Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - вторникъ, 23 мая 2017 г. Сейчасъ на порталѣ посѣтителей - 14.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Ма́ія въ 16-й де́нь.
Преподо́бнаго отца́ на́шего Ѳео́дора Освяще́ннаго, ученика́ преподо́бнаго Пахо́мія Вели́каго.

[ВЕЧЕРЪ,]
Стихи́ры Ѳео́дора, гла́съ 6. Подо́бенъ: Все́ отло́жше.

Еги́петъ пе́рвѣе,* де́монскими неи́стовяся же́ртвами и страстьми́,* по́стническими ны́нѣ чи́нми украша́ется* и разли́чными добро́тами,* добродѣ́тельми боже́ственными украша́емь показу́ется.* Въ не́мже просія́* боже́ственныхъ даро́въ тезоимени́тый* Ѳео́доръ преподо́бный, и богови́дный,* и богопрія́тный,* и́же, чу́днымъ смире́ніемъ подо́бяся Христу́,* со дерзнове́ніемъ мо́лится* о душа́хъ на́шихъ.

Поще́ніе, воздержа́ніе,* смире́ніе, терпѣ́ніе,* оша́яніе зло́бы, добродѣ́тели прія́тіе* отъ ю́ности му́дрый Ѳео́доръ,* по́стникъ вели́кій,* богому́дрый показа́ся,* те́плъ бы́въ боже́ственныя любве́ рачи́тель,* и вся́ ви́димая, ра́дуяся, превзы́де, чу́дный,* жи́тельствомъ возвыша́емый,* бесѣ́дуя Бо́гу,* со дерзнове́ніемъ мо́лится* ны́нѣ о душа́хъ на́шихъ.

Сла́ва, и ны́нѣ, пра́здника.

Тропа́рь, гла́съ 1:

Пусты́нный жи́тель, и въ тѣлеси́ а́нгелъ, и чудотво́рецъ яви́лся еси́, богоно́се о́тче на́шъ Ѳео́доре: посто́мъ, бдѣ́ніемъ, моли́твою небе́сная дарова́нія пріи́мъ, исцѣля́еши неду́жныя и ду́ши вѣ́рою притека́ющихъ ти́. Сла́ва Да́вшему тебѣ́ крѣ́пость, сла́ва Вѣнча́вшему тя́, сла́ва Дѣ́йствующему тобо́ю всѣ́мъ исцѣле́нія.


[НА УТРЕНИ,]
Кано́нъ, его́же краегране́сіе: Пою́ Бо́гу тя́ да́ра свяще́нна. Гла́съ 2.

Пѣ́снь 1.

Ирмо́съ: Во глубинѣ́ постла́ иногда́ фараони́тское всево́инство преоруже́нная си́ла, вопло́щшееся же Сло́во всезло́бный грѣ́хъ потреби́ло е́сть, препросла́вленный Госпо́дь, сла́вно бо просла́вися.

Пѣснопѣ́ніи хотя́щему твое́ пѣ́ти ны́нѣ торжество́, боже́ственныхъ даро́въ я́ко сы́й тезоимени́тъ, да́ръ пода́ждь ми́ свѣтоно́сенъ, отъ сокро́вищъ почерпа́я неиздае́мыхъ благода́ть боже́ственную, всеприснопа́мятне. [Два́жды.]

Поуча́яся зако́ну прилѣ́жно, о́тче, чи́стому, ве́сь чи́стъ и пречи́стъ бы́лъ еси́, Всечи́стому же Сло́ву совокупля́яся, чистоты́ свѣ́телъ сосу́дъ показа́лся еси́ и освяще́нъ, всеблаже́нне.

Богоро́диченъ: Умертви́въ себе́ мíру, жи́знь, о́тче, равноа́нгельну на земли́ благоче́стно проходя́, Возсія́вшему отъ ложе́снъ дѣви́ческихъ послѣ́довалъ еси́, кре́стъ тво́й на ра́мо взе́мъ, богому́дре преблаже́нне.

Пѣ́снь 3.

Ирмо́съ: Процвѣла́ е́сть пусты́ня я́ко кри́нъ Го́споди, язы́ческая неплодя́щая це́рковь, прише́ствіемъ Твои́мъ, въ не́йже утверди́ся мое́ се́рдце.

Яко да́ръ люби́мь, Влады́цѣ, преподо́бне, твою́ ду́шу, Ѳео́доре, спаса́ему и воздержа́ніемъ отъ страсте́й измѣне́нну прине́слъ еси́. [Два́жды.]

Бо́гу освяще́нъ, превозше́лъ еси́, всему́дре, зри́мыхъ чу́вство, чи́стымъ же умо́мъ бесѣ́довалъ еси́ Уму́ превы́спреннему, преблаже́нне.

Богоро́диченъ: Удали́лся еси́ въ пусты́ни, бѣ́гая, сла́вне, Иже отъ Дѣ́вы просія́вшаго Бо́га Сло́ва ты́ пріи́мъ, о Не́мже и спа́слся еси́, досточу́дне.

