Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - пятница, 18 августа 2017 г. Сейчасъ на порталѣ посѣтителей - 19.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Ма́ія въ 26-й де́нь.
Обрѣ́теніе честны́хъ моще́й преподо́бнаго Мака́рія, игу́мена Каля́зинскаго.

НА ВЕЧЕРНИ,
На Го́споди воззва́хъ: стихи́ры, гла́съ 6.

Вседержи́тельною десни́цею укрѣпля́емь,* преподо́бне о́тче на́шъ Мака́ріе,* воздержа́ніемъ пи́щу боже́ственную позна́лъ еси́* и непреста́нною моли́твою и нощны́мъ стоя́ніемъ* боже́ственный наслѣ́дникъ бы́ти сподо́бися.* Сле́зными же пото́ки вся́ бѣсо́вская ополче́нія потопи́лъ еси́,* тѣ́мже и Христо́съ тя́ дарова́ніемъ чуде́съ просла́ви,* Его́же вожделѣ́ и Его́же ра́ди тяготу́ дневну́ю понесе́,* Того́ моли́ спасти́ся душа́мъ на́шимъ.

Пріиди́те, вси́ концы́ земли́,* псалмы́ и пѣ́сньми свяще́нное и честно́е* преподо́бнаго торжество́ Мака́рія дне́сь благоче́стно восхва́лимъ,* а́ще бо и послѣди́ возсія́,* но дре́внихъ че́сти сподо́бися,* и мо́лится Христо́ви* спасти́ся душа́мъ на́шимъ.

Страстна́я взыгра́нія воздержа́ніемъ,* о́тче преподо́бне Мака́ріе, изсуши́лъ еси́* и отъ сего́ до́мъ и жили́ще Ду́ху Пресвято́му показа́ся* и исцѣле́ніе вѣ́рою приходя́щимъ къ тебѣ́ подае́ши,* я́коже вторы́й Илія́, чудесы́ показа́ся:* о́нъ бо въ животѣ́ возду́хи водото́чными чудодѣ́йствоваше,* ты́ же и по сме́рти чудесы́ удивля́еши,* не зерца́ломъ бо и гада́ньми,* но я́снѣ и явле́ннѣ зри́ши Святу́ю Тро́ицу,* Ея́же моли́ спасти́ся душа́мъ на́шимъ.

Сла́ва, гла́съ 8:

Пріиди́те, и́нокъ мно́жества, дне́сь псало́мская пѣ́нія а́ки цвѣ́ты духо́вныя принесе́мъ, я́ко вои́стинну и́ноческому удобре́нію и преподо́бнымъ сожи́телю, хва́ляще, си́це рце́мъ: ра́дуйся, свѣти́льниче многосвѣ́тлый, возводя́ ко Христу́ и́нокъ мно́жества; ра́дуйся, Тве́ри гра́ду похвала́ и удобре́ніе, и всѣ́мъ вѣ́рнымъ благоути́шное приста́нище, и исцѣле́ніе боля́щимъ во грѣсѣ́хъ, на боже́ственное тѣ́хъ возвыша́я раче́ніе, тѣ́мъ пречестну́ю и святу́ю твою́, и а́нгеломъ говѣ́йную обстоя́ще ра́ку, любе́зно облобыза́емъ, преподо́бне о́тче на́шъ Мака́ріе, и боже́ственнаго человѣколю́бія про́симъ получи́ти твои́ми къ Бо́гу моли́твами и мíру смире́ніе дарова́ти и душа́мъ на́шимъ ве́лію ми́лость.

И ны́нѣ, пра́здника или́ богоро́диченъ: Ца́рь Небе́сный...
Вхо́дъ. Проки́менъ дне́. И чте́нія три́ преподо́бническая.

Прему́дрости Соломо́новы чте́ніе.

Пра́ведныхъ ду́ши въ руцѣ́ Бо́жіей, и не прико́снется и́хъ му́ка. Непщева́ни бы́ша во очесѣ́хъ безу́мныхъ умре́ти, и вмѣни́ся озлобле́ніе исхо́дъ и́хъ, и е́же отъ на́съ ше́ствіе — сокруше́ніе, они́ же су́ть въ ми́рѣ. Ибо предъ лице́мъ человѣ́ческимъ, а́ще и му́ку пріи́мутъ, упова́ніе и́хъ безсме́ртія испо́лнено. И вма́лѣ нака́зани бы́вше, вели́кими благодѣ́тельствовани бу́дутъ, я́ко Бо́гъ искуси́ я́ и обрѣ́те и́хъ досто́йны Себѣ́. Я́ко зла́то въ горни́лѣ, искуси́ и́хъ и, я́ко всепло́діе же́ртвенное, прія́тъ я́. И во вре́мя посѣще́нія и́хъ, возсія́ютъ, и я́ко и́скры по сте́блію, потеку́тъ. Су́дятъ язы́комъ и облада́ютъ людьми́, и воцари́тся Госпо́дь въ ни́хъ во вѣ́ки. Надѣ́ющіися На́нь разумѣ́ютъ и́стину и вѣ́рніи въ любви́ пребу́дутъ Ему́, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.

