Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - вторникъ, 17 октября 2017 г. Сейчасъ на порталѣ посѣтителей - 16.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Ма́ія въ 19-й де́нь.
Слу́жба преподо́бнаго Корни́лія Коме́льскаго.

НА МАЛѢЙ ВЕЧЕРНИ,
Стихи́ры, гла́съ 8. Подо́бенъ: О, пресла́внаго чудесе́!

Вѣ́рою соше́дшеся вси́,* я́ко по́стника Христо́ва тя́ почита́емъ, Корни́ліе:* ра́дуяся бо, ше́ствовавъ* въ пусты́ни непроходи́мѣй, му́дре,* наста́вникъ бы́лъ еси́ че́стенъ.* Тѣ́мже тебѣ́ мы́ вѣ́рою взыва́емъ:* о всеблаже́нне, по́стниковъ похвало́,* о на́съ моли́ся ко Го́споду* поми́ловатися душа́мъ на́шимъ.

Преподо́бне о́тче Корни́ліе,* бу́дущія ра́ди жи́зни* въ верте́пъ разбо́йничь всели́лся еси́,* ника́коже боя́ся неви́димыхъ вра́гъ,* а́ще и мно́ги ско́рби творя́ху, приходя́ще къ тебѣ́,* ты́ же моли́твами твои́ми* си́хъ безъ вѣ́сти твори́лъ еси́,* о терпѣли́вый душе́ю пусты́нный жи́телю!* Тѣ́мже тя́ вѣ́рою вси́ почита́емъ и ублажа́емъ.

Сла́ва, гла́съ 8:

Спасе́нія ища́ отвсю́ду, блаже́нне Корни́ліе, во́льное стра́нство Го́спода ра́ди прія́лъ еси́, труды́ мно́гія, и жа́жду, и гла́дъ, сту́день же и зно́й Христа́ ра́ди претерпѣ́лъ еси́. Тѣ́мже и слы́шиши: благíй ра́бе вѣ́рный, вни́ди въ ра́дость Го́спода твоего́! Сего́ же гла́са и на́мъ услы́шати мо́лимся, да всегда́ па́мять твою́ любо́вію ублажа́емъ.

И ны́нѣ, богоро́диченъ.

На стихо́внѣ стихи́ры, гла́съ 2. Подо́бенъ: До́ме Евфра́ѳовъ.

Ле́сти лука́выхъ бѣсо́въ* изобличи́въ кре́стною си́лою,* уясни́лъ еси́ сла́ву Христо́ву,* о́тче Корни́ліе.

Сти́хъ: Честна́ предъ Го́сподемъ* сме́рть преподо́бныхъ Его́.

Взя́тся, я́коже Илія́,* на колесни́цѣ о́гненнѣй,* смѣси́лся еси́, блаже́нне,* нехода́тайственнѣ Тро́ицѣ,* Корни́ліе прекра́сне.

Сти́хъ: Блаже́нъ му́жъ, боя́йся Го́спода,* въ за́повѣдехъ Его́ восхо́щетъ зѣло́.

Нося́ на руку́ твое́ю, о́тче,* Кре́стъ Госпо́день,* бѣсо́вская мечта́нія* до конца́, Корни́ліе,* потреби́лъ еси́.

Сла́ва, и ны́нѣ, богоро́диченъ:

Вы́ше Тя́ ли́цы,* Богоро́дице Дѣ́во,* пою́тъ съ ни́жними,* сла́вяще непреста́нно* Рождество́ Твое́ пречи́стое.

[Тропа́рь пи́санъ на вели́цѣй вече́рни.]



НА ВЕЛИЦѢЙ ВЕЧЕРНИ,
Блаже́нъ му́жъ.., [1-й антифо́нъ.] На Го́споди воззва́хъ: поста́вимъ стихо́въ 8, пра́здника на 4 и преподо́бнаго на 4.
Стихи́ры преподо́бнаго Корни́лія, гла́съ 8. Подо́бенъ: О, пресла́внаго чудесе́!

Отче Корни́ліе преподо́бне,* впери́въ у́мъ къ Бо́гу вѣ́рою,* мірска́го смѣше́нія* возгнуша́вся неуста́внаго* и кре́стъ тво́й воспріе́мь,* Всеви́дцу послѣ́довалъ еси́,* тѣ́ло, непокори́вое по́двиги воздержа́нія,* по́мысла си́лою порабо́тивъ Боже́ственному Ду́ху. [Два́жды.]

Отче преподо́бне Корни́ліе,* сле́зными исто́чники* ду́шу твою́ очища́я* и всено́щными стоя́ніи Бо́га моля́,* впери́лся еси́ къ любви́ Сего́ блаже́нныя красоты́,* ея́же досто́йно ны́нѣ наслажда́ешися,* непреста́нно и ра́достно* съ пострада́вшими съ тобо́ю,* богому́дре и преподо́бне.

Преподо́бне о́тче прему́дре Корни́ліе,* боля́щимъ ты́ яви́лся еси́ исцѣле́ніе,* и хромы́мъ хожде́ніе* ми́лостивно сотворя́еши,* и всѣ́мъ, притека́ющимъ съ вѣ́рою* къ цѣльбоно́сному твоему́ гро́бу,* прося́щимъ по́мощи и заступле́нія,* моли́твами твои́ми* исцѣле́ніе неду́говъ* неоску́дно подае́ши.

