Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - вторникъ, 17 октября 2017 г. Сейчасъ на порталѣ посѣтителей - 16.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Ма́ія въ 24-й де́нь.
Слу́жба преподо́бнаго отца́ на́шего Ники́ты сто́лпника, Переясла́вскаго чудотво́рца.

НА МАЛѢЙ ВЕЧЕРНИ,
Поста́вимъ стихи́ 4 и пое́мъ стихи́ры самогла́сны, гла́съ 5:

Честны́й и свѣтоно́сный* наста́ пра́здникъ,* испо́лнь ра́дости, и весе́лія,* и духо́внаго торжества́.* Тѣ́мже, соше́дшеся, мона́ховъ мно́жества* и христоимени́тіи лю́діе,* любо́вію восхваля́юще,* блажи́мъ боже́ственная дѣя́нія твоя́:* я́ко бо кри́нъ удо́льный, процвѣ́тъ,* благоуха́еши душе́вная на́ша чу́вства.* Ники́то о́тче на́шъ,* моли́ спасти́ ду́ши на́ша.

Яко уязви́лся еси́* жела́ніемъ боже́ственнымъ,* преподо́бне о́тче Ники́то,* взе́мъ бо кре́стъ тво́й,* послѣ́довалъ еси́ Влады́цѣ Христу́.* Тогда́, вся́кая плотска́я мудрова́нія умертви́въ,* наслѣ́довалъ еси́ кро́ткихъ зе́млю,* прича́стіемъ бо обожа́емь* и неизрече́ннаго о́наго весе́лія наслажда́яся,* помина́й на́съ, творя́щихъ* всесвяту́ю твою́ и пречестну́ю па́мять.

Сла́ва, гла́съ 8:

Преподо́бне и богоблаже́нне о́тче Ники́то, вои́стинну сподо́бился еси́ боже́ственныя жи́зни, посто́мъ и бдѣ́ніемъ изнуря́я тѣ́ло твое́, тѣ́мже и о́бразъ бы́лъ еси́ мона́ховъ, а́ще бо и тѣле́сный язы́къ умолча́, но чудеса́ свидѣ́тельствуютъ. Дре́вній гра́дъ Переясла́вль, проповѣ́дуя, хва́лится, имѣ́я въ себѣ́ неистощи́мое сокро́вище: са́ми бо, зря́ще честну́ю ра́ку моще́й твои́хъ и чудеса́ быва́емая, прославля́ютъ просла́вльшаго тя́ Го́спода. Ему́же моли́ся, преподо́бне, дарова́ти вселе́ннѣй ми́ръ и ве́лію ми́лость.

На стихо́внѣ стихи́ры, гла́съ 2. Подо́бенъ: До́ме Евфра́ѳовъ.

Изше́дъ изъ до́му,* гра́да Переясла́вля,* преподо́бне о́тче Ники́то,* и доше́дъ тезоимени́таго Ла́вры,* ту́ показа́лся еси́ до́мъ Пресвята́го Ду́ха.

Сти́хъ: Честна́ предъ Го́сподемъ* сме́рть преподо́бныхъ Его́.

До́мъ духо́вный бы́ти* сподо́бился еси́, о́тче Ники́то,* отъ удивле́нія бра́шенъ ужасну́вся,* я́ко ка́мень, согражде́нъ* Боже́ственною благода́тію.

Сти́хъ: Блаже́нъ му́жъ, боя́йся Го́спода,* въ за́повѣдехъ Его́ восхо́щетъ зѣло́.

Зако́нъ пріе́мъ отъ наста́вника* тезоимени́таго Ла́вры,* и мірска́я мудрова́нія оста́вль,* яви́лся еси́ до́мъ* Пресвята́го Ду́ха.

[Сла́ва, и ны́нѣ,] богоро́диченъ:

Ра́дуйся, Яже ра́дость* мíру пріе́мшая* и утоли́вшая печа́ль,* Дѣ́во, прама́тернюю,* Христа́ Жизнода́вца поро́ждши.


НА ВЕЛИЦѢЙ ВЕЧЕРНИ,
Пое́мъ: Блаже́нъ му́жъ.., [1-й антифо́нъ.] На Го́споди воззва́хъ: стихи́ры [на 8], гла́съ 4. Подо́бенъ: Яко до́бля.

Воздержа́нія стрѣла́ми* врага́ уязви́лъ еси́* и сего́ разори́лъ еси́ полки́.* Тѣ́мъ побѣ́ды прія́тъ на враги́,* блаже́нне преподо́бне,* на сего́ держа́вно тя́, Ники́то,* Христу́ укрѣ́пльшу.* Его́же моли́* отъ тли́ и бѣ́дъ изба́вити* соверша́ющихъ при́сно честну́ю па́мять твою́. [Два́жды.]

На лу́чшая видѣ́нія* вше́дъ, блаже́нне,* земна́я вся́ и тлѣ́ющая преходя́щая* въ тѣлеси́, преподо́бне, презрѣ́лъ еси́,* житіе́ безвеще́ственное* на земли́, Ники́то, пожи́лъ еси́, сла́вя Христа́.* Его́же моли́* отъ тли́ и бѣ́дъ изба́вити* чту́щія при́сно честну́ю па́мять твою́.

Дарова́ніи Ду́ха,* боже́ственными сія́ніи просвѣ́щся,* приснопа́мятне Ники́то,* свѣти́льникъ показа́лся еси́ конце́мъ,* болѣ́зней зо́лъ и тму́ страсте́й* отгоня́я моли́твами твои́ми,* избавля́я неду́гъ, и скорбе́й, и бѣ́дъ* вѣ́рою соверша́ющихъ при́сно* честну́ю па́мять твою́.

Ины стихи́ры, гла́съ то́йже. Подо́бенъ: Да́лъ еси́ зна́меніе.

Яко гла́съ проро́ческій услы́шавъ:* измы́йтеся, и чи́сти бу́дете;* и отъ сего́ умиле́ніе въ се́рдцы пріе́мъ,* и всего́ себе́ слеза́ми облива́я,* воспомина́я своя́ содѣ́янная,* и ничто́же могíй вѣща́ти,* то́кмо во умѣ́ свое́мъ къ Бо́гу глаго́лаше:* наста́ви мя́ на стези́ пра́вы,* и пойду́ во и́стинѣ Твое́й,* исполня́я Твоя́ повелѣ́нія. [Два́жды.]

Егда́ друго́мъ и зна́емымъ со́званнымъ* и потре́бнымъ устро́еннымъ* зна́меніе стра́шно показа́ся:* пѣ́на съ кро́вію, отъ сосу́да исходя́щи,* и снѣ́дная на мно́ги у́ды человѣ́ческія претвори́шася,* и, ве́ліимъ стра́хомъ одержи́мь бы́въ,* ско́ро отъ до́му изы́де,* и, ко оби́тели устреми́вся,* во умѣ́ свое́мъ къ Бо́гу моля́шеся.