Конда́къ, гла́съ 2. Подо́бенъ: Вы́шнихъ ища́.

Въ дому́ Бо́жіи, я́ко фи́никсъ, процвѣ́лъ еси́, плоды́ же добродѣ́телей Го́сподеви прине́слъ поще́ніемъ изря́днымъ, о́тче преподо́бне, тѣ́мже и ублажа́ешися, я́ко безпло́тныхъ равностоя́теленъ.

Сѣда́ленъ, гла́съ 3. Подо́бенъ: Боже́ственныя вѣ́ры.

Боже́ственною си́лою одѣ́янъ, обнажи́лъ еси́ полки́ супроти́вныхъ си́лъ, богоно́се, и, добродѣ́телей просія́въ свѣ́тлостію, исцѣле́ній зари́ облиста́лъ еси́, о́тче преподо́бне: Христа́ Бо́га моли́ дарова́ти на́мъ ве́лію ми́лость.

Сла́ва, и ны́нѣ, пра́здника или́ богоро́диченъ:

Боже́ственная ски́нія была́ еси́ Сло́ва, еди́на Пречи́стая Ма́ти Дѣ́во, чистото́ю а́нгелы превозше́дшая, па́че всѣ́хъ мене́, пе́рсть бы́вша, оскверне́на плотски́ми прегрѣше́ньми, очи́сти моли́твъ Твои́хъ боже́ственными вода́ми, подаю́щи, Чи́стая, ве́лію ми́лость.

Крестобогоро́диченъ:

Нескве́рная Агница Сло́ва, нетлѣ́нная Дѣ́ва Ма́ти, на Крестѣ́ зря́щи повѣ́шена изъ Нея́ безъ болѣ́зни прозя́бшаго, ма́терски подо́бно, рыда́ющи, вопія́ше: увы́ Мнѣ́, Ча́до Мое́, ка́ко стра́ждеши во́лею, хотя́ изба́вити отъ страсте́й безче́стія человѣ́ка?

Пѣ́снь 4.

Ирмо́съ: Прише́лъ еси́ отъ Дѣ́вы не хода́тай, ни а́нгелъ, но Са́мъ Го́споди вопло́щся, и спа́слъ еси́ всего́ мя человѣ́ка; тѣ́мъ зову́ ти́: сла́ва си́лѣ Твое́й, Го́споди.

Купносе́льникъ Пахо́мію боже́ственному бы́въ, нра́вы подража́лъ еси́, о́тче богому́дре Ѳео́доре, того́ воздержа́нія и правосла́вною вѣ́рою уподобля́емый.

Пѣва́емаго ца́рства и боже́ственнаго сія́нія, досто́йно получи́лъ еси́, я́ко бы́въ худо́гъ, о́тче, чистото́ю, къ прича́стію неизрече́нныя красоты́.

Се́ла еѳіо́пская, де́монская со́нмища твоего́ ужасо́шася терпѣ́нія, и смире́нія, и непреста́ннаго во бдѣ́ніихъ твоего́ стоя́нія, досточу́дне.

Богоро́диченъ: Во изступле́ніи главы́ си́льныхъ ссѣко́шася стра́хомъ рождества́ Твоего́, Богороди́тельнице Всенепоро́чная, собо́ръ же преподо́бныхъ удиви́ся досто́йно Боже́ственною благода́тію.

Пѣ́снь 5.

Ирмо́съ: Хода́тай Бо́гу и человѣ́комъ бы́лъ еси́, Христе́ Бо́же: Тобо́ю бо Влады́ко, къ свѣтонача́льнику Отцу́ Твоему́, отъ но́щи невѣ́дѣнія, приведе́ніе и́мамы.

Уче́нія те́плѣ честна́я имѣ́въ, разори́лъ еси́ всѣ́хъ ересе́й преле́стная прія́тія, му́дре, Тро́ическою вѣ́рою огражда́я ста́до твое́. [Два́жды.]

Яко свѣ́тъ вои́стинну на земли́ бы́лъ еси́, Ѳео́доре, житіе́ непоро́чно пожи́въ, всеприснопа́мятне, по́стниковъ украше́ніе, мона́шествующихъ похвала́.

Богоро́диченъ: Тече́ніемъ по́стническихъ сле́зъ напая́я се́рдце твое́, плодоно́сно показа́лъ еси́ возсія́вшему Влады́цѣ Христу́ отъ Дѣ́вы Святы́я, Ѳео́доре пребога́те.

Пѣ́снь 6.

Ирмо́съ: Въ бе́зднѣ грѣхо́внѣй валя́яся, неизслѣ́дную милосе́рдія Твоего́ призыва́ю бе́здну: отъ тли́, Бо́же мя́ возведи́.

Свѣ́тлое и богоуго́дное житіе́ твое́ тебѣ́ небе́сную, о́тче, свѣ́тлость святы́хъ показа́, въ се́лѣхъ небе́сныхъ, Ѳео́доре. [Два́жды.]

