Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - пятница, 18 августа 2017 г. Сейчасъ на порталѣ посѣтителей - 10.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Ма́ія въ 24-й де́нь.
Преподо́бнаго отца́ на́шего Симео́на, и́же на Ди́внѣй горѣ́.

[ВЕЧЕРЪ,]
На Го́споди воззва́хъ: стихи́ры Симео́на, на 6, гла́съ 8. Подо́бенъ: О, пресла́внаго чудесе́!

Жела́ніемъ боже́ственнымъ впери́мь,* еще́ пло́ть нося́* и пе́рстію обложе́нъ,* а́нгеломъ бы́лъ еси́ я́вѣ единожи́тель,* земны́хъ у́бо отсту́пль,* къ небе́снымъ же, о́тче, возвыша́емь,* столпо́мъ высо́кимъ,* къ Бо́гу взима́яся при́сно* и восхожде́ніи облиста́яся. [Два́жды.]

Пло́ть истни́въ воздержа́ніемъ,* и горѣ́ возводя́щу ду́шу* и къ Бо́гу приближа́ющуся,* Симео́не, показа́лъ еси́,* и прія́телище Ду́ха,* и си́лою Сего́ чудеса́ па́че естества́* твори́ти сподо́бился еси́.* Отону́дуже бы́сть вседѣ́тельное дѣя́ніе,* я́же па́че ума́ вся́ и мы́сли прехо́дятъ. [Два́жды.]

Сла́ва, гла́съ 6:

Отче досточу́дне, пусты́ни яви́лся еси́ до́брое прозябе́ніе, на́мъ же засту́пникъ: въ то́й бо жела́ніе обрѣ́лъ еси́ небе́сныя высоты́, цѣле́бныя же благода́ти отъ некра́домыхъ сокро́вищь Ду́ха сподо́бился еси́. Тѣ́мже обои́ми Христо́съ тя́ обогати́ и чуде́съ самодѣ́теля показа́, Симео́не преподо́бне, моли́ спасти́ся душа́мъ на́шимъ.

И ны́нѣ, богоро́диченъ или́ крестобогоро́диченъ. Подо́бенъ: Тридне́венъ.

На дре́вѣ Живо́тъ на́шъ зря́щи, Всенепоро́чная Богоро́дице, ви́сящъ, ма́терски рыда́ющи, вопія́ше: Сы́не Мо́й и Бо́же Мо́й, спаси́ любо́вію пою́щія Тя́.

На стихо́внѣ дне́. Сла́ва, гла́съ 2. Самогла́сенъ. Ге́рманово.

На го́ру высоку́, обра́зно ди́вну, возше́дъ и въ честны́й киво́тъ, я́ко въ незаходи́мая, вше́дъ дѣя́ніемъ изря́днымъ, и восхожде́ніе видѣ́ній показа́лъ еси́: житіе́ у́бо уясни́въ у́зы желѣ́зными, я́коже гри́внами златы́ми, укра́шенъ, Бо́га же зря́, и зри́мь, и еди́нъ Еди́ному бесѣ́дуя, Его́же моли́, честны́й Симео́не, о душа́хъ на́шихъ.

И ны́нѣ, богоро́диченъ или́ крестобогоро́диченъ. Подо́бенъ: Егда́ отъ дре́ва.

Угль, его́же прови́дѣ пре́жде сла́вный Иса́ія, воплоща́ется отъ Неискусому́жныя Ма́тере ма́ніемъ Прозя́бшаго и Роди́теля и, ро́ждся, закала́ется во́лею, мíра взе́мляй прегрѣше́нія, Агнецъ я́ко непоро́ченъ. Тѣ́мже Агница и Дѣ́ва, Сего́ на Крестѣ́ зря́щи, печа́ли ору́жіемъ снѣда́шеся.

