Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - понедѣльникъ, 21 августа 2017 г. Сейчасъ на порталѣ посѣтителей - 22.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Ма́ія въ 14-й де́нь.
Свята́го му́ченика Иси́дора, и́же во о́стровѣ Хíосѣ.

[ВЕЧЕРЪ,]
Стихи́ры пра́здника 3 и му́ченика 3, гла́съ 4. Подо́бенъ: Да́лъ еси́ зна́меніе.

Ре́вностію разжига́емь* благоче́стія, Иси́доре,* вше́лъ еси́ въ суди́ще,* те́плѣ страда́нія* и вѣне́цъ побѣ́ды, му́чениче, прія́тъ,* на ле́сть уче́ніи богопоко́рными украша́емь* кре́стнымъ же укрѣпля́емь всеору́жіемъ,* низложи́лъ еси́ льсти́ваго томи́теля,* вѣнцено́сецъ показу́яся.

Вои́стинну превзыдо́ша* му́ченическая страда́нія* похвале́ніемъ подо́бія,* и сло́ва, и по́мысла,* тве́рди бо столпи́ благоче́стія* тѣ́ломъ ме́ртвенымъ и стра́стнымъ,* ра́вно на́мъ сообложе́ни,* на о́гнь же дерзну́ша* и я́звы преоби́дѣша,* я́ко въ тѣлеси́ стра́ждуще чужде́мъ, сла́вніи.

Сла́ва, и ны́нѣ, пра́здника.

Тропа́рь, гла́съ 4:

Му́ченикъ Тво́й, Го́споди, Иси́доръ во страда́ніи свое́мъ вѣне́цъ прія́тъ нетлѣ́нный отъ Тебе́, Бо́га на́шего: имѣ́яй бо крѣ́пость Твою́, мучи́телей низложи́, сокруши́ и де́моновъ немощны́я де́рзости. Того́ моли́твами спаси́ ду́ши на́ша.

Сла́ва, и ны́нѣ, пра́здника.



[НА УТРЕНИ,]
Кано́нъ, гла́съ 8.

Пѣ́снь 1.

Ирмо́съ: Во́ду проше́дъ, я́ко су́шу, и еги́петскаго зла́ избѣжа́въ, изра́ильтянинъ вопія́ше: Изба́вителю и Бо́гу на́шему пои́мъ.

Твои́ми моли́твами, му́чениче Христо́въ, Иси́доре блаже́нне, съ небесе́ просвѣще́ніе пода́ждь мнѣ́ и благода́ть восхвали́ти пра́здникъ тво́й честны́й.

Соверше́нно имѣ́я къ Бо́гу, Иси́доре му́чениче, се́рдце и ду́шу и непоро́чно стяжа́въ житіе́, съ му́ченики подвиза́лся еси́ до́брѣ.

Зако́нно устро́ивъ твою́ жи́знь, Иси́доре му́чениче, я́коже некра́домо сокро́вище, вѣ́ру удержа́лъ еси́ непрело́жну спасе́нія, всеблаже́нне.

Богоро́диченъ: Вои́стинну ро́ждши естество́мъ Бо́га, и́стинно слы́шишися Богоро́дица, вои́стинну зва́ніе по коему́ждо Боже́ственнымъ рождество́мъ, Чи́стая, нося́щи.

Пѣ́снь 3.

Ирмо́съ: Ты́ еси́ утвержде́ніе притека́ющихъ къ Тебѣ́, Го́споди, Ты́ еси́ свѣ́тъ омраче́нныхъ, и пое́тъ Тя́ ду́хъ мо́й.

Сло́вомъ направля́емь, стра́стная стремле́нія, сла́вне му́чениче Христо́въ, добродѣ́тельми по́стными, страстоте́рпче, увяди́лъ еси́.

Имѣ́я непосты́дное душе́вное стремле́ніе, сла́вне, всеблагоче́стно исповѣ́даніе невре́дно соблю́лъ еси́.

Ми́лостива моли́твами твои́ми всѣ́хъ Судію́ сотвори́ благоче́стно твое́ восхваля́ющимъ, страстоте́рпче, торжество́.

