Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - пятница, 20 октября 2017 г. Сейчасъ на порталѣ посѣтителей - 14.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Ма́ія въ 26-й де́нь.
Слу́жба свята́го великому́ченика Христо́ва Гео́ргія, му́чившагося въ Средцѣ́, гра́дѣ Бо́лгарскомъ, отъ безбо́жнаго царя́ Сели́ма Ту́рскаго.

[ВЕЧЕРЪ,]
На Го́споди воззва́хъ: стихи́ры [на 6], гла́съ 5. Подо́бенъ: Ра́дуйся.

Ра́дуйся, страстоте́рпче Христо́въ, Гео́ргіе прехва́льне!* Ты́ кро́вію твое́ю честно́ю зе́млю освяти́лъ еси́,* и скве́рныя кро́ви, приноси́мыя бѣсо́мъ, упраздни́лъ еси́,* и вѣне́цъ нетлѣ́нный отъ руки́ Госпо́дни на версѣ́ твое́мъ прія́лъ еси́, всече́стне,* не отъ ка́меній честны́хъ укра́шенъ,* но твое́ю кро́вію прозябе́нъ.* Тѣ́мже моли́ся Христу́* дарова́ти душа́мъ на́шимъ ми́ръ и ве́лію ми́лость.

Ра́дуйся, великому́чениче Христо́въ, Гео́ргіе всече́стне!* Мы́ освяща́еми есмы́,* твоя́, свяще́нне, боре́нія и по́двиги сла́вящіи,* е́же подвиза́лся еси́ по Христѣ́ Бо́зѣ въ лѣ́тѣхъ послѣ́днихъ* проти́ву неви́димаго врага́ ко́знемъ* и срацы́нскую вѣ́ру безбо́жную попра́лъ еси́ твои́мъ терпѣ́ніемъ;* тѣ́мже и сограждани́нъ а́нгеломъ бы́лъ еси́, пресла́вне,* и всѣ́мъ страстоте́рпцемъ сопресто́льникъ.* Съ ни́миже моли́ся Го́сподеви* дарова́ти душа́мъ на́шимъ ми́ръ и ве́лію ми́лость.

Сла́ва, гла́съ 6. Самогла́сенъ:

Пріиди́те, мучениколю́бцы вси́, ли́къ соста́вимъ, вѣнцы́ похвала́ми плету́ще и честну́ю главу́ великому́ченика Христо́ва, Гео́ргія но́ваго, вѣнча́юще, напослѣ́докъ лѣ́томъ въ Средцѣ́ гра́дѣ муче́нія две́рь до́брѣ проше́дшаго: се́й бо храбо́рникъ, Христо́вою вооружи́вся вѣ́рою, въ по́двигъ вни́де му́жественнѣ, и Христа́ исповѣ́да, Сы́на Бо́жія и Бо́га, Творца́ и Судію́ вся́ческихъ, предъ тмочи́сленнымъ наро́домъ, и Моаме́ѳова преда́нія и зако́ны и уче́нія его́ до конца́ низложи́. Мучи́теля и царя́ безбо́жнаго, Сели́ма Ту́рскаго, попра́въ, му́ченикомъ бы́сть о́бразъ и подписа́ніе. Пріиди́те, ца́ріе и кня́зи, сего́ подража́йте, да и подо́бнымъ вѣнце́мъ пріобщите́ся. Бога́тіи и ни́щіи, и здра́віи и неду́жніи, почерпи́те оби́льно исцѣле́нія въ сла́ву Христу́ Бо́гу отъ ковче́га свяще́ннаго, я́ко отъ нетлѣ́нна исто́чника. Се́й у́бо, на земли́ пострада́вый и ны́нѣ на небесѣ́хъ ца́рствуя, со а́нгелы, и съ ли́ки му́ченикъ, и со всѣ́ми святы́ми мо́лится Спа́су о на́съ, умири́ти мíръ и спасти́ ду́ши на́ша.

И ны́нѣ, богоро́диченъ: Богоро́дице, Ты́ еси́ лоза́ и́стинная...
Или́ крестобогоро́диченъ. Подо́бенъ: Все́ отло́жше.

