Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - воскресенiе, 20 августа 2017 г. Сейчасъ на порталѣ посѣтителей - 14.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Ма́ія въ 11-й де́нь.
Свята́го священному́ченика Мокíя.

[ВЕЧЕРЪ,
На Го́споди воззва́хъ:] стихи́ры священному́ченика, гла́съ 4. Подо́бенъ: Яко до́бля.

Благоче́стіемъ разжига́емь,* и страда́ніемъ изощре́нъ,* и му́жествомъ, Мокíе, пома́занъ,* небокова́ненъ бы́лъ еси́, сла́вне, ме́чь,* ополче́нія враго́въ* до конца́ потребля́ющь.* Тѣ́мже дне́сь свѣ́тлую, и свѣтоно́сную,* и святу́ю пра́зднуемъ твою́ па́мять,* сла́ва му́чениковъ и похвала́.

И колесы́ сокруша́емь,* и огне́мъ попаля́емь,* и звѣре́мъ, блаже́нне, помета́емь,* и изгна́ніемъ оскорбля́емь,* и мече́мъ усѣка́емь,* не отве́рглся еси́ Христа́,* ни и́доломъ поже́рлъ еси́.* Тѣ́мже прія́лъ еси́ вѣнцы́ побѣ́дныя* и приче́лся еси́ лико́мъ безпло́тныхъ,* о все́мъ мíрѣ моля́ся.

Сла́ва, и ны́нѣ, пра́здника.

Тропа́рь, гла́съ 4:

И нра́вомъ прича́стникъ, и престо́ломъ намѣ́стникъ апо́столомъ бы́въ, дѣя́ніе обрѣ́лъ еси́, богодохнове́нне, въ видѣ́нія восхо́дъ, сего́ ра́ди сло́во и́стины исправля́я, и вѣ́ры ра́ди пострада́лъ еси́ да́же до кро́ве, священному́чениче Моќе. Моли́ Христа́ Бо́га спасти́ся душа́мъ на́шимъ.

Сла́ва, и ны́нѣ, пра́здника.



[НА УТРЕНИ,]
Кано́нъ, гла́съ 4.

Пѣ́снь 1.

Ирмо́съ: Отве́рзу уста́ моя́, и напо́лнятся Ду́ха, и сло́во отры́гну Цари́цѣ Ма́тери, и явлю́ся, свѣ́тло торжеству́я, и воспою́, ра́дуяся, Тоя́ чудеса́.

Къ широтѣ́, блаже́нне, твои́хъ похва́лъ напра́ви ума́ моего́ тѣсноту́ и свѣ́тъ низпосли́ се́рдцу моему́, пою́щу свѣтоно́сную и сла́вную па́мять твою́, му́чениче прехва́льне.

Звѣзду́ многосвѣ́тлую Це́рковь познава́етъ тя́, тоя́ тве́рдь уясня́ющаго свѣ́тлостію страда́ній твои́хъ, преблаже́нне, му́чениковъ украше́ніе, Мокíе всему́дре.

Твои́ми кровьми́ безбо́жіе разори́лъ еси́, по́двиги бра́нными враги́ разрази́лъ еси́, снѣда́емь огне́мъ, нече́ствующихъ всю́ попали́лъ еси́ суету́.

Желѣ́зомъ стру́жемь и огне́мъ оскорбля́емь, зла́та свѣтлѣ́йши, Мокíе, бы́лъ еси́, изображе́ніе Христо́выхъ страсте́й и вѣ́ры побо́рникъ, богоблаже́нне.

Богоро́диченъ: Ра́дости на́мъ Хода́таица, я́ко пріи́мши исполне́ніе всего́ Божества́, яви́лася еси́, Всенепоро́чная. Тѣ́мже вси́ Тебѣ́, — ра́дуйся, — я́коже а́нгелъ, согла́сно взыва́емъ, Богора́дованная.

Пѣ́снь 3.

Ирмо́съ: Не му́дростію, и си́лою, и бога́тствомъ хва́лимся, но Тобо́ю, Отчею ѵпоста́сною Му́дростію, Христе́: нѣ́сть бо свя́тъ, па́че Тебе́, Человѣколю́бче.

Обнаже́нъ, къ подвиго́мъ и къ боре́ніемъ отлучи́лся еси́, си́лою Креста́ не́мощь твою́ укрѣпля́я, тѣ́мже велехва́льнаго змíя низложи́лъ еси́.

