Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - пятница, 28 апрѣля 2017 г. Сейчасъ на порталѣ посѣтителей - 20.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Ма́ія въ 15-й де́нь.
Слу́жба свята́го благовѣ́рнаго царе́вича кня́зя Дими́трія, Моско́вскаго и всея́ Россíи но́ваго чудотво́рца.

НА ВЕЧЕРНИ.
На Го́споди воззва́хъ, стихи́ры, гла́съ 5. Подо́бенъ: Ра́дуйся.

Осмолѣ́тнымъ ю́ностнымъ цвѣ́томъ украша́емь, муче́нія ра́ною просвѣща́емь, пресвѣ́тло, прему́дре, сія́еши, и, вмѣ́сто тлѣ́нныхъ и мимотеку́щихъ нетлѣ́нная и превѣ́чная воспріе́мъ, Христу́ предстоя́, моли́ся о на́съ, прему́дре, и посѣща́й творя́щихъ вѣ́рно твою́ свѣтоно́сную па́мять дарова́ти на́мъ ми́ръ и ве́лію ми́лость.

Пріиди́те у́бо, моско́встіи наро́ди, страстоте́рпца и му́ченика Дими́трія царе́вича торжество́ соста́вимъ и, свѣ́тло того́ псалмы́ и пѣ́сньми ликовству́юще, пра́зднуемъ съ похвала́ми: созыва́етъ бо на́съ духо́внѣ де́нь страда́нія его́ торжествова́ти, въ о́ньже восхо́дитъ отъ земли́ къ небе́снымъ, и ви́дитъ, я́же Ангели ви́дятъ, и хвала́ми отъ Ангелъ вѣнча́ется, и предстои́тъ престо́лу Христо́ву, и мо́литъ дарова́ти на́мъ ми́ръ и ве́лію ми́лость.

Ины стихи́ры, гла́съ 2. Подо́бенъ: Кíими похва́льными.

Кíими духо́вными похвала́ми, восхва́лимъ чудотво́рца и му́ченика Дими́трія въ настоя́щее сіе́ торжество́? Въ пречестнѣ́мъ хра́мѣ се́мъ вѣ́рою и любо́вію возопіе́мъ пра́зднственная: ра́дуйся, вѣ́рныхъ люде́й те́плый засту́пниче, и земли́ Россíйскія удобре́ніе, и всея́ вселе́нныя наслажде́ніе, его́же вѣнцы́ вѣнча́етъ Христо́съ Бо́гъ на́шъ, имѣ́яй ве́лію ми́лость.

Кíими похва́льными пѣ́сньми ны́нѣ соста́вимъ ликова́ніе? Въ честнѣ́мъ пра́здницѣ твоея́ па́мяти, страстоте́рпче Христо́въ Дими́тріе, духо́вно пра́зднующе, мо́лимся: моли́ благовѣ́рному Импера́тору на́шему [имяре́къ] побѣди́тельная на враги́ дарова́ти, тебе́ бо те́пла моли́твенника ко Влады́цѣ стяжа́хомъ, подаю́щему мíрови ве́лію ми́лость.

Кíими похва́льными добро́тами воспое́мъ Дими́трія царе́вича страстоте́рпца? Безконе́чную бо благода́ть отъ Христа́ прія́лъ е́сть, и всѣ́мъ подае́тъ неоску́дная исцѣле́нія, и мо́лится за на́съ, своя́ лю́ди, во е́же спасти́ся на́мъ, того́ па́мять вѣ́рою почита́ющимъ. Его́же чудесы́ просла́ви Христо́съ Бо́гъ на́шъ, имѣ́яй ве́лію ми́лость.

Сла́ва, гла́съ 8:

Кто́ отъ земны́хъ по достоя́нію возмо́жетъ твоему́ вели́честву хвалу́ принести́? Всегда́ бо пита́ешися боговидѣ́ніемъ Святы́я Тро́ицы, Боже́ственными заря́ми просвѣща́емь, неизрече́ннымъ свѣтоли́тіемъ осія́емь, я́сно зри́ши Боже́ственную сла́ву, и со дерзнове́ніемъ предстоя́ престо́лу всѣ́хъ Царя́, и ми́лостива Того́ на́мъ сотворя́я, вѣ́рою соверша́ющимъ и свѣ́тло пра́зднующимъ де́нь боже́ственныя твоея́ па́мяти, сла́вы же и ра́дости, е́йже ты́ сподо́бился еси́, и вѣ́чнаго наслажде́нія, Импера́тору на́шему [имяре́къ], и на́мъ причасти́тися моли́, и вселе́ннѣй дарова́ти ми́ръ и ве́лію ми́лость.

И ны́нѣ, пра́здника.
Вхо́дъ. Проки́менъ дне́ и чте́нія.


Проро́чества Иса́іина чте́ніе. [Глава 43.]

Та́ко глаго́летъ Госпо́дь: вси́ язы́цы собра́шася вку́пѣ, и соберу́тся кня́зи отъ ни́хъ, кто́ возвѣсти́тъ сія́ въ ни́хъ? Или́ я́же отъ нача́ла, кто́ слы́шана сотвори́тъ ва́мъ? Да приведу́тъ свидѣ́тели своя́ и оправдя́тся, и да услы́шатъ, и да реку́тъ и́стину. Бу́дите Ми́ свидѣ́тели, и Азъ Свидѣ́тель, глаго́летъ Госпо́дь Бо́гъ, и отрокъ, его́же избра́хъ, да позна́ете и вѣ́руете Ми́, и разумѣ́ете, я́ко Азъ е́смь; пре́жде Мене́ не бы́сть и́нъ бо́гъ, и по Мнѣ́ не бу́детъ. Азъ е́смь Бо́гъ, и нѣ́сть ра́звѣ Мене́ спаса́яй. Азъ возвѣсти́хъ и спасо́хъ, уничижи́хъ, и не бѣ́ въ ва́съ чу́ждій. Вы́ Мнѣ́ свидѣ́тели, и Азъ Госпо́дь Бо́гъ. И еще́ отъ нача́ла Азъ е́смь, и нѣ́сть отъ ру́къ Мои́хъ избавля́яй; сотворю́, и кто́ отврати́тъ то? Си́це глаго́летъ Госпо́дь Бо́гъ, избавля́яй ва́съ Святы́й Изра́илевъ.

Прему́дрости Соломо́ни чте́ніе. [Глава 3.]

Пра́ведныхъ ду́ши въ руцѣ́ Бо́жіей, и не прико́снется и́хъ му́ка. Непщева́ни бы́ша во очесѣ́хъ безу́мныхъ умре́ти, и вмѣни́ся озлобле́ніе исхо́дъ и́хъ, и е́же отъ на́съ ше́ствіе сокруше́ніе; они́ же су́ть въ ми́рѣ. Ибо предъ лице́мъ человѣ́ческимъ а́ще и му́ку пріи́мутъ, упова́ніе и́хъ безсме́ртія испо́лнено. И вма́лѣ нака́зани бы́вше, вели́кими благодѣ́тельствовани бу́дутъ, я́ко Бо́гъ искуси́ я́ и обрѣ́те и́хъ досто́йны Себѣ́. Яко зла́то въ горни́лѣ, искуси́ и́хъ и, я́ко всепло́діе же́ртвенное, прія́тъ я́. И во вре́мя посѣще́нія и́хъ возсія́ютъ и, я́ко и́скры по сте́блію, потеку́тъ: су́дятъ язы́комъ и облада́ютъ людьми́, и воцари́тся Госпо́дь въ ни́хъ во вѣ́ки. Надѣ́ющіися На́нь разумѣ́ютъ и́стину и вѣ́рніи въ любви́ пребу́дутъ Ему́, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.

