Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - четвергъ, 29 iюня 2017 г. Сейчасъ на порталѣ посѣтителей - 18.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Ма́ія въ 10-й де́нь.
Слу́жба и́же во святы́хъ отцу́ на́шему Си́мону, епи́скопу Влади́мірскому и Су́ждальскому.

ВЕЧЕРЪ,
Блаже́нъ му́жъ.., 1-й антифо́нъ. На Го́споди воззва́хъ: стихи́ры, гла́съ 5. Подо́бенъ: Ра́дуйся, живо́носный.

Ра́дуйся, люби́телю Христа́,* Го́спода своего́, те́плѣйшій,* Си́моне досточу́дне,* и́же теплото́ю духо́вныя благода́ти* зѣ́льнѣ въ любо́вь Бо́жію распали́вся,* вся́ кра́сная мíра сего́ презрѣ́лъ еси́* и у́мъ сво́й въ послуша́ніе Христо́во плѣни́лъ еси́,* тѣ́мже ны́нѣ, я́ко свобо́дь,* въ свобо́дныхъ живы́й мѣ́стѣхъ,* на́ша у́мы, вра́жіими прило́ги плѣне́нныя,* свободи́, о́тче блаже́нне,* и твои́мъ къ Бо́гу хода́тайствомъ* отъ бѣ́дъ изба́ви,* мо́лимтися, о́тче,* па́мять твою́ почита́юще.

Молва́ми житія́ сего́ одержи́мыхъ* и на пути́ страсте́й заблужда́ющихъ,* Си́моне, святи́телю прему́дрѣйшій,* твои́мъ му́дрымъ уче́ніемъ* наставля́я и вразумля́я,* приве́лъ еси́ на спасе́нія стезю́,* бы́въ тѣ́мъ руководи́тель къ высотѣ́ небе́сной,* идѣ́же и са́мъ ны́нѣ со а́нгелы водворя́яся,* наста́ви твои́мъ неви́димымъ управле́ніемъ* въ живо́тъ и спасе́ніе ду́ши на́ша.

Сла́ва, гла́съ 6:

Ско́рый язы́къ тво́й ко уче́нію лѣни́выхъ сердца́ и ны́нѣ возставля́етъ и призыва́етъ къ дѣ́ланію за́повѣдей Госпо́днихъ; па́стырская же свирѣ́ль твоя́ возглаша́етъ боговѣща́нная словеса́, и́миже, я́ко лѣ́ствицею, слы́шащіи возно́сятся и Бо́гу присвоя́ются, тѣ́мже Си́моне, о́тче преподо́бне, я́ко имы́й дерзнове́ніе ко Христу́ Бо́гу, не преста́й моля́ся, да просвѣти́мся свѣ́томъ ра́зума и благи́хъ дѣя́ній, любо́вію чту́щіи святу́ю па́мять твою́.

И ны́нѣ, богоро́диченъ.
Вхо́дъ. Проки́менъ дне́. И чте́нія три́.

При́тчей чте́ніе.

Па́мять пра́веднаго съ похвала́ми, и благослове́ніе Госпо́дне на главѣ́ его́. Блаже́нъ человѣ́къ, и́же обрѣ́те прему́дрость, и сме́ртенъ, и́же увѣ́дѣ ра́зумъ. Лу́чше бо сію́ купова́ти, не́жели зла́та и сребра́ сокро́вища. Честнѣ́йшая же е́сть ка́меній многоцѣ́нныхъ, все́ же честно́е недосто́йно ея́ е́сть. Долгота́ бо дне́й и лѣ́та живота́ въ десни́цѣ ея́, въ шу́йцѣ же ея́ бога́тство и сла́ва. Отъ у́стъ ея́ исхо́дитъ пра́вда, зако́нъ же и ми́лость на язы́цѣ но́ситъ. Послу́шайте у́бо мене́, о ча́да, честна́я бо реку́, и блаже́нъ человѣ́къ, и́же пути́ моя́ сохрани́тъ: исхо́ди бо мои́ — исхо́ди живота́, и уготовля́ется хотѣ́ніе отъ Го́спода. Сего́ ра́ди молю́ ва́съ и предлага́ю мо́й гла́съ сыново́мъ человѣ́ческимъ. Я́ко а́зъ, прему́дрость, устро́ихъ совѣ́тъ, и ра́зумъ и смы́слъ азъ призва́хъ. Мо́й совѣ́тъ и утвержде́ніе, мо́й ра́зумъ, моя́ же крѣ́пость. Азъ мене́ лю́бящія люблю́, и́щущіи же мене́ обря́щутъ благода́ть. Разумѣ́йте у́бо, незло́бивіи, кова́рство, ненака́заніи же, прилага́йте сердца́. Послу́шайте мене́ и па́ки, честна́я бо реку́, и отве́рзу отъ усте́нъ пра́вая, я́ко и́стинѣ поучи́тся горта́нь мой, ме́рзки же пре́до мно́ю устны́ лжи́выя. Съ пра́вдою вси́ глаго́лы у́стъ мои́хъ, ничто́же въ ни́хъ стро́потно, ниже́ развраще́нно. Вся́ пра́ва су́ть разумѣва́ющимъ и про́ста обрѣта́ющимъ ра́зумъ. Науча́ю бо ва́съ и́стинѣ, да бу́детъ о Го́сподѣ наде́жда ва́ша, и испо́лнитеся Ду́ха.

Прему́дрости Соломо́ни чте́ніе.

