Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - пятница, 18 августа 2017 г. Сейчасъ на порталѣ посѣтителей - 22.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Ма́ія въ 20-й де́нь.
Обрѣ́теніе моще́й и́же во святы́хъ отца́ на́шего Алексíя, митрополи́та [Кíевскаго], Моско́вскаго и всея́ Россíи чудотво́рца.

НА МАЛѢЙ ВЕЧЕРНИ,
[На Го́споди воззва́хъ,] стихи́ры, гла́съ 4. Подо́бенъ: Да́лъ еси́ зна́меніе.

Да́лъ еси́ зна́меніе* Твоего́ благосе́рдія и ми́лованія* боя́щимся Тебе́, Го́споди,* и храня́щимъ за́повѣди Твоя́,* явле́ніе честны́хъ моще́й* уго́дника Твоего́ Алексíя,* цѣле́бъ пучи́ну неизчерпа́ему.* Тѣ́мже неизрече́нное смотре́ніе Твое́ сла́вимъ,* Іису́се Всеси́льне,* Спа́се ду́шъ на́шихъ.

Да́лъ еси́ да́ръ благода́тный* христолюби́вымъ князе́мъ,* богоглаго́лива учи́теля Правосла́вныя вѣ́ры,* вельмо́жамъ тве́рдое защище́ніе,* си́рымъ я́ко отца́ чадолюби́ва и милосе́рда,* вдови́цамъ же те́плое заступле́ніе* и всѣ́мъ скорбя́щимъ утѣше́ніе.* Тѣ́мъ Твое́ человѣколю́бное смотре́ніе сла́вимъ,* Іису́се Всеси́льне,* Спа́се ду́шъ на́шихъ.

Да́лъ еси́, Всеси́льне,* Це́ркви Твое́й прави́теля изря́дна,* святи́теля Алексíя,* богатя́щася благоче́стіемъ,* и, я́ко порфи́рою многоцѣ́нною, крася́щася* непоро́чнымъ житіе́мъ и ми́лостынею,* и пра́вдою, я́ко боже́ственнымъ вѣнце́мъ, обложи́вшася,* и чуде́съ да́ръ пріе́мша отъ всемо́щныя десни́цы Твоея́.* Тѣ́мже Твое́ человеколю́бное смотре́ніе сла́вимъ,* Іису́се Всеси́льне,* Спа́се ду́шъ на́шихъ.

Сла́ва, гла́съ 4:

Яко звѣзду́ пресвѣ́тлую, осіява́ющую страну́ всю́ Россíйскую, тебе́ Бо́гъ пре́жде избра́ отъ ю́ности, о́тче святи́телю Алексíе, па́стыря овца́мъ слове́снымъ, воздви́гшаго це́рковь благолѣ́пну, преукраше́ну и всечу́дну, въ не́йже вси́ пра́зднуемъ честно́е Благовѣ́щеніе Пресвяты́я Богоро́дицы, и е́же въ Хо́нѣхъ чу́до архистрати́га Михаи́ла. Окрестъ же стоя́ще ра́ки твоея́, я́же и́мать въ себѣ́ да́ръ исцѣле́нія благода́ти, честны́я мо́щи твоя́, святи́телю Алексíе, твои́ми бо моли́твами и посо́біемъ, вѣ́рный Импера́торъ на́шъ держа́вно побѣжда́етъ пога́ныхъ супоста́тъ. Тебе́ Христо́съ свѣти́ло вели́кое показа́ въ Россíи, ты́ похвала́ земли́ на́шей и защище́ніе. Тѣ́мже, дне́сь пра́зднующе честно́е пренесе́ніе твое́, мо́лимъ тя́, свя́те: ми́ръ мíру испроси́ и душа́мъ на́шимъ ве́лію ми́лость.

И ны́нѣ, богоро́диченъ, [гла́съ то́йже:

Изба́ви на́съ отъ ну́ждъ на́шихъ, Ма́ти Христа́ Бо́га, ро́ждшая всѣ́хъ Творца́, да вси́ вопіе́мъ Ти́: ра́дуйся, еди́но предста́тельство ду́шъ на́шихъ.]

На стихо́внѣ стихи́ры, гла́съ 1. Подо́бенъ: Небе́сныхъ чино́въ.

Небе́снымъ чино́мъ* поревнова́лъ еси́,* святи́телю Алексíе,* и на земли́, богоно́се,* освяще́нъ сосу́дъ яви́лся еси́* и жили́ще Пресвята́го Ду́ха.

Сти́хъ: Свяще́нницы Твои́ облеку́тся въ пра́вду,* и преподо́бніи Твои́ возра́дуются.

Небе́снымъ чино́мъ ра́дованіе,* и на земли́ святи́телемъ показа́лся еси́,* свяще́нникомъ сла́ва,* Алексíе прему́дре,* мона́шествующимъ пра́вило* и Це́ркве утвержде́ніе.

Сти́хъ: Блаже́нъ му́жъ, боя́йся Го́спода,* въ за́повѣдехъ Его́ восхо́щетъ зѣло́.

Въ небе́сныхъ водворя́яся,* земны́хъ ны́нѣ пріими́ хвалу́* ча́дъ твои́хъ, о́тче,* пра́зднующимъ же честно́е пренесе́ніе* моще́й твои́хъ* подава́й серде́чная проше́нія.

Сла́ва, и ны́нѣ, богоро́диченъ:

Небе́снымъ лико́мъ ра́дованіе* и на земли́ человѣ́комъ,* Христа́ Жизнода́теля* родила́ еси́,* отъе́мши печа́ль,* Дѣ́во, прама́тернюю.

Тропа́рь, гла́съ 2:

Яко сокро́вище пребога́тое, многолѣ́тно въ земли́ сокрове́нное, честны́я мо́щи твоя́ обрѣто́шася чудоточа́щія, всеблаже́нне о́тче святи́телю Алексíе: отъ ни́хже врачевство́ пріе́млюще, обогаща́емся и Христа́ славосло́вимъ, глаго́люще: сла́ва прославля́ющему святы́я Своя́.

Инъ тропа́рь, гла́съ 4:

Апо́стольскихъ прее́мниковъ архіере́евъ сопресто́льниче, Россíи всея́ па́стырю и учи́телю, всеблаже́нне о́тче Алексíе, Влады́цѣ всѣ́хъ моли́ся ми́ръ па́ствѣ твое́й дарова́ти, и спасе́ніе душа́мъ, и ве́лію ми́лость.

Сла́ва и ны́нѣ, пра́здника или́ богоро́диченъ:

Иже на́съ ра́ди рожде́йся [отъ Дѣ́вы, и распя́тіе претерпѣ́въ, Благíй, испрове́ргій сме́ртію сме́рть и Воскресе́ніе явле́й я́ко Бо́гъ, не пре́зри, я́же созда́лъ еси́ руко́ю Твое́ю, яви́ человѣколю́біе Твое́, Ми́лостиве. Пріими́ ро́ждшую Тя́, Богоро́дицу, моля́щуюся за ны́, и спаси́, Спа́се на́шъ, лю́ди отча́янныя.]


НА ВЕЛИЦѢЙ ВЕЧЕРНИ,
Пое́мъ: Блаже́нъ му́жъ.., 1-й антифо́нъ. На Го́споди, воззва́хъ.., стихи́ры на 8: пра́здника 3 и свята́го 5, гла́съ 1. Подо́бенъ: О, ди́вное чу́до!

О, ди́вное чу́до!* Исто́чникъ чудодѣя́ній,* отъ гро́ба возсія́ша святы́я мо́щи* святи́теля Христо́ва Алексíя.* Весели́ся и ра́дуйся, христоимени́тый гра́де Москва́,* такова́го святи́теля пріи́мъ,* богопроповѣ́дника благода́ти.* Воспое́мъ, вѣ́рніи, Дави́да иму́ще ликонача́льника:* свяще́нницы Твои́ облеку́тся въ пра́вду,* и преподо́бніи Твои́ возра́дуются,* прося́ще у Христа́ ми́ра и ве́лія ми́лости. [Два́жды.]