Сме́ртію вре́менною безсме́ртное благосла́віе, болѣ́зней ра́ди плотски́хъ вѣ́чное наслажде́ніе обрѣ́лъ, я́коже возжела́лъ еси́, му́чениче непобѣди́ме.

Къ нетлѣ́нію отъ тли́ вои́стинну преше́лъ еси́ кра́йнею любо́вію, ра́достно вмѣсти́лся еси́, а́нгеломъ соприча́стникъ бы́въ, Мокíе.

Богоро́диченъ: Тя́ прему́дрость Бо́жія пречи́стое селе́ніе обрѣ́тши, отъ Твои́хъ чи́стыхъ крове́й воплоща́ется и по рождествѣ́ нетлѣ́нну показа́.

Сѣда́ленъ, гла́съ 4. Подо́бенъ: Вознесы́йся.

Наро́читый всѣ́мъ страстоно́сецъ, врага́ до конца́ смири́вый и о́гненное муче́ніе претерпѣ́вый крѣ́пко, Мокíй сла́вный, похвала́ми да почте́нъ бу́детъ: се́й бо претерпѣ́ нестерпи́мыя му́ки и, усѣ́ченъ бы́въ во главу́, ко Христу́ вѣнцено́сецъ взы́де, ра́дуяся.

Сла́ва, и ны́нѣ, пра́здника.

Пѣ́снь 4.

Ирмо́съ: Сѣдя́й въ сла́вѣ на Престо́лѣ Божества́ во о́блацѣ ле́гцѣ, прíиде Іису́съ Пребоже́ственный, Нетлѣ́нною Дла́нію и спасе́ зову́щія: сла́ва, Христе́, си́лѣ Твое́й.

Ко́жаныхъ ри́зъ ве́тхаго умерщвле́нія совле́клся еси́, блаже́нне, всю́ду тѣ́ломъ стру́жемь, во оде́жду нетлѣ́нія обле́клся еси́ и наслажда́ешися дре́ва жи́зни, ра́дуяся.

Украси́лся еси́ благозра́чіемъ добродѣ́телей, пресла́вне, уясни́лся еси́ болѣ́зньми добротво́рнаго страда́нія, уподо́бився а́нгеломъ, я́коже бо безпло́тенъ, сломле́нія и ра́ны претерпѣ́лъ еси́.

Безбо́жія глубина́ тя́ ника́коже погрузи́: держа́вною бо руко́ю тя́ Содѣ́тель спасе́, рѣ́ки му́къ не поколеба́ша души́ твоея́ столпа́, му́дре, непоколе́блемаго.

Богоро́диченъ: Иже во́лею вся́ созда́вый хотѣ́ніемъ отъ Твои́хъ крове́й пло́ть Себѣ́ созда́ и во двою́ существу́ Еди́нъ происхо́дитъ, Ма́ти Дѣ́во, спаса́я на́съ бла́гостію.

Пѣ́снь 5.

Ирмо́съ: Ты́, Го́споди, мо́й Свѣ́тъ, въ мíръ прише́лъ еси́, Свѣ́тъ Святы́й, обраща́яй изъ мра́чна невѣ́дѣнія вѣ́рою воспѣва́ющія Тя́.

Тя́ си́лу держа́вну на врага́ неви́димаго му́ченикъ Тво́й стяжа́въ, некрѣ́пкую сего́ крѣ́пость, Христе́, низложи́.

Твои́ми кровьми́ земля́ освяти́ся, блаже́нне, твои́ми ра́нами уязви́ся де́монскій по́лкъ, богому́дре досточу́дне.

Тя́ иму́щи свѣ́тла би́сера и че́стна во увязе́ніи свое́мъ, честна́я Це́рковь, всеблаже́нне, украша́ется.

Богоро́диченъ: Свѣ́тъ безлѣ́тный на́мъ, Отчее сія́ніе, родила́ еси́ подъ лѣ́томъ, бога́тствомъ бла́гости бы́вша, Всенепоро́чная.

Пѣ́снь 6.

Ирмо́съ: Пожру́ Ти со гла́сомъ хвале́нія, Го́споди, Це́рковь вопіе́тъ Ти́, отъ бѣсо́вскія кро́ве очи́щшися, ра́ди ми́лости отъ ре́бръ Твои́хъ исте́кшею кро́вію.

