Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - пятница, 15 декабря 2017 г. Сейчасъ на порталѣ посѣтителей - 7.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Ма́ія въ 21-й де́нь.
Слу́жба срѣ́тенію чудотво́рныя ико́ны Пресвяты́я Богоро́дицы, я́же нарица́ется Влади́мірская.

ВЕЧЕРЪ,
Блаже́нъ му́жъ. На Го́споди воззва́хъ: стихи́ры на 8, гла́съ 4. Подо́бенъ: Яко до́бля.

Твои́мъ Рождество́мъ* а́дова крѣ́пость разори́ся,* и все́ человѣ́чество спасе́но бы́сть.* Ны́нѣ же Твои́ми моли́твами* враго́въ на́шихъ шата́ніе низложи́,* и крѣ́пость и́хъ сокруши́,* и лю́демъ Твои́мъ побѣ́ды на враги́ да́руй,* да посра́мятся вси́,* явля́ющіи рабо́мъ Твои́мъ зла́я.

Богоро́дице Влады́чице, держа́вная Помо́щнице,* укрѣпи́ сла́вящаго Тя́ Импера́тора на враги́,* да я́коже дре́вле спасла́ еси́ Ца́рскій гра́дъ отъ нахожде́нія пога́ныхъ,* та́ко и ны́нѣ спаси́ страну́ Россíйскую отъ нахожде́нія вра́жія,* отъ междоусо́бныя ра́ти, отъ гла́да же и тру́са,* Дѣ́во неискусобра́чная.* Сего́ ра́ди Тя́ сла́витъ страна́ Россíйская,* человѣ́комъ Помо́щницу.

Ны́нѣ страна́ Россíйская* о Тебѣ́ хва́лится и весели́тся,* имѣ́ющи Тя́ Засту́пницу непосты́дную* и стѣ́ну неруши́му,* гра́ду на́шему непоколеби́мое основа́ніе,* стра́жа неусы́пна земли́ Россíйскія.* Не преста́й ны́нѣ Твои́ми, Госпоже́, моли́твами* избавля́ти Тво́й гра́дъ и лю́ди отъ всѣ́хъ бѣ́дъ.

Тебѣ́ припа́даютъ, Госпоже́,* святи́телей сосло́віе и собо́ри,* совокупле́ніе всѣ́хъ,* цари́ же и кня́зи,* и ве́сь наро́дъ, уми́льно моля́щеся,* Тебѣ́ ны́нѣ кла́няющеся,* и любе́зно цѣлу́юще Тво́й о́бразъ,* и моля́щеся, глаго́лютъ:* чту́щій Тя́ гра́дъ всегда́ спаса́й отъ всѣ́хъ бѣ́дъ.

Ины стихи́ры, гла́съ 8. Подо́бенъ: О, пресла́внаго чудесе́!

О, пресла́внаго чудесе́!* Иже Невмѣсти́мый небесы́,* и а́нгелы Сла́вимый,* и отъ серафи́мовъ Пое́мый,* на зе́млю соше́дъ, въ Твою́ утро́бу вмѣсти́ся* и ключа́ дѣ́вства не разруши́,* на́ше естество́, дре́вле отъ діа́вола му́чимо, изъя́тъ* и ве́сь ро́дъ человѣ́ческій свободи́,* Тебе́ же, Госпоже́, Засту́пницу на́мъ дарова́.* Тѣ́мъ не преста́й сохраня́ти* и спаса́ти ду́ши на́ша, я́ко Милосе́рда.

О, пресла́внаго чудесе́!* Се́ заступле́ніе пріи́де,* супротивле́ніе низложи́ся.* Гра́дъ на́шъ спаси́,* враги́ на́ша прожени́* и на́съ, рабо́въ Твои́хъ, Твое́ю ми́лостію возвесели́.* О, Бо́жія Сло́ва селе́ніе!* Ро́дъ человѣ́ческій, чту́щій Тя́,* всегда́ спаса́й отъ всѣ́хъ бѣ́дъ.

Пода́ждь утѣше́ніе* Твои́мъ рабо́мъ, Чи́стая,* напа́стьми одержи́мымъ,* и ро́гъ вѣ́рныхъ вознеси́,* Богороди́тельнице Марíе,* спаси́ моли́твами Твои́ми гра́дъ Тво́й неразруши́мь,* и ва́рварская шата́нія низложи́,* и на́съ, рабо́въ Твои́хъ, Безневѣ́стная,* хва́лящихъ Тя́, спаси́.

Сла́ва, и ны́нѣ, гла́съ 8:

Пріиди́те, россíйстіи собо́ри, пріиди́те, вѣ́рныхъ совокупле́нія, въ срѣ́теніе Цари́цы Богоотрокови́цы: се́ бо гряде́тъ Цари́ца Свои́мъ о́бразомъ честны́мъ, спасти́ гра́дъ и лю́ди, отъ сопоста́тныхъ пога́нъ невоева́ны. О, чу́до ве́ліе и пресла́вное и пребо́льши ума́! Ка́ко прише́ствіемъ честна́го Ея́ о́браза сопроти́вніи побѣжда́ются и ски́петры царе́й на́шихъ утвержда́ются? Но́щь упраздни́ся, и де́нь прибли́жися. Его́же ра́ди Тебе́, вину́ спасе́нія на́шего, естество́ на́ше пріе́млетъ, и вся́ тва́рь воспѣва́етъ Ти́, зову́ши: ра́дуйся, Предста́тельнице, и Помо́щнице, и спасе́ніе ду́шъ на́шихъ.

Вхо́дъ. Проки́менъ дне́. И чте́нія три́.

Бытія́ чте́ніе. [Глава́ 28.]