Прему́дрости Соломо́ни чте́ніе. [Глава́ 4.]

Пра́ведникъ, а́ще пости́гнетъ сконча́тися, въ поко́и бу́детъ. Ста́рость бо честна́ не многолѣ́тна, ниже́ въ числѣ́ лѣ́тъ исчита́ется. Сѣди́на же е́сть му́дрость человѣ́комъ, и во́зрастъ ста́рости — житіе́ нескве́рное. Благоуго́денъ Бо́гови бы́въ, возлю́бленъ бы́сть, и живы́й посредѣ́ грѣ́шникъ, преста́вленъ бы́сть. Восхище́нъ бы́сть, да не зло́ба измѣни́тъ ра́зума его́, или́ ле́сть прельсти́тъ ду́шу его́. Раче́ніе бо зло́бы помрача́етъ до́брая и паре́ніе по́хоти, премѣня́етъ у́мъ незло́бивъ. Сконча́вся вма́лѣ, испо́лни лѣ́та до́лга, уго́дна бо бѣ́ Го́сподеви душа́ его́, сего́ ра́ди потща́ся отъ среды́ лука́вствія. Лю́діе же ви́дѣвше и не разумѣ́вше, ниже́ поло́жше въ помышле́ніи таково́е, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.

На литíи стихи́ры, гла́съ 8:

Па́че плотска́го благоро́дія духо́вное получи́лъ еси́: Христу́ бо отъ младе́нства душе́ю прилѣпи́вся, вся́ко наслажде́ніе мірско́е, я́ко не су́щее, оста́вль, дости́глъ еси́ на небесѣ́хъ перворо́дныхъ мно́жество, идѣ́же съ ни́ми предстои́ши Святѣ́й Тро́ице, со Ангелы веселя́ся, я́ко му́ченикъ непобѣди́мъ, нетлѣ́нными вѣнцы́ вѣнча́лся еси́ отъ Бо́га, Его́же моли́ о на́съ, еди́наго Человѣколю́бца.

Но́вый страда́льче, свѣ́тлая му́чениковъ добро́то, царе́виче Дими́тріе, я́ко ору́жіе — кре́стъ держа́вно нося́, вѣ́ру — я́ко щи́тъ, наде́жду — я́ко броня́, вооружи́лся еси́ на пре́лесть, и ны́нѣ въ ми́рѣ глубо́цѣ правосла́вныхъ житіе́ утверди́, и междоусо́бную бра́нь укроти́, и благовѣ́рнаго Импера́тора на́шего [имяре́къ] возвы́си, и вся́ поле́зная да́руй всегда́ лю́демъ твои́мъ моли́твами твои́ми.

Сопресто́льное Сло́во Отчее, да́ждь утѣше́ніе лю́демъ Твои́мъ, и раба́ Твоего́, благовѣ́рнаго Импера́тора на́шего [имяре́къ] возвы́си, и печа́ль на́шу въ ра́дость претвори́, и междоусо́бныя бра́ни умири́, и вся́ поле́зная да́руй лю́демъ Твои́мъ. Твоея́ бо всегда́ тре́буемъ вси́ по́мощи, да спасе́ши отъ всѣ́хъ зо́лъ рабы́ Твоя́, моли́твами страстоте́рпца Твоего́ царе́вича Дими́трія.

Сла́ва, гла́съ то́йже:

Пріиди́те, празднолю́бцы, ли́къ соста́вимъ, пріиди́те, восхва́лимъ чудотво́рца и му́ченика. Стеце́мся вѣ́рою и любо́вію и возопіе́мъ пра́зднственная въ настоя́щее торжество́ преимени́таго сего́ и тве́рдаго побо́рника, великому́ченика царе́вича Дими́трія: се́й бо мо́литъ о на́съ Христа́ Бо́га на́шего, и подае́тъ на́мъ моли́твами свои́ми отпуще́ніе грѣхо́въ и душа́мъ спасе́ніе.

И ны́нѣ, богоро́диченъ.


На стихо́внѣ стихи́ры, гла́съ 8. Подо́бенъ: Что́ ва́съ нарече́мъ.

Что́ тя нарече́мъ, Дими́тріе благоро́дне?* Вы́шнихъ жела́я, до́льняя презрѣ́лъ еси́* и, коне́цъ житія́ осмолѣ́тнымъ во́зрастомъ му́ченически соверши́въ,* вѣнце́мъ ца́рскимъ отъ Бо́га вѣнча́лся еси́,* я́ко сы́нъ царе́въ и му́ченикъ непобѣди́мъ,* и вмѣ́сто земны́хъ и тлѣ́нныхъ* на небеси́ нетлѣ́нная воспрія́лъ еси́.* Моли́ спасти́ся душа́мъ на́шимъ.

Сти́хъ: Пра́ведникъ, я́ко фи́никсъ, процвѣте́тъ* и, я́ко ке́дръ, и́же въ Лива́нѣ, умно́жится.

Что́ тя нарече́мъ, прехва́льне,* му́чениче и чудотво́рче Дими́тріе?* Звѣзду́? — сія́еши бо чудесы́;* рѣку́ ли? — источа́еши бо неду́гомъ исцѣле́нія,* всѣ́мъ человѣ́комъ да́руеши здра́віе* и чуде́съ дарова́ніе,* и къ Бо́гу о всѣ́хъ хода́тай.* Моли́ спасти́ся душа́мъ на́шимъ.

Сти́хъ: Насажде́ни въ дому́ Госпо́дни,* во дво́рѣхъ Бо́га на́шего процвѣту́тъ.

Что́ тя имену́емъ, страстоте́рпче?* Роди́теля земна́го оста́вилъ еси́* и небе́снаго Бо́га Отца́ получи́лъ еси́.* Вы́шній Іерусали́мъ, ма́терь всѣ́хъ, возлюби́лъ еси́,* идѣ́же со Христо́мъ ны́нѣ ца́рствуеши.* Вели́кое твое́ страда́ніе,* и бо́льша дарова́нія.* Моли́ спасти́ся душа́мъ на́шимъ.

Сла́ва, гла́съ 6:

Пріиди́те, вѣ́рніи, во святу́ю це́рковь, въ то́й бо дне́сь прино́сится сла́ва на небеса́ Бо́гу и на земли́ пое́тся хвала́ но́вому му́ченику и страстоте́рпцу царе́вичу Дими́трію: соверша́ющимъ бо па́мять его́ проше́ніе во все́мъ исполня́етъ, и отъ напа́стей и бѣ́дъ избавля́етъ, и отъ всѣ́хъ зо́лъ покрыва́етъ, и спаса́етъ всѣ́хъ свои́ми моли́твами. Подае́тъ бо Христо́съ, моли́твъ ра́ди его́, Импера́тору на́шему [имяре́къ] на враги́ побѣ́ду, и ми́ръ вселе́ннѣй, и душа́мъ на́шимъ отпуще́ніе грѣхо́въ, и ве́лію ми́лость.