Егда́ отъ до́му изше́дъ,* слеза́ми пу́ть омочи́лъ еси́,* оби́тели достиза́еши и наста́внику духо́внѣ бесѣ́довалъ еси́,* обѣ́ты твоя́ Бо́гу воздава́я,* пло́ти твоея́ не пощади́лъ еси́,* мра́вію и мши́цамъ* сію́ въ снѣ́дь пре́далъ еси́* и си́мъ врага́ до конца́ посрами́лъ еси́.

Сла́ва, гла́съ 6:

Мíръ возненави́дѣвъ, Христа́ возлюби́лъ еси́ и, Тому́ послѣ́довавъ, вери́ги тя́жки на тѣ́лѣ твое́мъ носи́лъ еси́, посто́мъ и бдѣ́ніемъ себе́ удруча́я, я́ко безпло́тенъ, на земли́ пожи́лъ еси́; ду́шу же пресвѣ́тлу Бо́гу предста́вивъ, дарова́ній чуде́съ сподо́бился еси́. Тѣ́мъ мо́лимъ тя́, о́тче Ники́то преподо́бне, моли́ спасти́ся душа́мъ на́шимъ.

И ны́нѣ, богоро́диченъ.
Вхо́дъ. Проки́менъ дне́. Чте́нія три́.

Проро́чества Иса́іина чте́ніе. [Глава́ 43.]

Та́ко глаго́летъ Госпо́дь: вси́ язы́цы собра́шася вку́пѣ, и соберу́тся кня́зи отъ ни́хъ, кто́ возвѣсти́тъ сія́ въ ни́хъ? Или́ я́же отъ нача́ла, кто́ слы́шана сотвори́тъ ва́мъ? Да приведу́тъ свидѣ́тели своя́ и оправдя́тся, и да услы́шатъ, и да реку́тъ и́стину. Бу́дите Ми́ свидѣ́тели, и Азъ Свидѣ́тель, глаго́летъ Госпо́дь Бо́гъ, и отрокъ, его́же избра́хъ, да позна́ете и вѣ́руете Ми́, и разумѣ́ете, я́ко Азъ е́смь; пре́жде Мене́ не бы́сть и́нъ бо́гъ, и по Мнѣ́ не бу́детъ. Азъ е́смь Бо́гъ, и нѣ́сть ра́звѣ Мене́ спаса́яй. Азъ возвѣсти́хъ и спасо́хъ, уничижи́хъ, и не бѣ́ въ ва́съ чу́ждій. Вы́ Мнѣ́ свидѣ́тели, и Азъ Госпо́дь Бо́гъ. И еще́ отъ нача́ла Азъ е́смь, и нѣ́сть отъ ру́къ Мои́хъ избавля́яй; сотворю́, и кто́ отврати́тъ то? Си́це глаго́летъ Госпо́дь Бо́гъ, избавля́яй ва́съ Святы́й Изра́илевъ.

Проро́чества Иса́іина чте́ніе. [Глава́ 62.]

Та́ко глаго́летъ Госпо́дь: на стѣна́хъ твои́хъ, Іерусали́ме, устро́ихъ стра́жи ве́сь де́нь и всю́ но́щь, и́же до конца́ не премо́лкнутъ, помина́юще Го́спода. Нѣ́сть бо ва́мъ подо́бенъ, а́ще испра́виши и сотвори́ши, Іерусали́ме, непрезо́рство на земли́. Кля́тся Госпо́дь си́лою Свое́ю и крѣ́постію мы́шцы Своея́: а́ще ктому́ отда́мъ пшени́цу твою́ и бра́шно твое́ враго́мъ твои́мъ, и а́ще ктому́ испію́тъ вино́ твое́ сы́нове чуждíи, о не́мже труди́лся еси́, но собира́ющіи снѣдя́тъ е́ и восхва́лятъ Го́спода, и е́млющіи испію́тъ е́ во дво́рѣхъ святы́хъ Мои́хъ. Ше́ствуйте враты́ Мои́ми, и пу́ть сотвори́те лю́демъ Мои́мъ, и ка́меніе, е́же на пути́, размещи́те, и воздви́гните зна́меніе во язы́ки. Се́ бо Госпо́дь слы́шано сотвори́ до послѣ́днихъ земли́, и рече́те дще́ри Сіо́новѣ: се́ Спаси́тель тво́й прихо́дитъ, имы́й мзду́ съ Собо́ю, и дѣ́ло Его́ предъ лице́мъ Его́. И нарече́тъ я́ лю́ди свя́ты, изба́влены Го́сподемъ, ты́ же нарече́шися взы́сканъ гра́дъ и не оста́вленъ.

Прему́дрости Соломо́ни чте́ніе. [Глава́ 5.]

Пра́ведницы во вѣ́ки живу́тъ, и въ Го́сподѣ мзда́ и́хъ, и попече́ніе и́хъ у Вы́шняго. Сего́ ра́ди пріи́мутъ ца́рствіе благолѣ́пія и вѣне́цъ добро́ты отъ руки́ Госпо́дни, зане́ десни́цею покры́етъ я́ и мы́шцею защити́тъ и́хъ. Пріи́метъ всеору́жіе — рве́ніе свое́ и вооружи́тъ тва́рь въ ме́сть враго́мъ. Облече́тся въ броня́ пра́вды и возложи́тъ шле́мъ — су́дъ нелицемѣ́ренъ. Пріи́метъ щи́тъ непобѣди́мый — преподо́біе, поостри́тъ же напра́сный гнѣ́въ — во ору́жіе, спобо́ретъ же съ ни́мъ мíръ на безу́мныя. По́йдутъ праволу́чныя стрѣ́лы мо́лніины и, я́ко отъ благокру́гла лу́ка облако́въ, на намѣ́реніе полетя́тъ, и отъ каменоме́тныя я́рости испо́лнь паду́тъ гра́ды. Вознегоду́етъ на ни́хъ вода́ морска́я, рѣ́ки же потопя́тъ я́ на́гло. Сопроти́въ ста́нетъ и́мъ ду́хъ си́лы и, я́ко ви́хоръ, развѣ́етъ и́хъ, и опустоши́тъ всю́ зе́млю беззако́ніе, и злодѣ́йство преврати́тъ престо́лы си́льныхъ. Слы́шите у́бо, ца́ріе, и разумѣ́йте, навы́кните, судіи́ конце́въ земли́. Внуши́те держа́щіи мно́жества и гордя́щіися о наро́дѣхъ язы́ковъ, я́ко дана́ е́сть отъ Го́спода держа́ва ва́мъ и си́ла отъ Вы́шняго.

На литíи стихи́ры, гла́съ 4:

Преподо́бне о́тче Ники́то, ты́ вра́чь душа́мъ и тѣ́ломъ яви́лся еси́, источа́я неду́жнымъ исцѣле́нія струи́, да́ромъ же благода́тнымъ украша́емь, да́льнего ра́ди ше́ствія тя́жкимъ неду́гомъ обдержи́маго кня́зя здра́ва сотвори́лъ еси́, воздаю́ща хвалу́ Бо́гу, такова́ да́ра сподо́бльшему тя́, и, обра́щшагося къ пу́тному ше́ствію, глаго́лавша: моли́, преподо́бне, о чту́щихъ любо́вію пречестну́ю па́мять твою́, спасти́ ду́ши на́ша.

