Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - воскресенiе, 20 августа 2017 г. Сейчасъ на порталѣ посѣтителей - 13.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Ма́ія въ 9-й де́нь.
Слу́жба и́же во святы́хъ отца́ на́шего Никола́я архіепи́скопа, Мѵ́ръ Ликíйскихъ чудотво́рца.

НА ВЕЧЕРНИ,
Пое́мъ Блаже́нъ му́жъ.., 1-й антифо́нъ. На Го́споди воззва́хъ: стихи́ры пра́здника 3 и свята́го 5, гла́съ 8. Подо́бенъ: На не́бо теку́щее.

Моле́бными пѣ́сньми, соше́дшеся, празднолю́бцы, на́шего засту́пника честно́е пренесе́ніе ра́достно восхва́лимъ, и́же вся́ страны́ просвѣща́етъ чудесы́ и скорбя́щія боже́ственнѣ утѣша́етъ, оби́димыя избавля́етъ, и́же ми́лостынею Бо́га одолжи́ и того́ ра́ди прія́тъ стокра́тное воздая́ніе. Къ нему́же вси́ мы́ взыва́емъ: помоли́ся, святи́телю Нико́лае, Спа́су всѣ́хъ умири́ти ми́ръ и спасти́ ду́ши на́ша. [Два́жды.]

Ангельская жили́ща дости́гъ добродѣ́тельми, предстои́ши Влады́цѣ твоему́ Христу́, Ему́же ра́бъ благопокори́въ бы́лъ еси́, и отъ ра́ки мѵ́ро то́чиши, вѣ́рнымъ посо́бствуя чудесы́ твои́ми и къ Бо́гу приводя́ благочести́выя. Не отъ Ба́ра ны́нѣ призыва́емъ тя́, но отъ го́рняго Іерусали́ма, идѣ́же ра́достно лику́еши со апо́столы, и проро́ки, и святи́тели: помоли́ся, богоно́се Нико́лае, Спа́су всѣ́хъ умири́ти мíръ и спасти́ ду́ши на́ша.

Сла́ва, гла́съ 6:

Святи́телей удобре́ніе и отце́въ сла́ву, исто́чника чуде́съ и вѣ́рныхъ засту́пника вели́каго, соше́дшеся, о празднолю́бцы, пѣ́сненными похвала́ми воспое́мъ, глаго́люще: ра́дуйся, мѵ́ряновъ храни́телю, и первосѣда́телю честны́й, и сто́лпе неподви́жимый; ра́дуйся, свѣти́льниче свесвѣ́тлый, и́же мірскíя концы́ просвѣща́я чудесы́; ра́дуйся, скорбя́щихъ боже́ственная ра́досте и оби́димыхъ те́плый предста́телю. И ны́нѣ, всеблаже́нне Нико́лае, не преста́й моля́ся Христу́ Бо́гу о вѣ́рою и любо́вію чту́щихъ приснора́достную и всепра́зднственную па́мять твою́.

И ны́нѣ, пра́здника.
Вхо́дъ. Проки́менъ дне́ и чте́нія.

При́тчей чте́ніе. [Главы́ 10, 3 и 8.]

Па́мять пра́веднаго съ похвала́ми, и благослове́ніе Госпо́дне на главѣ́ его́. Блаже́нъ человѣ́къ, и́же обрѣ́те прему́дрость, и сме́ртенъ, и́же увѣ́дѣ ра́зумъ. Лу́чше бо сію́ купова́ти, не́жели зла́та и сребра́ сокро́вища. Честнѣ́йшая же е́сть ка́меній многоцѣ́нныхъ, все́ же честно́е недосто́йно ея́ е́сть. Долгота́ бо дне́й и лѣ́та живота́ въ десни́цѣ ея́, въ шу́йцѣ же ея́ бога́тство и сла́ва. Отъ у́стъ ея́ исхо́дитъ пра́вда, зако́нъ же и ми́лость на язы́цѣ но́ситъ. Послу́шайте у́бо мене́, о ча́да, честна́я бо реку́, и блаже́нъ человѣ́къ, и́же пути́ моя́ сохрани́тъ: исхо́ди бо мои́ — исхо́ди живота́, и уготовля́ется хотѣ́ніе отъ Го́спода. Сего́ ра́ди молю́ ва́съ и предлага́ю мо́й гла́съ сыново́мъ человѣ́ческимъ. Я́ко а́зъ, прему́дрость, устро́ихъ совѣ́тъ, и ра́зумъ и смы́слъ азъ призва́хъ. Мо́й совѣ́тъ и утвержде́ніе, мо́й ра́зумъ, моя́ же крѣ́пость. Азъ мене́ лю́бящія люблю́, и́щущіи же мене́ обря́щутъ благода́ть. Разумѣ́йте у́бо, незло́бивіи, кова́рство, ненака́заніи же, прилага́йте сердца́. Послу́шайте мене́ и па́ки, честна́я бо реку́, и отве́рзу отъ усте́нъ пра́вая, я́ко и́стинѣ поучи́тся горта́нь мой, ме́рзки же пре́до мно́ю устнѣ́ лжи́выя. Съ пра́вдою вси́ глаго́лы у́стъ мои́хъ, ничто́же въ ни́хъ стро́потно, ниже́ развраще́нно. Вся́ пра́ва су́ть разумѣва́ющимъ и про́ста обрѣта́ющимъ ра́зумъ. Науча́ю бо ва́съ и́стинѣ, да бу́детъ о Го́сподѣ наде́жда ва́ша, и испо́лнитеся Ду́ха.

При́тчей чте́ніе. [Главы́ 10 и 11.]

