Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - четвергъ, 27 апрѣля 2017 г. Сейчасъ на порталѣ посѣтителей - 6.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Ма́ія въ 12-й де́нь.
Слу́жба преподо́бному отцу́ на́шему Діони́сію, архимандри́ту Тро́ице-Се́ргіева монастыря́, Ра́донежскому чудотво́рцу.

НА МАЛѢЙ ВЕЧЕРНИ,
На Го́споди, воззва́хъ: стихи́ры на 4, гла́съ 1:

Стра́хомъ Бо́жіимъ огражда́емь, мірска́я вся́ возненави́дѣлъ еси́, богоно́сне Діони́сіе, вы́шнихъ всегда́ ища́, и́хже получи́ти и на́мъ моли́ся, прося́ на́мъ ми́ра и ве́лія ми́лости.

Кре́стъ Христо́въ отъ ю́ности на ра́мо взе́мъ, усе́рдно Тому́ послѣ́довалъ еси́, о́тче Діони́сіе, тѣ́мже бога́тно прія́лъ еси́ мзду́ трудо́въ твои́хъ отъ Подвигополо́жника Христа́, Его́же моли́ дарова́ти на́мъ ми́ръ и ве́лію ми́лость.

[Сла́ва,] и ны́нѣ, богоро́диченъ, гла́съ то́йже:

Блажи́мъ Тя́, Пренепоро́чную и Честнѣ́йшую херуви́мъ, я́ко Тобо́ю содѣ́яся спасе́ніе мíру и сѣдя́щимъ во тмѣ́ и сѣ́ни сме́ртнѣй свѣ́тъ благода́ти возсія́.

На стихо́внѣ стихи́ры, гла́съ 2:

До́мъ Ду́ха Свята́го исполне́ніемъ за́повѣдей Христо́выхъ преподо́бне Діони́сіе, бы́въ, помози́ и на́мъ ше́ствовати путе́мъ, веду́щимъ къ вѣ́чнымъ оби́телемъ, идѣ́же е́сть всѣ́хъ веселя́щихся жили́ще.

Сти́хъ: Честна́ предъ Го́сподемъ сме́рть преподо́бныхъ Его́.

Оби́тель Святы́я Тро́ицы, вруче́нную тебѣ́ отъ Боже́ственнаго про́мысла, до́брѣ управля́я о́бразомъ житія́ твоего́ и кра́йнимъ незло́біемъ, мно́жество и́ночествующихъ на пу́ть спасе́нія наста́вилъ еси́, преподо́бне Діони́сіе; и ны́нѣ моли́ся упра́вленнымъ бы́ти и на́мъ на пу́ть покая́нія и въ де́нь стра́шнаго Суда́ изба́витися муче́нія.

Сти́хъ: Блаже́нъ му́жъ, боя́йся Го́спода, въ за́повѣдехъ Его́ восхо́щетъ зѣло́.

Церко́вная установле́нія тща́тельнѣ исправля́я и о нестрое́ніи оте́чества душе́ю болѣ́знуя, потща́лся еси́ созва́ти до́блестныя сы́ны Россíи на защище́ніе Правосла́вныя вѣ́ры, и́хже благослови́въ, побѣ́ду и́мъ отъ Бо́га испроси́лъ еси́; тѣ́мже ны́нѣ по до́лгу тя́ ублажа́емъ, Діони́сіе преподо́бне.

Сла́ва, гла́съ 8:

Вельми́ болѣ́знуя о стра́ждущихъ лю́дѣхъ во вре́мя вели́кія напа́сти, обыше́дшія страну́ Россíйскую, съ пла́чемъ ве́ліимъ и со слеза́ми призыва́лъ еси́ всѣ́хъ къ помоществова́нію и́мъ, собо́ю о́бразъ всѣ́мъ подая́ и́стинныя любве́; и ны́нѣ стра́ждущимъ лю́тѣ отъ неви́димыхъ враго́въ помози́, преподо́бне Діони́сіе, и изба́ви злодѣ́йствія и́хъ, я́ко да по до́лгу тя́ ублажа́емъ.

И ны́нѣ, богоро́диченъ:

Влады́чице, пріими́ моли́твы ра́бъ Твои́хъ и изба́ви на́съ отъ вся́кія ну́жды и печа́ли.

Тропа́рь, гла́съ 3:

Земна́я, прельща́ющая очеса́ міролю́бцевъ, возненави́дѣлъ еси́, о́тче богоно́сне Діони́сіе, за уме́ты та́ вмѣни́въ, ше́ствуя путе́мъ ско́рбнымъ, и въ терпѣ́ніи до́бръ во́инъ Христо́въ яви́лся еси́, побѣди́въ стра́сти мíра, бы́лъ еси́ до кончи́ны непоколеби́мый благоче́стія побо́рникъ. Тѣ́мже мы́ дне́сь, соверша́я свяще́нную па́мять твою́, духо́вными тя́ пѣ́сньми ублажа́емъ и смире́нно мо́лимъ, да, предстоя́ престо́лу Го́спода Бо́га, хода́тайствуеши о спасе́ніи ду́шъ на́шихъ.

Инъ тропа́рь, гла́съ 4:

Бла́гости научи́вся отъ Вы́шняго благода́ти, измла́да подвиза́вся благо́ю со́вѣстію, Діони́сіе преподо́бне, терпѣ́нія сто́лпъ бы́лъ еси́ и сло́ва Бо́жія проповѣ́дникъ, благоче́стія догма́ты утверди́въ и суеу́мныхъ мудрова́ніе упраздни́въ, тѣ́мже и пострада́лъ еси́ за и́стину, ра́дуяся, о́бразъ страда́льцемъ собо́ю показа́въ, но, я́ко имѣ́я дерзнове́ніе ко Христу́ Бо́гу, не преста́й моля́ся о на́съ, любо́вію чту́щихъ святу́ю па́мять твою́.

