Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - пятница, 28 апрѣля 2017 г. Сейчасъ на порталѣ посѣтителей - 11.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Ма́ія въ 14-й де́нь.
Слу́жба свята́го Иси́дора, Христа́ ра́ди юро́диваго, Росто́вскаго чудотво́рца.

[ВЕЧЕРЪ,]
[Блаже́нъ му́жъ, 1-й антифо́нъ.] На Го́споди воззва́хъ: стихи́ры, гла́съ 4. Подо́бенъ: Яко до́бля.

Земны́й а́нгелъ и небе́сный человѣ́къ* яви́лся еси́, преблаже́нне,* исто́чникъ умиле́нія,* ми́лости тече́ніе,* пучи́на чуде́съ,* струя́ исцѣле́ній,* Иси́доре досточу́дне,* ма́слина Бо́жія, вои́стинну плодови́та,* еле́емъ трудо́въ твои́хъ* просвѣща́я вѣ́рно хва́лящихъ тя́* и моля́ Человѣколю́бца отъ бѣ́дъ изба́вити* любо́вію чту́щія всечестну́ю па́мять твою́.

Ра́зумъ тво́й, блаже́нне,* боже́ственнымъ свѣ́томъ сія́я,* тѣле́сныя стра́сти превзы́де,* не примѣ́сенъ до́льнимъ нося́ о́бразъ* и вообража́я себе́ боже́ственными добродѣ́тельми,* показа́ся ве́сь свѣтообра́зенъ* поспѣше́ніемъ Ду́ха Пресвята́го,* Иси́доре богому́дре, пра́веднымъ похвала́.* Съ ни́миже моли́ Христа́ Бо́га на́шего* отъ бѣ́дъ изба́вити пою́щія тя́.

Ины стихи́ры, гла́съ 8. Подо́бенъ: О, пресла́внаго чудесе́!

Блаже́нне Иси́доре богому́дре,* чи́стая твоя́ душа́,* правовѣ́рнымъ смы́сломъ сія́ющи,* облиста́ющи добродѣ́телей свѣтлостьми́,* озаря́етъ вѣ́рныхъ исполне́ніе,* бѣсо́вскую тму́ отгоня́щи.* Тѣ́мже я́ко прича́стника тя́ невече́рнѣй благода́ти* ублажа́емъ благоче́стно вси́, досточу́дне.

Имѣ́я ду́шу ми́лостивну,* и чи́стъ по́мыслъ,* и се́рдце бо́дро,* вѣ́ру небла́знену* и любо́вь вои́стинну нелицемѣ́рну,* отъ земли́ преста́вился еси́ къ небе́снымъ* и съ ли́ки пра́ведныхъ водворя́ешися.* Тѣ́мже тя́ почита́емъ свяще́нными пѣ́сньми* и благоче́стно вси́ сла́вимъ,* досточу́дне Иси́доре.

Боже́ственными уче́ніи укрѣпля́яся,* стра́сти плотскíя отъ души́ отгна́лъ еси́* и Святѣ́й Тро́ицѣ селе́ніе преочище́нное бы́лъ еси́.* Тѣ́мъ къ боже́ственнѣй жи́зни преста́вился еси́,* Бо́гу соблюда́ющему, и ны́нѣ* невреди́мо твое́ блаже́нное тѣ́ло* боже́ственнымъ судо́мъ,* и́мже Са́мъ вѣ́сть,* прославля́яй тя́ я́вѣ, Иси́доре.

Сла́ва, гла́съ 1:

Яко тече́ніе до́брѣ сконча́вшему, и вѣ́ру соблю́дшему непоро́чну, и враги́ безпло́тныя терпѣ́ніемъ свои́мъ попра́вшему, возложи́ся на честны́й тво́й ве́рхъ, побѣ́ды вѣне́цъ пресвѣ́телъ, отъ руки́ Вседержи́теля Бо́га, Его́же ра́ди мíръ и я́же въ не́мъ су́етства преоби́дѣлъ еси́. Тѣ́мъ и свята́я твоя́ чи́стая душа́ на небеса́ востече́, ра́дующися, пра́ведныхъ же ли́цы срѣто́ша тя́, веселя́щеся, и небе́сная селе́нія свѣ́тло воспрія́ша; блаже́нное же и честно́е тѣ́ло твое́ на земли́ пребыва́етъ нетлѣ́нно, вѣ́рнымъ подая́ исцѣле́ніе. Тѣ́мже вѣ́рою пра́вою и те́плымъ жела́ніемъ свято́му твоему́ гро́бу припа́дающе, богому́дре Иси́доре, про́симъ испроси́ти у Христа́ Бо́га на́шего, гра́ду твоему́ непоколеби́му и безмяте́жну пребы́ти отъ навѣ́тъ вра́жіихъ и пога́нскаго наше́ствія, правовѣ́рному Импера́тору на́шему держа́вы и побѣ́ды на враги́, умире́нія мíру и спасе́нія душа́мъ на́шимъ.

И ны́нѣ, пра́здника или́ богоро́диченъ.
[Вхо́дъ. Проки́менъ дне́ и] чте́нія три́.

Прему́дрости Соломо́ни чте́ніе.

