Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - вторникъ, 23 мая 2017 г. Сейчасъ на порталѣ посѣтителей - 14.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Ма́ія въ 12-й де́нь.
Иже во святы́хъ оте́цъ на́шихъ Епифа́нія, епи́скопа Ки́прскаго, и Ге́рмана, патріа́рха Константино́польскаго.

[ВЕЧЕРЪ,
На Го́споди воззва́хъ:] стихи́ры Епифа́нія, гла́съ 5. Подо́бенъ: Ра́дуйся.

Ра́дуйся, благоче́стія свѣти́ло, заря́ми о́гненныхъ слове́съ твои́хъ просвѣти́вый вселе́нную и попали́вый враго́въ хвра́стная уче́нія, Епифа́ніе, огне́мъ, и́же въ бу́ри невѣ́дѣнія су́щія, къ приста́нищу богоразу́мія благоути́шному призыва́я: орга́нъ оглаша́емь дыха́нія Ду́ха, цвѣ́томъ чуде́съ непреста́нно источа́я пучи́ну и сме́рти избавля́я. Христа́ умоли́ душа́мъ на́шимъ дарова́ти ве́лію ми́лость.

Ра́дуйся, мы́сленная рѣко́, испо́лнена во́дъ духо́вныхъ, украше́ніе церко́вное, священнонача́лія пра́вило, мона́шествующихъ сто́лпъ, Епифа́ніе, основа́ніе правосла́вныхъ, церко́вное водруже́ніе, сто́лпъ крѣ́пости, нече́стію супроти́вниче, трубо́ богогла́сная, славíй многовѣща́нный, небе́сный у́ме, бо́дрый язы́че, и́же зако́ну Боже́ственному поучи́вся благода́тію Христо́вою. Его́же моли́ душа́мъ на́шимъ да́ти ве́лію ми́лость.

Ины стихи́ры свята́го Ге́рмана, гла́съ 1. Подо́бенъ: Всехва́льніи му́ченицы.

Лео́нтіево мудрова́ніе* тве́рдо, Ге́рмане, низложи́лъ еси́,* и́же, злоче́стія испо́лнь,* поклоне́нія честны́хъ ико́нъ Христо́выхъ окая́нный* и всѣ́хъ святы́хъ отве́ржеся,* но, словесы́ твои́ми, богоявле́нне,* изобличи́вся, я́ко безу́менъ* и несмы́сленъ пребы́сть.

Ле́въ, безбо́жный звѣ́рь,* и́же Бо́га ненави́дя,* анти́христовъ предте́ча,* поклоне́ніе Христо́ва о́браза* отве́ргъ, преподо́бне,* наслѣ́дія вѣ́рныхъ изве́ржеся.* Тѣ́мже мо́лимъ тя́:* я́коже о́наго, моли́твами твои́ми* настоя́щее отжени́ смуще́ніе.

Жела́ніе улучи́лъ еси́,* е́же тебѣ́, богоявле́нне,* издале́че жела́емое явле́нно,* и́бо ко Влады́цѣ твоему́* со дерзнове́ніемъ, Ге́рмане блаже́нне,* ны́нѣ священнолѣ́пно вше́лъ еси́.* Ему́же предстоя́,* наслажда́ешися обоже́нія,* ми́ръ мíрови испроси́.

Сла́ва, и ны́нѣ, пра́здника.

Тропа́рь, гла́съ 4:

Бо́же оте́цъ на́шихъ, творя́й при́сно съ на́ми по Твое́й кро́тости, не отста́ви ми́лость Твою́ отъ на́съ, но моли́твами и́хъ въ ми́рѣ упра́ви живо́тъ на́шъ.

Сла́ва, и ны́нѣ, пра́здника.



[НА УТРЕНИ,]
Кано́нъ свята́го Епифа́нія, творе́ніе Іоа́нна мона́ха, гла́съ 1.

Пѣ́снь 1.

Ирмо́съ: Твоя́ побѣди́тельная десни́ца боголѣ́пно въ крѣ́пости просла́вися: та́ бо, Безсме́ртне, я́ко всемогу́щая, проти́вныя сотре́, изра́ильтяномъ пу́ть глубины́ новосодѣ́лавшая.

