Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - суббота, 27 мая 2017 г. Сейчасъ на порталѣ посѣтителей - 12.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Ма́ія въ 16-й де́нь.
Слу́жба преподо́бнаго отца́ на́шего Ефре́ма Переко́мскаго.

[ВЕЧЕРЪ,]
[Блаже́нъ му́жъ: 1-й антифо́нъ. На Го́споди воззва́хъ:] стихи́ры, гла́съ 5. Подо́бенъ: Ра́дуйся.

Преподо́бне о́тче Ефре́ме,* любве́ ра́ди учи́теля твоего́,* вся́, я́же на земли́, преоби́дѣлъ еси́,* и, въ пусты́ню всели́вся,* пло́ти по́хотное мудрова́ніе умертви́лъ еси́,* и по́стническими труды́ твое́ житіе́ уясни́лъ еси́.* Отону́дуже и ученики́ собра́въ,* ревну́ющія твоему́ житію́,* си́хъ Христу́ приве́лъ еси́,* Его́же моли́ спасти́ всѣ́хъ, тебе́ пою́щихъ.

Иже непра́ведно разбо́йнически* наше́дшихъ на оби́тель твою́, преподо́бне,* хотя́щихъ оскорби́ти ученики́ твоя́,* ты́ же отъ ке́лліи я́ко тѣ́хъ ви́дѣлъ еси́,* то́кмо жезла́ ударе́ніемъ устраши́лъ еси́.* Отону́дуже, я́ко позна́вше свое́ безчеловѣ́чное суровство́,* со студо́мъ бѣ́гству устреми́шася.* Христу́ моли́ся спасти́ ду́ши на́ша.

Сла́ва, гла́съ 6:

На у́сть Вере́нды, на о́стровѣ водвори́вся, преподо́бне, и въ пусты́ню безмо́лвія вше́дъ, та́мо ке́ллію созда́лъ еси́, въ не́йже небе́сное бога́тство стяжа́лъ еси́, слеза́ми у́бо постя́ся, ра́достію пожина́еши плоды́ трудо́въ твои́хъ. Тѣ́мже оби́тель, ю́же труды́ твои́ми стяжа́лъ еси́, со ученики́ не оста́ви, но ми́лостивно посѣща́й, Христу́, о́тче Ефре́ме, моли́ся спасти́ ду́ши на́ша.

И ны́нѣ, пра́здника.
Вхо́дъ. Проки́менъ дне́. И чте́нія три́.

Прему́дрости Соломо́ни чте́ніе.

Пра́ведницы во вѣ́ки живу́тъ, и въ Го́сподѣ мзда́ и́хъ, и попече́ніе и́хъ у Вы́шняго. Сего́ ра́ди пріи́мутъ ца́рствіе благолѣ́пія и вѣне́цъ добро́ты отъ руки́ Госпо́дни, зане́ десни́цею покры́етъ я́ и мы́шцею защити́тъ и́хъ. Пріи́метъ всеору́жіе — рве́ніе свое́ и вооружи́тъ тва́рь въ ме́сть враго́мъ. Облече́тся въ броня́ пра́вды и возложи́тъ шле́мъ — су́дъ нелицемѣ́ренъ. Пріи́метъ щи́тъ непобѣди́мый — преподо́біе, поостри́тъ же напра́сный гнѣ́въ — во ору́жіе, спобо́ретъ же съ ни́мъ мíръ на безу́мныя. По́йдутъ праволу́чныя стрѣ́лы мо́лніины и, я́ко отъ благокру́гла лу́ка облако́въ, на намѣ́реніе полетя́тъ, и отъ каменоме́тныя я́рости испо́лнь паду́тъ гра́ды. Вознегоду́етъ на ни́хъ вода́ морска́я, рѣ́ки же потопя́тъ я́ на́гло. Сопроти́въ ста́нетъ и́мъ ду́хъ си́лы и, я́ко ви́хоръ, развѣ́етъ и́хъ, и опустоши́тъ всю́ зе́млю беззако́ніе, и злодѣ́йство преврати́тъ престо́лы си́льныхъ. Слы́шите у́бо, ца́ріе, и разумѣ́йте, навы́кните, судіи́ конце́въ земли́. Внуши́те держа́щіи мно́жества и гордя́щіися о наро́дѣхъ язы́ковъ, я́ко дана́ е́сть отъ Го́спода держа́ва ва́мъ и си́ла отъ Вы́шняго.

