Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - вторникъ, 27 iюня 2017 г. Сейчасъ на порталѣ посѣтителей - 15.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Ма́ія въ 9-й де́нь.
Свята́го проро́ка Иса́іи и свята́го му́ченика Христофо́ра.

[ВЕЧЕРЪ,
На Го́споди воззва́хъ:] стихи́ры проро́ка, гла́съ 4. Подо́бенъ: Да́лъ еси́ зна́меніе.

Умъ же и мы́сль* очи́щь, досточу́дне Иса́іе,* Ду́ха благоуго́денъ орга́нъ,* дѣ́йствы сего́ и дохнове́ньми* ударя́емь при́сно,* и богому́дренно сложе́нъ бы́лъ еси́, пресла́вне,* на престо́лѣ Сѣдя́щаго* превознесе́ннѣ зря́* и Боже́ственнымъ науча́яся.

Еди́но Госпо́дство* Тріѵпоста́снаго Божества́,* трисвяты́мъ ра́зумомъ,* непреста́нно сла́вящія серафи́мы боже́ственныя,* блаже́нне, ви́дѣвъ и научи́вся,* проро́честѣй увѣ́рился еси́ благода́ти, чу́дне.* Тѣ́мже, твою́ всесвяще́нную соверша́юще па́мять,* Христу́ тя приво́димъ,* моли́твенника си́льнѣйшаго.

Ины стихи́ры му́ченика, гла́съ то́йже. Подо́бенъ: Яко до́бля.

Христофо́ре пресла́вне,* христоимени́тый сто́лпе,* честно́е украше́ніе благода́ти,* ты́, си́льныхъ держа́ву низве́ргъ,* мучи́телей посрами́лъ еси́* и Христа́ я́ко и́стинна Царя́ и Зижди́теля твоего́ проповѣ́далъ еси́.* Его́же Боже́ственною си́лою* съ небесе́ вѣне́цъ Боже́ственный прія́лъ еси́* и пребыва́ющую сла́ву.

Непристу́пнымъ Божество́мъ,* неизрече́нною бла́гостію* и тве́рдою свѣ́тлостію, просвѣща́емь,* мра́къ и́дольскій разори́въ,* беззако́нныхъ шата́нія низложи́лъ еси́ свѣ́тло* и, огне́мъ и ра́нами одержи́мь,* супроти́внаго стрѣльца́* на суди́щи низло́жь,* побѣдоно́сецъ и побѣди́тель яви́лся еси́.

Си́лы вы́шнихъ во́инствъ* тебѣ́ удиви́шася,* и му́ченичестіи чи́ни совозвесели́шася,* пра́ведныхъ собо́ри согла́сно возопи́ша,* и руко́ю богонача́льною Бо́гъ свы́ше вѣнча́.* Тѣ́мже зове́мъ:* Христофо́ра моли́твами, я́ко Ще́дръ* спаси́ вся́, творя́щія* сего́ боже́ственное торжество́.

Сла́ва, и ны́нѣ, пра́здника.

Тропа́рь, гла́съ 2:

Проро́ка Твоего́ Иса́іи па́мять, Го́споди, пра́зднующе, тѣ́мъ Тя́ мо́лимъ: спаси́ ду́ши на́ша.

Другíй тропа́рь му́ченика, гла́съ 4:

Оде́ждами отъ крове́й украша́яйся, Го́сподеви предстои́ши, Царю́ си́лъ, Христофо́ре приснопа́мятне, отону́дуже со безпло́тными и му́ченики пое́ши трисвяты́мъ и стра́шнымъ сладкопѣ́ніемъ, тѣ́мже моли́твами твои́ми спаса́й ста́до твое́.


[НА УТРЕНИ,]
Кано́нъ святы́хъ, проро́ка и му́ченика. Творе́ніе Ѳеофа́ново, гла́съ 4.

Пѣ́снь 1.

Ирмо́съ: Воспою́ Тебѣ́, Го́споди Бо́же мо́й, я́ко изве́лъ еси́ лю́ди изъ рабо́ты еги́петскія, покры́лъ же еси́ колесни́цы фарао́новы и си́лу.

