Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - четвергъ, 27 апрѣля 2017 г. Сейчасъ на порталѣ посѣтителей - 9.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Ма́ія въ 19-й де́нь.
Слу́жба преподо́бному и богоно́сному отцу́ на́шему Корни́лію, игу́мену Палеостро́вскому, чудотво́рцу.

НА МАЛѢЙ ВЕЧЕРНИ,
[На Го́споди, воззва́хъ:] стихи́ры на 4, гла́съ 1. Подо́бенъ: Яко безпло́тнымъ.

Пріиди́те, вѣ́рныхъ мно́жество, и сра́дуйтеся въ свѣтоно́сный де́нь па́мяти преподо́бнаго отца́ на́шего, въ пусты́ни се́й на не́бо вознося́щася, крилѣ́ ева́нгельскихъ до́блестей воспрія́вшаго и небе́сныхъ бла́гъ рачи́теля бы́вшаго, его́же, я́ко Бо́жія уго́дника, ублажа́юще, грѣхо́въ оставле́ніе моли́твами его́ пріе́млемъ.

Воздержа́ніемъ мірскíя сла́дости попра́вши, сле́зными то́ками пла́мень страсте́й погаси́лъ еси́, богоно́сне о́тче Корни́ліе, а́лчбою и жа́ждею пло́ть изнуря́я, ду́шу свою́ очи́стилъ еси́, тѣ́мъ и въ благода́тный ра́й возше́лъ еси́, плоды́ безсме́ртія вкуша́я и сла́дость вѣ́чныя жи́зни.

Мы́сленныхъ враго́въ истреби́вши, я́ко безпло́тенъ, на земли́ пожи́лъ еси́, Корни́ліе чу́дне, и во оби́тели се́й, я́ко звѣзда́ пресвѣ́тлая, добродѣ́тельми возсія́лъ еси́ и чуде́съ свѣ́тлостію. Тѣ́мже па́мять твою́ дне́сь ублажа́юще, во умиле́ніи вопіе́мъ ти́: преподо́бне о́тче, моли́ Христа́ Бо́га грѣхо́въ оставле́ніе дарова́ти любо́вію чту́щимъ тя́.

Сла́ва, гла́съ 2:

Ева́нгелія Христо́ва и́стинный послу́шникъ яви́лся еси́, преподо́бне, мíръ и вся́, я́же въ не́мъ, я́ко не су́щая, оста́вилъ еси́ любве́ ра́ди Христо́вы, по́стъ возлюби́лъ еси́, добродѣ́тельми украси́вся изря́дно, и хра́мъ Пресвятѣ́й Богоро́дицѣ, въ похвалу́ Рождества́ Ея́, воздви́глъ еси́. Тѣ́мже, безмо́лвія и благоче́стія рачи́телю, въ торжествѣ́ премíрномъ богозрѣ́ніемъ наслажда́ющуся, возопіе́мъ: о, преподо́бне о́тче Корни́ліе, я́ко имѣ́я дерзнове́ніе ко Христу́ Бо́гу, моли́, е́же спасти́ всѣ́хъ на́съ, благоче́стно чту́щихъ всечестну́ю па́мять твою́.

И ны́нѣ, богоро́диченъ, гла́съ то́йже:

Безсѣ́менно заче́ншая и безстра́стно роди́вшая Бо́га Сло́ва, христіа́нъ Предста́тельнице, Богоро́дице Влады́чице! Къ Тебѣ́ припа́даемъ, Тя́ пое́мъ и славосло́вимъ и Тебѣ́ вси́ мо́лимся со слеза́ми: воззри́ на на́съ милосе́рдымъ о́комъ, отъ и́га страсте́й изба́ви на́съ и безстра́стіе да́руй душа́мъ на́шимъ.

На стихо́внѣ стихи́ры, гла́съ 2. Подо́бенъ: До́ме Евфра́ѳовъ.

До́мъ добродѣ́телей ты́ показа́лся еси́, и прія́телище дарова́ній, богоно́се о́тче Корни́ліе.

Сти́хъ: Честна́ предъ Го́сподемъ сме́рть преподо́бныхъ Его́.

Душегуби́тельныя стра́сти побѣди́лъ еси́ по́стническихъ трудо́въ по́тами, преподо́бне Корни́ліе.

Сти́хъ: Блаже́нъ му́жъ, боя́йся Го́спода, въ за́повѣдехъ Его́ восхо́щетъ зѣло́.

Чуде́съ исто́чника, богому́драго Корни́лія, чистото́ю моли́твы Бо́гови прибли́жившагося, дарова́ се́й оби́тели ди́вный во святы́хъ Госпо́дь, нечи́стыя отгоня́ти ду́хи, въ наслажде́ніе вѣ́рно почита́ющимъ святу́ю па́мять его́.

Сла́ва, гла́съ то́йже:

Отверже́ніемъ мíра Христу́ послѣ́довалъ еси́ и у́мнымъ о́комъ зрѣ́лъ еси́ предъ собо́ю Го́спода, блаже́нне, равноа́нгельское житіе́ пожи́въ, благода́тный бо свѣ́тъ Божества́ на трудолю́бный по́стничества пу́ть наста́ви тя́ и, сквозѣ́ страсте́й свирѣ́пое мо́ре преве́дши, возведе́ на го́ру безстра́стія, духо́вныя ма́нны прича́стника сотвори́ и въ небе́сный Сіо́нъ введе́, идѣ́же со а́нгелы ликовству́я, Всеблага́го Творца́ моли́, е́же спасти́ ду́ши на́ша.

И ны́нѣ, богоро́диченъ:

Го́рніи Тя́ ли́цы, Богоро́дице Дѣ́во, пою́тъ съ до́льними, сла́вяще непреста́нно рождество́ Твое́ пречи́стое.

Тропа́рь, гла́съ 5:

Отъ ю́ности, прему́дре, приле́жно подвиза́вся, отъ Бо́га наставля́емь, оте́чество свое́ оста́вль — гра́дъ Пско́въ, и всели́ся въ пусты́ню, во ото́цѣ вели́каго е́зера Оне́га, и́ноки собра́ му́дрѣ и извѣще́ніемъ Свята́го Ду́ха оби́тель согради́ и хра́мъ созда́ Пресвятѣ́й Богоро́дицѣ въ похвалу́ Рождества́ Ея́, струя́ми же сле́зъ твои́хъ безпло́тныя враги́ погрузи́лъ еси́ и житія́ твоего́ цѣлому́дріемъ со а́нгельскими ли́ки совокупи́ся, преподо́бне о́тче Корни́ліе, съ ни́миже Христа́ Бо́га моли́ спасти́ся душа́мъ на́шимъ.

