Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - среда, 24 мая 2017 г. Сейчасъ на порталѣ посѣтителей - 13.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Ма́ія въ 11-й де́нь.
Слу́жба и́же во святы́хъ отцу́ на́шему Іо́сифу, митрополи́ту Астраха́нскому.

[НА ВЕЛИЦѢЙ ВЕЧЕРНИ,
Блаже́нъ му́жъ.., 1-й антифо́нъ.] На Го́споди воззва́хъ: стихи́ры пра́здника 3 и святи́теля 5, гла́съ 5:

Пріиди́те, вѣ́рніи, во псалмѣ́хъ и пѣ́ніихъ ублажи́мъ святи́теля Іо́сифа, вѣ́ры бо чи́стыя и пра́выя свѣти́льникъ яви́ся, Го́спода и лю́ди своя́ всѣ́мъ се́рдцемъ возлюби́въ, сме́рти не убоя́ся, но ду́шу за о́вцы своя́ положи́ и ны́нѣ мо́лится ко Го́споду дарова́ти на́мъ ми́ръ и ве́лію ми́лость.

Богосвѣ́тлое свѣти́ло гра́да Астрахани и всея́ Пово́лжскія земли́, святи́телю богому́дре Іо́сифе, луча́ми любве́ Христо́вы просвѣще́нъ, моли́твенникъ усе́рдный яви́лся еси́, скорбя́щихъ же утѣ́шитель и въ ну́ждахъ ско́рый помо́щникъ; и ны́нѣ моли́ся ко Го́споду даровати на́мъ ми́ръ и ве́лію ми́лость.

Святи́телю Іо́сифе, вѣ́рный служи́тель Бо́жій бы́лъ еси́, съ па́ствою свое́ю постя́ся и о побѣ́дѣ на враги́ усе́рдно моля́ся, мяте́жники же увѣща́я покори́тися Бо́гу и вла́сти зако́ннѣй, сего́ ра́ди муче́ніе и сме́рть прія́лъ еси́, блаже́нне, положи́въ ду́шу за о́вцы своя́, и ны́нѣ моли́ся ко Го́споду дарова́ти ми́ръ и ве́лію ми́лость.

Сла́ва, гла́съ 1:

Святи́телю богоблаже́нне Іо́сифе, ра́дуются въ де́нь торжества́ твоего́ земна́я и небе́сная, весели́тся ли́къ святи́телей и му́чениковъ, предстоя́щихъ съ тобо́ю Тро́ицѣ Единосу́щнѣй, и гра́дъ Астрахань свѣ́тло торжеству́етъ и вѣ́рою вопіе́тъ: ра́дуйся, святи́телю Іо́сифе, те́плый моли́твенниче и предста́телю на́шъ ко Го́споду.

И ны́нѣ, пра́здника или́ богоро́диченъ, гла́съ 1:

Всемíрную сла́ву, [отъ человѣ́къ прозя́бшую и Влады́ку ро́ждшую, небе́сную две́рь воспои́мъ, Марíю Дѣ́ву, безпло́тныхъ пѣ́снь и вѣ́рныхъ удобре́ніе: Сія́ бо яви́ся не́бо и хра́мъ Божества́, Сія́, прегражде́ніе вражды́ разруши́вши, ми́ръ введе́ и Ца́рствіе отве́рзе; Сію́ у́бо иму́ще вѣ́ры утвержде́ніе, Побо́рника и́мамы, изъ Нея́ ро́ждшагося Го́спода. Дерза́йте у́бо, дерза́йте, лю́діе Бо́жіи, и́бо То́й побѣди́тъ враги́, я́ко Всеси́ленъ].

Вхо́дъ. Проки́менъ дне́. Чте́нія три́ святи́тельская.

При́тчей чте́ніе.

Па́мять пра́веднаго съ похвала́ми, и благослове́ніе Госпо́дне на главѣ́ его́. Блаже́нъ человѣ́къ, и́же обрѣ́те прему́дрость, и сме́ртенъ, и́же увѣ́дѣ ра́зумъ. Лу́чше бо сію́ купова́ти, не́жели зла́та и сребра́ сокро́вища. Честнѣ́йшая же е́сть ка́меній многоцѣ́нныхъ, все́ же честно́е недосто́йно ея́ е́сть. Долгота́ бо дне́й и лѣ́та живота́ въ десни́цѣ ея́, въ шу́йцѣ же ея́ бога́тство и сла́ва. Отъ у́стъ ея́ исхо́дитъ пра́вда, зако́нъ же и ми́лость на язы́цѣ но́ситъ. Послу́шайте у́бо мене́, о ча́да, честна́я бо реку́, и блаже́нъ человѣ́къ, и́же пути́ моя́ сохрани́тъ: исхо́ди бо мои́ — исхо́ди живота́, и уготовля́ется хотѣ́ніе отъ Го́спода. Сего́ ра́ди молю́ ва́съ и предлага́ю мо́й гла́съ сыново́мъ человѣ́ческимъ. Я́ко а́зъ, прему́дрость, устро́ихъ совѣ́тъ, и ра́зумъ и смы́слъ азъ призва́хъ. Мо́й совѣ́тъ и утвержде́ніе, мо́й ра́зумъ, моя́ же крѣ́пость. Азъ мене́ лю́бящія люблю́, и́щущіи же мене́ обря́щутъ благода́ть. Разумѣ́йте у́бо, незло́бивіи, кова́рство, ненака́заніи же, прилага́йте сердца́. Послу́шайте мене́ и па́ки, честна́я бо реку́, и отве́рзу отъ усте́нъ пра́вая, я́ко и́стинѣ поучи́тся горта́нь мой, ме́рзки же пре́до мно́ю устны́ лжи́выя. Съ пра́вдою вси́ глаго́лы у́стъ мои́хъ, ничто́же въ ни́хъ стро́потно, ниже́ развраще́нно. Вся́ пра́ва су́ть разумѣва́ющимъ и про́ста обрѣта́ющимъ ра́зумъ. Науча́ю бо ва́съ и́стинѣ, да бу́детъ о Го́сподѣ наде́жда ва́ша, и испо́лнитеся Ду́ха.