Во уго́днѣмъ вѣ́рою пожи́въ зако́нѣ писа́ній, Влады́чній подъя́лъ еси́ яре́мъ, украси́вся же, пребога́те, свѣти́льникъ показа́лся еси́, земны́я просвѣща́я концы́.

Жела́ніемъ Боже́ственнаго зако́на объя́тъ бы́въ и непра́веднаго разсуди́въ пра́ведное, о́тче Епифа́ніе, обра́зно прія́лъ еси́ спаси́тельную вѣ́ру Тро́ическую, я́коже отъ Боже́ственнаго проразумѣ́нія.

Цѣли́тель пло́ти же и души́, богови́дѣнъ бы́сть тебѣ́ человѣ́къ, подъяре́мникомъ твои́мъ стра́стное уби́лъ е́сть стремле́ніе, и исцѣли́ души́ невѣ́рное мудрова́ніе.

Богоро́диченъ: Ве́сь о́бразъ мо́й пріе́мъ, и́же во о́бразѣ Бо́жіи пе́рвѣе зри́мый, ве́сь обнови́лъ е́сть, во Твою́ утро́бу боголѣ́пно все́лься, Чи́стая. Тѣ́мже Богоро́дицу вѣ́рою Тя́ вси́ сла́вимъ.

Инъ кано́нъ свята́го Ге́рмана, творе́ніе Ѳеофа́на, гла́съ 1.
Пѣ́снь 1. Ирмо́съ то́йже.

Свяще́нія оде́ждою укра́шенъ, блаже́нне, пожи́лъ еси́, сло́вомъ же благода́ти вѣ́рныхъ пречестны́я собо́ры, яви́лся еси́, богоявле́нне, просвѣща́я уче́ніи.

Колесни́ца бы́лъ еси́ добродѣ́телей, на ню́же всѣ́дъ, къ Бо́гу отше́лъ еси́, мíра красоту́ оста́вль и гнилу́ю сла́ву, небе́сный таи́нникъ свое́ю прему́дростію бы́въ.

Отъ промышле́нія проувѣ́дѣнъ бы́въ, я́ко свяще́нникъ богогла́сенъ сы́й, о́тче, избѣ́глъ еси́ томи́тельнаго скве́рнаго убíйства, преподо́бне, Бо́гу соблюда́ющу тя́ десни́цею Вседержи́тельною.

Богоро́диченъ: Ку́ю Ти́ досто́йную пѣ́снь на́ше принесе́тъ неможе́ніе? То́кмо обра́довательную, е́йже на́съ Гавріи́лъ научи́: ра́дуйся, Богоро́дице Дѣ́во, Ма́ти Неневѣ́стная.

Пѣ́снь 3.

Ирмо́съ: Еди́не Вѣ́дый человѣ́ческаго существа́ не́мощь и ми́лостивно въ не́ вообра́жся, препоя́ши мя́ съ высоты́ си́лою, е́же вопи́ти Тебѣ́, Святы́й: одушевле́нный хра́ме неизрече́нныя сла́вы Твоея́, Человѣколю́бче.

Черну́ оде́жду ви́дѣвъ пода́вшаго, проси́вшу ми́лости, тѣле́сныма очи́ма, свѣ́тлою же ри́зою одѣ́яна разу́мно узрѣ́въ, Боже́ственною благода́тію просвѣти́лся еси́ къ вѣ́рѣ непоро́чнѣй.

Слы́шавъ глаго́лы благочести́выя, ве́щи возгнуша́лся еси́ у́бо, и житіе́ возжела́въ невеще́ственно, я́ко и кро́ви соприча́стну твое́й и ра́зума прича́стну пріи́мъ сестру́, яви́стася супру́га блаже́нная.

Ме́ртвыхъ помышле́ній отврати́вся, преблаже́нне Епифа́ніе, возжела́лъ еси́ живо́му служи́ти Бо́гу и къ Боже́ственному хра́му вѣ́рно прите́клъ еси́, пріе́мъ о́бразъ свѣ́тлый, пребога́те, ме́ртвыхъ твои́хъ явля́я отпаде́ніе.

Богоро́диченъ: Святы́хъ Свята́го Христа́ свя́то породила́ еси́, Святы́ни свято́е селе́ніе, во святы́хъ почива́ющаго, Ему́же вопіе́мъ: Свята́ Це́ркви одушевле́нная пречи́стыя сла́вы Твоея́, Человѣколю́бче.