Изы́де Іа́ковъ отъ студенца́ кля́твеннаго и и́де въ Харра́нь. И обрѣ́те мѣ́сто, и спа́ та́мо, за́йде бо со́лнце; и взя́тъ отъ ка́менія мѣ́ста того́, и положи́ возгла́віе себѣ́, и спа́ на мѣ́стѣ о́номъ. И со́нъ ви́дѣ: и се́ лѣ́ствица утвержде́на на земли́, eя́же глава́ досяза́ше до небе́съ, и Ангели Бо́жіи восхожда́ху и низхожда́ху по не́й. Госпо́дь же утвержда́шеся на не́й, и рече́: Азъ Бо́гъ Авраа́мовъ, отца́ твоего́, и Бо́гъ Исаа́ковъ, не бо́йся: земля́, идѣ́же ты́ спи́ши на не́й, тебѣ́ да́мъ ю́ и сѣ́мени твоему́. И бу́детъ сѣ́мя твое́, я́ко песо́къ земны́й, и распространи́тся на мо́ре, и ли́ву, и сѣ́веръ, и на восто́ки, и возблагословя́тся о тебѣ́ вся́ колѣ́на земна́я и о сѣ́мени твое́мъ. И се́ Азъ съ тобо́ю, сохраня́яй тя́ на вся́комъ пути́, а́може а́ще по́йдеши, и возвращу́ тя́ въ зе́млю сію́, я́ко не и́мамъ тебе́ оста́вити, до́ндеже сотвори́ти Ми́ вся́, ели́ка глаго́лахъ тебѣ́. И воста́ Іа́ковъ отъ сна́ своего́, и рече́: я́ко éсть Госпо́дь на мѣ́стѣ се́мъ, а́зъ же не вѣ́дѣхъ. И убоя́ся, и рече́: я́ко стра́шно мѣ́сто сіе́, нѣ́сть сіе́, но до́мъ Бо́жій, и сія́ врата́ небе́сная.

Прoро́чества Іезекíилева чте́ніе. [Глава́ 43 и 44.]

Та́ко глаго́летъ Госпо́дь: бу́детъ отъ дне́ осма́го и про́чее, сотворя́тъ іере́и на олтари́ всесожже́нія ва́шего и я́же спасе́нія ва́шего, и пріиму́ вы́, глаго́летъ Адонаи́ Госпо́дь. И обрати́ мя́ на пу́ть вра́тъ святы́хъ внѣ́шнихъ, зря́щихъ на восто́ки, и сія́ бя́ху затворе́на. И рече́ Госпо́дь ко мнѣ́: врата́ сія́ затворе́на бу́дутъ, и не отве́рзутся, и никто́же про́йдетъ сквозѣ́ и́хъ, я́ко Госпо́дь Бо́гъ Изра́илевъ про́йдетъ и́ми, и бу́дутъ затворе́на. Яко игу́менъ ся́детъ въ ни́хъ снѣ́сти хлѣ́бъ: по пути́ ела́мскихъ вра́тъ вни́детъ, и по пути́ его́ изы́детъ. И введе́ мя́ по пути́ вра́тъ святы́хъ, су́щихъ къ сѣ́веру, пря́мо хра́му, и ви́дѣхъ, и се́ испо́лнь сла́вы хра́мъ Госпо́день.

При́тчей чте́ніе. [Глава́ 9.]

Прему́дрость созда́ себѣ́ до́мъ и утверди́ столпо́въ се́дмь. Закла́ своя́ же́ртвенная, и раствори́ въ ча́ши свое́й вино́, и угото́ва свою́ трапе́зу. Посла́ своя́ рабы́, созыва́ющи съ высо́кимъ проповѣ́даніемъ на ча́шу, глаго́лющи: и́же е́сть безу́менъ, да уклони́тся ко мнѣ́. И тре́бующимъ ума́ рече́: пріиди́те, яди́те мо́й хлѣ́бъ и пíйте вино́, е́же раствори́хъ ва́мъ. Оста́вите безу́міе, и жи́ви бу́дите, и взыщи́те ра́зума, да поживете́, и испра́вите ра́зумъ въ вѣ́дѣніи. Наказу́яй злы́я, пріи́метъ себѣ́ безче́стіе, облича́яй же нечести́ваго опоро́читъ себе́. Обличе́нія бо нечести́вому — ра́ны ему́. Не облича́й злы́хъ, да не возненави́дятъ тебе́, облича́й прему́дра, и возлю́битъ тя́. Да́ждь прему́дрому вину́, и прему́дршій бу́детъ, сказу́й пра́ведному, и приложи́тъ пріима́ти. Нача́ло прему́дрости — стра́хъ Госпо́день, и совѣ́тъ святы́хъ — ра́зумъ. Разумѣ́ти бо зако́нъ по́мысла е́сть блага́го: си́мъ бо о́бразомъ мно́гое поживе́ши вре́мя, и приложа́тся тебѣ́ лѣ́та живота́.

На литíи стихи́ры, гла́съ 2. Самогла́сны:

Яко вои́стинну дре́вняго киво́та пречестнѣ́е, егда́ Дави́дъ, собра́въ чи́ны, ликовствова́ше; ны́нѣ Твоя́, Богоро́дице, ико́на, е́йже предстоя́тъ архіере́евъ собо́ри, и съ чи́нми а́нгелъ, ца́ріе же и кня́зи, и все́ христоимени́тыхъ люде́й мно́жество досто́йно блажа́тъ Тя́, Ма́терь Бо́жію, и прославля́ютъ раболѣ́пно, и честву́ютъ, и покланя́ются, и мо́лятся Тебѣ́ по Бо́зѣ: да мíръ умири́ши въ правосла́віи, и ца́рскія ски́птры утверди́ши, и спасе́ши отъ всѣ́хъ зо́лъ Твоя́ рабы́, я́ко еди́на Благослове́нная.

