Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - суббота, 21 октября 2017 г. Сейчасъ на порталѣ посѣтителей - 23.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Ма́ія въ 18-й де́нь.
Свята́го му́ченика Ѳеодо́та, и́же въ Анки́рѣ, и святы́хъ му́ченикъ Петра́, Діони́сія и и́же съ ни́ми, и святы́хъ седми́ дѣ́въ.

[ВЕЧЕРЪ,]
Стихи́ры, гла́съ 1. Подо́бенъ: Небе́сныхъ чино́въ.

Возложи́вся Го́сподеви,* я́коже свяще́ненъ сосу́дъ,* и повину́яся словесе́мъ Его́, богоблаже́нне,* разда́лъ еси́ бога́тно, му́чениче му́дре,* ни́щимъ бога́тство некра́домо,* муче́нія разу́мно и чу́дно себѣ́ притворя́я.

Се́ рѣка́ спасе́нія,* се́ исто́чникъ жи́въ,* святы́хъ ковче́гъ показа́ся дѣ́въ,* тѣ́мже, пріиди́те усе́рдно,* почерпе́мъ ны́нѣ, боля́щіи, исцѣле́ніе* и ра́дость, и́же въ ско́рби,* моли́твами святы́хъ невѣ́стъ Христо́выхъ.

Ины стихи́ры, гла́съ 4. Подо́бенъ: Да́лъ еси́ зна́меніе.

Заре́ю просвѣща́еми* трисо́лнечнаго Божества́,* темноту́ претеко́сте му́къ* и яви́стеся свѣ́тлы звѣ́зды,* Це́ркве боже́ственное утвержде́ніе,* при́сно свѣтоводя́ще, святíи му́ченицы,* Тѣ́мже светоза́рное ва́ше соверша́емъ торжество́,* покланя́ющеся моще́мъ* и пе́рсти тѣле́снѣй.

Петра́, Діони́сія,* Па́вла, Андре́я, Венеди́ма,* до́блія адама́нты,* Христи́ну, Ираклíя и Павли́на* вси́ ра́достію ны́нѣ ублажи́мъ, вѣ́рніи,* по Тро́ицѣ тве́рдо страда́вшія,* и вся́ зміи́на кова́рства попра́вшія,* и тму́ отгна́вшія и́дольскую благода́тію.

Кровьми́ искупи́сте Ца́рствіе, блаже́нніи,* Бо́жіе недви́жимое,* и приста́нища достиго́сте ти́хая,* вся́ко треволне́ніе подъе́мше лю́тыхъ* ра́зумомъ му́жескимъ, богоблаже́нніи.* Тѣ́мъ ублажа́етеся* и всѣ́ми прославля́етеся,* моля́щеся всегда́* обрѣсти́ на́мъ ми́лость въ Де́нь су́дный.

Сла́ва, и ны́нѣ, пра́здника.



[НА УТРЕНИ,]
Кано́нъ му́ченика и святы́хъ же́нъ, гла́съ 4.

Пѣ́снь 1.

Ирмо́съ: Пои́мъ Го́сподеви, пресла́вно погрузи́вшему фарао́на въ мо́ри, пѣ́снь побѣ́дную, я́ко просла́вися.

Пое́мъ Го́сподеви, человѣ́ческую не́мощь на неви́димаго врага́ укрѣ́пльшему и побѣ́дами вѣнча́вшему.

Богода́нную, страстоте́рпче, побѣ́ду пріе́мь, не побѣжде́нъ супоста́ты яви́лся еси́, Ѳеодо́те сла́вне, тѣ́хъ побѣжда́я.

Чистоты́ боже́ственныя добро́тою укра́шени, въ суди́лище, я́коже въ невѣ́стникъ, дѣ́вы внидо́сте, пою́ще Жениха́ Христа́.

Богоро́диченъ: Бы́хомъ, Богоро́дице, Твои́мъ Рождество́мъ вси́ о́бщницы боже́ственныя сла́вы, и́же любо́вію сла́вяще Ма́терь Тя́ всѣ́хъ Бо́га.

Инъ кано́нъ святы́хъ му́чениковъ, гла́съ то́йже.
Пѣ́снь 1.

Ирмо́съ: Воспою́ Тебѣ́, Го́споди Бо́же мо́й, я́ко изве́лъ еси́ лю́ди изъ рабо́ты еги́петскія, покры́лъ же еси́ колесни́цы фарао́новы и си́лу.