Инъ. Ирмо́съ то́йже.

Иже Боже́ственнымъ проразумѣ́ніемъ провѣ́дый твоего́ нра́ва свобо́дное и душе́вное, му́дре, благоро́діе, рука́ми беззако́нныхъ убіе́ну бы́ти тебѣ́ Бо́гъ возбрани́ и дѣ́вственныхъ чи́ну скопле́ніе прему́дро обличи́.

Ви́дѣти жела́я я́вѣ, блаже́нне, свѣ́тлость мы́сленную Боже́ственнаго обоже́нія, священнонача́ліе твое́ украси́лъ еси́ житіе́мъ цѣлому́дреннымъ и му́дрыми уче́ньми правосла́вно напра́вилъ еси́ ста́до.

На вели́кое сѣда́лище вше́дъ, вельми́ просвѣти́лъ еси́ церко́вное, о́тче, исполне́ніе уче́ній пѣ́сньми, Ге́рмане прехва́льне, святи́телю преподо́бне и свѣти́льниче вселе́нныя прече́стне.

Богоро́диченъ: Изъ Тебе́ процвѣте́, Чи́стая, Цвѣ́тъ неувяда́емый, благоуха́я все́ человѣ́чество Боже́ственнымъ мѵ́ромъ Своего́ естества́, Отцу́ Собезнача́льный, и изъ Тебе́ бы́въ подъ лѣ́томъ, Дѣ́во Всенепоро́чная.

Сѣда́ленъ, гла́съ 8. Подо́бенъ: Прему́дрости.

Но́гъ твои́хъ обу́щи, я́коже Моисе́й, во святѣ́мъ мѣ́стѣ отложи́въ, Боже́ственнымъ та́йнамъ научи́лся еси́ духо́внымъ и, воздержа́нія болѣ́зньми умертви́въ тѣ́ло твое́, пресла́вныхъ чуде́съ тва́рь испо́лнилъ еси́. Тѣ́мже и Богодохнове́ннаго Писа́нія неизрече́нная всѣ́мъ благоразсуди́лъ еси́, богоно́се о́тче на́шъ, святи́телю Епифа́ніе, моли́ Христа́ Бо́га согрѣше́ній оставле́ніе дарова́ти чту́щимъ любо́вію святу́ю па́мять твою́.

Сла́ва, и́нъ сѣда́ленъ, гла́съ то́йже:

Во свяще́нную обле́клся оде́жду, показа́лся еси́ посо́бникъ Христо́ви, не убоя́вся беззако́ннаго царя́, о́тче на́шъ, вы́и не преклони́лъ еси́ безбо́жному велѣ́нію, зауше́нія терпя́, поноше́нія и преще́нія. Тѣ́мже льсте́цъ, я́ростію разгорѣ́вся, въ темни́цѣ тя́ затвори́, да́же до кончи́ны, блаже́нне. Сего́ ра́ди вопіе́мъ ти́: моли́ Христа́ Бо́га грѣхо́въ оставле́ніе дарова́ти на́мъ, чту́щимъ любо́вію святу́ю па́мять твою́.

И ны́нѣ, пра́здника.

Пѣ́снь 4.

Ирмо́съ: Го́ру Тя́, благода́тію Бо́жіею пріосѣне́нную, прозорли́выма Авваку́мъ усмотри́въ очи́ма, изъ Тебе́ изы́ти Изра́илеву провозглаша́ше Свято́му, во спасе́ніе на́ше и обновле́ніе.

Моли́твенникъ, я́коже ра́бъ, присту́пль ко креще́нію, сыноположи́лся еси́ и́мъ и наслѣ́дникъ и́стиненъ Бо́жій, Епифа́ніе, и Христу́ снаслѣ́дникъ бы́лъ еси́, боголѣ́пно Тому́ пожи́въ.

Зри́тъ твое́ многоукра́шено лице́ и неизрече́нною Па́стырь сла́вою и вѣнце́мъ благолѣ́пнымъ сла́вную главу́ твою́ па́че естества́ вѣнча́ну, сла́вне, чи́стаго твоего́ се́рдца о́бразы.

