Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - воскресенiе, 25 iюня 2017 г. Сейчасъ на порталѣ посѣтителей - 16.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Ма́ія въ 15-й де́нь.
Преподо́бнаго отца́ на́шего Пахо́мія Вели́каго.

Стихи́ры пра́здника 3 и преподо́бнаго 3, гла́съ 6. Подо́бенъ: Все́ отло́жше:

Тебѣ́ ны́нѣ прибы́сть* отъ дѣ́ятельнаго видѣ́нія,* отложе́ніемъ тѣ́ла,* дебе́лаго покрыва́ла,* и пристра́стіе плотско́е отве́ргшу,* Бо́гу сраствори́тися,* отону́дными облиста́емь заря́ми и благода́тьми,* и богодѣ́тельными сія́ніи,* и манове́ніемъ обожа́емь,* и и́же къ лу́чшему восхожде́нію.* И ны́нѣ, богоно́се, блаже́нъ бы́въ,* Христа́ со дерзнове́ніемъ моли́* о душа́хъ на́шихъ.

Все́ чу́вство превозше́дъ,* Влады́цѣ чи́сто бесѣ́довалъ еси́,* пло́ти бы́въ внѣ́, всече́стне,* по́мысломъ лу́чшимъ* стра́сти удержа́въ,* и, де́монская шата́нія разори́въ,* попра́лъ еси́, Пахо́міе.* И ны́нѣ живы́й въ небе́сныхъ се́лѣхъ,* вся́, чту́щія па́мять твою́, помина́й,* Христу́ со дерзнове́ніемъ* моля́ся о душа́хъ на́шихъ.

Сла́ва, гла́съ 6:

Еже по о́бразу соблю́дъ невреди́мо, у́мъ влады́ку на стра́сти па́губныя по́стнически поста́вивъ, во е́же по подо́бію, я́ко мо́щно, возше́лъ еси́, му́жески бо естество́ пону́дивъ, потща́лся еси́ ху́ждшее покори́ти лу́чшему, и пло́ть порабо́тити ду́ху. Тѣ́мже мона́шествующихъ яви́лся еси́ ве́рхъ, жи́тель пусты́нный, благотеку́щихъ обучи́тель, пра́вило добродѣ́тели извѣ́стнѣйшее. И ны́нѣ на небесѣ́хъ зерца́ломъ разрѣ́шшимся, о́тче на́шъ Пахо́міе, чи́стѣ зри́ши Святу́ю Тро́ицу, моля́ся несре́дственнѣ о вѣ́рою и любо́вію чту́щихъ тя́.

И ны́нѣ, пра́здника.


На стихо́внѣ пра́здника. Сла́ва, гла́съ 6:

Преподо́бне о́тче, во всю́ зе́млю изы́де вѣща́ніе исправле́ній твои́хъ, тѣ́мъ на небесѣ́хъ обрѣ́лъ еси́ мзду́ трудо́въ твои́хъ, де́монскія погуби́лъ еси́ полки́ и Ангельскія дости́глъ еси́ чи́ны, и́хже житію́ безъ поро́ка поревнова́лъ еси́. Дерзнове́ніе имѣ́я ко Христу́ Бо́гу, ми́ръ испроси́ душа́мъ на́шимъ.

И ны́нѣ, пра́здника.


Тропа́рь, гла́съ 8:

Сле́зъ твои́хъ тече́ньми пусты́ни безпло́дное воздѣ́лалъ еси́, и и́же изъ глубины́ воздыха́ньми во сто́ трудо́въ уплодоноси́лъ еси́, и бы́лъ еси́ свѣти́льникъ вселе́ннѣй, сія́я чудесы́, Пахо́міе о́тче на́шъ, моли́ Христа́ Бо́га спасти́ся душа́мъ на́шимъ.


Кано́нъ пра́здника со ирмосо́мъ на 6 и свята́го на 6, его́же краегране́сіе: Пахо́мію похвалу́ любе́зно плету́. Гла́съ 2.


Пѣ́снь 1.

Ирмо́съ: Во глубинѣ́ постла́ иногда́ фараони́тское всево́инство преоруже́нная си́ла, вопло́щшееся же Сло́во всезло́бный грѣ́хъ потреби́ло е́сть, препросла́вленный Госпо́дь, сла́вно бо просла́вися.

Надѣ́явся бла́гости твои́хъ нра́вовъ, усе́рдно тебѣ́ пѣ́снь ра́бски возглаша́ю, но мо́й, богогла́се, у́мъ свѣтолу́чными сія́ньми, твои́ми мольба́ми просвѣти́, Пахо́міе преизря́дне.