Уста́ пра́веднаго ка́плютъ прему́дрость, язы́къ же непра́веднаго поги́бнетъ. Устнѣ́ муже́й пра́ведныхъ ка́плютъ благода́ти, уста́ же нечести́выхъ развраща́ются. Мѣ́рила льсти́вая ме́рзость предъ Го́сподемъ, вѣ́съ же пра́ведный прія́тенъ Ему́. Идѣ́же а́ще вни́детъ досажде́ніе, та́мо и безче́стіе, уста́ же смире́нныхъ поуча́ются прему́дрости. Соверше́ніе пра́выхъ наста́витъ и́хъ, и поползнове́ніе отрица́ющихся упасе́тъ и́хъ. Не по́льзуютъ имѣ́нія въ де́нь я́рости, пра́вда же изба́витъ отъ сме́рти. Умеръ пра́ведный, оста́ви раска́яніе, нару́чна же быва́етъ и посмѣя́тельна нечести́выхъ па́губа. Пра́вда непоро́чнаго исправля́етъ пути́, въ нече́стіе же па́даетъ непра́вда. Пра́вда муже́й пра́выхъ изба́витъ и́хъ, безсовѣ́стіемъ же плѣня́ются беззако́нніи. Сконча́вшуся му́жу пра́ведну, не поги́бнетъ наде́жда, похвала́ же нечести́выхъ поги́бнетъ. Пра́ведникъ отъ ло́ва убѣ́гнетъ, въ него́же мѣ́сто предае́тся нечести́вый. Во устѣ́хъ нечести́выхъ сѣ́ть гра́жданомъ, чу́вство же пра́ведныхъ благопоспѣ́шное. Во благи́хъ пра́ведныхъ испра́вится гра́дъ, и въ поги́бели нечести́выхъ ра́дованіе. Во благослове́ніи пра́выхъ возвы́сится гра́дъ, усты́ же нечести́выхъ раскопа́ется. Руга́ется гра́жданомъ лише́нный ра́зума, му́жъ же му́дрый безмо́лвіе во́дитъ.

Прему́дрости Соломо́ни чте́ніе. [Глава́ 4.]

Пра́ведникъ, а́ще пости́гнетъ сконча́тися, въ поко́и бу́детъ. Ста́рость бо честна́ не многолѣ́тна, ниже́ въ числѣ́ лѣ́тъ исчита́ется. Сѣди́на же е́сть му́дрость человѣ́комъ, и во́зрастъ ста́рости — житіе́ нескве́рное. Благоуго́денъ Бо́гови бы́въ, возлю́бленъ бы́сть, и живы́й посредѣ́ грѣ́шникъ, преста́вленъ бы́сть. Восхище́нъ бы́сть, да не зло́ба измѣни́тъ ра́зума его́ или́ ле́сть прельсти́тъ ду́шу его́. Раче́ніе бо зло́бы помрача́етъ до́брая и паре́ніе по́хоти, премѣня́етъ у́мъ незло́бивъ. Сконча́вся вма́лѣ, испо́лни лѣ́та до́лга, уго́дна бо бѣ́ Го́сподеви душа́ его́, сего́ ра́ди потща́ся отъ среды́ лука́вствія. Лю́діе же ви́дѣвше и не разумѣ́вше, ниже́ поло́жше въ помышле́ніи таково́е, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.

На литíи стихи́ры самогла́сны, гла́съ 2:

Отче Нико́лае, а́ще и Мѵ́рская страна́ молчи́тъ, но мíръ ве́сь, и́же тобо́ю просвѣще́нный, мѵ́ра же благоуха́ніи и чуде́съ мно́жествомъ взыва́етъ благохва́льными пѣ́сньми, и спа́сшіися тобо́ю осужде́нніи. Съ су́щими въ Мѵ́рѣхъ, и мы́, пою́ще, вопіе́мъ: моли́ спасти́ся душа́мъ на́шимъ.

Гла́съ 4:

Отче Нико́лае, Пресвята́го Ду́ха мѵрополо́жница сы́й, я́ко въ Мѵ́рѣхъ благоуха́еши Боже́ственными арома́ты, Христо́вымъ бо апо́столомъ подо́бникъ бы́въ, вселе́нную обхо́диши словесы́ чуде́съ твои́хъ. Тѣ́мже и да́льнымъ, я́ко бли́зъ, во снѣ́ явля́яся, отъ сме́рти избавля́еши, и́же непра́веднымъ судо́мъ умре́ти иму́щія, спаса́я пресла́вно отъ бѣ́дъ мно́гихъ призыва́ющихъ тя́. Тѣ́мже и на́съ отъ находя́щихъ лю́тыхъ свободи́ твои́ми моли́твами, при́сно восхваля́ющихъ тя́.

Гла́съ 8:

До́блестей твои́хъ, преподо́бне о́тче, пло́дъ, просвѣти́лъ е́сть вѣ́рныхъ сердца́: кто́ бо слы́ша безмѣ́рное твое́ смире́ніе и терпѣ́нію не удиви́ся, я́же къ ни́щимъ ти́хости, къ скорбя́щимъ утѣше́нію? Вся́ боголѣ́пно научи́лъ еси́, святи́телю Нико́лае, и ны́нѣ неувяда́емымъ вѣнце́мъ увя́злся еси́, моли́ся о душа́хъ на́шихъ.

На хвалу́ поте́клъ еси́ Госпо́дню, Нико́лае, во вре́меннѣй жи́зни, и То́й тя́ просла́ви на небе́снѣй и и́стиннѣй жи́зни. Тѣ́мже, дерзнове́ніе стяжа́въ къ Нему́, моли́ спасти́ ду́ши на́ша.

Сла́ва, гла́съ 6:

Благíй ра́бе вѣ́рный, дѣ́лателю виногра́да Христо́ва, ты́ и тяготу́ дневну́ю поне́слъ еси́, ты́ и да́нный ти́ тала́нтъ возрасти́лъ еси́ и по тебѣ́ прише́дшимъ не зави́дѣлъ еси́. Тѣ́мже врата́ небе́сная отверзо́шася тебѣ́, вни́ди въ ра́дость Го́спода твоего́ и моли́ о на́съ, свя́те Нико́лае.

И ны́нѣ, пра́здника.

На стихо́внѣ стихи́ры, гла́съ 4. Подо́бенъ: Яко до́бля.

Звѣзду́ незаходи́мую* всесвѣ́тлаго Со́лнца,* не́бо духо́вное,* повѣ́дающее сла́ву Бо́жію спаси́тельную,* Боже́ственнаго проповѣ́дника, просвѣ́щника язы́комъ,* рѣку́, излива́ющую во́ды ра́зума* и напая́ющую вѣ́рныхъ сердца́,* да ублажи́мъ Никола́я, пресла́внаго святи́теля.

