, Ни́ле преподо́бне,* моли́твенниче о душа́хъ на́шихъ. [Два́жды.]

Чу́вственныя стра́сти тѣле́сныя* укроти́въ воздержа́нія брозда́ми, чудодѣ́йственниче Ни́ле,* и, ре́вность безпло́тныхъ во пло́ти показа́въ,* вся́ плотска́я жела́нія ду́хови повину́лъ еси́.* Тѣ́мъ ны́нѣ въ небе́сныхъ селе́ніихъ водворя́яся,* моли́ о душа́хъ на́шихъ.

Блаже́нне Ни́ле,* основа́ніе положи́въ добродѣ́телей* и ве́тхаго человѣ́ка совле́кся съ похотьми́,* во Христа́ обле́клся еси́ вои́стинну.* Тѣ́мъ и побѣди́лъ еси́, преподо́бне,* мно́гая враго́въ ополче́нія,* наста́вникъ мона́хомъ бы́въ,* моли́ спасти́ся душа́мъ на́шимъ.

Сла́ва, гла́съ 8:

Преподо́бне и богоно́се о́тче на́шъ Ни́ле, ты́ усе́рдно въ пусты́ни подвиза́лся еси́, любве́ ра́ди Го́спода своего́ и воздая́нія ра́ди, е́же со всѣ́ми святы́ми бу́дущихъ Его́ бла́гъ, и житіе́мъ свои́мъ по́стническимъ, я́ко а́нгелъ на земли́, человѣ́ки удиви́лъ еси́, бѣ́сы же и всю́ си́лу и́хъ устраши́лъ еси́, и востаю́щія на тя́ злотво́рцы, неми́лостивыя разбо́йники по́мощію Бо́жіею посрами́лъ еси́. И ны́нѣ, преподо́бне, уго́дниче Христо́въ, о́тче на́шъ Ни́ле, моли́ о на́съ всеми́лостиваго Бо́га пода́ти ми́ръ мíрови и душа́мъ на́шимъ ве́лію ми́лость.

И ны́нѣ, богоро́диченъ:

Арха́нгела Гавріи́ла гла́съ воспріи́мше, рце́мъ: ра́дуйся, Ма́ти Бо́жия, Яже Жизнода́вца Христа́ мíру ро́ждши.

На стихо́внѣ стихи́ры, гла́съ 2. Подо́бенъ: До́ме Евфра́ѳовъ.

До́мъ и селе́ніе* Отцу́ Безнача́льному бы́лъ еси́,* преподо́бне Ни́ле, о́тче на́шъ,* Того́ моли́ пода́ти ми́ръ Це́ркви Его́* и душа́мъ на́шимъ ве́лію ми́лость.

Сти́хъ: Честна́ предъ Го́сподемъ* сме́рть преподо́бныхъ Его́.

До́мъ и оби́тель* Безнача́льнаго Отца́* Единоро́дному Сы́ну бы́лъ еси́,* преподо́бне Ни́ле, о́тче на́шъ.* Того́ моли́ поми́ловати Импера́тора на́шего [и́мярекъ],* и душа́мъ на́шимъ пода́ти ве́лію ми́лость.

Сти́хъ: Блаже́нъ му́жъ, боя́йся Го́спода,* въ за́повѣдехъ Его́ восхо́щетъ зѣло́.

До́мъ и жили́ще* Ду́ху Пресвято́му бы́лъ еси́,* преподо́бне Ни́ле, о́тче на́шъ.* Того́ моли́ пода́ти ми́ръ всему́ Правосла́вію* и душа́мъ на́шимъ ве́лію ми́лость.

Сла́ва, подо́бенъ то́йже:

До́мъ и пребыва́ніе* Пресвятѣ́й и Безнача́льнѣй Тро́ицѣ бы́лъ еси́,* преподо́бне Ни́ле, о́тче на́шъ.* Юже моли́ ми́ръ оби́тели твое́й пода́ти* и душа́мъ на́шимъ ве́лію ми́лость.

И ны́нѣ, богоро́диченъ. Подо́бенъ то́йже:

До́мъ и хра́мъ прекра́сенъ* воздви́женъ во оби́тели твое́й, преподо́бне,* въ похвалу́ и сла́ву Пресвятѣ́й Богоро́дицѣ Марíи.* Юже моли́, преподо́бне о́тче на́шъ Ни́ле,* пода́ти душа́мъ на́шимъ ве́лію ми́лость.

Тропа́рь, гла́съ 4:

Яко свѣти́льникъ всесвѣ́телъ, яви́лся еси́ во о́стровѣ Селиге́ра е́зера, преподо́бне о́тче Ни́ле, ты́ бо, кре́стъ Христо́въ отъ ю́ности своея́ на ра́мо взе́мъ, усе́рдно Тому́ послѣ́довалъ еси́, чистото́ю Бо́гови прибли́жився, отону́дуже и чуде́съ дарова́ніемъ обогати́лся еси́. Тѣ́мъ и мы́, притека́юще къ ра́цѣ моще́й твои́хъ, уми́льно глаго́лемъ: о́тче преподо́бне, моли́ Христа́ Бо́га спасти́ся душа́мъ на́шимъ.

Сла́ва, и ны́нѣ, богоро́диченъ:

Еже отъ вѣ́ка утае́нное, и а́нгеломъ несвѣ́домое та́инство: Тобо́ю, Богоро́дице, су́щимъ на земли́ яви́ся, Бо́гъ въ несли́тномъ соедине́ніи воплоща́емь, и кре́стъ во́лею на́съ ра́ди воспріи́мъ, и́мже воскреси́въ первозда́ннаго, спасе́ отъ сме́рти ду́ши на́ша.

НА ВЕЛИЦѢЙ ВЕЧЕРНИ,
Блаже́нъ му́жъ.., 1-й антифо́нъ. [На Го́споди воззва́хъ:] стихи́ры на 8, гла́съ 4. Подо́бенъ: Яко до́бля.

