Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - пятница, 18 августа 2017 г. Сейчасъ на порталѣ посѣтителей - 11.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Ма́ія въ 26-й де́нь.
Свята́го апо́стола Ка́рпа, еди́наго отъ седми́десяти.

[ВЕЧЕРЪ,]
Стихи́ры апо́стола, гла́съ 1. Подо́бенъ: Всехва́льніи.

Звѣзда́ пресвѣ́тла я́влься* боже́ственными сія́ньми,* вселе́нныя концы́ просвѣща́еши всегда́* уче́ніи, блаже́нне,* и разгоня́еши благода́тію* мра́къ неду́жный кому́ждо.* И ны́нѣ моли́* дарова́ти душа́мъ на́шимъ ми́ръ* и ве́лію ми́лость.

Же́ртву безкро́вну Бо́гу* жря́ соверше́нную,* за Того́, му́чениче, поже́рлся еси́* и прине́слся еси́ къ разу́мнѣй трапе́зѣ,* же́ртва благово́нна,* апо́столе Ка́рпе всебога́те.* И ны́нѣ моли́* дарова́ти душа́мъ на́шимъ ми́ръ* и ве́лію ми́лость.

Сла́ва, и ны́нѣ, пра́здника или́ богоро́диченъ:

Всепѣ́тая Влады́чице,* наде́жде вѣ́рныхъ и утвержде́ніе,* прибѣ́жище и по́мощь,* Тя́ мо́лимъ:* отъ вся́кія бѣды́ рабы́ Твоя́ сохрани́* вѣ́рою покланя́ющіяся Рождеству́ Твоему́,* Его́же моли́* дарова́ти душа́мъ на́шимъ ми́ръ* и ве́лію ми́лость.

Крестобогоро́диченъ:

Своего́ Агнца* Агница и Непоро́чная Влады́чица* на Крестѣ́ я́ко ви́дѣ, зра́ка не иму́ща, ниже́ добро́ты,* увы́ Мнѣ́, — рыда́ющи, глаго́лаше, —* гдѣ́ добро́та Твоя́ за́йде, Сладча́йшій?* гдѣ́ благолѣ́піе?* гдѣ́ благода́ть блиста́ющая о́браза Твоего́,* Сы́не Мо́й любе́знѣйшій?

Тропа́рь, гла́съ 3:

Апо́столе святы́й Ка́рпе, моли́ Ми́лостиваго Бо́га, да прегрѣше́ній оставле́ніе пода́стъ душа́мъ на́шимъ.


[НА УТРЕНИ,]
Кано́нъ, творе́ніе Іо́сифово, его́же краегране́сіе: Сла́внаго хвалю́ Ка́рпа боже́ственною любо́вію. Гла́съ 4.

Пѣ́снь 1.

Ирмо́съ: Воспою́ Тебѣ́, Го́споди Бо́же мо́й, я́ко изве́лъ еси́ лю́ди изъ рабо́ты еги́петскія, покры́лъ же еси́ колесни́цы фарао́новы и си́лу.

Любо́вію соверша́ющія твою́ свѣтоно́сную и свяще́нную, сла́вную и всечестну́ю па́мять свѣ́та боже́ственнаго испо́лни, апо́столе, моли́твами твои́ми.

Ве́сь возложи́вся Влады́цѣ, Сего́ зако́ны честны́я невре́дны соблю́лъ еси́, беззако́нныя же благозако́нію научи́лъ еси́, апо́столе.

Умъ преу́мный возлюби́въ въ зрѣ́ніи та́йномъ, умо́мъ озари́вся, всеблаже́нне свяще́нне, свѣ́тъ яви́лся еси́ вторы́й.

Богоро́диченъ: Ро́ждши, Дѣ́во, несказа́нно, есте́ственныя зако́ны обнови́ла еси́, тѣ́мже Тя́ блажи́мъ, Марíе Богоневѣ́сто.

Пѣ́снь 3.