Сти́хъ: Честна́ предъ Го́сподемъ* сме́рть преподо́бныхъ Его́.

Мо́ремъ, святи́телю, бы́ша ше́ствія твоя́* изъ Мѵ́ръ Ликíйскихъ въ Ба́ръ гра́дъ:* взя́тся бо отъ гро́ба ковче́гъ тво́й* и къ за́падомъ до́йде отъ восто́ка,* благоче́стно послѣ́довавшимъ мона́хомъ,* и́же при гро́бѣ твое́мъ* че́сть ти́ твори́вшимъ,* манове́ніемъ Влады́ки всѣ́хъ,* Нико́лае пресла́вне.

Сти́хъ: Свяще́нницы Твои́ облеку́тся въ пра́вду,* и преподо́бніи Твои́ возра́дуются.

Кораблепла́ваніемъ ти́,* во́ду блаже́нну содѣ́я,* и, ко гра́ду Ба́ру прише́дъ,* мѵ́ро источи́лъ еси́, сла́вне,* и, стра́сти неисцѣ́льныя исцѣля́я,* ту́ су́щимъ бы́лъ еси́ прибѣ́жище,* и засту́пникъ, и изба́витель,* ко всѣ́хъ Царю́ и Спа́су моля́ся,* Нико́лае святи́телю.

Сла́ва, гла́съ 6. Самогла́сенъ:

Человѣ́че Бо́жій и вѣ́рный ра́бе, слуго́ Госпо́день, му́жу жела́ній, сосу́де избра́нный, сто́лпе и утвержде́ніе Це́ркве, Ца́рствія наслѣ́дниче, не премолчи́, вопія́ за ны́ ко Го́споду.

И ны́нѣ, пра́здника.

Тропа́рь, гла́съ 4:

Приспѣ́ де́нь свѣ́тлаго торжества́, гра́дъ Ба́рскій ра́дуется, и съ ни́мъ вселе́нная вся́ ликовству́етъ пѣ́сньми и пѣ́ньми духо́вными: дне́сь бо свяще́нное торжество́ въ пренесе́ніе честны́хъ и многоцѣле́бныхъ моще́й святи́теля и чудотво́рца Никола́я, я́коже со́лнце незаходи́мое, возсія́ свѣтоза́рными луча́ми, разгоня́я тму́ искуше́ній же и бѣ́дъ отъ вопію́щихъ вѣ́рно: спаса́й на́съ, я́ко предста́тель на́шъ вели́кій, Нико́лае.

Сла́ва, и ны́нѣ, пра́здника.



НА УТРЕНИ,
На Бо́гъ Госпо́дь: Тропа́рь пра́здника и свята́го.

По 1-й стихоло́гіи сѣда́ленъ пра́здника, два́жды.

По 2-й стихоло́гіи сѣда́ленъ святи́теля, гла́съ 4. Подо́бенъ: Удиви́ся.

Удиви́лъ еси́, Влады́ко, святи́теля Твоего́ во страна́хъ, пода́въ ему́ чуде́съ благода́ть неду́ги разли́чныя отъ человѣ́къ отгоня́ти и су́щія во у́захъ избавля́ти, оби́димыя же отъ лю́тыхъ изыма́ти. Ему́же моле́бно вопіе́мъ: святы́й Нико́лае, изба́ви на́съ отъ вра́гъ на́шихъ. [Два́жды.]

Сла́ва, и ны́нѣ, пра́здника или́ богоро́диченъ:

Нечи́стыхъ помышле́ній мои́хъ мно́жества и безмѣ́стныхъ мы́слей обурева́нія кто́ изрещи́ мо́жетъ, Пренепоро́чная? Настоя́нія же безпло́тныхъ вра́гъ мои́хъ и си́хъ зло́бу кто́ исповѣ́сть? Но Твое́ю мольбо́ю, Блага́я, си́хъ ми́ всѣ́хъ избавле́ніе да́руй.

По поліеле́и сѣда́ленъ, гла́съ 1. Подо́бенъ: Гро́бъ Тво́й.

Освя́щъ себе́ житіе́мъ соверше́ннымъ, яви́лся еси́ святи́тель Бо́га Вы́шняго, отъ Него́же укрѣпля́емь, ерети́чествующихъ уста́ загради́лъ еси́. Тѣ́мъ твое́ пренесе́ніе свѣ́тло пра́зднуемъ, Христа́ Бо́га велича́юще. [Два́жды.]

Сла́ва, и ны́нѣ, пра́здника или́ богоро́диченъ:

Безневѣ́стная Чи́стая Богоро́дице Дѣ́во, еди́на вѣ́рныхъ предста́тельство и покро́ве, бѣ́дъ, и скорбе́й, и лю́тыхъ обстоя́ній всѣ́хъ изба́ви, на Тя́ упова́ніе, Отрокови́це, иму́щихъ, и ду́ши на́ша спаси́ боже́ственными мольба́ми Твои́ми.

Степе́нна, 1-й антифо́нъ 4-го гла́са. Проки́менъ, гла́съ 4: Честна́ предъ Го́сподемъ* сме́рть преподо́бныхъ Его́. Сти́хъ: Что́ возда́мъ Го́сподеви о всѣ́хъ, я́же воздаде́ ми? Вся́кое дыха́ніе... Ева́нгеліе Іоа́нна, зача́ло 35, отъ полу́.

По 50-мъ псалмѣ́ стихи́ра, гла́съ 6:

Наслѣ́дниче Бо́жій, соприча́стниче Христо́въ, служи́телю Госпо́день, свя́те Нико́лае, по и́мени твоему́ та́ко и житіе́ твое́: спросія́ бо сѣди́нѣ ра́зумъ, свидѣ́тельствоваше свѣ́тлость лица́ твоего́ душе́вное незло́біе, извѣ́ствоваше кро́тость сло́ва молчали́вое. Жи́знь твоя́ сла́вна, и успе́ніе со святы́ми, моли́ о душа́хъ на́шихъ.

Кано́нъ пра́здника со ирмосо́мъ на 6. И свята́го на 8.

Кано́нъ свята́го, гла́съ 8.
Пѣ́снь 1.