Сла́ва, гла́съ 6:

Еже по о́бразу соблю́дъ невреди́мо, у́мъ влады́ку на стра́сти па́губныя по́стнически поста́вивъ, во е́же по подо́бію я́ко мо́щно возше́лъ еси́, му́жески бо естество́ пону́дивъ, потща́лся еси́ ху́ждшее покори́ти лу́чшему и пло́ть порабо́тити ду́ху. Тѣ́мже мона́шествующихъ яви́лся еси́ ве́рхъ, жи́тель пусты́нный, благотеку́щихъ обучи́тель, пра́вило добродѣ́тели извѣ́стнѣйшее. И ны́нѣ на небесѣ́хъ, зерца́ломъ разрѣ́шшимся, о́тче на́шъ Корни́ліе, чи́стѣ зри́ши Святу́ю Тро́ицу, моля́ся несре́дственнѣ о и́же вѣ́рою и любо́вію чту́щихъ тя́.

И ны́нѣ, пра́здника.
Вхо́дъ. Проки́менъ дне́, и чте́нія три́.

Прему́дрости Соломо́ни чте́ніе.

Пра́ведницы во вѣ́ки живу́тъ, и въ Го́сподѣ мзда́ и́хъ, и попече́ніе и́хъ у Вы́шняго. Сего́ ра́ди пріи́мутъ ца́рствіе благолѣ́пія и вѣне́цъ добро́ты отъ руки́ Госпо́дни, зане́ десни́цею покры́етъ я́ и мы́шцею защити́тъ и́хъ. Пріи́метъ всеору́жіе — рве́ніе свое́ и вооружи́тъ тва́рь въ ме́сть враго́мъ. Облече́тся въ броня́ пра́вды и возложи́тъ шле́мъ — су́дъ нелицемѣ́ренъ. Пріи́метъ щи́тъ непобѣди́мый — преподо́біе, поостри́тъ же напра́сный гнѣ́въ — во ору́жіе, спобо́ретъ же съ ни́мъ мíръ на безу́мныя. По́йдутъ праволу́чныя стрѣ́лы мо́лніины и, я́ко отъ благокру́гла лу́ка облако́въ, на намѣ́реніе полетя́тъ, и отъ каменоме́тныя я́рости испо́лнь паду́тъ гра́ды. Вознегоду́етъ на ни́хъ вода́ морска́я, рѣ́ки же потопя́тъ я́ на́гло. Сопроти́въ ста́нетъ и́мъ ду́хъ си́лы и, я́ко ви́хоръ, развѣ́етъ и́хъ, и опустоши́тъ всю́ зе́млю беззако́ніе, и злодѣ́йство преврати́тъ престо́лы си́льныхъ. Слы́шите у́бо, ца́ріе, и разумѣ́йте, навы́кните, судіи́ конце́въ земли́. Внуши́те держа́щіи мно́жества и гордя́щіися о наро́дѣхъ язы́ковъ, я́ко дана́ е́сть отъ Го́спода держа́ва ва́мъ и си́ла отъ Вы́шняго.

Прему́дрости Соломо́ни чте́ніе.

Пра́ведныхъ ду́ши въ руцѣ́ Бо́жіей, и не прико́снется и́хъ му́ка. Непщева́ни бы́ша во очесѣ́хъ безу́мныхъ умре́ти, и вмѣни́ся озлобле́ніе исхо́дъ и́хъ, и е́же отъ на́съ ше́ствіе — сокруше́ніе, они́ же су́ть въ ми́рѣ. Ибо предъ лице́мъ человѣ́ческимъ, а́ще и му́ку пріи́мутъ, упова́ніе и́хъ безсме́ртія испо́лнено. И вма́лѣ нака́зани бы́вше, вели́кими благодѣ́тельствовани бу́дутъ, я́ко Бо́гъ искуси́ я́ и обрѣ́те и́хъ досто́йны Себѣ́. Я́ко зла́то въ горни́лѣ, искуси́ и́хъ и, я́ко всепло́діе же́ртвенное, прія́тъ я́. И во вре́мя посѣще́нія и́хъ, возсія́ютъ, и я́ко и́скры по сте́блію, потеку́тъ. Су́дятъ язы́комъ и облада́ютъ людьми́, и воцари́тся Госпо́дь въ ни́хъ во вѣ́ки. Надѣ́ющіися На́нь разумѣ́ютъ и́стину и вѣ́рніи въ любви́ пребу́дутъ Ему́, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.

Прему́дрости Соломо́ни чте́ніе.