Ди́вныя твоя́ цвѣ́ты добродѣ́телей, Алексíе,* я́ко ма́слина плодови́та въ дому́ Бо́жіи:* свѣ́тло возше́лъ еси́ въ небе́сныя оби́тели,* идѣ́же воздаде́ся тебѣ́ вене́цъ за тру́дъ воздая́нія.* На́мъ же честна́я дарова́нія обрѣто́шася,* отъ мно́гъ лѣ́тъ сокрове́ны честны́я твоя́ мо́щи нетлѣ́нны,* чуде́съ зарю́ испуща́ющія* чту́щимъ па́мять твою́, святи́телю, и вопію́щимъ:* Го́спода умоли́, преподо́бне,* дарова́ти на́мъ ве́лію ми́лость. [Два́жды.]

Пресла́вная чудеса́ яви́шася дне́сь,* сокро́вище неиздае́мо дарова́ній духо́вныхъ,* исто́чникъ исцѣле́ній* и спасе́ніе вѣ́рнымъ,* чудотво́рныя мо́щи святи́теля* и па́стыря овца́мъ слове́снымъ,* святи́тельское честно́е украше́ніе,* зако́нъ церко́вныхъ вели́кое утвержде́ніе,* воспое́мъ, вѣ́рніи, святи́теля Алексíя,* Го́спода моля́ща,* подаю́щаго на́мъ ве́лію ми́лость.

Сла́ва, гла́съ 8:

Пріиди́те, Россíйстіи собо́ри, и ви́дите, я́ко украше́ніе ца́рско и я́ко вѣне́цъ пресвѣ́тлый, прія́тъ дне́сь преимени́тый гра́дъ Москва́, честны́я мо́щи святи́теля Алексíя: отъ мно́гъ бо лѣ́тъ сокрове́ны, обрѣто́шася нетлѣ́нны. О ни́хже украша́ется, и, хваля́ся, вселе́нную созыва́етъ на весе́ліе Боже́ственныхъ дарова́ній, неисчерпа́емыхъ чуде́съ, отъ ни́хъ быва́емыхъ всегда́, и велегла́сно вопіе́тъ: Ты́ прояви́лъ еси́, Влады́ко Христе́, сицева́го святи́теля христоимени́тымъ лю́демъ, свѣ́тло пра́зднующимъ, и Ца́рствія сподо́би и́хъ небе́снаго моли́твами его́.

И ны́нѣ, пра́здника или́ богоро́диченъ:

Ца́рь Небе́сный за человѣколю́біе [на земли́ яви́ся и съ человѣ́ки поживе́, от Дѣ́вы бо Чи́стыя пло́ть пріе́мый и изъ Нея́ проше́дый съ воспрія́тіемъ, еди́нъ е́сть Сы́нъ, сугу́бъ естество́мъ, но не ѵпоста́сію. Тѣ́мже, соверше́нна Того́ Бо́га и соверше́нна Человѣ́ка вои́стинну проповѣ́дающе, исповѣ́дуемъ Христа́ Бо́га на́шего: Его́же моли́, Ма́ти Безневѣ́стная, поми́ловатися душа́мъ на́шимъ].

Вхо́дъ. Проки́менъ дне́. Чте́нія три́.

При́тчей чте́ніе.

Па́мять пра́веднаго съ похвала́ми, и благослове́ніе Госпо́дне на главѣ́ его́. Блаже́нъ человѣ́къ, и́же обрѣ́те прему́дрость, и сме́ртенъ, и́же увѣ́дѣ ра́зумъ. Лу́чше бо сію́ купова́ти, не́жели зла́та и сребра́ сокро́вища. Честнѣ́йшая же е́сть ка́меній многоцѣ́нныхъ, все́ же честно́е недосто́йно ея́ е́сть. Долгота́ бо дне́й и лѣ́та живота́ въ десни́цѣ ея́, въ шу́йцѣ же ея́ бога́тство и сла́ва. Отъ у́стъ ея́ исхо́дитъ пра́вда, зако́нъ же и ми́лость на язы́цѣ но́ситъ. Послу́шайте у́бо мене́, о ча́да, честна́я бо реку́, и блаже́нъ человѣ́къ, и́же пути́ моя́ сохрани́тъ: исхо́ди бо мои́ — исхо́ди живота́, и уготовля́ется хотѣ́ніе отъ Го́спода. Сего́ ра́ди молю́ ва́съ и предлага́ю мо́й гла́съ сыново́мъ человѣ́ческимъ. Я́ко а́зъ, прему́дрость, устро́ихъ совѣ́тъ, и ра́зумъ и смы́слъ азъ призва́хъ. Мо́й совѣ́тъ и утвержде́ніе, мо́й ра́зумъ, моя́ же крѣ́пость. Азъ мене́ лю́бящія люблю́, и́щущіи же мене́ обря́щутъ благода́ть. Разумѣ́йте у́бо, незло́бивіи, кова́рство, ненака́заніи же, прилага́йте сердца́. Послу́шайте мене́ и па́ки, честна́я бо реку́, и отве́рзу отъ усте́нъ пра́вая, я́ко и́стинѣ поучи́тся горта́нь мой, ме́рзки же пре́до мно́ю устны́ лжи́выя. Съ пра́вдою вси́ глаго́лы у́стъ мои́хъ, ничто́же въ ни́хъ стро́потно, ниже́ развраще́нно. Вся́ пра́ва су́ть разумѣва́ющимъ и про́ста обрѣта́ющимъ ра́зумъ. Науча́ю бо ва́съ и́стинѣ, да бу́детъ о Го́сподѣ наде́жда ва́ша, и испо́лнитеся Ду́ха.

При́тчей чте́ніе.

Уста́ пра́веднаго ка́плютъ прему́дрость, язы́къ же непра́веднаго поги́бнетъ. Устнѣ́ муже́й пра́ведныхъ ка́плютъ благода́ти, уста́ же нечести́выхъ развраща́ются. Мѣ́рила льсти́вая ме́рзость предъ Го́сподемъ, вѣ́съ же пра́ведный прія́тенъ Ему́. Идѣ́же а́ще вни́детъ досажде́ніе, та́мо и безче́стіе, уста́ же смире́нныхъ поуча́ются прему́дрости. Соверше́ніе пра́выхъ наста́витъ и́хъ, и поползнове́ніе отрица́ющихся упасе́тъ и́хъ. Не по́льзуютъ имѣ́нія въ де́нь я́рости, пра́вда же изба́витъ отъ сме́рти. Умеръ пра́ведный, оста́ви раска́яніе, нару́чна же быва́етъ и посмѣя́тельна нечести́выхъ па́губа. Пра́вда непоро́чнаго исправля́етъ пути́, въ нече́стіе же па́даетъ непра́вда. Пра́вда муже́й пра́выхъ изба́витъ и́хъ, безсовѣ́стіемъ же плѣня́ются беззако́нніи. Сконча́вшуся му́жу пра́ведну, не поги́бнетъ наде́жда, похвала́ же нечести́выхъ поги́бнетъ. Пра́ведникъ отъ ло́ва убѣ́гнетъ, въ него́же мѣ́сто предае́тся нечести́вый. Во устѣ́хъ нечести́выхъ сѣ́ть гра́жданомъ, чу́вство же пра́ведныхъ благопоспѣ́шное. Во благи́хъ пра́ведныхъ испра́вится гра́дъ, и въ поги́бели нечести́выхъ ра́дованіе. Во благослове́ніи пра́выхъ возвы́сится гра́дъ, усты́ же нечести́выхъ раскопа́ется. Руга́ется гра́жданомъ лише́нный ра́зума, му́жъ же му́дрый безмо́лвіе во́дитъ.