Агнца своего́* Агница нескве́рная дре́вле* и непоро́чная Влады́чица* на дре́вѣ кре́стнѣмъ я́ко узрѣ́,* ма́терски восклица́ше* и, дивя́шися, вопія́ше:* Ча́до сладча́йшее,* что́ зрѣ́ніе сіе́ но́вое и пресла́вное?* Ка́ко со́нмъ безблагода́тный* суди́щу Пила́тову предаде́ Тя* и осужда́етъ на сме́рть Живота́ вся́ческихъ?* Но воспѣва́ю Твое́ неизрече́нное,* Сло́ве, снизхожде́ніе.

На стихо́внѣ стихи́ры окто́иха.
Та́же му́ченика стихи́ра, гла́съ 4. Подо́бенъ: Яко до́бля.

Сти́хъ: Пра́ведникъ, я́ко фи́никсъ, процвѣте́тъ,* я́ко ке́дръ, и́же въ Лива́нѣ, умно́жится.

Страда́лецъ до́блественный и во́инъ непобѣди́мый* Святы́мъ Ду́хомъ показа́вся,* низложи́лъ еси́ супоста́та му́дростію слове́съ,* и дѣ́лъ твои́хъ, сла́вне,* и терпѣли́выми показа́ніи.* Тѣ́мже прія́лъ еси́ вѣне́цъ нетлѣ́нный* отъ руки́ Госпо́дни,* съ вы́шними ли́ки счета́вся,* му́чениче Христо́въ Гео́ргіе,* моли́ спасти́ся душа́мъ на́шимъ.

Сла́ва, гла́съ 8. Самогла́сенъ:

Великому́чениче Христо́въ Гео́ргіе, ты́, оклевета́емь отъ нечести́выхъ и богоме́рзкихъ сеи́тъ, предста́лъ еси́ мучи́телю. Мучи́тель же, удиви́вся твоему́ во́зрасту и красотѣ́ лица́, нача́ ласка́ніемъ увѣща́ти тя́ окая́нный отъ христіа́нскія вѣ́ры, и тафію́ возложи́ на честну́ю главу́ твою́, ю́же они́, беззако́нніи, ноша́ху. Ты́ же, му́чениче, де́рзостно попра́лъ еси́ нога́ми твои́ми и поплева́лъ еси́ ли́ца и́хъ, безбо́жны наре́къ, и, я́сно Христа́, Сы́на Бо́жія, со Отце́мъ и Святы́мъ Ду́хомъ предъ всѣ́ми проповѣ́давъ, срацы́нскую вѣ́ру и зако́ны и́хъ до конца́ низложи́лъ еси́ Боже́ственною Утѣ́шителя си́лою. И по мно́гихъ му́кахъ зломы́сленный мучи́тель огне́мъ искуси́ пло́ть твою́, ты́ же я́ко хлѣ́бъ сла́докъ, Тро́ицѣ прине́слся еси́, блаже́нне, и небе́снымъ счисли́лся еси́ а́нгеломъ. Тѣ́мъ тя́ мо́лимъ: моли́ спасти́ся душа́мъ на́шимъ.

И ны́нѣ, богоро́диченъ или́ крестобогоро́диченъ:

На дре́вѣ ви́дяши воздви́жена Сы́на своего́, Пречи́стая, утро́бою ма́терски растерза́ющися, зва́ше: увы́ Мнѣ́, ка́ко за́йде, Свѣ́те Мо́й безлѣ́тный?

Тропа́рь, гла́съ 4:

Боже́ственнымъ жела́ніемъ отъ ю́наго во́зраста ве́сь са́мъ себе́ Го́сподеви возложи́въ, въ моли́твахъ и постѣ́хъ о́бразъ бы́въ добродѣ́тели, бога́тство же, и сла́ву, и доброро́дство тѣле́сное, я́ко не су́щее, презрѣ́въ, и Христа́ еди́наго отъ души́ возлюби́лъ еси́, и Того́, и́стиннаго су́ща Бо́га, въ Тро́ицѣ покланя́ема, предъ нечести́выми ту́рки проповѣ́далъ еси́, и, срацы́нскую вѣ́ру, и зако́ны Моаме́ѳовы подъ нога́ми попра́въ и мучи́теля ужаси́въ, муче́нія вѣнце́мъ украси́вся, сла́вне, къ небе́снымъ восте́клъ еси́ ликостоя́ніемъ, прему́дре Гео́ргіе. Моли́ Христа́ Бо́га сохрани́ти оте́чество твое́ и спасти́ правосла́внаго Импе́ратора, и лю́ди и гра́дъ, и́же твоя́ по́двиги при́сно почита́ющія.