Сла́ва, и ны́нѣ, пра́здника.



НА ВЕЛИЦѢЙ ВЕЧЕРНИ,
[Блаже́нъ му́жъ.., 1-й антифо́нъ.] На Го́споди, воззва́хъ: стихи́ры на 8, пра́зднику 3 и свято́му 5, гла́съ 8:

Ве́сь отъ ю́ности себе́ Го́сподеви возложи́въ и мона́шеское житіе́ возлюби́въ, потща́лся еси́ ше́ствовати тѣ́снымъ путе́мъ, преподо́бне о́тче Діони́сіе, смире́нною же му́дростію себе́ уничижа́я, отъ Бо́га возвели́ченъ бы́лъ еси́, Его́же моли́ спасти́ся душа́мъ на́шимъ.

Труды́, поще́ніемъ и бдѣ́ніемъ умерщвля́я тѣ́ло свое́ и непреста́нными моли́твами къ Бо́гу всегда́ приближа́яся, до́мъ че́стенъ Ду́ху Свято́му бы́лъ еси́, Иже, ви́дя твое́ благо́е произволе́ніе, прави́теля поста́ви тя́ до́му Живонача́льныя Тро́ицы, идѣ́же вѣ́ренъ яви́лся еси́ о́бразомъ добродѣ́тельнаго твоего́ житія́ мно́гія ча́да приве́дъ ко спасе́нію.

Да́нный тебѣ́ отъ Бо́га тала́нтъ земны́ми попече́ніи не закрыва́я, во исправле́ніи церко́вныхъ послѣ́дованій и моли́твъ, повелѣ́ніе отъ царя́ и патріа́рха пріи́мъ, трудолю́бнѣ подвиза́лся еси́, Діони́сіе, а́ще и по́слѣжде мно́гія бѣ́ды и напа́сти за сіе́ отъ зави́стныхъ непови́нно прія́лъ еси́, тѣ́мже по достоя́нію вѣнча́лся еси́ отъ Бо́га, Его́же моли́ спасти́ся душа́мъ на́шимъ.

Житомѣ́ритель изря́денъ во вре́мя ну́жды, я́коже дре́вле Іо́сифъ, и непоколеби́мый сто́лпъ терпѣ́нія въ разли́чныхъ напа́стѣхъ, я́коже Іовъ, бы́лъ еси́, Діони́сіе, всѣ́мъ дре́внимъ страда́льцемъ за и́стину подо́бникъ, съ ни́миже и прія́лъ еси́ на небесѣ́хъ мзду́ трудо́въ твои́хъ; тѣ́мже ны́нѣ по до́лгу тя́ любо́вію ублажа́емъ.

Съ поруга́ніемъ по то́ржищу води́мь, во око́вахъ держи́мь, біе́мъ, и попира́емь, и вся́чески безче́стимь, къ бію́щимъ тя́ весе́лымъ лице́мъ бесѣ́довалъ еси́. Вопроша́ющимъ же тя́ о бѣдѣ́ се́й друго́мъ твои́мъ отвѣща́лъ еси́: нѣ́сть се́ бѣда́, но то́кмо подо́біе бѣды́, и́стинная же бѣда́ е́сть въ гее́ннѣ съ діа́воломъ му́чиму бы́ти; ея́же изба́витися на́мъ Го́спода умоли́, Діони́сіе преподо́бне.

Сла́ва, гла́съ 6:

Пріиди́те, мона́шествующихъ собра́нія, свяще́нницы и вси́ лю́діе, любо́вію восхва́лимъ отца́ на́шего Діони́сія въ де́нь свѣ́тлой па́мяти его́, то́й бо яви́ся и́стинный ревни́тель по́стническаго житія́, послѣ́дуя стопа́мъ вели́каго Се́ргія, свяще́нства бы́сть честны́й сосу́дъ, о лю́дехъ попечи́тель изря́денъ, я́звенныя врачу́я, нагíя одѣва́я и гла́дныя до́брѣ пита́я, отходя́щихъ же отъ сего́ вре́меннаго житія́ по достоя́нію напу́тствуя къ вѣ́чному животу́, тѣ́мже возопіи́мъ ему́: о́тче Діони́сіе, не преста́й и ны́нѣ, вку́пѣ съ преподо́бнымъ Се́ргіемъ, проси́ти у Христа́ Бо́га Благовѣ́рному Импера́тору на́шему побѣ́ды на враги́, ца́рству Его́ благо́е устрое́ніе, всѣ́мъ лю́демъ ми́ръ и душа́мъ на́шимъ ве́лію ми́лость.

И ны́нѣ, богоро́диченъ по гла́су или́ пра́здниченъ.
Вхо́дъ, проки́менъ дне́ и чте́нія три́ преподо́бническія.

Прему́дрости Соломо́ни чте́ніе.

Пра́ведныхъ ду́ши въ руцѣ́ Бо́жіей, и не прико́снется и́хъ му́ка. Непщева́ни бы́ша во очесѣ́хъ безу́мныхъ умре́ти, и вмѣни́ся озлобле́ніе исхо́дъ и́хъ, и е́же отъ на́съ ше́ствіе — сокруше́ніе, они́ же су́ть въ ми́рѣ. Ибо предъ лице́мъ человѣ́ческимъ, а́ще и му́ку пріи́мутъ, упова́ніе и́хъ безсме́ртія испо́лнено. И вма́лѣ нака́зани бы́вше, вели́кими благодѣ́тельствовани бу́дутъ, я́ко Бо́гъ искуси́ я́ и обрѣ́те и́хъ досто́йны Себѣ́. Я́ко зла́то въ горни́лѣ, искуси́ и́хъ и, я́ко всепло́діе же́ртвенное, прія́тъ я́. И во вре́мя посѣще́нія и́хъ, возсія́ютъ, и я́ко и́скры по сте́блію, потеку́тъ. Су́дятъ язы́комъ и облада́ютъ людьми́, и воцари́тся Госпо́дь въ ни́хъ во вѣ́ки. Надѣ́ющіися На́нь разумѣ́ютъ и́стину и вѣ́рніи въ любви́ пребу́дутъ Ему́, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.