Пра́ведницы во вѣ́ки живу́тъ, и въ Го́сподѣ мзда́ и́хъ, и попече́ніе и́хъ у Вы́шняго. Сего́ ра́ди пріи́мутъ ца́рствіе благолѣ́пія и вѣне́цъ добро́ты отъ руки́ Госпо́дни, зане́ десни́цею покры́етъ я́ и мы́шцею защити́тъ и́хъ. Пріи́метъ всеору́жіе — рве́ніе свое́ и вооружи́тъ тва́рь въ ме́сть враго́мъ. Облече́тся въ броня́ пра́вды и возложи́тъ шле́мъ — су́дъ нелицемѣ́ренъ. Пріи́метъ щи́тъ непобѣди́мый — преподо́біе, поостри́тъ же напра́сный гнѣ́въ — во ору́жіе, спобо́ретъ же съ ни́мъ мíръ на безу́мныя. По́йдутъ праволу́чныя стрѣ́лы мо́лніины и, я́ко отъ благокру́гла лу́ка облако́въ, на намѣ́реніе полетя́тъ, и отъ каменоме́тныя я́рости испо́лнь паду́тъ гра́ды. Вознегоду́етъ на ни́хъ вода́ морска́я, рѣ́ки же потопя́тъ я́ на́гло. Сопроти́въ ста́нетъ и́мъ ду́хъ си́лы и, я́ко ви́хоръ, развѣ́етъ и́хъ, и опустоши́тъ всю́ зе́млю беззако́ніе, и злодѣ́йство преврати́тъ престо́лы си́льныхъ. Слы́шите у́бо, ца́ріе, и разумѣ́йте, навы́кните, судіи́ конце́въ земли́. Внуши́те держа́щіи мно́жества и гордя́щіися о наро́дѣхъ язы́ковъ, я́ко дана́ е́сть отъ Го́спода держа́ва ва́мъ и си́ла отъ Вы́шняго.

Прему́дрости Соломо́ни чте́ніе.

Пра́ведныхъ ду́ши въ руцѣ́ Бо́жіей, и не прико́снется и́хъ му́ка. Непщева́ни бы́ша во очесѣ́хъ безу́мныхъ умре́ти, и вмѣни́ся озлобле́ніе исхо́дъ и́хъ, и е́же отъ на́съ ше́ствіе — сокруше́ніе, они́ же су́ть въ ми́рѣ. Ибо предъ лице́мъ человѣ́ческимъ, а́ще и му́ку пріи́мутъ, упова́ніе и́хъ безсме́ртія испо́лнено. И вма́лѣ нака́зани бы́вше, вели́кими благодѣ́тельствовани бу́дутъ, я́ко Бо́гъ искуси́ я́ и обрѣ́те и́хъ досто́йны Себѣ́. Я́ко зла́то въ горни́лѣ, искуси́ и́хъ и, я́ко всепло́діе же́ртвенное, прія́тъ я́. И во вре́мя посѣще́нія и́хъ, возсія́ютъ, и я́ко и́скры по сте́блію, потеку́тъ. Су́дятъ язы́комъ и облада́ютъ людьми́, и воцари́тся Госпо́дь въ ни́хъ во вѣ́ки. Надѣ́ющіися На́нь разумѣ́ютъ и́стину и вѣ́рніи въ любви́ пребу́дутъ Ему́, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.

Прему́дрости Соломо́ни чте́ніе.

Пра́ведникъ, а́ще пости́гнетъ сконча́тися, въ поко́и бу́детъ. Ста́рость бо честна́ не многолѣ́тна, ниже́ въ числѣ́ лѣ́тъ исчита́ется. Сѣди́на же е́сть му́дрость человѣ́комъ, и во́зрастъ ста́рости — житіе́ нескве́рное. Благоуго́денъ Бо́гови бы́въ, возлю́бленъ бы́сть, и живы́й посредѣ́ грѣ́шникъ, преста́вленъ бы́сть. Восхище́нъ бы́сть, да не зло́ба измѣни́тъ ра́зума его́ или́ ле́сть прельсти́тъ ду́шу его́. Раче́ніе бо зло́бы помрача́етъ до́брая и паре́ніе по́хоти, премѣня́етъ у́мъ незло́бивъ. Сконча́вся вма́лѣ, испо́лни лѣ́та до́лга, уго́дна бо бѣ́ Го́сподеви душа́ его́, сего́ ра́ди потща́ся отъ среды́ лука́вствія. Лю́діе же ви́дѣвше и не разумѣ́вше, ниже́ поло́жше въ помышле́ніи таково́е, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.

На стихо́внѣ стихи́ры, гла́съ 2. Подо́бенъ: До́ме Евфра́ѳовъ.

До́мъ и жили́ще* Ду́ха Пресвята́го,* му́дре Иси́доре, бы́лъ еси́,* тѣ́мже и на́съ* до́мы Тому́ содѣ́лай,* святу́ю твою́ па́мять почита́ющихъ.

Сти́хъ: Возвесели́тся пра́ведникъ о Го́сподѣ* и упова́етъ на Него́.

Житіе́ твое́, я́ко со́лнце,* въ сердца́ вѣ́рныхъ возсія́,* зарю́ чуде́съ испуща́я.* Тѣ́мже и на́съ свѣ́томъ невече́рнимъ озари́,* всечестну́ю твою́ па́мять почита́ющихъ.

Сти́хъ: Пра́ведникъ, я́ко фи́никсъ, процвѣте́тъ,* я́ко ке́дръ, и́же въ Лива́нѣ, умно́жится.

Не преста́й моля́ся, Иси́доре,* о при́сныхъ твои́хъ рабѣ́хъ,* и́хже духо́внымъ твои́мъ житіе́мъ просвѣти́лъ еси́,* да вси́ честно́е твое́ успе́ніе,* веселя́щеся, почита́емъ.