Любо́вію, и наде́ждею, и вѣ́рою вооружи́ Подвигополо́жникъ вели́кій крѣ́пка ору́жника благоче́стія. Сего́ ра́ди пре́лести низложи́ утвержде́ніе.

Любве́ плотскíя у́мъ отлучи́лъ еси́ и, Жениха́ добро́ты неизрече́нныя зря́, му́ки нивочто́же вмѣни́лъ еси́, прехва́льне.

Немо́кренно муче́нія преше́лъ еси́ пучи́ну и къ вы́шнимъ приста́нищемъ благи́хъ со всѣ́мъ бога́тствомъ устреми́лся еси́, побѣ́ды вѣне́цъ пріе́мъ.

Богоро́диченъ: Бе́здну милосе́рдія, Христа́, Ро́ждшая, отъ грѣхо́вныя глубины́ мя́, я́ко ми́лостива Еди́на, возведи́ и отъ бу́ри помышле́ній сопроти́вныхъ спаси́.

Конда́къ, гла́съ 8. Подо́бенъ: Тве́рдыя.

Вооружи́вся щито́мъ вѣ́ры, нечести́выхъ ополче́нія сте́рлъ еси́, священному́чениче, и вѣне́цъ отъ Христа́ взя́лъ еси́, Мокíе, тѣ́мъ и, со а́нгелы ра́дуяся, спаса́й отъ бѣ́дъ пою́щія тя́, моля́ непреста́нно о всѣ́хъ на́съ.

Икосъ:

Имѣ́яй ду́шу скве́рнену и тѣ́ло отъ безчи́сленныхъ собла́знъ и бу́рею лю́тѣ погружа́емь, не смѣ́ю глаго́лати, ниже́ могу́, твоея́ похвалы́, блаже́нне священному́чениче, но я́ко исто́чникъ сы́й, мно́гія ми́ отмы́й собла́зны и во отверзе́ніе усто́мъ сло́во да́ти моли́ся, мо́лишися бо непреста́нно о всѣ́хъ на́съ.

Пѣ́снь 7.

Ирмо́съ: Спасы́й во огни́ авраа́мскія Твоя́ о́троки и халде́и уби́въ, я́же Пра́вда пра́ведно уловля́ше, препѣ́тый Го́споди, Бо́же оте́цъ на́шихъ, благослове́нъ еси́.

Въ пе́щь вве́рженъ бы́въ, обрѣ́лъ еси́ тя́ ороша́ющаго Сло́ва во зра́цѣ а́нгельстѣ, ю́ноши три́ спа́сшаго, вопія́, преблаже́нне: препѣ́тый Го́споди, Бо́же оте́цъ на́шихъ, благослове́нъ еси́.

На мечи́, на о́гнь и на разже́нныя сосу́ды, му́чениче, противоста́лъ еси́ му́жески, си́лою Боже́ственною укрѣпля́емь, и вопія́лъ еси́, ра́дуяся: препѣ́тый Го́споди, Бо́же оте́цъ на́шихъ, благослове́нъ еси́.

Кро́вными твои́ми то́ки угаси́лъ еси́ пре́лести пла́мень, терпѣ́нія же огне́мъ зажже́нное хвра́стіе попали́лъ еси́ и́дольское, поя́: оте́цъ на́шихъ Бо́же, благослове́нъ еси́.

Богоро́диченъ: Тя́, безсме́ртнаго исто́чника во́ду оставле́нія еди́ну источи́вшую на́мъ, Іису́са Христа́, Приснодѣ́во, воспѣва́емъ, зову́ще: Бо́же оте́цъ на́шихъ, благослове́нъ еси́.

Пѣ́снь 8.

Ирмо́съ: Отроки благочести́выя въ пещи́ Рождество́ Богоро́дичо спасло́ е́сть, тогда́ у́бо образу́емое, ны́нѣ же дѣ́йствуемое, вселе́нную всю́ воздвиза́етъ пѣ́ти Тебѣ́: Го́спода по́йте, дѣла́, и превозноси́те Его́ во вся́ вѣ́ки.