Прему́дрости Соломо́новы чте́ніе.

Пра́ведницы во вѣ́ки живу́тъ, и въ Го́сподѣ мзда́ и́хъ, и попече́ніе и́хъ у Вы́шняго. Сего́ ра́ди пріи́мутъ ца́рствіе благолѣ́пія и вѣне́цъ добро́ты отъ руки́ Госпо́дни, зане́ десни́цею покры́етъ я́ и мы́шцею защити́тъ и́хъ. Пріи́метъ всеору́жіе — рве́ніе свое́ и вооружи́тъ тва́рь въ ме́сть враго́мъ. Облече́тся въ броня́ пра́вды и возложи́тъ шле́мъ — су́дъ нелицемѣ́ренъ. Пріи́метъ щи́тъ непобѣди́мый — преподо́біе, поостри́тъ же напра́сный гнѣ́въ — во ору́жіе, спобо́ретъ же съ ни́мъ мíръ на безу́мныя. По́йдутъ праволу́чныя стрѣ́лы мо́лніины и, я́ко отъ благокру́гла лу́ка облако́въ, на намѣ́реніе полетя́тъ, и отъ каменоме́тныя я́рости испо́лнь паду́тъ гра́ды. Вознегоду́етъ на ни́хъ вода́ морска́я, рѣ́ки же потопя́тъ я́ на́гло. Сопроти́въ ста́нетъ и́мъ ду́хъ си́лы и, я́ко ви́хоръ, развѣ́етъ и́хъ, и опустоши́тъ всю́ зе́млю беззако́ніе, и злодѣ́йство преврати́тъ престо́лы си́льныхъ. Слы́шите у́бо, ца́ріе, и разумѣ́йте, навы́кните, судіи́ конце́въ земли́. Внуши́те держа́щіи мно́жества и гордя́щіися о наро́дѣхъ язы́ковъ, я́ко дана́ е́сть отъ Го́спода держа́ва ва́мъ и си́ла отъ Вы́шняго.

Прему́дрости Соломо́новы чте́ніе.

Пра́ведникъ, а́ще пости́гнетъ сконча́тися, въ поко́и бу́детъ. Ста́рость бо честна́ не многолѣ́тна, ниже́ въ числѣ́ лѣ́тъ исчита́ется. Сѣди́на же е́сть му́дрость человѣ́комъ, и во́зрастъ ста́рости — житіе́ нескве́рное. Благоуго́денъ Бо́гови бы́въ, возлю́бленъ бы́сть, и живы́й посредѣ́ грѣ́шникъ, преста́вленъ бы́сть. Восхище́нъ бы́сть, да не зло́ба измѣни́тъ ра́зума его́ или́ ле́сть прельсти́тъ ду́шу его́. Раче́ніе бо зло́бы помрача́етъ до́брая и паре́ніе по́хоти, премѣня́етъ у́мъ незло́бивъ. Сконча́вся вма́лѣ, испо́лни лѣ́та до́лга, уго́дна бо бѣ́ Го́сподеви душа́ его́, сего́ ра́ди потща́ся отъ среды́ лука́вствія. Лю́діе же ви́дѣвше и не разумѣ́вше, ниже́ поло́жше въ помышле́ніи таково́е, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.

На стихо́внѣ стихи́ры, гла́съ 8. Подо́бенъ: О, пресла́внаго чудесе́!

О, пресла́вное чу́до!* Яко звѣзда́ отъ за́пада,* Мака́ріе, провозсія́лъ еси́* и бы́лъ еси́ пра́вило добродѣ́телей,* мона́ховъ утвержде́ніе,* по́стниковъ удобре́ніе.* Тѣ́мже, соше́дшеся въ па́мять твою́,* Христа́ возвели́чимъ,* прославля́ющего Своя́ уго́дники.

Сти́хъ: Честна́ предъ Го́сподемъ* сме́рть преподо́бныхъ Его́.

О, пресла́вное чу́до!* Въ послѣ́дняя времена́,* я́ко заря́, облиста́лъ еси́, Мака́ріе,* мона́хъ и́стиненъ бы́лъ еси́,* любве́ яви́лся еси́ испо́лненъ* и, я́ко а́нгелъ, на земли́ пожи́лъ еси́,* изобража́я въ себѣ́ добро́ту боже́ственную.* Тѣ́мъ па́мять твою́* почита́емъ, досточу́дне.

Сти́хъ: Блаже́нъ му́жъ, боя́йся Го́спода,* въ за́повѣдехъ Его́ восхо́щетъ зѣло́.