Прему́дрости Соломо́ни чте́ніе.

Уста́ пра́веднаго ка́плютъ прему́дрость, устнѣ́ же муже́й му́дрыхъ вѣ́дятъ благода́ть. Уста́ му́дрыхъ поуча́тся прему́дрости, пра́вда же избавля́етъ и́хъ отъ сме́рти. Сконча́вшуся му́жу пра́ведну, не поги́бнетъ наде́жда. Сы́нъ бо пра́веденъ ражда́ется въ живо́тъ и во благи́хъ свои́хъ пло́дъ пра́вды объи́метъ. Свѣ́тъ пра́веднымъ всегда́, и отъ Го́спода обря́щутъ благода́ть и сла́ву. Язы́къ му́дрыхъ до́брая свѣ́сть, и въ се́рдцѣ и́хъ почíетъ му́дрость. Лю́битъ Госпо́дь преподо́бная сердца́, прія́тни же Ему́ вси́ непоро́чніи въ пути́. Му́дрость Госпо́дня просвѣща́етъ лице́ разу́мнаго: постига́етъ бо жела́ющія ю́, пре́жде да́же разумѣ́ти ю́, и удо́бь у́зрится отъ лю́бящихъ ю́. Утреневавый къ не́й не утруди́тся, и бдя́й ея́ ра́ди вско́рѣ безъ печа́ли бу́детъ. Яко досто́йныхъ ея́ сама́ обхо́дитъ, и́щущи, и во стезя́хъ ея́ явля́ется и́мъ благопріе́мнѣ. Му́дрости никогда́же одолѣ́етъ зло́ба. Си́хъ ра́ди и рачи́тель бы́хъ добро́ты ея́, и возлюби́хъ ю́, и поиска́хъ отъ ю́ности моея́. И взыска́хъ невѣ́сту привести́ себѣ́, я́ко всѣ́хъ Влады́ка возлюби́ ю́. Таи́бница бо е́сть Бо́жія хи́трости и обрѣта́тельница дѣ́лъ Его́. Труды́ ея́ су́ть добродѣ́тели: цѣлому́дрію же и ра́зуму та́ учи́тъ, пра́вдѣ и му́жеству, и́хже потре́бнѣе ничто́же е́сть въ житіи́ человѣ́комъ. Аще же и мно́гаго иску́сства жела́етъ кто́, вѣ́сть дре́вняя, и бы́ти хотя́щая разсмо́тритъ. Свѣ́сть изви́тія слове́съ и разрѣше́нія гада́ній, зна́менія и чудеса́ проразумѣ́етъ, и сбытія́ време́нъ и лѣ́тъ, и всѣ́мъ совѣ́тникъ е́сть бла́гъ. Яко безсме́ртіе е́сть въ не́й и благосла́віе во обще́ніи слове́съ ея́. Сего́ ра́ди бесѣ́довахъ ко Го́споду, и помоли́хся Ему́, и рѣ́хъ отъ всего́ се́рдца моего́: Бо́же отце́въ и Го́споди ми́лости, сотвори́вый вся́ сло́вомъ Твои́мъ и му́дростію Твое́ю устро́ивый человѣ́ка, да владѣ́етъ бы́вшими отъ Тебе́ тварьми́ и да управля́етъ мíръ въ преподо́біи и пра́вдѣ. Да́ждь ми́ Твои́хъ Престо́ловъ присѣдя́щую прему́дрость и не отлучи́ мене́ отъ о́трокъ Твои́хъ, я́ко а́зъ ра́бъ Тво́й и сы́нъ рабы́ни Твоея́. Посли́ ю́ съ Небе́съ отъ свята́го жили́ща Твоего́ и отъ Престо́ла сла́вы Твоея́, да, су́щи со мно́ю, научи́тъ мя́, что́ благоуго́дно е́сть предъ Тобо́ю, и наста́витъ мя́ въ ра́зумъ, и сохрани́тъ мя́ въ сла́вѣ свое́й. Помышле́нія бо сме́ртныхъ вся́ боязли́ва и погрѣши́тельна умышле́нія и́хъ.

Прему́дрости Соломо́ни чте́ніе.

