Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - пятница, 15 декабря 2017 г. Сейчасъ на порталѣ посѣтителей - 13.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Ма́ія въ 21-й де́нь.
Святы́хъ вели́кихъ царе́й и равноапо́столовъ Константи́на и Еле́ны.

ВЕЧЕРЪ,
[Блаже́нъ му́жъ, 1-й антифо́нъ.] На Го́споди воззва́хъ: стихи́ры пра́здника 3, та́же святы́хъ 5, гла́съ 4. Подо́бенъ: Да́лъ еси́ зна́меніе.

Да́лъ еси́, Человѣколю́бче,* благочести́вому Твоему́ уго́днику* Соломо́нову му́дрость,* Дави́дову кро́тость* и апо́стольское правосла́віе,* я́ко царе́й Ца́рь,* госпо́дствующихъ всѣ́хъ Госпо́дь.* Тѣ́мже Твое́ человеколю́бное смотре́ніе сла́вимъ,* Іису́се Всеси́льне, Спа́се ду́шъ на́шихъ. [Два́жды.]

Пе́рвый повину́лъ еси́ багряни́цу,* приснопо́мнимый царю́,* во́лею Христу́,* Того́ позна́въ Бо́га* и всѣ́ми ца́рствующаго всѣ́хъ Благодѣ́теля,* побѣдотво́рна вся́кому нача́лу* и вла́сти превы́шшаго.* Отсю́ду тебѣ́, христолю́бче,* ца́рство испра́вилъ е́сть* Іису́съ Человѣколю́бецъ и Спа́съ ду́шъ на́шихъ.

Сла́ва, гла́съ 2. Византíево:

Бога́тыхъ даро́въ лу́чшая пріе́мъ отъ Бо́га, царю́ держа́внѣйшій, Константи́не превели́кій, до́брѣ въ си́хъ преуспѣ́въ: озари́вся бо заря́ми Пресвята́го Ду́ха, отъ Сильве́стра святи́теля креще́ніемъ, во царѣ́хъ яви́лся еси́ непобѣди́мь, вселе́нную, я́ко да́ръ, да́лъ еси́ Зижди́телю твоему́ и ца́рствующій гра́дъ благочести́вый. Тѣ́мже моля́ся не преста́й Христу́ Бо́гу, дарова́ти всѣ́мъ, творя́щимъ па́мять твою́, я́ко дерзнове́ніе имѣ́я, согрѣше́ній проще́ніе и ве́лію ми́лость.

И ны́нѣ, пра́здника.
Вхо́дъ. Проки́менъ дне́. И чте́нія.

Ца́рствъ тре́тіихъ чте́ніе. [Глава́ 8.]

Ста́ Соломо́нъ предъ лице́мъ же́ртвенника Госпо́дня, предъ всѣ́мъ собо́ромъ Изра́илевымъ, и воздѣ́въ ру́цѣ свои́ на не́бо, и рече́: Го́споди Бо́же Изра́илевъ, нѣ́сть Бо́гъ, я́коже Ты́, на небеси́ горѣ́ и на земли́ до́лѣ. Аще бо не́бо и не́бо небесе́ не довлѣ́ютъ Тебѣ́, ка́ко до́мъ се́й, его́же созда́хъ и́мени Твоему́? Оба́че и при́зриши на моли́тву мою́, Го́споди Бо́же Изра́илевъ, услы́шати моле́нія и моли́тву, е́юже ра́бъ Тво́й мо́лится предъ Тобо́ю, къ Тебѣ́ дне́сь. Да бу́дутъ о́чи Твои́ отве́рсты на до́мъ се́й де́нь и но́щь, на мѣ́сто сіе́, о не́мже глаго́лалъ еси́: бу́детъ и́мя Мое́ та́мо, е́же услы́шати моли́тву, е́юже мо́лится ра́бъ Тво́й на мѣ́стѣ се́мъ, во дни́ и но́щи. И послу́шати мольбы́ раба́ Твоего́ и люде́й Твои́хъ Изра́иля. И ели́ка а́ще помо́лятся къ Тебѣ́ на мѣ́стѣ се́мъ, и Ты́ услы́шиши на мѣ́стѣ жили́ща Твоего́ на небеси́, и сотвори́ши, и ми́лостивъ бу́деши и́мъ.

Проро́чества Иса́іина чте́ніе. [Главы́ 61 и 62.]

Да возра́дуется душа́ моя́ о Го́сподѣ, облече́ бо мя́ въ ри́зу спасе́нія, и оде́ждею весе́лія одѣ́я мя́, я́ко жениху́ возложи́ мнѣ́ вѣне́цъ, и я́ко невѣ́сту украси́ мя красото́ю. И я́ко земля́ растя́щая цвѣ́тъ сво́й, и я́ко вертогра́дъ сѣ́мена своя́ прозяба́етъ: та́ко возсія́етъ Госпо́дь пра́вду, и ра́дость предъ всѣ́ми язы́ки. Сіо́на ра́ди не умо́лкну, и Іерусали́ма ра́ди не попущу́, до́ндеже у́бо изы́детъ я́ко свѣ́тъ пра́вда моя́, и спасе́ніе же мое́ я́ко свѣща́ разжже́тся. И у́зрятъ язы́цы пра́вду твою́, и вси́ ца́ріе зе́мстіи сла́ву твою́, и нареку́тся и́менемъ твои́мъ но́вымъ, е́же Госпо́дь имену́етъ е́. И бу́деши вѣне́цъ добро́ты въ руцѣ́ Госпо́дни, и діади́ма ца́рствія въ руцѣ́ Бо́га Твоего́. И ктому́ не нарече́шися оста́вленъ, и земля́ твоя́ ктому́ не нарече́тся пуста́. Тебѣ́ бо нарече́тся во́ля моя́, и земля́ твоя́ вселе́нная, я́ко благоволи́тъ Госпо́дь въ тебѣ́, и земля́ твоя́ насели́тся. И я́ко живы́й ю́ноша съ дѣ́вою, та́ко поживу́тъ сы́нове твои́ съ тобо́ю. И бу́детъ, и́мже о́бразомъ возвесели́тся жени́хъ о невѣ́стѣ, та́ко возвесели́тся Госпо́дь о тебѣ́.

