Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - воскресенiе, 25 iюня 2017 г. Сейчасъ на порталѣ посѣтителей - 15.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Ма́ія въ 23-й де́нь.
Слу́жба преподо́бнѣй ма́тери на́шей Евфроси́ніи По́лотской.

НА ВЕЧЕРНИ,
На Го́споди воззва́хъ: стихи́ры, гла́съ 6:

Ангельскому житію́ подража́ющи,* посто́мъ и моли́твами Христу́, я́ко безпло́тна, послужи́ла еси́.* Ны́нѣ со а́нгельскими чи́нми водворя́ющися* въ черто́зѣ Безсме́ртнаго Жениха́ твоего́,* моли́, Его́же возлюби́ла еси́,* о чту́щихъ ра́достно всечестну́ю па́мять твою́.

Ангелоподо́бное житіе́ воспріе́мши,* сла́ву вре́менную, и бога́тство,* и до́мъ о́тчій, и обру́чника земна́го оста́вила еси́* и си́хъ ра́ди воздая́ніе вѣ́чное* на небеси́ воспрія́ла еси́,* идѣ́же со а́нгелы ра́дующися,* моли́ о чту́щихъ любо́вію па́мять твою́.

Сла́ва, [гла́съ то́йже]:

Мона́шескаго чи́на удобре́ніе и чернори́зицъ похвалу́ ра́достно воспои́мъ дне́сь, Царя́ Христа́ Бо́га на́шего восхваля́юще: Се́й бо, я́ко Освяти́тель святы́хъ и похвала́ преподо́бныхъ, просла́ви нетлѣ́ніемъ мо́щи преподо́бныя Евфроси́ніи, и́мже благовѣ́рніи лю́діе благоговѣ́йно предстоя́ще и съ любо́вію лобыза́юще я́, исцѣле́нія въ болѣ́знехъ пріе́млютъ и въ ско́рбехъ утѣше́ніе и ра́достно со умиле́ніемъ глаго́лютъ: ра́дуйся, Евфроси́ніе, невѣ́сто Христо́ва всечестна́я.

И ны́нѣ, богоро́диченъ: Кто́ Тебе́ не ублажи́тъ...
Вхо́дъ. Проки́менъ дне́. И чте́нія три́.

Прему́дрости Соломо́ни чте́ніе.

Пра́ведныхъ ду́ши въ руцѣ́ Бо́жіей, и не прико́снется и́хъ му́ка. Непщева́ни бы́ша во очесѣ́хъ безу́мныхъ умре́ти, и вмѣни́ся озлобле́ніе исхо́дъ и́хъ, и е́же отъ на́съ ше́ствіе — сокруше́ніе, они́ же су́ть въ ми́рѣ. Ибо предъ лице́мъ человѣ́ческимъ, а́ще и му́ку пріи́мутъ, упова́ніе и́хъ безсме́ртія испо́лнено. И вма́лѣ нака́зани бы́вше, вели́кими благодѣ́тельствовани бу́дутъ, я́ко Бо́гъ искуси́ я́ и обрѣ́те и́хъ досто́йны Себѣ́. Я́ко зла́то въ горни́лѣ, искуси́ и́хъ и, я́ко всепло́діе же́ртвенное, прія́тъ я́. И во вре́мя посѣще́нія и́хъ, возсія́ютъ, и я́ко и́скры по сте́блію, потеку́тъ. Су́дятъ язы́комъ и облада́ютъ людьми́, и воцари́тся Госпо́дь въ ни́хъ во вѣ́ки. Надѣ́ющіися На́нь разумѣ́ютъ и́стину и вѣ́рніи въ любви́ пребу́дутъ Ему́, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.

Прему́дрости Соломо́ни чте́ніе.

Пра́ведницы во вѣ́ки живу́тъ, и въ Го́сподѣ мзда́ и́хъ, и попече́ніе и́хъ у Вы́шняго. Сего́ ра́ди пріи́мутъ ца́рствіе благолѣ́пія и вѣне́цъ добро́ты отъ руки́ Госпо́дни, зане́ десни́цею покры́етъ я́ и мы́шцею защити́тъ и́хъ. Пріи́метъ всеору́жіе — рве́ніе свое́ и вооружи́тъ тва́рь въ ме́сть враго́мъ. Облече́тся въ броня́ пра́вды и возложи́тъ шле́мъ — су́дъ нелицемѣ́ренъ. Пріи́метъ щи́тъ непобѣди́мый — преподо́біе, поостри́тъ же напра́сный гнѣ́въ — во ору́жіе, спобо́ретъ же съ ни́мъ мíръ на безу́мныя. По́йдутъ праволу́чныя стрѣ́лы мо́лніины и, я́ко отъ благокру́гла лу́ка облако́въ, на намѣ́реніе полетя́тъ, и отъ каменоме́тныя я́рости испо́лнь паду́тъ гра́ды. Вознегоду́етъ на ни́хъ вода́ морска́я, рѣ́ки же потопя́тъ я́ на́гло. Сопроти́въ ста́нетъ и́мъ ду́хъ си́лы и, я́ко ви́хоръ, развѣ́етъ и́хъ, и опустоши́тъ всю́ зе́млю беззако́ніе, и злодѣ́йство преврати́тъ престо́лы си́льныхъ. Слы́шите у́бо, ца́ріе, и разумѣ́йте, навы́кните, судіи́ конце́въ земли́. Внуши́те держа́щіи мно́жества и гордя́щіися о наро́дѣхъ язы́ковъ, я́ко дана́ е́сть отъ Го́спода держа́ва ва́мъ и си́ла отъ Вы́шняго.