Бы́лъ еси́ прія́телище Боже́ственныя благода́ти, преподо́бне, и расточи́лъ еси́ му́дрѣ бога́тство вре́менное Христу́, и, имѣ́ніемъ небе́снымъ обога́щся, некра́домое сокры́лъ еси́, я́коже разу́мный судія́, Епифа́ніе.

Юныхъ отве́рглъ еси́ въ ю́ности мудрова́ніе, укрѣ́пль же ся ста́рческими отъ му́дрыхъ и разу́мныхъ, стра́хомъ, блаже́нне, боже́ственнымъ, поуче́ніемъ слове́съ духо́вныхъ рачи́тель прему́дрости бы́лъ еси́.

Богоро́диченъ: Святы́хъ Свята́я Богоро́дице Всепѣ́тая, ча́яніе язы́ковъ и спасе́ніе вѣ́рныхъ, изъ Тебе́ возсія́ Изба́витель, и Жизнода́вецъ, и Госпо́дь, Его́же моли́ спасти́ся рабо́мъ Твои́мъ.

Инъ. Ирмо́съ то́йже.

Умертви́въ, прему́дрѣ, пло́ти взыгра́нія, священнотаи́нниче Ге́рмане, любому́дрія просвѣще́ніемъ у́мъ уясни́лъ еси́, духо́внымъ та́йно наставле́ніемъ укра́шенъ, Христу́ зовы́й: сла́ва си́лѣ Твое́й, Го́споди.

Отврещи́ся пречестны́хъ Христо́выхъ изображе́ній злочести́вый вра́гъ пону́ди тя́, въ неразу́міе бо вве́ргся, твои́ми изобличи́ся я́вѣ уче́ніи, сла́вне, но, неисцѣ́льно неду́гуя, нечу́вственъ пребы́сть.

Глаго́лъ обличе́ніе твои́хъ зря́, звѣроимени́тый, му́дре, звѣрообра́знымъ умо́мъ съ престо́ла низведе́ свяще́ннаго, но вмѣ́сто сего́ обогати́лся еси́ священнодѣ́йствомъ, всеблаже́нне, небе́снымъ.

Богоро́диченъ: Ра́дость Тебѣ́ я́вѣ отъ небе́съ принося́, архистрати́гъ, Чи́стая, благовѣсти́, ре́къ: Бо́гъ пріи́детъ съ пло́тію изъ Тебе́, Дѣ́во Пречи́стая, на спасе́ніе любо́вію пою́щимъ Тя́.

Пѣ́снь 5.

Ирмо́съ: Просвѣти́вый сія́ніемъ прише́ствія Твоего́, Христе́, и освѣти́вый кресто́мъ Твои́мъ мíра концы́, сердца́ просвѣти́ свѣ́томъ Твоего́ богоразу́мія правосла́вно пою́щихъ Тя́.

Преподо́бно твое́ чре́во хлѣ́бомъ и водо́ю утѣсни́лъ еси́, я́ко ва́риво имѣ́въ со́ль, и стра́сти удержа́лъ еси́ пло́ти, во пло́ти житію́ безпло́тныхъ подо́бяся.

Уще́дрилъ еси́ та́ющихъ въ жа́жди зно́я и зно́й премѣни́лъ еси́, боголѣ́пно зна́менія начина́я, я́ко служи́тель изря́денъ, твоему́ подо́бяся Влады́цѣ, вино́ въ во́ду преложи́лъ еси́, блаже́нне.

Избѣ́глъ еси́ тщíя человѣ́къ сла́вы и въ пусты́ню, я́коже тво́й Влады́ка, всели́лся еси́, искуше́ніи, му́дре, Влады́чними къ боре́нію неви́димыхъ неможе́ніе твое́ укрѣпля́я.

Богоро́диченъ: Сло́во Боже́ственное сло́вомъ во утро́бѣ вмѣсти́ла еси́ па́че сло́ва, Богоро́дице, Того́ у́бо моли́ отъ безслове́сныхъ дѣя́ній и сласте́й смертоно́сныхъ свободи́ти рабы́ Твоя́.

Инъ. Ирмо́съ то́йже.

До конца́ Христа́ возлю́бль, богопрія́тне, возлю́бленъ бы́лъ еси́ отъ Него́ досто́йно и прія́лъ еси́ дарова́ній пучи́ну, и́бо, му́дре, уче́ніи твои́ми Це́рковь просвѣти́лъ еси́.