О, пресла́вное чу́до!* Ма́карій ди́вный,* Креста́ си́лою вооружи́вся,* и, я́ко крѣ́пкій во́инъ,* побѣди́ неви́димыхъ враго́въ ополче́нія,* и со а́нгелы ны́нѣ водворя́ется.* Тѣ́мже въ па́мять его́ возопіе́мъ:* того́ моли́твами, Христе́ Бо́же,* спаси́ ду́ши на́ша, я́ко Милосе́рдъ.

Сла́ва, гла́съ 2:

Преподо́бне о́тче, измла́да въ добродѣ́тели прилѣ́жно подвиза́вся, сосу́дъ бы́лъ еси́ Свята́го Ду́ха. Тѣ́мъ и чуде́съ дарова́нія пріе́мъ, человѣ́ки научи́лъ еси́ преоби́дѣти маловре́менныхъ, ны́нѣ же неизрече́ннымъ свѣ́томъ свѣ́тло сія́еши, просвѣти́ на́ша помышле́нія, о́тче преподо́бне Мака́ріе. [1]

И ны́нѣ, пра́здника или́ богоро́диченъ.

Тропа́рь, гла́съ 8:

Плотска́я мудрова́нія, о́тче Мака́ріе, воздержа́ніемъ и бдѣ́ніемъ умертви́лъ еси́, мѣ́сто бо, на не́мже по́ты твоя́ излія́лъ еси́, я́ко труба́, вопіе́тъ къ Бо́гу, повѣ́дающи твоя́ исправле́нія, и по сме́рти честны́я твоя́ мо́щи источа́ютъ исцѣле́нія. Тѣ́мже вопіе́мъ ти́: моли́ Христа́ Бо́га, да спасе́тъ ду́ши на́ша.

Инъ тропа́рь, гласъ 2:

Яко дре́во насажде́но при вода́хъ воздержа́нія, струя́ми сле́зъ твои́хъ напая́емь, преподо́бне о́тче Мака́ріе, сѣ́явъ бо со слеза́ми, въ ра́дости жне́ши добродѣ́тельныя рукоя́ти, тѣ́мъ Вели́кій Мздода́вецъ плоды́ трудо́въ твои́хъ прія́тъ и въ жи́тницахъ небе́сныхъ тя́ сокро́вище положи́, но помина́й чту́щихъ любо́вію пресвѣ́тлую па́мять твою́ и моли́ Святу́ю Тро́ицу, преподо́бне Мака́ріе, спасти́ся душа́мъ на́шимъ.

Инъ тропа́рь, гла́съ 8:

Сле́зъ твои́хъ тече́ньми пусты́ни безпло́дное воздѣ́лалъ еси́, и и́же изъ глубины́ воздыха́ньми во сто́ трудо́въ уплодоноси́лъ еси́, и бы́лъ еси́ свѣти́льникъ вселе́ннѣй, сія́я чудесы́, Мака́ріе о́тче на́шъ, моли́ Христа́ Бо́га спасти́ся душа́мъ на́шимъ.

Сла́ва, и ны́нѣ, пра́здника или́ богоро́диченъ: Иже на́съ ра́ди...



НА УТРЕНИ,
На Бо́гъ Госпо́дь: Тропа́рь пра́здника, два́жды. Сла́ва, преподо́бнаго. И ны́нѣ, пра́здника или́ богоро́диченъ.

По 1-й стихоло́гіи сѣда́ленъ, гла́съ 8:

Заре́ю Боже́ственнаго сія́нія просвѣти́вся, оста́вилъ еси́ мíра житія́ вся́ и воспрія́лъ еси́ со безпло́тными житіе́ невеще́ственно, Ду́ха Боже́ственными благода́тьми усугу́бився, отону́дуже исцѣле́ній да́ръ воспрія́лъ еси́. Тѣ́мъ вопіе́мъ ти́: моли́ Христа́ Бо́га спасти́ся душа́мъ на́шимъ. [Два́жды.]

Сла́ва, и ны́нѣ, пра́здника или́ богоро́диченъ:

Небе́сное благоче́стіе си́ламъ и похва́льную высоту́ душа́мъ на́шимъ, Ма́терь Дѣ́ву Отрокови́цу восхва́лимъ, вѣ́рніи: ра́дуйся, Яже а́нгеловъ Творца́ во утро́бѣ носи́вши; ра́дуйся, па́дающимъ очище́ніе, Бо́га Сло́во вопло́щши; ра́дуйся, Невѣ́сто неневѣ́стная.

По 2-й стихоло́гіи сѣда́ленъ, гла́съ 2:

Страстны́я тмы́ отбѣ́гъ, къ безстра́стію путе́мъ наставля́емь, къ Свѣ́ту невече́рнему восте́клъ еси́ и, отъ Сего́ озари́вся, нетлѣ́нія бога́тство наслѣ́довалъ еси́. Моли́ непреста́нно о всѣ́хъ на́съ. [Два́жды.]