Ирмо́съ: Пѣ́снь возсле́мъ, лю́діе, чу́дному Бо́гу на́шему, свободи́вшему Изра́иля отъ рабо́ты, пѣ́снь побѣ́дную пою́ще и вопію́ще: пои́мъ Тебѣ́, еди́ному Влады́цѣ.

Пѣ́снь усте́нъ мои́хъ пріими́, Благода́телю Христе́, и уясни́ ми́ язы́къ, не помина́я мно́гихъ мои́хъ грѣхо́въ, да воспою́ честно́е житіе́ Твоего́ святи́теля въ па́мять пренесе́нія моще́й его́.

Чудотво́рный да́ръ пріе́мъ и терпѣ́нія вѣнцы́, святи́тельствомъ украша́яся, Бо́гу помоли́ся, о́тче, прегрѣше́ній проще́ніе дарова́ти на́мъ, сла́вящимъ твое́ пренесе́ніе.

Па́стырь Христо́ва ста́да, о́тче, ины́мъ овца́мъ посыла́ешися, къ лати́нскому язы́ку, да вся́ удиви́ши чудесы́ твои́ми и ко Христу́ приведе́ши, блаже́нне, Ему́же и о на́съ моли́ся непреста́нно.

Богоро́диченъ: Дале́че бы́вше иногда́, язы́честіи наро́ди Рождество́мъ Твои́мъ, Богоро́дице, къ Бо́гу прибли́жихомся: Ты́ бо мене́ Обожи́вшаго породила́ еси́ и дре́внія кля́твы Свобо́ждшаго Свое́ю кро́вію.

Инъ кано́нъ Никола́я, гла́съ 4.
Пѣ́снь 1.

Ирмо́съ: Отве́рзу уста́ моя́, и напо́лнятся Ду́ха, и сло́во отры́гну Цари́цѣ Ма́тери, и явлю́ся, свѣ́тло торжеству́я, и воспою́, ра́дуяся, Тоя́ чудеса́.

Просвѣти́ ду́шу и се́рдце, молю́ Ти ся, Свѣтода́вче, тва́ри Содѣ́телю, да́ръ пода́ждь ми́ воспѣва́ніемъ пѣ́ти Твоего́ уго́дника пречестна́го, и́мже мíръ отъ ско́рби изба́ви.

Небе́сную ты́ обрѣ́тъ прему́дрость, я́ко тала́нта вруче́ннаго, благоупотреби́лъ еси́: то́ю бо, разори́въ противобо́жную ле́сть, умудри́лъ еси́ лю́ди боже́ственнымъ уче́ніемъ.

Богоро́диченъ: Зачина́ется Превѣ́чный, и соверше́нный обновля́ется, изъ Отрокови́цы Дѣ́тищь ражда́ется, Его́же проповѣ́далъ еси́ во двою́ существу́, во еди́ной же ѵпоста́си, богоблаже́нне.

Катава́сія пра́здника.

Пѣ́снь 3.

Ирмо́съ: Небе́снаго кру́га Верхотво́рче, Го́споди, и Це́ркве Зижди́телю, Ты́ мене́ утверди́ въ любви́ Твое́й, жела́ній кра́ю, вѣ́рныхъ утвержде́ніе, еди́не Человѣколю́бче.

Незло́бивый нра́вомъ и кро́ткій о́бразомъ, житіе́ имѣ́я а́нгельское, богоблаже́нне Нико́лае, не преста́й о на́съ моля́ся еди́ному Человѣколю́бцу.

Кíй гра́дъ, блаже́нне, не имѣ́етъ тебе́ помо́щника? Ка́я ли душа́ не призыва́етъ твоего́ и́мене? Или́ ко́его мѣ́ста не присѣща́еши ду́хомъ, твои́ми чудесы́ удивля́я вся́, Нико́лае?

Ба́рскій у́бо гра́дъ прія́тъ тѣ́ло твое́, но ду́хъ тво́й въ вы́шнѣмъ Іерусали́мѣ, идѣ́же лику́еши со проро́ки, и апо́столы, и святи́тели ку́пно, моля́ся о на́съ еди́ному Человѣколю́бцу.

Богоро́диченъ: Просвѣще́ніе ми́ испроси́, Пречи́стая Влады́чице, омраче́нному грѣхи́ мно́гими, поро́ждшая Свѣ́тъ всему́ мíру, и стра́стную мглу́ дале́че отжени́, еди́на Богоблаже́нная.

Инъ.

Ирмо́съ: Твоя́ пѣсносло́вцы, Богоро́дице, живы́й и незави́стный Исто́чниче, ли́къ Себѣ́ совоку́пльшія, духо́вно утверди́, въ боже́ственнѣй Твое́й сла́вѣ, вѣнце́въ сла́вы сподо́би.

Печа́льніи тя́ обрѣто́хомъ крѣ́пкое утѣше́ніе, помраче́нніи — свѣ́тъ, и злы́хъ измѣне́ніе и́же скорбьми́ одержи́міи, свяще́ннѣйшій о́тче.

Святи́телю Нико́лае, Бо́жія уста́ бы́въ, изъ у́стъ во́лка непрія́зненна лю́ди изба́вилъ еси́, сла́вне, и приве́лъ еси́ Творцу́ да́ръ, дая́й исцѣле́ніе всѣ́мъ.

Богоро́диченъ: Еди́нъ роди́тися изво́ли пло́тію изъ Тебе́, вы́ше сло́ва сы́й Сло́во, Богома́ти Пречи́стая, избра́вый слугу́ Себѣ́ и учи́теля наро́домъ іера́рха Никола́я.

Конда́къ пра́здника, и и́косъ.
И сѣда́ленъ святи́теля, гла́съ 1. Подо́бенъ: Гро́бъ Тво́й.

Пренесе́ніе твои́хъ честны́хъ моще́й положе́ніе на́мъ бы́сть пра́зднества свѣ́тла, святи́телю Госпо́день прехва́льный, е́же хва́лимъ благоче́стно, и ра́достно чту́ще тя́ свѣ́та незаходи́маго Со́лнца, вѣ́рнымъ добро́то, Нико́лае. [Два́жды.]

