Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - суббота, 27 мая 2017 г. Сейчасъ на порталѣ посѣтителей - 11.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Ма́ія въ 20-й де́нь.
Па́мять преподо́бнаго отца́ на́шего Стефа́на, Пи́перскаго чудотво́рца.

НА ВЕЛИЦѢЙ ВЕЧЕРНИ,
Блаже́нъ му́жъ.., антифо́нъ 1-й. На Го́споди воззва́хъ: стихи́ры на 6, гла́съ 4:

Въ уедине́ніи всели́лся еси́,* преблаги́мъ Христо́мъ наставля́емь,* преподо́бне о́тче Стефа́не,* въ не́мже въ зако́нѣ Госпо́дни* науча́яся де́нь и но́щь,* плоды́ духо́вныя* прине́слъ еси́ Христу́ Бо́гу.* Его́же моли́,* о притека́ющихъ съ вѣ́рою* къ ра́цѣ моще́й твои́хъ,* благода́ть исцѣле́ній дарова́ти,* и просвѣти́ти и спасти́ ду́ши на́ша. [Два́жды.]

Егда́ благода́ть Свята́го Ду́ха* се́рдце твое́ просвѣти́,* тогда́ Тро́ицы Живонача́льныя* прекра́сное селе́ніе яви́лся еси́.* Еюже наставля́емь,* святы́й хра́мъ созда́лъ еси́,* блаже́нне Стефа́не,* ше́ствуя къ небе́снѣй стези́,* воздержа́ніемъ, посто́мъ и моли́твами,* и́миже и ны́нѣ сохраня́й* почита́ющія святу́ю па́мять твою́. [Два́жды.]

Сла́ва, гла́съ 6:

Правосла́вія ревни́телю, благоче́стія и чистоты́ наста́вниче, и́щущимъ спасе́нія путеводи́телю, блаже́нне о́тче Стефа́не, стра́сти па́губныя посто́мъ обузда́вый, му́жески естество́ пону́дивъ, потща́лся еси́ ху́дшее покори́ти лу́чшему, и пло́ть порабо́тити ду́ху. Тѣ́мже яви́лся еси́ благотеку́щихъ учи́тель, пра́вило добродѣ́тели; ны́нѣ же на небесѣ́хъ зри́ши Святу́ю Тро́ицу, моля́ся о вѣ́рою и любо́вію чту́щихъ тя́.

И ны́нѣ, пра́здника, или́ [богоро́диченъ]: Кто́ Тебе́ не ублажи́тъ...
Вхо́дъ. Проки́менъ дне́. Чте́нія три́, [преподо́бническая].

Прему́дрости Соломо́ни чте́ніе.

Пра́ведницы во вѣ́ки живу́тъ, и въ Го́сподѣ мзда́ и́хъ, и попече́ніе и́хъ у Вы́шняго. Сего́ ра́ди пріи́мутъ ца́рствіе благолѣ́пія и вѣне́цъ добро́ты отъ руки́ Госпо́дни, зане́ десни́цею покры́етъ я́ и мы́шцею защити́тъ и́хъ. Пріи́метъ всеору́жіе — рве́ніе свое́ и вооружи́тъ тва́рь въ ме́сть враго́мъ. Облече́тся въ броня́ пра́вды и возложи́тъ шле́мъ — су́дъ нелицемѣ́ренъ. Пріи́метъ щи́тъ непобѣди́мый — преподо́біе, поостри́тъ же напра́сный гнѣ́въ — во ору́жіе, спобо́ретъ же съ ни́мъ мíръ на безу́мныя. По́йдутъ праволу́чныя стрѣ́лы мо́лніины и, я́ко отъ благокру́гла лу́ка облако́въ, на намѣ́реніе полетя́тъ, и отъ каменоме́тныя я́рости испо́лнь паду́тъ гра́ды. Вознегоду́етъ на ни́хъ вода́ морска́я, рѣ́ки же потопя́тъ я́ на́гло. Сопроти́въ ста́нетъ и́мъ ду́хъ си́лы и, я́ко ви́хоръ, развѣ́етъ и́хъ, и опустоши́тъ всю́ зе́млю беззако́ніе, и злодѣ́йство преврати́тъ престо́лы си́льныхъ. Слы́шите у́бо, ца́ріе, и разумѣ́йте, навы́кните, судіи́ конце́въ земли́. Внуши́те держа́щіи мно́жества и гордя́щіися о наро́дѣхъ язы́ковъ, я́ко дана́ е́сть отъ Го́спода держа́ва ва́мъ и си́ла отъ Вы́шняго.

Прему́дрости Соломо́ни чте́ніе.