Прему́дрости Соломо́ни чте́ніе.

Пра́ведныхъ ду́ши въ руцѣ́ Бо́жіей, и не прико́снется и́хъ му́ка. Непщева́ни бы́ша во очесѣ́хъ безу́мныхъ умре́ти, и вмѣни́ся озлобле́ніе исхо́дъ и́хъ, и е́же отъ на́съ ше́ствіе — сокруше́ніе, они́ же су́ть въ ми́рѣ. Ибо предъ лице́мъ человѣ́ческимъ, а́ще и му́ку пріи́мутъ, упова́ніе и́хъ безсме́ртія испо́лнено. И вма́лѣ нака́зани бы́вше, вели́кими благодѣ́тельствовани бу́дутъ, я́ко Бо́гъ искуси́ я́ и обрѣ́те и́хъ досто́йны Себѣ́. Я́ко зла́то въ горни́лѣ, искуси́ и́хъ и, я́ко всепло́діе же́ртвенное, прія́тъ я́. И во вре́мя посѣще́нія и́хъ, возсія́ютъ, и я́ко и́скры по сте́блію, потеку́тъ. Су́дятъ язы́комъ и облада́ютъ людьми́, и воцари́тся Госпо́дь въ ни́хъ во вѣ́ки. Надѣ́ющіися На́нь разумѣ́ютъ и́стину и вѣ́рніи въ любви́ пребу́дутъ Ему́, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.

Прему́дрости Соломо́ни чте́ніе.

Пра́ведникъ, а́ще пости́гнетъ сконча́тися, въ поко́и бу́детъ. Ста́рость бо честна́ не многолѣ́тна, ниже́ въ числѣ́ лѣ́тъ исчита́ется. Сѣди́на же е́сть му́дрость человѣ́комъ, и во́зрастъ ста́рости — житіе́ нескве́рное. Благоуго́денъ Бо́гови бы́въ, возлю́бленъ бы́сть, и живы́й посредѣ́ грѣ́шникъ, преста́вленъ бы́сть. Восхище́нъ бы́сть, да не зло́ба измѣни́тъ ра́зума его́ или́ ле́сть прельсти́тъ ду́шу его́. Раче́ніе бо зло́бы помрача́етъ до́брая и паре́ніе по́хоти, премѣня́етъ у́мъ незло́бивъ. Сконча́вся вма́лѣ, испо́лни лѣ́та до́лга, уго́дна бо бѣ́ Го́сподеви душа́ его́, сего́ ра́ди потща́ся отъ среды́ лука́вствія. Лю́діе же ви́дѣвше и не разумѣ́вше, ниже́ поло́жше въ помышле́ніи таково́е, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.

На стихо́внѣ стихи́ры, гла́съ 2. Подо́бенъ: До́ме Евфра́ѳовъ.

Яко преходя́щую жи́знь* на земли́ презрѣ́въ, блаже́нне,* та́мо сподо́бился еси́ улучи́ти* жи́знь боже́ственную* и тоя́ сія́ніе прія́лъ еси́, богоно́се.

Сти́хъ: Честна́ предъ Го́сподемъ* сме́рть преподо́бныхъ Его́.

Любве́ ра́ди Христо́вы,* преподо́бне Ефре́ме,* пло́ти рачи́тельное умертви́лъ еси́ мудрова́ніе* и ду́шу, отъ страсте́й свобо́дну,* Бо́гу предста́вилъ еси́.

Сти́хъ: Блаже́нъ му́жъ, боя́йся Го́спода,* въ за́повѣдехъ Его́ восхо́щетъ зѣло́.

Бо́дренными моли́твами* и сле́зными исто́чники* Це́рковь вѣ́рныхъ* обогати́лъ еси́,* богоблаже́нне Ефре́ме.

Сла́ва, гла́съ 8:

Мона́ховъ мно́жества наста́вника тя́ почита́емъ, о́тче на́шъ Ефре́ме: твое́ю бо стезе́ю вои́стинну пра́во ходи́ти позна́хомъ. Блаже́нъ еси́, Христу́ рабо́тавъ, и вра́жію обличи́лъ еси́ си́лу, а́нгеловъ собесѣ́дниче, преподо́бныхъ соприча́стниче и пра́ведныхъ, съ ни́миже моли́ся Го́сподеви поми́ловатися душа́мъ на́шимъ.