Предстоя́тъ Ти́, Госпоже́ Богоро́дице, предъ Твои́мъ, Пречи́стая, о́бразомъ, архіере́евъ сосло́віе, ца́ріе и кня́зи, и вси́ лю́діе, мона́си и простíи, вѣ́дуще Тя́ вои́стинну Помо́щницу си́льну и непобѣди́му, моле́нія Тебѣ́ приноси́ти отъ всея́ души́ подвиза́ютъ, и поуща́ютъ на моли́тву къ Бо́гу, тре́бующе Твоея́ по́мощи, да простре́ши богоно́сныя Твоя́ ру́ки и умо́лиши за мíръ. Вонми́ и услы́ши, Влады́чице, и пода́ждь утѣше́ніе рабо́мъ Твои́мъ, до́ндеже не одолѣ́ютъ ны́ грѣхи́ на́ша тя́жкія и лю́тыя: Твоея́ бо всегда́ тре́буемъ вси́ по́мощи.

Гла́съ 8:

Пе́рвѣе написа́вшейся Твое́й ико́нѣ ева́нгельскихъ та́инъ благовѣ́стникомъ и къ Тебѣ́, Цари́цѣ, принесе́ннѣй, да усво́иши ту́ и си́льну содѣ́лаеши спасти́ честву́ющія Тя́. И пора́довалася еси́, я́ко су́щи Ми́лостива, спасе́нія на́шего Содѣ́тельница, я́ко уста́ и гла́съ ико́нѣ бы́вше, я́коже и Бо́га внегда́ зачина́ющи во чре́вѣ, пѣ́снь воспѣ́ла еси́: Се́ отъ ны́нѣ ублажа́тъ Мя́ вси́ ро́ди. И, на ту́ зря́щи, глаго́лала еси́ со вла́стію: Съ си́мъ о́бразомъ благода́ть Моя́ и си́ла. И мы́ и́стинно вѣ́руемъ, я́ко се́ рекла́ еси́, Госпоже́: си́мъ о́бразомъ съ на́ми еси́. Тѣ́мъ благоговѣ́йно предстоя́ще, покланя́емся Тебѣ́, раби́ Твои́: посѣти́ ны́ Твои́ми Ма́терними щедро́тами.

Гла́съ 7:

Гора́ еси́ вели́кая и пресла́вная, па́че горы́ Сина́йскія, Богоро́дице. Она́ бо, не терпя́ше сни́тія сла́вы Бо́жія, во о́бразѣхъ и сѣ́нехъ, огне́мъ возгара́шеся, и гро́ми и мо́лніи та́мо бы́ша. Ты́ же ве́сь Боже́ственный о́гнь су́щь, Бо́жіе Сло́во во чре́вѣ Твое́мъ неопа́льно носи́ла еси́, и отъ сосе́цъ Твои́хъ млеко́мъ пита́ла еси́ ма́ніемъ Нося́щаго вся́. И Ма́тернее дерзнове́ніе къ Нему́ иму́щи, помози́, Влады́чице, вѣ́рно пра́зднующимъ Тво́й честны́й пра́здникъ, и не забу́ди, ми́лостивно посѣща́ющи, прія́ла бо еси́ отъ Бо́га да́ръ стро́ити и покрыва́ти христоимени́тое ста́до, рабы́ Твоя́.

Сла́ва, и ны́нѣ, гла́съ 6:

Тебѣ́ вси́ ро́ди человѣ́честіи хва́льныя да́ры прино́сятъ, Влады́чице, и мо́лятся я́ко Цари́цѣ и Ма́тери Бо́жіи. Проро́цы Тя́ прему́дро проповѣ́даша, леви́ти благослови́ша, апо́столи и му́ченицы исповѣ́даша, ца́ріе и кня́зи покланя́ются, архіере́е проповѣ́даютъ, мона́си и простíи благоговѣ́ютъ, бога́тіи и убо́зіи, сироты́ и вдо́вы, и вся́къ во́зрастъ, и вся́ко преспѣ́яніе, ста́рческое и младе́нческое, подъ кро́въ Тво́й держа́вный съ вѣ́рою прибѣга́емъ: покры́й и соблюди́, Госпоже́, моли́твами Твои́ми и спаси́ отъ бѣ́дъ ду́ши на́ша.

На стихо́внѣ стихи́ры, гла́съ 8. Подо́бенъ: Что́ ва́съ нарече́мъ.

Что́ Тя́ нарече́мъ, Богоро́дице Влады́чице?* Ко́рень ли Іессе́овъ?* Отъ Тебе́ бо на́мъ Христо́съ, я́ко цвѣ́тъ, изы́де.* Ма́нну ли, вѣ́рныхъ сердца́ услажда́ющую Твои́мъ Рождество́мъ?* Руно́ Гедео́ново?* На Тя́ бо Христо́съ, я́ко роса́, сни́де,* и Тя́ Засту́пницу на́мъ показа́.* Его́же моли́ спасти́ ду́ши на́ша.

Сти́хъ: Слы́ши, Дщи́, и ви́ждь,* и приклони́ у́хо Твое́.

Да вси́ похва́лимъ, вѣ́рніи, таково́ на́мъ заступле́ніе да́вшую непосты́дное,* и непребори́мое на враги́ одолѣ́ніе побѣ́дное,* и на́мъ всѣ́мъ спасе́ніе,* и гра́ду на́шему стѣ́ну и покро́въ,* и основа́ніе непоколеби́мое,* и Импера́тору на́шему на сопоста́ты посо́біе,* и непобѣди́мую побѣ́ду.