Пра́ведныхъ ду́ши въ руцѣ́ Бо́жіей, и не прико́снется и́хъ му́ка. Непщева́ни бы́ша во очесѣ́хъ безу́мныхъ умре́ти, и вмѣни́ся озлобле́ніе исхо́дъ и́хъ, и е́же отъ на́съ ше́ствіе — сокруше́ніе, они́ же су́ть въ ми́рѣ. Ибо предъ лице́мъ человѣ́ческимъ, а́ще и му́ку пріи́мутъ, упова́ніе и́хъ безсме́ртія испо́лнено. И вма́лѣ нака́зани бы́вше, вели́кими благодѣ́тельствовани бу́дутъ, я́ко Бо́гъ искуси́ я́ и обрѣ́те и́хъ досто́йны Себѣ́. Я́ко зла́то въ горни́лѣ, искуси́ и́хъ и, я́ко всепло́діе же́ртвенное, прія́тъ я́. И во вре́мя посѣще́нія и́хъ, возсія́ютъ, и я́ко и́скры по сте́блію, потеку́тъ. Су́дятъ язы́комъ и облада́ютъ людьми́, и воцари́тся Госпо́дь въ ни́хъ во вѣ́ки. Надѣ́ющіися На́нь разумѣ́ютъ и́стину и вѣ́рніи въ любви́ пребу́дутъ Ему́, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.

Прему́дрости Соломо́ни чте́ніе.

Пра́ведникъ, а́ще пости́гнетъ сконча́тися, въ поко́и бу́детъ. Ста́рость бо честна́ не многолѣ́тна, ниже́ въ числѣ́ лѣ́тъ исчита́ется. Сѣди́на же е́сть му́дрость человѣ́комъ, и во́зрастъ ста́рости — житіе́ нескве́рное. Благоуго́денъ Бо́гови бы́въ, возлю́бленъ бы́сть, и живы́й посредѣ́ грѣ́шникъ, преста́вленъ бы́сть. Восхище́нъ бы́сть, да не зло́ба измѣни́тъ ра́зума его́ или́ ле́сть прельсти́тъ ду́шу его́. Раче́ніе бо зло́бы помрача́етъ до́брая и паре́ніе по́хоти, премѣня́етъ у́мъ незло́бивъ. Сконча́вся вма́лѣ, испо́лни лѣ́та до́лга, уго́дна бо бѣ́ Го́сподеви душа́ его́, сего́ ра́ди потща́ся отъ среды́ лука́вствія. Лю́діе же ви́дѣвше и не разумѣ́вше, ниже́ поло́жше въ помышле́ніи таково́е, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.

На литíи стихи́ры, гла́съ 4:

На земли́ а́нгела и на небеси́ человѣ́ка, мíру украше́ніе, о́бразъ добродѣ́телей, по́стниковъ похвалу́, Стефа́на почти́мъ; насажде́нъ бо въ дому́ Госпо́дни и процвѣте́, я́ко ке́дръ, въ уедине́ннѣй ке́лліи Пи́перстѣй, сія́я преподо́біемъ и пра́вдою.

Кíй ра́зумъ и язы́къ человѣ́ческій возмо́жетъ изрещи́, или́ же похвали́ти житіе́ твое́? Ангели же житію́ твоему́ на земли́ въ тѣлеси́ удиви́шася, велича́юще Христа́, побѣ́ду тебѣ́, преподо́бне, на стра́сти дарова́вшаго, его́же моли́, спасти́ся на́мъ.

Благослове́нная оби́тель въ себѣ́ честны́я мо́щи твоя́ иму́щая, отъ ни́хже истека́ютъ вѣ́рнымъ исцѣле́нія, мы́ же благода́рственно прославля́емъ Христа́, дарова́вшаго на́мъ такова́го отца́, Стефа́не пречу́дне, моли́твенниче о душа́хъ на́шихъ.

Свѣ́тлый тво́й приспѣ́ пра́здникъ, Стефа́не богому́дре, созыва́ющь вѣ́рныя лю́ди въ це́рковь, идѣ́же почива́ютъ твоя́ нетлѣ́нныя мо́щи, въ де́нь успе́нія твоего́, про́симъ отъ Христа́, твои́мъ богоуго́днымъ хода́тайствомъ, прія́ти ве́лію ми́лость.

Сла́ва, гла́съ 2:

Пусты́ня, иногда́ непло́дствующа, ны́нѣ испо́лнися мно́жествомъ наро́да, обстоя́щаго всечестну́ю ра́ку преподо́бнаго Стефа́на, и духо́вно веселя́щагося и вопію́ща: ра́дуйся, о́тче, чудесы́ озаря́я ду́ши вѣ́рныхъ ча́дъ свои́хъ; ра́дуйся, умно́живый ча́да духо́вная; ра́дуйся, подви́жниче непребори́мый. Мо́лимся ти́, свя́те Стефа́не, я́ко да изба́виши отъ вра́жіихъ навѣ́товъ всѣ́хъ на́съ, чту́щихъ святу́ю па́мять твою́, до́брѣ сконча́ти жи́знь свою́, и получи́ти дерзнове́ніе въ де́нь стра́шнаго испыта́нія.

И ны́нѣ, пра́здника, или́ богоро́диченъ:

Все́ упова́ніе на Тя́ возлага́ю, Ма́ти Бо́жія, сохрани́ мя подъ кро́вомъ Твои́мъ.