[Сла́ва, и ны́нѣ, богоро́диченъ, гла́съ то́йже:

Ра́дуйся, две́ре Госпо́дня непроходи́мая; ра́дуйся, стѣно́ и покро́ве притека́ющихъ къ Тебѣ́; ра́дуйся, необурева́емое приста́нище и неискусобра́чная, ро́ждшая пло́тію Творца́ Твоего́ и Бо́га, моля́щи не оскудѣва́й о воспѣва́ющихъ и кла́няющихся Рождеству́ Твоему́.]


НА ВЕЛИЦѢЙ ВЕЧЕРНИ,
Блаже́нъ му́жъ.., [1-й антифо́нъ.] На Го́споди воззва́хъ: стихи́ры на 8, гла́съ 6. Подо́бенъ: Все́ упова́ніе мое́.

Любо́вь Содѣ́теля всѣ́хъ превлече́ тя́ къ себѣ́, преподо́бне, ея́же ра́ди оста́вилъ еси́ вся́ мíра сего́ пристра́стія и оте́чество свое́, я́ко вредя́щее пу́ть спасе́нія, ро́дъ же и дру́ги избра́ себѣ́ бы́ти святы́я а́нгелы и въ небе́сныхъ дво́рѣхъ водвори́тися возжелѣ́лъ еси́, въ ни́хже предстоя́ ны́нѣ престо́лу Пресвяты́я Тро́ицы, моли́ся о душа́хъ на́шихъ. [Два́жды.]

Умнымъ о́комъ смотря́я бу́дущая безъ конца́ пребыва́нія, созерца́я блаже́нство рая́, отъ шу́ихъ же зря́ му́ки, и того́ ра́ди въ пеще́ру ма́лу и те́мну затвори́лъ еси́ себе́, преподо́бне, да сего́ вѣ́ка тѣсното́ю мо́жеши наслѣ́довати ра́йскую несказа́нную сла́дость и Ца́рствіе небе́сное, въ не́мъ же сы́й ны́нѣ, моли́ся о душа́хъ на́шихъ.

Пе́рвѣе у́бо стра́хомъ бу́дущихъ му́къ отри́нулъ еси́ вся́ мірска́я пристра́стія, пото́мъ же мздо́ю ра́йскаго воздая́нія обогати́тися возжелѣ́лъ еси́, та́же, любо́вію Госпо́днею уязви́вся, проше́лъ еси́ вся́ степе́ни соверше́нства, бы́въ возлю́бленъ Го́сподеви. Тѣ́мже моли́ся, преподо́бне, о душа́хъ на́шихъ.

Ины стихи́ры, гла́съ 4. Подо́бенъ: Зва́нный.

Егда́ любо́вь Бо́жія мы́сли твое́й предста́, тогда́, о́тче Корни́ліе, всю́ мíра суету́, я́ко ничто́же су́щую, и гра́дъ сво́й оста́вль, во страну́ чу́жду пресели́лся еси́ и, во́ли Боже́ственнѣй во все́мъ повину́яся, жесто́кій пу́ть преше́лъ еси́, веду́щій тя́ въ простра́нство небе́снаго Ца́рствія, его́же сподо́битися и на́мъ моли́, преподо́бне. [Два́жды.]

Егда́, во́лею Бо́жіею наставля́емь, пріи́де во страну́ вели́каго е́зера Оне́га, на не́мже обрѣ́те мѣ́сто, имену́емое Палеостро́въ, въ о́ньже всели́вся, взыска́ себѣ́ пеще́ру въ разсѣ́линахъ ка́менныхъ, въ не́йже неусы́пными труды́ тѣ́ло свое́ изнуря́я, въ постѣ́ и моли́твѣ пребыва́лъ еси́, простра́нство небе́снаго Ца́рствія взыску́я, его́же сподо́битися и на́мъ моли́, преподо́бне.

Егда́ по́двиги твоя́ яви́ Бо́гъ лю́демъ, лю́бящимъ спасе́ніе, тогда́ собра́шася къ тебѣ́ лю́діе боголюби́віи, и́хже ра́ди спасе́нія въ безмо́лвіи ото́ка киновíю возгради́лъ еси́ и це́рковь Богома́тери, въ сла́ву Рождества́ Ея́, воздви́глъ еси́, да приноси́мыми въ не́й моли́твами съ ча́ды твои́ми получи́ши Ца́рствіе небе́сное, его́же сподо́битися и на́мъ моли́, преподо́бне.

Сла́ва, гла́съ 6:

О, ди́внаго твоего́ му́жества, преподо́бне! На пло́ть свою́, я́ко на врага́, возста́лъ еси́, распина́ющи ю́, со страстьми́ и по́хотьми, и посто́мъ, бдѣ́ніемъ же и всено́щнымъ стоя́ніемъ ду́ху му́дрѣ покоря́ющи; тѣ́мже и всели́лся еси́ въ пеще́ру те́мну и тѣ́сну, въ не́й живы́й, слеза́ми и безстра́стіемъ проти́ву неви́димыхъ враго́въ ко́знемъ подвиза́лся еси́. Сего́ ра́ди отъ Вседержи́тельныя Десни́цы досто́йный вѣне́цъ прія́лъ еси́, руково́дствуя живу́щая съ тобо́ю ча́да твоя́, прине́слъ еси́ и́хъ, я́ко пло́дъ добродѣ́телей стори́чный, Бо́гови, Ему́же ны́нѣ предстоя́, моли́ся о на́съ, свя́те Корни́ліе.

И ны́нѣ, богоро́диченъ:

Кто́ Тебѣ́ не ублажи́тъ, [Пресвята́я Дѣ́во? Кто́ ли не воспое́тъ Твоего́ Пречи́стаго Рождества́? Безлѣ́тно бо отъ Отца́ возсія́вый Сы́нъ Единоро́дный, То́йже отъ Тебе́, Чи́стыя, про́йде, неизрече́нно вопло́щся: естество́мъ Бо́гъ Сы́й и естество́мъ бы́въ Человѣ́къ на́съ ра́ди; не во двою́ лицу́ раздѣля́емый, но во двою́ естеству́ несли́тно познава́емый. Того́ моли́, Чи́стая Всеблаже́нная, поми́ловатися душа́мъ на́шимъ].

Вхо́дъ. Проки́менъ дне́ и чте́нія три́.

При́тчей чте́ніе.