Безстра́стія жела́ніемъ те́плымъ, о́тче, одержи́мь, ве́щныя увяди́лъ еси́ страсте́й во́лны, Пахо́міе, и дости́глъ еси́, любо́вію вперя́емь, сего́ теку́щаго сія́нія, преблаже́нне, Божества́.

Ра́дости испо́лнилъ еси́, му́дре, небе́сныя чи́ны, Творца́ позна́въ всея́ тва́ри: во храни́лищи бо навы́клъ еси́ иму́щаго неизрече́нную си́лу, Сего́, богоно́се, вѣ́рно уче́ньми наказу́емь.

Богоро́диченъ: Превы́шши была́ еси́, Чи́стая, всея́ неви́димыя и ви́димыя, Приснодѣ́во, тва́ри: Зижди́теля бо родила́ еси́, я́коже благоизво́ли воплоти́тися во утро́бѣ Твое́й. Его́же со дерзнове́ніемъ моли́ спасти́ ду́ши на́ша.

Пѣ́снь 3.

Ирмо́съ: Процвѣла́ е́сть пусты́ня, я́ко кри́нъ, Го́споди, язы́ческая неплодя́щая, Це́рковь, прише́ствіемъ Твои́мъ, въ не́йже утверди́ся мое́ се́рдце.

Якоже еле́нь прите́клъ еси́ къ водѣ́, преподо́бне, и, окропле́нъ бы́въ креще́ніемъ святы́мъ, ро́су прія́лъ еси́, е́юже услади́ся се́рдце твое́.

Не терпя́ще тве́рдости зрѣ́ти твое́й, преподо́бне, де́монстіи полцы́, богоно́се, воздержа́тельныя искуше́нія тебѣ́ разли́чная простро́ша.

Яко свяще́нное стяжа́въ житіе́, бы́лъ еси́ по́стникомъ, Пахо́міе, законополо́жникъ и пе́рвый во́ждь, Христу́ сія́ приве́лъ еси́, сла́вне, въ Не́мже утверди́ся твое́ се́рдце.

Богоро́диченъ: Чи́ни удиви́шася Ангельстіи, Пречи́стая, и человѣ́ческая устраши́шася сердца́ о рождествѣ́ Твое́мъ, тѣ́мже Тя́, Богоро́дице, вѣ́рою почита́емъ.

Конда́къ пра́здника и и́косъ.
Та́же сѣда́ленъ, гла́съ 8. Подо́бенъ: Прему́дрости.

Сле́зъ ту́чами твою́ ду́шу напои́въ бога́тно, о́тче му́дре, многопло́дный добродѣ́телей твои́хъ пожа́лъ еси́ кла́съ и, па́стырь овца́мъ преподо́бнымъ бы́въ, на зла́цѣ сія́ воздержа́нія воспита́лъ еси́. Тѣ́мже разрѣ́шся отъ житія́ сла́вно, оте́ческимъ, Пахо́міе, лико́мъ сочета́лся еси́. Сего́ ра́ди вопіе́мъ ти́: моли́ Христа́ Бо́га согрѣше́ній оставле́ніе пода́ти чту́щимъ любо́вію святу́ю па́мять твою́. [Два́жды.]

Сла́ва, и ны́нѣ, пра́здника или́ богоро́диченъ:

Со́лнца о́блаче разу́мнаго, Боже́ственнаго Свѣ́та свѣти́льниче златокова́нный, Нескве́рная, Небла́зная, Всенепоро́чная Влады́чице, омраче́нную ду́шу мою́ ослѣпле́ніемъ страсте́й, безстра́стія заре́ю просвѣти́, молю́ся, и оскверне́нное мое́ се́рдце омы́й пото́ки умиле́нія, покая́нія же слеза́ми и отъ тимѣ́нія мя́ очи́сти дѣ́лъ мои́хъ, да любо́вію зову́ Ти́: Богоро́дице Приснодѣ́во, моли́ Христа́ Бо́га прегрѣше́ній оставле́ніе пода́ти ми́, Тебе́ бо имѣ́ю наде́жду, ра́бъ Тво́й.