Сла́ва, и ны́нѣ, пра́здника или́ богоро́диченъ:

Души́ моея́ лѣ́ность лю́тую и се́рдца моего́ пренеможе́ніе, Ма́ти Бо́жія, воззрѣ́вши, исцѣли́ моли́твами Твои́ми и спасе́ныхъ ча́сти сподо́би, избавля́ющи мя́ тмы́ и муче́нія, я́ко еди́на упова́ніе мое́ и утѣше́ніе.

По поліеле́и сѣда́ленъ, гла́съ 6:

Воздержа́ніемъ мно́гимъ мудрова́нія пло́ти умертви́лъ еси́, ду́шу украси́въ оде́ждею безстра́стія, сле́зныя ка́пли съ тече́ніи по́товъ совокупи́лъ еси́. Преше́дъ умо́мъ ко и́стинному Рачи́телю, испроси́ на́мъ ве́лію ми́лость. [Два́жды.]

Сла́ва, и ны́нѣ, пра́здника или́ богоро́диченъ:

Отъ се́рдца стена́ніе и отъ утро́бы Ти́ приноша́ю, Твое́, Пренепоро́чная, прося́ благопребы́тное заступле́ніе: поми́луй всестрастну́ю мою́ ду́шу, умилосе́рди многоми́лостиваго Бо́га изба́вити мя́ суда́ и е́зера о́гненнаго, еди́на Благослове́нная.

Та́же, степе́нна, 1-й антифо́нъ 4-го гла́са. Проки́менъ, [гла́съ 4:] Честна́ предъ Го́сподемъ* сме́рть преподо́бныхъ Его́. Сти́хъ: Что́ возда́мъ Го́сподеви о всѣ́хъ, я́же воздаде́ ми? Ева́нгеліе Матѳе́я, зача́ло 43.

По 50-мъ псалмѣ́ стихи́ра, гла́съ 6:

Преподо́бне о́тче, во всю́ зе́млю изы́де вѣща́ніе исправле́ній твои́хъ, тѣ́мъ на небесѣ́хъ обрѣ́лъ еси́ мзду́ трудо́въ твои́хъ, де́монскія погуби́лъ еси́ полки́ и а́нгельскія дости́глъ еси́ чи́ны, и́хже житію́ безпоро́чно поревнова́лъ еси́, дерзнове́ніе имѣ́я ко Христу́ Бо́гу, ми́ръ испроси́ душа́мъ на́шимъ.

Кано́нъ, гла́съ 1.

Пѣ́снь 1.

Ирмо́съ: Твоя́ побѣди́тельная десни́ца боголѣ́пно въ крѣ́пости просла́вися: та́ бо, Безсме́ртне, я́ко всемогу́щая проти́вныя сотре́, изра́ильтяномъ пу́ть глубины́ новосодѣ́лавшая.

Ума́ чи́стыми свѣтлостьми́ Боже́ственная зря́, му́жескимъ нра́вомъ, блаже́нне, къ подвиго́мъ устреми́лся еси́, премíрными блиста́ніи Трисо́лнечнаго Свѣ́та озаря́емь.

Поста́вивъ но́зѣ на ка́мени вѣ́ры, не поколеба́лся еси́, блаже́нне, отъ искуше́ній и навѣ́тъ вра́жіихъ, но, я́ко огнепа́льна звѣзда́, попаля́я вся́ благода́тію Пресвята́го Ду́ха.

Зако́ны Боже́ственныя соблюда́я, побѣ́ду вѣ́чную взя́лъ еси́, преподо́бне, прогони́ти ду́хи лука́выя и си́хъ до конца́ низложи́лъ еси́.

Богоро́диченъ: Неизглаго́ланно зачала́ еси́ Бо́га и па́че естества́ родила́ еси́, Пречи́стая Влады́чице, земны́я отъ прегрѣше́ній измѣ́ншаго. Тѣ́мже молю́ Тя: мно́гихъ мя́ согрѣше́ній изба́ви.

Пѣ́снь 3.

Ирмо́съ: Еди́не, вѣ́дый человѣ́ческаго существа́ не́мощь и ми́лостивно въ не́ вообра́жся, препоя́ши мя́ съ высоты́ си́лою, е́же вопи́ти Тебѣ́, Святы́й, одушевле́нный хра́ме неизрече́нныя сла́вы Твоея́, Человѣколю́бче.

Якоже честны́й би́серъ, твоя́ мо́щи, преподо́бне, всѣ́ми ви́димы, предлежа́тъ, разли́чная исцѣле́нія неоску́дно подаю́ще.

Глаго́ломъ и зако́номъ Бо́жіимъ испо́лнитель бы́лъ еси́, испо́лнися, о́тче прему́дре, боже́ственныхъ даро́въ и чуде́съ, и всѣ́мъ луча́ бога́тно испусти́лъ еси́.

Напра́вился еси́, преподо́бне, къ боже́ственнымъ приста́нищемъ окормле́ніемъ Христа́ Бо́га на́шего, напа́стей преше́дъ свирѣ́пыхъ во́лнъ.