[Сла́ва,] и ны́нѣ, богоро́диченъ или́ крестобогоро́диченъ.



НА УТРЕНИ,
Кано́нъ [на] 6, его́же краегране́сіе сицево́: Но́вому му́ченику но́ву плету́ похвалу́. Гла́съ 4.

Пѣ́снь 1.

Ирмо́съ: Мо́ря чермну́ю пучи́ну невла́жными стопа́ми дре́вній пѣшеше́ствовавъ Изра́иль, крестообра́зными Моисе́овыма рука́ма Амали́кову си́лу въ пусты́ни побѣди́лъ е́сть.

Новоявле́нъ му́ченикъ, блаже́нне Гео́ргіе, вселе́ннѣй напослѣ́докъ яви́лся еси́, тѣ́мже пода́ждь ми́ сло́во твое́ю благода́тію, твоя́ по́двиги воспѣва́ти по достоя́нію.

Очи́ма мы́сленныма, предстоя́ на суди́щи, му́чениковъ зрѣ́лъ еси́ честно́е сосло́віе, тебе́ призыва́ющихъ ра́достно, Гео́ргіе, и подо́бными вѣнцы́ украша́ющихъ.

Во́инствомъ досточу́днымъ твоего́ сопротивле́нія погаси́въ Моаме́ѳова преда́нія и зако́ны, вѣ́ру и́хъ срацы́нскую попра́лъ еси́, досточу́дне Гео́ргіе, о Христѣ́ укрѣпля́яся, и злочести́ваго мучи́теля соверше́ннѣ посрами́лъ еси́, сла́вне.

Одѣ́явся въ броня́ исповѣ́данія вѣ́ры и шле́мъ возложи́въ благода́ти, свѣтлѣ́йшій язы́комъ, Гео́ргіе, боговѣща́ннымъ и честны́мъ, я́коже мече́мъ, ссѣ́клъ еси́ безу́мнаго мучи́теля.

Богоро́диченъ: Безъ сѣ́мене Отчею во́лею отъ Боже́ственнаго Ду́ха Бо́жія зачала́ еси́ Сы́на и пло́тію породила́ еси́, Иже отъ Отца́ безъ ма́тере и на́съ ра́ди изъ Тебе́ безъ отца́.

Пѣ́снь 3.

Ирмо́съ: Весели́тся о Тебѣ́ Це́рковь Твоя́, Христе́, зову́щи: Ты́ моя́ крѣ́пость, Го́споди, и прибѣ́жище, и утвержде́ніе.

Ополче́ніе злочести́вое, я́ко воево́да си́ленъ, побѣди́лъ еси́ и стропти́ваго змíя вся́ хи́трости попра́лъ еси́, му́чениче Гео́ргіе.

О Влады́цѣ пе́рвѣе и Го́сподѣ не насы́тишася іуде́и законопресту́пніи и пророкоубíйственніи, но и Того́ му́ченика разрѣ́заему тѣ́лу, и огне́мъ опаля́ему неми́лостивно, и води́му по гра́ду отъ слу́гъ нече́стія.

Епа́рхъ сѣ́ти простира́ше словесы́ ласка́тельными къ ловле́нію страда́льца прему́драго. Но о́нъ вопія́ къ нему́: преста́ни на мно́зѣ буесло́вія, а́зъ бо бѣсо́мъ не поклоню́ся, ни пожру́, па́че Творца́, на́съ созда́вшаго.

Богоро́диченъ: Ты́ еди́на су́щимъ на земли́ па́че естества́, благи́хъ Хода́таица, Ма́ти Бо́жія яви́лася еси́, тѣ́мже, ра́дуйся, вопіе́мъ Ти́, я́ко Го́спода ро́ждшей, спасе́ніе душа́мъ на́шимъ.

Сѣда́ленъ, гла́съ 8. Подо́бенъ: Прему́дрости.

Во́инство, су́щее на земли́, возненави́дѣвъ, му́чениче, небе́сныя возжела́въ сла́вы, болѣ́зни претерпѣ́лъ еси́ за Христа́ Бо́га и огнепа́льную сме́рть отъ безбо́жныхъ и скве́рныхъ ту́рковъ, беззако́ннаго же царя́ Сели́ма посрами́лъ еси́ Христо́вымъ посо́біемъ. Тѣ́мже дне́сь святу́ю твою́ па́мять пра́зднуемъ, Го́сподеви принося́ще хвалу́, треблаже́нне, страстоте́рпче Христо́въ Гео́ргіе, моли́ Христа́ Бо́га согрѣше́ній оставле́ніе дарова́ти чту́щимъ любо́вію святу́ю па́мять твою́.