Уста́ пра́веднаго ка́плютъ прему́дрость, устнѣ́ же муже́й му́дрыхъ вѣ́дятъ благода́ть. Уста́ му́дрыхъ поуча́тся прему́дрости, пра́вда же избавля́етъ и́хъ отъ сме́рти. Сконча́вшуся му́жу пра́ведну, не поги́бнетъ наде́жда. Сы́нъ бо пра́веденъ ражда́ется въ живо́тъ и во благи́хъ свои́хъ пло́дъ пра́вды объи́метъ. Свѣ́тъ пра́веднымъ всегда́, и отъ Го́спода обря́щутъ благода́ть и сла́ву. Язы́къ му́дрыхъ до́брая свѣ́сть, и въ се́рдцѣ и́хъ почíетъ му́дрость. Лю́битъ Госпо́дь преподо́бная сердца́, прія́тни же Ему́ вси́ непоро́чніи въ пути́. Му́дрость Госпо́дня просвѣща́етъ лице́ разу́мнаго: постига́етъ бо жела́ющія ю́, пре́жде да́же разумѣ́ти ю́, и удо́бь у́зрится отъ лю́бящихъ ю́. Утреневавый къ не́й не утруди́тся, и бдя́й ея́ ра́ди вско́рѣ безъ печа́ли бу́детъ. Яко досто́йныхъ ея́ сама́ обхо́дитъ, и́щущи, и во стезя́хъ ея́ явля́ется и́мъ благопріе́мнѣ. Му́дрости никогда́же одолѣ́етъ зло́ба. Си́хъ ра́ди и рачи́тель бы́хъ добро́ты ея́, и возлюби́хъ ю́, и поиска́хъ отъ ю́ности моея́. И взыска́хъ невѣ́сту привести́ себѣ́, я́ко всѣ́хъ Влады́ка возлюби́ ю́. Таи́бница бо е́сть Бо́жія хи́трости и обрѣта́тельница дѣ́лъ Его́. Труды́ ея́ су́ть добродѣ́тели: цѣлому́дрію же и ра́зуму та́ учи́тъ, пра́вдѣ и му́жеству, и́хже потре́бнѣе ничто́же е́сть въ житіи́ человѣ́комъ. Аще же и мно́гаго иску́сства жела́етъ кто́, вѣ́сть дре́вняя, и бы́ти хотя́щая разсмо́тритъ. Свѣ́сть изви́тія слове́съ и разрѣше́нія гада́ній, зна́менія и чудеса́ проразумѣ́етъ, и сбытія́ време́нъ и лѣ́тъ, и всѣ́мъ совѣ́тникъ е́сть бла́гъ. Яко безсме́ртіе е́сть въ не́й и благосла́віе во обще́ніи слове́съ ея́. Сего́ ра́ди бесѣ́довахъ ко Го́споду, и помоли́хся Ему́, и рѣ́хъ отъ всего́ се́рдца моего́: Бо́же отце́въ и Го́споди ми́лости, сотвори́вый вся́ сло́вомъ Твои́мъ и му́дростію Твое́ю устро́ивый человѣ́ка, да владѣ́етъ бы́вшими отъ Тебе́ тварьми́ и да управля́етъ мíръ въ преподо́біи и пра́вдѣ. Да́ждь ми́ Твои́хъ Престо́ловъ присѣдя́щую прему́дрость и не отлучи́ мене́ отъ о́трокъ Твои́хъ, я́ко а́зъ ра́бъ Тво́й и сы́нъ рабы́ни Твоея́. Посли́ ю́ съ Небе́съ отъ свята́го жили́ща Твоего́ и отъ Престо́ла сла́вы Твоея́, да, су́щи со мно́ю, научи́тъ мя́, что́ благоуго́дно е́сть предъ Тобо́ю, и наста́витъ мя́ въ ра́зумъ, и сохрани́тъ мя́ въ сла́вѣ свое́й. Помышле́нія бо сме́ртныхъ вся́ боязли́ва и погрѣши́тельна умышле́нія и́хъ.

Прему́дрости Соломо́ни чте́ніе.

Похваля́ему пра́веднику, возвеселя́тся лю́діе: безсме́ртіе бо е́сть па́мять его́, я́ко отъ Го́спода познава́ется и отъ человѣ́къ, и уго́дна Го́сподеви душа́ его́. Возлюби́те у́бо, о му́жіе, му́дрость и поживете́: восхощи́те ея́ и нака́зани бу́дете. Нача́ло бо ея́ любы́ и соблюде́ніе зако́на. Почти́те прему́дрость, да во вѣ́ки ца́рствуете. Возвѣщу́ ва́мъ и не скры́ю отъ ва́съ та́инъ Бо́жіихъ, я́ко То́й му́дрости наста́вникъ е́сть, и му́дрыхъ испра́витель, и вся́кому смы́слу и дѣ́лу хитре́цъ. И всѣ́мъ смы́сломъ научи́тъ му́дрость, е́сть бо въ не́й Ду́хъ разу́менъ и свя́тъ, и сія́ніе свѣ́та присносу́щнаго, и о́бразъ бла́гости Бо́жія. Та́я дру́ги Бо́жія и проро́ки устроя́етъ, благолѣ́пнѣйши же е́сть со́лнца и па́че вся́каго сотворе́нія звѣ́здъ, свѣ́ту сосужда́ема, обрѣта́ется пе́рвѣйши. Та́я угожда́ющихъ е́й отъ болѣ́зни изба́ви и наста́ви на стези́ пра́выя. Даде́ и́мъ ра́зумъ имѣ́ти свя́тъ, и сохрани́ я́ отъ ловя́щихъ, и по́двигъ крѣ́покъ подаде́ и́мъ. Да разумѣ́ютъ вси́, я́ко си́льнѣйши всего́ е́сть благоче́стіе, и никогда́же премо́жетъ зло́ба му́дрости, ниже́ пре́йдетъ злы́я облича́ющи су́дъ. Реко́ша же въ себѣ́, помы́сливше непра́ведно: наси́льствуемъ пра́ведному, и не пощади́мъ преподо́бства его́, ни усрами́мся сѣди́нъ ста́рости многолѣ́тны. Бу́детъ бо на́мъ крѣ́пость — зако́нъ и улови́мъ пра́веднаго, я́ко неуго́денъ на́мъ е́сть, и проти́вится дѣло́мъ на́шимъ, и поно́ситъ на́мъ отпаде́ніе зако́на, и облича́етъ на́мъ согрѣше́нія наказа́нія на́шего. Возвѣща́етъ на́мъ ра́зумъ имѣ́ти Бо́жій, и о́трока Госпо́дня себе́ имену́етъ. Бы́сть на́мъ на обличе́ніе помышле́ній на́шихъ и тя́жекъ на́мъ е́сть и ви́димь, я́ко неподо́бно ины́мъ житіе́ его́, и измѣне́ны стези́ его́. Въ поруга́ніе вмѣни́хомся ему́, и удаля́ется отъ путе́й на́шихъ, я́ко отъ нечисто́тъ, и блажи́тъ послѣ́дняя пра́ведныхъ. Уви́димъ у́бо, а́ще словеса́ его́ и́стинна су́ть, иску́симъ, я́же сбыва́ются ему́. Руга́ніемъ и му́кою истя́жемъ его́, да разумѣ́емъ кро́тость его́ и иску́симъ беззло́бство его́, сме́ртію безобра́зною осу́димъ его́, бу́детъ бо посѣще́ніе отъ слове́съ его́. Сія́ помы́слиша и прельсти́шася, ослѣпи́ бо я́ зло́ба и́хъ, и не разумѣ́ша та́инъ Бо́жіихъ и не разсуди́ша, я́ко Ты́ еси́ Бо́гъ еди́нъ, живота́ имѣ́яй и сме́рти вла́сть, и спаса́яй во вре́мя ско́рби, и избавля́яй отъ вся́каго зла́. Ще́дръ и Ми́лостивъ, и дая́й преподо́бнымъ Свои́мъ благода́ть, и Свое́ю мы́шцею го́рдымъ противля́яйся.