Богоро́диченъ: Дѣ́ло, е́же содѣ́лалъ еси́, Го́споди, кто́ ска́жетъ? Юже бо прокля́лъ еси́ въ печа́лѣхъ роди́ти ча́да, Сы́нъ Ея́ показа́лся еси́, и ра́дуется же́нское отпа́дшее естество́ о Тебѣ́, Бо́зѣ, Богоро́дицы ра́ди.

Инъ конда́къ, гла́съ 8:

Яко фи́никсъ псало́мскій во удо́ліихъ по́стническихъ процвѣ́лъ еси́, трудо́въ свои́хъ по́ты, я́ко плоды́ духо́вными, возвели́чилъ еси́ надъ всѣ́ми Бо́га, но я́ко имѣ́я дерзнове́ніе ко Святѣ́й Тро́ицѣ, помина́й на́съ, чту́щихъ любо́вію святу́ю па́мять твою́, да зове́мъ ти́: ра́дуйся, преподо́бне Мака́ріе, о́тче на́шъ.

Сѣда́ленъ, гла́съ 8:

Храни́тель сы́й боже́ственныхъ повелѣ́ній Влады́ки, сла́вне, чи́стое житіе́ твое́ показа́ тя священнодѣ́теля боже́ственна, ка́плями по́товъ твои́хъ пре́лести лю́тое у́гліе погаси́лъ еси́ и въ ти́хое приста́нище дости́глъ еси́, зри́ши, блаже́нне, Его́же возжелѣ́лъ еси́. Тѣ́мже вопіе́мъ ти́: моли́ Христа́ Бо́га грѣхо́въ оставле́ніе пода́ти, чту́щимъ любо́вію святу́ю па́мять твою́. [Два́жды.]

Сла́ва, и ны́нѣ, пра́здника или́ богоро́диченъ:

Яко дѣ́ву и еди́ну въ жена́хъ, Тя́, безъ сѣ́мене ро́ждшую Бо́га пло́тію, вси́ ублажа́емъ, ро́ди человѣ́честіи: о́гнь бо всели́ся въ Тя́ Божества́, и я́ко Младе́нца дои́ши Зижди́теля и Го́спода. Тѣ́мъ, а́нгельскій и человѣ́ческій ро́дъ, досто́йно сла́вимъ пресвято́е Рождество́ Твое́ и согла́сно вопіе́мъ Ти́: моли́ Христа́ Бо́га согрѣше́ній оставле́ніе дарова́ти покланя́ющимся вѣ́рою пресвято́му Рождеству́ Твоему́.

Пѣ́снь 4.

Ирмо́съ: Го́ру Тя́, благода́тію Бо́жіею приосѣне́нную, прозорли́выма Авваку́мъ усмотри́въ очи́ма, изъ Тебе́ изы́ти Изра́илеву провозглаша́ше Свято́му, во спасе́ніе на́ше и обновле́ніе.

Поче́тъ до́брыми твои́ми нра́вы Бо́га Преблага́го, Мака́ріе, тѣ́мже исцѣле́ній исто́чникъ излива́еши, зно́й отгоня́я болѣ́зней же и печа́лей, му́дре.

Ны́нѣшняго житія́ красоты́ вся́ уме́ты вмѣни́лъ еси́, да Христа́ пріобря́щеши, и сего́ ра́ди до́брѣ потруди́лся еси́, вѣнцено́сче великоимени́тый.

Просте́ръ у́мъ ко еди́ному Влады́цѣ, вѣне́цъ нетлѣ́нія отъ Него́ прія́лъ еси́, сія́ющій свѣ́тлыми свѣтоли́тіи и бога́тыми дарова́ніи, идѣ́же перворо́дныхъ жили́ща.

Богоро́диченъ: Влады́чице мíра, Богоро́дице, помози́ ми, прелука́вый вра́гъ поглоща́етъ мя́ зѣ́льнѣ лю́тыми воспомина́ніи и помышле́ніи, я́же отъ Бо́га мя́ разлуча́ютъ, не оста́ви у́бо мене́, ниже́ пре́зри.

Пѣ́снь 5.

Ирмо́съ: Тво́й ми́ръ да́ждь на́мъ, Сы́не Бо́жій: ино́го бо, ра́звѣ Тебе́, Бо́га не зна́емъ, и́мя Твое́ имену́емъ, я́ко Бо́гъ живы́хъ и ме́ртвыхъ еси́.

Стра́сти попали́лъ еси́ огне́мъ воздержа́нія, ду́шу озари́въ Боже́ственными сія́ніи, де́моновъ прогони́тель яви́лся еси́, Боже́ственнымъ Ду́хомъ просвѣща́емь.

До́блести твоя́, Мака́ріе, человѣкоубíйца зрѣ́ти не могíй, искуше́нія тебѣ́ простира́етъ, и мужему́дренно противля́яся, до конца́ сего́ низложи́лъ еси́.