Проро́чества Иса́іина чте́ніе. [Глава́ 60.]

Свѣти́ся, свѣти́ся, Іерусали́ме: пріи́де бо тво́й свѣ́тъ и сла́ва Госпо́дня на тебѣ́ возсія́. Яко се́ тма́ покры́етъ зе́млю и мра́къ на язы́ки, на тебѣ́ бо яви́тся Госпо́дь, и сла́ва Его́ на тебѣ́ у́зрится. И по́йдутъ ца́ріе свѣ́томъ твои́мъ, и язы́цы свѣ́тлостію восто́ка твоего́. Возведи́ о́крестъ о́чи твои́ и ви́ждь со́бранная ча́да твоя́: пріи́дутъ вси́ сы́нове твои́ издале́ча, и дще́ри твоя́ на ра́мѣхъ во́змутся. Тогда́ у́зриши, и возра́дуешися, и убои́шися, и ужа́снешися се́рдцемъ, егда́ преложи́тъ на тя́ бога́тство мо́ря, и язы́къ, и люде́й. И пріи́дутъ ти́ стада́ велблу́дъ, и покры́ютъ тя́ велблу́ды Мадіа́мстіи и Гефа́рстіи, вси́ отъ Сава́ пріи́дутъ, нося́ще тебѣ́ зла́то и лива́нъ, принесу́тъ тебѣ́ и ка́мень че́стенъ, и спасе́ніе отъ Го́спода благовѣстя́тъ. И вся́ о́вцы Кида́рскія соберу́тся тебѣ́, и о́вни Навео́ѳстіи пріи́дутъ тебѣ́, и вознесу́тся прія́тная на же́ртвенникъ Мо́й, и до́мъ моли́твы Моея́ просла́вится. Кíи су́ть, и́же, я́ко о́блацы, лета́ютъ, и я́ко го́лубіе со птенцы́ свои́ми? Со мно́ю е́сть Сіо́нъ, Мене́ о́строви ожида́ша и корабли́ Ѳарсíйстіи въ пе́рвыхъ, е́же привести́ ча́да твоя́ издале́ча и сребро́ и зла́то и́хъ съ ни́ми, за и́мя Госпо́дне Свято́е и за е́же Свято́му Изра́илеву сла́вну бы́ти. И сози́ждутъ сы́нове иноро́дніи стѣ́ны твоя́, и ца́ріе и́хъ предста́нутъ тебѣ́: за гнѣ́въ бо Мо́й порази́хъ тя́ и за ми́лость Мою́ возлюби́хъ тя́. И отве́рзутся врата́ твоя́, Іерусали́ме, вы́ну де́нь и но́щь и не затворя́тся, е́же ввести́ къ тебѣ́ си́лу язы́ковъ и цари́ и́хъ ведо́мыя. Язы́цы бо и ца́ріе, и́же тебѣ́ не порабо́таютъ, поги́бнутъ, и язы́цы запустѣ́ніемъ запустѣ́ютъ. И сла́ва Лива́нова къ тебѣ́ пріи́детъ, въ кипари́сѣ, и пе́вкѣ и ке́дрѣ вку́пѣ, просла́вити мѣ́сто свято́е Мое́, и мѣ́сто но́гъ Мои́хъ просла́влю. И по́йдутъ къ тебѣ́, боя́щеся, сы́нове смири́вшихъ тя́ и прогнѣ́вавшихъ тя́ и покло́нятся слѣда́мъ но́гъ твои́хъ вси́ прогнѣ́вавшіи тя́, и нарече́шися гра́дъ Госпо́день, Сіо́нъ Свята́го Изра́илева. За е́же бы́ти тебѣ́ оста́влену и возненави́дѣну, и не бѣ́ помога́яй тебѣ́, и положу́ тя въ ра́дость вѣ́чную, весе́ліе родо́мъ родо́въ. И изссе́ши млеко́ язы́ковъ, и бога́тство царе́й снѣ́си, и разумѣ́еши, я́ко Азъ Госпо́дь, спаса́яй тя́ и избавля́яй тя́, Бо́гъ Изра́илевъ.

На литíи стихи́ра хра́ма, и святы́хъ, гла́съ 1:

Достодо́лжно соверша́емъ па́мять твою́, Константи́не равноапо́стольне, всѣ́хъ царе́й степе́нь и похвало́: просвѣще́нъ бо бы́въ луча́ми Ду́ха, всю́ уясни́лъ еси́ Це́рковь Христо́ву, собо́ры вѣ́рныхъ отвсю́ду собра́въ въ свѣ́тлѣмъ гра́дѣ Нике́йстѣмъ, идѣ́же злочести́выхъ угаси́ся шата́ніе и ерети́ческія изнемого́ша язы́ки и обуя́ша, правосла́вныхъ же вознесе́ся вѣне́цъ, я́вльшейся вѣ́рѣ. Отню́дуже отъ ни́хъ просла́вися правосла́внѣйшій, и всѣ́мъ царе́мъ проповѣ́данъ бы́лъ еси́ оте́цъ, я́ко пе́рвый багряни́цу отъ Бо́га пріе́мъ. Тѣ́мже мо́лимъ ти ся, соверша́ющіи па́мять твою́ вѣ́рно: испроси́ очище́ніе прегрѣше́ній душа́мъ на́шимъ.