Просвѣти́ мя, Го́споди Бо́же мо́й, и наста́ви свѣ́тло боже́ственнаго проро́ка Твоего́ сла́вное и честно́е восхвали́ти торжество́.

Боговѣща́нная труба́ Иса́іина, огласи́вшая зе́млю, церко́вныя пита́тели созва́ пра́здновати па́мять его́.

Стра́сти тѣле́сныя, богоно́се, помысло́мъ душе́внымъ тве́рдо покори́въ, сла́ву сподо́бися ви́дѣти Вседержи́теля.

Му́ченика:

Пріиди́те вси́ дне́сь, христоно́сцы, Христофо́ра па́мять, и́стины свидѣ́теля богому́драго, благоче́стно воспои́мъ.

Му́жески подвиза́вся на ле́сть, мучи́телей преще́нія, му́чениче страстоно́сче, крѣ́постію Христо́вою утвержда́емь, попра́лъ еси́.

Богоро́диченъ: Же́злъ прозря́ Тя, Богоро́дице, цвѣ́тъ же па́ки изъ Тебе́ воплоще́нное Сло́во, провозвѣсти́ сла́вный Иса́ія, Пречи́стая.

Пѣ́снь 3.

Ирмо́съ: Лу́къ си́льныхъ изнемо́же, и немощству́ющіи препоя́сашася си́лою, сего́ ра́ди утверди́ся въ Го́сподѣ се́рдце мое́.

Всю́ зарю́ духо́вную воспріе́мь, провозгласи́лъ еси́, сла́вне, Сло́ва смотре́нія неизрече́нное та́инство.

Взя́лся еси́ къ высотѣ́ небе́снѣй, и благоче́стія свѣ́тлость показа́лъ еси́, и́дольскаго су́етія ты́ изобличи́въ не́мощь.

Ка́меня въ Сіо́нѣ пречестна́го, краеуго́льнаго, вселе́нную содержа́щаго, Влады́ку Христа́, Иса́ія проро́чествуетъ, полага́ема.

Му́ченика:

Ору́жіемъ Креста́ огражда́емь, му́чениче Христофо́ре, ра́ны претерпѣ́лъ еси́, присножела́емаго наслажда́ешися, ра́дуяся.

Пло́ть у́бо ра́нами ссѣца́шеся, боголюби́вая же твоя́ душа́ любо́вію пита́шеся, поуча́ющися Ца́рствія, Христофо́ре, наслажде́нію.

Богоро́диченъ: Рече́ніе вои́стинну испо́лнися Иса́іино: Дѣ́ва бо роди́ воплоще́нна Жизнода́вца и Спа́са ду́шъ на́шихъ.

Сѣда́ленъ, гла́съ 4. Подо́бенъ: Ско́ро предвари́.

Отъ страсте́й тѣле́сныхъ преочи́стивъ ду́шу, сла́ву ви́дѣлъ еси́ надъ всѣ́ми су́щаго Бо́га, проро́че пребога́те. Просія́въ проро́чества свѣтоно́сными заря́ми, — Мла́до, — ре́клъ еси́, — Отроча́ роди́тся, — Зижди́тель, спаса́ющій на́съ отъ тли́ моли́твами твои́ми.

Сла́ва, сѣда́ленъ му́ченика, гла́съ то́йже. Подо́бенъ: Яви́лся еси́ дне́сь.

По́двигъ, сла́вне, муче́нія сконча́въ, прія́лъ еси́ вѣне́цъ побѣ́ды отъ Бо́га, Христофо́ре блаже́нне, Его́же умоли́ отъ бѣ́дъ изба́вити на́съ.

И ны́нѣ, пра́здника.

Пѣ́снь 4.

Ирмо́съ: Твоего́ на земли́ явле́нія, Христе́ Бо́же, проповѣ́дуя проро́къ прише́ствіе, съ весе́ліемъ вопія́ше: сла́ва си́лѣ Твое́й, Го́споди.

На добродѣ́тельный возше́дъ ве́рхъ, чи́сто Жела́емому бесѣ́довалъ еси́ и ра́достно пѣ́лъ еси́: сла́ва си́лѣ Твое́й, Го́споди.