Сти́хъ: Кля́тся Госпо́дь Дави́ду и́стиною* и не отве́ржется ея́.

Досто́йно Тя́ блажи́тъ человѣ́ческій ро́дъ, Чи́стая,* я́ко спаса́еши чту́щія Тя́ отъ всѣ́хъ бѣ́дъ.* Ты́ бо еси́, Госпоже́ Дѣ́во Чи́стая,* засту́пница непосты́дная Твои́мъ рабо́мъ показа́лася еси́,* и моли́твенница те́пла къ Бо́гу* отъ находя́щихъ скорбе́й.* Тобо́ю ва́рварская шата́нія разруша́ются* и стрѣ́лы вра́жія упражня́ются,* и раби́ Твои́, отъ одержа́щихъ бѣ́дъ изба́вльшеся,* Тя́, Богома́ти, пѣ́сньми ублажа́емъ.

Сла́ва, и ны́нѣ, гла́съ то́йже. Самогла́сенъ:

Да ра́дуются россíйстіи собо́ри, да ликовству́етъ естество́, я́ко Твоего́, Чи́стая, честна́го о́браза прише́ствіемъ гра́дъ на́шъ спаса́ется, раби́ Твои́, отъ одержа́щія ну́жды изба́вльшеся, Тебѣ́, Чи́стая, взыва́ютъ: ра́дуйся, до́брыхъ вино́вная, и засту́пница непосты́дная, и спасе́ніе ду́шъ на́шихъ.

Тропа́рь, гла́съ 4:

Дне́сь свѣ́тло красу́ется сла́внѣйшій гра́дъ Москва́, я́ко зарю́ со́лнечную, воспріе́мши, Влады́чице, чудотво́рную Твою́ ико́ну, къ не́йже ны́нѣ мы́ притека́юще и моля́щеся Тебѣ́, взыва́емъ си́це: о пречу́дная Влады́чице Богоро́дице! Моли́ся изъ Тебе́ воплоще́нному Христу́ Бо́гу на́шему, да изба́витъ гра́дъ се́й и вся́ гра́ды и страны́ христіа́нскія невреди́мы отъ всѣ́хъ навѣ́тъ вра́жіихъ и спасе́тъ ду́ши на́ша, я́ко Милосе́рдъ.


НА УТРЕНИ,
По 1-й стихоло́гіи сѣда́ленъ, гла́съ 4. Подо́бенъ: Удиви́ся Іо́сифъ.

Боже́ственными заря́ми просвѣти́ пою́щія Тя́, и умы́ утверди́, непоро́чная Дѣ́во, крѣ́пкая Засту́пнице мíра всего́. Тѣ́мже торжеству́емъ вси́, любо́вію пою́ще Тя́ и прише́ствіе Твоего́ о́браза сла́вяще: не преста́й, Дѣ́во, моли́твами Твои́ми спаса́ющи рабы́ Твоя́ отъ вся́кія бѣды́, еди́на Благослове́нная.

Сла́ва, и ны́нѣ, богоро́диченъ:

Невѣ́сто неискусобра́чная, прему́дрости село́ показа́ся утро́ба Твоя́ Бо́га Сло́ва: Ты́ бо еди́на, Ма́ти Бо́жія, благи́хъ хода́таица яви́вшися, вся́кихъ страсте́й изба́ви рабы́ Твоя́, непреста́нно воспѣва́ющія сла́ву Твою́.

По 2-й стихоло́гіи сѣда́ленъ, гла́съ 3. Подо́бенъ: Красотѣ́ дѣ́вства.

Яко звѣзда́ многосвѣ́тлая, взы́де отъ восто́ка къ за́паду Тво́й о́бразъ, Богома́ти, озари́ ско́рби тмо́ю одержи́мыхъ, и преще́нія вра́гъ изба́ви, и вся́ тѣ́хъ сѣ́ти разруши́въ, яви́ся предста́тельнице крѣ́пкая, ору́жіе непобѣди́мое на враги́ мíру всему́: изъ Тебе́ бо всѣ́хъ Влады́ка пло́ть пріи́мъ, вся́ человѣ́ки обожи́.

Сла́ва, и ны́нѣ, то́йже.

По поліеле́и припѣ́въ:

Досто́йно е́сть велича́ти Тя́, Богоро́дице, честнѣ́йшую херуви́мъ и сла́внѣйшую безъ сравне́нія серафи́мъ.

Псало́мъ избра́нный: Бо́же, су́дъ Тво́й царе́ви да́ждь...

Та́же сѣда́ленъ, гла́съ 1:

Блаже́нна еси́ Ты́, Богоро́дице Чи́стая, вели́чествія Твоя́ кто́ воспѣ́ти мо́жетъ? Еже чу́до стра́шно и чу́до ве́ліе содѣ́явши. Твои́ми моли́твами, Богома́ти, чту́щій Тя́ гра́дъ всегда́ свобожда́ется отъ всѣ́хъ бѣ́дъ, тмы́ и меча́, пога́ныхъ плѣне́нія и вся́каго гнѣ́ва. Тѣ́мже мы́, зря́ще честно́е о́браза Твоего́ прише́ствіе, хва́лимъ, я́ко Цари́цу, воспѣва́юще, вѣ́рніи, словесы́ Тя́, Чи́стая, блажа́ще, глаго́лемъ: Богоро́дице чи́стая, моли́ Воплоще́ннаго изъ Тебе́ спасти́ся душа́мъ на́шимъ.

Сла́ва, и ны́нѣ, то́йже.


