Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - вторникъ, 23 мая 2017 г. Сейчасъ на порталѣ посѣтителей - 15.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Ма́ія въ 25-й де́нь.
Тре́тіе обрѣ́теніе честны́я главы́ свята́го сла́внаго Проро́ка, Предте́чи и Крести́теля Іоа́нна.

ВЕЧЕРЪ.
Пое́мъ Блаже́нъ му́жъ.
На Го́споди воззва́хъ: стихи́ры пра́здника 3 и Предте́чи 5.
Аще же по́стъ, стихи́ры на 6, гла́съ 8. Подо́бенъ: О, пресла́внаго чудесе́!

Благода́ть неоску́дну источа́ющи,* свяще́нная глава́ твоя́,* блаже́нне Предте́че,* свяще́ннику богому́дру,* не вѣ́дящу показу́ется,* и́же потща́ся вѣ́рою и благода́тію,* явле́нно твори́тъ сея́ прише́ствіе,* освяща́яся съ людьми́ богому́дрыми и царе́мъ,* вѣ́ру правосла́вну те́плѣ утвержда́юще.

Тре́тіе пра́зднуемъ явле́ніе* твоея́ честны́я главы́,* ю́же Тро́ица вѣнча́ла е́сть,* усѣ́чена бы́вши, сла́вне,* ре́вности ра́ди боже́ственныя;* и обрѣ́теніемъ сея́ ра́дуются а́нгельстіи чи́ни,* му́ченикъ сосло́віе, боже́ственніи апо́столи и проро́цы вси́.* Съ ни́миже на́съ всегда́ помина́й,* Госпо́день Предте́че.

Сла́ва, гла́съ 6:

Сокро́вище боже́ственныхъ даро́въ, богохрани́мая глава́ твоя́, Предте́че, отъ земны́хъ нѣ́дръ возсія́, ю́же мы́ вѣ́рно пріе́млюще и покланя́ющеся, сла́вне, обогаща́емся отъ тебе́, Христо́въ Крести́телю, чудесы́ пресла́вными и согрѣше́ній проще́ніемъ.

И ны́нѣ, пра́здника. Аще ли по́стъ: И ны́нѣ, богоро́диченъ 1-й.
Вхо́дъ. Проки́менъ дне́.


Проро́чества Иса́іина чте́ніе:

Та́ко глаго́летъ Госпо́дь: утѣша́йте, утѣша́йте лю́ди Моя́, глаго́летъ Бо́гъ: свяще́нницы, глаго́лите въ се́рдцы Іерусали́му, умоли́те его́, я́ко умно́жися смире́ніе его́. Разрѣши́ся бо грѣ́хъ его́, я́ко прія́тъ изъ руки́ Госпо́дни сугу́ба согрѣше́нія своя́. Гла́съ вопію́щего въ пусты́ни: угото́вайте пу́ть Госпо́день, пра́вы твори́те стези́ Бо́гу на́шему. На го́ру высо́ку взы́ди, благовѣству́й Сіо́ну, возвыша́й крѣ́постію гла́съ сво́й, благовѣству́яй Іерусали́му: вознеси́те, не бо́йтеся. Азъ Го́сподь Бо́гъ, Азъ услы́шу убо́гихъ Изра́илевъ, и не оста́влю тѣ́хъ. Но отве́рзу отъ го́ръ рѣ́ки и посредѣ́ по́ля исто́чники, сотворю́ пусты́ню въ лу́гъ и жа́ждущую зе́млю во исто́чники водны́я. Да возвесели́тся не́бо свы́ше, и о́блацы да кропя́тъ пра́вду, да возсія́етъ земля́, и да прозя́бнетъ ми́лость, и пра́вда да возсія́етъ вку́пѣ. Гла́съ весе́лія возвѣсти́те, и услы́шано да бу́детъ, возвѣсти́те да́же до коне́цъ земли́, глаго́лите, я́ко изба́ви Госпо́дь раба́ Своего́ Іа́кова и, а́ще вжа́ждутъ въ пусты́ни, источи́тъ и́мъ во́ду изъ ка́мене. Возвесели́ся, непло́ды неражда́ющая, расто́ргни и возопíй, неболѣ́вшая, я́ко мно́га ча́да пусты́я па́че, не́жели иму́щія му́жа.

Проро́чества Малахíина чте́ніе:

Та́ко глаго́летъ Госпо́дь Вседержи́тель: се́ Азъ посыла́ю Ангела Моего́ предъ лице́мъ Твои́мъ, и́же угото́витъ пу́ть Тво́й предъ Тобо́ю. И пріи́детъ во хра́мъ Сво́й Госпо́дь, Его́же вы́ и́щете, и кто́ стерпи́тъ де́нь вхо́да Его́? Зане́же тому́ пріити́, я́ко о́гнь въ горни́лѣ и я́коже бы́ліе перу́щихъ, и очи́ститъ, пояда́я и очища́я, я́ко сребро́ и зла́то. И пріи́детъ къ ва́мъ судо́мъ, и бу́детъ свидѣ́тель ско́ръ на лука́выя, и на прелюбодѣ́йцы, и на клену́щіяся и́менемъ Мои́мъ во лжу́, и на лиша́ющія мзды́ нае́мника, и на наси́льствующія вдови́цы и пха́ющія си́рыя, и на уклоня́ющія су́дъ прише́льца, и на небоя́щіяся Его́, глаго́летъ Госпо́дь Вседержи́тель. Зане́ Азъ Госпо́дь Бо́гъ ва́шъ, и не измѣню́ Себе́; и вы́, сы́нове Іа́ковли, уклони́стеся отъ зако́на и не сохрани́сте. Сего́ ра́ди обрати́теся ко Мнѣ́, и обращу́ся къ ва́мъ, глаго́летъ Госпо́дь Вседержи́тель, и ублажа́тъ ва́съ вси́ язы́цы, и разумѣ́йте, я́ко Азъ Госпо́дь, смотря́яй посреди́ пра́веднаго и посреди́ беззако́нника въ де́нь о́нъ, въ о́ньже сотворю́ снабдѣ́ніе лю́бящимъ Мя́. Позна́йте у́бо и помяни́те зако́нъ Моисе́овъ, раба́ Моего́, я́коже заповѣ́да ва́мъ въ Хори́вѣ, ко всему́ Изра́илю повелѣ́ніе и оправда́ніе. И се́ Азъ послю́ ва́мъ Илію́ Ѳесви́тянина, пре́жде да́же не пріити́ дню́ Госпо́дню вели́кому, просвѣще́нному, и́же напра́витъ се́рдце отца́ къ сы́ну и се́рдце человѣ́ка ко и́скреннему своему́, да не, прише́дъ, поражу́ зе́млю вско́рѣ, глаго́летъ Госпо́дь Вседержи́тель, Бо́гъ Святы́й Изра́илевъ.