И ны́нѣ, пра́здника.

Тропа́рь, гла́съ 4:

Отъ ю́ности твоея́ ве́сь Бо́гови порабо́тился еси́, блаже́нне, и Того́ ра́ди любве́ оте́чество и ро́дъ оста́вилъ еси́, въ пусты́ню всели́вся, въ не́йже жесто́кое житіе́ показа́въ, и чуде́съ дарова́нія отъ Бо́га прія́лъ еси́, Ефре́ме преподо́бне, моли́ Христа́ Бо́га, да спасе́тъ ду́ши на́ша.


НА УТРЕНИ,
На Бо́гъ Госпо́дь: Тропа́рь пра́здника, два́жды. Сла́ва, свята́го. И ны́нѣ, пра́здника.

По 1-й стихоло́гіи сѣда́ленъ, гла́съ 4:

Юность твою́, преподо́бне, воздержа́ніемъ увяди́лъ еси́, стра́сти тѣле́сныя, я́ко плѣ́нника ху́да, связа́въ, ду́хови повину́лъ еси́, и сего́ ра́ди, о́тче Ефре́ме, Христо́съ чудесы́ пресла́вно тебе́ вѣнча́етъ, еди́нъ, прославля́яй святы́хъ Свои́хъ. [Два́жды.]

Сла́ва, и ны́нѣ, богоро́диченъ:

Умертви́ся вся́ крѣ́пость моя́ отъ мно́жества безмѣ́рныхъ зо́лъ мои́хъ и, мно́гими скорбьми́ одержи́мь, уже́ отча́яхся, но помози́ ми, Влады́чице, Ефре́ма блаже́ннаго предста́тельствомъ, я́ко ра́дость ро́ждшая, пла́чущимъ утѣше́ніе.

По 2-й стихоло́гіи сѣда́ленъ, гла́съ 5. Подо́бенъ: Собезнача́льное.

По́стника Госпо́дня пѣ́сньми почти́мъ, я́ко умертви́вша вся́ прило́ги страсте́й воздержа́ніемъ тве́рдымъ и крѣ́пкимъ терпѣ́ніемъ вои́стинну и посрами́вша зѣло́ сопроти́внаго всю́ горды́ню, ны́нѣ моля́щася Го́сподеви поми́ловатися душа́мъ на́шимъ. [Два́жды.]

Сла́ва, и ны́нѣ, богоро́диченъ:

Ужа́сно чу́до зача́тія и несказа́ненъ о́бразъ рождества́ въ Тебѣ́ позна́ся, Приснодѣ́во Чи́стая, ужаса́етъ мо́й у́мъ и удивля́етъ помышле́ніе: сла́ва Твоя́, Богоро́дице, во всѣ́хъ простре́ся, ко спасе́нію ду́шъ на́шихъ.

По поліеле́и сѣда́ленъ, гла́съ 4:

Яко со́лнце, возсія́лъ еси́ заря́ми всему́ мíру, издале́ча чудесы́ твои́ми, чудотво́рче Ефре́ме, свѣтоно́сче блаже́нне, преподо́бныхъ похвало́. [Два́жды.]

Сла́ва, и ны́нѣ, богоро́диченъ:

Въ кро́въ Тво́й, Дѣ́во, вси́ прибѣга́юще, вопіе́мъ Ти́: мольбу́ пріими́ отъ на́съ и не преста́й моля́щися Человѣколю́бцу спасти́ся рабо́мъ Твои́мъ.

Степе́нна, 1-й антифо́нъ 4-го гла́са. Проки́менъ, [гла́съ 4]: Честна́ предъ Го́сподемъ* сме́рть преподо́бныхъ Его́. Сти́хъ: Что́ возда́мъ Го́сподеви о всѣ́хъ, я́же воздаде́ ми? Ева́нгеліе Матѳе́я, зача́ло 43.

По 50-мъ псалмѣ́ стихи́ра, гла́съ 6:

Преподо́бне о́тче, во всю́ зе́млю изы́де вѣща́ніе исправле́ній твои́хъ, тѣ́мъ на небесѣ́хъ обрѣ́лъ еси́ мзду́ трудо́въ твои́хъ, де́монскія погуби́лъ еси́ полки́ и а́нгельскія дости́глъ еси́ чи́ны, и́хже житію́ безъ поро́ка поревнова́лъ еси́. Дерзнове́ніе имѣ́я ко Христу́ Бо́гу, ми́ръ испроси́ душа́мъ на́шимъ.