Прему́дрости Соломо́ни чте́ніе.

Пра́ведницы во вѣ́ки живу́тъ, и въ Го́сподѣ мзда́ и́хъ, и попече́ніе и́хъ у Вы́шняго. Сего́ ра́ди пріи́мутъ ца́рствіе благолѣ́пія и вѣне́цъ добро́ты отъ руки́ Госпо́дни, зане́ десни́цею покры́етъ я́ и мы́шцею защити́тъ и́хъ. Пріи́метъ всеору́жіе — рве́ніе свое́ и вооружи́тъ тва́рь въ ме́сть враго́мъ. Облече́тся въ броня́ пра́вды и возложи́тъ шле́мъ — су́дъ нелицемѣ́ренъ. Пріи́метъ щи́тъ непобѣди́мый — преподо́біе, поостри́тъ же напра́сный гнѣ́въ — во ору́жіе, спобо́ретъ же съ ни́мъ мíръ на безу́мныя. По́йдутъ праволу́чныя стрѣ́лы мо́лніины и, я́ко отъ благокру́гла лу́ка облако́въ, на намѣ́реніе полетя́тъ, и отъ каменоме́тныя я́рости испо́лнь паду́тъ гра́ды. Вознегоду́етъ на ни́хъ вода́ морска́я, рѣ́ки же потопя́тъ я́ на́гло. Сопроти́въ ста́нетъ и́мъ ду́хъ си́лы и, я́ко ви́хоръ, развѣ́етъ и́хъ, и опустоши́тъ всю́ зе́млю беззако́ніе, и злодѣ́йство преврати́тъ престо́лы си́льныхъ. Слы́шите у́бо, ца́ріе, и разумѣ́йте, навы́кните, судіи́ конце́въ земли́. Внуши́те держа́щіи мно́жества и гордя́щіися о наро́дѣхъ язы́ковъ, я́ко дана́ е́сть отъ Го́спода держа́ва ва́мъ и си́ла отъ Вы́шняго.

Прему́дрости Соломо́ни чте́ніе.

Пра́ведникъ, а́ще пости́гнетъ сконча́тися, въ поко́и бу́детъ. Ста́рость бо честна́ не многолѣ́тна, ниже́ въ числѣ́ лѣ́тъ исчита́ется. Сѣди́на же е́сть му́дрость человѣ́комъ, и во́зрастъ ста́рости — житіе́ нескве́рное. Благоуго́денъ Бо́гови бы́въ, возлю́бленъ бы́сть, и живы́й посредѣ́ грѣ́шникъ, преста́вленъ бы́сть. Восхище́нъ бы́сть, да не зло́ба измѣни́тъ ра́зума его́ или́ ле́сть прельсти́тъ ду́шу его́. Раче́ніе бо зло́бы помрача́етъ до́брая и паре́ніе по́хоти, премѣня́етъ у́мъ незло́бивъ. Сконча́вся вма́лѣ, испо́лни лѣ́та до́лга, уго́дна бо бѣ́ Го́сподеви душа́ его́, сего́ ра́ди потща́ся отъ среды́ лука́вствія. Лю́діе же ви́дѣвше и не разумѣ́вше, ниже́ поло́жше въ помышле́ніи таково́е, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.

На стихо́внѣ стихи́ры, гла́съ 5:

Ра́дуйся, о́тче Діони́сіе, мона́шествующихъ пра́вило извѣ́стнѣйшее, согрѣша́ющихъ немедли́тельный обличи́телю, ка́ющимся же ско́ро подава́яй проще́ніе, вражду́ющихъ ту́не на тя́ врачу́яй свои́мъ христоподража́тельнымъ смире́ніемъ и всѣ́мъ поле́зная промышля́яй: тѣ́мже и на́мъ, почита́ющимъ святу́ю па́мять твою́, испроси́ у Христа́ Бо́га ми́ръ и ве́лію ми́лость.

Сти́хъ: Честна́ предъ Го́сподемъ [сме́рть преподо́бныхъ Его́].

Ра́дуйся, богому́дре Діони́сіе, погрѣше́нія неразу́мныхъ обличи́вый и церко́вныя кни́ги до́брѣ испра́вивый, а́ще и мно́гія бѣды́ и напа́сти отъ зави́стныхъ за сіе́ претерпѣ́лъ еси́, но послѣди́ сла́вный страстоте́рпецъ за и́стину яви́лся еси́, отъ царя́ и патріа́рха почте́нъ, наипа́че же отъ Всеще́драго Бо́га на небеси́ ве́лію благода́ть пріи́мъ, Его́же моли́ низпосла́ти душа́мъ на́шимъ ми́ръ и ве́лію ми́лость.

Сти́хъ: Блаже́нъ му́жъ, боя́йся Го́спода, [въ за́повѣдехъ Его́ восхо́щетъ зѣло́].

Ра́дуйся, до́брый па́стырю слове́снаго ста́да, о́тче на́шъ Діони́сіе, ты́ бо су́етное дме́ніе заблужда́ющихъ и проти́вящихся тебѣ́ о́стрымъ обличе́нія сло́вомъ му́дрѣ низложи́лъ еси́ и су́етно бы́ти мудрова́ніе си́хъ показа́лъ еси́, а́ще и неисправле́ни пребыва́ху и мно́гія напа́сти тебѣ́ послѣди́ творя́ху, но ты́ прія́лъ еси́ отъ Бо́га оби́льную мзду́ трудо́въ твои́хъ и незло́биваго терпѣ́нія твоего́, тѣ́мже моли́ дарова́ти и на́мъ, чту́щимъ святу́ю па́мять твою́, ми́ръ и ве́лію ми́лость.

