Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - суббота, 21 октября 2017 г. Сейчасъ на порталѣ посѣтителей - 20.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Ма́ія въ 23-й де́нь.
Слу́жба обрѣ́тенію честна́го тѣлесе́ и́же во святы́хъ отца́ на́шего Лео́нтія епи́скопа, Росто́вскаго чудотво́рца.

НА МАЛѢЙ ВЕЧЕРНИ,
[На Го́споди воззва́хъ:] стихи́ры, гла́съ 8. Подо́бенъ: О, пресла́внаго чудесе́!

Отче богоуго́дниче Лео́нтіе,* ты́ свяще́нниковъ наказа́тель* и всея́ страны́ Росто́вскія звѣзда́ пресвѣ́тлая,* осія́ющая чудесы́ вся́ вѣ́рныя:* тя́ бо Бо́гъ пре́жде избра́ отъ ю́ности, о́тче,* па́стыря ове́цъ слове́сныхъ.* Тѣ́мъ преподо́бныхъ ли́къ тя́ воспрія́тъ,* съ ни́миже моли́,* прося́ ста́ду твоему́ грѣхо́въ оставле́ніе.

Отче богопрія́тне Лео́нтіе,* ты́ мона́шескимъ житіе́мъ* Бо́гу угоди́лъ еси́,* отъ Ца́рскаго гра́да,* я́коже со́лнце, гра́ду Росто́ву возсія́лъ еси́.* Тѣ́мже невѣ́рныя* уче́ньми твои́ми увѣ́рилъ еси́* и, си́хъ просвѣти́въ, научи́лъ еси́* богосло́вити Отца́, и Сы́на, и Ду́ха Единосу́щнаго.

Отче святи́телю Лео́нтіе,* ты́ немощны́хъ вра́чь* сокро́вище неизги́блемо дарова́ній духо́вныхъ,* исто́чникъ исцѣле́ній,* спасе́ніе вѣ́рнымъ,* чудотво́рецъ преизя́щенъ* и боля́щихъ цѣли́тель,* въ напа́стехъ утѣше́ніе,* на́мъ же засту́пникъ,* избавля́я отъ сѣ́ти вра́жія ду́ши на́ша.

Сла́ва, гла́съ 8:

Весели́ся и ра́дуйся, гра́де сла́вный Росто́ве, красу́йся и ра́дуйся, Це́рковь Бо́жія, и ди́вна въ пра́вду, въ не́йже лежи́тъ свята́я ра́ка, я́же и́мать въ себѣ́ да́ръ исцѣле́нія благода́ти, честно́е тѣ́ло твое́, святи́телю вели́кій Лео́нтіе: ты́ бо смире́ніе стяжа́въ и цѣлому́дріе. Твои́ми моли́твами и посо́біемъ вѣ́рный Импера́торъ на́шъ держа́вно побѣжда́етъ пога́ныя супоста́ты. Тебе́ Христо́съ свѣти́ло вели́кое показа́ гра́ду Росто́ву, ты́ же и похвала́ ему́, ты́ и защище́ніе, тво́й гро́бъ безме́здна врачба́ предлежи́тъ: къ нему́ бо слѣпíи приходя́ще, вѣ́рою просвѣща́ются, хромíи, влеку́щеся, ска́чуще, отхо́дятъ, неду́жніи исцѣля́ются, бѣсну́ющіися бѣсо́въ избыва́ютъ. Тѣ́мъ и мы́ дне́сь вси́, почита́юще честно́е твое́ обрѣ́теніе, мо́лимъ тя́, преподо́бне о́тче: ми́ръ мíру испроси́ и душа́мъ на́шимъ ве́лію ми́лость.

И ны́нѣ, богоро́диченъ:

Бу́ря прегрѣше́ній объя́тъ смире́нную мою́ ду́шу, во глубину́ отча́янія лю́то низложи́вши: ускори́, Чи́стая, и окорми́тельница бу́ди ми́ тиха́ въ приста́нище Бо́жія во́ли, да прославля́ю мно́гая Твоя́ чудеса́ ве́село, Влады́чице Всенепоро́чная, Ма́ти Христа́ Бо́га.

На стихо́внѣ стихи́ры, гла́съ 2. Подо́бенъ: До́ме Евфра́ѳовъ.

Яви́лся еси́,* отъ млады́хъ ногте́й, богоно́се,* освяще́нъ сосу́дъ, Лео́нтіе,* и жили́ще Пресвята́го Ду́ха.

Сти́хъ: Свяще́нницы Твои́ облеку́тся въ пра́вду,* и преподо́бніи Твои́ возра́дуются.

Ра́дуйся, святи́телей похвало́,* о́тче Лео́нтіе,* свяще́нниковъ сла́ва,* пра́вило мона́ховъ,* Це́ркве утвержде́ніе.

Сти́хъ: Блаже́нъ му́жъ, боя́йся Го́спода,* въ за́повѣдехъ Его́ восхо́щетъ зѣло́.

Пріими́ пѣ́ніе ны́нѣ* ча́дъ твои́хъ, о́тче,* и лю́бящимъ тя́* подава́й серде́чная проше́нія.

Сла́ва, и ны́нѣ, богоро́диченъ:

Ра́дуйся,* Яже ра́дость мíру ро́ждшая,* Христа́ Жизнода́вца,* и отъе́мшая печа́ль,* Дѣ́во, прама́тернюю.

Тропа́рь, гла́съ 4:

Апо́столомъ соприча́стникъ и къ Бо́гу моле́бникъ вѣ́ренъ, добродѣ́тельми возше́дъ на небе́сная, и любо́вь возложи́лъ еси́ къ Лю́бящему тя́, и невѣ́рныя лю́ди обрати́лъ еси́ въ вѣ́ру. Тѣ́мъ ны́нѣ, со а́нгелы лику́я, предстои́ши престо́лу сла́вы всѣ́хъ Царя́ Христа́ Бо́га: моли́ся, святи́телю Лео́нтіе, да спасе́тъ ду́ши на́ша.