Прему́дрости Соломо́ни чте́ніе:

Пра́ведникъ, а́ще пости́гнетъ сконча́тися, въ поко́и бу́детъ. Осу́дитъ же пра́ведникъ умира́яй живу́щія нечести́выя. Узрятъ бо кончи́ну пра́веднаго и не разумѣ́ютъ, что́ совѣща́ша о не́мъ, я́ко пове́ржетъ Госпо́дь нечести́выя безгла́сны ни́цъ и поколе́блетъ и́хъ отъ основа́ній, и до послѣ́дняго исче́знутъ въ болѣ́зни, и па́мять и́хъ поги́бнетъ. Пріи́дутъ бо въ помышле́ніе согрѣше́ній свои́хъ ужа́сни, и обличи́тъ и́хъ сопроти́въ беззако́нія и́хъ. Тогда́ ста́нетъ въ дерзнове́ніи мно́зѣ пра́ведникъ предъ лице́мъ оскорби́вшихъ его́ и отмета́ющихъ труды́ его́. Ви́дѣвше же его́, смяту́тся стра́хомъ мно́гимъ и ужа́снутся о пресла́вномъ спасе́ніи его́. Реку́тъ бо къ себѣ́, ка́ющеся, и въ тѣснотѣ́ ду́ха воздо́хнутъ, и реку́тъ: се́й бѣ́, его́же имѣ́хомъ нѣ́когда въ посмѣ́хъ и въ при́тчу поноше́нія, безу́мніи, житіе́ его́ вмѣни́хомъ неи́стово и кончи́ну его́ безче́стну. Ка́ко вмѣни́ся въ сынѣ́хъ Бо́жіихъ и во святы́хъ жре́бій его́ е́сть? Убо заблуди́хомъ отъ пути́ и́стиннаго, и пра́вды свѣ́тъ не облиста́ на́мъ, и со́лнце не возсія́ на́мъ. Беззако́нныхъ испо́лнихомся сте́зь и поги́бели и ходи́хомъ стези́ непрохо́дны, пути́ же Госпо́дня не разумѣ́хомъ.

На стихо́внѣ стихи́ры, гла́съ 1. Подо́бенъ: Небе́сныхъ чино́въ.

Пріиди́те, торжество́ боже́ственное свѣ́тло соверши́мъ:* Свѣ́та бо свѣти́льникъ,* гла́съ же Сло́ва, дру́гъ Женихо́въ,* вели́кій свѣти́льникъ и́стины яви́ся* Крести́тель Госпо́день,* показа́въ на́мъ святу́ю главу́ свою́.

Сти́хъ: Та́мо возращу́ ро́гъ Дави́дови,* угото́вахъ свѣти́льникъ пома́занному Моему́.

О блу́днѣмъ беззако́ніи Иродова дѣя́нія* и прелюбодѣ́йственныя скве́рны* беззако́ннующа обличи́лъ еси́, я́ко проповѣ́дникъ чистоты́,* во главу́ усѣ́ченъ бы́лъ еси́, Предте́че,* ю́же благода́тію боже́ственныхъ чудодѣя́ній,* вѣ́рнымъ ны́нѣ откры́лъ еси́.

Сти́хъ: Помяни́, Го́споди, Дави́да* и всю́ кро́тость его́.

Якоже богото́чный благода́тей исто́чникъ,* отъ земны́хъ нѣ́дръ,* источа́ющь чудеса́, главу́ Предте́чеву,* я́ко сокро́вище дарова́ній,* пріе́мше отъ Бо́га явле́нну,* ра́достно восхва́лимъ, празднолю́бцы.

Сла́ва, гла́съ 2:

Якоже боже́ственныхъ умышле́ній, всечестна́я ра́ка неизрече́ннаго существа́, я́сно прови́дѣвшая та́инство, глава́ твоя́, я́ко отъ ложе́снъ ма́тернихъ, отъ сокро́вищъ земны́хъ дне́сь возсія́, Іоа́нне всехва́льне, и облагово́ни всю́ подсо́лнечную, освяще́нія пролива́ющая мѵ́ро, и мы́сленно проповѣ́дающая пу́ть покая́нія, и Спа́су всѣ́хъ моля́щаяся о душа́хъ на́шихъ.

И ны́нѣ, дне́ или́ богоро́диченъ.


Тропа́рь, гла́съ 4:

Яко боже́ственное сокро́вище, сокрове́нное въ земли́, Христо́съ откры́ главу́ твою́ на́мъ, проро́че и Предте́че. Вси́ у́бо, соше́дшеся въ сея́ обрѣ́теніе, пѣ́сньми богоглаго́ливыми Спа́са воспои́мъ, спаса́юща на́съ отъ тлѣ́нія моли́твами твои́ми.