Сла́ва, гла́съ 8:

Мона́ховъ мно́жества, наста́вника тя́ почита́емъ, о́тче на́шъ Діони́сіе: твое́ю бо стезе́ю вои́стинну пра́во ходи́ти позна́хомъ. Блаже́нъ еси́, Христу́ рабо́тавъ, и вра́жію обличи́лъ еси́ си́лу, а́нгеловъ собесѣ́дниче и преподо́бныхъ соприча́стниче и пра́ведныхъ, съ ни́миже моли́ся Го́сподеви, поми́ловатися душа́мъ на́шимъ.

[И нынѣ, пра́здника или́ богоро́диченъ:

Безневѣ́стная Дѣ́во, Яже Бо́га неизрече́нно заче́нши пло́тію, Ма́ти Бо́га Вы́шняго, Твои́хъ рабо́въ мольбы́ пріими́, Всенепоро́чная, всѣ́мъ подаю́щи очище́ніе прегрѣше́ній, ны́нѣ на́ша моле́нія пріе́млющи, моли́ спасти́ся всѣ́мъ на́мъ.

На благослове́ніи хлѣ́бовъ: Тропа́рь свята́го, два́жды [пи́санъ на ма́лѣй вече́рни] и Богоро́дице Дѣ́во.., еди́ножды.



НА УТРЕНИ,
На Бо́гъ Госпо́дь: Тропа́рь пра́здника, два́жды. Сла́ва, преподо́бнаго. И ны́нѣ, пра́здника.

По 1-мъ стихосло́віи сѣда́ленъ, гла́съ 4: [1]

Благíй яре́мъ Христо́въ, ра́дуяся, всегда́ нося́, кро́токъ и смире́нъ се́рдцемъ, по словеси́ Госпо́дню, бы́лъ еси́, о́тче Діони́сіе, тѣ́мже и обрѣ́лъ еси́ вѣ́чный поко́й, е́же и на́мъ улучи́ти моли́твами твои́ми, мо́лимся. [Два́жды.]

Сла́ва, и ны́нѣ пра́здника.

По 2-мъ стихосло́віи сѣда́ленъ, гла́съ 4:

Блаже́нства о́наго жела́я, е́же Христо́съ ни́щимъ ду́хомъ обѣща́, вся́кое до́лу влеку́щее мудрова́ніе отъ себе́, му́дре, отри́нулъ еси́, ничесо́же отъ вре́менныхъ возжела́въ, тѣ́мже и обогати́лся еси́ отъ Бо́га небе́сными дарова́ніи, прославля́я съ го́рними си́лами Содѣ́теля вся́ческихъ. [Два́жды.]

Сла́ва, и ны́нѣ пра́здника.

По поліеле́и сѣда́ленъ, гла́съ 8:

Егда́ съ поруга́ніемъ, зно́ю вельми́ належа́щу, чрезъ ве́сь де́нь, во дворѣ́ держи́мь, бы́лъ еси́ во око́вахъ, жа́ждею ве́ліею томи́мь, тогда́ наде́ждею прохлажде́нія о́ною живо́ю водо́ю, ю́же Христо́съ вѣ́рующимъ въ Него́ обѣща́, укрѣпля́лъ еси́ себе́, и, наде́жди не погрѣши́въ, стяжа́лъ еси́ вну́трь исто́чникъ воды́, теку́щъ въ живо́тъ вѣ́чный, да не вжа́ждешися во вѣ́ки. [Два́жды.]

Сла́ва, и ны́нѣ, богоро́диченъ:

О Тебѣ́ ра́дуется, Благода́тная, вся́кая тва́рь, а́нгельскій собо́ръ и человѣ́ческій ро́дъ, освяще́нный хра́ме и раю́ слове́сный, дѣ́вственная похвало́, изъ Нея́же Бо́гъ воплоти́ся, и Младе́нецъ бы́сть, пре́жде вѣ́къ Сы́й Бо́гъ на́шъ: ложесна́ бо Твоя́ престо́лъ сотвори́ и чре́во Твое́ простра́ннѣе небе́съ содѣ́ла. О Тебѣ́ ра́дуется, Благода́тная, вся́кая тва́рь, сла́ва Тебѣ́.

Та́же степе́нна, 4-го гла́са, антифо́нъ 1-й. Проки́менъ, гла́съ 4: Честна́ предъ Го́сподемъ* сме́рть преподо́бныхъ Его́. Сти́хъ: Что́ возда́мъ Го́сподеви о всѣ́хъ, я́же воздаде́ ми? Вся́кое дыха́ніе... Ева́нгеліе Матѳе́я, зача́ло 43.

По 50-мъ псалмѣ́ стихи́ра, гла́съ 6:

Діони́сія преподо́бнаго досто́йно вси́ ублажи́мъ, оте́чества похвалу́ и Це́ркве Россíйскія утвержде́ніе, предстоя́ща ны́нѣ Святѣ́й Тро́ицѣ и те́плѣ моля́щася о душа́хъ на́шихъ.]

Кано́нъ пра́зднику со ирмосо́мъ на 6 и свята́го на 8, гла́съ 4.

Кано́нъ моле́бный преподо́бному Діони́сію, архимандри́ту Тро́ицкаго Се́ргіева монастыря́, гла́съ 4. Его́же краегране́сіе: Мольбу́ ти приношу́, Діони́сіе преподо́бне. Творе́ніе грѣ́шнаго и́нока Си́мона.
Пѣ́снь 1.