Прему́дрости Соломо́новы чте́ніе.

Пра́ведникъ, а́ще пости́гнетъ сконча́тися, въ поко́и бу́детъ. Ста́рость бо честна́ не многолѣ́тна, ниже́ въ числѣ́ лѣ́тъ исчита́ется. Сѣди́на же е́сть му́дрость человѣ́комъ, и во́зрастъ ста́рости — житіе́ нескве́рное. Благоуго́денъ Бо́гови бы́въ, возлю́бленъ бы́сть, и живы́й посредѣ́ грѣ́шникъ, преста́вленъ бы́сть. Восхище́нъ бы́сть, да не зло́ба измѣни́тъ ра́зума его́ или́ ле́сть прельсти́тъ ду́шу его́. Раче́ніе бо зло́бы помрача́етъ до́брая и паре́ніе по́хоти, премѣня́етъ у́мъ незло́бивъ. Сконча́вся вма́лѣ, испо́лни лѣ́та до́лга, уго́дна бо бѣ́ Го́сподеви душа́ его́, сего́ ра́ди потща́ся отъ среды́ лука́вствія. Лю́діе же ви́дѣвше и не разумѣ́вше, ниже́ поло́жше въ помышле́ніи таково́е, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.

На литíи стихи́ры, гла́съ 6. Самогла́сны:

Возсія́ дне́сь, я́ко со́лнце, и, я́ко мо́лнія, возблиста́, о́тче, вѣща́ніе твое́, и, я́коже гро́мъ, возгремѣ́: съ небесе́ бо имѣ́лъ еси́ свы́ше дохнове́ніе и́стинно, ны́нѣ же честны́я мо́щи твоя́ неугаси́мы лучи́ чуде́съ испуща́ютъ отъ гро́ба, я́ко отъ черто́га свѣ́тла, просвѣща́юще ду́ши пою́щихъ тя́.

Пресла́вно просла́вися свята́я це́рковь, въ не́йже положены́ бы́ша честны́я мо́щи твоя́. Кня́зи же и вси́ вѣ́рніи, притека́юще, неисцѣ́льнымъ страсте́мъ пріе́млютъ исцѣле́нія о и́мени твое́мъ, святи́телю Алексíе, моли́ спасти́ся на́мъ.

Сла́ва, гла́съ то́йже:

Святи́телей удобре́ніе, Алексíе прему́дре, сто́лпе и утвержде́ніе Це́ркве, богосло́вія труба́ златокова́нная, Тро́ицы побо́рниче, благоче́стія законопи́сче, пра́зднующимъ на́мъ обрѣ́теніе честны́хъ моще́й твои́хъ оставле́ніе грѣхо́въ испроси́ и па́ству твою́ до́брѣ сохрани́, да вси́ ублажа́емъ тя́.

И ны́нѣ, пра́здника или́ богоро́диченъ, [гла́съ то́йже:

Богоро́дице, Ты́ еси́ лоза́ и́стинная, возрасти́вшая на́мъ Пло́дъ живота́, Тебѣ́ мо́лимся: моли́ся, Влады́чице, со святы́ми апо́столы поми́ловати ду́ши на́ша.]

На стихо́внѣ стихи́ры, гла́съ 5. Самогла́сны:

Пріиди́те, вни́демъ въ це́рковь Госпо́дню, въ до́мъ Бо́га на́шего, и у́зримъ (сла́ву Единоро́днаго отъ Отца́), сла́ву и украше́ніе церко́вное, свѣти́льника неугаси́ма, и, я́ко отъ окри́на благово́нна и отъ цвѣте́цъ ра́йскихъ неувяда́емыхъ, мѵрово́нна благово́нія, услажда́юща сердца́ вѣ́рныхъ, честны́я мо́щи святи́теля Алексíя, разли́чная исцѣле́нія испуща́юща, я́ко отъ исто́чника приснотеку́щаго. О, прему́дрыхъ суде́бъ Твои́хъ, Христе́! Такову́ю благода́ть дарова́вый уго́днику Твоему́, его́же моли́твами поми́луй на́съ.

Сти́хъ: Свяще́нницы Твои́ облеку́тся въ пра́вду, и преподо́бніи Твои́ возра́дуются.

Благода́ть Свята́го Ду́ха дѣ́йствующая е́сть къ ра́цѣ моще́й твои́хъ вѣ́рою притека́ющимъ: тѣ́мъ бо благово́ніе мѵ́ра чуде́съ испуща́еши и неду́говъ исцѣле́ніе подава́еши. Но, о пресвяще́нный о́тче Алексíе! Имѣ́яй дерзнове́ніе къ Бо́гу, и съ безпло́тными лику́я на небесѣ́хъ, съ ни́миже моли́ся Ему́, е́же спасти́ся ста́ду твоему́ невоева́ну.

Сти́хъ: Честна́ предъ Го́сподемъ сме́рть преподо́бныхъ Его́.

Яко ма́сличенъ но́вый са́дъ возлю́бленъ Бо́жія трапе́зы, бы́лъ еси́, я́ко и́стинный свидѣ́тель благовѣ́стія Христо́ва, царя́ удиви́лъ еси́ чуде́съ сія́ніи: цари́цѣ же, душе́ю и тѣ́ломъ ослѣ́пшей, свѣ́тъ чу́вственный дарова́лъ еси́, Це́ркви же Христо́вѣ простра́нно свѣ́тъ Тро́ичный зрѣ́ти откры́лъ еси́. Тѣ́мъ и Христо́съ Тя́ благослови́, и ви́диши блага́я Іерусали́ма, и въ не́мъ пи́щи боже́ственныя наслажда́яся, достохва́льне и преосвяще́нне святи́телю Христо́въ Алексíе, и на́съ моли́твами твои́ми о́бщники бы́ти Ца́рствія небе́снаго сподо́би.

Сла́ва, гла́съ 6:

Неиздае́ма е́сть благода́ть святи́теля Алексíя, ю́же прія́тъ отъ всѣ́хъ Царя́, Христа́ Бо́га, тѣ́мъ и честны́я его́ мо́щи Бо́жіею си́лою вы́ну содѣва́ютъ чудеса́, и всѣ́хъ, вѣ́рою призыва́ющихъ и́мя его́, отъ неисцѣ́льныхъ неду́гъ измѣня́ютъ. Его́же моли́твами, Го́споди, христолюби́вому Импера́тору на́шему посо́бствуй на враги́ и належа́щихъ на́съ скорбе́й душе́вныхъ и тѣле́сныхъ страсте́й свободи́, я́ко Человѣколю́бецъ.

И ны́нѣ, пра́здника или́ богоро́диченъ, [гла́съ то́йже:

Творе́цъ и Изба́витель мо́й, Пречи́стая, Христо́съ Госпо́дь, изъ Твои́хъ ложе́снъ проше́дъ, въ мя́ оболкíйся, пе́рвыя кля́твы Ада́ма свободи́. Тѣ́мже Ти́, Всечи́стая, я́ко Бо́жіи Ма́тери же и Дѣ́вѣ, вои́стинну вопіе́мъ немо́лчно: ра́дуйся а́нгельски, ра́дуйся, Влады́чице, предста́тельство, и покро́ве, и спасе́ніе ду́шъ на́шихъ.]

[На благослове́ніи хлѣ́бовъ: Тропа́рь свята́го, два́жды [пи́санъ на ма́лѣй вече́рни] и Богоро́дице Дѣ́во.., еди́ножды.]



НА УТРЕНИ,
На Бо́гъ Госпо́дь.., а́ще е́сть 50-ца: Тропа́рь пра́здника, два́жды. Сла́ва, святи́теля. И ны́нѣ, пра́здника.
Аще ли по́стъ: Тропа́рь святи́теля, два́жды. Сла́ва, и ны́нѣ, богоро́диченъ.