Степе́нна, 1-й антифо́нъ 4-го гла́са. Проки́менъ: Помяну́ и́мя Твое́* во вся́комъ ро́дѣ и ро́дѣ. Сти́хъ: Слы́ши, Дщи́, и ви́ждь, и приклони́ у́хо Твое́. Вся́кое дыха́ніе... Ева́нгеліе Луки́, зача́ло 4.

По 50-мъ псалмѣ́ стихи́ра, гла́съ 2:

Гото́вися, всечестны́й гра́де Москва́, на срѣ́теніе Дѣ́вы Богома́тере: се́ бо гряде́тъ къ тебѣ́ свѣ́тлое вели́кое со́лнце отъ вра́тъ затворе́нныхъ. Тма́ у́бо ско́рби твоея́ отгоня́ется, свѣ́тъ же твоего́ весе́лія исполня́ется, бу́ря сопроти́вныхъ вѣ́тровъ уставля́ется, му́жіе и свяще́нницы въ печа́лехъ сла́дкое утѣше́ніе пріе́млютъ, Цари́цѣ еди́ной покланя́ются, моля́щеся, глаго́лютъ: Пречи́стая Дѣ́во, мольба́ми Твои́ми изба́ви рабы́ Твоя́ отъ вся́кія бѣды́ и печа́ли.

Кано́нъ, гла́съ 4.

Пѣ́снь 1.

Ирмо́съ: Отве́рзу уста́ моя́ и напо́лнятся Ду́ха, и сло́во отры́гну Цари́цѣ Ма́тери, и явлю́ся, свѣ́тло торжеству́я, и воспою́, ра́дуяся, Тоя́ чудеса́.

Просвѣти́, Влады́чице, ду́ши на́ша заре́ю Боже́ственною, па́че ума́ благода́тію Твое́ю, незави́стный да́ръ пода́ждь ми́ воспѣ́ти Тя́, я́ко Помо́щницу человѣ́ческому существу́, Препѣ́тая, вѣ́рное заступле́ніе, на враги́ побѣ́ду Правосла́вному Импера́тору на́шему.

Пріиди́те, собери́теся, россíйстіи собо́ри, въ пречестны́й хра́мъ Всенепоро́чныя Влады́чицы и возопíйте, уми́льно моля́щеся, къ честно́му о́бразу взира́юще: Богоро́дице безневѣ́стная, хва́лящія Тя́ спаси́.

Тво́й, Богома́ти, всечестны́й о́бразъ богогла́сный Ева́нгелія Христо́ва списа́тель, пребоже́ственный Лука́, написа́въ, Творца́ всѣ́хъ на Твои́хъ честны́хъ рука́хъ вообрази́. Къ нему́же притека́ющія напа́сти и печа́ли избавля́еши, и вся́ покрыва́еши Твое́ю ми́лостію.

Хра́мъ прекра́сный, Содѣ́тель всѣ́хъ еди́ну Тя́ обрѣ́тъ, въ Тя́ всели́ся и человѣ́ки обожи́. Къ Нему́же за ны́, Богоро́дице, моли́ся, спасти́ ны отъ пога́ныхъ плѣне́нія, и вся́кія ины́я ско́рби, находя́щія на ны́, да Твоего́ дне́сь о́браза срѣ́теніе всече́стно пра́зднуемъ.

Пѣ́снь 3.

Ирмо́съ: Твоя́ пѣсносло́вцы, Богоро́дице, живы́й и незави́стный исто́чниче, ли́къ себѣ́ совоку́пльшія, духо́вно утверди́, въ боже́ственнѣй Твое́й сла́вѣ, вѣнце́въ сла́вы сподо́би.

Все́ помышле́ніе отве́ргше, богому́дріи, пріиди́те въ срѣ́теніе прекра́сныя зари́, держа́щія пресвѣ́тлую лучу́, вся́ просвѣща́ющую и ми́лостію ве́сь мíръ обога́щшую.

Твою́, Богома́ти, всечестну́ю и чудотво́рную ико́ну россíйстіи кня́зи стяжа́вше, я́ко заступле́ніе крѣ́пко и стѣ́ну неруши́му, мо́лятся Ти́, на враги́ побѣ́ду Правовѣ́рному дарова́ти Импера́тору на́шему.

Облакъ свѣтоза́рный показа́ся, росо́ю благода́ти вся́ омыва́ющи тѣле́сныя скве́рны и ду́ши просвѣща́ющи, еди́на Всепѣ́тая.

Дре́во многопло́дно яви́лася еси́, пи́щею неги́блющею вся́ насыща́ющи, ду́ши же веселя́щи, Богоневѣ́сто Чи́стая, добродѣя́нія всѣ́мъ источи́ и отъ скорбе́й ну́ждныхъ спаси́.

Сѣда́ленъ, гла́съ 4. Подо́бенъ: Удиви́ся Іо́сифъ.

Наро́ди боголюби́віи, пріиди́те въ срѣ́теніе: се́ бо прихо́дитъ Дѣ́ва, всѣ́хъ проро́ковъ превы́шши, честны́мъ Свои́мъ о́бразомъ, Жизнода́теля мíру на рука́хъ имѣ́ющи, гра́дъ Сво́й сохраня́ти стра́ждущій, ва́рварскую де́рзость низложи́ти, вообрази́тися всѣ́мъ храни́тельница тве́рда, держа́ва и огражде́ніе вѣ́рно моля́щимся.

Сла́ва, и ны́нѣ, то́йже.

Пѣ́снь 4.

Ирмо́съ: Неизслѣ́дный Бо́жій совѣ́тъ, е́же отъ Дѣ́вы воплоще́нія Тебе́, Вы́шняго, проро́къ Авваку́мъ усмотря́я, зовя́ше: сла́ва си́лѣ Твое́й, Го́споди.