Проро́честѣй Иса́ія благода́ти ввѣ́ренъ бы́сть, и Бо́жіе жили́ще показа́ся, и небе́сныхъ си́лъ сла́вы нетлѣ́нныя сподо́бися.

Обнови́тися острово́мъ ре́клъ еси́ прито́чно, язы́ческимъ це́рквамъ, Боже́ственнаго Ду́ха испо́лненъ, сла́вне, таи́нникъ неизрече́нныхъ бы́въ.

Му́ченика:

Небе́сное наслѣ́діе, му́чениче, воспрія́лъ еси́, на земли́ по Христѣ́ подвиза́вся, и́дольскую же погаси́лъ еси́ пре́лесть му́жески лю́таго де́мона.

Же́нское тебѣ́ искуше́ніе, му́чениче, приноша́ше, я́коже Ада́му пра́отцу змíй пре́жде, но, побѣжде́нъ бы́въ, стыдя́шеся, удавле́нія на тя́ простира́я.

Богоро́диченъ: Отроча́ на́мъ даде́ся отъ проро́чицы, рожде́нное безъ болѣ́зни Богома́тере, Его́же нача́льство на ра́мѣ боже́ственный Иса́ія проповѣ́да.

Пѣ́снь 5.

Ирмо́съ: Просвѣще́ніе Твое́, Го́споди, низпосли́ на́мъ и отъ мглы́ прегрѣше́ній разрѣши́ ны, Бла́же, Тво́й ми́ръ да́руяй.

Сокрове́нное свы́ше та́инство зря́ и дре́вній совѣ́тъ Вы́шняго, е́же о на́съ смотре́ніе, богоглаго́ливе, возвѣсти́лъ еси́.

Страсте́й Твои́хъ, Го́споди, приснотеку́щій исто́чникъ страсте́й на́съ отмыва́етъ, прише́лъ бо еси́, Спа́се, я́коже Иса́ія проро́къ научи́.

Богочести́вый Иса́ія, отъ Бо́га изше́дъ, Отца́, Сло́ва и Свята́го Ду́ха въ Естествѣ́ Еди́номъ, Тро́ицу Еди́ну невѣ́дущимъ проповѣ́да.

Му́ченика:

Просвѣще́ніемъ благода́ти улови́лъ еси́ лю́ди и неи́стовство безбо́жныхъ мучи́телей разори́лъ еси́ я́вѣ, на земли́, му́дре, одѣ́янъ свы́ше дѣ́йствомъ.

Небе́сное изво́ливъ наслажде́ніе я́вѣ па́че земна́го, му́дре Христофо́ре, претерпѣ́лъ еси́ крѣ́пко муче́нія болѣ́зни, Кресто́мъ укрѣпля́емь.

Богоро́диченъ: На о́блацѣ, Го́споди, сѣдя́щаго чи́стѣ Всепѣ́тыя Ма́тере, Иса́ія ви́дѣ Тя́ я́сно, еги́петскія низлага́юща и́долы.

Пѣ́снь 6.

Ирмо́съ: Возопи́, прообразу́я погребе́ніе тридне́вное, проро́къ Іо́на, въ ки́тѣ моля́ся: отъ тли́ изба́ви мя́, Іису́се, Царю́ си́лъ.

Ду́хомъ воображе́нъ, Иса́ія узрѣ́ на престо́лѣ Госпо́дьства сла́ву блеща́щуся, пѣсносло́вимую трисвяты́мъ гла́сомъ, Тричи́сленную.

Ко усто́мъ боя́щимся твои́мъ прино́ситъ у́гль, Иса́іе, серафи́мъ, клеща́ми взе́мъ, и Бо́гу проро́ка соверша́етъ, та́йно освяще́нна.

Сбытіе́ издале́ча зря́ прорече́ній, Иса́ія у́мно со а́нгелы ра́дуется и, игра́я, сла́витъ Испо́лнившаго его́ проповѣ́данія.

Му́ченика:

Не къ кро́ви, ни къ пло́ти бра́нь взе́мъ до́блій, но нача́ла побѣжда́ше и де́моны, неви́димою си́лою Сы́на Бо́жія укрѣпля́емь.

