Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - суббота, 29 апрѣля 2017 г. Сейчасъ на порталѣ посѣтителей - 17.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Ма́ія въ 13-й де́нь.
Преподобному́ченика Мака́рія, архимандри́та Ка́невскаго, Овручскаго.

НА ВЕЛИЦѢЙ ВЕЧЕРНИ,
[Блаже́нъ му́жъ.., 1-й антифо́нъ.] На Го́споди, воззва́хъ: стихи́ры, гла́съ 1. Подо́бенъ: Небе́сныхъ чино́въ.

Воспои́мъ, лю́діе,* честно́е житіе́ отца́ на́шего Мака́рія,* гра́да Овруча свято́е прозябе́ніе,* благоче́стія рачи́теля,* нече́стія же обузда́теля,* и тому́ ны́нѣ помо́лимся:* Христа́ моли́, Христу́ помоли́ся, преподобному́чениче,* дарова́ти Це́ркви единомы́сліе,* ми́ръ и ве́лію ми́лость.

Яви́лся еси́, о́тче на́шъ Мака́ріе,* разсужде́нія пра́вило изря́днѣйшее,* егда́, Мака́рію Вели́кому подо́бяся,* вмѣни́лъ еси́ воздержа́ніе въ пи́щу сла́достную,* нищету́ же, я́коже и то́й, въ бога́тство вмѣни́въ* и во́льное уничиже́ніе во благосла́віе,* уго́денъ Бо́гу бы́лъ еси́.* Сего́ ра́ди вопіе́мъ ти́:* Христа́ моли́, Христу́ помоли́ся, преподобному́чениче,* дарова́ти Це́ркви единомы́сліе,* ми́ръ и ве́лію ми́лость.

Всю́ отложи́въ на небеса́ наде́жду,* вся́ кра́сная мíра сего́ въ уме́ты вмѣни́лъ еси́,* Всевы́шняго же Бо́га Го́спода благоволе́нія ища́,* святу́ю во́лю благоговѣ́йно исполня́лъ еси́.* Сего́ ра́ди еди́нъ отъ ли́ка святы́хъ Бо́жіихъ яви́лся еси́.* Тѣ́мже вопіе́мъ ти́:* Христа́ моли́, Христу́ помоли́ся, преподобному́чениче,* дарова́ти Це́ркви единомы́сліе,* ми́ръ и ве́лію ми́лость.

Истинному благоче́стію обучи́тися жела́я,* неоскверне́на себе́ отъ мíра грѣхо́внаго сохрани́ти тща́лся еси́,* убо́гихъ же, вдо́въ и сиро́тъ помо́щникъ и засту́пникъ бы́ти.* Сего́ ра́ди ра́бъ Бо́жій благíй и вѣ́рный бы́лъ еси́.* Тѣ́мже вопіе́мъ ти́:* Христа́ моли́, Христу́ помоли́ся, преподобному́чениче,* дарова́ти Це́ркви единомы́сліе,* ми́ръ и ве́лію ми́лость.

Ины стихи́ры, гла́съ 2. Подо́бенъ: Егда́ отъ дре́ва.

Егда́ узрѣ́лъ еси́, о́тче Мака́ріе,* въ земли́ твое́й отъ уніа́товъ* поврежда́ему святу́ю вѣ́ру Правосла́вную,* противоста́лъ еси и́мъ* и опло́тъ Правосла́вія яви́лся еси́.* Сего́ ра́ди изгна́нія мно́га отъ уніа́товъ претерпѣ́лъ еси́.* Тѣ́мже тя́ почита́емъ и ублажа́емъ. [Два́жды.]

Егда́ ско́рби мно́ги отъ еретико́въ прія́лъ еси́,* тогда́ святы́хъ апо́столъ глаго́лы послу́шая,* я́ко Бо́гу па́че, не́же лю́демъ,* повинова́тися подоба́етъ,* непрекло́нно въ послуша́ніи Це́ркви пребы́лъ еси́* и па́ству ты́ сему́ послуша́нію науча́лъ еси́.* Тѣ́мже тя́ почита́емъ и ублажа́емъ.

Егда́ къ невѣ́рнымъ ага́ряномъ,* уби́ти тя́ и́щущимъ,* со кресто́мъ честны́мъ изше́дъ,* небоя́зненно предъ ни́ми ста́лъ еси́,* тогда́, мече́мъ отъ ни́хъ усѣче́нъ бы́въ,* тече́ніе жи́зни твоея́ пра́ведно сконча́лъ еси́.* Тѣ́мже тя́ почита́емъ и ублажа́емъ.

Сла́ва, гла́съ и подо́бенъ то́йже:

Посто́мъ и послуша́ніемъ, слеза́ми и моли́твою по́хоть пло́ти, по́хоть оче́съ и го́рдость жите́йскую, о́тче Мака́ріе, изъ ко́рене посѣка́вый, кончи́ною му́ченическою за Христа́ по́двиги твоя́ запечатлѣ́лъ еси́. Тѣ́мже и па́мять твою́ любо́вію почита́емъ.

И ны́нѣ, пра́здника.
Вхо́дъ. Проки́менъ дне́. И чте́нія три́ преподо́бническая.

Прему́дрости Соломо́ни чте́ніе.

Пра́ведныхъ ду́ши въ руцѣ́ Бо́жіей, и не прико́снется и́хъ му́ка. Непщева́ни бы́ша во очесѣ́хъ безу́мныхъ умре́ти, и вмѣни́ся озлобле́ніе исхо́дъ и́хъ, и е́же отъ на́съ ше́ствіе — сокруше́ніе, они́ же су́ть въ ми́рѣ. Ибо предъ лице́мъ человѣ́ческимъ, а́ще и му́ку пріи́мутъ, упова́ніе и́хъ безсме́ртія испо́лнено. И вма́лѣ нака́зани бы́вше, вели́кими благодѣ́тельствовани бу́дутъ, я́ко Бо́гъ искуси́ я́ и обрѣ́те и́хъ досто́йны Себѣ́. Я́ко зла́то въ горни́лѣ, искуси́ и́хъ и, я́ко всепло́діе же́ртвенное, прія́тъ я́. И во вре́мя посѣще́нія и́хъ, возсія́ютъ, и я́ко и́скры по сте́блію, потеку́тъ. Су́дятъ язы́комъ и облада́ютъ людьми́, и воцари́тся Госпо́дь въ ни́хъ во вѣ́ки. Надѣ́ющіися На́нь разумѣ́ютъ и́стину и вѣ́рніи въ любви́ пребу́дутъ Ему́, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.

Прему́дрости Соломо́ни чте́ніе.

