Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - среда, 16 августа 2017 г. Сейчасъ на порталѣ посѣтителей - 28.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣсяца Маія въ 12-й день.
Кано́нъ преподо́бному отцу́ на́шему Діони́сію, архимандри́ту Се́ргіевы Ла́вры, Ра́донежскому чудотво́рцу.

Тропа́рь, гла́съ 3:

Земна́я прельща́ющая очеса́ міролю́бцевъ, возненави́дѣлъ еси́, о́тче богоно́сне Діони́сіе! За уме́ты та́ вмѣни́въ, ше́ствуя путе́мъ ско́рбнымъ, въ терпѣ́ніи до́бръ во́инъ Христо́въ яви́лся еси́, побѣди́въ стра́сти мíра, бы́лъ до кончи́ны непоколеби́мый благоче́стія побо́рникъ. Тѣ́мже мы́ дне́сь, соверша́я свяще́нную па́мять твою́, духо́вными тя́ пѣ́сньми ублажа́емъ и смире́нно мо́лимъ, да, предстоя́ престо́лу Го́спода Бо́га, хода́тайствуеши о спасе́ніи ду́шъ на́шихъ.

Сла́ва, и ны́нѣ, богоро́диченъ:

Вся́ еди́нымъ содѣ́лавъ сло́вомъ, восхотѣ́въ ме́ртвыхъ сооживи́ти Бо́гови, и тлѣ́ніе облещи́ въ нетлѣ́ніе и вознести́ на не́бо, во утро́бу неискособра́чныя Дѣ́вы всели́лся еси́, Юже велича́юще, благослови́мъ Тя́.

[Канонъ], гласъ 6.

Пѣ́снь 1.

Отъ млады́хъ ногте́й, богоно́сне Діони́сіе, кро́тость ве́лію возъимѣ́лъ еси́: дѣ́тская глумле́нія презрѣ́въ, смиренному́дріе серде́чно яви́лъ, усе́рдно стра́ху Бо́жію внима́я.

Якоже Симео́нъ, Ду́хомъ прови́дя, прія́въ на ру́ки Предвѣ́чнаго Младе́нца, предре́клъ спасе́ніе человѣ́ковъ, та́кожде вну́треннима очи́ма прозрѣ́въ оте́цъ тво́й духо́вный бы́ти имѣ́ющее твое́ житіе́, глаго́лаше: се́й сы́нъ на́шъ бу́детъ на́мъ оте́цъ.

Не козлогласова́ніямъ и ины́мъ язы́комъ поуча́шеся, я́коже обы́чай е́сть дѣ́темъ имени́тыхъ, мірска́я внима́ющихъ, но стра́хъ Бо́жій всади́лъ еси́ въ се́рдцѣ твое́мъ, вѣ́дящи, я́ко тѣле́сное обуче́ніе вма́лѣ поле́зно, а благоче́стіе на все́ поле́зно е́сть.

Яко отъ чре́ва ма́тери твоея́ утверди́ся се́рдце твое́ во Го́сподѣ, и измла́да примѣ́ръ добродѣ́тели показа́лъ еси́. Тѣ́мъ тя́ благоче́стно восхваля́я, велича́емъ дарова́вшаго ти́ душе́вный ра́зумъ и просвѣти́вшаго тя́ свѣ́томъ и́стины Христа́ Жизнода́вца.

Богоро́диченъ: Досто́йно е́сть блажи́ти Тя́, Пренепоро́чную и Честнѣ́йшую херуви́мъ, я́ко чрезъ Тя́ содѣ́лася спасе́ніе мíру и свѣ́тъ благода́ти облиста́ сѣдя́щихъ во тьмѣ́ сме́ртнѣй.

Пѣ́снь 3.

Ирмо́съ: Нѣ́сть свя́тъ, я́коже Ты́, Го́споди Бо́же мо́й, вознесы́й ро́гъ вѣ́рныхъ Твои́хъ, Бла́же, и утверди́вый на́съ на ка́мени исповѣ́данія Твоего́.