Сла́ва, и ны́нѣ, пра́здника или́ богоро́диченъ.



НА ВЕЛИЦѢЙ ВЕЧЕРНИ,
Блаже́нъ му́жъ.., [1-й антифо́нъ.] На Го́споди воззва́хъ: стихи́ры, гла́съ 5. Подо́бенъ: Ра́дуйся, по́стникомъ.

Ра́дуйся, Лео́нтіе преблаже́нне,* святи́тельское честно́е украше́ніе,* зако́новъ церко́вныхъ вели́кое утвержде́ніе,* маломо́щныхъ помо́щникъ,* скорбя́щихъ же ра́достное утѣше́ніе,* моле́бникъ те́плый въ напа́стехъ стра́ждущихъ,* тму́ разжени́ невѣ́дѣнія* и во приста́нище ти́хое наста́ви,* идѣ́же со безпло́тными наслажда́ешися* кра́сныя добро́ты Влады́чни,* вѣ́рныхъ сердца́ на пѣ́ніе воздвиза́я.* Христу́ помоли́ся дарова́ти душа́мъ на́шимъ* ми́ръ и ве́лію ми́лость.

Добродѣ́тельми свѣ́тло процвѣ́лъ еси́,* я́ко ма́слина плодови́та въ дому́ Бо́жіи,* ту́чами твои́хъ пречи́стыхъ моли́твъ;* отону́дуже, себѣ́ свѣщу́ вже́гъ свѣ́тло,* вше́лъ еси́ въ небе́сныя оби́тели,* идѣ́же воздаде́ся тебѣ́ вѣне́цъ за тру́дъ воздая́нія:* не да́лъ бо еси́ сна́ очи́ма твои́ма,* ни вѣ́ждома твои́ма дрема́нія,* до́ндеже усну́лъ еси́ сно́мъ о́бщимъ,* преподо́бне святи́телю Лео́нтіе.* Христу́ помоли́ся дарова́ти душа́мъ на́шимъ* ми́ръ и ве́лію ми́лость.

Красу́йся и весели́ся, Лео́нтіе,* свяще́нниче и богопроповѣ́дниче благода́тный,* блаже́нный ра́зумъ, святопрозя́бшій гро́здъ,* виногра́да живо́тнаго вино́ иска́палъ еси́,* веселя́щее вѣ́рныхъ сердца́,* дря́хлствующая омраче́ніемъ ле́сти,* упое́ная пія́нствомъ идолонеи́стовства;* святоблаже́нная главо́,* честны́й на́шъ учи́телю,* пріиди́ посѣти́ на́съ, озло́бленныхъ грѣхо́вными страстьми́,* Христу́ помоли́ся дарова́ти душа́мъ на́шимъ* ми́ръ и ве́лію ми́лость.

Ра́дуйся, и весели́ся, гра́де сла́вный,* пріе́мый такова́го святи́теля,* богоблаже́ннаго Лео́нтія,* богопроповѣ́дника благода́ти.* Се́й бо, му́дростію Ду́ха Свята́го преукра́шся,* вся́ку добродѣ́тель отъ ю́ности сотвори́,* сосу́дъ бы́въ Свята́го Ду́ха,* теплото́ю моли́твъ свяще́нства ма́сть боже́ственную пріи́мъ,* лю́ди, омраче́нныя пре́лестію,* научи́ вѣ́ровати во Христа́,* и по святѣ́мъ свое́мъ преставле́ніи* источа́етъ исцѣле́нія съ вѣ́рою приходя́щимъ,* и Христу́ мо́лится дарова́ти душа́мъ на́шимъ* ми́ръ и ве́лію ми́лость.

Ины стихи́ры, гла́съ 2. Подо́бенъ: Кíими похва́льными.

Кíими похва́льными вѣнцы́ увязе́мъ святи́теля?* Свяще́нства вѣнца́, благоче́стія управле́ніе,* Це́ркве свѣ́тлое украше́ніе,* исто́чника боже́ственныхъ исцѣле́ній неисчерпа́емаго,* проли́тіе дарова́ній духо́вныхъ,* рѣку́ мно́гихъ чуде́съ,* зе́млю росто́вскую веселя́щу тече́ніемъ,* Лео́нтія, бо́драго предста́теля на́шего и храни́теля. [Два́жды.]

Кíими смире́нными устна́ми воспое́мъ святи́теля?* Ди́внаго въ чудесѣ́хъ и безпло́тнымъ сожи́теля,* освяще́ннаго отъ пеле́нъ,* столпа́ Це́ркве недви́жима,* весе́ліе земли́ на́шея,* пра́вды прави́теля, сиро́тъ пита́теля,* оби́димыхъ засту́пника,* больны́хъ врача́ безме́здна.

Пріиди́те, вѣ́рныхъ собо́ри,* псало́мски восплещи́те рука́ми,* печа́льныхъ утѣ́ху, отча́янныхъ засту́пника,* боже́ственнаго Лео́нтія воспѣва́юще,* похвалу́ земли́ Россíйскія* и всего́ свяще́нства украше́ніе,* рѣку́ ми́лости вои́стинну,* боже́ственнаго Христо́ва смире́нія ревни́теля,* подаю́щаго мíрови ве́лію ми́лость.

Сла́ва, гла́съ 8:

Якоже проро́къ Дави́дъ, похваля́я, пое́тъ: честна́ предъ Го́сподемъ сме́рть преподо́бныхъ Его́; и мы́ тя́ ублажа́емъ, Христо́ва рачи́теля. Ты́ у́бо человѣ́къ сы́й естество́мъ, я́ко а́нгелъ, на земли́ яви́лся еси́ си́лою Ду́ха Свята́го и чистото́ю разу́мнаго се́рдца, въ моли́твахъ бдѣ́ніемъ, при́сно ви́дя лице́ во свѣ́тѣ живу́щаго Бо́га, и, Того́ возлюби́въ, обрѣ́лъ еси́ жела́емое въ небе́сныхъ жили́щахъ, со безпло́тными си́лами. Моли́ся за Импера́тора правовѣ́рующаго и за святи́тели, любо́вію сла́вящія твою́ па́мять; вся́ же лю́ди, свѣ́тлое твое́ торжество́ пра́зднующія, моли́ храни́ти отъ вся́каго гнѣ́ва зло́бна. О, блаже́нная главо́! О, честны́й на́шъ учи́телю, святи́телю Лео́нтіе! Не преста́й прося́ ми́ра мíрови и спасе́нія душа́мъ на́шимъ.