Гла́съ 2. Византíево:

Не отъ человѣ́къ зва́ніе пріи́мъ, но, я́ко боже́ственный Па́велъ, имѣ́лъ еси́ сіе́ па́че свы́ше, пресла́вне Константи́не, отъ Христа́ Бо́га. Зна́меніе бо Креста́ на небеси́ ви́дѣвъ, си́мъ улови́лся еси́, я́ко добрѣ́йшій ло́въ, о се́мъ и побѣди́тель проти́ву ви́димыхъ и неви́димыхъ враго́въ яви́лся еси́ непобѣди́мь. Тѣ́мже мо́лимъ тя́, я́ко те́пла моли́твенника, земнíи, досто́йно па́мять твою́ почита́юще, въ дерзнове́ніи испроси́ти на́мъ просвѣще́нія, очище́нія и ве́лія ми́лости.

Благочести́ваго Константи́на па́мять, я́ко мѵ́ро истощева́емо, дне́сь возсія́: Христа́ бо возжелѣ́въ, и́долы пренебреже́, хра́мъ воздви́гъ на земли́ Распе́ншемуся на́съ ра́ди, на небесѣ́хъ же воспрія́ наде́жды вѣне́цъ.

Гла́съ 3:

Юношескій провожда́я во́зрастъ, я́коже боже́ственный Па́велъ, съ вы́шнихъ прія́лъ еси́ боже́ственное дарова́ніе и лю́таго борца́ ра́ть всеору́жествомъ Креста́ низве́рглъ еси́, царе́й похвало́, Константи́не апо́столе, о на́съ ко Го́споду моли́ся, спасти́ся душа́мъ на́шимъ.

Гла́съ 4:

Хвала́ Бо́гу отъ бре́нныхъ усте́нъ воспѣва́ема е́сть въ боже́ственнѣй па́мяти твое́й, Константи́не всехва́льне: ты́ бо яви́лся еси́ преизя́щный во́инъ словесе́ вѣ́ры, поруга́въ изва́янныя и́доловъ зра́ки, и ны́нѣ приче́лся еси́ свѣ́тлости Тро́ичнѣй просвѣща́яй помышле́нія на́ша мольба́ми твои́ми.

Сла́ва, гла́съ 5:

Це́рковь дне́сь украси́вшися держа́вою твое́ю, царю́, та́йно весели́тся и твою́ всечестну́ю па́мять по достоя́нію прехва́льно почита́етъ, зову́щи: ра́дуйся, и́же Па́влу поревнова́вый, и Кре́стъ Христо́въ взе́мый, и сѣ́ти сокруши́вый сопротивоборца́. Ра́дуйся, царе́й всеизря́дне и апо́столомъ равноче́стне. Ра́дуйся, вѣ́рныхъ утвержде́ніе и царе́й крѣ́пкое забра́ло. Константи́не блаже́нне, о на́съ ко Го́споду не оскудѣ́й моля́ся, я́ко дерзнове́ніе имѣ́яй, царе́й украше́ніе.

И ны́нѣ, пра́здника или́ богоро́диченъ.

На стихо́внѣ стихи́ры, гла́съ 2. Подо́бенъ: Егда́ отъ дре́ва.

Пе́рвый ца́рь во христіа́нѣхъ,* отъ Бо́га, Константи́не,* ски́птръ воспрія́лъ еси́:* тебѣ́ бо яви́ся въ земли́* кры́емо спаси́тельное зна́меніе,* и́мже и язы́ки вся́* покори́лъ еси́ подъ но́ги ри́млянъ,* ору́жіе необори́мое имѣ́яй —* Животворя́щій Кре́стъ, блаже́нне,* и́мже и приве́лся еси́ Бо́гу на́шему.

Сти́хъ: Вознесо́хъ избра́ннаго отъ люде́й Мои́хъ,* обрѣто́хъ Дави́да, раба́ Моего́.

Вои́стинну блаже́нно чре́во* и освяще́нна утро́ба,* тебе́ носи́вшая,* царю́ мировожделѣ́нне,* христіа́новъ ра́досте,* Константи́не боговѣнча́нне,* ри́млянъ сла́во,* бога́тство и побо́рниче си́рыхъ и вдови́цъ,* покро́въ смире́нныхъ* и недоумѣ́ющихся въ ско́рбехъ исправле́ніе,* вои́стинну и плѣ́нныхъ избавле́ніе.

Сти́хъ: Сего́ ра́ди пома́за Тя́, Бо́же,* Бо́гъ Тво́й еле́емъ ра́дости.

Жела́ніемъ и любо́вію* Христо́вою уязви́вшися,* ма́ти пресла́дкія о́трасли* со тща́ніемъ пріи́де* во святы́й Сіо́нъ,* на мѣ́сто свято́е,* на не́мже распя́тся во́лею Спа́съ на́шъ,* во е́же спасти́ на́съ,* идѣ́же Кре́стъ взе́мши,* ра́дующися, взыва́ше:* сла́ва Дарова́вшему мнѣ́,* Его́же надѣ́яхся.