Сла́ва, и ны́нѣ: Еже отъ вѣ́ка утае́ное... Или́ пра́здника.



НА УТРЕНИ
На Бо́гъ Госпо́дь: а́ще е́сть 50-ца, тропа́рь пра́здника, два́жды. Сла́ва, Предте́чи. И ны́нѣ, пра́здника.
Аще же ни́, тропа́рь Предте́чи, два́жды. Сла́ва, и ны́нѣ, богоро́диченъ.


По 1-й стихоло́гіи сѣда́ленъ, гла́съ 4. Подо́бенъ: Ско́ро предвари́.

Отъ земли́ возсія́вши, Предте́чева глава́, лучи́ испуща́етъ нетлѣ́нія вѣ́рнымъ исцѣле́ній: свы́ше собира́етъ мно́жество Ангелъ, до́лѣ созыва́етъ человѣ́ческій ро́дъ, единогла́сную возсыла́ти сла́ву Христу́ Бо́гу. [Два́жды.]

Сла́ва, и ны́нѣ, пра́здника.
Аще ли по́стъ: Сла́ва, и ны́нѣ, богоро́диченъ. Подо́бенъ:

Дѣ́во Всенепоро́чная, Яже Пресу́щественнаго Бо́га ро́ждшая, со Предте́чею Того́ непреста́нно моли́, оставле́ніе прегрѣше́ній, и исправле́ніе житія́ да́ти на́мъ пре́жде конца́, вѣ́рою и любо́вію пою́щимъ Тя́ по до́лгу, еди́на Всепѣ́тая.

По 2-й стихоло́гіи сѣда́ленъ, гла́съ 4. Подо́бенъ: Вознесы́йся.

Изда́вшися, я́ко зла́то отъ руды́, свяще́нная твоя́ глава́ пресла́вно отъ незаходи́мыхъ нѣ́дръ земны́хъ, обогати́ вѣ́рныхъ вся́ мы́сли разумѣ́ніемъ боже́ственнымъ ны́нѣ, пока́йтеся, вопію́щи обы́чно; е́йже покланя́ющеся, Предте́че, Христа́ велегла́сно вѣ́рою сла́вимъ. [Два́жды.]

Сла́ва, и ны́нѣ, пра́здника или́ богоро́диченъ:

Иже на престо́лѣ Херуви́мстѣмъ сѣдя́й и въ нѣ́дрѣхъ Отчихъ водворя́яся, я́ко на престо́лѣ святѣ́мъ сѣди́тъ Свое́мъ, Влады́чице, въ нѣ́дрѣхъ Твои́хъ. Вопло́щся бо Бо́гъ вои́стинну, воцари́ся надъ всѣ́ми язы́ки, и разу́мно ны́нѣ пои́мъ Ему́, Его́же умоли́ спасти́ся рабо́мъ Твои́мъ.

По поліеле́и сѣда́ленъ, гла́съ 4. Подо́бенъ: Яви́лся еси́.

Иродъ, Предте́че, беззако́нновавъ, честну́ю главу́ твою́ мече́мъ отсѣче́ бѣ́днѣ, окая́нный, ю́же отъ любве́, вѣ́рніи, цѣлу́емъ.

Сла́ва, гла́съ 8. Подо́бенъ: Повелѣ́нное.

Крести́телева глава́ кры́яшеся, я́ко би́серъ, въ земли́ вла́жнѣй, и, я́ко свѣ́щникъ богосвѣ́телъ, укра́шена, озаря́етъ, чудотворя́щи мíру всему́: я́ко у́тро, возсія́ всеблаголѣ́пно со́лнцу Предте́ча, и невече́рнимъ свѣ́томъ возвѣща́я па́ки на́мъ, се́, — взыва́я, — Агнецъ Бо́жій.

И ны́нѣ, богоро́диченъ:

Яже непремѣ́ннаго Бо́га поро́ждшая, премѣня́емое при́сно се́рдце мое́ грѣхо́мъ и лѣ́ностію, прило́гми льсти́ваго, утверди́, Блага́я, моли́твами Ма́терними Твои́ми, я́ко да и а́зъ благода́рно сла́влю Тя́, Богороди́тельнице Марíе, поми́луй ста́до Твое́, е́же стяжа́ла еси́, Всенепоро́чная.

Степе́нна, 1-й антифо́нъ 4-го гла́са. Проки́менъ, гла́съ 4: Та́мо возращу́ ро́гъ Дави́дови,* угото́вахъ свѣти́льникъ пома́занному Моему́. Сти́хъ: Помяни́, Го́споди, Дави́да и всю́ кро́тость его́. Вся́кое дыха́ніе... Ева́нгеліе отъ Луки́, зача́ло 31.

По 50-мъ псалмѣ́ стихи́ра, гла́съ 6:

Яже пе́рвѣе на блю́дѣ, Иродову беззако́нную нечистоту́ обличи́вшая, покая́ніе же всѣ́мъ проповѣ́давшая вѣ́рнымъ, честна́я глава́ Крести́теля Христо́ва, отъ сокро́вищъ земны́хъ я́вльшаяся, предлежи́тъ вѣ́рно притека́ющимъ къ не́й, и прикаса́ющимся со стра́хомъ, и покланя́ющимся любо́вію душе́вною, да́рующая разрѣше́ніе прегрѣше́ній, проше́ніемъ подае́тъ потре́бная и ве́лію ми́лость.

Аще е́сть 50-ца, кано́нъ пра́здника со ирмосо́мъ на 6. Аще ли по́стъ, кано́нъ Богоро́дицы со ирмосо́мъ на 6 и Предте́чи на 8, гла́съ 8.


Пѣ́снь 1.

Ирмо́съ: Колесницегони́теля фарао́ня погрузи́ чудотворя́й иногда́ Моисе́йскій же́злъ, крестообра́зно порази́въ и раздѣли́въ мо́ре, Изра́иля же бѣглеца́, пѣшехо́дца спасе́, пѣ́снь Бо́гови воспѣва́юща.