Возлюби́въ благолѣ́пно жела́ній кра́й, страстоте́рпче, не чу́лъ еси́ болѣ́зней стру́жемь, мы́сль твою́ возвыша́я всегда́ ко Влады́цѣ твоему́.

Богоро́диченъ: Дѣ́ву, во утро́бѣ заче́ншую зря́ и ро́ждшую, Иса́ія, проро́къ сла́вный, воплоще́нна Сло́ва, Сы́на Бо́жія, ны́нѣ ра́дуется.

Конда́къ, гла́съ 2. Подо́бенъ: Въ моли́твахъ.

Проро́чества дарова́ніе пріе́мъ, пророкому́чениче, Иса́іе богопроповѣ́дниче, всѣ́мъ изъясни́лъ еси́ вочеловѣ́ченіе Госпо́дне, возгласи́въ велегла́сно конце́мъ: се́ Дѣ́ва во чре́вѣ пріи́метъ.

Икосъ:

Вси́ сни́демся, и́же во страна́хъ, воспѣ́ти досто́йно Иса́ію, вѣ́рніи, во проро́цѣхъ ди́внаго: то́й бо, коне́цъ проро́чества воспріи́мъ, мíръ просвѣща́етъ, всѣ́мъ вку́пѣ та́йну Боже́ственнаго соедине́нія провозвѣсти́въ, съ тѣ́ми всѣ́ми возопи́въ: съ на́ми Бо́гъ неви́димый, се́ Дѣ́ва во чре́вѣ пріи́метъ.

Пѣ́снь 7.

Ирмо́съ: Авраа́мстіи иногда́ въ Вавило́нѣ о́троцы пе́щный пла́мень попра́ша, пѣ́сньми взыва́юще: оте́цъ на́шихъ Бо́же, благослове́нъ еси́.

Спаси́тельное на́мъ приходя́щее зря́ Иса́ія избавле́ніе, — пріи́детъ, — возопи́, — оте́цъ на́шихъ Бо́же, благослове́нъ еси́.

Проро́чества благода́тію и муче́нія вѣнце́мъ Иса́ія увязе́ся, — крѣ́пость моя́ и пѣ́ніе мое́, — оте́цъ на́шихъ Бо́же, благослове́нъ еси́.

Благоче́стія предѣ́лы и житія́ зако́ны богоно́снымъ язы́комъ положи́лъ еси́, проро́че богодухнове́нне, — оте́цъ на́шихъ Бо́же, благослове́нъ еси́.

Му́ченика:

Муче́нія пу́ть терпѣ́ніемъ текíй, Христофо́ръ въ небе́сныхъ живе́тъ се́лѣхъ, поя́: оте́цъ на́шихъ Бо́же, благослове́нъ еси́.

Нече́стія пла́мень благоче́стія росо́ю Христофо́ръ увяди́, въ пѣ́снѣхъ зовы́й: оте́цъ на́шихъ Бо́же, благослове́нъ еси́.

Богоро́диченъ: Дѣ́вства ви́дѣвъ пачеесте́ственное рождество́ и чистоты́ свѣ́тлость, Иса́ія возопи́: оте́цъ на́шихъ Бо́же, благослове́нъ еси́.

Пѣ́снь 8.

Ирмо́съ: Въ Вавило́нѣ о́троцы, боже́ственною распала́еми ре́вностію, мучи́теля и пла́мене преще́ніе му́жески попра́ша, и посредѣ́ огня́ вве́ржени, ороша́еми, поя́ху: благослови́те, вся́ дѣла́ Госпо́дня, Го́спода.

Весе́лія ри́зою женихо́вою обложе́нъ обра́зно, ра́дуется ны́нѣ ве́село Иса́ія сла́вный и, боже́ственныя пи́щи наслажда́яся, со а́нгелы вѣща́етъ: благослови́те, вся́ дѣла́ Госпо́дня, Го́спода.