Па́мять пра́веднаго съ похвала́ми, и благослове́ніе Госпо́дне на главѣ́ его́. Блаже́нъ человѣ́къ, и́же обрѣ́те прему́дрость, и сме́ртенъ, и́же увѣ́дѣ ра́зумъ. Лу́чше бо сію́ купова́ти, не́жели зла́та и сребра́ сокро́вища. Честнѣ́йшая же е́сть ка́меній многоцѣ́нныхъ, все́ же честно́е недосто́йно ея́ е́сть. Долгота́ бо дне́й и лѣ́та живота́ въ десни́цѣ ея́, въ шу́йцѣ же ея́ бога́тство и сла́ва. Отъ у́стъ ея́ исхо́дитъ пра́вда, зако́нъ же и ми́лость на язы́цѣ но́ситъ. Послу́шайте у́бо мене́, о ча́да, честна́я бо реку́, и блаже́нъ человѣ́къ, и́же пути́ моя́ сохрани́тъ: исхо́ди бо мои́ — исхо́ди живота́, и уготовля́ется хотѣ́ніе отъ Го́спода. Сего́ ра́ди молю́ ва́съ и предлага́ю мо́й гла́съ сыново́мъ человѣ́ческимъ. Я́ко а́зъ, прему́дрость, устро́ихъ совѣ́тъ, и ра́зумъ и смы́слъ азъ призва́хъ. Мо́й совѣ́тъ и утвержде́ніе, мо́й ра́зумъ, моя́ же крѣ́пость. Азъ мене́ лю́бящія люблю́, и́щущіи же мене́ обря́щутъ благода́ть. Разумѣ́йте у́бо, незло́бивіи, кова́рство, ненака́заніи же, прилага́йте сердца́. Послу́шайте мене́ и па́ки, честна́я бо реку́, и отве́рзу отъ усте́нъ пра́вая, я́ко и́стинѣ поучи́тся горта́нь мой, ме́рзки же пре́до мно́ю устны́ лжи́выя. Съ пра́вдою вси́ глаго́лы у́стъ мои́хъ, ничто́же въ ни́хъ стро́потно, ниже́ развраще́нно. Вся́ пра́ва су́ть разумѣва́ющимъ и про́ста обрѣта́ющимъ ра́зумъ. Науча́ю бо ва́съ и́стинѣ, да бу́детъ о Го́сподѣ наде́жда ва́ша, и испо́лнитеся Ду́ха.

При́тчей чте́ніе.

Уста́ пра́веднаго ка́плютъ прему́дрость, язы́къ же непра́веднаго поги́бнетъ. Устнѣ́ муже́й пра́ведныхъ ка́плютъ благода́ти, уста́ же нечести́выхъ развраща́ются. Мѣ́рила льсти́вая ме́рзость предъ Го́сподемъ, вѣ́съ же пра́ведный прія́тенъ Ему́. Идѣ́же а́ще вни́детъ досажде́ніе, та́мо и безче́стіе, уста́ же смире́нныхъ поуча́ются прему́дрости. Соверше́ніе пра́выхъ наста́витъ и́хъ, и поползнове́ніе отрица́ющихся упасе́тъ и́хъ. Не по́льзуютъ имѣ́нія въ де́нь я́рости, пра́вда же изба́витъ отъ сме́рти. Умеръ пра́ведный, оста́ви раска́яніе, нару́чна же быва́етъ и посмѣя́тельна нечести́выхъ па́губа. Пра́вда непоро́чнаго исправля́етъ пути́, въ нече́стіе же па́даетъ непра́вда. Пра́вда муже́й пра́выхъ изба́витъ и́хъ, безсовѣ́стіемъ же плѣня́ются беззако́нніи. Сконча́вшуся му́жу пра́ведну, не поги́бнетъ наде́жда, похвала́ же нечести́выхъ поги́бнетъ. Пра́ведникъ отъ ло́ва убѣ́гнетъ, въ него́же мѣ́сто предае́тся нечести́вый. Во устѣ́хъ нечести́выхъ сѣ́ть гра́жданомъ, чу́вство же пра́ведныхъ благопоспѣ́шное. Во благи́хъ пра́ведныхъ испра́вится гра́дъ, и въ поги́бели нечести́выхъ ра́дованіе. Во благослове́ніи пра́выхъ возвы́сится гра́дъ, усты́ же нечести́выхъ раскопа́ется. Руга́ется гра́жданомъ лише́нный ра́зума, му́жъ же му́дрый безмо́лвіе во́дитъ.

Прему́дрости Соломо́ни чте́ніе.

Пра́ведныхъ ду́ши въ руцѣ́ Бо́жіей, и не прико́снется и́хъ му́ка. Непщева́ни бы́ша во очесѣ́хъ безу́мныхъ умре́ти, и вмѣни́ся озлобле́ніе исхо́дъ и́хъ, и е́же отъ на́съ ше́ствіе — сокруше́ніе, они́ же су́ть въ ми́рѣ. Ибо предъ лице́мъ человѣ́ческимъ, а́ще и му́ку пріи́мутъ, упова́ніе и́хъ безсме́ртія испо́лнено. И вма́лѣ нака́зани бы́вше, вели́кими благодѣ́тельствовани бу́дутъ, я́ко Бо́гъ искуси́ я́ и обрѣ́те и́хъ досто́йны Себѣ́. Я́ко зла́то въ горни́лѣ, искуси́ и́хъ и, я́ко всепло́діе же́ртвенное, прія́тъ я́. И во вре́мя посѣще́нія и́хъ, возсія́ютъ, и я́ко и́скры по сте́блію, потеку́тъ. Су́дятъ язы́комъ и облада́ютъ людьми́, и воцари́тся Госпо́дь въ ни́хъ во вѣ́ки. Надѣ́ющіися На́нь разумѣ́ютъ и́стину и вѣ́рніи въ любви́ пребу́дутъ Ему́, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.

На литíи стихи́ры, гла́съ 1:

Пра́зднуя па́мять твою́, о́тче Корни́ліе, собра́вшіися ча́да твоя́, любе́зно облобыза́емъ твою́ ра́ку и, твоя́ моли́твы на по́мощь призыва́юще, про́симъ твоего́ заступле́нія: предста́ни, о на́съ, преподо́бне, моля́ся къ ще́дрому Влады́цѣ и Того́ ро́ждшей Богома́тери, улучи́ти на́мъ ми́лость въ де́нь Су́дный и десна́го стоя́нія причасти́тися.

Гла́съ 2:

Обоне́жстіи лю́діе, небе́снаго жи́теля стяжа́вше, къ нему́же ны́нѣ притека́юще, возопіи́мъ: спаси́ ны́ отъ бѣ́дъ моли́твами твои́ми, свя́те Корни́ліе.