По 1-й стихоло́гіи сѣда́ленъ, гла́съ 8:

Наста́ свѣтоно́сный де́нь, чудотво́рца, архіепи́скопа Алексíя па́мять, пріиди́те, соше́дшеся, пра́зднуемъ свѣ́тло и соста́вимъ ли́ки, и похвала́ми почти́мъ его́, и рце́мъ ему́: ра́дуйся, честны́й свѣти́льниче Россíйскія земли́, источа́еши бо чудеса́, и излива́еши исцѣле́нія, и мо́лишися о душа́хъ на́шихъ. [Два́жды.]

Сла́ва, и ны́нѣ, пра́здника или́ богоро́диченъ:

Да Тво́й па́ки сози́ждеши о́бразъ, Спа́се, истлѣ́вшій страстьми́, небе́сныхъ утаи́вся суще́ствъ, воплоти́лся еси́ отъ Дѣ́вы, Ейже со стра́хомъ вопіе́мъ: ра́дуйся, Обра́дованная, Госпо́дь съ Тобо́ю.

По 2-й стихоло́гіи сѣда́ленъ, гла́съ 4:

Пріиди́те, торжеству́емъ свѣ́тло, пра́зднующе па́мять святи́теля Алексíя чудотво́рца: преста́вися бо отъ земли́ къ невеще́ственнымъ оби́телемъ, идѣ́же зри́тъ добро́ту неизрече́нную, а́нгельскимъ лико́мъ собесѣ́дникъ бы́въ. Тѣ́мже, со апо́столы и му́ченики лику́я, о́тче на́шъ Алексíе преподо́бне, прилѣ́жно моли́ся Влады́цѣ Христу́ о чту́щихъ вѣ́рою па́мять твою́. [Два́жды.]

Сла́ва, и ны́нѣ, пра́здника или́ богоро́диченъ:

Стѣна́ непобеди́мая на́мъ, христіа́номъ, еси́, Богоро́дице Дѣ́во: къ Тебѣ́ бо прибѣга́юще, невреди́ми пребыва́емъ и, па́ки согрѣша́юще, и́мамы Тя́ моли́твенницу. Тѣ́мъ, благодаря́ще, вопіе́мъ Ти́: ра́дуйся, Благода́тная, Госпо́дь съ Тобо́ю.

По поліеле́и сѣда́ленъ, гла́съ 8:

Проповѣ́дуетъ, о́тче, твоя́ чудеса́ ны́нѣ Россíйская митропо́лія и вся́ оте́чествія и страны́ чудодѣ́йствія: я́ко вся́ отъ болѣ́зней и скорбе́й изба́ви, богоблаже́нне Алексíе, пита́телю вдови́цъ и си́рыхъ, а́ки оте́цъ, помо́щникъ въ ско́рбехъ всеизря́денъ, пла́чущихъ утѣше́ніе, па́стырь и наста́вникъ блудя́щихъ, Алексíе преподо́бне. И на́съ твои́ми моли́твами отъ бѣ́дъ изба́ви, моля́ся Христу́ Бо́гу прегрѣше́ній оставле́ніе пода́ти вѣ́рою и любо́вію чту́щимъ святу́ю па́мять твою́. [Два́жды.]

Сла́ва, и ны́нѣ, пра́здника или́ богоро́диченъ:

Яко дѣ́ву и еди́ну въ жена́хъ, Тя́, безъ сѣ́мене ро́ждшую Бо́га пло́тію, вси́ ублажа́емъ, ро́ди человѣ́честіи: о́гнь бо всели́ся въ Тя́ Божества́, и я́ко Младе́нца млеко́мъ пита́еши Зижди́теля и Го́спода. Тѣ́мъ, а́нгельскій и человѣ́ческій ро́дъ, досто́йно сла́вимъ пресвято́е Рождество́ Твое́ и согла́сно вопіе́мъ Ти́: моли́ Христа́ Бо́га согрѣше́ній оставле́ніе дарова́ти покланя́ющимся вѣ́рою пресвято́му Рождеству́ Твоему́.

Та́же степе́нна, 1-й антифо́нъ 4-го гла́са. Проки́менъ, [гласъ 4]: Честна́ предъ Го́сподемъ* сме́рть преподо́бныхъ Его́. Сти́хъ: Что́ возда́мъ Го́сподеви о всѣ́хъ, я́же воздаде́ ми́? Вся́кое дыха́ніе... Ева́нгеліе Іоа́нна, зача́ло 35, отъ полу.

По 50-мъ псалмѣ́ стихи́ра, гла́съ 8:

Вся́къ язы́къ да подви́жится къ похвале́нію пресла́внаго святи́теля и чудотво́рца Алексíя, ве́сь ро́дъ и во́зрастъ вся́къ, ю́ноши, и дѣ́вы, и ста́рцы, кня́зи и свяще́нники и вси́ земнíи концы́, духо́вный ли́къ соста́вимъ пѣ́ніемъ, тру́бный гла́съ воспріи́мемъ и благода́рныя пѣ́сни принесе́мъ, глаго́люще: ра́дуйся, Христо́въ святи́телю, положи́вый ду́шу за о́вцы твоя́, я́ко о́бщникъ Христа́ Бо́га на́шего; ра́дуйся, служи́телю небе́сный, и па́стырей па́стырю, и страда́лецъ непобѣди́мый; ра́дуйся, пріе́мый благода́ть духо́вную, отъе́млеши неду́ги, и отго́ниши ду́хи лука́выя, и исцѣля́еши стра́сти, и просвѣща́еши вѣ́рныя блиста́ніи чуде́съ твои́хъ. Съ вы́шними же ли́ки ны́нѣ водворя́яся, священнотаи́нниче, ра́дости неизрече́нныя наслажда́ешися. Его́же моли́ изба́витися вся́каго гнѣ́ва и муче́нія творя́щимъ сла́вную твою́ па́мять.

И а́ще е́сть Пятьдеся́тница: кано́нъ пра́здника на 6 и святи́теля кано́на два́, на 8.

[Кано́нъ пе́рвый,] творе́ніе Питири́ма, епи́скопа Пе́рмскаго, гла́съ 6.
Пѣ́снь 1.

Ирмо́съ: Яко по су́ху пѣшеше́ствовавъ Изра́иль по бе́зднѣ стопа́ми, гони́теля фарао́на ви́дя потопля́ема, Бо́гу побѣ́дную пѣ́снь пои́мъ, вопія́ше.

Отве́рзи ми́ устнѣ́ благода́тію Твоего́ Божества́, Христе́, и, озари́въ, просвѣти́ ду́шу же и се́рдце несумнѣ́нною вѣ́рою воспѣ́ти обрѣ́теніе честны́хъ моще́й святи́теля Твоего́ Алексíя.

Отъ у́стъ недосто́йныхъ, и отъ се́рдца нечи́ста, и отъ недости́жнаго ума́ на́шего пріими́ ма́лое хвале́ніе, святи́телю Алексíе, воспѣ́ти обрѣ́теніе честны́хъ моще́й твои́хъ.

Тро́ицу Ли́цы, Еди́ницу же Существо́мъ проповѣ́далъ еси́, святи́телю, и отъ Тоя́ незави́стныя да́ры прія́лъ еси́, и исцѣле́нія разли́чная подава́еши вѣ́рою приходя́щимъ къ ра́цѣ моще́й твои́хъ.

Богоро́диченъ: Язы́ковъ ча́яніе дре́вле Тобо́ю дарова́ся, Пречи́стая Богоро́дице: Ты́ бо Христа́ родила́ еси́, отъ ро́ва прегрѣше́ній возводя́ща во тлю́ попо́лзшіяся и отъ бѣ́дъ избавля́юща Тя́ велича́ющія.

Другíй кано́нъ, гла́съ 8.
Пѣ́снь 1.