И ны́нѣ, пра́здника.


Тропа́рь, гла́съ 4:

Ца́рскую діади́му обагри́лъ еси́ кро́вію твое́ю, богому́дре му́чениче, за ски́птръ — кре́стъ въ руку́ пріи́мъ, яви́лся еси́ побѣдоно́сецъ и же́ртву непоро́чную Влады́цѣ прине́слъ еси́ себе́: я́ко бо а́гнецъ незло́бивъ, отъ раба́ заколе́нъ еси́. И ны́нѣ, ра́дуяся, предстои́ши Святѣ́й Тро́ицѣ, моли́ся о держа́вѣ сро́дниковъ твои́хъ богоуго́днѣй бы́ти и сыново́мъ россíйскимъ спасти́ся.


НА УТРЕНИ.
По 1-й стихоло́гіи сѣда́ленъ, гла́съ 1:

Отъ чре́слъ ца́рскихъ произше́дъ, цвѣ́тъ чистоты́ произни́кнулъ еси́ и пло́дъ благовѣ́рія возра́слъ, осмолѣ́тенъ во́зрастомъ, жили́ще бы́лъ еси́ Пресвята́го Ду́ха, Боже́ственными чудесы́ сія́я, благоро́дне Дими́тріе, ми́ръ мíру испроси́ и душа́мъ на́шимъ ве́лію ми́лость. [Два́жды.]

Сла́ва, и ны́нѣ, богоро́диченъ:

Упова́ніе христіа́нъ, Пресвята́я Дѣ́во, Его́же родила́ еси́, Бо́га, па́че ума́ же и сло́ва, непреста́нно моли́ съ Вы́шними си́лами пода́ти оставле́ніе грѣхо́въ на́шихъ всѣ́хъ и исправле́ніе житія́ вѣ́рою и любо́вію при́сно Тя́ сла́вящимъ.

По 2-й стихоло́гіи сѣда́ленъ, гла́съ 4:

Кро́вь твою́, я́коже алава́стръ мѵ́ра, Христу́ прине́слъ еси́, благовѣ́рный царе́виче Дими́тріе. Тѣ́мъ и Преблагíй вели́кій Дарода́тель Бо́гъ просла́ви тя́ и возвы́си чудесы́ Свои́ми благода́тными, и сего́ ра́ди па́мять твою́ ра́достно почита́емъ, досточу́дне. [Два́жды.]

Сла́ва, и ны́нѣ, богоро́диченъ:

Дѣ́во Всенепоро́чная, пресу́щнаго Бо́га ро́ждшая, со Безпло́тными Того́ непреста́нно моли́ оставле́ніе прегрѣше́ній и исправле́ніе житія́ да́ти на́мъ пре́жде конца́, вѣ́рою и любо́вію пою́щимъ Тя́ по до́лгу, еди́на Всепѣ́тая.

По поліеле́и сѣда́ленъ, гла́съ 8:

Отъ младе́нства душе́ю къ Бо́гу прилѣпи́лся еси́ и сего́ ра́ди вѣнце́мъ муче́нія вѣнча́лся еси́, я́ко предо́бръ страда́лецъ всече́стенъ. Тѣ́мъ, съ му́ченическими ли́ки веселя́ся, небе́сныя да́ры пріе́млеши, и́миже подае́ши отъ вся́кихъ неду́гъ здра́віе приходя́щимъ къ тебѣ́ съ вѣ́рою и любо́вію, чту́щимъ святу́ю и многоцѣле́бную па́мять твою́. [Два́жды.]

Сла́ва, и ны́нѣ, богоро́диченъ:

Яко Дѣ́ву и еди́ну въ жена́хъ, Тя́, безъ сѣ́мене ро́ждшую Бо́га пло́тію, вси́ ублажа́емъ, ро́ди человѣ́честіи: Огнь бо всели́ся въ Тя́ Божества́ и я́ко Младе́нца млеко́мъ пита́еши Зижди́теля и Го́спода. Тѣ́мъ, Ангельскій и человѣ́ческій ро́дъ, досто́йно сла́вимъ пресвято́е рождество́ Твое́ и согла́сно вопіе́мъ Ти́: моли́ Христа́ Бо́га согрѣше́ній оставле́ніе дарова́ти покланя́ющимся вѣ́рою пресвято́му Рождеству́ Твоему́.

Степе́нна, 1-й антифо́нъ 4-го гла́са.

Проки́менъ: Возвесели́тся пра́ведникъ о Го́сподѣ* и упова́етъ на Него́.

Сти́хъ: Услы́ши, Бо́же, гла́съ мо́й, внегда́ моли́ти ми ся къ Тебѣ́.

Вся́кое дыха́ніе... Ева́нгеліе отъ Луки́, зача́ло 106.


По 50-мъ псалмѣ́ стихи́ра, гла́съ 8:

Изъ младе́нства изгна́нъ бы́въ земна́го ца́рства, небе́сному Ца́рству отъ Бо́га сподо́бился еси́. Ны́нѣ же, благода́тный да́ръ отъ Подвигополо́жника Христа́ соверше́нно воспріи́мъ, неоску́дно источа́еши всѣ́мъ исцѣле́ніе. Со Ангелы ликовству́я, Христу́, Дими́тріе, моли́ся, я́ко да ми́лостивъ бу́детъ на́мъ въ де́нь стра́шнаго Его́ прише́ствія.

Канона два. Первый канонъ, гласъ 2.


Пѣ́снь 1.

Ирмо́съ: Во глубинѣ́ постла́ иногда́ фараони́тское всево́инство преоруже́нная си́ла, вопло́щшееся же Сло́во всезло́бный грѣ́хъ потреби́ло е́сть, препросла́вленный Госпо́дь, сла́вно бо просла́вися.

Му́ченика Твоего́, Христе́, Дими́трія, пѣ́ти мнѣ́ жела́ющему, моли́твами его́, я́ко Бла́гъ, осія́ніе Пресвята́го Ду́ха да́руй, да воспою́ свѣ́тло Твоего́ уго́дника торжество́.

Умертви́вшему крѣ́пость сме́рти подо́бяся, му́чениче Дими́тріе, отъ раба́ заколе́ніе претерпѣ́лъ еси́ и, пресла́вно въ небе́сныя оби́тели всели́вся, трудо́въ воздая́ніе прія́лъ еси́, прехва́льне.

Честна́я твоя́ па́мять, му́чениче, освяща́ющи мíръ, приспѣ́. Ра́дуется же дне́сь пресла́вный гра́дъ Москва́, твоего́ блага́го получи́въ заступле́нія, и, благодаря́, Спа́су вопіе́тъ: препросла́вленный Госпо́дь, я́ко просла́вися.

Богоро́диченъ: О Тебѣ́ ны́нѣ проро́чество соверши́ся, Богороди́тельнице Влады́чице Чи́стая, Его́же бо провозвѣсти́ша высокогла́сно вси́ проро́цы, Того́, Невмѣсти́маго, пресла́вно во чре́вѣ вмѣсти́ла еси́, во двою́ естеству́ соверше́нна Бо́га же и Человѣ́ка.

