Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - вторникъ, 12 декабря 2017 г. Сейчасъ на порталѣ посѣтителей - 18.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Ма́ія въ 22-й де́нь.
Свята́го му́ченика Васили́ска.

Стихи́ры, гла́съ 4. Подо́бенъ: Яко до́бля.

Твои́ но́зѣ связа́вше,* гвоздьми́ пригвозди́ша,* егда́ ше́ствовалъ еси́ стезе́ю,* ра́дуяся, муче́нія, прехва́льне,* си́ми же попра́лъ еси́ главу́ вра́жію,* и до конца́ сокруши́лъ еси́,* и ше́ствовалъ еси́ крѣ́пко* ше́ствія небе́сная,* Влады́цѣ побѣдоно́сецъ я́влься, сла́вне.

Моли́тва твоя́ израсти́* дре́во, непрозя́бшее пе́рвѣе,* и исто́чникъ источи́ жи́вы во́ды;* тече́ніемъ же твоея́ кро́ве земля́ освяти́ся,* возду́хъ же душе́внымъ* возше́ствіемъ, пребога́те.* Тѣ́мже вѣ́рою тво́й святы́й соверша́емъ, Васили́ске,* всепра́зднственный де́нь,* въ о́ньже зако́нно подвиза́лся еси́.

Аще у́бо прилучи́тся въ по́стъ, ищи́ стихи́ры Богоро́дицы сего́ мѣ́сяца въ 20-й де́нь.



НА УТРЕНИ
Кано́нъ, его́же краегране́сіе: Превели́каго Васили́ска хвалю́. Іо́сифъ. Гла́съ 8.


Пѣ́снь 1.

Ирмо́съ: Пѣ́снь возсле́мъ, лю́діе, чу́дному Бо́гу на́шему, свободи́вшему Изра́иля отъ рабо́ты, пѣ́снь побѣ́дную пою́ще и вопію́ще: пои́мъ Тебѣ́, еди́ному Влады́цѣ.

Се́й свѣ́тлый тво́й пра́здникъ благоче́стно хва́лящія, му́чениче многострада́льне, Царя́ Христа́ моли́ спасти́, и небе́снаго Ца́рствія прича́стники бы́ти.

Ве́сь любо́вію Христо́вою укрѣ́плься, пребога́те, пло́ть преоби́дѣлъ еси́, я́ко растлѣ́тися хотя́щу, и претерпѣ́лъ еси́ му́ки, нра́вомъ му́жественнымъ обличи́въ и́дольскую пре́лесть.

Но́щь неразу́мія, просвѣще́ніемъ Пресвята́го Ду́ха осія́емь, преше́лъ еси́, Васили́ске, и страда́ній свѣ́тлостію яви́лся еси́, я́ко со́лнце, всю́ тва́рь свѣ́тло озаря́я.

Богоро́диченъ: Руно́ предзря́ше Гедео́нъ, пречи́стую утро́бу Твою́, Ро́су небе́сную, Дѣ́во, пріе́мшую, мо́ре изсуша́ющую, Отрокови́це, безбо́жія и иста́явшія напои́вшую ра́зумы.

Пѣ́снь 3.

Ирмо́съ: Ты́ еси́ утвержде́ніе притека́ющихъ къ Тебѣ́, Го́споди, Ты́ еси́ свѣ́тъ омраче́нныхъ, и пое́тъ Тя́ ду́хъ мо́й.

Кро́вію страда́нія и́дольское разгорѣ́ніе погаси́лъ еси́ и пи́щи, му́чениче, пото́ка наслажда́ешися, ра́дуяся.

Му́ченика Тро́ицы тя́ избра́нна, дво́ица, сла́вне, стра́далецъ оста́вльши, ко Христу́ оты́де.

Пожида́еши стра́ждущія съ тобо́ю, изрѣши́вся тѣлесе́, Христа́ Го́спода исповѣ́дуя, всѣ́хъ Царя́, Васили́ске многострада́льне.

