Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - вторникъ, 25 апрѣля 2017 г. Сейчасъ на порталѣ посѣтителей - 21.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Ма́ія въ 10-й де́нь.
Свята́го апо́стола Си́мона Зило́та.

[ВЕЧЕРЪ,]
Стихи́ры [на 6]: пра́здника 3 и апо́стола 3, гла́съ 4. Подо́бенъ: Да́лъ еси́ зна́меніе.

Си́монъ апо́столъ,* обте́къ концы́,* я́коже ко́ло, валя́яся,* всю́ зе́млю попали́ идолонеи́стовства* и, благоче́стіемъ просвѣти́въ,* свѣ́тлы лучи́ возжже́ вѣ́рнымъ благода́ти:* вся́ бо просвѣти́* Еди́но сла́вити Божество́ въ Тре́хъ Ѵпоста́сѣхъ,* нераздѣ́льно и несѣко́мо.

Си́монъ апо́столъ,* всесвѣ́тлый и пречу́дный,* язы́ковъ учи́тель,* мре́жа боже́ственная,* изъ глубины́ поги́бельныя на́съ улови́вшая* богосло́віемъ высо́кимъ,* и́стинный проповѣ́дникъ,* вся́ ко Христо́ву позна́нію* ны́нѣ му́дрѣ приведе́* и своя́ исправле́нія предло́жь трапе́зу красну́.

Сла́ва, гла́съ 2:

Ре́вности тезоимени́тъ наре́клся еси́, Си́моне досточу́дне: ревну́я, поревнова́лъ еси́ Бо́гу Вседержи́телю, и, боже́ственныхъ тя́ чуде́съ испо́лнь, показа́, стра́нну бо ре́вность имѣ́я, тезоимени́тъ ре́вности, блаже́нне, назва́лся еси́ и нра́ву зва́ніе согла́сно стяжа́лъ еси́. Тѣ́мже въ вы́шнихъ сы́й, съ вы́шними ли́ки вселя́емь, моли́ся, богови́дче, Сло́ву, Христу́ Бо́гу на́шему, дарова́ти на́мъ ве́лію ми́лость.

И ны́нѣ, пра́здника.

На стихо́внѣ стихи́ры, гла́съ 1. Подо́бенъ: Всехва́льніи му́ченицы.

Си́моне всеприснопа́мятне,* сла́дости пото́къ испи́лъ еси́* и богому́дренно напои́въ* Бо́жія ра́зума* те́плѣ жела́ющія,* Христа́ подража́я.* Къ Нему́же ны́нѣ ра́достно преше́лъ еси́,* сла́вою обожа́емь Тро́ицы пресвѣ́тлою* и ми́ромъ неисчетноси́льнымъ.

Сти́хъ: Во всю́ зе́млю изы́де вѣща́ніе и́хъ* и въ концы́ вселе́нныя глаго́лы и́хъ.

Си́моне пречу́дне,* Бо́жію созерца́я красоту́* и я́ко дости́жно зря́й,* едине́ніемъ лу́чшимъ наслажда́яся сего́,* и положе́ньми обожа́емь,* еди́наго, жела́емаго и блаже́ннаго,* ра́дуяся, дости́глъ еси́,* христопроповѣ́дниче всеприснопа́мятне,* а́нгеломъ ны́нѣ соводворя́емь.

Сти́хъ: Небеса́ повѣ́даютъ сла́ву Бо́жію,* творе́ніе же руку́ Его́ возвѣща́етъ тве́рдь.

Си́моне всеблаже́нне,* Бо́гу и человѣ́комъ показа́лся еси́* вѣ́ренъ хода́тай* и ны́нѣ ми́лостива* благодерзнове́нными моли́твами* сотвори́ на́мъ Христа́,* не преста́й Го́спода моля́ всегда́* дарова́ти душа́мъ на́шимъ ми́ръ* и ве́лію ми́лость.

Сла́ва, гла́съ 6:

Тва́рь, я́ко оре́лъ высокопа́рный, преше́лъ еси́, Си́моне свяще́ннѣйшій, учениче́ Спа́совъ и апо́столе, и, ле́сть и́дольскую огневѣща́нными твои́ми догма́ты, я́ко ве́щь, всю́ попали́въ, язы́ки изъ глубины́ невѣ́дѣнія къ Бо́жію позна́нію приве́лъ еси́. И ны́нѣ моли́ся Христу́, я́ко да ми́лостивъ бу́детъ на́мъ въ де́нь Су́дный.