Пра́ведникъ, а́ще пости́гнетъ сконча́тися, въ поко́и бу́детъ. Ста́рость бо честна́ не многолѣ́тна, ниже́ въ числѣ́ лѣ́тъ исчита́ется. Сѣди́на же е́сть му́дрость человѣ́комъ, и во́зрастъ ста́рости — житіе́ нескве́рное. Благоуго́денъ Бо́гови бы́въ, возлю́бленъ бы́сть, и живы́й посредѣ́ грѣ́шникъ, преста́вленъ бы́сть. Восхище́нъ бы́сть, да не зло́ба измѣни́тъ ра́зума его́ или́ ле́сть прельсти́тъ ду́шу его́. Раче́ніе бо зло́бы помрача́етъ до́брая и паре́ніе по́хоти, премѣня́етъ у́мъ незло́бивъ. Сконча́вся вма́лѣ, испо́лни лѣ́та до́лга, уго́дна бо бѣ́ Го́сподеви душа́ его́, сего́ ра́ди потща́ся отъ среды́ лука́вствія. Лю́діе же ви́дѣвше и не разумѣ́вше, ниже́ поло́жше въ помышле́ніи таково́е, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.

На литíи стихи́ры, гла́съ 2, самогла́сны:

Преподо́бне о́тче, измла́да въ добродѣ́тели прилѣ́жно обучи́вся, орга́нъ бы́лъ еси́ Свята́го Ду́ха и, отъ Него́ пріе́мъ чуде́съ дѣ́йство, научи́лъ еси́ человѣ́ки преоби́дѣти сла́дкая; ны́нѣ же боже́ственнымъ свѣ́томъ чистѣ́йше осіява́емь, просвѣти́ и на́ша мы́сли, Корни́ліе, о́тче на́шъ.

На земли́ а́нгела и на небесѣ́хъ человѣ́ка Бо́жія, мíрови благоукраше́ніе, наслажде́ніе благи́хъ добродѣ́телей, по́стниковъ похвалу́, Корни́лія почти́мъ: насажде́нъ бо въ дому́ Бо́жіи, я́ко кри́нъ, и процвѣте́ пра́ведно, я́ко ке́дръ, въ пусты́ни, умно́жи ста́до Христо́во слове́сныхъ ове́цъ преподо́біемъ и пра́вдою.

Сла́ва, гла́съ 2:

Пусты́ня, я́же пре́жде разбо́йническая жили́ща имя́ше, ны́нѣ, Корни́ліе, учени́къ твои́хъ мно́жествомъ испо́лнена, украша́ется: хра́мъ бо прече́стенъ Бо́жія Ма́тере воздви́глъ еси́, разли́чными добро́тами укра́шенъ. Тѣ́мже въ не́мъ дне́сь соше́дшеся и честны́й гро́бъ тво́й обстоя́ще любе́зно, покланя́ющеся и глаго́люще, мо́лимся: Це́рквамъ единомышле́ніе да́руя, правосла́вному Импера́тору на́шему на враги́ спосо́бствуй моли́твами твои́ми, и на́мъ испроси́ ми́ръ, и душа́мъ на́шимъ ве́лію ми́лость.

И ны́нѣ, пра́здника.

На стихо́внѣ стихи́ры, гла́съ 4. Подо́бенъ: Зва́нный свы́ше.

Егда́ боже́ственное тя́ жела́ніе* распали́, преподо́бне,* тогда́ все́ плотско́е мудрова́ніе ду́ху повину́лъ еси́,* поще́нія страда́ньми утверди́вся* и, я́ко зла́то, въ горни́лѣ искуше́но сіе́, яви́вся,* прія́телище бы́лъ еси́ Пресвята́го Ду́ха,* собра́въ мона́шествующихъ мно́жества,* уче́ньми твои́ми тѣ́хъ,* я́ко нѣ́коею восхо́дною лѣ́ствицею,* на высоту́ добродѣте́лей возводи́лъ еси́,* тѣ́мже Христа́ моли́* спасти́ и просвѣти́ти ду́ши на́ша.

Сти́хъ: Честна́ предъ Го́сподемъ* сме́рть преподо́бныхъ Его́.

Возсія́ дне́сь пресвѣ́тлая и всепра́зднственная па́мять твоя́,* пресла́вне Корни́ліе,* созыва́ющи многочи́сленное* по́стникъ сосло́віе* и преподо́бныхъ ликостоя́ніе,* а́нгелы же съ человѣ́ки* я́ко вои́стинну къ похвале́нію* въ Тро́ицѣ пѣва́емаго* Христа́ Бо́га на́шего,* Его́же моли́* спасти́ и просвѣти́ти ду́ши на́ша.

Сти́хъ: Блаже́нъ му́жъ, боя́йся Го́спода,* въ за́повѣдехъ Его́ восхо́щетъ зѣло́.

Богоно́се и преблаже́нне о́тче Корни́ліе,* ты́, проро́чески слеза́ми зе́млю омака́въ,* не да́лъ еси́ сна́ твои́ма очи́ма,* ни вѣ́ждома дрема́нія,* серде́чное жела́ніе ко Христу́ явля́я,* Его́же измла́да возлюби́лъ еси́,* вся́кія добродѣ́тели ви́дъ испра́вль.* Тѣ́мже тя́ ублажа́емъ,* Христа́ велича́юще,* тебе́ просла́вльшаго,* Его́же моли́* спасти́ и просвѣти́ти ду́ши на́ша.