Сла́ва, и ны́нѣ, пра́здника.

Пѣ́снь 4.

Ирмо́съ: Всѣ́лъ еси́ на ко́ни, апо́столы Твоя́, Го́споди, и прія́лъ еси́ рука́ма Твои́ма узды́ и́хъ, и спасе́ніе бы́сть ѣжде́ніе Твое́ вѣ́рно пою́щимъ: сла́ва си́лѣ Твое́й, Го́споди.

Свѣ́томъ Вы́шняго озаря́емь, святи́телю, мое́ се́рдце просвѣти́ и тму́ грѣхо́вную отжени́, да, ра́дуяся, пою́ твое́ свято́е пренесе́ніе.

Возсту́пль на лѣ́ствицу добродѣ́телей, блаже́нне, чудотво́рецъ яви́лся еси́ по все́й земли́, Нико́лае, и сего́ ра́ди отъ Мѵ́ръ ба́рстіи лю́діе пріе́млютъ святы́я мо́щи твоя́.

Іере́и вѣ́рніи о тебѣ́ хва́лятся, и лю́ди христолюби́віи призыва́ютъ тя́, во бране́хъ помо́щника, и мы́, недосто́йніи, подвиза́емъ тя́ къ Бо́гу за ны́ моли́тися, Нико́лае.

Богоро́диченъ: Чи́ны а́нгельскія удивля́етъ, Богоро́дице, та́йны Твоея́ глубина́, бѣ́сы же смуща́етъ Твоя́ ико́на. Ейже мы́ кла́няемся, чту́ще Тя́, Бо́жію Ма́терь.

Инъ.

Ирмо́съ: Неизслѣ́дный Бо́жій совѣ́тъ, е́же отъ Дѣ́вы воплоще́нія Тебе́, Вы́шняго, проро́къ Авваку́мъ усмотря́я, зовя́ше: сла́ва си́лѣ Твое́й, Го́споди.

Нача́льна, богогла́се, Свѣ́та Бо́жія прича́стіемъ вторы́й яви́лся еси́, сія́ніемъ просвѣща́ющь мра́чныя, я́ко рачи́тель добродѣ́тели, преизя́щенъ сла́вою.

Изба́ви ста́до твое́ отъ грѣхо́вныя бу́ри, бѣ́дъ же и во́лнъ проти́вныхъ, вводя́ ны́ при́сно къ приста́нищемъ безво́лненнымъ, спаси́тельными твои́ми моли́твами.

Богоро́диченъ: Естество́мъ несказа́нно вы́шняго Свѣ́та, милосе́рдіемъ пребога́таго ро́ждшая неизрече́нно, обнища́вшія ны́, Пречи́стая, Бо́жіими да́ры обогати́.

Пѣ́снь 5.

Ирмо́съ: Мра́къ души́ моея́ разжени́, Свѣтода́вче Христе́ Бо́же, началоро́дную тму́ изгна́въ бе́здны, и да́руй ми́ свѣ́тъ повелѣ́ній Твои́хъ, Сло́ве, да у́тренюя, сла́влю Тя́.

Въ Мѵ́рѣхъ престо́лъ имѣ́лъ еси́, въ Ба́ръ тѣ́ло пресели́лъ еси́, и ду́хомъ на небеси́ пребыва́еши, святи́телю Нико́лае, со апо́столы, я́ко прее́мникъ, съ ни́миже о на́съ моли́, пою́щихъ твое́ пренесе́ніе.

Всѣ́хъ христіа́нъ наде́ждо, и оби́димыхъ ве́лій засту́пниче, и боля́щихъ цѣли́телю, печа́льныхъ утѣ́шителю и къ Бо́гу отъ человѣ́къ хода́таю, Импера́тору на́шему ми́ръ испроси́ и спаса́й ны́ отъ пога́ныхъ нахожде́нія.

Погруже́нную ду́шу мою́ мно́гими страстьми́, Нико́лае, умерщвле́нную грѣхопаде́ніемъ, оживи́ твои́ми моли́твами и напра́ви на покая́ніе, да съ вѣ́рными всѣ́ми твое́ сла́влю пренесе́ніе.

Богоро́диченъ: Его́же тмы́ а́нгельскія и серафи́мская мно́жества ужаса́ются и разу́мная тва́рь трепе́щетъ, Того́ я́ко Младе́нца, Дѣ́во, пита́еши, Его́же обра́зно на руку́ Твое́ю ви́дяще, всегда́ покланя́емся.

Инъ.

Ирмо́съ: Ужасо́шася вся́ческая о Боже́ственнѣй сла́вѣ Твое́й: Ты́ бо, неискусобра́чная Дѣ́во, имѣ́ла еси́ во утро́бѣ надъ всѣ́ми Бо́га, и родила́ еси́ Безлѣ́тнаго Сы́на, всѣ́мъ, воспѣва́ющимъ Тя́, ми́ръ подава́ющая.

Мно́гимъ чудотворе́ніемъ кра́снѣ но́зѣ стяжа́въ, всѣ́мъ блага́я благовѣсти́лъ еси́, отъ вражды́ ве́тхія свобо́дны творя́ боже́ственнымъ уче́ніемъ, спаси́ ны, священнонача́льниче.

Бо́га благоволе́ніемъ на хребе́тъ морскíй всѣ́дъ и со благоговѣ́йными му́жи мно́гу пучи́ну преше́дъ, ко гра́ду Ба́рску прише́лъ еси́, блаже́нне Нико́лае.

Богоро́диченъ: Щи́тъ вѣ́рнымъ, Бо́жія Ма́ти Дѣ́во, Тя́ вои́стинну сла́вимъ, а́нгельски зову́ще Ти́: ра́дуйся, Благослове́нная и Благода́тная, слы́шаніе и глаго́ланіе стра́шно и ди́вно поко́ище Влады́цѣ тва́ри вся́кія.

Пѣ́снь 6.

Ирмо́съ: Якоже проро́ка изба́вилъ еси́ изъ глубины́ преиспо́днія, Христе́ Бо́же, и мене́ отъ грѣхо́въ мои́хъ изба́ви, я́ко Человѣколю́бецъ, и упра́ви живо́тъ мо́й, молю́ся.