Сла́ва, гла́съ 8:

Свѣ́тъ пресвѣ́тлый, ца́рская звѣзда́ невече́рняя, отъ невѣ́рія въ вѣ́ру Божества́ преше́дши, приведе́ся освяти́ти лю́ди и гра́дъ и, о́бразъ Креста́ на небеси́ ви́дѣвъ, услы́ша отту́ду: си́мъ побѣжда́й враги́ твоя́! Отону́дуже пріе́мъ разумѣ́ніе Ду́ха, свяще́нникъ извѣще́нъ и ца́рь еле́емъ, утверди́лъ еси́ Це́рковь Бо́жію, правосла́вныхъ царе́й, о́тче, его́же и ра́ка исцѣле́ніе то́читъ, Константи́не равноапо́стольне, моли́ся о душа́хъ на́шихъ.

И ны́нѣ, пра́здника.

Тропа́рь, гла́съ 8:

Креста́ Твоего́ о́бразъ на небеси́ ви́дѣвъ и, я́коже Па́велъ, зва́ніе не отъ человѣ́къ пріе́мъ, въ царѣ́хъ апо́столъ Тво́й, Го́споди, Ца́рствующій гра́дъ въ руцѣ́ Твое́й положи́, его́же спаса́й всегда́ въ ми́рѣ моли́твами Богоро́дицы, еди́не Человѣколю́бче.


НА УТРЕНИ,
На Бо́гъ Госпо́дь: тропа́рь пра́здника, два́жды. Сла́ва, святы́хъ. И ны́нѣ, пра́здника.

По 1-й каѳи́смѣ сѣда́ленъ, гла́съ 3. Подо́бенъ: Боже́ственныя вѣ́ры.

Но́вый бы́лъ еси́ Дави́дъ о́бразы, ро́гъ свы́ше воспріе́мъ ца́рствія ве́рхъ тво́й: еле́емъ бо Ду́ха пома́за тя́, сла́вне, Пресу́щное Сло́во и Госпо́дь. Отону́дуже прія́лъ еси́ и ски́птръ, прему́дре, ца́рскій, прося́ на́мъ ве́лія ми́лости. [Два́жды.]

Сла́ва, и ны́нѣ, пра́здника или́ богоро́диченъ:

Боже́ственная ски́нія была́ еси́, Сло́ва, еди́на Пречи́стая Ма́ти Дѣ́во, чистото́ю а́нгелы превозше́дшая, па́че всѣ́хъ мене́, пе́рсть бы́вша, оскверне́на плотски́ми прегрѣше́ньми, очи́сти моли́твъ Твои́хъ боже́ственными вода́ми, подаю́щи, Чи́стая, ве́лію ми́лость.

По 2-й каѳи́смѣ сѣда́ленъ, гла́съ 6. Подо́бенъ: Ангельскія:

Уязвля́емь на Крестѣ́ Творе́цъ со́лнца и тва́ри, тебе́, я́ко звѣзду́ свѣ́тлую, съ небесе́ звѣзда́ми привлече́, ему́же и держа́ву пе́рвому ца́рскую возложи́. Тѣ́мже тя́ восхваля́емъ, Константи́не, царю́ благочести́вѣйшій, съ Еле́ною, ма́терію богому́дрою. [Два́жды.]

Сла́ва, и ны́нѣ, пра́здника или́ богоро́диченъ:

Преднапису́етъ Гедео́нъ зача́тіе, и сказу́етъ Дави́дъ рождество́ Твое́, Богоро́дице: сни́де бо, я́ко до́ждь на руно́, Сло́во во чре́во Твое́, и прозябла́ еси́ безъ сѣ́мене, земле́ свята́я, мíрови спасе́ніе, Христа́ Бо́га на́шего, Благода́тная.

[Велича́ніе:

Велича́емъ ва́съ, святíи благовѣ́рніи и равноапо́стольніи ца́ріе Константи́не и Еле́но, и чте́мъ святу́ю па́мять ва́шу, вы́ бо святы́мъ Кресто́мъ всю́ вселе́нную просвѣти́ли есте́.

Псало́мъ избра́нный: Небеса́ повѣ́даютъ сла́ву Бо́жію...]

По поліеле́и сѣда́ленъ, гла́съ 4. Подо́бенъ: Ско́ро предвари́.

Благонаро́чита па́мять тво́я, я́вльшися на́мъ, озаря́етъ концы́ богоразу́мія свѣ́томъ, Константи́не богодохнове́нне: ты́ бо въ царѣ́хъ благочести́внѣ показа́лся еси́, зако́ны небе́снаго Царя́ соблю́дъ. Тѣ́мже моли́твами твои́ми изба́ви на́съ отъ искуше́ній. [Два́жды.]

Сла́ва, и ны́нѣ, богоро́диченъ:

Обнови́ла еси́, Чи́стая, Боже́ственнымъ Рождество́мъ Твои́мъ истлѣ́вшее во страсте́хъ земноро́дныхъ ме́ртвенное существо́ и воздви́гла еси́ вся́ отъ сме́рти къ животу́ нетлѣ́нія, тѣ́мже Тя́ по до́лгу блажи́мъ вси́, Дѣ́во препросла́вленная, я́коже прорекла́ еси́.

Степе́нна, 1-й антифо́нъ 4-го гла́са. Проки́менъ, гла́съ 4: Вознесо́хъ избра́ннаго* отъ люде́й Мои́хъ. Сти́хъ: Сего́ ра́ди пома́за Тя́, Бо́же, Бо́гъ Тво́й еле́емъ ра́дости, па́че прича́стникъ Твои́хъ. Вся́кое дыха́ніе... Ева́нгеліе Іоа́нна, зача́ло 36.

