Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - пятница, 15 декабря 2017 г. Сейчасъ на порталѣ посѣтителей - 7.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Ма́ія въ 20-й де́нь.
Свята́го му́ченика Ѳалале́я.

[ВЕЧЕРЪ,]
Стихи́ры му́ченика, гла́съ 4. Подо́бенъ: Яко до́бля.

Вообража́лъ еси́ страда́ніе* Влады́ки тва́ри,* на дре́во, сла́вне, воздви́женъ* и въ ре́бра растерза́емь* мучи́телей суровство́мъ,* и облича́еши тѣ́хъ растерза́емую мы́сль,* и́дольскую же укоря́я ле́сть* и проявле́нно благоче́стіе укрѣпля́я,* великому́чениче Ѳалале́е.

Повелѣ́ніи мучи́теля* глубинѣ́ преда́лся еси́ морстѣ́й,* пребыва́еши же Боже́ственною благода́тію* неистопле́нъ, прему́дре,* то́ки же кро́вными* фарао́на мы́сленного* и сего́ во́инство потопи́лъ еси́* и коне́чнѣй, богому́дре, поги́бели пре́далъ еси́,* вельми́ отъ Христа́ укрѣпля́емь.

Стихи́ры Богоро́дицы, гла́съ и подо́бенъ то́йже:

Осужде́нія изба́ви,* Пресвята́я Богоневѣ́сто,* и лю́тыхъ прегрѣше́ній смире́нную мою́ ду́шу,* и сме́рти измѣни́ моли́твами Твои́ми,* и да́руй оправда́ніе получи́ти* въ де́нь испыта́нія,* е́же получи́ша святы́хъ собо́ри,* покая́ніемъ очище́на мя́ пре́жде конца́ покажи́* и сле́зными излія́ніи.

Ту́чами Ду́ха Пресвята́го, Пречи́стая,* мою́ мы́сль ороси́,* Яже ка́плю ро́ждшая, Христа́,* неизче́тно безмѣ́рная беззако́нія человѣ́ковъ* щедро́тами измы́вшую;* изсуши́ исто́чникъ страсте́й мои́хъ* и пото́ка мя́ сподо́би* пи́щи живы́я при́сно* моли́твами Твои́ми.

Покая́нія изря́дное* и спаси́тельное врачевство́,* Яже Бо́га ро́ждшая, Спа́са моего́,* и сле́зъ то́ки,* и часа́ по́мыслъ, гро́знаго и стра́шнаго,* и суда́ неумы́тнаго* Ты́ ми да́руй избѣжа́ти моли́твами Твои́ми, о Дѣ́во,* муче́нія тре́петнаго,* и Боже́ственную улучи́ти благода́ть.

Сла́ва, и ны́нѣ, богоро́диченъ:

Тма́ми, Пречи́стая, обѣща́хся* покая́ніе сотвори́ти* о мои́хъ согрѣше́ніихъ,* но не оставля́етъ мя́ люби́мый зо́лъ мои́хъ обы́чай.* Сего́ ра́ди Тебѣ́ вопію́* и припа́даю, моля́ся:* Ты́ мя, Влады́чице, изми́ такова́го мучи́тельства,* наставля́ющи мя́ къ лу́чшимъ* и спасе́нія бли́зъ су́щимъ.

Крестобогоро́диченъ:

Агнца и Па́стыря Тя́* на дре́вѣ я́ко ви́дѣ,* Агница ро́ждшая рыда́ше* и ма́терски Ти́ вѣща́ше:* Сы́не возжелѣ́нне* ка́ко на дре́вѣ кре́стнѣмъ* повѣ́шенъ еси́, Долготерпѣли́ве?* Ка́ко ру́цѣ и но́зѣ Твои́, Сло́ве,* пригвозди́шася отъ беззако́нныхъ,* и кро́вь Твою́ излія́лъ еси́, Влады́ко?