Сла́ва, гла́съ 8:

Мона́ховъ мно́жества наста́вника тя́ почита́емъ, о́тче на́шъ Корни́ліе, твое́ю бо стезе́ю вои́стинну пра́во ходи́ти позна́хомъ. Блаже́нъ еси́, Христу́ рабо́тавъ, и вра́жію обличи́лъ еси́ си́лу, а́нгеловъ собесѣ́дниче, преподо́бныхъ соприча́стниче и пра́ведныхъ, съ ни́миже моли́ся Го́сподеви поми́ловатися душа́мъ на́шимъ.

И ны́нѣ, пра́здника.

Тропа́рь, гла́съ 4:

Отъ ю́ности горя́щимъ жела́ніемъ боже́ственныя любве́ разжига́емь, жите́йскія молвы́ оста́вилъ еси́, преподо́бне, ревни́тель Анто́нію Вели́кому бы́въ, безмо́лвіемъ и жесто́кимъ пребыва́ніемъ послѣ́дуя Христу́, бдѣ́ніемъ, и моли́твами, и посто́мъ о́бразъ бы́лъ еси́ твои́мъ ученико́мъ. Тѣ́мже моли́ся Го́сподеви, Корни́ліе блаже́нне, спасти́ся душа́мъ на́шимъ.


НА УТРЕНИ,
По 1-й и по 2-й каѳи́смѣ сѣда́льны пра́здника.

По поліеле́и сѣда́ленъ преподо́бнаго, гла́съ 8. Подо́бенъ: Прему́дрости.

Въ пусты́ню, блаже́нне, всели́вся, и въ не́й пречи́стый хра́мъ Бо́жіи Ма́тери воздви́гъ, мно́жество мона́шествующихъ та́мо собра́лъ еси́, Бо́гу съ тобо́ю рабо́тающихъ, и́хже сохраня́й отъ вся́каго вре́да лука́ваго, да всегда́ благода́рственно вопіе́мъ ти́: преблаже́нне Корни́ліе, моли́ Христа́ Бо́га грѣхо́въ оставле́ніе дарова́ти чту́щимъ любо́вію святу́ю па́мять твою́. [Два́жды.]

Сла́ва, и ны́нѣ, богоро́диченъ:

Яко дѣ́ву и еди́ну въ жена́хъ, Тя́, безъ сѣ́мене ро́ждшую Бо́га пло́тію, вси́ ублажа́емъ, ро́ди человѣ́честіи: о́гнь бо всели́ся въ Тя́ Божества́, и я́ко Младе́нца млеко́мъ пита́еши Зижди́теля и Го́спода. Тѣ́мъ, а́нгельскій и человѣ́ческій ро́дъ, досто́йно сла́вимъ пресвято́е Рождество́ Твое́ и согла́сно вопіе́мъ Ти́: моли́ Христа́ Бо́га согрѣше́ній оставле́ніе дарова́ти покланя́ющимся вѣ́рою пресвято́му Рождеству́ Твоему́.

Степе́нна, 1-й антифо́нъ 4-го гла́са. Проки́менъ, [гла́съ 4]: Честна́ предъ Го́сподемъ* сме́рть преподо́бныхъ Его́. Сти́хъ: Что́ возда́мъ Го́сподеви о всѣ́хъ, я́же воздаде́ ми́? Вся́кое дыха́ніе... Ева́нгеліе Матѳе́я, зача́ло 43.

По 50-мъ псалмѣ́ стихи́ра, гла́съ 6:

Преподо́бне о́тче, во всю́ зе́млю изы́де вѣща́ніе исправле́ній твои́хъ, тѣ́мъ на небесѣ́хъ обрѣ́лъ еси́ мзду́ трудо́въ твои́хъ, де́монскія погуби́лъ еси́ полки́ и а́нгельскія дости́глъ еси́ чи́ны, и́хже житію́ безъ поро́ка поревнова́лъ еси́. Дерзнове́ніе имѣ́я ко Христу́ Бо́гу, ми́ръ испроси́ душа́мъ на́шимъ.

Кано́нъ пра́здника на 6, и свята́го на 8, гла́съ 8.

Пѣ́снь 1.

Ирмо́съ: Колесницегони́теля фарао́ня погрузи́ чудотворя́й иногда́ Моисе́йскій же́злъ, крестообра́зно порази́въ и раздѣли́въ мо́ре, Изра́иля же бѣглеца́, пѣшехо́дца спасе́, пѣ́снь Бо́гови воспѣва́юща.

Сло́во ми́ да́ждь, Сло́ве Бо́жій, Свѣтода́вче Христе́, воспѣ́ти свѣ́тлое и свѣтоно́сное житіе́ Твоего́ уго́дника, преподо́бнаго Корни́лія. Моли́твами его́ разори́ мра́къ се́рдца моего́ и Твои́мъ свѣ́томъ души́ озари́тися, молю́ся.

Влады́чнему любостра́нству, преподо́бне, подо́бяся, са́мъ стра́нствовати изво́лилъ еси́. Тѣ́мже и Всеви́дящее Око, ви́дѣвъ твое́ благо́е изволе́ніе, да́ромъ чуде́съ обогати́ тя, Корни́ліе, я́ко пресла́вно.

Трисо́лнечнымъ сія́ніемъ, богому́дре, озаря́емь, зло́е, блаже́нне, бѣсо́въ шата́ніе и вра́жія преще́нія ра́нами болѣ́зней, я́коже паучи́ну, разори́лъ еси́, Бо́жіимъ Ду́хомъ разжига́емь, Корни́ліе блаже́нне.