Богоро́диченъ: Да обря́щу Тя́, Пречи́стая, руководя́щу мя́ всегда́ къ добродѣ́телемъ и къ покая́нія пути́ вводя́щу.

Сѣда́ленъ, гла́съ 1. Подо́бенъ: Гро́бъ Тво́й.

Еди́ному Царю́ ны́нѣ предстои́ши, ра́дуяся, діади́мою свѣ́тлою и оде́ждею, отъ твои́хъ обагре́нною крове́й, свяще́нно обложе́нъ и обоже́нъ чи́стымъ прича́стіемъ, тѣ́мже, дне́сь всесвяту́ю па́мять твою́ соверша́юще, пое́мъ тя́.

Сла́ва, и ны́нѣ, пра́здника или́ богоро́диченъ:

Упова́ніе христіа́нъ, Пресвята́я Дѣ́во, Его́же родила́ еси́, Бо́га, па́че ума́ же и сло́ва, непреста́нно моли́ съ вы́шними си́лами, пода́ти оставле́ніе грѣхо́въ на́шихъ всѣ́хъ и исправле́ніе житія́ вѣ́рою и любо́вію при́сно Тя́ сла́вящимъ.

Крестобогоро́диченъ:

Нескве́рная Агница, Агнца и Па́стыря, повѣ́шена на дре́вѣ, ме́ртва зря́щи, пла́чущи, вѣща́ше, ма́терски восклица́ющи: ка́ко претерплю́ Твое́, е́же па́че сло́ва, Сы́не Мо́й, сни́тіе и во́льныя стра́сти, Бо́же Преблагíй?

Пѣ́снь 4.

Ирмо́съ: Услы́шахъ, Го́споди, смотре́нія Твоего́ та́инство, разумѣ́хъ дѣла́ Твоя́ и просла́вихъ Твое́ Божество́.

Зе́млю дѣ́лавъ ра́ломъ, му́чениче, души́ твоея́, стори́ческій кла́съ прине́слъ еси́ страда́нія, въ жи́тницахъ боже́ственныхъ соблюда́емь.

Свяще́ненъ услы́шалъ еси́ свы́ше, преблаже́нне, гла́съ, кончи́ну тебѣ́ извѣству́ющъ страда́нія и лико́мъ му́ченикъ сочта́вшій тя́.

Тве́рдо показу́я, сла́вне, сопротивле́ніе, претерпѣ́лъ еси́, вери́гами свя́занъ, и пре́лести рѣша́ вся́ку сою́зу.

Сатану́ удави́лъ еси́ боже́ственными, страстоте́рпче, жи́лами болѣ́зней твои́хъ, тѣ́мже побѣ́ды украси́лся еси́, Васили́ске му́чениче, вѣнце́мъ.

Богоро́диченъ: Отцу́ Единосу́щный яви́ся по всему́ человѣ́комъ подо́бенъ, вопло́щся, я́коже изво́ли, отъ Твои́хъ крове́й, Всенепоро́чная.

Пѣ́снь 5.

Ирмо́съ: Утренююще вопіе́мъ Ти́: Го́споди, спаси́ ны, Ты́ бо еси́ Бо́гъ на́шъ, ра́звѣ Тебе́, ино́го не вѣ́мы.

Зако́нно пострада́ти ведо́мь, беззако́ннующихъ си́лою Ду́ха, му́чениче богому́дре, посрами́лъ еси́.

Ше́ствовавъ де́рзностнѣ стезю́ муче́нія, жа́ла сокруши́лъ еси́ борца́, сла́вне.

Вонзе́нія твои́хъ гвозде́й, богому́дре, водруже́нная, врага́ борца́ главу́ до конца́ сокруши́ша.

Богоро́диченъ: Въ подо́біи пло́ти родила́ еси́, Богоро́дице, недомы́слимаго и непостижи́маго Бо́га.

Пѣ́снь 6.