И ны́нѣ, пра́здника.

Тропа́рь, гла́съ 3:

Апо́столе святы́й Си́моне, моли́ ми́лостиваго Бо́га, да прегрѣше́ній оставле́ніе пода́стъ душа́мъ на́шимъ.

Сла́ва, и ны́нѣ, пра́здника.



НА УТРЕНИ,
На Бо́гъ Госпо́дь: Тропа́рь пра́здника, два́жды. Сла́ва, апо́стола. И ны́нѣ, пра́здника.

По 1-й каѳи́смѣ сѣда́ленъ, гла́съ 2:

Улови́въ язы́ки, апо́столъ сла́вный, и научи́въ концы́ земны́я Тебѣ́ кла́нятися со Отце́мъ и Ду́хомъ, Христе́ Бо́же. Того́ ра́ди утверди́ Це́рковь Твою́ и вѣ́рнымъ низпосли́ благослове́ніе Твое́, еди́не Ми́лостиве и Человѣколю́бче. [Два́жды.]

Сла́ва, и ны́нѣ, пра́здника.

По 2-й каѳи́смѣ сѣда́ленъ, гла́съ 4:

Лучу́, я́ко Со́лнце пра́вды испусти́ тя́ Христо́съ, просвѣти́ти всю́ зе́млю, апо́столе сла́вный Си́моне. Боже́ственными твои́ми моли́твами озаря́еши и боже́ственнымъ свѣ́томъ невече́рнимъ всѣ́хъ просвѣща́еши, вѣ́рою соверша́ющихъ святу́ю па́мять твою́. [Два́жды.]

Сла́ва, и ны́нѣ, пра́здника.

Кано́нъ пра́здника со ирмосо́мъ на 6 и апо́стола на 6, его́же акростихи́съ: Апо́стола Си́мона пою́ сла́ву. Гла́съ 8.

Пѣ́снь 1.

Ирмо́съ: Пѣ́снь возсле́мъ, лю́діе, чу́дному Бо́гу на́шему, свободи́вшему Изра́иля отъ рабо́ты, пѣ́снь побѣ́дную пою́ще и вопію́ще: пои́мъ Тебѣ́, Еди́ному Влады́цѣ.

Въ вы́шнихъ Влады́цѣ предстоя́, апо́столе чу́дне, тя́ просла́вльшему и ученика́ Себѣ́ свѣ́тло показа́вшему, просвѣти́ ду́шу мою́, да воспою́ боже́ственную твою́ па́мять.

Вся́ко изоби́ліе благи́хъ тебѣ́ Христо́съ дарова́въ, ве́рхъ боже́ственныхъ дарова́ній, апо́столе, показа́ тя, судо́мъ пра́веднымъ, богоявле́нне, пра́ведный еди́нъ.

Вседухо́вную зарю́ пріи́мь, апо́столе, соше́дшую на тя́ съ небесе́, огнедохнове́нъ бы́лъ еси́, всю́ попаля́я пре́лесть многобо́жія.

Богоро́диченъ: Ты́, мое́ ме́ртвенное и тлѣ́нное, безсме́ртное и нетлѣ́нное, Спа́се, показа́въ, во утро́бу всели́лся еси́ Святы́я Дѣ́вы Пречи́стыя неискусобра́чно, вообрази́вся же въ человѣ́ческое естество́.

Катава́сія пра́здника.

Пѣ́снь 3.

Ирмо́съ: Нѣ́сть свя́тъ, я́ко Госпо́дь, и нѣ́сть пра́веденъ, я́ко Бо́гъ на́шъ, Его́же пое́тъ вся́ тва́рь: нѣ́сть пра́веденъ па́че Тебе́, Го́споди.

Боже́ственное та́инство воплоще́нія позна́лъ еси́ вои́стинну, апо́столе Си́моне богопрія́тне, отъ Самаго́ Спа́са зарю́ пріи́мь премíрную.

Сло́во Безнача́льное и Присносу́щное Своего́ служи́теля тя́, Си́моне чу́дне, блиста́ніи свѣ́тлыми бога́тно просвѣти́ Боже́ственныя благода́ти.