Го́ру преве́лію, ю́же Даніи́лъ ви́дѣ, отъ нея́же ка́мень отсѣче́ся безъ руки́ и вся́ собла́зны истни́, вѣ́рныя же просвѣти́, и́стинное свѣтоза́рное со́лнце показа́, луча́ми просвѣща́ющи, Богоро́дице Приснодѣ́во.

Вооружа́ются на лю́ди Твоя́, Чи́стая Богоро́дице, сы́нове Ага́рины, злы́й совѣ́тъ творя́ще, гра́ды разоря́юще, вѣ́рныя же погубля́юще, но Ты́, Всепѣ́тая, Твое́ю ми́лостію вся́ низложи́, исма́ильтяны враги́ покаря́ющи Благовѣ́рному Импера́тору на́шему.

Не́бо одушевле́но, еди́на Богома́ти, Свѣ́тъ ве́лій пріе́мши, вся́ просвѣща́ющи, тму́ держа́щихъ бѣ́дъ разжени́ и на́съ вы́шняго прича́стія сподо́би.

Дави́дъ предъ киво́томъ ликовству́етъ, леви́ти же воспѣва́ютъ; па́че же предъ Тобо́ю, Богороди́тельнице Чи́стая, Россíя хвала́ми я́ко Цари́цу воспѣва́етъ, гла́сы моле́бными прилѣ́жно Ти́ вопію́щи: ра́дуйся, Засту́пнице гра́да на́шего.

Пѣ́снь 5.

Ирмо́съ: Ужасо́шася вся́ческая о Боже́ственнѣй сла́вѣ Твое́й, Ты́ бо, Неискусобра́чная Дѣ́во, имѣ́ла еси́ во утро́бѣ надъ всѣ́ми Бо́га и родила́ еси́ Безлѣ́тнаго Сы́на, всѣ́мъ воспѣва́ющимъ Тя́ ми́ръ подава́ющая.

Тебе́, Богома́ти, вели́кій во проро́цѣхъ Иса́ія прови́дѣ ду́хомъ, Угль имѣ́ющу во чре́вѣ, вѣ́рныя просвѣща́ющь, и собла́зны вся́ пожига́ющь, спаса́я ро́дъ человѣ́чь.

Же́злъ Ааро́новъ прозябла́ еси́ и зло́бный ко́рень исто́ргнула еси́, Дѣ́во Богоневѣ́стная, Жизнода́теля ро́ждши мíру, Его́же моли́ сему́ гра́ду спасти́ся отъ мно́гихъ напа́стей.

Ны́нѣ у́бо приступи́те съ весе́ліемъ, богоизбра́нное ста́до, россíйстіи собо́ри, ко Всечестнѣ́й Бо́жіи Ма́тери, и честны́й Ея́ о́бразъ любе́зно пріими́те: се́ бо благода́ть неисчерпа́емая, во́ды точа́щи Боже́ственныя неоску́дно, Юже, вѣ́рніи, почти́мъ, и честно́му о́бразу Ея́ поклони́мся.

Отъ ко́рене Іессе́ева дре́во возрасте́ всѣ́мъ живо́тное, Пло́дъ у́бо прозябла́ еси́ во утро́бѣ Твое́й, Дѣ́во Чи́стая, вся́ лю́ди насыща́ющи Твое́ю ми́лостію.

Пѣ́снь 6.

Ирмо́съ: Боже́ственное сіе́ и всечестно́е соверша́юще пра́зднество, богому́дріи, Богома́тере, пріиди́те рука́ми воспле́щимъ, отъ Нея́ ро́ждшагося Бо́га сла́вимъ.

Отъ Тебе́, Богома́ти, истече́ пото́къ сла́дкій, вся́ напая́я лю́ди, ду́шъ измыва́я скве́рны; Богоро́дице Влады́чице, спаси́ всѣ́хъ, покланя́ющихся вѣ́рно честно́му о́бразу Твоему́.

Вси́ у́бо, совоку́пльшеся вку́пѣ, воспое́мъ Чи́стую Дѣ́ву, богоизбра́нную лѣ́ствицу Іа́ковлю, Гедео́ново же руно́, ра́дости хода́таицу, крѣ́пость и похвалу́ спаса́емыхъ, Богороди́тельницу Чи́стую.

Се́ ны́нѣ весе́ліе приближа́ется, ско́рбь же потребля́ется, вѣ́рніи спаса́ются, я́ко отъ исто́чника ра́дость почерпа́юще, вы́ну хвала́ми воспѣва́ютъ: ра́дуйся, Чи́стая Влады́чице, спасе́нія на́шего нача́токъ и всѣ́хъ вѣ́рныхъ стѣна́ и похвала́.

Пода́ждь на́мъ по́мощь мольба́ми Твои́ми, Пречи́стая Богоро́дице, ско́рби у́бо нахо́дятъ на ны́, и печа́ли умножа́ются, врази́ ополча́ются, но Ты́, Пречи́стая, предста́вши, изба́ви, враго́въ на́шихъ шата́ніе низложи́, на враги́ побѣ́ду да́руй, да посра́мятся вси́, явля́ющіи рабо́мъ Твои́мъ зла́я.

Конда́къ, гла́съ 8. Подо́бенъ: Взбра́нной.

Взбра́нной Воево́дѣ побѣди́тельная, я́ко изба́вльшеся отъ злы́хъ прише́ствіемъ Твоего́ честна́го о́браза, Влады́чице Богоро́дице, свѣ́тло сотворя́емъ празднество́ срѣ́тенія Твоего́, и обы́чно зове́мъ Ти́: ра́дуйся, Невѣ́сто неневѣ́стная.