Гла́съ 3:

Вели́кій гра́де Пско́ве, весели́ся, въ не́мже роди́ся му́жъ жела́ній духо́вныхъ; Оло́нецтіи предѣ́лы, лику́йте, въ ва́съ бо по́двиги и труды́ оте́цъ показа́; ра́дуйся и ты́, е́зеро Оне́го, имѣ́я кра́сный Палео́токъ, въ не́мже оте́цъ киновíю возгради́, я́же бы́сть и́нокомъ спаси́тельное прибѣ́жище; ра́дуйся и ты́, богонасажде́нный ото́че, идѣ́же процвѣте́, я́ко ке́дръ, добродѣ́тели прекра́сный; ра́дуйся, и сосѣ́дствующая того́ оби́тели ве́се Толву́йская, возвѣща́ющи ку́пно по́двиги уго́дника Бо́жія, его́же ра́ку цѣлу́юще, усе́рдно вси́ возопіи́мъ къ нему́: не преста́й моли́ти о на́съ Влады́ку Христа́, о́тче преподо́бне Корни́ліе.

Сла́ва, гла́съ 4:

Адама́нтово терпѣ́ніе преподо́бнаго ви́дѣвше, о дру́зи, возвесели́мся: дѣ́лаше бо вы́ну тому́ вра́гъ бѣды́, изощря́я на́нь лю́тыя страсте́й стрѣ́лы, и разли́чными по́мыслы томя́ше его́ ду́шу, но того́ крѣ́пость зря́ посрамля́шеся, во́ина его́ ви́дя изря́дна. Убо и мы́, я́ко крѣ́пкому побѣди́телю лю́тыхъ страсте́й и преди́вному отцу́ на́шему, возопіи́мъ: отжени́ отъ на́съ стра́сти на́ша, засту́пниче на́шъ Корни́ліе.

И ны́нѣ, богоро́диченъ:

При́зри на моле́нія [Твои́хъ ра́бъ, Всенепоро́чная, утоля́ющи лю́тая на ны́ воста́нія, вся́кія ско́рби на́съ измѣня́ющи, Тя́ бо еди́ну тве́рдое и извѣ́стное утвержде́ніе и́мамы, и Твое́ предста́тельство стяжа́хомъ, да не постыди́мся, Влады́чице, Тя́ призыва́ющіи, потщи́ся на умоле́ніе Тебѣ́ вѣ́рно вопію́щихъ: ра́дуйся, Влады́чице, всѣ́хъ по́моще, ра́досте и покро́ве, и спасе́ніе ду́шъ на́шихъ].

На стихо́внѣ стихи́ры, гла́съ 5. Подо́бенъ: Ра́дуйся.

Ра́дуйся, о́тче Корни́ліе, гра́ду Пско́ву похвала́ вели́кая, Обоне́жстѣй странѣ́ красота́ неувяда́емая, Палео́строву украше́ніе ди́вное, верте́пу твоему́ сла́ва безсме́ртная; ра́дуйся, Боже́ственный хра́ме, въ не́мже благоизво́ли Всеблагíй Госпо́дь тѣ́лу твоему́ свято́му почи́ти и ра́ку твою́ чуде́съ исто́чникомъ содѣ́лати; ра́дуйся, оби́тель свята́я, въ ню́же соше́дшеся любо́вію въ па́мять твою́, свѣ́тло торжеству́юще, восхва́лимъ безмо́лвія рачи́теля, и́стиннаго по́стника, всеизря́днаго дѣ́лателя зако́на Бо́жія, свѣти́льника благода́тнаго, небе́снаго Сіо́на жи́теля, зако́нъ бо пло́ти ума́ твоего́ не возмо́же поколеба́ти, но зако́ну ума́, о Бо́зѣ влады́чествующему, зако́нъ во удесѣ́хъ побѣжде́нъ быва́етъ, е́же принося́ тебѣ́ ны́нѣ, свя́те Корни́ліе, Христа́ прилѣ́жно моли́, дарова́ти на́мъ ве́лію ми́лость.

Сти́хъ: Честна́ предъ Го́сподемъ сме́рть преподо́бныхъ Его́.

Ра́дуйся, о́тче Корни́ліе, я́ко ото́къ тво́й яви́ся обурева́емымъ приста́нище ти́хое, въ не́мъ же благопло́дный са́дъ насади́лъ еси́; ра́дуйся, я́ко и по сме́рти безсме́ртною сла́вою сія́ющи, блиста́еши съ вѣ́рою приходя́щимъ чудесы́ твои́ми; ра́дуйся, я́ко ра́бъ вѣ́ренъ Влады́цѣ, вше́лъ еси́ въ несконча́емую ра́дость Го́спода своего́, Его́же прилѣ́жно моли́ дарова́ти на́мъ ве́лію ми́лость.

Сти́хъ: Блаже́нъ му́жъ, боя́йся Го́спода, въ за́повѣдехъ Его́ восхо́щетъ зѣло́.

Ра́дуйся, о́тче Корни́ліе, созда́телю до́му Богома́тере усе́рдный, пра́вило и́нокомъ изя́щное, па́стырю слове́сныхъ ове́цъ ди́вный, па́губныхъ страсте́й обличи́телю, послѣ́дователю Христо́въ усе́рднѣйшій, милосе́рдія пучи́но вели́кая, напа́ствуемыхъ предста́телю теплѣ́йшій, скорбя́щимъ утѣ́шителю сладча́йшій, боля́щимъ врачу́ безме́здный, въ мо́ри пла́вающимъ окорми́телю предо́брый, Христа́ прилѣ́жно моли́ дарова́ти на́мъ ве́лію ми́лость.

Сла́ва, гла́съ то́йже. Самогла́сенъ:

О, преподо́бне, отъ Христо́выхъ слове́съ научи́вся вну́тренняго человѣ́ка отъ страсте́й грѣхо́вныхъ очища́ти, — отъ се́рдца бо исхо́дятъ помышле́нія зла́я, — тѣ́мъ въ безмо́лвіи добродѣ́телей дѣ́ланіемъ и благода́ти дѣ́йствомъ серде́чную чистоту́ стяжа́въ, сосу́дъ чи́стъ Свято́му Ду́ху яви́ся. Обоне́жская страна́, хва́лящися, торжеству́етъ, стяжа́вши себѣ́ во пло́ти а́нгела, и ото́къ съ пеще́рою украша́ются, возрасти́вши въ себѣ́ пло́дъ еде́мскій, ди́внаго отца́ Корни́лія, къ нему́же и мы́ возопіи́мъ: моли́ся о на́съ, преподо́бне.