Крестобогоро́диченъ:

Агнца, и Па́стыря, и Изба́вителя, Агница зря́щи на Крестѣ́, восклица́ше, пла́чущи, и, го́рько рыда́ющи, вопія́ше: мíръ у́бо ра́дуется, пріе́мля Тобо́ю избавле́ніе, утро́ба же Моя́ гори́тъ, зря́щи Твое́ распя́тіе, е́же терпи́ши за милосе́рдіе ми́лости. Долготерпѣли́ве Го́споди, ми́лости бе́здно и исто́чниче неисчерпа́емый, умилосе́рдися и да́руй согрѣше́ній оставле́ніе вѣ́рою пою́щимъ Боже́ственныя стра́сти Твоя́.

Пѣ́снь 4.

Ирмо́съ: Прише́лъ еси́ отъ Дѣ́вы, не хода́тай, ни Ангелъ, но Са́мъ, Го́споди, вопло́щся, и спа́слъ еси́ всего́ мя́, человѣ́ка. Тѣ́мъ зову́ Ти́: сла́ва си́лѣ Твое́й, Го́споди.

Яко изря́денъ прави́тель бы́лъ еси́, Пахо́міе, мона́шескихъ собо́ровъ: видѣ́ніемъ бо, прему́дре о́тче, извѣсти́лся еси́, добродѣ́тели воздви́гнути попече́ніе.

Ду́ха Свята́го зарю́ пріе́мъ, звѣзда́ пресвѣ́тлая, сія́ющая благода́тію, бы́лъ еси́ всѣ́мъ, и́хже наста́вилъ еси́ ко спасе́нія приста́нищу твои́ми уче́ньми.

Житіе́ твое́, богоно́се, преблаже́нне Пахо́міе, пра́вило извѣ́стно мона́шествующихъ бы́сть, и́мже ны́нѣ живу́тъ твои́мъ послѣ́дующіи, о́тче, боже́ственнымъ уче́ніемъ.

Уязвля́емь Влады́чнею любо́вію, погаси́лъ еси́ пло́ти пристра́стіе воздержа́ніемъ, Пахо́міе, все́ житіе́ твое́, я́ко благово́нну же́ртву, освяти́лъ еси́.

Богоро́диченъ: Тя́ приста́нище спасе́нія и стѣ́ну недви́жиму, Богоро́дице Влады́чице, вси́ вѣ́мы, вѣ́рніи: Ты́ бо моли́твами Твои́ми отъ бѣ́дъ избавля́еши ду́ши на́ша.

Пѣ́снь 5.

Ирмо́съ: Хода́тай Бо́гу и человѣ́комъ бы́лъ еси́, Христе́ Бо́же: Тобо́ю бо, Влады́ко, къ Свѣтонача́льнику, Отцу́ Твоему́, отъ но́щи невѣ́дѣнія приведе́ніе и́мамы.

Любо́вію Бо́жіею, уче́ніемъ бесѣ́довалъ еси́ Ду́ха, изъ ни́хже просвѣща́емь, добродѣ́тели соверше́ніе прія́лъ еси́, отъ страсте́й измѣни́въ душе́вное устрое́ніе.

Моли́твенника Твоего́, по́стника приво́димъ Тебѣ́, Влады́ко, того́ ра́ди прося́ще просвѣще́ніемъ благода́ти просвѣти́тися и Твои́мъ всеору́жіемъ всегда́ сохрани́тися.

Укрѣпи́въ у́мъ за́повѣдей соблюде́ньми, Пахо́міе, пло́ти взыгра́ніе твои́мъ воздержа́ніемъ увяди́лъ еси́ и па́стырь показа́лся еси́ боголюбе́знаго со́нма.

Богоро́диченъ: Моли́ Твоего́ Сы́на и Го́спода, Дѣ́во Чи́стая, плѣ́ннымъ избавле́ніе отъ проти́внаго обстоя́нія, и на Тя́ упова́ющимъ умире́ніе дарова́ти.

Пѣ́снь 6.

Ирмо́съ: Въ бе́зднѣ грѣхо́внѣй валя́яся, неизслѣ́дную милосе́рдія Твоего́ призыва́ю бе́здну: отъ тли́, Бо́же, мя́ возведи́.

Всегуби́тельная де́монская попра́лъ еси́, о́тче, кова́рства, Влады́ки твоего́ одѣ́янъ си́лою и кресто́мъ честны́мъ огражда́емь.

Умно па́че вре́менныхъ проразсуди́въ вѣ́чнующая, болѣ́зни воздержа́нія претерпѣ́лъ еси́, преподо́бне, и душа́мъ строи́тель бы́лъ еси́.