Кано́нъ пра́здника на 6 и преподо́бнаго Ефре́ма на 8, гла́съ 4.

Пѣ́снь 1.

Ирмо́съ: Отве́рзу уста́ моя́, и напо́лнятся Ду́ха, и сло́во отры́гну Цари́цѣ Ма́тери, и явлю́ся, свѣ́тло торжеству́я, и воспою́, ра́дуяся, Тоя́ чудеса́.

Смири́лся еси́ Христа́ ра́ди, о́тче, и, кре́стъ взе́мъ, отъ оте́чества и сро́дникъ, я́ко отъ змíя, бѣ́галъ еси́. Отону́дуже въ пусты́ню вше́дъ, въ не́йже трудолю́бно подвиза́лся еси́, преподо́бне.

Отъ ю́ности твоея́, о́тче Ефре́ме, у́мъ къ Бо́гу впери́въ, тлѣ́нными нетлѣ́нная, я́ко до́брый купе́цъ, искупи́лъ еси́, тѣ́мже, ны́нѣ соше́дшеся, па́мять твою́ почита́емъ.

Христо́вымъ раче́ніемъ, о́тче Ефре́ме, па́че огня́ распала́емь, настоя́щая, я́ко ничто́же су́щая, презрѣ́лъ еси́, сего́ ра́ди въ поко́ища всели́лся еси́, идѣ́же пра́ведныхъ ду́ши веселя́тся.

Богоро́диченъ: Боля́ща исцѣли́ душе́ю же и тѣ́ломъ, Влады́чице, раба́ Твоего́, блаже́ннаго Ефре́ма моле́ніемъ: Тебе́ бо Предста́тельницу вси́ су́щіи въ печа́ли стяжа́хомъ, я́ко ро́ждшую спасе́ніе на́ше.

Катава́сія пра́здника.

Пѣ́снь 3.

Ирмо́съ: Твоя́ пѣсносло́вцы, Богоро́дице, живы́й и незави́стный Исто́чниче, ли́къ Себѣ́ совоку́пльшія, духо́вно утверди́, въ боже́ственнѣй Твое́й сла́вѣ, вѣнце́въ сла́вы сподо́би.

Сна́ твои́ма очи́ма не да́лъ еси́, блаже́нне Ефре́ме, ни вѣ́ждома дрема́нія, до́ндеже сподо́бился еси́ пра́ведныхъ селе́нія, е́же угото́ва Бо́гъ, преподо́бне, лю́бящимъ Его́.

Бо́дренными твои́ми моли́твами, о́тче Ефре́ме, и жесто́кимъ воздержа́ніемъ Го́споду на земли́ до́брѣ угоди́лъ еси́, сего́ ра́ди стра́шенъ враго́мъ и сла́венъ человѣ́комъ бы́лъ еси́.

Ра́йскую жи́знь и та́мо святы́хъ весе́ліе всегда́ во умѣ́ твое́мъ помина́я, преподо́бне, въ слеза́хъ и воздыха́ніихъ всю́ твою́ жи́знь, о́тче Ефре́ме, проше́лъ еси́, сего́ ра́ди и по сме́рти отъ Христа́ чудесы́ просла́вился еси́.

Богоро́диченъ: Источа́еши исцѣле́ній струи́ боля́щимъ, Дѣ́во, всю́ду: Тя́ бо исто́чникъ показа́ милосе́рдія, Влады́чице, Иже ми́лости Госпо́дь, изъ Тебе́ рожде́йся па́че ума́.

Сѣда́ленъ, пи́санъ по 1-й стихоло́гіи:

[Юность твою́, преподо́бне, воздержа́ніемъ увяди́лъ еси́, стра́сти тѣле́сныя, я́ко плѣ́нника ху́да, связа́въ, ду́хови повину́лъ еси́, и сего́ ра́ди, о́тче Ефре́ме, Христо́съ чудесы́ пресла́вно тебе́ вѣнча́етъ, еди́нъ, прославля́яй святы́хъ Свои́хъ. [Два́жды.]