На стихо́внѣ стихи́ры, гла́съ 1:

Стефа́не преподо́бне,* душе́вныя стра́сти* отъ ко́рене исто́рглъ еси́,* и тѣле́сная чу́вства* ду́ху порабо́тилъ еси́,* и чуде́съ благода́ти* сподо́бился еси́* отъ Христа́ Бо́га,* Ему́же моли́ся,* дарова́ти душа́мъ на́шимъ* ми́ръ и ве́лію ми́лость.

Сти́хъ: Честна́ предъ Го́сподемъ* сме́рть преподо́бныхъ Его́.

Воздержа́ніемъ и моли́твою,* о́тче Стефа́не,* бѣсо́вскія полки́ посрами́лъ еси́,* и а́нгелы возвесели́лъ еси,* съ ни́ми же Христу́ моли́ся,* дарова́ти душа́мъ на́шимъ* ми́ръ и ве́лію ми́лость.

Сти́хъ: Блаже́нъ му́жъ, боя́йся Го́спода,* въ за́повѣдехъ Его́ восхо́щетъ зѣло́.

Удаля́яся отъ мíра,* преподо́бне Стефа́не,* сла́ву вре́менную пренебре́глъ еси́,* и небе́снѣй сла́вѣ причи́сленъ еси́,* а́нгеломъ собесѣ́дниче,* съ ни́ми же престо́лу Царя́ Христа́ предстоя́, моли́ся,* дарова́ти душа́мъ на́шимъ* ми́ръ и ве́лію ми́лость.

Сла́ва, гла́съ 8:

Благочести́ваго наро́да своего́, о́тче Стефа́не, наста́вника тя́ почита́емъ, тобо́ю бо пу́ть пра́вый ходи́ти позна́хомъ. Блаже́нъ еси́, Христу́ рабо́тавъ, и вра́жію обличи́лъ еси́ си́лу, а́нгеловъ собесѣ́дниче, преподо́бныхъ соприча́стниче и пра́ведныхъ, съ ни́миже моли́ся Го́споду, поми́ловатися душа́мъ на́шимъ.

И ны́нѣ, пра́здника, или́ богоро́диченъ:

Безневѣ́стная Дѣ́во, Яже Бо́га неизрече́нно заче́нши пло́тію, Ма́ти Бо́га Вы́шняго, Твои́хъ рабо́въ мольбы́ пріими́, Всенепоро́чная, всѣ́мъ подаю́щи очище́ніе прегрѣше́ній, ны́нѣ на́ша моле́нія пріе́млющи, моли́ спасти́ся всѣ́мъ на́мъ.

Тропа́рь, гла́съ 4:

Яко дре́внимъ святы́мъ отце́мъ подража́тель, по́стническое житіе́ возлюби́вый, посто́мъ, и моли́твами и слеза́ми напая́емь, себе́ огради́лъ еси́. Тѣ́мже и по преставле́ніи твое́мъ тѣ́ло твое́ яви́ся цѣ́ло и благоуха́нно, е́же съ любо́вію цѣлу́емъ, Стефа́не о́тче на́шъ, моли́ Христа́ Бо́га, спасти́ся душа́мъ на́шимъ. [Два́жды.]

И Богоро́дице Дѣ́во... [Еди́ножды.]



НА УТРЕНИ,
На Бо́гъ Госпо́дь... Аще е́сть Пятдеся́тница: тропа́рь пра́здника, два́жды. Сла́ва, преподо́бнаго. И ны́нѣ, пра́здника.
Аще ли е́сть по́стъ: тропа́рь преподо́бнаго, два́жды. Сла́ва, и ны́нѣ, богоро́диченъ.

По 1-мъ стихосло́віи сѣда́ленъ, гла́съ 1:

Отъ всея́ души́ Христа́ возлюби́лъ еси́, Имже укрѣпля́емь, моли́твою низложи́лъ еси́ враги́ неви́димыя, и вѣнце́мъ вѣнча́лся еси́ отъ руки́ Христа́, всѣ́хъ Бо́га. Тѣ́мже и мы́ почита́емъ честну́ю твою́ па́мять, о́тче на́шъ Стефа́не. [Два́жды.]

Сла́ва, и ны́нѣ, пра́здника или́ богоро́диченъ:

Обнови́ла еси́, Пречи́стая, Рождество́мъ Твои́мъ истлѣ́вшее страстьми́ земноро́дныхъ естество́, и возста́вила еси́ е́ отъ сме́рти къ жи́зни нетлѣ́нѣй. Тѣ́мже Тя́ по до́лгу блажи́мъ, Дѣ́во Препросла́вленная, я́коже прорекла́ еси́.

По 2-мъ стихосло́віи сѣда́ленъ, гла́съ 5:

По́стника тя́ почти́мъ, о́тче Стефа́не, зане́ умертви́лъ еси́ прило́ги страсте́й, воздержа́ніемъ же и терпѣ́ніемъ посрами́лъ еси́ всю́ горды́ню сопроти́внаго. Ны́нѣ, предстоя́ Го́споду, моли́ся поми́ловати ду́ши на́ша. [Два́жды.]