По 50-мъ псалмѣ́:

Сла́ва: Моли́твами боговѣнча́нныхъ царе́й, Ми́лостиве... И ны́нѣ: Моли́твами Богоро́дицы... Та́же: Поми́луй мя́, Бо́же... Посе́мъ стихи́ра: Благочести́ваго Константи́на... [Ищи́ на литíи.]

Кано́нъ пра́здника, на 6 и святы́хъ на 8, гла́съ 8.

Пѣ́снь 1.

Ирмо́съ: Во́ду проше́дъ, я́ко су́шу, и еги́петскаго зла́ избѣжа́въ, изра́ильтянинъ вопія́ше: Изба́вителю и Бо́гу на́шему пои́мъ.

Еди́не небе́сный Царю́, ца́рствующаго грѣха́ ны́нѣ во мнѣ́, Твои́хъ уго́дниковъ мольба́ми, смире́нную ду́шу мою́ свободи́.

Го́рняго бы́въ рачи́тель Ца́рствія, блаже́нне Константи́не, Царю́ всѣ́хъ и Влады́цѣ, умо́мъ чи́стымъ вѣ́ровавъ, послужи́лъ еси́.

Свѣ́томъ облиста́вшися богонача́льнымъ, тму́ неразу́мія оста́вила еси́ вои́стинну, богому́драя Еле́но, пріи́скренно Царю́ вѣко́въ порабо́тала еси́.

Богоро́диченъ: Две́рь боже́ственнаго восто́ка, отве́рзи ми́ две́ри покая́нія и отъ двере́й смертоно́снаго грѣха́ хода́тайствомъ Твои́мъ изба́ви мя́, Влады́чице.

Катава́сія пра́здника.

Пѣ́снь 3.

Ирмо́съ: Небе́снаго кру́га Верхотво́рче, Го́споди, и Це́ркве Зижди́телю, Ты́ мене́ утверди́ въ любви́ Твое́й, жела́ній кра́ю, вѣ́рныхъ утвержде́ніе, еди́не Человѣколю́бче.

Возме́здія небе́сная получи́ти потща́лся еси́, тѣ́мже Зову́щему, богому́дре, послѣ́довалъ еси́, и тму́ оста́вилъ еси́, о́тче, пре́данныя ти́ ле́сти, и свѣти́льникъ Ду́хомъ Боже́ственнымъ бы́лъ еси́.

Христу́ прилѣпи́вшися и на Него́, всечестна́я, всю́ возложи́вши наде́жду, свяще́нная Его́ мѣста́ дости́гла еси́, въ ни́хже пречи́стыя стра́сти, воплоти́вся, претерпѣ́, Преблагíй.

Спаси́тельное ору́жіе, неразори́мое одолѣ́ніе, христіа́нскую наде́жду, Кре́стъ честны́й, за́вистію сокрове́нный, ты́ яви́ла еси́, боже́ственнымъ распаля́ема жела́ніемъ, богоблаже́нная.

Богоро́диченъ: Свяще́ннаго гражда́нства отпа́дъ, Пречи́стая, приложи́хся ското́мъ и осужде́нъ ве́сь бы́хъ; Яже Судію́ ро́ждшая, вся́каго осужде́нія изба́ви и спаси́ мя.

Конда́къ и и́косъ пра́здника.
Та́же, сѣда́ленъ, гла́съ 8. Подо́бенъ: Прему́дрости.

Чу́вства просте́ръ къ небеси́ и звѣ́здную навы́кнувъ добро́ту, отъ си́хъ тайноучи́мь быва́я вся́ческихъ Го́спода, кре́стное же ору́жіе посредѣ́ облиста́, напису́я о се́мъ побѣжда́ти и держа́внымъ бы́ти. Тѣ́мже, души́ твоея́ отве́рзъ очеса́, письмо́ проче́лъ еси́ и о́бразу научи́вся, Константи́не всече́стне, моли́ Христа́ Бо́га согрѣше́ній оставле́ніе дарова́ти пра́зднующимъ любо́вію святу́ю па́мять твою́. [Два́жды.]

Сла́ва, и ны́нѣ, пра́здника или́ богоро́диченъ:

Прему́дрость и Сло́во въ Твое́мъ чре́вѣ заче́нши неопа́льно, Ма́ти Бо́жія, мíрови родила́ еси́ мíръ Содержа́щаго и въ объя́тіяхъ понесла́ еси́ вся́ Нося́щаго, Пита́теля всѣ́хъ и Творца́ тва́ри. Тѣ́мже молю́ Тя, Всесвята́я Дѣ́во, и вѣ́рно сла́влю Тя́, изба́витися ми́ отъ прегрѣше́ній, и въ де́нь суда́, егда́ предста́ти и́мамъ предъ лице́мъ Созда́теля моего́, Влады́чице Дѣ́во Чи́стая, Твою́ по́мощь тогда́ пода́ждь ми́: вся́ бо мо́жеши, ели́ка хо́щеши, Всепѣ́тая.

Пѣ́снь 4.

Ирмо́съ: Услы́шахъ, Го́споди, смотре́нія Твоего́ та́инство, разумѣ́хъ дѣла́ Твоя́ и просла́вихъ Твое́ Божество́.

Съ небесе́, я́ко Па́вла тя́ дре́вле, уловля́етъ Христо́съ Госпо́дь, Константи́не, науча́я тя́ Царя́ Еди́наго Сего́ почита́ти.