Прича́стенъ содѣ́лавшися бра́ку, искуше́ніе прія́лъ еси́ отъ Бо́га лише́ніемъ други́ни твоея́, я́коже Іовъ, но сласте́мъ мíра сего́ не порабо́тилъ себе́ и, плотска́я жела́нія побѣди́въ, яви́лся еси́ дово́ленъ бы́ти къ несе́нію бре́мени ева́нгельскаго, е́же тебѣ́ бы́сть легко́ и бла́го.

Вои́стинну ти́ бла́го бы́сть, я́ко да не преткне́ши но́гу твою́ о ка́мень собла́зновъ мíра сего́: прія́въ щи́тъ вѣ́ры, обле́клся еси́ въ шле́мъ спасе́нія и, возложи́въ на ся́ броню́ пра́вды, соприче́лъ себе́ ли́ку подви́жниковъ духо́вныхъ.

Да красу́ется гра́дъ Ста́рица не ди́вными и восхища́ющими зрѣ́ніе оче́съ вещми́, но зрѣ́въ ю́наго ста́рца Діони́сія.

Не быва́етъ свѣти́льникъ подъ спу́домъ, но на свѣ́щницѣ поставля́ютъ его́, да всѣ́ми ви́димъ бу́детъ; та́кожде и ты́, о́тче Діони́сіе, благоуго́денъ бы́въ Бо́гови, получи́лъ посѣще́ніе во избра́нныхъ Его́, содѣ́лавшися наста́вникомъ и назида́телемъ ста́да духо́внаго.

Не истощи́ма е́сть си́ла Бо́жія чудодѣ́йствующая: прославля́етъ Бо́гъ святы́хъ Свои́хъ, да по́здные пото́мки, не прилѣпля́ясь къ тлѣ́ннымъ и скороги́бнущимъ веща́мъ, па́че всего́ пеку́тся о свое́мъ преселе́ніи на не́бо. Тѣ́мже и дарова́ на се́мъ пути́ свѣти́льники, уже́ возне́сшіеся, въ ни́хже свѣ́титъ на́мъ и Діони́сій святы́й.

Сѣда́ленъ, [гла́съ 3]:

Пріиди́те къ сему́ гро́бу, глаго́лющіеся бы́ти мудры́ и объюродѣ́вшіе, ослѣпи́вшись помышле́ніями вѣ́ка сего́, зри́те чу́до Ева́нгелія, я́ко мы́ съ ме́ртвымъ глаго́лемъ, и то́й на́мъ отвѣщава́етъ: о́тче Діони́сіе, рцы́ на́мъ сло́во утѣше́нія. Не услы́шите, краснозлоглаго́льствующіе мудрецы́ вѣ́ка сего́, слове́съ пра́веднаго, но правовѣ́рніи, прини́кнувъ къ его́ гро́бу, къ святы́мъ его́ оста́нкамъ, я́вственнѣ слы́шатъ, я́ко сме́рть вѣ́рныхъ су́ть па́сха и тлѣ́нное и́хъ содѣ́лывается нетлѣ́нными.

Сла́ва, и ны́нѣ, богоро́диченъ:

Тобо́ю, Дѣ́во Чи́стая, пріе́млемъ ра́дость: родила́ бо всѣ́хъ освяща́ющаго Христа́ и Бо́га на́шего. Тѣ́мже Тя́, я́ко Ма́терь Зижди́теля спасе́нія человѣ́ковъ, проповѣ́дуемъ.

Пѣ́снь 4.

Ирмо́съ: Христо́съ моя́ си́ла, Бо́гъ и Госпо́дь, честна́я Це́рковь боголѣ́пно пое́тъ, взыва́ющи, отъ смы́сла чи́ста, о Го́сподѣ пра́зднующи.