Сла́ва, и ны́нѣ, пра́здника или́ богоро́диченъ:

Упова́ніе христіа́нъ, Пресвята́я Дѣ́во, Его́же родила́ еси́ па́че ума́ и сло́ва, непреста́нно моли́ съ вы́шними си́лами, да́ти оставле́ніе грѣхо́въ всѣ́мъ на́мъ, и исправле́ніе житія́, вѣ́рою и любо́вію при́сно Тя́ чту́щимъ.

По поліеле́и сѣда́ленъ, гла́съ 3:

Послѣ́дуя стопа́мъ Влады́ки Христа́, преподо́бне Стефа́не, смире́ніе и нищету́ возлюби́лъ еси́, и блаже́нную жи́знь воспрія́лъ еси́. Тѣ́мже дне́сь Христо́ва Це́рковь пра́зднуетъ твою́ па́мять, я́ко еси́ преподо́бнымъ украше́ніе. [Два́жды.]

Сла́ва, и ны́нѣ, пра́здника или́ богоро́диченъ:

Наста́ви на́съ на пу́ть покая́нія, уклоня́ющихся при́сно ко злы́мъ, и прогнѣ́вающихъ преблага́го Бо́га, неискусобра́чная благослове́нная Марíе, прибѣ́жище человѣ́ковъ, Бо́жіе селе́ніе.

Степе́нна, 1-й антифо́нъ 4-го гла́са. Проки́менъ, гла́съ 4: Честна́ предъ Го́сподемъ* сме́рть преподо́бныхъ Его́. Сти́хъ: Что́ возда́мъ Го́сподеви о всѣ́хъ, я́же воздаде́ ми? Вся́кое дыха́ніе... Ева́нгеліе отъ Матѳе́я, зача́ло 43.

По 50-мъ псалмѣ́ стихи́ра, гла́съ 6:

Всечестно́е торжество́, соше́дшеся дне́сь, пра́зднуемъ, Стефа́на отца́ на́шего, и къ честнѣ́й его́ ра́цѣ съ вѣ́рою притека́юще, смире́нно лобыза́емъ святы́я мо́щи его́, моля́щеся ему́: разли́чныя неду́ги на́ша исцѣли́ти, и всѣ́хъ на́съ, соверша́ющихъ ны́нѣ свяще́нную па́мять его́, сохрани́ти отъ вся́каго зла́го навѣ́та супоста́товъ, и моли́тися, дарова́ти всѣ́мъ отъ Го́спода ве́лію ми́лость.

Кано́нъ [преподо́бнаго], гла́съ 4.

Пѣ́снь 1.

Ирмо́съ: Мо́ря чермну́ю пучи́ну невла́жными стопа́ми дре́вній пѣшеше́ствовавъ Изра́иль, крестообра́зными Моисе́овыма рука́ма Амали́кову си́лу въ пусты́ни побѣди́лъ е́сть.

Пода́ждь ми, Сло́ве Бо́жій, сло́во, отве́рзи уста́ моя́ недосто́йная и очи́сти се́рдце мое́, я́ко да возмогу́ по достоя́нію воспѣ́ти преподо́бнаго уго́дника Твоего́.

Са́мъ Ты́, Христе́, просла́вилъ еси́ Стефа́на, да́руй и мнѣ́ е́же мощи́, просла́вити я́ко подоба́етъ, честно́е сіе́ торжество́ его́.

Свѣ́томъ боже́ственнымъ просвѣти́лъ еси́ се́рдце свое́, преподо́бне, отъ ю́ности своея́ удали́лся еси́ мірска́го пристра́стія, тѣ́мъ и небе́сная воспрія́лъ еси́ наслажде́нія.

Богоро́диченъ: Безъ сѣ́мене, Отчею во́лею, отъ Боже́ственнаго Ду́ха зачала́ еси́ Сы́на, и пло́тію родила́ еси́ Бо́га, на́шего ра́ди спасе́нія.

Пѣ́снь 3.

Ирмо́съ: Весели́тся о Тебѣ́ Це́рковь Твоя́, Христе́, зову́щи: Ты́ моя́ крѣ́пость, Го́споди, и прибѣ́жище, и утвержде́ніе.

Возмуще́нія жите́йскаго избѣ́гъ, иска́лъ еси́ ти́хаго приста́нища, оба́че не имѣ́я его́ въ оби́тели Мора́чстѣй отъ злы́хъ ага́рянъ, всели́лся еси́ въ пеще́рѣ Терма́нстѣй.

Воздержа́ніемъ пло́ть свою́ удручи́вый, въ бдѣ́ніи нощны́ми возвы́силъ еси́ ду́шу свою́, побѣжда́я стремле́нія лю́тыхъ страсте́й, блаже́нне Стефа́не.

Оста́вль пеще́ру, зане́ въ не́й не имѣ́лъ еси́ поко́я, обрѣ́лъ еси́ бли́зъ гра́да Спу́жа лу́чшее мѣ́сто, зово́мое Збо́рна Гла́вица, идѣ́же всели́лся еси́, о́тче Стефа́не.