Во́льнѣ обнища́въ ду́хомъ, о́тче, безсме́ртное и непрее́мное на небесѣ́хъ наслажде́ніе и несказа́нное бога́тство воспрія́лъ еси́.

Богоро́диченъ: Неискусому́жно, Дѣ́во, родила́ еси́ и вѣ́чнуеши Дѣ́ва, явля́ющи и́стиннаго Божества́, Сы́на и Бо́га Твоего́, о́бразы.

Конда́къ, гла́съ 2. Подо́бенъ: Вы́шнихъ ища́.

Свѣти́льникъ свѣ́телъ показа́лся еси́ въ концѣ́хъ, пусты́ню же гра́ды сотвори́лъ еси́ мно́жествы мона́шескими, са́мъ себе́ распе́нъ, кре́стъ тво́й на ра́мо взе́мъ, и воздержа́ніемъ тѣ́ло изнури́лъ еси́, моля́ непреста́нно о всѣ́хъ на́съ.

Икосъ:

Пресвѣ́тлая блаже́ннаго па́мять, другíй яви́ся де́нь спасе́нія на́мъ, свѣ́тлостію воздержа́нія, но́щь глубоку́ страсте́й отгоня́щи и вседобродѣ́тельнымъ дѣя́ніемъ свѣ́тло облиста́ющи, въ не́йже ясна́ звѣзда́ и свѣтла́ яви́ся. Вѣ́рно пѣ́сни съ весе́ліемъ Пахо́мію боже́ственному принесе́мъ: съ высоты́ бо зря́, просвѣща́етъ на́съ и дае́тъ ми́ръ неоску́денъ, моля́ непреста́нно о всѣ́хъ на́съ.

Пѣ́снь 7.

Ирмо́съ: Богопроти́вное велѣ́ніе беззако́ннующаго мучи́теля высо́къ пла́мень вознесло́ е́сть, Христо́съ же простре́ богочести́вымъ отроко́мъ ро́су духо́вную, Сы́й благослове́нъ и препросла́вленъ.

Крѣ́постію одѣ́явся Влады́чнею, я́ко пра́хъ, сладостра́стія житія́ попра́лъ еси́, любо́вію побѣжда́емь нетлѣ́нныя жи́зни, е́йже ны́нѣ и причасти́лся еси́, съ ли́ки Ангелъ, о́тче, водворя́яся.

Се́рдце стяжа́въ чи́сто, ви́дѣти сподо́бился еси́ всѣ́ми Неви́димаго, отсю́ду я́коже блаже́нъ служи́тель, о́тче, бы́лъ еси́, поя́ Благодѣ́теля и Препросла́вленнаго.

Правосла́вную му́дрость ты́ стяжа́въ, Еди́ницу Тричи́сленную, Тро́ицу Единосу́щную, преблаже́нне, проповѣ́далъ еси́ и Сло́ва стра́шное воплоще́ніе, научи́лъ еси́ пѣ́ти Благодѣ́теля, я́ко препросла́вленна во вѣ́ки.

Богоро́диченъ: Святы́хъ Святѣ́йшую Тя́ разумѣ́емъ, я́ко еди́ну, ро́ждшую Бо́га непремѣ́ннаго, Дѣ́во Нескве́рная, Ма́ти Безневѣ́стная, всѣ́мъ бо источи́ла еси́ вѣ́рнымъ нетлѣ́ніе Боже́ственнымъ рождество́мъ Твои́мъ.

Пѣ́снь 8.

Ирмо́съ: Пе́щь иногда́ о́гненная въ Вавило́нѣ дѣ́йства раздѣля́ше, Бо́жіимъ велѣ́ніемъ халде́и опаля́ющая, вѣ́рныя же ороша́ющая, пою́щія: благослови́те, вся́ дѣла́ Госпо́дня, Го́спода.

По́стныхъ я́вѣ воображе́нія отъ Ангела научи́вся, му́дре, отъ Боже́ственнаго повелѣ́нія. Имиже ны́нѣ пита́еми, благоче́стія пито́мцы, пѣ́сньми зову́ще: благослови́те, вся́ дѣла́ Госпо́дня, Го́спода.

Якоже мо́лнія, вели́кими блиста́ніи житіе́ сія́ющее всѣ́мъ возсія́ воздержа́нія твоего́, всему́дре, благоче́стно Зижди́телю зову́щимъ: благослови́те, вся́ дѣла́ Госпо́дня, Го́спода.

