Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - воскресенiе, 23 iюля 2017 г. Сейчасъ на порталѣ посѣтителей - 19.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Ма́ія въ 13-й де́нь.
Святы́я му́ченицы Глике́ріи.

[ВЕЧЕРЪ,]
Стихи́ры, гла́съ 8. Подо́бенъ: Му́ченицы Твои́, Го́споди.

Уязви́ся любо́вію* твое́ю сла́дкою,* Влады́ко, Глике́рія* и го́рькую я́звъ болѣ́знь* претерпѣва́етъ, Сло́ве Бо́жій,* тѣ́мже къ неболѣ́зненному* преставля́ется наслажде́нію,* я́ко нескве́рна и нетлѣ́нна.* Тоя́ моли́твами* да́руй всѣ́мъ, Сло́ве,* ве́лію ми́лость.

До́брѣ исповѣ́давши* Христо́во и́мя,* твоего́ Жениха́,* предъ враги́ беззако́ннующими,* зако́нно пострада́ла еси́* Его́ ра́ди, честна́я,* на у́ды ссѣка́ема крѣ́пко,* звѣ́ри побѣжда́ющи му́жески,* и ны́нѣ мо́лишися* всѣ́мъ дарова́ти* ве́лію ми́лость.

Сла́ва, и ны́нѣ, пра́здника.

Тропа́рь, гла́съ 4:

Агница Твоя́, Іису́се, Глике́рія, зове́тъ ве́ліимъ гла́сомъ: Тебе́, Женише́ мо́й, люблю́, и Тебе́ и́щущи, страда́льчествую, и сраспина́юся, и спогреба́юся креще́нію Твоему́, и стражду́ Тебе́ ра́ди, я́ко да ца́рствую въ Тебѣ́, и умира́ю за Тя́, да и живу́ съ Тобо́ю; но, я́ко же́ртву непоро́чную, пріими́ мя, съ любо́вію поже́ршуюся Тебѣ́. Тоя́ моли́твами, я́ко Ми́лостивъ, спаси́ ду́ши на́ша.


НА УТРЕНИ,
Кано́нъ, гла́съ 8.

Пѣ́снь 1.

Ирмо́съ: Во́ду проше́дъ, я́ко су́шу, и еги́петскаго зла́ избѣжа́въ, изра́ильтянинъ вопія́ше: Изба́вителю и Бо́гу на́шему пои́мъ.

Го́рести мя́ изба́ви страсте́й твои́ми, Глике́ріе, къ Бо́гу моли́твами, я́ко да твою́ па́мять воспою́ и до́блія сла́влю по́двиги твоя́.

Уязви́вшися любо́вію Христо́вою, кре́стнымъ всеору́жіемъ побѣди́ла еси́ врага́ и побѣ́ды прія́ла еси́ вѣне́цъ, о Глике́ріе, дѣ́во прехва́льная!

Ка́менію приноша́ющіи че́сть тя́ ка́меніемъ побива́ютъ, взира́ющую отъ души́ къ живо́му Ка́меню — Влады́цѣ, тебѣ́ дарова́вшему побѣ́ду, богоневѣ́сто.

Богоро́диченъ: Вои́стинну ро́ждши естество́мъ Бо́га, и́стинно слы́шишися Богоро́дица, вои́стинну именова́ніе по коему́ждо Боже́ственнымъ рождество́мъ, Чи́стая, нося́щи.

Пѣ́снь 3.

Ирмо́съ: Небе́снаго кру́га Верхотво́рче, Го́споди, и Це́ркве Зижди́телю, Ты́ мене́ утверди́ въ любви́ Твое́й, жела́ній кра́ю, вѣ́рныхъ утвержде́ніе, еди́не Человѣколю́бче.

Не щи́тъ, ни копіе́, но кре́стную побѣ́ду вѣ́рою несумнѣ́нною пріе́мши, усе́рдно возшла́ еси́ къ боре́ніемъ и до́блимъ подвиго́мъ къ міроде́ржца ко́знемъ.

Тя́, Женише́, жела́ющи, не ужаса́юся сме́рти, Твои́ми добро́тами наслажда́ема, го́ресть отлага́ю, ра́дующися, му́ку и лю́тая томле́нія, — Глике́рія, стра́ждущи, и́стинно взыва́ше.