Ирмо́съ: Во́ду проше́дъ, я́ко су́шу, и еги́петскаго зла́ избѣжа́въ, изра́ильтянинъ вопія́ше: Изба́вителю и Бо́гу на́шему пои́мъ.

Да́ждь ми́ сло́во, Сло́ве, и у́мъ мо́й благода́тію Ду́ха просвѣти́, е́же восхвали́ти Твоего́ уго́дника, святи́теля Алексíя.

Испроси́ у Христа́ дарова́ти ми́ благода́ть Ду́ха, е́же соплести́ тебѣ́ достодо́лжную хвалу́, богому́дре о́тче Алексíе.

Пріими́ моле́ніе на́ше, святи́телю Алексíе, и озари́ на́ша мы́сли свѣ́томъ твои́хъ добродѣ́телей, пѣ́ти тя́ досто́йно.

Богоро́диченъ: Земноро́дніи Рождество́мъ Твои́мъ, Дѣ́во Богоро́дице, отъ земли́ къ небе́снѣй высотѣ́ взя́хомся и а́нгельскимъ лико́мъ причто́хомся.

Катава́сія пра́здника.

Пѣ́снь 3.

Ирмо́съ: Нѣ́сть свя́тъ, я́коже Ты́, Го́споди Бо́же мо́й, вознесы́й ро́гъ вѣ́рныхъ Твои́хъ, Бла́же, и утверди́вый на́съ на ка́мени исповѣ́данія Твоего́.

Смиреному́дрія нра́вомъ и о́браза кро́тостію а́нгельскому житію́ подо́бяся, нескве́рно и непоро́чно тѣ́ло твое́ соблю́лъ еси́, пресвяще́нный о́тче, святи́телю Алексíе.

Яко звѣзда́ многосвѣ́тлаго со́лнца, отъ гро́ба возсія́ша, отъ мно́гихъ лѣ́тъ сокрове́ны, честны́я мо́щи святи́теля Алексíя, чуде́съ лучи́ испуща́юще и исцѣле́нія всѣ́мъ подаю́ще.

Ра́достію у́бо возра́довашася вси́ моско́встіи наро́ди, архіере́й вели́кій со святи́тели, и христолюби́віи кня́зи, и церко́вное все́ совокупле́ніе, егда́ обрѣто́шася честны́я твоя́ мо́щи, ничи́мже вреди́мы, святи́телю Алексíе.

Богоро́диченъ: Ро́ждшая Свѣ́тъ всему́ мíру, просвѣти́ на́ша помышле́нія, Пречи́стая Влады́чице, и неразу́мія мглу́ дале́че отжени́, еди́на Богоблаже́нная.

Инъ.

Ирмо́съ: Утверди́ся се́рдце мое́ во Го́сподѣ, вознесе́ся ро́гъ мо́й въ Бо́зѣ мое́мъ, разшири́шася на враги́ моя́ уста́ моя́, возвесели́хся о спасе́ніи Твое́мъ.

Мо́лимъ тя́, святи́телю, моли́ о хва́лящихъ тя́ и притека́ющихъ любо́вію къ честны́мъ моще́мъ твои́мъ, е́же получи́ти грѣхо́въ проще́ніе и бѣ́дъ свобожде́ніе.

Просла́ви тя́ Госпо́дь, святи́телю Алексíе, мно́га бо лѣ́та тѣ́ло твое́, земле́ю покрове́но, соблюде́ нетлѣ́нно, точа́щее чудеса́ прося́щимъ тя́ те́плѣ.

Прояви́ Госпо́дь мо́щи твоя́ и, я́ко свѣти́льникъ свѣ́телъ, поста́ви я́ не подъ спу́домъ, но на свѣ́щницѣ, да свѣ́тятъ сія́ніемъ чуде́съ притека́ющимъ ти́ съ вѣ́рою.

Богоро́диченъ: Приво́димъ Тебѣ́ въ моли́тву ми́лостивную Хода́таицу, ро́ждшую Тя́ пло́тію, Христе́ Бо́же на́шъ, Ея́же моли́твами, Ще́дре, мíръ Тво́й умири́.

Сѣда́ленъ, гла́съ 1:

Па́мять обрѣ́тенія честны́хъ моще́й твои́хъ наста́ на́мъ свѣ́тло празднество́, пречу́дный святи́телю Христо́въ, Алексíе прехва́льне, въ ню́же чуде́съ благода́ть прія́лъ еси́ отъ всѣ́хъ Царя́, Христа́ Бо́га, разли́чныя неду́ги отъ человѣ́къ отгони́ти, и отъ у́зъ избавля́ти, и оби́димыхъ отъ лю́тъ изыма́ти. Тѣ́мже зове́мъ: изба́ви на́съ отъ вра́гъ на́шихъ. [Два́жды.]

Сла́ва, и ны́нѣ, пра́здника или́ богоро́диченъ:

Гавріи́лу вѣща́вшу Тебѣ́, Дѣ́во, — ра́дуйся, — со гла́сомъ воплоща́шеся всѣ́хъ Влады́ка въ Тебѣ́, святѣ́мъ киво́тѣ, я́коже рече́ пра́ведный Дави́дъ, яви́лася еси́ ши́ршая небе́съ, поноси́вши Зижди́теля Твоего́: сла́ва Все́льшемуся въ Тя́; сла́ва Проше́дшему изъ Тебе́; сла́ва Свободи́вшему на́съ Рождество́мъ Твои́мъ.

Пѣ́снь 4.

Ирмо́съ: Христо́съ моя́ си́ла, Бо́гъ и Госпо́дь, честна́я Це́рковь боголѣ́пно пое́тъ, взыва́ющи, отъ смы́сла чи́ста, о Го́сподѣ пра́зднующи.

Благода́рственныя пѣ́сни принесе́мъ Христу́ Бо́гу на́шему, такова́го святи́теля дарова́вшему Це́ркви Свое́й, пречестно́е удобре́ніе и гра́ду Москвѣ́ вели́кое утвержде́ніе.

Яко Ааро́нъ незло́біемъ, Ду́ха благода́тію, сла́вне, въ ри́зу свы́ше обле́клся еси́ преподо́бія и пра́вды и, предстоя́ престо́лу Христо́ву, моли́ о на́съ непреста́нно, святи́телю Алексíе.

Яко луча́ свѣтоза́рнаго со́лнца, отъ гро́ба на́мъ взы́де, святи́телю, озаря́я всѣ́хъ, вѣ́рою почита́ющихъ обрѣ́теніе честны́хъ моще́й твои́хъ, богоблаже́нне Алексíе.

Богоро́диченъ: Ра́дости на́мъ хода́таица яви́лася еси́, я́ко пріе́мши исполне́ніе всего́ Божества́, Всенепоро́чная. Тѣ́мъ вси́, — ра́дуйся, — а́нгелово велегла́сно зове́мъ, Богора́дованная.

Инъ.

Ирмо́съ: Изъ горы́ пріосѣне́нныя, Сло́ве, проро́къ, еди́ныя Богоро́дицы, хотя́ща воплоти́тися богови́дно усмотри́ и со стра́хомъ славосло́вяше си́лу Твою́.

Те́плый предста́телю бѣ́дствующихъ и моля́щихся ско́рый услы́шателю, о́тче на́шъ, святи́телю Алексíе, изба́ви отъ вся́кихъ напа́стей вся́, призыва́ющія тя́.

Свѣти́льниче всесвѣ́тлый, просія́вый добродѣ́тельми твои́ми, озари́ сердца́ на́ша, омраче́нная прило́ги льсти́ваго, и разжени́ тму́ страсте́й при́сно борю́щихъ ны́.

Пра́зднующимъ свѣ́тло па́мять твою́, Благовѣ́рному Импера́тору на́шему и лю́демъ ми́ръ у Христа́ испроси́ и изба́ви отъ междоусо́бныя бра́ни и наше́ствій проти́вныхъ.