Пресвѣ́тлымъ зна́меніемъ тя́, блаже́нне, звѣзда́ми Христо́съ Со́лнце озаря́етъ и свѣти́льника тя́ омраче́ннымъ показа́.

И нра́вы боголюби́ва и боже́ственными дѣя́ніи досточу́дна, блаже́нная, была́ еси́: сего́ ра́ди вѣ́рою тя́ сла́вимъ.

Явля́еши кры́емую лѣ́ты мно́гими ны́нѣ боже́ственную побѣ́ду Креста́, и́мже спасо́хомся и де́монскія пре́лести изба́вихомся.

Богоро́диченъ: Ду́шу мою́ озари́, омраче́нную согрѣше́ньми, Яже Со́лнце пра́вды ро́ждшая, Приснодѣ́во.

Пѣ́снь 5.

Ирмо́съ: Утренююще, вопіе́мъ Ти́: Го́споди, спаси́ ны, Ты́ бо еси Бо́гъ на́шъ, ра́звѣ Тебе́, ино́го не вѣ́мы.

Утреневавъ къ незаходи́мому Со́лнцу и Влады́цѣ, царю́ богому́дре, свѣ́та испо́лненъ бы́лъ еси́.

Любо́вь и соверше́нное милосе́рдіе, я́ко порфи́ру, нося́щи, всели́лася еси́ ны́нѣ въ вы́шняя Ца́рствія.

Совокупи́лася еси́ со безпло́тныхъ, Еле́но, ликостоя́ніи, Бо́гу угоди́вши добродѣ́тельными твои́ми дѣя́ніи.

Богоро́диченъ: Дѣ́во, ду́шу мою́ очи́сти, оскверне́нную сластьми́ тѣле́сными, навѣ́томъ зміи́нымъ.

Пѣ́снь 6.

Ирмо́съ: Моли́тву пролію́ ко Го́споду и Тому́ возвѣщу́ печа́ли моя́, я́ко зо́лъ душа́ моя́ испо́лнися и живо́тъ мо́й а́ду прибли́жися, и молю́ся, я́ко Іо́на: отъ тли́, Бо́же, возведи́ мя.

Собра́лъ еси́ богоно́сныхъ оте́цъ блаже́нный ли́къ пресла́вно и тѣ́ми, Константи́не, всѣ́хъ обурева́емая сердца́ утверди́лъ еси́ единоче́стна славосло́вити Ро́ждшему, Сло́ва и сопресто́льна.

Вѣ́ровавши въ Го́спода жи́ва, е́же бы́ти всѣ́мъ подаю́щаго, ме́рзскихъ и су́етныхъ и́доловъ ме́ртвенная отри́нула еси́ служе́нія и прія́ла еси́ ра́достно, Еле́но, Ца́рство небе́сное.

Дла́нію Твое́ю окормля́еми, Сло́ве, невѣ́денія глубоча́йшую тму́ и лю́таго безбо́жія бу́рю Тобо́ю ца́рствовавшіи отри́нуша и приведо́шася къ ти́химъ благоче́стія приста́нищамъ, ра́дующеся.

Богоро́диченъ: Исцѣли́ неисцѣ́льно неду́говавшее и ухапле́ніемъ лука́ваго лю́тѣ уязви́вшееся се́рдце мое́, Отрокови́це, и Твоего́ исцѣле́нія сподо́би, и спаси́ мя, на Тя́ надѣ́ющагося, мольба́ми Твои́ми, Пречи́стая.

Конда́къ, гла́съ 3. Подо́бенъ: Дѣ́ва дне́сь.

Константи́нъ дне́сь съ ма́терію Еле́ною Кре́стъ явля́ютъ, всечестно́е дре́во, всѣ́хъ у́бо іуде́евъ посрамле́ніе су́ще, ору́жіе же на проти́вныя вѣ́рныхъ царе́й: на́съ бо ра́ди яви́ся зна́меніе ве́ліе и во бранѣ́хъ гро́зное.

Икосъ:

Константи́на, вѣ́рніи, съ ма́терію почти́мъ: Дави́да бо и сíи словеса́ услы́шавше, на ке́дрѣ, и пе́вгѣ, и кипари́сѣ, тресло́жный Кре́стъ позна́ша, и́мже спаси́тельная стра́сть послѣ́дова, и вся́ предста́виша іуде́и, угото́витися показа́ти лю́демъ ве́ліе оправда́ніе, сокрове́нное за́висти ра́ди и не́нависти тѣ́хъ, и, сіе́ обрѣ́тше, показа́ша они́. Сего́ ра́ди всѣ́мъ побѣдоно́сніи яви́шася, ору́жіе нося́ще необори́мое, зна́меніе ве́ліе и во бранѣ́хъ гро́зное.

Пѣ́снь 7.

Ирмо́съ: Отроцы евре́йстіи въ пещи́ попра́ша пла́мень дерзнове́нно, и на ро́су о́гнь преложи́ша, вопію́ще: благослове́нъ еси́, Го́споди Бо́же, во вѣ́ки.

Твоя́ повелѣ́нія сохраня́я, повину́ся Твоему́ зако́ну Константи́нъ, тѣ́мже беззако́ннующихъ низложи́ ополче́нія, вопія́ Тебѣ́: Го́споди Бо́же, благослове́нъ еси́.

Дре́во, е́же всѣ́хъ извле́кшее, досточу́дне, изъ ро́ва поги́бели, загребе́нное за́вистію, на́мъ открыва́еши, погреба́яй де́моны всегуби́тельныя во вѣ́ки.