Похваля́ему пра́веднику, возвеселя́тся лю́діе: безсме́ртіе бо е́сть па́мять его́, я́ко отъ Го́спода познава́ется и отъ человѣ́къ, и уго́дна Го́сподеви душа́ его́. Возлюби́те у́бо, о му́жіе, му́дрость и поживете́: восхощи́те ея́ и нака́зани бу́дете. Нача́ло бо ея́ любы́ и соблюде́ніе зако́на. Почти́те прему́дрость, да во вѣ́ки ца́рствуете. Возвѣщу́ ва́мъ и не скры́ю отъ ва́съ та́инъ Бо́жіихъ, я́ко То́й му́дрости наста́вникъ е́сть, и му́дрыхъ испра́витель, и вся́кому смы́слу и дѣ́лу хитре́цъ. И всѣ́мъ смы́сломъ научи́тъ му́дрость, е́сть бо въ не́й Ду́хъ разу́менъ и свя́тъ, и сія́ніе свѣ́та присносу́щнаго, и о́бразъ бла́гости Бо́жія. Та́я дру́ги Бо́жія и проро́ки устроя́етъ, благолѣ́пнѣйши же е́сть со́лнца и па́че вся́каго сотворе́нія звѣ́здъ, свѣ́ту сосужда́ема, обрѣта́ется пе́рвѣйши. Та́я угожда́ющихъ е́й отъ болѣ́зни изба́ви и наста́ви на стези́ пра́выя. Даде́ и́мъ ра́зумъ имѣ́ти свя́тъ, и сохрани́ я́ отъ ловя́щихъ, и по́двигъ крѣ́покъ подаде́ и́мъ. Да разумѣ́ютъ вси́, я́ко си́льнѣйши всего́ е́сть благоче́стіе, и никогда́же премо́жетъ зло́ба му́дрости, ниже́ пре́йдетъ злы́я облича́ющи су́дъ. Реко́ша же въ себѣ́, помы́сливше непра́ведно: наси́льствуемъ пра́ведному, и не пощади́мъ преподо́бства его́, ни усрами́мся сѣди́нъ ста́рости многолѣ́тны. Бу́детъ бо на́мъ крѣ́пость — зако́нъ и улови́мъ пра́веднаго, я́ко неуго́денъ на́мъ е́сть, и проти́вится дѣло́мъ на́шимъ, и поно́ситъ на́мъ отпаде́ніе зако́на, и облича́етъ на́мъ согрѣше́нія наказа́нія на́шего. Возвѣща́етъ на́мъ ра́зумъ имѣ́ти Бо́жій, и о́трока Госпо́дня себе́ имену́етъ. Бы́сть на́мъ на обличе́ніе помышле́ній на́шихъ и тя́жекъ на́мъ е́сть и ви́димь, я́ко неподо́бно ины́мъ житіе́ его́, и измѣне́ны стези́ его́. Въ поруга́ніе вмѣни́хомся ему́, и удаля́ется отъ путе́й на́шихъ, я́ко отъ нечисто́тъ, и блажи́тъ послѣ́дняя пра́ведныхъ. Уви́димъ у́бо, а́ще словеса́ его́ и́стинна су́ть, иску́симъ, я́же сбыва́ются ему́. Руга́ніемъ и му́кою истя́жемъ его́, да разумѣ́емъ кро́тость его́ и иску́симъ беззло́бство его́, сме́ртію безобра́зною осу́димъ его́, бу́детъ бо посѣще́ніе отъ слове́съ его́. Сія́ помы́слиша и прельсти́шася, ослѣпи́ бо я́ зло́ба и́хъ, и не разумѣ́ша та́инъ Бо́жіихъ и не разсуди́ша, я́ко Ты́ еси́ Бо́гъ еди́нъ, живота́ имѣ́яй и сме́рти вла́сть, и спаса́яй во вре́мя ско́рби, и избавля́яй отъ вся́каго зла́. Ще́дръ и Ми́лостивъ, и дая́й преподо́бнымъ Свои́мъ благода́ть, и Свое́ю мы́шцею го́рдымъ противля́яйся.

На литíи стихи́ра, гла́съ 6:

Святи́телю и му́чениче Іо́сифе, егда́ отъ стѣны́ гра́да све́рженъ бы́лъ еси́, обагри́въ зе́млю кро́вію твое́ю, тогда́ страна́ Астраха́нская го́рько пла́кася, вопія́: поме́рче со́лнце мое́, сокры́ся духо́вный свѣ́тъ. Ны́нѣ же ра́дуется и свѣ́тло торжеству́етъ, я́ко яви́ся е́й моли́твенникъ те́плый, чудотво́рецъ ди́вный, и съ моли́твою притека́етъ къ тебѣ́, предста́телю своему́, всѣ́мъ бо источа́еши исцѣле́ній благода́ть и освѣща́еши пу́ть изъ тмы́ грѣхо́вныя къ Невече́рнему Свѣ́ту.

Сла́ва, гла́съ 6:

Святи́телю богому́дре Іо́сифе, во вся́ страны́ Пово́лжскія изы́де вѣща́ніе исправле́ній твои́хъ, тѣ́мъ на небесѣ́хъ обрѣ́те мзду́ трудо́въ твои́хъ, де́моновъ побѣди́ полки́ и му́чениковъ дости́гъ чи́ны, и́хже страда́ніемъ поревнова́лъ еси́. Дерзнове́ніе имѣ́я ко Го́споду, ми́ръ испроси́ душа́мъ на́шимъ.

И ны́нѣ, пра́здника или́ богоро́диченъ, гла́съ 6:

Творе́цъ и Изба́витель мо́й, [Пречи́стая, Христо́съ Госпо́дь, изъ Твои́хъ ложе́снъ проше́дъ, въ мя́ оболкíйся, пе́рвыя кля́твы Ада́ма свободи́. Тѣ́мже Ти́, Всечи́стая, я́ко Бо́жіи Ма́тери же и Дѣ́вѣ, вои́стинну вопіе́мъ немо́лчно: ра́дуйся а́нгельски, ра́дуйся, Влады́чице, предста́тельство, и покро́ве, и спасе́ніе ду́шъ на́шихъ].

На стихо́внѣ стихи́ры, гла́съ 7:

Блаже́нъ еси́, святи́телю Іо́сифе, путе́мъ бо Христо́вымъ вои́стинну ше́ствовавъ, любо́вію и моли́твами лю́ди ко Го́споду приводи́лъ еси́ и, пострада́въ за пра́вду, я́ко звѣзда́ свѣ́тлая, возсія́лъ еси́, къ Свѣ́ту Незаходи́мому и на́съ возведи́ моли́твами твои́ми.

Сти́хъ: Честна́ предъ Го́сподемъ сме́рть преподо́бныхъ Его́.