Яко отъ окри́на, отъ боже́ственныя твоея́ це́ркве неску́дно пріе́млемъ здра́віе тѣлесе́мъ и душа́мъ очище́ніе, святи́телю Нико́лае, чудеса́ бо то́чиши благода́тію несомнѣ́нною вѣ́рою упова́ющимъ на тя́.

Отъ напа́стей разли́чныхъ, и бѣ́дъ лю́тыхъ, и скорбе́й, одержа́щихъ ны́, и отъ разли́чныхъ злы́хъ, о́тче, я́ко Христо́въ уго́дникъ пресла́вный, изба́ви рабы́ твоя́, достодо́лжно чту́щія твое́ свято́е пренесе́ніе.

Грѣхо́внымъ мра́зомъ исте́рпъ и жите́йскимъ вѣ́тромъ порѣва́емь, я́ко друго́е со́лнце, о́тче, подо́біе твоего́ о́браза ви́дѣвъ, твои́ми моли́твами да согрѣ́юся, служи́телю Христо́въ Нико́лае.

Богоро́диченъ: Земны́хъ у́мъ небе́сныя та́йны не увѣ́сть, ни тва́рь Творца́ ра́зума домы́слится: прехо́дитъ бо у́мъ человѣ́чь отъ Дѣ́вы рождество́ Госпо́дне. Ейже моля́щеся вѣ́рою, грѣхо́въ проще́ніе пріи́мемъ.

Инъ.

Ирмо́съ: Боже́ственное сіе́ и всечестно́е соверша́юще пра́зднество, богому́дріи, Богома́тере, пріиди́те, рука́ми воспле́щимъ, отъ Нея́ ро́ждшагося Бо́га сла́вимъ.

Лю́ди Бо́жія ко спасе́нію устро́ивый во пло́ти Явльшагося мно́гія ра́ди бла́гости, проповѣ́дниче Нико́лае и язы́къ учи́телю, спаси́ ны наставле́ніемъ твои́мъ.

Имѣ́вый пу́ть — мо́ре и стези́ — во́ды, умоли́ у Го́спода, е́же на́мъ мо́ре жите́йское преплы́ти безъ вре́да и стезе́ю во́дъ сле́зныхъ дости́гнути Ца́рствіе небе́сное.

Богоро́диченъ: Ты́ две́рь Царя́ небе́съ и хра́мъ сла́вы Его́, Дѣ́во Всепѣ́тая, отве́рзи на́мъ две́ри милосе́рдія и введи́ ны́ моли́твами Твои́ми въ жили́ща небе́сныя сла́вы.

Конда́къ, гла́съ 3. Подо́бенъ: Дѣ́ва дне́сь.

Взы́де, я́ко звѣзда́, отъ восто́ка до за́пада твоя́ мо́щи, святи́телю Нико́лае, мо́ре же освяти́ся ше́ствіемъ твои́мъ, и гра́дъ Ба́рскій пріе́млетъ тобо́ю благода́ть: на́съ бо дѣ́ля яви́лся еси́ чудотво́рецъ изя́щный, преди́вный и ми́лостивый.

Икосъ:

Воспои́мъ ны́нѣ святи́теля пѣ́сньми, Мѵ́рскимъ лю́демъ па́стыря и учи́теля, да моли́твами его́ просвѣти́мся: се́й бо яви́ся чи́стъ ве́сь, нетлѣ́ненъ ду́хомъ, Христу́ принося́ же́ртву непоро́чну, чи́сту, Бо́гу благопрія́тну, я́ко святи́тель, очище́нъ и душе́ю и тѣ́ломъ. Тѣ́мже сы́й и́стинно Це́ркви предста́тель и побо́рникъ сея́ и чудотво́рецъ изя́щенъ, преди́венъ и ми́лостивъ.

Пѣ́снь 7.

Ирмо́съ: На по́лѣ Деи́рѣ иногда́ мучи́тель пе́щь поста́ви на муче́ніе богоно́сныхъ, въ не́йже три́ о́троки пѣсносло́вяху Еди́наго Бо́га, тро́ично воспѣва́ху, глаго́люще: отце́въ Бо́же, благослове́нъ еси́.

Дне́сь ра́дуются а́нгели Бо́жіи, рыда́етъ же де́монское мно́жество: спа́слъ бо еси́ лю́ди отъ напа́сти и отгна́лъ еси́ ду́хи те́мныя. Тѣ́мъ досто́йно одолѣ́вый нарица́ешися. Сего́ ра́ди вопіе́мъ Го́сподеви: оте́цъ на́шихъ Бо́же, благослове́нъ еси́.

Одержи́міи печа́лію не́мощи, разли́чными неду́ги утружде́ни, съ вѣ́рою къ ра́цѣ твое́й влеку́тся и, получи́вше твою́ ми́лость, быстрообра́зно отхо́дятъ, ра́достно Го́сподеви пою́ще: оте́цъ на́шихъ Бо́же, благослове́нъ еси́.

Предстоя́тъ ти́, бла́женне, собо́ри правовѣ́рныхъ люде́й, и хва́лятся о тебѣ́ церко́вніи учи́тели, прославля́ютъ же тя́ цари́, я́ко засту́пника. Мы́ же ти́ мо́лимся, спаси́ ны, Нико́лае, пою́щія Го́сподеви: оте́цъ на́шихъ Бо́же, благослове́нъ еси́.

Богоро́диченъ: О, ка́ко, Спа́са моего́ воспою́, Его́же тре́петно хва́лятъ а́нгели? Но Ты́, Ма́ти, наста́ви мя́ и милосе́рдіе Сыно́внее благоутро́біемъ Твои́мъ пону́ди поми́ловати ны́, на Тя́ упова́ющія, я́ко Ты́, за ны́ моля́щи Его́, отъ му́ки изба́виши.

Инъ.

Ирмо́съ: Не послужи́ша тва́ри богому́дріи, па́че Созда́вшаго, но, о́гненное преще́ніе му́жески попра́вше, ра́довахуся, пою́ще: препѣ́тый отце́въ Госпо́дь и Бо́гъ, благослове́нъ еси́.