Богоро́диченъ: Свѣ́щникъ всезлаты́й Тя́ проро́къ прописа́, Богоро́дице, нося́щу Свѣ́тъ невече́рній, просвѣща́ющаго мíръ луча́ми Божества́, Христа́ Бо́га на́шего.

Конда́къ и и́косъ пра́здника.
И сѣда́ленъ свята́го, гла́съ 3. Подо́бенъ: Боже́ственныя вѣ́ры.

Боже́ственнаго Ду́ха свѣтозаре́ніемъ тму́ разруши́лъ еси́ многобо́жія и вѣ́рныхъ сердца́ просвѣти́лъ еси́, воспѣ́въ спаси́тельная повелѣ́нія, и упраздни́лъ еси́ е́ллинскія ба́сни, Си́моне сла́вне, Христа́ Бо́га моли́ дарова́ти на́мъ ве́лію ми́лость. [Два́жды.]

Сла́ва, и ны́нѣ, пра́здника.

Пѣ́снь 4.

Ирмо́съ: Изъ горы́ приосѣне́нныя, Сло́ве, проро́къ, еди́ныя Богоро́дицы, хотя́ща воплоти́тися богови́дно усмотри́ и со стра́хомъ славосло́вяше си́лу Твою́.

Ве́сь сокро́вище сы́й дарова́ній ева́нгельскихъ, благода́ти испо́лненъ, свѣ́тъ мíра и со́ль вселе́нныя, Си́моне всеблаже́нне, бы́лъ еси́.

Веще́й сту́днаго явле́нія отврати́лся еси́, невеще́ственъ же Свѣ́тъ ви́дѣти сподо́бился еси́, Божества́ ви́дъ, пріи́мшаго ве́щь человѣ́чества, досточу́дне.

Си́моне, учениче́ жи́зни нетлѣ́нныя, умертви́ на́шъ живу́щій грѣ́хъ живоно́сною си́лою Животода́вца, ея́же прія́лъ еси́ дѣ́йствіе.

Богоро́диченъ: Ра́венъ бы́въ Отцу́ Твоему́ по существу́, ра́венъ человѣ́комъ бы́лъ еси́ по естеству́, отъ Пречи́стыя Дѣ́вы на́шу, Влады́ко, пло́ть пріе́мый.

Пѣ́снь 5.

Ирмо́съ: Отъ но́щи невѣ́денія боговѣ́дѣніемъ просвѣти́вый концы́, просвѣти́ мя у́тромъ человѣколю́бія Твоего́, Го́споди.

Со огне́мъ, богови́дче, ты́ зри́мый язы́къ Ду́ха прія́лъ еси́ усе́рдно, на го́рницѣ сѣдя́.

Яко высо́къ сы́й, въ превы́шнихъ се́лѣхъ живы́й, высо́кая и вели́кая уче́нія на́мъ прине́слъ еси́.

Богоро́диченъ: Зако́нъ пе́рвый, Дѣ́во, рождество́мъ Твои́мъ преста́, процвѣте́ же благода́ть, и пра́вда возсія́.

Пѣ́снь 6.

Ирмо́съ: Ри́зу мнѣ́ пода́ждь свѣ́тлу, одѣя́йся свѣ́томъ, я́ко ри́зою, многоми́лостиве Христе́ Бо́же на́шъ.

Ре́вности тезоимени́тъ нарече́нный, Си́моне досточу́дне, ре́вностію поревнова́лъ еси́ по Го́сподѣ Бо́зѣ Вседержи́тели.

Тя́ Боже́ственныхъ чуде́съ самодѣ́лателя Спа́съ показа́, да́въ вла́сть тебѣ́ дѣ́йствомъ Своея́ бла́гости.

Богоро́диченъ: Да заградя́тся уста́ злочести́выхъ, Богоро́дицу Тя́ не му́дрствующихъ, Всенепоро́чная, и ли́ца въ сту́дъ да облеку́тся.

Конда́къ, гла́съ 2. Подо́бенъ: Тве́рдыя.

Извѣ́стно прему́дрости уче́нія въ душа́хъ благоче́ствующихъ поло́жшаго во хвале́ніи ублажи́мъ, я́ко богоглаго́ливаго вси́ Си́мона: престо́лу бо сла́вы ны́нѣ предстои́тъ и со безпло́тными весели́тся, моля́ся непреста́нно о всѣ́хъ на́съ.