Прему́дрости Соломо́ни чте́ніе.

Пра́ведникъ, а́ще пости́гнетъ сконча́тися, въ поко́и бу́детъ. Ста́рость бо честна́ не многолѣ́тна, ниже́ въ числѣ́ лѣ́тъ исчита́ется. Сѣди́на же е́сть му́дрость человѣ́комъ, и во́зрастъ ста́рости — житіе́ нескве́рное. Благоуго́денъ Бо́гови бы́въ, возлю́бленъ бы́сть, и живы́й посредѣ́ грѣ́шникъ, преста́вленъ бы́сть. Восхище́нъ бы́сть, да не зло́ба измѣни́тъ ра́зума его́ или́ ле́сть прельсти́тъ ду́шу его́. Раче́ніе бо зло́бы помрача́етъ до́брая и паре́ніе по́хоти, премѣня́етъ у́мъ незло́бивъ. Сконча́вся вма́лѣ, испо́лни лѣ́та до́лга, уго́дна бо бѣ́ Го́сподеви душа́ его́, сего́ ра́ди потща́ся отъ среды́ лука́вствія. Лю́діе же ви́дѣвше и не разумѣ́вше, ниже́ поло́жше въ помышле́ніи таково́е, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.

На литíи стихи́ры, гла́съ 7:

Преподо́бная ма́ти Евфроси́ніе, житіе́ твое́ на земли́ богоуго́дно соверши́ла еси́, пра́ведна и во всѣ́хъ оправда́ніихъ Госпо́днихъ безпоро́чна. Пріиди́те у́бо, мона́шествующихъ собо́ри, пѣ́сньми и пѣ́ніи духо́вными свѣ́тло ликовству́имъ дне́сь, си́це зову́ще: ра́дуйся, апо́стольскихъ и оте́ческихъ преда́ній ревни́тельнице; ра́дуйся, По́лотскаго гра́да похвало́; ра́дуйся, Евфроси́ніе всечестна́я, ты́ бо смире́ніемъ и чистото́ю Ца́рствіе не́бесное въ чи́нѣ а́нгельстѣмъ наслѣ́довала еси́. И ны́нѣ Го́споду предстоя́щи, моли́ Его́ дарова́ти на́мъ ве́лію и бога́тую ми́лость.

По до́лгу ублажа́емъ тя́, я́ко на́шу похвалу́ и а́нгела во пло́ти, житіе́ бо твое́, Евфроси́ніе, че́стно и успе́ніе со святы́ми: просія́ла бо еси́ дѣ́лы благи́ми и мно́гихъ ко Христу́ привела́ еси́; и Кре́стъ честны́й твое́й оби́тели завѣща́ла еси́; по да́ру благода́ти Бо́жія, обита́вшія въ тебѣ́, проро́чески прови́дящи по разруше́ніи ея́ па́ки чрезъ Кре́стъ возобновле́ніе, е́же ны́нѣ и соверши́ся. Тѣ́мже мы́, съ ра́достію ублажа́юще тя́, припа́даемъ ти́, со умиле́ніемъ моля́щеся: моли́ся за ны́, ма́ти преподо́бная, ко Го́споду, да пода́стъ душа́мъ на́шимъ ве́лію и бога́тую ми́лость.

Сла́ва, [гла́съ то́йже]:

Дне́сь свѣ́тло красу́ется дре́вній гра́дъ По́лотскъ боже́ственнымъ сокро́вищемъ Креста́ Госпо́дня, его́же усе́рдіемъ твои́мъ устро́ила еси́, преподо́бная Евфроси́ніе, и оби́тель твоя́ ра́дуется о возвраще́ніи е́й Честна́го и Животворя́щаго Креста́, и́же чрезъ мно́гая лѣ́та сохране́нъ бы́сть Про́мысломъ Госпо́днимъ; ему́же покланя́ющеся съ вѣ́рою и любе́зно его́ лобыза́юще, исцѣле́нія душе́вная и тѣле́сная пріе́млемъ, Христа́ непреста́нно велича́юще.

И ны́нѣ, богоро́диченъ:

Богоро́дице Дѣ́во, упова́ніе христіа́номъ, покры́й и соблюди́ ны Твои́ми къ Сы́ну Твоему́ и Бо́гу моли́твами отъ вся́кія ну́жды и печа́ли.