Гла́съ Сло́ва бы́въ, разрѣши́ безгла́сіе мое́, я́коже отцу́ дре́вле, ра́достнымъ гла́сомъ восхвали́ти тя́ въ настоя́щее обрѣ́теніе главы́ твоея́, блаже́нне Предте́че, небе́сный человѣ́че.

На главу́ ру́ку положи́вый, Предте́че, Це́ркви Бо́жіи, твою́ честну́ю главу́, позна́вшую Тро́ицы явле́ніе, проявля́еши сіе́ тре́тіе, прея́вственно освяща́ющую правосла́вныхъ собра́нія.

Не терпя́ на мно́зѣ сокрыва́тися, Госпо́день Предте́че, устроя́еши па́ки яви́тися дне́сь, не въ ста́мнѣ затворе́нъ, сре́бренѣ же сосу́дѣ въ свяще́нномъ мѣ́стѣ положе́нъ, священнодѣ́йственнику извѣще́нъ.

Ца́рствующій я́вѣ гра́дъ ны́нѣ пріе́млетъ свяще́нный да́ръ, и́же пре́жде лише́нъ бы́въ главы́ твоея́, Предте́че, тоя́ вхо́домъ крася́ся, ны́нѣ ра́дуется и достодо́лжно ублажа́етъ тя́.

Богоро́диченъ: Отъ чре́ва непло́дныя прозя́блъ еси́, гото́вя Творцу́ сло́вомъ пути́, всехва́льне, отъ Дѣ́вы возсія́вшему Пресвяты́я несказа́нно, Юже Богоро́дицу вѣ́дуще, вси́ ро́ди, ублажа́емъ.

Катава́сія пра́здника. Аще ли по́стъ: Отве́рзу уста́ моя́...


Пѣ́снь 3.

Ирмо́съ: Небе́снаго кру́га Верхотво́рче, Го́споди, и Це́ркве Зижди́телю, Ты́ мене́ утверди́ въ любви́ Твое́й, жела́ній кра́ю, вѣ́рныхъ утвержде́ніе, Еди́не Человѣколю́бче.

Блу́днымъ пляса́ніемъ, свяще́нная глава́ твоя́, скве́рнѣй женѣ́ вдана́ бы́вши, рука́ма ноша́шеся, ны́нѣ же цѣлому́дренно священнодѣ́йственника дла́ньми, свяще́нно во святу́ю це́рковь вно́сится.

Благоче́стно срѣта́етъ тя́ вѣ́рныхъ совокупле́ніе, съ священнодѣ́йственникомъ же ца́рь, сла́вне Предте́че, пою́ще ра́достію, и предваря́етъ тя́ любо́вію, освяща́емь прише́ствіемъ твои́мъ.

Отъ незаходи́мыхъ свяще́нныхъ, я́ко свѣтоза́рное со́лнце, свяще́ннѣйшая глава́ твоя́ возсія́вши, всю́ просвѣти́ вселе́нную, проро́че Христо́въ и Предте́че, боже́ственными свѣтлостьми́.

Богоро́диченъ: Отъ непло́дныхъ чре́слъ свѣтоявле́нна возсія́лъ еси́ звѣзда́ Со́лнца сла́вы, предходя́й Возсія́вшаго отъ Дѣви́ческа о́блака, Крести́телю, и разрѣ́шшаго но́щь многобо́жную.

Конда́къ и и́косъ пра́здника.
Та́же сѣда́ленъ, гла́съ 4. Подо́бенъ: Вознесы́йся.

Изда́вшися, я́ко зла́то отъ руды́, свяще́нная твоя́ глава́ пресла́вно, отъ незаходи́мыхъ не́дръ земны́хъ, обогати́, Христо́въ Крести́телю, всѣ́хъ притека́ющихъ въ тоя́ обрѣ́теніе, пѣ́сньми велича́ющихъ Спа́са и Зижди́теля, подаю́щаго на́мъ тебе́ ра́ди ве́лію ми́лость. [Два́жды.]

Сла́ва, и ны́нѣ, пра́здника или́ богоро́диченъ:

Грѣхолюби́въ сы́й, молю́ Тя́, безгрѣ́шнаго Бо́га ро́ждшую, взе́млющаго грѣхи́ мíра, Пречи́стая, многогрѣ́шную ду́шу мою́ уще́дрити, и грѣхи́ моя́ мно́гія очи́стити: грѣ́шныхъ бо Ты́ еси́ очище́ніе, и спасе́ніе вѣ́рныхъ, и заступле́ніе.

Аще ли по́стъ, сѣда́ленъ то́чію, два́жды. Сла́ва, и ны́нѣ, богоро́диченъ.


Пѣ́снь 4.

Ирмо́съ: Услы́шахъ, Го́споди, смотре́нія Твоего́ та́инство, разумѣ́хъ дѣла́ Твоя́ и просла́вихъ Твое́ Божество́.

Проро́ковъ я́ко превы́шшій, Прорече́ннаго ви́дѣти сподо́бился еси́, Иліино́ю предъиды́й си́лою предъ Ни́мъ, блаже́нне Предте́че.

Пресла́вную главу́ твою́, мѵ́ры исцѣле́ній источа́ющу, тре́тіе уже́ яви́лъ еси́, смра́дныя стра́сти отгоня́ющую.

Не въ ста́мнѣ, я́коже пе́рвѣе, въ сосу́дѣ же сре́бренѣ погребе́на явля́ется глава́ твоя́ въ свяще́ннѣмъ мѣ́стѣ, досточу́дне.

Соше́дшеся, почерпи́те вси́ исцѣле́нія неистощи́мая отъ исто́чника издава́ема, честны́я главы́ Предте́чи Христо́ва.