Веще́й су́етствомъ всему́ уму́ человѣ́ческому обуя́вшу, я́ко со́лію, да́ждь цѣльбу́ сло́вомъ твои́мъ и пѣ́ти Го́сподеви научи́: препѣ́тый отце́въ Госпо́дь и Бо́гъ, благослове́нъ еси́.

О, пресла́вная твоя́ чудеса́, я́же сотвори́лъ еси́! Неду́ги бо исцѣля́еши и бѣ́дъ избавля́еши, всѣ́мъ вопи́ти повелѣва́я Го́сподеви: препѣ́тый оте́цъ на́шихъ Бо́же, благослове́нъ еси́.

Богоро́диченъ: На́шему смире́нію засту́пница и стѣна́, Богороди́тельнице Чи́стая, Ты́ еси́. Иже раби́ Твои́ су́ще, всегда́ вопіе́мъ Го́сподеви: препѣ́тый оте́цъ на́шихъ Бо́же, благослове́нъ еси́.

Пѣ́снь 8.

Ирмо́съ: Ангели и небеса́, на престо́лѣ сла́вы сѣдя́щаго, и я́ко Бо́га непреста́нно сла́вимаго, благослови́те, по́йте, и превозноси́те Его́ во вѣ́ки.

Ангели небе́съ я́ко служи́теля тя́ воспріе́млютъ, проро́цы и апо́столи я́ко клевре́та срѣта́ютъ, Са́мъ Госпо́дь тебе́ воспріе́млетъ, мы́ же, грѣ́шніи, ми́лости про́симъ.

Вели́ка вла́сть отъ Бо́га вдана́ ти́ е́сть, Нико́лае: мо́ре повину́ется, возду́хъ слу́шаетъ, и язы́цы покаря́ются, ви́дяще пресла́вная твоя́ чудеса́.

Но́вому Изра́илю, христіа́нскому наро́ду, Спа́се, сла́внѣйши Моисе́я показа́лъ еси́ Твоего́ святи́теля Никола́я, отъ всѣ́хъ зо́лъ на́съ избавля́юща.

Богоро́диченъ: Очище́ніе грѣхо́въ я́ко Ма́ти Бо́жія испроси́ и ру́ку ми́ простри́, Госпоже́, погруже́нному во глубинѣ́ неча́янія, да, наде́ждею воста́въ, превозноша́ю Тя́ во вѣ́ки вся́.

Инъ.

Ирмо́съ: Отроки благочести́выя въ пещи́ Рождество́ Богоро́дичо спасло́ е́сть, тогда́ у́бо образу́емое, ны́нѣ же дѣ́йствуемое, вселе́нную всю́ воздвиза́етъ пѣ́ти Тебѣ́: Го́спода по́йте, дѣла́, и превозноси́те Его́ во вся́ вѣ́ки.

Возра́слъ еси́, я́ко цвѣ́тъ благоуха́ненъ, Мѵ́рскія земли́, сла́вне, всѣ́мъ принося́ благоуха́нныя вони́, цѣле́бныя да́ры хва́лящимъ тя́ и пою́щимъ: Го́спода воспѣва́йте, дѣла́, и превозноси́те Его́ во вся́ вѣ́ки.

Иска́павый Бо́жія благода́ти сла́дость, я́ко гора́ ма́сличная еле́й, мо́ре имѣ́лъ еси́ пу́ть, безбѣ́дственъ благода́тію Го́спода, Ему́же сла́дцѣ зове́мъ: Го́спода воспѣва́йте, дѣла́, и превозноси́те Его́ во вся́ вѣ́ки.

Богоро́диченъ: Лико́въ премíрныхъ со удивле́ніемъ ражда́еши и пребыва́еши при́сно Дѣ́ва: Сло́во бо родила́ еси́, Человѣ́ка бы́вша непрело́жна Божество́мъ, Ему́же вси́ пое́мъ: Го́спода воспѣва́йте, дѣла́, и превозноси́те Его́ во вся́ вѣ́ки.

Пѣ́снь 9.

Ирмо́съ: Благослове́нъ Госпо́дь Бо́гъ Изра́илевъ, воздви́гнувый ро́гъ спасе́нія на́мъ въ дому́ Дави́довѣ, Отрока Своего́, въ ни́хже посѣти́ на́съ Восто́къ съ высоты́ и напра́вилъ ны́ е́сть на пу́ть ми́ра.

Благослове́нъ Госпо́дь Бо́гъ на́шъ, я́ко просла́ви святи́теля во страна́хъ, чуде́съ струи́ испуща́юща, въ мѵ́рѣхъ и въ лати́нѣхъ вся́ исцѣля́юща и въ Россíи ми́лостивно посѣща́юща.

Честны́мъ сно́мъ усну́лъ еси́ и тѣ́ло въ Ба́ръ по́льзы ра́ди пусти́лъ еси́, неусы́пный бы́въ засту́пникъ всѣ́мъ, вѣ́рою призыва́ющимъ тя́, моли́твами твои́ми, Нико́лае.

Благослове́нъ небесе́ и земли́ Творе́цъ, Бо́гъ Вседержи́тель, Оте́цъ Безнача́льный и Всеси́льный, и Сы́нъ пре́жде вѣ́къ, отъ нѣ́дръ отрыгнове́нное Сло́во, Имже вся́ бы́ша, я́же о на́съ, и Ду́хъ исходя́й Святы́й: Тро́ице Свята́я, сла́ва Тебѣ́.

Богоро́диченъ: Изви́тіемъ слове́съ по достоя́нію Тя́ похвали́ти не достиза́ю, небе́сныхъ си́лъ пребо́льшу и тва́ри всея́ Честнѣ́йшу, Бо́га и Творца́ поро́ждшую пло́тію. Его́же моли́, Богоро́дице, да поми́луетъ ны́ въ де́нь су́дный.

Инъ.

Ирмо́съ: Вся́къ земноро́дный да взыгра́ется, Ду́хомъ просвѣща́емь, да торжеству́етъ же безпло́тныхъ умо́въ естество́, почита́ющее свяще́нное торжество́ Богома́тере, и да вопіе́тъ: ра́дуйся, Всеблаже́нная Богоро́дице, Чи́стая Приснодѣ́во.