На стихо́внѣ стихи́ры, гла́съ 8:

Преподо́бная ма́ти Евфроси́ніе,* ты́ Христу́ Го́споду* во смире́ніи и кро́тости послужи́ла еси́,* и мно́гихъ ко спасе́нію наста́вила еси́,* и сего́ ра́ди отъ Го́спода* воздая́ніе воспрія́ла еси́,* Его́же моли́ спасти́ся душа́мъ на́шимъ.

Сти́хъ: Ди́венъ Бо́гъ во святы́хъ Свои́хъ,* Бо́гъ Изра́илевъ.

Преподо́бная ма́ти Евфроси́ніе,* съ любо́вію ублажа́емъ тя́,* Ева́нгелія и́стинную исповѣ́дницу,* правосла́вія ревни́тельницу,* воздержа́нія учи́тельницу,* а́нгеломъ собесѣ́дницу,* ни́щихъ и сиро́тъ пита́тельницу,* ю́же вѣнча́ Христо́съ вѣнце́мъ небе́снымъ,* Его́же моли́ спасти́ся душа́мъ на́шимъ.

Сти́хъ: Честна́ предъ Го́сподемъ* сме́рть преподо́бныхъ Его́.

Преподо́бная ма́ти Евфроси́ніе,* ра́достно соверша́юще па́мять твою́,* прославля́емъ по́двиги твоя́:* во трудѣ́хъ бо отъ ю́ности Христу́ послужи́ла еси́,* а́нгельскія чи́ны удиви́вши;* на земли́, я́ко безпло́тна,* въ постѣ́хъ и моли́твахъ,* и всено́щныхъ стоя́ніихъ,* и въ богомы́сліи пребыва́ла еси́.* Тѣ́мже и Ду́ха Свята́го* въ ду́шу твою́ прія́ла еси́.

Сла́ва, гла́съ то́йже:

Свѣ́тло украси́вши свѣти́льникъ тво́й еле́емъ чистоты́ и ми́лости, въ небе́сный Черто́гъ съ му́дрыми дѣ́вами ко Христу́ возшла́ еси́, къ Жениху́ твоему́ Безсме́ртному. Ему́же прилѣ́жно моли́ся о соверша́ющихъ любо́вію па́мять твою́.

И ны́нѣ, богоро́диченъ: Безневѣ́стная Дѣ́во...

По Ны́нѣ отпуща́еши.., тропа́рь, гла́съ 4:

Подража́ющи дванадесятолѣ́тна дванадесятолѣ́тну Христу́, учи́вшему во святи́лищи Бо́жію сло́ву, послѣ́довала еси́, Евфроси́ніе. Сла́ву вре́менную и земна́го обру́чника оста́вльши и вся́ мірска́я презрѣ́вши, краснѣ́йшему па́че всѣ́хъ Христу́ себе́ уневѣ́стила еси́, кре́стъ взе́мши, путе́мъ а́нгельскаго житія́ ше́ствующи и мно́гая къ Нему́ наставля́юши, во благоуха́ніи мѵ́ра въ небе́сный Черто́гъ востекла́ еси́, идѣ́же моли́, Его́же возлюби́ла еси́, о чту́щихъ благоче́стно па́мять твою́.


НА УТРЕНИ,
На Бо́гъ Госпо́дь: тропа́рь, два́жды. Сла́ва, и ны́нѣ: Еже отъ вѣ́ка утае́нное...

По 1-мъ стихосло́віи сѣда́ленъ, гла́съ 1:

За́повѣди Госпо́дни возлюби́вши, отъ ю́ности твоея́, преподо́бная ма́ти, мно́гимъ была́ еси́ наста́вница мона́шескаго житія́, мно́гія ко Христу́ привела́ еси́; тѣ́мже дне́сь пра́зднующе всечестну́ю па́мять твою́, прославля́емъ Бо́га, прославля́ющаго святы́я Своя́. [Два́жды.]

Сла́ва, и ны́нѣ, богоро́диченъ:

Уста́ми и се́рдцемъ велича́емъ Тя́, Ма́терь Бо́жію: Ты́ же, ро́ждшая Бо́га, не отри́ни на́съ отъ Твоего́ заступле́нія.

По 2-мъ стихосло́віи сѣда́ленъ, гла́съ 1:

Дѣ́вства чистото́ю украси́вши твою́ ду́шу, преподо́бная Евфроси́ніе, со свѣти́льникомъ горя́щимъ возшла́ еси́ во дворы́ Го́спода твоего́, Его́же моли́ непреста́нно, да и мы́ сподо́бимся причте́ни бы́ти къ ли́ку избра́нныхъ. [Два́жды.]

Сла́ва, и ны́нѣ, богоро́диченъ:

Ско́рая въ бѣда́хъ Засту́пнице, гото́вое обурева́емыхъ приста́нище, сохрани́ мя, Ма́ти Бо́жія, отъ потопле́нія жите́йскаго и не да́ждь ми́ сокруши́тися о ка́мень па́губы душе́вныя.