Ирмо́съ: Лу́къ си́льныхъ изнемо́же, и немощству́ющіи препоя́сашася си́лою, сего́ ра́ди утверди́ся въ Го́сподѣ се́рдце мое́.

Цѣвни́ца, бряца́ющая Ду́хомъ, бы́лъ еси́, всеблаже́нне, богодви́жимый язы́къ тво́й, вѣща́ющь вели́чія Спа́са и Бо́га на́шего.

Имѣ́я Сло́во пребезнача́льное, направля́ющее тя́ и я́вѣ укрѣпля́ющее, безбо́жнымъ спаси́тельныя стези́, Ка́рпе, показа́лъ еси́.

Ка́рпе, спаси́тельное проповѣ́даніе тва́ри, я́ко святи́тель богопрія́тенъ, возвѣсти́въ, мно́га подъя́лъ еси́ гоне́нія и ско́рби, сла́вне.

Богоро́диченъ: Но́во я́ко Отроча́ родила́ еси́, пре́жде вѣ́къ изъ Отца́ возсія́вшее неизглаго́ланно, Богороди́тельнице, сего́ ра́ди Тя́ сла́вимъ.

Сѣда́ленъ, гла́съ 3. Подо́бенъ: Боже́ственныя вѣ́ры.

Боже́ственное сія́ніе воспріи́мъ, Ка́рпе прему́дре, Утѣ́шителево, омраче́нныя невѣ́дѣніемъ просвѣти́лъ еси́ и, преста́влься къ вы́шнему Ца́рствію, Царю́ всѣ́хъ предстои́ши, моля́ Христа́ Бо́га всегда́ дарова́ти на́мъ ве́лію ми́лость.

Сла́ва, и ны́нѣ, пра́здника или́ богоро́диченъ:

Боже́ственнаго естества́ не отлу́чся, пло́ть бы́въ во чре́вѣ Твое́мъ, но Бо́гъ вочеловѣ́чся и пребы́сть, Иже по рождествѣ́ Ма́терь Тя́ Дѣ́ву, я́ко пре́жде рождества́, сохрани́въ Всенепоро́чну, еди́нъ Госпо́дь. Того́ прилѣ́жно моли́ дарова́ти на́мъ ве́лію ми́лость.

Крестобогоро́диченъ:

Нескве́рная Агница Сло́ва, Нетлѣ́нная Дѣ́ва Ма́ти, на Крестѣ́ зря́щи повѣ́шена изъ Нея́ безъ болѣ́зни прозя́бшаго, ма́терски подо́бно рыда́ющи, вопія́ше: увы́ Мнѣ́, Ча́до Мое́, ка́ко стра́ждеши во́лею, хотя́ изба́вити отъ страсте́й безче́стія человѣ́ка?

Пѣ́снь 4.

Ирмо́съ: Любве́ ра́ди, Ще́дре, Твоего́ о́браза, на Крестѣ́ Твое́мъ ста́лъ еси́, и раста́яшася язы́цы: Ты́ бо еси́, Человѣколю́бче, крѣ́пость моя́ и хвале́ніе.

Созда́въ, я́ко ка́меніе, вѣ́рныхъ мно́жество на благоче́стіи ка́мени, хра́мы содѣ́лалъ еси́ Свята́го Ду́ха, богому́дре апо́столе.

Но́вы содѣ́лавъ креще́ніемъ, богоблаже́нне, обетша́вшія нра́вомъ тлѣ́ннымъ, человѣ́ки спа́слъ еси́, сла́вящія Христа́, Бо́га на́шего.

Явля́я та́инство Покры́вшаго добродѣ́телію, богому́дре, небеса́, привле́клъ еси́ язы́ки къ позна́нію Его́, тму́ отгоня́.

Съ Па́вломъ, свѣти́льникомъ вселе́нныя, пу́ть ше́ствуя мно́жицею, пути́, веду́щія, Ка́рпе, показа́лъ еси́ лю́демъ ко благоче́стію.