Удиви́лъ еси́, Го́споди, пути́ Твоя́ въ путе́хъ пра́ведныхъ, просвѣща́я на́съ чрезъ возлю́бленныхъ Твои́хъ и содѣ́ловая на́мъ въ ни́хъ спасе́ніе, е́же яви́лъ и во уго́дникѣ Твое́мъ Діони́сіи.

Вну́тренними смяте́ніями егда́ напа́ствуема бѣ́ Россíя, та́кожде и внѣ́шними, воздви́глъ еси́, Го́споди, подвигополо́жниковъ духо́вныхъ, и́же безъ меча́ и стрѣ́лъ и не кова́рствомъ укроти́ша де́рзость враго́въ, но си́лою смире́нія и свя́тости, въ ли́кѣ ко́ихъ воспѣва́емъ и тя́, о́тче Діони́сіе.

Ни я́рость звѣ́рская, ни муче́нія злоны́рливыхъ враго́въ не устраши́ша тебе́, но, исповѣ́дникъ бы́въ Бо́жія сло́ва, увѣща́я наро́дъ, и царю́, и патріа́рху, бди́тельному оте́чества па́стырю, мно́гу сотвори́лъ еси́ по́льзу.

Удивля́яся, вѣ́рніи Россíяне, всеблаже́нному патріа́рху Гермоге́ну, почти́те дне́сь па́мять воспѣва́емаго на́ми Діони́сія, и́же, съ ни́мъ вку́пѣ побо́рствуя о вѣ́рѣ, я́ко наде́ждѣ спасе́нія оте́чества, мно́гія подъя́лъ озлобле́нія.

Богоро́диченъ: Аще зря́ще то́кмо о́бразъ царя́, на земли́ су́ща благодѣ́тельна и благочести́ва, на пе́рси свои́ восхити́тельнѣ его́ взима́ютъ, я́ко изобразу́юща христа́ Го́спода; возвели́чимъ у́бо, правосла́вніи, Носи́вшую во утро́бѣ Свое́й Царя́ царе́й, Благодѣ́теля всему́ мíру, Ея́же моли́твами, при и́скреннемъ взыва́ніи на́шемъ, Бо́гъ, ми́ра Оте́цъ, вознесе́тъ Благовѣ́рнаго Импера́тора на́шего.

Пѣ́снь 5.

Ирмо́съ: Бо́жіимъ свѣ́томъ Твои́мъ, Бла́же, у́тренюющихъ Ти́ ду́ши любо́вію озари́, молю́ся, Тя́ вѣ́дѣти, Сло́вѣ Бо́жій, и́стиннаго Бо́га, отъ мра́ка грѣхо́внаго взыва́юща.

Истиннымъ сло́ва Бо́жія разумѣ́ніемъ одаре́нъ бы́лъ еси́ свы́ше, богому́дре Діони́сіе, и сего́ ра́ди па́че други́хъ поручено́ тебѣ́ испра́вити погрѣ́шности, въ церко́вныя кни́ги по невѣ́дѣнію вше́дшія.

Подража́я блаже́нному Макси́му Гре́ку, и́же бы́въ истре́бованъ испра́вити преведе́нныя кни́ги, но отъ невѣ́жествующихъ пострада́ за и́стину, и ты́, святы́й Діони́сіе, бы́въ ему́ послѣ́дователь, се́й же жре́бій имѣ́въ, и́стину отщепи́вшимся показу́еши.

Аще бы имѣ́ли да́ръ такова́го вѣ́дѣнія, я́коже сла́вимый ны́нѣ Діони́сій, согла́сіе водвори́лося бы въ на́съ; но, о Пресвяты́й Бо́же! вѣ́руемъ, я́ко и си́хъ, невѣ́дущихъ Писа́нія, приведе́ши во дво́ръ Тво́й моли́твами и примѣ́ромъ богому́драго Діони́сія.