По поліеле́и сѣда́ленъ, гла́съ 8:

Просія́ла еси́ а́нгельскимъ житіе́мъ твои́мъ, преподо́бная Евфроси́ніе, украша́ющися красото́ю нра́ва, воздержа́ніемъ и милосе́рдіемъ, поуча́ющи духо́вныя сестры́ твоя́ словесы́ душеспаси́тельными, и, примѣ́ромъ сло́во утвержда́ющи, мно́гихъ ко спасе́нію привела́ еси́; тѣ́мже, приснопа́мятная Евфроси́ніе, предстоя́щи Престо́лу Вседержи́теля, моли́ дарова́ти грѣхо́въ оставле́ніе чту́щимъ любо́вію па́мять твою́. [Два́жды.]

Сла́ва, и ны́нѣ, богоро́диченъ:

Проро́цы Тя́ предвозвѣсти́ша, апо́столи проповѣ́даша, му́ченицы просла́виша, святи́теліе ублажи́ша, тѣ́мже и мы́ съ ни́ми Богоро́дицу Тя́ исповѣ́дающе, благоче́стно велича́емъ.

Степе́нна, 1-й антифо́нъ 4-го гла́са. Проки́менъ, [гла́съ 4]: Честна́ предъ Го́сподемъ* сме́рть преподо́бныхъ Его́. Сти́хъ: Что́ возда́мъ Го́сподеви о всѣ́хъ, я́же воздаде́ ми? Ева́нгеліе отъ Матѳе́я, зача́ло 104.

По 50-мъ псалмѣ́ стихи́ра, гла́съ 7:

Блага́я и вѣ́рная рабо́ Госпо́дня, и́го Христо́во благо́е на себе́ воспріе́мши, и бре́мя Его́ ле́гкое на себѣ́ усе́рдно поне́сши, и ны́нѣ въ небе́снѣмъ Ца́рствіи водворя́ющися, о на́съ помоли́ся, да сподо́бимся ве́лія и бога́тыя ми́лости.

Кано́нъ, гла́съ 6.

Пѣ́снь 1.

Ирмо́съ: Яко по су́ху пѣшеше́ствовавъ Изра́иль по бе́зднѣ стопа́ми, гони́теля фарао́на ви́дя потопля́ема, Бо́гу побѣ́дную пѣ́снь пои́мъ, вопія́ше.

Отъ ю́ности поуча́ющися свяще́ннымъ за́повѣдемъ Госпо́днимъ и жела́ющи Ему́ еди́ному послужи́ти, презрѣ́ла еси́ сла́ву и бога́тство мíра сего́.

Христа́ возлюби́вши, роди́телей и сро́дниковъ твои́хъ и обру́чника земна́го оста́вила еси́, преподо́бная, и мона́шеское житіе́ воспрія́ла еси́.

Ско́рби испо́лнися се́рдце отца́ и ма́тере твоея́, егда́ во и́ночестѣмъ о́бразѣ узрѣ́ша тя́, возлю́бленную дще́рь свою́, ты́ же словесы́ благи́ми, вразумля́ющу тя́ Свято́му Ду́ху, утѣ́шила еси́ и́хъ.

Богоро́диченъ: Ско́рбныхъ наведе́нія обурева́ютъ смире́нную мою́ ду́шу, и напа́стей о́блацы мое́ покрыва́ютъ се́рдце, Богоневѣ́стная, но, Свѣ́тъ ро́ждшая Боже́ственный и Превѣ́чный, возсія́й ми́ свѣ́тъ ра́достный.

Пѣ́снь 3.

Ирмо́съ: Нѣ́сть свя́тъ, я́коже Ты́, Го́споди Бо́же мо́й, вознесы́й ро́гъ вѣ́рныхъ Твои́хъ, Бла́же, и утверди́вый на́съ на ка́мени исповѣ́данія Твоего́.

Въ безмо́лвіи со еди́нымъ Го́сподемъ моли́твою жела́ющи соедини́тися, при святѣ́й це́ркви Святы́я Софíи въ тѣ́снѣй ке́лліи водвори́лася еси́, преподо́бная.

Отъ труда́ ру́къ твои́хъ, преподо́бная, послужи́ла еси́ Христу́, Спаси́телю на́шему, богоуго́дно упражня́ющися въ преписа́ніи кни́гъ святы́хъ, и цѣно́ю, взе́млемою за ни́хъ, утѣша́ла еси́ ни́щую бра́тію Христо́ву.

Въ кро́тости и смире́ніи, въ постѣ́хъ и моли́твахъ, въ трудѣ́хъ, и нощны́хъ бдѣ́ніихъ, и моли́твенныхъ колѣнопреклоне́ніихъ, усе́рдно послужи́ла еси́ Го́споду твоему́, всечестна́я.