На стихо́внѣ стихи́ры, гла́съ 1. Подо́бенъ: Прехва́льніи му́ченицы.

Слове́сную трубу́ богосло́вія* и добродѣ́телей чи́стое зерца́ло,* я́ко таи́нника благода́ти,* соше́дшеся дне́сь, пѣ́сньми тя́ восхваля́емъ,* Си́моне свяще́ннѣйшій, и мо́лимся:* моли́ся Христу́ Бо́гу* дарова́ти душа́мъ на́шимъ* ми́ръ и ве́лію ми́лость.

Сти́хъ: Свяще́нницы Твои́ облеку́тся въ пра́вду,* и преподо́бніи Твои́ возра́дуются.

Отъ свѣ́та у́мнаго* пріе́мь, блаже́нне, озаре́ніе,* я́ко свѣ́тлое свѣти́ло,* бы́лъ еси́ посредѣ́ по́стническаго ли́ка,* отъ него́же, избра́ніемъ свы́ше,* святи́тельскому вруче́нъ престо́лу,* бы́лъ еси́ до́бръ па́стырь* слове́сныхъ ове́цъ Христа́ Бо́га,* Ему́же ны́нѣ предстоя́,* моли́ся дарова́ти душа́мъ на́шимъ* ми́ръ и ве́лію ми́лость.

Сти́хъ: Уста́ пра́веднаго поуча́тся прему́дрости,* и язы́къ его́ возглаго́летъ су́дъ.

Лѣ́ствицу къ небеси́ у́мную* мно́гими труда́ми твои́ми обрѣ́тъ,* святи́телю блаже́нне,* возше́лъ еси́ къ незаходи́мому Свѣ́ту* и съ первонача́льники твои́ми живе́ши, ра́дуяся,* съ ни́миже и о на́съ моли́ся,* я́ко да сподо́бимся въ жи́зни вѣ́чной съ тобо́ю* и со всѣ́ми святы́ми спребыва́нія.

Сла́ва, гла́съ 2:

Свѣ́тлаго житія́ твоего́ о́бразъ, свяще́ннѣйшій Си́моне, мно́гія на добродѣ́тели испра́ви, рѣка́ же спаси́тельнаго уче́нія твоего́ ду́ши, уны́ніемъ содержи́мыя, къ бо́дрости подви́же и лѣни́выя къ богохвале́нію возста́ви, тѣ́мъ твою́ всечестну́ю па́мять почита́юще, припа́даемъ и мо́лимся, я́ко да твои́мъ наставле́ніемъ жи́знь на́шу въ ми́рѣ испра́вимъ и пріи́мемъ отъ Христа́ Бо́га ве́лію ми́лость.

И ны́нѣ, богоро́диченъ: Спаси́ отъ бѣ́дъ рабы́ Твоя́...

Тропа́рь, гла́съ 1:

Житíй преподо́бныхъ оте́цъ Пече́рскихъ списа́телю извѣ́стный, святи́телю Христо́въ Си́моне всеблаже́нне, моли́ся прилѣ́жно съ ни́ми Христу́ Бо́гу, да упра́витъ въ ми́рѣ живо́тъ на́шъ и въ кни́ги живо́тныя да напи́шетъ ны́, спаса́я ду́ши на́ша.

Сла́ва, и ны́нѣ, богоро́диченъ.



НА УТРЕНИ,
На Бо́гъ Госпо́дь: Тропа́рь святи́телю, [два́жды]. Сла́ва, и ны́нѣ, богоро́диченъ.

По 1-мъ стихосло́віи сѣда́ленъ, гла́съ 4. Подо́бенъ: Яви́лся еси́.

Яко златотка́нною порфи́рою, правосла́внымъ твои́мъ уче́ніемъ Це́рковь Влади́мірская обложи́ся, ли́цы же и́ночествующихъ наставле́ніемъ твои́мъ красу́ются, Тро́ицу Святу́ю во Еди́номъ Существѣ́, о тебѣ́, іера́рше Си́моне, вы́ну прославля́юще. [Два́жды.]

Сла́ва, и ны́нѣ, богоро́диченъ:

Пречи́стая Дѣ́во, Ма́ти Бо́жія, на́съ, прибѣга́ющихъ къ Твое́й бла́гости и и́щущихъ ско́раго Твоего́ заступле́нія, не пре́зри, но, прекло́ньшися на ми́лость, въ ну́ждахъ на́шихъ помози́ и изба́ви отъ бѣ́дъ ду́ши на́ша.