Въ пусты́ню дости́глъ еси́,* преблаги́мъ Бо́гомъ наставля́емь,* преподо́бне о́тче Ни́ле,* я́ко дре́во, при вода́хъ насажде́нъ,* де́нь и но́щь поуча́яся въ зако́нѣ Госпо́дни,* плоды́ воздержа́нія прине́слъ еси́ Всесвятѣ́й Тро́ицѣ,* Юже, преподо́бне, моли́* вѣ́рою притека́ющимъ къ ра́цѣ моще́й твои́хъ* благода́ть исцѣле́нія дарова́ти,* и спасти́, и просвѣти́ти ду́ши на́ша. [Три́жды.]

Въ пусты́ню всели́вся,* преблаги́мъ Христо́мъ Бо́гомъ наставля́емь,* преподо́бне о́тче Ни́ле,* въ не́йже, я́ко дре́во при вода́хъ, насади́вся* и въ зако́нѣ Госпо́дни поучи́вся де́нь и но́щь,* плоды́ духо́вныя прине́слъ еси́ Христу́ Бо́гу.* Его́же моли́ о притека́ющихъ съ вѣ́рою къ ра́цѣ моще́й твои́хъ* благода́ть исцѣле́ній дарова́ти,* и спасти́, и просвѣти́ти ду́ши на́ша. [Три́жды.]

Въ пусты́ню водвори́лся еси́* благода́тію Христа́ Бо́га,* преблаже́нне о́тче Ни́ле,* въ не́йже, я́ко лоза́ благопло́дная,* при вода́хъ насажде́нъ еси́,* плоды́ Христу́ Бо́гу принося́* и къ жи́зни вѣ́чнѣй* наставля́я вѣ́рою пра́зднующихъ честну́ю па́мять твою́,* моли́ Христа́ Бо́га* отъ тли́ и бѣ́дъ изба́витися на́мъ,* и спасти́, и просвѣти́ти ду́ши на́ша. [Два́жды.]

Сла́ва, гла́съ 8:

Преподо́бне о́тче Ни́ле, ты́ въ зако́нѣ Госпо́дни де́нь и но́щь поучи́вся, досто́инъ бы́въ дре́ва живо́тнаго вѣ́твь бы́ти, и пло́дъ тво́й страда́ньми и вѣнцы́ процвѣте́, дерзнове́ніе имѣ́я къ Подвигополо́жнику Христу́ Бо́гу, проси́ и на́мъ очище́нія грѣхо́въ и ве́лія ми́лости.

И ны́нѣ, богоро́диченъ:

Ца́рь Небе́сный за человѣколю́біе на земли́ яви́ся и съ человѣ́ки поживе́, от Дѣ́вы бо Чи́стыя пло́ть пріе́мый и изъ Нея́ проше́дый съ воспрія́тіемъ, еди́нъ е́сть Сы́нъ, сугу́бъ естество́мъ, но не ѵпоста́сію. Тѣ́мже, соверше́нна Того́ Бо́га и соверше́нна Человѣ́ка вои́стинну проповѣ́дающе, исповѣ́дуемъ Христа́ Бо́га на́шего: Его́же моли́, Ма́ти Безневѣ́стная, поми́ловатися душа́мъ на́шимъ.

Вхо́дъ, проки́менъ дне́ и чте́нія три́.

Прему́дрости Соломо́новы чте́ніе.

Пра́ведныхъ ду́ши въ руцѣ́ Бо́жіей, и не прико́снется и́хъ му́ка. Непщева́ни бы́ша во очесѣ́хъ безу́мныхъ умре́ти, и вмѣни́ся озлобле́ніе исхо́дъ и́хъ, и е́же отъ на́съ ше́ствіе — сокруше́ніе, они́ же су́ть въ ми́рѣ. Ибо предъ лице́мъ человѣ́ческимъ, а́ще и му́ку пріи́мутъ, упова́ніе и́хъ безсме́ртія испо́лнено. И вма́лѣ нака́зани бы́вше, вели́кими благодѣ́тельствовани бу́дутъ, я́ко Бо́гъ искуси́ я́ и обрѣ́те и́хъ досто́йны Себѣ́. Я́ко зла́то въ горни́лѣ, искуси́ и́хъ и, я́ко всепло́діе же́ртвенное, прія́тъ я́. И во вре́мя посѣще́нія и́хъ, возсія́ютъ, и я́ко и́скры по сте́блію, потеку́тъ. Су́дятъ язы́комъ и облада́ютъ людьми́, и воцари́тся Госпо́дь въ ни́хъ во вѣ́ки. Надѣ́ющіися На́нь разумѣ́ютъ и́стину и вѣ́рніи въ любви́ пребу́дутъ Ему́, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.

Прему́дрости Соломо́новы чте́ніе.

Пра́ведницы во вѣ́ки живу́тъ, и въ Го́сподѣ мзда́ и́хъ, и попече́ніе и́хъ у Вы́шняго. Сего́ ра́ди пріи́мутъ ца́рствіе благолѣ́пія и вѣне́цъ добро́ты отъ руки́ Госпо́дни, зане́ десни́цею покры́етъ я́ и мы́шцею защити́тъ и́хъ. Пріи́метъ всеору́жіе — рве́ніе свое́ и вооружи́тъ тва́рь въ ме́сть враго́мъ. Облече́тся въ броня́ пра́вды и возложи́тъ шле́мъ — су́дъ нелицемѣ́ренъ. Пріи́метъ щи́тъ непобѣди́мый — преподо́біе, поостри́тъ же напра́сный гнѣ́въ — во ору́жіе, спобо́ретъ же съ ни́мъ мíръ на безу́мныя. По́йдутъ праволу́чныя стрѣ́лы мо́лніины и, я́ко отъ благокру́гла лу́ка облако́въ, на намѣ́реніе полетя́тъ, и отъ каменоме́тныя я́рости испо́лнь паду́тъ гра́ды. Вознегоду́етъ на ни́хъ вода́ морска́я, рѣ́ки же потопя́тъ я́ на́гло. Сопроти́въ ста́нетъ и́мъ ду́хъ си́лы и, я́ко ви́хоръ, развѣ́етъ и́хъ, и опустоши́тъ всю́ зе́млю беззако́ніе, и злодѣ́йство преврати́тъ престо́лы си́льныхъ. Слы́шите у́бо, ца́ріе, и разумѣ́йте, навы́кните, судіи́ конце́въ земли́. Внуши́те держа́щіи мно́жества и гордя́щіися о наро́дѣхъ язы́ковъ, я́ко дана́ е́сть отъ Го́спода держа́ва ва́мъ и си́ла отъ Вы́шняго.