Богоро́диченъ: Умертви́ мудрова́ніе пло́ти на́шея, Влады́чице, и ду́ши оживи́, Дѣ́во, вѣ́рою пою́щихъ Тя́.

Конда́къ, гла́съ 4. Подо́бенъ: Яви́лся еси́.

Упра́витель превели́кій вселе́ннѣй ты́ яви́лся еси́, свя́те, твои́ми къ Бо́гу моли́твами, тѣ́мже воспѣва́емъ тя́ дне́сь, му́чениче богому́дре, Иси́доре пресла́вне.

Та́же сѣда́ленъ, гла́съ 3. Подо́бенъ: Красотѣ́ дѣ́вства.

Подви́гся на змíя, поста́вилъ еси́ побѣ́ду, му́чениче Иси́доре, отъ Еги́пта свѣти́льникъ, озаря́я подсо́лнечную, всѣ́мъ возсія́лъ еси́, движе́нія творя́ къ возсія́вшему изъ Дѣ́вы Богоотрокови́цы, Его́же ра́ди закла́нъ бы́въ, страстоте́рпче, же́ртва благово́нна бы́лъ еси́.

Сла́ва, и ны́нѣ, пра́здника.

Пѣ́снь 4.

Ирмо́съ: Ты́ моя́ крѣ́пость, Го́споди, Ты́ моя́ и си́ла, Ты́ мо́й Бо́гъ, Ты́ мое́ ра́дованіе, не оста́вль нѣ́дра Отча, и на́шу нищету́ посѣти́въ. Тѣ́мъ съ проро́комъ Авваку́момъ зову́ Ти: си́лѣ Твое́й сла́ва, Человѣколю́бче.

Всего́ въ тебѣ́ Сло́ва все́льшася имѣ́я, я́коже во́инъ непобѣди́мый, мучи́тельскую посрами́лъ еси́ горды́ню и, побѣдоно́сецъ Того́ ра́ди, блаже́нне, бы́въ, вѣне́цъ неувяда́емый отъ Бо́га прія́лъ еси́, всесла́вне му́чениче Иси́доре.

Юношески погна́лъ еси́, Иси́доре, враги́ твоя́, си́хъ истни́лъ еси́, стра́шнымъ ору́жіемъ Креста́ огражде́нъ, крѣ́постію же препоя́санъ, и возненави́дѣвшихъ тя́ потреби́лъ еси́, зовы́й: си́лѣ Твое́й сла́ва, Человѣколю́бче.

Послѣ́дуя сме́рти Влады́чнѣй, Того́ ра́ди стра́сти терпѣ́лъ еси́, тѣ́мже нетлѣ́ннѣй тя́ жи́зни, му́чениче, сподо́би Госпо́дь сла́вы, Ему́же въ ру́цѣ пре́далъ еси́ ду́шу твою́, преблаже́нне Иси́доре.

Богоро́диченъ: Вопло́щся, обновля́етъ всего́ человѣ́ка, Пречи́стая, сему́ соедини́вся, Отчихъ нѣ́дръ не оста́вль, во Твою́ утро́бу всели́тися изво́ли и бога́тствомъ милосе́рдія, во́лею обнища́въ, обогати́ мíръ Божество́мъ.

Пѣ́снь 5.

Ирмо́съ: Вску́ю мя́ отри́нулъ еси́ отъ лица́ Твоего́, Свѣ́те незаходи́мый, и покры́ла мя́ е́сть чужда́я тма́ окая́ннаго? Но обрати́ мя, и къ свѣ́ту за́повѣдей Твои́хъ пути́ моя́ напра́ви, молю́ся.

Же́ртва принесе́ся непоро́чная и соверше́на твоему́ Влады́цѣ Христу́, и, закла́нъ бы́въ, усе́рдно кро́вь твою́ пролія́лъ еси́, Иси́доре, приобщи́вся страсте́й Его́ и Ца́рствія Его́ досто́инъ наслѣ́дникъ бы́въ.

Укрѣпля́емь, Спа́се, всеси́льною Твое́ю крѣ́постію, погаси́лъ е́сть мглу́ пре́лести, добропобѣ́дный му́ченикъ Иси́доръ, усѣче́нъ бо во главу́, Тебѣ́ ду́шу Жизнода́вцу благохва́льно предаде́, Влады́ко.