Икосъ:

Ангелъ предста́тель съ небесе́ по́сланъ бы́сть рещи́ Богоро́дицѣ: ра́дуйся! И, со безпло́тнымъ гла́сомъ воплоща́ема Тя́ зря́, Го́споди, ужаса́шеся, и стоя́ше, зовы́й къ Не́й такова́я: Ра́дуйся, Еюже ра́дость возсія́етъ; ра́дуйся, Еюже кля́тва исче́знетъ. Ра́дуйся, па́дшаго Адама воззва́ніе; ра́дуйся, сле́зъ Евиныхъ избавле́ніе. Ра́дуйся, высото́, неудобовосходи́мая человѣ́ческими по́мыслы; ра́дуйся глубино́, неудобозри́мая и а́нгельскима очи́ма. Ра́дуйся, я́ко еси́ Царе́во сѣда́лище; ра́дуйся, я́ко но́сиши Нося́щаго вся́. Ра́дуйся, звѣздо́, явля́ющая Со́лнце; ра́дуйся, утро́бо Боже́ственнаго воплоще́нія. Ра́дуйся, Еюже обновля́ется тва́рь; ра́дуйся, Еюже покланя́емся Творцу́. Ра́дуйся, Невѣ́сто неневѣ́стная.

Пѣ́снь 7.

Ирмо́съ: Не послужи́ша тва́ри богому́дріи, па́че Созда́вшаго, но, о́гненное преще́ніе му́жески попра́вше, ра́довахуся, пою́ще: препѣ́тый отце́въ Госпо́дь и Бо́гъ, благослове́нъ еси́.

Яко порфи́рою и ви́ссомъ, червле́ною хлами́дою, Дѣ́во Богоро́дице Влады́чице, гра́дъ Тво́й Тобо́ю одѣ́явся, Христа́ велича́етъ, и прише́ствіе честна́го Твоего́ о́браза сла́витъ, я́вльшася па́че лу́чь со́лнечныхъ, и немра́чнымъ свѣ́томъ просвѣща́юща велегла́сно хва́ляшія Тя́.

Скрижа́ли, богопи́санныя пе́рстомъ Ду́ха, въ я́рости Мои́сей сокруши́; но въ Тебѣ́, Чи́стая, пресла́вный Творе́цъ всели́вся, невре́дну Тя́ сохрани́. Ему́же пое́мъ: оте́цъ на́шихъ Бо́же, благослове́нъ еси́.

Пріими́ Твои́хъ ра́бъ мольбы́, Пречи́стая Дѣ́во Богоро́дице, непостоя́нную бу́рю утиши́ моли́твами Твои́ми и совѣ́ты проти́вныхъ враго́въ разжени́, напа́дающихъ на ста́до Твое́, Всенепоро́чная Влады́чице.

Тебе́ еди́ну Помо́щницу ро́ду человѣ́ческому, Богоро́дице Марíе, Зижди́тель всѣ́хъ рождество́мъ Свои́мъ назна́мена, и проро́цы прообрази́ша: о́въ Тя́ две́рь, и́нъ же Тя́ ло́жницу Бо́жію; мы́ же Тя́ воспѣва́емъ Роди́тельницу Бо́жію, и Хода́таицу къ Бо́гу, и Засту́пницу отъ всѣ́хъ зо́лъ, находя́щихъ на ны́.

Пѣ́снь 8.

Ирмо́съ: Отроки благочести́выя въ пещи́ Рождество́ Богоро́дичо спасло́ е́сть, тогда́ у́бо образу́емое, ны́нѣ же дѣ́йствуемое, вселе́нную всю́ воздвиза́етъ пѣ́ти Тебѣ́: Го́спода по́йте дѣла́ и превозноси́те Его́ во вся́ вѣ́ки.

Ка́ко Тя́, Дѣ́во, по достоя́нію воспое́мъ, по́мощь тве́рдую, храни́тельницу жи́зни на́шея и хода́таицу непрело́жну къ Сы́ну Твоему́ и Бо́гу на́шему? Его́же воспѣва́емъ и превозно́симъ во вѣ́ки.

Цвѣ́те прекра́сный и воня́ пи́щная, облагоуха́еши, Богоро́дице Марíе, вся́, и спаса́еши, и отъ неду́гъ исцѣля́еши, бѣ́сы прогоня́еши. Тѣ́мже Ти́ вопіе́мъ: ра́дуйся, Помо́щнице всѣ́мъ моля́щимся вѣ́рнымъ.

Сто́лпъ я́вльшися, Богома́ти, нахожде́нія проти́вныхъ отгоня́: Тя́ бо чту́щимъ се́рдцемъ те́плымъ яви́лася еси́ стѣна́, и огражде́ніе, и спаси́тельное прибѣ́жище.

Дави́дски воспѣва́емъ Ти́ пѣ́снь, го́ру Бо́жію Тя́ имену́юще, Пречи́стая Дѣ́во: Исто́чника бо су́щимъ приснотеку́щаго источи́ла еси́. Его́же пое́мъ и превозно́симъ во вѣ́ки.

Пѣ́снь 9.

Ирмо́съ: Вся́къ земноро́дный да взыгра́ется, Ду́хомъ просвѣща́емь, да торжеству́етъ же безпло́тныхъ умо́въ естество́, почита́ющее свяще́нное торжество́ Богома́тере, и да вопіе́тъ: ра́дуйся, Всеблаже́нная Богоро́дице, Чи́стая Приснодѣ́во.