Богому́дре Ники́то, сла́ву маловре́менную оста́вль, въ тезоимени́таго Ла́вру всели́лся еси́, о́тче, и, Тро́ицѣ чи́стый до́мъ показа́вся, блаже́нне, си́лою и дѣ́йствіемъ Свята́го Ду́ха те́мныя полки́ прогоня́еши, и змíя среди́ ке́лліи ме́ртва сотвори́лъ еси́: живя́ше бо въ тебѣ́ Христо́съ Бо́гъ на́шъ, Его́же моли́, преподо́бне, спасти́ ду́ши на́ша.

Мірскíй мяте́жъ оста́вль и взе́мъ кре́стъ тво́й, послѣ́довалъ еси́ Христу́ невозвра́тнымъ по́мысломъ. Изъ до́му изше́лъ еси́, супру́гу и бли́жники я́ко нивочто́же вмѣни́въ, и дости́глъ еси́ тезоимени́таго въ му́ченицѣхъ Ла́вры, душе́вныя стра́сти изъ ко́рене исторга́я, тя́жкая желѣ́за на вы́ю возложи́лъ еси́, и ча́стыхъ ра́ди бдѣ́ній и моли́твъ благода́ть воспріе́мъ, преподо́бне, исцѣля́ти разли́чныя неду́ги. Ангеломъ собесѣ́дниче и преподо́бнымъ сожи́телю, о́тче Ники́то, моли́ся Го́сподеви спасти́ ду́ши на́ша.

Сла́ва, гла́съ 5:

Преподо́бне о́тче, не да́лъ еси́ сна́ твои́ма очи́ма, ни вѣ́ждома дрема́нія, до́ндеже ду́шу и тѣ́ло отъ страсте́й свободи́лъ еси́ и себе́ угото́валъ еси́ Ду́ху жили́ще: прише́дъ бо, Христо́съ со Отце́мъ оби́тель въ тебѣ́ сотвори́, и Единосу́щныя Тро́ицы уго́дникъ бы́въ, великопроповѣ́дниче, о́тче на́шъ Ники́то, моли́ спасти́ся на́мъ.

И ны́нѣ, богоро́диченъ.

На стихо́внѣ стихи́ры, гла́съ 8. Подо́бенъ: О, пресла́внаго чудесе́!

Преподо́бне о́тче Ники́то,* слѣпы́мъ дае́ши свѣ́тъ,* боля́щимъ исцѣле́ніе,* хромы́мъ здра́віе* и ми́лостивно преклоня́ешися* приходя́щимъ съ вѣ́рою ко хра́му твоему́,* прося́щимъ по́мощи твоея́:* се́ бо засту́пника и предста́теля, вѣ́рніи вси́, обрѣто́хомъ,* восхваля́ющіи тя́, всече́стне.

Сти́хъ: Честна́ предъ Го́сподемъ* сме́рть преподо́бныхъ Его́.

Преподо́бне о́тче всече́стне,* добродѣ́тельми благи́ми вше́лъ еси́,* я́ко на о́гненнѣй колесни́цѣ, къ Бо́гу* и побѣ́дными вѣнцы́ увя́злся еси́,* я́ко мони́сты, на тѣ́лѣ твое́мъ носи́лъ еси́ честны́я вери́ги;* на гро́бѣ же положены́,* источа́ютъ исцѣле́нія* и прогоня́ютъ ду́хи лука́выя.* Тѣ́мъ блажи́мъ тя́, прехва́льне Ники́то.

Сти́хъ: Блаже́нъ му́жъ, боя́йся Го́спода,* въ за́повѣдехъ Его́ восхо́щетъ зѣло́.

Лико́мъ по́стническимъ* сочта́лся еси́, преподо́бне,* и мона́шескимъ украси́лся еси́, блаже́нне, житіе́мъ,* и ны́нѣ въ небе́сныхъ весели́шися селе́ніихъ,* идѣ́же лику́ютъ а́нгели,* свѣ́томъ боже́ственнымъ вои́стинну обожа́емь.* Помина́й вы́ну блажа́щихъ тя́ на земли́* и пресвято́е твое́ творя́щихъ* успе́ніе, Ники́то.

Сла́ва, гла́съ 3:

Гла́съ проро́ка, велегла́сно вопію́ща: измы́йтеся, и чи́сти бу́дете, моля́щу ти ся во святи́лищи, услы́шавъ, возстена́лъ еси́ изъ глубины́ се́рдца, глаго́ля: Бо́же, очи́сти мя́! И учрежде́ніе сотвори́лъ еси́ въ дому́ клевре́тъ ра́ди твои́хъ, и уви́дѣніемъ бра́шенъ ужа́слся, и отто́ргнулся еси́, я́ко се́рна, отъ тенета́, земна́я мудрова́нія оплева́въ. И ны́нѣ, преподо́бне о́тче Ники́то, не пре́зри моли́твы ра́бъ твои́хъ, моля́щихся тебѣ́, испроси́ у Христа́ Бо́га поми́ловати ду́ши на́ша.

И ны́нѣ, богоро́диченъ.

Тропа́рь, гла́съ 4:

Правосла́внымъ смы́сломъ ю́ношская возжелѣ́нія возненави́дѣвъ и до́блественныя нра́вы воспріи́мъ, врага́ побѣди́лъ еси́, и во благоразу́міи Бо́гу угоди́лъ еси́, и свы́ше отъ Него́ пріе́мъ да́ръ чуде́съ, бѣ́сы прогоня́ти, неду́ги исцѣля́ти, Ники́то пресла́вне, моли́ Христа́ Бо́га, да спасе́тъ ду́ши на́ша.


НА УТРЕНИ,
По 1-й стихоло́гіи сѣда́ленъ, гла́съ 4:

Во оби́тели тезоимени́таго тебѣ́ страстоте́рпца жи́знь препроводи́лъ еси́, и вси́, приходя́щіи къ тебѣ́, а́ки ко исто́чнику благотеку́щему, ра́достно отходя́ще, Христа́ прославля́ютъ. [Два́жды.]

Сла́ва, и ны́нѣ, богоро́диченъ:

Воста́нія безпло́тныхъ вра́гъ и зло́бы, изба́ви мя́, Богоро́дице, и Твое́ю моли́твою си́хъ прожени́: Тя́ бо и́мамъ те́плое заступле́ніе, и по́мощь, и тве́рдое прибѣ́жище.

По 2-й стихоло́гіи сѣда́ленъ, гла́съ 3:

Не то́кмо во гра́дѣ твое́мъ слы́шано бы́сть, но и во вся́ страны́ и гра́ды произы́де сла́ва и́мене твоего́, преподо́бне, и вси́, призыва́ющіи съ вѣ́рою тебе́ на по́мощь, неду́говъ исцѣле́ніе пріе́млютъ. [Два́жды.]

Сла́ва, и ны́нѣ, богоро́диченъ:

Предста́тельнице и покро́въ Ты́ еси́, Пречи́стая, изба́ви ны́ отъ бѣ́дъ лю́тыхъ и обстоя́ній и ду́ши на́ша спаси́ боже́ственными Твои́ми моли́твами.