И ны́нѣ, богоро́диченъ: Ца́рь Небе́сный за человѣколю́біе...
[Вхо́дъ.] Проки́менъ дне́. Чте́нія три́, святи́тельская.

При́тчей чте́ніе.

Па́мять пра́веднаго съ похвала́ми, и благослове́ніе Госпо́дне на главѣ́ его́. Блаже́нъ человѣ́къ, и́же обрѣ́те прему́дрость, и сме́ртенъ, и́же увѣ́дѣ ра́зумъ. Лу́чше бо сію́ купова́ти, не́жели зла́та и сребра́ сокро́вища. Честнѣ́йшая же е́сть ка́меній многоцѣ́нныхъ, все́ же честно́е недосто́йно ея́ е́сть. Долгота́ бо дне́й и лѣ́та живота́ въ десни́цѣ ея́, въ шу́йцѣ же ея́ бога́тство и сла́ва. Отъ у́стъ ея́ исхо́дитъ пра́вда, зако́нъ же и ми́лость на язы́цѣ но́ситъ. Послу́шайте у́бо мене́, о ча́да, честна́я бо реку́, и блаже́нъ человѣ́къ, и́же пути́ моя́ сохрани́тъ: исхо́ди бо мои́ — исхо́ди живота́, и уготовля́ется хотѣ́ніе отъ Го́спода. Сего́ ра́ди молю́ ва́съ и предлага́ю мо́й гла́съ сыново́мъ человѣ́ческимъ. Я́ко а́зъ, прему́дрость, устро́ихъ совѣ́тъ, и ра́зумъ и смы́слъ азъ призва́хъ. Мо́й совѣ́тъ и утвержде́ніе, мо́й ра́зумъ, моя́ же крѣ́пость. Азъ мене́ лю́бящія люблю́, и́щущіи же мене́ обря́щутъ благода́ть. Разумѣ́йте у́бо, незло́бивіи, кова́рство, ненака́заніи же, прилага́йте сердца́. Послу́шайте мене́ и па́ки, честна́я бо реку́, и отве́рзу отъ усте́нъ пра́вая, я́ко и́стинѣ поучи́тся горта́нь мой, ме́рзки же пре́до мно́ю устны́ лжи́выя. Съ пра́вдою вси́ глаго́лы у́стъ мои́хъ, ничто́же въ ни́хъ стро́потно, ниже́ развраще́нно. Вся́ пра́ва су́ть разумѣва́ющимъ и про́ста обрѣта́ющимъ ра́зумъ. Науча́ю бо ва́съ и́стинѣ, да бу́детъ о Го́сподѣ наде́жда ва́ша, и испо́лнитеся Ду́ха.

При́тчей чте́ніе.

Уста́ пра́веднаго ка́плютъ прему́дрость, язы́къ же непра́веднаго поги́бнетъ. Устнѣ́ муже́й пра́ведныхъ ка́плютъ благода́ти, уста́ же нечести́выхъ развраща́ются. Мѣ́рила льсти́вая ме́рзость предъ Го́сподемъ, вѣ́съ же пра́ведный прія́тенъ Ему́. Идѣ́же а́ще вни́детъ досажде́ніе, та́мо и безче́стіе, уста́ же смире́нныхъ поуча́ются прему́дрости. Соверше́ніе пра́выхъ наста́витъ и́хъ, и поползнове́ніе отрица́ющихся упасе́тъ и́хъ. Не по́льзуютъ имѣ́нія въ де́нь я́рости, пра́вда же изба́витъ отъ сме́рти. Умеръ пра́ведный, оста́ви раска́яніе, нару́чна же быва́етъ и посмѣя́тельна нечести́выхъ па́губа. Пра́вда непоро́чнаго исправля́етъ пути́, въ нече́стіе же па́даетъ непра́вда. Пра́вда муже́й пра́выхъ изба́витъ и́хъ, безсовѣ́стіемъ же плѣня́ются беззако́нніи. Сконча́вшуся му́жу пра́ведну, не поги́бнетъ наде́жда, похвала́ же нечести́выхъ поги́бнетъ. Пра́ведникъ отъ ло́ва убѣ́гнетъ, въ него́же мѣ́сто предае́тся нечести́вый. Во устѣ́хъ нечести́выхъ сѣ́ть гра́жданомъ, чу́вство же пра́ведныхъ благопоспѣ́шное. Во благи́хъ пра́ведныхъ испра́вится гра́дъ, и въ поги́бели нечести́выхъ ра́дованіе. Во благослове́ніи пра́выхъ возвы́сится гра́дъ, усты́ же нечести́выхъ раскопа́ется. Руга́ется гра́жданомъ лише́нный ра́зума, му́жъ же му́дрый безмо́лвіе во́дитъ.

Прему́дрости Соломо́новы чте́ніе.

Пра́ведникъ, а́ще пости́гнетъ сконча́тися, въ поко́и бу́детъ. Ста́рость бо честна́ не многолѣ́тна, ниже́ въ числѣ́ лѣ́тъ исчита́ется. Сѣди́на же е́сть му́дрость человѣ́комъ, и во́зрастъ ста́рости — житіе́ нескве́рное. Благоуго́денъ Бо́гови бы́въ, возлю́бленъ бы́сть, и живы́й посредѣ́ грѣ́шникъ, преста́вленъ бы́сть. Восхище́нъ бы́сть, да не зло́ба измѣни́тъ ра́зума его́ или́ ле́сть прельсти́тъ ду́шу его́. Раче́ніе бо зло́бы помрача́етъ до́брая и паре́ніе по́хоти, премѣня́етъ у́мъ незло́бивъ. Сконча́вся вма́лѣ, испо́лни лѣ́та до́лга, уго́дна бо бѣ́ Го́сподеви душа́ его́, сего́ ра́ди потща́ся отъ среды́ лука́вствія. Лю́діе же ви́дѣвше и не разумѣ́вше, ниже́ поло́жше въ помышле́ніи таково́е, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.