Пѣ́сньми, Ге́рмане, богодохнове́нными уясни́лъ еси́ ли́ки вѣ́рныхъ и боже́ственная исполне́нія, и́бо все́ подо́бное утвержде́ніе, о́тче, твоего́ се́рдца правосла́вныя просвѣти́.

Ра́дуйся, му́чениковъ страда́ніе, и побѣ́ды обличи́въ похвала́ми и словесы́ сложе́нными, и а́біе, сла́вне, обра́зными шародѣ́йствы во еди́но совокупля́я обоя́.

Богоро́диченъ: Веселя́тся небе́сныя си́лы, зря́ще Тя́, ра́дуются съ ни́ми человѣ́ковъ собра́нія: Рождество́мъ бо Твои́мъ соедини́шася, Дѣ́во Богоро́дице, Его́же досто́йно сла́вимъ.

Пѣ́снь 6.

Ирмо́съ: Обы́де на́съ послѣ́дняя бе́здна, нѣ́сть избавля́яй, вмѣни́хомся, я́ко о́вцы заколе́нія, спаси́ лю́ди Твоя́, Бо́же на́шъ, Ты́ бо крѣ́пость немощству́ющихъ и исправле́ніе.

Бѣсо́встіи тя́ подо́бницы окружи́вше, ага́рянстіи вну́чата, Влады́цѣ же подо́бяся твоему́, супроти́вящагося возблагодѣ́тельствовалъ еси́ и свѣ́тло показа́лъ еси́, о́тче, друго́е о́ко.

Содѣ́тель тво́й, въ тебѣ́ почи́вый, Ду́ха тя́ орга́нъ и бо́га, я́коже Моисе́я, фарао́ну показа́, ара́вскимъ жили́щемъ: вои́стинну бо яви́лся еси́, о́бразу Сего́ подо́бяся.

Сотрясе́ ассирíйскаго царя́, ду́хъ гоня́щаго, бы́сть же вѣ́стникъ твое́й, о́тче, добродѣ́тели и Боже́ственныя благода́ти, и́бо того́ вѣ́сть сла́вити Бо́гъ сла́вящія.

Богоро́диченъ: Веселя́тся о Тебѣ́, Дѣ́во Пречи́стая, ро́да на́шего пра́отцы, Еде́мъ воспріе́мше Тобо́ю, его́же преступле́ніемъ погуби́ша: Ты́ бо Чиста́ и пре́жде рождества́, и по рождествѣ́ еси́.

Инъ. Ирмо́съ то́йже.

Напоя́ется уче́ніи твои́ми, всему́дре, и словесы́ ца́рское свяще́ніе, лю́діе же Христо́ви возлю́бленніи, богозва́нніи и къ Бо́гу наставля́ются наказа́ніи твои́ми.

Помина́й тя́ пою́щія, преподо́бне, Бо́гу ны́нѣ предстоя́, испо́лненъ боже́ственныя добро́ты и нетлѣ́нныя красоты́, и къ животу́ наста́ви моли́твами твои́ми.

Восхожде́ніе, му́дре, житію́ положи́лъ еси́ отъ сла́вы и си́лы къ небе́снѣй сла́вѣ и крѣ́пости, сла́вне, премину́я воздержа́ніи, до́ндеже Христу́ жела́емому, ра́дуяся, бесѣ́довалъ еси́.

Богоро́диченъ: Ны́нѣ, Пречи́стая, Твоего́ раба́ изба́ви отъ вся́каго обстоя́нія, треволне́нія же и бу́ри страсте́й и къ Твоему́ приста́нищу наста́ви: Ты́ бо еси́ мнѣ́ предста́тельница и исправле́ніе.

Конда́къ, гла́съ 4. Подо́бенъ: Вознесы́йся.

Священнонача́льникъ чу́дную дво́ицу восхва́лимъ, вѣ́рніи, по до́лгу, съ Ге́рманомъ боже́ственнаго Епифа́нія: сíи бо попали́ша безбо́жныхъ язы́ки, догма́ты прему́дрѣйшія возло́жше всѣ́мъ, правосла́вно пою́щимъ при́сно благоче́стія вели́кое та́инство.