[НА УТРЕНИ,]
Кано́нъ, гла́съ 8.

Пѣ́снь 1.

Ирмо́съ: Во́ду проше́дъ, я́ко су́шу, и еги́петскаго зла́ избѣжа́въ, изра́ильтянинъ вопія́ше: Изба́вителю и Бо́гу на́шему пои́мъ.

Омо́ченою багряни́цею страда́льческими кровьми́ благоукра́шенно Це́рковь Христо́ва одѣ́яна, хва́лится въ страстоно́сцѣхъ и краси́тся.

Си́лу непобѣди́му отъ Бо́га пріе́мъ, страстоте́рпче, во тма́хъ враго́въ воева́лъ еси́ еди́нъ, въ по́двизѣхъ страда́нія, Ѳалале́е.

Ве́щь отве́ргъ плотску́ю и невеще́ственныхъ житіе́ на земли́ пожи́въ, Ѳалале́е, а́нгельскимъ ликостоя́ніемъ счи́слился еси́.

Богоро́диченъ: Земноро́дніи Рождество́мъ Твои́мъ отъ земли́ къ небе́снѣй высотѣ́ вознесо́хомся, вои́стинну Чи́стая Богоро́дице, и а́нгельскимъ ликостоя́ніемъ причто́хомся.

Пѣ́снь 3.

Ирмо́съ: Ты́ еси́ утвержде́ніе притека́ющихъ къ Тебѣ́, Го́споди, Ты́ еси́ свѣ́тъ омраче́нныхъ, и пое́тъ Тя́ ду́хъ мо́й.

Ма́сть пома́за главу́ твою́, сла́вне, Христо́ва, сего́ ра́ди пре́лести не прине́слъ еси́ ма́сти цѣле́ніе кро́вь твоя́ всѣ́мъ человѣ́комъ источи́ и отъ земли́ кро́вь нече́стія отмы́ла е́сть, Ѳалале́е.

Пло́ть покори́лъ еси́ тебе́ ра́ди Кре́стъ пріе́мшему, му́чениче Христо́въ, и жи́зни нетлѣ́нныя сподо́бился еси́, блаже́нне.

Паде́ся мучи́тель подъ но́зѣ твои́, сла́вне, низложе́нъ бы́въ твои́мъ терпѣ́ніемъ и сопротивле́ніемъ, Ѳалале́е.

Богоро́диченъ: Разрѣши́ Рождество́ Твое́ согрѣше́ній на́шихъ до́лги и пра́вдѣ вся́ вѣ́рныя привяза́.

Сѣда́ленъ, гла́съ 4. Подо́бенъ: Вознесы́йся.

Свѣтови́дѣнъ показа́вся, страстоте́рпче, безбо́жія омраче́ніе отри́нулъ еси́ и къ ка́знемъ и сме́рти отлучи́лся еси́. Тѣ́мже, сконча́въ твоя́ вели́кія по́двиги, вели́кое прія́лъ еси́ наслѣ́діе и сла́ву ника́коже мимоходя́щую, до́блій страда́льче Ѳалале́е сла́вне.

Сла́ва, и ны́нѣ, богоро́диченъ:

По Бо́зѣ во Тво́й, Богоро́дице, прибѣга́ю смире́нный покро́въ боже́ственный и, припа́дая, молю́ся: поми́луй, Пречи́стая, я́ко превзыдо́ша главу́ мою́ грѣси́, и бою́ся, Влады́чице, му́ки, и трепе́щу, моле́ніе сотвори́, Чи́стая, къ Сы́ну Твоему́ отъ си́хъ изба́вити мя́.

Крестобогоро́диченъ:

Отъ Безнача́льнаго Отца́ рожде́ннаго, напослѣ́докъ Тя́ пло́тію ро́ждшая, на Крестѣ́ ви́сяща зря́щи, Христе́, — увы́ Мнѣ́, любе́знѣйшій Іису́се, — вопія́ше, — ка́ко сла́вимый я́ко Бо́гъ отъ а́нгелъ, отъ беззако́нныхъ ны́нѣ человѣ́къ, Сы́не, хотя́ распина́ешися? Пою́ Тя, долготерпѣли́ве.