Богоро́диченъ: Умно богоно́сный, Богороди́тельнице, го́ру Тя́ ви́дѣвъ ве́лію и присѣ́нную, Отрокови́це, отъ нея́же пріи́де пло́тію Бо́гъ на́шъ.

Пѣ́снь 5.

Ирмо́съ: Просвѣще́ніе Твое́, Го́споди, низпосли́ на́мъ и отъ мглы́ прегрѣше́ній разрѣши́ ны, Бла́же, Тво́й ми́ръ да́руяй.

Яко садодѣ́латель изря́денъ, показа́лъ еси́ лю́демъ живо́тное дре́во, отъ него́же яды́й жи́въ бу́детъ про́чее во вѣ́ки, христопроповѣ́дниче апо́столе.

Проповѣ́дникъ язы́ковъ, апо́столъ и учи́тель че́стенъ, священнотаи́нникъ и священносло́въ, Ка́рпе, бы́въ, въ весе́ліи Влады́цѣ предстои́ши.

Отъ восто́ка прише́лъ еси́, я́ко незаходи́мая звѣзда́, вселе́нную заря́ми твои́хъ слове́съ и свяще́нными просвѣща́я о́бразы, іера́рше апо́столе.

Богоро́диченъ: Скве́рну души́ и тѣлесе́ очи́сти ми́ ны́нѣ, Благослове́нная, милосе́рдымъ Твои́мъ воззрѣ́ніемъ, я́ко да Тя́ пою́ и велича́ю по до́лгу, Всепѣ́тая.

Пѣ́снь 6.

Ирмо́съ: Возопи́, прообразу́я погребе́ніе тридне́вное, проро́къ Іо́на, въ ки́тѣ моля́ся: отъ тли́ изба́ви мя́, Іису́се, Царю́ си́лъ.

Источа́етъ ра́ка твои́хъ моще́й тре́бующимъ исцѣле́нія, святи́телю, то́ки благода́тію Боже́ственною, и отъе́млетъ стра́сти, и потопля́етъ нечи́стыя ду́хи.

Сло́во твое́, отъ безслове́сія избавля́я человѣ́ки, и чуде́съ вели́кое показа́ніе, сла́вне, заблу́ждшихъ ко благоче́стію, Ка́рпе, наста́ви.

Вжиля́емь си́лою боже́ственною, змíя, на высоту́ хулу́ глаго́лавшаго, погуби́въ, отъ о́наго поглоще́нныя, апо́столе, спа́слъ еси́.

Богоро́диченъ: Родила́ еси́ безъ болѣ́зни Зижди́теля, Всенепоро́чная, болѣ́зни и труды́ на́ша отъе́млющаго и неболѣ́зненнѣй сподобля́юща пи́щи человѣ́чество.

Конда́къ, гла́съ 4. Подо́бенъ: Яви́лся еси́.

Яко звѣзду́ пресвѣ́тлую, Це́рковь всегда́ стяжа́ тя, апо́столе Ка́рпе, чуде́съ твои́хъ многоподава́ніемъ просвѣща́ема, спаси́ вѣ́рою чту́щихъ па́мять твою́.

Пѣ́снь 7.

Ирмо́съ: Авраа́мстіи иногда́ въ Вавило́нѣ о́троцы пе́щный пла́мень попра́ша, пѣ́сньми взыва́юще: оте́цъ на́шихъ Бо́же, благослове́нъ еси́.

Неду́ги отгоня́ вѣща́ніемъ, исцѣля́я стра́сти зна́меніемъ то́кмо еди́нымъ, спаси́тельное возвѣсти́лъ еси́ проповѣ́даніе, священнотаи́нниче Ка́рпе, просвѣща́я су́щія во тмѣ́.

Ярости князе́й, му́дре, ника́коже убоя́вся, до́блественнѣ отлучи́лся еси́ къ страда́нію болѣ́зненныхъ трудо́въ, взыва́я: оте́цъ на́шихъ Бо́же, благослове́нъ еси́.