Богоро́диченъ: Смири́вшагося спаси́ мя, высокому́дренно пожи́вшаго, ро́ждшая Возне́сшаго смири́вшееся естество́, Пречи́стая.

Пѣ́снь 5.

Ирмо́съ: Вску́ю мя́ отри́нулъ еси́ отъ лица́ Твоего́, Свѣ́те незаходи́мый, и покры́ла мя́ е́сть чужда́я тма́, окая́ннаго? Но обрати́ мя, и къ свѣ́ту за́повѣдей Твои́хъ, пути́ моя́ напра́ви, молю́ся.

Яко хода́тай ве́тхаго и но́ваго бы́въ свяще́ннѣйшій, хода́тайствы боже́ственными на́ше обветша́ніе обнови́, обновле́ніе соверша́ющихъ но́вымъ явле́ніемъ главы́ твоея́, блаже́нне Предте́че.

Отъ Кома́нъ прине́сшу благода́ть исцѣле́ній главу́ твою́ къ Ца́рскому гра́ду, Предте́че, созыва́еши гра́ды дне́сь къ тоя́ прише́ствію: собира́ются вѣ́рныхъ мно́жества, просвѣще́нія нетлѣ́ннаго исполня́еми.

Ца́рь вхо́ду главы́ твоея́ мно́жае, не́же багряни́цѣ, ра́дуется, свяще́нникъ же, боже́ственный Богоно́сца тезоимени́тый, Предте́че, дла́ньми сію́ обдержа́, соблагословля́етъ, благословя́ вѣ́рныхъ соверше́нства.

Богоро́диченъ: Влады́ку ро́ждши, яви́лася еси́ превы́шшая го́рнихъ си́лъ и земны́хъ естество́ богосодѣ́лала еси́, Отрокови́це Всенепоро́чная. Тѣ́мже Богоро́дицу всеи́стинную, душе́ю и язы́комъ, вѣ́рніи, Тя́, Дѣ́во, сла́вимъ.

Пѣ́снь 6.

Ирмо́съ: Очи́сти мя́, Спа́се, мно́га бо беззако́нія моя́, и изъ глубины́ зо́лъ возведи́, молю́ся, къ Тебѣ́ бо возопи́хъ, и услы́ши мя́, Бо́же спасе́нія моего́.

Истина отъ земли́, глава́ возсія́вшая Крести́теля Твоего́, Христе́, лжу́ отгна́, ересе́й разори́ го́рькую зи́му и мíръ просвѣти́ла е́сть.

Почерпи́те просвѣще́ніе, и благода́ть Бо́жію, и ми́лость: и главы́, и ду́ши освяти́те, главѣ́ прикосну́вшеся Предте́чи благода́ти, Боже́ственному верху́ прикосну́вшагося въ вода́хъ.

Главы́ враго́въ подъ но́зѣ сокруши́ти Импера́тору на́шему, моли́ся, Предте́че, любо́вію честну́ю твою́ главу́ чту́щему, Ирода обличи́вшую.

Богоро́диченъ: Су́шимъ во а́дѣ Свѣ́тъ проповѣ́далъ еси́, приходя́щаго отъ крове́й Дѣви́ческихъ, пло́тію обложе́на бы́вша Человѣ́ка, на благодѣя́ніе человѣ́ковъ, блаже́нне Предте́че.

Конда́къ, гла́съ 6. Подо́бенъ: Еже о на́съ.

Свѣтоявле́нный и боже́ственный въ мíрѣ сто́лпъ, Со́лнца свѣти́льникъ, Предте́ча, главу́ свѣтоно́сную и боже́ственную свою́ показа́вый въ концѣ́хъ, освяща́етъ то́й вѣ́рно покланя́ющихся и взыва́ющихъ: Христо́въ прему́дрый Крести́телю, спаси́ всѣ́хъ на́съ.

Икосъ:

Отъ земли́, я́коже исто́чникъ ра́йскій, глава́ боголюби́вая Предте́чева струи́ испуща́етъ благода́ти, и чуде́съ то́ки подава́етъ всѣ́мъ тре́бующимъ. Присту́пимъ у́бо вси́, почерпе́мъ усе́рдно исцѣле́ній боже́ственныя сея́ пото́ки: напоя́етъ бо ду́ши дарова́ніи непреста́нными, и потопля́етъ тѣле́сныя болѣ́зни, и вся́къ неду́гъ благовре́меннѣ отъе́млетъ. Сію́ у́бо воспое́мъ любо́вію, и цѣлу́емъ вѣ́рою, че́стно облобыза́юще, и пѣ́сньми, я́ко вѣнцы́, сію́, вѣ́рніи, вѣнча́емъ. Предочи́стимъ на́ша скве́рны мы́сленныя, и боже́ственными добродѣ́тельми украси́мъ ду́ши и вопіе́мъ тве́рдо: Христо́въ прему́дрый Крести́телю, спаси́ всѣ́хъ на́съ.

Пѣ́снь 7.

Ирмо́съ: Отъ Іуде́и доше́дше, о́троцы въ Вавило́нѣ иногда́, вѣ́рою Тро́ическою пла́мень пе́щный попра́ша, пою́ще: отце́въ Бо́же, благослове́нъ еси́.

Со́лнца сла́вы пресвѣ́тлый свѣ́щникъ бы́лъ еси́, Предте́че, тму́ отгоня́я ле́сти и просвѣща́я вѣ́рою зову́щихъ: оте́цъ на́шихъ Бо́же, благослове́нъ еси́.

Пра́здникъ моле́бенъ честна́я Це́рковь се́й, Предте́че, свѣ́тло соверша́етъ, главу́ твою́ чту́щи и обы́чно зову́щи: оте́цъ на́шихъ Бо́же, благослове́нъ еси́.