По поліеле́и сѣда́ленъ, гла́съ 2:

Ко́е похвале́ніе принесе́мъ тебѣ́, преподо́бне? а́нгельски бо на земли́ пожи́лъ еси́, дре́внихъ же по́стникъ воздержа́ніемъ дости́гъ, му́ченикомъ же приложи́лся еси́, я́ко ну́ждную сме́рть прія́лъ еси́. Тѣ́мъ мо́лимъ тя́, Ники́то: моли́ Христа́ Бо́га о всѣ́хъ на́съ. [Два́жды.]

Сла́ва, и ны́нѣ, богоро́диченъ:

Прія́тъ во чре́вѣ Невмѣсти́маго Бо́га, херуви́мъ и серафи́мъ вы́шши яви́лася еси́, Влады́чице, тѣ́мъ, вси́ вѣ́рніи, воспѣва́емъ Рождество́ Твое́, Пречи́стая.

Степе́нна, 1-й антифо́нъ 4-го гла́са. Проки́менъ, [гла́съ 4]: Честна́ предъ Го́сподемъ* сме́рть преподо́бныхъ Его́. Сти́хъ: Что́ возда́мъ Го́сподеви о всѣ́хъ, я́же воздаде́ ми́? Вся́кое дыха́ніе... Ева́нгеліе Матѳе́я, зача́ло 43.

По 50-мъ псалмѣ́ стихи́ра, гла́съ 6:

Преподо́бне о́тче, егда́ отъ до́му изше́лъ еси́, ни на гра́дъ озрѣ́лся еси́, ни друго́въ соедине́нія, ни супру́жницы любве́ помышля́я, но ку́пно вся́ земна́я возненави́дѣвъ, на небе́сная взира́я и къ си́мъ ра́зумъ тво́й возвыша́я: и я́коже обѣща́лся еси́, та́ко благоче́стно соверши́лъ еси́. Тѣ́мъ па́мять твою́ почита́емъ, досточу́дне.

Кано́нъ, гла́съ 4.
Пѣ́снь 1.

Ирмо́съ: Отве́рзу уста́ моя́, и напо́лнятся Ду́ха, и сло́во отры́гну Цари́цѣ Ма́тери, и явлю́ся, свѣ́тло торжеству́я, и воспою́, ра́дуяся, Тоя́ чудеса́.

Свѣ́томъ благода́ти озаря́емь, преподо́бне, вѣ́рою па́мять твою́ торжеству́ющія свѣтови́дную тмы́ грѣхо́вныя моли́твами твои́ми изба́ви, Ники́то пресла́вне.

Къ Бо́гу вводя́щь несовра́тно ше́ствовалъ еси́ пу́ть, ко гра́ду небе́сному, Ники́то, дости́глъ еси, и́бо Святы́й наста́ви тя́ Ду́хъ, почива́яй въ се́рдцы твое́мъ.

Вознося́щее смире́ніе, Ники́то, имѣ́лъ еси́, тѣ́мъ мо́лимся тебѣ́: уще́дри, преподо́бне, смире́ніе на́ше и болѣ́зни вся́ облегчи́ серде́цъ на́шихъ.

Богоро́диченъ: Ра́дости на́мъ Хода́таица, я́ко пріе́мши исполне́ніе всего́ Божества́, яви́лася еси́, Всенепоро́чная, тѣ́мъ вси́ Тебѣ́, — ра́дуйся, — а́нгелово согла́сно зове́мъ, Богора́дованная.

Другíй кано́нъ, имѣ́я краегране́сіе: Пѣ́ніе приношу́ моле́бно преди́вному отцу́ Ники́тѣ. Гла́съ 8.
Пѣ́снь 1.

Ирмо́съ: Сокруши́вшему бра́ни мы́шцею Свое́ю и прове́дшему Изра́иля сквозѣ́ Чермно́е мо́ре, пои́мъ Ему́, я́ко Изба́вителю на́шему Бо́гу, я́ко просла́вися.

Пѣ́ніе пріими́ отъ усте́нъ недосто́йныхъ, Человѣколю́бче Го́споди, и пода́ждь ми́ отверзе́ніе усто́мъ и гла́съ умиле́нія, да возмогу́ воспѣ́ти уго́дника Твоего́, Ники́ту преди́внаго.

Не́навистію возненави́дѣвъ суету́ мíра, вся́ содѣ́янная съ пла́чемъ исповѣ́далъ еси́ духо́вному твоему́ наста́внику и запреще́ніе любе́зно отъ души́ воспрія́лъ еси́.

Ели́ко имѣ́я друго́въ любле́нія, и подру́жія совокупле́нія, и домо́вное пребыва́ніе, во́лею всѣ́хъ оттщети́вся, Христа́ еди́наго пріобрѣ́лъ еси́.

Богоро́диченъ: Мольбу́ приноша́ю отъ усте́нъ недосто́йныхъ, сію́ пріими́, Влады́чице, я́ко вдо́выя о́ныя двѣ́ ца́тѣ, недѣ́йственна бо е́сть. Тѣ́мже со умиле́ніемъ вопію́ Ти: о Пребога́тая, сла́ва Рождеству́ Твоему́, Пречи́стая!

Пѣ́снь 3.

Ирмо́съ: Не му́дростію, и си́лою, и бога́тствомъ хва́лимся, но Тобо́ю, Отчею Ѵпоста́сною Му́дростію, Христе́, нѣ́сть бо свя́тъ, па́че Тебе́, Человѣколю́бче.

Пре́жднее весе́ліе измѣни́лъ еси́ бу́дущихъ ра́ди благи́хъ же́стостію, добродѣ́тельно пожи́въ, блаже́нне, на исто́чницѣ въ гора́хъ, я́ко вели́кій Илія́, пребыва́я.

Пу́ть пра́вый, его́же возжелѣ́въ поще́нія ра́ди, удивле́ніемъ бра́шенъ тебѣ́ показа́ Бо́гъ, его́же обрѣ́лъ еси́ безме́здно я́коже приста́нище, му́дре.

Коле́блемыхъ разли́чными страстьми́ ко твоему́ столпу́, Ники́то, приходя́щихъ, честны́мъ твои́мъ хода́тайствомъ всѣ́хъ на́съ посѣти́, моля́ Человѣколю́бца.

Богоро́диченъ: Тя́ Му́дрость Бо́жія всечестны́й орга́нъ обрѣ́тши, отъ Твои́хъ чи́стыхъ крове́й воплоща́ется и по рождествѣ́ нетлѣ́нну показа́.

Инъ.

Ирмо́съ: Утверди́ся се́рдце мое́ въ Го́сподѣ, вознесе́ся ро́гъ мо́й въ Бо́зѣ мое́мъ, разши́ришася на враги́ моя́ уста́ моя́, возвесели́хся о спасе́ніи Твое́мъ.

Матѳе́й, мы́тницу оста́вль, евангели́стъ показа́ся; ты́ же, преподо́бне, суету́ мíра отве́ргъ въ мона́шеская одѣ́явся, Христу́ угоди́лъ еси́ и чудотво́рецъ показа́лся еси́.