Въ собо́рище злодѣ́евъ беззако́нныхъ со кресто́мъ святы́мъ безбоя́зненно прише́лъ еси́, покори́тися Бо́гу и власте́мъ увѣщева́я; мяте́жницы и разбо́йницы, зло́бою лю́тою одержи́ми, погуби́ти тя́ восхотѣ́ша, и огне́мъ и вся́кими муче́ніи пыта́ху тя́, и съ раска́та сверго́ша. И ны́нѣ чту́щимъ тя́ у Го́спода испроси́ грѣхо́вныя жи́зни исправле́ніе.

Сти́хъ: Что́ возда́мъ Го́сподеви о всѣ́хъ, я́же воздаде́ ми?

Поноше́ніе отъ разбо́йникъ претерпѣ́въ и муче́ніе, Христу́, пострада́вшему за ны́, послѣ́довалъ еси́ и, съ высоты́ све́рженъ, священному́чениче, къ высотѣ́ небе́снѣй возше́лъ еси́, идѣ́же при́сное ра́дованіе и безсме́ртная жи́знь, и́хже и да сподо́бимся получи́ти моли́твами твои́ми.

[Сла́ва,[1] и ны́нѣ, пра́здника или́ богоро́диченъ, гла́съ 2:

О, чудесе́ но́ваго, [всѣ́хъ дре́внихъ чуде́съ! Кто́ бо позна́ Ма́терь, безъ му́жа ро́ждшую и на руку́ нося́щую всю́ тва́рь Содержа́щаго? Бо́жіе е́сть изволе́ніе Ро́ждшееся. Его́же я́ко Младе́нца, Пречи́стая, Твои́ма рука́ма носи́вшая, и ма́тернее дерзнове́ніе къ Нему́ иму́щая, не преста́й моля́щи о чту́щихъ Тя́, уще́дрити и спасти́ ду́ши на́ша].

Тропа́рь, гла́съ 6:

По́двигомъ до́брымъ подвиза́вся, жи́знь твою́ страда́ніями за пра́вду увѣнча́въ, пресели́лся еси́ въ небе́сныя оби́тели, идѣ́же предстоя́ престо́лу Святы́я Тро́ицы, моли́, святи́телю Іо́сифе, гра́ду Астрахани и оте́честву на́шему въ ми́рѣ спасти́ся. [Два́жды.]

И Богоро́дице Дѣ́во... [Еди́ножды.]



НА УТРЕНИ,
На Бо́гъ Госпо́дь: Тропа́рь пра́здника, два́жды. Сла́ва, святи́теля. И ны́нѣ, пра́здника.

По 1-й каѳи́змѣ сѣда́ленъ, гла́съ 4:

Укори́зны и поноше́нія отъ мяте́жникъ пріе́мъ и о́гненное муче́ніе претерпѣ́въ, ча́шу страда́ній испи́лъ еси́, за пра́вду и вѣ́рность вла́сти зако́нной подвиза́вся, со стѣны́ гра́да све́рженъ и кро́вію зе́млю обагри́въ, священному́ченикъ яви́лся еси́. Сего́ ра́ди зове́мъ: спаса́й на́съ, святи́телю Христо́въ, моли́твами твои́ми. [Два́жды.]

Сла́ва, и ны́нѣ, пра́здника или́ богоро́диченъ, гла́съ 4:

Преблагослове́нная Марíе Богоро́дице Всепѣ́тая, Засту́пнице на́ша усе́рдная, спаси́ на́съ отъ бѣ́дъ и страсте́й моли́твами Твои́ми.

По 2-й каѳи́змѣ сѣда́ленъ, гла́съ 6:

Святи́телю Іо́сифе, помо́щникъ въ бѣда́хъ и болѣ́знехъ явля́ешися лю́демъ благочести́вымъ, къ тебѣ́ прибѣга́ющимъ. И ны́нѣ мо́лимъ: отъ вся́кія напа́сти сохраня́й на́съ моли́твами твои́ми. [Два́жды.]

Сла́ва, и ны́нѣ, пра́здника или́ богоро́диченъ, гла́съ 6:

Пресвята́я Ма́ти Дѣ́во, Христа́ Изба́вителя ро́ждшая, къ Тебѣ́ прибѣга́емъ: спаси́ на́съ отъ бѣ́дъ, Марíе Богоневѣ́сто.

По поліеле́и сѣда́ленъ, гла́съ 1:

До́бръ во́инъ Христо́въ и спасе́нія проповѣ́дникъ бы́лъ еси́, святи́телю Іо́сифе, егда́ мяте́жники покори́тися Бо́гу и вла́сти зако́ннѣй увѣща́лъ еси́, вся́ же лю́ди вѣ́рны бы́ти своему́ до́лгу наставля́лъ еси́. Сего́ ра́ди мо́лимъ: утверди́ и на́ша сердца́ во единомы́сліи и любви́ къ оте́честву моли́твами твои́ми. [Два́жды.]

Сла́ва, и ны́нѣ, пра́здника или́ богоро́диченъ, гла́съ 1:

Всесвята́я Дѣ́во Чи́стая, предста́тельство и покро́въ къ Тебѣ́ прибѣга́ющихъ, Тебѣ́ мо́лимся, Влады́чице: спаси́ на́съ отъ бѣ́дъ моли́твами Твои́ми.

[Степе́нна, 1-й антифо́нъ 4-го гла́са.] Проки́менъ, гла́съ 1: Уста́ моя́ возглаго́лютъ прему́дрость* и поуче́ніе се́рдца моего́ ра́зумъ. Сти́хъ: Уста́ пра́веднаго поуча́тся прему́дрости, и язы́къ его́ возглаго́летъ су́дъ. Ева́нгеліе отъ Іоа́нна, зача́ло 36.