Икосъ:

Апо́стола па́мять вси́, я́ко спаси́тельный де́нь, восхва́лимъ ны́нѣ и благоче́стно ублажи́мъ: то́й бо все́й вселе́ннѣй, я́коже со́лнце, сія́етъ, свѣ́та луча́ми всю́ мглу́ отгоня́я, и просвѣща́етъ любо́вію сего́ па́мять соверша́ющія и любе́зно почита́ющія. Тѣ́мже усе́рдно стеце́мся, воспѣва́юще его́: то́й бо Христу́ предстои́тъ, моля́ся непреста́нно о всѣ́хъ на́съ.

Пѣ́снь 7.

Ирмо́съ: Отроцы евре́йстіи въ пещи́ попра́ша пла́мень дерзнове́нно, и на ро́су о́гнь преложи́ша, вопію́ще: благослове́нъ еси́, Го́споди Бо́же, во вѣ́ки.

Стра́нну ре́вность, Си́моне, имѣ́я, тезоимени́тъ ре́вности, блаже́нне, наре́клся еси́ и нра́въ, зва́нію согла́сенъ, стяжа́лъ еси́, — благослове́нъ еси́, Го́споди, — вопія́, — во вѣ́ки.

Вку́пѣ Сло́ву сликовству́я и собесѣ́дникъ Тому́ бы́въ, Ца́рствія та́мо сопричасти́лся еси́, зовы́й: благослове́нъ еси́, Го́споди Бо́же, во вѣ́ки.

Богоро́диченъ: Ле́стію дре́вле благожре́бія пра́отцы изгна́ змíй, Ты́ же си́хъ, Ма́ти Бо́жія, воззвала́ еси́. Благослове́нъ, Пречи́стая, Пло́дъ Твоего́ чре́ва.

Пѣ́снь 8.

Ирмо́съ: Мусикíйскимъ орга́номъ согласу́ющимъ и лю́демъ безчи́сленнымъ, покланя́ющимся о́бразу въ Деи́рѣ, три́ о́троцы не повину́вшеся, Го́спода воспѣва́ху и славосло́вяху во вся́ вѣ́ки.

Яко красны́, Си́моне, твои́ но́ги, благолѣ́пенъ е́сть и язы́къ, глаго́лющь сла́ву Христо́ву, и научи́ зва́ти: Го́спода по́йте и превозноси́те во вся́ вѣ́ки.

Добро́тами укра́шенъ свѣтолу́чными и чуде́съ пуща́я сія́нія, позна́лся еси́, Си́моне, лю́демъ сѣ́мя благослове́нное: Го́спода по́йте, дѣла́, и превозноси́те во вся́ вѣ́ки.

Богоро́диченъ: Умъ не мо́жетъ рождества́ Твоего́, Богороди́тельнице, сказа́ти и изрещи́ сло́во изнемога́етъ: Бо́га бо, заче́нши, родила́ еси́, Дѣ́во, Его́же превозно́симъ во вся́ вѣ́ки.

Пѣ́снь 9.

Ирмо́съ: Чи́стую сла́вно почти́мъ, лю́діе, Богоро́дицу, о́гнь Божества́ пріи́мшую во чре́вѣ неопа́льно, пѣ́сньми велича́емъ.

Явле́нъ бы́лъ еси́ конце́мъ, свѣ́томъ сія́я, и, о́гнь духо́вный пріе́мъ, свѣтови́дѣнъ показа́лся еси́, тѣ́мже тя́ велича́емъ.

Ве́сь Бо́гу возложе́нъ, Тому́ сраствори́лся еси́, Его́же ны́нѣ моли́, богоявле́нне, о на́съ, вѣ́рою и любо́вію восхваля́ющихъ тя́.

Богоро́диченъ: Спасе́нія всѣ́хъ Хода́таицу, я́вльшуюся человѣ́комъ и мíръ просвѣ́щшую сія́ніи богови́дныя чистоты́, въ пѣ́снехъ велича́емъ.

Свѣти́ленъ. Подо́бенъ: Ду́хомъ во святи́лищи.