Прему́дрости Соломо́новы чте́ніе.

Пра́ведникъ, а́ще пости́гнетъ сконча́тися, въ поко́и бу́детъ. Ста́рость бо честна́ не многолѣ́тна, ниже́ въ числѣ́ лѣ́тъ исчита́ется. Сѣди́на же е́сть му́дрость человѣ́комъ, и во́зрастъ ста́рости — житіе́ нескве́рное. Благоуго́денъ Бо́гови бы́въ, возлю́бленъ бы́сть, и живы́й посредѣ́ грѣ́шникъ, преста́вленъ бы́сть. Восхище́нъ бы́сть, да не зло́ба измѣни́тъ ра́зума его́ или́ ле́сть прельсти́тъ ду́шу его́. Раче́ніе бо зло́бы помрача́етъ до́брая и паре́ніе по́хоти, премѣня́етъ у́мъ незло́бивъ. Сконча́вся вма́лѣ, испо́лни лѣ́та до́лга, уго́дна бо бѣ́ Го́сподеви душа́ его́, сего́ ра́ди потща́ся отъ среды́ лука́вствія. Лю́діе же ви́дѣвше и не разумѣ́вше, ниже́ поло́жше въ помышле́ніи таково́е, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.

На литíи стихи́ры, гла́съ 8:

Ра́дуйся, свѣти́льниче пресвѣ́тлый, преподо́бне и богоно́се о́тче на́шъ Ни́ле, ты́ на земли́, я́ко безпло́тенъ, пожи́лъ еси́, посто́мъ и моли́твою Бо́га себѣ́ ми́лостива сотвори́лъ еси́ и да́ръ отъ Него́ прозрѣ́нія и проро́чества прія́лъ еси́, и по преставле́ніи чудеса́ отъ святы́хъ моще́й твои́хъ, я́ко отъ исто́чника, преизоби́льно источа́ются, и съ вѣ́рою приходя́щіи, разли́чными неду́ги одержи́міи, исцѣлѣва́ются. И ны́нѣ, преподо́бне о́тче на́шъ Ни́ле, моли́ о на́съ Христа́ Бо́га пода́ти ми́ръ мíрови и душа́мъ на́шимъ ве́лію ми́лость.

Ра́дуйся, Россíйскія земли́ свѣти́ло незаходи́мое, преподо́бне о́тче на́шъ Ни́ле, ты́ въ пусты́ни трина́десять лѣ́тъ Го́спода ра́ди своего́ терпѣли́во подвиза́лся еси́, и плотскíя стра́сти воздержа́ніемъ свои́мъ умертви́лъ еси́, и въ не́й, мно́го пострада́въ отъ нача́льника зло́бы, губи́теля врага́, съ ни́мъ му́жественно бра́лся еси́, и по́мощію Бо́жіею, и свое́ю къ Бо́гу те́плою вѣ́рою все́ его́ злоко́знство, я́ко паучи́ну, до конца́ расто́ргнулъ еси́, и посрами́лъ еси́ всеси́льною по́мощію Пречи́стыя Богоро́дицы прише́дшія на тя́ злы́я разбо́йники. И ны́нѣ, преподо́бне о́тче на́шъ Ни́ле, не преста́й о на́съ моля́ Христа́ Бо́га дарова́ти ми́ръ мíру и душа́мъ на́шимъ ве́лію ми́лость.

Ра́дуйся, преподо́бне о́тче на́шъ Ни́ле, ты́ на о́стровъ Столобно́е, я́ко на о́блакъ, ра́дуяся, возше́лъ еси́ и на не́мъ моли́твою и посто́мъ, чистото́ю и благоговѣ́ніемъ, смире́ніемъ и беззло́біемъ и всѣ́ми добродѣ́тельми, я́ко а́нгелъ, подвиза́лся еси́ во вре́меннѣй се́й жи́зни: два́десять бо и се́дмь лѣ́тъ препроводи́лъ еси́, соверша́я за́повѣди Госпо́дни и устроя́я себѣ́ на небесѣ́хъ пала́ты нерукотворе́нны и вѣ́чны, о ни́хже рече́но бы́сть: и́хже о́ко не ви́дѣ, и у́хо не слы́ша, и на се́рдце человѣ́ку не взыдо́ша, я́же угото́ва Бо́гъ лю́бящимъ Его́; а́може и пресели́лся еси́ къ вѣ́чнымъ оби́телемъ о́нѣмъ, и прія́тъ тя́ Госпо́дь съ пра́ведными, и́хже житію́ послѣ́довалъ еси́. Ра́ка же и святы́я мо́щи твоя́, я́ко мо́ре, съ вѣ́рою приходя́щимъ неоску́дно исцѣле́нія излива́ютъ, и мно́зи мно́гія и разли́чныя цѣльбы́ пріе́млютъ: слѣпíи прозира́ютъ, глусíи слы́шатъ, слукíя исправля́ются, прокаже́нніи очища́ются, нѣмíи благоглаго́ливи быва́ютъ, бѣ́си же отъ человѣ́къ моли́твами твои́ми отбѣга́ютъ. И ны́нѣ, преподо́бне о́тче на́шъ Ни́ле, не преста́й моля́ся Христу́ Бо́гу о ста́дѣ и о оби́тели свое́й и душа́мъ на́шимъ пода́ти ми́ръ и ве́лію ми́лость.

Сла́ва, гла́съ 8:

Что́ ти принесе́мъ, преподо́бне, я́ко неоску́дно излива́еши тре́бующимъ благода́ть? и́бо тѣ́ло твое́, о́тче, чистоты́ жили́ще показа́ся. Тѣ́мъ и, посѣще́ніемъ Свята́го Ду́ха озари́вшеся, нетлѣ́нно въ на́ше благослове́ніе соблюда́ется, благода́тныхъ лу́чь сія́ній испо́лнено, и́хже бѣ́сове не терпя́тъ зрѣ́ти, дале́че отбѣга́ютъ, да́нныя ти́ благода́ти трепе́щутъ, и́хже отъ ду́шъ на́шихъ и тѣле́съ отжени́, мо́лимся, и ненавѣ́тны на́съ при́сно соблюди́ отъ тѣ́хъ ла́янія твои́ми моли́твами.