Тропа́рь, гла́съ 1:

Пусты́нный жи́тель, и въ тѣлеси́ а́нгелъ, и чудотво́рецъ показа́лся еси́, богоно́се о́тче на́шъ Симіо́не, посто́мъ, бдѣ́ніемъ, моли́твою небе́сная дарова́нія пріи́мъ, исцѣля́еши неду́жныя и ду́ши вѣ́рою притека́ющихъ къ тебѣ́. Сла́ва Да́вшему тебѣ́ крѣ́пость, сла́ва Вѣнча́вшему тя́, сла́ва Дѣ́йствующему тобо́ю всѣ́мъ исцѣле́нія.


[НА УТРЕНИ,]
Кано́нъ преподо́бнаго на 6, его́же краегране́сіе: Чу́дне, пою́, Симео́не, твою́ благода́ть. Гла́съ 8.

Пѣ́снь 1.

Ирмо́съ: Колесницегони́теля фарао́ня погрузи́ чудотворя́й иногда́ Моисе́йскій же́злъ, крестообра́зно порази́въ и раздѣли́въ мо́ре, Изра́иля же бѣглеца́, пѣшехо́дца спасе́, пѣ́снь Бо́гови воспѣва́юща.

Богосло́вія вои́стинну вина́ е́сть па́мять твоя́, чудодѣ́йственный о́тче Симео́не, и сія́ніе соше́дшимся всѣ́мъ чи́стыми сердцы́ пѣ́ти тоя́ вели́чество и досточу́дное житіе́ твое́.

Отъ гла́са Крести́телева и видѣ́нія благовѣсти́ся твое́й сла́внѣй ма́тери, и тя́, благово́нно и божестве́нное жили́ще, всеблаже́нне о́тче, зача́тъ же и роди́, Тріѵпоста́снаго Божества́.

Па́че естества́ пра́вды носи́ло Бо́жіихъ дарова́ній, отъ пеле́нъ, о́тче, ма́тернихъ хотя́ща бы́ти, проразумѣ́въ вели́кій Предте́ча, шу́яго сосца́ тебѣ́ отвраща́тися повелѣва́етъ и къ десно́му прилѣпля́тися.

Чи́сто изъ нача́ла пріи́мъ житіе́, пребога́те, ба́нею, о́тче, пакибытія́ да́ръ духо́вный, отъ младе́нства боже́ственнѣ твоея́ души́ благолѣ́піе показа́лъ еси́, со́лнца свѣтлѣ́йши.

Богоро́диченъ: Пресла́вная, возглаго́лашася о Тебѣ́ въ ро́дѣхъ родо́въ, Бо́га Сло́ва во чре́вѣ вмѣсти́вшая, чиста́ же пребы́вши, Богоро́дице Марíе, тѣ́мже Тя́ вси́ почита́емъ, су́щее по Бо́зѣ заступле́ніе на́ше.

Пѣ́снь 3.

Ирмо́съ: Небе́снаго кру́га Верхотво́рче, Го́споди, и Це́ркве Зижди́телю, Ты́ мене́ утверди́ въ любви́ Твое́й, жела́ній кра́ю, вѣ́рныхъ утвержде́ніе, еди́не Человѣколю́бче.

Отъ млады́хъ ногте́й подви́жникъ изря́денъ изра́слъ еси́, рачи́тель же боже́ственныя добро́ты те́плый. Тѣ́мъ отъ ложе́снъ тя́ проувѣ́дѣвъ Влады́ка, Симео́не, освяти́лъ е́сть, о́тче пресла́вне.

Умудри́вся отъ мла́да, чудотво́рче преподо́бне о́тче, во́зраста и́стиннымъ ра́зумомъ, Ду́ха непостижи́маго самови́дно сподо́бился еси́ ви́дѣти, си́лами окружа́ема.

Души́ чу́вства отъ ужа́снаго, преподо́бне о́тче, просвѣти́въ видѣ́нія, чу́денъ ра́зумъ благи́хъ стяжа́лъ еси́ и и́нако иму́щимъ, Симео́не, небла́зненно житіе́ показа́лъ еси́.