Богоро́диченъ: Вѣ́дуще, благоче́стно проповѣ́дуемъ Тя́, и́стинную Бо́жію Ма́терь, Пренепоро́чная, Тобо́ю бо къ на́мъ Зижди́тель прибли́жися.

Сѣда́ленъ, гла́съ 8:

Оте́чество свое́ оста́вилъ еси́ и, я́коже Авраа́мъ другíй пресе́льникъ бы́въ, кре́стъ сво́й взе́мъ, Христу́ послѣ́довалъ еси́, пло́ть свою́ воздержа́ніемъ и труды́ умертви́лъ еси́, и по сме́рти отъ Бо́га благода́ть прія́лъ еси́ неду́ги исцѣля́ти, съ вѣ́рою приходя́щимъ къ ра́цѣ моще́й твои́хъ, преподо́бне Стефа́не. Тѣ́мже моли́ Христа́ Бо́га, согрѣше́ніемъ оставле́ніе дарова́ти всѣ́мъ, чту́щимъ любо́вію святу́ю па́мять твою́. [Два́жды.]

Сла́ва, и ны́нѣ, пра́здника или́ богоро́диченъ:

Стѣна́ непобѣди́мая на́мъ, христіа́номъ, еси́, Богоро́дице Дѣ́во: къ Тебѣ́ [бо] прибѣга́юще, невреди́ми пребыва́емъ и, па́ки согрѣша́юще, и́мамы Тя́ моли́твенницу. Сего́ ра́ди, благодаря́ще, вопіе́мъ Ти́: ра́дуйся, Благода́тная, Госпо́дь съ Тобо́ю.

Пѣ́снь 4.

Ирмо́съ: Вознесе́на Тя́ ви́дѣвши Це́рковь на Крестѣ́, Со́лнце Пра́ведное, ста́ въ чи́нѣ свое́мъ, досто́йно взыва́ющи: сла́ва си́лѣ Твое́й, Го́споди.

Мо́ря стра́стнаго пучи́ною обурева́еміи, къ Тебѣ́, Іису́се всеблагíй, прибѣга́юще, вопіе́мъ: отъ тимѣ́нія страсте́й изба́ви на́съ, да въ тишинѣ́ ду́ха уго́днику Твоему́ пѣ́снь хвале́бную принесе́мъ, его́же просла́вилъ еси́.

Страннолю́біе свяжа́лъ еси́, и любо́вь къ Бо́гу и бли́жнимъ въ се́рдцѣ свое́мъ всели́лъ еси́, преподо́бне Стефа́не.

Благода́тію свы́ше, блиста́еши чудесы́, Стефа́не, о́тче на́шъ, сего́ ра́ди молю́ся ти́: грѣхми́ отемне́нное се́рдце мое́, свѣ́томъ моли́твъ твои́хъ просвѣти́, я́ко да и а́зъ благода́рственно воспою́ па́мять твою́.

Богоро́диченъ: Сни́де, я́ко до́ждь на руно́, во утро́бу Твою́ Госпо́дь, я́коже дре́вле рече́ проро́къ, Всенепоро́чная, Ему́же взыва́емъ: сла́ва си́лѣ Твое́й, Го́споди.

Пѣ́снь 5.

Ирмо́съ: Ты́, Го́споди, мо́й Свѣ́тъ, въ мíръ прише́лъ еси́, Свѣ́тъ Святы́й, обраща́яй изъ мра́чна невѣ́дѣнія вѣ́рою воспѣва́ющія Тя́.

Честно́е житіе́ отъ ю́ности твоея́ потща́лся еси́ сохрани́ти, тѣ́мже ви́дѣвъ сіе́ Пресвяты́й Ду́хъ, всели́ся въ тя́, преподо́бне о́тче.

За́повѣди Госпо́дни сохраня́я въ се́рдцѣ свое́мъ, проповѣ́дникъ Ева́нгелія наро́ду своему́ бы́лъ еси́, возводя́ его́ къ небеси́, и́же слу́шая тя́, моли́твенно призыва́етъ съ тобо́ю, о́тче Стефа́не, пресвято́е и́мя Христо́во.

Мѣ́сто освяти́ся, въ не́мже честны́я мо́щи твоя́ положи́шася, преподо́бне, и по исхо́дѣ седми́хъ лѣ́тъ изнесе́ны бы́ша изъ гро́ба и, чудесы́ просла́вленныя, положе́ни бы́ша въ це́рковь Рождества́ Пресвяты́я Богоро́дицы, имену́емыя Пи́перская ке́ллія.

Богоро́диченъ: Влады́чице всея́ тва́ри, Богоро́дице Дѣ́во Марíе, неизрече́нно ро́ждши Бо́га Сло́ва, Его́же, Пречи́стая, моли́, безслове́сныхъ страсте́й на́съ изба́вити, да въ ми́рѣ се́рдцемъ и усты́ воспѣва́емъ Его́ пресвято́е и́мя.

Пѣ́снь 6.