Богоро́диченъ: Яко Бо́жія Ма́ти, дерзнове́ніе иму́щи къ ро́ждшемуся изъ Тебе́ Единоро́дному Сло́ву, и Отцу́ Собезнача́льному, и Соесте́ственному Ду́ху Свято́му, моля́щися не преста́й отъ бѣ́дъ спасти́, Всенепоро́чная, Тя́, Богоро́дицу, сла́вящія.

Катава́сія пра́здника.

Пѣ́снь 3.

Ирмо́съ: Утвержде́й въ нача́лѣ небеса́ ра́зумомъ и зе́млю на вода́хъ основа́вый, на ка́мени мя́, Христе́, за́повѣдей Твои́хъ утверди́, я́ко нѣ́сть свя́тъ, па́че Тебе́, Еди́не Человѣколю́бче.

Кто́ изрещи́ мо́жетъ зе́мленъ твоя́ болѣ́зни, о́тче, и по́двиги, и́хже ра́ди досто́йну мзду́ стяжа́лъ еси́ отъ Бо́га? и бы́лъ еси́ прія́телище Боже́ственнаго Ду́ха, преподо́бенъ и и́стиненъ, пра́веденъ и непоро́ченъ.

Укрѣ́пль у́мъ ра́зумомъ боже́ственнымъ, о́тче Корни́ліе, и прему́дростію духо́вною и сло́вомъ укра́шенъ, тѣ́мъ привле́клъ еси́ мно́гихъ ду́ши во спасе́ніе, яви́въ мона́хомъ извѣ́стно житія́ прописа́ніе.

Зло́бы нача́льникъ вра́гъ, хотя́ тебѣ́ па́кость сотвори́ти, преподо́бне Корни́ліе, лука́выхъ человѣ́къ на тя́ вооружа́етъ: тебѣ́ прирази́вся, постыдѣ́ся, Христу́ бо тя́ соблюда́ющу.

Богоро́диченъ: Херуви́мъ и серафи́мъ превы́шши яви́лася еси́, Богоро́дице: Ты́ бо прія́ла еси́ невмѣсти́маго Бо́га во Твое́мъ чре́вѣ, Нескве́рная. Тѣ́мже Тя́, вси́ вѣ́рніи, пѣ́сньми, Чи́стая, ублажа́емъ.

Сѣда́ленъ, гла́съ 8. Подо́бенъ: Прему́дрости.

Христо́вою любо́вію связа́въ твою́ ду́шу и поще́нія страда́ньми утверди́вся, зла́та свѣтлѣ́йши, благоче́стіемъ облиста́лъ еси́ и, чи́стое прія́телище бы́въ Ду́ху, лука́выхъ духо́въ тму́ разгна́лъ еси́; тѣ́мъ собра́въ и́ночествующихъ мно́жества, па́стырь и́мъ бы́лъ еси́ и свѣти́льникъ свѣ́телъ, Корни́ліе преподо́бне. Моли́ Христа́ Бо́га грѣхо́въ оставле́ніе дарова́ти чту́щимъ любо́вію святу́ю па́мять твою́. [Два́жды.]

Сла́ва, и ны́нѣ, пра́здника или́ богоро́диченъ:

Яко Всенепоро́чная Невѣ́сто Творцу́, я́ко Неискусому́жная Ма́ти Изба́вителю, прія́телище я́ко су́щи Утѣ́шителя, Препѣ́тая, беззако́нію мя́ су́ща скве́рное оби́телище и бѣсо́мъ игра́лище, въ ра́зумѣ бы́вша, потщи́ся отъ тѣ́хъ злодѣ́йства мя́ изба́вити и свѣ́тлое жили́ще добродѣ́телей соверши́, Свѣтоно́сная Нетлѣ́нная, отжени́ о́блакъ страсте́й и вы́шняго прича́стія сподо́би и Свѣ́та невече́рняго моли́твами Твои́ми.

Пѣ́снь 4.

Ирмо́съ: Ты́ моя́ крѣ́пость, Го́споди, Ты́ моя́ и си́ла, Ты́ мо́й Бо́гъ, Ты́ мое́ ра́дованіе, не оста́вль нѣ́дра Отча, и на́шу нищету́ посѣти́въ. Тѣ́мъ съ проро́комъ Авваку́момъ зову́ Ти: си́лѣ Твое́й сла́ва, Человѣколю́бче.

Свѣ́тлое твое́ житіе́ я́ко пра́вило извѣ́стно вся́кія, о́тче, добродѣ́тели показа́ся въ моли́твахъ и поще́ніихъ, бдѣ́ніихъ же и мольба́хъ, я́же ко Христу́ Человѣколю́бцу.

Сна́ твои́ма очи́ма не да́лъ еси́, блаже́нне Корни́ліе, ни вѣ́ждома дрема́нія, до́ндеже сподо́бился еси́ пра́ведныхъ селе́нія, е́же угото́ва Бо́гъ, преподо́бне, лю́бящимъ Его́.