Провозвѣсти́лъ еси́ Сло́ва стра́шное прише́ствіе боже́ственными игра́ніи, возвѣща́еши твоея́ главы́ обрѣ́теніе, проро́че, нело́жными усты́ тя́ жела́ющему те́плѣ священнодѣ́йственному па́стырю.

Богоро́диченъ: Дѣ́вство и рождество́ па́че естества́ и сло́ва въ Тебѣ́ стече́ся, Бо́га бо воплоще́нна родила́ еси́ несказа́нно, Богоро́дице, Ему́же пое́мъ: оте́цъ на́шихъ Бо́же, благослове́нъ еси́.

Пѣ́снь 8.

Ирмо́съ: Седмери́цею пе́щь халде́йскій мучи́тель богочести́вымъ неи́стовно разжже́, си́лою же лу́чшею спасе́ны сія́ ви́дѣвъ, Творцу́ и Изба́вителю вопія́ше: о́троцы, благослови́те, свяще́нницы, воспо́йте, лю́діе, превозноси́те во вся́ вѣ́ки.

Крести́тель и Предте́ча, земны́й Ангелъ, беззако́нія извѣ́стный укори́зникъ, Тро́ицы явле́ніе пре́жде ви́дяй, тре́тіе явля́етъ главу́ свою́, всѣ́мъ любо́вію пою́щимъ: свяще́нницы, благослови́те, лю́діе, превозноси́те Христа́ во вѣ́ки.

Срѣта́етъ усе́рдно тебе́ ца́рь кротча́йшій вку́пѣ со христолюби́выми людьми́, прехва́льне, па́стырей же пе́рвѣйшій, простира́етъ ру́цѣ къ тебѣ́, и, свои́ прилага́я пе́рси, игра́етъ съ весе́ліемъ, и вопіе́тъ благода́рно: лю́діе, превозноси́те Христа́ во вѣ́ки.

Па́че зла́та глава́ твоя́ просія́вши, Предте́че, сокро́виществованна въ сре́бренныхъ сосу́дѣхъ, я́ко бога́тство многоцѣ́нно, Ца́рскому гра́ду даде́ся. Тоя́ дарова́ніи богатѣ́я боже́ственными, усе́рдно пое́тъ: свяще́нницы, благослови́те, лю́діе, превозноси́те Христа́ во вѣ́ки.

Богоро́диченъ: Во чре́вѣ носи́мому, вся́ческая нося́щему, блаже́нне Іоа́нне, поклони́лся еси́, ра́дуяся, во чре́вѣ кры́емь непло́днѣмъ, прехва́льне. Его́же, ро́ждшася отъ Святы́я Дѣ́вы, Агнца Бо́жія проповѣ́дая, благоче́стно возопи́лъ еси́: лю́діе, превозноси́те во вся́ вѣ́ки.

Пѣ́снь 9.

Ирмо́съ: Устраши́ся вся́къ слу́хъ неизрече́нна Бо́жія снизхожде́нія, я́ко Вы́шній во́лею сни́де да́же и до пло́ти отъ Дѣви́ческаго чре́ва бы́въ Человѣ́къ. Тѣ́мже Пречи́стую Богоро́дицу, вѣ́рніи, велича́емъ.

Непло́дныя преподо́бенъ пло́дъ, въ рожде́нныхъ жена́ми превы́шшій, Царя́ Христа́ во́инъ, вели́кій Предте́ча, проповѣ́давый Агнца, мíра прегрѣше́нія взе́млющаго, да восхва́лится свяще́нными пѣ́сньми.

Ча́шу испо́лнивъ бога́тно, созыва́еши съ высо́кимъ проповѣ́даніемъ Це́рковь Христо́ву обрѣ́теніемъ главы́, Предте́че: пріиди́те, насы́титеся, — вопія́, — кра́сныхъ, и́хже угото́вахъ, и возвели́чите Су́щаго, человѣ́комъ подае́маго.

Ца́рь тя́, Ангеле Бо́жій, ангелоимени́тый въ свое́ ца́рство, ра́дуяся, пріе́млетъ, сослужа́щаго съ си́мъ добрѣ́йша пастыренача́льника благоче́стно и зва́ніемъ, и благода́тію украша́ема я́вѣ богоно́снаго свяще́нника и богому́дреннаго.

Облиста́лъ еси́ боже́ственное просвѣще́ніе главы́ твоея́ вхо́домъ, сла́вне, и уясни́лъ еси́ вѣ́рныхъ сердца́, вопію́щихъ ти́: Со́лнца незаходи́мый свѣти́льниче, всесвяты́й Предте́че, страсте́й мглы́ на́съ, и ве́сь гра́дъ, и лю́ди изба́ви.

Богоро́диченъ: Пощади́ мя, Спа́се, рожде́йся и сохра́нь Ро́ждшую Тя́ нетлѣ́нну по рождествѣ́, егда́ ся́деши суди́ти дѣло́мъ мои́мъ, беззако́нія пре́зри и грѣхи́ моя́, я́ко безгрѣ́шенъ и ми́лостивъ Бо́гъ и Человѣколю́бецъ.

Свѣти́ленъ. Подо́бенъ: Посѣти́лъ ны́.

Не терпя́ше на мно́зѣ кры́ти земля́ главу́ твою́, я́коже гла́съ вопію́щаго; ты́ обрѣ́теніе ея́, о́бразомъ нѣ́коимъ возвѣсти́лъ еси́, Предте́че Іоа́нне, въ о́ньже тя́ почита́емъ.

Сла́ва. Подо́бенъ: Со ученики́.

Во обрѣ́теніи, Предте́че, честны́я твоея́ главы́, ца́рь христолюби́вый мно́жае ра́довашеся, я́коже о свое́й ца́рской порфи́рѣ. Его́же возме́здія побѣ́дами свы́ше укрѣпля́емь, и на́съ соблюди́, покры́й твои́ми моли́твами, Крести́телю прехва́льне Іоа́нне, свѣ́тло пра́зднующихъ и любо́вію тя́ чту́щихъ.