Икосъ:

Яко свяще́нныхъ добро́ту и сла́ву правосла́вныхъ, дво́ицу святу́ю почти́мъ досто́йно: сíи бо яви́шася на́мъ столпи́ утвержде́нія на враги́ неви́димыя и ви́димыя всегда́, вѣ́ры же столпи́ непрекло́нніи и Це́ркве украше́ніе красно́. Его́же нося́щи, пра́во исправля́етъ, у́мно вопію́щи: возвесели́ся во мнѣ́ ду́хъ мо́й вои́стинну, оде́жду мою́, я́коже пре́жде, воспріе́мши, ю́же еретицы́ растерза́ша, не пою́ще благоче́стія вели́кое та́инство.

Пѣ́снь 7.

Ирмо́съ: Тебе́, у́мную, Богоро́дице, пе́щь разсмотря́емъ, вѣ́рніи, я́коже бо о́троки спасе́ три́ Превозноси́мый, мíръ обнови́, во чре́вѣ Твое́мъ всецѣ́лъ, хва́льный отце́въ Бо́гъ и препросла́вленъ.

Отъ Боже́ственныя десни́цы пріе́мъ чуде́съ да́ръ, прося́щимъ у тебе́ ту́не, о́тче, исцѣле́нія всѣ́мъ разда́лъ еси́, я́коже Влады́ка тебѣ́ повелѣ́, хва́льный отце́въ Бо́гъ и препросла́вленъ.

Па́даетъ, на ногу́ твое́ю валя́яся, ассирíйскій ца́рь, стыдѣ́тися бо добродѣ́тели вѣ́сть и сопоста́тъ. Вся́каго же покаря́етъ Еди́ный, во святы́хъ почива́я, хва́льный отце́въ Бо́гъ и препросла́вленъ.

Сло́во молчи́тъ, исправле́нія твоя́ и чуде́съ мно́жество ника́коже возмо́же сказа́ти, всеблаже́нне: песка́ бо премину́етъ, е́же Христо́съ тебѣ́ дарова́, хва́льный отце́въ Бо́гъ и препросла́вленъ.

Тро́иченъ: Трисвѣ́тлая Еди́нице, неоску́дный безмѣ́рныя бе́здны Свѣ́те, назира́еши Твоя́ пѣвцы́: превозноси́мый Безнача́льный Отче, и Сы́не Собезнача́льный, и Ду́ше Соприсносу́щный, хва́льный отце́въ Бо́гъ и препросла́вленъ.

Богоро́диченъ: Ты́, Исто́чникъ жи́зни ро́ждши, умерщвле́нна мя́ лю́тѣ бѣсо́вскими наведе́ніи, Чи́стая Всенепоро́чная, оживи́ моли́твами Твои́ми, Твоему́ Сы́ну воспѣва́юща: хва́льный отце́въ Бо́гъ и препросла́вленъ.

Инъ. Ирмо́съ то́йже.

Ве́сь въ тебѣ́ Свята́го Ду́ха излія́ся исто́чникъ: источа́еши бо, я́ко рѣ́ки, о́тче досточу́дне, за́повѣди спаси́тельныя и богокра́сная уче́нія, прехва́льнаго велича́я Бо́га во вся́ вѣ́ки.

Пѣсносло́вя благоче́стно, уясни́лъ еси́ Влады́чнія пра́здники, воспѣва́я пѣ́сненно, обоже́нъ бы́въ, вся́ святы́я же твои́ми мусикíями къ добродѣ́тели помазу́я, му́дрѣ, вѣ́рою пою́щія: хва́льный отце́въ Бо́же и препросла́вленъ.

Тро́иченъ: Еди́но нача́ло во Еди́нствѣ непресѣко́мѣмъ, во Ѵпоста́сѣхъ Тріе́хъ богосло́внымъ язы́комъ вопія́, всѣ́мъ проповѣ́далъ еси́ Безнача́льна Роди́теля, Единоро́днаго же Собезнача́льна Сы́на и Соесте́ственна Боже́ственнаго Ду́ха я́сно и Единосу́щна.

Богоро́диченъ: На Тебе́, Чи́стая Богоро́дице, положи́хъ всю́ наде́жду и къ Тебѣ́ прибѣга́ю всегда́: спаси́ мя, Всенепоро́чная, и изба́ви моли́твами Твои́ми одержа́щія молвы́ и смуще́нія, лю́тыхъ мои́хъ страсте́й и паде́ній.