Пѣ́снь 4.

Ирмо́съ: Услы́шахъ, Го́споди, смотре́нія Твоего́ та́инство, разумѣ́хъ дѣла́ Твоя́, и просла́вихъ Твое́ Божcтво́.

Просвѣще́на тя́, сла́вне, заре́ю добродѣ́телей, Христо́съ прія́тъ на суди́щи страда́нія, я́коже въ черто́зѣ, и просла́вилъ е́сть.

Исцѣле́ніе тя́ даде́ Влады́ка всѣ́мъ вѣ́рнымъ, Ѳалале́е, и твои́ми боже́ственными моли́твами цѣли́ши стра́сти ду́шъ на́шихъ.

Пото́цы крове́й твои́хъ мѵ́ро исцѣле́нія всѣ́мъ источа́ютъ и отгоня́ютъ смра́дъ неду́говъ, Ѳалале́е, и скорбе́й.

Богоро́диченъ: Якоже неистощи́мое, Влады́чице, Тя́ дарова́ній сокро́вище иму́ще, незави́стныя да́ры отъ Тебе́ чуде́съ вси́ пріе́млемъ.

Пѣ́снь 5.

Ирмо́съ: Просвѣти́ на́съ повелѣ́ніи Твои́ми, Го́споди, и мы́шцею Твое́ю высо́кою Тво́й ми́ръ пода́ждь на́мъ, Человѣколю́бче.

Облакъ болѣ́зней и му́къ не покры́ свѣ́тлости терпѣ́нія твоего́: просія́лъ бо еси́, страстоте́рпче, па́че со́лнца.

Расты́й мы́сленно въ Лива́нѣ вѣ́ры, благово́ніе вся́ко дхну́лъ еси́ муче́нія, пресла́вне Ѳалале́е.

Ору́жіемъ, му́дре, одѣ́янъ страда́нія, возду́шнымъ ше́ствіемъ возше́лъ еси́ къ боже́ственнѣй высотѣ́ благода́ти, Ѳалале́е.

Богоро́диченъ: Скве́рну страстны́хъ помышле́ній очи́щши ду́шу мою́, Богоневѣ́сто, Твои́ми моли́твами, чи́ста мя́ Бо́гу предста́ви.

Пѣ́снь 6.

Ирмо́съ: Очи́сти мя́, Спа́се, мно́га бо беззако́нія моя́, и изъ глубины́ зо́лъ возведи́, молю́ся, къ Тебѣ́ бо возопи́хъ, и услы́ши мя́, Бо́же спасе́нія моего́.

Служа́ живо́му Бо́гу и Творцу́ всея́ тва́ри, служе́нія мірски́хъ отри́нулъ еси́, Ѳалале́е, тѣ́мъ тя́ просла́ви Подвигополо́жникъ во страда́ніихъ и чудесѣ́хъ.

Просте́рлъ еси́ прозябе́нія, я́коже ма́слина плодови́та, терпѣ́нія, му́дре, на высоту́ разумѣва́емь, тѣ́мже источи́лъ еси́ еле́й чуде́съ вѣ́рнымъ, му́чениче Ѳалале́е.

Свѣщу́ душе́вную еле́емъ, му́чениче Ѳалале́е, добродѣ́телей разу́мно укра́шь, сла́вне, огне́мъ страда́нія возже́глъ еси́. Тѣ́мже въ черто́гъ боже́ственный дости́глъ еси́.

Богоро́диченъ: Бы́хомъ ме́ртвіи — безсме́ртни, Боже́ственною благода́тію Рождества́ Твоего́, и тлѣ́нія пе́рваго изба́вихомся, Богоро́дице Пречи́стая, и нетлѣ́нія оде́ждею украси́хомся.