Богоро́диченъ: Удиви́ла еси́ вои́стинну ны́нѣ на мнѣ́, Влады́чице, благодѣя́нія Твоя́, Богоотрокови́це, и ми́лости Твоя́, тѣ́мже сла́влю Тя́, и воспѣва́ю, и почита́ю мно́гое и безмѣ́рное е́же о на́съ смотре́ніе Твое́.

Сѣда́ленъ, гла́съ 5:

Ангельскаго видѣ́нія сподо́билася еси́, преподо́бная ма́ти Евфроси́ніе, трикра́тно бо посѣти́ тя а́нгелъ, возвѣща́я ти́ во́лю Госпо́дню, да и́деши на мѣ́сто, нарица́емое Сельце́, и устро́иши та́мо оби́тель дѣ́въ, Бо́гу освяще́нныхъ. [Два́жды.]

Сла́ва, и ны́нѣ, богоро́диченъ:

Еди́на и́стинная христіа́нъ Покрови́тельнице, вся́кихъ лю́тыхъ обстоя́ній, бѣ́дъ и скорбе́й на́съ изба́ви и моли́твами Твои́ми спаси́ ду́ши на́ша.

Пѣ́снь 4.

Ирмо́съ: Христо́съ моя́ си́ла, Бо́гъ и Госпо́дь, честна́я Це́рковь боголѣ́пно пое́тъ, взыва́ющи, отъ смы́сла чи́ста, о Го́сподѣ пра́зднующи.

Ангелъ возвѣсти́ бы́вшему во дни́ твоя́ святи́телю Иліи́ о тебѣ́, преподо́бная, повелѣва́я да́ти мѣ́сто, во е́же оби́тель устро́ити.

Якоже возлежи́тъ на главѣ́ ца́рстѣй вѣне́цъ, та́ко почива́етъ Ду́хъ Святы́й на тебѣ́, преподо́бная, — си́це возвѣсти́ а́нгелъ святи́телю.

И я́ко мѵ́ро восхо́дитъ къ Бо́гу, та́ко восхо́дитъ моли́тва преподо́бныя, и я́ко со́лнце сія́етъ на тве́рди небе́снѣй, та́ко просія́ житіе́ Евфроси́ніи предъ а́нгелы Бо́жіими, — глаго́ла а́нгелъ въ видѣ́ніи святи́телю.

Богоро́диченъ: И гдѣ́ про́чее ино́е обря́щу заступле́ніе? ка́мо прибѣ́гну? гдѣ́ же и спасу́ся? ку́ю те́плую возъи́мамъ Помо́щницу, скорбьми́ жите́йскими и бу́рями, увы́ мнѣ́! коле́блемь? На Тя́ Еди́ну упова́ю, и дерза́ю, и хвалю́ся, и притека́ю къ покро́ву Твоему́: спаси́ мя.

Пѣ́снь 5.

Ирмо́съ: Бо́жіимъ свѣ́томъ Твои́мъ, Бла́же, у́тренюющихъ Ти́ ду́ши любо́вію озари́, молю́ся, Тя́ вѣ́дѣти, Сло́вѣ Бо́жій, и́стиннаго Бо́га, отъ мра́ка грѣхо́внаго взыва́юща.

Ра́дости и удивле́нія о видѣ́ніи а́нгельстѣмъ испо́лнися архіере́й Госпо́день и призва́ тя́, преподо́бная, возвѣсти́ти ти́ чу́дное явле́ніе.

Во́лю Го́спода твоего́ со усе́рдіемъ испо́лнила еси́, преподо́бная, и пришла́ еси́ на мѣ́сто, пока́занное ти́ а́нгеломъ, и та́мо водвори́лася еси́.

На еди́наго Го́спода возложи́вши тве́рдое упова́ніе, ничто́же стяжа́ла еси́ отъ имѣ́ній, но въ нищетѣ́ ева́нгельстѣй пребыва́ла еси́.

Богоро́диченъ: Кíй Тебѣ́ да́ръ принесу́ благодаре́нія, за и́хже наслади́хся, Твои́хъ дарова́ній и Твоея́ безмѣ́рныя благосты́ни? Тѣ́мже сла́влю, пѣсносло́влю и велича́ю Твою́ неизрече́нную ко мнѣ́ ми́лость.

Пѣ́снь 6.

Ирмо́съ: Жите́йское мо́ре, воздвиза́емое зря́ напа́стей бу́рею, къ ти́хому приста́нищу Твоему́ прите́къ, вопію́ Ти: возведи́ отъ тли́ живо́тъ мо́й, Многоми́лостиве.

Ви́дѣвше ангелоподо́бное твое́ житіе́, мно́гія дѣ́вы восхотѣ́ша обручи́тися Христу́ и въ чи́стѣмъ дѣ́вствѣ Ему́ еди́ному послужи́ти.

Сестра́ твоя́, княжна́ Звенисла́ва, подража́ющи тебѣ́, отве́ржеся сла́вы и наслажде́ній мíра сего́ и къ тебѣ́ притече́, и́го Христо́во благо́е на себе́ воспрія́ти.