Ирмо́съ: Моли́тву пролію́ ко Го́споду и Тому́ возвѣщу́ печа́ли моя́, я́ко зо́лъ душа́ моя́ испо́лнися и живо́тъ мо́й а́ду прибли́жися, и молю́ся, я́ко Іо́на: отъ тли́, Бо́же, возведи́ мя.

На дре́во возне́сшегося проповѣ́дуя, на су́сѣ свя́занъ бы́лъ еси́ дре́вѣ, и сіе́ твои́хъ моли́твъ одожде́ньми показу́еши сы́ро и ли́ствіемъ соверше́ннымъ укра́шено, на утвержде́ніе благочести́выхъ, Васили́ске, и сла́ву болѣ́зней твои́хъ.

Разрѣше́на тя́ пло́тскихъ пристра́стій, беззако́нніи непра́ведно связу́ютъ, и желѣ́зными пригвожда́ютъ гвоздьми́, и до́лгимъ путе́мъ во́дятъ, кро́вію всю́ зе́млю освяща́юща, му́чениче многострада́льне.

Стоя́ свя́занъ рука́ма, впери́лъ еси́ серде́чное о́ко къ Бо́гу и исто́чникъ потещи́ воды́ живы́я Того́ умоли́лъ еси́, въ па́мять твою́ всесла́вную и душа́мъ исцѣле́ніе, блаже́нне.

Богоро́диченъ: Сокруше́нія окая́нныя души́ моея́ и лѣ́тныя исцѣли́ стра́сти, Врача́ бо ду́шъ и тѣле́съ несказа́нно, Дѣ́во, ро́ждши, и спаси́ мя, на Тя́ наде́жду мою́, Всенепоро́чная, возло́жшаго.

Конда́къ, гла́съ 8. Подо́бенъ: Взбра́нной:

Во страда́ніи крѣ́покъ и му́жественъ яви́лся еси́ и въ чудесѣ́хъ преди́венъ, явле́нно Христо́во и́мя преднося́, мучи́теля посрами́лъ еси́. Тѣ́мъ тя́ почита́емъ, Васили́ске, при́сно зову́ще, всече́стне: ра́дуйся, му́чениковъ свѣ́тлая добро́то.

Пѣ́снь 7.

Ирмо́съ: Отроцы евре́йстіи въ пещи́ попра́ша пла́мень дерзнове́нно и на ро́су о́гнь преложи́ша, вопію́ще: благослове́нъ еси́, Го́споди Бо́же, во вѣ́ки.

Украше́ніе му́чениковъ показа́лся еси́, въ прекра́сныхъ жили́щахъ, преблаже́нне, живы́й, и отъ на́съ, любо́вію тя́ чту́щихъ, мірску́ю бу́рю отжени́ твои́ми моли́твами.

До́мъ Тро́ицы показа́лся еси́, истука́нныя же и хра́мы и́дольскія низлага́я, му́дре, и поя́ Влады́цѣ: благослове́нъ еси́, Го́споди Бо́же, во вѣ́ки.

Подава́етъ тебѣ́ по́честь Влады́ка, пострада́вшу крѣ́пко, и низло́жшу хи́трости вра́жія, и пою́щу согла́сно: благослове́нъ еси́, Го́споди Бо́же, во вѣ́ки.

Друга́я тве́рдь показа́лся еси́, я́ко со́лнце, страда́нія стяжа́въ, и я́ко звѣ́зды, твои́хъ чуде́съ, Васили́ске, свяще́нную свѣ́тлость и по́лность во вѣ́ки.

Богоро́диченъ: Се́, Юже рече́, Дѣ́ву, Боже́ственнымъ Ду́хомъ вели́кій Иса́ія, во утро́бѣ Бо́га зача́тъ и роди́. Ему́же пое́мъ: Го́споди Бо́же, благослове́нъ еси́.

Пѣ́снь 8.

Ирмо́съ: Побѣди́тели мучи́теля и пла́мене благода́тію Твое́ю бы́вше, за́повѣдемъ Твои́мъ зѣло́ прилежа́ще, о́троцы вопія́ху: благослови́те, вся́ дѣла́ Госпо́дня, Го́спода.