И ны́нѣ, богоро́диченъ:

Ра́дуйся, вселе́нныя похвало́; ра́дуйся, хра́ме Госпо́день; ра́дуйся, горо́ пріосѣне́нная; ра́дуйся, всѣ́хъ прибѣ́жище; ра́дуйся, свѣ́щниче златы́й; ра́дуйся, сла́во правосла́вныхъ честна́я; ра́дуйся, Марíе, Ма́ти Христа́ Бо́га; ра́дуйся, раю́; ра́дуйся, Боже́ственная трапе́зо; ра́дуйся, сѣ́не; ра́дуйся, ру́чко всезлата́я; ра́дуйся, всѣ́хъ упова́ніе.

На стихо́внѣ стихи́ры, гла́съ 8. Подо́бенъ: О, пресла́внаго чудесе́!

Преподо́бне и богоно́се о́тче на́шъ Ни́ле,* ты́ отъ ю́ности отве́рглся еси́ мíра и сро́дникъ свои́хъ* и прія́лъ еси́ о́бразъ а́нгельскій и́ноческаго житія́* во оби́тели свята́го апо́стола и евангели́ста Іоа́нна Богосло́ва* и преподо́бнаго отца́ на́шего Са́ввы, и́же въ Кри́пцахъ,* и въ не́й подвиза́вся смире́ніемъ и послуша́ніемъ,* я́ко до́брый во́инъ Христо́въ.* Того́ о на́съ моли́, преподо́бне, со святы́ми си́ми* пода́ти грѣхо́въ оставле́ніе* и душа́мъ на́шимъ ве́лію ми́лость.

Сти́хъ: Честна́ предъ Го́сподемъ* сме́рть преподо́бныхъ Его́.

Преподо́бне и равноа́нгельне о́тче на́шъ Ни́ле,* ты́, отъ ю́ности Христа́ возлюби́въ,* и ле́гкое и́го Его́ на ся́ воспрія́лъ еси́,* и невозвра́тнымъ по́мысломъ послѣ́довалъ еси́ стопа́мъ Влады́ки своего́,* и прія́лъ еси́ отъ Него́ трудо́мъ свои́мъ воздая́нія,* е́же съ Ни́мъ пребыва́ніе, и со а́нгелы ликова́ніе,* и со всѣ́ми святы́ми ра́дованіе;* Того́ моли́ о на́съ, преподо́бне,* пода́ти грѣхо́въ проще́ніе* и душа́мъ на́шимъ ве́лію ми́лость.

Сти́хъ: Блаже́нъ му́жъ, боя́йся Го́спода,* въ за́повѣдехъ Его́ восхо́щетъ зѣло́.

Преподо́бне и богому́дре о́тче на́шъ Ни́ле,* ты́ Христа́ ра́ди отъ ю́ности въ пусты́ню всели́лся еси́,* и въ не́й, я́ко безпло́тенъ, на стра́сти плотскíя подвиза́лся еси́* посто́мъ, и моли́твою, и святы́мъ смире́ніемъ,* и нача́льника зло́бы, врага́,* съ кова́рствы его́ до конца́ низложи́лъ еси́,* и ны́нѣ, преподо́бне, предстоя́ у престо́ла всѣ́хъ Царя́,* моли́ся о почита́ющихъ свяще́нную и многора́достную па́мять твою́* пода́ти грѣхо́въ оставле́ніе* и душа́мъ на́шимъ ве́лію ми́лость.

Сла́ва, гла́съ то́йже:

Мона́ховъ мно́жества, наста́вника тя́ почита́емъ, о́тче на́шъ Ни́ле: твое́ю бо стезе́ю пра́во вои́стинну ходи́ти позна́хомъ. Блаже́нъ еси́, Христу́ рабо́тавъ, и вра́жію обличи́лъ еси́ си́лу, а́нгеловъ собесѣ́дниче, преподо́бныхъ соприча́стниче и пра́ведныхъ; съ ни́миже моли́ся Го́сподеви поми́ловатися душа́мъ на́шимъ.

И ны́нѣ, богоро́диченъ:

Безневѣ́стная Дѣ́во, Яже Бо́га неизрече́нно заче́нши пло́тію, Ма́ти Бо́га Вы́шняго, Твои́хъ рабо́въ мольбы́ пріими́, Всенепоро́чная, всѣ́мъ подаю́щи очище́ніе прегрѣше́ній, ны́нѣ на́ша моле́нія пріе́млющи, моли́ спасти́ся всѣ́мъ на́мъ.

На благослове́ніи хлѣ́бовъ: Тропа́рь свята́го, два́жды [пи́санъ на ма́лѣй вече́рни] и Богоро́дице Дѣ́во.., еди́ножды.

НА УТРЕНИ,
На Бо́гъ Госпо́дь: Тропа́рь преподо́бному, два́жды. Сла́ва, и ны́нѣ, богоро́диченъ.

По 1-мъ стихосло́віи, сѣда́ленъ, гла́съ 4. Подо́бенъ: Ско́ро предвари́.

Зва́нію Го́спода своего́ послѣ́довалъ еси́, мíръ оста́вивъ, и вся́, я́же въ мíрѣ, красова́нія, преблаже́нне Ни́ле, претерпѣ́лъ еси́ усе́рдно пусты́нное озлобле́ніе, полки́ же бѣсо́вскія побѣди́лъ еси́ му́жески; тѣ́мже па́мять твою́ при́сно восхваля́емъ пѣ́сньми вѣ́рно. [Два́жды.]

Сла́ва, и ны́нѣ, богоро́диченъ:

Обнови́ла еси́, Чи́стая, Боже́ственнымъ Рождество́мъ Твои́мъ истлѣ́вшее страстьми́ земноро́дныхъ существо́ и возста́вила еси́ отъ сме́рти къ жи́зни нетлѣ́нія. Тѣ́мже Тя́ по до́лгу блажи́мъ вси́, Дѣ́во Препросла́вленная, я́коже прорекла́ еси́.