Пра́ведницы во вѣ́ки живу́тъ, и въ Го́сподѣ мзда́ и́хъ, и попече́ніе и́хъ у Вы́шняго. Сего́ ра́ди пріи́мутъ ца́рствіе благолѣ́пія и вѣне́цъ добро́ты отъ руки́ Госпо́дни, зане́ десни́цею покры́етъ я́ и мы́шцею защити́тъ и́хъ. Пріи́метъ всеору́жіе — рве́ніе свое́ и вооружи́тъ тва́рь въ ме́сть враго́мъ. Облече́тся въ броня́ пра́вды и возложи́тъ шле́мъ — су́дъ нелицемѣ́ренъ. Пріи́метъ щи́тъ непобѣди́мый — преподо́біе, поостри́тъ же напра́сный гнѣ́въ — во ору́жіе, спобо́ретъ же съ ни́мъ мíръ на безу́мныя. По́йдутъ праволу́чныя стрѣ́лы мо́лніины и, я́ко отъ благокру́гла лу́ка облако́въ, на намѣ́реніе полетя́тъ, и отъ каменоме́тныя я́рости испо́лнь паду́тъ гра́ды. Вознегоду́етъ на ни́хъ вода́ морска́я, рѣ́ки же потопя́тъ я́ на́гло. Сопроти́въ ста́нетъ и́мъ ду́хъ си́лы и, я́ко ви́хоръ, развѣ́етъ и́хъ, и опустоши́тъ всю́ зе́млю беззако́ніе, и злодѣ́йство преврати́тъ престо́лы си́льныхъ. Слы́шите у́бо, ца́ріе, и разумѣ́йте, навы́кните, судіи́ конце́въ земли́. Внуши́те держа́щіи мно́жества и гордя́щіися о наро́дѣхъ язы́ковъ, я́ко дана́ е́сть отъ Го́спода держа́ва ва́мъ и си́ла отъ Вы́шняго.

Прему́дрости Соломо́ни чте́ніе.

Пра́ведникъ, а́ще пости́гнетъ сконча́тися, въ поко́и бу́детъ. Ста́рость бо честна́ не многолѣ́тна, ниже́ въ числѣ́ лѣ́тъ исчита́ется. Сѣди́на же е́сть му́дрость человѣ́комъ, и во́зрастъ ста́рости — житіе́ нескве́рное. Благоуго́денъ Бо́гови бы́въ, возлю́бленъ бы́сть, и живы́й посредѣ́ грѣ́шникъ, преста́вленъ бы́сть. Восхище́нъ бы́сть, да не зло́ба измѣни́тъ ра́зума его́ или́ ле́сть прельсти́тъ ду́шу его́. Раче́ніе бо зло́бы помрача́етъ до́брая и паре́ніе по́хоти, премѣня́етъ у́мъ незло́бивъ. Сконча́вся вма́лѣ, испо́лни лѣ́та до́лга, уго́дна бо бѣ́ Го́сподеви душа́ его́, сего́ ра́ди потща́ся отъ среды́ лука́вствія. Лю́діе же ви́дѣвше и не разумѣ́вше, ниже́ поло́жше въ помышле́ніи таково́е, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.

На литíи стихи́ра хра́ма и преподо́бнаго, гла́съ 8:

До́мъ роди́телей со благодаре́ніемъ оста́вивый, во оби́тель по́стническую гра́да Овруча всели́лся еси́, проти́ву же ко́знемъ діа́вола подвиза́лся еси́ и во́лю свою́ за враты́ сея́ оби́тели оста́вити себе́ понужда́лъ еси́, храни́тель же тве́рдый свята́го Правосла́вія бы́въ, изгна́нія мно́гащи отъ еретико́въ поне́слъ еси́.

Блаже́нне богому́дре Мака́ріе, чи́стая твоя́ душа́ правовѣ́рнымъ смы́сломъ сія́ющи, облиста́ добродѣ́телей свѣ́тлостію, озаря́етъ вѣ́рныхъ исполне́ніе, бѣсо́въ тму́ отгоня́ющи, тѣ́мже, я́ко прича́стника благода́ти невече́рнія, тя́ благоче́стно вси́ почита́емъ, досточу́дне.

Кончи́ну же житія́ до́блественнѣ отъ невѣ́рныхъ ага́рянъ пріе́мъ, пресла́внаго чудодѣ́йства отъ Бо́га сподо́бился еси́. Но моли́ за ны́, святу́ю па́мять твою́ соверша́ющія, ми́ръ на́мъ, па́дшимъ, пода́ти, житіе́ же на́ше испра́вити и черто́говъ небе́сныхъ сподо́бити на́съ, по вели́цѣй ми́лости Еди́наго Человѣколю́бца.

Имѣ́я я́ко му́ченикъ непобѣди́мъ ко Влады́цѣ Христу́ дерзнове́ніе благопрія́тно, я́ко зако́ненъ страда́лецъ благопода́тно слы́шаніе Онаго, мольба́ми не преста́й, досточу́дне, па́мять творя́ о вѣ́рно пою́щихъ тя́, напа́стей си́хъ изыма́я и обстоя́нія.

Ковче́гъ свяще́нія мо́щей твои́хъ ра́ка яви́ся, цвѣ́тъ исцѣле́нія испуща́ющи, и, я́ко рѣка́, нело́жныхъ дарова́ній испо́лнена, врачевство́ безме́здно, изъ нея́же почерпа́емъ здра́віе присноживо́тно, приходя́щіи вѣ́рно, му́чениче сла́вне, въ тебѣ́ вои́стинну чу́днаго Бо́га сла́вяще.

Сла́ва, гла́съ то́йже:

Пріиди́те, свяще́нныхъ собо́ри и правосла́вныхъ исполне́ніе, пріиди́те, мона́ховъ совокупле́ніе, и вни́дите, ра́дующеся, въ це́рковь Бо́га на́шего, чудотво́рную ра́ку преподо́бнаго отца́ Мака́рія обы́мемъ ра́достно, я́ко чуде́съ сокро́вище неотъе́млемо, и, честны́я его́ мо́щи любо́вію лобыза́юще, разли́чныхъ неду́гъ свободи́мся и душа́мъ спасе́ніе пріе́млемъ, вопію́ще ему́: о всеблаже́нне о́тче Мака́ріе, моли́ Преблага́го Бо́га на́шего дарова́ти странѣ́ на́шей на враги́ побѣ́ду и спасти́ ду́ши на́ша.

И ны́нѣ, богоро́диченъ, гла́съ то́йже:

На Него́же херуви́мы зрѣ́ти не мо́гутъ, Сего́ ма́терски на объя́тіихъ носи́ла еси́, Чи́стая; тѣ́мъ Тя́, я́ко херуви́мъ Сла́внѣйшую, во гла́сѣхъ пѣ́ній велича́емъ и, припа́дающе, зове́мъ: моли́ Сы́на Твоего́ и Бо́га на́шего за непотре́бныя рабы́ Твоя́.

На стихо́внѣ стихи́ры, гла́съ 5. Подо́бенъ: Ра́дуйся.

Ра́дуйся, уго́дниче Христо́въ Мака́ріе,* у́мъ влады́ку на стра́сти па́губныя поста́вивый,* во е́же пло́ть неудобопокори́вую ду́ху порабо́тити.* Тѣ́мъ и мы́ се́рдцемъ смире́ннымъ,* къ тебѣ́ припа́дающе, про́симъ* ко одолѣва́нію страсте́й твоея́ по́мощи* и въ ско́рбехъ благоду́шія.

Сти́хъ: Пра́ведникъ, я́ко фи́никсъ, процвѣте́тъ,* я́ко ке́дръ, и́же въ Лива́нѣ, умно́жится.