За власы́ повѣ́шена и желе́зными ноготьми́ стру́жема, тѣ́ломъ болѣ́зни терпя́ше, наслажде́ніе неболѣ́зненное и Жениха́ добро́ту прозря́щи всечестна́я ума́ чистото́ю.

Богоро́диченъ: Умерщвле́на мя́ дре́вле къ животу́, Пречи́стая, па́ки возвела́ еси́ еди́на, Ѵпоста́сную Жи́знь ро́ждшая, Ейже прирази́вшися, разсѣ́деся я́вѣ сме́рть вражде́бная.

Конда́къ, гла́съ 3. Подо́бенъ: Дѣ́ва дне́сь.

Дѣ́ву лю́бящи Богоро́дицу Марíю, соблюла́ еси́ нетлѣ́нно твое́ дѣ́вство, любо́вію же ко Го́споду усе́рдствовавши, пострада́ла еси́ мужему́дренно да́же до сме́рти. Сего́ ра́ди и сугу́бымъ тя́, дѣ́во му́ченице, вѣнце́мъ вѣнча́етъ Христо́съ Бо́гъ.

Сѣда́ленъ, гла́съ 4. Подо́бенъ: Вознесы́йся.

Оде́ждами свѣ́тло укра́шена свяще́нныхъ и чу́дныхъ по́двигъ твои́хъ, я́коже невѣ́ста, дѣ́во Христо́ва, къ нетлѣ́нному Сего́ возшла́ еси́ черто́гу и красоты́ Его́ наслажда́ешися. Но моли́ спасти́ся на́мъ отъ вся́кія ну́жды, любо́вію пою́щимъ тя́.

Сла́ва, и ны́нѣ, пра́здника.

Пѣ́снь 4.

Ирмо́съ: Услы́шахъ, Го́споди, смотре́нія Твоего́ та́инство, разумѣ́хъ дѣла́ Твоя́ и просла́вихъ Твое́ Божество́.

Блаже́нную стра́сть Твою́ му́ченица богому́драя изобража́ющи, претерпѣва́етъ повѣ́шеніе и я́звъ болѣ́зни, Всеси́льне.

Ка́плями крове́й твои́хъ о́гнь угасе́ су́етства, потопле́ни же бы́ша пото́цы многобо́жія, всеблаже́нная!

Зауше́ніемъ лани́тъ твои́хъ ли́ца де́моновъ, му́ченице, зауши́ла еси́, сокруше́ніе же лица́ твоего́, я́ко пра́хъ, пре́лести истни́.

Тѣ́ло ураня́ющіи твое́, ревнова́вшей житію́ безпло́тну, па́дше, уморе́ни бы́ша безпло́тныхъ боже́ственными манове́ніи.

Богоро́диченъ: Страсте́й мои́хъ смуще́ніе, ко́рмчію ро́ждшая Го́спода, и бу́рю утиши́ мои́хъ прегрѣше́ній, Богоневѣ́стная.

Пѣ́снь 5.

Ирмо́съ: Вску́ю мя́ отри́нулъ еси́ отъ лица́ Твоего́, Свѣ́те незаходи́мый, и покры́ла мя́ е́сть чужда́я тма́ окая́ннаго? Но обрати́ мя, и къ свѣ́ту за́повѣдей Твои́хъ пути́ моя́ напра́ви, молю́ся.

Добро́тами услажда́ема, добротвори́теля Іису́са красото́ю, въ благово́ніе мѵ́ра Того́ востекла́ еси́ страда́ньми, опаля́ема жела́ніемъ, разжига́ема любо́вію Того́, Глике́ріе, свѣ́тлостію.

Отъ исто́чникъ спасе́нія поче́ршпи присноживо́тно исцѣле́ніе, распали́лася еси́ жа́ждею муче́нія и, ускори́вши, потекла́ еси́, и, пи́вши, ста́ла еси́, упоко́ившися жела́ніемъ любве́ кра́йнія, богоневѣ́сто.

Небе́сною пи́щею тя́, му́ченице, въ темни́цѣ пита́ютъ а́нгели: пи́щи бо ми́ра и живы́хъ жи́зни возжела́ла еси́, е́йже предста́ вои́стинну въ ря́снахъ, укра́шена я́звами твоего́ страда́нія.