И ны́нѣ, богоро́диченъ:

Хра́мъ и Две́рь еси́, [Пала́та и Престо́лъ Царе́въ, Дѣ́во всечестна́я, Еюже Изба́витель мо́й, Христо́съ Госпо́дь, во тмѣ́ спя́щимъ яви́ся, Со́лнце сы́й пра́вды, просвѣти́ти хотя́, я́же созда́ по о́бразу Своему́ руко́ю Свое́ю. Тѣ́мже, Всепѣ́тая, я́ко Ма́терне дерзнове́ніе къ Нему́ стяжа́вшая, непреста́нно моли́, спасти́ся душа́мъ на́шимъ].

[На благослове́ніи хлѣ́бовъ: Тропа́рь свята́го, два́жды [пи́санъ на ма́лѣй вече́рни] и Богоро́дице Дѣ́во.., еди́ножды.]



НА УТРЕНИ,
[На Бо́гъ Госпо́дь: Тропа́рь преподо́бнаго, два́жды. Сла́ва, и ны́нѣ, богоро́диченъ.]

По 1-й каѳи́змѣ сѣда́ленъ, гла́съ 2:

Жела́я бу́дущихъ бла́гъ, презрѣ́лъ еси́ настоя́щая и, въ пусты́ню всели́вся, посто́мъ и труды́ тѣ́ло свое́ изнури́лъ еси́ и, ду́шу добродѣ́тельми очи́стивъ, къ Бо́гу возше́лъ еси́, Ему́же предстоя́, моли́ о на́съ, преподо́бне. [Два́жды.]

Сла́ва, и ны́нѣ, богоро́диченъ:

Во́лны напа́стей воста́ша на ны́, Дѣ́во, въ ни́хже лю́тѣ обурева́еми, бѣ́дствуемъ, Ты́ же, о Богома́ти, простри́ держа́вную Твою́ десни́цу, изъ глубины́ зо́лъ въ приста́нище ми́лости Твоея́ введи́, Влады́чице.

По 2-й каѳи́змѣ сѣда́ленъ, гла́съ 3:

Ото́ка оти́шіе посредѣ́ вели́каго е́зера Оне́га узрѣ́въ, всели́лся еси́ въ о́нь, преподо́бне, и, въ пеще́ру те́мну и тѣ́сну вше́дъ, моли́твами и посто́мъ Бо́гови угоди́лъ еси́, Ему́же ны́нѣ предстоя́, моли́ся о на́съ, я́ко оте́цъ о дѣ́техъ, ко Влады́цѣ. [Два́жды.]

Сла́ва, и ны́нѣ, богоро́диченъ:

Кто́, къ Тебѣ́ прише́дъ, отхо́дитъ печа́ленъ, о всего́ мíра сладча́йшая Ра́досте! Ты́ бо еси́ безнаде́жнымъ крѣ́пкая наде́жда и ни́щимъ неотъе́млемое бога́тство, грѣ́шнымъ же те́плая Засту́пнице и ско́рая ко спасе́нію по́мощь.

По поліеле́и сѣда́ленъ, гла́съ 8:

Крѣ́пкаго твоего́ по Бо́зѣ жела́нія не отвлеко́ша, о́тче Корни́ліе, ни оте́чества привѣ́ты, ни друго́въ любле́нія, и пусты́нный гла́дъ, ну́жда, труды́ и бдѣ́ніе не мого́ша твоего́ тѣ́ла разсла́бити, и пеще́ра, мала́ и те́мна, не приведе́ тя́ во у́жасъ и уны́ніе, но, я́ко адама́нтъ, и посредѣ́ пе́щи страсте́й стоя́, невреди́мъ пребы́лъ еси́, и на́мъ одолѣ́ти сія́ помози́ и моли́ся о на́съ, преподо́бне. [Два́жды.]

Сла́ва, и ны́нѣ, богоро́диченъ:

Къ кому́ прибѣ́гнемъ, бѣ́дніи грѣ́шницы, всѣ́мъ страсте́мъ пови́нніи лю́діе, ра́звѣ Тебе́, Всеми́лостивая Влады́чице? Твои́хъ бо щедро́тъ не оскудѣва́етъ мо́ре, Твоего́ заступле́нія не безмо́лвствуетъ сло́во, тѣ́мже всѣ́хъ на́съ поми́луй, Цари́це, вся́ ны́ спаси́, Богома́ти: Ты́ бо еси́ избра́на отъ всѣ́хъ родо́въ въ заступле́ніе и спасе́ніе на́ше.

Та́же степе́нна, 1-й антифо́нъ 4-го гла́са. Проки́менъ, [гласъ 4]: Честна́ предъ Го́сподемъ* сме́рть преподо́бныхъ Его́. Сти́хъ: Что́ возда́мъ Го́сподеви о всѣ́хъ, я́же воздаде́ ми́? Ева́нгеліе отъ Матѳе́я, зача́ло 43.

По 50-мъ псалмѣ́ стихи́ра, гла́съ 2:

Добродѣ́тели твоя́, о́тче, яви́ша тя́ на́мъ, лю́демъ твои́мъ: оста́вилъ бо еси́ оте́чество, да живо́тъ вѣ́чный получи́ши, въ пусты́ню всели́вся, въ пеще́ру те́мну затвори́лся еси́, да во свѣ́тлость вы́шняго Іерусали́ма вни́деши; чистото́ю и добродѣ́тельми сподо́бился еси́ зрѣ́ти несказа́нную добро́ту Влады́чню, ея́же и на́мъ насы́титися моли́, преподо́бне Корни́ліе.

Кано́нъ преподо́бному Корни́лію, гла́съ 8.
Пѣ́снь 1.

Ирмо́съ: Во́ду проше́дъ, я́ко су́шу, и еги́петскаго зла́ избѣжа́въ, изра́ильтянинъ вопія́ше: Изба́вителю и Бо́гу на́шему пои́мъ.

Человѣколю́бче Христе́, да́ждь ми́ сло́во воспѣ́ти Твоего́ уго́дника, напослѣ́докъ днíй я́вльшагося и всю́ на́шу страну́ житіе́мъ удиви́вшаго.

Юности моея́ невѣ́жествіе пощади́, и коле́блемыя по́мыслы стра́хомъ Госпо́днимъ укрѣпи́, о́тче, и не возгнуша́йся мене́, пѣ́ти тя́ начина́ющаго.

Ди́вное твое́ житіе́ человѣ́ки удиви́ло е́сть, и а́нгели, ви́дѣвше, возра́довашася, я́ко, пло́тянъ сы́й, къ безпло́тнымъ лико́мъ прише́лъ еси́.