На литíи стихи́ры, гла́съ 4:

Якоже бога́тство, гро́бъ тво́й честно́е держи́тъ тѣ́ло, обогаща́я чудесы́ притека́ющихъ къ тебѣ́ вѣ́рно, блаже́нне святи́телю Лео́нтіе; я́ко имѣ́я о́бласть разрѣша́ти и вяза́ти, преподо́бне, вся́ разрѣши́ согрѣше́нія, боже́ственное твое́ обрѣ́теніе свѣ́тло пра́зднующихъ и Ца́рствія небе́снаго сподо́би моли́твами твои́ми.

Яко украше́ніе ца́рско, Росто́въ гра́дъ обрѣ́те твое́ тѣ́ло, святи́телю Лео́нтіе, о не́мже украша́ется и, хваля́ся о словесѣ́хъ твои́хъ, вселе́нную созыва́етъ на весе́ліе боже́ственныхъ дарова́ній и неизрече́нныхъ чуде́съ твои́хъ, сотворя́емыхъ вы́ну, велегла́сно зовы́й: Ты́ прояви́лъ еси́, Влады́ко, сицева́го святи́теля гра́ду на́шему.

Гла́съ 6:

Егда́ обрѣ́теніе честна́го твоего́ тѣ́ла, о́тче, бѣ́яше, тогда́ мно́жество вѣ́рныхъ, обступи́вше гро́бъ, съ тре́петомъ зря́ху тебе́, о́віи же, зря́ще на тѣ́ло, стра́хомъ одержи́ми бѣ́яху. Кня́зь же Андре́й со слеза́ми вопія́ше: о Влады́ко, что́ Ти́ возда́мъ проти́ву Твоему́ благодаре́нію, е́же на́мъ дарова́лъ еси́, удивля́яся? Но у́бо, святи́телю Лео́нтіе, моли́ся прилѣ́жно Христу́ Бо́гу на́шему, я́ко спасти́ся гра́ду твоему́ невоева́ну.

Сла́ва, гла́съ 6:

Излія́ся благода́ть во устна́хъ твои́хъ, преподо́бне о́тче святи́телю Лео́нтіе, и бы́лъ еси́ па́стырь Христо́вы Це́ркве, уча́ слове́сныя о́вцы вѣ́ровати въ Тро́ицу Единосу́щную во Еди́номъ Божествѣ́.

И ны́нѣ, богоро́диченъ.

На стихо́внѣ стихи́ры, гла́съ 8:

Святи́телю Лео́нтіе,* разу́мнаго свѣ́та заре́,* церко́вное свѣти́ло,* святи́тельская похвало́,* красото́ мона́шескаго по́стнаго житія́* и и́стинное пра́вило,* на́мъ же засту́пникъ,* свобожда́я отъ губи́теля ду́ши на́ша.

Сти́хъ: Уста́ пра́веднаго поуча́тся прему́дрости* и язы́къ его́ возглаго́летъ су́дъ.

Святи́телю Лео́нтіе,* вели́кую о́бласть отъ Бо́га прія́лъ еси́,* мно́жество лука́выхъ бѣсо́въ* моли́твою твое́ю отго́ниши,* отъ си́хъ озлобле́нія исцѣля́я всѣ́хъ,* вѣ́рою къ тебѣ́ притека́ющихъ.

Сти́хъ: Уста́ моя́ возглаго́лютъ прему́дрость* и поуче́ніе се́рдца моего́ ра́зумъ.

Святи́теля вели́каго Лео́нтія* ка́ко досто́йно воспое́мъ?* чи́стаго ума́, богоза́рнаго свѣ́та, освѣща́ющаго ны́* и боже́ственный ра́зумъ подаю́щаго,* та́инъ глуби́нныхъ повѣ́дателя.* Ему́же согла́сно вси́ рце́мъ:* ра́дуйся, о́тче отце́въ, Лео́нтіе.

Сла́ва, гла́съ 6:

Ты́ еси́ па́стырь до́брый и учи́тель те́плый, святи́телю Лео́нтіе, тя́ всегда́ похваля́юще, вопіе́мъ ти́: тобо́ю украси́ Бо́гъ це́рковь Ма́тере Своея́ и тѣ́ло многолѣ́тное твое́, покрове́но въ земли́, нетлѣ́нно яви́ лю́демъ твои́мъ. Тѣ́мже моли́ся непреста́нно о хва́лящихъ тя́ и чту́щихъ па́мять твою́, прося́ оставле́нія грѣхо́въ и спасе́нія душа́мъ на́шимъ.

И ны́нѣ, Богоро́диченъ: Богоро́дице, Ты́ еси́ лоза́ и́стинная...

Тропа́рь, гла́съ 4: Апо́столомъ соприча́стникъ... пи́санъ на ма́лѣй вече́рни.



НА УТРЕНИ,
По 1-й стихоло́гіи сѣда́ленъ, гла́съ 1. Подо́бенъ: Гро́бъ Тво́й.

Служи́тель бы́въ Христу́, вся́ческихъ Влады́цѣ, научи́лъ еси́ лю́ди и просвѣти́лъ еси́ боже́ственнымъ креще́ніемъ, къ разумѣ́нію сего́ наста́вль, святи́телю. Тѣ́мже проповѣ́дника тя́ и́стины вси́ имену́емъ, святи́теля и уго́дника Христо́ва. [Два́жды.]