Лука́вое со́нмище оста́вль, Христо́въ яре́мъ на ся́ возложи́лъ еси́, труды́ же и по́двиги твои́ми всѣ́хъ удивля́я и ко спасе́нію наставля́я.

Блу́днаго гла́сомъ вопія́ и со воздыха́ніемъ въ пе́рси бія́, Бо́гу прибли́жился еси́ и ра́дости вѣ́чныя сподо́бился еси́ и непреста́ннаго, Ники́то, весе́лія.

Богоро́диченъ: Напа́стьми мно́гими одержи́мь съ болѣ́зньми и пла́чемъ вопію́ Ти: изба́ви, Богоро́дице, отъ одержа́щихъ мя́ скорбе́й и вѣ́чнаго муче́нія и Ца́рствія Сы́на Твоего́ сподо́би мя́.

Сѣда́ленъ, гла́съ 5:

Тѣ́ломъ возше́дъ на сто́лпъ, у́мъ же возвы́сивъ на премíрная, труды́ ко трудо́мъ прилага́еши, жела́я дости́гнути угото́ванныхъ тебѣ́ бла́гъ на небесѣ́хъ, и́хже получи́въ, помина́й на́съ, почита́ющихъ свяще́нную па́мять твою́.

Другíй сѣда́ленъ, гла́съ 4:

Яко всесвѣ́тлая звѣзда́, возсія́въ свѣтоза́рными добродѣ́тельми, богоно́се, всю́ ду́шу просвѣти́лъ еси́ Ду́хомъ. Тѣ́мъ преше́лъ еси́ къ невече́рнему Свѣ́ту, разрѣша́я страсте́й на́шихъ те́мныя о́блаки, па́мять твою́ при́сно творя́щихъ се́рдца пра́востію.

Сла́ва, и ны́нѣ, богоро́диченъ:

Нечи́стыхъ по́мыслъ мои́хъ мно́жество и безмѣ́стныхъ мы́слей обурева́нія кто́ изрещи́ мо́жетъ, Всенепоро́чная? Настоя́нія же безпло́тныхъ вра́гъ мои́хъ кто́ исповѣ́сть и си́хъ зло́бу? Но Твое́ю мольбо́ю, Блага́я, си́хъ мнѣ́ всѣ́хъ избавле́ніе да́руй.

Пѣ́снь 4.

Ирмо́съ: Сѣдя́й въ сла́вѣ на Престо́лѣ Божества́ во о́блацѣ ле́гцѣ, прíиде Іису́съ Пребоже́ственный, Нетлѣ́нною Дла́нію и спасе́ зову́щія: сла́ва, Христе́, си́лѣ Твое́й.

Столпу́, богоно́се, согражда́ему непоколе́блемою душе́ю са́мъ ся пре́далъ еси́, бу́дущую жи́знь предзря́, ея́же улучи́ти жела́я, я́ко хра́бръ во́инъ.

Ла́вры честны́я дости́глъ еси́, му́дре, возвы́сився смире́ніемъ, верхи́ де́монскія смири́лъ еси́ и въ не́й до́блествовалъ еси́, сла́ва мона́ховъ и утвержде́ніе.

Моли́твами и посто́мъ вооружи́вся и стра́хомъ себе́ умертви́въ Госпо́днимъ, блаже́нне, отсту́пника изсѣка́еши, неви́димаго змíя, о́тче, побѣ́дникъ бы́лъ еси́.

Ве́сь Боже́ственнымъ Ду́хомъ разже́нъ бы́въ, о́тче, труды́ подъя́лъ еси́ на мно́га лѣ́та, въ хлѣви́нѣ у́зцѣ терпя́, взыска́я Го́спода, благода́тію тя́ Боже́ственною укрѣпля́ющаго.

Богоро́диченъ: На престо́лѣ высо́цѣ стра́шно сѣдя́й на ма́тернюю руку́, Младе́нецъ бы́въ, сѣди́тъ, низпа́дшій о́бразъ возводя́ и обоже́ніе су́щимъ подава́я.

Инъ.

Ирмо́съ: Проро́къ Авваку́мъ у́мныма очи́ма прови́дѣ, Го́споди, прише́ствіе Твое́, тѣ́мъ и вопія́ше: отъ ю́га пріи́детъ Бо́гъ. Сла́ва си́лѣ Твое́й, сла́ва снизхожде́нію Твоему́.

При́сно имѣ́лъ еси́ къ Бо́гу моли́твенника, духо́внаго твоего́ наста́вника, я́коже втора́го Моисе́я, изве́дшаго изъ Еги́пта дре́вняго Изра́иля, науча́юща тя́ воспѣва́ти: сла́ва си́лѣ Твое́й, Го́споди.

Не довлѣ́ тебѣ́, преподо́бне, многотру́дное пребыва́ніе, желѣ́за тя́жкая на ся́ возлага́еши и труды́ къ трудо́мъ прилага́еши, вопія́ Христу́: сла́ва си́лѣ Твое́й, Го́споди.

Ше́ствія небеси́ явля́я, сто́лпъ водрузи́лъ еси́ и отъ сего́ стезю́ въ моли́твенный хра́мъ ископа́лъ еси́, идѣ́же прилѣ́жно вопія́ Христу́: сла́ва си́лѣ Твое́й, Го́споди.

Богоро́диченъ: Возста́ви мя́, ни́зу лежа́щаго, моли́твами Твои́ми, Пречи́стая, и на покая́нія стези́ наста́ви, да, возбну́въ отъ глубины́ неча́янія, узрю́ свѣ́тъ богоразу́мія и воспою́ заступле́ніе Твое́, Препѣ́тая.

Пѣ́снь 5.

Ирмо́съ: Ужасо́шася вся́ческая о Боже́ственнѣй сла́вѣ Твое́й: Ты́ бо, неискусобра́чная Дѣ́во, имѣ́ла еси́ во утро́бѣ надъ всѣ́ми Бо́га, и родила́ еси́ Безлѣ́тнаго Сы́на, всѣ́мъ, воспѣва́ющимъ Тя́, ми́ръ подава́ющая.

Ходи́лъ еси́, преподо́бне, по у́зкому пути́, боже́ственными восхожде́ніи се́рдца распространя́яся и прича́стіемъ обожа́яся, всему́дре. Тѣ́мъ бы́лъ еси́ мона́хомъ свѣ́тлость.

Око очи́стившу у́мное, преподо́бне, благода́ть даде́ся тебѣ́, а́ки проро́ку, е́же пре́дняя предзрѣ́ти и предглаго́лати я́ко су́щая да́льняя и безвѣ́стная.

Болѣ́знь облегчи́ ми грѣхо́въ и скорбе́й, и преста́ви се́рдца моего́ болѣ́зни, и согрѣше́ній разрѣше́ніе да́руй, Благодѣ́теля Бо́га имѣ́я, послу́шающаго честны́хъ твои́хъ моли́твъ.