Сла́ва, и ны́нѣ, богоро́диченъ:

Со́лнца о́блаче разу́мнаго, боже́ственнаго Свѣ́та свѣти́льниче златокова́нный, нескве́рная, небла́зная, всенепоро́чная Влады́чице, омраче́нную ду́шу мою́ ослѣпле́ніемъ страсте́й безстра́стія заре́ю просвѣти́, молю́ся, и оскверне́нное ми́ се́рдце омы́й пото́ки умиле́нія, покая́нія же слеза́ми, и отъ тимѣ́нія мя́ очи́сти дѣ́лъ мои́хъ, да любо́вію зову́ Ти: Богоро́дице Приснодѣ́во, моли́ Христа́ Бо́га прегрѣше́ній оставле́ніе пода́ти ми́: Тебе́ бо имѣ́ю наде́жду, ра́бъ Тво́й.

Крестобогоро́диченъ:

Агнца и Па́стыря, и Изба́вителя, Агница зря́щи на Крестѣ́, восклица́ше, пла́чущи, и го́рько рыда́ющи, вопія́ше: мíръ у́бо ра́дуется, пріе́мля Тобо́ю избавле́ніе, утро́ба же Моя́ гори́тъ, зря́щи Твое́ распя́тіе, е́же терпи́ши за милосе́рдіе ми́лости. Долготерпѣли́ве Го́споди, ми́лости бе́здно и исто́чниче неисчерпа́емый, умилосе́рдися и да́руй согрѣше́ній оставле́ніе, вѣ́рою пою́щимъ Боже́ственныя стра́сти Твоя́.

Пѣ́снь 4.

Ирмо́съ: Вознесе́на Тя́ ви́дѣвши Це́рковь на Крестѣ́, Со́лнце Пра́ведное, ста́ въ чи́нѣ свое́мъ, досто́йно взыва́ющи: сла́ва си́лѣ Твое́й, Го́споди.

Что́ ми мно́гая словеса́ и обѣща́емая тлѣ́емая, я́же безу́мнѣ предлага́еши? — Гео́ргіе глаго́лалъ еси́ къ мучи́телю, — сія́ вся́ мнѣ́ же́лчи горча́йши. Но твори́, е́же хо́щеши, о злому́дренне, а́зъ бо вопію́: сла́ва си́лѣ Твое́й, Го́споди.

Изнури́ пло́ть твою́ мно́гими ра́нами злому́дренный мучи́тель, ты́ же, треблаже́нне, по́мыслъ непрекло́ненъ спа́слъ еси́, поя́ усе́рдно тя́ Укрѣ́пльшему: сла́ва си́лѣ Твое́й, Го́споди.

Ника́коже тебе́ послу́шаю, къ па́губѣ привлача́юща, е́же служи́ти нечи́стымъ бѣсо́мъ, я́коже вы́, нечести́віи, слу́жите помраче́нной пре́лести, — Гео́ргій къ мучи́телю вѣща́ше. — Умру́ же па́че усе́рдно за Уме́ршаго мене́ ра́ди и съ му́ченики вопію́: сла́ва си́лѣ Твое́й, Го́споди.

Богоро́диченъ: Неискусобра́чно родила́ еси́, о Дѣ́во, и по рождествѣ́ яви́лася еси́, дѣ́вствующи па́ки. Тѣ́мже немо́лчными гла́сы, ра́дуйся, Влады́чице, вѣ́рою несумнѣ́нною взыва́емъ.

Пѣ́снь 5.

Ирмо́съ: Ты́, Го́споди, мо́й Свѣ́тъ, въ мíръ прише́лъ еси́, Свѣ́тъ Святы́й, обраща́яй изъ мра́чна невѣ́дѣнія вѣ́рою воспѣва́ющія Тя́.

Изнемого́ша бію́щіи, страстоте́рпчестѣй пло́ти утве́рждшися, и мучи́тель, томле́нія изыску́я: ты́ же до́блественнѣ терпѣ́лъ еси́, красу́яся ра́нами, я́же за любо́вь подъя́лъ еси́ Го́спода твоего́.