Сла́ва, и ны́нѣ, богоро́диченъ:

Безневѣ́стная Чи́стая Богоро́дице Дѣ́во, еди́на вѣ́рныхъ предста́тельнице и покро́ве, бѣ́дъ, и скорбе́й, и лю́тыхъ обстоя́ній всѣ́хъ изба́ви, на Тя́ упова́ніе, Отрокови́це, иму́щихъ, и ду́ши на́ша спаси́ боже́ственными моли́твами Твои́ми.

По 2-й стихоло́гіи сѣда́ленъ, гла́съ 4. Подо́бенъ: Ско́ро предвари́.

Отъ ю́ности взе́мъ кре́стъ тво́й, благочести́вно Христу́ послѣ́довалъ еси́, увяди́въ плотско́е мудрова́ніе воздержа́ніемъ; тѣ́мже, на святи́тельстѣмъ сѣда́лищи сѣ́дъ, святи́телю, возвели́чилъ еси́ Влады́ку и Того́ Пречи́стую Ма́терь, разли́чными дарова́ніи твою́ украси́вша ра́ку, Лео́нтіе богоблаже́нне. [Два́жды.]

Сла́ва, и ны́нѣ, богоро́диченъ:

Дѣ́во Всенепоро́чная, Яже Пресу́щнаго Бо́га ро́ждшая, со святи́телемъ Того́ непреста́нно моли́ оставле́ніе прегрѣше́ній и исправле́ніе житія́ да́ти на́мъ пре́жде конца́, вѣ́рою и любо́вію пою́щимъ Тя́ по до́лгу, еди́на Всепѣ́тая.

По поліеле́и сѣда́ленъ, гла́съ 8. Подо́бенъ: Прему́дрости.

Надъ страстьми́ ца́рствовавъ плотски́ми, святи́тель яви́лся еси́ богоподо́бенъ, па́ству твою́ пресла́вно упа́слъ еси́, преподо́бне, креще́ніемъ же просвѣти́лъ еси́ и наказа́лъ еси́ сла́вити Еди́наго Бо́га въ Тріе́хъ Ѵпоста́сехъ, тѣ́мже источа́еши исцѣле́нія и по кончи́нѣ вѣ́рою приходя́щимъ ко святѣ́й Бо́жіей це́ркви и къ ра́цѣ моще́й твои́хъ, святи́телю Лео́нтіе; моли́ Христа́ Бо́га согрѣше́ній оставле́ніе пода́ти чту́щимъ любо́вію святу́ю па́мять твою́. [Два́жды.]

Сла́ва, и ны́нѣ, богоро́диченъ:

Небе́сную две́рь и киво́тъ, пресвяту́ю го́ру, свѣ́тлый о́блакъ воспои́мъ, неопали́мую купину́, слове́сный ра́й, Евы воззва́ніе, вселе́нныя всея́ вели́кое сокро́вище, я́ко спасе́ніе въ Не́й содѣ́лася мíрови и оставле́ніе дре́внихъ согрѣше́ній. Сего́ ра́ди вопіе́мъ Ей: моли́ся Сы́ну Твоему́ прегрѣше́ній оставле́ніе дарова́ти благоче́стно покланя́ющимся всесвято́му Рождеству́ Твоему́.

Степе́нна, 1-й антифо́нъ 4-го гла́са. Проки́менъ, [гла́съ 4]: Уста́ моя́ возглаго́лютъ прему́дрость* и поуче́ніе се́рдца моего́ ра́зумъ. Сти́хъ: Услы́шите сія́, вси́ язы́цы, внуши́те, вси́, живу́щіи по вселе́ннѣй. Ева́нгеліе Іоа́нна, зача́ло 35, отъ полу́.

По 50-мъ псалмѣ́ стихи́ра, гла́съ 6:

Святи́телей удобре́ніе и отце́въ сла́ву, исто́чника исцѣле́ній и вѣ́рныхъ засту́пника вели́каго, соше́дшеся, празднолю́бцы, пѣ́сньми и похвала́ми воспои́мъ, глаго́люще: ра́дуйся, Росто́ву храни́телю, и наста́вниче честны́й, и сто́лпе неподви́жимый; ра́дуйся, свѣти́льниче всесвѣ́тлый, и́же мíра концы́ просвѣща́яй чудесы́; ра́дуйся, скорбя́щихъ боже́ственное утѣше́ніе и оби́димыхъ те́плый побо́рниче. И ны́нѣ, преблаже́нне Лео́нтіе, не преста́й моля́ся Христу́ Бо́гу, спасти́ся душа́мъ на́шимъ.

Кано́нъ дне́ или́ богоро́дицы, на 6, и святи́теля, на 8. Творе́ніе Іоа́нна епи́скопа. Гла́съ 6.

Пѣ́снь 1.

Ирмо́съ: Яко по су́ху пѣшеше́ствовавъ Изра́иль по бе́зднѣ стопа́ми, гони́теля фарао́на ви́дя потопля́ема, Бо́гу побѣ́дную пѣ́снь пои́мъ, вопія́ше.

Свѣ́томъ Твоего́ Божества́, Христе́, мра́къ невѣ́дѣнія души́ моея́ озари́въ, просвѣти́, Ми́лостиве, и да́ждь ми́ сло́во, Сло́ве, да воспою́ свѣ́тло Твоего́ рачи́теля торжество́.

Ма́стію свяще́нною пома́занъ бы́въ отъ руки́ Вседержи́теля Бо́га, святи́телю сла́вне Лео́нтіе, моли́ о хва́лящихъ твою́ па́мять, получи́ти грѣхо́въ проще́ніе и напа́стей избавле́ніе.

Души́ самово́льное житіе́, и доброро́дство вѣ́ры стяжа́въ, богопоруче́нныя тебѣ́ лю́ди, и че́стно наказа́въ, преблаже́нне, свяще́нне Лео́нтіе, приве́лъ еси́ я́ ко Христу́ Бо́гу.

Богоро́диченъ: Язы́комъ избавле́ніе Тобо́ю яви́ся, Пречи́стая Влады́чице, пре́жде па́дшимъ во тлю́ пра́дѣда Ада́ма преступле́ніемъ: Ты́ бо Христа́ породила́ еси́, вся́ческихъ Творца́ и Го́спода.