По 2-мъ стихосло́віи, сѣда́ленъ, гла́съ 5. Подо́бенъ: Собезнача́льное Сло́во.

По́стника Госпо́дня пѣ́сньми почти́мъ, я́ко умертви́вша вся́ прило́ги страсте́й воздержа́ніемъ тве́рдымъ и крѣ́пкимъ терпѣ́ніемъ вои́стинну, и посрами́вша зѣло́ сопроти́внаго всю́ горды́ню, и ны́нѣ моля́щася Го́сподеви поми́ловатися душа́мъ на́шимъ. [Два́жды.]

Сла́ва, и ны́нѣ, богоро́диченъ:

Стра́шно чу́до зача́тія и несказа́ненъ о́бразъ Рождества́ въ Тебѣ́ позна́ся, Чи́стая Приснодѣ́во, ужаса́етъ ми́ у́мъ и удивля́етъ помышле́нія; сла́ва Твоя́, Богоро́дице, всѣ́мъ простре́ся на спасе́ніе ду́шъ на́шихъ.

По поліеле́и сѣда́ленъ, гла́съ 1. Подо́бенъ: Гро́бъ Тво́й, Спа́се.

Погре́блъ еси́ страсте́й все́ воста́ніе умерщвле́ніемъ пло́ти, свяще́нный о́тче, жи́знь безконе́чную по сме́рти прія́лъ еси́; тѣ́мже дне́сь Христо́ва Це́рковь пра́зднуетъ твою́ досточу́дную па́мять, преподо́бнымъ украше́ніе. [Два́жды.]

Сла́ва, и ны́нѣ, богоро́диченъ:

Наста́ви на́съ на пу́ть покая́нія, уклоня́ющихся при́сно къ безпу́тіямъ зо́лъ и Преблага́го Бо́га прогнѣ́вающихъ, Неискусобра́чная Благослове́нная Марíе, прибѣ́жище отча́янныхъ человѣ́ковъ, Бо́жіе селе́ніе.

Степе́нна, 1-й антифо́нъ 4-го гла́са. Проки́менъ, гла́съ 4: Честна́ предъ Го́сподемъ* [сме́рть преподо́бныхъ Его́.] Сти́хъ: Что́ возда́мъ Го́сподеви о всѣ́хъ, [я́же воздаде́ ми?] Вся́кое дыха́ніе... Ева́нгеліе отъ Матѳе́я, зача́ло 43.

По 50-мъ псалмѣ́, стихи́ра, гла́съ 8:

Преподо́бне о́тче Ни́ле, мíра красоты́ и пи́щи сла́достныя возненави́дѣвъ, и́ноческое житіе́ па́че возлюби́лъ еси́ и, а́нгеломъ собесѣ́дникъ бы́въ, свѣти́льникъ многосвѣ́тлый яви́лся еси́ чудесми́, я́ко со́лнце, сія́я. Тѣ́мъ всѣ́хъ на́съ помина́й, соверша́ющихъ свяще́нную па́мять твою́: мы́ бо ча́да твоя́ и о́вцы слове́сныхъ ти́ уче́ній и тя́ на по́мощь призыва́емъ, прося́ще тобо́ю прія́ти ми́ръ и ве́лію ми́лость.

Кано́нъ Богоро́дицы, со ирмосо́мъ на 6, и свято́му еди́нъ кано́нъ, на 8, гла́съ 4.

Пѣ́снь 1.

Ирмо́съ: Отве́рзу уста́ моя́, и напо́лнятся Ду́ха, и сло́во отры́гну Цари́цѣ Ма́тери, и явлю́ся, свѣ́тло торжеству́я, и воспою́, ра́дуяся, Тоя́ чудеса́.

Смири́лся еси́ Христа́ ра́ди, о́тче Ни́ле, и, кре́стъ взе́мъ, оте́чества и сро́дникъ бѣ́галъ еси́; отню́дуже въ пусты́ню вше́дъ и въ не́й трудолю́бно подвиза́лся еси́, преподо́бне.

Отъ ю́ности своея́, о́тче Ни́ле, у́мъ къ Бо́гу впери́въ, и тлѣ́нными нетлѣ́нная, я́ко до́брый купе́цъ, искупи́лъ еси́, тѣ́мже, ны́нѣ соше́дшеся, па́мять твою́ почита́емъ.

Христо́вымъ раче́ніемъ, о́тче Ни́ле, па́че огня́ распала́емь, настоя́щая, я́ко ничто́же су́щи, презрѣ́лъ еси́, и того́ ра́ди въ поко́ище всели́ся, идѣ́же пра́ведныхъ ду́ши веселя́тся.

Богоро́диченъ: Боля́ща исцѣли́ душе́ю же и тѣ́ломъ, Влады́чице, раба́ Твоего́ блаже́ннаго Ни́ла моле́ніемъ: Тебе́ бо Предста́тельницу вси́ су́щіи въ печа́лехъ стяжа́хомъ, я́ко ро́ждшую Спасе́ніе на́ше.

Катава́сія по уста́ву.

Пѣ́снь 3.

Ирмо́съ: Твоя́ пѣсносло́вцы, Богоро́дице, живы́й и незави́стный Исто́чниче, ли́къ Себѣ́ совоку́пльшія, духо́вно утверди́, въ боже́ственнѣй Твое́й сла́вѣ, вѣнце́въ сла́вы сподо́би.

Сна́ твои́мъ очесе́мъ не да́лъ еси́, блаже́нне Ни́ле, ни вѣ́ждомъ дрема́нія, до́ндеже сподо́бился еси́ пра́ведныхъ селе́нія, я́же угото́ва Бо́гъ лю́бящимъ Его́.

Бо́дренными твои́ми моли́твами, о́тче Ни́ле, и жесто́кимъ воздержа́ніемъ Бо́гу на земли́ до́брѣ угоди́лъ еси́, и сего́ ра́ди бы́въ стра́шенъ враго́мъ и сла́венъ человѣ́комъ.