Стеня́, и пла́ча, и сѣ́туя, умиле́ніемъ и слеза́ми кропя́ зе́млю, при́сно, о́тче богому́дре, моли́тву соверша́лъ еси́, до́ндеже обрѣ́лъ еси́ боже́ственное утѣше́ніе во гра́дѣ Бо́жіи и со всѣ́ми святы́ми, преподо́бне, всели́лся еси́.

Богоро́диченъ: Бо́га, изъ Тебе́ воплоще́ннаго непрело́жно, единосу́щна Отцу́, и Тебѣ́, ро́ждшей, ра́вна по человѣ́честву, моли́ проще́ніе согрѣше́ній и душа́мъ спасе́ніе пою́щимъ Тя́ вѣ́рою дарова́ти.

Пѣ́снь 5.

Ирмо́съ: Вску́ю мя́ отри́нулъ еси́ отъ лица́ Твоего́, Свѣ́те незаходи́мый, и покры́ла мя́ е́сть чужда́я тма́ окая́ннаго? Но обрати́ мя, и къ свѣ́ту за́повѣдей Твои́хъ пути́ моя́ напра́ви, молю́ся.

Погаси́въ стра́сти росо́ю подвиго́въ твои́хъ, о́тче блаже́нне, бога́тно возже́глъ еси́ огне́мъ любве́ и вѣ́ры воздержа́нія свѣти́льникъ, и просвѣще́ніе безстра́стія, и дне́ сы́нъ яви́лся еси́.

Исцѣле́ній тебѣ́ благода́ть Христо́съ въ неду́зѣхъ разли́чныхъ дарова́ и на ду́хи нечи́стыя вла́сть, му́дре: естество́ бо, о́тче, побѣди́въ, па́че естества́ дарова́ній сподо́бился еси́ Ду́ха.

Ра́йскія добро́ты жела́я, преподо́бне Корни́ліе, въ слеза́хъ, и воздыха́ніихъ, и бдѣ́ніихъ и моли́твахъ твою́ жи́знь препроводи́лъ еси́ и сего́ ра́ди по сме́рти отъ Христа́ чудесы́ просла́вился еси́.

Богоро́диченъ: Тя́ стѣ́ну иму́щіи и заступле́ніемъ Твои́мъ соблюда́еміи, Твое́ю боже́ственною сла́вою хва́лящеся, Тя́ ублажа́емъ: Ты́ бо, Пречи́стая, душа́мъ на́шимъ источа́еши весе́ліе и ра́дованіе.

Пѣ́снь 6.

Ирмо́съ: Очи́сти мя́, Спа́се, мно́га бо беззако́нія моя́, и изъ глубины́ зо́лъ возведи́, молю́ся, къ Тебѣ́ бо возопи́хъ, и услы́ши мя́, Бо́же спасе́нія моего́.

Главы́ враго́въ мы́сленныхъ сокруши́ти, мо́лимся, и ви́димыя подъ но́зѣ покори́ти правосла́вному Импера́тору на́шему, моли́ся, преподо́бне, чту́щему любо́вію святу́ю па́мять твою́.

Житія́ твоего́ исправле́нія и вѣща́нія, о́тче, всю́ обтеко́ша отню́дъ вселе́нную, и́бо въ пресла́вную дости́глъ еси́ высоту́: Бо́гъ бо тя́ просла́ви и сла́вна всѣ́мъ сотвори́.

Ни́щихъ строи́тель, вдо́въ предста́тель, промы́сленникъ си́рыхъ, печа́льныхъ утѣше́ніе, па́дшихъ исправле́ніе, оби́димыхъ засту́пникъ ско́ръ бы́лъ еси́, твоему́, о́тче, подо́бяся учи́телю.

Богоро́диченъ: Вознесла́ еси́ вои́стинну па́дшее человѣ́ческое существо́, о́бразъ боже́ственный и Отцу́ ра́венство иму́ща, ви́димаго Сы́на неизмѣ́нна, Богома́ти, безъ сѣ́мене во чре́вѣ поноси́вши.

Конда́къ, гла́съ 8:

Го́сподеви, отъ Святы́я Дѣ́вы возсія́вшу мíрови, и Тому́ измла́да, я́ко а́нгелъ, послужи́лъ еси́, блаже́нне, и си́лою Его́ пусты́ню, я́ко гра́дъ, сотвори́лъ еси́, мно́жество же учени́къ въ не́й собра́лъ еси́, и́хже богодохнове́нными уче́ньми просвѣти́лъ еси́. Тѣ́мъ вопіе́мъ ти́: ра́дуйся, о́тче на́шъ Корни́ліе, и́нокомъ боже́ственное удобре́ніе.