Сла́ва, гла́съ то́йже. Самогла́сенъ:

Отъ нече́стія во благоче́стіе прише́дый, свѣ́томъ разу́мнымъ отъ Бо́га просвѣще́нъ бы́въ, возненави́дѣлъ еси́ оте́ческое безбо́жіе и возлюби́лъ еси́ и́стинную вѣ́ру Христо́ву, гра́да на́шего я́ко дости́гнувъ и въ не́мъ чи́стымъ и непоро́чнымъ житіе́мъ Го́сподеви угоди́лъ еси́ и мно́гія лю́ди удиви́лъ еси́ чудесы́, богоблаже́нне Иси́доре. Но ны́нѣ имѣ́я дерзнове́ніе ко Влады́цѣ всѣ́хъ Бо́гу, моли́ о и́же вѣ́рою творя́щихъ всечестну́ю твою́ па́мять, притека́ющихъ со усе́рдіемъ къ чуде́сному гро́бу твоему́, изба́вится страсте́й душе́вныхъ же вку́пѣ и тѣле́сныхъ и вся́ческихъ бѣ́дъ и искуше́ній и спасти́ся душа́мъ на́шимъ.

И ны́нѣ, пра́здника или́ богоро́диченъ.

Тропа́рь, гла́съ 4:

Просвѣти́вся боже́ственною благода́тію, богому́дре, цѣлому́дріемъ мно́гимъ и терпѣ́ніемъ во вре́меннѣй жи́зни тече́ніе до́брѣ сконча́лъ еси́. Тѣ́мъ и по сме́рти яви́ тя свѣ́тлость житія́ твоего́: источа́еши бо исцѣле́ній благода́ть и́же съ вѣ́рою притека́ющимъ ко свято́му твоему́ гро́бу, Иси́доре блаже́нне, моли́ Христа́ Бо́га, да спасе́тъ ду́ши на́ша.


НА УТРЕНИ,
По 1-й стихоло́гіи сѣда́ленъ, гла́съ 8. Подо́бенъ: Прему́дрости.

Отъ ю́ности, я́ко свѣти́льникъ, возсія́лъ еси́, блаже́нне, зѣ́льнымъ воздержа́ніемъ умертви́лъ еси́ плотска́я взыгра́нія, тѣ́мъ и на высоту́ восте́клъ еси́ богоразу́мія, пресла́вне, пожи́въ въ мíрѣ богоуго́дно, посрами́лъ еси́ бѣсо́вская ополче́нія, Иси́доре всеблаже́нне. Сего́ ра́ди вопіе́мъ ти́: моли́ Христа́ Бо́га согрѣше́ній оставле́ніе дарова́ти чту́щимъ любо́вію святу́ю па́мять твою́. [Два́жды.]

Сла́ва, и ны́нѣ, пра́здника или́ богоро́диченъ.

Въ ти́ну впа́дъ грѣхо́въ, и нѣ́сть мнѣ́ постоя́нія, лю́тѣ потопи́ мя бу́ря прегрѣше́ній. Но я́ко ро́ждши Сло́во, еди́наго Человѣколю́бца, на мя́, раба́ Твоего́, при́зри и изба́ви мя́ вся́каго грѣха́, и страсте́й душетлѣ́нныхъ, и вся́каго озлобле́нія лука́ваго убíйцы, Богоро́дице Неискусому́жная моли́ Христа́ Бо́га грѣхо́въ оставле́ніе да́ти ми́, Тебе́ бо наде́жду и́мамъ, ра́бъ Тво́й.

По 2-й стихоло́гіи сѣда́ленъ, гла́съ 4:

Яко въ дому́ вои́стинну, на мѣ́стѣ пу́стѣ, посреди́ безу́мныхъ человѣ́къ всели́вся, богому́дре Иси́доре, вся́ко озлобле́ніе претерпѣва́я, до́брыя дѣ́тели, я́коже ѳиміа́мъ благово́ненъ и же́ртву благопрія́тну, Бо́гу прине́слъ еси́. Тѣ́мже, дерзнове́ніе стяжа́въ къ Нему́, моли́ дарова́ти очище́ніе согреше́ній вѣ́рою хва́лящимъ святу́ю па́мять твою́. [Два́жды.]

Сла́ва, и ны́нѣ, пра́здника или́ богоро́диченъ.

Прибѣ́жище су́щимъ въ лю́тыхъ, премѣне́ніе къ Бо́гу согрѣша́ющимъ, Пречи́стая Влады́чице, спаси́ на́съ отъ вся́каго обстоя́нія, и озлобле́нія человѣ́ческа, и стра́шнаго муче́нія, и страсте́й безче́стія, несумнѣ́нною вѣ́рою Тя́ при́сно призыва́ющихъ, Дѣ́во Всепѣ́тая.

По поліеле́и сѣда́ленъ, гла́съ 8. Подо́бенъ: Прему́дрости.

Яко врача́ прему́дра и уго́дника Госпо́дня богопрія́тна, къ чуде́сному твоему́ гро́бу прикаса́ющеся, богому́дре, соше́дшеся любо́вію и вѣ́рою, во псалмѣ́хъ и пѣ́ніихъ возра́дуемся, сла́вяще Христа́, такову́ю благода́ть тебѣ́ дарова́вшаго исцѣле́ній, Иси́доре всеблаже́нне. Моли́ Христа́ Бо́га согрѣше́ній оставле́ніе дарова́ти вѣ́рою и любо́вію пра́зднующимъ всечестну́ю па́мять твою́. [Два́жды.]

Сла́ва, и ны́нѣ, пра́здника или́ богоро́диченъ.