Ви́дящи умножаю́щіяся сестры́ твоя́ духо́вныя, Евфроси́ніе всечестна́я, возжела́ла еси́ сооруди́ти хра́мъ Го́споду Вседержи́телю, честна́го и сла́внаго Его́ Преображе́нія.

Богоро́диченъ: Утѣше́ніе въ ско́рбехъ вѣ́мъ, и неду́говъ цѣле́ніе Тя́ зна́ю, Богома́ти, и всесоверше́нное сокруше́ніе сме́рти, и рѣку́ живота́ неисчерпа́емую, и всѣ́хъ, су́щихъ въ напа́стехъ, ско́рое и бы́строе заступле́ніе.

Конда́къ гла́съ 8:

Избра́ннѣй Бо́гомъ отъ са́маго рожде́нія и призва́ннѣй на служе́ніе Ему́, въ чи́нѣ а́нгельстѣмъ Го́сподеви послужи́вшей свя́то, и препо́добно пожи́вшей, и ны́нѣ съ небе́сными си́лами Го́спода восхваля́ющей, о на́съ же, грѣ́шныхъ, предъ Го́сподемъ хода́тайствующей, съ ра́достію и любо́вію воззове́мъ: ра́дуйся, Евфроси́ніе, невѣ́сто Христо́ва всечестна́я.

Икосъ:

Ангельски на земли́ житіе́ соверши́ла еси́, чистото́ю и смире́ніемъ, кро́тостію и терпѣ́ніемъ, милосе́рдіемъ и воздержа́ніемъ Го́сподеви угоди́ла еси́, и ны́нѣ во свѣ́тлостехъ святы́хъ почива́ющи послѣди́ трудо́въ свои́хъ, пріими́ отъ на́съ пѣ́ніе сіе́: ра́дуйся, дѣ́вственнице душе́ю и тѣ́ломъ; ра́дуйся, наста́внице преди́вная иноки́нямъ; ра́дуйся, еще́ на земли́ сподо́бльшаяся а́нгельскаго видѣ́нія; ра́дуйся, отъ Го́спода чрезъ а́нгела устро́ити оби́тель повелѣ́ніе пріе́мшая; ра́дуйся, со усе́рдіемъ во́лю Госпо́дню испо́лньшая; ра́дуйся, вся́ земна́я наслажде́нія мíра сего́ Христа́ ра́ди отве́ргшая; ра́дуйся, Небе́сному Жениху́, Іису́су Сладча́йшему, себе́ обручи́вшая; ра́дуйся, въ чистотѣ́, постѣ́хъ и моли́твахъ Тому́ послужи́вшая; ра́дуйся, безцѣ́нное сокро́вище — пречестны́й Кре́стъ оби́тели свое́й во освяще́ніе и утвержде́ніе стяжа́вшая; ра́дуйся, въ трудѣ́хъ дневны́хъ и нощны́хъ житіе́ твое́ соверши́вшая; ра́дуйся, въ невече́рнемъ дни́ Ца́рствія Бо́жія ны́нѣ пребыва́ющая; ра́дуйся, Евфроси́ніе, невѣ́сто Христо́ва всечестна́я.

Пѣ́снь 7.

Ирмо́съ: Росода́тельну у́бо пе́щь содѣ́ла а́нгелъ преподо́бнымъ отроко́мъ, халде́и же опаля́ющее велѣ́ніе Бо́жіе, мучи́теля увѣща́ вопи́ти: благослове́нъ еси́, Бо́же оте́цъ на́шихъ.

Не о свое́мъ то́чію спасе́ніи прилѣжа́ше ти́ попече́ніе, преподо́бная ма́ти, но о всѣ́хъ, и́хже ти́ ввѣ́рилъ е́сть Госпо́дь, и́хже поуча́ла еси́ въ зако́нѣ Госпо́дни, твори́ти во́лю Его́.

Образъ была́ еси́ слове́сному твоему́ ста́ду, всечестна́я Евфроси́ніе, дѣ́лы благи́ми, смире́ніемъ возвыша́ющися, и кро́тостію привлека́ющи, и терпѣ́ніемъ утвержда́ющи пребыва́ти непрекло́нными въ любви́ ко Го́споду.

Егда́ соверша́шеся созида́ніе хра́ма Госпо́дня, а́нгелъ возбужда́ше строи́теля, глаго́ля: Іоа́нне, иди́ на строе́ніе хра́ма Вседержи́телева.

Богоро́диченъ: Все́ю душе́ю, и мы́слію, и се́рдцемъ, и устна́ми Тя́ сла́влю, наслади́вся Твои́хъ вели́кихъ дарова́ній, и Твоея́ благосты́ни, и безмѣ́рныхъ Твои́хъ чуде́съ.

Пѣ́снь 8.