Ко́ль стра́шно же и пресла́вно за Христа́ сопротивле́ніе твое́, ему́же у́бо почуди́шася племена́, обрѣ́тшаяся на по́двизѣ, и похвали́ша терпѣ́нія, ту́рцы же и срацы́ни студо́мъ облеко́шася.

О, нра́ва благочести́ва! О, до́блественна ра́зума! О, вѣ́ры теплѣ́йшія честна́го страстоте́рпца Гео́ргія! Ея́же ра́ди Бо́га получи́.

Богоро́диченъ: Тя́ ору́жіе непобѣди́мо на враги́ предлага́емъ, Тя́ держа́ву и наде́жду на́шего спасе́нія, Богоневѣ́стная, и́мамы.

Пѣ́снь 6.

Ирмо́съ: Пожру́ Ти со гла́сомъ хвале́нія, Го́споди, Це́рковь вопіе́тъ Ти́, отъ бѣсо́вскія кро́ве очи́щшися, ра́ди ми́лости отъ ре́бръ Твои́хъ исте́кшею кро́вію.

Ника́коже поколеба́ша столпа́ благоче́стія свирѣ́пство повелѣва́ющаго безбо́жнаго мучи́теля, ни жезлы́ біе́нія, ни го́рькая темни́ца, ни ра́ны, ниже́ сме́рть нужднѣ́йшая.

Оку херуви́мскому ума́ твоего́ чистота́ уподо́бися: до́лѣ бо му́жески терпѣ́лъ еси́ муче́нія, горѣ́ же предстоя́лъ Влады́цѣ, посла́вшему тебѣ́ вѣне́цъ побѣ́дный.

Взыгра́шася свѣ́тло му́ченичестіи тогда́ ли́цы, ви́дѣвше твое́ дерзнове́ніе, и, прини́кше ку́пно со а́нгелы, неви́димо укрѣпля́ху тя́ въ по́двизѣ.

Богоро́диченъ: О чу́до, всѣ́хъ чуде́съ новѣ́йшее! Яко Дѣ́ва, во утро́бѣ вся́ Содержа́щаго неискусому́жно пріе́мши, не стужи́ Си.

Конда́къ, гла́съ 4:

Яко звѣзда́ пресвѣ́тлая, яви́лся еси́ непреле́стная мíрови, пра́веднаго со́лнца Христа́ возвѣща́ющи страда́ніи твои́ми, страстоте́рпче, вели́кій му́чениче Христо́въ Гео́ргіе, и пре́лесть погаси́лъ еси́ срацы́нскую, и Моаме́ѳова преда́нія и зако́ны подъ нога́ми твои́ми попра́лъ еси́, и беззако́ннаго царя́ и мучи́телей ужаси́лъ еси́ крѣ́пкимъ твои́мъ терпѣ́ніемъ, и вѣ́рнымъ подае́ши свѣ́тъ, моля́ся къ Бо́гу непреста́нно о всѣ́хъ на́съ.

Икосъ:

Прему́дрый Зижди́тель Влады́ка и Господи́нъ виногра́да мы́сленнаго, я́коже пресвяты́ми усты́ и́же о при́тчи виногра́да глаго́летъ: я́коже во единонадеся́тый ча́съ дѣ́лавшимъ подо́бную да́стъ цѣ́ну, та́кожде и отъ пе́рваго часа́ дѣ́лавшимъ. И ны́нѣ дѣ́лы извѣсти́ въ при́тчи кры́емое, Гео́ргія но́ва показа́въ, свѣ́тла му́ченика и храбо́рника преизря́дна, преда́нія и зако́ны Моаме́ѳовы подъ нога́ма свои́ма попра́вшаго и беззако́ннаго царя́ Сели́ма и мучи́тели ужаси́вшаго крѣ́пкимъ терпѣ́ніемъ, на са́мый у́бо послѣ́докъ лѣ́тныхъ ты́сящъ подо́бна бы́вшаго пе́рвымъ страда́льцемъ. Того́ Христо́съ просла́ви нетлѣ́ніемъ исцѣле́нія, и́же вѣ́рнымъ подае́тъ свѣ́тъ, моля́ся непреста́нно къ Бо́гу о всѣ́хъ на́съ.

Пѣ́снь 7.

Ирмо́съ: Въ пещи́ авраа́мстіи о́троцы перси́дстѣй, любо́вію благоче́стія па́че, не́жели пла́менемъ, опаля́еми, взыва́ху: благослове́нъ еси́ въ хра́мѣ сла́вы Твоея́, Го́споди.