Яко дѣ́ву и еди́ну въ жена́хъ, Тя́, безъ сѣ́мене ро́ждшую Бо́га пло́тію, вси́ ублажа́емъ, ро́ди человѣ́честіи, о́гнь бо всели́ся въ Тя́ Божества́, и я́ко младе́нца млеко́мъ пита́еши Зижди́теля и Го́спода. Тѣ́мъ, а́нгельскій и человѣ́ческій ро́дъ, досто́йно сла́вимъ пресвято́е рождество́ Твое́ и согла́сно вопіе́мъ Ти́: моли́ Христа́ Бо́га согрѣше́ній оставле́ніе дарова́ти покланя́ющимся вѣ́рою пресвято́му Рождеству́ Твоему́.

Степе́нна, 1-й антифо́нъ 4-го гла́са. Проки́менъ, гла́съ 4: Возвесели́тся пра́ведникъ о Го́сподѣ* и упова́етъ на Него́. Сти́хъ: Услы́ши, Бо́же, гла́съ мо́й, внегда́ моли́ти ми ся къ Тебѣ́. Ева́нгеліе Матѳе́я, зача́ло 43.

По 50-мъ псалмѣ́ стихи́ра, гла́съ 6:

Человѣ́че Бо́жій, вѣ́рный ра́бе, уго́дниче Христо́въ, соверши́телю Того́ боже́ственныхъ повелѣ́ній, му́жу ди́вный въ чудесѣ́хъ, сто́лпе и утвержде́ніе гра́ду на́шему, Ца́рствія небе́снаго наслѣ́дниче, богоблаже́нне Иси́доре, дерзнове́ніе имѣ́я ко Христу́ Бо́гу, не преста́й моля́ся о душа́хъ на́шихъ.

Кано́нъ пра́здника со ирмосо́мъ на 6 и свята́го на 8, гла́съ 8.

Пѣ́снь 1.

Ирмо́съ: Колесницегони́теля фарао́ня погрузи́ чудотворя́й иногда́ Моисе́йскій же́злъ, крестообра́зно порази́въ и раздѣли́въ мо́ре, Изра́иля же бѣглеца́, пѣшехо́дца спасе́, пѣ́снь Бо́гови воспѣва́юща.

Вы́спрь житіе́ стяжа́въ благодѣя́ніемъ боже́ственнымъ и ве́сь свѣтообра́зенъ бы́въ, просвѣще́ніе ми́ низпосли́, я́ко да, ра́дуяся, восхвалю́ пресвѣ́тлое житіе́ твое́, е́же до́брѣ соверши́въ, воспрія́лъ еси́, я́же угото́ва Бо́гъ лю́бящимъ Его́, богому́дре Иси́доре.

Боже́ственнымъ разже́гся жела́ніемъ, вся́ оте́ческія отве́рглъ еси́ нра́вы, Христа́ же обрѣсти́ потща́лся еси́. И сего́ ра́ди, бѣ́гая, удали́вся нечести́выхъ сожи́тельства, благоче́стія свѣ́томъ озаре́нъ бы́лъ еси́ и боже́ственными добродѣ́тельми укра́шенъ, досточу́дне Иси́доре.

Дрема́нія вѣ́ждома не да́лъ еси́, блаже́нне Иси́доре, ниже́ поко́я твоему́ тѣ́лу, до́ндеже сно́мъ пра́веднымъ почи́въ, и непоколеби́мь бы́лъ еси́, я́ко сто́лпъ, вра́гъ неви́димыхъ ополче́ніемъ, Бо́гу при́сно предстоя́ во всено́щномъ стоя́ніи и славосло́віи, тѣ́мже отъ Него́ ны́нѣ просла́вился еси́.

Богоро́диченъ: Яко ло́жницу Боже́ственную и лѣ́ствицу, къ небе́снѣй возводя́щую высотѣ́ человѣ́ческое естество́, кади́льницу же Невеще́ственнаго и Свѣтоно́снаго Угля, въ ложеснѣ́хъ поне́сшу Богоизбра́нную Отрокови́цу Марíю, вси́ ублажа́емъ, зову́ще: ра́дуйся, Чи́стая, ро́ждшая Нача́льника жи́зни на́шея.

Катава́сія пра́здника.

Пѣ́снь 3.

Ирмо́съ: Утвержде́й въ нача́лѣ небеса́ ра́зумомъ и зе́млю на вода́хъ основа́вый, на ка́мени мя́, Христе́, за́повѣдей Твои́хъ утверди́, я́ко нѣ́сть свя́тъ па́че Тебе́, Еди́не Человѣколю́бче.

Глаго́ломъ боже́ственнымъ послѣ́дуя и си́мъ вы́ну поуча́яся, испо́лнился еси́ во́дъ благода́тныхъ, и источи́лъ еси́ пото́ки чуде́съ, и, чу́ждь бы́въ вся́каго плотска́го жела́нія, воспѣва́я, глаго́лалъ еси́ Бо́гу, Иси́доре: нѣ́сть свя́тъ, па́че Тебе́, Человѣколю́бче.

Благоутро́біе стяжа́лъ еси́, ми́лостивому Бо́гу подо́бствовавъ, расточи́лъ еси́ бога́тство убо́гимъ; тѣ́мже на небесѣ́хъ присносу́щее блаже́нство тебѣ́ угото́вася, его́же получи́въ, Иси́доре, вопіе́ши: нѣ́сть свя́тъ, па́че Тебе́, Человѣколю́бче.