По 50-мъ псалмѣ́ стихи́ра, гла́съ 6:

Звѣзда́ свѣ́тлая Астраха́нскія Це́ркви и святи́телей ея́ сла́ва и похвала́ яви́лся еси́, Іо́сифе, отъ беззако́нныхъ убіе́нный моли́твенникъ усе́рдный, Го́спода и лю́ди своя́ до конца́ возлюби́вый и ду́шу свою́ за дру́ги положи́вый, ны́нѣ жре́бій тво́й со святы́ми; сего́ ра́ди зове́мъ: Іо́сифе, святи́телю убіе́нный, моли́ о душа́хъ на́шихъ.

Кано́нъ пра́здника со ирмосо́мъ на 6 и святи́теля на 8.

Кано́нъ святи́телю Іо́сифу, гла́съ 8.
Пѣ́снь 1.

Ирмо́съ: Колесницегони́теля фарао́ня погрузи́ чудотворя́й иногда́ Моисе́йскій же́злъ, крестообра́зно порази́въ и раздѣли́въ мо́ре, Изра́иля же бѣглеца́, пѣшехо́дца спасе́, пѣ́снь Бо́гови воспѣва́юща.

Воспои́мъ свѣ́тло и восхва́лимъ пѣ́сньми честну́ю па́мять святи́теля Христо́ва, возлюби́въ бо Па́стыря овца́мъ — вели́каго Христа́, не убоя́ся разбо́йникъ, но ду́шу за о́вцы своя́ положи́.

Егда́ разбо́йницы и престу́пницы вступи́ша во гра́дъ Астрахань, тогда́ злодѣ́йства и у́жасы ве́ліи соверша́хуся. Ты́ же, архипа́стырю до́брый, укры́лъ еси́ ми́рныя лю́ди въ до́мѣ твое́мъ.

Къ жи́зни нестарѣ́ющей и присносу́щнѣй преста́вился еси́, богому́дре святи́телю Іо́сифе, ея́же и на́съ, моля́щихся тебѣ́, твои́ми моли́твами сподо́би.

Богоро́диченъ: Наде́жда, и предста́тельство, и покро́въ бу́ди, Дѣ́во, рабо́мъ Твои́мъ, да, Тобо́ю изба́вленніи отъ бѣ́дъ, возвели́чимъ Тя́ свѣ́тло, я́ко Истинную Ма́терь Истиннаго Свѣ́та.

Катава́сія пра́здника.

Пѣ́снь 3.

Ирмо́съ: Утвержде́й въ нача́лѣ небеса́ ра́зумомъ и зе́млю на вода́хъ основа́вый, на ка́мени мя́, Христе́, за́повѣдей Твои́хъ утверди́, я́ко нѣ́сть свя́тъ па́че Тебе́, Еди́не Человѣколю́бче.

До́бръ во́инъ Христо́въ яви́лся еси́, святи́телю: взе́мъ бо ме́чъ духо́вный — сло́во Бо́жіе, мяте́жники отъ Боже́ственнаго Писа́нія увѣщева́лъ еси́, привести́ хотя́ и́хъ ко Христу́ Бо́гу.

Утвержде́нъ на ка́мени за́повѣдей Христо́выхъ, святи́телю, разбо́йникомъ и мяте́жникомъ дерзнове́нно вѣща́лъ еси́: преста́ните отъ зо́лъ ва́шихъ и покори́теся Бо́гу и вла́сти зако́ннѣй, да обря́щете проще́ніе, и ми́лость, и поко́й душа́мъ ва́шимъ.

Лю́діе беззако́нніи и жесто́ціи се́рдцемъ не послу́шаша слове́съ любве́ твоея́ и на му́ки огня́ осуди́ша тя́, зло́бою горя́ще: не лю́битъ бо законопресту́пникъ облича́ющихъ его́.

Богоро́диченъ: Не́бо небе́съ и Свято́е святы́хъ яви́лася еси́, Приснодѣ́во: Творе́цъ бо и Вседержи́тель небесе́ и земли́ въ Те́бѣ та́инственно всели́ся.

Конда́къ и и́косъ пра́здника.
И сѣда́ленъ святи́теля, гла́съ 1:

Іо́сифе священному́чениче, отъ мяте́жникъ убіе́нный, въ ми́рѣ и поко́и пра́ведныхъ ны́нѣ пребыва́еши, я́коже пи́сано е́сть: пра́ведныхъ ду́ши въ руцѣ́ Бо́жіей и не прико́снется и́хъ му́ка. Да́руй ми́ръ и на́шимъ душа́мъ, страсте́й возста́ніе укроти́въ, да въ присносу́щный дости́гнемъ поко́й моли́твами твои́ми. [Два́жды.]

Сла́ва, и ны́нѣ, пра́здника или́ богоро́диченъ, гла́съ 1:

Чу́до чуде́съ, Благода́тная, въ Тебѣ́ зря́щи, тва́рь ра́дуется: зачала́ бо еси́ безсѣ́менно и родила́ еси́ неизрече́нно, Его́же чинонача́лія а́нгеловъ ви́дѣти не мо́гутъ; Того́ моли́ о душа́хъ на́шихъ.

Пѣ́снь 4.

Ирмо́съ: Ты́ моя́ крѣ́пость, Го́споди, Ты́ моя́ и си́ла, Ты́ мо́й Бо́гъ, Ты́ мое́ ра́дованіе, не оста́вль нѣ́дра Отча, и на́шу нищету́ посѣти́въ. Тѣ́мъ съ проро́комъ Авваку́момъ зову́ Ти: си́лѣ Твое́й сла́ва, Человѣколю́бче.