Богоро́диченъ: Твоя́ пѣсносло́вцы, Богоро́дице, духо́вно утверди́вшеся, испо́лнятся Ду́ха, не уста́ми, но се́рдцемъ исповѣ́дающе Тя́, честнѣ́йшую херуви́мъ и благослове́ннѣйшую въ человѣ́цѣхъ.

Пѣ́снь 6.

Ирмо́съ: Жите́йское мо́ре, воздвиза́емое зря́ напа́стей бу́рею, къ ти́хому приста́нищу Твоему́ прите́къ, вопію́ Ти: возведи́ отъ тли́ живо́тъ мо́й, Многоми́лостиве.

Кто́ исповѣ́сть благонра́віе и ще́дрость твою́, о́тче Діони́сіе, никто́ бо не исхожда́ше то́щъ отъ тебе́, не прія́въ ми́лости и сло́въ, назида́ющихъ и́стинное бога́тство.

Яко жела́етъ еле́нь на исто́чники водны́я, си́це но́зѣ твои́ теча́ху на пѣсносло́вія Бо́жія; колѣ́на твоя́ изнемого́ста отъ бдѣ́нія, и пло́ть твоя́ измѣни́ся отъ поще́нія, но не́мощь твоя́ пре́йде отъ си́лы въ си́лу.

Искони́ вра́гъ человѣ́ковъ, узрѣ́въ тя́, въ мíрѣ се́мъ не отъ мíра бы́ти, поскрежета́ зубы́ свои́ми и рече́: гна́въ, пости́гну. Но ты́, откры́въ пу́ть тво́й ко Го́споду, глаго́лалъ: а́ще и со́нмъ враго́въ обы́детъ мя́, не убою́ся, упова́я на Тя́, Бо́же оте́цъ на́шихъ, Иже благослове́нъ во вѣ́къ.

Якоже иногда́ три́ о́троцы сла́вляху среди́ огня́ вѣ́домаго Бо́га, та́кожде и ты́, горя́ во огнѣ́ озлобле́ній, огне́мъ Боже́ственныя любви́ попали́лъ лука́внующихъ, воспѣва́я ми́лость въ ро́ды родо́въ боя́щимся Го́спода.

Богоро́диченъ: Змíй, уязви́вый пя́ту Благослове́ннаго, притупи́лъ свое́ жа́ло, тѣ́мже у́бо Тебе́, ро́ждшую Сте́ршего главу́ его́, Уме́ршаго за грѣхи́ на́ша и Воста́вшаго за оправда́нія на́ша, досто́йно велича́емъ.

Конда́къ, [гла́съ 4]:

Пра́вило вѣ́ры, сто́лпъ благоче́стія бы́лъ еси́, богоно́сне Діони́сіе, яви́въ въ себѣ́ о́бразъ и примѣ́ръ преуспѣ́янія добродѣ́тели и по́двиговъ: се́ю Ева́нгельскою мре́жею мно́гихъ улови́лъ еси́ подража́телей, подая́ блестя́щею на небеси́ сла́вою свое́ю ре́вность къ содѣ́йствованію на по́льзу правовѣ́рныхъ; тѣ́мже мы, ны́нѣ воспѣва́юще сія́, мо́лимъ тя́, да хода́тайствуеши о благочести́вѣйшемъ на́шемъ Импера́торѣ [и́мярекъ], и о все́мъ Це́ркви исполне́ніи.

Пѣ́снь 7.

Ирмо́съ: Росода́тельну у́бо пе́щь содѣ́ла а́нгелъ преподо́бнымъ отроко́мъ, халде́и же опаля́ющее велѣ́ніе Бо́жіе, мучи́теля увѣща́ вопи́ти: благослове́нъ еси́, Бо́же оте́цъ на́шихъ.