Конда́къ, гла́съ 3. Подо́бенъ: Дѣ́ва дне́сь.

Му́ченикомъ сострада́лецъ я́влься и ору́жникъ, во́инъ изря́дный Царя́ сла́вы бы́лъ еси́, искуше́ньми и му́кою возвыше́ніе идолослужи́телей попра́лъ еси́, сего́ ра́ди честну́ю твою́ пое́мъ па́мять, му́дре Ѳалале́е.

Икосъ:

Хра́бра Христо́ва и́стины служи́теля, я́ко тве́рда страда́льца и проповѣ́дника вѣ́ры, низложи́вшаго вра́жію ко́знь, и́доловъ обличи́вшаго все́ неи́стовство душегу́бное, пѣ́сньми и хвала́ми вси́ воспое́мъ ны́нѣ и благоче́стно похва́лимъ: я́ко бо а́гнецъ, посредѣ́ волко́въ пребеззако́нныхъ предста́въ, проповѣ́даетъ благоче́стно Госпо́день зако́нъ, его́же творя́ще единомы́сленно, честну́ю пое́мъ па́мять прему́драго Ѳалале́я.

Пѣ́снь 7.

Ирмо́съ: Отъ Іуде́и доше́дше, о́троцы, въ Вавило́нѣ иногда́, вѣ́рою Тро́ическою пла́мень пе́щный попра́ша, пою́ще: отце́въ Бо́же, благослове́нъ еси́.

Возше́дъ на высоту́ Христо́ва благоче́стія, му́чениче Ѳалале́е, и́дольскія возгнуша́лся еси́ до́лу влеку́шія ле́сти и непреста́нно взыва́еши: оте́цъ на́шихъ Бо́же, благослове́нъ еси́.

Водру́жся на ка́мени Зижди́теля любве́, му́чениче Ѳалале́е, муче́ній треволне́ніи ника́коже поколеба́лся еси́, Сего́ боже́ственныя вѣ́ры, и благода́рно Того́ пое́ши, я́ко Благодѣ́теля.

Отъ незави́стныхъ во́дъ духо́вныя благода́ти поче́рпъ чуде́съ, прося́щимъ незави́стно сія́ всѣ́мъ раздава́еши, Ѳалале́е, вопія́: оте́цъ на́шихъ Бо́же, благослове́нъ еси́.

Ди́венъ я́ко сы́й во святы́хъ всѣ́хъ, еди́не Человѣколю́бче, удиви́, Ще́дрый, моли́твами Ѳалале́я бога́тыя ми́лости Твоя́ пою́щимъ, Христе́, Твое́ смотре́ніе.

Богоро́диченъ: Да вся́ привлече́тъ къ небе́снѣй сла́вѣ Творе́цъ вся́ческихъ, изъ Тебе́, Богоро́дице, благоизво́ли роди́тися и на́мъ, я́ко Человѣколю́бецъ и Благодѣ́тель, Бо́гъ пло́тію примѣси́тися.

Пѣ́снь 8.

Ирмо́съ: Седмери́цею пе́щь халде́йскій мучи́тель богочести́вымъ неи́стовно разжже́, си́лою же лу́чшею спасе́ны сія́ ви́дѣвъ, Творцу́ и Изба́вителю вопія́ше: о́троцы, благослови́те, свяще́нницы, воспо́йте, лю́діе, превозноси́те во вся́ вѣ́ки.

Отло́жь непостоя́нную му́дрость, му́чениче сла́вне, хва́лящихся е́ллинъ въ плете́ніихъ, ра́зумъ непа́дающій и сло́во непоколе́блемое Влады́ки всѣ́хъ и Бо́га привле́клъ еси́, вопія́ Ему́ непреста́нно: о́троцы, благослови́те, свяще́нницы, воспо́йте, лю́діе, превозноси́те во вся́ вѣ́ки.

