Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - вторникъ, 17 октября 2017 г. Сейчасъ на порталѣ посѣтителей - 15.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Ма́ія въ 19-й де́нь.
Свята́го священному́ченика Патрикíя, епи́скопа Пру́сскаго, и дружи́ны его́.

Аллилу́ія.

[ВЕЧЕРЪ,]
Стихи́ры му́чениковъ, гла́съ 6. Подо́бенъ: Все́ отло́жше.

Нося́ще отъ кро́ве* му́ченическія багряни́цу,* ски́петръ же держа́ще — Кре́стъ честны́й,* ца́рствуютъ со Христо́мъ, ра́дующеся,* за Него́же пострада́ти во́лею восхотѣ́ша,* боже́ственніи му́ченицы:* священноявле́нный Поліе́нъ, Ака́кій же и Мена́ндръ* съ Патрикíемъ богому́дрымъ.* И ны́нѣ, ра́дующеся,* предстоя́тъ престо́лу Христо́ву,* со дерзнове́ніемъ моля́щеся* о душа́хъ на́шихъ.

Жела́юще, му́ченицы, Христо́ва Ца́рствія,* вре́менную сме́рть,* я́ко пи́щу, вмѣни́ша, блаже́нніи,* и гла́дъ претерпѣ́вше* и я́звенія болѣ́зней* му́жески, до́бліи.* Тѣ́мже бы́ша всѣ́мъ вѣ́рнымъ засту́пницы,* душа́мъ же и тѣлесе́мъ здра́віе* устроя́юще незави́стно,* я́же ны́нѣ по до́лгу* воспое́мъ, вѣ́рніи, ра́достно,* я́ко Го́сподеви моля́щіяся* о душа́хъ на́шихъ.

Стихи́ры Богоро́дицы. Гла́съ и подо́бенъ то́йже:
[Аще по́стъ, и пое́тся Аллилу́ія, тогда́ стихи́ры пре́жде Богоро́дицы, та́же святы́хъ.]

Ра́дуйся, зако́на исполне́ніе,* ра́дуйся, хра́ме Святы́я Тро́ицы,* Невѣ́сто Нетлѣ́нная,* ра́дуйся, боже́ственное носи́ло всѣ́хъ Царя́,* ра́дуйся, огню́ невеще́ственный,* я́ко клеще́ю нося́щи на руку́ Твое́ю у́гля,* но́вый раю́ вертогра́да затворе́нного,* трапе́за боже́ственная и пресвѣ́тлая,* голуби́це нескве́рная,* престо́ле Вы́шняго,* о́дръ Бо́жій мы́сленный,* ю́же Ду́хъ Святы́й* Отрокови́цу Тя́ осѣни́.

Уя́звена мя́* разбо́йническими бѣсо́вскими нахо́ды,* и лежа́ща всего́ недѣ́йственна, Пренепоро́чная,* на пути́ всегда́ непостоя́ннаго житія́,* и ми́лости прося́ща,* вско́рѣ посѣти́,* вино́ излива́ющи и еле́й на неисцѣ́льныя ра́ны,* и ко здра́вію возведи́,* я́ко да Тя́ сла́влю* и любо́вію по до́лгу воспою́* вели́чія Твоя́, Чи́стая,* Ма́ти Приснодѣ́во.

Нра́вомъ злы́мъ поползо́хся* и порабоще́нъ ле́стію лука́вною, Богоневѣ́стная,* къ пречу́дному Твоему́ милосе́рдію* и те́плому заступле́нію,* Пресвята́я Отрокови́це,* прибѣга́ю, окая́нный:* сою́зъ мя́ изба́ви напа́стей и печа́ли,* и спаси́ мя, Пренепоро́чная,* бѣсо́вскихъ прило́гъ,* да прославля́ю Тя́,* и любо́вію пою́ и покланя́юся,* и велича́ю Тя́, Влады́чице,* Присноблаже́нную.

Сла́ва, и ны́нѣ, богоро́диченъ:

Ки́това чре́ва мя́,* лука́ваго грѣха́ изведи́, Влады́чице,* во утро́бѣ вмѣсти́вшая Невмѣсти́маго,* лю́тыя во́лны* искуше́ній изба́ви,* бу́ри паде́ній,* Отрокови́це, исхити́,* беззако́ній мои́хъ изсуша́ющи пучи́ну* и уставля́ющи де́монскаго ополче́нія настоя́нія,* боже́ственнымъ Твои́мъ посо́біемъ, Чи́стая,* я́ко да непреста́нно сла́влю Тя́,* Присноблаже́нную.