Сла́ва, и ны́нѣ, богоро́диченъ:

Умертви́ся вся́ крѣ́пость моя́ отъ мно́жества безмѣ́рныхъ зо́лъ мои́хъ и, мно́гими скорбьми́ одержи́мь, уже́ отча́яхся, но помози́ ми, Влады́чице, Ефре́ма блаже́ннаго предста́тельствомъ, я́ко ра́дость ро́ждшая, пла́чущимъ утѣше́ніе.]

Пѣ́снь 4.

Ирмо́съ: Сѣдя́й въ сла́вѣ на Престо́лѣ Божества́ во о́блацѣ ле́гцѣ, прíиде Іису́съ Пребоже́ственный, Нетлѣ́нною Дла́нію и спасе́ зову́щія: сла́ва, Христе́, си́лѣ Твое́й.

Житіе́ твое́, о́тче Ефре́ме, чу́дно на земли́ показа́лъ еси́, вели́ко поще́ніе и смире́ніе, сего́ ра́ди та́мо вели́чество наслѣ́довалъ еси́, моли́ спасти́ся отъ бѣ́дъ пою́щимъ тя́.

Се́ргія вели́каго житію́ послѣ́дуя, преподо́бне, тѣ́мже того́, ели́ко мо́щно, именова́ніе отъ житія́ стяжа́лъ еси́, Ефре́ме пребога́те.

Посто́мъ и моли́твами тѣ́ло твое́ изнури́лъ еси́ и сего́ ради́ сподо́бился еси́ ви́дѣти неизрече́нная блага́я, я́же святы́мъ угото́вана, съ ни́миже, о́тче Ефре́ме, о на́съ моли́ся.

Богоро́диченъ: Кро́въ, и заступле́ніе, и прибѣ́жище бу́ди ми́, Дѣ́во, рабу́ Твоему́ и исцѣли́ мя отъ безмѣ́рныхъ зо́лъ воспѣва́ти, Пречи́стая: сла́ва Рождеству́ Твоему́.

Пѣ́снь 5.

Ирмо́съ: Ужасо́шася вся́ческая о Боже́ственнѣй сла́вѣ Твое́й: Ты́ бо, неискусобра́чная Дѣ́во, имѣ́ла еси́ во утро́бѣ надъ всѣ́ми Бо́га, и родила́ еси́ Безлѣ́тнаго Сы́на, всѣ́мъ, воспѣва́ющимъ Тя́, ми́ръ подава́ющая.

Чи́сто житіе́ твое́ отъ ю́ности потща́лся еси́, преподо́бне, сохрани́ти, тѣ́мже, чистоту́ твою́ ви́дѣвъ, Пресвяты́й Ду́хъ въ тя́ всели́ся.

Яко преоби́дѣвъ тлѣ́нная, вѣ́чная, о́тче, сподо́бился еси́ прія́ти по нело́жному словеси́: проси́те и пріи́мете. И е́же я́ко проси́лъ еси́, сія́ по досто́инству прія́лъ еси́.

Мѣ́сто, е́же сподо́бися прія́ти честны́я мо́щи твоя́, преподо́бне, освяти́ся, и по мно́гимъ страна́мъ прославля́емо е́сть, я́ко въ себѣ́ мо́щи твоя́ имѣ́етъ.

Богоро́диченъ: Не преста́й моля́щи, Его́же родила́ еси́, Богоневѣ́сто, я́ко Спа́са и Влады́ку, разрѣше́ніе пода́ти ско́рбемъ и болѣ́знемъ, къ ра́дости нетлѣ́ннѣй мя́ возведи́, проща́я ми́ согрѣше́нія.

Пѣ́снь 6.

Ирмо́съ: Боже́ственное сіе́ и всечестно́е соверша́юще пра́зднество, богому́дріи, Богома́тере, пріиди́те, рука́ми воспле́щимъ, отъ Нея́ ро́ждшагося Бо́га сла́вимъ.

Твое́ вели́кое житіе́ и чистоту́, къ си́мъ же безмѣ́рное смире́ніе прови́дѣвъ, Пресвяты́й Ду́хъ сла́вна тя́, о́тче, всѣ́мъ показа́. Тѣ́мже, отъ сего́ житія́ ко о́ному вѣ́ку преше́дъ, получи́лъ еси́ съ пра́ведными весе́ліе.