Превзе́мься, Ѳалале́е, отъ земны́хъ ду́хомъ, Творца́ и Изба́вителя зря́ ума́ чистото́ю, и болѣ́зни претерпѣ́лъ еси́, стражда́ до́блественною душе́ю, посе́мъ и зовы́й: благослови́те, свяще́нніи, Влады́ку, лю́діе, превозноси́те Его́ во вѣ́ки.

Му́ченическими кровьми́ обагри́въ оде́жду, Ѳалале́е, се́ю одѣ́ялся еси́ мы́сленно, ца́рское я́ко украше́ніе, и со всѣ́ми страда́льцы и му́ченики въ небе́сныхъ кро́вѣхъ лику́еши, вопія́, непреста́нно: о́троцы, благослови́те, свяще́нницы, воспо́йте, лю́діе, превозноси́те во вся́ вѣ́ки.

Богоро́диченъ: Иже отъ не су́щихъ вся́ сло́вомъ составле́й, пло́ть человѣ́чу отъ Тебе́ прія́тъ еди́нъ Безсме́ртный, за милосе́рдіе, Чи́стая, да обнови́тъ, я́ко Бо́гъ Благодѣ́тель, вся́, пою́щія: о́троцы, благослови́те, свяще́нницы, воспо́йте, лю́діе, превозноси́те во вся́ вѣ́ки.

Пѣ́снь 9.

Ирмо́съ: Устраши́ся вся́къ слу́хъ неизрече́нна Бо́жія снизхожде́нія, я́ко Вы́шній во́лею сни́де да́же и до пло́ти, отъ дѣви́ческаго чре́ва бы́въ Человѣ́къ. Тѣ́мже Пречи́стую Богоро́дицу, вѣ́рніи, велича́емъ.

Цвѣ́ты ны́нѣ добродѣ́телей, страстоте́рпче, мы́сленный исплете́нный вѣне́цъ страда́нія, я́коже ка́меніемъ, сего́ украси́лъ еси́ и удобри́лъ еси́ кра́сными, Ѳалале́е, ра́нами, и́мже обложе́нъ, въ небе́сный черто́гъ вше́лъ еси́.

Уязви́лся еси́ стрѣло́ю мы́сленною терпѣ́нія, и уязвля́яй тѣ́ло твое́ вра́гъ злонача́льный, изнемо́гъ, на земли́ паде́ся; ты́ же, укрѣпля́емь душе́ю, къ высотѣ́, Ѳалале́е, взя́лся еси́ небе́снѣй, воспѣва́я укрѣ́пльшаго тя́ Го́спода.

Яви́шася исцѣле́ніе вѣ́рнымъ крове́й твои́хъ ка́пли, Ѳалале́е, неду́ги отмыва́юще, и исцѣле́нія чуде́съ точа́ще, и огнепале́нія лю́тая, угаша́юще благода́тію Вѣнцеда́вца Христа́, и тя́ пѣ́сненно сла́вящія ороша́юще.

Позна́на бы́ша всѣ́мъ земноро́днымъ страда́ніемъ возда́нія твоя́, Ѳалале́е, преиму́ща бо па́че наде́жды дарова́нія источа́ютъ, и́миже и на́съ, благоче́стно и вѣ́рно чту́щія твоя́ боре́нія, отъ се́рдца прося́щія, посѣти́.

Богоро́диченъ: Возвы́си, Влады́чице Чи́стая, души́ моея́ до́лу влеку́щее мудрова́ніе къ пресвѣ́тлому и боже́ственному жела́нію, Твоего́ Сы́на и Бо́га, да, любо́вію Его́ при́сно огнепале́нъ и плѣня́емь, къ Нему́ добродѣ́телію прибли́жуся.

Источникъ: Минíа, мѣ́сяцъ Ма́ій. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 145 об. – 149.

/ Къ оглавленію раздѣла /


Наверхъ / Къ титульной страницѣ

0