Вѣ́ры побо́рницы, вѣ́рою свяще́нное ва́ше всегда́ творя́щія торжество́, страсте́й изба́вите и вся́каго обстоя́нія.

Вѣ́триломъ впери́вшеся, богоно́сніи, крѣ́стнымъ пресла́вно, немо́кренно пучи́ну муче́ній преплы́сте, враги́ пото́пльше.

Совокупи́стеся чино́мъ небе́снымъ, претерпѣ́вше я́звы въ тѣлеси́, святíи, тѣ́мже боже́ственную дне́сь ва́шу па́мять почита́емъ.

Зако́номъ боже́ственнымъ утвержда́еми, беззако́ннующихъ совѣ́ты, му́дріи, упраздни́сте, пострада́вше же зако́нно, Бо́жію сла́ву улучи́сте.

Богоро́диченъ: Яко престо́лъ, Дѣ́во, Царя́, на него́же всѣ́дъ, вѣ́рнымъ сѣда́лище небе́сное угото́валъ еси́, почита́емъ и любо́вію Тя́ сла́вимъ.

Пѣ́снь 3.

Ирмо́съ: Въ Го́сподѣ Бо́зѣ мое́мъ се́рдце мое́ утверди́ся, тѣ́мъ немощству́ющіи препоя́сашася си́лою.

О Го́сподѣ Бо́зѣ твое́мъ укрѣ́плься, му́чениче Ѳеодо́те, враги́ супроти́вныя и́стиною уничижи́лъ еси́.

Дебельство́ плотско́е воздержа́ніемъ отло́жше, къ высотѣ́, страстоте́рпцы, страда́нія впери́стеся.

Къ ласка́ніемъ враго́въ слу́ха не прикло́ньше, пострада́сте зако́нно, зако́новъ боже́ственныхъ послу́шавше.

Богоро́диченъ: На ка́мени, Дѣ́во, Твое́ю наде́ждею утвержде́ни, ника́коже треволне́ніемъ искуше́ній поколеби́мся.

Инъ.

Ирмо́съ: Лу́къ си́льныхъ изнемо́же, и немощству́ющіи препоя́сашася си́лою, сего́ ра́ди утверди́ся въ Го́сподѣ се́рдце мое́.

Поста́вль на ка́мени вѣ́ры, Пе́тре, души́ твоея́ но́ги, блаже́нне, сопротивле́ніемъ не побѣди́лся еси́ безбо́жныхъ, всеблаже́нне.

Якоже тя́ звѣзду́ сія́ющу, гра́дъ тво́й, Пе́тре, мíрови предлага́етъ, отгоня́ща безбо́жія но́щь Боже́ственною благода́тію.

Воззрѣ́ніемъ къ Бо́гу вжиля́яся, Пе́тре, колесы́ и у́зами сокруша́емь и біе́мь непреста́нно, вѣнцено́сецъ показа́лся еси́.

Пѣ́ніе Бо́гови принося́ще, вся́ко, страстоте́рпцы, нанесе́ніе му́къ претерпѣ́сте: сего́ ра́ди вѣнце́въ сподо́бистеся.

Богоро́диченъ: Еди́на дѣ́вствуеши, ро́ждши, еди́на та́инства вели́каго вои́стинну Служи́тельница позна́лася еси́, Бо́га ро́ждши, Богоро́дице Ма́ти Дѣ́во.

Сѣда́ленъ, гла́съ 4. Подо́бенъ: Ско́ро предвари́.

Всѣ́мъ служи́тель, Ду́хомъ Боже́ственнымъ пома́зався, бы́лъ еси́, сла́вне, и, пострада́въ тве́рдо, вельми́ просла́вился еси́. Тѣ́мже тя́, соше́дшеся, Ѳеодо́те, почита́емъ, вѣ́рою соверша́юще святу́ю твою́ па́мять, въ не́йже моли́твами твои́ми вся́ спаса́й.

Сла́ва, гла́съ и подо́бенъ то́йже:

Му́ченическими кровьми́ удобре́ни, Го́сподеви предстоите́, всѣ́хъ Царю́, добропобѣ́дніи му́ченицы. Тѣ́мже съ весе́ліемъ честну́ю ва́шу па́мять дне́сь соверша́емъ, долго́въ разрѣше́ніе прося́ще прія́ти ва́ми и ве́лію ми́лость.