Крестобогоро́диченъ:

Агнца своего́* Агница нескве́рная дре́вле* и непоро́чная Влады́чица* на дре́вѣ кре́стнѣмъ я́ко узрѣ́,* ма́терски восклица́ше* и, дивя́щися, вопія́ше:* Ча́до сладча́йшее,* что́ зрѣ́ніе сіе́* но́вое и пресла́вное?* Ка́ко со́нмъ безблагода́тный* суди́щу Пила́тову предаде́ Тя* и осужда́етъ на сме́рть Живота́ вся́ческихъ?* Но воспѣва́ю Твое́ неизрече́нное, Сло́ве, снизхожде́ніе.


[НА УТРЕНИ,]
Кано́нъ, творе́ніе Ѳеофа́ново, гла́съ 8.

Пѣ́снь 1.

Ирмо́съ: Колесницегони́теля фарао́ня погрузи́ чудотворя́й иногда́ Моисе́йскій же́злъ, крестообра́зно порази́въ и раздѣли́въ мо́ре, Изра́иля же бѣглеца́, пѣшехо́дца спасе́, пѣ́снь Бо́гови воспѣва́юща.

Вся́ческими укра́шени благода́тьми, свяще́нства оде́ждею и обагре́ніемъ а́біе муче́нія кро́вію украси́вшеся, сла́вніи, и до́брѣ укра́шшеся, благоче́стія яви́стеся побо́рницы, тве́рди вѣ́ры.

Подвигополо́жникъ Христо́съ, сѣдя́й одесну́ю Отца́, страда́льцемъ всѣ́мъ подвиго́въ три́знище отве́рзый, собра́ возра́стно сочета́нныхъ, ли́къ му́ченикъ четверочи́сленный, пѣ́сньми Того́ велича́ющія.

Це́ркве предста́тель, Патрикíе, я́коже па́стырь бла́гъ, по не́й, блаже́нне, ду́шу твою́ положи́лъ еси́, со Ака́кіемъ, Мена́ндромъ и Поліе́номъ боже́ственнымъ, прему́дрыми засту́пники обога́щся, пѣ́ніе Бо́гу возсыла́я при́сно.

Богоро́диченъ: Глаго́ломъ боже́ственныхъ проро́къ послѣ́дующе, исповѣ́даша Бо́жіе Сло́во, пло́ть пріе́мшаго, богоглаго́ливіи му́ченицы, отъ Пречи́стыя Дѣ́вы, Юже, Богоро́дицу, сла́вяще, пѣ́сньми при́сно блажи́мъ.

Пѣ́снь 3.

Ирмо́съ: Утвержде́й въ нача́лѣ небеса́ ра́зумомъ и зе́млю на вода́хъ основа́вый, на ка́мени мя́, Христе́, за́повѣдей Твои́хъ утверди́, я́ко нѣ́сть свя́тъ, па́че Тебе́, Еди́не Человѣколю́бче.

Ше́ствовавшія му́жески стезю́ муче́нія и сконча́вшія до́брое тече́ніе ублажи́мъ, вѣ́рніи, я́ко побѣдоно́сныя му́ченики, и вѣне́чники боже́ственныя, и святи́тели богому́дрыя.

Богогла́сный, разже́гся ре́вностію благоче́стія, увяди́ пла́мень пре́лести, витíйствуя тве́рдо богослове́сная велѣ́нія и вразумля́я всѣ́хъ къ боже́ственному вои́стинну позна́нію.

Умерщвле́на ви́дѣвъ пія́нствомъ нече́стія Патрикíй лю́таго иге́мона, вскочи́, вопія́ богоразу́мія глаго́лы разсѣва́я всѣ́мъ боже́ственное сло́во вѣ́ры.

Богоро́диченъ: Неискусобра́чно Сло́во Бо́жіе, о Богоро́дице, породила́ еси́, изъ Тебе́ воплоще́нна, Его́же му́ченицы, Бо́га, му́жески исповѣ́даша, я́ко во́ини Сего́ и вѣне́чницы бы́вше.

Сѣда́ленъ, гла́съ 8. Подо́бенъ: Прему́дрости.

Съ Мена́ндромъ Ака́кія му́драго, и Поліе́на, вѣ́рою свяще́ннаго, почти́мъ пѣ́сньми, и вели́каго Патрикíя: свяще́нницы бо сíи Бо́га Вседержи́теля бы́вше, вѣ́рою Тому́ благоугоди́ша, тѣ́мже муче́нія при кончи́нѣ житія́ свѣ́тло сподо́бишася и а́нгеломъ сочета́шася. Имже любо́вію вопіе́мъ: моли́те Христа́ Бо́га согрѣше́ній оставле́ніе дарова́ти чту́щимъ любо́вію святу́ю па́мять ва́шу.