Богоро́диченъ: Небе́сный Ца́рь, ви́дя человѣ́ка, преступле́ніемъ ги́бнуща, благоизво́ли отъ Тебе́ воплоти́тися, Пресвята́я Дѣ́во, и Тебе́ показа́ человѣ́ческому ро́ду покро́въ и заступле́ніе.

Пѣ́снь 3.

Ирмо́съ: Ты́ еси́ утвержде́ніе притека́ющихъ къ Тебѣ́, Го́споди, Ты́ еси́ Свѣ́тъ омраче́нныхъ, и пое́тъ Тя́ ду́хъ мо́й.

Ангельское житіе́ во пло́ти пожи́лъ еси́, о́тче Корни́ліе, сего́ ра́ди прославля́ешися вѣ́чно въ небе́сныхъ оби́телѣхъ.

Госпо́день Кре́стъ отъ ю́ности взе́мъ на ра́мо свое́, о́тче, умертви́лъ еси́ стра́сти плотскíя воздержа́ніемъ и моли́твами.

Отъ ю́ности твоея́ терпѣ́нія мече́мъ вооружи́вся, порази́лъ еси́, преподо́бне, главу́ веліа́рову и ко́зни его́ попра́лъ еси́.

Богоро́диченъ: Кто́ и́нъ въ ро́дѣхъ родо́въ просла́вленъ бы́сть, я́коже Ты́, Влады́чице? Бо́га бо небе́снаго Ма́ти и всея́ тва́ри Госпожа́ показа́ся.

Сѣда́ленъ, гла́съ 3:

Ше́ствуя путе́мъ за́повѣдей Госпо́днихъ, обрѣ́лъ еси́ кора́бль безстра́стія, на него́же всѣ́дъ, преше́лъ еси́ жите́йскую пучи́ну, му́дре, и ны́нѣ, веселя́ся, лику́еши со а́нгелы во дво́рѣхъ небе́сныхъ, и мо́лишися за ду́ши на́ша, хода́таю на́шъ ди́вный, о́тче Корни́ліе. [Два́жды.]

Сла́ва, и ны́нѣ, богоро́диченъ:

Непреста́нно погружа́ема мя́ зря́ волна́ми страсте́й мои́хъ, Влады́чице Всепѣ́тая, простри́ держа́вную Твою́ десни́цу и изба́ви мя́ отъ тимѣ́нія глубины́: мо́лится бо Тебѣ́ за мя́ хода́тай на́шъ, ди́вный Корни́лій.

Пѣ́снь 4.

Ирмо́съ: Услы́шахъ, Го́споди, смотре́нія Твоего́ та́инство, разумѣ́хъ дѣла́ Твоя́ и просла́вихъ Твое́ Божество́.

Ото́къ средѣ́ вели́каго е́зера Оне́га обрѣ́лъ еси́ и, въ о́нь всели́вся еди́нъ, Христо́ви еди́ному живы́й, просла́вился еси́.

Подо́бяся пра́отцу Авраа́му, изъ гра́да Пско́ва, я́коже о́нъ иногда́ изъ оте́чества, отше́дъ, всели́лся еси́ въ пусты́ню, Бо́гови живы́й.

Ни тѣснота́ пеще́ры, ни пусты́ня ото́ка, ни бра́шна ску́дость къ малоду́шію тя́ привести́ возмого́ша: вся́ бо сія́ терпѣ́ніемъ побѣди́лъ еси́.

Богоро́диченъ: Имамы Тя́ наде́жду и те́плую о на́съ Предста́тельницу къ Сы́ну и Бо́гу Твоему́, Его́же моли́ти не преста́й, Влады́чице, при́сно.

Пѣ́снь 5.

Ирмо́съ: Утренююще, вопіе́мъ Ти́: Го́споди, спаси́ ны, Ты́ бо еси Бо́гъ на́шъ, ра́звѣ Тебе́, ино́го не вѣ́мы.

Лю́таго врага́ діа́вола терпѣ́нія стрѣла́ми устрѣли́въ, главу́ его́ смире́нія мече́мъ порази́лъ еси́, Го́сподеви вопія́: ра́звѣ Тебе́, ино́го не зна́ю.

Неду́гъ разслабле́нія иногда́ явле́ніемъ свои́мъ отъ стра́ждущаго му́жа отгна́въ, во и́ночество приве́лъ его́, вопію́ща Христо́ви: ра́звѣ Тебе́, ино́го не зна́ю.

Язы́къ на славосло́віе, о́чи на бдѣ́ніе, мы́сль на моли́тву, главу́ съ колѣ́нами на поклоне́ніе вда́лъ еси́, Го́сподеви взыва́я: ра́звѣ Тебе́, ино́го не зна́ю.

Богоро́диченъ: Хра́мъ Тво́й, Богома́ти, его́же Ти́ созда́ Корни́лій, прія́ла еси́, я́ко Авелеву же́ртву Госпо́дь, пріими́ и на́съ, вопію́щихъ: ины́я, ра́звѣ Тебе́, Засту́пницы не зна́емъ.

Пѣ́снь 6.

Ирмо́съ: Ри́зу мнѣ́ пода́ждь свѣ́тлу, одѣя́йся свѣ́томъ, я́ко ри́зою, многоми́лостиве Христе́ Бо́же на́шъ.

Ве́сь въ багряни́цу чистоты́, о́тче, одѣ́ялся еси́ и, въ небе́сныя черто́ги всели́вся, Спа́су пое́ши: сла́влю Тя́, Христе́ Бо́же на́шъ.

Аще земля́ и сокры́ тя́, но чудеса́, отъ ра́ки твоея́ излива́емая, убѣжда́ютъ на́съ пѣ́ти Влады́цѣ: сла́вимъ Тя́, Христе́ Го́споди, Бо́же на́шъ.

Любо́вію твое́ю прилѣпи́вся Влады́цѣ, не преста́й моли́ти за ны́, рабы́ твоя́, да и мы́ съ тобо́ю вопіе́мъ: спаси́ ны, Христе́ Бо́же на́шъ.

Богоро́диченъ: Юноши и дѣ́вы, обурева́еміи страсте́й волна́ми, прибѣга́ютъ въ ти́хое приста́нище Твоего́ милосе́рдія и вопію́тъ: спаси́ ны, Многоми́лостивая Влады́чице.

Конда́къ, гла́съ 3. Подо́бенъ: Дѣ́ва дне́сь.