Ра́дуйся, уго́дниче Христо́въ Мака́ріе,* ду́шу бо твою́ отъ грѣхо́вныя непра́вды очи́стивъ,* увѣща́лъ еси́ лю́ди преоби́дѣти сла́дкая,* въ любви́ же нелицемѣ́рнѣй съ боя́щимися Бо́га жи́ти.* Сего́ ра́ди мно́гія отъ прегрѣше́ній отврати́въ,* къ житію́ благоче́стному наста́вилъ еси́.

Сти́хъ: Насажде́ни въ дому́ Госпо́днемъ,* во дво́рѣхъ Бо́га на́шего процвѣту́тъ.

Ра́дуйся, уго́дниче Христо́въ Мака́ріе,* о́бразъ пра́вѣдныя жи́зни въ себѣ́ яви́вый,* обхожде́ніе бо а́нгельское и пла́чъ радостотво́рный,* кро́тость боголюбе́зную,* любо́вь же ми́лующую моли́твою стяжа́лъ еси́.* Тѣ́мъ къ тебѣ́, я́ко ди́вному уго́днику Бо́жію, припа́дающе, про́симъ:* моли́ся Го́сподеви* ми́ръ мíру дарова́ти* и душа́мъ на́шимъ ве́лію ми́лость.

Сла́ва, гла́съ 7:

Христа́ всели́въ въ ду́шу твою́, о́тче Мака́ріе, Исто́чника жи́зни, нра́вы благи́ми процвѣ́лъ еси́. Тѣ́мъ моли́ Его́ благосты́ню ниспосла́ти на́мъ по́мощь во е́же стра́сти мно́гія, отъ ю́ности на́съ борю́щія, одолѣ́ти и Го́сподеви рабо́тати.

И ны́нѣ, богоро́диченъ, или́ пра́здника.

Тропа́рь, гла́съ 4:

Христу́, на́съ ра́ди съ небе́съ соше́дшему, послѣ́довалъ еси́ въ по́двизѣхъ твои́хъ, Мака́ріе, о́тче на́шъ. Его́же моли́ о на́съ, ублажа́ющихъ тя́, проще́ніе прегрѣше́ній дарова́ти на́мъ, любо́вію же и смире́ніемъ сердца́ на́ша озари́ти и спасти́ ду́ши на́ша.

Инъ тропа́рь, гла́съ то́йже:

Боже́ственнымъ жела́ніемъ ве́сь са́мъ себе́ отъ ю́наго во́зраста Го́сподеви возложи́въ, яви́лся еси́ свѣти́льникъ свѣ́тлый гра́ду твоему́, поуча́я всѣ́хъ и́стиннѣй вѣ́рѣ и житію́ богоуго́дному, священному́чениче Мака́ріе, Овручская похвало́. Сего́ ра́ди, я́ко а́гнецъ непоро́чный, гони́мый отъ распрелюби́выхъ враго́въ, возше́лъ еси́ во оби́тель Ка́невскую, идѣ́же, я́ко па́стырь до́брый, ду́шу твою́ положи́лъ еси́ за о́вцы твоя́. И ны́нѣ ко всечестнѣ́й ра́цѣ многоцѣле́бныхъ моще́й твои́хъ мы́, грѣ́шніи, со умиле́ніемъ притека́юще, да́ръ исцѣле́нія пріе́млемъ, многострада́льне: ты́ бо при́сно источа́еши боля́щимъ здра́віе, печа́льнымъ утѣше́ніе и всѣ́мъ, чту́щимъ тя́, вся́кое исполня́еши тре́бованіе, моля́ся Христу́ Бо́гу спасти́ся душа́мъ на́шимъ.

Инъ тропа́рь, гла́съ 8:

Ко всечестнѣ́й ра́цѣ многоцѣле́бныхъ моще́й твои́хъ, преподобному́чениче Мака́ріе, мы́, грѣ́шніи, притека́юще, да́ръ исцѣле́нія пріе́млемъ: ты́ бо при́сно источа́еши боля́щимъ здра́віе, печа́льнымъ утѣше́ніе и всѣ́хъ, чту́щихъ тя́, вся́кое исполня́еши тре́бованіе, моля́щеся Христу́ Бо́гу спасти́ся душа́мъ на́шимъ.


НА УТРЕНИ,
На Бо́гъ Госпо́дь: Тропа́рь пра́здника, два́жды. Сла́ва, свята́го. И ны́нѣ, пра́здника.

На 1-мъ стихословіи сѣдаленъ, гласъ 7:

Па́стырскому худо́жеству незло́біемъ обучи́вся, оте́чески па́ству твою́ науча́лъ еси́ стра́ху Бо́жію и е́же позна́ти рече́нное: да не хва́лится прему́дрый прему́дростію свое́ю, и да не хва́лится си́льный си́лою свое́ю, и да не хва́лится бога́тый бога́тствомъ свои́мъ, но о се́мъ да хва́лится хваля́йся, е́же разумѣ́ти и зна́ти Го́спода и твори́ти су́дъ и пра́вду посредѣ́ земли́. [Два́жды.]

Сла́ва, и ны́нѣ, богоро́диченъ:

Но́сиши вся́ Нося́щаго и дои́ши всѣ́мъ пи́щу Даю́щаго: ве́ліе и стра́шное, е́же па́че ума́, Твое́ та́инство, ковче́же честны́я святы́ни, Дѣ́во Богоро́дице, тѣ́мъ Тя́ вѣ́рно ублажа́емъ.

По 2-мъ стихосло́віи сѣда́ленъ, гла́съ 4:

Сокро́вища вѣ́ка сего́ со тща́ніемъ оста́вилъ еси́, небе́сная сла́достныя свѣ́тлости ища́, о́тче Мака́ріе, тѣ́мже и слы́шиши отъ Го́спода: о ма́лѣ бы́лъ еси́ вѣ́ренъ и надъ мно́гими тя́ поста́влю, вни́ди въ ра́дость Го́спода твоего́. [Два́жды.]

Сла́ва, и ны́нѣ, богоро́диченъ:

Чи́ни а́нгельстіи, Пречи́стая, ны́нѣ немо́лчно Твое́ Рождество́ почита́ютъ, въ чину́ бо стоя́тъ, взира́юще, весе́лія Его́ насыща́ющеся, и Тя́, Богоро́дицу, непреста́нно велича́ютъ.

По поліеле́и сѣда́ленъ, гла́съ 6:

Ско́рби, изгна́нія и напа́сти терпѣли́вно поне́слъ еси́, о́тче на́шъ Мака́ріе, крестоноше́нія за́повѣдь соблюда́я; и ны́нѣ со безпло́тными въ весе́ліи сра́дуяся, моли́ся о на́съ, честну́ю и свяще́нную па́мять твою́ соверша́ющихъ. [Два́жды.]

Сла́ва, и ны́нѣ, пра́здника.

[Степе́нна, 1-й антифо́нъ 4-го гла́са. Проки́менъ, гласъ 4: Честна́ предъ Го́сподемъ* сме́рть преподо́бныхъ Его́. Сти́хъ: Что́ возда́мъ Го́сподеви о всѣ́хъ, я́же воздаде́ ми́? Ева́нгеліе отъ Матѳе́я, зача́ло 43.]