Богоро́диченъ: Пала́та прекра́сная и престо́лъ Всецаря́ Христа́ показа́лася еси́: честнѣ́йшая бо еси́ вои́стинну всѣ́хъ тва́рей, Богома́ти, Предста́тельница и покро́въ ду́шъ на́шихъ.

Пѣ́снь 5.

Ирмо́съ: Бо́жіимъ свѣ́томъ Твои́мъ, Бла́же, у́тренюющихъ Ти́ ду́ши любо́вію озари́, молю́ся, Тя́ вѣ́дѣти, Сло́вѣ Бо́жій, и́стиннаго Бо́га, отъ мра́ка грѣхо́внаго взыва́юща.

Благода́тію Боже́ственнаго Ду́ха моли́тва твоя́ поспѣшеству́ема: егда́ у́бо це́рковь паде́ся, образо́въ, и́же въ не́й, святы́хъ ничи́мже вреди́, я́ко ни пра́ху прикосну́тися и́мъ, та́ко и ны́нѣ сохраня́й гра́дъ тво́й отъ сопроти́вныхъ вра́гъ.

Всѣ́мъ христіа́номъ въ бѣда́хъ помо́щникъ и гра́ду Москвѣ́ ве́лій засту́пникъ, неду́гующимъ вра́чь безме́здный, и су́щимъ въ ну́ждахъ и ско́рбехъ гото́вѣйшій утѣ́шитель, и хода́тай те́плый ко всѣ́хъ Царю́, Христу́ Бо́гу.

На земли́ положе́но бы́сть честно́е тѣ́ло твое́, святи́телю Алексíе, ду́хъ же возлетѣ́ на небеса́, со апо́столы же и святи́тели и со а́нгелы ликовству́я, Святѣ́й Тро́ицѣ предстои́ши: моли́ся прилѣ́жно за гра́дъ и лю́ди твоя́, свя́те.

Богоро́диченъ: Та́йны Твоея́ глубина́, Пречи́стая Богоро́дице, а́нгельскія чи́ны удивля́етъ, и честна́я Твоя́ ико́на бѣ́сы смуща́етъ и прогоня́етъ, мы́ же покланя́емъ Ти ся, вѣ́дуще Тя́, Бо́жію Ма́терь.

Инъ.

Ирмо́съ: Отъ но́щи невѣ́дѣнія боговѣ́дѣніемъ просвѣти́вый концы́, просвѣти́ мя у́тромъ человѣколю́бія Твоего́, Го́споди.

Блиста́ньми чуде́съ твои́хъ, богому́дре, це́рковь твою́ озари́ и лю́ди возвесели́, Христа́ моля́ да́ти всѣ́мъ на́мъ грѣхо́въ проще́ніе.

Моли́ о на́съ Всесвяту́ю Тро́ицу, святи́телю Алексíе, я́ко да низпо́слетъ на́мъ благода́ть Свою́, хва́лящимъ тя́ любо́вію.

Всечестна́я ра́ка твоя́, святи́телю Алексíе, чудеса́ то́читъ приходя́щимъ вѣ́рно и прося́щимъ подае́тъ цѣльбу́ оби́льно.

Богоро́диченъ: Еди́наго отъ Тро́ицы воплоще́ннаго Бо́га и́стинно родила́ еси́, Его́же моли́ отъ бѣ́дъ изба́витися рабо́мъ Твои́мъ.

Пѣ́снь 6.

Ирмо́съ: Жите́йское мо́ре, воздвиза́емое зря́ напа́стей бу́рею, къ ти́хому приста́нищу Твоему́ прите́къ, вопію́ Ти: возведи́ отъ тли́ живо́тъ мо́й, Многоми́лостиве.

Христо́вою си́лою обле́клся еси́, Алексíе прему́дре, и священнодѣ́тель и́стиненъ показа́лся еси́, Бо́жіимъ сія́ніемъ просвѣти́вся, я́ко отъ окри́на, честны́я твоея́ ра́ки исцѣле́нія разли́чна неоску́дно подае́ши пра́зднующимъ вѣ́рно честны́хъ твои́хъ моще́й обрѣ́теніе.

Вседѣ́тальнаго Ду́ха пресвѣ́тлыми луча́ми осія́емь при́сно, отъ разли́чныхъ искуше́ній, и бѣ́дъ, и скорбе́й, обдержа́щихъ на́съ, я́ко Христо́въ уго́дникъ, о́тче, изба́ви рабы́ твоя́, свѣтоно́сное твое́ торжество́ всегда́ соверша́ющихъ вѣ́рно, святи́телю Алексíе.

Ясно проповѣ́далъ еси́ еди́нство Тро́ицы, и нему́дрыхъ сердца́ въ ра́зумъ приве́лъ еси́, и ро́ждшему Сло́во сопресто́льно богоразу́міемъ и́стиннымъ ра́вно славосло́вивъ. Тѣ́мъ, въ небе́сныхъ селе́ніихъ водворя́яся, отъ бѣ́дъ на́съ избавля́й.

Богоро́диченъ: Ро́ждшая сія́ніе сла́вы Отчи, Дѣ́во Богоро́дице Всепѣ́тая, просвѣти́ ду́ши пою́щихъ Тя́: Твое́ю бо благода́тію нетлѣ́нны сохране́ны бы́ша честны́я мо́щи святи́теля Алексíя, разли́чная дарова́нія источа́юща вѣ́рою чту́щимъ па́мять его́.

Инъ.

Ирмо́съ: Моли́тву пролію́ ко Го́споду и Тому́ возвѣщу́ печа́ли моя́, я́ко зо́лъ душа́ моя́ испо́лнися и живо́тъ мо́й а́ду прибли́жися, и молю́ся, я́ко Іо́на: отъ тли́, Бо́же, возведи́ мя.

Преосвяще́нне Алексíе, красото́ церко́вная, архіере́евъ благолѣ́піе, равностоя́телю же святы́хъ а́нгелъ, моли́ о хва́лящихъ тя́ и испроси́ получи́ти всѣ́мъ грѣхо́въ оставле́ніе.

Преблаже́нне святи́телю Алексíе, моли́ся прилѣ́жно за гра́дъ и лю́ди твоя́, и обдержа́щія ско́рби премѣни́, и грѣхо́въ проще́ніе и го́рняго весе́лія наслѣ́діе испроси́.

По́двигъ твои́хъ труда́ми прія́лъ еси́ Боже́ственная дарова́нія: честны́я бо твоя́ мо́щи въ шестьдеся́тное лѣ́то обрѣто́шася нетлѣ́нны, исцѣле́нія разли́чная подаю́щія.

Богоро́диченъ: Припа́дающе, мо́лимъ Тя́ прилѣ́жно, всеми́лостивая Влады́чице: моли́ изъ Тебе́ Ро́ждшагося изба́вити ны́ лю́тыя ско́рби, и ва́рварскаго преще́нія, и вся́каго навѣ́та вра́жія.

Конда́къ, гла́съ 8:

Яко со́лнце незаходи́мое, отъ гро́ба возсія́ на́мъ отъ мно́гъ лѣ́тъ сокрове́нны честны́я твоя́ мо́щи нетлѣ́нны, святи́телю Алексíе, тобо́ю благода́ть пріе́млемъ: всю́ бо страну́ сію́ и вся́ ны́ чудесы́ и добро́тою обогаща́еши, дѣ́йствомъ благода́ти, да пое́мъ ти́: ра́дуйся, о́тче, свѣти́ло Россíи.