Пѣ́снь 3.

Ирмо́съ: Нѣ́сть свя́тъ, я́коже Ты́, Го́споди Бо́же мо́й, вознесы́й ро́гъ вѣ́рныхъ Твои́хъ, Бла́же, и утверди́вый на́съ на ка́мени исповѣ́данія Твоего́.

Свобо́денъ сы́й у́мъ отъ страсте́й соблю́дъ, сосу́дъ освяще́нъ Ду́ха Пресвята́го бы́лъ еси́, всего́ себе́ пригво́ждь къ Вы́шнему любо́вію, преблаже́нне.

Тво́й богоглаго́ливый язы́къ бы́сть, пріе́мъ Христа́ вну́трь, въ се́рдцы глаго́лющь, Бо́жій витíя, Лео́нтіе, Тому́ помоли́ся за ны́.

Креста́ Госпо́дня си́лою укрѣпля́яся, блаже́нне, поще́ніемъ бо вѣ́рныя твоея́ моли́твы стремле́нія бѣсо́вская низложи́въ, пове́рглъ еси́.

Богоро́диченъ: Вели́ка сла́ва церко́вная, па́че дре́вняго собо́ра Изра́илева: Ты́ бо Це́рковь Бо́жія, Богоро́дице, въ не́йже Христо́съ пожи́въ, спасе́ніе содѣ́ла.

Сѣда́ленъ, гла́съ 8. Подо́бенъ: Прему́дрости.

Тве́рдостію ра́зума украша́яся, плотскíя тя́гости горды́ню попра́лъ еси́, и бы́лъ еси́ оби́телище избра́нно Ду́ха Пресвята́го, неукло́ннымъ ра́зумомъ простира́яся къ Лю́бящему тя́, тѣ́мъ и ре́вностію боже́ственною разгара́яся, сла́вне, многоко́зненнаго стрѣ́лы притупи́лъ еси́ и яви́вся а́нгеломъ собесѣ́дникъ, святи́телю Лео́нтіе, моли́ Христа́ Бо́га согрѣше́ній оставле́ніе дарова́ти чту́щимъ любо́вію святу́ю па́мять твою́. [Два́жды.]

Сла́ва, и ны́нѣ пра́здника или́ богоро́диченъ:

Яко Всенепоро́чная Невѣ́сто Творцу́, я́ко неискусому́жная Ма́ти Изба́вителя, прія́телище я́ко су́щи Утѣ́шителя, Препѣ́тая, беззако́нію мя́ су́ща скве́рное оби́телище и бѣсо́мъ игра́лище въ ра́зумѣ бы́вша, потщи́ся отъ тѣ́хъ злодѣ́йства мя́ изба́вити и свѣ́тлое жили́ще добродѣ́телей соверши́, Свѣтоно́сная, Нетлѣ́нная, отжени́ о́блакъ страсте́й и Вы́шняго прича́стія сподо́би и Свѣ́та невече́рняго моли́твами Твои́ми.

Пѣ́снь 4.

Ирмо́съ: Христо́съ моя́ си́ла, Бо́гъ и Госпо́дь, честна́я Це́рковь боголѣ́пно пое́тъ, взыва́ющи, отъ смы́сла чи́ста, о Го́сподѣ пра́зднующи.

Христа́ да похва́лимъ, вси́ вѣ́рніи, такова́го святи́теля да́вшаго, пречестно́е удобре́ніе сла́внѣй це́ркви Своея́ Пречи́стыя Ма́тере.

Ду́ха дарова́ніи благода́тію, сла́вне, въ ри́зу свы́ше облача́яся, а́ки Ааро́нъ, незло́біемъ, преподо́біемъ и пра́вдою предста́лъ еси́ престо́лу Христо́ву.

Духо́венъ стяжа́въ язы́къ же и уста́ ти́хая честны́ми твои́ми словесы́, я́ко отъ пото́ка пи́щна, точа́ща уче́нія медото́чная, жи́знь безконе́чную исхода́тайствуй на́мъ.

Богоро́диченъ: Христа́ на́мъ, Бо́жію си́лу и му́дрость, Ты́ породи́вши, Пречи́стая Влады́чице, Богора́дованная Дѣ́во, спаси́ лю́ди и гра́дъ, на Тя́ упова́ющія, Богоро́дице Пренепоро́чная.

Пѣ́снь 5.

Ирмо́съ: Бо́жіимъ свѣ́томъ Твои́мъ, Бла́же, у́тренюющихъ Ти́ ду́ши любо́вію озари́, молю́ся, Тя́ вѣ́дѣти, Сло́вѣ Бо́жій, и́стиннаго Бо́га, отъ мра́ка грѣхо́внаго взыва́юща.

Блаже́нъ ты́ яви́лся еси́, и добро́ ти бы́сть, я́ко въ моли́твахъ чи́стое и во бдѣ́ніихъ крѣ́пкое, успѣ́шно пострада́лъ еси́, свяще́нный святи́телю, о́тче Лео́нтіе: та́ко бо благослови́тся вся́къ, боя́йся Го́спода.

Бо́жіимъ хране́ніемъ блюдо́мо всечестно́е тѣ́ло твое́, преблаже́нне Лео́нтіе, мно́гими лѣ́ты земле́ю покрове́но, яви́ся невреди́мо, я́ко цвѣ́тъ неувяда́емь, вѣ́рныхъ сердца́ веселя́що.

Гро́бъ честна́го твоего́ тѣлесе́ показа́ся, вѣ́рныхъ люде́й душа́мъ благослове́ніе и тѣлесе́мъ исцѣле́ніе, оби́льно излива́я, то́читъ и вся́кія стра́сти тму́ отгоня́етъ.

Богоро́диченъ: Бо́жіимъ укра́шена свѣ́томъ, богопрера́дованная Ма́ти: Ты́ бо породила́ еси́ краснѣ́йша па́че всѣ́хъ сыно́въ человѣ́ческихъ, и́стиннаго Бо́га, отъ ле́сти мíръ изба́вльшаго.