Другíй кано́нъ, его́же краегране́сіе сицево́: Хвалю́ сла́ву царе́вича Дими́трія. Про́чая же, кромѣ́ сего́, да разумѣ́ются. Гла́съ 8.
Пѣ́снь 1.

Ирмо́съ: Колесницегони́теля фарао́ня погрузи́ чудотворя́й иногда́ Моисе́йскій же́злъ, крестообра́зно порази́въ и раздѣли́въ мо́ре, Изра́иля же бѣглеца́, пѣшехо́дца спасе́, пѣ́снь Бо́гови воспѣва́юща.

Христе́ мо́й Преблагíй, отжени́ тму́ отъ мра́чнаго ума́ моего́, и просвѣти́ отягче́нную мою́ ду́шу мно́гими грѣхи́, и напра́ви мы́сль мою́, да досто́йно воспою́ но́ваго сего́ страда́льца, царе́вича Дими́трія.

Въ му́ченическихъ ли́цѣхъ предстоя́ и неизрече́нный свѣ́тъ зря́, страда́льче Дими́тріе, просвѣти́ моя́ недоумѣ́нная помышле́нія, я́ко да воспою́ тя́, я́коже подоба́етъ ми́ рещи́.

Аще ра́бъ тво́й и убíйца земна́го тя́ ца́рства и лиши́, ты́ же вмѣ́сто того́, страда́льче Дими́тріе, небе́сное воспрія́лъ еси́ и, та́мо наслажда́яся боже́ственныхъ красо́тъ и весе́лія, моли́ Христа́ Бо́га дарова́ти на́мъ ве́лію ми́лость.

Богоро́диченъ: Лѣ́ствица еси́ вои́стинну высо́кая Ты́, Влады́чице, ю́же Іа́ковъ ви́дѣвъ, я́ко Ангели Бо́жіи восхожда́ху и низхожда́ху по не́й, Госпо́дь же утвержда́шеся на Тебѣ́; очи́сти ти́ну грѣхо́въ мои́хъ и спаси́ мя, недосто́йнаго раба́ Твоего́.

Катава́сія пра́здника.


Пѣ́снь 3.

Ирмо́съ: Процвѣла́ е́сть пусты́ня, я́ко кри́нъ, Го́споди, язы́ческая неплодя́щая, Це́рковь, прише́ствіемъ Твои́мъ, въ не́йже утверди́ся мое́ се́рдце.

Егда́ оста́вль земна́го мíра те́мность, страда́льчески же обагре́но кро́вію тѣ́ло твое́ скры́въ на Углечѣ, ду́шу въ небе́сныя оби́тели, Дими́тріе, всели́лъ еси́, прехва́льне.

Но́щи и тмы́ сы́нове нареко́шася убíйцы беззако́нніи: я́ко а́гнца бо тя́ непоро́чна, ноже́мъ сбодо́ша, хода́таи твоему́ вѣнцу́ боже́ственному, Дими́тріе, бы́вше.

Исцѣле́нія струи́ источа́еши ко гро́бу твоему́, му́чениче Дими́тріе, вѣ́рою притека́ющимъ, благода́рно же ра́дованіе подае́ши пою́щимъ: нѣ́сть свя́та, я́коже Бо́гъ на́шъ.

Богоро́диченъ: Марíе, злата́я кади́льнице, страсте́й мои́хъ отжени́ смра́дъ и утверди́ мя, коле́блема прираже́ньми лука́ваго ратобо́рца.

Инъ.

Ирмо́съ: Небе́снаго кру́га Верхотво́рче, Го́споди, и Це́ркве Зижди́телю, Ты́ мене́ утверди́ въ любви́ Твое́й, жела́ній кра́ю, вѣ́рныхъ утвержде́ніе, еди́не Человѣколю́бче.

Юношескаго соверше́ннаго цвѣ́та не доспѣ́въ, пожа́лся еси́, непови́нный страда́льче Дими́тріе, и ну́ждную сме́рть претерпѣ́лъ еси́, того́ ра́ди ны́нѣ лику́еши съ ли́ки му́ченическими, предстоя́ у Царя́ и Бо́га всѣ́хъ.

Сме́рть твоя́ уби́ раба́ твоего́ и убíйцу, благоро́дне, нарица́вшихся же во твое́ благоро́дное и́мя, та́кожде до конца́ всѣ́хъ погуби́, ты́ же сме́ртію твое́ю вѣ́чный живо́тъ пріобрѣ́лъ еси́.

Лю́тое колеба́ніе бы́сть въ Россíйстѣй земли́ по сме́рти твое́й, благовѣ́рный Дими́тріе, отъ о́нѣхъ злы́хъ и навѣ́тныхъ человѣ́къ, лжу́щихся и́менемъ твои́мъ; Бо́гъ же моли́твъ ра́ди твои́хъ до конца́ всѣ́хъ погуби́ и лю́тое колеба́ніе отъ ни́хъ укроти́.

Богоро́диченъ: Аще Бо́гъ Тя́ избра́ Себѣ́ небе́сное селе́ніе, Дѣ́во Ма́ти Чи́стая, и кто́ не подиви́тся пресла́вному Рождеству́ Твоему́, и́мже всѣ́хъ искупи́ отъ кля́твы зако́нныя? Тѣ́мъ и а́зъ молю́ Ти ся: свободи́ и мене́, недосто́йнаго раба́ Твоего́, отъ кля́твы грѣхо́вныя.

Сѣда́ленъ, гла́съ 4. Подо́бенъ: Ско́ро предвари́.

Наста́, празднолю́бцы, свѣ́тлое торжество́, па́мять сла́вная страстоно́сца Христо́ва, веселя́щи вся́ческая, сія́ющи въ мíрѣ заря́ми чуде́съ. Тѣ́мже непреста́нную благода́ть твои́ми моли́твами у Христа́ испроси́, му́чениче Дими́тріе, душа́мъ на́шимъ и ве́лію ми́лость.

Сла́ва: Яко отъ младе́нства лише́нъ еси́ земна́го ца́рства, благоро́дне Дими́тріе, и въ того́ мѣ́сто въ небе́сное пресели́вся, та́мо сподо́бился еси́ небе́сная блага́я ви́дѣти, и ны́нѣ я́сно зри́ши Святу́ю Тро́ицу и мо́лишися о держа́вѣ твои́хъ сро́дниковъ и за вся́ вѣ́рныя лю́ди, во е́же бы и́мъ получи́ти вся́ блага́я и поле́зная.

И ны́нѣ, богоро́диченъ: Дѣ́во Всенепоро́чная, Яже пресу́щнаго Бо́га ро́ждшая, съ му́ченикомъ Того́ непреста́нно моли́ оставле́ніе прегрѣше́ній и исправле́ніе житія́ да́ти на́мъ пре́жде конца́, вѣ́рою и любо́вію пою́щимъ Тя́ по до́лгу, еди́на Всепѣ́тая.

Пѣ́снь 4.

Ирмо́съ: Прише́лъ еси́ отъ Дѣ́вы, не хода́тай, ни Ангелъ, но Са́мъ, Го́споди, вопло́щся, и спа́слъ еси́ всего́ мя́, человѣ́ка. Тѣ́мъ зову́ Ти́: сла́ва си́лѣ Твое́й, Го́споди.