Ра́йскую жи́знь и та́мо святы́мъ весе́ліе всегда́ во умѣ́ свое́мъ помышля́я, преподо́бне, тѣ́мже во слеза́хъ и въ воздыха́ніи всю́ жи́знь свою́, о́тче Ни́ле, проше́лъ еси́ и сего́ ра́ди по сме́рти отъ Христа́ чудесы́ просла́вися.

Богоро́диченъ: Источа́еши исцѣле́ніемъ струи́ боля́щимъ, Дѣ́во, всю́ду: Тя́ бо исто́чникъ показа́ исцѣле́ній, Влады́чице, Иже ми́лости Госпо́дь, изъ Тебе́ рожде́йся па́че ума́.

Сѣда́ленъ, гла́съ 4. Подо́бенъ: Ско́ро предвари́.

Страстно́е покори́лъ еси́ плотско́е мудрова́ніе и ху́ждшее порабо́тилъ еси́ лу́чшему, о́тче Ни́ле пресла́вне, сокруши́лъ еси́ бѣсо́вскія ко́зни посто́мъ и возсія́лъ еси́ въ мíрѣ, я́ко луча́ со́лнечная, сія́ній твои́хъ добродѣ́телей: сего́ ра́ди тя́ воспѣва́емъ. [Два́жды.]

Сла́ва, и ны́нѣ, богоро́диченъ:

Стѣна́ непобѣди́мая на́мъ, христіа́номъ, еси́, Богоро́дице Дѣ́во, къ Тебѣ́ прибѣга́юще, невреди́ми пребыва́емъ и, па́ки согрѣша́юще, и́мамы Тя́ Моли́твенницу. Тѣ́мъ, благодаря́ще, вопіе́мъ Ти́: ра́дуйся, Благода́тная, Госпо́дь съ Тобо́ю.

Пѣ́снь 4.

Ирмо́съ: Сѣдя́й въ сла́вѣ на Престо́лѣ Божества́ во о́блацѣ ле́гцѣ, прíиде Іису́съ Пребоже́ственный, Нетлѣ́нною Дла́нію и спасе́ зову́щія: сла́ва, Христе́, си́лѣ Твое́й.

Житіе́ свое́, о́тче Ни́ле, чу́дно на земли́ показа́лъ еси́, вели́ко поще́ніе и смире́ніе, и сего́ ра́ди на небесѣ́хъ жи́знь вѣ́чную наслѣ́довалъ еси́; моли́ спасти́ся отъ бѣ́дъ пою́щимъ тя́.

Симео́на вели́каго, на столпѣ́ жи́вшаго, житію́ послѣ́дуя, преподо́бне, тѣ́мже того́, ели́ко мо́щно, именова́ніе отъ житія́ стяжа́лъ еси́, Ни́ле пребога́те.

Посто́мъ и моли́твами тѣ́ло твое́, о́тче Ни́ле, изнури́лъ еси́ и сего́ ра́ди сподо́бился еси́ ви́дѣти неизрече́нная блага́я, я́же святы́мъ угото́вана, съ ни́миже, о́тче Ни́ле, о на́съ моли́ся.

Богоро́диченъ: Покро́въ, и заступле́ніе, и прибѣ́жище бу́ди ми́, Дѣ́во, рабу́ Твоему́, исцѣли́ мя́ отъ безмѣ́рныхъ зо́лъ, воспѣва́ти, Пречи́стая: сла́ва Рождеству́ Твоему́.

Пѣ́снь 5.

Ирмо́съ: Ужасо́шася вся́ческая о Боже́ственнѣй сла́вѣ Твое́й: Ты́ бо, неискусобра́чная Дѣ́во, имѣ́ла еси́ во утро́бѣ надъ всѣ́ми Бо́га, и родила́ еси́ Безлѣ́тнаго Сы́на, всѣ́мъ, воспѣва́ющимъ Тя́, ми́ръ подава́ющая.

Чи́сто житіе́ твое́ отъ ю́ности потща́лся еси́, преподо́бне, сохрани́ти; тѣ́мже, чистоту́ твою́ ви́дѣвъ, Пресвяты́й Ду́хъ въ тя́ всели́ся.

Яко преоби́дѣвъ тлѣ́нная, вѣ́чная, о́тче, сподо́бился еси́ прія́ти по нело́жному словеси́: проси́те и пріи́мете. Тѣ́мже, я́ко проси́лъ, сія́ по досто́инству прія́лъ еси́.

Мѣ́сто освяти́ся, на не́мже честны́я мо́щи твоя́ положи́шася, преподо́бне, и по мно́гимъ страна́мъ прославля́емо е́сть, я́ко въ себѣ́ мо́щи твоя́ иму́щее.

Богоро́диченъ: Не преста́й моля́щи, Его́же родила́ еси́, Богоневѣ́сто, я́ко Спа́са и Влады́ку, разрѣше́ніе ми́ пода́ти скорбе́й и болѣ́зней облегче́ніе, я́ко да пріиму́ проще́ніе, пѣсносло́вя Тя́ во вѣ́ки.

Пѣ́снь 6.

Ирмо́съ: Боже́ственное сіе́ и всечестно́е соверша́юще пра́зднество, богому́дріи, Богома́тере, пріиди́те, рука́ми воспле́щимъ, отъ Нея́ ро́ждшагося Бо́га сла́вимъ.

Твое́ вели́кое житіе́ и чистоту́, къ си́мъ же безмѣ́рное смире́ніе прови́дѣвъ, Пресвяты́й Ду́хъ сла́вна тя́, о́тче, показа́; тѣ́мже, отъ сего́ житія́ ко о́ному преше́дъ, получи́лъ еси́ съ пра́ведными та́мо весе́ліе.

Дне́сь наста́вши, свяще́нная па́мять твоя́, преподо́бне Ни́ле, весели́тъ ученики́ твоя́, воспѣва́ющія любо́вію по́двиги твоя́, и́же, честно́е твое́ успе́ніе сла́вяще, торжеству́ютъ, и́хже моли́твами твои́ми, о́тче, соблюди́.

Разбо́йницы иногда́ пріидо́ша тебе́ оскорби́ти, преподо́бне, но ты́, тѣ́хъ лука́вство разумѣ́въ, Превѣ́чнаго Христа́ Бо́га си́лою и Пречи́стыя Его́ Ма́тере по́мощію си́хъ не́мощны сотвори́лъ еси́, и́же, не могу́ще тебѣ́ проти́витися, стра́хомъ отбѣго́ша, побѣжде́ни па́че бы́вше, не́жели побѣди́ша.