Пѣ́снь 6.

Ирмо́съ: Жите́йское мо́ре, воздвиза́емое зря́ напа́стей бу́рею, къ ти́хому приста́нищу Твоему́ прите́къ, вопію́ Ти: возведи́ отъ тли́ живо́тъ мо́й, Многоми́лостиве.

Еди́нство Тро́ицы проповѣ́далъ еси́ я́сно, святи́телю Лео́нтіе, и нему́дрыхъ сердца́ волну́ема укроти́лъ еси́, ра́вно славосло́вити ро́ждшагося Сло́ва, сопресто́льна Отцу́ и Ду́ху Свято́му.

Не терпя́ ви́дѣти вра́гъ ле́стное его́ погиба́ющее сѣ́тованіе, подви́же устремле́ніе людско́е на святопома́занную твою́ главу́, ты́ же моли́твами твои́ми разсла́блены и не́мощны пове́рглъ еси́ я́.

Богоразу́міемъ свѣ́тло имѣ́юще души́ своея́ у́мное, крася́тъ ра́ку моще́й твои́хъ, стека́ющеся къ похвале́нію чуде́съ твои́хъ празднолю́бцы, свяще́нный на́шъ учи́телю.

Богоро́диченъ: Диви́тъ у́мъ же и слу́хъ Твое́ чревоноше́ніе, Дѣ́во господоимени́тая: ражда́еши бо Неви́димаго Бо́га, се́ уже́ ви́дима въ на́шемъ существѣ́ я́ко Человѣ́ка, спаса́ющаго человѣ́ки.

Конда́къ, гла́съ 4. Подо́бенъ: Яви́лся еси́.

Житія́ ра́ди чистоты́, Всеви́децъ Госпо́дь свѣ́тъ Сво́й насади́ въ души́ твое́й, вразуми́ти лю́ди мно́гія твои́ми уче́ніи, Лео́нтіе преподо́бне.

Икосъ:

Новоразу́мному язы́ку, великоимени́тѣй странѣ́, блаже́ннѣй земли́ святоразу́менъ проповѣ́дникъ показа́лся еси́ боголѣ́пныя вѣ́ры Христо́вы: омраче́нная на́ша сердца́ озари́въ, изъ глубины́ нече́стія исто́рглъ еси́; пре́жде бо ны́ невѣ́жды су́щія, слове́съ благода́тію укроти́въ, наказа́лъ еси́ сла́вити пра́ведное и вели́кое въ Тро́ицѣ Божество́. Свяще́нный на́шъ учи́телю, отъ кру́га небе́снаго посѣща́й моли́твами твои́ми хва́лящія твою́ па́мять, Лео́нтіе преподо́бне.

Пѣ́снь 7.

Ирмо́съ: Росода́тельну у́бо пе́щь содѣ́ла а́нгелъ преподо́бнымъ отроко́мъ, халде́и же опаля́ющее велѣ́ніе Бо́жіе, мучи́теля увѣща́ вопи́ти: благослове́нъ еси́, Бо́же оте́цъ на́шихъ.

Уче́ньми бо крѣ́пкими прему́дрыхъ слове́съ твои́хъ, я́ко чадолюби́вый оте́цъ, незло́бивыхъ дѣте́й мно́жество усво́ивъ Це́ркви, увѣща́лъ еси́ вопи́ти: благослове́нъ Бо́гъ оте́цъ на́шихъ.

Тобо́ю освяти́ Госпо́дь гра́дъ вели́кій сла́вный Росто́въ, вѣнцено́сче Лео́нтіе, лю́діе бо его́, вразумле́ни тобо́ю, пою́тъ Христу́: благослове́нъ Бо́гъ оте́цъ на́шихъ.

Гася́ща у́бо свѣщу́ у честны́я твоея́ ра́ки, блаже́нне, устраши́въ и не глаго́лати сотвори́въ, твоея́ же святы́ни моли́твою исцѣле́ніе прія́тъ. Съ ни́мже и мы́, веселя́щеся, вопіе́мъ Христу́: благослове́нъ Бо́гъ оте́цъ на́шихъ.

Богоро́диченъ: Умертви́ся пресмыка́емый змíй Твои́мъ Рождество́мъ, Пречи́стая Дѣ́во, поро́ждши невмѣсти́маго Бо́га небесы́. Спаси́ отъ бѣ́дъ хва́лящія Тя́, благослове́нная Чи́стая Приснодѣ́во.

Пѣ́снь 8.

Ирмо́съ: Изъ пла́мене преподо́бнымъ ро́су источи́лъ еси́ и пра́веднаго же́ртву водо́ю попали́лъ еси́: вся́ бо твори́ши, Христе́, то́кмо е́же хотѣ́ти. Тя́ превозно́симъ во вся́ вѣ́ки.

Лику́ютъ чи́ни а́нгельстіи на небесѣ́хъ, и вѣ́рныхъ со́нмища на земли́, твою́ па́мять похваля́юще, святи́телю Лео́нтіе, Христа́ превозно́сятъ во вѣ́ки.

Тлѣ́нныя ве́щи оттря́съ и въ небе́сныя ду́шу твою́ впери́въ, я́ко же́ртва благопрія́тна, въ воню́ благово́нія прине́слся еси́ Христу́, Его́же превозно́симъ во вѣ́ки.

Воспое́мъ усе́рдно пѣ́сньми Христа́ Бо́га, преподо́бнаго торжество́ ви́дяще, сла́вимъ. Вся́ бо дѣ́йствуетъ Христо́съ, ели́ко хо́щетъ: Его́ бо сла́вящія прославля́етъ во вѣ́ки.

Богоро́диченъ: На Тя́, Богома́ти Пречи́стая, небе́сный до́ждь сни́де, омыва́ющій скве́рну ду́шъ на́шихъ, тѣ́мъ Тя́ блажи́мъ, Чи́стую, во вѣ́ки.

Пѣ́снь 9.