Егда́ сверго́ша тя́ со стѣ́нъ гра́да, шу́мъ бы́сть ве́лій, и злодѣ́и отъ стра́ха омертвѣ́ша; на мѣ́стѣ же, идѣ́же пове́ржено бы́сть тѣ́ло твое́, ви́дѣша мно́зи три́ свѣщи́ горя́щія: преста́вился бо еси́ отъ сме́рти къ жи́зни, идѣ́же сія́етъ незаходи́мый свѣ́тъ Святы́я Тро́ицы.

Препоя́сався си́лою свы́ше, священному́чениче, по́двигомъ до́брымъ подвиза́лся еси́, блаже́нне, оби́димыхъ защища́я, печа́льныхъ утѣша́я, упо́рныхъ же и злы́хъ съ кро́тостію облича́я и вразумля́я. И ны́нѣ ра́дуешися свѣ́тло, идѣ́же пра́вда и ми́ръ и ра́дость о Го́сподѣ на́шемъ.

Красу́йся свѣ́тло и лику́й, гра́де Астрахань, имѣ́я небе́снаго засту́пника и покрови́теля, святи́теля Іо́сифа, во сла́вѣ небе́снѣй предстоя́ща вели́кому Царю́ и моля́щася, да чту́щіе па́мять его́, избѣ́гше грѣхо́вныя тмы́, сы́нове Свѣ́та бу́дутъ.

Богоро́диченъ: Жили́ще Свѣ́та яви́ла еси́, Богома́ти: Со́лнце бо сла́вы — Госпо́дь изъ Тебѣ́ возсія́ и на́мъ отве́рзе врата́ къ Незаходи́мому Свѣ́ту.

Пѣ́снь 5.

Ирмо́съ: Вску́ю мя́ отри́нулъ еси́ отъ лица́ Твоего́, Свѣ́те незаходи́мый, и покры́ла мя́ е́сть чужда́я тма́ окая́ннаго? Но обрати́ мя, и къ свѣ́ту за́повѣдей Твои́хъ пути́ моя́ напра́ви, молю́ся.

Приско́рбна бы́сть душа́ твоя́, священному́чениче, егда́ пріи́де ча́съ тво́й взя́ту тебѣ́ бы́ти мяте́жники, но, моли́твою во хра́мѣ укрѣпи́вся, му́жественно къ ни́мъ изше́лъ еси́.

Въ ри́захъ святи́тельскихъ и со святы́мъ кресто́мъ безбоя́зненно вше́дъ въ собо́рище мяте́жниковъ, дерзнове́нно, я́ко проро́къ Бо́жій, глаго́лалъ еси́: почто́ зва́сте мене́, та́тіе и клятвопресту́пницы? Оста́вите упо́рство ва́ше и зло́бу, поми́луетъ вы́ благовѣ́рный ца́рь, и́стину глаго́лю, на мя́ положи́теся.

Яко а́спиды глусíи, слове́съ твои́хъ не слу́шаша врази́ твои́, святи́телю Іо́сифе, и, е́мше тя́, огне́мъ пыта́ху и вся́кими муче́ніи и съ высоты́ сверго́ша тя́. Ты́ же, къ высотѣ́ небе́снѣй возше́дъ, въ вы́шній гра́дъ святы́хъ направля́еши всѣ́хъ, чту́щихъ тя́, священному́чениче.

Богоро́диченъ: Всесвята́я Дѣ́во, Ма́ти всѣ́хъ Царя́, Жи́знь и Воскресе́ніе всѣ́хъ изъ Тебѣ́ возсія́, да, сме́ртную си́лу сокруши́въ, спасе́тъ я́ко Бо́гъ пою́щія Тя́.

Пѣ́снь 6.

Ирмо́съ: Очи́сти мя́, Спа́се, мно́га бо беззако́нія моя́, и изъ глубины́ зо́лъ возведи́, молю́ся, къ Тебѣ́ бо возопи́хъ, и услы́ши мя́, Бо́же спасе́нія моего́.

Исцѣли́ неду́ги и болѣ́зни на́ша, Спа́се, моли́твами святи́теля Твоего́, Тобо́ю бо просла́вленъ бы́въ, всѣ́мъ исцѣле́нія подае́тъ возложе́ніемъ честны́я власяни́цы его́.

Чудотворе́нія да́ръ подаде́ тебѣ́ Христо́съ, святи́телю; тѣ́мже нѣмо́му уста́ си́лою Госпо́дней отве́рзлъ еси́, и то́й просла́ви тя́ и возблагодари́ Го́спода, да́вшаго такову́ю вла́сть избра́нникомъ Свои́мъ.

Жена́ кровоточи́ва, вотще́ ижди́вшая имѣ́ніе свое́ на врачева́ніе земно́е, косну́вся кра́я ри́зъ Госпо́днихъ, исцѣле́ніе прія́тъ. И въ тебе́, священному́чениче, всели́ся си́ла Христо́ва: власяни́ца бо твоя́ честна́я, съ моли́твою на боля́щія возлага́емая, ско́рое исцѣле́ніе подае́тъ.

Богоро́диченъ: Спасе́ніе упова́ющимъ на Тя́ бу́ди, Пречи́стая Дѣ́во. Мно́го бо мо́жетъ моли́тва Твоя́, о Ма́ти Милосе́рдая. Ты́ бо избавля́еши отъ бѣ́дъ и страсте́й ду́ши на́ша.