Наноси́мая ти́ страда́нія, Гео́ргіе досточу́дне, ели́ко пе́стрый о́нъ и кова́рный мучи́тель наноша́ше, ты́ же, страда́льче, му́жественнѣ терпѣ́лъ еси́ за любо́вь Христа́ твоего́, ра́достно поя́: препѣ́тый оте́цъ на́шихъ Бо́же, благослове́нъ еси́.

Истиненъ а́зъ му́ченикъ и́стиннаго Христа́, Бо́га на́шего, — страда́лецъ взыва́ше къ беззако́ннымъ, — біе́нія же́зленная, и о́гнь, и и́ныя му́ки гото́въ е́смь сла́дцѣ подъя́ти за любо́вь Христа́ моего́, ра́достно поя́: препѣ́тый оте́цъ на́шихъ Бо́же, благослове́нъ еси́.

Зубы́ скре́гчуще убíйственнѣ, беззако́нніи ту́рцы, я́ко звѣ́ріе, восхи́тиша богоявле́нника и огню́ предава́ху, му́ченикъ же ра́достно поя́ше: препѣ́тый оте́цъ на́шихъ Бо́же, благослове́нъ еси́.

Богоро́диченъ: Вы́шняго освяще́нное боже́ственное селе́ніе, ра́дуйся, Тобо́ю бо даде́ся ра́дость, Богоро́дице, вопію́щимъ Ти́: благослове́нна Ты́ въ жена́хъ, Всенепоро́чная Влады́чице.

Пѣ́снь 8.

Ирмо́съ: Ру́цѣ распросте́ръ, Даніи́лъ, льво́въ зія́нія въ ро́вѣ затче́; о́гненную же си́лу угаси́ша, добродѣ́телію препоя́савшеся, благоче́стія рачи́тели, о́троцы, взыва́юще: благослови́те, вся́ дѣла́ Госпо́дня, Го́спода.

Ублажи́ша тя́ ца́ріе, благослови́ша святи́теліе, слы́шаще твое́ му́жественное терпѣ́ніе и ко Христу́ хода́тая стяжа́вше тя́. И ны́нѣ приходя́ще, честны́мъ твои́мъ моще́мъ покланя́ются, взыва́юще: благослови́те, вся́ дѣла́ Госпо́дня, Го́спода.

Хваля́ся я́звами Христо́выми, къ вѣ́чнымъ восте́клъ еси́ оби́телемъ, въ багряни́цу одѣ́янъ, му́чениче Гео́ргіе, отъ крове́й твои́хъ обагре́нную, и свѣ́тло Царю́ си́лъ предстои́ши, съ му́ченики лику́я, пое́ши: благослови́те, вся́ дѣла́ Госпо́дня, Го́спода.

Игра́етъ вели́кій гра́дъ Среде́цъ, и вси́ окре́стніи гра́ди, и ве́си, тебе́ воспита́вшіи, и крася́тся па́мятію твое́ю честно́ю, страстоте́рпче Гео́ргіе. Муче́ніе бо сконча́въ, вѣнца́ побѣ́ды сподо́бился еси́ и пое́ши: благослови́те, вся́ дѣла́ Госпо́дня, Го́спода.

Богоро́диченъ: Ты́ еди́на во всѣ́хъ родѣ́хъ, Дѣ́во Пречи́стая, Ма́ти яви́лася еси́ Бо́га, Ты́ Божеству́ была́ еси́ пребыва́лище, Всенепоро́чная, не опа́льшися огне́мъ непристу́пнаго Свѣ́та. Тѣ́мже вси́ Тя́ благослови́мъ, Марíе Богоневѣ́стная.

Пѣ́снь 9.

Ирмо́съ: Ка́мень нерукосѣ́чный отъ несѣко́мыя горы́, Тебе́, Дѣ́во, краеуго́льный отсѣче́ся — Христо́съ, совокупи́вый разстоя́щаяся естества́. Тѣ́мъ, веселя́щеся, Тя́, Богоро́дице, велича́емъ.

Во́инъ и́стинный Христо́ва преповѣ́данія яви́лся еси́, Гео́ргіе, и безбо́жія ле́сти срацы́нскія потреби́тель бы́лъ еси́. Тѣ́мже ны́нѣ моли́твами твои́ми потреби́ ва́рварское воста́ніе, правосла́вному Импера́тору подъ но́ги си́хъ, сла́вне, низлага́я.