Побѣди́тель мучи́телей и духо́въ, сла́вне, лука́вствія показа́лся еси́, поя́ тя́ Укрѣ́пльшаго непреста́нно: благослови́те, вся́ дѣла́, Го́спода и превозноси́те Его́ во вѣ́ки.

Умертви́лся еси́ мíру, ме́ртвымъ вдыха́ющему жи́знь Влады́цѣ, Васили́ске сла́вне му́чениче, неукло́нно послѣ́дуя, пое́ши: благослови́те, вся́ дѣла́, Го́спода и превозноси́те Его́ во вѣ́ки.

Тѣ́ломъ му́ки терпя́, тве́рдостію души́, богому́дре, со безпло́тными боже́ственными лику́еши Ангелы, хвалу́ Бо́гу принося́ и вопія́: по́йте, вся́ дѣла́, Го́спода и превозноси́те Его́ во вѣ́ки.

Богоро́диченъ: Яви́лася еси́ ши́рши небе́съ, вмѣсти́вша Бо́га въ ложесна́хъ, тѣсноты́ лука́ваго избавля́ющаго вся́ пою́щія, Пресвята́я Отрокови́це: благослови́те, вся́ дѣла́, Го́спода и превозноси́те Его́ во вѣ́ки.

Пѣ́снь 9.

Ирмо́съ: Устраши́ся вся́къ слу́хъ неизрече́нна Бо́жія снизхожде́нія, я́ко Вы́шній во́лею сни́де да́же и до пло́ти, отъ Дѣви́ческаго чре́ва бы́въ Человѣ́къ. Тѣ́мже Пречи́стую Богоро́дицу, вѣ́рніи, велича́емъ.

Вѣ́триломъ, блаже́нне, кре́стнымъ муче́нія, преше́дъ бу́рю, ти́хое Ца́рствія приста́нище дости́глъ еси́ и, я́коже купе́цъ до́бръ, бре́мя спа́слъ еси́ благоче́стія, Христу́ всѣ́хъ Царю́ и Бо́гу на́шему.

Якоже дре́вле о́гнь съ небесе́ Ѳесви́тянинъ Илія́ сведе́, си́це, блаже́нне, твое́ю моли́твою пла́мень све́лъ еси́, и́мже попали́ся хра́мъ и́дольскій, и ка́пища де́монская пожго́шася, и Бо́гъ Творе́цъ велича́ется.

Тѣлесе́ разрѣша́ешися, му́дре, ме́чнымъ усѣче́ніемъ, пріе́мшимъ тво́й му́дрымъ си́ламъ боже́ственный ду́хъ, побѣ́ждшій благода́тію лука́вствія лю́тыя, пребога́те, ду́хи, и ны́нѣ въ вы́шнихъ живе́ши, вѣнцено́сецъ, Васили́ске, Ца́рствія.

Земля́ у́бо, му́чениче, погребе́ніемъ, не́бо же душе́ю освяти́ся твое́ю, богодухнове́нне: я́коже бо багряни́цею свѣ́тлою отъ кро́ве твоея́ одѣ́янъ, Христу́ Бо́гу на́шему сца́рствуеши всегда́, помина́я вѣ́рно помина́ющихъ тя́.

Богоро́диченъ: Естество́мъ у́бо Бо́гъ сы́й, но претерпѣ́лъ еси́ одѣ́ятися въ человѣ́ка, въ ложесна́ Непоро́чныя во́лею все́лься, Человѣколю́бче. Тѣ́мже сугубоесте́ственна вѣ́дяще хотѣ́нія Твоя́, Тя́ велича́емъ, Ма́терь Твою́ вѣ́рно ублажа́юще.

Источникъ: Минíа, мѣ́сяцъ Ма́ій. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 181–184.

/ Къ оглавленію раздѣла /


Наверхъ / Къ титульной страницѣ

0