По 2-мъ стихосло́віи сѣда́ленъ, гла́съ 3. Подо́бенъ: Красотѣ́ дѣ́вства.

Мы́сленное сокро́вище отъ первонача́льныхъ оте́цъ на́шихъ пріе́мь, о́тче преподо́бне Си́моне, святи́телю прему́дрѣйшій, во стотру́дныя тала́нты сіе́ умно́жилъ еси́ и по тебѣ́ прише́дшимъ неоску́дно оста́вилъ еси́, са́мъ же, я́ко благíй ра́бъ, вше́лъ еси́ въ ра́дость Го́спода своего́, ея́же и на́съ, хвала́ми па́мять твою́ почита́ющихъ, моли́твами твои́ми сподо́би. [Два́жды.]

Сла́ва, и ны́нѣ, богоро́диченъ:

Вруче́нныя на́мъ отъ Бо́га тала́нты лѣ́ностію погуби́хомъ и стыди́мся тщи́ яви́тися Го́споду своему́. Къ Тебѣ́ прибѣга́емъ, Влады́чице: да́ждь поне́ еди́ну ца́ту отъ неоску́днаго сокро́вища ми́лости Твоея́, да не постыди́мся въ де́нь стра́шнаго испыта́нія, и Тя́, Приснодѣ́ву, хвала́ми непреста́нно велича́емъ.

По поліеле́и сѣда́ленъ, гла́съ 5. Подо́бенъ: Собезнача́льное Сло́во.

Му́драго святи́теля и па́стыря неусы́пна, житíй святы́хъ списа́теля вѣ́рна и ревни́теля тѣ́хъ благоче́стна, Си́мона свяще́ннѣйшаго въ пѣ́снехъ, лю́діе, ублажи́мъ: то́й бо ны́нѣ, въ вы́шнихъ предстоя́ престо́лу Влады́чню, чи́стѣ зри́тъ Свѣ́тъ непристу́пный и мо́лится непреста́нно о любо́вію па́мять его́ пою́щихъ и Христа́ Бо́га прославля́ющихъ. [Два́жды.]

Сла́ва, и ны́нѣ, богоро́диченъ:

Сло́ва, Отцу́ Собезнача́льнаго, Ма́ти су́щи, грѣ́шныхъ ско́рая Помо́щнице и Засту́пнице въ бѣда́хъ су́щимъ, простри́ пречи́стыя дла́ни, и́миже Безлѣ́тнаго, въ лѣ́то Младе́нца я́вльшася, носи́ла еси́, и умоли́ о на́съ, многогрѣ́шныхъ, Того́ бла́гость, да изба́вимся отъ находя́щихъ ну́ждъ и печа́лей, я́ко да при́сно непоро́чное Рождество́ Твое́ велича́емъ.

Степе́нна, 1-й антифо́нъ, 4-го гла́са. Проки́менъ, [гла́съ 4]: Уста́ моя́ возглаго́лютъ прему́дрость,* и поуче́ніе се́рдца моего́ ра́зумъ. Сти́хъ: Свяще́нницы Твои́ облеку́тся въ пра́вду, и преподо́бніи Твои́ возра́дуются. Вся́кое дыха́ніе... Ева́нгеліе отъ Іоа́нна, зача́ло 36.

По 50-мъ псалмѣ́ стихи́ра, гла́съ 6:

Труды́ дѣя́ній твои́хъ, преподо́бне о́тче, во о́бразъ и́ночествующимъ бы́ша. Кто́ бо ви́дѣ безмѣ́рное твое́ смире́ніе и въ житіи́ свое́мъ не испра́вися? Или́ кто́, ви́дѣвъ безро́потное твое́ послуша́ніе, терпеливоду́шію твоему́ не удиви́ся? Всѣ́хъ собо́ю научи́лъ еси́, но и по отше́ствіи твое́мъ уча́ не престае́ши, вразумля́я и наставля́я ти́химъ наказа́ніемъ. Тѣ́мже я́ко па́стыря тя́, и учи́теля, и преподо́бнымъ единовсе́льника, чту́ще па́мять твою́, ублажа́емъ.

Кано́нъ Богоро́дицы со ирмосо́мъ на 6 и святи́телю на 6. Гла́съ 8.

Пѣ́снь 1.

Ирмо́съ: Колесницегони́теля фарао́ня погрузи́ чудотворя́й иногда́ Моисе́йскій же́злъ, крестообра́зно порази́въ и раздѣли́въ мо́ре, Изра́иля же бѣглеца́, пѣшехо́дца спасе́, пѣ́снь Бо́гови воспѣва́юща.

Добродѣ́тели святи́теля Твоего́ хвала́ми воспѣ́ти, а́ки мо́ре тече́ніемъ преплы́ти; устремля́ющася мя́ упра́ви, Христе́, молю́ся, и, у́мъ отъ бу́рныхъ житія́ сего́ по́мысловъ ути́шивъ, спаси́, пѣ́снь Тебѣ́, Бо́гу моему́, воспѣва́юща.

Гру́бъ сы́й и несмы́сленъ, но любо́вію къ тебѣ́ влеко́мь, дерза́ю па́мять твою́, Си́моне, іера́рше Христо́въ, восхвали́ти, ты́ же моли́твами твои́ми мнѣ́ посо́бствуй и наста́ви мя́ ны́нѣ о тебѣ́ Влады́цѣ моему́ пѣ́снь Бо́гу воспѣва́ти.

Житіе́ твое́, преподо́бне, чту́ще, кто́ не почуди́тся, ви́дя ре́вность твою́ къ подража́нію пе́рвымъ отце́мъ Пече́рскимъ? Тѣ́мже и а́зъ, удивля́яся, смире́нно о тебѣ́ Бо́гу моему́ пѣ́ніе возсыла́ю.