Икосъ:

Похва́лимъ ны́нѣ святи́теля пѣ́сньми, Россíйскаго па́стыря и учи́теля, и благоче́стно притеце́мъ къ ра́цѣ моще́й его́, и почерпе́мъ дарова́нія, я́ко отъ исто́чника исцѣле́ній. Юже обстоя́ще ны́нѣ, ра́достно весели́мся и, усе́рдно обше́дше, свѣтоно́сными пѣ́сньми просла́вимъ, глаго́люще: чудотво́рче святи́телю Алексíе, чудесы́ обогаща́й всѣ́хъ на́съ содѣ́яніемъ благода́ти, да пое́мъ ти́: ра́дуйся, о́тче, свѣти́ло Россíи.

Пѣ́снь 7.

Ирмо́съ: Росода́тельну у́бо пе́щь содѣ́ла а́нгелъ преподо́бнымъ отроко́мъ, халде́и же опаля́ющее велѣ́ніе Бо́жіе, мучи́теля увѣща́ вопи́ти: благослове́нъ еси́, Бо́же оте́цъ на́шихъ.

Отъ свѣтоно́сныя десни́цы пріе́мъ благода́ть чуде́съ, вѣ́рою прося́щимъ, о́тче, исцѣле́нія разли́чная подава́еши, святи́телю Христо́въ Алексíе, благоче́стно пою́щимъ: благослове́нъ Бо́гъ оте́цъ на́шихъ.

Гро́бъ, идѣ́же положе́но бы́сть честно́е тѣ́ло твое́, сокруше́нъ бы́сть отъ мно́гаго ка́менія, егда́ распаде́ся це́рковь, моще́мъ же твои́мъ ника́коже прикосну́ся. Ихже мы́ зря́ще, неизрече́нно свѣтя́щихся, ра́достно зове́мъ: благослове́нъ Бо́гъ оте́цъ на́шихъ.

Въ Тріе́хъ Ѵпоста́сехъ богонача́льныхъ, держа́ву Отца́, равнодѣ́тельна Сы́на и Ду́ха богосло́вилъ еси́, и То́й тя́ просла́ви, и засту́пника тя́ показа́ на́мъ, зову́щимъ ти́: изба́ви на́съ, свя́те, отъ всѣ́хъ зо́лъ, находя́щихъ на ны́.

Богоро́диченъ: Тя́ Засту́пницу, Чи́стая Богоро́дице, стяжа́хомъ, и на Тя́ вси́ наде́жду возложи́хомъ, и къ Тебѣ́ прибѣга́емъ: спаси́ на́съ, Всенепоро́чная, и изба́ви моли́твами Твои́ми отъ обдержа́щія ско́рби и мяте́жа и лю́тыхъ напа́стей и бѣ́дъ.

Инъ.

Ирмо́съ: Отъ Іуде́и доше́дше, о́троцы, въ Вавило́нѣ иногда́, вѣ́рою Тро́ическою пла́мень пе́щный попра́ша, пою́ще: отце́въ Бо́же, благослове́нъ еси́.

Орга́нъ духо́вный бы́лъ еси́, о́тче святи́телю Алексíе, у́мно дви́жимь благода́тію, при́сно бряца́лъ еси́, поя́: оте́цъ на́шихъ Бо́же, благослове́нъ еси́.

На земли́, я́ко со́лнце, сія́еши чудесы́, о́тче блаже́нне, на небесѣ́хъ же вѣнцено́сецъ, ра́дуяся, пое́ши: оте́цъ на́шихъ Бо́же, благослове́нъ еси́.

Благода́тію Ду́ха честны́я мо́щи святи́теля Алексíя разли́чныя цѣльбы́ подаю́тъ вѣ́рою пою́щимъ: оте́цъ на́шихъ Бо́же, благослове́нъ еси́.

Богоро́диченъ: Тѣле́сныя сла́бости и душе́вныя неду́ги, Богороди́тельнице, любо́вію приходя́щихъ къ кро́ву Твоему́ исцѣли́, врача́ Христа́ на́мъ ро́ждшая.

Пѣ́снь 8.

Ирмо́съ: Изъ пла́мене преподо́бнымъ ро́су источи́лъ еси́ и пра́веднаго же́ртву водо́ю попали́лъ еси́: вся́ бо твори́ши, Христе́, то́кмо е́же хотѣ́ти. Тя́ превозно́симъ во вся́ вѣ́ки.

На небесѣ́хъ чи́ни а́нгельстіи лику́ютъ, и на земли́ вѣ́рныхъ собо́ри свѣ́тло пра́зднуютъ обрѣ́теніе честна́го твоего́ тѣлесе́, святи́телю Алексíе, пѣ́сньми сла́вяще Христа́ во вѣ́ки.

Вонми́ и услы́ши глаго́лы на́ша, святи́телю Христо́въ Алексíе, и спаси́ Держа́внаго Импера́тора на́шего и святи́телей, гра́дъ же и лю́ди изми́ отъ вся́каго зла́, пою́щія и превознося́щія Христа́ во вѣ́ки вся́.

Единонача́льная Тро́ица, всѣ́ми влады́чествующая, Иже тобо́ю воспѣва́емая, си́мъ одари́ тя манове́ніемъ Боже́ственнымъ, цѣ́ло и нетлѣ́нно свяще́нное твое́ тѣ́ло сохрани́, сла́вящихъ бо Ю прославля́етъ во вѣ́ки.

Богоро́диченъ: Не умолчи́мъ никогда́же велича́ти и глаго́лати заступле́ніе Твое́, е́же твори́ши, утиша́ющи мяте́жъ, прибѣга́ющимъ къ покро́ву Твоему́, Богома́ти, и наде́жду тве́рду иму́щимъ Тя́ во вѣ́ки.

Инъ.

Ирмо́съ: На горѣ́ святѣ́й просла́вльшася и въ купинѣ́ огне́мъ Приснодѣ́вы Моисе́ови та́йну я́вльшаго, Го́спода по́йте и превозноси́те во вся́ вѣ́ки.

Потщи́ся, свя́те, изба́вити ны́ отъ напа́стей и скорбе́й мно́гихъ, обдержа́щихъ ны́, плотски́хъ и душе́вныхъ, да, ра́дующеся, пое́мъ Христа́ во вся́ вѣ́ки.

Призыва́ющія тя́, о́тче, изба́ви вся́каго зла́ и лю́тыхъ нахожде́ній и отъ напра́сный сме́рти исхи́ти пою́щія Христа́ во вся́ вѣ́ки.

Ма́ніемъ Боже́ственнымъ разли́чныя цѣльбы́ подаю́тъ честны́я твоя́ мо́щи, святи́телю, прося́щимъ тя́ усе́рдно и Христа́ пою́щимъ во вся́ вѣ́ки.

Богоро́диченъ: Ро́ждшая Еди́наго отъ Тро́ицы, моли́ти не преста́й, Богоро́дице, изба́витися на́мъ отъ бѣ́дъ, пою́щимъ и превознося́щимъ Его́ во вѣ́ки.

Пѣ́снь 9.

Ирмо́съ: Бо́га человѣ́комъ невозмо́жно ви́дѣти, на Него́же не смѣ́ютъ чи́ни а́нгельстіи взира́ти; Тобо́ю бо, Всечи́стая, яви́ся человѣ́комъ Сло́во воплоще́нно, Его́же велича́юще, съ небе́сными во́и, Тя́ ублажа́емъ.

Со апо́столы и святи́тели Влады́чню престо́лу и съ ли́ки а́нгельскими предстоя́, моли́ изба́вити на́съ отъ печа́лей, находя́щихъ на ны́: я́ко бо о́гнь, паля́щь и разжиза́ющь, лю́тый пла́мень, обходя́щій на́съ, отъ него́же изба́ви ны́, святи́телю Алексíе прему́дре, да тя́ ублажа́емъ.

Яви́ся звѣздѣ́ подо́бно, свѣтоно́сивѣй подо́біе о́браза твоего́, духо́вными луча́ми просвѣща́я сердца́ вѣ́рныхъ, богоразу́мія же свѣ́томъ лучи́ чуде́съ испуща́еши и исцѣле́нія подава́еши, святи́телю, пра́зднующимъ любо́вію обрѣ́теніе честны́хъ моще́й твои́хъ.