Тече́ніе кра́сныхъ твои́хъ но́гъ, Си́моне апо́столе, возврати́въ, къ ше́ствію небе́сному возше́лъ еси́, ра́дуяся, и, Тро́ицѣ предста́въ, во Отцѣ́ ви́диши Сы́на и Ду́ха Боже́ственнаго. Сего́ ра́ди вѣ́рою пресвяще́нную твою́ и боже́ственную пра́зднуемъ па́мять. [Два́жды.]

Сла́ва, и ны́нѣ, пра́здника.

На хвали́техъ стихи́ры на 4, гла́съ 8. Подо́бенъ: Что́ вы́ нарече́мъ?

Что́ тя́ имену́емъ, апо́столе?* Не́бо ли? я́ко сла́ву исповѣ́далъ еси́ Бо́жію.* Рѣку́ ли? я́ко тва́рь напая́еши та́йно.* Звѣзду́, озаря́ющую Це́рковь,* ча́шу, пи́во свято́е излива́ющую,* дру́га Христо́ва бли́жнѣйшаго,* безпло́тныхъ равносе́льника.* Моли́ о спасе́ніи ду́шъ на́шихъ. [Два́жды.]

Си́моне, апо́столовъ похвало́,* украси́шася твои́ но́ги,* путе́мъ про́повѣди ше́ствующія до́брѣ* и пути́ вся́ вра́жія стѣсня́ющія* широто́ю боже́ственнаго ра́зума,* Сло́ва, я́вльшагося дебельство́мъ пло́ти* и ученика́ тя́ пресла́вна избра́вшаго, блаже́нне.* Его́же моли́ спасти́ся душа́мъ на́шимъ.

Си́моне, богогла́сный апо́столе,* по́сланъ бы́лъ еси́,* я́ко стрѣла́ отъ Христа́ свѣтови́дна,* уязвля́юща враги́,* уя́звленнымъ же душа́мъ* я́вственно подаю́ща исцѣле́ніе.* Тѣ́мже тя́ по до́лгу ублажа́емъ* и свято́е твое́ дне́сь соверша́емъ торжество́.* Моли́ спасти́ся душа́мъ на́шимъ.

Сла́ва, гла́съ 2:

Оста́вивъ земна́я, послѣ́довалъ еси́ Христу́ и, зна́менався духнове́ніемъ Свята́го Ду́ха, по́сланъ бы́въ отъ Него́ въ язы́ки поги́бшія обраща́ти человѣ́ки во свѣ́тъ богоразу́мія, апо́столе Си́моне, и, сконча́въ по́двиги боже́ственныя твоея́ стра́сти и му́къ разли́чныхъ, ду́шу твою́ Христу́ преда́лъ еси́, Того́ моли́, всеблаже́нне, дарова́ти на́мъ ве́лію ми́лость.

И ны́нѣ, пра́здника.
Славосло́віе вели́кое. Ектеніи́ и отпу́стъ.



НА ЛИТУРГІИ,

Блаже́нна пра́здника, пѣ́снь рядова́я и апо́стола пѣ́снь 6-я, на 4. Проки́менъ, гла́съ 8: Во всю́ зе́млю изы́де вѣща́ніе и́хъ* и въ концы́ вселе́нныя глаго́лы и́хъ. Сти́хъ: Небеса́ повѣ́даютъ сла́ву Бо́жію, [творе́ніе же руку́ Его́ возвѣща́етъ тве́рдь]. Апо́столъ къ Кори́нѳяномъ, зача́ло 131. Аллилу́ія, гласъ 1: Исповѣ́дятъ небеса́ чудеса́ Твоя́, Го́споди, [и́бо и́стину Твою́ въ це́ркви святы́хъ. Сти́хъ: Бо́гъ прославля́емь въ совѣ́тѣ святы́хъ]. Ева́нгеліе Матѳе́я, зача́ло 56. Прича́стенъ: Во всю́ зе́млю [изы́де вѣща́ніе и́хъ и въ концы́ вселе́нныя глаго́лы и́хъ].

Источникъ: Минíа, мѣ́сяцъ Маій. — М.: Въ до́мѣ Патрíаршемъ, 1691. — Л. 99 об. – 104.

/ Къ оглавленію раздѣла /


Наверхъ / Къ титульной страницѣ

0