И ны́нѣ, пра́здника или́ богоро́диченъ:

На Тя́ съ Бо́гомъ упова́емъ, Пречи́стая, изъ Тебе́ проше́дшему, сраспина́еміи Христу́, Твои́ми къ Нему́ мольба́ми невре́дны до конца́ ны́ сохрани́.

На хвали́техъ стихи́ры на 4, гла́съ 5. Подо́бенъ: Ра́дуйся.

Ра́дуйся, свяще́нная главо́, и свѣтоно́сная, и Ангеломъ говѣ́йная, я́же мече́мъ усѣ́чена дре́вле, и о́стрыми обличе́ньми нечистоты́ сту́дъ посѣ́кшая, исто́чникъ чуде́съ, вѣ́рныя напая́юща, и я́же Спа́сово спаси́тельное прише́ствіе возвѣсти́вшая, и наи́тіе Ду́ха дре́вле уви́дѣвшая, къ Сему́ все́льшаяся, ве́тхой же и но́вой хода́тайствовавшая благода́ти: Христа́ умоли́, душа́мъ на́шимъ дарова́ти ве́лію ми́лость.

Въ сосу́дѣ скуде́льнѣ сокрове́нная иногда́ Предте́чева глава́ яви́ся, отъ земны́хъ нѣ́дръ изда́вшаяся я́вственнѣ, и чуде́съ струи́ источа́ющая: и́бо въ вода́хъ главу́ омы́, превы́спренняя ны́нѣ покрыва́ющаго вода́ми, и одождя́ющаго человѣ́комъ боже́ственное оставле́ніе. Сію́ у́бо ублажи́мъ, вои́стинну пресла́вну, и въ сея́ обрѣ́теніи ра́достно пра́зднуемъ, Христа́ моля́ще дарова́ти душа́мъ на́шимъ ве́лію ми́лость.

Глава́, я́же А́гнца Бо́жія воспроповѣ́давшая, пло́тію я́вльшагося, и всѣ́мъ покая́нія спаси́тельныя пути́ Боже́ственными за́повѣдьми извѣсти́вшая, я́же пре́жде Иродово законопреступле́ніе обличи́вшая, и сего́ ра́ди отсѣ́чена отъ тѣлесе́, и на вре́мя подъе́мшая сокрове́ніе, я́коже свѣтоявле́нное на́мъ возсія́ со́лнце, пока́йтеся, — вопію́щая, — и ко Христу́ ны́нѣ приложи́теся во умиле́ніи душе́внѣмъ, подаю́щему мíрови ве́лію ми́лость.

Сла́ва, гла́съ 6:

Всечестну́ю главу́ Крести́теля Твоего́, Го́споди, я́вльшуюся дне́сь отъ земли́, со гла́сомъ хвале́нія пріе́мшіи вѣ́рно, въ мольбу́, Человѣколю́бче, грѣ́шніи раби́ Твои́, приводя́ще, мо́лимся, тоя́ ра́ди улучи́ти въ де́нь суда́ отъ Тебе́ очище́ніе и ве́лію ми́лость.

И ны́нѣ, пра́здника или́ богоро́диченъ.


Славосло́віе вели́кое. По трисвято́мъ тропа́рь Предте́чи. Сла́ва, и ны́нѣ, пра́здника или́ богоро́диченъ: Еже отъ вѣ́ка... Ектеніи́. И отпу́стъ.



НА ЛИТУРГИИ

Блаже́нна, отъ кано́на Предте́чи пѣ́снь 3-я и 6-я. Проки́менъ, гла́съ 7: Возвесели́тся пра́ведникъ о Го́сподѣ* и упова́етъ на Него́. Сти́хъ: Услы́ши, Бо́же, гла́съ мо́й, внегда́ моли́ти ми ся къ Тебѣ́. Апо́столъ къ Кори́нѳяномъ, зача́ло 176. Алли́луія, гла́съ 5: Свѣ́тъ возсія́ пра́веднику, [и пра́вымъ се́рдцемъ весе́ліе.]. Сти́хъ: Истина отъ земли́ возсія́, и пра́вда съ небесе́ прини́че. Ева́нгеліе отъ Матѳе́я, зача́ло 40. Прича́стенъ: Въ па́мять вѣ́чную бу́детъ пра́ведникъ, [отъ слу́ха зла́ не убои́тся].


(Зри́) Аще случи́тся обрѣ́теніе главы́ Іоа́нна Предте́чи въ недѣ́лю 7-ю по Па́сцѣ, святы́хъ оте́цъ:

Оставля́ется слу́жба пра́здника Вознесе́нія, и пое́тся слу́жба воскре́сна, и Предте́чи и святы́хъ отце́въ. Въ суббо́ту на ма́лѣй вече́рни пое́мъ, я́коже указа́ся во главѣ́ Богосло́ва.

На вели́цѣй вече́рни по обы́чной каѳи́смѣ, на Го́споди воззва́хъ: стихи́ры воскре́сны 3, и Предте́чи 3, и святы́хъ отце́въ 4. Сла́ва, отце́въ. И ны́нѣ, богоро́диченъ воскре́сенъ гла́са. По вхо́дѣ чте́нія отце́въ и Предте́чи. На литíи стихи́ра хра́ма и Предте́чи хвали́тны. Сла́ва, отце́въ. И ны́нѣ, богоро́диченъ. На стихо́внѣ воскре́сны. Сла́ва, отце́въ. И ны́нѣ, богоро́диченъ. На благослове́ніи хлѣ́бовъ, тропа́рь, Богоро́дице Дѣ́во, два́жды. И отце́въ, еди́ножды. И чте́ніе въ Дѣя́ніихъ апо́стольскихъ.