Ирмо́съ: Изъ пла́мене преподо́бнымъ ро́су источи́лъ еси́ и пра́веднаго же́ртву водо́ю попали́лъ еси́: вся́ бо твори́ши, Христе́, то́кмо е́же хотѣ́ти. Тя́ превозно́симъ во вся́ вѣ́ки.

Съ вѣ́рою и тве́рдымъ упова́ніемъ помоли́лася еси́, преподо́бная, ко Го́споду, и услы́ша Госпо́дь моле́ніе вѣ́рныя рабы́ Своея́, и чу́днѣ соверши́ся созда́ніе хра́ма Его́.

Ра́дости и весе́лія испо́лнилася еси́, преподо́бная Евфроси́ніе, егда́ соверши́ся освяще́ніе хра́ма, въ не́мже о е́же проше́ніемъ на́шимъ услы́шаннымъ бы́ти отъ Го́спода со слеза́ми моли́лася еси́.

Мо́щна бѣ́ предъ Го́сподемъ моли́тва твоя́, зане́ хра́мъ, воздви́гнутый тобо́ю, чрезъ мно́гая лѣ́та цѣ́лъ и невреди́мь сохрани́ся.

Богоро́диченъ: Обстоя́нія, и ско́рби, и ну́жды обрѣто́ша мя́, Чи́стая, и напа́сти жите́йскія, и искуше́нія отвсю́ду мя́ обыдо́ша, но предста́ни ми́ и покры́й мя́ святы́мъ Твои́мъ покро́вомъ.

Пѣ́снь 9.

Ирмо́съ: Бо́га человѣ́комъ невозмо́жно ви́дѣти, на Него́же не смѣ́ютъ чи́ни а́нгельстіи взира́ти; Тобо́ю бо, Всечи́стая, яви́ся человѣ́комъ Сло́во воплоще́нно, Его́же велича́юще, съ небе́сными во́и, Тя́ ублажа́емъ.

Возжела́ла еси́ имѣ́ти во оби́тели твое́й ико́ну Пречи́стыя Богома́тере, ю́же и получи́ла еси́, и, ра́достно ту́ю пріе́мши, мно́гая благодаре́нія Го́споду и Пречи́стѣй Ма́тери Его́ воздала́ еси́.

Кре́стъ честны́й устро́ила еси́ усе́рдіемъ твои́мъ, преподо́бная, и ка́плю Боже́ственныя Кро́ве Христа́ Спаси́теля и ча́сть Животворя́щаго Дре́ва въ не́мъ положи́ла еси́ на освяще́ніе и спасе́ніе всѣ́мъ, покланя́ющимся ему́ и цѣлу́ющимъ его́ съ любо́вію и стра́хомъ.

Мно́гая лѣ́та въ тѣ́снѣй ке́лліи, при хра́мѣ Госпо́дни, въ моли́твахъ и колѣнопреклоне́ніяхъ препроводи́ла еси́, преподо́бная Евфроси́ніе, я́ко безпло́тна, на земли́ пребыва́ющи.

Богоро́диченъ: Ра́дость отъ а́нгела Пріе́мшей и мы́, по прорече́нію Твоему́, Пресвята́я Дѣ́во, ублажа́юще Тя́ со всѣ́ми ро́ды, ева́нгельски вопіе́мъ: ра́дуйся, Благода́тная, Госпо́дь съ Тобо́ю.

Свѣти́ленъ, гла́съ 8:

Преподо́бная Евфроси́ніе, сла́вна па́мять твоя́, вои́стинну бо на тебѣ́ испо́лнися сло́во Ду́ха Свята́го: въ па́мять вѣ́чную бу́детъ пра́ведникъ. Тѣ́мже и на́съ, соверша́ющихъ па́мять твою́ съ любо́вію, спаса́й отъ вся́кія бѣды́ и напа́сти. [Два́жды.]

Сла́ва, и ны́нѣ, богоро́диченъ:

Ра́дуйся, престо́ле огнезра́чный Госпо́день; ра́дуйся, боже́ственная и маннопріе́мная ста́мно; ра́дуйся, златы́й свѣти́льниче; ра́дуйся, свѣще́ неугаси́мая; ра́дуйся, дѣ́вамъ сла́во и ма́теремъ украше́ніе и похвало́, Богороди́тельнице.

На хвали́техъ стихи́ры, гла́съ 8:

Земны́я пи́щи наслажде́ніе,* бога́тство и сла́ву мíра сего́ презрѣ́вши,* Небе́снаго Жениха́ возлюби́ла еси́,* Евфроси́ніе всечестна́я:* до́брѣ по́двигъ тво́й на земли́* во и́ночестѣмъ чи́нѣ соверши́ла еси́,* съ му́дрыми дѣ́вами возшла́ еси́* къ Жениху́ Христу́,* Ему́же въ ра́дости ны́нѣ предстоя́щи,* непреста́нно моли́ся о душа́хъ на́шихъ.