И ны́нѣ, пра́здника или́ богоро́диченъ:

Дѣ́во Всенепоро́чная, Яже Пресу́щнаго Бо́га ро́ждшая, со безпло́тными Того́ непреста́нно моли́ оставле́ніе прегрѣше́ній и исправле́ніе житія́ да́ти на́мъ пре́жде конца́, вѣ́рою и любо́вію пою́щимъ Тя́ по до́лгу, еди́на Всепѣ́тая.

Крестобогоро́диченъ:

На Крестѣ́ Тя возвы́шена я́ко узрѣ́ Пречи́стая Ма́ти Твоя́, Сло́ве Бо́жій, ма́терски рыда́ющи, вѣща́ше: что́ но́вое и стра́нное сіе́ чу́до, Сы́не Мо́й? Ка́ко, Жи́знь всѣ́хъ, вкуша́еши сме́рти, оживи́ти ме́ртвыя хотя́, я́ко Милосе́рдъ?

Пѣ́снь 4.

Ирмо́съ: Услы́шахъ слу́хъ Твоего́ смотре́нія, я́ко отъ Дѣ́вы роди́лся еси́, ро́ждшую не опали́въ: и просла́вихъ, Спа́се, снизхожде́ніе Твое́.

Ты́, кровьми́ страда́льческими, я́коже въ мо́ри, гони́теля, му́чениче, погру́жь, въ нетлѣ́ннѣ наслажде́ніи весели́шися, поя́ Христа́ Вѣнцеда́вца.

Просія́ благохва́льный ли́къ страстоте́рпицъ, се́дмь му́дрыхъ дѣ́въ, многосвѣ́тлы свѣщи́ вже́гше, въ Христо́вѣ боже́ственнѣмъ черто́зѣ.

Богоро́диченъ: Яко вѣне́цъ Тя́ мы́сленный, дѣ́вы страстоте́рпицы иму́ще, о Тебѣ́, Дѣ́во, хва́лятся, пою́ще Сы́на и Бо́га Твоего́, Жениха́ и Влады́ку.

Инъ.

Ирмо́съ: Любве́ ра́ди, Ще́дре, Твоего́ о́браза на Крестѣ́ Твое́мъ ста́лъ еси́, и раста́яшася язы́цы: Ты́ бо еси́, Человѣколю́бче, крѣ́пость моя́ и хвале́ніе.

Дрема́ніе отъ вѣ́ждей душе́вныхъ оттря́сше, е́же отъ лѣ́ности, бо́дростію боже́ственною, все́ успи́сте безбо́жныхъ зло́е умышле́ніе.

Яко пречестнíи и боже́ственніи Сло́ва ка́меніе, уморе́ни бы́вше ка́меніемъ, Андре́й, Па́велъ и Діони́сій присносу́щныя жи́зни сподо́бишася.

Прекра́сное цвѣ́тіе благоче́стія и и́стинное и боже́ственное Христо́во благово́ніе, вѣ́рою восхва́лимъ му́ченики дне́сь.

До́льняя презрѣ́вше жела́ніемъ боже́ственнымъ и плотскíя болѣ́зни претерпѣ́вше до́блественнѣ, ра́дующеся, къ неболѣ́зненному животу́ преидо́ша.

Богоро́диченъ: Препѣ́тая Дѣ́во Богороди́тельнице, пою́щія Тя́ спаса́й, на Тя́ упова́ющія, вся́каго обстоя́нія, и бѣ́дъ, и скорбе́й.

Пѣ́снь 5.

Ирмо́съ: Возсія́вый Свѣ́тъ, и просвѣти́вый у́тро, и показа́вый де́нь, сла́ва Тебѣ́, сла́ва Тебѣ́, Іису́се, Сы́не Бо́жій.

Отъ ча́ши, му́дре, души́ твоея́, пролива́я вино́ уче́нія, сердца́ возвесели́лъ еси́ благочести́выхъ, Ѳеодо́те сла́вне.

Воздержа́нія, честны́я, напи́вшеся росы́, цвѣ́ты чистоты́ разу́мно израсти́сте и Христо́во благово́ніе яви́стеся.

Плотскíя болѣ́зни, я́ко наслажде́ніе, дѣ́вы Влады́чнія ра́ди любве́ вмѣня́юще, Его́ ра́ди до́блѣ пострада́ша.

Богоро́диченъ: Изба́вльшеся пре́лести и́дольскаго бѣше́нія Рождество́мъ Твои́мъ боже́ственнымъ, Тя́ пое́мъ, Чи́стая, благи́хъ вину́ и Хода́таицу.