Пріе́мь а́нгельскій о́бразъ въ благолѣ́пной Пече́рской Ла́врѣ, прія́лъ еси́ и а́нгельское житіе́, послѣ́дуя Анто́нію вели́кому и Ѳеодо́сію чу́дному, съ ни́миже ны́нѣ живы́й, ра́дуешися, непреста́нно пѣ́снь Бо́гу воспѣва́я.

Богоро́диченъ: Премѣни́хъ о́бразъ, но дѣ́лъ мои́хъ не премѣни́хъ, Ма́ти Бо́жія, благода́тію изъ Тебе́ Ро́ждшагося спа́сшая ро́дъ человѣ́ческій, по благода́ти Твое́й спаси́ мя, о Тебѣ́, Влады́чицѣ мое́й, пѣ́ніе Бо́гу возсыла́юща.

Пѣ́снь 3.

Ирмо́съ: Небе́снаго кру́га Верхотво́рче, Го́споди, и Це́ркве Зижди́телю, Ты́ мене́ утверди́ въ любви́ Твое́й, жела́ній кра́ю, вѣ́рныхъ утвержде́ніе, еди́не Человѣколю́бче.

Аки звѣ́зды небе́сныя, просія́ша добродѣ́тели твоя́, о́тче, и́хже луча́ми и на́съ озари́, во тмѣ́ страсте́й ходя́щихъ, да о тебѣ́ небе́снаго кру́га Творцу́ воспое́мъ: сла́ва Ти́, Еди́не Человѣколю́бче.

Свѣ́та невече́рняго хотя́ прича́стникъ бы́ти, мíра тлѣ́нныхъ удали́лся еси́ и, а́нгельскій о́бразъ воспріе́мь, а́нгельски приноси́лъ еси́ Бо́гу хвале́ніе, зовы́й: сла́ва Ти́, Еди́не Человѣколю́бче.

Просія́вшимъ вели́кимъ отце́мъ — Анто́нію и Ѳеодо́сію Пече́рскимъ — ревну́я, а́ки свѣ́тлая звѣзда́, просія́лъ еси́ въ жи́зни се́й, преподо́бне, смире́ніемъ и чистото́ю. Имже удивля́ющеся, пое́мъ: сла́ва Тебѣ́, Еди́не Человѣколю́бче.

Послуша́ніе твое́, блаже́нне, бы́сть, а́ки зерца́ло, посредѣ́ собо́ра бра́тій, и си́мъ наипа́че прибли́жился еси́ бы́вшему послушли́ву да́же до сме́рти Іису́су. Ему́же ны́нѣ живе́ши посредѣ́ гра́жданъ небе́сныхъ и пое́ши: сла́ва Ти́, Еди́не Человѣколю́бче.

Богоро́диченъ: За́повѣди Го́спода моего́ слы́шу, но та́ преслуша́ю; Ты́ же, Чи́стая Дѣ́во, ре́кшая: се́ Раба́ Госпо́дня, — сотвори́ мя́ раба́ послушли́ва, да сла́влю Тя́, Еди́ну Человѣколюби́вую Ма́терь.

Сѣда́ленъ, гла́съ 8:

Лѣ́ствицу добродѣ́телей обрѣ́тъ, возше́лъ еси́ на го́ру безстра́стія и, узрѣ́въ пре́лесть мíра сего́, любостра́стнаго ца́рствія, во мгнове́ніи о́ка преходя́щаго, отре́клся еси́, ни міроде́ржцу, но Еди́ному Царю́ вѣко́въ поклони́лся еси́, тѣ́мъ тя́ пѣ́сньми почита́емъ, Си́моне, о́тче преблаже́нне. [Два́жды.]

Сла́ва, и ны́нѣ, богоро́диченъ:

Яко спасе́нія наде́жду и Помо́щницу въ ну́ждахъ иму́ще Тя́, Богоневѣ́стная Дѣ́во, вра́жіихъ нахожде́ній не убои́мся, но о Тебѣ́ дерза́емъ, Ты́ бо еси́ крѣ́пость на́ша и утвержде́ніе.

Пѣ́снь 4.

Ирмо́съ: Ты́ моя́ крѣ́пость, Го́споди, Ты́ моя́ и си́ла, Ты́ мо́й Бо́гъ, Ты́ мое́ ра́дованіе, не оста́вль нѣ́дра Отча, и на́шу нищету́ посѣти́въ. Тѣ́мъ съ проро́комъ Авваку́момъ зову́ Ти: си́лѣ Твое́й сла́ва, Человѣколю́бче.

Ты́, преподо́бне, вѣ́дѣніемъ и дѣя́ніемъ къ свѣ́ту мы́сленному прибли́жився, свѣ́телъ житіе́мъ показа́лся еси́, и́мже мно́зи наставля́еми, сла́вляху Бо́га, глаго́люще: си́лѣ Твое́й сла́ва, Человѣколю́бче.

Слу́хъ дѣя́ній твои́хъ, о́тче, про́йде въ разли́чныя страны́, и мно́зи жела́ху тя́ предводи́теля и наста́вника себѣ́ имѣ́ти, я́ко да, наста́вльшеся тобо́ю, просла́вятъ Отца́ Небе́снаго, Иже просла́ви тя́ сицево́ю благода́тію.

Па́че и́нѣхъ Це́рковь Влади́мірская ускори́ призва́ти тя́, блаже́нне, я́ко да ю́, мятя́щуюся, твои́мъ прише́ствіемъ возвесели́ши и упасе́ши жезло́мъ твоего́ правле́нія.

Предсрѣта́ютъ тя́ и Су́ждальстіи гра́ждане, ли́ки духо́вныхъ пѣ́сней составля́юще, и, ра́дующеся, возво́дятъ на престо́лъ архіере́йскій, на́ньже возше́дъ, бы́лъ еси́ тому́ до́брый па́стырь.