Дне́сь начина́ема свяще́нная па́мять твоя́, преподо́бне Ефре́ме, весели́тъ ученики́ твоя́, воспѣва́ющія любо́вію по́двиги твоя́ и честно́е успе́ніе сла́вящія, торжеству́юще, и́хже моли́твами твои́ми, о́тче, соблюди́.

Разбо́йницы пе́рвѣе прише́дше тебе́ оскорби́ти, преподо́бне, но ты́, тѣ́хъ разумѣ́въ лука́вство, воздви́гнути тѣ́мъ дре́во ре́клъ еси́, не могу́щимъ же мно́гимъ тебѣ́ еди́ному проти́витися. Тѣ́мже, я́ко посра́млени про́чее, со стра́хомъ отбѣжа́ша, па́че побѣжде́ни бы́вше, не́жели побѣди́ша.

Богоро́диченъ: Твою́ пода́ждь ми́ по́мощь и изба́ви мя́, Влады́чице, отъ бѣ́дъ и скорбе́й, и прегрѣше́ній мои́хъ, Яже всѣ́хъ ро́ждшая избавле́ніе.

Конда́къ, гла́съ 8. Подо́бенъ: Взбра́нной.

Ангельскому житію́ поревнова́въ, преподо́бне, вся́ земна́я оста́вивъ, ко Христу́ прите́клъ еси́ и, Того́ за́повѣдьми огра́ждся, яви́лся еси́ сто́лпъ непоколеби́мь отъ вра́жіихъ напа́даній. Тѣ́мъ зове́мъ ти́: ра́дуйся, Ефре́ме, свѣти́ло пресвѣ́тлое.

Икосъ:

Иже въ ме́ртвеннѣмъ тѣ́лѣ а́нгельскому уподо́блься житію́ па́че естества́ и съ тѣ́ми на небесѣ́хъ лику́я, пріиди́те, вси́ вѣ́рніи, воспое́мъ преподо́бнаго Ефре́ма: то́й бо, я́ко уме́ты, вмѣни́ мірска́я вся́ кра́сная, я́ко да небе́сныхъ получи́тъ, вше́дъ на го́ру, я́коже дре́вле Моисе́й и вели́кій Илія́, посто́мъ очи́щся, сподо́бися ви́дѣти Тро́ическую свѣ́тлость не во мра́цѣ, ни въ ви́хрѣ, но во свѣ́тѣ благода́ти Бо́жія. Тѣ́мъ и чуде́съ лучи́ испуща́я свѣ́тло и рѣ́ки исцѣле́нія источа́я вѣ́рнымъ отъ гро́ба, я́ко неду́говъ исцѣли́тель, ра́дуйся, о́тче Ефре́ме, свѣти́ло пресвѣ́тлое.

Пѣ́снь 7.

Ирмо́съ: Не послужи́ша тва́ри богому́дріи, па́че Созда́вшаго, но, о́гненное преще́ніе му́жески попра́вше, ра́довахуся, пою́ще: препѣ́тый отце́въ Госпо́дь и Бо́гъ, благослове́нъ еси́.

Источа́етъ чудеса́ честна́я ра́ка твоя́, преподо́бне, преизоби́лующи благода́тію, вѣ́рою приходя́щимъ здра́віе да́руетъ, Христу́ отъ души́ вопію́щимъ: благослове́нъ еси́, Го́споди, Бо́же оте́цъ на́шихъ.

Дре́внимъ о́нѣмъ вели́кимъ отце́мъ, въ постѣ́ провозсія́вшимъ, житію́ подо́бяся, преподо́бне, въ пусты́ню всели́лся еси́ и та́мо въ поще́ніихъ мно́га лѣ́та пребы́лъ еси́.

Яко и́стиннаго и кро́ткаго Пастыренача́льника Христа́ незло́бивое овча́, о́тче Ефре́ме, бы́лъ еси́, тѣ́мже незло́бивъ къ хотя́щимъ тебе́ озло́бити бы́лъ еси́, Христо́ви вопія́: Бо́же, благослове́нъ еси́.

Богоро́диченъ: Обощре́ны болѣ́зни ра́нъ мои́хъ отъ безмѣ́рныхъ мои́хъ прегрѣше́ній, Влады́чице, веду́тъ въ сме́рть душе́вную и тѣле́сную, но исхи́ти, я́ко сильна́, вся́кихъ скорбе́й и неду́говъ.