Благоугоди́въ Зижди́телю дѣ́лы боже́ственными, наслѣ́довалъ еси́ благи́хъ воспрія́тіе; дре́ва у́бо живо́тнаго при́сно наслажда́яся, блаже́нне Иси́доре, воспѣва́еши непреста́нно: нѣ́сть свя́тъ, па́че Тебе́, Человѣколю́бче.

Богоро́диченъ: Святы́хъ а́нгелъ су́щи святѣ́йши, Яже си́хъ Содѣ́теля во Твое́й утро́бѣ поне́сшая и ро́ждшая, Богоотрокови́це Чи́стая, Изба́вителя человѣ́комъ. Тѣ́мже Ти́ согла́сно вопіе́мъ: нѣ́сть свя́ты и пречи́сты, ра́звѣ Тебе́, Влады́чице.

Сѣда́ленъ, гла́съ 4:

Отъ земли́ Воззва́вый тя́ на вѣ́чныя оби́тели соблюда́етъ и по сме́рти неврежде́но тѣ́ло твое́, свя́те: ты́ бо въ цѣлому́дріи и чистотѣ́ житіе́ по́жилъ еси́, не порабо́тився плотски́мъ страсте́мъ, Иси́доре богому́дре. Тѣ́мже тя́ любо́вію почита́емъ. [Два́жды.]

Сла́ва, и ны́нѣ, пра́здника или́ богоро́диченъ.

Стѣна́ непобѣди́мая на́мъ, христіа́номъ, еси́, Богоро́дице Дѣ́во: къ Тебѣ́ бо прибѣга́юще, невреди́ми пребыва́емъ и, па́ки согрѣша́юще, и́мамы Тя́ Моли́твенницу. Тѣ́мъ, благодаря́ще, вопіе́мъ Ти́: ра́дуйся, Благода́тная, Госпо́дь съ Тобо́ю.

Пѣ́снь 4.

Ирмо́съ: Ты́ моя́ крѣ́пость, Го́споди, Ты́ моя́ и си́ла, Ты́ мо́й Бо́гъ, Ты́ мое́ ра́дованіе, не оста́вль нѣ́дра Отча, и на́шу нищету́ посѣти́въ. Тѣ́мъ съ проро́комъ Авваку́момъ зову́ Ти: си́лѣ Твое́й сла́ва, Человѣколю́бче.

За́повѣдемъ боже́ственнымъ соверши́тель яви́вся, неукло́ннымъ ра́зумомъ, всеблаже́нне, оте́ческаго небре́глъ еси́ невѣ́рствія, отъ ю́ности бо житіе́ имѣ́лъ еси́ нескве́рно и ми́лостивенъ ра́зумъ, досточу́дне, зовы́й непреста́нно: си́лѣ Твое́й сла́ва, Человѣколю́бче.

Ни мíра возмуще́ніе, ни вла́сти удержа́ніе, ни сла́ва вре́менная, ниже́ тлѣ́емое бога́тство твое́я къ Бо́гу любве́ возмого́ша уклони́ти, Иси́доре. Но благоволи́лъ еси́ вои́стинну житіе́ изря́дно, боже́ственнымъ раче́ніемъ укрѣпля́емь, взыва́я при́сно: си́лѣ Твое́й сла́ва, Человѣколю́бче.

Возвыша́яся боже́ственными повелѣ́ніи вы́ну, вра́гъ неви́димыхъ смири́лъ еси́ возвыше́нія умиле́нія слеза́ми, я́коже ке́дръ, при́сно сы́й напоя́емь, прія́лъ еси́ исцѣле́ній дѣ́тель, Иси́доре, судо́мъ пра́веднымъ вся́ческая оправда́ющаго, Ему́же предстоя́, вопіе́ши: си́лѣ Твое́й сла́ва, Человѣколю́бче.

Богоро́диченъ: Преукра́шена боже́ственною сла́вою, вся́ческая отъ не су́щихъ сло́вомъ соста́вльшаго Бо́га Сло́ва родила́ еси́, Человѣ́ка вои́стинну бы́вша, Его́же о на́съ, рабѣ́хъ Твои́хъ, моля́щи не преста́й, Богоро́дице Ма́ти Приснодѣ́во, вѣ́рою Тебѣ́ зову́щихъ: си́лѣ Твое́й сла́ва, Влады́чице.

Пѣ́снь 5.

Ирмо́съ: Вску́ю мя́ отри́нулъ еси́ отъ лица́ Твоего́, Свѣ́те незаходи́мый, и покры́ла мя́ е́сть чужда́я тма́ окая́ннаго? Но обрати́ мя, и къ свѣ́ту за́повѣдей Твои́хъ пути́ моя́ напра́ви, молю́ся.

Свѣ́томъ невеще́ственнымъ трисія́ннаго Божества́ озаре́нъ, досточу́дне Иси́доре, но́щь житія́ настоя́щаго непоткнове́нно преше́лъ еси́, и ны́нѣ, въ вѣ́чныхъ оби́телехъ съ ли́ки преподо́бныхъ водворя́яся, помина́й на́съ, всечестну́ю твою́ па́мять на земли́ торжеству́ющихъ.

Ны́нѣ е́же о тебѣ́ чу́до ве́ліе зри́мо е́сть и у́жаса испо́лнено, богоблаже́нне Иси́доре: ка́ко на мно́га лѣ́та земле́ю покрове́нно нетлѣ́нно твое́ тѣ́ло, во гро́бѣ лежа́ще, соблюда́ется, судьба́ми, и́миже вѣ́сть Бо́гъ, прославля́я тя́.