Богоро́диченъ: Ума́ моего́ исцѣли́ превраще́ніе, Пречи́стая, уврачу́й стра́сти души́ моея́ и лѣ́ностную тму́ отжени́, я́ко да хвала́ми Тя́ при́сно ублажа́емъ, Всенепоро́чная.

Инъ.

Ирмо́съ: Го́споди Бо́же на́шъ, ми́ръ да́ждь на́мъ, Го́споди Бо́же на́шъ, стяжи́ ны, Го́споди, ра́звѣ Тебе́ ино́го не вѣ́мы, и́мя Твое́ имену́емъ.

Пѣ́нія соверша́я, исходя́ въ нощи́ отъ столпа́, два́ исто́чника ископа́лъ еси́, отъ ни́хже и до ны́нѣ, съ вѣ́рою почерпа́юще, пріе́млютъ благода́ть исцѣле́ній.

Сопе́рникъ прелука́вый, а́ки змíй превели́къ, посредѣ́ ке́лліи твоея́ изы́де, устраша́я тя́, ты́ же сего́, блаже́нне, попра́лъ еси́ и безъ вѣ́сти моли́твою до конца́ сотвори́лъ еси́.

Неду́гъ ослабле́нія удо́въ имѣ́я, благочести́вый Михаи́лъ, княже́ніе тогда́ содержа́й во гра́дѣ Черни́говѣ, моли́твами твои́ми исцѣле́ніе получи́.

Богоро́диченъ: Христа́ Іису́са ро́ждшая, Пречи́стая, Сего́ моли́ при́сно изба́вити отъ бѣ́дъ рабы́ Твоя́, вѣ́рою и́мя Твое́ призыва́ющія: ра́звѣ бо Тебе́, Влады́чице, ино́го заступле́нія не и́мамы.

Пѣ́снь 6.

Ирмо́съ: Боже́ственное сіе́ и всечестно́е соверша́юще пра́зднество, богому́дріи, Богома́тере, пріиди́те, рука́ми воспле́щимъ, отъ Нея́ ро́ждшагося Бо́га сла́вимъ.

Умертви́лъ еси́ стра́сти тѣле́сныя, я́ко дре́во ви́дѣся высокове́рхо, плоды́ чуде́съ принося́, Ники́то богоблаже́нне.

Иже безчи́сленнымъ болѣ́знемъ прибли́жихся, тѣ́ломъ не́мощенъ пребы́въ, преподо́бне. Тѣ́мъ зову́ ти вѣ́рою: болѣ́зни уста́ви се́рдца моего́.

Отъ душе́вныхъ не́мощей, о́тче, коле́блемыхъ, вѣ́рою тя́ призыва́ющихъ ны́нѣ посѣти́ моли́твами твои́ми, я́же къ Бо́гу, я́ко да благоче́стно тя́ сла́вимъ.

Богоро́диченъ: Еди́на Помо́щнице, помози́ ми, погиба́ющу, и ру́ку ми́ простри́, и ко приста́нищу наведи́ покая́нія, Дѣ́во Богора́дованная.

Инъ.

Ирмо́съ: Яко во́ды морскíя, Человѣколю́бче, волна́ми жите́йскими обурева́юся, тѣ́мже, я́ко Іо́на, та́ко вопію́ Ти́: возведи́ отъ тли́ живо́тъ мо́й, благоутро́бне Го́споди.

Преди́вно бы́сть чу́до: еще́ бо держа́вному Михаи́лу, ни оби́тели дости́гшу, ни столпа́ ви́дѣвшу, то́кмо же́злъ тво́й въ ру́цѣ пріи́мъ и о се́мъ укрѣпи́вся, исцѣле́ніе получи́ и пріи́де во оби́тель твою́ здра́въ.

Ра́достно благочести́вый Михаи́лъ кня́зь, пріе́мля отъ тебе́ благослове́ніе, са́мъ тебѣ́ исповѣ́да, ка́ко веліа́ръ во о́бразѣ чернца́, двакра́ты поноси́ тебе́, сказу́я тебе́, отъ житія́ сего́ отше́дша.

Держа́вный Михаи́лъ кня́зь, доше́дъ мѣ́ста, идѣ́же исцѣле́ніе получи́, повелѣ́ водрузи́ти Честны́й Кре́стъ въ сла́ву Бо́гу и въ па́мять чудеси́ преди́внаго отца́.

Богоро́диченъ: Все́ вре́мя живота́ моего́ во страсте́хъ изжи́хъ и ны́нѣ моле́нія приноша́ю Ти́, Пречи́стая: разрѣше́ніе пода́ждь ми́, Всепѣ́тая, и вѣ́чнаго мя́ изба́ви осужде́нія, Ты́ бо мíру Блага́я Помо́щница.

Конда́къ, гла́съ 8:

Христа́ ра́ди отъ твои́хъ рабо́въ ну́ждную сме́рть претерпѣ́лъ еси́ и вѣне́цъ нетлѣ́нія отъ Него́ воспрія́лъ еси́, приходя́щимъ же съ вѣ́рою отъ честна́го твоего́ гро́ба подае́ши цѣльбы́, о Ники́то преподо́бне, моли́твенниче о душа́хъ на́шихъ.

Икосъ:

Земны́й а́нгелъ, небе́сный человѣ́къ бы́лъ еси́, преподо́бне, посто́мъ и бдѣ́ніемъ ду́шу просвѣти́въ, алка́ніемъ, и жа́ждею, и на земли́ лега́ніемъ Бо́гу угоди́лъ еси́ и вся́ку добродѣ́тель мона́шескаго житія́ испра́вилъ еси́, къ си́мъ же и ну́ждную сме́рть отъ твои́хъ рабо́въ воспріи́мъ, возше́лъ еси́ къ жела́емому Христу́, ра́дуяся, о Ники́то преподо́бне, моли́твенниче о душа́хъ на́шихъ.

Пѣ́снь 7.

Ирмо́съ: Не послужи́ша тва́ри богому́дріи, па́че Созда́вшаго, но, о́гненное преще́ніе му́жески попра́вше, ра́довахуся, пою́ще: препѣ́тый отце́въ Госпо́дь и Бо́гъ, благослове́нъ еси́.

Се́рдце твое́ Тро́ическое жили́ще содѣ́лавъ, три́ кресты́ и тя́жкая желѣ́за, Ники́то, на себѣ́ поне́съ, отъ ни́хже Боже́ственною благода́тію цѣльбы́ истека́ютъ на просвѣще́ніе и очище́ніе вѣ́рно притека́ющимъ ти́.

Душа́ твоя́ свѣтозаре́ніемъ Боже́ственнаго Ду́ха сія́ющи при́сно, ду́ши ви́дяще притека́ющихъ ти́ вѣ́рою свѣ́тло, блаже́нне, проро́ческими прорече́ніи, тѣ́мъ тя́ ублажа́емъ.

Неду́говъ тружда́ющихъ, блаже́нне, ду́ши и тѣлеса́ твои́ми святы́ми моли́твами вско́рѣ измѣни́ и пѣ́ти сотвори́: препѣ́тый отце́въ Госпо́дь и Бо́гъ, благослове́нъ еси́.