Кро́вію страда́нія тлѣ́ннаго смра́да избѣжа́въ, богому́дре, вмѣ́сто земна́го — небе́снаго Ца́рствія наслѣ́дникъ бы́лъ еси́, страстоте́рпче, тѣ́мъ вси́, чту́ще, тя́ ублажа́емъ.

Ангельскаго селе́нія во дво́рѣхъ пребыва́еши и въ Россíйстѣй земли́ благода́ть источа́еши къ ра́цѣ моще́й твои́хъ любо́вію припа́дающимъ, страда́льче, и вопію́щимъ: сла́ва си́лѣ Твое́й, Го́споди.

Две́ри небе́сныя свѣ́тло отверзо́шася, пріе́мше тя́, му́чениче, и Це́рковь тя́ ны́нѣ имѣ́етъ, ликовству́ющи со избра́нными, пою́щи Бо́гу: си́лѣ Твое́й сла́ва, Человѣколю́бче.

Богоро́диченъ: Свяще́нніи провозвѣсти́ша дре́вле гла́си чревоноше́нія Твоего́ глубину́, и́хже сбытіе́ ви́дяще, Чи́стая, пое́мъ: си́лѣ Твое́й сла́ва, Влады́чице.

Инъ.

Ирмо́съ: Ты́ моя́ крѣ́пость, Го́споди, Ты́ моя́ и си́ла, Ты́ мо́й Бо́гъ, Ты́ мое́ ра́дованіе, не оста́вль нѣ́дра Отча, и на́шу нищету́ посѣти́въ. Тѣ́мъ съ проро́комъ Авваку́момъ зову́ Ти: си́лѣ Твое́й сла́ва, Человѣколю́бче.

Вмѣ́сто земны́я высоты́, небе́сную дости́глъ еси́, благоро́дне Дими́тріе, и ны́нѣ съ пра́ведными ли́ки водворя́ешися, и пое́ши, и сла́виши Бо́га, Ему́же пое́мъ: си́лѣ Твое́й сла́ва, Человѣколю́бче.

Удиви́ Бо́гъ всѣ́хъ Свои́хъ чудотворе́ніемъ, я́ко посла́ на раба́ твоего́ убíйцу нѣ́коего врага́ и отме́тника пра́выя на́шея вѣ́ры, наре́кшагося тезоиме́нствомъ твои́мъ, да све́ржетъ убíйцу твоего́ съ престо́ла ца́рска, е́же и бы́сть.

Ца́рь царе́й и Госпо́дь господе́й дарова́ тебѣ́ вмѣ́сто земна́го ца́рства — небе́сное, рабу́ же твоему́ и убíйцѣ даде́ здѣ́ зло́е отмще́ніе, во о́номъ же вѣ́цѣ по лука́вству сугу́бая муче́нія, я́коже Са́мъ, вся́ вѣ́дый, вѣ́сть.

Богоро́диченъ: Ада́мова дщи́ и вну́ка Ты́ была́ еси́, Влады́чице, отъ него́же ве́сь ро́дъ человѣ́чь произы́де, Ты́ же всѣ́хъ Живо́тъ породила́ еси́ — Христа́ Бо́га на́шего, Его́же моли́, да спасе́тъ ду́ши на́ша, я́ко Бла́гъ и Человѣколю́бецъ.

Пѣ́снь 5.

Ирмо́съ: Хода́тай Бо́гу и человѣ́комъ бы́лъ еси́, Христе́ Бо́же: Тобо́ю бо, Влады́ко, къ Свѣтонача́льнику, Отцу́ Твоему́, отъ но́щи невѣ́дѣнія приведе́ніе и́мамы.

Му́чениче Дими́тріе, я́ко звѣзда́ пресвѣ́тлая, въ Россíйстѣй земли́ возсія́лъ еси́, Це́рковь Христо́ву свѣ́томъ богоразу́мія озари́въ, тму́ же отъ нея́ отгна́въ невѣ́дѣнія, просвѣти́лъ еси́ ту́ пресла́вныхъ чуде́съ явле́ніемъ.

Имѣ́я къ Бо́гу дерзнове́ніе, боже́ственное твое́ торжество́, му́чениче, творя́щія и честно́е твое́ страда́ніе вѣ́рою чи́стою хва́лящія помина́й, преблаже́нне, и отъ бу́ри, и бѣ́дъ, и напа́стей спаса́й.

Ты́, я́ко кри́нъ благоцвѣту́щъ, тече́ніемъ кро́ве твоея́ показа́лся еси́, блаже́нне, и, гро́здъ мы́сленный виногра́да Христо́ва, благово́ніемъ чуде́съ мíръ облагоуха́лъ еси́, вѣ́рою тя́, му́чениче, сла́вящія.

Богоро́диченъ: Но́во я́ко Младе́нца на́мъ Превѣ́чное Сло́во родила́ еси́, двѣма́ во́лема и дѣ́йствы су́ща сугу́ба, я́ко Человѣ́ка ку́пно же и Бо́га, Всенепоро́чная.

Инъ.

Ирмо́съ: Вску́ю мя́ отри́нулъ еси́ отъ лица́ Твоего́, Свѣ́те незаходи́мый, и покры́ла мя́ е́сть чужда́я тма́ окая́ннаго? Но обрати́ мя, и къ свѣ́ту за́повѣдей Твои́хъ пути́ моя́ напра́ви, молю́ся.

Рожде́ніе твое́ отъ ца́рскаго ко́рене бы́сть, убіе́ніе же твое́ отъ ра́бскаго зва́нія случи́ся, ты́ же, страда́льче Дими́тріе, си́мъ не повреди́лся еси́, но и па́че отъ земна́го ца́рствія въ небе́сное пресели́лся еси́.

Ей, вои́стинну рече́ся, я́ко пра́ведникъ и по сме́рти жи́въ бу́детъ, та́кожде и ты́, непови́нный страда́льче Дими́тріе, и по сме́рти твое́й жи́въ и ца́рствуеши со всѣ́ми святы́ми во Ца́рствіи небе́снѣмъ.

Ве́лія ра́дость сотвори́ся по все́й Россíйстѣй земли́, я́ко Бо́гъ моли́твами твои́ми погуби́ вся́ враги́ и навѣ́тники человѣ́ки, смуща́ющія держа́ву сро́дникъ твои́хъ, о ни́хже ны́нѣ мо́лишися дарова́ти и́мъ ве́лію ми́лость.

Богоро́диченъ: Изъ Тебе́ Бо́гъ произы́де и спасе́ніе дарова́ всему́ ро́ду человѣ́чу. Тѣ́мже и а́зъ, недосто́йный ра́бъ Тво́й, молю́ Ти ся, Пречи́стая: спасе́ніе ми́ да́руй, я́ко да пою́ Тя и велича́ю, Дѣ́во Всепѣ́тая.

Пѣ́снь 6.

Ирмо́съ: Въ бе́зднѣ грѣхо́внѣй валя́яся, неизслѣ́дную милосе́рдія Твоего́ призыва́ю бе́здну: отъ тли́, Бо́же, мя́ возведи́.

Разже́гся за́вистію, ра́бъ-убíйца побѣди́ся властолю́біемъ и къ за́висти убíйство приплете́: закла́ тя, я́ко а́гнца непоро́чна, му́чениче, отмще́нія же пра́веднаго не убѣжа́.