Богоро́диченъ: До́браго Па́стыря су́щи Ма́ти, слове́сныя Твоя́ о́вцы, мы́сленнымъ волко́мъ распу́женныя, собери́ и Сама́, Влады́чице, на́съ упаси́, да нектому́ а́дскій во́лкъ дерза́етъ ста́ду Твоему́ прибли́житися.

Пѣ́снь 5.

Ирмо́съ: Вску́ю мя́ отри́нулъ еси́ отъ лица́ Твоего́, Свѣ́те незаходи́мый, и покры́ла мя́ е́сть чужда́я тма́ окая́ннаго? Но обрати́ мя, и къ свѣ́ту за́повѣдей Твои́хъ пути́ моя́ напра́ви, молю́ся.

Тебѣ́, Си́моне, я́коже о́ному люби́мому ученику́ Своему́ Си́мону, вручи́лъ е́сть па́стырей Нача́льникъ Іису́съ ове́цъ па́ству, ю́же пріе́мь, до́брѣ наста́вилъ еси́ къ высотѣ́ небе́сной; къ не́йже и моя́ пути́ напра́ви, молю́тися.

Отъ ю́ности возлюби́лъ еси́ всѣ́хъ Влады́ку, отъ Него́же за любо́вное воздая́ніе прія́лъ еси́ честно́ю Его́ Кро́вію иску́пленныя о́вцы пасти́. Того́жде Влады́ки овча́ и а́зъ е́смь, воззри́ на мя́, святи́телю Си́моне, и пути́ моя́ напра́ви, молю́тися.

Па́стырская свирѣ́ль уче́ній твои́хъ, о́тче, увеселя́ше слове́сныя о́вцы, и нектому́ предпочита́ху тлѣ́нныя пи́щи, духо́внымъ пита́ющеся зла́комъ; а́лчуща мя́ твои́мъ уче́ніемъ напита́й и пути́ моя́ напра́ви, молю́тися.

Жезло́мъ правле́нія до́брѣ управля́лъ еси́ вруче́нное тебѣ́ ста́до, о́бразъ тѣ́мъ себе́ сама́го подая́, его́же, отча́сти напи́санный, и а́зъ чту́, но не могу́ тому́ ревнова́ти. Ты́, па́стырю до́брый, да бу́ду подража́тель того́, пути́ моя́ напра́ви моли́твами твои́ми.

Богоро́диченъ: Онебеси́вшая земноро́дныхъ существо́ пресвяты́мъ Рождество́мъ Твои́мъ, Дѣ́во Марíе, у́мъ на́шъ, по земны́хъ су́етствіяхъ плѣ́жущъ, возведи́ къ го́рнимъ, и къ иска́нію о́ныхъ, мо́лимтися, пути́ на́ша напра́ви.

Пѣ́снь 6.

Ирмо́съ: Очи́сти мя́, Спа́се, мно́га бо беззако́нія моя́, и изъ глубины́ зо́лъ возведи́, молю́ся, къ Тебѣ́ бо возопи́хъ, и услы́ши мя́, Бо́же спасе́нія моего́.

Благода́тію Ду́ха Свята́го освяще́нъ, я́ко священнотаи́нникъ вѣ́ренъ, престо́лу Бо́жію на земли́, Си́моне, въ преподо́біи и пра́вдѣ послужи́лъ еси́, тебѣ́ ны́нѣ, съ вѣ́рными рабы́ въ ра́дости Го́спода твоего́ живу́щу, молю́ся: бу́ди ми́ моли́твенникъ къ Бо́гу о спасе́ніи мое́мъ.

Сугу́баго зва́нія, святи́телю, я́ко сугу́быя на ся́ труды́ пріе́мый, сподо́бился еси́: па́стырскимъ бо прилѣжа́ дѣло́мъ, и́ноческихъ по́двиговъ никогда́же оставля́лъ еси́; тѣ́мже въ по́чести сугу́бѣй ны́нѣ живы́й, моли́ о мнѣ́, да не лишу́ся спасе́нія моего́.

При́сно помина́я, преподо́бне, отце́въ Пече́рскихъ труды́, навы́клъ еси́ тѣ́мъ подража́ти, и́мже купнонра́венъ и единому́дръ показа́вся, препосла́лся еси́ отъ ху́ждшаго къ лу́чшему, я́ко да сугу́бымъ украси́шися вѣнце́мъ.

Дѣя́ніемъ Госпо́днихъ за́повѣдей умертви́лъ еси́ пло́ть твою́, но благода́тію Бо́жіею оживи́лъ еси́ ду́шу твою́. Вѣ́дѣніемъ же духо́вную лѣ́ствицу обрѣ́тъ, восте́клъ еси́ возвыше́ніемъ у́мнымъ къ Бо́гу, Ему́же предстоя́, моли́ся о пою́щихъ тя́, Си́моне блаже́нне.

Богоро́диченъ: Дѣя́ніе лѣ́ностію, вѣ́дѣніе же омраче́ніемъ страсте́й погуби́хъ, и ни еди́наго же не имы́й, сугу́баго бою́ся осужде́нія, оба́че къ Тебѣ́, Богороди́тельнице, прибѣга́ю, я́ко си́льна и многомо́щна, обоя́ испра́ви и бу́ди Помо́щница спасе́нія моего́.

Конда́къ, гла́съ 2:

Святи́тельства оде́ждою, а́ще и досто́йнѣ одѣ́ялся еси́, оба́че тѣ́мъ не вознося́ся, жела́лъ еси́ па́че сме́тіемъ предъ враты́ Ла́вры Пече́рскія поврещи́ся, смиренному́дре Си́моне. Тѣ́мже, не а́ки смѣ́тіе, вра́тъ внѣ́, но, я́ко сокро́вище, вну́трь святы́я пеще́ры положе́нъ бы́ти сподо́бился еси́, и ны́нѣ на небеси́ Го́сподеви предстоя́, моли́ся о на́съ, чту́щихъ тя́.

Пѣ́снь 7.