Инъ.

Ирмо́съ: Просвѣще́ніе Твое́, Го́споди, низпосли́ на́мъ и отъ мглы́ прегрѣше́ній разрѣши́ ны, Бла́же, Тво́й ми́ръ да́руяй.

Зна́менавшеся, му́ченицы, свѣ́томъ разу́мнымъ, муче́нія тму́ и но́чь злу́ю многобо́жія си́лою Боже́ственною непоткнове́нно преидо́сте.

Дѣви́ческими сія́ющи, Христи́но, добро́тами, я́звенными заря́ми свѣ́тло украси́лася еси́ и въ мы́сленный Христо́въ черто́гъ всели́лася еси́, ра́дующися.

Неи́стовнѣ рачи́тельствующіи тѣ́ла твоего́, Христи́но му́ченице, сла́дкимъ твои́мъ сло́вомъ жела́нію Бо́жію привя́зани, пострада́ша крѣ́пко.

Богоро́диченъ: Невѣ́сто Бо́жія Безневѣ́стная, Ея́же ра́ди ве́тхаго отрѣши́вшеся до́лга, сы́нове по благода́ти яви́хомся Отца́ Небе́снаго, пою́щія Тя́ сохраня́й.

Пѣ́снь 6.

Ирмо́съ: Якоже проро́ка Іо́ну отъ ки́та изба́вилъ еси́, Христе́ Бо́же, и мене́ изъ глубины́ прегрѣше́ній возведи́ и спаси́ мя, еди́не Человѣколю́бче.

Якоже приста́нище тя́ боже́ственно вѣ́рніи, Ѳеодо́те, обрѣ́тше, злочести́выхъ треволне́нія уклони́шася, пою́ще ко́рмчію Христа́.

Любле́ніемъ Зижди́теля, есте́ственную укрѣпи́ша не́мощь, па́че есте́ственныя страстоте́рпицы по́двиги, и о се́мъ до́брѣ претерпѣ́ша.

Седмосвѣ́тлаго свѣти́льника равночи́сленны свѣщи́ вже́гше, я́коже въ черто́зѣ, дѣ́вы, внидо́сте въ по́двигъ страда́нія.

Богоро́диченъ: Земля́ отъ кля́твы изба́вися дре́внія, Дѣ́во, Рождество́мъ Твои́мъ со живу́щими на не́й. Вину́ благослове́нія, всегда́ сла́вимъ Тя́.

Инъ.

Ирмо́съ: Возопи́, прообразу́я погребе́ніе тридне́вное, проро́къ Іо́на, въ ки́тѣ моля́ся: отъ тли́ изба́ви мя́, Іису́се, Царю́ си́лъ.

Сла́вный до́блествовавъ Ираклíй, прія́тъ ве́лію сла́ву, рая́ граждани́нъ бы́въ и честны́мъ лико́мъ соедини́вся страда́лецъ, ны́нѣ ра́дуется.

Воспое́мъ съ Павли́номъ боже́ственнаго Венеди́ма и Андре́я, Ираклíя и Діони́сія, Петра́ же, и Па́вла, и Христи́ну, Госпо́дни му́ченики.

Растерза́еми и ка́меніемъ непра́ведно біе́ми, огне́мъ же скончава́еми, сла́вніи му́ченицы, въ Це́ркви пе́рвенецъ жи́ти сподо́бистеся.

Показа́вшему прему́дрыя страстоте́рпцы, сія́юще, я́коже звѣ́зды, на тве́рди церко́внѣй, благоче́стно пою́ще: Сы́ну Бо́жію поклони́мся.

Богоро́диченъ: Яко ни́ва, плодоно́сный кла́съ прозябла́ еси́, Богоро́дице, живо́тный, жи́знію вѣ́рныя препита́ющаго и гла́дъ преле́стный отъ земли́ вои́стинну отвраща́ющаго.

Конда́къ, гла́съ 2. Подо́бенъ: Вы́шнихъ ища́.

Страда́льчески подвиза́вся до́брѣ, со сострада́льцы твои́ми, Ѳеодо́те, и вѣнцы́ по́чести прія́сте съ честны́ми страстоте́рпицами дѣ́вами. Тѣ́мже Христа́ Бо́га моли́те непреста́нно о всѣ́хъ на́съ.

Пѣ́снь 7.