Яко а́нгелъ во пло́ти, на земли́ показа́ся, поще́ніемъ насажде́нъ бы́въ, преподо́бне о́тче Корни́ліе, наста́вникъ и́нокомъ мно́гимъ бы́лъ еси́, сего́ ра́ди вопіе́мъ ти́: моли́ Христа́ Бо́га спасти́ся душа́мъ на́шимъ.

Икосъ:

Ада́мъ за преступле́ніе дре́вле изъ Еде́ма изгна́нъ бы́сть, и те́рніе и волче́цъ пожа́, и, нетлѣ́ненъ сы́й, въ тлѣ́ніе впаде́; ты́ же пусты́й ото́къ насели́, и пеще́ру не́бо содѣ́ла, и, тлѣ́ненъ сы́й, нетлѣ́нную жи́знь наслѣ́дова. Тѣ́мже, притека́юще къ ра́цѣ твое́й, благочести́віи лю́діе вопію́тъ: о́тче Корни́ліе, моли́ Христа́ Бо́га спасти́ся душа́мъ на́шимъ.

Пѣ́снь 7.

Ирмо́съ: Отроцы евре́йстіи въ пещи́ попра́ша пла́мень дерзнове́нно, и на ро́су о́гнь преложи́ша, вопію́ще: благослове́нъ еси́, Го́споди Бо́же, во вѣ́ки.

О тебѣ́, о́тче Корни́ліе, хва́лящеся, обоне́жстіи лю́діе притека́ютъ во хра́мъ Пречи́стыя Богома́тере и вопію́тъ Рожде́нному отъ Нея́: благослове́нъ еси́, Го́споди Бо́же, во вѣ́ки.

Отрокови́ца, немощно́е о́ко иму́щи, притече́ къ ра́цѣ твое́й, съ вѣ́рою моля́щися, и, получи́вши сла́дкій свѣ́тъ, вопія́ше: благослове́нъ еси́, Го́споди Бо́же, во вѣ́ки.

Богоро́диченъ: Пресвята́я Дѣ́ва роди́ Сы́на, вся́ку печа́ль потре́бльшаго, къ Нему́же вопіе́мъ: благослове́нъ еси́, Го́споди Бо́же, во вѣ́ки.

Пѣ́снь 8.

Ирмо́съ: Богоглаго́ливіи о́троцы въ пещи́, со огне́мъ пла́мень попира́юще, поя́ху: благослови́те, дѣла́ Госпо́дня, Го́спода.

Пла́ваніемъ твои́мъ Оне́го е́зеро освяти́ся, свя́те, живу́щіи же при не́мъ лю́діе вопію́тъ: благослови́те, дѣла́ Госпо́дня, Го́спода.

Живу́щу ти́ въ разсѣ́линѣ ка́меннѣй, освяти́ся ото́къ твои́ми моли́твами, и киновíя, ра́дующися, съ весе́ліемъ вопіе́тъ: благослови́те, дѣла́ Госпо́дня, Го́спода.

Стремле́нія плотска́я, тя́жкими вери́гами и по́ясомъ желѣ́знымъ тѣ́ло свое́ неми́лостивно связа́въ, увяди́лъ еси́, поя́: благослови́те, дѣла́ Госпо́дня, Го́спода.

Богоро́диченъ: Кто́ за ны́ мо́лится Вы́шнему та́ко усе́рдно, я́коже Ты́, о Богома́ти! Тѣ́мже вопіе́мъ: да благослови́тъ предста́тельство Твое́, Госпоже́, Го́спода.

Пѣ́снь 9.

Ирмо́съ: Воспита́нная во свята́я святы́хъ и ро́ждшая Свѣ́тъ вселе́нныя, Благода́тная, ра́дуйся, пѣ́сньми Рождество́ Твое́ велича́емъ.

Уста́ твоя́, о́тче, не преста́ша благослови́ти Бо́га, ру́цѣ же въ рукодѣ́ліи и колѣ́на въ поклоне́ніи не ослабѣ́ша никогда́же: тѣ́мже и мы́ Укрѣпи́вшаго тя́ велича́емъ.

Юже получи́ша сла́ву святíи, возжелѣ́лъ еси́ и ты́ причасти́тися тоя́, въ не́йже сы́й ны́нѣ, помяни́ и на́съ, почита́ющихъ святу́ю твою́ па́мять.

Земля́, имѣ́ющи тя́, на себѣ́ живу́ща, ра́довашеся, и не́бо, пріе́мшее тя́ въ себе́, до́браго раба́ Влады́чня, весели́тся, мы́ же непреста́нно Бо́га велича́емъ.

Ра́ка — о́бразъ подо́бія твоего́; гра́дъ Пско́въ — рожде́ніе; пеще́ра — по́двиги; киновíя — па́стырство; свя́тость — чудеса́ сказа́вше, всѣ́мъ тя́ проповѣ́даша.

Богоро́диченъ: Юности моея́ не возгнуша́йся, Влады́чице, до конца́ бо о́ная оскверне́на е́сть, но покая́нія сле́зы ми́ да́ждь, и вѣ́ру мою́ къ Тебѣ́ пріими́, и спаси́ мя.

Свѣти́ленъ:

Насажде́нъ Бо́гомъ посредѣ́ ото́ка, я́ко фи́никсъ, о́тче, и пеще́ра израсти́ тя́ на́мъ, я́ко кри́на благоуха́нна, ра́ка же и о́бразъ тво́й цѣльбы́ то́чатъ всегда́ съ вѣ́рою приходя́щимъ. [Два́жды.]

Сла́ва, и ны́нѣ, богоро́диченъ:

Въ похвалу́ Рождества́ Твоего́ воздви́же хра́мъ Корни́лій, Тво́й уго́дникъ, его́же Ты́ спа́сши, просла́вила еси́ во страна́хъ ру́сскихъ; помози́ и на́мъ, Богома́ти, бѣ́дствующимъ лю́тѣ, и всѣ́хъ на́съ поми́луй.

На хвали́техъ стихи́ры, гла́съ 8. Подо́бенъ: О, пресла́внаго чудесе́!

О, пресла́вное чу́до! Ко́ль прему́дръ купе́цъ бы́сть Корни́лій и какову́ бога́ту сотвори́ ку́плю, ча́щею лѣ́са стяжа́ еде́мскій ра́й, и ка́меннымъ верте́помъ небе́сное Ца́рство наслѣ́дова. О, каковы́й на́мъ ди́венъ оте́цъ дарова́ся! Его́же ра́ди, Христе́, спаси́ ду́ши на́ша, я́ко Милосе́рдъ.