Посѣще́на тя́ отъ Го́спода, Ка́рпе, Ве́рріи боже́ственна поста́ви посѣти́теля, изря́дно посѣща́юща сего́ посѣще́ніи боже́ственными.

Богоро́диченъ: Яко простра́ннѣйши су́щи небе́съ, въ ложесна́ прія́тъ Сло́во Невмѣсти́мое, Дѣ́во, избавля́ющаго тѣсноты́ вся́кія ро́дъ человѣ́ческій.

Пѣ́снь 8.

Ирмо́съ: На Крестѣ́ пло́тію пригвожде́ннаго и показа́вшаго на́мъ ору́жіе во спасе́ніе, о́троцы, превозноси́те Христе́ Бо́га на́шего во вѣ́ки.

Па́влу, му́дрому наста́внику, въ посла́ніихъ служа́ боже́ственныхъ, святи́телю, спаси́тельная уче́нія всѣ́мъ разда́лъ еси́ спаса́емымъ.

Утро свѣ́тлое, озаря́яй вселе́нную свѣ́томъ, проповѣ́дникъ показа́лся еси́, и неразу́мія тму́ глубо́кую отгна́лъ еси́, досточу́дне.

Чудеса́ соверша́я призыва́ніемъ Отца́ и Ду́ха, му́дре, и Сло́ва воплоще́ннаго, увѣ́рилъ еси́ е́ллины му́дрыя Тріѵпоста́сное Существо́ чти́ти.

Богоро́диченъ: Яви́лася еси́ Не́бо, Богороди́тельнице, возсія́вшее на́мъ пра́вды Со́лнце, просвѣща́ющи вся́ ны́ въ ра́зумъ богоразу́мія.

Пѣ́снь 9.

Ирмо́съ: Рождество́ Твое́ нетлѣ́нно яви́ся: Бо́гъ изъ боку́ Твое́ю про́йде, я́ко Плотоно́сецъ яви́ся на земли́ и съ человѣ́ки поживе́. Тя́, Богоро́дице, тѣ́мъ вси́ велича́емъ.

Ви́дѣвъ со сла́вою Бо́га, восходя́ща съ пло́тію въ вы́шняя, седми́десятимъ, Ка́рпе, ученико́мъ соприче́лся еси́, изше́лъ еси́ вку́пѣ съ ни́ми, проповѣ́дникъ боже́ственъ явля́яся.

Яко овча́ посреди́ волко́въ, по́сланъ бы́лъ еси́, претворя́я тѣ́хъ, Ка́рпе, къ разумѣ́нію, сло́вомъ и́стиннымъ на спасе́ніе, и прелага́я си́хъ нра́въ, богоглаго́ливе, ко благоче́стію.

Собесѣ́дникъ яви́лся еси́ а́нгеломъ, апо́столе Ка́рпе богоглаго́ливе, апо́столомъ же и му́ченикомъ, ди́вно во благоче́стіи сконча́вшимся, съ ни́миже лику́я ве́село, и на́съ помина́й.

Освяти́лъ еси́, Ка́рпе, ше́ствуя, зе́млю, и свято́е проповѣ́далъ еси́ Ева́нгеліе вѣ́рою, и ду́ши Живода́тельному Сло́ву приве́лъ еси́. Тѣ́мже тебѣ́ да́руетъ наслѣ́діе небе́сное.

Богоро́диченъ: Гла́съ Ти́ прино́симъ, Дѣ́во, Гавріи́ловъ, вопію́ще: ра́дуйся, ле́гкій о́блаче, ра́дуйся, земле́ недѣ́ланная, кла́съ красе́нъ плодонося́щи, Пита́теля все́й тва́ри.

Источникъ: Минíа, мѣ́сяцъ Ма́ій. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 219 об. – 222 об.

/ Къ оглавленію раздѣла /


Наверхъ / Къ титульной страницѣ

0