Пѣ́снь 8.

Ирмо́съ: Отроки благочести́выя въ пещи́ Рождество́ Богоро́дичо спасло́ е́сть, тогда́ у́бо образу́емое, ны́нѣ же дѣ́йствуемое, вселе́нную всю́ воздвиза́етъ пѣ́ти Тебѣ́: Го́спода по́йте, дѣла́, и превозноси́те Его́ во вся́ вѣ́ки.

Изъ мла́да, преподо́бне о́тче, потща́лся еси́ твою́ со́вѣсть и се́рдце съ душе́ю чи́стою Го́сподеви предста́вити. Тѣ́мже и Христо́съ чудесы́ тебе́ прославля́етъ, Тому́ вопію́ща: Го́спода воспѣва́йте, дѣла́, и превозноси́те Его́ во вся́ вѣ́ки.

Ны́нѣ пусты́ня весе́ліемъ, о́тче, красу́ется, иму́щи мо́щи твоя́ въ себѣ́, Ефре́ме преподо́бне, ученицы́ же твои́, твоему́ житію́ ревну́юще, о твое́й па́мяти ра́дующеся, Творцу́ вопію́тъ: Го́спода воспѣва́йте, дѣла́, и превозноси́те Его́ во вся́ вѣ́ки.

Въ пусты́ни, преподо́бне, идѣ́же селе́ніе имѣ́лъ еси́, та́мо прече́стенъ хра́мъ въ сла́ву Христо́ву воздви́глъ еси́, въ не́мъ прославля́тися пречи́стому Того́ и́мени и всѣ́мъ вопи́ти: Го́спода воспѣва́йте, дѣла́, и превозноси́те Его́ во вся́ вѣ́ки.

Богоро́диченъ: Свѣ́щниче Свѣ́та трисо́лнечнаго су́щи, заре́ю благоутро́бія Твоего́ тму́ отыми́ прегрѣше́ній мои́хъ, Богороди́тельнице, избавле́ніе ну́ждныхъ болѣ́зней подаю́щи вѣ́рою пою́щему и превознося́щему пречи́стое Твое́ рождество́.

Пѣ́снь 9.

Ирмо́съ: Вся́къ земноро́дный да взыгра́ется, Ду́хомъ просвѣща́емь, да торжеству́етъ же безпло́тныхъ умо́въ естество́, почита́ющее свяще́нное торжество́ Богома́тере, и да вопіе́тъ: ра́дуйся, Всеблаже́нная Богоро́дице, Чи́стая Приснодѣ́во.

Отъ пусты́ннаго житія́ къ премíрному и вѣ́чному житію́ я́ко преше́дъ, блаже́нне, не преста́й моля́ Изба́вителя отъ разли́чныхъ напа́стей и бѣ́дъ изба́вити, любо́вію честно́е твое́ успе́ніе ны́нѣ пѣ́сньми сла́вящихъ.

Пѣвце́въ, и́скреннею любо́вію пою́щихъ и вѣ́рою тебѣ́ пѣ́ніе хвале́нія принося́щихъ, преблаже́нне Ефре́ме, отъ вся́кихъ бѣ́дъ и скорбе́й избавля́й, да тя́ вси́ любо́вію велича́емъ.

Отъ ру́къ мои́хъ недосто́йныхъ ма́лое сіе́ пѣ́сненное хвале́ніе принося́щаго ти́ съ любо́вію, пріими́, блаже́нне Ефре́ме: не бо́ возмого́хъ проти́ву твоего́ вели́чества украси́ти, но ма́лое сіе́, я́ко вели́ко, пріими́, да тебе́ всегда́ велича́емъ въ пѣ́снехъ.

Богоро́диченъ: Пѣ́ніе съ пѣ́снію и хвале́ніе исплете́ное отъ болѣ́зненныя души́ приношу́ съ любо́вію Тебѣ́, ро́ждшей Христа́, естество́мъ Бо́га, его́же благопрія́тно пріи́мши, проше́нія моя́, Богоро́дице, испо́лни и моли́твами Твои́ми соблюди́.

Свѣти́ленъ:

Ангельскаго житія́ жела́я, удали́лъ еси́ себе́ въ пусты́няхъ и, стра́сти покори́въ плотскíя, ра́венъ а́нгеломъ яви́лся еси́, о́тче на́шъ богоно́се Ефре́ме. [Два́жды.]