По 50-мъ псалмѣ́ стихи́ра, гла́съ 6:

Просія́ дне́сь па́мять твоя́, Мака́ріе многострада́льне, созыва́ющи на́съ, празднолю́бцевъ, ко благохвале́нію и сла́вѣ Христа́ Бо́га на́шего, тѣ́мже и притека́юще къ ра́цѣ моще́й твои́хъ, исцѣле́ній дарова́нія пріе́млемъ и вѣнча́вша тя́ Спа́са Христа́ воспѣва́емъ во вѣ́ки, непреста́нно сла́вяще.

Кано́нъ пра́здника и преподобному́ченика Мака́рія, гла́съ 5, его́же краегране́сіе: Мака́рія уго́дника па́мять честну́ю пою́.
Пѣ́снь 1.

Ирмо́съ: Спаси́телю Бо́гу, въ мо́ри лю́ди немо́крыми нога́ми наста́вльшему и фарао́на со всево́инствомъ пото́пльшему, Тому́ еди́ному пои́мъ, я́ко просла́вися.

Мака́рія честну́ю па́мять ка́ко воспою́, грѣ́шенъ сы́й и устнѣ́ нечи́стыя имы́й? Но помози́ ми сіе́ соверши́ти, Христе́, презира́я моя́ прегрѣше́нія и подава́я сло́во усто́мъ мои́мъ.

Ада́мова зла́го нра́ва, непослуша́ніемъ кля́тву мíрови наве́дшаго, бѣ́гая, Мака́ріе о́тче святы́й, отъ мла́да во́зраста послуша́нію обучи́тися тща́лся еси́.

Ко хра́му Бо́жію, о́трокъ сы́й, приходя́, моли́твою же и благода́тію церко́вною освяща́яся, въ жили́ще Го́споду себе́ очища́лъ еси́.

Богоро́диченъ: Се́ вре́мя наста́ моего́ уны́нія, воста́ни, Пречи́стая Влады́чице, и пода́ждь ми́ ру́ку, Ты́ бо мíръ Боже́ственнаго весе́лія испо́лнила еси́.

Инъ кано́нъ свята́го, гла́съ 4.
Пѣ́снь 1.

Ирмо́съ: Мо́ря чермну́ю пучи́ну невла́жными стопа́ми дре́вній пѣшеше́ствовавъ Изра́иль, крестообра́зными Моисе́овыма рука́ма Амали́кову си́лу въ пусты́ни побѣди́лъ е́сть.

Свѣ́тъ отъ Свѣ́та, Христе́ Бо́же, отъ Отца́ пре́жде вѣ́къ рожде́йся и искони́ Сы́й со Отце́мъ и Ду́хомъ, мра́къ души́ моея́ отгна́въ, озари́ у́мъ мо́й, молю́ся, я́ко да возмогу́ пѣ́ти Твоего́ уго́дника, Мака́рія свяще́ннаго.

Бога́тыми сія́ніи Ду́ха облія́й свѣтоно́сный се́й и честны́й пра́здникъ тво́й чту́щія, страсте́й мглы́ изба́ви и напа́стей, преподобному́чениче Мака́ріе.

Му́чениковъ свѣ́тло обогати́лъ еси́ благосла́віе Боже́ственное, па́стырскими укра́шся добро́тами и обагри́въ кро́вію свяще́ннаго страда́нія твоего́ одѣя́ніе, богоблаже́нне.

Разори́въ вра́жія многоплете́нныя ко́зни у́зами страда́ній твои́хъ, недѣ́йственна сего́ пове́рглъ еси́ на зе́млю, Мака́ріе, и нога́ма твои́ма попра́лъ еси́.

Испо́лненъ сы́й благода́ти, испо́лненъ и ра́зума Бо́жія, имѣ́лъ еси́ въ тебѣ́ живу́щую Ду́ха Боже́ственную си́лу, богому́дре, ея́же ра́ди, я́ко со́лнце, просія́лъ еси́, просвѣща́я вѣ́рныя.

Богоро́диченъ: Естество́мъ Содѣ́теля родила́ еси́, на́съ обожи́вшаго па́че ума́ соедине́ніемъ и́стиннымъ, Богоро́дице Пресвята́я, Его́же прилѣ́жно моли́ просвѣти́ти пою́щія Тя́.

Пѣ́снь 3.

Ирмо́съ: Си́лою Креста́ Твоего́, Христе́, утверди́ мое́ помышле́ніе, во е́же пѣ́ти и сла́вити спаси́тельное Твое́ Вознесе́ніе.

Аще не Госпо́дь сози́ждетъ до́мъ, всу́е труди́шася зи́ждущіи. Си́мъ глаго́ломъ псалмопѣ́вца послѣ́дуя, о́тче Мака́ріе, ю́ностное самонадѣ́яніе отлага́я, по́мощи Бо́жія въ дѣ́лѣхъ и по́двизѣхъ взыска́лъ еси́.

Ре́вность духо́вную отъ ю́ности показу́я, еди́ну отъ пе́рвѣйшихъ добродѣ́телей исправля́ти понужда́лъ еси́ себе́, е́же язы́ка обузда́ніемъ осужде́нія и праздносло́вія уклони́тися.

Іису́са, Бо́га, во пло́ти я́вльшагося и въ до́мѣ Іо́сифа древодѣ́ла тружда́вшагося, воспомина́я, и са́мъ, о́тче Мака́ріе, тѣ́ло твое́ труды́ утомля́лъ еси́.

Яко ю́ностныхъ по́хотей побѣди́тель бы́ти жела́я, собла́зновъ мíра прелюбодѣ́йнаго прилѣ́жно уклоня́лся еси́, о́тче Мака́ріе.

Богоро́диченъ: Отъ вся́каго искуше́нія соблюди́ къ Тебѣ́ прибѣга́ющихъ, Богоро́дице, упова́ніе на́ше.

Инъ.

Ирмо́съ: Не му́дростію, и си́лою, и бога́тствомъ хва́лимся, но Тобо́ю, Отчею ѵпоста́сною Му́дростію, Христе́: нѣ́сть бо свя́тъ, па́че Тебе́, Человѣколю́бче.

Крѣ́пость ти́ дае́тъ Христо́съ — Вели́кій Страстополо́жникъ, погуби́ти пре́лесть и посрами́ти врага́, хва́лящася безсту́дно и су́етно свирѣ́пѣющаго.

Просвѣще́нъ измла́да ра́зумъ имѣ́лъ еси́ и да́же до ста́рости и престарѣ́нія, богоно́се, Бо́гу угожда́я, отту́ду сла́ву получи́лъ еси́.

Посѣ́клъ еси́ пре́лести те́рніе мече́мъ духо́внымъ, Христо́вы вѣ́ры пло́дъ неле́стно прине́слъ еси́, всеблаже́нне, стори́чный — болѣ́зни твоя́ Влады́цѣ твоему́.