Истинную ча́шу отъ твои́хъ крове́й страда́льческихъ поче́рплъ еси́, прехва́льне му́чениче, и сію́ всегда́ предлага́еши Це́ркви, и пита́еши твои́ми чудесы́, Дими́тріе, вопію́щія Христу́: отъ тли́, Бо́же, изба́ви на́съ.

Яко пречестна́ же́ртва, та́йнѣй трапе́зѣ принесе́нъ бы́въ заколе́ніемъ, му́чениче, въ небе́сныхъ оби́телехъ пресла́вно водворя́ешися, зря́ сла́ву Бо́жію и пріе́мля болѣ́зней твои́хъ по́чести и страда́нія.

Богоро́диченъ: На Тя́ соше́дши роса́ небе́сная и оляденѣ́вшую зе́млю, Приснодѣ́во, богоразу́мія вода́ми напои́вши, многопло́дну яви́.

Инъ.

Ирмо́съ: Бе́здна грѣхо́въ и прегрѣше́ній бу́ря мя́ смуща́етъ и во глубину́ ну́жднаго рѣ́етъ мя́ отча́янія, но Твою́ крѣ́пкую ру́ку мнѣ́ простри́, я́ко Петро́ви, о Упра́вителю, и спаси́.

Чу́дно па́ки и ди́вно ви́дѣти, я́ко ра́бъ тво́й и убíйца, сѣдя́ на престо́лѣ оте́чествія твоего́ и слы́ша издале́ча благоро́дное твое́ и́мя, боя́знію обдержа́ся и сме́ртію сконча́ся, ты́ же при́сно живе́ши въ Ца́рствіи небе́снѣмъ.

Аще и во еди́номъ часѣ́, лю́тую сію́ сме́рть претерпѣ́лъ еси́, страда́льче Дими́тріе, но со многострада́вшими му́ченики вѣ́чный живо́тъ пріобрѣ́лъ еси́, и ны́нѣ съ ни́ми наслажда́ешися ра́йскія красоты́ и весе́лія.

Ди́вство ве́ліе показа́ Бо́гъ тобо́ю, ка́ко по толи́цѣхъ лѣ́тѣхъ вопію́щи непови́нная кро́вь твоя́, а́ки Авелева на Ка́ина, на раба́ твоего́ и убíйцу, и́же и ца́рь бы́сть, и прише́дши, злѣ́ погуби́ его́. Ты́ же при́сно ра́дуешися, пребыва́я у Христа́ Царя́ и Бо́га всѣ́хъ.

Богоро́диченъ: Изъ ко́рене Іессе́ева прозябла́ еси́, Влады́чице, и ко́рень породила́ еси́, всѣ́хъ Царя́, Христа́ Бо́га на́шего, отъ Него́же вси́ спасе́ніе получа́емъ. Тѣ́мъ непреста́нно моли́ Его́ дарова́ти на́мъ ве́лію ми́лость.

Конда́къ, гла́съ 8:

Возсія́ дне́сь въ сла́внѣй па́мяти твое́й вѣ́рнымъ весе́ліе, я́ко бо доброра́сленный гре́знъ, прозя́блъ еси́ и Христу́ красе́нъ пло́дъ прине́слъ еси́ себе́; тѣ́мже и по убіе́ніи твое́мъ соблюде́ тѣ́ло твое́ нетлѣ́нно, страда́льчески обагре́ное кро́вію. Благоро́дне свя́те Дими́тріе, соблюда́й оте́чество твое́ и гра́дъ тво́й невреди́мъ, тому́ бо еси́ утвержде́ніе.

Икосъ:

Яко а́гнецъ непоро́ченъ, кро́вь твою́ излія́лъ еси́, богому́дре Дими́тріе, и отъ Благода́теля всѣ́хъ Бо́га чуде́съ да́ръ прія́лъ еси́, и вмѣ́сто тлѣ́ннаго обрѣ́лъ еси́ бога́тство нетлѣ́нное, предстои́ши бо престо́лу сла́вы всѣ́хъ Царя́. Ему́же о на́съ, му́чениче, моли́ся, да твои́ми моли́твами отъ бѣ́дъ свободи́вшеся, ра́достно возопіе́мъ, глаго́люще: ра́дуйся, вѣ́рныхъ прави́телю; ра́дуйся, вѣ́ры тве́рдое забра́ло; ра́дуйся, чу́до чуде́съ пресла́вное и приста́нище ти́хое притека́ющихъ къ тебѣ́; ра́дуйся, ко́реню вѣ́ры и моле́бниче о моля́щихъ ти ся; ра́дуйся, оте́честву твоему́ похвала́ и Импера́тору на́шему [имяре́къ] на враги́ побо́рникъ. Сохраня́й гра́дъ тво́й невреди́мъ, тому́ бо еси́ утвержде́ніе.

Пѣ́снь 7.

Ирмо́съ: Богопроти́вное велѣ́ніе беззако́ннующаго мучи́теля высо́къ пла́мень вознесло́ е́сть, Христо́съ же простре́ богочести́вымъ отроко́мъ ро́су духо́вную, Сы́й благослове́нъ и препросла́вленъ.

Собла́знъ лука́ваго раба́ и того́ хи́тростей превы́ше, я́ко побѣди́тель изря́денъ, му́чениче, бы́въ, просла́вился еси́, зовы́й: Бо́же, благослове́нъ еси́.

Луча́ми, я́ко звѣзда́, собо́рную це́рковь чудесы́ просвѣти́лъ еси́, вѣ́рою же притека́ющимъ къ ра́цѣ моще́й твои́хъ исцѣле́ніе неоску́дно подае́ши, преблаже́нне, и зову́щимъ: Бо́же, благослове́нъ еси́.

Аки а́гнецъ непоро́ченъ и кади́ло благопрія́тно, Агнцу и́стинному и Па́стырю, му́чениче, прине́слся еси́ въ приноше́ніе всебога́тно и прія́тно всесожже́ніе, Ему́же пое́мъ: благослове́нъ Бо́гъ оте́цъ на́шихъ.

Богоро́диченъ: Невеще́ственнаго Свѣ́та вселе́ніе Твое́ чре́во бы́сть, свѣтлостьми́ Боже́ственнаго ра́зума безбо́жіе отгна́вшаго, Пречи́стая Богоневѣ́сто Отрокови́це. Ему́же пое́мъ, взыва́юще: благослове́нъ Бо́гъ оте́цъ на́шихъ.

Инъ.

Ирмо́съ: Бо́жія снисхожде́нія о́гонь устыдѣ́ся въ Вавило́нѣ иногда́, сего́ ра́ди о́троцы въ пещи́, ра́дованною ного́ю, я́ко во цвѣ́тницѣ, лику́юще поя́ху: благослове́нъ еси́, Бо́же оте́цъ на́шихъ.

Мно́ги ко́зни умышля́ше на тя́ ра́бъ тво́й и убíйца, да преда́стъ тя́ непови́ннѣй и лю́тѣй сме́рти, я́коже и бы́сть; по́слѣжде же са́мъ живота́ своего́ гонза́етъ и ца́рства отбыва́етъ, ты́ же, страда́льче, во вѣ́ки ца́рствуеши.