Богоро́диченъ: Непремѣ́ннаго ро́ждши, еди́на Богора́дованная, десни́цею Его́, Чи́стая, премѣни́ти ми́ у́мъ на лу́чшее молю́ Ти ся, лю́тѣ превраща́емый жите́йскими упраждне́ніи.

Инъ.

Ирмо́съ: Отъ Іуде́и доше́дше, о́троцы, въ Вавило́нѣ иногда́, вѣ́рою Тро́ическою пла́мень пе́щный попра́ша, пою́ще: отце́въ Бо́же, благослове́нъ еси́.

Не ржа́ покры́ тя́жкая о́на желѣ́за, но труды́ твоя́ и по́ты си́хъ просвѣти́ша, и, я́ко зла́то, блеща́хуся: любве́ же ра́ди Госпо́дни не чу́лъ еси́ си́хъ на тѣлеси́ твое́мъ, усе́рдно вопія́: оте́цъ на́шихъ Бо́же, благослове́нъ еси́.

Му́тніи умо́мъ убíйцы, зря́ще блиста́ніе о́но на тѣлеси́ твое́мъ, мня́ще мно́жество зла́та нося́щу ти́, о убíйствѣ твое́мъ умы́слиша. Ты́ же отъ си́хъ, преподо́бне, ну́ждную сме́рть воспрія́лъ еси́, вопія́ Христу́: оте́цъ на́шихъ Бо́же, благослове́нъ еси́.

Обрѣто́ша во вре́мя у́тренняго клепа́нія честно́е тѣ́ло твое́, те́пло лежа́що, ду́шу же отше́дшу ко Го́споду, оби́тели же, испо́лньшися благово́нія, вси́ возопи́ша со слеза́ми: оте́цъ на́шихъ Бо́же, благослове́нъ еси́.

Богоро́диченъ: Це́рковь освяще́на Бо́гу бы́вши, Марíе Богороди́тельнице, Сего́ моли́, я́ко Человѣколю́бца, Чи́стая, уще́дрити лю́ди согрѣши́вшія и спасти́ отъ бѣ́дъ лю́тыхъ и страсте́й треволне́нія.

Пѣ́снь 8.

Ирмо́съ: Отроки благочести́выя въ пещи́ Рождество́ Богоро́дичо спасло́ е́сть, тогда́ у́бо образу́емое, ны́нѣ же дѣ́йствуемое, вселе́нную всю́ воздвиза́етъ пѣ́ти Тебѣ́: Го́спода по́йте, дѣла́, и превозноси́те Его́ во вся́ вѣ́ки.

Стоя́ на столпѣ́ вы́спрь, я́ко на свѣ́щницѣ свѣща́, преподо́бне, свѣтя́щи, всѣ́мъ ра́зумы вѣ́рнымъ просвѣща́я, пока́зовалъ еси́ до́брѣ словесы́ и дѣя́ніи стезю́ живота́ и возводи́лъ еси́ сія́ боже́ственнымъ смы́сломъ къ высотѣ́ безстра́стія.

Умъ безстра́стіемъ очи́щь, бесѣ́довалъ еси́ ко Го́споду Вседержи́телю, отъ Него́же неизрече́нная, преподо́бне, навыка́я, проро́чески предглаго́лалъ еси́, просвѣща́я ду́ши, я́ко вели́кій, преблаже́нне, проро́къ; тѣ́мъ тя́ согла́сно вѣ́рою воспѣва́емъ.

Наидо́ша ми́ ра́ны тя́жкія, и неду́зи ча́сто тружда́ютъ, тѣ́хъ мя́ измѣни́, о́тче, молю́ ти ся, я́ко отъ Бо́га пріи́мъ, Ники́то, благода́ть исцѣля́ти стра́сти и болѣ́зни облегча́ти.

Тро́иченъ: Со всѣ́ми го́рними во́инствы Отца́ и Сы́на и Свята́го Ду́ха, Тро́ицу Нераздѣ́льну, Несозда́нно Божество́, пѣсносло́вяще: Свя́тъ, Свя́тъ, Свя́тъ, — возопіе́мъ ра́достно, — Еди́на Вла́сть, Нача́ло и Ца́рство.

Богоро́диченъ: Иже всѣ́ми непристу́пенъ Сы́й Зижди́тель го́рними, Отрокови́це, чи́нми, всели́вся въ ложесна́ Твоя́, неопа́льну соблюде́ Тя и по рождествѣ́ нетлѣ́нну. Ему́же ны́нѣ при́сно пое́мъ: Го́спода воспѣва́йте дѣла́ и превозноси́те Его́ во вся́ вѣ́ки.

Инъ.

Ирмо́съ: Покрыва́яй вода́ми превы́спренняя Своя́, полага́яй мо́рю предѣ́лъ песо́къ и содержа́й вся́, Тя́ пое́тъ со́лнце, Тя́ сла́витъ луна́, Тебѣ́ прино́ситъ пѣ́снь вся́ тва́рь, я́ко Содѣ́телю всѣ́хъ во вѣ́ки.

Неразу́мніи о́ни убíйцы жела́емаго зла́та не получи́ша, честны́я же вери́ги въ рѣку́ Во́лгу вверго́ша; пресвѣ́тлымъ луча́мъ надъ ни́ми въ нощи́ я́вльшимся, я́ко и ве́сь гра́дъ Яросла́вль осія́вшимъ.

Кресты́ три́ и вери́ги тя́жки, верху́ воды́ пла́вающе, обрѣто́шася, и си́хъ боголюби́віи взе́мше, во гра́дъ Яросла́вль внесо́ша, и мно́зи, разли́чными неду́ги одержи́міи, исцѣле́ніе отъ си́хъ получи́ша.

Ты́ са́мъ, преподо́бне, обрѣ́тшему яви́вся, три́ кресты́, ре́клъ еси́, и тя́жкая желѣ́за, по́честь трудо́въ мои́хъ, ско́ро положе́ни да бу́дутъ на гро́бѣ мое́мъ. Онъ же, стра́хомъ и ра́достію одержи́мъ бѣ́, по словеси́ твоему́ та́ко сотвори́.

Богоро́диченъ: Твоя́ ми́лости на мнѣ́ удиви́вши, Чи́стая, уя́звенную ду́шу мою́ исцѣли́, и бу́дущаго муче́нія изба́ви, и Ца́рствія Сы́на Твоего́ сподо́би мя́.

Пѣ́снь 9.

Ирмо́съ: Вся́къ земноро́дный да взыгра́ется, Ду́хомъ просвѣща́емь, да торжеству́етъ же безпло́тныхъ умо́въ естество́, почита́ющее свяще́нное торжество́ Богома́тере, и да вопіе́тъ: ра́дуйся, Всеблаже́нная Богоро́дице, Чи́стая Приснодѣ́во.

Воздвиза́я ру́ки твоя́ къ Бо́гу, моли́лся еси́, крѣпя́ у́мъ тво́й удержа́ти отъ страсте́й, а́ки а́нгелъ, въ тѣлеси́, о́тче, ты́ бы́лъ еси́. Тѣ́мъ со а́нгелы всегда́ на небесѣ́хъ живе́ши, сла́вному престо́лу предстоя́, Свѣ́та невече́рняго исполня́емь.