Ирмо́съ: Глаго́лавый на горѣ́ съ Моисе́омъ и о́бразъ дѣ́вства явле́й въ купинѣ́, благослове́нъ еси́, Бо́же оте́цъ на́шихъ.

Кова́рствія враго́въ, страстоте́рпче, му́дростію духо́вною изоблича́я, отъ си́хъ пре́лести спа́слъ еси́ пострада́вшія съ тобо́ю му́ченики.

Нетлѣ́нныхъ бла́гъ любо́вію, дѣ́вы, окрили́вше помышле́нія, по́двиги взыдо́сте къ си́мъ, воспѣва́юще Христа́.

Зло́бы обрѣта́теля, страстоте́рпицы, ника́коже ле́стію прекло́ньшеся, цѣ́лу Зижди́теля, сла́вныя, за́повѣдь соблюдо́сте.

Богоро́диченъ: Ви́дѣти сла́ву изъ Тебе́ Рожде́ннаго и сея́ наслади́тися съ му́ченики, Тя́, Пречи́стая, пою́щія, Сего́ при́сно умоли́.

Инъ.

Ирмо́съ: Авраа́мстіи иногда́ въ Вавило́нѣ о́троцы пе́щный пла́мень попра́ша, пѣ́сньми взыва́юще: оте́цъ на́шихъ Бо́же, благослове́нъ еси́.

Юнымъ ревну́юще вѣ́рно въ Вавило́нѣ дѣ́темъ, во о́гнь усе́рдно внидо́сте, вопію́ще, блаже́нніи: оте́цъ на́шихъ Бо́же, благослове́нъ еси́.

Не поклони́стеся истука́ннымъ, страда́льцы сла́вніи, небре́гше, приснопа́мятную сме́рть претерпѣ́сте, безсме́ртная наслажде́нія я́вѣ воспріе́мше.

Му́жественною душе́ю и крѣ́постію нра́ва беззако́ннующихъ шата́нія низложи́ша му́ченицы, вопію́ще вѣ́рно: оте́цъ на́шихъ Бо́же, благослове́нъ еси́.

Глаго́лы боже́ственныхъ му́ченикъ укрѣ́плься, Павли́не, умре́ти произво́лилъ еси́, пресла́вне, вопія́ Сотво́ршему вся́ческая: оте́цъ на́шихъ Бо́же, благослове́нъ еси́.

Богоро́диченъ: Киво́тъ Бо́жій, боже́ственныя ма́нны ста́мну, златы́й свѣ́щникъ и трапе́зу, го́ру святу́ю, Богоро́дицу вси́ пѣ́сненно сла́вимъ, вѣ́рніи.

Пѣ́снь 8.

Ирмо́съ: Царя́ Христа́, Его́же исповѣ́даша плѣне́нніи о́троцы, въ пещи́ глаго́люще ве́ліимъ гла́сомъ: вся́ дѣла́, по́йте Го́спода.

Благодѣ́теля Христа́ имѣ́я, Ѳеодо́те, въ болѣ́знехъ страда́нія, соблюда́юща и укрѣпля́юща при́сно тя́ во все́мъ, пачеесте́ственныя по́двиги подъя́лъ еси́, поя́ Самого́ Бо́га и Царя́.

Благоволе́ніемъ Христа́ до́брыя дѣ́вы, ду́ши услади́вше, во слѣ́дъ Сего́ теча́ху, пострада́вше до́блественно, и въ ра́дости вопія́ху: Тя́ превозноша́емъ, Христе́, во вѣ́ки.

Содѣ́телю вся́ческихъ, Ты́ не́мощь укрѣпи́лъ еси́, Сло́ве, же́нскаго естества́ во страда́ніихъ, я́ко Бо́гъ, тѣ́мже, до́брѣ страда́вше, поя́ху святы́я Тя́, Бо́га и Царя́.

Богоро́диченъ: Новодѣ́тель человѣ́ча естества́, Чи́стая, изъ Тебе́ бо человѣ́ческое поне́слъ, я́ко Человѣколю́бецъ Бо́гъ и Творе́цъ, естество́ созда́ на́ше, исповѣ́дающихъ Тя́, вои́стинну Богоро́дицу.

Инъ.

Ирмо́съ: Изба́вителю всѣ́хъ Всеси́льне, посредѣ́ пла́мене благоче́ствовавшія, снизше́дъ, ороси́лъ еси́ и научи́лъ еси́ пѣ́ти: вся́ дѣла́, благослови́те, по́йте Го́спода.