Златолюби́ваго еконо́ма, дерзну́вшаго оболга́ти тя́ царю́ и патріа́рху, во е́же свято́е оби́тели стяжа́ніе непра́ведно отъя́ти, претерпѣ́въ темни́цу и ра́ны, дѣла́ми свои́ми низложи́въ, яви́лся еси́ и́стинный до́лжнаго назида́нія строи́тель.

Хитросплете́нныя ко́зни сокруши́въ, не убоя́лся гнѣ́ва царе́ва и патріа́рхова, показа́въ озлобле́ніями свои́ми обстоя́щую и́хъ ле́сть и кова́рство, сказа́лъ пути́ пра́вды ева́нгельскія.

Егда́ па́ки бе́здна беззако́ній на́шихъ призва́ бе́здну гнѣ́ва правосу́дія Бо́жія и егда́ не бы́сть ни гра́да, ни ве́си, ни де́бри, е́же бы укры́тися христіа́номъ, восхотѣ́ Бо́гъ показа́ти си́лу Свою́ не въ си́лѣ ко́нстѣй, но въ небра́нныхъ во́инахъ: проти́вныя сотре́, препоя́савъ си́лою Свое́ю подви́жниковъ Ла́вры Се́ргіевой.

Преста́ волне́ній оте́чества на́шего бу́ря, егда́ яви́шася вѣ́рніи по вѣ́рѣ ко́рмчіи: му́дрый Іоаса́фъ, ре́вностный Авра́мій и усе́рдный по Бо́зѣ Діони́сій, его́же ны́нѣ чту́ще па́мять, благословля́емъ Тя́, Бо́же Россíи.

Богоро́диченъ: Благослове́нъ Христо́съ, Пло́дъ чре́ва Твоего́, Богоро́дице Дѣ́во, я́ко подъ Его́ зна́менемъ ополча́ющіеся побѣжда́ютъ ви́димыхъ и неви́димыхъ враго́въ.

Пѣ́снь 8.

Ирмо́съ: Изъ пла́мене преподо́бнымъ ро́су источи́лъ еси́ и пра́веднаго же́ртву водо́ю попали́лъ еси́: вся́ бо твори́ши, Христе́, то́кмо е́же хотѣ́ти. Тя́ превозно́симъ во вся́ вѣ́ки.

Па́ки ты́ въ озлобле́ніяхъ и му́кахъ отъ враго́въ и́стины, тебѣ́, я́ко правдолю́бцу содѣ́янныхъ, бы́въ цѣ́лый го́дъ, подвиза́яся о сохране́ніи Бо́жія сло́ва, въ спасе́ніе на́ше пре́даннаго, показа́лъ на́мъ примѣ́ръ, да и мы́, въ жите́йскомъ мо́рѣ бу́рею, проти́въ на́съ ды́шущею, напа́ствуемы, та́кожде ополчи́вшись, противоста́немъ ко́знемъ и дости́гнемъ ти́хаго вѣ́чнаго приста́нища.

Преста́ша иногда́ дыша́ть зло́бою бра́тія на Іо́сифа, егда́ бѣ́ во спасе́ніе и́мъ, и о́нъ, преда́въ забве́нію оби́ду, прообразова́лъ кро́тость Ева́нгелія; се́ но́вый Іо́сифъ, бы́въ и́стинно усе́рдный житомѣ́ритель благослове́нному гра́ду Москвѣ́ и о́крестнымъ ве́сямъ, ги́бнущимъ отъ гла́да, но мудрѣ́йшіи сы́нове вѣ́ка сего́ не преста́ша отъ зло́бы на пра́вду, за ню́же стоя́лъ еси́, Діони́сіе блаже́нне.