Ирмо́съ: Пожру́ Ти со гла́сомъ хвале́нія, Го́споди, Це́рковь вопіе́тъ Ти́, отъ бѣсо́вскія кро́ве очи́щшися, ра́ди ми́лости отъ ре́бръ Твои́хъ исте́кшею кро́вію.

Ища́ ми́рнаго приста́нища, преподо́бне о́тче Стефа́не, преходи́лъ еси́ изъ оби́тели свята́го Луки́ въ Мора́чcкую оби́тель, идѣ́же прія́лъ еси́ постриже́ніе, затѣ́мъ и рукоположе́ніе. Оба́че, не имѣ́я здѣ́ поко́я отъ ага́рянъ, преше́лъ еси́ въ пеще́ру Терма́нскую, я́же въ пле́мени Ро́вачстѣмъ.

Всели́вся здѣ́, обходи́лъ еси́ вся́ селе́нія благочести́выхъ люде́й Пи́перскія о́бласти, уча́ всѣ́хъ вѣ́рѣ и благоче́стію.

Возлюби́въ лю́ди сія́ и мѣ́сто, яви́лся еси́, о́тче, свои́мъ духо́внымъ ча́домъ, те́плое жела́ніе свое́, имѣ́ти здѣ́ себѣ́ ке́ллію, лю́ди же и це́рковь. Еже бы́сть отъ люде́й съ любо́вію испо́лнено.

Богоро́диченъ: Твою́ по́мощь да́ждь ми́, и изба́ви мя́ отъ бѣ́дъ, и скорбе́й, и прегрѣше́ній мои́хъ, Яже ро́ждши всѣ́хъ Избавле́ніе.

Конда́къ, гла́съ 7:

Пріиди́те вси́ правосла́вія пито́мцы, въ Скенде́ріи живу́щіи наро́ды, въ си́хъ временѣ́хъ послѣ́днихъ, свѣти́ло вѣ́ры показа́вшаго, сего́ преподо́бнаго Стефа́на, восхва́лимъ Христа́ Бо́га на́шего, къ Нему́же вопіе́мъ: изба́ви на́съ отъ вра́гъ вѣ́ры на́шея, да въ ми́рѣ воспѣва́емъ: Аллилу́ія.

Икосъ:

Отъ благочести́выхъ роди́телей благопло́дный пло́дъ яви́лся еси́, о́тче Стефа́не, Христо́вы за́повѣди измла́да возлюби́лъ еси́, удаля́яся мíра сего́ наслажде́нія: посто́мъ, бдѣ́ніемъ и моли́твами немо́лчная славосло́вія Пресвятѣ́й Тро́ицѣ возноси́лъ еси́ о наро́дѣ свое́мъ многострада́льнѣмъ. Сего́ ра́ди и мы́, велича́юще Пресвяту́ю Тро́ицу — Бо́га на́шего, вопіе́мъ ти́: ра́дуйся, а́нгеле земны́й и человѣ́че небе́сный, а́нгелы удиви́вый чистото́ю житія́ твоего́, и человѣ́ки научи́вый благоугожда́ти Бо́гу; ра́дуйся, свѣти́льниче по́лный Боже́ственныя благода́ти, сія́я чудесы́ и си́лы озаря́я души́ человѣ́ческія; ра́дуйся, при́сный на́шъ моли́твенниче о душа́хъ на́шихъ ко Го́споду [и] засту́пниче, мо́лиши бо ся непреста́нно о всѣ́хъ на́съ, бли́жнихъ свои́хъ.

Пѣ́снь 7.

Ирмо́съ: Юноши три́ въ Вавило́нѣ, велѣ́ніе мучи́телево на бу́йство прело́жше, посредѣ́ пла́мене вопія́ху: благослове́нъ еси́, Го́споди, Бо́же оте́цъ на́шихъ.

Якоже Ло́тъ дре́вле Содо́ма избѣже́, та́ко и ты́, преподо́бне, оста́вилъ еси́ свое́ родно́е мѣ́сто, ища́ приста́нища ми́рнаго, вездѣ́ вопія́: благослове́нъ еси́, Го́споди, Бо́же оте́цъ на́шихъ.

Си́лою Христо́вою вооружи́вся, преподо́бне, стра́шенъ яви́лся еси́ бѣсо́мъ и враго́мъ непоро́чныя вѣ́ры на́шея, взе́мъ же кре́стъ сво́й, послѣ́довалъ еси́ Христу́, вопія́ немо́лчно: благослове́нъ еси́, Го́споди, Бо́же оте́цъ на́шихъ.

Храня́ще и́стинное правовѣ́ріе по́слѣ ко́совскаго пораже́нія, хра́брый наро́дъ се́рбскій въ Че́рнѣй Горѣ́, возра́довася, егда́ прíиде въ Пи́перахъ преподо́бный, ему́же воздвиго́ша ке́ллію и хра́мъ, идѣ́же ку́пно велича́ху Бо́га, зову́ще: благослове́нъ еси́, Го́споди, Бо́же оте́цъ на́шихъ.