Богоро́диченъ: Ма́тернее дерзнове́ніе, е́же къ Сы́ну Твоему́, иму́щи, Всечи́стая, сро́днаго промышле́нія, е́же о на́съ, не пре́зри, мо́лимся, я́ко Тебе́ и еди́ну христіа́не ко Влады́цѣ очище́ніе ми́лостивно предлага́емъ.

Пѣ́снь 6.

Ирмо́съ: Очи́сти мя́, Спа́се, мно́га бо беззако́нія моя́, и изъ глубины́ зо́лъ возведи́, молю́ся, къ Тебѣ́ бо возопи́хъ, и услы́ши мя́, Бо́же спасе́нія моего́.

Яко со́лнце, отъ за́падъ му́ченица возсія́вши, просвѣща́етъ вѣ́рныхъ сердца́ благода́тію и попаля́етъ полки́ мра́чныхъ бѣсо́въ заря́ми страда́нія.

Кре́стными заря́ми освѣща́ема, неразу́мія тмы́ отбѣжа́ла еси́, сердца́ же вѣ́рою вопію́щихъ, Глике́ріе страстоте́рпице, просвѣти́ла еси́.

Ко́жныхъ ри́зъ тлѣ́нія совлече́ся му́ченица сла́вная, копіе́мъ убіе́на въ лице́ и главу́ суровство́мъ му́чащаго, Тебѣ́, Христе́, даю́щему крѣ́пость, пою́щи благода́рно.

Богоро́диченъ: Но́во нося́щи Отроча́, пре́жде вѣ́къ Бо́га, Всенепоро́чная, изъ Тебе́ вопло́щшася, не преста́й моля́щи спасти́ пою́щія Тя́.

Конда́къ и и́косъ пра́здника.

Пѣ́снь 7.

Ирмо́съ: Отъ Іуде́и доше́дше, о́троцы, въ Вавило́нѣ иногда́, вѣ́рою Тро́ическою пла́мень пе́щный попра́ша, пою́ще: отце́въ Бо́же, благослове́нъ еси́.

Пучи́ну невре́дно преплыла́ еси́ страда́нія и волну́ болѣ́зней премину́ла еси́ небу́рно, во приста́нища дости́гла еси́ ти́хая, боже́ственными прохлажде́ньми благопреплы́вши, пою́щи: оте́цъ на́шихъ Бо́же, благослове́нъ еси́.

Па́влова гоне́нія, богому́драя, изобража́ющи повелѣ́ніемъ мучи́тельскимъ, отъ гра́да во гра́дъ прихо́диши ча́сто, подвиза́ющися проти́ву нача́лъ тмы́, и вы́шній гра́дъ дости́гла еси́, пою́щи: оте́цъ на́шихъ Бо́же, благослове́нъ еси́.

Въ пе́щь вве́ржена бы́вши, не опали́ся, и́бо на ро́су преложи́ о́гнь ю́ноши три́ въ Вавило́нѣ Спасы́й, пресла́вная.

Богоро́диченъ: Яко одушевле́нъ ковче́гъ, прія́ла еси́ Сло́во Безнача́льное, я́ко свя́тъ Хра́мъ, Зижди́теля вмѣсти́ла еси́, я́ко престо́лъ огнезра́ченъ, но́сиши Влады́ку, Богома́ти, всея́ тва́ри.

Пѣ́снь 8.

Ирмо́съ: Седмери́цею пе́щь халде́йскій мучи́тель богочести́вымъ неи́стовно разжже́, си́лою же лу́чшею спасе́ны сія́ ви́дѣвъ, Творцу́ и Изба́вителю вопія́ше: о́троцы, благослови́те, свяще́нницы, воспо́йте, лю́діе, превозноси́те во вся́ вѣ́ки.

Насади́теля тва́ри ты́ многопло́денъ виногра́дъ яви́лася еси́, Глике́ріе, вои́стинну, нося́щи страда́нія гро́здія, изгнете́ны, му́ченице, точи́лы му́ченическими, и умиле́нія вино́ пролива́ющи, вѣ́рою Христу́ пою́щимъ: о́троцы, благослови́те, свяще́нницы, воспо́йте, лю́діе, превозноси́те во вся́ вѣ́ки.