[Сла́ва, и ны́нѣ,] богоро́диченъ:

Держа́внымъ Твои́мъ покро́вомъ отъ враго́въ навѣ́та на́съ, Чи́стая, Твои́хъ ра́бъ, соблюди́ всѣ́хъ невре́дныхъ, Тя́ бо еди́ну и́мамы прибѣ́жище въ ну́ждахъ.

На хвали́техъ стихи́ры на 4, гла́съ 8. Подо́бенъ: О, пресла́внаго чудесе́!

Преподо́бне о́тче Ефре́ме,* ты́, и́го Христо́во на ра́мо взе́мъ,* до́блественнѣ наи́тіе вра́жіе попра́лъ еси́.* Сего́ ра́ди тя́,* вѣ́рніи вси́, почита́емъ, о преблаже́нне,* мона́шествующихъ похвало́.* Тѣ́мже Христа́ непреста́нно моли́* спасти́ ду́ши на́ша. [Два́жды.]

Вѣ́рою соше́дшеся вси́,* я́ко по́стника тя́ Христо́ва почита́емъ, Ефре́ме:* ра́дуяся у́бо, ше́ствовалъ еси́ въ пусты́ню непроходи́мую, му́дре,* наста́вникъ бы́лъ еси́ че́стенъ.* Тѣ́мже тебѣ́ мы́ вѣ́рою взыва́емъ, блаже́нне,* по́стниковъ похвало́:* о на́съ моли́ся ко Го́споду,* поми́ловатися душа́мъ на́шимъ.

Преподо́бне о́тче на́шъ,* бу́дущія ра́ди жи́зни* при е́зерѣ на о́стровѣ Переко́мѣ всели́лся еси́,* ника́коже боя́ся неви́димыхъ враго́въ,* мно́гажды толца́нія творя́щихъ къ тебѣ́,* ты́ же моли́твами си́хъ безъ вѣ́сти твори́лъ еси́,* о терпѣли́вый душе́ю!* въ пу́стѣ мѣ́стѣ, чу́дное овча́,* Христа́ Агнца Па́стыря имѣ́я.* Тѣ́мже тя́ вѣ́рою вси́ чти́мъ и ублажа́емъ.

Сла́ва, гла́съ то́йже. Самогла́сенъ:

На не́бо теку́щую возше́дъ колесни́цу, чу́дне, добродѣ́телей, дости́глъ еси́ кра́йнее житіе́ воздержа́ніемъ, изъ пусты́ни смотря́я Вы́шняго Іерусали́ма красоты́ и, болѣ́зненнымъ по́двигомъ досто́йно по́чести пріе́мъ, съ небе́сными ра́дуешися чинонача́ліи, преблаже́нне, вѣ́чныхъ благи́хъ наслѣ́дникъ и Ца́рствія жи́тель бы́въ. Моли́ся, преподо́бне Ефре́ме, Спа́су всѣ́хъ, умири́ти мíръ и спасти́ ду́ши на́ша.

И ны́нѣ, пра́здника.
Славосло́віе вели́кое. [Ектеніи́ и отпу́стъ.]



НА ЛИТУРГІИ,

Слу́жба преподо́бническая: [Блаже́нна пра́здника, пѣ́снь рядова́я и свята́го пѣ́снь 6-я, на 4. Проки́менъ, гла́съ 7: Честна́ предъ Го́сподемъ* сме́рть преподо́бныхъ Его́. Сти́хъ: Что́ возда́мъ Го́сподеви о всѣ́хъ, я́же воздаде́ ми? Апо́столъ къ Гала́томъ, зача́ло 213. Аллилуія, гласъ 6: Блаже́нъ му́жъ, боя́йся Го́спода, въ за́повѣдехъ Его́ восхо́щетъ зѣло́. Сти́хъ: Си́льно на земли́ бу́детъ сѣ́мя его́. Ева́нгеліе Луки́, зача́ло 24. Прича́стенъ: Въ па́мять вѣ́чную бу́детъ пра́ведникъ, отъ слу́ха зла́ не убои́тся.]

Источникъ: Минíа, мѣ́сяцъ Ма́ій. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 122 – 127.

/ Къ оглавленію раздѣла /


Наверхъ / Къ титульной страницѣ

0