Явственно тебѣ́ предста́ по́сланный а́нгелъ, а́нгельское, богоно́се, завѣща́ житіе́, цѣлова́ти ра́достно, но́гъ же я́вльшагося прикосну́лся еси́, о́тче, стопа́мъ.

Богоро́диченъ: Всели́вся въ Дѣ́ву тѣле́снѣ, Го́споди, яви́лся еси́ человѣ́комъ, я́коже подоба́ше ви́дѣти Тебе́, Юже и показа́лъ еси́ я́ко и́стинную Богоро́дицу и вѣ́рныхъ Помо́щницу, еди́не Человѣколю́бче.

Сѣда́ленъ, гла́съ 8. Подо́бенъ: Прему́дрости.

Пре́жде зача́тія, о́тче, освяти́вся, роди́тельницѣ пода́лся еси́ прекра́сно прозябе́ніе, хотя́щь бы́ти сосу́дъ Боже́ственнаго Ду́ха, Его́же си́лою возра́съ, уязви́лъ еси́ лука́выхъ духо́въ мно́жество жезло́мъ вѣ́ры; тѣ́мже, со сла́вою отше́дъ, бы́лъ еси́ вѣ́рныхъ сто́лпъ непоколеби́мь и свѣти́льникъ свѣ́телъ, Симео́не досточу́дне. Моли́ Христа́ Бо́га согрѣше́ній оставле́ніе дарова́ти чту́щимъ любо́вію святу́ю па́мять твою́. [Два́жды.]

Сла́ва, и ны́нѣ, пра́здника или́ богоро́диченъ:

Въ напа́сти многоплете́нныя впа́дъ отъ вра́гъ ви́димыхъ и неви́димыхъ, бу́рею одержи́мь безчи́сленныхъ согрѣше́ній мои́хъ, и я́ко къ те́плому заступле́нію и покро́ву моему́, Чи́стая, ко приста́нищу притека́ю Твоея́ бла́гости. Тѣ́мже, Пречи́стая, изъ Тебе́ Воплоще́нному безсѣ́менно моли́ся прилѣ́жно о всѣ́хъ рабѣ́хъ Твои́хъ, непреста́нно моля́щихтися, Богоро́дице Пречи́стая, моля́щи Его́ при́сно согрѣше́ній оставле́ніе дарова́ти, воспѣва́ющимъ досто́йно сла́ву Твою́.

Крестобогоро́диченъ:

Агнца и Па́стыря, и Изба́вителя, Агница зря́щи на Крестѣ́, восклица́ше, пла́чущи, и го́рько рыда́ющи, вопія́ше: мíръ у́бо ра́дуется, пріе́мля Тобо́ю избавле́ніе, утро́ба же Моя́ гори́тъ, зря́щи Твое́ распя́тіе, е́же терпи́ши за милосе́рдіе ми́лости. Долготерпѣли́ве Го́споди, ми́лости бе́здно и исто́чниче неисчерпа́емый, умилосе́рдися и да́руй согрѣше́ній оставле́ніе, вѣ́рою пою́щимъ Боже́ственныя Стра́сти Твоя́.

Пѣ́снь 4.

Ирмо́съ: Ты́ моя́ крѣ́пость, Го́споди, Ты́ моя́ и си́ла, Ты́ мо́й Бо́гъ, Ты́ мое́ ра́дованіе, не оста́вль нѣ́дра Отча, и на́шу нищету́ посѣти́въ. Тѣ́мъ съ проро́комъ Авваку́момъ зову́ Ти: си́лѣ Твое́й сла́ва, Человѣколю́бче.

Пребы́ти вну́трь ника́коже мíра претерпѣ́лъ еси́ еще́, о́тче, имѣ́я наставля́ющую тя́ Бо́жія Ду́ха си́лу: въ непроходи́мыхъ же пусты́няхъ живы́й и со звѣрьми́ ходя́ безъ боя́зни, отроча́ сы́й, и болѣ́зньми весели́лся еси́ тѣле́сными.