Христу́, отъ Чи́стыя Дѣ́вы вопло́щшемуся,* послѣ́довала еси́, Евфроси́ніе,* въ дѣ́вствѣ Тому́ отъ ю́ности твоея́ послужи́ла еси́* и мно́гимъ ко спасе́нію пу́ть показа́ла еси́. —* Сестры́ моя́ возлю́бленныя, — глаго́лала еси́, —* тѣ́сенъ и приско́рбенъ пу́ть, вводя́й въ живо́тъ,* но вѣ́чно воздая́ніе;* тѣ́мже подвиза́йтеся нелѣ́ностно,* и́мате бо помога́ющаго, Самаго́ Подвигополо́жника Христа́,* подаю́щаго живо́тъ нетлѣ́нный.

Бо́гомъ избра́нная, Евфроси́ніе,* я́ко звѣзда́ пресвѣ́тлая,* отъ ро́да своего́ возсія́вшая,* страну́ сію́ просвѣща́ющая,* о всѣ́хъ, къ тебѣ́ усе́рдно притека́ющихъ,* и моли́твъ твои́хъ ко Го́споду прося́щихъ,* и любо́вію цѣлу́ющихъ честны́й тво́й о́бразъ,* бу́ди моли́твенница и изба́ви на́съ отъ вся́кія ско́рби,* отъ вся́кія болѣ́зни, душе́вныя же и тѣле́сныя,* вѣ́рою и любо́вію соверша́ющихъ* па́мять честна́го преставле́нія твоего́.

Торжество́ дне́сь* преподо́бныя Евфроси́ніи пра́зднующе,* пріиди́те, вѣ́рніи,* воспои́мъ по́двиги и труды́ ея́,* восхва́лимъ серафи́мскою любо́вію* Іису́са Сладча́йшаго возлюби́вшую* и Ему́ усе́рдно послужи́вшую,* и съ вѣ́рою и любо́вію воззове́мъ къ не́й:* ра́дуйся, Евфроси́ніе всечестна́я,* красото́ и похвале́ніе мона́шескаго чи́на,* невѣ́сто Христо́ва избра́нная,* со а́нгелы и всѣ́ми святы́ми* въ невече́рнемъ дни́ Ца́рствія Бо́жія водвори́вшаяся;* моли́ся же спасти́ся Благочести́вѣйшему Импера́тору на́шему [и́мярекъ]* и все́й держа́вѣ и лю́демъ Его́.

Сла́ва, гла́съ то́йже:

Во святы́й гра́дъ Іерусали́мъ поклони́тися гро́бу Госпо́дню возжела́вши и дости́гши земна́го Іерусали́ма, въ ра́дости святы́мъ мѣсто́мъ благоговѣ́йное поклоне́ніе воздала́ еси́, Евфроси́ніе, прося́щи у Го́спода благода́ти, да пріи́метъ ду́хъ тво́й на мѣ́стѣ святѣ́мъ; и услы́ша Госпо́дь моли́тву твою́, и посла́ а́нгела, и́же возвѣсти́ ти о преше́ствіи твое́мъ отъ земна́го Іерусали́ма въ Го́рній Іерусали́мъ небе́сный, идѣ́же ра́достно лику́ющи со дѣ́вственными ли́ки, помина́й на́съ, съ любо́вію пра́зднующихъ святу́ю па́мять твою́.

И ны́нѣ, [богоро́диченъ]:

Влады́чице, пріими́ моли́твы ра́бъ Твои́хъ и изба́ви на́съ отъ вся́кія ну́жды и печа́ли.

Славосло́віе вели́кое. [Ектеніи́ и отпу́стъ.]



НА ЛИТУРГІИ,

Слу́жба вся́ преподо́бнѣй женѣ́: [Блаже́нна отъ кано́на, пѣ́снь 3 и 6. Проки́менъ, гла́съ 4: Ди́венъ Бо́гъ во святы́хъ Свои́хъ,* Бо́гъ Изра́илевъ. Сти́хъ: Въ це́рквахъ благослови́те Бо́га, Го́спода отъ исто́чникъ Изра́илевыхъ. Апо́столъ къ Кори́нѳяномъ, зача́ло 181. Аллилу́ія, гла́съ 1: Терпя́, потерпѣ́хъ Го́спода, и вня́тъ ми́ и услы́ша моли́тву мою́. Сти́хъ: Поста́ви на ка́мени но́зѣ мои́ и испра́ви стопы́ моя́. Ева́нгеліе Ма́рка, зача́ло 21. Прича́стенъ: Ра́дуйтеся, пра́ведніи, о Го́сподѣ, пра́вымъ подоба́етъ похвала́].

Источникъ: Слу́жба со ака́ѳистомъ преподо́бнѣй ма́тери на́шей Евфроси́ніи По́лотской, ея́же па́мять пра́зднуемъ мѣ́сяца Ма́ія въ 23-й де́нь. — СПб.: Сѵнода́льная Тѵпогра́фія, 1910. — С. 3 –22 , 51 – 59.

/ Къ оглавленію раздѣла /


Наверхъ / Къ титульной страницѣ

0