Сла́ва, и ны́нѣ, пра́здника или́ богоро́диченъ:

Небе́сную две́рь и киво́тъ, пресвяту́ю го́ру, свѣ́тлый о́блакъ воспои́мъ, неопали́мую купину́, слове́сный ра́й, Евы воззва́ніе, вселе́нныя всея́ вели́кое сокро́вище, я́ко спасе́ніе въ Не́й содѣ́лася мíру и оставле́ніе дре́внихъ согрѣше́ній. Сего́ ра́ди вопіе́мъ Ей: моли́ся Сы́ну Твоему́ прегрѣше́ній оставле́ніе дарова́ти благоче́стно покланя́ющимся всесвято́му Рождеству́ Твоему́.

Крестобогоро́диченъ:

Агнца, и Па́стыря, и Изба́вителя Агница зря́щи на Крестѣ́, восклица́ше, пла́чущи, и, го́рько рыда́ющи, вопія́ше: мíръ у́бо ра́дуется, пріе́мля Тобо́ю избавле́ніе, утро́ба же Моя́ гори́тъ, зря́щи Твое́ распя́тіе, е́же терпи́ши за милосе́рдіе ми́лости. Долготерпѣли́ве Го́споди, ми́лости бе́здно и исто́чниче неисчерпа́емый, умилосе́рдися и да́руй согрѣше́ній оставле́ніе вѣ́рою пою́щимъ Боже́ственныя стра́сти Твоя́.

Пѣ́снь 4.

Ирмо́съ: Ты́ моя́ крѣ́пость, Го́споди, Ты́ моя́ и си́ла, Ты́ мо́й Бо́гъ, Ты́ мое́ ра́дованіе, не оста́вль нѣ́дра Отча, и на́шу нищету́ посѣти́въ. Тѣ́мъ съ проро́комъ Авваку́момъ зову́ Ти: си́лѣ Твое́й сла́ва, Человѣколю́бче.

Си́лою Христо́вою одѣ́явся, Патрикíе, свяще́нникъ бо Сего́ бы́лъ еси́ и, Того́ стопа́мъ я́вѣ послѣ́довавъ, муче́ніи прине́слся еси́ еди́ному Благодѣ́телю, благоче́стно взыва́я: си́лѣ Твое́й сла́ва, Человѣколю́бче.

Священнодѣ́йственникъ боже́ственъ показа́лся еси́, Ака́кіе, боже́ственныя зари́, о́тче, насыща́яся, и, Христо́въ му́ченикъ и́стиненъ я́влься, и́дольскую ле́сть оплева́лъ еси́. Тѣ́мже и ра́достною со́вѣстію зове́ши: си́лѣ Твое́й сла́ва, Человѣколю́бче.

Съ со́нмомъ, Христе́, Твои́хъ му́ченикъ Мена́ндръ лику́я и ра́дуяся, луча́ми ны́нѣ сія́етъ Твои́ми, и свѣтоли́тіи лѣ́по украша́емь, и та́мо Тебѣ́, Влады́цѣ, ра́дуяся, взыва́етъ: си́лѣ Твое́й сла́ва, Человѣколю́бче.

Богоро́диченъ: Ору́жіе, Христе́, Тя́ ро́ждшую Всенепоро́чную стяжа́вше, ле́сти побѣди́ша кова́рства му́ченицы му́дріи и томи́телей ласка́нія я́вѣ отри́нуша. И ны́нѣ, вѣнцено́сцы я́вльшеся, вопію́тъ: си́лѣ Твое́й сла́ва, Человѣколю́бче.

Пѣ́снь 5.

Ирмо́съ: Вску́ю мя́ отри́нулъ еси́ отъ лица́ Твоего́, Свѣ́те незаходи́мый, и покры́ла мя́ е́сть чужда́я тма́ окая́ннаго? Но обрати́ мя, и къ свѣ́ту за́повѣдей Твои́хъ пути́ моя́ напра́ви, молю́ся.

Умертви́вшеся мíру, му́ченицы богому́дріи, болѣ́зньми воздержа́нія, Христу́ усе́рдно принесо́стеся заколе́нія соверше́нная, себе́ поже́рше, я́коже а́гнцы, Влады́чнимъ предповину́стеся боже́ственнымъ повелѣ́ніемъ.