Истка́нную отъ вы́шнія благода́ти совлече́ніемъ бре́ннаго тѣлесе́ страда́льцы въ ри́зу облеко́шася, любо́вію вопію́ще: вся́ дѣла́, благослови́те, по́йте Го́спода.

Кропле́ніемъ боже́ственныя кро́ве, му́ченицы, очи́стившеся, кро́вь ва́шу за Христа́ излія́сте, пою́ще непреста́нно: вся́ дѣла́, благослови́те, по́йте Го́спода.

Красны́ гро́зды яви́стеся мы́сленнаго виногра́да, блаже́нніи, вино́ на́мъ пролива́юще благоче́стія, любо́вію взыва́ющимъ: вся́ дѣла́, благослови́те, по́йте Го́спода.

Богоро́диченъ: Мы́сленное очисти́лище бы́сть, всѣ́хъ моли́твы пріе́млющи и Сы́ну Твоему́, Пречи́стая, вознося́щи во избавле́ніе пою́щимъ: вся́ дѣла́, благослови́те, по́йте Го́спода.

Пѣ́снь 9.

Ирмо́съ: Безсѣ́менное Рождество́ Твое́, Богоро́дице Чи́стая, Христа́ Бо́га на́шего пѣ́сньми немо́лчными велича́емъ.

Преле́стныя полки́ побѣди́, сла́вне, си́лою духо́вною и прія́тъ вѣне́цъ побѣ́ды, Ѳеодо́те.

Яко ма́сти, чудеса́ дыха́я, всѣ́хъ благоуха́еши, Ѳеодо́те, вѣ́рою и любо́вію тя́ сла́вящія.

Заре́ю сія́юще чистоты́, красны́ показа́стеся добро́тою во страда́ніи, добродѣ́вы.

Мольбу́ седмосвѣ́тлую, честны́я, вже́гше, на́съ наста́вите къ незаходи́мому свѣ́ту Христа́ Бо́га.

Богоро́диченъ: Па́че вся́кія любве́ Твое́ жела́ніе, Пречи́стая, су́щи, привлачи́тъ мя́ вопи́ти Тебѣ́ непреста́нно: ра́дуйся, Влады́чице.

Инъ.

Ирмо́съ: Ева у́бо неду́гомъ преслуша́нія кля́тву всели́ла е́сть, Ты́ же, Дѣ́во Богоро́дице, прозябе́ніемъ чревоноше́нія мíрови благослове́ніе процвѣла́ еси́. Тѣ́мъ Тя́ вси́ велича́емъ.

Поже́рше жела́ніемъ са́ми себе́, му́ченицы до́бліи, ра́дующеся, преда́ша кро́ви усе́рдно, и бога́тство неотъе́млемо прія́ша, и ны́нѣ му́ченическимъ причто́стеся ликостоя́ніемъ, всехва́льніи.

Яви́стеся цвѣ́ти мы́сленніи, благоуха́юще, страстоно́сцы, благоче́стіе, и боже́ственнаго гра́да гра́ждане, приста́нища су́щимъ въ бу́ри спаси́тельна, свѣти́льницы и́стины и побо́рницы, тѣ́мже досто́йно блажи́ми есте́.

Съ Петро́мъ и Па́вломъ му́драго Ираклíя, Павли́на и Венеди́ма, вку́пѣ Андре́я, и Христи́ну, и Діони́сія почти́мъ, крѣ́пко за Христа́ пострада́вшія и ле́сть потре́бльшія.

Земля́ у́бо кро́ви ва́ша прія́тъ, излія́вшіяся, великоимени́тіи, за всѣ́хъ Благодѣ́теля, жили́ща же пра́ведныхъ ду́хи, съ ни́миже лику́юще, помяни́те помина́ющія ва́съ всегда́.

Богоро́диченъ: Гла́съ Тебѣ́, вѣ́рніи, ра́достно приноша́емъ а́нгеловъ, Богоневѣ́сто: ра́дуйся, помо́щнице человѣ́комъ, му́ченикъ и апо́столъ утвержде́ніе и всѣ́хъ проро́ковъ оглаше́ніе, Богороди́тельнице Всенепоро́чная.

Источникъ: Минíа, мѣ́сяцъ Ма́ій. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 130 – 134 об.

/ Къ оглавленію раздѣла /


Наверхъ / Къ титульной страницѣ

0