Богопрія́тному твоему́ начина́нію и чу́дному соверше́нію по Христѣ́ житія́ твоего́ а́нгельстіи чи́ни удиви́шася, богому́дре Иси́доре, и́бо во пло́ти сы́й, тѣ́хъ житію́ подража́тель яви́лся еси́. Тѣ́мже и да́ръ прозрѣ́нія отъ Бо́га прія́лъ еси́, е́же пресла́вная твори́ти чудеса́.

Богоро́диченъ: Моли́ изъ Тебе́ ро́ждшагося Го́спода, Дѣ́во Отрокови́це Чи́стая, сохрани́ти рабы́ Твоя́ отъ сопроти́вныхъ обстоя́ній и бѣсо́вскаго искуше́нія, Тя́, вои́стинну Бо́жію Ма́терь, исповѣ́дающихъ, и страсте́й душетлѣ́нныхъ свободи́ти, и вѣ́чнаго осужде́нія.

Пѣ́снь 6.

Ирмо́съ: Очи́сти мя́, Спа́се, мно́га бо беззако́нія моя́, и изъ глубины́ зо́лъ возведи́, молю́ся, къ Тебѣ́ бо возопи́хъ, и услы́ши мя́, Бо́же спасе́нія моего́.

Струи́ благода́ти, я́ко мѵ́ро благово́нно, отъ свята́го твоего́ гро́ба истека́ютъ, всебога́те, веселя́ще сердца́ вѣ́рныхъ, отъ любве́ къ тебѣ́ приходя́щихъ, и прогоня́юще кова́рства духо́въ лука́выхъ си́лою Ду́ха Пресвята́го, Иси́доре.

Во дво́рѣхъ Го́спода Савао́ѳа насажде́нъ, я́коже фи́никсъ, процвѣ́лъ еси́, богому́дре, и страсте́й вои́стинну тлетво́рныхъ побѣди́тель яви́лся еси́, Иси́доре, поспѣше́ніемъ боже́ственнымъ. Тѣ́мже и ра́дости пра́ведныхъ сподо́бился еси́, досточу́дне.

Ца́рствія Бо́жія возжела́въ, тече́ніе до́брѣ сконча́лъ еси́ и вѣ́ру соблю́лъ еси́ нескве́рну, виногра́дъ бы́въ благопло́денъ, богозва́нне Иси́доре, принося́ всекра́сныя гро́зды добродѣ́тели Содѣ́телю всѣ́хъ, Бо́гу, вѣнце́мъ нетлѣ́нія тебе́ украси́вшему.

Богоро́диченъ: Избра́ Тебе́ Госпо́дь во всѣ́хъ ро́дѣхъ, благослове́нная въ жена́хъ, непоро́чная Дѣ́во Богоро́дице, я́ко прекра́сное селе́ніе простра́нное, боже́ственную ло́жницу, и киво́тъ святы́ни, и свѣ́щникъ, и трапе́зу, Чи́стая.

Конда́къ, гла́съ 8. Подо́бенъ: Взбра́нной.

Взбра́нному и ди́вному въ пра́ведницѣхъ, и́же у́бо отъ Христа́ да́ръ чуде́съ пріи́мшему, похва́льныя ны́нѣ принесе́мъ глаго́лы, но я́ко имѣ́я дерзнове́ніе ко Святѣ́й Тро́ицѣ, Юже моли́ изба́витися отъ бѣ́дъ рабо́мъ твои́мъ, да зове́мъ ти́: ра́дуйся, богому́дре Иси́доре.

Икосъ:

Ка́ко возмогу́, грѣ́шный и скве́рный, а́зъ вку́пѣ душе́ю и тѣ́ломъ исписа́ти, е́же во пло́ти сы́й, равноа́нгельное житіе́ твое́ и пресла́вная чудеса́? Аще у́бо мно́зи прему́дріи не дости́гнутъ исповѣ́дати мно́гаго твоего́ терпѣ́нія, и смире́нія, и те́плыя ко Христу́ любве́, но, оба́че надѣ́яся на твое́ беззло́біе, о блаже́нне, си́це вопію́ ти: ра́дуйся, пресвѣ́тлая звѣздо́, отъ за́пада возсія́вшая и къ восто́ку прише́дшая; ра́дуйся, возненави́дѣвый оте́ческую и богоме́рзкую вѣ́ру, Христа́ же еди́наго, надъ всѣ́ми су́щаго Бо́га, всѣ́мъ се́рдцемъ возлюби́вый и Тому́ невозвра́тнымъ жела́ніемъ послѣ́довавый; ра́дуйся, бу́йственное и юро́дственное е́же по апо́столу, жи́тельство избра́вый; ра́дуйся, премѣни́вый тлѣ́нная и настоя́щая наде́ждею бу́дущихъ бла́гъ; ра́дуйся, дре́внему Іову уподо́бивыйся терпѣ́ніемъ; ра́дуйся, страстоте́рпче Христо́въ непобѣди́мый, но при́сно побѣди́вый діа́вола твои́мъ смире́ніемъ; ра́дуйся, я́ко дре́вній о́нъ Ла́зарь ни́щій, почива́я ны́нѣ въ ло́нѣхъ Авраа́млихъ; ра́дуйся, и́же по отше́ствіи мíра сего́, су́щимъ въ бѣда́хъ и искуше́ніихъ гото́въ обрѣта́яся предста́тель и засту́пникъ; ра́дуйся, вездѣ́ призыва́ющихъ тя́ бы́стро предваря́еши; ра́дуйся, богому́дре Иси́доре.

Пѣ́снь 7.