Яко на небеси́, въ хлѣви́нѣ у́зцѣ пожи́лъ еси́, преподо́бне: тѣ́мъ ти́ умири́шася ди́віи звѣ́ріе, покори́вшему стра́сти тѣле́сныя и злостремле́нія, Ники́то преподо́бне. Сего́ ра́ди вѣ́рою тя́ почита́емъ.

Твоя́ честны́я и святы́я мо́щи, во гро́бѣ лежа́ще, погружа́ютъ неду́ги, и попаля́ютъ то́лпы де́монскія всегда́, преподо́бне Ники́то, Боже́ственною благода́тію, и источа́ютъ всѣ́мъ исцѣле́нія, вѣ́рно тя́ блажа́щимъ.

Уже́ къ Бо́гу приближа́яся я́снѣ и чи́стѣ, помяни́ вѣ́рою тя́, Ники́то, помина́ющихъ, грѣхо́въ оставле́ніе на́мъ испроси́, и неду́говъ всѣ́хъ избавле́ніе, и Бо́жія Ца́рства селе́ніе.

Богоро́диченъ: Свѣ́томъ мя́ озари́ Твои́мъ, Непоро́чная, ро́ждшая Свѣ́тъ непристу́пный, разжени́ о́блакъ страсте́й души́ моея́, и отъ тмы́ изми́, молю́ Ти ся, и Боже́ственнаго спасе́нія сподо́би, Чи́стая, еди́на Приснодѣ́ва.

Инъ.

Ирмо́съ: Тя́, Неискусобра́чную Ма́терь Бо́га Вы́шняго, Тя́, па́че ума́ ро́ждшую сло́вомъ вои́стинну Бо́га, вы́шшую пречи́стыхъ си́лъ, немо́лчными славословле́ніи велича́емъ..

Моли́ за ны́, о́тче преподо́бне, — держа́вный вопія́ше, — и испроси́ мíру ми́ръ, на́мъ же здра́віе и на враги́ одолѣ́ніе; тебе́ бо моли́твенника те́пла ко Влады́цѣ предлага́емъ.

Ра́ку твою́ лобыза́юще, ца́ріе благочести́віи уми́льно глаго́лютъ: испроси́ у Христа́, преподо́бне, на́мъ же и ча́домъ на́шимъ здра́віе, и спасе́ніе и ве́лію ми́лость.

Ку́пно за Импера́тора, и святи́телей, и за вся́ правосла́вныя моли́ся, преподо́бне, да вси́, па́мять твою́ свѣ́тло пра́зднующе, въ пѣ́снехъ Христа́ велича́емъ.

Богоро́диченъ: Льва́ рыка́ющаго на мя́ ути́ши, Пречи́стая, мене́ же цѣльбы́ боже́ственныя сподо́би, да узрю́ свѣ́тъ богоразу́мія и ра́достно воспою́ Рождество́ Твое́, Богоро́дице.

Свѣти́ленъ:

Вся́ житія́ оста́вль, Христа́ пріобрѣ́лъ еси́, трудополо́жно пожи́въ и сме́рть ну́ждную воспрія́тъ; тѣ́мъ па́мять твою́, Ники́то, почита́емъ. [Два́жды.]

Сла́ва, и ны́нѣ, богоро́диченъ:

Бо́га на́мъ, Пречи́стая, родила́ еси́, и вси́, прароди́тельныя кля́твы изба́вльшеся, воспѣва́емъ Тя́, Препѣ́тая.

На хвали́техъ стихи́ры на 4, гла́съ 8. Подо́бенъ: О, пресла́внаго чудесе́!

О, пресла́внаго чудесе́!* Ка́ко премѣни́ся ра́зумъ тво́й* отъ суеты́ мíра на благоче́стіе?* Смире́нъ и цѣлому́дръ показа́ся* мона́хомъ наста́вникъ ко спасе́нію,* по́стниковъ похвала́,* молча́льниковъ удобре́ніе.* Тѣ́мже любо́вію па́мять твою́,* Ники́то преподо́бне, ублажа́емъ. [Два́жды.]

Моли́твенникъ къ Бо́гу крѣ́покъ бы́лъ еси́,* чистоты́ рачи́тель,* цѣлому́дрія о́бразъ,* терпѣ́нія сто́лпъ,* а́нгельски на земли́ пожи́лъ еси́,* и, я́ко звѣзда́ пресвѣ́тлая, показа́лся еси́,* и бы́лъ еси́ мно́гимъ во́ждь ко спасе́нію.* Тѣ́мже любе́зно па́мять твою́,* Ники́то преподо́бне, восхваля́емъ.

Образомъ ангелолѣ́пенъ показа́лся еси́,* сѣди́на честна́, посто́мъ укра́шена,* воздержа́ніемъ сія́я,* братолю́біемъ цвѣты́й,* кро́токъ взо́ромъ,* и ти́хъ хожде́ніемъ,* и умиле́нъ видѣ́ніемъ, и смире́нъ се́рдцемъ,* высо́къ добродѣ́тельнымъ житіе́мъ.* Тѣ́мже любо́вію па́мять твою́,* Ники́то преподо́бне, ублажа́емъ.

Сла́ва, гла́съ то́йже. Самогла́сенъ:

Преподо́бне о́тче Ники́то, въ мона́шествѣ пожи́лъ еси́ непоро́чно и благоуго́дно Го́сподеви, и, ели́ко трудополо́жно нача́лъ еси́, изря́дно и чу́дно сконча́лъ еси́ и всесоверше́нно во стра́сѣ Бо́жіи, и чуде́съ дарова́ній сподо́бился еси́, е́же исцѣля́ти неду́ги разли́чныя и прогоня́ти ду́хи лука́выя. Тѣ́мъ па́мять твою́ почита́емъ, досточу́дне.

И ны́нѣ, богоро́диченъ.
Славосло́віе вели́кое. [Ектеніи́] и отпу́стъ.



НА ЛИТУРГІИ,

[Блаже́нна, пе́рваго кано́на свята́го, пѣ́снь 3-я, и втора́го, пѣ́снь 6-я. Проки́менъ, гла́съ 7: Честна́ предъ Го́сподемъ* сме́рть преподо́бныхъ Его́. Сти́хъ: Что́ возда́мъ Го́сподеви о всѣ́хъ, я́же воздаде́ ми? Апо́столъ къ Гала́томъ, зача́ло 213. Аллилу́ія, гла́съ 6: Блаже́нъ му́жъ, боя́йся Го́спода, въ за́повѣдехъ Его́ восхо́щетъ зѣло́. Сти́хъ: Си́льно на земли́ бу́детъ сѣ́мя его́. Ева́нгеліе Луки́, зача́ло 24. Прича́стенъ: Въ па́мять вѣ́чную бу́детъ пра́ведникъ, отъ слу́ха зла́ не убои́тся.]

Источникъ: Минíа, мѣ́сяцъ Ма́ій. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 201 – 211.

/ Къ оглавленію раздѣла /


Наверхъ / Къ титульной страницѣ

0