Ирмо́съ: Триста́ты крѣ́пкія, Рожде́йся отъ Дѣ́вы, безстра́стія во глубинѣ́, души́ трича́стное потопи́, молю́ся, да Тебѣ́, я́ко въ тимпа́нѣ, во умерщвле́ніи тѣлесе́ побѣ́дное воспою́ пѣ́ніе.

Мо́ря жите́йскаго волна́ми потопля́емь и напа́стьми лю́тыми помраче́нный умо́мъ, молю́ся: при́зри, Го́споди Бо́же мо́й, на смире́ніе души́ моея́ и просвѣти́ смы́слъ помраче́нный, да восхвалю́ до́блестнаго страда́льца, преподо́бнаго Діони́сія.

Очи души́ и се́рдца къ тебѣ́, преподо́бне Діони́сіе, возложи́хъ, суеты́ мірскíя бѣ́гая, и ны́нѣ припа́даю ти́ и вопію́: спаси́ мя, па́дшаго мно́гими грѣхи́, и испра́ви пу́ть мо́й ко спасе́нію.

Лѣ́ностію содержи́мь е́смь лю́тѣ и во глубину́ прегрѣше́нія впадо́хъ, простри́ ми́ ру́ку по́мощи, преподо́бне Діони́сіе, и исхити́ мя отъ си́хъ зо́лъ хода́тайствомъ твои́мъ, я́ко да спасе́нъ бы́въ тобо́ю, ублажа́ю тя́ при́сно.

Богоро́диченъ: Благоутро́бнымъ и ти́химъ Свои́мъ о́комъ воззри́ на мя́, раба́ Твоего́, и услы́шати потщи́ся, Блага́я Помо́щнице, исполня́ющи мольбу́ Своего́ раба́, Пречи́стая Богоро́дице, разоря́ющи совѣ́ты лука́выя.

Пѣ́снь 3.

Ирмо́съ: Утвержда́яй гро́мъ и созида́яй ду́хъ, утверди́ мене́, Го́споди, да Тя́ пою́ и́стинно и творю́ во́лю Твою́, я́ко нѣ́сть свя́тъ, я́ко Ты́, Бо́же на́шъ.

Утѣсня́емь е́смь грѣхи́ мно́гими, преподо́бне Діони́сіе, и напа́стьми лю́тыми содержи́мь, къ тебѣ́ прибѣга́ю: спаси́ мя, тре́бующаго твоея́ по́мощи.

Ты́ иногда́ въ разли́чныхъ скорбѣ́хъ и напа́стѣхъ су́щимъ помо́щникъ обрѣ́лся еси́. И ны́нѣ вопію́, я́ко къ те́плому своему́ хода́таю: спаси́ мя отъ находя́щихъ ми́ зо́лъ, преподо́бне Діони́сіе.

Изба́ви мя́ отъ язы́ка льстивоглаго́ливаго, я́ко благíй предста́тель, и спасе́на мя́ покажи́ ны́нѣ и въ де́нь Суда́, моли́твами твои́ми, преподо́бне Діони́сіе.

Богоро́диченъ: Потопля́етъ мя́ волна́ грѣхо́вная и бу́ря безмѣ́стныхъ помышле́ній. Умилосе́рдися, Всенепоро́чная, и ру́ку по́мощи, я́ко Ми́лостива, простри́, да, спаса́емь, ублажа́ю Тя́.

Сѣда́ленъ, гла́съ 3:

Все́ житіе́ мое́ въ лѣ́ности мно́зѣй преидо́хъ, и ны́нѣ прибли́жихся къ вре́мени исхо́да моего́, и отъ вра́гъ мои́хъ устраша́юся, да не исто́ргнутъ ду́шу мою́ и во глубину́ поги́бели сведу́тъ. Но къ тебѣ́ прибѣга́ю, па́стырю своему́, преподо́бне Діони́сіе: уще́дри мя́, раба́ твоего́, и изба́ви мя́ отъ озлобле́нія си́хъ моли́твами твои́ми. [Два́жды.]

Сла́ва, и ны́нѣ, богоро́диченъ:

Мно́гими прегрѣше́ніи а́зъ, блу́дный, у́мъ помрачи́въ, вопію́ къ Твоему́ крѣ́пкому заступле́нію, Богоро́дице: просвѣти́ души́ моея́ зѣ́ницы, и возсія́й ми покая́нія свѣ́тлую зарю́, и облецы́ мя́ во ору́жіе свѣ́та, Богороди́тельнице Чи́стая.

Пѣ́снь 4.

Ирмо́съ: Се́й Бо́гъ на́шъ, отъ Дѣ́вы вопло́щся и естество́ обожи́въ, Его́же воспѣва́юще, вопіе́мъ: сла́ва си́лѣ Твое́й, Го́споди.

Ру́цѣ воздѣ́ти не смѣ́ю ко Спаси́телю своему́ Бо́гу, ве́сь оскверне́нъ нечи́стыми дѣ́лы: испроси́, преподо́бне, отпуще́ніе грѣхо́въ мои́хъ.

Испра́ви, преподо́бне Діони́сіе, моли́тву раба́ твоего́, я́ко кади́ло благово́нно, ко Го́споду Іису́су Христу́, да твои́мъ заступле́ніемъ получу́ ми́лость.

Нечи́стыми по́мыслы оскверни́хъ ду́шу мою́ и въ лѣ́ности все́ житіе́ ижди́хъ, къ тебѣ́ прибѣга́ю, преподо́бне, очище́ніе ми́ пода́ждь моли́твами твои́ми.

Богоро́диченъ: Оружіемъ уя́звлена мя́ грѣхо́внымъ и лежа́ща, исцѣли́ мя дѣ́йственными Свои́ми мольба́ми, Пренепоро́чная Влады́чице, и уны́нія тму́ разжени́.