Мірска́го смуще́нія отбѣ́глъ еси́, добродѣ́тельми удобри́въ житіе́ твое́, мона́ховъ утвержде́ніе бы́лъ еси́, о́тче Мака́ріе преподо́бне.

Богоро́диченъ: Ты́ крѣ́пость моя́, Ты́ похвала́ и ра́дованіе, храни́тельница ми́ и заступле́ніе, и прибѣ́жище, и предста́тельница непобѣди́ма, Пресвята́я Богоро́дице, тѣ́мже спаси́ раба́ Твоего́.

Пѣ́снь 6.

Ирмо́съ: Обы́де на́съ послѣ́дняя бе́здна, нѣ́сть избавля́яй, вмѣни́хомся, я́ко о́вцы заколе́нія, спаси́ лю́ди Твоя́, Бо́же на́шъ, Ты́ бо крѣ́пость немощству́ющихъ и исправле́ніе.

Моля́ прилѣ́жно Го́спода, недви́жущагося о́трока цѣ́ла сотворя́еши, безгла́снаго пре́жде Бо́жіимъ про́мысломъ показа́лъ еси́ многоглаго́лива, о́тче на́шъ, чудотво́рче Мака́ріе, и́ночествующимъ свѣти́льниче пресвѣ́тлый.

По́стническимъ огне́мъ искуси́вся, о́ко се́рдца твоего́ преочи́стивъ, и добродѣ́тельнымъ нра́вомъ ду́шу просвѣти́лъ еси́.

Вни́де въ тя́ раче́ніе Содѣ́теля, богому́дре, оста́вль земны́хъ пристра́стіе, единосе́льникъ показа́лся еси́ вы́шнимъ служи́телемъ.

Богоро́диченъ: Безъ сѣ́мене во чре́вѣ Бо́га зачала́ еси́, Дѣ́ва пребы́вши по рождествѣ́, Чи́стая, стра́шнѣмъ. Тѣ́мже хвала́ми Тя́ сла́вимъ, Тобо́ю изба́вльшеся кля́твы, Пречи́стая.

Конда́къ, гла́съ 2. Подо́бенъ: Вы́шнихъ ища́.

Вы́шнихъ жела́я, воздержа́ніемъ, и труды́, и по́ты наслади́вся, жела́ніе пло́ти твоея́ обузда́въ, чуде́съ да́ръ пріе́мъ отъ Христа́ Бо́га, свѣти́льникъ яви́лся еси́ пресвѣ́тлый. Тѣ́мже Христо́ва Це́рковь пѣ́сньми сла́витъ тя́, преподо́бне Мака́ріе, о́тче на́шъ.

Икосъ:

Зва́ніе Вседержи́тельныя десни́цы въ се́рдцы твое́мъ яви́ся, ты́ же но́вое пресвѣ́тлое свѣти́ло, о́тче Мака́ріе, показа́ся: а́ще и естество́мъ человѣ́къ бы́въ, но Вы́шняго Іерусали́ма сограждани́нъ яви́ся, вся́ оста́вилъ еси́ плотска́я мудрова́нія, бога́тство и сла́ву, я́ко пра́хъ, нивочто́же вмѣни́въ, и на стра́сти, я́ко безпло́тенъ, подвиза́ся. Тѣ́мъ вопіе́мъ ти́: ра́дуйся, я́ко моли́твами твои́ми проти́вніи побѣжда́ются; ра́дуйся, цѣлому́дрія сто́лпе, и́мже бѣсо́вская шата́нія искорени́шася; ра́дуйся, свѣти́льниче многосвѣ́тлый; ра́дуйся, ста́ду твоему́ по́мощь и заступле́ніе; ра́дуйся, крестоно́сному Импера́тору [2] на́шему похвала́ и утвержде́ніе, его́же соблюди́ моли́твами свои́ми отъ вра́гъ ненавѣ́тна, да, вси́ вѣ́рніи, вопіе́мъ ти́: ра́дуйся, Мака́ріе, преподо́бне о́тче на́шъ.

Пѣ́снь 7.

Ирмо́съ: Тебе́, у́мную, Богоро́дице, пе́щь, разсмотря́емъ, вѣ́рніи, я́коже бо о́троки спасе́ три́ Превозноси́мый, мíръ обнови́, во чре́вѣ Твое́мъ всецѣ́лъ, хва́льный отце́въ Бо́гъ и препросла́вленъ.

Воздержа́нія росо́ю до́блественнѣ страстну́ю пе́щь погаси́лъ еси́, сле́зъ же ка́плями, возду́шныхъ князе́й написа́нія растерза́лъ еси́ и со дерзнове́ніемъ вопія́лъ еси́ Христу́: оте́цъ на́шихъ Бо́же, благослове́нъ еси́.

По́стниковъ ты́ бы́лъ еси́ похвала́, Мака́ріе, крѣ́пко низложи́въ де́монская шата́нія, и ны́нѣ наслажда́ешися неизрече́нныя красоты́, вопія́ Христу́: оте́цъ на́шихъ Бо́же, благослове́нъ еси́.