Ирмо́съ: Бо́жія снизхожде́нія о́гнь устыдѣ́ся въ Вавило́нѣ иногда́, сего́ ра́ди о́троцы въ пещи́, ра́дованною ного́ю, я́ко во цвѣ́тницѣ лику́юще, поя́ху: благослове́нъ еси́ Бо́же, оте́цъ на́шихъ.

Си́лою укрѣпля́емь всемогу́щаго Бо́га, пло́ти умертви́лъ еси́ и я́же до́лу влеку́щая мудрова́нія, всебога́те, чистото́ю и бдѣ́ніемъ непреста́ннымъ и ра́зумъ горѣ́ стяжа́лъ еси́, вопія́ непреста́нно, Иси́доре: благослове́нъ еси́, Бо́же оте́цъ на́шихъ.

Свѣ́тлости ра́ди житія́ твоего́ удиви́ тя Госпо́дь въ чудесѣ́хъ, богому́дре Иси́доре: купцу́ у́бо, въ мо́ри утопа́ющу, скорѣ́йшимъ явле́ніемъ предста́лъ еси́, досточу́дне, и отъ глубины́ сего́ изба́вилъ еси́, вопію́ща: благослове́нъ еси́, Бо́же оте́цъ на́шихъ.

Го́рнее Ца́рствіе, весе́ліе присносу́щное и сла́ву неувяда́ющую, бога́тство неистощи́мое и е́же преподо́бныхъ наслажде́ніе, по́честь трудо́въ твои́хъ воспрія́лъ еси́ отъ Бо́га, Благодѣ́теля всѣ́хъ, Ему́же ны́нѣ предстоя́, вопіе́ши: благослове́нъ еси́, Бо́же оте́цъ на́шихъ.

Богоро́диченъ: Его́же родила́ еси́, Го́спода, Влады́чице Чи́стая, не преста́й моля́щи, изъя́ти мя́ при́сно отъ вра́гъ, оскорбля́ющихъ мя́, и тя́жкое бре́мя грѣхо́въ мои́хъ расточи́ти, Богоневѣ́стная, я́ко да, ра́дуяся, вопію́: благослове́нъ, Пречи́стая, Пло́дъ Твоего́ чре́ва.

Пѣ́снь 8.

Ирмо́съ: Седмери́цею пе́щь халде́йскій мучи́тель богочести́вымъ неи́стовно разжже́, си́лою же лу́чшею спасе́ны сія́ ви́дѣвъ, Творцу́ и Изба́вителю вопія́ше: о́троцы, благослови́те, свяще́нницы, воспо́йте, лю́діе, превозноси́те во вся́ вѣ́ки.

Не то́кмо въ житіи́ сы́й, но и по отше́ствіи мíра мно́жайшая чудеса́ отъ честна́го твоего́ гро́ба содѣва́ются приходя́щимъ съ вѣ́рою, всеблаже́нне Иси́доре, и́бо неду́ги прого́ниши си́лою духо́вною и отъ бѣ́дъ изыма́еши. Тѣ́мже, не престаю́ще, вопіе́мъ: свяще́нницы, воспо́йте, лю́діе, превозноси́те во вся́ вѣ́ки.

Дерзну́вша у́бо іере́я извѣще́ніе прія́ти о святѣ́мъ тѣлеси́ твое́мъ, боже́ственная а́біе си́ла напра́сно порази́, но твои́ми моли́твами исцѣле́ніе получи́, всехва́льне Иси́доре. Тѣ́мже и мы́, веселя́щеся, вопіе́мъ: свяще́нницы, воспо́йте, лю́діе, превозноси́те во вся́ вѣ́ки.

Добродѣ́тельнымъ нра́вомъ и се́рдцемъ смире́ннымъ ми́лостивъ ты́ яви́лся еси́, досточу́дне Иси́доре, тре́бующимъ отъ тебе́ по́мощи, при́сно помога́я и чуде́съ дѣя́ніемъ удивля́я вѣ́рою Го́сподеви вопію́щія: свяще́нницы, по́йте, лю́діе, превозноси́те во вся́ вѣ́ки.

Богоро́диченъ: Ада́ма Содѣ́тель въ ложесна́хъ Твои́хъ, Чи́стая, зи́ждется и млеко́мъ пита́ется, пита́яй вся́ко дыха́ніе, Дѣ́во Богоро́дице. Тѣ́мже я́ко Ма́терь Бо́жію, вѣ́рніи, Тя́ прославля́емъ и превозно́симъ Чи́стую во вѣ́ки.

Пѣ́снь 9.

Ирмо́съ: Ужасе́ся о се́мъ не́бо, и земли́ удиви́шася концы́, я́ко Бо́гъ яви́ся человѣ́комъ пло́тски, и чре́во Твое́ бы́сть простра́ннѣйшее небе́съ. Тѣ́мъ Тя́, Богоро́дицу, а́нгеловъ и человѣ́къ чинонача́лія велича́ютъ.

Зрѣ́ти при́сно возжела́въ сла́ву Бо́га на́шего, Иси́доре, мно́гихъ добродѣ́телей разли́чными о́бразы себе́ удобри́лъ еси́ и, свѣщу́ нося́, укра́шену еле́емъ терпѣ́нія твоего́, возше́лъ еси́ въ свѣтоно́сный черто́гъ, со а́нгелы сы́й яснѣ́е наслажда́ешися боговидѣ́нія.

Яко у́треннее со́лнце, возсія́ па́мять твоя́ въ мíрѣ су́щимъ, сердца́ озаря́ющи боже́ственною свѣ́тлостію: ты́ бо свѣ́та и дне́ я́ко вои́стинну сы́нъ яви́лся еси́, богому́дре Иси́доре, тѣ́мже тя́ непреста́нно ублажа́емъ.