Дѣя́ніи боже́ственными создала́ еси́ се́рдце твое́ це́рковь Бо́гу, Еле́но, и хра́мы свяще́нныя Тому́ содѣ́лала еси́, идѣ́же пло́тію пречи́стыя на́съ ра́ди подъя́тъ стра́сти.

Богоро́диченъ: Во́лею мое́ю согрѣша́яй и порабоще́нъ безмѣ́стными обы́чайми, ко обы́чному Твоему́ ны́нѣ притека́ю милосе́рдію, отча́яннаго спаси́ мя, Пресвята́я Богоро́дице.

Пѣ́снь 8.

Ирмо́съ: Седмери́цею пе́щь халде́йскій мучи́тель богочести́вымъ неи́стовно разжже́, си́лою же лу́чшею спасе́ны сія́ ви́дѣвъ, Творцу́ и Изба́вителю вопія́ше: о́троцы, благослови́те, свяще́нницы, воспо́йте, лю́діе, превозноси́те во вся́ вѣ́ки.

Яко багряни́цею, сла́вне, одѣ́явся милосе́рдіемъ, и я́коже хлами́дою, въ до́брую кро́тость вѣнце́мъ укра́шенъ бы́лъ еси́ добродѣ́телей соверше́ннымъ умо́мъ и, преста́влься отъ земли́ къ вы́шнему Ца́рствію, зове́ши: іере́и, благослови́те, лю́діе, превозноси́те Христа́ во вѣ́ки.

Веселя́щуюся ви́дящіи съ сы́номъ тя́ богому́дрымъ, сла́вная Еле́но, въ Бо́жіи Ца́рствіи, Христа́ велича́емъ, ва́шъ честны́й пра́здникъ показа́вшаго на́мъ, па́че лучи́ со́лнечныя на́съ озари́вшій, вѣ́рно пою́щихъ: лю́діе, превозноси́те Христа́ во вѣ́ки.

Яко чу́дно жела́ніе твое́ и нра́въ боже́ственный, сла́вная Еле́но, жена́мъ похвало́: мѣ́стъ бо дости́гши, честны́я стра́сти подъе́мшихъ, Влады́цѣ всѣ́хъ хра́мы прекра́сными удобри́ла еси́, вопію́щи: лю́діе, превозноси́те Христа́ во вся́ вѣ́ки.

Богоро́диченъ: Души́ моея́ о́чи, мно́гими преступле́ніи ослѣпле́нныя, Богоро́дице, просвѣти́, у́мъ мо́й умири́ и се́рдце, молю́ся, смуще́нное сластьми́ многообра́зными, и спаси́ мя, вопію́ща: іере́и, благослови́те, лю́діе, превозноси́те Чи́стую во вся́ вѣ́ки.

Пѣ́снь 9.

Ирмо́съ: Ужасе́ся о се́мъ не́бо, и земли́ удиви́шася концы́, я́ко Бо́гъ яви́ся человѣ́комъ пло́тски, и чре́во Твое́ бы́сть простра́ннѣйшее небе́съ. Тѣ́мъ Тя́, Богоро́дицу, а́нгеловъ и человѣ́къ чинонача́лія велича́ютъ.

Гро́бъ, идѣ́же лежи́тъ свяще́нное, Константи́не, и честно́е тѣ́ло твое́, зарю́ боже́ственныхъ исцѣле́ній чи́стѣ приступа́ющимъ всегда́ источа́етъ, страсте́й разли́чныхъ тму́ отгоня́ и свѣ́томъ невече́рнимъ просвѣща́я восхваля́ющихъ тя́.

Свя́то свою́ сконча́вши жи́знь, со святы́ми ны́нѣ всели́лася еси́, освяще́нія испо́лнена бы́вши и просвѣще́нія. Тѣ́мже и исцѣле́ній всегда́ источа́еши рѣ́ки, и стра́сти попаля́еши, Еле́но блаже́нная, и напая́еши ду́ши на́ша.

Пребезнача́льне безсме́ртне Царю́, Ца́рствія вы́шняго сподо́билъ еси́, и́хже благоче́стно дре́вле оправда́лъ еси́ на земли́, е́же ца́рствовати, Го́споди, Тя́ возлюби́вшихъ чи́стѣ, Еле́ну святу́ю и вели́каго Константи́на, и́хже моли́твами всѣ́хъ уще́дри.

Богоро́диченъ: Всѣ́хъ Царя́ и Творца́ заче́нши, Дѣ́во, родила́ еси́ и се́ ны́нѣ, я́коже Цари́ца одесну́ю Сего́, Чи́стая, предстои́ши. Тѣ́мже молю́ Тя: шу́ія ча́сти изба́ви мя́ въ ча́съ суда́ и десны́мъ овца́мъ сопричти́.

Свѣти́ленъ. Подо́бенъ: Жены́, услы́шите.

Свѣти́льницы, просвѣти́вшіи вселе́нную всю́ благоче́стія вѣ́рою, вы́ яви́стеся вои́стинну, боговѣнча́нне Константи́не и Еле́но сла́вная. Ва́съ возвели́чившаго Христа́ пѣ́сньми славосло́вимъ, Ди́внаго во святы́хъ.

Сла́ва, другíй. Подо́бенъ: Ученико́мъ.