Скача́, я́коже еле́нь, по гора́мъ, жела́лъ еси́, о́тче, богото́чныхъ исто́чниковъ и, обрѣ́тъ сія́, Симео́не, боголю́бія жа́жду преиспо́лнилъ еси́: отъ ни́хже богосло́вія насы́щся, источа́еши при́сно, лице́ Христо́во зря́.

Бѣлообразу́юща тя́, я́коже на колесни́цѣ, зрѣ́лъ еси́, преподо́бне, носи́ма, у́мныма, о́тче, очи́ма: столпо́мъ же свѣ́тлымъ отроча́ наставля́емь, боже́ственный Іоа́ннъ стоя́ на степе́ни, пре́жде твоего́ къ нему́ восхожде́нія.

Наста́вленъ бы́въ, сла́вне, отъ благода́ти, да́нныя тебѣ́, я́коже отъ си́лы въ боже́ственную си́лу, ше́ствуеши ко Іоа́нновѣ хра́минѣ богому́дреннаго, съ ни́мже по́двигомъ любе́зно боре́ніе проходя́, яви́лся еси́, я́коже а́нгелъ.

Богоро́диченъ: Ты́ вѣ́рныхъ похвала́ еси́, Безневѣ́стная, Ты́ Предста́тельница, Ты́ прибѣ́жище христіа́нъ, стѣна́ и приста́нище: къ Сы́ну бо Твоему́ мольбы́ но́сиши, Всенепоро́чная, и спаса́еши отъ бѣ́дъ вѣ́рою и любо́вію Богоро́дицу Чи́стую Тя́ вѣ́дущія.

Пѣ́снь 5.

Ирмо́съ: Вску́ю мя́ отри́нулъ еси́ отъ лица́ Твоего́, Свѣ́те незаходи́мый, и покры́ла мя́ е́сть чужда́я тма́ окая́ннаго? Но обрати́ мя, и къ свѣ́ту за́повѣдей Твои́хъ пути́ моя́ напра́ви, молю́ся.

Красоты́ испо́лнь, я́ко благолѣ́пенъ дѣ́тищъ, о́тче, Госпо́дь я́вственно предста́, на степе́ни стоя́нія твоего́ су́щу, и облиста́въ сла́вою терпѣ́нія, я́коже проси́лъ еси́, Себе́ показа́въ распина́ема.

Возсія́ заре́ю открове́ній все́ житіе́ твое́, и́мже боже́ственнаго мѵ́ра благово́нія бы́въ испо́лненъ, супроти́вныя страда́льчески, Христо́въ уго́дниче, де́монскія ссѣ́клъ еси́ полки́.

Возвы́сился еси́ видѣ́ніи боже́ственными, всеблаже́нне, ума́ чистото́ю и, исто́чникъ му́дрости живоно́сныя, то́ки источа́ющее се́рдце имѣ́я, отъ Бо́га уче́ньми, ду́ши боля́щихъ просвѣти́лъ еси́.

Богоро́диченъ: Ма́тернее дерзнове́ніе, е́же къ Сы́ну Твоему́, иму́щи, Пречи́стая, сро́днаго промышле́нія, е́же о на́съ, не пре́зри, моли́мся, я́ко Тебе́ и еди́ну, христіа́не, ко Влады́цѣ очище́ніе ми́лостивно предлага́емъ.

Пѣ́снь 6.

Ирмо́съ: Моли́тву пролію́ ко Го́споду и Тому́ возвѣщу́ печа́ли моя́, я́ко зо́лъ душа́ моя́ испо́лнися и живо́тъ мо́й а́ду прибли́жися, и молю́ся, я́ко Іо́на: отъ тли́, Бо́же, возведи́ мя.