Истинно ре́къ воспроси́вшимъ тя́, ка́ко бы́сть толи́кое твое́ бѣ́дствованіе, сказа́въ: бѣды́ и напа́сти въ вѣ́цѣ се́мъ не су́ть бѣды́ и напа́сти, но су́ть иску́съ Бо́жій. Вои́стинну та́ко: я́ко бо зла́то, въ горни́лѣ искуша́емое, быва́етъ свѣтлѣ́е, та́кожде и ты́, бы́въ искуше́нъ, избѣ́гнувъ и́стинной бѣды́ гее́нской, яви́лся свѣтлѣ́е во свѣ́тлостяхъ святы́хъ. Тѣ́мже и на́съ, искуша́емыхъ, убѣжда́еши ревнова́ти сла́вѣ твое́й.

Терпя́, потерпѣ́лъ еси́, и ти́ вня́тъ Госпо́дь, и поста́ви но́зѣ твои́ на ка́мень Це́ркви Своея́, и исчезо́ша врази́ твои́, и вложи́ во уста́ твоя́ пѣ́снь, во е́же съ вѣ́рными глаго́лати: а́ще е́сть Бо́гъ, судя́й на земли́, у́бо е́сть пло́дъ пра́веднику, и путіе́ его́ пра́ви су́ть.

Богоро́диченъ: Вся́ на́ша до́брая дѣла́ бы́ли бъ вмѣнены́ за ничто́, а́ще бы не чрезъ Воплоти́вшагося отъ Тя́ содѣ́лася спасе́ніе человѣ́ковъ.

Пѣ́снь 9.

Ирмо́съ: Бо́га человѣ́комъ невозмо́жно ви́дѣти, на Него́же не смѣ́ютъ чи́ни а́нгельстіи взира́ти; Тобо́ю бо, Всечи́стая, яви́ся человѣ́комъ Сло́во воплоще́нно, Его́же велича́юще, съ небе́сными во́и, Тя́ ублажа́емъ.

Не умолчи́мъ и сего́, чтя́ па́мять преподо́бнаго, ко́ль ве́ліе имѣ́ о́нъ попече́ніе, подража́я пра́ведному Товíи, о погребе́ніи ме́ртвыхъ, изби́тыхъ отъ враго́въ оте́чества на́шего, и како́въ бѣ́ его́ по́двигъ въ лѣче́ніи отъ ни́хже изму́ченныхъ ра́нами: са́мъ исхожда́ше съ бра́тіею но́щію и врачева́ше я́звы и́хъ, ели́ко мо́щно бѣ́.

Тре́тіе яви́ся оби́тель ди́внаго Се́ргія щи́тъ и огражде́ніе вѣ́рной Россíи, же́ртвуя пра́ведными свои́ми стяжа́ніями. Си́мъ примѣ́ромъ возжего́шася и́стинная ча́да Россíи, и, умили́вшеся ея́ гра́матами, Пожа́рскій и Ми́нинъ ско́ро потеко́ша на избавле́ніе оте́чества. Тѣ́мже и ны́нѣ, блаже́нне Діони́сіе, моли́ Бо́га, да оте́чество и киновíя сія́ бу́дутъ непреодоли́мы.

Глаго́лютъ нечести́віи, я́ко во вре́мени вся́ ги́бнутъ, пра́во глаго́лютъ: поги́бнутъ бо съ помышле́ніями свои́ми, но въ па́мять вѣ́чную бу́детъ пра́ведникъ, и пра́вда его́ пребу́детъ во вѣ́къ. Тѣ́мже и мы́ ублажа́емъ тя́, о́тче Діони́сіе, и чте́мъ святу́ю па́мять твою́, ты́ бо свои́мъ примѣ́ромъ и на́съ руково́дствуеши къ небеси́.

За вся́ сія́ почте́нъ бы́въ во вре́мени, похвале́нъ и отъ вселе́нскихъ патріа́рхъ, изъ ни́хже отъ Іерусали́мскаго получи́лъ еси́ клобу́къ его́ патріа́ршескій, но блаже́ннѣе яви́лся, егда́ умира́я о Го́сподѣ, воспѣва́лъ па́сху твою́, глаго́ля: умре́ти ми́ пріобрѣ́теніе е́сть, тече́ніе соверши́хъ, вѣ́ру соблюдо́хъ. Тѣ́мже и воспѣва́емъ тя́, сподо́бившагося вѣнца́ небе́снаго.