Твоя́ кра́сныя я́вственно, преподо́бне, имѣ́лъ еси́ но́ги, муче́нія къ стезя́мъ ступа́ющія свѣ́тло и главы́ вра́жія сокруша́ющія, Мака́ріе многострада́льне.

Богоро́диченъ: Изба́ви мя́ отъ вся́каго прило́га сопроти́внаго, Ма́ти Дѣ́во Всечи́стая, и се́рдце мое́ просвѣти́, вѣ́рою Тя́ сла́вящаго, Всенепоро́чная.

Инъ конда́къ, гла́съ 2:

По́стническое и равноа́нгельское житіе́ твое́ страда́льческими уясни́лъ еси́ по́двиги и а́нгеломъ совсе́льникъ, богоблаже́нне, яви́лся еси́, Мака́ріе, съ ни́миже Христу́ Бо́гу моля́ся не преста́й о всѣ́хъ на́съ.

Инъ и́косъ:

По́стниковъ свѣ́тлую добро́ту, Це́ркве Христо́вы утвержде́ніе, ны́нѣ Мака́рія восхва́лимъ: но́вый бо сто́лпъ о́гненъ яви́ся, попаля́я гла́вы ерети́чествующихъ, вѣ́рныхъ же просвѣща́я ду́ши, въ вѣ́рѣ пра́вѣй въ Боже́ственный гра́дъ вы́шній Іерусали́мъ, я́коже друга́го Изра́иля, вводя́, къ нему́же согла́сно вопіе́мъ: всеблаже́нне о́тче, не забу́ди Христу́ моля́ся непреста́нно о всѣ́хъ на́съ.

Сѣда́ленъ, гла́съ 4:

Мужа́тися и потерпѣ́ти Го́спода, я́коже учи́тъ псало́мникъ, подвиза́яся, терпѣ́ніемъ и вѣ́рою ко́зни бѣсо́вскія побѣжда́лъ еси́, о́тче Мака́ріе, тѣ́мъ и благода́ть отъ Христа́ пріе́мъ, чуде́съ дѣя́нія явля́еши пресла́вно. Сего́ ра́ди вопіе́мъ ти́: моли́ Христа́ Бо́га прегрѣше́ній оставле́ніе дарова́ти пою́щимъ свяще́нную па́мять твою́.

Сла́ва:

По́стнически лука́ваго попра́въ, страда́льчески, му́чениче Христо́въ, просла́вился еси́, претерпѣ́въ му́жески соверше́ннымъ умо́мъ, тѣ́мже причта́лся еси́ лико́мъ му́ченическимъ и вѣ́чнующее ца́рство стяжа́лъ еси́, помяни́ на́съ, соверша́ющихъ вѣ́рою па́мять твою́.

И ны́нѣ, богоро́диченъ:

Попече́ньми жите́йскими и молво́ю многомяте́жною побѣжда́еми и грѣхми́ отягча́еми, къ Тебѣ́, Блага́я Влады́чице, прибѣга́емъ, моля́щеся: страсте́й на́шихъ грѣхо́вныхъ умири́ смуще́ніе и вы́шняго прича́стія сподо́би на́съ, благоче́стно покланя́ющихся всесвято́му Рождеству́ Твоему́.

Пѣ́снь 4.

Ирмо́съ: Услы́шахъ слу́хъ си́лы Креста́, я́ко ра́й отве́рзеся и́мъ, и возопи́хъ: сла́ва си́лѣ Твое́й, Го́споди.

Умноже́ніе печа́лей и молвы́ жите́йскія, съ жи́знію бра́чною соедине́нныя, зря́, о́тче Мака́ріе, житіе́ мона́шеское избра́лъ еси́.

Го́спода Еди́наго зна́ти и па́че Его́ ни ко еди́ному отъ человѣ́къ любо́вію прилѣпля́тися, живо́тъ же сво́й въ Бо́зѣ отъ люде́й сокры́ти иска́лъ еси́, о́тче, мона́шества и́го воспріе́мый.

Отца́ Небе́снаго умоля́я о е́же насу́щныхъ потре́бное дарова́ти тебѣ́, о земнѣ́мъ бога́тствѣ и стяжа́ніи, о́тче, небре́глъ еси́.

Добродѣ́тельми дѣ́вственныя чистоты́, поста́ же и бдѣ́нія по́двиги тѣле́сныя испра́вилъ еси́, о́тче.

Богоро́диченъ: Отъ востаю́щихъ на мя́ напа́стей го́рько, спаси́ мя, Ма́ти Го́спода моего́ Пренепоро́чная.

Инъ.

Ирмо́съ: Вознесе́на Тя́ ви́дѣвши Це́рковь на Крестѣ́, Со́лнце Пра́ведное, ста́ въ чи́нѣ свое́мъ, досто́йно взыва́ющи: сла́ва си́лѣ Твое́й, Го́споди.

Превознесе́ннаго держа́вою нече́стія го́рдаго мучи́теля ко Влады́цѣ боже́ственными воззрѣ́ніи разрази́лъ еси́, взыва́я: сла́ва си́лѣ Твое́й, Го́споди.

Страда́лецъ зако́ненъ, болѣ́зньми по благоче́стіи обложи́вся, яви́лся еси́, пребога́те, мучи́телей суровства́ не ужаса́яся.

Ше́ствія твоя́, Ду́хомъ Боже́ственнымъ иду́ща, запя́ша ше́ствія лука́ваго и пу́ть пра́въ мно́гимъ яви́шася.

Тве́рдымъ умо́мъ беззако́ннующему сопроти́влься, муче́нія вѣне́цъ прія́лъ еси́, му́жески пострада́въ, свяще́нне.

Богоро́диченъ: Отягче́на сно́мъ уны́нія, къ покая́нія у́тру мя́ Твое́ю неусы́пною моли́твою, Влады́чице, воздви́гни, моля́ Сы́на Твоего́, и спаси́ мя, еди́на Спа́са ро́ждшая.

Пѣ́снь 5.

Ирмо́съ: Утренююще, вопіе́мъ Ти́: Го́споди, спаси́ ны, Ты́ бо еси́ Бо́гъ на́шъ, ра́звѣ бо Тебе́, ино́го не зна́емъ.

Ничто́же отъ житія́ потре́бныхъ веще́й иска́ти тща́лся еси́, но сія́ моли́твою со благодаре́ніемъ отъ Бо́га испроша́ти навыка́лъ еси́, всѣ́мъ живо́тъ, и дыха́ніе, и вся́ подаю́щаго.

И бли́жнихъ, научи́ти и́хъ моли́твѣ, проси́вшихъ тя́, сію́ исполня́ти разсуди́тельно наставля́лъ еси́, въ се́рдцы свое́мъ моли́твѣ Госпо́дней — Отче на́шъ — поуча́шеся.

Ко Го́споду, по псало́мнику, ру́цѣ простира́лъ еси́, исповѣ́даяся Ему́ о пра́ведныхъ судѣ́хъ Его́.

Аще въ согрѣше́ніе нѣ́кое впа́сти тебѣ́ ви́дѣлъ еси́, покая́ніе сла́дкое показу́я, не́мощь и вину́ твою́ Го́спода отпусти́ти тебѣ́ серде́чно умоля́лъ еси́.