Вели́къ, я́коже Моисе́й, добродѣ́тельми чу́дный бы́въ, о́тче, на высо́къ сто́лпъ ма́ніемъ боже́ственнымъ возше́дъ, взя́тся Ду́хомъ, и, си́лу просвѣти́тельную пріе́мъ, я́коже о́нъ, просла́вился еси́.

Истощи́ сво́й вра́гъ стрѣ́лъ душетлѣ́нный ту́лъ, неи́стовно, богоно́се, стрѣля́я, и души́ твоея́ столпа́ не поколеба́: на ка́мени бо неразсѣ́днѣмъ Христо́вѣ крѣ́пко утверди́лся еси́.

Яко терпя́щу по́ты удо́бь воздержа́нія, чу́дный о́тче, я́влься Влады́ка тебѣ́, же́злъ крѣ́пости Христо́съ вруча́етъ и си́мъ тебѣ́ немощны́хъ неду́ги повелѣва́етъ цѣли́ти.

Богоро́диченъ: Марíе, Влады́чнее селе́ніе, свѣ́тлыми дѣ́вства заря́ми свѣтови́дно, я́ко кри́нъ, сія́я посреди́ терно́внаго смѣше́нія, Тебѣ́ молю́ся, Благо́й: согрѣше́ній ми́ да́руй проще́ніе.

Конда́къ, гла́съ 2. Подо́бенъ: Вы́шнихъ ища́.

Вы́шняя жела́я, до́льная отложи́въ, и, я́ко не́бо, сто́лпъ содѣ́лавый, тѣ́мъ облиста́лъ еси́ чуде́съ заре́ю, преподо́бне, и Христу́, всѣ́хъ Бо́гу, мо́лишися непреста́нно о всѣ́хъ на́съ.

Икосъ:

Всесвѣ́тлая блаже́ннаго па́мять, другíй яви́ся де́нь спасе́нія на́мъ, сія́ніемъ поще́нія но́щь глубо́кую страсте́й отгоня́щій и всеизря́дными дѣя́ньми просвѣща́ющій. Въ ню́же свѣ́тло, я́ко звѣ́зды, я́вльшеся, вси́ вѣ́рніи, пѣ́нія въ весе́ліи Симео́ну свѣти́льнику принесе́мъ: свы́ше бо зря́, просвѣща́етъ ны́ и дае́тъ умире́ніе неизглаго́ланно, Христа́ Бо́га моля́ непреста́нно о всѣ́хъ на́съ.

Пѣ́снь 7.

Ирмо́съ: Халде́йскія пе́щи всепа́губную си́лу угаси́вше о́бразомъ Ангела снизше́дшаго, Зижди́телю ю́ноши взыва́ху: благослове́нъ еси́ и хва́льный, Бо́же оте́цъ на́шихъ.

Юношески, богоно́се, мудрова́нія мірскíя ле́сти, тщíя же сла́вы, низпа́данія бѣ́гая, въ молча́ніи жи́ти возлюби́лъ еси́, и ду́хомъ вопія́ непреста́нно: благослове́нъ Бо́гъ оте́цъ на́шихъ.

Крестообра́зно простира́я дла́ни твоя́ и моли́тву дѣ́йствуяй, Христа́ во сла́вѣ со а́нгелы очи́ма явле́нно, богоно́се, узрѣ́лъ еси́, на го́ру сію́ ди́вную взы́ти повелѣва́юща.

Неботе́чнѣ нра́вомъ иды́й, о́тче, къ столпу́, возше́лъ еси́ на него́, пре́жде сего́ ты́ Влады́ки боже́ственнымъ повину́вся велѣ́ніемъ, дости́глъ еси́ горы́ сея́, ю́же чу́дно чу́дну са́мъ именова́лъ еси́.

Высо́кій ве́рхъ, я́коже небе́сный ра́й, благово́нными насажде́нъ цвѣты́ вся́кими, обрѣ́тъ, всели́лся еси́, жили́ще же сіе́ чудодѣ́йственнѣ, богоначерта́нно водрузи́лъ еси́.