Пѣ́снь 8.

Ирмо́съ: Въ пещи́ о́троцы Изра́илевы, я́коже въ горни́лѣ, добро́тою благоче́стія чистѣ́е зла́та блеща́хуся, глаго́люще: благослови́те, вся́ дѣла́ Госпо́дня, Го́спода, по́йте и превозноси́те во вся́ вѣ́ки.

Ты́ сло́вомъ обличи́лъ еси́ му́дрѣ ересе́й пре́лесть и сія́ніемъ благоче́стія отгна́лъ еси́ ту́ю, вопія́, Епифа́ніе: благослови́те, вся́ дѣла́ Госпо́дня, Го́спода, по́йте и превозноси́те во вся́ вѣ́ки.

На престо́лъ возне́сся высо́къ, надъ страстьми́ бо ца́рствовалъ еси́, пло́ть же удержа́въ, ты́ упа́слъ еси́ Христо́во ста́до, зовы́й: благослови́те, вся́ дѣла́ Госпо́дня, Го́спода, по́йте и превозноси́те во вся́ вѣ́ки.

Да лику́етъ вся́ко мы́сленное и слове́сное существо́ въ па́мять святи́теля и уго́дника Христо́ва, вѣ́рно зову́щее: благослови́те, вся́ дѣла́ Госпо́дня, Го́спода, по́йте и превозноси́те во вся́ вѣ́ки.

Богоуго́дно ты́ богосло́вивъ, я́ко основа́ніе уче́ній всѣ́мъ богосло́віе оста́вилъ еси́ твое́, и́мже, о́тче, пое́мъ: благослови́те, вся́ дѣла́ Госпо́дня, Го́спода, по́йте и превозноси́те во вся́ вѣ́ки.

Богоро́диченъ: Ра́дуйся, престо́ле сла́вный Бо́жій, ра́дуйся, вѣ́рныхъ стѣно́, Еюже свѣ́тъ су́щимъ во тмѣ́ возсія́, Христо́съ. И, Тя́ блажа́ще, вопіе́мъ: вся́ дѣла́, Дѣ́ву благослови́те и славосло́вите пречи́стое Ея́ Рождество́.

Инъ. Ирмо́съ то́йже.

Сія́ній блиста́ніи Свѣ́та Трисо́лнечнаго, свѣще́ю, священноявле́нне, наслажда́яся, ны́нѣ зове́ши, ра́дуяся: благослови́те, вся́ дѣла́ Госпо́дня, Го́спода, по́йте и превозноси́те во вся́ вѣ́ки.

Мно́гаго свѣ́та и сія́нія, о́тче, сподо́бленъ, въ се́лѣхъ небе́сныхъ и въ жили́щахъ на́съ, вопію́щихъ, помяни́: благослови́те, вся́ дѣла́ Госпо́дня, Го́спода, по́йте и превозноси́те во вся́ вѣ́ки.

Яко соблю́дъ богови́дно и по о́бразу Бо́жію, ико́ны святы́хъ воздви́глъ еси́, вѣ́дый на первообра́зное преходи́ти, вся́ку че́сть же, прехва́льне, и сла́ву, Го́спода по́йте, вопія́, и превозноси́те Его́ во вся́ вѣ́ки.

Богоро́диченъ: Новообра́зно па́че естества́, Дѣ́во, заче́нши Сло́во, Отцу́ соесте́ственна Сы́на, Дѣ́вою пребыла́ еси́. Тѣ́мъ Тя́ пое́мъ, вся́ дѣла́, и — ра́дуйся — Тебѣ́ вопіе́мъ, и превозно́симъ, Чи́стая, во вся́ вѣ́ки.

Пѣ́снь 9.

Ирмо́съ: Образъ чи́стаго рождества́ Твоего́ огнепали́мая купина́ показа́ неопа́льная; и ны́нѣ на на́съ напа́стей свирѣ́пѣющую угаси́ти, мо́лимся, пе́щь, да Тя́, Богоро́дице, непреста́нно велича́емъ.