Богоро́диченъ: Благослове́нъ вои́стинну Пло́дъ пречи́стаго чре́ва Твоего́, Его́же славосло́вятъ небе́сныя си́лы и преподо́бныхъ собо́ры восхваля́ютъ, Изба́вльшаго на́съ дре́внія кля́твы, благослове́нная Богома́ти.

Пѣ́снь 8.

Ирмо́съ: Вся́ дѣла́ Бо́жія и вся́ тва́рь, благослови́те Го́спода, я́ко человѣ́комъ отъ земли́ возсія́ Свѣ́тъ, и вселе́нную всю́ просвѣти́, и жи́знь вѣ́чную мíру дарова́, по́йте, лю́діе, и превозноси́те Его́ во вѣ́ки.

Издѣ́тска потща́лся еси́, преподо́бне Стефа́не, науче́нъ роди́тельми, свою́ со́вѣсть, и се́рдце и ду́шу предста́вити Го́споду, сего́ ра́ди и Христо́съ тя́ чудесы́ прославля́етъ. Тѣ́мъ и вопіе́ши: Го́спода по́йте и превозноси́те во вся́ вѣ́ки.

Оби́ліемъ благода́ти и одожде́ніемъ слове́съ твои́хъ, бли́жнія лю́ди своя́ напои́лъ еси́, и си́мъ мно́гъ пло́дъ Влады́цѣ Христу́ возрасти́лъ еси́, богому́дре.

Яко а́нгела тя́ вѣ́мы, зане́ ангелоподо́бно на земли́ пожи́лъ еси́, чистоту́ души́ и тѣ́ла соблю́лъ еси́, ны́нѣ же, о́тче Стефа́не, водворя́ешися душе́ю та́мо, идѣ́же ничто́же скве́рно вхо́дитъ, на земли́ же нетлѣ́ннымъ свои́мъ тѣ́ломъ [пребыва́еши] и, съ вѣ́рными свои́ми людми́, пое́ши немо́лчную пѣ́снь Бо́гу, Препѣ́тому и Превозноси́мому во вѣ́ки.

Богоро́диченъ: Ангельское цѣлова́ніе прино́симъ Ти́ съ любо́вію, Богоро́дице Пречи́стая: ра́дуйся, Благода́тная, Госпо́дь съ Тобо́ю. Ты́ же ра́дости сподо́би на́съ, по до́лгу ублажа́ющія Тя́ и ро́ждшагося отъ Тебе́ Го́спода, пою́щія и превознося́щія во вѣ́ки.

Пѣ́снь 9.

Ирмо́съ: Ка́мень нерукосѣ́чный отъ несѣко́мыя горы́, Тебе́, Дѣ́во, краеуго́льный отсѣче́ся — Христо́съ, совокупи́вый разстоя́щаяся естества́. Тѣ́мъ, веселя́щеся, Тя́, Богоро́дице, велича́емъ.

Чу́ждъ бы́лъ еси́ превозноше́нія тщесла́внаго, [въ] смире́ніи же глубо́цѣмъ житіе́ свое́ препроводи́лъ еси́, всѣ́мъ окружа́ющимъ ты́ бы́лъ еси́ о́бразъ смире́нія и терпѣ́нія, и́хже науча́лъ еси́ бѣжа́ти душегу́бныя горды́ни и велича́ти Христа́ Жизнода́вца, богоизбра́нниче Стефа́не.

Побѣ́дное одоле́ніе ро́ду на́шему, на сопроти́вныя да́руй моли́твами твои́ми, Стефа́не преподо́бне, Це́ркви же единомы́сліе устро́й, во е́же бы вси́ вѣ́рніи лю́діе спасе́ніе улучи́ли.

Отъ недосто́ныхъ мои́хъ усте́нъ приноси́мое ти́ ма́лое, отъ усе́рдія, хвале́ніе, пріими́, богоизбра́нниче о́тче Стефа́не, и огня́ вѣ́чнаго изба́витися ми́, молю́ся, я́ко да честну́ю па́мять твою́ при́сно воспѣва́ю.

Богоро́диченъ: Безсѣ́менно ро́ждшая пло́тію Ѵпоста́сное Сло́во Пребезнача́льнаго Отца́, моли́ся Ему́, Богоро́дице Всепѣ́тая, спасти́ ду́ши пою́щихъ Тя́.

Свѣти́ленъ:

Посто́мъ тече́ніе свое́ соверши́въ, яви́лся еси́ украше́ніе добродѣ́тельми, сла́ва Це́ркве, и ра́дость своего́, вѣ́рнаго Бо́гу, наро́да се́рбскаго, и́же тя́ стяжа́ моли́твеника, сего́ ра́ди, преподо́бне о́тче, помина́й чту́щія честну́ю па́мять твою́. [Два́жды.]

Сла́ва, и ны́нѣ, пра́здника или́ богоро́диченъ:

Предста́тельницу Тя́, Пресвята́я Дѣ́во, мы́, грѣ́шніи, иму́ще, мо́лимся Ти́: не забу́ди Твоя́ рабы́ ма́терними Твои́ми моли́твами, у Сы́на Твоего́ и Бо́га на́шего, дарова́ти всѣ́мъ на́мъ ве́лію ми́лость.