Тя́, па́че ума́ изъ нерожде́нна Отца́, пре́жде вѣ́къ рожде́нна, Христе́, сла́вя, проповѣ́да Пахо́мій сла́вный и Ду́ха Всесвята́го, еди́но Тро́ицы естество́ вѣ́дый и Божество́.

Богоро́диченъ: Две́рь Тя́ Свѣ́та, Дѣ́во Богома́ти, благоче́ствующе, имену́емъ, Отчее бо сія́ніе, соеди́ншееся пло́ти дебельству́, па́че естества́ родила́ еси́, Пречи́стая. Его́же пое́мъ, вся́ дѣла́ Госпо́дня, Го́спода.

Пѣ́снь 9.

Ирмо́съ: Безнача́льна Роди́теля Сы́нъ, Бо́гъ и Госпо́дь, вопло́щся отъ Дѣ́вы, на́мъ яви́ся, омраче́нная просвѣти́ти, собра́ти расточе́нная. Тѣ́мъ Всепѣ́тую Богоро́дицу велича́емъ.

Луча́ми благода́ти озари́вся, Пахо́міе, я́ко вѣ́ренъ служи́тель Бо́гу предстои́ши и наслади́тися сла́вы сподо́блься неразруши́мыя. Тѣ́мже честны́й пра́здникъ тво́й велича́емъ.

Исплете́ся тебѣ́ вѣне́цъ, я́ко побѣди́телю, Пахо́міе, десни́цею живоно́сною и вседержи́тельною, и ны́нѣ пою́щія твою́ па́мять сла́вную сподо́би, блаже́нне, улучи́ти оставле́ніе согрѣше́ній, всеприснопа́мятне.

Плоды́ ны́нѣ объе́мъ болѣ́зней твои́хъ, Пахо́міе, ра́дости наслажда́ешися, я́же па́че ума́, но хода́тайствуя изба́вити твоя́ ученики́, Христа́ умоли́, тя́ ны́нѣ сла́вящія и чту́щія, достосла́вне.

Богоро́диченъ: Яко руно́, Пренепоро́чная, до́ждь небе́сный во утро́бѣ пріе́мши, на́мъ родила́ еси́ пи́щу даю́щаго, благоче́стно Того́ воспѣва́ющимъ и Тя́, Всепѣ́тую Богоро́дицу, исповѣ́дающимъ.

Свѣти́ленъ. Подо́бенъ: Не́бо звѣзда́ми.

Ангельскаго житія́ жела́я, удали́лъ еси́ себе́ въ пусты́няхъ и стра́сти покори́лъ еси́ плотскíя, равноа́нгеленъ показа́вся, Пахо́міе богоно́се. [Два́жды.]

Сла́ва, и ны́нѣ, пра́здника.


На стихо́внѣ, Сла́ва, гла́съ 8:

Мона́ховъ мно́жества, наста́вника тя́ почита́емъ, о́тче на́шъ Пахо́міе, твое́ю бо стезе́ю вои́стинну пра́во ходи́ти позна́хомъ. Блаже́нъ еси́, Христу́ рабо́тавъ, и вра́жію обличи́лъ еси́ си́лу, Ангеловъ собесѣ́дниче, преподо́бныхъ соприча́стниче и пра́ведныхъ, съ ни́миже моли́ся Го́сподеви поми́ловатися душа́мъ на́шимъ.

И ны́нѣ, пра́здника.



НА ЛИТУРГІИ,

Блаже́нна пра́здника, пѣ́снь рядова́я, и свята́го, пѣ́снь 3-я. Проки́менъ, гла́съ 7: Честна́ предъ Го́сподемъ сме́рть преподо́бныхъ Его́. Сти́хъ: Что́ возда́мъ Го́сподеви о всѣ́хъ, я́же воздаде́ ми? Апо́столъ къ Кори́нѳяномъ, зача́ло 176. Аллилу́ія, гла́съ 6: Блаже́нъ му́жъ, боя́йся Го́спода, [въ за́повѣдехъ Его́ восхо́щетъ зѣло́]. Сти́хъ: Си́льно на земли́ бу́детъ сѣ́мя его́. Ева́нгеліе отъ Луки́, зача́ло 77. Прича́стенъ: Въ па́мять вѣ́чную [бу́детъ пра́ведникъ, отъ слу́ха зла́ не убои́тся].

Источникъ: Минíа, мѣ́сяцъ Ма́ій. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 98 об. – 102 об.

/ Къ оглавленію раздѣла /


Наверхъ / Къ титульной страницѣ

0