Изъ чре́ва ма́терня изы́де, и не во мно́зѣ вре́мени настоя́щее се́ житіе́ ви́дѣ, и лю́тою и непови́нною сме́ртію отъ о́наго раба́ своего́ и убíйцы ко Го́споду оты́де, и въ кро́вы небе́сныя всели́ся.

Тече́тъ сла́ва, а́ки рѣка́, въ Россíйстѣй земли́, повѣ́дающи и непови́нную сме́рть твою́: ка́ко повелѣ́ніемъ о́наго раба́ твоего́ таково́ю сме́ртію вѣ́чный живо́тъ себѣ́ получи́лъ еси́.

Богоро́диченъ: Ро́дъ земны́хъ по достоя́нію воспѣ́ти Тя́ не мо́жетъ, Влады́чице, а́зъ же, окая́нный и скве́рный, ка́ко могу́ простре́ти недосто́йніи устнѣ́ мои́ и воспѣ́ти Тя́, Дѣ́во Всепѣ́тая?

Пѣ́снь 8.

Ирмо́съ: Пе́щь иногда́ о́гненная въ Вавило́нѣ дѣ́йства раздѣля́ше, Бо́жіимъ велѣ́ніемъ халде́и опаля́ющая, вѣ́рныя же ороша́ющая, пою́щія: благослови́те, вся́ дѣла́ Госпо́дня, Го́спода.

Вше́дъ, му́чениче, въ небе́снаго кру́га тече́нія, на добродѣ́тельный возду́хъ, страда́ньми препоя́санъ, кре́стъ за ски́петръ въ десну́ю ру́ку имѣ́я, сца́рствовати Христу́ сподо́бился еси́, Дими́тріе царе́виче. Моли́ спасти́ся на́мъ, пою́щимъ: благослови́те, вся́ дѣла́ Госпо́дня, Го́спода.

Укра́шенъ ра́зумомъ, кра́сному Влады́цѣ предстои́ши, свѣ́телъ при́сно, я́ко побѣдоно́сецъ богопрія́тенъ, укроти́ моли́твами твои́ми ва́рварская нахожде́нія и низложи́ му́чащее на́съ искуше́ніе, согнѣта́ющее зло́мъ во глубину́ поги́бели, страстоте́рпче Дими́тріе, пою́щихъ: благослови́те, вся́ дѣла́ Госпо́дня, Го́спода.

Пречестна́я [твоя́] па́мять, освяща́ющи мíръ, приспѣ́, всехва́льне страстоно́сче, въ ню́же мо́лимся получи́ти тобо́ю заступле́ніе, Дими́тріе, пою́щимъ сла́ву блага́го уго́дника: благослови́те, вся́ дѣла́ Госпо́дня, Го́спода.

Богоро́диченъ: Свяще́нныхъ проро́къ честны́й ли́къ Тя́ пропису́етъ, киво́тъ и несѣко́мую го́ру, же́злъ и две́рь, е́юже, я́ко вѣ́сть, про́йде Вы́шній и па́ки затворе́ну оста́ви Тя́ Дѣ́ву.

Инъ.

Ирмо́съ: Седмери́цею пе́щь халде́йскій мучи́тель богочести́вымъ неи́стовно разжже́, си́лою же лу́чшею спасе́ны сія́ ви́дѣвъ, Творцу́ и Изба́вителю вопія́ше: о́троцы, благослови́те, свяще́нницы, воспо́йте, лю́діе, превозноси́те во вся́ вѣ́ки.

Изъ отца́, благочести́ва царя́, благода́ти тезоиме́нна, ма́тере же цари́цы, госпожи́ нарече́нныя, произше́лъ еси́, благоро́дне Дими́тріе, и самаго́, ма́тере градово́мъ, Го́рняго Іерусали́ма, дости́глъ еси́. Того́ ра́ди мо́лимъ тя́: не преста́й моли́ти о душа́хъ на́шихъ.

Яко а́гнецъ незло́бивъ, ничи́мже проти́вися рабу́ твоему́ и убíйцѣ, о́нъ же за́вистію діа́волею я́тъ бы́сть и предаде́ тя́ непови́ннѣй сме́рти, того́ ра́ди живота́ своего́ злѣ́ гонза́етъ, ты́ же при́сно пребыва́еши во Ца́рствіи небе́снѣмъ.

Яви́ся пе́рвый вра́гъ въ Россíйстѣй земли́ по сме́рти твое́й, и́же пре́жде нося́й на себѣ́ о́бразъ и́ноческъ, послѣди́ же све́рже его́ съ себе́, и возложи́ на ся́ тезоимени́тство твое́, и бы́сть ца́рь, Бо́гъ же моли́твъ ра́ди твои́хъ до конца́ сего́ погуби́.

Богоро́диченъ: Истинная еси́ Ма́ти небе́снаго Царя́ и Бо́га всѣ́хъ, Влады́чице: Тобо́ю ве́сь ро́дъ человѣ́чь обнови́ся и отъ дре́внія кля́твы свободи́ся. Тѣ́мже и а́зъ, недосто́йный, молю́ Ти ся: свободи́ и мене́, непотре́бнаго раба́ Твоего́, отъ содержа́щаго грѣха́ моего́.

Пѣ́снь 9.

Ирмо́съ: Безнача́льна Роди́теля Сы́нъ, Бо́гъ и Госпо́дь, вопло́щся отъ Дѣ́вы, на́мъ яви́ся, омраче́нная просвѣти́ти, собра́ти расточе́нная. Тѣ́мъ Всепѣ́тую Богоро́дицу велича́емъ.

Обрѣ́лъ еси́ отъ Христа́ возме́здіе, му́дре му́чениче, пра́вды вѣне́цъ пріи́мъ и ра́дость неконча́емую, и, небе́снаго селе́нія во дво́рѣхъ пребыва́я, держа́ву оте́чества твоего́ помина́й, му́чениче Дими́тріе.

Егда́ принесе́ни бы́ша честны́я твоя́ мо́щи, страстоте́рпче Дими́тріе, тогда́ святи́тели, обстоя́ще о́дръ, ца́рь же, и кня́зи, и вси́ россíйстіи наро́ди воскли́кнуша ку́пно па́мять вѣ́чную, Христа́ велича́юще.

Му́ченикъ дне́сь сосло́віе, святы́хъ и пра́ведныхъ ду́ши, я́ко побѣдоно́сца тя́ и слико́вника прія́ша, му́чениче Дими́тріе, съ ни́миже пое́ши, ра́дуяся, Бо́га въ Тро́ицѣ, спа́сающаго ду́ши на́ша.

Богоро́диченъ: Разумѣ́вше издале́ча прозорли́выми очи́ма, проро́цы Тя́ я́вѣ провозвѣсти́ша, хотя́щую Ма́терь бы́ти Вседѣ́телю и всѣ́хъ Влады́цѣ. Тѣ́мъ Тя́ пое́мъ, Всепѣ́тая Богоро́дице, и исповѣ́дуемъ, я́ко вои́стинну су́щую Богоро́дицу.

Инъ.