Богоро́диченъ: Упова́ніе христіа́нъ, Пресвята́я Дѣ́во, Его́же родила́ еси́, Бо́га, непреста́нно моли́ съ вы́шними си́лами исправле́ніе житія́ пода́ти и оставле́ніе грѣхо́въ, вѣ́рою и любо́вію при́сно Тя́ сла́вящимъ.


Моли́тва преподо́бному отцу́ Діони́сію.

Отъ млады́хъ ногте́й возлюби́вый Христа́, преподо́бный Діони́сіе! Сотвори́ моли́твами свои́ми, да и на́ши сердца́ свяще́ннымъ любви́ Бо́жія огне́мъ пламенѣ́ютъ, не то́кмо въ ю́ности, но и въ ста́рости да не погаса́ютъ, возжига́емы теплото́ю вѣ́ры. Возложи́вый на ся́ подви́жниче яре́мъ ева́нгельскій, и о́ный обрѣ́тши благи́мъ и ле́гкимъ, до конца́ о́ный му́жественно соверши́лъ еси́, сподо́бившись вѣнца́ торже́ственнаго я́ко побѣди́тель, и на́мъ помоги́, тя́гостное вре́мя житія́ сего́ му́жественно понести́, и соблю́дши вѣ́ру до конца́, сподо́битися милосе́рдаго отъ Бо́га воздая́нія. Бы́въ тща́тельный и ре́вностный зва́нія отъ Бо́га тебѣ́ возложе́ннаго исполни́тель, помози́ и на́мъ, проходи́ти зва́нія на́ши, неосла́бно, покрѣпля́я на́съ упова́ніемъ по́мощи на Всеси́льнаго. Мно́гіе ко́зни и страда́нія отъ злоко́зненныхъ враго́въ великоду́шно претерпѣ́вый, свя́те Діони́сіе, и на́мъ, окружа́емымъ сетя́ми вра́жіими, и разли́чнымъ искуше́ніямъ подлежа́щимъ, моли́твами твои́ми испроси́ свы́ше по́мощь на побѣжде́ніе и попра́ніе о́ныхъ. Всегда́ умерщвля́я посто́мъ, моли́твами и бдѣ́ніемъ пло́ть свою́, оживи́лъ еси́ ду́шу свою́, и о́ную содѣ́лалъ еси́ хра́момъ Животворя́щаго Ду́ха, и на́съ святы́й приме́ръ тво́й да возбужда́етъ подража́ти слѣда́мъ твои́мъ, и улучи́ти вре́мя къ покая́нію и оставле́нію грѣхо́въ на́шихъ. Бы́въ горя́щій къ сла́вѣ Це́ркви и Оте́чества ревни́тель, исхода́тайствуй моли́твами свои́ми ми́ръ Це́ркви, благоде́нствіе Оте́честву, благослове́ніе Самодержа́вному Импера́тору на́шему, оби́тели же се́й, твои́мъ правле́ніемъ благоустро́енной и защище́нной, всемогу́щее покрови́тельство, да прославля́емъ просла́вльшаго тя́ Го́спода, ны́нѣ и при́сно, и во вѣ́ки вѣко́въ. Ами́нь.

Источникъ: Кано́нъ преподо́бному отцу́ на́шему Діони́сію, архимандри́ту Се́ргіевы Ла́вры, Ра́донежскому чудотво́рцу, съ присовокупле́ніемъ житія́ его́. — М.: Въ Сѵнодальной Тѵпографіи, 1817. — Л. 1 – 7 об.

/ Къ оглавленію раздѣла /


Наверхъ / Къ титульной страницѣ

0