Пострада́вше зако́нно, му́ченицы всехва́льніи, вѣнча́стеся: претерпѣ́вше бо го́рькія болѣ́зни и ра́ны отъ беззако́нныхъ, на небесѣ́хъ наслажда́тися нетлѣ́нныя жи́зни сподо́бистеся.

Умно со а́нгелы ны́нѣ живы́й, Патрикíе блаже́нне, соверша́ющихъ честну́ю па́мять твою́ помяни́, ко Влады́цѣ твои́ми моли́твами прилѣ́жно моля́ся отъ бѣ́дъ изба́вити, всехва́льне.

Богоро́диченъ: Истинную Богоро́дицу вси́ Тя́ позна́вше, му́ченицы сла́вніи, изъ Тебе́ рожде́ннаго Бо́га Сло́ва, вѣ́дяще, проповѣ́даша, проти́ву грѣху́ ю́ношески и до сме́рти сопроти́вльшеся, Отрокови́це Всепѣ́тая.

Пѣ́снь 6.

Ирмо́съ: Бе́здна грѣхо́въ и прегрѣше́ній бу́ря мя́ смуща́етъ и во глубину́ ну́жднаго рѣ́етъ мя́, отча́янія, но Твою́ крѣ́пкую ру́ку мнѣ́ простри́, я́ко Петро́ви, о Упра́вителю, и спаси́.

Ли́къ страда́льческій, отъ четы́рехъ соста́вленъ му́ченикъ и святи́тель, досто́йно благолѣ́пно уясня́емый, лю́діе благочести́віи, ны́нѣ соста́вльше ли́къ, ра́достно восхва́лимъ.

Разрѣша́ютъ тѣле́сныя болѣ́зни, страда́льцы, неду́жнымъ те́плыхъ во́дъ отъ гробо́въ ва́шихъ излія́нія, и стра́сти душе́вныя ва́шими боже́ственными моли́твами вѣ́рою приходя́щимъ измѣня́ются.

Утро ми́ у́мное, во тмѣ́ прегрѣше́ній лежа́щу и въ скве́рнѣй жи́зни пребыва́ющу, моли́твами, блаже́нне, твои́ми ны́нѣ возста́ви, моля́ Изба́вителя Христа́, Патрикíе.

Богоро́диченъ: Просвѣти́ мою́ ду́шу, ро́ждшая сія́ніе сла́вы Отчи, Дѣ́во Богоро́дице Всепѣ́тая: Твою́ бо страда́льцы благода́ть иму́ще, мучи́телей языкобо́лія отри́нуша.

Конда́къ, гла́съ 4. Подо́бенъ: Яви́лся еси́.

Яко свѣтосія́ненъ добро́тою свяще́нства и муче́нія кро́вію преукра́шенъ, съ пострада́вшими съ тобо́ю, Патрикíе, Христу́ предстоя́, о на́съ помина́й, я́ко страда́лецъ честны́й.

Пѣ́снь 7.

Ирмо́съ: Бо́жія снисхожде́нія о́гонь устыдѣ́ся въ Вавило́нѣ иногда́, сего́ ра́ди о́троцы въ пещи́, ра́дованною ного́ю, я́ко во цвѣ́тницѣ, лику́юще поя́ху: благослове́нъ еси́, Бо́же оте́цъ на́шихъ.

Сла́вніи му́ченицы, свяще́нства укра́шени оде́ждею, свое́ю кро́вію сію́ свяще́ннѣйшу содѣ́лавше, въ боговидѣ́ніи лику́юще, поя́ху: благослове́нъ еси́, Бо́же оте́цъ на́шихъ.

Витíйскую лю́тость, свѣ́томъ боже́ственнымъ озаря́емь, изобличи́лъ еси́, блаже́нне, я́ко въ пещи́ тепли́цахъ, въ ни́хже не опали́лся еси́, взыва́я: благослове́нъ еси́, Бо́же оте́цъ на́шихъ.

Не терпя́ше, сла́вне, му́дрыхъ твои́хъ слове́съ иге́монъ го́рдый, и́миже обличи́лъ еси́ прескверна́выя и лжеимени́тыя бо́ги, и́хже поплева́въ, пѣ́лъ еси́, ра́дуяся: благослове́нъ еси́, Бо́же оте́цъ на́шихъ.