Икосъ:

Зва́нію Го́спода твоего́ послѣ́довалъ еси́ прилѣ́жно, блаже́нне, вся́, я́же въ мíрѣ кра́сная, Его́ ра́ди преоби́дѣвъ. Тѣ́мже вопіе́мъ ти́: ра́дуйся, я́ко, измла́да Христа́ возлюби́въ, си́лою Его́ претерпѣ́лъ еси́ пусты́нное озлобле́ніе усе́рдно; ра́дуйся, я́ко Вы́шняго по́мощію бѣсо́вскую пре́лесть попра́лъ еси́; ра́дуйся, я́ко прече́стенъ хра́мъ Бо́жія Ма́тере воздви́глъ еси́; ра́дуйся, я́ко въ не́мъ тобо́ю Бо́гъ прославля́ется; ра́дуйся, я́ко собра́лъ еси́ учени́къ мно́жество; ра́дуйся, я́ко съ тѣ́ми прилѣ́жно Го́сподеви рабо́талъ еси́; ра́дуйся, я́ко удиви́лъ еси́ а́нгелы житіе́мъ твои́мъ; ра́дуйся, я́ко тобо́ю человѣ́цы по́льзовашася; ра́дуйся, крестоно́сному Импера́тору похвала́; ра́дуйся, христолюби́вому во́инству утвержде́ніе; ра́дуйся, я́ко моли́твами твои́ми сопроти́вніи побѣжда́ются; ра́дуйся, о́тче на́шъ Корни́ліе, и́нокомъ боже́ственное удобре́ніе.

Пѣ́снь 7.

Ирмо́съ: Бо́жія снисхожде́нія о́гонь устыдѣ́ся въ Вавило́нѣ иногда́, сего́ ра́ди о́троцы въ пещи́, ра́дованною ного́ю, я́ко во цвѣ́тницѣ, лику́юще поя́ху: благослове́нъ еси́, Бо́же оте́цъ на́шихъ.

Истощи́въ ту́лъ стрѣ́лъ, вра́гъ вселука́вый устраши́ти тя́ не возмо́же, си́лою бо Вы́шняго укрѣпля́емь и Того́ по́мощію вооружа́емь, преподо́бне, пѣ́лъ еси́: благослове́нъ еси́, Бо́же оте́цъ на́шихъ.

Бу́дущія жи́зни взыска́въ, сла́ву маловре́менную небре́глъ еси́ и, въ пусты́ню всели́вся, блаже́нне, со звѣрьми́ жи́ти изво́лилъ еси́, поя́: благослове́нъ еси́, Бо́же оте́цъ на́шихъ.

Вра́гъ, прирази́вся тебѣ́, преподо́бне, разбо́йники на тя́ посыла́етъ, постыдѣ́въ же ся, душе́внаго твоего́ хра́ма не поколеба́, утвержде́нъ бо бѣ́ на ка́мени.

Богоро́диченъ: Го́ру Тя́ проро́къ Даніи́лъ Боже́ственнымъ Ду́хомъ нарече́, Дѣ́во, изъ нея́же ка́мень безъ ру́къ отсѣче́ся и сокруше́ніе содѣ́я истука́ннѣй пре́лести.

Пѣ́снь 8.

Ирмо́съ: Седмери́цею пе́щь халде́йскій мучи́тель богочести́вымъ неи́стовно разжже́, си́лою же лу́чшею спасе́ны сія́ ви́дѣвъ, Творцу́ и Изба́вителю вопія́ше: о́троцы, благослови́те, свяще́нницы, воспо́йте, лю́діе, превозноси́те во вся́ вѣ́ки.

Царю́ всѣ́хъ и Бо́гу со святы́ми предстоя́, съ ни́миже, Корни́ліе, моли́ся, Импера́тору на́шему побѣ́ды на ва́рвары дарова́ти и грѣхо́въ оставле́ніе, твою́ па́мять почита́ющимъ и пою́щимъ вы́ну: свяще́нницы, воспо́йте, лю́діе, превозноси́те во вся́ вѣ́ки.

Госпо́днихъ за́повѣдей извѣ́стенъ храни́тель бы́лъ еси́, раздробля́я а́лчущимъ хлѣ́бъ тво́й, преподо́бне, та́ющу гла́домъ добродѣ́телей ду́шу мою́ насы́ти, блаже́нне, пою́ща любо́вію: свяще́нницы, воспо́йте, лю́діе, превозноси́те во вся́ вѣ́ки.

Ва́рваръ иногда́ наше́ствіе, и ко оби́тели твое́й устреми́вшихся, Боже́ственною си́лою устраши́лъ еси́. И ны́нѣ на на́съ мы́сленныхъ вра́гъ устремле́ніе моли́твами твои́ми разори́, пою́щихъ: свяще́нницы, воспо́йте, лю́діе, превозноси́те во вся́ вѣ́ки.

Богоро́диченъ: Къ Богоро́дицѣ все́ твое́ упова́ніе имѣ́лъ еси́, Корни́ліе, и Тоя́ призыва́ніемъ вра́жія сѣ́ти вся́ расто́рглъ еси́ и лю́тыхъ воста́ніе, съ Не́юже, преподо́бне, моли́ся о и́же любо́вію честну́ю твою́ па́мять чту́щихъ и вопію́щихъ: свяще́нницы, воспо́йте, лю́діе, превозноси́те во вся́ вѣ́ки.

Пѣ́снь 9.

Ирмо́съ: Ужасе́ся о се́мъ не́бо, и земли́ удиви́шася концы́, я́ко Бо́гъ яви́ся человѣ́комъ пло́тски, и чре́во Твое́ бы́сть простра́ннѣйшее небе́съ. Тѣ́мъ Тя́, Богоро́дицу, а́нгеловъ и человѣ́къ чинонача́лія велича́ютъ.