Пѣ́снь 5.

Ирмо́съ: Ча́сть моя́ еси́, Го́споди, и сла́ва лица́ моего́: Ты́ бо мя́ изъ тмы́ невѣ́дѣнія еди́нъ изба́вилъ еси́ богоразу́міемъ. И Тебѣ́ молю́ся, Христе́: да́руй рабу́ Твоему́ ми́ръ, я́ко Человѣколю́бецъ.

Шата́ніе ю́ности и лицемѣ́ріе ста́рости — обоя́ безу́міе стяжа́хъ и ве́сь студа́ напо́лненъ бы́хъ. Но со слеза́ми къ тебѣ́ вопію́: помо́щникъ ми́ бу́ди ко спасе́нію.

Узрѣ́хъ скве́рну души́ моея́, въ зерца́ло дѣ́лъ мои́хъ прини́кнувъ, и во окри́нѣ сле́зъ мои́хъ измы́тися подви́гнухся; испроси́ ми, преподо́бне, у Спа́са вре́мя покая́нія, да получу́ отпуще́ніе грѣхо́въ.

Да́нное ми́ бога́тство духо́вное пре́жде тѣле́сными сластьми́ злѣ́ ижди́хъ. Но, я́ко блу́днаго, преподо́бне, уще́дривъ, оправда́й, ускори́ на по́мощь пре́жде кончи́ны моея́ и спаси́ мя́.

Богоро́диченъ: Исцѣли́ душе́вныя моя́ я́звы, Богоро́дице, заступи́ мя́, Дѣви́це, и изба́ви мя́, раба́ Твоего́, отъ оклевета́нія, и навѣ́та, и развраще́нія непра́ведна.

Пѣ́снь 6.

Ирмо́съ: Бу́ря мя́ помышле́ній пости́гши, во глубину́ низвлачи́тъ мя́ безмѣ́рныхъ грѣхо́въ, но Ты́, Упра́вителю Благíй, предвари́въ, упра́ви, я́ко проро́ка, и спаси́ мя.

Отъ пеле́нъ въ плѣ́нъ враго́въ веде́нъ бы́хъ, беззако́ніемъ кипя́, но тебе́ наста́вника стяжа́въ и твоея́ по́мощи тре́буя, зову́: спаси́ мя́, упова́ющаго на тя́.

На умоле́ніе мое́ умилосе́рдися и ра́дость въ печа́ли мѣ́сто да́руй, да пою́ при́сно, преподо́бне Діони́сіе, и вопію́ ти́ прилѣ́жно: изба́ви мя́ отъ навѣ́та вра́жія.

Истяза́нія мя́ въ ча́съ стра́шный свободи́ моли́твами твои́ми, преподо́бне Діони́сіе, и бѣсо́вскія пре́лести отъ мене́ отжени́ и му́ки вѣ́чныя изба́ви мя́.

Богоро́диченъ: Собо́рище на ны́ лука́вое собра́ся, непра́ведно борю́щее на́съ, Пречи́стая Богоро́дице: си́хъ низложи́, и непра́ведное со́нмище разжени́, и душа́мъ на́шимъ поле́зная сотвори́.

Конда́къ, гла́съ 6:

Свѣ́тъ Трисія́нный, всели́выйся въ ду́шу твою́, сосу́дъ избра́нъ показа́ тя, вѣща́юща боже́ственная лю́демъ, исповѣ́дникъ Бо́жія сло́ва яви́лся еси́, и прилага́ющихъ Божеству́ веще́ственный о́гнь я́вственно обличи́лъ еси́, и злосла́вныхъ смы́слы, я́ко паучи́нное пряде́ніе, растерза́лъ еси́, благоче́стія сто́лпъ и забра́ло тве́рдое мíрови показа́лся еси́ и сего́ ра́ди отъ вселе́нскаго патріа́рха ди́внѣ похвале́нъ бы́лъ еси́. Мы́ же благода́рными гла́сы, веселя́щеся, вопіе́мъ ти́: ра́дуйся, о́тче на́шъ, Діони́сіе преподо́бне.

Икосъ:

Грѣхо́въ ми́ разрѣше́ніе пода́ждь и е́же пѣ́ти по достоя́нію по́двиги твоя́, Діони́сіе преподо́бне, въ ро́въ бо глубо́къ вве́рженъ е́смь неразу́мія, а́ще не ты́ ми́ пода́си, недосто́йному, сло́во и язы́къ непосты́денъ, воспѣ́ти со дерзнове́ніемъ си́це: ра́дуйся, небе́сный человѣ́че и земны́й а́нгеле, я́ко съ пло́тію на земли́ безпло́тныхъ житіе́ показа́лъ еси́; ра́дуйся, па́стырю всеизря́дный, я́ко послѣ́довалъ еси́ стопа́мъ преподо́бнаго Се́ргія, ста́до твое́ упа́слъ еси́ и и́нокъ мно́жество до́брѣ упра́вилъ еси́; ра́дуйся, терпѣ́нія сто́лпе и смире́нныя кро́тости высото́; ра́дуйся, стра́ннымъ прибѣ́жище и безнаде́жнымъ неча́емое упова́ніе; ра́дуйся, скорбя́щихъ утѣше́ніе и безпомо́щныхъ помо́щниче; ра́дуйся, духодви́жимая уста́ и язы́че богоглаго́ливый, я́ко во вре́мя всемíрныхъ напа́стей наро́ду вѣща́лъ еси́ и царю́ и патріа́рху мно́гу по́льзу сотвори́лъ еси́; ра́дуйся, врачу́ прему́дрый я́звеннымъ, я́ко при́сный оте́цъ о ни́хъ промышля́я, о́выхъ врачу́я, о́выхъ же съ пѣ́ніемъ подоба́ющимъ и съ напу́тіемъ вѣ́чнаго живота́ отпуща́я; ра́дуйся, пита́телю благíй си́рымъ и больны́мъ промы́шленниче и упокое́ніе въ до́брѣй пи́щи и питіи́, са́мъ же, благодаря́ Бо́га, овся́нымъ хлѣ́бомъ и водо́ю дово́льствовавыйся; ра́дуйся, свы́ше отъ Бо́га да́ръ воспріи́мый умноже́ніемъ хлѣ́ба, я́ко и ма́лъ сосу́децъ не оскудѣ́ на пи́щу бра́тіи и наро́ду мно́гу; ра́дуйся, проповѣ́дниче Бо́жія Сло́ва, Правосла́вія догма́ты утвержда́я, злосла́вныхъ же смы́слы изъ ко́рене исторга́я; ра́дуйся, страда́льче предо́брый, изгна́нія и ра́ны на тѣлеси́ му́жески претерпѣ́въ, по и́стинѣ побора́я; ра́дуйся, церко́вное утвержде́ніе и умире́ніе мíру. Ра́дуйся, наста́вниче спасе́нія на́шего, Діони́сіе преподо́бне.