Еди́ному Бо́гу возложи́въ ду́шу и помышле́ніе, тѣ́сный пу́ть ше́ствовалъ еси́, тѣ́мъ получи́лъ еси́ небе́снаго Ца́рствія наслажде́ніе. И ны́нѣ взыва́еши: оте́цъ на́шихъ Бо́же, благослове́нъ еси́.

Богоро́диченъ: Тро́ицѣ во еди́нствѣ правосла́вно служа́ще, Тя́, Ма́ти Дѣ́во Чи́стая, я́ко Бо́га пло́тію ро́ждшую проповѣ́дающе, земнíи, боже́ственнѣ пое́мъ: оте́цъ на́шихъ Бо́же, благослове́нъ еси́.

Пѣ́снь 8.

Ирмо́съ: Въ пещи́ о́троцы Изра́илевы, я́коже въ горни́лѣ, добро́тою благоче́стія чистѣ́е зла́та блеща́хуся, глаго́люще: благослови́те, вся́ дѣла́ Госпо́дня, Го́спода, по́йте и превозноси́те во вся́ вѣ́ки.

Ду́ха благода́ть пріи́мъ, о́тче Мака́ріе, сосу́дъ избра́нный показа́лся еси́, святы́ню пріи́мъ отъ Христа́ Бо́га, Ему́же непреста́нно вопія́: да благослови́тъ тва́рь вся́ Го́спода и превозно́ситъ во вся́ вѣ́ки.

Боже́ственною си́лою укрѣпля́емь, побѣди́лъ еси́ неви́димыхъ вра́гъ ополче́нія, къ Свѣ́ту прибли́жился еси́ невече́рнему, при́сно воспѣва́я: да благослови́тъ вся́ тва́рь Го́спода и превозно́ситъ во вся́ вѣ́ки.

Мона́шествующихъ бы́лъ еси́ пра́вило пра́вости и стра́сти вся́ крѣ́пко попра́лъ еси́. Тѣ́мже, возше́дъ на высоту́, научи́лъ еси́ воспѣва́ти: да благослови́тъ тва́рь вся́ Го́спода и превозно́ситъ во вся́ вѣ́ки.

Богоро́диченъ: Спасе́нія хода́таица на́мъ яви́лася еси́, Богоро́дице, ро́ждшая Спа́са и Влады́ку всѣ́хъ. Тѣ́мже молю́ Тя: спасе́нія сподо́би смире́нную мою́ ду́шу пѣсносло́вити Тя́ вѣ́рно во вся́ вѣ́ки.

Пѣ́снь 9.

Ирмо́съ: Образъ чи́стаго рождества́ Твоего́ огнепали́мая купина́ показа́ неопа́льная; и ны́нѣ на на́съ напа́стей свирѣ́пѣющую угаси́ти, мо́лимся, пе́щь, да Тя́, Богоро́дице, непреста́нно велича́емъ.

Мра́зъ нощны́й до́блественнѣ претерпѣ́лъ еси́ и ва́ръ дневны́й поне́слъ еси́, до́мъ Прему́дрости Бо́жія бы́лъ еси́ и возше́лъ еси́ на го́ру боже́ственнаго ра́зума.

Алчбою, и моли́твами непреста́нными, и чистото́ю Бо́гу соединя́яся, мно́жества мона́шествующихъ научи́лъ еси́ веще́ственныхъ всѣ́хъ огреба́тися.

Ста́до твое́, о́тче, возгна́лъ еси́ на па́жить чи́сту воздержа́нія, и приве́лъ еси́ къ безстра́стія исто́чнику, и ны́нѣ потщи́ся, па́стырю до́брый, сохрани́ти сіе́ невре́дно.

Богоро́диченъ: О, Пресвята́я Дѣ́во, Ма́ти Бо́га Вы́шняго! Твое́ Рождество́ на земли́ спасе́ніе яви́ся грѣ́шникомъ и смире́ннымъ, о Тебѣ́ бо спасо́хомся, вѣ́ровавшіи, но спаса́еши мя́ ны́нѣ и во вся́ вѣ́ки жи́зненныя.

Свѣти́ленъ:

Многосвѣ́тлый свѣти́льникъ, пусты́нное воспита́ніе, чистоты́ сокро́вище, а́нгеломъ собесѣ́дниче, до́мъ Ду́ха Пресвята́го, Мака́ріе преподо́бне, непреста́нно моли́ся о вѣ́рою почита́ющихъ пречестну́ю па́мять твою́. [Два́жды.]

Сла́ва, и ны́нѣ, пра́здника или́ богоро́диченъ:

Тя́ пѣ́сньми немо́лчными ублажа́емъ, Дѣ́во, я́ко отъ Тро́ицы Еди́наго родила́ еси́, Богоро́дице, и но́сиши на боже́ственныхъ объя́тіяхъ Боже́ственное Сло́во, Его́же пѣ́сньми досто́йно сла́вимъ.