Ирмо́съ: Бо́га человѣ́комъ невозмо́жно ви́дѣти, на Него́же не смѣ́ютъ чи́ни а́нгельстіи взира́ти; Тобо́ю бо, Всечи́стая, яви́ся человѣ́комъ Сло́во воплоще́нно, Его́же велича́юще, съ небе́сными во́и, Тя́ ублажа́емъ.

Яко звѣзда́ свѣтоно́сная, яви́лся еси́, луча́ми духо́вными вѣ́рныхъ сердца́ просвѣща́я, свѣ́томъ ра́зума боже́ственнаго, богому́дре Лео́нтіе. Тѣ́мъ, ны́нѣ со а́нгелы водворя́яся, спаса́й хва́лящія твою́ па́мять.

Дѣ́лы духо́вными укра́шенъ, въ пи́щи ра́йстѣй веселя́ся, помяни́ хва́лящія твою́ па́мять, заступа́я отъ бѣ́дъ и скорбе́й, преблаже́нне священносвяти́телю Лео́нтіе, да непреста́нно тя́ ублажа́емъ.

Имѣ́я Ца́рство непремѣ́нно, Царю́ сы́й вы́шнихъ си́лъ, Христе́, десни́цы Твоея́ крѣ́постію вра́гъ нечести́выхъ вы́ю низве́рзи подъ но́зѣ правовѣ́рному и богому́дрому Импера́тору на́шему.

Богоро́диченъ: Егда́ су́диши, Ми́лостиве, я́ростію не обличи́ мене́, ни гнѣ́ва же сотвори́ проти́ву беззако́ніемъ. Аще ли обличи́ши, то кто́ постои́тъ? Моли́твами ро́ждшія Тя́ чи́стыя Ма́тере огня́ гее́нскаго изба́витися мо́лимся и прича́стникомъ бы́ти Ца́рства небе́снаго.

Свѣти́ленъ. Подо́бенъ: Посѣти́лъ ны́.

Сла́вно кра́сится дне́сь свѣтоза́рное твое́ торжество́: во свѣ́тѣ сла́вы лица́ Бо́жія предстоя́, святи́телю, помяни́ на́съ, хва́лящихъ твою́ па́мять. [Два́жды.]

[Сла́ва, и ны́нѣ,] богоро́диченъ:

По Бо́зѣ упова́ніе иму́ще на Тя́, Пречи́стая Богоро́дице, мо́лимся: къ Ро́ждшемуся изъ Тебе́ мольба́ми невреди́мыхъ на́съ да́же до конца́ сохрани́.

На хвали́техъ стихи́ры, на 4, гла́съ 8. Подо́бенъ: О, пресла́внаго чудесе́!

Преподо́бне о́тче Лео́нтіе,* ты́, возше́дъ на лѣ́ствицу боже́ственнаго ра́зума* и къ Бо́гу приближа́яся,* усыне́нія отъ Него́ да́ръ прія́лъ еси́,* исцѣля́ти неду́ги неисцѣ́льныя* и отгоня́ти ду́хи омраче́нныя.* Тѣ́мъ твое́ успе́ніе пра́зднуемъ,* ра́достію се́рдца Христа́ велича́юще,* велича́ющаго Своего́ уго́дника. [Два́жды.]

Преподо́бне о́тче богому́дре,* ты́ вои́стинну яви́лся еси́ другíй Моисе́й,* свобожда́я и наставля́я но́ваго Изра́иля* отъ пре́лести лю́таго фарао́на* и преводя́ на зе́млю обѣтова́нія,* въ небе́сныя огра́ды,* идѣ́же ны́нѣ лику́еши у престо́ла всѣ́хъ Царя́,* за ны́ непреста́нно къ Нему́, о́тче, моля́ся,* преблаже́нне Лео́нтіе.

Ра́дуйся, всекра́сне Лео́нтіе,* ты́ измла́да Христа́ возлюби́лъ еси́,* куми́ръ возгнуша́вся* и ме́рзскихъ идолослуже́ній,* хра́мъ себе́ освяти́лъ еси́* и оби́тель бы́лъ еси́ Пресвята́го Ду́ха:* Его́же исполня́яся,* Тро́ицу во Еди́номъ Божествѣ́* проповѣ́далъ еси́.* Ейже за твоя́ ча́да, о́тче, помоли́ся.

Сла́ва, гла́съ 8:

Святи́телю Лео́нтіе, высото́ добродѣ́телей, Бо́жіе процвѣте́ніе, му́дрости орга́не, правовѣ́рныхъ сла́во, зловѣ́рія обличи́телю, дѣ́вственнаго ли́ка вели́кое спаси́тельное и ди́вное мудрова́ніе, Христа́ Бо́га моли́ дарова́ти душа́мъ на́шимъ ве́лію ми́лость.

И ны́нѣ, богоро́диченъ.
Славосло́віе вели́кое. [Ектеніи́] и отпу́стъ.



НА ЛИТУРГІИ,

Блаже́нна, пѣ́снь 3-я и 6-я. Проки́менъ, [гла́съ 1]: Уста́ моя́ возглаго́лютъ прему́дрость* и поуче́ніе се́рдца моего́ ра́зумъ. Сти́хъ: Услы́шите сія́, вси́ язы́цы, внуши́те, вси́, живу́щіи по вселе́ннѣй. Апо́столъ ко Евре́емъ, зача́ло 318, отъ полу́. Аллилу́ія, [гла́съ 2]: Уста́ пра́веднаго поуча́тся прему́дрости, и язы́къ его́ возглаго́летъ су́дъ. [Сти́хъ: Зако́нъ Бо́га его́ въ се́рдцѣ его́, и не за́пнутся стопы́ eго́.] Ева́нгеліе Матѳе́я, зача́ло 11. Прича́стенъ: Въ па́мять вѣ́чную [бу́детъ пра́ведникъ, отъ слу́ха зла́ не убои́тся].

Источникъ: Минíа, мѣ́сяцъ Ма́ій. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 188 об. – 195 об.

/ Къ оглавленію раздѣла /


Наверхъ / Къ титульной страницѣ

0