Въ Тріе́хъ богонача́льныхъ Ѵпоста́сѣхъ Еди́нъ сы́й Бо́гъ, сла́вимый всегда́ и ца́рство имѣ́я непремѣ́нно, всемо́щною Твое́ю десни́цею шата́нія вра́гъ нечести́выхъ, и братоубíйцъ вы́и низве́рзи подъ но́зѣ Благовѣ́рному и Богоразу́мному Импера́тору на́шему.

Богоро́диченъ: Ро́ди вси́ Тя́ ублажа́ютъ ны́нѣ, Пречи́стая Богоро́дице, и вся́къ гра́дъ и страна́, ору́жіе, и заступле́ніе, и забра́ло Тя́ иму́ще, хва́лятся Тобо́ю, я́ко крѣ́пость и́хъ ро́ждшую, Влады́ку всѣ́хъ, Христа́ Бо́га, си́лу иму́щаго непобѣди́мую.

Инъ.

Ирмо́съ: Проявле́нное на горѣ́ законополо́жнику во огни́ и купинѣ́, Рождество́ Приснодѣ́вы, въ на́ше вѣ́рныхъ спасе́ніе, пѣ́сньми немо́лчными велича́емъ.

Поми́луй ны́, смире́нныя рабы́ твоя́, святи́телю Алексíе, и отъ тмы́ скорбе́й изми́ и пла́мене искуше́ній исхи́ти, вѣ́рно къ тебѣ́ притека́ющія.

Яко звѣзда́ свѣтоза́рная, на небесѣ́хъ водворя́яся, съ ли́ки святы́хъ а́нгелъ моли́ся о хва́лящихъ тя́ и притека́ющихъ къ ра́цѣ честны́хъ моще́й твои́хъ.

Архіере́евъ украше́ніе, мона́ховъ удобре́ніе, всѣ́хъ вѣ́рныхъ прописа́ніе, Це́ркве изря́дный па́стырь и учи́тель ты́ еси́, Алексíе преосвяще́нне.

Богоро́диченъ: Безсѣ́менно ро́ждшая пло́тію Ѵпоста́сное Сло́во Пребезнача́льнаго Отца́, моли́ся Ему́, Богоро́дице Всепѣ́тая, спасти́ ду́ши пою́щихъ Тя́.

Свѣти́ленъ:

Пріиди́те вси́, ди́внаго и сла́внаго въ чудесѣ́хъ, вели́каго святи́теля Алексíя пѣ́сньми свяще́нными похва́лимъ, Россíйскаго свѣти́льника и учи́теля, и а́нгельскимъ чино́мъ ссе́льника, и моли́твенника те́пла ко Го́споду о чту́щихъ па́мять его́. [Два́жды.]

Сла́ва, и ны́нѣ, пра́здника или́ богоро́диченъ:

По Бо́зѣ упова́ніе на́ше иму́ще на Тя́, Пречи́стая Богоро́дице, мо́лимъ Ти ся: моли́ся о на́съ ко изъ Тебе́ Ро́ждшемуся невре́дны на́съ да́же до конца́ сохрани́ти, прири́щущихъ къ покро́ву Твоему́.

На хвали́техъ стихи́ры на 4, гла́съ 8. Подо́бенъ: О, пресла́внаго чудесе́!

О, пресла́вное чу́до,* а́нгеломъ подо́бное,* человѣ́комъ же недовѣ́домое,* е́же мно́го вре́мя во гро́бѣ лежа́щее пречестно́е тѣ́ло* обрѣ́теся невреди́мо,* чу́днаго и преди́внаго святи́теля Алексíя,* исцѣля́ющее неду́ги неисцѣ́льныя* и прогоня́ющее ду́хи лука́выя отъ приходя́щихъ къ нему́* и ра́достными сердцы́ Христа́ прославля́ющихъ,* возвели́чившаго Своего́ уго́дника. [Два́жды.]

О, пресла́внаго чудесе́,* пріиди́те, наслади́мся,* я́ко отъ окри́на, благи́ми уха́ніи,* невла́жную серде́цъ на́шихъ ни́ву умягчи́мъ:* ка́ко пло́тяный человѣ́къ* небесохо́децъ бы́сть,* какову́ же лѣ́ствицу водрузи́,* и боже́ственнаго ра́зума восхо́дъ обрѣ́те,* и къ Бо́гу прибли́жися* и, съ ли́ки святы́хъ а́нгелъ* Боже́ственному престо́лу предстоя́,* о на́съ непреста́нно мо́лится?

О, пресла́вное чу́до,* богоизбра́нный святи́телю,* все́й странѣ́ Россíйстѣй звѣзда́ пресвѣ́тлая,* и всѣ́мъ вѣ́рнымъ дарова́нія разли́чная подава́еши* отъ сокро́вища неиздае́ма,* исто́чникъ исцѣле́ній,* немощны́мъ врачевство́ безме́здно,* въ напа́стехъ гото́вѣйшій утѣ́шитель* и моли́твенникъ теплѣ́йшій,* Алексíе прему́дре,* моля́ о на́съ не преста́й Человѣколю́бца,* и́стинный на́шъ учи́телю.

Сла́ва, гла́съ 8:

На не́бо веду́щій пу́ть, небла́зненна спу́тника обрѣ́тъ, ле́гцѣ преимени́таго гра́да до́йде, поще́ніемъ го́рняго Іерусали́ма прекра́сная селе́нія ви́дитъ; и ны́нѣ къ духо́внѣй трапе́зѣ совокупля́етъ на́съ те́плый на́шъ засту́пникъ, преосвяще́нный и честны́й на́шъ учи́тель Алексíй, чудотво́рныя и многоцѣле́бныя своя́ мо́щи предложи́въ на́мъ, я́ко снѣ́дь сла́дку и всестро́йну, во исцѣле́ніе неду́жнымъ и скорбя́щимъ во утѣше́ніе, прибѣ́жище же тружда́ющимся и духо́въ злы́хъ отгоне́ніе. Пріиди́те, вси́ Россíйстіи наро́ди, къ честнѣ́й ра́цѣ его́, и, разли́чная дарова́нія пріе́млюще, того́ просла́вимъ и мо́лимся, вопію́ще: того́ моли́твами, Христе́ Бо́же, спаси́ ду́ши на́ша.

И ны́нѣ, дне́ или́ богоро́диченъ:

[Влады́чице, пріими́ моли́твы ра́бъ Твои́хъ и изба́ви на́съ отъ вся́кія ну́жды и печа́ли.]

Славосло́віе вели́кое. [Ектеніи́] и отпу́стъ.



НА ЛИТУРГІИ,

Блаже́нна отъ кано́на, пѣ́снь 3 и 6. Проки́менъ, [гла́съ 1]: Уста́ моя́ возглаго́лютъ прему́дрость,* и поуче́ніе се́рдца моего́ ра́зумъ. Сти́хъ: Услы́шите сія́ вси́ язы́цы, [внуши́те вси́ живу́щіи по вселе́ннѣй]. Апо́столъ ко Евре́емъ, зача́ло 335. Аллилу́ія, гла́съ 2: Уста́ пра́веднаго поуча́тся прему́дрости, [и язы́къ eго́ возглаго́летъ су́дъ]. Сти́хъ: Зако́нъ Бо́га его́ въ се́рдцѣ его́, [и не за́пнутся стопы́ eго́]. Ева́нгеліе Луки́, зача́ло 24. Прича́стенъ: Въ па́мять вѣ́чную бу́детъ пра́ведникъ, [отъ слу́ха зла́ не убои́тся].

Источникъ: Минíа, мѣ́сяцъ Ма́ій. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 149 об. – 160.

/ Къ оглавленію раздѣла /


Наверхъ / Къ титульной страницѣ

0