Побѣди́тель, одолѣва́я, Ѳео́доре, лука́вствія духо́въ, бы́лъ еси́, Утѣ́шителя Ду́ха помо́щника стяжа́въ, богопрія́тне.

Богоро́диченъ: Облакъ ле́гкій еси́, Чи́стая, на не́мже сѣдя́, пріи́де во Еги́петъ Вседержи́тель Госпо́дь и свѣти́льники преподо́бныя содѣ́ла.

Конда́къ, и и́косъ пра́здника.

Пѣ́снь 7.

Ирмо́съ: Богопроти́вное велѣ́ніе беззако́ннующаго мучи́теля высо́къ пла́мень вознесло́ е́сть: Христо́съ же простре́ Богочести́вымъ отроко́мъ ро́су духо́вную, Сы́й Благослове́нъ и Препросла́вленъ.

Разу́мно возжела́лъ еси́, я́коже богови́децъ, боже́ственную свѣ́тлость ви́дѣти, Ѳео́доре, тѣ́мже ви́димая вся́ оста́вилъ еси́, во мра́къ же вше́дъ, зрѣ́ти сподо́бился еси́ Непостижи́маго. [Два́жды.]

Яда ты́ зміи́на душетлѣ́ннаго, преблаже́нне Ѳео́доре, ника́коже пріи́мъ, сего́ па́мять, о́тче, погуби́лъ еси́, па́мять непреста́нно Бо́жію въ се́рдцы, блаже́нне, стяжа́въ.

Богоро́диченъ: Святы́хъ Свята́го, во святы́хъ почива́ющаго, свя́то породила́ еси́, Дѣ́во Всенепоро́чная, за милосе́рдіе мно́гое Человѣ́ка бы́вша, изъ Тебе́ воплоще́нна, пре́жде Безпло́тнаго.

Пѣ́снь 8.

Ирмо́съ: Пе́щь иногда́ о́гненная въ Вавило́нѣ дѣ́йства раздѣля́ше, Бо́жіимъ велѣ́ніемъ халде́и опаля́ющая, вѣ́рныя же ороша́ющая, пою́щія: благослови́те вся́ дѣла́ Госпо́дня Го́спода.

Ты́ свѣтови́денъ, Свѣ́ту пресвѣ́тлому бесѣ́довавъ, яви́лся еси́, преблаже́нне Ѳео́доре, едине́ніемъ же лу́чшимъ па́че естества́ обожа́емь, зовы́й ны́нѣ: благослови́те, вся́ дѣла́ Госпо́дня, Го́спода. [Два́жды.]

Му́ченикъ бы́въ тве́рдъ ко грѣху́, да́же до кро́ве проти́влься, богому́дре Ѳео́доре, вѣнце́мъ страда́нія твою́ главу́ украси́лъ еси́, зовы́й ны́нѣ: благослови́те, вся́ дѣла́ Госпо́дня, Го́спода.

Богоро́диченъ: Яви́ся на́мъ изъ Тебе́, Богороди́тельнице, пра́вды свѣ́тлое Со́лнце, просвѣща́я вся́ческая заре́ю Божества́, вопло́щся Вы́шній, Его́же ны́нѣ воспѣва́емъ: благослови́те, вся́ дѣла́ Госпо́дня, Го́спода.

Пѣ́снь 9.

Ирмо́съ: Безнача́льна Роди́теля Сы́нъ, Бо́гъ и Госпо́дь, вопло́щься отъ Дѣ́вы, на́мъ яви́ся, омраче́нная просвѣти́ти, собра́ти расточе́нная, тѣ́мъ Всепѣ́тую Богоро́дицу, велича́емъ.

Ны́нѣ не въ гада́ніихъ тебѣ́ Христо́съ ви́димь е́сть, къ лицу́ же па́че ви́дится лице́мъ, и́стиннымъ явле́ніемъ, и́же сѣно́внымъ разрѣ́шшимся зерца́ломъ, даро́въ тезоимени́те, Спа́са и Бо́га на́шего. [Два́жды.]

Жела́ніе боже́ственное твое́ испо́лнися, Ѳео́доре, я́ко дости́гъ кончи́ну, е́же поще́ніемъ издале́ча зря́ше со умиле́ніемъ, его́же и получи́въ, жела́нія уста́вилъ еси́, по́стниковъ похвало́, мона́шествующихъ благолѣ́піе.

Богоро́диченъ: Неду́говавъ растлѣ́тися преслуша́ніемъ, пе́рвый Ада́мъ Тобо́ю, Богома́ти, обнови́ся: Ты́ бо, воплоще́нна Сло́ва ро́ждши безъ истлѣ́нія неизрече́нно, тлю́ искорени́вши, нетлѣ́ніе процвѣла́ еси́.

Источникъ: Минíа, мѣ́сяцъ Ма́ій. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 119 – 121 об.

/ Къ оглавленію раздѣла /


Наверхъ / Къ титульной страницѣ

0