Богоро́диченъ: Иму́ще Тя́ стѣ́ну необори́му, искуше́ній же и печа́лей избавля́емся, Пречи́стая.

Инъ.

Ирмо́съ: Нечести́віи не у́зрятъ сла́вы Твоея́, Христе́, но мы́ Тя́, Единоро́дне, Оте́ческія сла́вы Сія́ніе Божества́, отъ но́щи у́тренююще, воспѣва́емъ Тя́, Человѣколю́бче.

Му́ченическими вѣнча́ почестьми́ по́стническія твоя́ труды́ и́стинно, преподо́бне Мака́ріе, Подвигополо́жникъ Еди́нъ Бо́гъ на́шъ, на убíйцы укрѣпи́вый тя́.

Нога́ твоя́ ста́ проро́чески, му́чениче, на правотѣ́, непреста́ннымъ мудрова́ніемъ подпина́ющи многоко́зненнаго, стезя́ми муче́нія удобря́емая.

Струя́ми страда́льческими крове́й твои́хъ потопи́лъ еси́ мо́ре безбо́жія, рѣ́ки же исцѣле́нія, Мака́ріе, источи́лъ еси́.

Преподо́бенъ въ преподо́бныхъ показа́лся еси́, сла́вне, и, въ му́ченицѣхъ свѣ́тло чу́дно пострада́въ, бори́теля побѣди́лъ еси́, Мака́ріе чу́дне.

Богоро́диченъ: Заче́нши, родила́ еси́ Бо́га Емману́ила на обновле́ніе человѣ́комъ, Пресвята́я Чи́стая, пло́ть бы́вша, Его́же моли́ при́сно спасти́ ду́ши на́ша.

Пѣ́снь 6.

Ирмо́съ: Обы́де мя́ бе́здна, гро́бъ мнѣ́ ки́тъ бы́сть, а́зъ же возопи́хъ къ Тебѣ́, Человѣколю́бцу, и спасе́ мя десни́ца Твоя́, Го́споди.

Па́стырскаго служе́нія да́ръ отъ Ду́ха Свята́го пріе́мъ, трудолю́бно воздѣ́лывалъ еси́ моли́твою о па́ствѣ твое́й и поуче́ніи оте́ческими.

Апо́столу Па́влу подража́лъ еси́, па́ству твою́ покая́нію и вѣ́рѣ въ Го́спода Іису́са науча́лъ еси́, о́тче Мака́ріе.

Мы́сльми прельсти́тельными лука́ваго врага́ обольсти́ти пасо́мыхъ твои́хъ и́щущаго, сего́ умышле́нія зло́бныя и́мъ раскрыва́лъ еси́.

Яко Па́велъ апо́столъ, не себе́ проповѣ́далъ еси́, но Христа́ Іису́са Го́спода, себе́ же раба́ па́ствы твоея́ помышля́лъ еси́ Іису́са ра́ди.

Богоро́диченъ: Иже нра́вомъ прельще́нъ е́смь, безъ отвѣ́та сы́й, Богоро́дице зову́: вся́ческихъ мя́ изба́ви зо́лъ.

Инъ.

Ирмо́съ: Пожру́ Ти со гла́сомъ хвале́нія, Го́споди, Це́рковь вопіе́тъ Ти́, отъ бѣсо́вскія кро́ве очи́щшися, ра́ди ми́лости отъ ре́бръ Твои́хъ исте́кшею кро́вію.

Источа́я тво́й медото́чный язы́къ уче́нія медото́чная, го́рести безбо́жія вои́стинну изба́ви благопоко́рно тебѣ́ притека́ющія, му́чениче Мака́ріе.

Пото́пы крове́й твои́хъ, му́чениче, му́тныхъ беззако́нія пото́ковъ и рѣ́къ безбо́жія ле́стныя и лука́выя изсуши́ша струи́, исцѣле́ній же вѣ́рныхъ неизчерпа́емая пучи́на яви́шася.

Вы́шшій страсте́й и му́къ бы́въ, пло́ти отсѣче́нія претерпѣ́лъ еси́, сла́вне, Христа́ бо Помо́щника и Содѣ́теля имѣ́лъ еси́ Споспѣ́шника.

Свѣ́томъ благода́ти озаря́емь, страстоте́рпче прему́дре, невозвра́тно ше́ствовалъ еси́ путе́мъ, вводя́щимъ къ вы́шнему Іерусали́му, Святы́й бо Ду́хъ наста́ви тя́, обита́яй въ се́рдцѣ твое́мъ, Мака́ріе.

Богоро́диченъ: Свята́го святы́хъ неизрече́нно родила́ еси́, Пресвята́я Дѣ́во, вѣ́рныя при́сно освяща́ющаго и му́ченическія ли́ки со а́нгелы совокупи́вшаго.

Конда́къ, гла́съ 4:

Нетлѣ́нною красото́ю смире́ннаго житія́ твоего́ Бо́га на земли́ просла́вилъ еси́ и Боже́ственныя вѣ́ры чистоту́ сохраня́ти лю́ди научи́лъ еси́, страда́льческими же по́двиги кончи́ну пріе́мъ, отъ Бо́га просла́вленъ яви́лся еси́, преподобному́чениче Мака́ріе, о́тче на́шъ.

Икосъ:

Сокрове́нную въ Бо́зѣ чистоту́ житія́ твоего́ ка́ко повѣ́дати мо́щно е́сть, но на моли́твы пра́ведника, я́же су́ть моли́твы твоя́, надѣ́ющеся, тѣ́ми ве́лію ми́лость отъ Го́спода низпосла́ти на́мъ про́симъ, преподобному́чениче Мака́ріе, о́тче на́шъ.

Пѣ́снь 7.

Ирмо́съ: Въ пещи́ о́гненнѣй пѣсносло́вцы спасы́й о́троки, благослове́нъ Бо́гъ оте́цъ на́шихъ.

Терпѣ́ніемъ и пожда́ніемъ лю́ди удиви́лъ еси́ и бѣсо́вскія злохи́трости потреби́лъ еси́, благода́тію Бо́жіею.

Ча́шу житія́ Твоего́, Го́споди, пи́ти подвиза́вшагося, Мака́рія преподобному́ченика нетлѣ́ніемъ и чудесы́ просла́вилъ еси́.

Ева́нгельски блаже́нства наслажда́ешися, благоче́стно, Мака́ріе, пожи́въ и напа́сти и изгна́нія отъ еретико́въ поне́слъ еси́.

Богородиченъ: Безъ ума́ себе́ вся́ческими поработи́вша паде́ньми, Богоро́дице, вопію́: мольба́ми Твои́ми пода́ждь ми́ свобо́ду, Всепѣ́тая.

Инъ.

Ирмо́съ: Въ пещи́ авраа́мстіи о́троцы перси́дстѣй, любо́вію благоче́стія па́че, не́жели пла́менемъ, опаля́еми, взыва́ху: благослове́нъ еси́ въ хра́мѣ сла́вы Твоея́, Го́споди.

Съ вы́шними ликостоя́ніи, я́ко му́ченикъ, ра́дуяся, лику́еши, блаже́нне, на небесѣ́хъ и воспѣва́еши, веселя́ся: благослове́нъ еси́ въ хра́мѣ сла́вы Твоея́, Го́споди.