Принеси́те вѣ́ру, боля́щіи, гряди́те, цѣльбу́ получи́ти и́щущіи: се́ бо преподо́бный Корни́лій, я́ко со́лнце, сла́дкій свѣ́тъ дарова́ и разсла́бленному тѣ́ломъ ско́рое здра́віе содѣ́ла. О, каково́ свѣти́ло Обоне́жстѣй странѣ́ дарова́ся! Его́же ра́ди, Христе́, спаси́ ду́ши на́ша, я́ко Милосе́рдъ.

Отъ шу́ма жите́йскихъ во́лнъ удали́лся еси́ во о́стровъ Па́лей, идѣ́же ни глубина́ страсте́й, ни бу́ря духо́въ проти́вныхъ тве́рдости ума́ твоего́, о́тче Корни́ліе, не возмо́же поколеба́ти, но, по́двигомъ до́брымъ въ безмо́лвіи подвиза́вся, благоуго́денъ Христу́ яви́ся. Въ ра́дости су́ща пра́ведныхъ, всеблаже́нне, мо́лимъ тя́, вся́ку печа́ль и го́ресть отъ ду́шъ на́шихъ отгна́ти, благоче́стно пра́зднующихъ свѣтоно́сную твою́ па́мять.

Въ небе́сныхъ су́щи оби́телехъ, преподо́бне о́тче Корни́ліе, Влады́ку всѣ́хъ моли́ оби́тель сію́ и вся́ гра́ды и страны́ христіа́нскія въ ми́рѣ сохрани́ти, Обоне́жскія же страны́ и всѣ́хъ на́съ свѣ́томъ богоразу́мія просвѣти́ти, да, благоче́стно чту́ще па́мять твою́, послѣ́дуемъ святы́мъ стопа́мъ твои́мъ.

Сла́ва, гла́съ 8. Самогла́сенъ:

Отъ пусты́ни ди́венъ гра́жданинъ и отъ пеще́ры сла́вный чудотво́рецъ яви́лся еси́, о́тче Корни́ліе: живы́й бо въ ни́хъ, подвиза́ся терпѣли́вно и блаже́нство ра́йское наслѣ́довалъ еси́, въ не́мже ны́нѣ сы́й, лику́я, помина́й на́съ, чту́щихъ твою́ па́мять, и моли́ся о на́съ, преподо́бне.

И ны́нѣ, богоро́диченъ:

Влады́чице, пріими́ [моли́твы ра́бъ Твои́хъ и изба́ви на́съ отъ вся́кія ну́жды и печа́ли].

Славосло́віе вели́кое. [Ектеніи́] и отпу́стъ.



НА ЛИТУРГІИ,

Блаже́нна отъ кано́на, пѣ́снь 3 и 6. Проки́менъ, [гла́съ 7]: Честна́ предъ Го́сподемъ* сме́рть преподо́бныхъ его́. Сти́хъ: Что́ возда́мъ Го́сподеви о всѣ́хъ, [я́же воздаде́ ми́?] Апо́столъ, къ Гала́томъ, зача́ло 213. Аллилу́ія, гла́съ 6: Блаже́нъ му́жъ, боя́йся Го́спода, [въ за́повѣдехъ Его́ восхо́щетъ зѣло́. Сти́хъ: Си́льно на земли́ бу́детъ сѣ́мя его́]. Ева́нгеліе Луки́, зача́ло 24. Прича́стенъ: Въ па́мять вѣ́чную [бу́детъ пра́ведникъ, отъ слу́ха зла́ не убои́тся].


Моли́тва преподо́бному Корни́лію, игу́мену Палеостро́вскому, чудотво́рцу:

О, преподо́бне о́тче на́шъ Корни́ліе, вели́кій уго́дниче Бо́жій и ско́рый въ бѣда́хъ предста́телю! Не забу́ди, я́коже обѣща́лся еси́, посѣща́ти на́съ, ча́дъ свои́хъ: а́ще бо тѣ́ломъ отъ на́съ и отше́лъ еси́, но ду́хомъ съ на́ми пребыва́еши. Мо́лимся у́бо тебѣ́, о преподо́бне о́тче Корни́ліе, бу́ди предста́тель за ны́, грѣ́шныя рабы́ своя́, ко Го́споду Іису́су Христу́ и Пречи́стѣй Его́ Богома́тери, Влады́чицѣ на́шей Богоро́дицѣ, да изба́вимся отъ гла́да, губи́тельства, тру́са, пото́па, огня́ и меча́, отъ наше́ствія иноплеме́нныхъ и междоусо́бный бра́ни, отъ напра́сныя сме́рти и отъ всѣ́хъ враго́въ ви́димыхъ и неви́димыхъ. О, преподо́бне о́тче Корни́ліе! Услы́ши на́съ, грѣ́шныхъ рабо́въ свои́хъ, моля́щихся тебѣ́, изря́днѣе же въ ча́съ се́й со слеза́ми припа́дающихъ къ ра́цѣ со святы́мъ изображе́ніемъ твои́мъ. Не отри́ни на́съ отъ своего́ заступле́нія, а́ще бо и грѣ́шніи есмы́, но съ вѣ́рою притека́емъ къ честно́му твоему́ гро́бу и съ любо́вію облобыза́юще честну́ю твою́ ико́ну, уми́льно зове́мъ: пріими́ отъ на́съ, недосто́йныхъ, моли́тву сію́, я́ко кади́ло благово́нное, я́ко же́ртву благопрія́тну, и умерщвле́нныя на́ша ду́ши злы́ми дѣ́лы и по́мыслы оживи́, преподо́бне, и просвѣти́ на́ша о́чи серде́чныя, я́коже и дѣви́цѣ Ага́фіи исцѣли́лъ еси́ десно́е о́ко, и зрѣ́ти сотвори́лъ, и Бори́су стра́ждущему во снѣ́ яви́лся еси́, и, отъ разслабле́нія здра́ва содѣ́лавши, во и́ноческій о́бразъ приве́лъ еси́ его́, та́кожде и на́съ, содержи́мыхъ у́зами вра́жіими, и́миже связа́ на́съ зло́е на́ше произволе́ніе, исто́ргни изъ глубины́ прегрѣше́ній на́шихъ и къ пути́ покая́нія наста́ви, и отъ сѣ́ти діа́воли разрѣши́ ми́лостивнымъ свои́мъ предста́тельствомъ. Ами́нь.

Источникъ: Слу́жба преподо́бному и богоно́сному отцу́ на́шему Корни́лію, игу́мену Палеостро́вскому, чудотво́рцу. — СПб.: Въ Сѵнода́льной Тѵпогра́фіи, 1881. — 48 с.

/ Къ оглавленію раздѣла /


Наверхъ / Къ титульной страницѣ

0