Па́мять твоя́ дне́сь прино́ситъ пра́зднество, апо́стольскій ли́къ и му́ченическій собо́ръ ра́дуется и пра́ведніи ду́си, вѣ́рніи же тя́ пѣ́сньми сла́вимъ, вопію́ще: отъ всѣ́хъ скорбе́й, святи́телю Христо́въ, изба́ви ны́.

Пресла́вная па́мять твоя́ на́мъ возсія́, свѣ́тло просвѣща́ющи вѣ́рныя, святи́телю Христо́въ Нико́лае му́дре. Тѣ́мже мо́лимъ тя́: помяни́ всѣ́хъ на́съ и отъ проти́вныя напа́сти вся́кія моли́твами твои́ми изба́ви.

Богоро́диченъ: Умертви́ на́ша плотскíя стра́сти и по́хоти, Богороди́тельнице Чи́стая, уста́ви и страсте́й на́шихъ бу́рю, утоли́ волне́ніе помысло́въ, укрѣпи́, Благослове́нная Пречи́стая, сердца́ вѣ́рно чту́щихъ Тя́, Засту́пницу.

Свѣти́ленъ. Подо́бенъ: Жены́, услы́шите.

Вели́ка чудеса́ твоя́, пресвяты́й Нико́лае, я́ко яви́лся еси́ во снѣ́ богому́дрому Константи́ну и три́ во́ины спа́слъ еси́, безъ вины́ на сме́рть осужде́нныя. Та́ко и на́съ спаси́ отъ напра́сныя и вѣ́чныя сме́рти, пресвяты́й Нико́лае, святи́телю Госпо́день. [Два́жды.]

Сла́ва, и ны́нѣ, пра́здника.

На хвали́техъ стихи́ры на 4, гла́съ 1. Самогла́сны:

Воззрѣ́въ неукло́нно на высоту́ ра́зума и узрѣ́въ неявле́нныя прему́дрости глубину́, и уче́ніи мíръ обогати́лъ еси́, о́тче. О на́съ при́сно моли́ся Христу́, святи́телю Нико́лае.

Человѣ́че Бо́жій, и вѣ́рный уго́дниче, и строи́телю Того́ та́инъ, и му́жу жела́ній духо́вныхъ, сто́лпе одушевле́нный и вдохнове́нный о́бразъ, я́ко Боже́ственное бо сокро́вище, тя́ Мѵ́рская Це́рковь, чудя́щися, прія́ла е́сть и моли́твенника о душа́хъ на́шихъ.

Гла́съ 2:

Пра́вило вѣ́ры и о́бразъ кро́тости яви́ тебе́ ста́ду твоему́ Христо́съ Бо́гъ, святи́телю Нико́лае: въ Мѵ́рѣхъ у́бо благоуха́ющу ти́ всю́ду сія́ютъ свѣ́тло боже́ственная твоя́ исправле́нія, си́рыхъ и вдови́цъ предста́телю. Тѣ́мже моли́ся непреста́нно спасти́ ду́ши на́ша.

Отче Нико́лае, мѵрополо́жница моще́й твои́хъ Мѵ́ры обогаща́етъ, въ ни́хже и свя́занныя непра́ведно осужде́нныя, во снѣ́ царю́ я́влься, и твои́мъ явле́ніемъ свободи́лъ еси́ отъ сме́рти, и у́зъ, и темни́цы, но и ны́нѣ, я́коже тогда́, и при́сно явле́ніемъ твои́мъ яви́ся, моля́й о душа́хъ на́шихъ.

Сла́ва, гла́съ 5:

Востру́бимъ трубо́ю пѣ́сней, взыгра́емъ пра́зднственная и ликовству́емъ, ра́дующеся, въ моле́бное торжество́ богоно́снаго отца́, цари́ и кня́зи да стеку́тся, и́же со́ннымъ стра́шнымъ явле́ніемъ царя́ препира́юща непови́нно держи́мыя три́ отпусти́ти воево́ды. Да воспою́тъ па́стыри и учи́тели, До́брому Па́стырю подобноревни́тельна па́стыря, соше́дшеся, восхва́лимъ, и́же въ неду́зехъ — врача́, въ бѣда́хъ — изба́вителя, грѣ́шніи — засту́пника, ни́щіи — сокро́вище и и́же въ ско́рбехъ — утѣ́шителя, спу́тника — путеше́ствующіи, на мо́ри су́щіи — прави́теля и вси́ вездѣ́ те́плѣ предваря́юща. Вели́каго святи́теля восхваля́юще, си́це рце́мъ: пресвяты́й Нико́лае, предвари́, и изба́ви на́съ отъ настоя́щія бѣды́, и спаси́ ста́до твое́ моли́твами твои́ми.

И ны́нѣ, пра́здника.

По трисвято́мъ тропа́рь свята́го. Сла́ва, и ны́нѣ, пра́здника. Славосло́віе вели́кое. Ектеніи́ и отпу́стъ. Зна́менуются же бра́тія святы́мъ еле́емъ отъ канди́ла свята́го. И ча́съ 1-й, и коне́чный отпу́стъ.


НА ЛИТУРГІИ,

Блаже́нна отъ кано́на пра́здника, пѣ́снь рядова́я и свята́го пѣ́снь 3-я, на 4. Проки́менъ, гла́съ 7: Восхва́лятся преподо́бніи во сла́вѣ и возра́дуются на ло́жахъ свои́хъ. Сти́хъ: Воспо́йте Го́сподеви пѣ́снь но́ву, я́ко ди́вна сотвори́ Госпо́дь. Апо́столъ ко Евре́емъ, зача́ло 335. Аллилу́ія, гласъ 2: Свяще́нницы Твои́ облеку́тся въ пра́вду, и преподо́бніи Твои́ возра́дуются. Ева́нгеліе Луки́ зача́ло 24. Прича́стенъ: Въ па́мять вѣ́чную [бу́детъ пра́ведникъ отъ слу́ха зла́ не убои́тся].

Источникъ: Минíа, мѣ́сяцъ Ма́ій. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 62 – 71.

/ Къ оглавленію раздѣла /


Наверхъ / Къ титульной страницѣ

0