Преукра́шенъ Боже́ственною сла́вою и благода́тію, му́чениче страстоте́рпче, сія́еши свѣтови́дно и просвѣща́еши зову́щія: благослове́нъ еси́ въ хра́мѣ сла́вы Твоея́, Го́споди.

Па́че естества́ просвѣще́ніемъ, Мака́ріе, у́мъ просвѣти́въ тво́й, бу́дущихъ, блаже́нне, зна́ніемъ обогати́лся еси́, Влады́цѣ зовы́й: благослове́нъ еси́, Бо́же оте́цъ на́шихъ.

Благода́ть свы́ше исцѣле́нія пріе́мъ, неду́ги отъе́млеши, му́чениче, и лука́выя отгоня́еши ду́хи, вопія́: благослове́нъ еси́, Бо́же оте́цъ на́шихъ.

Богоро́диченъ: Отъ Дѣ́вы Нетлѣ́нныя па́че естества́ рожда́ется Сло́во, Иже сло́вомъ вся́ содѣва́яй, безслове́сія хотя́ изба́вити во́льное славосло́вящія Того́ сни́тіе.

Пѣ́снь 8.

Ирмо́съ: Изъ Отца́ пре́жде вѣ́къ рожде́ннаго Сы́на и Бо́га, и въ послѣ́дняя лѣ́та воплоще́ннаго отъ Дѣ́вы Ма́тере, свяще́нницы, по́йте, лю́діе, превозноси́те во вся́ вѣ́ки.

Стра́сти Христо́вы, о́тче Мака́ріе, воспомина́я, страда́льческими по́двиги по́стническое житіе́ твое́ уясни́лъ еси́.

Тѣле́сныя му́ки отъ невѣ́рныхъ ага́рянъ прія́ти угото́вавыйся, со кресто́мъ Боже́ственнымъ къ ни́мъ изше́лъ еси́.

Ничто́же предпочита́ти па́че любве́ Христо́вы ева́нгельски научи́вся и жи́знь свою́ за Христа́ положи́лъ еси́.

Умъ тво́й небе́снаго блаже́нства наде́ждою озари́въ и благода́тію въ по́двизѣ утверди́вся, муче́нія пу́ть сконча́лъ еси́.

Богоро́диченъ: Яко ро́ждшая Творца́ и Царя́ вся́ческихъ, Богоро́дице Всенепоро́чная, Чи́стая, Ты́ мя изба́ви вся́каго скве́рнаго согрѣше́нія.

Инъ.

Ирмо́съ: Ру́цѣ распросте́ръ, Даніи́лъ, льво́въ зія́нія въ ро́вѣ затче́; о́гненную же си́лу угаси́ша, добродѣ́телію препоя́савшеся, благоче́стія рачи́тели, о́троцы, взыва́юще: благослови́те, вся́ дѣла́ Госпо́дня, Го́спода.

Омрачи́лъ еси́ все́ вра́жіе неи́стовство, сла́вне, и боре́нія, неотъе́млемою си́лою Хри́ста облече́нъ, и, побѣдоно́сецъ бы́въ, му́чениче Мака́ріе, вопія́лъ еси́: благослови́те, вся́ дѣла́ Госпо́дня, Го́спода.

Чуде́съ твои́хъ мно́жество па́че ума́ дарова́нія, я́же тебѣ́ подаде́ Христо́съ, всѣ́мъ показу́етъ сла́ву и благода́ть исцѣле́нія, я́же па́че сло́ва я́вѣ твою́ благода́ть проповѣ́дуетъ на́мъ, вопію́щимъ: благослови́те, вся́ дѣла́ Госпо́дня, Го́спода.

Неми́лостивно твою́ главу́ вра́гъ сокруши́, но Бо́гъ тя́ въ высоча́йшихъ вѣнце́мъ вѣнча́ побѣди́тельнымъ, вѣне́чниче многострада́льне, сла́во му́чениковъ и всѣ́хъ преподо́бныхъ.

Ра́дуйся, страда́льцевъ и́стино; ра́дуйся, удобре́ніе вѣ́ры и украше́ніе; ра́дуйся, пресвѣ́тлый му́чениковъ свѣтоно́сче, и́же ле́сть разори́вый страда́ніемъ твои́мъ и свѣ́тъ просія́вый мíрови, Мака́ріе преподо́бне и прему́дре.

Богоро́диченъ: Се́ вси́ ро́ди, Отрокови́це, я́коже прорекла́ еси́, Тя́ ублажа́ютъ, Бо́га Блаже́ннаго ро́ждшую, блаже́нныя содѣва́ющаго, и́же повелѣ́ніемъ Его́ послѣ́дующія вѣ́рою и вопію́щія: благослови́те, вся́ дѣла́ Госпо́дня, Го́спода.

Пѣ́снь 9.

Ирмо́съ: Тя́, па́че ума́ и словесе́ Ма́терь Бо́жію, въ лѣ́то Безлѣ́тнаго неизрече́нно ро́ждшую, вѣ́рніи, единому́дренно велича́емъ.

Юдо́ль земну́ю проше́дъ, небе́снаго блаже́нства, о́тче, дости́глъ еси́.

Пѣ́ніе по́двигъ твои́хъ отъ на́съ, недосто́йныхъ, пріими́, Мака́ріе, и грѣхо́вныя нищеты́ на́шея не возгнуша́йся.

О, ка́ко грѣхи́ мно́гими тя́жцѣ обремени́хомся, о, ка́ко тала́нты, отъ Бо́га прія́тыя, окая́ннѣ расточи́хомъ! Но не лиши́ и на́съ, грѣ́шныхъ, твоего́ заступле́нія, Мака́ріе, о́тче на́шъ.

Южскій предѣ́лъ страны́ Ру́сскія, тебѣ́ при́сный, о́тче Мака́ріе, отъ искуше́ній и бѣ́дъ сохрани́.

Богоро́диченъ: Яко Ма́ти Бо́жія, моли́ изъ Тебе́ ро́ждшагося Го́спода Бо́га и Царя́, е́же изба́витися вся́каго преще́нія и лука́ваго обы́чая Твоему́ рабу́, Чи́стая, на Тя́ надѣ́ющемуся изъ чре́ва моея́ ма́тери, Влады́чице.

Инъ.

Ирмо́съ: Ка́мень нерукосѣ́чный отъ несѣко́мыя горы́, Тебе́, Дѣ́во, краеуго́льный отсѣче́ся — Христо́съ, совокупи́вый разстоя́щаяся естества́. Тѣ́мъ, веселя́щеся, Тя́, Богоро́дице, велича́емъ.

Предстоя́ у престо́ла всѣ́хъ Влады́ки, богови́дче Мака́ріе, творя́щимъ честно́е твое́ пра́зднество здра́віе да́руй и гра́ду на́шему изба́витися отъ напа́стей и бѣ́дъ, побѣ́ду странѣ́ на́шей на проти́вныя враги́ испроси́ моли́твами твои́ми.