На хвали́техъ стихи́ры, гла́съ 8.

Боже́ственная и свѣтоно́сная наста́ па́мять* и́же въ по́стницѣхъ вели́каго Мака́рія,* ду́ши и тѣлеса́ веселя́щи,* тѣ́мже пріиди́те, празднолю́бцы,* я́ко да наслади́мся ны́нѣшняго торжества́:* се́ бо на́ше зва́ніе пріи́де,* и Ру́сскія земли́ удобре́ніе,* и Твери́ гра́ду похвала́ и утвержде́ніе,* снаслѣ́дникъ бо Христо́въ яви́ся,* и безпло́тныхъ житію́ подража́тель бы́въ,* и мо́лится Спа́су всѣ́хъ* умири́ти мíръ и спасти́ ду́ши на́ша.

Весели́ся и красу́йся о Го́сподѣ,* вели́кій Тве́рь гра́дъ,* процвѣ́тше въ себѣ́ но́ваго свѣти́льника,* я́коже со́лнце, вселе́нную просвѣща́юща.* Красу́йся и лику́й, Це́рковь Бо́жія,* и́нокъ же мно́жества, сра́дуйтеся,* празднолю́бныхъ собо́ри, взыгра́йте,* и, вѣне́цъ отъ духо́вныхъ цвѣте́цъ испле́тше,* съ Дави́домъ возопіе́мъ:* со́нъ че́стенъ предъ Го́сподемъ сме́рть преподо́бныхъ Его́.

Чи́стое и пречестно́е прія́телище яви́ся Ду́ху Пресвято́му,* преподо́бне о́тче на́шъ Мака́ріе,* безпло́тныхъ бо во пло́ти житію́ подража́лъ еси́,* тѣле́сная бо двиза́нія воздержа́ніемъ умертви́въ,* въ живоно́сную ме́ртвость обо́лкся.* Сего́ ра́ди отъ Вседержи́тельныя вѣнча́ся десни́цы* и чуде́съ исцѣле́нія отъ Него́ сподо́бися.* Аще бо преста́вися отъ земли́,* но Бо́гови жи́въ предстои́ши* и здѣ́ съ на́ми неви́димо водворя́яся,* но, я́ко имѣ́я дерзнове́ніе,* моли́ся о душа́хъ на́шихъ.

Сла́ва, гла́съ 6:

Свѣ́тлый и всепра́зднственный дне́сь возсія́ де́нь, я́коже второ́е со́лнце, вся́ празднолю́бныхъ собо́ры просвѣща́я и мглу́ отгоня́я дре́вняго помраче́нія, честна́я па́мять Мака́рія вселе́нную созыва́етъ, честнѣ́й бо его́ и чудотво́рнѣй ра́цѣ со стра́хомъ и любо́вію предстоя́ще, любе́зно облобыза́емъ и мо́лимся: Импера́тору [3] на́шему одолѣ́ніе побѣ́дное дарова́ти, и смире́ніе мíру, и душа́мъ на́шимъ ве́лію ми́лость.

И ны́нѣ, пра́здника или́ богоро́диченъ.
[Славосло́віе вели́кое. Ектеніи́ и отпу́стъ.]



НА ЛИТУРГІИ,

Блаже́нна отъ кано́на, пѣ́снь 3-я и 6-я. Проки́менъ, гла́съ 7: Честна́ предъ Го́сподемъ* сме́рть преподо́бныхъ Его́. Сти́хъ: Что́ возда́мъ Го́сподеви о всѣ́хъ, я́же воздаде́ ми? Апо́столъ къ Гала́томъ, зача́ло 213. Аллилуія, гласъ 6: Блаже́нъ му́жъ, боя́йся Го́спода, въ за́повѣдехъ Его́ восхо́щетъ зѣло́. Сти́хъ: Си́льно на земли́ бу́детъ сѣ́мя его́. Ева́нгеліе Луки́, зача́ло 24. Прича́стенъ: Въ па́мять вѣ́чную бу́детъ пра́ведникъ, [отъ слу́ха зла́ не убои́тся.]

Примѣчанія:
[1] Свѣрено со службой преп. Макарію (См.: «На хвалитехъ...», «Слава»).
[2] Въ изданіи 1646 г. (Минѣя, мѣсяцъ Май, Москва, л.385 –385 об.): «Крестоно́сному Царю́ на́шему...»; см. также окончаніе икоса въ службѣ на преставленіе преп. Макарія 17 Марта.
[3] Въ изданіи 1646 г.: «Царю́ на́шему...»

Источникъ: Мине́я Ма́й. Ча́сть тре́тья. — М.: Издательскій совѣтъ Русской Православной Церкви, 2002. — С. 161-172.

/ Къ оглавленію раздѣла /


Наверхъ / Къ титульной страницѣ

0