Богоро́диченъ: Во свѣ́тѣ Госпо́дни ходя́щіи, пріиди́те, воспои́мъ боже́ственный гра́дъ Царя́ ца́рствующихъ, Марíю Пречи́стую, Богоро́дицу и́стинную, я́ко упова́ніе ду́шъ на́шихъ.

Пѣ́снь 8.

Ирмо́съ: Седмери́цею пе́щь халде́йскій мучи́тель богочести́вымъ неи́стовно разжже́, си́лою же лу́чшею спасе́ны сія́ ви́дѣвъ, Творцу́ и Изба́вителю вопія́ше: о́троцы, благослови́те, свяще́нницы, воспо́йте, лю́діе, превозноси́те во вся́ вѣ́ки.

Боголѣ́пными, преподо́бне, души́ твоея́ си́лами трисвѣ́тлому спримѣси́лся еси́ сія́нію, отъ него́ науча́емь, я́ко отъ еди́наго Божества́, Сему́ предъ столпо́мъ твои́мъ требога́тенъ хра́мъ сла́вно созда́лъ еси́ и несозда́нную чти́ти научи́лъ еси́ въ не́мъ Тро́ицу во вѣ́ки.

Всеси́льное Ду́ха Свята́го дѣ́йство, богови́дно все́льшееся въ тя́, богогла́се, стица́тися подви́же отъ коне́цъ всѣ́хъ, отъ духо́въ лука́выхъ томи́мыя, и, си́хъ исцѣля́я ва́ійнымъ твои́мъ жезло́мъ, науча́еши Зижди́теля пѣ́ти во вѣ́ки вся́.

Юношеское мудрова́ніе плотско́е повину́лъ еси́, о́тче, посто́мъ и моле́ніемъ ду́ху, утро́бы же разгорѣ́ніе угаси́въ, потреби́лъ еси́ и, я́ко не яды́й, па́че человѣ́ка яви́лся еси́, пи́щею небе́сною пита́яся то́кмо, вино́вна же сему́ пое́ши во вѣ́ки.

Ликостоя́ніе боже́ственное ученико́въ тебѣ́, чу́дный о́тче, вруча́етъ Христо́съ Госпо́дь, и́хже любо́вію пріе́мъ, уче́ніи осія́лъ еси́ къ воздержа́нія простре́тися тече́нію. Съ ни́миже почива́я во Ца́рствіи, Царя́ всѣ́хъ славосло́виши во вся́ вѣ́ки.

Богоро́диченъ: О на́съ моли́ Сы́на Твоего́ и Го́спода, вои́стинну и чи́сто вопію́щихъ Ти́ и Тя́, Богома́терь, исповѣ́дающихъ, Чи́стая, грѣхо́въ прося́щи разрѣше́нія, улучи́ти же спасе́ніе вѣ́рно пою́щимъ: о́троцы, благослови́те, свяще́нницы, воспо́йте, лю́діе, превозноси́те во вся́ вѣ́ки.

Пѣ́снь 9.

Ирмо́съ: Устраши́ся вся́къ слу́хъ неизрече́нна Бо́жія снизхожде́нія, я́ко Вы́шній во́лею сни́де да́же и до пло́ти, отъ дѣви́ческаго чре́ва бы́въ Человѣ́къ. Тѣ́мже Пречи́стую Богоро́дицу, вѣ́рніи, велича́емъ.

Хлѣ́бы ма́лыми, Симео́не, насы́щшаго мно́жество человѣ́къ мно́гое, Христа́, треблаже́нне, моли́твами твои́ми подража́я, во огра́дѣ твое́й пра́здныя жи́тницы пшени́цы напо́лнилъ еси́ благослове́ніи твои́ми и отъ гла́да изба́вилъ еси́ ста́до твое́.