Украша́ется, блаже́нне, твои́ми честны́ми кровьми́ Це́рковь Христо́ва и уясня́ется твои́хъ страда́ній сопротивле́ніемъ, сла́вне: проти́ву грѣха́ бо ты́ крѣ́пко, да́же до кро́ве, противоста́лъ еси́, Иси́доре.

Богоро́диченъ: Оскве́рншееся естество́ человѣ́ческое преступле́ніемъ пе́рвымъ, и лю́тѣ истлѣ́вшее, и мертво́ бы́вшее возста́вила еси́, исто́чникъ ро́ждшая па́че ума́ безсме́ртія, Богоро́дице Пренепоро́чная Влады́чице.

Пѣ́снь 6.

Ирмо́съ: Моли́тву пролію́ ко Го́споду и Тому́ возвѣщу́ печа́ли моя́, я́ко зо́лъ душа́ моя́ испо́лнися и живо́тъ мо́й а́ду прибли́жися, и молю́ся, я́ко Іо́на: отъ тли́, Бо́же, возведи́ мя.

Соверше́нную любо́вь къ Бо́гу стяжа́въ, страстоте́рпче преблаже́нне, бла́гъ ра́ди нетлѣ́нныхъ вои́стинну земны́хъ любо́вь оста́вилъ еси́ и восте́клъ еси́, вопія́: прилѣпи́хся во слѣ́дъ Тебе́, Влады́ко.

Яко жени́хъ благолѣ́пенъ, Иси́доре, добро́тами му́ченическими укра́шенъ, къ небесе́мъ возше́лъ еси́, ра́дуяся, добротво́рному сія́нію предстоя́ти, моля́ся всегда́ о творя́щихъ па́мять твою́.

Претерпѣ́лъ еси́, страда́льче, закла́ніе, прозря́ тебѣ́ вѣ́чное наслажде́ніе и пи́щу присноживо́тную вои́стинну съ му́ченики, я́ко му́ченикъ непобѣ́димь, воспрія́лъ еси́ и́стинно вѣне́цъ, преблаже́нне Иси́доре.

Богоро́диченъ: Марíе, Влады́чнее селе́ніе, свѣ́тлыми дѣ́вства заря́ми свѣтови́дно, я́ко кри́нъ, сія́ющи посреди́ терно́внаго смуще́нія, Тебѣ́ молю́ся, Благо́й, согрѣше́ній пода́ждь ми́ проще́ніе.

Конда́къ и и́косъ пра́здника.

Пѣ́снь 7.

Ирмо́съ: Отроцы евре́йстіи въ пещи́ попра́ша пла́мень дерзнове́нно и на ро́су о́гнь преложи́ша, вопію́ще: благослове́нъ еси́, Го́споди Бо́же, во вѣ́ки.

Ны́нѣ осія́емь, треблаже́нне, духо́вною заре́ю, тя́ пою́щимъ осія́тися съ тобо́ю благоволи́, вопію́щимъ: благослове́нъ еси́, Го́споди Бо́же, во вѣ́ки. [Два́жды.]

О, предо́брыхъ твои́хъ подвиго́въ! и́миже разруши́лъ еси́ пре́лесть и́дольскую и мучи́тели лю́тыя посрами́лъ еси́, зовы́й: благослове́нъ еси́, Го́споди Бо́же, во вѣ́ки.

Богоро́диченъ: Всесвята́я Влады́чице Дѣ́во, согрѣше́ній мои́хъ ра́ны еле́емъ милосе́рдія Твоего́ исцѣли́, вопію́щаго: благослове́нъ, Пречи́стая, Пло́дъ Твоего́ чре́ва.

Пѣ́снь 8.

Ирмо́съ: Седмери́цею пе́щь халде́йскій мучи́тель богочести́вымъ неи́стовно разжже́, си́лою же лу́чшею спасе́ны сія́ ви́дѣвъ, Творцу́ и Изба́вителю вопія́ше: о́троцы, благослови́те, свяще́нницы, воспо́йте, лю́діе, превозноси́те во вся́ вѣ́ки.