Конда́къ, гла́съ 2:

Яко звѣзда́ пресвѣ́тлая, возсія́лъ еси́, святи́телю Іо́сифе, во Астрахани, идѣ́же роди́лся и воспита́лся еси́, и за вѣ́рность Бо́гу и власте́мъ зако́ннымъ му́ченическую сме́рть прія́лъ еси́. Мы́ же, чту́ще страда́нія твоя́, зове́мъ ти́: святи́телю Іо́сифе, отъ мяте́жниковъ убіе́нный, моли́ Христа́ Бо́га о душа́хъ на́шихъ.

Икосъ:

Возлюби́въ, святи́телю, Христо́вы Боже́ственныя за́повѣди и возненави́дѣвъ мíра сего́ наслажде́ніе, прише́лъ еси́ усе́рдно къ Тому́ и бы́лъ еси́ свѣти́льникъ, просвѣща́яй вся́ Пово́лжскія страны́ блиста́ніемъ духо́внымъ. Тѣ́мъ, припа́дая, мо́лимъ тя́: просвѣти́ на́ша о́чи душе́вныя воспѣ́ти твоя́ по́двиги, поще́ніе, и бдѣ́ніе, и му́ченическую кончи́ну, и́хже ра́ди блаже́нныя жи́зни ны́нѣ наслажда́ешися; мы́ же, чту́ще тя́, вопіе́мъ: святи́телю Іо́сифе, отъ мяте́жниковъ убіе́нный, моли́ Христа́ Бо́га о душа́хъ на́шихъ.

Пѣ́снь 7.

Ирмо́съ: Бо́жія снизхожде́нія о́гнь устыдѣ́ся въ Вавило́нѣ иногда́, сего́ ра́ди о́троцы въ пещи́, ра́дованною ного́ю, я́ко во цвѣ́тницѣ лику́юще, поя́ху: благослове́нъ еси́ Бо́же, оте́цъ на́шихъ.

Отроцы, огня́ изба́вленніи, ра́достно воспѣва́ху Спа́са и Изба́вителя; ты́ же, священному́чениче, опале́нный огне́мъ веще́ственнымъ, пла́мене вѣ́чнаго изба́вился еси́, вопія́: благослове́нъ еси́, Го́споди, Бо́же оте́цъ на́шихъ.

Умъ и се́рдце твое́, святи́телю, посредѣ́ о́гненнаго муче́нія ко Го́споду устремля́лъ еси́, я́ко тріе́ о́троцы, взыва́я: благослове́нъ еси́, Бо́же оте́цъ на́шихъ.

Со о́троки и всѣ́ми святы́ми лику́еши, блаже́нне, во Ца́рствіи небе́снѣмъ и ра́достно пое́ши Невече́рнему Свѣ́ту: благослове́нъ еси́, Го́споди, Бо́же оте́цъ на́шихъ.

Богоро́диченъ: Благослове́нна и препросла́влена еси́ во вѣ́ки, похвало́ христіа́нъ, весе́ліе всѣ́хъ и ра́дость, Марíе Богоневѣ́сто, ра́дость бо источа́еши всѣ́мъ, къ Сы́ну Твоему́ вопію́щимъ: благослове́нъ еси́, Бо́же оте́цъ на́шихъ.

Пѣ́снь 8.

Ирмо́съ: Седмери́цею пе́щь халде́йскій мучи́тель богочести́вымъ неи́стовно разжже́, си́лою же лу́чшею спасе́ны сія́ ви́дѣвъ, Творцу́ и Изба́вителю вопія́ше: о́троцы, благослови́те, свяще́нницы, воспо́йте, лю́діе, превозноси́те во вся́ вѣ́ки.

Ра́дости неизрече́нныя прича́стникъ яви́лся еси́, священному́чениче, при́сно въ Бо́зѣ пребыва́я и въ ча́съ муче́нія изъ глубины́ души́ твоея́ вопія́ ко Го́споду: о́троцы, благослови́те, свяще́нницы, воспо́йте, лю́діе, превозноси́те Христа́ во вѣ́ки.

Егда́ ведо́ша тя́ беззако́нніи на стѣ́ну гра́да, я́ко подража́тель Христу́, возве́дъ о́чи на не́бо, моли́лся еси́ о оби́дящихъ тя́, блаже́нне: Го́споди, не помяни́ и́мъ грѣха́ сего́! Свяще́нницы же гра́дстіи, къ нога́мъ твои́мъ со слеза́ми припа́дающе, да́ша ти́ послѣ́днее цѣлова́ніе, отходи́лъ бо еси́ ко Го́споду, вопія́: о́троцы, благослови́те, свяще́нницы, воспо́йте, лю́діе, превозноси́те Христа́ во вѣ́ки.

Ангельски на земли́ пожи́лъ еси́, Іо́сифе, и по преставле́ніи твое́мъ вку́пѣ со а́нгельскими ли́ки во оби́тели небе́сныя водвори́лся еси́, вопія́: о́троцы, благослови́те, свяще́нницы, воспо́йте, лю́діе, превозноси́те Христа́ во вѣ́ки.

Богоро́диченъ: Три́ о́троки отъ пе́щи свободи́вый, всѣ́хъ отъ пе́щи напа́стей избавля́етъ хода́тайствомъ Твои́мъ, Пречи́стая, Сы́нъ Тво́й и Бо́гъ на́шъ, Ему́же вопіе́мъ: о́троцы, благослови́те, свяще́нницы, воспо́йте, лю́діе, превозноси́те Его́ во вѣ́ки.

Пѣ́снь 9.

Ирмо́съ: Ужасе́ся о се́мъ не́бо, и земли́ удиви́шася концы́, я́ко Бо́гъ яви́ся человѣ́комъ пло́тски, и чре́во Твое́ бы́сть простра́ннѣйшее небе́съ. Тѣ́мъ Тя́, Богоро́дицу, а́нгеловъ и человѣ́къ чинонача́лія велича́ютъ.