Бѣ́гая сла́вы отъ человѣ́къ, въ пусты́ню всели́лся еси́, вся́ уме́ты вмѣни́въ, да Христа́ еди́наго пріобря́щеши, Его́же ра́ди пусты́нная озлобле́нія претерпѣ́лъ еси́, да тлѣ́нными нетлѣ́нная измѣни́ши, Корни́ліе.

Отъ мѣ́ста отгони́ти тя́ вра́гъ покуша́вся, мона́хи на убіе́ніе твое́ поощря́ше, Корни́ліе преподо́бне, я́же до́брѣ уче́ніемъ твои́мъ наказа́лъ еси́ и, я́коже твоя́ ча́да, при́сно тѣ́хъ возлюби́лъ еси́.

Не забу́ди, посѣща́я ча́дъ твои́хъ, Корни́ліе преподо́бне, къ ра́цѣ моще́й твои́хъ притека́ющихъ и любо́вію па́мять твою́ торжеству́ющихъ, отъ всѣ́хъ искуше́ній вра́жіихъ изба́витися, всѣ́хъ Влады́цѣ моли́ся, блаже́нне.

Богоро́диченъ: Зачала́ еси́, Дѣ́во, безъ сѣ́мене, вся́ческая созда́вшаго Сло́во Бо́жіе, кромѣ́ хотѣ́нія пло́ти, и безъ истлѣ́нія родила́ еси́, безъ болѣ́зней ма́терскихъ. Тѣ́мъ Тя́, Богоро́дице, язы́комъ и се́рдцемъ исповѣ́дающе, велича́емъ.

Свѣти́ленъ:

Стра́стнаго омраче́нія ду́шу очи́стивъ, преподо́бне, честны́мъ поще́ніемъ и моли́твами непреста́нными, зерца́ло бы́лъ еси́ боже́ственныхъ сія́ній, свѣти́льниче мона́ховъ, Корни́ліе богому́дре. [Два́жды.]

Сла́ва, и ны́нѣ, пра́здника.

На хвали́техъ стихи́ры на 4, гла́съ 8. Подо́бенъ: О, пресла́внаго чудесе́!

О, пресла́внаго чудесе́!* Въ послѣ́днихъ родѣ́хъ,* просія́ въ добродѣ́телехъ* посты́ и моли́твами,* и труды́ тѣле́сными,* и ины́ми мно́гими страда́ніи,* по всему́ вре́мени твоего́ житія́,* у́мъ вперя́я къ Бо́гу,* подвиза́лся еси́ неосла́бно,* о́тче Корни́ліе. [Два́жды.]

О, пресла́внаго чудесе́!* Нигдѣ́же яви́лся еси́,* по́честь уловля́я* и ласка́ньми услажда́яся,* па́че же смире́ніе Христо́во нося́* въ согбе́ннѣ мудрова́ніи,* е́же вообража́лъ еси́ твои́мъ ученико́мъ,* и́хже собра́лъ еси́ мно́гими по́двиги и труды́,* о́тче Корни́ліе.

О, пресла́внаго чудесе́!* Пусты́ню гра́дъ сотвори́,* ю́же ви́дѣвше, ра́тніи* убоя́шася наступи́ти на ню́:* мня́ху бо и ви́дяху* мно́жество вооруже́нныхъ во́иновъ;* се́ же дѣ́ло моли́твъ ра́ди свята́го бы́сть,* и́же твори́тъ всегда́,* помога́я на́мъ, свои́мъ ученико́мъ.

Сла́ва, гла́съ 7:

Умно́живъ добродѣ́тель, просвѣти́лъ еси́ мíръ; ужаси́въ де́моны, возвесели́лъ еси́ а́нгелы; собра́въ ста́до мона́ховъ, научи́лъ еси́ и́хъ ходи́ти въ за́повѣдехъ Госпо́днихъ и, пріе́мъ благода́ть исцѣле́нія, съ вѣ́рою приходя́щимъ да́руеши безме́здно. Преподо́бне о́тче на́шъ, моли́ся о душа́хъ на́шихъ.

И ны́нѣ, пра́здника.



НА ЛИТУРГІИ,

Слу́жба вся́ преподо́бническая: [Блаже́нна пра́здника, пѣ́снь рядова́я и свята́го пѣ́снь 6-я, на 4. Проки́менъ, гла́съ 7: Честна́ предъ Го́сподемъ* сме́рть преподо́бныхъ Его́. Сти́хъ: Что́ возда́мъ Го́сподеви о всѣ́хъ, я́же воздаде́ ми? Апо́столъ къ Гала́томъ, зача́ло 213. Аллилуія, гласъ 6: Блаже́нъ му́жъ, боя́йся Го́спода, въ за́повѣдехъ Его́ восхо́щетъ зѣло́. Сти́хъ: Си́льно на земли́ бу́детъ сѣ́мя его́. Ева́нгеліе Луки́, зача́ло 24. Прича́стенъ: Въ па́мять вѣ́чную бу́детъ пра́ведникъ, отъ слу́ха зла́ не убои́тся.]

Источникъ: Минíа, мѣ́сяцъ Ма́ій. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 139 – 145 об.

/ Къ оглавленію раздѣла /


Наверхъ / Къ титульной страницѣ

0