Ласка́ньми покуша́шеся окра́сти мучи́тель твоего́ терпѣ́нія крѣ́пость и си́лу, всеблаже́нне Иси́доре, ко своему́ злоразу́мію, но ты́, богому́дре, — Христа́ бою́ся, — вопія́лъ еси́, — Ему́же и служу́: о́троцы, благослови́те, свяще́нницы, воспо́йте, лю́діе, превозноси́те во вся́ вѣ́ки.

Всесвѣ́тло, я́ко со́лнце, ти́хое твое́ лице́, муче́нія ра́дованіемъ я́вльшееся, я́ко а́гнецъ бо непоро́ченъ, закла́нъ бы́въ, прине́слся еси́ Бо́гу, Ему́же, я́ко Содѣ́телю, пѣ́сньми вопія́лъ еси́: о́троцы, благослови́те, свяще́нницы, воспо́йте, лю́діе, превозноси́те во вся́ вѣ́ки.

Свѣтови́дно тѣ́ло твое́ лю́бящимъ явля́шеся, а́нгельскимъ доринося́щимъ чино́мъ, блиста́яся, Иси́доре, чуде́съ свѣ́тлостьми и благода́тьми чудотворе́нія разли́чными, оби́льная подава́еши исцѣле́нія вопію́щимъ: о́троцы, благослови́те, свяще́нницы, воспо́йте, лю́діе, превозноси́те во вся́ вѣ́ки.

Богоро́диченъ: Вѣтíйстіи язы́цы Тя́ восхвали́ти не мо́гутъ, о Богороди́тельнице, Марíе Богоневѣ́сто! Бо́га бо родила́ еси́, надъ всѣ́ми су́щаго, Отрокови́це Чи́стая, отъ дѣви́ческія неискусобра́чныя утро́бы, Его́же о́троцы благословя́тъ, свяще́нницы воспѣва́ютъ, лю́діе превозно́сятъ во вся́ вѣ́ки.

Пѣ́снь 9.

Ирмо́съ: Ужасе́ся о се́мъ не́бо, и земли́ удиви́шася концы́, я́ко Бо́гъ яви́ся человѣ́комъ пло́тски, и чре́во Твое́ бы́сть простра́ннѣйшее небе́съ. Тѣ́мъ Тя́, Богоро́дицу, Ангеловъ и человѣ́къ чинонача́лія велича́ютъ.

Бога́тствомъ милосе́рдія соше́дый съ небе́съ, кре́стъ же и сме́рть на́съ ра́ди во́лею претерпѣ́лъ еси́, я́ко Бла́гъ. Сего́ ра́ди Иси́доръ, на Тя́ взира́я, вопія́ше: соумру́ Тебѣ́, да жи́въ бу́ду, сраспну́ся, да ца́рствую съ Тобо́ю.

Зако́нно твои́хъ крове́й на земли́ ка́пли излія́вшіяся, Иси́доре, на небесѣ́хъ оде́жду тебѣ́ обагри́ша благолѣ́пно, истка́ну благода́тію, въ ню́же ны́нѣ одѣ́янъ, Христу́ предстои́ши, въ черто́зѣхъ, преблаже́нне, небе́сныхъ, вѣне́цъ нося́, му́чениче сла́вне.

Яко имѣ́я дерзнове́ніе ко Христу́, моли́тися не преста́й, Иси́доре, отъ напа́стей, бу́ри же, и скорбе́й, и страсте́й изба́вити творя́щихъ па́мять твою́ досто́йно свяще́нную, душе́внаго же спасе́нія прося́, треблаже́нне, твоего́ жре́бія сподо́би.

Богоро́диченъ: Яко Спа́са ро́ждшая и Изба́вителя, спасе́ніе мнѣ́, Отрокови́це, сподо́би получи́ти, Пречи́стая, прегрѣше́ній мои́хъ плени́цы Твои́ми моли́твами разрѣша́ющи: вся́ бо, я́ко хо́щеши, Ты́ исправля́еши, я́ко носи́ла еси́ въ нѣ́дрѣхъ всѣ́хъ Царя́ бла́гостію несравне́нною.

Источникъ: Минíа, мѣ́сяцъ Ма́ій. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 88 об. – 91 об.

/ Къ оглавленію раздѣла /


Наверхъ / Къ титульной страницѣ

0