По́стланымъ, сла́вная, о́стрымъ ка́меніемъ терпѣ́ла еси́ порѣва́нія неукло́ннымъ умо́мъ, уловля́еши же блюсти́теля, и, связа́вши боже́ственными плени́цами и́дольскія разрѣ́шшася льсти́, и му́ченика приво́диши сло́вомъ пра́ведно пѣ́ти: о́троцы, благослови́те, свяще́нницы, воспо́йте, лю́діе, превозноси́те во вся́ вѣ́ки.

Якоже Даніи́лъ загради́ звѣре́й уста́ боже́ственными пѣ́сньми, моли́твъ твои́хъ, всечестна́я, о́гнь угаси́ла еси́, беззако́ннующихъ обличи́вши, тѣ́ломъ ме́ртвеннымъ безсме́ртіе стяжа́ла еси́, а́нгеломъ уподо́бившися, съ ни́миже пое́ши: о́троцы, благослови́те, свяще́нницы, воспо́йте, лю́діе, превозноси́те во вся́ вѣ́ки.

Богоро́диченъ: Глаго́ломъ Твои́мъ послѣ́дующе, ублажа́емъ, Пречи́стая, Тя́, Блаже́нную, пло́тію ро́ждшую вои́стинну Блаже́ннаго, во свѣ́тѣ живу́щаго незаходи́мѣмъ, и Свѣтода́теля, и Жизнода́вца, и Влады́ку. Его́же о́троцы, благослови́те, свяще́нницы, воспо́йте, лю́діе, превозноси́те во вся́ вѣ́ки.

Пѣ́снь 9.

Ирмо́съ: Устраши́ся вся́къ слу́хъ неизрече́нна Бо́жія снизхожде́нія, я́ко Вы́шній во́лею сни́де да́же и до пло́ти, отъ дѣви́ческаго чре́ва бы́въ Человѣ́къ. Тѣ́мже Пречи́стую Богоро́дицу, вѣ́рніи, велича́емъ.

Умъ тво́й, зрѣ́ніемъ къ Бо́гу услажда́емь, соблюда́ла еси́ себе́ безболѣ́зненно, твое́ многострада́льное тѣ́ло, дѣ́во, егда́ предъ суди́щемъ уязвля́ема мучи́телей, страда́ла еси́ тве́рдо, побѣжда́ющи безтѣле́сныя враги́ съ тѣ́ломъ.

Обручи́лася еси́, нетлѣ́нная дѣ́во, Рожде́нному отъ Дѣ́вы Богоотрокови́цы и принесла́ еси́ я́ко да́ръ Сему́, му́ченице, страда́ніе многови́дными ра́нами, непра́ведную сме́рть. Тѣ́мже черто́га тя́ небе́снаго вои́стинну сподо́би.

Иму́щи крилѣ́ зла́ты, сія́ющія заре́ю Ду́ха, му́ченице, возлетѣ́ла еси́, цвѣ́ты укра́шена, боже́ственными свѣтлостьми́, и въ са́мыхъ небе́сныхъ боже́ственныхъ жили́щахъ вои́стинну почи́ла еси́, наслажда́ющися я́сно обоже́нія.

Лику́еши ны́нѣ ра́достно со а́нгелы, предъ лице́мъ Зижди́теля твоего́, уясня́ема заря́ми, отту́ду истека́ющими всегда́, но помина́й на́съ, вѣ́рою соверша́ющихъ твою́ па́мять сла́вную, Глике́ріе, страстоте́рпице прехва́льная.

Богоро́диченъ: Селе́ніе была́ еси́ Бо́жіе, Невмѣсти́маго въ ложесна́ вмѣ́щши, пре́жде Безпло́тнаго, воплоще́нна ужа́сно ро́ждши. Его́же моли́, Чи́стая, согрѣше́ній проще́ніе всѣ́мъ дарова́ти, вѣ́рою Тя́ всегда́ велича́ющимъ.

Источникъ: Минíа, мѣ́сяцъ Ма́ій. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 85 – 88 об.

/ Къ оглавленію раздѣла /


Наверхъ / Къ титульной страницѣ

0