Ирмо́съ: Ужасе́ся о се́мъ не́бо, и земли́ удиви́шася концы́, я́ко Бо́гъ яви́ся человѣ́комъ пло́тски, и чре́во Твое́ бы́сть простра́ннѣйшее небе́съ. Тѣ́мъ Тя́, Богоро́дицу, Ангеловъ и человѣ́къ чинонача́лія велича́ютъ.

Тезоимени́тъ еси́, страда́льче, дре́внему великому́ченику Дими́трію Селу́нскому, его́же у́бо моли́твами сла́вный му́ченикъ Не́сторъ Лíя уби́, ты́ же и́менемъ твои́мъ раба́ твоего́ и убíйцу злѣ́ погуби́лъ еси́.

Аще, а́ки кла́съ незрѣ́лъ, и пожа́лся еси́ тѣле́снѣ, благовѣ́рне царе́виче Дими́тріе, но благоро́дною твое́ю душе́ю невреди́мъ пребы́лъ еси́, и ны́нѣ пребыва́еши въ небе́сныхъ селе́ніихъ, ра́дуяся, и весели́шися, поя́ и славосло́вя Го́спода.

Во осмолѣ́тномъ во́зрастѣ ко Го́споду отше́дъ и со многому́чившимися му́ченики въ ра́дость и весе́ліе вше́дъ, ра́дуешися съ ни́ми и весели́шися у Христа́ и Бо́га всѣ́хъ, Его́же поя́, моли́ся о на́съ.

Аще и не во мно́зѣмъ вре́мени пострада́лъ еси́, но во еди́номъ часѣ́, сію́ лю́тую и непови́нную сме́рть претерпѣ́лъ еси́, страда́льче Дими́тріе, сего́ ра́ди введе́ Бо́гъ тя́ въ вѣ́чное весе́ліе и неконча́емую ра́дость.

Богоро́диченъ: Соприсносу́щное Сло́во Отцу́ и Ду́ху, во чре́ве Твое́мъ заче́нши и бе́зъ сѣ́мене поро́ждши, Ма́ти Дѣ́во Чи́стая, отъ Него́же, вѣ́рніи, спасе́ніе и просвѣще́ніе пріе́млемъ душа́мъ и тѣ́ломъ на́шимъ, Того́ моли́, да спасе́тъ ду́ши на́ша, я́ко Бла́гъ и Человѣколю́бецъ.

Свѣти́ленъ:

Яко цвѣ́тъ краснѣ́йшій, отъ ца́рска прозя́блъ еси́ ко́рене, прекра́сне Дими́тріе, и обагре́ніемъ страда́нія твоего́, я́ко ца́рскою порфи́рою, обагри́лся еси́ кро́вію. Тѣ́мъ всечестну́ю твою́ па́мять любо́вію творя́щія отъ бѣ́дъ спаса́й. [Два́жды]

Богоро́диченъ: Стоя́ще о́крестъ Тебе́ дѣ́вы богому́дрыя, Богороди́тельнице Марíе, я́коже царе́вы дще́ре, Сы́ну Твоему́ приведо́шася невѣстолѣ́пно, Пречи́стая, я́ко Царю́ вся́ческихъ, Его́же, Ма́ти Дѣ́во Отрокови́це, о на́съ моли́.

На хвали́техъ стихи́ры на 4, гла́съ 4. Подо́бенъ: Да́лъ еси́ зна́меніе.

Да́лъ еси́ зна́меніе* Це́ркви Твое́й, Го́споди,* новоявле́ннаго чудотво́рца, благовѣ́рнаго царе́вича Дими́трія,* непови́нно пострада́вшаго* и кро́вь свою́, я́ко во́ду, пролія́вшаго:* Тебе́ бо, всѣ́ми владу́щаго, возлюби́въ чи́стымъ се́рдцемъ,* душе́ю сокруше́нною* бы́сть побо́рникъ вѣ́ры* и исто́чникъ чуде́съ,* потопи́ бѣсо́вская ополче́нія. [Два́жды]

Отъ ко́рене изра́слъ еси́ благочести́ваго,* розга́ благовѣ́рная, Дими́тріе,* изъ младе́нства кре́стъ,* я́ко ору́жіе, на ра́мо твое́ взе́мъ,* вѣ́ру, я́ко щи́тъ,* наде́жду, я́ко броня́,* кро́тость и незло́біе, я́ко оско́рдъ,* побѣжда́ющія враги́* и бѣсо́вская ополче́нія* и тѣ́хъ прило́ги,* сего́ ра́ди, лику́я со Ангелы,* непреста́нно моли́ о душа́хъ на́шихъ.

Яко звѣзда́ пресвѣ́тлая,* просвѣща́ющи ду́ши вѣ́рныхъ* чуде́сными сія́ніи,* страстоно́сче Госпо́день,* благовѣ́рный Дими́тріе,* мра́къ страсте́й и болѣ́зней на́шихъ отгоня́еши,* здра́віе же всѣ́мъ да́руеши,* любе́зно цѣлу́ющимъ многострада́льная твоя́ мо́щи,* моли́твенниче о душа́хъ на́шихъ.

Сла́ва, гла́съ 8:

Пріиди́те дне́сь, собо́ри Россíйстіи, и ви́дите незло́биваго а́гнца, закла́ннаго непови́нно, побѣдоно́сца Дими́трія. Тѣ́ломъ у́бо во гро́бѣ погребе́нъ бы́сть, я́ко ме́ртвъ, душе́ю же на небесѣ́хъ со Ангелы и съ му́ченики ликовству́етъ, я́ко жи́въ, я́коже свидѣ́тельствуютъ и богодарова́нная его́ чудеса́. Ему́же, пою́ще, возопіе́мъ: страстоно́сче Христо́въ Дими́тріе, смоле́бники пріи́мъ Ангельскія ли́ки и му́ченики, моли́ся Пресвятѣ́й Тро́ицѣ, вѣ́рно чту́щему тя́ благовѣ́рному Импера́тору на́шему [имяре́къ] здра́віе дарова́ти, и на враги́ одолѣ́ніе, и спасти́ ду́ши на́ша.

И ны́нѣ, пра́здника.



НА ЛИТУРГІИ,
слу́жба му́ченическая:

[Блаже́нна пра́здника, пѣ́снь рядова́я, и свята́го, пѣ́снь 3-я. Проки́менъ, гла́съ 7: Возвесели́тся пра́ведникъ о Го́сподѣ, и упова́етъ на Него́. Сти́хъ: Услы́ши, Бо́же, гла́съ мо́й, внегда́ моли́ти ми ся къ Тебѣ́. Апо́столъ къ Тимоѳе́ю, зача́ло 292. Аллилу́ія, гла́съ 4: Пра́ведникъ, я́ко фи́никсъ процвѣте́тъ, я́ко ке́дръ, и́же въ Лива́нѣ, умно́жится. Сти́хъ: Насажде́ни въ дому́ Госпо́дни, во дво́рѣхъ Бо́га на́шего процвѣту́тъ. Ева́нгеліе отъ Іоа́нна, зача́ло 52. Прича́стенъ: Въ па́мять вѣ́чную бу́детъ пра́ведникъ, отъ слу́ха зла́ не убои́тся.]

Источникъ: Минíа, мѣ́сяцъ Ма́ій. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 108 об. – 118 об.

/ Къ оглавленію раздѣла /


Наверхъ / Къ титульной страницѣ

0