Пѣ́снь 7.

Ирмо́съ: Не преда́ждь на́съ до конца́ и́мене Твоего́ ра́ди, и не разори́ завѣ́та Твоего́, и не отста́ви ми́лости Твоея́ отъ на́съ, Го́споди Бо́же оте́цъ на́шихъ, препѣ́тый во вѣ́ки.

Испыта́тель бы́хъ чужи́хъ грѣхо́въ, а своего́ беззако́нія утаи́тель, оправда́юся язы́комъ, дѣ́лы же въ нече́стіе схожду́. Сего́ ра́ди молю́ тя, преподо́бне, да очи́стиши мя́ отъ беззако́нія моего́.

Еще ми́лости и заступле́нія у тебе́ прошу́, Діони́сіе преподо́бне, не возгнуша́йся моея́ смра́дности, поми́луй мя́, милосе́рдовавъ о мнѣ́, и изведи́ мя́ ко исправле́нію моли́твами твои́ми.

Покро́въ мо́й и прибѣ́жище ты́ еси́, и заступле́ніе, и при́сное хвале́ніе ми́ о тебѣ́, преподо́бне Діони́сіе, не пре́зри мя́, раба́ твоего́, упова́ющаго на тя́.

Богоро́диченъ: Раболѣ́пно ве́сь преклоня́юся, окая́нный, и отъ се́рдца моего́ вопію́, ру́цѣ распросте́ръ, колѣ́на преклоня́ю, и молю́ Тя́, Пречи́стую Дѣ́ву, изба́витися ско́ро бѣ́дъ, при́сно находя́щихъ отъ навѣ́та чужда́го.

Пѣ́снь 8.

Ирмо́съ: Земля́ и вся́, я́же на не́й, мо́ре и вси́ исто́чницы, небеса́ небе́съ, свѣ́тъ и тма́, мра́зъ и зно́й, сы́нове человѣ́честіи, свяще́нницы, благослови́те Го́спода и превозноси́те Его́ во вѣ́ки.

Еди́нымъ спаси́тельнымъ путе́мъ устро́й мя́ ше́ствовати, преподо́бне Діони́сіе, моли́твами твои́ми непреткнове́нно, я́ко руководи́тель и наста́вникъ къ вѣ́чному животу́.

Пла́вая въ пучи́нѣ настоя́щаго житія́, помышля́ю бе́здну мно́гихъ мои́хъ зо́лъ и не и́мамъ окорми́теля помышле́ніемъ, преподо́бне. Спаси́ мя, обурева́емаго при́сно, и пода́ждь ру́ку по́мощи.

Объя́тъ бы́хъ дрема́ніемъ злы́мъ, окая́нный, и со́нъ отча́янія покры́ мя, беззако́ннаго. Но ты́, наста́вниче мо́й, при́зри на мя́ ми́лостивнымъ о́комъ, ви́ждь смире́ніе мое́ и спаси́ мя.

Богоро́диченъ: Душе́вныхъ ми́ сле́зъ да́ждь ка́плю, Пречи́стая Богоро́дице, омыва́ющу скве́рну всю́ мои́хъ дѣя́ній и лука́вая помышле́нія, всю́ очища́ющу души́ моея́ нечистоту́ и Це́рковь творя́щу мя́ Бо́жія Ду́ха.

Пѣ́снь 9.

Ирмо́съ: Велича́емъ вси́ человѣколю́біе Твое́, Христе́ Спа́се на́шъ, Сла́во ра́бъ Твои́хъ и Вѣ́нче вѣ́рныхъ, возвели́чивый па́мять Ро́ждшія Тя́.

Омраче́нный у́мъ мо́й просвѣти́, и ду́шу мою́ болѣ́знующую исцѣли́, преподо́бне Діони́сіе, и огня́ неугаси́маго исхити́, и вѣ́чныхъ му́къ неизглаго́ланныхъ изба́ви мя́.

Безслове́сными страстьми́ прекло́нься, во глубину́ поги́бели снидо́хъ, и пла́мени сожже́ніе са́мъ ся́ содѣ́лахъ, и нико́ея же по́мощи имѣ́ю, ра́звѣ тебе́, преподо́бне.

На тя́ наде́жду спасе́нія моего́ возлага́ю, преподо́бне, и къ тебѣ́ прибѣга́ю: не пре́зри мя́, во грѣсѣ́хъ погиба́ющаго, спаси́ мя благоутро́бнымъ твои́мъ заступле́ніемъ.