На хвали́техъ стихи́ры на 4, гла́съ 5:

Дне́сь возсія́* пра́зднственная твоя́ па́мять,* преподо́бне Стефа́не,* блиста́ющи свѣ́томъ* твои́хъ добродѣ́телей,* и озаря́ющи вѣ́рныя* чудесы́ спаси́тельными,* сего́ ра́ди ублажа́юще тя́,* велича́емъ Живонача́льную Тро́ицу,* да́вшую на́мъ и отъ на́шего ро́да* Себѣ́ уго́дника.

Благопрія́тна лоза́* виногра́да Христо́ва бы́лъ еси́,* о́тче Стефа́не,* и храни́тель чистоты́,* е́юже возымѣ́лъ еси́* дерзнове́ніе ви́дѣти Бо́га,* Иже вся́ вѣ́рныя лю́ди* уго́дниками утѣша́етъ и весели́тъ добро́тою,* сего́ ра́ди, иму́ще тя́ моли́твенника,* мо́лимъ ти ся:* моли́ Христа́ Бо́га,* да спасе́тъ ду́ши на́ша.

Прилѣжа́я моле́нію* исполне́ніемъ пра́вилъ,* та́кожде и воздержа́нію,* о́тче преподо́бне,* змíя льсти́ваго,* сле́зными пото́ки умертви́лъ еси́,* Бо́гу же угоди́лъ еси́.* Сего́ ра́ди украси́ тя* небе́сными дарова́ніи* Госпо́дь Человѣколю́бецъ,* Спа́съ ду́шъ на́шихъ.

Ра́дуйся Стефа́не,* и́ноковъ пра́вило,* преподо́бныхъ красото́,* Боже́ственныхъ чуде́съ соверши́телю,* и́миже озаря́еши* твое́ земно́е оте́чество,* и си́ми [1] утвержда́яй на́съ* въ правосла́внѣй вѣ́рѣ,* честну́ю па́мять твою́ соверша́ющихъ,* пода́ждь же да́ры цѣле́бныя* коему́ждо по потре́бѣ,* и моли́ Христа́ Бо́га,* дарова́ти на́мъ ве́лію ми́лость.

Сла́ва, гла́съ 6:

Во все́й Че́рнѣй Горѣ́, въ ве́сѣхъ и гра́дѣхъ, и въ окре́стныхъ страна́хъ, изы́де вѣща́ніе чуде́съ твои́хъ, преподо́бне о́тче Стефа́не. Тебе́ ра́ди увѣ́дѣша лю́діе, я́ко е́сть Збо́рная Гла́вица це́рковь и ке́ллія Пи́перская, сего́ ра́ди и мы́, соше́дшеся при ра́цѣ моще́й твои́хъ, съ любо́вію соверша́емъ святу́ю па́мять твою́, и уми́льно ти́ глаго́лемъ: моли́ся ко Го́споду, да спасе́тъ всѣ́хъ на́съ, и да́руетъ всему́ наро́ду се́рбскому, побѣ́ды на сопроти́вныя, и душа́мъ на́шимъ ве́лію ми́лость.

И ны́нѣ, пра́здника или́ богоро́диченъ, гласъ 5:

Блажи́мъ Тя́, Богоро́дице Дѣ́во, и сла́вимъ Тя́, вѣ́рніи, по до́лгу, гра́дъ непоколеби́мый, стѣ́ну необори́мую, тве́рдую предста́тельницу и прибѣ́жище ду́шъ на́шихъ.

Славосло́віе вели́кое. Ектеніи́ и отпу́стъ.



НА ЛИТУРГІИ,

Блаже́нна пра́здника, пѣ́снь рядова́я и преподо́бнаго пѣ́снь 6-я, на 4. Проки́менъ, гла́съ 7: Честна́ предъ Го́сподемъ* сме́рть преподо́бныхъ Его́. Сти́хъ: Что́ возда́мъ Го́сподеви о всѣ́хъ, я́же воздаде́ ми? Апо́столъ къ Гала́томъ, зача́ло 213. Аллилуія, гласъ 6: Блаже́нъ му́жъ, боя́йся Го́спода, въ за́повѣдехъ Его́ восхо́щетъ зѣло́. Сти́хъ: Си́льно на земли́ бу́детъ сѣ́мя его́. Ева́нгеліе Луки́, зача́ло 24. Прича́стенъ: Въ па́мять вѣ́чную бу́детъ пра́ведникъ, [отъ слу́ха зла́ не убои́тся.]

Примѣчаніе:
[1] Въ текстѣ «сили» (опечатка?).

Источникъ: Србљак. — Београд: Издаjе Свети Архиjереjски Синод Српске Православне Цркве, 1986. — С. 378-387.

Благодаримъ достопочтеннаго Зорана (Сербія) за помощь въ подготовкѣ текста къ публикаціи.

/ Къ оглавленію раздѣла /


Наверхъ / Къ титульной страницѣ

0