Богоро́диченъ: Твою́ по́мощь да́ждь ми́ и изба́ви мя́ отъ бѣ́дъ, и скорбе́й, и прегрѣше́ній мои́хъ, Яже всѣ́хъ ро́ждши Избавле́ніе.

Конда́къ, гла́съ 8:

Оте́чества, преподо́бне, удали́вся, въ пусты́ню всели́лся еси́, и, на о́стровъ Селиге́ра е́зера возше́дъ, жесто́ко житіе́ показа́лъ еси́, и, мно́гихъ добродѣ́тельми удиви́въ, дарова́нія чуде́съ отъ Христа́ прія́лъ еси́. Помина́й на́съ, чту́щихъ па́мять твою́, да зове́мъ ти́: ра́дуйся, Ни́ле, о́тче на́шъ.

Икосъ:

Возлюби́въ, преподо́бне, Христо́вы боже́ственныя за́повѣди и возненави́дѣвъ мíра сего́ наслажде́ніе, прите́клъ еси́ усе́рдно къ Тому́ и бы́лъ еси́ свѣти́льникъ, просвѣща́яй концы́ блиста́ніемъ духо́внымъ. Тѣ́мъ, припа́дая, молю́ тя: просвѣти́ ми о́чи серде́чныя воспѣ́ти твоя́ по́двиги, поще́ніе, бдѣ́ніе, сле́зы, болѣ́зни, изнуре́ніе тѣ́ла блаже́нныя ра́ди бу́дущія жи́зни, ея́же ны́нѣ наслажда́яся, моли́ непреста́нно о всѣ́хъ на́съ.

Пѣ́снь 7.

Ирмо́съ: Не послужи́ша тва́ри богому́дріи, па́че Созда́вшаго, но, о́гненное преще́ніе му́жески попра́вше, ра́довахуся, пою́ще: препѣ́тый отце́въ Госпо́дь и Бо́гъ, благослове́нъ еси́.

Источа́етъ чудеса́ честна́я ра́ка твоя́, преподо́бне, преизоби́лующи благода́тію, вѣ́рою приходя́щимъ здра́віе да́руетъ, Христу́ отъ души́ вопію́щимъ: благослове́нъ Бо́гъ отце́въ на́шихъ.

Дре́внихъ о́нѣхъ и вели́кихъ отце́въ, въ постѣ́ просія́вшихъ, житію́ подо́бяся, преподо́бне, въ пусты́ню всели́лся еси́ и та́мо въ поще́ніихъ мно́га лѣ́та пребы́лъ еси́, Ни́ле, о́тче на́шъ.

Яко и́стиннаго и кро́ткаго Пастыренача́льника Христа́ незло́бивое овча́, о́тче Ни́ле, бы́лъ еси́. Тѣ́мже незло́бивъ хотя́щимъ тебе́ озло́бити яви́лся еси́, Христу́ вопія́: благослове́нъ Бо́гъ отце́въ на́шихъ.

Богоро́диченъ: Обощре́ны болѣ́зни ра́намъ мои́мъ отъ безмѣ́рныхъ мои́хъ прегрѣше́ній, Влады́чице, веду́тъ въ сме́рть душе́вную и тѣле́сную, но исхи́ти, я́ко си́льна, вся́кихъ скорбе́й и неду́гъ.

Пѣ́снь 8.

Ирмо́съ: Отроки благочести́выя въ пещи́ Рождество́ Богоро́дичо спасло́ е́сть, тогда́ у́бо образу́емое, ны́нѣ же дѣ́йствуемое, вселе́нную всю́ воздвиза́етъ пѣ́ти Тебѣ́: Го́спода по́йте, дѣла́, и превозноси́те Его́ во вся́ вѣ́ки.

Издѣ́тска, преподо́бне о́тче, потща́лся еси́ свою́ со́вѣсть и се́рдце съ душе́ю чи́сто Го́споду предста́вити. Тѣ́мъ и Христо́съ чудесы́, тебе́ прославля́етъ, Тому́ вопію́ща: Го́спода воспѣва́йте, дѣла́, и превозноси́те Его́ во вѣ́ки.

Ны́нѣ пусты́ня весе́ліемъ красу́ется, о́тче, иму́щи мо́щи твоя́ въ себѣ́, Ни́ле преподо́бне, ученицы́ же твои́, твоему́ житію́ ревну́юще, о твое́й па́мяти ра́дующеся, Творцу́ вопію́тъ: Го́спода воспѣва́йте, дѣла́, и превозноси́те Его́ во вѣ́ки.

Въ пусты́ни, преподо́бне, идѣ́же селе́ніе имѣ́лъ еси́, прече́стенъ хра́мъ во сла́ву Богоявле́нія Госпо́дня воздви́глъ еси́, въ не́мже прославля́ется пречи́стое Того́ и́мя, и вси́ вопію́тъ: Го́спода воспѣва́йте, дѣла́, и превозноси́те Его́ во вѣ́ки.

Богоро́диченъ: Свѣти́льникъ Свѣ́та Трисо́лнечнаго су́щи, заре́ю благоутро́бія Твоего́ тму́ отъими́ прегрѣше́ній мои́хъ, Богороди́тельнице, избавле́ніе ну́ждныхъ болѣ́зней подаю́щи, вѣ́рою превознося́щему пречи́стое Твое́ Рождество́.

Пѣ́снь 9.

Ирмо́съ: Вся́къ земноро́дный да взыгра́ется, Ду́хомъ просвѣща́емь, да торжеству́етъ же безпло́тныхъ умо́въ естество́, почита́ющее свяще́нное торжество́ Богома́тере, и да вопіе́тъ: ра́дуйся, Всеблаже́нная Богоро́дице, Чи́стая Приснодѣ́во.

Бога́тство и пи́ща, похвала́ и ра́дость преподо́бнымъ еси́, Христе́ Бо́же, Его́же возлюби́въ, преподо́бный Ни́лъ вся́, я́же въ мíрѣ кра́сная, нивочто́же вмѣни́; тѣ́мже наслажда́ется Твоея́ красоты́ во блаже́нномъ Свѣ́тѣ.