Ирмо́съ: Бо́жія снисхожде́нія о́гонь устыдѣ́ся въ Вавило́нѣ иногда́, сего́ ра́ди о́троцы въ пещи́, ра́дованною ного́ю, я́ко во цвѣ́тницѣ, лику́юще поя́ху: благослове́нъ еси́, Бо́же оте́цъ на́шихъ.

Бо́жія благода́ть дѣ́йствоваше въ тебѣ́, святи́телю, исхожда́ху бо вы́ну отъ у́стъ твои́хъ струи́ святы́хъ уче́ній, напая́ющія сердца́ лѣни́выхъ, и́же твои́мъ окропле́ніемъ произне́сше добродѣ́телей плоды́, зва́ху: благослове́нъ Бо́гъ оте́цъ на́шихъ.

Сѣ́ялъ еси́ сѣ́мя сло́ва Бо́жія въ вертогра́дѣ па́ствы своея́, насажда́я кри́нъ чистоты́, а́ки стебло́ Лива́ново, моли́тву, милосе́рдіе къ бли́жнимъ, а́ки ма́слину, а́ки кипари́съ, помышле́нія вы́ну о Бо́зѣ: я́же бо са́мъ твори́лъ еси́, сія́ и и́нѣхъ нака́зовалъ еси́ твори́ти.

До́брѣ написа́въ на скрижа́лѣхъ се́рдца твоего́ добродѣ́тели оте́цъ Пече́рскихъ, не скры́лъ еси́ тѣ́хъ подъ спу́домъ жите́йскія молвы́, о́тче, но, ре́вностію дви́жимь, ве́сь у́мъ сво́й обрати́лъ еси́ о́ныхъ житія́ на по́льзу и́нѣмъ написа́ти, я́же и мы́ чту́ще, зове́мъ: благослове́нъ Бо́гъ оте́цъ на́шихъ.

Аки разу́мная пчела́ мы́сленныя цвѣ́ты, житія́ преподо́бныхъ собра́въ, пода́лъ еси́ та́, а́ки со́тъ сла́дкій, по тебѣ́ живу́щимъ, и́миже мы́ услажда́юще ду́ши на́ша, съ тобо́ю, Си́моне, пое́мъ: благослове́нъ Бо́гъ оте́цъ на́шихъ.

Богоро́диченъ: Стра́стнаго вкуси́въ со́та, и́мамъ се́рдце и устнѣ́, го́рести испо́лнены; Ты́, Влады́чице, Сладча́йшаго ро́ждшая Іису́са, благода́тію Твое́ю услади́ ду́шу мою́, да воспою́: ра́дуйся, сла́дости святы́я Служи́тельнице и благослове́ніе оте́цъ на́шихъ.

Пѣ́снь 8.

Ирмо́съ: Седмери́цею пе́щь халде́йскій мучи́тель богочести́вымъ неи́стовно разжже́, си́лою же лу́чшею спасе́ны сія́ ви́дѣвъ, Творцу́ и Изба́вителю вопія́ше: о́троцы, благослови́те, свяще́нницы, воспо́йте, лю́діе, превозноси́те во вся́ вѣ́ки.

Седмогла́внаго змíя седми́цею дарова́ній духо́вныхъ сте́рлъ еси́ главу́, о́тче, и, уя́звленъ, трепе́щетъ до ны́нѣ и́мене твоего́, е́же въ дне́шній де́нь мы́ помина́юще, о тебѣ́ зове́мъ: лю́діе, превозноси́те Христа́ во вѣ́ки.

Любо́вію къ Пречи́стѣй Бо́жіей Ма́тери и отце́мъ Пече́рскимъ мнѣ́лся еси́ отстоя́ти тѣ́ломъ то́кмо, ду́хомъ же пребыва́лъ еси́ съ ни́ми и подража́лъ житію́ и́хъ, тѣ́мъ любо́вію твое́ю посѣти́ на́съ и моли́, да превозно́симъ Христа́ во вѣ́ки.

По и́стинѣ, я́коже Си́монъ люби́тель Сама́го Христа́ бы́сть те́плѣйшій, та́ко и ты́, Си́моне іера́рше, къ Богоро́дицѣ и Ея́ оби́тели показа́лся еси́ усе́рдный ревни́тель и и́хже люби́лъ еси́, съ тѣ́ми ны́нѣ живе́ши во вѣ́ки.

Сла́ву и че́сть свою́ съ уме́тами Пече́рскаго монастыря́ не сравня́я, жела́лъ еси́, о́тче: лу́чше тебѣ́ еди́нъ де́нь а́ки сме́тію въ дому́ та́мо Бо́жія Ма́тере примета́тися, не́жели ты́сящу лѣ́тъ сла́вимь бы́ти на престо́лѣ. О, чу́днаго твоего́ смире́нія, тѣ́мъ ублажа́емъ тя́ во вѣ́ки.

Богоро́диченъ: Твои́мъ посо́біемъ, Чи́стая, пріидо́хъ къ сопребыва́нію оте́цъ Пече́рскихъ, но отъ невнима́нія зрѣ́ніемъ вспя́ть уклони́хся, и влече́тъ мя́ вра́гъ въ мíръ на пе́рвая па́ки. Ма́ти Бо́жія, убѣди́ мя́ здѣ́ присѣдѣ́ти и спасе́нію своему́ внима́ти, да не, испа́дъ, поги́бну во вѣ́ки.

Пѣ́снь 9.

Ирмо́съ: Ужасе́ся о се́мъ не́бо, и земли́ удиви́шася концы́, я́ко Бо́гъ яви́ся человѣ́комъ пло́тски, и чре́во Твое́ бы́сть простра́ннѣйшее небе́съ. Тѣ́мъ Тя́, Богоро́дицу, Ангеловъ и человѣ́къ чинонача́лія велича́ютъ.

Удивля́емся свято́му житію́ твоему́, Си́моне преблаже́нне, прославля́емъ по́двиги твоя́, чти́мъ и па́мять твою́, ю́же ны́нѣ со а́нгелы велича́емъ.