Моле́ній и пѣ́ній гла́сы услы́ши, богоно́се о́тче Мака́ріе, въ вѣ́рѣ же и любви́ лю́ди утве́рди и оте́чества побори́ враги́, о́тче, вою́ющія на ны́, свы́ше благода́тію покрыва́я хва́лящія тя́.

Пою́ще, мо́лимъ тя́ прилѣ́жно: о Це́ркви помоли́ся, кресто́мъ побѣ́ды дарова́ти, правосла́внѣй вѣ́рѣ крѣ́пость на е́реси враго́въ да́руй моли́твами твои́ми, на́мъ же спасе́ніе и ми́ръ мíру въ твое́й па́мяти, Мака́ріе.

Страну́ на́шу отъ вся́кихъ бѣ́дъ защити́, богозда́нный правосла́вія щи́те, преподобному́чениче Мака́ріе, во благоче́стіи церкве́й Бо́жіихъ благострое́ніе да́ждь и свы́ше небе́сную по́мощь.

Богоро́диченъ: О, Пресвята́я Влады́чице Богоро́дице! Не и́мамы ины́я по́мощи, ра́звѣ Тебе́, моли́ся Сы́ну Твоему́ и Бо́гу на́шему съ преподо́бнымъ Мака́ріемъ, да соблюде́тъ и сохрани́тъ страну́ на́шу неруши́му и да спасе́тъ ны́, Тя́ велича́ющія.

Свѣти́ленъ:

Овруча благо́е воспита́ніе, Мака́рія свята́го восхва́лимъ вси́, я́ко вѣ́ры непоро́чныя исповѣ́дника, я́ко благоче́стія столпа́ и я́ко моли́твенника те́плаго о душа́хъ на́шихъ.

Сла́ва:

Свѣти́ло, на́мъ просія́вшее въ послѣ́днее вре́мя, просвѣти́ ны́, твоя́ пѣвцы́, свя́те преподо́бне Мака́ріе, и моли́ Го́спода за ны́, чту́щія па́мять твою́.

И ны́нѣ, пра́здника.

На хвали́техъ стихи́ры, гла́съ 8:

О, пресла́внаго слы́шанія!* Госпо́дь всѣ́хъ и Ца́рь мíра,* Ему́же со стра́хомъ слу́жатъ а́нгельская во́инства,* ли́ца своя́ закрыва́юща,* на ве́чери ученико́въ Свои́хъ но́зѣ умыва́ше.* Его́же уничиже́нія о́бразу послѣ́дуя, Мака́ріе святы́й,* нача́льства духо́внаго са́номъ облече́нъ,* я́ко послѣ́днѣйша и ме́ньша себе́ имѣ́ти подвиза́яся,* ева́нгельски па́ствѣ свое́й служа́ше.

О, бла́гости Бо́га на́шего!* Ко бли́жнимъ состра́стіе,* а́ще и ма́ло быва́етъ,* а́ще и въ ча́ши студе́ныя воды́ подая́ніе показу́ется,* награ́ды своея́ у Го́спода не погубля́етъ.* Еже воспомина́я, Мака́рій святы́й* нищелю́біе стяжа́ти* и въ печа́лехъ и напа́стехъ су́щія утѣша́ти подвиза́шеся.

О, ти́хости безстра́стныя!* Ско́рби и напа́сти отъ ерети́ковъ подъе́мля,* Мака́рій святы́й незло́біе и братолю́біе сохраня́ше,* ко враго́мъ доброжела́теленъ быва́я.

О, чуде́съ мно́гихъ!* Послуша́ніе и смире́ніе свята́го Мака́рія,* Пра́ведный Судія́ на земли́ превозно́ситъ,* нетлѣ́ніемъ и чудесы́ разли́чными* уго́дность предъ Ни́мъ моли́твъ его́ показу́я.

Сла́ва, гла́съ то́йже:

Не возмо́гутъ словеса́ на́ша твои́хъ добродѣ́телей воспѣ́ти, Мака́ріе, но сокруше́ннымъ се́рдцемъ къ тебѣ́ припа́дающе, про́симъ, е́же моли́тися Го́сподеви умири́ти мíръ и спасти́ ду́ши на́ша.

И ны́нѣ, богоро́диченъ или́ пра́здника.
Славосло́віе вели́кое, ектеніи́ и отпу́стъ.



НА ЛИТУРГІИ,

Слу́жба преподо́бническая: [Блаже́нна пра́здника, пѣ́снь рядова́я и отъ кано́на свята́го, пѣ́снь 6-я. Проки́менъ пра́здника и свята́го, гла́съ 7: Честна́ предъ Го́сподемъ сме́рть преподо́бныхъ его́. Сти́хъ: Что́ возда́мъ Го́сподеви о всѣ́хъ, я́же воздаде́ ми́?] Апо́столъ дне́ и свята́го, къ Гала́томъ, зача́ло 213. Аллилу́ія пра́здника и свята́го, гла́съ 6: Блаже́нъ му́жъ, боя́йся Го́спода, въ за́повѣдехъ Его́ восхо́щетъ зѣло́. Сти́хъ: Си́льно на земли́ бу́детъ сѣ́мя его́. Ева́нгеліе дне́ и свята́го, Луки́, зача́ло 24. Прича́стенъ пра́здника и свята́го: Въ па́мять вѣ́чную бу́детъ пра́ведникъ, отъ слу́ха зла́ не убои́тся.]


Моли́тва.

О, пресла́вный преподобному́чениче Мака́ріе, ско́рый помо́щниче и те́плый засту́пниче всѣ́хъ, притека́ющихъ къ тебѣ́! Предста́тельствомъ свои́мъ предъ Го́сподомъ умоли́ Спа́са на́шего, да обрати́тъ ду́ши на́ша къ покая́нію и исправле́нію, да да́руетъ ми́ръ оте́честву на́шему и все́й земли́, и да помо́жетъ всѣ́мъ на́мъ тве́рдыми бы́ти въ вѣ́рѣ Правосла́внѣй и дѣ́лѣхъ благи́хъ, да отжене́тъ отъ на́съ ду́хъ зло́бы и лука́вства и братолю́біе всели́тъ въ на́съ, и да прино́симъ во все́мъ житіи́ на́шемъ плоды́ духо́вныя: любо́вь, бла́гость, милосе́рдіе, вѣ́ру нелицемѣ́рную, кро́тость и воздержа́ніе, и да, распя́вше на земли́ пло́ть на́шу со страстьми́ и похотьми́ и ду́хомъ живу́ще и ходя́ще, сподо́бимся жи́зни вѣ́чныя въ вѣ́цѣ гряду́щемъ, и, ра́йскія сла́дости при́сно наслажда́ющеся съ тобо́ю и со всѣ́ми святы́ми, просла́вимъ Отца́, и Сы́на, и Свята́го Ду́ха, ны́нѣ, и при́сно, и во вѣ́ки вѣко́въ. Ами́нь.

Источникъ: Мине́я Ма́й. Ча́сть втора́я — М.: Издательскій совѣтъ Русской Православной Церкви, 2002. — С. 50-66.

/ Къ оглавленію раздѣла /


Наверхъ / Къ титульной страницѣ

0