Богоро́диченъ: Се́ ны́нѣ соверши́ся Дави́да боже́ственнаго боже́ственное прорече́ніе, мо́лится бо любо́вію четвери́ца му́ченикъ Твоему́ лицу́, Чи́стая, воплоще́нному изъ Тебе́ взыва́ющи: благослове́нъ еси́, Бо́же оте́цъ на́шихъ.

Пѣ́снь 8.

Ирмо́съ: Седмери́цею пе́щь халде́йскій мучи́тель богочести́вымъ неи́стовно разжже́, си́лою же лу́чшею спасе́ны сія́ ви́дѣвъ, Творцу́ и Изба́вителю вопія́ше: о́троцы, благослови́те, свяще́нницы, воспо́йте, лю́діе, превозноси́те во вся́ вѣ́ки.

Вѣнцено́сныя му́ченики, святи́тели богому́дрыя, пріиди́те, ра́дующеся, вѣ́рніи, почти́мъ, Христа́ велича́юще, дарова́вшаго си́мъ крѣ́пость злочести́выхъ не ужаса́тися му́къ, пою́щимъ: о́троцы, благослови́те, свяще́нницы, воспо́йте, лю́діе, превозноси́те во вся́ вѣ́ки.

Свяще́нія пома́заніемъ, муче́нія же кро́вію добропобѣ́дныхъ четвери́ца украси́ся и сія́етъ чудесы́ разли́чно па́че свѣ́та, Содѣ́телю и Изба́вителю вопію́щи: о́троцы, благослови́те, свяще́нницы, воспо́йте, лю́діе, превозноси́те во вся́ вѣ́ки.

Побѣди́вше, сла́вніи, де́монскія полки́ и мучи́телей преще́нія не убоя́вшеся, вѣнцы́ прія́сте отъ Христа́, всехва́льніи, и, я́ко побѣдоно́сніи страда́льцы, поете́: о́троцы, благослови́те, свяще́нницы, воспо́йте, лю́діе, превозноси́те во вся́ вѣ́ки.

Богоро́диченъ: Да ра́дуется Мена́ндръ, да весели́тся Ака́кій и съ Поліе́номъ свѣ́тлый Патрикíй, ли́къ соста́вльше, воплоще́нное Сло́во Отчее отъ дѣви́ческихъ неискусобра́чныхъ ложе́снъ да пою́тъ непреста́нно, свяще́нницы я́вльшеся, Того́ превознося́ще во вся́ вѣ́ки.

Пѣ́снь 9.

Ирмо́съ: Ужасе́ся о се́мъ не́бо, и земли́ удиви́шася концы́, я́ко Бо́гъ яви́ся человѣ́комъ пло́тски, и чре́во Твое́ бы́сть простра́ннѣйшее небе́съ. Тѣ́мъ Тя́, Богоро́дицу, а́нгеловъ и человѣ́къ чинонача́лія велича́ютъ.

Удиви́шася, зря́ще страда́льцевъ главы́ посѣка́еми, мучи́тели, и ду́ши любо́вію предаю́ще терпѣли́вно. Христо́съ же прія́тъ си́хъ, упоко́ивъ я́ у Себе́, и́миже и исцѣле́нія источа́етъ, я́ко отъ окри́на, непреста́нно притека́ющимъ.

Ви́дѣти тща́щеся жела́емыхъ исто́чника, святи́тели и му́ченики, на небесѣ́хъ, вся́ко достоя́ніе, е́же на земли́, оста́вльше, взя́стеся къ высо́кому вели́честву Боже́ственнаго Ца́рствія, пи́щи сподо́бльшеся, е́же па́че ума́ блаже́нства.

Проидо́сте во́ду искуше́ній, и о́гнь муче́ній премину́сте, и ны́нѣ я́сно, вѣ́чнующій страда́льцы, поко́й прія́сте въ небе́сныхъ ски́ніихъ, въ ни́хже, вѣнцено́сцы, лику́юще непреста́нно, отъ бѣ́дъ на́съ изба́вите.

Богоро́диченъ: Яко со́лнце, па́мять страда́льцевъ вѣ́рныя осіява́етъ чудесы́, и́бо изъ Тебе́, Чи́стая Дѣ́ва, рожде́йся Бо́гъ, Его́же благоче́стно проповѣ́даша святíи, сія́ преосія́ свѣ́тло, прославля́яй вѣ́рою Того́ прише́ствіе поче́тшія, я́ко обѣща́.

Источникъ: Минíа, мѣ́сяцъ Ма́ій. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 135 – 139.

/ Къ оглавленію раздѣла /


Наверхъ / Къ титульной страницѣ

0