Пи́щи нетлѣ́нныя, свѣ́та боже́ственнаго и сла́вы присносу́щныя ны́нѣ наслажда́ешися, священному́чениче, вку́пѣ со а́нгельскими чинонача́ліи и всѣ́ми святы́ми Го́спода велича́я.

Яко церко́вное свѣти́ло, святи́телю, въ пѣ́снехъ и пѣ́ніихъ почита́емъ тя́ вси́, досто́йно велича́юще.

Предстоя́ во сла́вѣ Царю́ и Бо́гу, священному́чениче Іо́сифе, храни́ держа́ву Россíйскую и гра́дъ на́шъ отъ всѣ́хъ бѣ́дъ моли́твами твои́ми.

Богоро́диченъ: Сла́ва Тебѣ́, Преблагослове́нная Марíе, Ма́ти Го́спода на́шего и Творца́. Да сподо́бимся и мы́ моли́твами Твои́ми вѣ́чныя сла́вы Его́.

Свѣти́ленъ:

Свѣти́льниче Це́ркви Астраха́нскія, святи́телю Іо́сифе, предстоя́ ны́нѣ Превѣ́чному Свѣ́ту, и на́съ наста́ви во свѣ́тѣ за́повѣдей Бо́жіихъ ходи́ти, да пріи́демъ и мы́ въ оби́тели свѣ́та. [Два́жды.]

Сла́ва, и ны́нѣ, пра́здника или́ богоро́диченъ:

Пречи́стая Дѣ́во, ро́ждшая Свѣ́тъ Непристу́пный, озари́ на́съ свѣ́томъ боже́ственнаго ли́ка Твоего́, да возра́дуемся о Тебѣ́, Ра́досте на́ша.

На хвали́техъ стихи́ры на 4, гла́съ 2:

Ангели на небеси́ и человѣ́цы на земли́, воспо́йте и просла́вите вели́каго засту́пника на́шего святи́теля Іо́сифа, а́нгелъ бо земны́й и человѣ́къ небе́сный яви́ся, пра́веднымъ житіе́мъ и любо́вію, вѣ́рою и чистото́ю подража́я Влады́цѣ и Го́споду своему́, положи́ ду́шу свою́ за лю́ди своя́ и, ны́нѣ въ вы́шнихъ водворя́яся, свѣ́тло лику́етъ. [Два́жды.]

Труба́ пра́вды Бо́жіей яви́лся еси́, святи́телю, всѣ́хъ бо ве́лъ еси́ ко и́стинному Свѣ́ту, безбоя́зненно всѣ́мъ и́стину глаго́ля, му́къ и сме́рти не убоя́лся еси́. Да пріи́демъ тобо́ю и мы́ къ Со́лнцу пра́вды, просвѣтле́нными умы́ созерца́ти во Святѣ́й Тро́ицѣ пра́вду вѣ́чную.

Вѣ́рны бы́ти Бо́гу и власте́мъ лю́ди твоя́ наставля́я, муче́ніе о́гненное и сме́рть прія́лъ еси́, съ высоты́ раска́та све́рженъ бы́лъ еси́. И ны́нѣ, среди́ му́ченики и архіере́и Го́споду поклоня́яся, моли́ спасти́ся душа́мъ на́шимъ.

Сла́ва, гла́съ 6:

Пріиди́те дне́сь, лю́діе, возра́дуемся свѣ́тло и просла́вимъ святи́теля на́шего Іо́сифа, согла́сно воспѣва́юще: ра́дуйся, священному́чениче; ра́дуйся, чудотво́рче; ра́дуйся, ско́рый на́шъ засту́пниче, святи́телю Іо́сифе.

И ны́нѣ, пра́здника или́ богоро́диченъ, гла́съ 6:

Упова́ніе непосты́дное и ра́дость небе́сную имѣ́емъ въ Тебѣ́, Богома́ти, Ты́ бо еси́ на́ше спасе́ніе, и по́мощь, и крѣ́пкое заступле́ніе, Тя́ воспѣва́емъ во вѣ́ки.

[Славосло́віе вели́кое, ектеніи́ и отпу́стъ.]



НА ЛИТУРГІИ,

Слу́жба святи́тельская: [Блаже́нна пра́здника, пѣ́снь рядова́я и отъ кано́на свята́го, пѣ́снь 3-я. Проки́менъ пра́здника и свята́го, гла́съ 1: Уста́ моя́ возглаго́лютъ прему́дрость,* и поуче́ніе се́рдца моего́ ра́зумъ. Сти́хъ: Услы́шите сія́ вси́ язы́цы, внуши́те вси́ живу́щіи по вселе́ннѣй. Апо́столъ дне́ и свята́го, ко Евре́омъ, зача́ло 318. Аллилу́ія пра́здника и свята́го, гла́съ 2: Уста́ пра́веднаго поуча́тся прему́дрости, и язы́къ eго́ возглаго́летъ су́дъ. Сти́хъ: Зако́нъ Бо́га его́ въ се́рдцѣ его́, и не за́пнутся стопы́ eго́. Ева́нгеліе дне́ и свята́го, Іоа́нна, зача́ло 36. Прича́стенъ пра́здника и свята́го: Въ па́мять вѣ́чную бу́детъ пра́ведникъ, отъ слу́ха зла́ не убои́тся.]

Примѣчаніе:
[1] Въ изданіи пропущенъ славникъ священномученику 2-го гласа.

Источникъ: Служба иже во святыхъ отцу нашему Іосифу, митрополиту Астраханскому. — М.: Т-во Типо-Литографіи И. М. Машистова, 1918. — 20 с.

/ Къ оглавленію раздѣла /


Наверхъ / Къ титульной страницѣ

0