Страстьми́ коле́блющихся и бу́рею грѣхо́вною погружа́емыхъ, я́ко дерзнове́ніе имѣ́яй ко Го́споду, всегда́ сохраня́й, благоче́стно тя́ воспѣва́ющихъ и прославля́ющихъ.

Облиста́въ заре́ю, просія́лъ еси́ духо́вно и яви́лся еси́ вы́шнему ликостоя́нію свѣ́телъ; озари́ ми у́мъ, блаже́нне, Трисія́ннымъ Свѣ́томъ Божества́ и отъ страсте́й мя́ изба́ви моли́твами твои́ми.

Богоро́диченъ: Ты́ еси́ вѣ́рнымъ похвала́, Безневѣ́стная, Ты́ заступле́ніе и свяще́нное прибѣ́жище христіа́номъ: къ Сы́ну бо Своему́ и Бо́гу мольбы́ но́сиши, Всенепоро́чная, и отъ бѣ́дъ спаса́еши вѣ́рою и любо́вію Богоро́дицу Чи́стую Тя́ воспѣва́ющихъ и велича́ющихъ.

Свѣти́ленъ. Подо́бенъ: Не́бо звѣзда́ми.

Посто́мъ тече́ніе твое́ соверши́въ, на небеса́ возше́лъ еси́ и Христу́ Бо́гу предстои́ши. Ни́ле, о́тче преподо́бне, за ны́ моли́ся, те́плѣ пою́щихъ тя́. [Два́жды.]

Сла́ва, и ны́нѣ, богоро́диченъ:

Ра́дость неизрече́нную ро́ждши, Го́спода, ра́дости небе́сныя прича́стниковъ всѣ́хъ на́съ сотвори́, Тебе́ почита́ющихъ, Пречи́стая, и отъ души́ вопію́щихъ Ти́: не забу́ди Твоя́ рабы́, Благослове́нная Марíе.

На хвали́техъ стихи́ры, гла́съ 4. Подо́бенъ: Да́лъ еси́ зна́меніе.

Свѣтлѣ́йши со́лнца просія́* всепра́зднственная па́мять твоя́, преподо́бне,* луча́ми блиста́ющи твои́хъ добродѣ́тельныхъ дѣя́ній* и озаря́ющи вѣ́рныхъ чу́вства* свѣ́томъ чуде́съ твои́хъ;* сію́ у́бо пра́зднующе,* ра́достно тя́ восхваля́емъ и вѣ́рно ублажа́емъ. [Два́жды.]

Якоже а́нгелъ, на земли́ пожи́лъ еси́,* воздержа́ніемъ тѣ́ло твое́ увяди́въ, сла́вне,* бдѣ́ніемъ же и па́мятію сме́ртною* къ верхо́вному богомы́слію возше́лъ еси́.* Тѣ́мъ и прибли́жился еси́ къ Самому́ Краеуго́льному Ка́меню —* Христу́, Бо́гу на́шему.

Стра́сти тѣле́сныя* прилѣ́жнымъ моле́ніемъ къ Бо́гу* и воздержа́ніемъ укроти́лъ еси́,* змíя льсти́ваго сле́зными пото́ки умертви́лъ еси́,* о́тче преподо́бне,* и угоди́лъ еси́ Бо́гу па́че инѣ́хъ, досточу́дне;* тѣ́мъ тя́ украси́ небе́сными дарова́ньми* Іису́съ Человѣколю́бецъ* и Спа́съ ду́шъ на́шихъ.

Сла́ва, гла́съ 5:

Преподо́бне о́тче Ни́ле, гла́съ ева́нгельскій Госпо́день услы́шавъ, мíра оста́вилъ еси́ красоту́, бога́тство и сла́ву нивочто́же вмѣни́лъ еси́, всѣ́мъ вопія́, глаго́ля: возлюби́те Бо́га и обря́щете благода́ть вѣ́чную, и ничто́же предпочти́те, па́че любве́ Его́, да егда́ пріи́детъ во сла́вѣ Свое́й, обря́щете поко́й со всѣ́ми святы́ми, и́хже моли́твами, Христе́, сохрани́ и спаси́ ду́ши на́ша.

И ны́нѣ, богоро́диченъ:

Блажи́мъ Тя́, Богоро́дице Дѣ́во, и сла́вимъ Тя́, вѣ́рніи, по до́лгу, гра́дъ непоколеби́мый, стѣ́ну необори́му, тве́рдую предста́тельницу и прибѣ́жище душа́мъ на́шимъ.

Славосло́віе вели́кое. [Ектеніи́] и отпу́стъ.

НА ЛИТУРГІИ,

Блаже́нна отъ кано́на свята́го, пѣ́снь 3-я и 6-я. Проки́менъ, гла́съ 7: Честна́ предъ Го́сподемъ* сме́рть преподо́бныхъ Его́. Сти́хъ: Что́ возда́мъ Го́сподеви о всѣ́хъ, [я́же воздаде́ ми?] Апо́столъ къ Кори́нѳяномъ, зача́ло 176. Аллилуія, гласъ 6: Блаже́нъ му́жъ, боя́йся Го́спода, [въ за́повѣдехъ Его́ восхо́щетъ зѣло́. Сти́хъ: Си́льно на земли́ бу́детъ сѣ́мя его́.] Ева́нгеліе Луки́, зача́ло 24. Прича́стенъ: Въ па́мять вѣ́чную [бу́детъ пра́ведникъ, отъ слу́ха зла́ не убои́тся.]

Источникъ: Слу́жба преподо́бному отцу́ на́шему Ни́лу, и́же на е́зерѣ Селиге́рѣ, на о́стровѣ, зово́момъ Столобно́е, но́вому чудотво́рцу. Его́же преставле́нія па́мять Деке́мврія въ 7-й де́нь, а обрѣ́тенія моще́й Ма́ія въ 27-й де́нь. — М.: Въ Сѵнода́льной Тѵпогра́фіи, 1762. — 28 л.

/ Къ оглавленію раздѣла /

Наверхъ / Къ титульной страницѣ