Аще и разсѣ́яны бы́ша свяще́нныя, му́дре, пло́ти твоя́, и а́ще кро́ви излія́шася, но побѣди́тельная отъ тебе́ проидо́ша. Тѣ́мже на на́съ востаю́щихъ си́лою твое́ю посрами́, и боговѣнча́ннаго Импера́тора на́шего Всероссíйскаго побѣди́теля яви́, любо́вію тебе́ сла́вящаго.

Ея́же жела́хомъ, па́мять свѣтоза́рную твою́ и честну́ю пріи́мше, почита́емъ, ра́дующеся же ду́хомъ и игра́юще, мо́лимся, блаже́нне Гео́ргіе: мѣ́сто сіе́, святи́тели и лю́ди, идѣ́же изво́ли сла́витися и́мя твое́, сохраня́й невре́дно, и Импера́тора на́шего Всероссíйскаго ски́петры и во́и утверди́.

Богоро́диченъ: Благослове́нную Марíю, и Бо́жію Ма́терь, и Дѣ́ву, пріиди́те вси́, вѣ́рою и любо́вію непреста́нно восхва́лимъ: Ея́же ра́ди обрѣ́тше вѣ́чное ра́дованіе.

Свѣти́ленъ. Подо́бенъ: Пло́тію усну́въ.

Свѣ́ту невече́рнему предстоя́, блаже́нне, съ му́ченическими ли́ки, воспѣва́ющія тя́ въ па́мяти твое́й отъ искуше́нія спаса́й моли́твами твои́ми. [Два́жды.]

[Сла́ва, и ны́нѣ,] богоро́диченъ:

На Тя́ съ Бо́гомъ упова́емъ, Пречи́стая, изъ Тебе́ Проше́дшему, сраспина́емыя Христу́, Твои́ми къ Нему́ мольба́ми невре́дны до конца́ ны́ сохрани́.

На хвали́техъ стихи́ры на 4, гла́съ 8. Самогла́сны:

Неизрече́нныхъ по́двигъ твои́хъ, му́чениче Гео́ргіе, ты́, боже́ственною распала́емь любо́вію, терпя́ же́зленное біе́ніе, и разрѣ́заніе пло́ти твоея́, и свѣща́ми опале́ніе, ника́коже прекло́ненъ пребы́лъ еси́, показу́я страда́льцемъ пе́рвымъ равно́ сопротивле́ніе твое́, о Христѣ́ укрѣпля́емь: го́рдаго змíя и мучи́теля посрами́лъ еси́ и Моаме́ѳова беззако́нная преда́нія попра́лъ еси́ нога́ми твои́ми. Тѣ́мже вси́, соше́дшеся, любо́вію па́мять твою́ почита́емъ, страстоте́рпче. [Два́жды.]

Терпѣли́вно свѣща́ми опаля́емь по всему́ тѣлеси́ за Владыку́ всѣ́хъ, Царя́ Христа́, и ра́нами хребе́тъ сокруша́емь, и ножи́ разрѣза́емь, и по гра́ду води́мъ: поруга́шася бо тебѣ́ нечести́віи и законопресту́пніи ту́рцы, надѣ́ющеся улови́ти адама́нта и къ свое́й пре́лести привлещи́, но Христо́съ тя́ кры́яше Свое́ю десни́цею. Ты́ же, му́чениче, претерпѣ́лъ еси́, зовы́й: Христо́вы любве́ отню́дъ ничто́же мя́ разлучи́тъ, ни сме́рть, ни живо́тъ, ни вся́кая друга́я му́ка. Тѣ́мже тя́ вси́ любо́вію ублажа́емъ и свѣтоно́сный де́нь страда́нія твоего́ почита́емъ.

Ты́ подо́бникъ великому́ченику Пантелеи́мону бы́лъ еси́, му́чениче Христо́въ Гео́ргіе: о́нъ бо помоли́ся во вре́мя стра́сти своея́ и вря́щее о́лово устуди́; тебе́ же злому́дренный мучи́тель по мно́гихъ му́кахъ преда́ огню́ и пе́съ мно́жество вве́рже, не хотя́ безу́мный честны́мъ твои́мъ моще́мъ сла́вимымъ бы́ти отъ христіа́нъ. Бо́гу же тя́ вельми́ просла́вльшу, му́чениче, во вре́мя страда́нія твоего́ дожде́мъ и гро́момъ стра́шнымъ и свѣ́томъ вели́кимъ, показа́ честно́е и многострада́льное тѣ́ло твое́ невреди́мо. И ны́нѣ моли́ся Го́сподеви, Ему́же съ му́ченики предстои́ши, о творя́щихъ па́мять твою́.