Ра́дости хода́таице, возвесели́ на́шъ смы́слъ вопи́ти Тебѣ́, Богоро́дице Чи́стая: ра́дуйся, храни́тельнице на́ша, держа́ва и огражде́ніе, и спаси́тельное прибѣ́жище.

Да восхва́лятъ согла́сно Тя́ не́бо и земля́, я́ко Жизнода́теля мíру ро́ждши: ра́дуйся, ти́хое приста́нище, живо́тныя воды́ исто́чниче неисчерпа́емый, Влады́чице.

Собра́вшеся дне́сь, лю́діе, во срѣ́теніе Пречи́стыя Бо́жія Ма́тере, Яже виногра́да мы́сленнаго гре́знъ нося́щи, вино́ источа́ющь всегда́, и весе́лія всѣ́хъ исполня́ющь, я́ко Богоро́дицу по до́лгу сла́вимъ.

Боже́ственная рѣка́ во́дъ живо́тныхъ, вся́ удо́лія напоя́ющи, на́ша собла́зны, Богома́ти, погрузи́ и до конца́ потреби́.

Свѣти́ленъ. Подо́бенъ: Посѣти́лъ ны́.

Да почти́тся дне́сь Богома́ти, Зижди́теля ро́ждшая, ра́йскихъ двере́й отверзе́ніе и всего́ мíра очище́ніе, побѣ́ду да́вшая Христолюби́вому Импера́тору; о Се́й бо проро́цы глаго́лаша, То́й поклони́мся.

Сла́ва, и ны́нѣ:

Пресвѣ́тлая дне́сь ми́лостивная свѣ́тлость, Бо́жія благода́ть, вся́ ра́достно одождя́етъ небе́сными ту́чами, на стези́ сла́дкія направля́ющи, Богоро́дице Влады́чице, всѣ́хъ, позна́вшихъ Тя́ земны́хъ, Принодѣ́во, ны́нѣ бо вся́ земля́ Россíйская ра́дуется, вѣ́рою Тя́ сла́вящи.

На хвали́техъ стихи́ры, на 4, гла́съ 4. Подо́бенъ: Яко до́бля.

Наста́вницу Тя́ заблу́ждшимъ,* и приста́нище спаси́тельное,* въ пучи́нѣ, Влады́чице, и бу́ри,* и во искуше́ніихъ, и въ печа́лехъ,* Христо́съ Тя́ всѣ́мъ показа́,* Сы́нъ Тво́й и Бо́гъ на́шъ,* вѣ́рно приходя́щимъ къ Тебѣ́.* Его́же моли́,* отъ злы́хъ бѣ́дъ изба́витися* вѣ́дущимъ Богоро́дицу Тя́ вои́стинну. [Два́жды.]

Тлѣ́ніе потреби́ла еси́* и болѣ́знь, Всепѣ́тая, дре́внюю всю́* Рождество́мъ Твои́мъ:* Живо́тъ бо мíрови ро́ждши,* и сме́рть разруши́вши,* болѣ́зни, Блага́я, исцѣля́еши,* вѣ́рно о́браза Твоего́ чудеса́ воспѣва́ющихъ,* и любо́вію кла́няющихся,* и чту́щихъ Тя́, Святу́ю и честнѣ́йшую Наста́вницу.

Яко исто́чникъ Тя́, Препѣ́тая,* живота́ и благода́ти,* источа́ющій чудеса́* и цѣльбу́ страсте́й душе́вныхъ и тѣле́сныхъ,* я́ко быстрину́ оставле́нія,* ми́лости щедро́тъ неисчерпа́емое мо́ре ви́дяще,* Тебѣ́ припа́даемъ, вси́ оскорбля́еміи ны́нѣ,* прося́ще вси́ разрѣше́нія* бу́дущего муче́нія.

Сла́ва, и ны́нѣ, гла́съ 8:

Иже на херуви́мѣхъ ѣ́здяй и пѣва́емый отъ серафи́мъ, сше́лъ еси́ съ небесе́ проро́чески, Бла́же, и всели́лся еси́ во утро́бу чи́стыя Богоотрокови́цы, Юже а́нгели воспѣ́ша та́йно: ра́дуйся, ра́достная Дѣ́во, необъя́тнаго я́ко Бо́га во чре́вѣ Твое́мъ пріе́мши па́че сло́ва, отъ невѣ́рія въ вѣ́ру мíръ преводя́ща. Сла́ва Тебѣ́, Христе́, еди́не Ми́лостиве и Человѣколю́бче!

Славосло́віе вели́кое. И отпу́стъ.



НА ЛИТУРГІИ,
Блаже́нны, отъ кано́на пѣ́снь 3-я и 6-я. [И про́чая] слу́жба вся́ Богоро́дицы:

[Проки́менъ, гла́съ 3, пѣ́снь Богоро́дицы: Вели́читъ душа́ Моя́ Го́спода, и возра́довася ду́хъ Мо́й о Бо́зѣ, Спа́сѣ Мое́мъ. Сти́хъ: Яко призрѣ́ на смире́ніе рабы́ Своея́, се́ бо отны́нѣ ублажа́тъ Мя́ вси́ ро́ди. Апо́столъ къ Филипписíемъ, зача́ло 240. Аллилу́ія, гла́съ 8: Слы́ши Дщи́ и ви́ждь, и приклони́ у́хо Твое́. Сти́хъ: Лицу́ Твоему́ помо́лятся бога́тіи лю́дстіи. Ева́нгеліе Луки́, зача́ло 54. Прича́стенъ: Ча́шу спасе́нія пріиму́, и и́мя Госпо́дне призову́.]

Источникъ: Минíа, мѣ́сяцъ Ма́ій. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 168 – 176.

/ Къ оглавленію раздѣла /


Наверхъ / Къ титульной страницѣ

0