Ни́жняя оста́вль, отше́лъ еси́ къ вы́шнимъ, тѣ́ло же твое́ по жела́нію принесе́но отъ престо́ла твоего́ въ пеще́ру и показу́етъ, любо́вь коли́ку имѣ́лъ еси́ къ сему́ мѣ́сту, на не́мже вси́ тя́ велича́емъ.

Ра́дуется пеще́ра, содержа́щи мо́щи твоя́, святи́телю, и созыва́етъ и́ночествующихъ и празднолю́бныхъ собо́ры, да похва́льными пѣ́сньми па́мять твою́ вси́, собра́вшіися въ дне́шній де́нь, велича́ютъ.

Отше́лъ еси́ са́мъ чу́вственнѣ, но неотсту́пнѣ съ на́ми па́мять твоя́ пребыва́етъ: се́ бо дѣ́ти твои́, любо́вію къ тебѣ́ горя́ще, при́сно тя́ помина́емъ и велича́емъ.

Богоро́диченъ: Неотсту́пнѣ съ на́ми су́щи, Пресвята́я Дѣ́во, собра́вшіяся въ па́мять вѣ́рнаго Твоего́ раба́ лю́ди укрѣпи́, лѣ́ность отжени́ и ра́зумъ просвѣти́, да бо́дренно Тя́ и Сы́на Твоего́ вси́ велича́емъ.

Свѣти́ленъ:

Богому́драго отца́, словеса́ прему́дра написа́вша, восхва́лимъ: честна́я бо его́ писа́нія су́ть а́ки роса́ у́тренняя, со́тъ сла́дкій, хлѣ́бъ живо́тный, не́ктаръ небе́сный, исто́чникъ воды́ живы́я, отъ него́же пія́й сла́дости духо́вныя исполня́ется и па́мять твою́ прославля́етъ, Си́моне блаже́ннѣйшій. [Два́жды.]

Сла́ва, и ны́нѣ, богоро́диченъ:

Исто́чникъ недовѣ́домый, и́же превы́ше небе́съ, воды́ живы́я произве́дши, Дѣ́во, напо́й мя́, жа́ждущаго ми́лости Твоея́, да, прохлажде́нъ, сла́влю Тя́.

На хвали́техъ стихи́ры, гла́съ 1. Подо́бенъ: Небе́сныхъ чино́въ.

Зри́тель священнотаи́нный* бы́лъ еси́, всеблаже́нне,* въ мíрѣ се́мъ живы́й тѣ́ломъ,* преста́вився же къ жи́зни лу́чшей,* сама́го богови́денія сподо́бился еси́* и зри́ши я́сно Свѣ́тъ непристу́пный,* Его́же и на́съ зрѣ́ти досто́йны сотвори́* те́плыми къ Бо́гу моли́твами твои́ми. [Два́жды.]

Словесе́мъ твои́мъ внима́ющіи* и наказа́нію твоему́ прилѣжа́щіи,* Си́моне преподо́бне,* по́льзу въ житіи́ познава́ютъ* и по́лни явля́ются исправле́нія,* духо́вная дѣя́нія пріе́млютъ* и благода́ть почерпа́ютъ уче́ніемъ твои́мъ,* и́мже обогати́ и на́съ,* въ дне́шній де́нь па́мять твою́* хвала́ми почита́ющихъ.

Боже́ственный орга́нъ Ду́ха Свята́го* и трубу́, проповѣ́дающую духо́вная исправле́нія,* Су́ждальскаго первосѣда́теля,* Си́мона священноглаго́льника* дне́сь, лю́діе, пѣ́сньми почти́мъ,* кла́няющеся ра́цѣ моще́й его́:* то́й бо я́ко іера́рхъ и моли́твенникъ те́плый,* предстоя́ престо́лу Влады́чню,* мо́лится, во е́же спасти́ся на́мъ.

Сла́ва, гла́съ 6:

Свѣ́тлости житія́ твоего́ и святи́тельскому исправле́нію удиви́шася а́нгелъ и человѣ́къ собо́ри, во избра́ніи бо священнотаи́нникъ свы́ше показа́лся еси́ и по́стникомъ зерца́ло изря́дное бы́лъ еси́, тѣ́мже я́ко досто́йна тя́ служи́теля Бо́жія, Си́моне, святи́телю блаже́ннѣйшій, любо́вію въ пѣ́снехъ велича́емъ.

И ны́нѣ, богоро́диченъ: Богоро́дице, Ты́ еси́ лоза́ и́стинная...
Славосло́віе вели́кое, [ектеніи́] и отпу́стъ.



НА ЛИТУРГІИ,

Слу́жба святи́телю о́бща: [Проки́менъ, гла́съ 1: Уста́ моя́ возглаго́лютъ прему́дрость,* и поуче́ніе се́рдца моего́ ра́зумъ. Сти́хъ: Услы́шите сія́ вси́ язы́цы, внуши́те вси́ живу́щіи по вселе́ннѣй. Апо́столъ ко Евре́омъ, зача́ло 318. Аллилу́ія, гла́съ 2: Уста́ пра́веднаго поуча́тся прему́дрости, и язы́къ eго́ возглаго́летъ су́дъ. Сти́хъ: Зако́нъ Бо́га его́ въ се́рдцѣ его́, и не за́пнутся стопы́ eго́. Ева́нгеліе Іоа́нна, зача́ло 36. Прича́стенъ: Въ па́мять вѣ́чную бу́детъ пра́ведникъ, отъ слу́ха зла́ не убои́тся].

Источникъ: Слу́жбы Преподо́бнымъ отце́мъ Пече́рскимъ, и́хже мо́щы въ Бли́жной и Да́льной пеще́рѣ нетлѣ́нно почива́ютъ. — Кíевъ: Въ тѵпогра́фіи Кíево-Пече́рскія Ла́ѵры, 1785. — Л. 84 – 89.

/ Къ оглавленію раздѣла /


Наверхъ / Къ титульной страницѣ

0