Предѣ́лъ дѣ́тели житіе́ твое́ и видѣ́нія Боже́ственнаго, о́тче, словеса́ твоя́ богому́дрымъ вои́стинну лю́демъ оста́вися, Епифа́ніе блаже́нне сла́вне. Тѣ́мже тя́ по достоя́нію, восхваля́юще, велича́емъ.

Невѣ́стѣ Христо́вѣ предста́, Це́ркви, сла́вне Епифа́ніе, и ути́ши я́же на ню́ воздви́женую, моли́твами твои́ми, свирѣ́пую бу́рю, я́ко имѣ́я дерзнове́ніе ко Влады́цѣ и Человѣколю́бцу.

Тро́иченъ: Царю́ царе́й, Свята́я Единонача́льная Тро́ице, всѣ́ми влады́чествующая, пою́щимъ Тя́ согрѣше́ній проще́ніе и житія́ всего́ устрое́ніе неотъе́млемо пода́ждь Епифа́нія моли́твами.

Богоро́диченъ: О, па́че ума́ чуде́съ Твои́хъ! Бо́жіе бо Сло́во, пло́ть бы́вшее, еди́на родила́ еси́ на́мъ па́че естества́, Ма́ти Дѣ́во, вся́ческая Боже́ственною во́лею я́вѣ содержа́ща, Его́же о всѣ́хъ умоли́.

Инъ. Ирмо́съ то́йже.

Рѣши́ти и вяза́ти согрѣше́нія вла́сть съ небесе́ пріе́мъ по зако́ну я́ко свяще́нникъ, преблаже́нне, пою́щимъ тя́, о́тче, оставле́ніе моли́твами твои́ми пода́ждь, да тя́ вси́ ублажа́емъ.

Обрѣ́лъ еси́ воздая́нія болѣ́зней твои́хъ священноявле́нно, Ге́рмане всеблаже́нне, блаже́нную пріи́мъ кончи́ну и жи́знь вѣ́чную воспріи́мъ, Боже́ственнаго видѣ́нія непреста́нно наслажда́ешися.

Ве́сь себе́ возложи́лъ еси́ Всеви́дцу Сло́ву и Вседержи́телю добра́ слу́жба показа́лся еси́ свяще́нная, же́ртву прія́тну и благоуго́дну принося́ Го́сподеви, твои́хъ трудо́въ пѣ́нія.

Богоро́диченъ: Уста́ви плотско́е мудрова́ніе и страсте́й, Дѣ́во, утиши́ смуще́ніе прибѣга́ющаго, Богороди́тельнице, къ покро́ву Твоему́, и наде́жды основа́ніе Тя́ иму́щаго, и боже́ственнымъ предста́тельствомъ обога́щшася и заступле́ніемъ.

Свѣти́ленъ. Подо́бенъ: Жены́, услы́шите.

Пріиди́те, вѣ́рніи, почти́мъ боже́ственное и всесвяще́нное іера́рховъ совокупле́ніе, въ пѣ́ніихъ пѣ́сненныхъ боже́ственнаго Епифа́нія и Ге́рмана, разори́вшія ересе́й омраче́ніе и благоче́стія заре́ю просвѣ́щшія всю́ тва́рь.

Сла́ва, и ны́нѣ, пра́здника.



НА ЛИТУРГІИ,

Проки́менъ, гла́съ 1: Уста́ моя́ возглаго́лютъ прему́дрость,* и поуче́ніе се́рдца моего́ ра́зумъ. Сти́хъ: Услы́шите сія́ вси́ язы́цы, внуши́те вси́ живу́щіи по вселе́ннѣй. Апо́столъ ко Евре́емъ, зача́ло 318. Аллилу́ія, гла́съ 2: Уста́ пра́веднаго поуча́тся прему́дрости, [и язы́къ eго́ возглаго́летъ су́дъ]. Сти́хъ: Зако́нъ Бо́га его́ въ се́рдцѣ его́, и не за́пнутся стопы́ eго́. Ева́нгеліе Матѳе́я, зача́ло 11. Прича́стенъ: Въ па́мять вѣ́чную бу́детъ пра́ведникъ, [отъ слу́ха зла́ не убои́тся].

Источникъ: Минíа, мѣ́сяцъ Ма́ій. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 78 об. – 85.

/ Къ оглавленію раздѣла /


Наверхъ / Къ титульной страницѣ

0