На у́трени на Бо́гъ Госпо́дь, тропа́рь воскре́сный и отце́въ. Сла́ва, Предте́чи. И ны́нѣ, богоро́диченъ. По каѳи́смахъ сѣда́льны воскре́сны и чте́ніе во Ева́нгеліи. Та́же поліеле́й, и сѣда́льны Предте́чи, о́ба по еди́ножды, безъ богоро́дичновъ. Сла́ва, сѣда́ленъ, и́же по поліеле́и. И ны́нѣ, богоро́диченъ и чте́ніе Предте́чи. Про́чее же пое́мъ на у́трени, и на часѣ́хъ, и на Литургíи, я́коже указа́ся во главѣ́ Богосло́ва.

(Зри́) Подоба́етъ вѣ́дати: Аще случи́тся па́мять обрѣ́тенія честны́я главы́ въ суббо́ту Пентико́стную или́ въ недѣ́лю Пятьдеся́тную:

Пое́мъ слу́жбу его́ въ четверто́къ 7-я недѣ́ли.

(Зри́) Аще ли же случи́тся обрѣ́теніе честны́я главы́ Іоа́нна Предте́чи въ понедѣ́льникъ Пятьдеся́тный:

Пое́мъ на у́трени во вто́рникъ, съ пра́здничною слу́жбою вку́пѣ.

(Мрк) Аще ли случи́тся обрѣ́теніе главы́ Предте́чевы въ пято́къ седмы́я недѣ́ли по Па́сцѣ, во отда́ніе Вознесе́нія Христо́ва, или́ въ суббо́ту предъ недѣ́лею всѣ́хъ святы́хъ, во отда́ніе пра́здника Пятьдеся́тницы.

И пое́мъ слу́жбу его́ на ряду́ въ суббо́ту, вку́пѣ со отда́ніемъ пра́здника. Въ пято́къ ве́чера пое́мъ Блаже́нъ му́жъ, 1-ю Сла́ву. На Го́споди воззва́хъ: стихи́ры пра́здника, на 6, и свята́го, на 4. Сла́ва, свята́го. И ны́нѣ, пра́здника. Вхо́дъ, проки́менъ дне́ и чте́нія свята́го 3. На литíи стихи́ры пра́здника и свята́го стихо́вныя. Сла́ва, свята́го. И ны́нѣ, пра́здника. На стихо́внѣ стихи́ры пра́здника, съ припѣ́вы и́хъ. Сла́ва, свята́го. И ны́нѣ, пра́здника. По трисвято́мъ тропа́рь свята́го. Сла́ва, и ны́нѣ, пра́здника. И опту́стъ.

На у́трени, на Бо́гъ Госпо́дь: тропа́рь пра́здника, два́жды. Сла́ва, свята́го. И ны́нѣ, пра́здника. По каѳи́смахъ сѣда́льны и чте́ніе пра́здника, поліеле́й и сѣда́льны свята́го вси́. Сла́ва, сѣда́ленъ, по поліеле́и свята́го. И ны́нѣ, пра́здника, и чте́ніе свята́го. Степе́нна, 1-й антифо́нъ 4-го гла́са. Проки́менъ и Ева́нгеліе свята́го. Псало́мъ 50-й и стихи́ра свята́го. Кано́нъ пра́здника со ирмосо́мъ на 6, и свята́го на 4, и другíй пра́здника на 4. Катава́сія пра́здника. По 3-й пѣ́сни конда́къ свята́го, и и́косъ и сѣда́ленъ свята́го, два́жды. Сла́ва, и ны́нѣ, пра́здника и чте́ніе свята́го. По 6-й пѣ́сни конда́къ пра́здника и и́косъ. На 9-й пѣ́сни Честнѣ́йшую, не пое́мъ. Свѣти́ленъ пра́здника. Сла́ва, свята́го. И ны́нѣ, пра́здника. На хвали́техъ стихи́ры пра́здника 3 и свята́го 3. Сла́ва, свята́го. И ны́нѣ, пра́здника. Славосло́віе вели́кое. По трисвято́мъ тропа́рь свята́го. Сла́ва, и ны́нѣ, пра́здника. Ектеніи́, и отпу́стъ. И ча́съ 1-й. На часѣ́хъ тропа́рь пра́здника. Сла́ва, свята́го. И ны́нѣ, богоро́диченъ часо́въ. По Отче на́шъ, кондаки́ премѣня́емъ пра́здника и свята́го.

На Литургíи: Блаже́нна, пра́здника пѣ́снь 9-я на 4, и свята́го пѣ́снь 3-я, на 4. По вхо́дѣ тропа́рь пра́здника и свята́го. Сла́ва, конда́къ свята́го. И ны́нѣ, пра́здника. Проки́менъ, аллилу́ія, и прича́стенъ пра́здника, и свята́го. Апо́столъ и Ева́нгеліе дне́ и свята́го.

(Мрк) О то́мже пра́здницѣ подоба́етъ вѣ́дати:

Аще случи́тся обрѣ́теніе честны́я главы́ Предте́чевы въ недѣ́лю всѣ́хъ святы́хъ, пое́мъ слу́жбу его́ въ пято́къ. Аще ли ко́его вели́каго свята́го, ему́же во уста́вѣ ука́жется бдѣ́ніе, пое́мъ слу́жбу вели́каго свята́го въ настоя́щую сію́ недѣ́лю всѣ́хъ святы́хъ, я́коже Іоа́нна Богосло́ва, въ 7-ю недѣ́лю по Па́сцѣ, со святы́ми отцы́ въ ряду́, та́коже и здѣ́ пое́тся.

Источникъ: Минíа, мѣ́сяцъ Ма́ій. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 211 – 219 об.

/ Къ оглавленію раздѣла /


Наверхъ / Къ титульной страницѣ

0