Порфи́ру отъ твои́хъ крове́й очервлени́въ и се́ю обложе́нъ, нося́ же вмѣ́сто ски́птра ору́жіе непобѣди́мое, сца́рствуеши, Мокíе, Царю́ всѣ́хъ, Го́спода воспѣва́йте, дѣла́, зовы́й, и превозноси́те Его́ во вся́ вѣ́ки.

Яко со́лнце, дне́сь мíру па́мять твоего́ страда́нія возсія́, вся́ озаря́ющи и мра́къ отгоня́ющи де́монскія зло́бы, сла́вне Мокíе, въ не́йже ра́достно тя́ пое́мъ, благословя́ще Христа́ во вѣ́ки.

Устро́ивъ колесни́цу, богому́дре, твоего́ страда́нія кро́вію, взя́тся къ небе́снымъ, дости́глъ еси́ чи́ны мы́сленныхъ си́лъ и страда́лецъ ли́ки, съ ни́миже предстоя́ Тро́ицѣ, всегда́ моли́ о пою́щихъ тя́.

Богоро́диченъ: Въ тебѣ́ ви́дѣна бы́ша ше́ствія Вели́каго Царя́ си́лъ, две́рь небе́сная, Отрокови́це Неискусобра́чная, Яже человѣ́ковъ смѣше́ніе озе́мльствовавшая. Тѣ́мже Тя́, Дѣ́ву, пое́мъ и превозно́симъ во вѣ́ки.

Пѣ́снь 9.

Ирмо́съ: Ева у́бо неду́гомъ преслуша́нія кля́тву всели́ла е́сть, Ты́ же, Дѣ́во Богоро́дице, прозябе́ніемъ чревоноше́нія мíрови благослове́ніе процвѣла́ еси́. Тѣ́мъ Тя́ вси́ велича́емъ.

Пребога́тъ, и по́лнъ просвѣще́нія бы́въ, и стра́стію украша́емь, вну́трь вмѣсти́лся еси́ черто́га, съ му́дрыми дѣ́вами веселя́ся, и добро́ту зри́ши недомы́сленную, ея́же свѣ́тлость пре́жде стяжа́лъ еси́.

Во градѣ́хъ ины́хъ предпострада́въ, сла́вне, византíйскій гра́дъ дости́глъ еси́, му́чениче, въ не́мже твои́хъ по́двиговъ кончи́ну и побѣ́ды вѣне́цъ прія́лъ еси́, я́ко страда́лецъ непобѣди́мь, его́же огражда́еши мольба́ми твои́ми.

Обрѣ́лъ еси́ возме́здіе я́ко вои́стинну болѣ́зней твои́хъ Ца́рство недви́жимое, ста́лъ еси́, жела́ніемъ, всеблаже́нне, дре́ву живо́тному присту́пль, и бо́гъ по прича́стію бы́въ, Мокíе му́чениче досточу́дне.

Богоро́диченъ: Глаго́ломъ послѣ́дующе Твои́мъ, всегда́ Тя́, Дѣ́во, ублажа́емъ: Сло́во бо на́мъ неизрече́нно, отъ Отца́ пре́жде вѣ́къ возсія́вшее, родила́ еси́, я́ко Са́мъ благоизво́ли, Его́же досто́йно велича́емъ.


НА ЛИТУРГІИ,

Проки́менъ, гла́съ 7: Возвесели́тся пра́ведникъ о Го́сподѣ и упова́етъ на Него́. Сти́хъ: Услы́ши, Бо́же, гла́съ мо́й, внегда́ моли́ти ми ся къ Тебѣ́. Апо́столъ къ Тимоѳе́ю, зача́ло 292. Аллилу́ія, гла́съ 4: Пра́ведникъ я́ко фи́никсъ процвѣте́тъ, [я́ко ке́дръ, и́же въ Лива́нѣ, умно́жится. Сти́хъ: Насажде́ни въ дому́ Госпо́дни во дво́рѣхъ до́му Бо́га на́шего процвѣту́тъ.] Ева́нгеліе Іоа́нна, зача́ло 51. Прича́стенъ: Въ па́мять вѣ́чную [бу́детъ пра́ведникъ, отъ слу́ха зла́ не убои́тся].

Источникъ: Минíа, мѣ́сяцъ Ма́ій. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 75 об. – 78 об.

/ Къ оглавленію раздѣла /


Наверхъ / Къ титульной страницѣ

0