Не отъ человѣ́къ прія́тъ ца́рственную держа́ву, но отъ Боже́ственныя благода́ти Константи́нъ вели́кій съ ма́терію, съ небесе́ облиста́емь же, зри́тъ Креста́ боже́ственную побѣ́ду, и́же си́мъ погуби́въ враго́въ, и́дольскую разруши́ ле́сть, въ мíрѣ же укрѣпи́ правосла́вную вѣ́ру.

И ны́нѣ, пра́здника.

На хвали́техъ стихи́ры пра́здника 3 и святы́хъ 3, гла́съ 8. Подо́бенъ: О, пресла́внаго чудесе́!

Ра́дуйся, Константи́не прему́дре,* правосла́вія исто́чниче,* напая́яй всегда́ сла́дкими вода́ми* всю́ подсо́лнечную.* Ра́дуйся, ко́реню,* изъ него́же прозябе́ пло́дъ,* пита́яй Це́рковь Христо́ву.* Ра́дуйся, похвало́ конце́въ, пресла́вне,* христіа́нскихъ царе́й пе́рвѣйшій.* Ра́дуйся, ра́досте вѣ́рныхъ.

Ца́рствуяй тва́рію,* благопоко́рное предзря́й* се́рдца твоего́, прему́дре,* слове́снѣ уловля́етъ тя́,* безслове́сіемъ держи́ма,* и, озари́въ твое́ помышле́ніе* благоче́стія разумѣ́ніи,* мíру показа́ свѣтоза́рна, я́ко со́лнце,* лучи́ испуща́юща* боже́ственныхъ дѣя́ній, пресла́вне.

Госпо́дня уче́нія,* я́коже земля́ избра́нная,* пріе́мши, всехва́льная,* добродѣ́тельныхъ дѣя́ній* благопло́діе прозябла́ еси́,* помышле́нія на́ша пита́ющее,* уподобле́ніемъ, Еле́но прему́драя,* гражда́нства твоего́.* Тѣ́мже пра́зднуемъ ра́достно* дне́сь па́мять твою́, торжеству́юще.

Еле́емъ ра́дости* Твоя́ прича́стники, Христе́,* Константи́на и Еле́ну,* пресла́вно пома́залъ еси́,* пре́лесть возненави́дѣвшихъ* и Твоея́ добро́ты возжела́вшихъ,* и Ца́рствія небе́снаго* Твоего́ си́хъ сподо́билъ еси́,* благоче́стно пе́рвѣе на земли́,* Сло́ве, ца́рствовавшихъ,* манове́ніемъ Твои́мъ.

Сла́ва, гла́съ 8. Меѳо́дія патріа́рха:

Ца́рь царе́й и Бо́гъ, бога́тыми дарова́ніи украша́яй досто́йныя, Са́мъ съ небесе́, я́коже Па́вла пресла́внаго, зна́меніемъ кре́стнымъ тебе́, Константи́не, улови́: си́мъ, ре́къ, побѣжда́й враги́ твоя́. Его́же взыска́въ съ ма́терію богому́дрою и обрѣ́тъ, я́коже жела́лъ еси́, си́хъ держа́вно въ бѣ́гство обрати́лъ еси́. Съ не́ю у́бо моли́ о правосла́вныхъ царѣ́хъ, и христолюби́вомъ во́инствѣ, и о всѣ́хъ, па́мять твою́ соверша́ющихъ вѣ́рно, еди́наго Человѣколю́бца, изба́витися вся́каго гнѣ́ва.

И ны́нѣ, пра́здника.
Славосло́віе вели́кое. [Ектеніи́ и отпу́стъ.]



НА ЛИТУРГІИ,

Блаже́нна пра́здника, пѣ́снь рядова́я, и святы́хъ, пѣ́снь 6-я, на 4. Проки́менъ, гла́съ 8: Во всю́ зе́млю изы́де вѣща́ніе и́хъ, и въ концы́ вселе́нныя глаго́лы и́хъ. Сти́хъ: Небеса́ повѣ́даютъ сла́ву Бо́жію, творе́ніе же руку́ Его́ возвѣща́етъ тве́рдь. Апо́столъ къ Гала́томъ, зача́ло 200. [Зри́:] Аще ли прилучи́тся вну́трь Пятьдеся́тницы, чте́тся Апо́столъ въ Дѣя́ніяхъ, зача́ло 49. Аллилу́ія, гла́съ 1: Вознесо́хъ избра́ннаго отъ люде́й Мои́хъ. Сти́хъ: Го́споди, си́лою Твое́ю возвесели́тся ца́рь и о спасе́ніи Твое́мъ возра́дуется зѣло́. Ева́нгеліе Іоа́нна, зача́ло 35, отъ полу́. Прича́стенъ: Во всю́ зе́млю [изы́де вѣща́ніе и́хъ, и въ концы́ вселе́нныя глаго́лы и́хъ].

Зри: Вѣ́стно бу́ди, а́ще случи́тся па́мять свята́го царя́ Константи́на въ четверто́къ Вознесе́нія или́ въ недѣ́лю 7-ю святы́хъ оте́цъ, слу́жбу его́ пѣ́ти, я́коже Іоа́нну Богосло́ву, по тѣ́мже глава́мъ.

Источникъ: Мине́я пра́здничная, имену́емая Анѳоло́гіонъ, содержа́щая слу́жбы Госпо́дскимъ и Богоро́дичнымъ пра́здникомъ и святы́мъ избра́ннымъ. — М.: Сѵнода́льная Тѵпогра́фія, 1901. — Л. 118 об. – 125 об.

/ Къ оглавленію раздѣла /


Наверхъ / Къ титульной страницѣ

0