Прему́дростію украша́яся и ра́зумомъ просвѣща́яся, смире́ніемъ се́рдца ра́дуяся, высото́ю же житія́ сія́я, досточу́дне, въ небе́сная селе́нія преше́лъ еси́ и та́мо, въ ли́цѣ пра́ведныхъ предстоя́, на́съ помина́й, чту́щихъ тя́, блаже́нне Иси́доре.

Богоро́диченъ: Свѣ́та Боже́ственнаго прія́телище, луча́ми Божества́ мíръ озари́вшаго, ви́дѣна была́ еси́, Богоблагода́тная, мо́стъ же и лѣ́ствица, на высоту́ земны́я возводя́щи, Дѣ́во. Тѣ́мже, вѣ́рніи, ублажа́юще, Тя́ велича́емъ.

Свѣти́ленъ. Подо́бенъ: Жены́, услы́шите.

Удали́вся, бѣ́гая мірски́хъ сожи́тельства, Христу́, надъ всѣ́ми Бо́гу на́шему, непоро́чнымъ житіе́мъ благоугоди́лъ еси́, всеблаже́нне Иси́доре, Его́же ны́нѣ моли́ о на́съ, рабѣ́хъ твои́хъ, вѣ́рою пра́зднующихъ всечестну́ю па́мять твою́. [Два́жды.]

Богоро́диченъ:

Му́дрость ѵпоста́сную, и Сло́во пресу́щное, и врача́ всѣ́хъ, Христа́ ро́ждшая, Дѣ́во, стру́пы и я́звы души́ моея́ исцѣли́, лю́тыя и многовре́менныя, и се́рдца моего́ стра́стная утоли́ помышле́нія.

На хвали́техъ стихи́ры на 4, гла́съ 4. Подо́бенъ: Да́лъ еси́ зна́меніе.

Да́лъ еси́ при́тчу терпѣ́нія и му́жества,* преблагíй Го́споди,* пра́веднаго Иси́дора и многочуде́снаго* добродѣ́тельми, и словесы́,* и дѣ́лы сія́юща,* цѣлому́дріемъ украша́ема и кро́тостію.* Тѣ́мъ Твое́ неизрече́нное смотре́ніе сла́вимъ,* Іису́се всеси́льне* и Спа́се ду́шъ на́шихъ. [Два́жды.]

Пра́веденъ и незло́бивъ,* и́стиненъ же, и непоро́ченъ, и вѣ́ренъ,* уклоня́яся отъ вся́кія зло́бныя ве́щи,* показа́лся еси́, Иси́доре блаже́нне,* просвѣще́нъ добродѣ́тельми* и благоче́стіемъ сія́я.* Тѣ́мъ тя́ ублажа́емъ* и свято́е твое́ и честно́е дне́сь пра́зднуемъ успе́ніе,* ра́дующеся, богому́дре.

Цѣлому́дріемъ и благовѣ́ріемъ,* я́ко багряни́цею многоцѣ́нного, одѣ́явся, Иси́доре,* пра́вдою же и кро́тостію,* я́ко боже́ственнымъ вѣнце́мъ, вѣнча́лся еси́,* со стра́ждущими Христа́ ра́ди* ца́рствовати возжелѣ́лъ еси́.* И ны́нѣ Царю́ си́лъ предстои́ши,* Іису́су всеми́лостивому* и Спа́су ду́шъ на́шихъ.

Сла́ва, гла́съ 8:

Добродѣ́телей твои́хъ, богому́дре Иси́доре, исправле́нія уясни́ша вѣ́рныхъ сердца́: кто́ бо слы́ша безмѣ́рное твое́ смире́ніе и терпѣ́нію не удиви́ся? Яже ко всѣ́мъ кро́тости и беззло́бію, къ скорбя́щимъ ми́лованію и къ су́щимъ въ бѣда́хъ ско́рому поможе́нію, къ пла́вающимъ немяте́жному приста́нищу и въ пу́ть ше́ствующимъ благо́му поспѣше́нію. Вся́ боголѣ́пно научи́лъ еси́, досточу́дне, и ны́нѣ неувяда́емымъ вѣнце́мъ вѣнча́лся еси́ отъ руки́ Вседержи́теля Бо́га. Его́же моли́ спасти́ся душа́мъ на́шимъ.

И ны́нѣ, пра́здника или́ богоро́диченъ.
Славосло́віе вели́кое. [Ектеніи́] и отпу́стъ.



НА ЛИТУРГІИ,

Блаже́нна, пѣ́снь 3-я и 6-я. Проки́менъ, [гла́съ 7:] Честна́ предъ Го́сподемъ* сме́рть преподо́бныхъ Его́. Сти́хъ: Что́ возда́мъ Го́сподеви о всѣ́хъ, я́же воздаде́ ми? Апо́столъ къ Гала́томъ, зача́ло 213. Аллилуія, [гласъ 6:] Блаже́нъ му́жъ, боя́йся Го́спода, въ за́повѣдехъ Его́ восхо́щетъ зѣло́. [Сти́хъ: Си́льно на земли́ бу́детъ сѣ́мя его́.] Ева́нгеліе Матѳе́я, зача́ло 10. Прича́стенъ: Въ па́мять вѣ́чную бу́детъ пра́ведникъ, [отъ слу́ха зла́ не убои́тся.]

Источникъ: Минíа, мѣ́сяцъ Ма́ій. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 91 об. – 98 об.

/ Къ оглавленію раздѣла /


Наверхъ / Къ титульной страницѣ

0