Богоро́диченъ: Еди́на боля́щихъ посѣще́ніе, еди́на па́дшихъ исправле́ніе, Влады́чице, еди́на къ Бо́гу руководи́тельнице и вхо́дъ, еди́на хода́таице вѣ́чныхъ бла́гъ, поми́луй мя́, еди́наго, и́же па́че всѣ́хъ согрѣши́вшаго.

Свѣти́ленъ:

Свѣ́тлымъ житіе́мъ твои́мъ свѣ́тъ ста́ду твоему́ бы́лъ еси́, преподо́бне Діони́сіе, тѣ́мже и на́ша омраче́нная грѣхо́мъ сердца́ свѣ́томъ покая́нія просвѣти́ и на пу́ть за́повѣдей Госпо́днихъ напра́ви. [Два́жды.]

[Сла́ва, и ны́нѣ, пра́здника или́] богоро́диченъ:

Свѣ́тъ ро́ждшая мíру, Пречи́стая Влады́чице, просвѣти́ у́мныя о́чи души́ моея́ и спаси́тельныхъ сле́зъ исто́чники да́руй ми́, рабу́ Твоему́, я́ко да по до́лгу Тя́ ублажа́ю.

На хвали́техъ стихи́ры на 6: три́ пра́здника и три́ свята́го, гла́съ 4:

Егда́ не бы́сть гра́да, ни ве́си, ни де́бри, е́же укры́тися лю́демъ россíйскимъ отъ мучи́тельства враго́въ, и́мже грѣ́хъ ра́ди свои́хъ пре́дани бы́ша, тогда́ ты, преподо́бне Діони́сіе, крѣ́пкое прибѣ́жище и наде́жное приста́нище всѣ́мъ стра́ждущимъ яви́лся еси́. Тѣ́мже и на́съ мучи́тельства де́монскаго изба́ви и отъ страсте́й свободи́ моли́твами твоими.

Но́щь вся́ка де́нь тебѣ́ бы́сть, преподо́бне Діони́сіе, егда́ о избавле́ніи оте́чества твоего́ те́плѣ со слеза́ми и во́племъ крѣ́пкимъ моли́лся еси́, тѣ́мже и возра́довался еси́, спасе́ніе зря́ и ми́рное люде́й пребыва́ніе, е́же и на́мъ отъ Бо́га испроси́ моли́твами твои́ми.

Нападо́ша иногда́ на преподо́бнаго Се́ргія, моля́щася въ созда́нной и́мъ це́ркви, бѣсо́вскія по́лчища во о́бразѣ лито́вскихъ во́инскихъ люде́й, хва́лящеся мѣ́сто сіе́ разори́ти, но моли́твою его́ прогна́ни бы́ша: се́ промысли́тельное проявле́ніе бы́сть, е́же послѣди́, во твое́ вре́мя, дѣ́ломъ соверши́ся, егда́ оби́тель сія́ до́лгое вре́мя лито́вскими людьми́ вою́ема бѣ́, и́же тща́хуся о́ную въ коне́цъ разори́ти, но самѣ́хъ богопораже́нною я́звою тру́пія досто́йно падо́ша, псало́мски, при а́дѣ. Тѣ́мже и ны́нѣ не преста́й, преподо́бне Діони́сіе, спаса́ти оби́тель сію́ и вся́ гра́ды и страны́ христіа́нскія отъ всѣ́хъ навѣ́тъ вра́жіихъ моли́твами твои́ми.

Сла́ва, гла́съ то́йже:

По мно́гихъ трудѣ́хъ и страда́ніихъ, я́же подъя́лъ еси́ о спасе́ніи оте́чества и исправле́ніи церко́внѣмъ, че́сть старѣ́йшинства и пе́рвенства въ бра́тіяхъ твои́хъ тебѣ́ отъ вселе́нскаго патріа́рха даде́ся, преподо́бне Діони́сіе, отъ Бо́га же небе́сное Ца́рство и несконча́емую ра́дость наслѣ́довалъ еси́, е́же и на́мъ испроси́ моли́твами твои́ми.

И ны́нѣ, пра́здника.
Славосло́віе вели́кое. Та́же ектеніи́ и отпу́стъ.



НА ЛИТУРГІИ,

Блаже́нна отъ кано́на свята́го, пѣ́снь 3 и 6. Проки́менъ, [гла́съ 7]: Честна́ предъ Го́сподемъ* сме́рть преподо́бныхъ его́. [Сти́хъ: Что́ возда́мъ Го́сподеви о всѣ́хъ, я́же воздаде́ ми́?] Апо́столъ, къ Гала́томъ, зача́ло 213. [Аллилу́ія, гла́съ 6: Блаже́нъ му́жъ, боя́йся Го́спода, въ за́повѣдехъ Его́ восхо́щетъ зѣло́. Сти́хъ: Си́льно на земли́ бу́детъ сѣ́мя его́.] Ева́нгеліе отъ Луки́, зача́ло 24. Прича́стенъ: Въ па́мять вѣ́чную [бу́детъ пра́ведникъ, отъ слу́ха зла́ не убои́тся].

Примѣчаніе:
[1] Въ службѣ 1909 года отсутствуютъ сѣдальны по 1-мъ и 2-мъ стихословіяхъ, по поліелеи и стихира по 50-мъ псалмѣ. Добавлены по изданію: Минея Май. Часть вторая. М., 2002., с. 24-25.

Источникъ: Слу́жба преподо́бному отцу́ на́шему Діони́сію, архимандри́ту Тро́ице-Се́ргіева монастыря́, Ра́донежскому чудотво́рцу, его́же па́мять соверша́ется Ма́ія въ 12-й де́нь. — М.: Сѵнода́льная Тѵпогра́фія, 1909. — 32 с.

/ Къ оглавленію раздѣла /


Наверхъ / Къ титульной страницѣ

0