Сла́ва, гла́съ 6:

Ра́дуйся и весели́ся, Бо́лгарскій гра́де Среде́цъ сла́вный, красу́йся и лику́й, я́ко въ тебѣ́ прозябе́ пло́дъ сла́венъ прекра́сный, добропобѣ́дный вели́кій му́ченикъ Христо́въ Гео́ргій: все́ бо кова́рство мучи́теля врага́ му́жески попра́ и вѣне́цъ побѣ́ды досто́йно прія́лъ е́сть, проповѣ́да лю́демъ че́стнѣ покланя́тися въ Тро́ицѣ Еди́ному Бо́гу. Тѣ́мже и мы́ со дерзнове́ніемъ вопіе́мъ сего́ просла́вльшему Христу́ Бо́гу на́шему, умири́ти мíръ и спасти́ ду́ши на́ша.

И ны́нѣ, богоро́диченъ, или́ крестобогоро́диченъ:

Се́ у́бо ви́дѣхъ копіе́, пробо́дшее се́рдце, Мое́ Ча́до, я́коже прореко́ша Ми́ дре́вле, егда́ Тя узрѣ́хъ, всѣ́хъ сыно́въ земны́хъ краснѣ́йша: на Крестѣ́ бо во́лею съ разбо́йники, я́ко злодѣ́й, повѣ́шенъ бы́лъ еси́, Христе́.

На стихо́внѣ стихи́ры окто́иха. Сла́ва, гла́съ 2. Самогла́сенъ:

Пріиди́те, мучениколю́бцы, наслади́мся мы́сленно духо́вныя дне́сь трапе́зы, ю́же на́мъ предложи́ му́ченикъ Гео́ргій, ея́же а́нгели наслажда́ются, по ре́кшему проро́ку: хлѣ́бъ яде́ а́нгельскій. Съ ни́миже и ду́хомъ водворя́ется, и на́мъ про́ситъ отъ Спа́са Христа́ грѣхо́въ оставле́нія, того́ честну́ю па́мять соверша́ющимъ.

И ны́нѣ, богоро́диченъ, или́ крестобогоро́диченъ. Подо́бенъ: Егда́ отъ дре́ва:

Дре́ву кре́стному Тя́, Іису́се, пригвожде́на зря́щи, Неискусобра́чная, пла́чущи, глаго́лаше: Ча́до Сла́дкое, почто́ оста́вилъ еси́ Мене́, ро́ждшую Тя́, еди́ну, Свѣ́те непристу́пный Пребезнача́льнаго Отца́? Потщи́ся и просла́вися, я́ко да сла́ву получа́тъ боже́ственную и́же боже́ственныя стра́сти Твоя́ сла́вящіи.


НА ЛИТУРГІИ,

Блаже́нна отъ кано́на, пѣ́снь 3-я и 6-я и про́чая вся́ слу́жба му́ченическая: [Проки́менъ, гла́съ 7: Возвесели́тся пра́ведникъ о Го́сподѣ,* и упова́етъ на Него́. Сти́хъ: Услы́ши, Бо́же, гла́съ мо́й, внегда́ моли́ти ми ся къ Тебѣ́. Апо́столъ къ Тимоѳе́ю, зача́ло 292. Аллилу́ія, гла́съ 4: Пра́ведникъ, я́ко фи́никсъ процвѣте́тъ, я́ко ке́дръ, и́же въ Лива́нѣ, умно́жится. Сти́хъ: Насажде́ни въ дому́ Госпо́дни, во дво́рѣхъ Бо́га на́шего процвѣту́тъ. Ева́нгеліе Луки́, зача́ло 63.] Прича́стенъ: Въ па́мять вѣ́чную бу́детъ пра́ведникъ, [отъ слу́ха зла́ не убои́тся.]

Источникъ: Минíа, мѣ́сяцъ Ма́ій. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 222 об. – 228 об.

/ Къ оглавленію раздѣла /


Наверхъ / Къ титульной страницѣ

0