Глаго́лы Ма́рѳы, честны́я и преподо́бныя твоея́ ма́тере, всеблаже́нне, моле́ньми тя́ моля́ще умоли́ти Христа́, не отре́клся еси́ тоя́ испо́лнити проше́нія и Бо́жій гра́дъ Бо́жія гнѣ́ва изба́вилъ еси́.

Увѣ́дѣвъ кончи́ну, Симео́не, подвиго́въ твои́хъ, разрѣ́шся отъ тѣлесе́, пренеизглаго́ланное въ вы́шнихъ, всеблаже́нне, обоже́ніе, къ нему́же отсю́ду возлетѣ́въ, ра́дуешися ду́хомъ, зря́ того́ ра́ди тріѵпоста́сное сія́ніе.

Ма́ніемъ, о́тче Симео́не, и промышле́ніи твои́ми отъ житія́ къ тебѣ́ многомяте́жнаго моли́твами устреми́вшіяся, въ приста́нище твое́, отъ вся́кихъ врага́ страсте́й свободи́ и па́мять твою́ пра́зднующія свѣ́тло сохраня́й.

Богоро́диченъ: Спаси́ мя, Ма́ти Бо́жія, ро́ждшая Христа́, Спа́са моего́, Бо́га и Человѣ́ка, сугу́ба естество́мъ, а не Ѵпоста́сію, Единоро́дна же отъ Отца́, изъ Тебе́ же пе́рвенца тва́ри вся́кія. Тѣ́мже вси́ Тя́ при́сно велича́емъ.

Свѣти́ленъ. Подо́бенъ: Свѣ́те неизмѣ́нный.

Отъ пусты́ни облиста́въ, вселе́нную просвѣща́еши, мона́ховъ мно́жества ра́дуются о твое́й па́мяти, о Симео́не богоно́се, не преста́й о мíрѣ моля́ся.

На стихо́внѣ дне́. Сла́ва, гла́съ 6:

Преподо́бне о́тче Симео́не, во всю́ зе́млю изы́де вѣща́ніе исправле́ній твои́хъ, тѣ́мъ на небесѣ́хъ обрѣ́лъ еси́ мзду́ трудо́въ твои́хъ, де́монскія погуби́лъ еси́ полки́ и а́нгельскія дости́глъ еси́ чи́ны, и́хже житію́ безпоро́ка поревнова́лъ еси́. Дерзнове́ніе имѣ́я ко Христу́ Бо́гу, ми́ръ испроси́ душа́мъ на́шимъ.

Крестобогоро́диченъ:

Предстоя́щи дре́ву иногда́ во вре́мя распя́тія, Дѣ́ва съ дѣ́вственнымъ ученико́мъ, и пла́чущи, вопія́ше: увы́ Мнѣ́, ка́ко стра́ждеши, всѣ́хъ сы́й, Христе́, безстра́стіе!


НА ЛИТУРГІИ,

Блаже́нна пра́здника и свята́го, пѣ́снь 3-я. Проки́менъ, гла́съ 7: Возвесели́тся пра́ведникъ о Го́сподѣ,* [и упова́етъ на Него́]. Сти́хъ: Услы́ши, Бо́же, гла́съ мо́й, [внегда́ моли́ти ми ся къ Тебѣ́]. Апо́столъ къ Колосса́емъ, зача́ло 258. Аллилу́ія, [гла́съ 6]: Блаже́нъ му́жъ, боя́йся Го́спода, [въ за́повѣдехъ Его́ восхо́щетъ зѣло́. Сти́хъ: Си́льно на земли́ бу́детъ сѣ́мя его́.] Ева́нгеліе отъ Матѳе́я, зача́ло 43. Прича́стенъ: Въ па́мять вѣ́чную бу́детъ пра́ведникъ, [отъ слу́ха зла́ не убои́тся].

Источникъ: Минíа, мѣ́сяцъ Ма́ій. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 196 – 200 об.

/ Къ оглавленію раздѣла /


Наверхъ / Къ титульной страницѣ

0