Бо́га пе́рвѣе отлучи́вшіися, де́монскими прельще́нніи словесы́, пра́ведно отступи́ша земли́ чи́стыя, окая́нніи, проро́ка гласово́мъ послѣ́дованно, и пѣ́ти не мо́гутъ: благослови́те, вся́ дѣла́ Госпо́дня, Го́спода.

Пре́лесть оста́вивше, къ Боже́ственному притеко́ша сія́нію мно́жества язы́къ и Христо́вѣ Це́ркви обручи́шася, я́коже дре́вле рече́ Иса́ія, и пѣ́сньми ны́нѣ пою́тъ: благослови́те, вся́ дѣла́ Госпо́дня, Го́спода.

Му́ченика:

Идолонеи́стовства на́гло приража́ема волна́, му́ченическими отсѣка́шеся тве́рдыми супротивообра́зными противле́ніи за Христа́ пріе́млющихъ бѣды́ и вопію́щихъ: благослови́те, вся́ дѣла́ Госпо́дня, Го́спода.

Въ ца́рскую багряни́цу обагре́нную отъ крове́й твои́хъ, му́чениче, красно́ одѣ́янъ ны́нѣ, Христофо́ре непобѣди́ме, со а́нгельскими ли́ки лику́еши и пое́ши Содѣ́телю твоему́: благослови́те, вся́ дѣла́ Госпо́дня, Го́спода.

Богоро́диченъ: Дѣ́ва Богома́ти Отрокови́ца я́ко Младе́нца держи́тъ Сло́ва, всѣ́мъ даю́щаго жи́знь и вся́ сотво́ршаго, я́коже рече́ пре́жде Иса́ія, и, ра́дуяся, взыва́ше: благослови́те, вся́ дѣла́ Госпо́дня, Го́спода.

Пѣ́снь 9.

Ирмо́съ: Ева у́бо неду́гомъ преслуша́нія кля́тву всели́ла е́сть, Ты́ же, Дѣ́во Богоро́дице, прозябе́ніемъ чревоноше́нія мíрови благослове́ніе процвѣла́ еси́. Тѣ́мъ Тя́ вси́ велича́емъ.

Престо́лу предста́лъ еси́ свѣ́тло, богопрія́тне, Влады́ки си́лъ, сла́вы же Того́ наслади́вся, твоего́ благоче́стія собира́я плоды́, всеблаже́нне сла́вне. Тѣ́мъ тя́ вси́ велича́емъ.

Пріиди́те ны́нѣ, свѣ́та проро́ческаго дарова́нія жела́ющіи, прія́ти кни́гу усе́рдно Иса́іи, богоразу́мія испо́лнену: тве́рдымъ жела́ніемъ внима́емъ, да Боже́ственныя зари́ испо́лнимся.

Ду́хомъ свѣ́тлости я́вѣ осія́емь, Иса́іе богоно́се, вся́, вѣ́рою творя́щія честну́ю твою́ и свѣтоно́сную па́мять, моли́ спасе́ніе получи́ти, да тя́ вси́ велича́емъ.

Му́ченика:

Вѣне́цъ свѣ́телъ я́ко побѣди́тель пріе́мъ, Христофо́ре всесла́вне, сца́рствуеши Влады́цѣ, тя́ въ му́кахъ укрѣ́пльшему и ру́ку живоно́сну пода́вшему одолѣ́ти злонача́льника.

Кро́вію му́ченическою свѣ́тло омы́вся, озари́лся еси́, пречу́дне, ны́нѣ же въ дѣ́вственнѣмъ черто́зѣ, съ Женихо́мъ ра́дуяся, вше́лъ еси́, ми́ра же мíру прося́, не преста́й, му́чениче сла́вне.

Богоро́диченъ: Угля мы́сленнаго, Чи́стая Богоневѣ́сто, Иса́ія Его́же ви́дѣ но́сиши на руку́, Богома́ти, зра́ку на́шему соединя́ема и мíру спасе́ніе свѣ́тло подаю́ща, тѣ́мъ Тя́ вси́ велича́емъ.

Источникъ: Минíа, мѣ́сяцъ Ма́ій. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 58 – 62.

/ Къ оглавленію раздѣла /


Наверхъ / Къ титульной страницѣ

0